੨. ਭੂਤਗਾਮਵਗ੍ਗੋ

੧. ਭੂਤਗਾਮਸਿਕ੍ਖਾਪਦਵਣ੍ਣਨਾ

੮੯. ਸੇਨਾਸਨਵਗ੍ਗਸ੍ਸ ਪਠਮਸਿਕ੍ਖਾਪਦੇ – ਅਨਾਦਿਯਨ੍ਤੋਤਿ ਤਸ੍ਸਾ ਵਚਨਂ ਅਗਣ੍ਹਨ੍ਤੋ. ਦਾਰਕਸ੍ਸ ਬਾਹੁਂ ਆਕੋਟੇਸੀਤਿ ਉਕ੍ਖਿਤ੍ਤਂ ਫਰਸੁਂ ਨਿਗ੍ਗਹੇਤੁਂ ਅਸਕ੍ਕੋਨ੍ਤੋ ਮਨੁਸ੍ਸਾਨਂ ਚਕ੍ਖੁਵਿਸਯਾਤੀਤੇ ਮਹਾਰਾਜਸਨ੍ਤਿਕਾ ਲਦ੍ਧੇ ਰੁਕ੍ਖਟ੍ਠਕਦਿਬ੍ਬਵਿਮਾਨੇ ਨਿਪਨ੍ਨਸ੍ਸ ਦਾਰਕਸ੍ਸ ਬਾਹੁਂ ਥਨਮੂਲੇਯੇਵ ਛਿਨ੍ਦਿ. ਨ ਖੋ ਮੇਤਂ ਪਤਿਰੂਪਨ੍ਤਿਆਦਿਮ੍ਹਿ ਅਯਂ ਸਙ੍ਖੇਪਵਣ੍ਣਨਾ – ਹਿਮਵਨ੍ਤੇ ਕਿਰ ਪਕ੍ਖਦਿਵਸੇਸੁ ਦੇਵਤਾਸਨ੍ਨਿਪਾਤੋ ਹੋਤਿ, ਤਤ੍ਥ ਰੁਕ੍ਖਧਮ੍ਮਂ ਪੁਚ੍ਛਨ੍ਤਿ – ‘‘ਤ੍ਵਂ ਰੁਕ੍ਖਧਮ੍ਮੇ ਠਿਤਾ ਨ ਠਿਤਾ’’ਤਿ? ਰੁਕ੍ਖਧਮ੍ਮੋ ਨਾਮ ਰੁਕ੍ਖੇ ਛਿਜ੍ਜਮਾਨੇ ਰੁਕ੍ਖਦੇਵਤਾਯ ਮਨੋਪਦੋਸਸ੍ਸ ਅਕਰਣਂ. ਤਤ੍ਥ ਯਾ ਦੇਵਤਾ ਰੁਕ੍ਖਧਮ੍ਮੇ ਅਟ੍ਠਿਤਾ ਹੋਤਿ, ਸਾ ਦੇਵਤਾਸਨ੍ਨਿਪਾਤਂ ਪਵਿਸਿਤੁਂ ਨ ਲਭਤਿ. ਇਤਿ ਸਾ ਦੇਵਤਾ ਇਮਞ੍ਚ ਰੁਕ੍ਖਧਮ੍ਮੇ ਅਟ੍ਠਾਨਪਚ੍ਚਯਂ ਆਦੀਨਵਂ ਅਦ੍ਦਸ, ਭਗਵਤੋ ਚ ਸਮ੍ਮੁਖਾ ਸੁਤਪੁਬ੍ਬਧਮ੍ਮਦੇਸਨਾਨੁਸਾਰੇਨ ਤਥਾਗਤਸ੍ਸ ਛਦ੍ਦਨ੍ਤਾਦਿਕਾਲੇ ਪੁਬ੍ਬਚਰਿਤਂ ਅਨੁਸ੍ਸਰਿ. ਤੇਨਸ੍ਸਾ ਏਤਦਹੋਸਿ – ‘‘ਨ ਖੋ ਮੇਤਂ ਪਤਿਰੂਪਂ…ਪੇ… ਵੋਰੋਪੇਯ੍ਯ’’ਨ੍ਤਿ. ਯਂਨੂਨਾਹਂ ਭਗਵਤੋ ਏਤਮਤ੍ਥਂ ਆਰੋਚੇਯ੍ਯਨ੍ਤਿ ਇਦਂ ਪਨਸ੍ਸਾ ‘‘ਅਯਂ ਭਿਕ੍ਖੁ ਸਪਿਤਿਕੋ ਪੁਤ੍ਤੋ, ਅਦ੍ਧਾ ਭਗਵਾ ਇਮਂ ਇਮਸ੍ਸ ਅਜ੍ਝਾਚਾਰਂ ਸੁਤ੍ਵਾ ਮਰਿਯਾਦਂ ਬਨ੍ਧਿਸ੍ਸਤਿ, ਸਿਕ੍ਖਾਪਦਂ ਪਞ੍ਞਪੇਸ੍ਸਤੀ’’ਤਿ ਪਟਿਸਞ੍ਚਿਕ੍ਖਨ੍ਤਿਯਾ ਅਹੋਸਿ. ਸਚਜ੍ਜ ਤ੍ਵਂ ਦੇਵਤੇਤਿ ਸਚੇ ਅਜ੍ਜ ਤ੍ਵਂ ਦੇਵਤੇ. ਪਸਵੇਯ੍ਯਾਸੀਤਿ ਜਨੇਯ੍ਯਾਸਿ ਉਪ੍ਪਾਦੇਯ੍ਯਾਸਿ. ਏਵਞ੍ਚ ਪਨ ਵਤ੍ਵਾ ਭਗਵਾ ਤਂ ਦੇਵਤਂ ਸਞ੍ਞਾਪੇਨ੍ਤੋ –

‘‘ਯੋ ਵੇ ਉਪ੍ਪਤਿਤਂ ਕੋਧਂ, ਰਥਂ ਭਨ੍ਤਂਵ ਵਾਰਯੇ;

ਤਮਹਂ ਸਾਰਥਿਂ ਬ੍ਰੂਮਿ, ਰਸ੍ਮਿਗ੍ਗਾਹੋ ਇਤਰੋ ਜਨੋ’’ਤਿ. (ਧ. ਪ. ੨੨੨);

ਇਮਂ ਗਾਥਮਭਾਸਿ. ਗਾਥਾਪਰਿਯੋਸਾਨੇ ਸਾ ਦੇਵਤਾ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ. ਪੁਨ ਭਗਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਨ੍ਤੋ –

‘‘ਯੋ ਉਪ੍ਪਤਿਤਂ ਵਿਨੇਤਿ ਕੋਧਂ, ਵਿਸਟਂ ਸਪ੍ਪਵਿਸਂਵ ਓਸਧੇਹਿ;

ਸੋ ਭਿਕ੍ਖੁ ਜਹਾਤਿ ਓਰਪਾਰਂ, ਉਰਗੋ ਜਿਣ੍ਣਮਿਵਤ੍ਤਚਂ ਪੁਰਾਣ’’ਨ੍ਤਿ. (ਸੁ. ਨਿ. ੧);

ਇਮਂ ਗਾਥਮਭਾਸਿ. ਤਤ੍ਰ ਪਠਮਗਾਥਾ ਧਮ੍ਮਪਦੇ ਸਙ੍ਗਹਂ ਆਰੁਲ਼੍ਹਾ, ਦੁਤਿਯਾ ਸੁਤ੍ਤਨਿਪਾਤੇ, ਵਤ੍ਥੁ ਪਨ ਵਿਨਯੇਤਿ. ਅਥ ਭਗਵਾ ਧਮ੍ਮਂ ਦੇਸੇਨ੍ਤੋਯੇਵ ਤਸ੍ਸਾ ਦੇਵਤਾਯ ਵਸਨਟ੍ਠਾਨਂ ਆਵਜ੍ਜਨ੍ਤੋ ਪਤਿਰੂਪਂ ਠਾਨਂ ਦਿਸ੍ਵਾ ‘‘ਗਚ੍ਛ, ਦੇਵਤੇ, ਅਸੁਕਸ੍ਮਿਂ ਓਕਾਸੇ ਰੁਕ੍ਖੋ ਵਿਵਿਤ੍ਤੋ, ਤਸ੍ਮਿਂ ਉਪਗਚ੍ਛਾ’’ਤਿ ਆਹ. ਸੋ ਕਿਰ ਰੁਕ੍ਖੋ ਨ ਆਲ਼ਵਿਰਟ੍ਠੇ, ਜੇਤਵਨਸ੍ਸ ਅਨ੍ਤੋਪਰਿਕ੍ਖੇਪੇ, ਯਸ੍ਸ ਦੇਵਪੁਤ੍ਤਸ੍ਸ ਪਰਿਗ੍ਗਹੋ ਅਹੋਸਿ, ਸੋ ਚੁਤੋ; ਤਸ੍ਮਾ ‘‘ਵਿਵਿਤ੍ਤੋ’’ਤਿ ਵੁਤ੍ਤੋ. ਤਤੋ ਪਟ੍ਠਾਯ ਚ ਪਨ ਸਾ ਦੇਵਤਾ ਸਮ੍ਮਾਸਮ੍ਬੁਦ੍ਧਤੋ ਲਦ੍ਧਪਰਿਹਾਰਾ ਬੁਦ੍ਧੁਪਟ੍ਠਾਯਿਕਾ ਅਹੋਸਿ. ਯਦਾ ਦੇਵਤਾਸਮਾਗਮੋ ਹੋਤਿ, ਤਦਾ ਮਹੇਸਕ੍ਖਦੇਵਤਾਸੁ ਆਗਚ੍ਛਨ੍ਤੀਸੁ ਅਞ੍ਞਾ ਅਪ੍ਪੇਸਕ੍ਖਾ ਦੇਵਤਾ ਯਾਵ ਮਹਾਸਮੁਦ੍ਦਚਕ੍ਕਵਾਲ਼ਪਬ੍ਬਤਾ ਤਾਵ ਪਟਿਕ੍ਕਮਨ੍ਤਿ. ਅਯਂ ਪਨ ਅਤ੍ਤਨੋ ਵਸਨਟ੍ਠਾਨੇ ਨਿਸੀਦਿਤ੍ਵਾਵ ਧਮ੍ਮਂ ਸੁਣਾਤਿ. ਯਮ੍ਪਿ ਪਠਮਯਾਮੇ ਭਿਕ੍ਖੂ ਪਞ੍ਹਂ ਪੁਚ੍ਛਨ੍ਤਿ, ਮਜ੍ਝਿਮਯਾਮੇ ਦੇਵਤਾ, ਤਂ ਸਬ੍ਬਂ ਤਤ੍ਥੇਵ ਨਿਸੀਦਿਤ੍ਵਾ ਸੁਣਾਤਿ. ਚਤ੍ਤਾਰੋ ਚ ਮਹਾਰਾਜਾਨੋਪਿ ਭਗਵਤੋ ਉਪਟ੍ਠਾਨਂ ਆਗਨ੍ਤ੍ਵਾ ਗਚ੍ਛਨ੍ਤਾ ਤਂ ਦੇਵਤਂ ਦਿਸ੍ਵਾਵ ਗਚ੍ਛਨ੍ਤਿ.

੯੦. ਭੂਤਗਾਮਪਾਤਬ੍ਯਤਾਯਾਤਿ ਏਤ੍ਥ ਭਵਨ੍ਤਿ ਅਹੁਵੁਞ੍ਚਾਤਿ ਭੂਤਾ; ਜਾਯਨ੍ਤਿ ਵਡ੍ਢਨ੍ਤਿ ਜਾਤਾ ਵਡ੍ਢਿਤਾ ਚਾਤਿ ਅਤ੍ਥੋ. ਗਾਮੋਤਿ ਰਾਸਿ; ਭੂਤਾਨਂ ਗਾਮੋਤਿ ਭੂਤਗਾਮੋ; ਭੂਤਾ ਏਵ ਵਾ ਗਾਮੋ ਭੂਤਗਾਮੋ; ਪਤਿਟ੍ਠਿਤਹਰਿਤਤਿਣਰੁਕ੍ਖਾਦੀਨਮੇਤਂ ਅਧਿਵਚਨਂ. ਪਾਤਬ੍ਯਸ੍ਸ ਭਾਵੋ ਪਾਤਬ੍ਯਤਾ; ਛੇਦਨਭੇਦਨਾਦੀਹਿ ਯਥਾਰੁਚਿ ਪਰਿਭੁਞ੍ਜਿਤਬ੍ਬਤਾਤਿ ਅਤ੍ਥੋ. ਤਸ੍ਸਾ ਭੂਤਗਾਮਪਾਤਬ੍ਯਤਾਯ; ਨਿਮਿਤ੍ਤਤ੍ਥੇ ਭੁਮ੍ਮਵਚਨਂ, ਭੂਤਗਾਮਪਾਤਬ੍ਯਤਾਹੇਤੁ, ਭੂਤਗਾਮਸ੍ਸ ਛੇਦਨਾਦਿਪਚ੍ਚਯਾ ਪਾਚਿਤ੍ਤਿਯਨ੍ਤਿ ਅਤ੍ਥੋ.

੯੧. ਇਦਾਨਿ ਤਂ ਭੂਤਗਾਮਂ ਵਿਭਜਿਤ੍ਵਾ ਦਸ੍ਸੇਨ੍ਤੋ ਭੂਤਗਾਮੋ ਨਾਮ ਪਞ੍ਚ ਬੀਜਜਾਤਾਨੀਤਿਆਦਿਮਾਹ. ਤਤ੍ਥ ਭੂਤਗਾਮੋ ਨਾਮਾਤਿ ਭੂਤਗਾਮਂ ਉਦ੍ਧਰਿਤ੍ਵਾ ਯਸ੍ਮਿਂ ਸਤਿ ਭੂਤਗਾਮੋ ਹੋਤਿ, ਤਂ ਦਸ੍ਸੇਤੁਂ ‘‘ਪਞ੍ਚ ਬੀਜਜਾਤਾਨੀ’’ਤਿ ਆਹਾਤਿ ਅਟ੍ਠਕਥਾਸੁ ਵੁਤ੍ਤਂ. ਏਵਂ ਸਨ੍ਤੇਪਿ ‘‘ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਮੂਲੇ ਜਾਯਨ੍ਤੀ’’ਤਿਆਦੀਨਿ ਨ ਸਮੇਨ੍ਤਿ. ਨ ਹਿ ਮੂਲਬੀਜਾਦੀਨਿ ਮੂਲਾਦੀਸੁ ਜਾਯਨ੍ਤਿ, ਮੂਲਾਦੀਸੁ ਜਾਯਮਾਨਾਨਿ ਪਨ ਤਾਨਿ ਬੀਜਾਕਤਾਨਿ, ਤਸ੍ਮਾ ਏਵਮੇਤ੍ਥ ਵਣ੍ਣਨਾ ਵੇਦਿਤਬ੍ਬਾ – ਭੂਤਗਾਮੋ ਨਾਮਾਤਿ ਵਿਭਜਿਤਬ੍ਬਪਦਂ. ਪਞ੍ਚਾਤਿ ਤਸ੍ਸ ਵਿਭਾਗਪਰਿਚ੍ਛੇਦੋ. ਬੀਜਜਾਤਾਨੀਤਿ ਪਰਿਚ੍ਛਿਨ੍ਨਧਮ੍ਮਨਿਦਸ੍ਸਨਂ. ਤਸ੍ਸਤ੍ਥੋ – ਬੀਜੇਹਿ ਜਾਤਾਨਿ ਬੀਜਜਾਤਾਨਿ; ਰੁਕ੍ਖਾਦੀਨਮੇਤਂ ਅਧਿਵਚਨਂ. ਅਪਰੋ ਨਯੋ – ਬੀਜਾਨਿ ਚ ਤਾਨਿ ਵਿਜਾਤਾਨਿ ਚ ਪਸੂਤਾਨਿ ਨਿਬ੍ਬਤ੍ਤਪਣ੍ਣਮੂਲਾਨੀਤਿ ਬੀਜਜਾਤਾਨਿ. ਏਤੇਨ ਅਲ੍ਲਵਾਲਿਕਾਦੀਸੁ ਠਪਿਤਾਨਂ ਨਿਬ੍ਬਤ੍ਤਪਣ੍ਣਮੂਲਾਨਂ ਸਿਙ੍ਗਿਵੇਰਾਦੀਨਂ ਸਙ੍ਗਹੋ ਕਤੋ ਹੋਤਿ.

ਇਦਾਨਿ ਯੇਹਿ ਬੀਜੇਹਿ ਜਾਤਤ੍ਤਾ ਰੁਕ੍ਖਾਦੀਨਿ ਬੀਜਜਾਤਾਨੀਤਿ ਵੁਤ੍ਤਾਨਿ, ਤਾਨਿ ਦਸ੍ਸੇਨ੍ਤੋ ‘‘ਮੂਲਬੀਜ’’ਨ੍ਤਿਆਦਿਮਾਹ. ਤੇਸਂ ਉਦ੍ਦੇਸੋ ਪਾਕਟੋ ਏਵ. ਨਿਦ੍ਦੇਸੇ ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਮੂਲੇ ਜਾਯਨ੍ਤਿ ਮੂਲੇ ਸਞ੍ਜਾਯਨ੍ਤੀਤਿ ਏਤ੍ਥ ਬੀਜਤੋ ਨਿਬ੍ਬਤ੍ਤੇਨ ਬੀਜਂ ਦਸ੍ਸਿਤਂ, ਤਸ੍ਮਾ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ, ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਆਲੁਵਕਸੇਰੁਕਮਲੁਪ੍ਪਲਪੁਣ੍ਡਰੀਕਕੁਵਲਯਕਨ੍ਦਪਾਟਲਿਮੂਲਾਦਿਭੇਦੇ ਮੂਲੇ ਗਚ੍ਛਵਲ੍ਲਿਰੁਕ੍ਖਾਦੀਨਿ ਜਾਯਨ੍ਤਿ ਸਞ੍ਜਾਯਨ੍ਤਿ, ਤਾਨਿ ਯਮ੍ਹਿ ਮੂਲੇ ਜਾਯਨ੍ਤਿ ਚੇਵ ਸਞ੍ਜਾਯਨ੍ਤਿ ਚ ਤਞ੍ਚ, ਪਾਲ਼ਿਯਂ ਵੁਤ੍ਤਂ ਹਲਿਦ੍ਦਾਦਿ ਚ ਸਬ੍ਬਮ੍ਪਿ ਏਤਂ ਮੂਲਬੀਜਂ ਨਾਮ. ਏਸੇਵ ਨਯੋ ਖਨ੍ਧਬੀਜਾਦੀਸੁ. ਯੇਵਾਪਨਕਖਨ੍ਧਬੀਜੇਸੁ ਪਨੇਤ੍ਥ ਅਮ੍ਬਾਟਕਇਨ੍ਦਸਾਲਨੁਹੀਪਾਲ਼ਿਭਦ੍ਦਕਣਿਕਾਰਾਦੀਨਿ ਖਨ੍ਧਬੀਜਾਨਿ, ਅਮੂਲਵਲ੍ਲਿ ਚਤੁਰਸ੍ਸਵਲ੍ਲਿਕਣਵੀਰਾਦੀਨਿ ਫਲ਼ੁਬੀਜਾਨਿ ਮਕਚਿਸੁਮਨਜਯਸੁਮਨਾਦੀਨਿ ਅਗ੍ਗਬੀਜਾਨਿ, ਅਮ੍ਬਜਮ੍ਬੂਪਨਸਟ੍ਠਿਆਦੀਨਿ ਬੀਜਬੀਜਾਨੀਤਿ ਦਟ੍ਠਬ੍ਬਾਨਿ.

੯੨. ਇਦਾਨਿ ਯਂ ਵੁਤ੍ਤਂ ‘‘ਭੂਤਗਾਮਪਾਤਬ੍ਯਤਾਯ ਪਾਚਿਤ੍ਤਿਯ’’ਨ੍ਤਿ ਤਤ੍ਥ ਸਞ੍ਞਾਵਸੇਨ ਆਪਤ੍ਤਾਨਾਪਤ੍ਤਿਭੇਦਂ ਪਾਤਬ੍ਯਤਾਭੇਦਞ੍ਚ ਦਸ੍ਸੇਨ੍ਤੋ ਬੀਜੇ ਬੀਜਸਞ੍ਞੀਤਿਆਦਿਮਾਹ. ਤਤ੍ਥ ਯਥਾ ‘‘ਸਾਲੀਨਂ ਚੇਪਿ ਓਦਨਂ ਭੁਞ੍ਜਤੀ’’ਤਿਆਦੀਸੁ (ਮ. ਨਿ. ੧.੭੬) ਸਾਲਿਤਣ੍ਡੁਲਾਨਂ ਓਦਨੋ ‘‘ਸਾਲੀਨਂ ਓਦਨੋ’’ਤਿ ਵੁਚ੍ਚਤਿ, ਏਵਂ ਬੀਜਤੋ ਸਮ੍ਭੂਤੋ ਭੂਤਗਾਮੋ ‘‘ਬੀਜ’’ਨ੍ਤਿ ਵੁਤ੍ਤੋਤਿ ਵੇਦਿਤਬ੍ਬੋ. ਯਂ ਪਨ ‘‘ਬੀਜਗਾਮਭੂਤਗਾਮਸਮਾਰਮ੍ਭਾ ਪਟਿਵਿਰਤੋ’’ਤਿਆਦੀਸੁ (ਦੀ. ਨਿ. ੧.੧੦) ਵੁਤ੍ਤਂ ਭੂਤਗਾਮਪਰਿਮੋਚਨਂ ਕਤ੍ਵਾ ਠਪਿਤਂ ਬੀਜਂ, ਤਂ ਦੁਕ੍ਕਟਵਤ੍ਥੁ. ਅਥ ਵਾ ਯਦੇਤਂ ‘‘ਭੂਤਗਾਮੋ ਨਾਮਾ’’ਤਿ ਸਿਕ੍ਖਾਪਦਵਿਭਙ੍ਗਸ੍ਸ ਆਦਿਪਦਂ, ਤੇਨ ਸਦ੍ਧਿਂ ਯੋਜੇਤ੍ਵਾ ਯਂ ਬੀਜਂ ਭੂਤਗਾਮੋ ਨਾਮ ਹੋਤਿ, ਤਸ੍ਮਿਂ ਬੀਜੇ ਬੀਜਸਞ੍ਞੀ ਸਤ੍ਥਕਾਦੀਨਿ ਗਹੇਤ੍ਵਾ ਸਯਂ ਵਾ ਛਿਨ੍ਦਤਿ ਅਞ੍ਞੇਨ ਵਾ ਛੇਦਾਪੇਤਿ, ਪਾਸਾਣਾਦੀਨਿ ਗਹੇਤ੍ਵਾ ਸਯਂ ਵਾ ਭਿਨ੍ਦਤਿ ਅਞ੍ਞੇਨ ਵਾ ਭੇਦਾਪੇਤਿ, ਅਗ੍ਗਿਂ ਉਪਸਂਹਰਿਤ੍ਵਾ ਸਯਂ ਵਾ ਪਚਤਿ ਅਞ੍ਞੇਨ ਵਾ ਪਚਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਯਥਾਰੁਤਂ ਪਨ ਗਹੇਤ੍ਵਾ ਭੂਤਗਾਮਵਿਨਿਮੁਤ੍ਤਸ੍ਸ ਬੀਜਸ੍ਸ ਛਿਨ੍ਦਨਾਦਿਭੇਦਾਯ ਪਾਤਬ੍ਯਤਾਯ ਪਾਚਿਤ੍ਤਿਯਂ ਨ ਵਤ੍ਤਬ੍ਬਂ.

ਅਯਞ੍ਹੇਤ੍ਥ ਵਿਨਿਚ੍ਛਯਕਥਾ – ਭੂਤਗਾਮਂ ਵਿਕੋਪੇਨ੍ਤਸ੍ਸ ਪਾਚਿਤ੍ਤਿਯਂ ਭੂਤਗਾਮਪਰਿਮੋਚਿਤਂ ਪਞ੍ਚਵਿਧਮ੍ਪਿ ਬੀਜਗਾਮਂ ਵਿਕੋਪੇਨ੍ਤਸ੍ਸ ਦੁਕ੍ਕਟਂ. ਬੀਜਗਾਮਭੂਤਗਾਮੋ ਨਾਮੇਸ ਅਤ੍ਥਿ ਉਦਕਟ੍ਠੋ, ਅਤ੍ਥਿ ਥਲਟ੍ਠੋ. ਤਤ੍ਥ ਉਦਕਟ੍ਠੋ ਸਾਸਪਮਤ੍ਤਿਕਾ ਤਿਲਬੀਜਕਾਦਿਭੇਦਾ ਸਪਣ੍ਣਿਕਾ ਅਪਣ੍ਣਿਕਾ ਚ ਸਬ੍ਬਾ ਸੇਵਾਲਜਾਤਿ ਅਨ੍ਤਮਸੋ ਉਦਕਪਪ੍ਪਟਕਂ ਉਪਾਦਾਯ ‘‘ਭੂਤਗਾਮੋ’’ਤਿ ਵੇਦਿਤਬ੍ਬੋ. ਉਦਕਪਪ੍ਪਟਕੋ ਨਾਮ ਉਪਰਿ ਥਦ੍ਧੋ ਫਰੁਸਵਣ੍ਣੋ, ਹੇਟ੍ਠਾ ਮੁਦੁ ਨੀਲਵਣ੍ਣੋ ਹੋਤਿ. ਤਤ੍ਥ ਯਸ੍ਸ ਸੇਵਾਲਸ੍ਸ ਮੂਲਂ ਓਰੂਹਿਤ੍ਵਾ ਪਥਵਿਯਂ ਪਤਿਟ੍ਠਿਤਂ, ਤਸ੍ਸ ਪਥਵੀ ਠਾਨਂ. ਯੋ ਉਦਕੇ ਸਞ੍ਚਰਤਿ, ਤਸ੍ਸ ਉਦਕਂ. ਪਥਵਿਯਂ ਪਤਿਟ੍ਠਿਤਂ ਯਤ੍ਥ ਕਤ੍ਥਚਿ ਵਿਕੋਪੇਨ੍ਤਸ੍ਸ ਉਦ੍ਧਰਿਤ੍ਵਾ ਵਾ ਠਾਨਨ੍ਤਰਂ ਸਙ੍ਕਾਮੇਨ੍ਤਸ੍ਸ ਪਾਚਿਤ੍ਤਿਯਂ. ਉਦਕੇ ਸਞ੍ਚਰਨ੍ਤਂ ਵਿਕੋਪੇਨ੍ਤਸ੍ਸੇਵ ਪਾਚਿਤ੍ਤਿਯਂ. ਹਤ੍ਥੇਹਿ ਪਨ ਇਤੋ ਚਿਤੋ ਚ ਵਿਯੂਹਿਤ੍ਵਾ ਨ੍ਹਾਯਿਤੁਂ ਵਟ੍ਟਤਿ, ਸਕਲਞ੍ਹਿ ਉਦਕਂ ਤਸ੍ਸ ਠਾਨਂ. ਤਸ੍ਮਾ ਨ ਸੋ ਏਤ੍ਤਾਵਤਾ ਠਾਨਨ੍ਤਰਂ ਸਙ੍ਕਾਮਿਤੋ ਹੋਤਿ. ਉਦਕਤੋ ਪਨ ਉਦਕੇਨ ਵਿਨਾ ਸਞ੍ਚਿਚ੍ਚ ਉਕ੍ਖਿਪਿਤੁਂ ਨ ਵਟ੍ਟਤਿ, ਉਦਕੇਨ ਸਦ੍ਧਿਂ ਉਕ੍ਖਿਪਿਤ੍ਵਾ ਪੁਨ ਉਦਕੇ ਪਕ੍ਖਿਪਿਤੁਂ ਵਟ੍ਟਤਿ. ਪਰਿਸ੍ਸਾਵਨਨ੍ਤਰੇਨ ਨਿਕ੍ਖਮਤਿ, ਕਪ੍ਪਿਯਂ ਕਾਰਾਪੇਤ੍ਵਾਵ ਉਦਕਂ ਪਰਿਭੁਞ੍ਜਿਤਬ੍ਬਂ. ਉਪ੍ਪਲਿਨੀਪਦੁਮਿਨੀਆਦੀਨਿ ਜਲਜਵਲ੍ਲਿਤਿਣਾਨਿ ਉਦਕਤੋ ਉਦ੍ਧਰਨ੍ਤਸ੍ਸ ਵਾ ਤਤ੍ਥੇਵ ਵਿਕੋਪੇਨ੍ਤਸ੍ਸ ਵਾ ਪਾਚਿਤ੍ਤਿਯਂ. ਪਰੇਹਿ ਉਪ੍ਪਾਟਿਤਾਨਿ ਵਿਕੋਪੇਨ੍ਤਸ੍ਸ ਦੁਕ੍ਕਟਂ. ਤਾਨਿ ਹਿ ਬੀਜਗਾਮੇ ਸਙ੍ਗਹਂ ਗਚ੍ਛਨ੍ਤਿ. ਤਿਲਬੀਜਕਸਾਸਪਮਤ੍ਤਕਸੇਵਾਲੋਪਿ ਉਦਕਤੋ ਉਦ੍ਧਤੋ ਅਮਿਲਾਤੋ ਅਗ੍ਗਬੀਜਸਙ੍ਗਹਂ ਗਚ੍ਛਤਿ. ਮਹਾਪਚ੍ਚਰਿਯਾਦੀਸੁ ‘‘ਅਨਨ੍ਤਕਤਿਲਬੀਜਕਉਦਕਪਪ੍ਪਟਕਾਦੀਨਿ ਦੁਕ੍ਕਟਵਤ੍ਥੁਕਾਨੀ’’ਤਿ ਵੁਤ੍ਤਂ, ਤਤ੍ਥ ਕਾਰਣਂ ਨ ਦਿਸ੍ਸਤਿ. ਅਨ੍ਧਕਟ੍ਠਕਥਾਯਂ ‘‘ਸਮ੍ਪੁਣ੍ਣਭੂਤਗਾਮੋ ਨ ਹੋਤਿ, ਤਸ੍ਮਾ ਦੁਕ੍ਕਟ’’ਨ੍ਤਿ ਵੁਤ੍ਤਂ, ਤਮ੍ਪਿ ਨ ਸਮੇਤਿ, ਭੂਤਗਾਮੇ ਹਿ ਪਾਚਿਤ੍ਤਿਯਂ, ਬੀਜਗਾਮੇ ਦੁਕ੍ਕਟਂ ਵੁਤ੍ਤਂ. ਅਸਮ੍ਪੁਣ੍ਣਭੂਤਗਾਮੋ ਨਾਮ ਤਤਿਯੋ ਕੋਟ੍ਠਾਸੋ ਨੇਵ ਪਾਲ਼ਿਯਂ ਨ ਅਟ੍ਠਕਥਾਸੁ ਆਗਤੋ. ਅਥ ਏਤਂ ਬੀਜਗਾਮਸਙ੍ਗਹਂ ਗਚ੍ਛਿਸ੍ਸਤੀਤਿ, ਤਮ੍ਪਿ ਨ ਯੁਤ੍ਤਂ, ਅਭੂਤਗਾਮਮੂਲਤ੍ਤਾ ਤਾਦਿਸਸ੍ਸ ਬੀਜਗਾਮਸ੍ਸਾਤਿ. ਅਪਿਚ ‘‘ਗਰੁਕਲਹੁਕੇਸੁ ਗਰੁਕੇ ਠਾਤਬ੍ਬ’’ਨ੍ਤਿ ਏਤਂ ਵਿਨਯਲਕ੍ਖਣਂ.

ਥਲਟ੍ਠੇ – ਛਿਨ੍ਨਰੁਕ੍ਖਾਨਂ ਅਵਸਿਟ੍ਠੋ ਹਰਿਤਖਾਣੁ ਨਾਮ ਹੋਤਿ. ਤਤ੍ਥ ਕਕੁਧਕਰਞ੍ਜਪਿਯਙ੍ਗੁਪਨਸਾਦੀਨਂ ਖਾਣੁ ਉਦ੍ਧਂ ਵਡ੍ਢਤਿ, ਸੋ ਭੂਤਗਾਮੇਨ ਸਙ੍ਗਹਿਤੋ. ਤਾਲਨਾਲ਼ਿਕੇਰਾਦੀਨਂ ਖਾਣੁ ਉਦ੍ਧਂ ਨ ਵਡ੍ਢਤਿ, ਸੋ ਬੀਜਗਾਮੇਨ ਸਙ੍ਗਹਿਤੋ. ਕਦਲਿਯਾ ਪਨ ਅਫਲਿਤਾਯ ਖਾਣੁ ਭੂਤਗਾਮੇਨ ਸਙ੍ਗਹਿਤੋ, ਫਲਿਤਾਯ ਬੀਜਗਾਮੇਨ. ਕਦਲੀ ਪਨ ਫਲਿਤਾ ਯਾਵ ਨੀਲਪਣ੍ਣਾ, ਤਾਵ ਭੂਤਗਾਮੇਨੇਵ ਸਙ੍ਗਹਿਤਾ, ਤਥਾ ਫਲਿਤੋ ਵੇਲ਼ੁ. ਯਦਾ ਪਨ ਅਗ੍ਗਤੋ ਪਟ੍ਠਾਯ ਸੁਸ੍ਸਤਿ, ਤਦਾ ਬੀਜਗਾਮੇਨ ਸਙ੍ਗਹਂ ਗਚ੍ਛਤਿ. ਕਤਰਬੀਜਗਾਮੇਨ? ਫਲ਼ੁਬੀਜਗਾਮੇਨ. ਕਿਂ ਤਤੋ ਨਿਬ੍ਬਤ੍ਤਤਿ? ਨ ਕਿਞ੍ਚਿ. ਯਦਿ ਹਿ ਨਿਬ੍ਬਤ੍ਤੇਯ੍ਯ, ਭੂਤਗਾਮੇਨੇਵ ਸਙ੍ਗਹਂ ਗਚ੍ਛੇਯ੍ਯ. ਇਨ੍ਦਸਾਲਾਦਿਰੁਕ੍ਖੇ ਛਿਨ੍ਦਿਤ੍ਵਾ ਰਾਸਿਂ ਕਰੋਨ੍ਤਿ, ਕਿਞ੍ਚਾਪਿ ਰਾਸਿਕਤਦਣ੍ਡਕੇਹਿ ਰਤਨਪ੍ਪਮਾਣਾਪਿ ਸਾਖਾ ਨਿਕ੍ਖਮਨ੍ਤਿ, ਬੀਜਗਾਮੇਨੇਵ ਸਙ੍ਗਹਂ ਗਚ੍ਛਨ੍ਤਿ. ਤਤ੍ਥ ਮਣ੍ਡਪਤ੍ਥਾਯ ਵਾ ਵਤਿਅਤ੍ਥਾਯ ਵਾ ਵਲ੍ਲਿਆਰੋਪਨਤ੍ਥਾਯ ਵਾ ਭੂਮਿਯਂ ਨਿਖਣਨ੍ਤਿ, ਮੂਲੇਸੁ ਚੇਵ ਪਣ੍ਣੇਸੁ ਚ ਨਿਗ੍ਗਤੇਸੁ ਪੁਨ ਭੂਤਗਾਮਸਙ੍ਖ੍ਯਂ ਗਚ੍ਛਨ੍ਤਿ. ਮੂਲਮਤ੍ਤੇਸੁ ਪਨ ਪਣ੍ਣਮਤ੍ਤੇਸੁ ਵਾ ਨਿਗ੍ਗਤੇਸੁ ਬੀਜਗਾਮੇਨ ਸਙ੍ਗਹਿਤਾ ਏਵ.

ਯਾਨਿ ਕਾਨਿਚਿ ਬੀਜਾਨਿ ਪਥਵਿਯਂ ਵਾ ਉਦਕੇਨ ਸਿਞ੍ਚਿਤ੍ਵਾ ਠਪਿਤਾਨਿ, ਕਪਾਲਾਦੀਸੁ ਵਾ ਅਲ੍ਲਪਂਸੁਂ ਪਕ੍ਖਿਪਿਤ੍ਵਾ ਨਿਕ੍ਖਿਤ੍ਤਾਨਿ ਹੋਨ੍ਤਿ, ਸਬ੍ਬਾਨਿ ਮੂਲਮਤ੍ਤੇ ਪਣ੍ਣਮਤ੍ਤੇ ਵਾ ਨਿਗ੍ਗਤੇਪਿ ਬੀਜਾਨਿਯੇਵ. ਸਚੇਪਿ ਮੂਲਾਨਿ ਚ ਉਪਰਿ ਅਙ੍ਕੁਰੋ ਚ ਨਿਗ੍ਗਚ੍ਛਤਿ, ਯਾਵ ਅਙ੍ਕੁਰੋ ਹਰਿਤੋ ਨ ਹੋਤਿ, ਤਾਵ ਬੀਜਾਨਿਯੇਵ. ਮੁਗ੍ਗਾਦੀਨਂ ਪਨ ਪਣ੍ਣੇਸੁ ਉਟ੍ਠਿਤੇਸੁ ਵੀਹਿਆਦੀਨਂ ਵਾ ਅਙ੍ਕੁਰੇ ਹਰਿਤੇ ਨੀਲਪਣ੍ਣਵਣ੍ਣੇ ਜਾਤੇ ਭੂਤਗਾਮਸਙ੍ਗਹਂ ਗਚ੍ਛਨ੍ਤਿ. ਤਾਲਟ੍ਠੀਨਂ ਪਠਮਂ ਸੂਕਰਦਾਠਾ ਵਿਯ ਮੂਲਂ ਨਿਗ੍ਗਚ੍ਛਤਿ. ਨਿਗ੍ਗਤੇਪਿ ਯਾਵ ਉਪਰਿ ਪਤ੍ਤਵਟ੍ਟਿ ਨ ਨਿਗ੍ਗਚ੍ਛਤਿ, ਤਾਵ ਬੀਜਗਾਮੋਯੇਵ. ਨਾਲ਼ਿਕੇਰਸ੍ਸ ਤਚਂ ਭਿਨ੍ਦਿਤ੍ਵਾ ਦਨ੍ਤਸੂਚਿ ਵਿਯ ਅਙ੍ਕੁਰੋ ਨਿਗ੍ਗਚ੍ਛਤਿ, ਯਾਵ ਮਿਗਸਿਙ੍ਗਸਦਿਸਾ ਨੀਲਪਤ੍ਤਵਟ੍ਟਿ ਨ ਹੋਤਿ, ਤਾਵ ਬੀਜਗਾਮੋਯੇਵ. ਮੂਲੇ ਅਨਿਗ੍ਗਤੇਪਿ ਤਾਦਿਸਾਯ ਪਤ੍ਤਵਟ੍ਟਿਯਾ ਜਾਤਾਯ ਅਮੂਲਕਭੂਤਗਾਮੇ ਸਙ੍ਗਹਂ ਗਚ੍ਛਤਿ.

ਅਮ੍ਬਟ੍ਠਿਆਦੀਨਿ ਵੀਹਿਆਦੀਹਿ ਵਿਨਿਚ੍ਛਿਨਿਤਬ੍ਬਾਨਿ. ਵਨ੍ਦਾਕਾ ਵਾ ਅਞ੍ਞਾ ਵਾ ਯਾ ਕਾਚਿ ਰੁਕ੍ਖੇ ਜਾਯਿਤ੍ਵਾ ਰੁਕ੍ਖਂ ਓਤ੍ਥਰਤਿ, ਰੁਕ੍ਖੋਵ ਤਸ੍ਸਾ ਠਾਨਂ, ਤਂ ਵਿਕੋਪੇਨ੍ਤਸ੍ਸ ਵਾ ਤਤੋ ਉਦ੍ਧਰਨ੍ਤਸ੍ਸ ਵਾ ਪਾਚਿਤ੍ਤਿਯਂ. ਏਕਾ ਅਮੂਲਿਕਾ ਲਤਾ ਹੋਤਿ, ਅਙ੍ਗੁਲਿਵੇਠਕੋ ਵਿਯ ਵਨਪ੍ਪਗੁਮ੍ਬਦਣ੍ਡਕੇ ਵੇਠੇਤਿ, ਤਸ੍ਸਾਪਿ ਅਯਮੇਵ ਵਿਨਿਚ੍ਛਯੋ. ਗੇਹਮੁਖਪਾਕਾਰਵੇਦਿਕਾਚੇਤਿਯਾਦੀਸੁ ਨੀਲਵਣ੍ਣੋ ਸੇਵਾਲੋ ਹੋਤਿ, ਯਾਵ ਦ੍ਵੇ ਤੀਣਿ ਪਤ੍ਤਾਨਿ ਨ ਸਞ੍ਜਾਯਨ੍ਤਿ ਤਾਵ ਅਗ੍ਗਬੀਜਸਙ੍ਗਹਂ ਗਚ੍ਛਤਿ. ਪਤ੍ਤੇਸੁ ਜਾਤੇਸੁ ਪਾਚਿਤ੍ਤਿਯਵਤ੍ਥੁ. ਤਸ੍ਮਾ ਤਾਦਿਸੇਸੁ ਠਾਨੇਸੁ ਸੁਧਾਲੇਪਮ੍ਪਿ ਦਾਤੁਂ ਨ ਵਟ੍ਟਤਿ. ਅਨੁਪਸਮ੍ਪਨ੍ਨੇਨ ਲਿਤ੍ਤਸ੍ਸ ਉਪਰਿਸ੍ਨੇਹਲੇਪੋ ਦਾਤੁਂ ਵਟ੍ਟਤਿ. ਸਚੇ ਨਿਦਾਘਸਮਯੇ ਸੁਕ੍ਖਸੇਵਾਲੋ ਤਿਟ੍ਠਤਿ, ਤਂ ਸਮ੍ਮੁਞ੍ਜਨੀਆਦੀਹਿ ਘਂਸਿਤ੍ਵਾ ਅਪਨੇਤੁਂ ਵਟ੍ਟਤਿ. ਪਾਨੀਯਘਟਾਦੀਨਂ ਬਹਿ ਸੇਵਾਲੋ ਦੁਕ੍ਕਟਵਤ੍ਥੁ, ਅਨ੍ਤੋ ਅਬ੍ਬੋਹਾਰਿਕੋ. ਦਨ੍ਤਕਟ੍ਠਪੂਵਾਦੀਸੁ ਕਣ੍ਣਕਮ੍ਪਿ ਅਬ੍ਬੋਹਾਰਿਕਮੇਵ. ਵੁਤ੍ਤਞ੍ਹੇਤਂ – ‘‘ਸਚੇ ਗੇਰੁਕਪਰਿਕਮ੍ਮਕਤਾ ਭਿਤ੍ਤਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ’’ਤਿ (ਮਹਾਵ. ੬੬).

ਪਾਸਾਣਜਾਤਿਪਾਸਾਣਦਦ੍ਦੁਸੇਵਾਲਸੇਲੇਯ੍ਯਕਾਦੀਨਿ ਅਹਰਿਤਵਣ੍ਣਾਨਿ ਅਪਤ੍ਤਕਾਨਿ ਚ ਦੁਕ੍ਕਟਵਤ੍ਥੁਕਾਨਿ. ਅਹਿਚ੍ਛਤ੍ਤਕਂ ਯਾਵ ਮਕੁਲ਼ਂ ਹੋਤਿ, ਤਾਵ ਦੁਕ੍ਕਟਵਤ੍ਥੁ. ਪੁਪ੍ਫਿਤਕਾਲਤੋ ਪਟ੍ਠਾਯ ਅਬ੍ਬੋਹਾਰਿਕਂ. ਅਲ੍ਲਰੁਕ੍ਖਤੋ ਪਨ ਅਹਿਚ੍ਛਤ੍ਤਕਂ ਗਣ੍ਹਨ੍ਤੋ ਰੁਕ੍ਖਤ੍ਤਚਂ ਵਿਕੋਪੇਤਿ, ਤਸ੍ਮਾ ਤਤ੍ਥ ਪਾਚਿਤ੍ਤਿਯਂ. ਰੁਕ੍ਖਪਪ੍ਪਟਿਕਾਯਪਿ ਏਸੇਵ ਨਯੋ. ਯਾ ਪਨ ਇਨ੍ਦਸਾਲਕਕੁਧਾਦੀਨਂ ਪਪ੍ਪਟਿਕਾ ਰੁਕ੍ਖਤੋ ਮੁਚ੍ਚਿਤ੍ਵਾ ਤਿਟ੍ਠਤਿ, ਤਂ ਗਣ੍ਹਨ੍ਤਸ੍ਸ ਅਨਾਪਤ੍ਤਿ. ਨਿਯ੍ਯਾਸਮ੍ਪਿ ਰੁਕ੍ਖਤੋ ਮੁਚ੍ਚਿਤ੍ਵਾ ਠਿਤਂ ਸੁਕ੍ਖਰੁਕ੍ਖੇ ਵਾ ਲਗ੍ਗਂ ਗਣ੍ਹਿਤੁਂ ਵਟ੍ਟਤਿ. ਅਲ੍ਲਰੁਕ੍ਖਤੋ ਨ ਵਟ੍ਟਤਿ. ਲਾਖਾਯਪਿ ਏਸੇਵ ਨਯੋ. ਰੁਕ੍ਖਂ ਚਾਲੇਤ੍ਵਾ ਪਣ੍ਡੁਪਲਾਸਂ ਵਾ ਪਰਿਣਤਕਣਿਕਾਰਾਦਿਪੁਪ੍ਫਂ ਵਾ ਪਾਤੇਨ੍ਤਸ੍ਸ ਪਾਚਿਤ੍ਤਿਯਮੇਵ. ਹਤ੍ਥਕੁਕ੍ਕੁਚ੍ਚੇਨ ਮੁਦੁਕੇਸੁ ਇਨ੍ਦਸਾਲਨੁਹੀਖਨ੍ਧਾਦੀਸੁ ਵਾ ਤਤ੍ਥਜਾਤਕਤਾਲਪਣ੍ਣਾਦੀਸੁ ਵਾ ਅਕ੍ਖਰਂ ਛਿਨ੍ਦਨ੍ਤਸ੍ਸਾਪਿ ਏਸੇਵ ਨਯੋ.

ਸਾਮਣੇਰਾਨਂ ਪੁਪ੍ਫਂ ਓਚਿਨਨ੍ਤਾਨਂ ਸਾਖਂ ਓਨਾਮੇਤ੍ਵਾ ਦਾਤੁਂ ਵਟ੍ਟਤਿ. ਤੇਹਿ ਪਨ ਪੁਪ੍ਫੇਹਿ ਪਾਨੀਯਂ ਨ ਵਾਸੇਤਬ੍ਬਂ. ਪਾਨੀਯਵਾਸਤ੍ਥਿਕੇਨ ਸਾਮਣੇਰਂ ਉਕ੍ਖਿਪਿਤ੍ਵਾ ਓਚਿਨਾਪੇਤਬ੍ਬਾਨਿ. ਫਲਸਾਖਾਪਿ ਅਤ੍ਤਨਾ ਖਾਦਿਤੁਕਾਮੇਨ ਨ ਓਨਾਮੇਤਬ੍ਬਾ. ਸਾਮਣੇਰਂ ਉਕ੍ਖਿਪਿਤ੍ਵਾ ਫਲਂ ਗਾਹਾਪੇਤਬ੍ਬਂ. ਯਂਕਿਞ੍ਚਿ ਗਚ੍ਛਂ ਵਾ ਲਤਂ ਵਾ ਉਪ੍ਪਾਟੇਨ੍ਤੇਹਿ ਸਾਮਣੇਰੇਹਿ ਸਦ੍ਧਿਂ ਗਹੇਤ੍ਵਾ ਆਕਡ੍ਢਿਤੁਂ ਨ ਵਟ੍ਟਤਿ. ਤੇਸਂ ਪਨ ਉਸ੍ਸਾਹਜਨਨਤ੍ਥਂ ਅਨਾਕਡ੍ਢਨ੍ਤੇਨ ਕਡ੍ਢਨਾਕਾਰਂ ਦਸ੍ਸੇਨ੍ਤੇਨ ਵਿਯ ਅਗ੍ਗੇ ਗਹੇਤੁਂ ਵਟ੍ਟਤਿ. ਯੇਸਂ ਰੁਕ੍ਖਾਨਂ ਸਾਖਾ ਰੁਹਤਿ, ਤੇਸਂ ਸਾਖਂ ਮਕ੍ਖਿਕਾਬੀਜਨਾਦੀਨਂ ਅਤ੍ਥਾਯ ਕਪ੍ਪਿਯਂ ਅਕਾਰਾਪੇਤ੍ਵਾ ਗਹਿਤਂ ਤਚੇ ਵਾ ਪਤ੍ਤੇ ਵਾ ਅਨ੍ਤਮਸੋ ਨਖੇਨਪਿ ਵਿਲਿਖਨ੍ਤਸ੍ਸ ਦੁਕ੍ਕਟਂ. ਅਲ੍ਲਸਿਙ੍ਗਿਵੇਰਾਦੀਸੁਪਿ ਏਸੇਵ ਨਯੋ. ਸਚੇ ਪਨ ਕਪ੍ਪਿਯਂ ਕਾਰਾਪੇਤ੍ਵਾ ਸੀਤਲੇ ਪਦੇਸੇ ਠਪਿਤਸ੍ਸ ਮੂਲਂ ਸਞ੍ਜਾਯਤਿ, ਉਪਰਿਭਾਗੇ ਛਿਨ੍ਦਿਤੁਂ ਵਟ੍ਟਤਿ. ਸਚੇ ਅਙ੍ਕੁਰੋ ਜਾਯਤਿ, ਹੇਟ੍ਠਾਭਾਗੇ ਛਿਨ੍ਦਿਤੁਂ ਵਟ੍ਟਤਿ. ਮੂਲੇ ਚ ਨੀਲਙ੍ਕੁਰੇ ਚ ਜਾਤੇ ਨ ਵਟ੍ਟਤਿ.

ਛਿਨ੍ਦਤਿ ਵਾ ਛੇਦਾਪੇਤਿ ਵਾਤਿ ਅਨ੍ਤਮਸੋ ਸਮ੍ਮੁਞ੍ਜਨੋਸਲਾਕਾਯਪਿ ਤਿਣਾਨਿ ਛਿਨ੍ਦਿਸ੍ਸਾਮੀਤਿ ਭੂਮਿਂ ਸਮ੍ਮਜ੍ਜਨ੍ਤੋ ਸਯਂ ਵਾ ਛਿਨ੍ਦਤਿ, ਅਞ੍ਞੇਨ ਵਾ ਛੇਦਾਪੇਤਿ. ਭਿਨ੍ਦਤਿ ਵਾ ਭੇਦਾਪੇਤਿ ਵਾਤਿ ਅਨ੍ਤਮਸੋ ਚਙ੍ਕਮਨ੍ਤੋਪਿ ਛਿਜ੍ਜਨਕਂ ਛਿਜ੍ਜਤੁ, ਭਿਜ੍ਜਨਕਂ ਭਿਜ੍ਜਤੁ, ਚਙ੍ਕਮਿਤਟ੍ਠਾਨਂ ਦਸ੍ਸੇਸ੍ਸਾਮੀਤਿ ਸਞ੍ਚਿਚ੍ਚ ਪਾਦੇਹਿ ਅਕ੍ਕਮਨ੍ਤੋ ਤਿਣਵਲ੍ਲਿਆਦੀਨਿ ਸਯਂ ਵਾ ਭਿਨ੍ਦਤਿ ਅਞ੍ਞੇਨ ਵਾ ਭੇਦਾਪੇਤਿ. ਸਚੇਪਿ ਹਿ ਤਿਣਂ ਵਾ ਲਤਂ ਵਾ ਗਣ੍ਠਿਂ ਕਰੋਨ੍ਤਸ੍ਸ ਭਿਜ੍ਜਤਿ, ਗਣ੍ਠਿਪਿ ਨ ਕਾਤਬ੍ਬੋ. ਤਾਲਰੁਕ੍ਖਾਦੀਸੁ ਪਨ ਚੋਰਾਨਂ ਅਨਾਰੁਹਨਤ੍ਥਾਯ ਦਾਰੁਮਕ੍ਕਟਕਂ ਆਕੋਟੇਨ੍ਤਿ, ਕਣ੍ਟਕੇ ਬਨ੍ਧਨ੍ਤਿ, ਭਿਕ੍ਖੁਸ੍ਸ ਏਵਂ ਕਾਤੁਂ ਨ ਵਟ੍ਟਤਿ. ਸਚੇ ਦਾਰੁਮਕ੍ਕਟਕੋ ਰੁਕ੍ਖੇ ਅਲ੍ਲੀਨਮਤ੍ਤੋਵ ਹੋਤਿ, ਰੁਕ੍ਖਂ ਨ ਪੀਲ਼ੇਤਿ, ਵਟ੍ਟਤਿ. ‘‘ਰੁਕ੍ਖਂ ਛਿਨ੍ਦ, ਲਤਂ ਛਿਨ੍ਦ, ਕਨ੍ਦਂ ਵਾ ਮੂਲਂ ਵਾ ਉਪ੍ਪਾਟੇਹੀ’’ਤਿ ਵਤ੍ਤੁਮ੍ਪਿ ਵਟ੍ਟਤਿ, ਅਨਿਯਾਮਿਤਤ੍ਤਾ. ਨਿਯਾਮੇਤ੍ਵਾ ਪਨ ‘‘ਇਮਂ ਰੁਕ੍ਖਂ ਛਿਨ੍ਦਾ’’ਤਿਆਦਿ ਵਤ੍ਤੁਂ ਨ ਵਟ੍ਟਤਿ. ਨਾਮਂ ਗਹੇਤ੍ਵਾਪਿ ‘‘ਅਮ੍ਬਰੁਕ੍ਖਂ ਚਤੁਰਸ੍ਸਵਲ੍ਲਿਂ ਆਲੁਵਕਨ੍ਦਂ ਮੁਞ੍ਜਤਿਣਂ ਅਸੁਕਰੁਕ੍ਖਚ੍ਛਲ੍ਲਿਂ ਛਿਨ੍ਦ ਭਿਨ੍ਦ ਉਪ੍ਪਾਟੇਹੀ’’ਤਿਆਦਿਵਚਨਮ੍ਪਿ ਅਨਿਯਾਮਿਤਮੇਵ ਹੋਤਿ. ‘‘ਇਮਂ ਅਮ੍ਬਰੁਕ੍ਖ’’ਨ੍ਤਿਆਦਿਵਚਨਮੇਵ ਹਿ ਨਿਯਾਮਿਤਂ ਨਾਮ, ਤਂ ਨ ਵਟ੍ਟਤਿ.

ਪਚਤਿ ਵਾ ਪਚਾਪੇਤਿ ਵਾਤਿ ਅਨ੍ਤਮਸੋ ਪਤ੍ਤਮ੍ਪਿ ਪਚਿਤੁਕਾਮੋ ਤਿਣਾਦੀਨਂ ਉਪਰਿ ਸਞ੍ਚਿਚ੍ਚ ਅਗ੍ਗਿਂ ਕਰੋਨ੍ਤੋ ਸਯਂ ਵਾ ਪਚਤਿ, ਅਞ੍ਞੇਨ ਵਾ ਪਚਾਪੇਤੀਤਿ ਸਬ੍ਬਂ ਪਥਵੀਖਣਨਸਿਕ੍ਖਾਪਦੇ ਵੁਤ੍ਤਨਯੇਨ ਵੇਦਿਤਬ੍ਬਂ. ਅਨਿਯਾਮੇਤ੍ਵਾ ਪਨ ‘‘ਮੁਗ੍ਗੇ ਪਚ, ਮਾਸੇ ਪਚਾ’’ਤਿਆਦਿ ਵਤ੍ਤੁਂ ਵਟ੍ਟਤਿ. ‘‘ਇਮੇ ਮੁਗ੍ਗੇ ਪਚ, ਇਮੇ ਮਾਸੇ ਪਚਾ’’ਤਿ ਏਵਂ ਵਤ੍ਤੁਂ ਨ ਵਟ੍ਟਤਿ.

ਅਨਾਪਤ੍ਤਿ ਇਮਂ ਜਾਨਾਤਿਆਦੀਸੁ ‘‘ਇਮਂ ਮੂਲਭੇਸਜ੍ਜਂ ਜਾਨ, ਇਮਂ ਮੂਲਂ ਵਾ ਪਣ੍ਣਂ ਵਾ ਦੇਹਿ, ਇਮਂ ਰੁਕ੍ਖਂ ਵਾ ਲਤਂ ਵਾ ਆਹਰ, ਇਮਿਨਾ ਪੁਪ੍ਫੇਨ ਵਾ ਫਲੇਨ ਵਾ ਪਣ੍ਣੇਨ ਵਾ ਅਤ੍ਥੋ, ਇਮਂ ਰੁਕ੍ਖਂ ਵਾ ਲਤਂ ਵਾ ਫਲਂ ਵਾ ਕਪ੍ਪਿਯਂ ਕਰੋਹੀ’’ਤਿ ਏਵਮਤ੍ਥੋ ਦਟ੍ਠਬ੍ਬੋ. ਏਤ੍ਤਾਵਤਾ ਭੂਤਗਾਮਪਰਿਮੋਚਨਂ ਕਤਂ ਹੋਤਿ. ਪਰਿਭੁਞ੍ਜਨ੍ਤੇਨ ਪਨ ਬੀਜਗਾਮਪਰਿਮੋਚਨਤ੍ਥਂ ਪੁਨ ਕਪ੍ਪਿਯਂ ਕਾਰੇਤਬ੍ਬਂ.

ਕਪ੍ਪਿਯਕਰਣਞ੍ਚੇਤ੍ਥ ਇਮਿਨਾ ਸੁਤ੍ਤਾਨੁਸਾਰੇਨ ਵੇਦਿਤਬ੍ਬਂ – ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਿ ਸਮਣਕਪ੍ਪੇਹਿ ਫਲਂ ਪਰਿਭੁਞ੍ਜਿਤੁਂ ਅਗ੍ਗਿਪਰਿਜਿਤਂ ਸਤ੍ਥਪਰਿਜਿਤਂ ਨਖਪਰਿਜਿਤਂ ਅਬੀਜਂ ਨਿਬ੍ਬਟ੍ਟਬੀਜਮੇਵ ਪਞ੍ਚਮ’’ਨ੍ਤਿ. ਤਤ੍ਥ ‘‘ਅਗ੍ਗਿਪਰਿਜਿਤ’’ਨ੍ਤਿ ਅਗ੍ਗਿਨਾ ਪਰਿਜਿਤਂ ਅਧਿਭੂਤਂ ਦਡ੍ਢਂ ਫੁਟ੍ਠਨ੍ਤਿ ਅਤ੍ਥੋ. ‘‘ਸਤ੍ਥਪਰਿਜਿਤ’’ਨ੍ਤਿ ਸਤ੍ਥੇਨ ਪਰਿਜਿਤਂ ਅਧਿਭੂਤਂ ਛਿਨ੍ਨਂ ਵਿਦ੍ਧਂ ਵਾਤਿ ਅਤ੍ਥੋ. ਏਸ ਨਯੋ ਨਖਪਰਿਜਿਤੇ. ਅਬੀਜਨਿਬ੍ਬਟ੍ਟਬੀਜਾਨਿ ਸਯਮੇਵ ਕਪ੍ਪਿਯਾਨਿ. ਅਗ੍ਗਿਨਾ ਕਪ੍ਪਿਯਂ ਕਰੋਨ੍ਤੇਨ ਕਟ੍ਠਗ੍ਗਿਗੋਮਯਗ੍ਗਿਆਦੀਸੁ ਯੇਨ ਕੇਨਚਿ ਅਨ੍ਤਮਸੋ ਲੋਹਖਣ੍ਡੇਨਪਿ ਆਦਿਤ੍ਤੇਨ ਕਪ੍ਪਿਯਂ ਕਾਤਬ੍ਬਂ. ਤਞ੍ਚ ਖੋ ਏਕਦੇਸੇ ਫੁਸਨ੍ਤੇਨ ‘‘ਕਪ੍ਪਿਯ’’ਨ੍ਤਿ ਵਤ੍ਵਾਵ ਕਾਤਬ੍ਬਂ. ਸਤ੍ਥੇਨ ਕਰੋਨ੍ਤੇਨ ਯਸ੍ਸ ਕਸ੍ਸਚਿ ਲੋਹਮਯਸਤ੍ਥਸ੍ਸ ਅਨ੍ਤਮਸੋ ਸੂਚਿਨਖਚ੍ਛੇਦਨਾਨਮ੍ਪਿ ਤੁਣ੍ਡੇਨ ਵਾ ਧਾਰਾਯ ਵਾ ਛੇਦਂ ਵਾ ਵੇਧਂ ਵਾ ਦਸ੍ਸੇਨ੍ਤੇਨ ‘‘ਕਪ੍ਪਿਯ’’ਨ੍ਤਿ ਵਤ੍ਵਾਵ ਕਾਤਬ੍ਬਂ. ਨਖੇਨ ਕਪ੍ਪਿਯਂ ਕਰੋਨ੍ਤੇਨ ਪੂਤਿਨਖੇਨ ਨ ਕਾਤਬ੍ਬਂ. ਮਨੁਸ੍ਸਾਨਂ ਪਨ ਸੀਹਬ੍ਯਗ੍ਘਦੀਪਿਮਕ੍ਕਟਾਦੀਨਂ ਸਕੁਨ੍ਤਾਨਞ੍ਚ ਨਖਾ ਤਿਖਿਣਾ ਹੋਨ੍ਤਿ, ਤੇਹਿ ਕਾਤਬ੍ਬਂ. ਅਸ੍ਸਮਹਿਂਸਸੂਕਰਮਿਗਗੋਰੂਪਾਦੀਨਂ ਖੁਰਾ ਅਤਿਖਿਣਾ, ਤੇਹਿ ਨ ਕਾਤਬ੍ਬਂ, ਕਤਮ੍ਪਿ ਅਕਤਂ ਹੋਤਿ. ਹਤ੍ਥਿਨਖਾ ਪਨ ਖੁਰਾ ਨ ਹੋਨ੍ਤਿ, ਤੇਹਿ ਵਟ੍ਟਤਿ. ਯੇਹਿ ਪਨ ਕਾਤੁਂ ਵਟ੍ਟਤਿ, ਤੇਹਿ ਤਤ੍ਥਜਾਤਕੇਹਿਪਿ ਉਦ੍ਧਰਿਤ੍ਵਾ ਗਹਿਤਕੇਹਿਪਿ ਛੇਦਂ ਵਾ ਵੇਧਂ ਵਾ ਦਸ੍ਸੇਨ੍ਤੇਨ ‘‘ਕਪ੍ਪਿਯ’’ਨ੍ਤਿ ਵਤ੍ਵਾਵ ਕਾਤਬ੍ਬਂ.

ਤਤ੍ਥ ਸਚੇਪਿ ਬੀਜਾਨਂ ਪਬ੍ਬਤਮਤ੍ਤੋ ਰਾਸਿ ਰੁਕ੍ਖਸਹਸ੍ਸਂ ਵਾ ਛਿਨ੍ਦਿਤ੍ਵਾ ਏਕਾਬਦ੍ਧਂ ਕਤ੍ਵਾ ਉਚ੍ਛੂਨਂ ਵਾ ਮਹਾਭਾਰੋ ਬਨ੍ਧਿਤ੍ਵਾ ਠਪਿਤੋ ਹੋਤਿ, ਏਕਸ੍ਮਿਂ ਬੀਜੇ ਵਾ ਰੁਕ੍ਖਸਾਖਾਯ ਵਾ ਉਚ੍ਛੁਮ੍ਹਿ ਵਾ ਕਪ੍ਪਿਯੇ ਕਤੇ ਸਬ੍ਬਂ ਕਤਂ ਹੋਤਿ. ਉਚ੍ਛੂ ਚ ਦਾਰੂਨਿ ਚ ਏਕਤੋ ਬਦ੍ਧਾਨਿ ਹੋਨ੍ਤਿ, ਉਚ੍ਛੁਂ ਕਪ੍ਪਿਯਂ ਕਰਿਸ੍ਸਾਮੀਤਿ ਦਾਰੁਂ ਵਿਜ੍ਝਤਿ, ਵਟ੍ਟਤਿਯੇਵ. ਸਚੇ ਪਨ ਯਾਯ ਰਜ੍ਜੁਯਾ ਵਾ ਵਲ੍ਲਿਯਾ ਵਾ ਬਦ੍ਧਾਨਿ, ਤਂ ਵਿਜ੍ਝਤਿ, ਨ ਵਟ੍ਟਤਿ. ਉਚ੍ਛੁਖਣ੍ਡਾਨਂ ਪਚ੍ਛਿਂ ਪੂਰੇਤ੍ਵਾ ਆਹਰਨ੍ਤਿ, ਏਕਸ੍ਮਿਂ ਖਣ੍ਡੇ ਕਪ੍ਪਿਯੇ ਕਤੇ ਸਬ੍ਬਂ ਕਤਮੇਵ ਹੋਤਿ. ਮਰਿਚਪਕ੍ਕਾਦੀਹਿ ਮਿਸ੍ਸੇਤ੍ਵਾ ਭਤ੍ਤਂ ਆਹਰਨ੍ਤਿ, ‘‘ਕਪ੍ਪਿਯਂ ਕਰੋਹੀ’’ਤਿ ਵੁਤ੍ਤੇ ਸਚੇਪਿ ਭਤ੍ਤਸਿਤ੍ਥੇ ਵਿਜ੍ਝਤਿ, ਵਟ੍ਟਤਿਯੇਵ. ਤਿਲਤਣ੍ਡੁਲਾਦੀਸੁਪਿ ਏਸੇਵ ਨਯੋ. ਯਾਗੁਯਾ ਪਕ੍ਖਿਤ੍ਤਾਨਿ ਪਨ ਏਕਾਬਦ੍ਧਾਨਿ ਹੁਤ੍ਵਾ ਨ ਸਨ੍ਤਿਟ੍ਠਨ੍ਤਿ, ਤਤ੍ਥ ਏਕਮੇਕਂ ਵਿਜ੍ਝਿਤ੍ਵਾ ਕਪ੍ਪਿਯਂ ਕਾਤਬ੍ਬਮੇਵ. ਕਪਿਤ੍ਥਫਲਾਦੀਨਂ ਅਨ੍ਤੋ ਮਿਞ੍ਜਂ ਕਟਾਹਂ ਮੁਞ੍ਚਿਤ੍ਵਾ ਸਞ੍ਚਰਤਿ, ਭਿਨ੍ਦਾਪੇਤ੍ਵਾ ਕਪ੍ਪਿਯਂ ਕਾਰਾਪੇਤਬ੍ਬਂ. ਏਕਾਬਦ੍ਧਂ ਹੋਤਿ, ਕਟਾਹੇਪਿ ਕਾਤੁਂ ਵਟ੍ਟਤਿ.

ਅਸਞ੍ਚਿਚ੍ਚਾਤਿ ਪਾਸਾਣਰੁਕ੍ਖਾਦੀਨਿ ਵਾ ਪਵਟ੍ਟੇਨ੍ਤਸ੍ਸ ਸਾਖਂ ਵਾ ਕਡ੍ਢਨ੍ਤਸ੍ਸ ਕਤ੍ਤਰਦਣ੍ਡੇਨ ਵਾ ਭੂਮਿਂ ਪਹਰਿਤ੍ਵਾ ਗਚ੍ਛਨ੍ਤਸ੍ਸ ਤਿਣਾਨਿ ਛਿਜ੍ਜਨ੍ਤਿ, ਤਾਨਿ ਤੇਨ ਛਿਨ੍ਦਿਸ੍ਸਾਮੀਤਿ ਏਵਂ ਸਞ੍ਚਿਚ੍ਚ ਅਚ੍ਛਿਨ੍ਨਤ੍ਤਾ ਅਸਞ੍ਚਿਚ੍ਚ ਛਿਨ੍ਨਾਨਿ ਨਾਮ ਹੋਨ੍ਤਿ. ਇਤਿ ਅਸਞ੍ਚਿਚ੍ਚ ਛਿਨ੍ਦਨ੍ਤਸ੍ਸ ਅਨਾਪਤ੍ਤਿ.

ਅਸਤਿਯਾਤਿ ਅਞ੍ਞਵਿਹਿਤੋ ਕੇਨਚਿ ਸਦ੍ਧਿਂ ਕਿਞ੍ਚਿ ਕਥੇਨ੍ਤੋ ਪਾਦਙ੍ਗੁਟ੍ਠਕੇਨ ਵਾ ਹਤ੍ਥੇਨ ਵਾ ਤਿਣਂ ਵਾ ਲਤਂ ਵਾ ਛਿਨ੍ਦਨ੍ਤੋ ਤਿਟ੍ਠਤਿ, ਏਵਂ ਅਸਤਿਯਾ ਛਿਨ੍ਦਨ੍ਤਸ੍ਸ ਅਨਾਪਤ੍ਤਿ.

ਅਜਾਨਨ੍ਤਸ੍ਸਾਤਿ ਏਤ੍ਥਬ੍ਭਨ੍ਤਰੇ ਬੀਜਗਾਮੋਤਿ ਵਾ ਭੂਤਗਾਮੋਤਿ ਵਾ ਨ ਜਾਨਾਤਿ, ਛਿਨ੍ਦਾਮੀਤਿਪਿ ਨ ਜਾਨਾਤਿ, ਕੇਵਲਂ ਵਤਿਯਾ ਵਾ ਪਲਾਲਪੁਞ੍ਜੇ ਵਾ ਨਿਖਾਦਨਂ ਵਾ ਖਣਿਤ੍ਤਿਂ ਵਾ ਕੁਦਾਲਂ ਵਾ ਸਙ੍ਗੋਪਨਤ੍ਥਾਯ ਠਪੇਤਿ, ਡਯ੍ਹਮਾਨਹਤ੍ਥੋ ਵਾ ਅਗ੍ਗਿਂ ਪਾਤੇਤਿ, ਤਤ੍ਰ ਚੇ ਤਿਣਾਨਿ ਛਿਜ੍ਜਨ੍ਤਿ ਵਾ ਡਯ੍ਹਨ੍ਤਿ ਵਾ ਅਨਾਪਤ੍ਤਿ. ਮਨੁਸ੍ਸਵਿਗ੍ਗਹਪਾਰਾਜਿਕਵਣ੍ਣਨਾਯਂ ਪਨ ਸਬ੍ਬਅਟ੍ਠਕਥਾਸੁ ‘‘ਸਚੇ ਭਿਕ੍ਖੁ ਰੁਕ੍ਖੇਨ ਵਾ ਅਜ੍ਝੋਤ੍ਥਟੋ ਹੋਤਿ, ਓਪਾਤੇ ਵਾ ਪਤਿਤੋ ਸਕ੍ਕਾ ਚ ਹੋਤਿ ਰੁਕ੍ਖਂ ਛਿਨ੍ਦਿਤ੍ਵਾ ਭੂਮਿਂ ਵਾ ਖਣਿਤ੍ਵਾ ਨਿਕ੍ਖਮਿਤੁਂ, ਜੀਵਿਤਹੇਤੁਪਿ ਅਤ੍ਤਨਾ ਨ ਕਾਤਬ੍ਬਂ. ਅਞ੍ਞੇਨ ਪਨ ਭਿਕ੍ਖੁਨਾ ਭੂਮਿਂ ਵਾ ਖਣਿਤ੍ਵਾ ਰੁਕ੍ਖਂ ਵਾ ਛਿਨ੍ਦਿਤ੍ਵਾ ਅਲ੍ਲਰੁਕ੍ਖਤੋ ਵਾ ਦਣ੍ਡਕਂ ਛਿਨ੍ਦਿਤ੍ਵਾ ਤਂ ਰੁਕ੍ਖਂ ਪਵਟ੍ਟੇਤ੍ਵਾ ਨਿਕ੍ਖਾਮੇਤੁਂ ਵਟ੍ਟਤਿ, ਅਨਾਪਤ੍ਤੀ’’ਤਿ ਵੁਤ੍ਤਂ. ਤਤ੍ਥ ਕਾਰਣਂ ਨ ਦਿਸ੍ਸਤਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਦਵਡਾਹੇ ਡਯ੍ਹਮਾਨੇ ਪਟਗ੍ਗਿਂ ਦਾਤੁਂ, ਪਰਿਤ੍ਤਂ ਕਾਤੁ’’ਨ੍ਤਿ (ਚੂਲ਼ਵ. ੨੮੩) ਇਦਂ ਪਨ ਏਕਮੇਵ ਸੁਤ੍ਤਂ ਦਿਸ੍ਸਤਿ. ਸਚੇ ਏਤਸ੍ਸ ਅਨੁਲੋਮਂ ‘‘ਅਤ੍ਤਨੋ ਨ ਵਟ੍ਟਤਿ, ਅਞ੍ਞਸ੍ਸ ਵਟ੍ਟਤੀ’’ਤਿ ਇਦਂ ਨਾਨਾਕਰਣਂ ਨ ਸਕ੍ਕਾ ਲਦ੍ਧੁਂ. ਅਤ੍ਤਨੋ ਅਤ੍ਥਾਯ ਕਰੋਨ੍ਤੋ ਅਤ੍ਤਸਿਨੇਹੇਨ ਅਕੁਸਲਚਿਤ੍ਤੇਨੇਵ ਕਰੋਤਿ, ਪਰੋ ਪਨ ਕਾਰੁਞ੍ਞੇਨ, ਤਸ੍ਮਾ ਅਨਾਪਤ੍ਤੀਤਿ ਚੇ. ਏਤਮ੍ਪਿ ਅਕਾਰਣਂ. ਕੁਸਲਚਿਤ੍ਤੇਨਾਪਿ ਹਿ ਇਮਂ ਆਪਤ੍ਤਿਂ ਆਪਜ੍ਜਤਿ. ਸਬ੍ਬਅਟ੍ਠਕਥਾਸੁ ਪਨ ਵੁਤ੍ਤਤ੍ਤਾ ਨ ਸਕ੍ਕਾ ਪਟਿਸੇਧੇਤੁਂ. ਗਵੇਸਿਤਬ੍ਬਾ ਏਤ੍ਥ ਯੁਤ੍ਤਿ. ਅਟ੍ਠਕਥਾਚਰਿਯਾਨਂ ਵਾ ਸਦ੍ਧਾਯ ਗਨ੍ਤਬ੍ਬਨ੍ਤਿ. ਸੇਸਂ ਉਤ੍ਤਾਨਮੇਵ.

ਤਿਸਮੁਟ੍ਠਾਨਂ – ਕਾਯਚਿਤ੍ਤਤੋ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ. ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਭੂਤਗਾਮਸਿਕ੍ਖਾਪਦਂ ਪਠਮਂ.

੨. ਅਞ੍ਞਵਾਦਕਸਿਕ੍ਖਾਪਦਵਣ੍ਣਨਾ

੯੪. ਦੁਤਿਯਸਿਕ੍ਖਾਪਦੇ – ਅਨਾਚਾਰਂ ਆਚਰਿਤ੍ਵਾਤਿ ਅਕਾਤਬ੍ਬਂ ਕਤ੍ਵਾ; ਕਾਯਵਚੀਦ੍ਵਾਰੇਸੁ ਆਪਤ੍ਤਿਂ ਆਪਜ੍ਜਿਤ੍ਵਾਤਿ ਵੁਤ੍ਤਂ ਹੋਤਿ. ਅਞ੍ਞੇਨਞ੍ਞਂ ਪਟਿਚਰਤੀਤਿ ਅਞ੍ਞੇਨ ਵਚਨੇਨ ਅਞ੍ਞਂ ਵਚਨਂ ਪਟਿਚਰਤਿ ਪਟਿਚ੍ਛਾਦੇਤਿ ਅਜ੍ਝੋਤ੍ਥਰਤਿ; ਇਦਾਨਿ ਤਂ ਪਟਿਚਰਣਵਿਧਿਂ ਦਸ੍ਸੇਨ੍ਤੋ ‘‘ਕੋ ਆਪਨ੍ਨੋ’’ਤਿਆਦਿਮਾਹ. ਤਤ੍ਰਾਯਂ ਵਚਨਸਮ੍ਬਨ੍ਧੋ – ਸੋ ਕਿਰ ਕਿਞ੍ਚਿ ਵੀਤਿਕ੍ਕਮਂ ਦਿਸ੍ਵਾ ‘‘ਆਵੁਸੋ, ਆਪਤ੍ਤਿਂ ਆਪਨ੍ਨੋਸੀ’’ਤਿ ਸਙ੍ਘਮਜ੍ਝੇ ਆਪਤ੍ਤਿਯਾ ਅਨੁਯੁਞ੍ਜਿਯਮਾਨੋ ‘‘ਕੋ ਆਪਨ੍ਨੋ’’ਤਿ ਵਦਤਿ. ‘‘ਤਤੋ ਤ੍ਵ’’ਨ੍ਤਿ ਵੁਤ੍ਤੇ ‘‘ਅਹਂ ਕਿਂ ਆਪਨ੍ਨੋ’’ਤਿ ਵਦਤਿ. ਅਥ ‘‘ਪਾਚਿਤ੍ਤਿਯਂ ਵਾ ਦੁਕ੍ਕਟਂ ਵਾ’’ਤਿ ਵੁਤ੍ਤੇ ਵਤ੍ਥੁਂ ਪੁਚ੍ਛਨ੍ਤੋ ‘‘ਅਹਂ ਕਿਸ੍ਮਿਂ ਆਪਨ੍ਨੋ’’ਤਿ ਵਦਤਿ. ਤਤੋ ‘‘ਅਸੁਕਸ੍ਮਿਂ ਨਾਮ ਵਤ੍ਥੁਸ੍ਮਿ’’ਨ੍ਤਿ ਵੁਤ੍ਤੇ ‘‘ਅਹਂ ਕਥਂ ਆਪਨ੍ਨੋ, ਕਿਂ ਕਰੋਨ੍ਤੋ ਆਪਨ੍ਨੋਮ੍ਹੀ’’ਤਿ ਪੁਚ੍ਛਤਿ. ਅਥ ‘‘ਇਦਂ ਨਾਮ ਕਰੋਨ੍ਤੋ ਆਪਨ੍ਨੋ’’ਤਿ ਵੁਤ੍ਤੇ ‘‘ਕਂ ਭਣਥਾ’’ਤਿ ਵਦਤਿ. ਤਤੋ ‘‘ਤਂ ਭਣਾਮਾ’’ਤਿ ਵੁਤ੍ਤੇ ‘‘ਕਿਂ ਭਣਥਾ’’ਤਿ ਵਦਤਿ.

ਅਪਿਚੇਤ੍ਥ ਅਯਂ ਪਾਲ਼ਿਮੁਤ੍ਤਕੋਪਿ ਅਞ੍ਞੇਨਞ੍ਞਂ ਪਟਿਚਰਣਵਿਧਿ – ਭਿਕ੍ਖੂਹਿ ‘‘ਤਵ ਸਿਪਾਟਿਕਾਯ ਕਹਾਪਣੋ ਦਿਟ੍ਠੋ, ਕਿਸ੍ਸੇਵਮਸਾਰੁਪ੍ਪਂ ਕਰੋਸੀ’’ਤਿ ਵੁਤ੍ਤੋ ‘‘ਸੁਦਿਟ੍ਠਂ, ਭਨ੍ਤੇ, ਨ ਪਨੇਸੋ ਕਹਾਪਣੋ; ਤਿਪੁਮਣ੍ਡਲਂ ਏਤ’’ਨ੍ਤਿ ਭਣਨ੍ਤੋ ਵਾ ‘‘ਤ੍ਵਂ ਸੁਰਂ ਪਿਵਨ੍ਤੋ ਦਿਟ੍ਠੋ, ਕਿਸ੍ਸੇਵਂ ਕਰੋਸੀ’’ਤਿ ਵੁਤ੍ਤੋ ‘‘ਸੁਦਿਟ੍ਠੋ, ਭਨ੍ਤੇ, ਨ ਪਨੇਸਾ ਸੁਰਾ, ਭੇਸਜ੍ਜਤ੍ਥਾਯ ਸਮ੍ਪਾਦਿਤਂ ਅਰਿਟ੍ਠ’’ਨ੍ਤਿ ਭਣਨ੍ਤੋ ਵਾ ‘‘ਤ੍ਵਂ ਪਟਿਚ੍ਛਨ੍ਨੇ ਆਸਨੇ ਮਾਤੁਗਾਮੇਨ ਸਦ੍ਧਿਂ ਨਿਸਿਨ੍ਨੋ ਦਿਟ੍ਠੋ, ਕਿਸ੍ਸੇਵਮਸਾਰੁਪ੍ਪਂ ਕਰੋਸੀ’’ਤਿ ਵੁਤ੍ਤੋ ‘‘ਯੇਨ ਦਿਟ੍ਠਂ ਸੁਦਿਟ੍ਠਂ, ਵਿਞ੍ਞੂ ਪਨੇਤ੍ਥ ਦੁਤਿਯੋ ਅਤ੍ਥਿ, ਸੋ ਕਿਸ੍ਸ ਨ ਦਿਟ੍ਠੋ’’ਤਿ ਭਣਨ੍ਤੋ ਵਾ, ‘‘ਈਦਿਸਂ ਤਯਾ ਕਿਞ੍ਚਿ ਦਿਟ੍ਠ’’ਨ੍ਤਿ ਪੁਟ੍ਠੋ ‘‘ਨ ਸੁਣਾਮੀ’’ਤਿ ਸੋਤਮੁਪਨੇਨ੍ਤੋ ਵਾ, ਸੋਤਦ੍ਵਾਰੇ ਪੁਚ੍ਛਨ੍ਤਾਨਂ ਚਕ੍ਖੁਂ ਉਪਨੇਨ੍ਤੋ ਵਾ, ਅਞ੍ਞੇਨਞ੍ਞਂ ਪਟਿਚਰਤੀਤਿ ਵੇਦਿਤਬ੍ਬੋ. ਅਞ੍ਞਵਾਦਕਂ ਰੋਪੇਤੂਤਿ ਅਞ੍ਞਵਾਦਕਂ ਆਰੋਪੇਤੁ; ਪਤਿਟ੍ਠਾਪੇਤੂਤਿ ਅਤ੍ਥੋ. ਵਿਹੇਸਕਂ ਰੋਪੇਤੂਤਿ ਏਤਸ੍ਮਿਮ੍ਪਿ ਏਸੇਵ ਨਯੋ.

੯੮. ਅਞ੍ਞਵਾਦਕੇ ਵਿਹੇਸਕੇ ਪਾਚਿਤ੍ਤਿਯਨ੍ਤਿ ਏਤ੍ਥ ਅਞ੍ਞਂ ਵਦਤੀਤਿ ਅਞ੍ਞਵਾਦਕਂ; ਅਞ੍ਞੇਨਞ੍ਞਂ ਪਟਿਚਰਣਸ੍ਸੇਤਂ ਨਾਮਂ. ਵਿਹੇਸੇਤੀਤਿ ਵਿਹੇਸਕਂ; ਤੁਣ੍ਹੀਭੂਤਸ੍ਸੇਤਂ ਨਾਮਂ, ਤਸ੍ਮਿਂ ਅਞ੍ਞਵਾਦਕੇ ਵਿਹੇਸਕੇ. ਪਾਚਿਤ੍ਤਿਯਨ੍ਤਿ ਵਤ੍ਥੁਦ੍ਵਯੇ ਪਾਚਿਤ੍ਤਿਯਦ੍ਵਯਂ ਵੁਤ੍ਤਂ.

੧੦੦. ਅਰੋਪਿਤੇ ਅਞ੍ਞਵਾਦਕੇਤਿ ਕਮ੍ਮਵਾਚਾਯ ਅਨਾਰੋਪਿਤੇ ਅਞ੍ਞਵਾਦਕੇ. ਅਰੋਪਿਤੇ ਵਿਹੇਸਕੇਤਿ ਏਤਸ੍ਮਿਮ੍ਪਿ ਏਸੇਵ ਨਯੋ.

੧੦੧. ਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞੀਤਿਆਦੀਸੁ ਯਂ ਤਂ ਅਞ੍ਞਵਾਦਕਵਿਹੇਸਕਰੋਪਨਕਮ੍ਮਂ ਕਤਂ, ਤਞ੍ਚੇ ਧਮ੍ਮਕਮ੍ਮਂ ਹੋਤਿ, ਸੋ ਚ ਭਿਕ੍ਖੁ ਤਸ੍ਮਿਂ ਧਮ੍ਮਕਮ੍ਮਸਞ੍ਞੀ ਅਞ੍ਞਵਾਦਕਞ੍ਚ ਵਿਹੇਸਕਞ੍ਚ ਕਰੋਤਿ, ਅਥਸ੍ਸ ਤਸ੍ਮਿਂ ਅਞ੍ਞਵਾਦਕੇ ਚ ਵਿਹੇਸਕੇ ਚ ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ.

੧੦੨. ਅਜਾਨਨ੍ਤੋ ਪੁਚ੍ਛਤੀਤਿ ਆਪਤ੍ਤਿਂ ਵਾ ਆਪਨ੍ਨਭਾਵਂ ਅਜਾਨਨ੍ਤੋਯੇਵ ‘‘ਕਿਂ ਤੁਮ੍ਹੇ ਭਣਥ, ਅਹਂ ਨ ਜਾਨਾਮੀ’’ਤਿ ਪੁਚ੍ਛਤਿ. ਗਿਲਾਨੋ ਵਾ ਨ ਕਥੇਤੀਤਿ ਮੁਖੇ ਤਾਦਿਸੋ ਬ੍ਯਾਧਿ ਹੋਤਿ, ਯੇਨ ਕਥੇਤੁਂ ਨ ਸਕ੍ਕੋਤਿ. ਸਙ੍ਘਸ੍ਸ ਭਣ੍ਡਨਂ ਵਾਤਿਆਦੀਸੁ ਸਙ੍ਘਮਜ੍ਝੇ ਕਥਿਤੇ ਤਪ੍ਪਚ੍ਚਯਾ ਸਙ੍ਘਸ੍ਸ ਭਣ੍ਡਨਂ ਵਾ ਕਲਹੋ ਵਾ ਵਿਵਾਦੋ ਵਾ ਭਵਿਸ੍ਸਤਿ, ਸੋ ਮਾ ਅਹੋਸੀਤਿ ਮਞ੍ਞਮਾਨੋ ਨ ਕਥੇਤੀਤਿ ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਸੇਸਂ ਉਤ੍ਤਾਨਮੇਵਾਤਿ.

ਤਿਸਮੁਟ੍ਠਾਨਂ – ਕਾਯਚਿਤ੍ਤਤੋ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਸਿਯਾ ਕਿਰਿਯਂ, ਸਿਯਾ ਅਕਿਰਿਯਂ, ਅਞ੍ਞੇਨਞ੍ਞਂ ਪਟਿਚਰਨ੍ਤਸ੍ਸ ਹਿ ਕਿਰਿਯਂ ਹੋਤਿ, ਤੁਣ੍ਹੀਭਾਵੇਨ ਵਿਹੇਸਨ੍ਤਸ੍ਸ ਅਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਅਞ੍ਞਵਾਦਕਸਿਕ੍ਖਾਪਦਂ ਦੁਤਿਯਂ.

੩. ਉਜ੍ਝਾਪਨਕਸਿਕ੍ਖਾਪਦਵਣ੍ਣਨਾ

੧੦੩. ਤਤਿਯਸਿਕ੍ਖਾਪਦੇ – ਦਬ੍ਬਂ ਮਲ੍ਲਪੁਤ੍ਤਂ ਭਿਕ੍ਖੂ ਉਜ੍ਝਾਪੇਨ੍ਤੀਤਿ ‘‘ਛਨ੍ਦਾਯ ਦਬ੍ਬੋ ਮਲ੍ਲਪੁਤ੍ਤੋ’’ਤਿਆਦੀਨਿ ਵਦਨ੍ਤਾ ਤਂ ਆਯਸ੍ਮਨ੍ਤਂ ਤੇਹਿ ਭਿਕ੍ਖੂਹਿ ਅਵਜਾਨਾਪੇਨ੍ਤਿ, ਅਵਞ੍ਞਾਯ ਓਲੋਕਾਪੇਨ੍ਤਿ, ਲਾਮਕਤੋ ਵਾ ਚਿਨ੍ਤਾਪੇਨ੍ਤੀ’’ਤਿ ਅਤ੍ਥੋ. ਲਕ੍ਖਣਂ ਪਨੇਤ੍ਥ ਸਦ੍ਦਸਤ੍ਥਾਨੁਸਾਰੇਨ ਵੇਦਿਤਬ੍ਬਂ. ਓਜ੍ਝਾਪੇਨ੍ਤੀਤਿਪਿ ਪਾਠੋ. ਅਯਮੇਵਤ੍ਥੋ. ਛਨ੍ਦਾਯਾਤਿ ਛਨ੍ਦੇਨ ਪਕ੍ਖਪਾਤੇਨ; ਅਤ੍ਤਨੋ ਅਤ੍ਤਨੋ ਸਨ੍ਦਿਟ੍ਠਸਮ੍ਭਤ੍ਤਾਨਂ ਪਣੀਤਾਨਿ ਪਞ੍ਞਪੇਤੀਤਿ ਅਧਿਪ੍ਪਾਯੋ. ਖਿਯ੍ਯਨ੍ਤੀਤਿ ‘‘ਛਨ੍ਦਾਯ ਦਬ੍ਬੋ ਮਲ੍ਲਪੁਤ੍ਤੋ’’ਤਿਆਦੀਨਿ ਵਦਨ੍ਤਾ ਪਕਾਸੇਨ੍ਤਿ.

੧੦੫. ਉਜ੍ਝਾਪਨਕੇ ਖਿਯ੍ਯਨਕੇ ਪਾਚਿਤ੍ਤਿਯਨ੍ਤਿ ਏਤ੍ਥ ਯੇਨ ਵਚਨੇਨ ਉਜ੍ਝਾਪੇਨ੍ਤਿ, ਤਂ ਉਜ੍ਝਾਪਨਕਂ. ਯੇਨ ਚ ਖਿਯ੍ਯਨ੍ਤਿ ਤਂ ਖਿਯ੍ਯਨਕਂ. ਤਸ੍ਮਿਂ ਉਜ੍ਝਾਪਨਕੇ ਖਿਯ੍ਯਨਕੇ. ਪਾਚਿਤ੍ਤਿਯਨ੍ਤਿ ਵਤ੍ਥੁਦ੍ਵਯੇ ਪਾਚਿਤ੍ਤਿਯਦ੍ਵਯਂ ਵੁਤ੍ਤਂ.

੧੦੬. ਉਜ੍ਝਾਪਨਕਂ ਨਾਮ ਉਪਸਮ੍ਪਨ੍ਨਂ ਸਙ੍ਘੇਨ ਸਮ੍ਮਤਂ ਸੇਨਾਸਨਪਞ੍ਞਾਪਕਂ ਵਾ…ਪੇ… ਅਪ੍ਪਮਤ੍ਤਕਵਿਸ੍ਸਜ੍ਜਨਕਂ ਵਾਤਿ ਏਤੇਸਂ ਪਦਾਨਂ ‘‘ਮਙ੍ਕੁਕਤ੍ਤੁਕਾਮੋ’’ਤਿ ਇਮਿਨਾ ਸਮ੍ਬਨ੍ਧੋ. ਅਵਣ੍ਣਂ ਕਤ੍ਤੁਕਾਮੋ ਅਯਸਂ ਕਤ੍ਤੁਕਾਮੋਤਿ ਇਮੇਸਂ ਪਨ ਵਸੇਨ ਉਪਸਮ੍ਪਨ੍ਨਨ੍ਤਿਆਦੀਸੁ ‘‘ਉਪਸਮ੍ਪਨ੍ਨਸ੍ਸਾ’’ਤਿ ਏਵਂ ਵਿਭਤ੍ਤਿਵਿਪਰਿਣਾਮੋ ਕਾਤਬ੍ਬੋ. ਉਜ੍ਝਾਪੇਤਿ ਵਾ ਖਿਯ੍ਯਤਿ ਵਾ ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਏਤ੍ਥ ਪਨ ਯਸ੍ਮਾ ‘‘ਖਿਯ੍ਯਨਕਂ ਨਾਮਾ’’ਤਿ ਏਵਂ ਮਾਤਿਕਾਪਦਂ ਉਦ੍ਧਰਿਤ੍ਵਾਪਿ ‘‘ਉਜ੍ਝਾਪਨਕਂ ਨਾਮਾ’’ਤਿ ਇਮਸ੍ਸ ਪਦਸ੍ਸ ਵੁਤ੍ਤਵਿਭਙ੍ਗੋਯੇਵ ਵਤ੍ਤਬ੍ਬੋ ਹੋਤਿ, ਅਞ੍ਞਵਾਦਕਸਿਕ੍ਖਾਪਦੇ ਵਿਯ ਅਞ੍ਞੋ ਵਿਸੇਸੋ ਨਤ੍ਥਿ, ਤਸ੍ਮਾ ਤਂ ਵਿਸੁਂ ਅਨੁਦ੍ਧਰਿਤ੍ਵਾ ਅਵਿਭਜਿਤ੍ਵਾ ਨਿਗਮਨਮੇਵ ਏਕਤੋ ਕਤਨ੍ਤਿ ਵੇਦਿਤਬ੍ਬਂ. ਧਮ੍ਮਕਮ੍ਮੇ ਧਮ੍ਮਕਮ੍ਮਸਞ੍ਞੀਤਿਆਦੀਸੁ ਯਂ ਤਸ੍ਸ ਉਪਸਮ੍ਪਨ੍ਨਸ੍ਸ ਸਮ੍ਮੁਤਿਕਮ੍ਮਂ ਕਤਂ ਤਞ੍ਚੇ ਧਮ੍ਮਕਮ੍ਮਂ ਹੋਤਿ, ਸੋ ਚ ਭਿਕ੍ਖੁ ਤਸ੍ਮਿਂ ਧਮ੍ਮਕਮ੍ਮਸਞ੍ਞੀ ਉਜ੍ਝਾਪਨਕਞ੍ਚ ਖਿਯ੍ਯਨਕਞ੍ਚ ਕਰੋਤਿ, ਅਥਸ੍ਸ ਤਸ੍ਮਿਂ ਉਜ੍ਝਾਪਨਕੇ ਚ ਖਿਯ੍ਯਨਕੇ ਚ ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ.

ਅਨੁਪਸਮ੍ਪਨ੍ਨਂ ਉਜ੍ਝਾਪੇਤਿ ਵਾ ਖਿਯ੍ਯਤਿ ਵਾਤਿ ਏਤ੍ਥ ਉਪਸਮ੍ਪਨ੍ਨਂ ਸਙ੍ਘੇਨ ਸਮ੍ਮਤਂ ਅਞ੍ਞਂ ਅਨੁਪਸਮ੍ਪਨ੍ਨਂ ਉਜ੍ਝਾਪੇਤਿ ਅਵਜਾਨਾਪੇਤਿ, ਤਸ੍ਸ ਵਾ ਤਂ ਸਨ੍ਤਿਕੇ ਖਿਯ੍ਯਤੀਤਿ ਅਤ੍ਥੋ. ਉਪਸਮ੍ਪਨ੍ਨਂ ਸਙ੍ਘੇਨ ਅਸਮ੍ਮਤਨ੍ਤਿ ਕਮ੍ਮਵਾਚਾਯ ਅਸਮ੍ਮਤਂ ਕੇਵਲਂ ‘‘ਤਵੇਸੋ ਭਾਰੋ’’ਤਿ ਸਙ੍ਘੇਨ ਆਰੋਪਿਤਭਾਰਂ ਭਿਕ੍ਖੂਨਂ ਵਾ ਫਾਸੁਵਿਹਾਰਤ੍ਥਾਯ ਸਯਮੇਵ ਤਂ ਭਾਰਂ ਵਹਨ੍ਤਂ, ਯਤ੍ਰ ਵਾ ਦ੍ਵੇ ਤਯੋ ਭਿਕ੍ਖੂ ਵਿਹਰਨ੍ਤਿ, ਤਤ੍ਰ ਵਾ ਤਾਦਿਸਂ ਕਮ੍ਮਂ ਕਰੋਨ੍ਤਨ੍ਤਿ ਅਧਿਪ੍ਪਾਯੋ. ਅਨੁਪਸਮ੍ਪਨ੍ਨਂ ਸਙ੍ਘੇਨ ਸਮ੍ਮਤਂ ਵਾ ਅਸਮ੍ਮਤਂ ਵਾਤਿ ਏਤ੍ਥ ਪਨ ਕਿਞ੍ਚਾਪਿ ਅਨੁਪਸਮ੍ਪਨ੍ਨਸ੍ਸ ਤੇਰਸ ਸਮ੍ਮੁਤਿਯੋ ਦਾਤੁਂ ਨ ਵਟ੍ਟਨ੍ਤਿ. ਅਥ ਖੋ ਉਪਸਮ੍ਪਨ੍ਨਕਾਲੇ ਲਦ੍ਧਸਮ੍ਮੁਤਿਕੋ ਪਚ੍ਛਾ ਅਨੁਪਸਮ੍ਪਨ੍ਨਭਾਵੇ ਠਿਤੋ, ਤਂ ਸਨ੍ਧਾਯ ‘‘ਸਙ੍ਘੇਨ ਸਮ੍ਮਤਂ ਵਾ’’ਤਿ ਵੁਤ੍ਤਂ. ਯਸ੍ਸ ਪਨ ਬ੍ਯਤ੍ਤਸ੍ਸ ਸਾਮਣੇਰਸ੍ਸ ਕੇਵਲਂ ਸਙ੍ਘੇਨ ਵਾ ਸਮ੍ਮਤੇਨ ਵਾ ਭਿਕ੍ਖੁਨਾ ‘‘ਤ੍ਵਂ ਇਦਂ ਕਮ੍ਮਂ ਕਰੋਹੀ’’ਤਿ ਭਾਰੋ ਕਤੋ, ਤਾਦਿਸਂ ਸਨ੍ਧਾਯ ‘‘ਅਸਮ੍ਮਤਂ ਵਾ’’ਤਿ ਵੁਤ੍ਤਂ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.

ਤਿਸਮੁਟ੍ਠਾਨਂ – ਕਾਯਚਿਤ੍ਤਤੋ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਉਜ੍ਝਾਪਨਕਸਿਕ੍ਖਾਪਦਂ ਤਤਿਯਂ.

੪. ਪਠਮਸੇਨਾਸਨਸਿਕ੍ਖਾਪਦਵਣ੍ਣਨਾ

੧੦੮. ਚਤੁਤ੍ਥਸਿਕ੍ਖਾਪਦੇ – ਹੇਮਨ੍ਤਿਕੇ ਕਾਲੇਤਿ ਹੇਮਨ੍ਤਕਾਲੇ ਹਿਮਪਾਤਸਮਯੇ. ਕਾਯਂ ਓਤਾਪੇਨ੍ਤਾਤਿ ਮਞ੍ਚਪੀਠਾਦੀਸੁ ਨਿਸਿਨ੍ਨਾ ਬਾਲਾਤਪੇਨ ਕਾਯਂ ਓਤਾਪੇਨ੍ਤਾ. ਕਾਲੇ ਆਰੋਚਿਤੇਤਿ ਯਾਗੁਭਤ੍ਤਾਦੀਸੁ ਯਸ੍ਸ ਕਸ੍ਸਚਿ ਕਾਲੇ ਆਰੋਚਿਤੇ. ਓਵਟ੍ਠਂ ਹੋਤੀਤਿ ਹਿਮਵਸ੍ਸੇਨ ਓਵਟ੍ਠਂ ਤਿਨ੍ਤਂ ਹੋਤਿ.

੧੧੦. ਅਵਸ੍ਸਿਕਸਙ੍ਕੇਤੇਤਿ ਵਸ੍ਸਿਕਵਸ੍ਸਾਨਮਾਸਾਤਿ ਏਵਂ ਅਪਞ੍ਞਤ੍ਤੇ ਚਤ੍ਤਾਰੋ ਹੇਮਨ੍ਤਿਕੇ ਚਤ੍ਤਾਰੋ ਚ ਗਿਮ੍ਹਿਕੇ ਅਟ੍ਠ ਮਾਸੇਤਿ ਅਤ੍ਥੋ. ਮਣ੍ਡਪੇ ਵਾਤਿ ਸਾਖਾਮਣ੍ਡਪੇ ਵਾ ਪਦਰਮਣ੍ਡਪੇ ਵਾ. ਰੁਕ੍ਖਮੂਲੇ ਵਾਤਿ ਯਸ੍ਸ ਕਸ੍ਸਚਿ ਰੁਕ੍ਖਸ੍ਸ ਹੇਟ੍ਠਾ. ਯਤ੍ਥ ਕਾਕਾ ਵਾ ਕੁਲਲਾ ਵਾ ਨ ਊਹਦਨ੍ਤੀਤਿ ਯਤ੍ਥ ਧੁਵਨਿਵਾਸੇਨ ਕੁਲਾਵਕੇ ਕਤ੍ਵਾ ਵਸਮਾਨਾ ਏਤੇ ਕਾਕਕੁਲਲਾ ਵਾ ਅਞ੍ਞੇ ਵਾ ਸਕੁਨ੍ਤਾ ਤਂ ਸੇਨਾਸਨਂ ਨ ਊਹਦਨ੍ਤਿ, ਤਾਦਿਸੇ ਰੁਕ੍ਖਮੂਲੇ ਨਿਕ੍ਖਿਪਿਤੁਂ ਅਨੁਜਾਨਾਮੀਤਿ. ਤਸ੍ਮਾ ਯਤ੍ਥ ਗੋਚਰਪ੍ਪਸੁਤਾ ਸਕੁਨ੍ਤਾ ਵਿਸ੍ਸਮਿਤ੍ਵਾ ਗਚ੍ਛਨ੍ਤਿ, ਤਸ੍ਸ ਰੁਕ੍ਖਸ੍ਸ ਮੂਲੇ ਨਿਕ੍ਖਿਪਿਤੁਂ ਵਟ੍ਟਤਿ. ਯਸ੍ਮਿਂ ਪਨ ਧੁਵਨਿਵਾਸੇਨ ਕੁਲਾਵਕੇ ਕਤ੍ਵਾ ਵਸਨ੍ਤਿ, ਤਸ੍ਸ ਰੁਕ੍ਖਸ੍ਸ ਮੂਲੇ ਨ ਨਿਕ੍ਖਿਪਿਤਬ੍ਬਂ. ‘‘ਅਟ੍ਠ ਮਾਸੇ’’ਤਿ ਵਚਨਤੋ ਯੇਸੁ ਜਨਪਦੇਸੁ ਵਸ੍ਸਕਾਲੇ ਨ ਵਸ੍ਸਤਿ, ਤੇਸੁਪਿ ਚਤ੍ਤਾਰੋ ਮਾਸੇ ਨਿਕ੍ਖਿਪਿਤੁਂ ਨ ਵਟ੍ਟਤਿਯੇਵ. ‘‘ਅਵਸ੍ਸਿਕਸਙ੍ਕੇਤੇ’’ਤਿ ਵਚਨਤੋ ਯਤ੍ਥ ਹੇਮਨ੍ਤੇ ਦੇਵੋ ਵਸ੍ਸਤਿ, ਤਤ੍ਥ ਹੇਮਨ੍ਤੇਪਿ ਅਜ੍ਝੋਕਾਸੇ ਨਿਕ੍ਖਿਪਿਤੁਂ ਨ ਵਟ੍ਟਤਿ. ਗਿਮ੍ਹੇ ਪਨ ਸਬ੍ਬਤ੍ਥ ਵਿਗਤਵਲਾਹਕਂ ਵਿਸੁਦ੍ਧਂ ਨਭਂ ਹੋਤਿ, ਏਵਰੂਪੇ ਕਾਲੇ ਕੇਨਚਿਦੇਵ ਕਰਣੀਯੇਨ ਅਜ੍ਝੋਕਾਸੇ ਮਞ੍ਚਪੀਠਂ ਨਿਕ੍ਖਿਪਿਤੁਂ ਵਟ੍ਟਤਿ.

ਅਬ੍ਭੋਕਾਸਿਕੇਨਾਪਿ ਵਤ੍ਤਂ ਜਾਨਿਤਬ੍ਬਂ, ਤਸ੍ਸ ਹਿ ਸਚੇ ਪੁਗ੍ਗਲਿਕਮਞ੍ਚਕੋ ਅਤ੍ਥਿ, ਤਤ੍ਥੇਵ ਸਯਿਤਬ੍ਬਂ. ਸਙ੍ਘਿਕਂ ਗਣ੍ਹਨ੍ਤੇਨ ਵੇਤ੍ਤੇਨ ਵਾ ਵਾਕੇਨ ਵਾ ਵੀਤਮਞ੍ਚਕੋ ਗਹੇਤਬ੍ਬੋ. ਤਸ੍ਮਿਂ ਅਸਤਿ ਪੁਰਾਣਮਞ੍ਚਕੋ ਗਹੇਤਬ੍ਬੋ. ਤਸ੍ਮਿਮ੍ਪਿ ਅਸਤਿ ਨਵਵਾਯਿਮੋ ਵਾ ਓਨਦ੍ਧਕੋ ਵਾ ਗਹੇਤਬ੍ਬੋ. ਗਹੇਤ੍ਵਾ ਚ ਪਨ ‘‘ਅਹਂ ਉਕ੍ਕਟ੍ਠਰੁਕ੍ਖਮੂਲਿਕੋ ਉਕ੍ਕਟ੍ਠਅਬ੍ਭੋਕਾਸਿਕੋ’’ਤਿ ਚੀਵਰਕੁਟਿਮ੍ਪਿ ਅਕਤ੍ਵਾ ਅਸਮਯੇ ਅਜ੍ਝੋਕਾਸੇ ਰੁਕ੍ਖਮੂਲੇ ਵਾ ਪਞ੍ਞਪੇਤ੍ਵਾ ਨਿਪਜ੍ਜਿਤੁਂ ਨ ਵਟ੍ਟਤਿ. ਸਚੇ ਪਨ ਚਤੁਗ੍ਗੁਣੇਨਪਿ ਚੀਵਰੇਨ ਕਤਕੁਟਿ ਅਤੇਮੇਨ੍ਤਂ ਰਕ੍ਖਿਤੁਂ ਨ ਸਕ੍ਕੋਤਿ, ਸਤ੍ਤਾਹਵਦ੍ਦਲਿਕਾਦੀਨਿ ਭਵਨ੍ਤਿ, ਭਿਕ੍ਖੁਨੋ ਕਾਯਾਨੁਗਤਿਕਤ੍ਤਾ ਵਟ੍ਟਤਿ.

ਅਰਞ੍ਞੇ ਪਣ੍ਣਕੁਟੀਸੁ ਵਸਨ੍ਤਾਨਂ ਸੀਲਸਮ੍ਪਦਾਯ ਪਸਨ੍ਨਚਿਤ੍ਤਾ ਮਨੁਸ੍ਸਾ ਨਵਂ ਮਞ੍ਚਪੀਠਂ ਦੇਨ੍ਤਿ ‘‘ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਥਾ’’ਤਿ ਵਸਿਤ੍ਵਾ ਗਚ੍ਛਨ੍ਤੇਹਿ ਸਾਮਨ੍ਤਵਿਹਾਰੇ ਸਭਾਗਭਿਕ੍ਖੂਨਂ ਪੇਸੇਤ੍ਵਾ ਗਨ੍ਤਬ੍ਬਂ, ਸਭਾਗਾਨਂ ਅਭਾਵੇ ਅਨੋਵਸ੍ਸਕੇ ਨਿਕ੍ਖਿਪਿਤ੍ਵਾ ਗਨ੍ਤਬ੍ਬਂ, ਅਨੋਵਸ੍ਸਕੇ ਅਸਤਿ ਰੁਕ੍ਖੇ ਲਗ੍ਗੇਤ੍ਵਾ ਗਨ੍ਤਬ੍ਬਂ. ਚੇਤਿਯਙ੍ਗਣੇ ਸਮ੍ਮਜ੍ਜਨਿਂ ਗਹੇਤ੍ਵਾ ਭੋਜਨਸਾਲਙ੍ਗਣਂ ਵਾ ਉਪੋਸਥਾਗਾਰਙ੍ਗਣਂ ਵਾ ਪਰਿਵੇਣਦਿਵਾਟ੍ਠਾਨਅਗ੍ਗਿਸਾਲਾਦੀਸੁ ਵਾ ਅਞ੍ਞਤਰਂ ਸਮ੍ਮਜ੍ਜਿਤ੍ਵਾ ਧੋਵਿਤ੍ਵਾ ਪੁਨ ਸਮ੍ਮਜ੍ਜਨੀਮਾਲ਼ਕੇਯੇਵ ਠਪੇਤਬ੍ਬਾ. ਉਪੋਸਥਾਗਾਰਾਦੀਸੁ ਅਞ੍ਞਤਰਸ੍ਮਿਂ ਗਹੇਤ੍ਵਾ ਅਵਸੇਸਾਨਿ ਸਮ੍ਮਜ੍ਜਨ੍ਤਸ੍ਸਾਪਿ ਏਸੇਵ ਨਯੋ.

ਯੋ ਪਨ ਭਿਕ੍ਖਾਚਾਰਮਗ੍ਗਂ ਸਮ੍ਮਜ੍ਜਨ੍ਤੋਵ ਗਨ੍ਤੁਕਾਮੋ ਹੋਤਿ, ਤੇਨ ਸਮ੍ਮਜ੍ਜਿਤ੍ਵਾ ਸਚੇ ਅਨ੍ਤਰਾਮਗ੍ਗੇ ਸਾਲਾ ਅਤ੍ਥਿ, ਤਤ੍ਥ ਠਪੇਤਬ੍ਬਾ. ਸਚੇ ਨਤ੍ਥਿ, ਵਲਾਹਕਾਨਂ ਅਨੁਟ੍ਠਿਤਭਾਵਂ ਸਲ੍ਲਕ੍ਖੇਤ੍ਵਾ ‘‘ਯਾਵਾਹਂ ਗਾਮਤੋ ਨਿਕ੍ਖਮਾਮਿ, ਤਾਵ ਨ ਵਸ੍ਸਿਸ੍ਸਤੀ’’ਤਿ ਜਾਨਨ੍ਤੇਨ ਯਤ੍ਥ ਕਤ੍ਥਚਿ ਨਿਕ੍ਖਿਪਿਤ੍ਵਾ ਪੁਨ ਪਚ੍ਚਾਗਚ੍ਛਨ੍ਤੇਨ ਪਾਕਤਿਕਟ੍ਠਾਨੇ ਠਪੇਤਬ੍ਬਾ. ਸਚੇ ਵਸ੍ਸਿਸ੍ਸਤੀਤਿ ਜਾਨਨ੍ਤੋ ਅਜ੍ਝੋਕਾਸੇ ਠਪੇਤਿ, ਦੁਕ੍ਕਟਨ੍ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਸਚੇ ਪਨ ਤਤ੍ਰ ਤਤ੍ਰੇਵ ਸਮ੍ਮਜ੍ਜਨਤ੍ਥਾਯ ਸਮ੍ਮਜ੍ਜਨੀ ਨਿਕ੍ਖਿਤ੍ਤਾ ਹੋਤਿ, ਤਂ ਤਂ ਠਾਨਂ ਸਮ੍ਮਜ੍ਜਿਤ੍ਵਾ ਤਤ੍ਰ ਤਤ੍ਰੇਵ ਨਿਕ੍ਖਿਪਿਤੁਂ ਵਟ੍ਟਤਿ. ਆਸਨਸਾਲਂ ਸਮ੍ਮਜ੍ਜਨ੍ਤੇਨ ਵਤ੍ਤਂ ਜਾਨਿਤਬ੍ਬਂ. ਤਤ੍ਰਿਦਂ ਵਤ੍ਤਂ – ਮਜ੍ਝਤੋ ਪਟ੍ਠਾਯ ਪਾਦਟ੍ਠਾਨਾਭਿਮੁਖਾ ਵਾਲਿਕਾ ਹਰਿਤਬ੍ਬਾ. ਕਚਵਰਂ ਹਤ੍ਥੇਹਿ ਗਹੇਤ੍ਵਾ ਬਹਿ ਛਡ੍ਡੇਤਬ੍ਬਂ.

੧੧੧. ਮਸਾਰਕੋਤਿ ਮਞ੍ਚਪਾਦੇ ਵਿਜ੍ਝਿਤ੍ਵਾ ਤਤ੍ਥ ਅਟਨਿਯੋ ਪਵੇਸੇਤ੍ਵਾ ਕਤੋ. ਬੁਨ੍ਦਿਕਾਬਦ੍ਧੋਤਿ ਅਟਨੀਹਿ ਮਞ੍ਚਪਾਦੇ ਡਂਸਾਪੇਤ੍ਵਾ ਪਲ੍ਲਙ੍ਕਸਙ੍ਖੇਪੇਨ ਕਤੋ. ਕੁਲ਼ੀਰਪਾਦਕੋਤਿ ਅਸ੍ਸਮੇਣ੍ਡਕਾਦੀਨਂ ਪਾਦਸਦਿਸੇਹਿ ਪਾਦੇਹਿ ਕਤੋ. ਯੋ ਵਾ ਪਨ ਕੋਚਿ ਵਙ੍ਕਪਾਦਕੋ, ਅਯਂ ਵੁਚ੍ਚਤਿ ਕੁਲ਼ੀਰਪਾਦਕੋ. ਆਹਚ੍ਚਪਾਦਕੋਤਿ ਅਯਂ ਪਨ ‘‘ਆਹਚ੍ਚਪਾਦਕੋ ਨਾਮ ਮਞ੍ਚੋ ਅਙ੍ਗੇ ਵਿਜ੍ਝਿਤ੍ਵਾ ਕਤੋ ਹੋਤੀ’’ਤਿ ਏਵਂ ਪਰਤੋ ਪਾਲ਼ਿਯਂਯੇਵ ਵੁਤ੍ਤੋ, ਤਸ੍ਮਾ ਅਟਨਿਯੋ ਵਿਜ੍ਝਿਤ੍ਵਾ ਤਤ੍ਥ ਪਾਦਸਿਖਂ ਪਵੇਸੇਤ੍ਵਾ ਉਪਰਿ ਆਣਿਂ ਦਤ੍ਵਾ ਕਤਮਞ੍ਚੋ ‘‘ਆਹਚ੍ਚਪਾਦਕੋ’’ਤਿ ਵੇਦਿਤਬ੍ਬੋ. ਪੀਠੇਪਿ ਏਸੇਵ ਨਯੋ. ਅਨ੍ਤੋ ਸਂਵੇਠੇਤ੍ਵਾ ਬਦ੍ਧਂ ਹੋਤੀਤਿ ਹੇਟ੍ਠਾ ਚ ਉਪਰਿ ਚ ਵਿਤ੍ਥਤਂ ਮਜ੍ਝੇ ਸਙ੍ਖਿਤ੍ਤਂ ਪਣਵਸਣ੍ਠਾਨਂ ਕਤ੍ਵਾ ਬਦ੍ਧਂ ਹੋਤਿ, ਤਂ ਕਿਰ ਮਜ੍ਝੇ ਸੀਹਬ੍ਯਗ੍ਘਚਮ੍ਮਪਰਿਕ੍ਖਿਤ੍ਤਮ੍ਪਿ ਕਰੋਨ੍ਤਿ. ਅਕਪ੍ਪਿਯਚਮ੍ਮਂ ਨਾਮੇਤ੍ਥ ਨਤ੍ਥਿ. ਸੇਨਾਸਨਞ੍ਹਿ ਸੋਵਣ੍ਣਮਯਮ੍ਪਿ ਵਟ੍ਟਤਿ, ਤਸ੍ਮਾ ਤਂ ਮਹਗ੍ਘਂ ਹੋਤਿ. ਅਨੁਪਸਮ੍ਪਨ੍ਨਂ ਸਨ੍ਥਰਾਪੇਤਿ ਤਸ੍ਸ ਪਲਿਬੋਧੋਤਿ ਯੇਨ ਸਨ੍ਥਰਾਪਿਤਂ, ਤਸ੍ਸ ਪਲਿਬੋਧੋ. ਲੇਡ੍ਡੁਪਾਤਂ ਅਤਿਕ੍ਕਮਨ੍ਤਸ੍ਸ ਆਪਤ੍ਤਿ ਪਾਚਿਤ੍ਤਿਯਸ੍ਸਾਤਿ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤਂ ਅਤਿਕ੍ਕਮਨ੍ਤਸ੍ਸ ਪਾਚਿਤ੍ਤਿਯਂ.

ਅਯਂ ਪਨੇਤ੍ਥ ਵਿਨਿਚ੍ਛਯੋ – ਥੇਰੋ ਭੋਜਨਸਾਲਾਯਂ ਭਤ੍ਤਕਿਚ੍ਚਂ ਕਤ੍ਵਾ ਦਹਰਂ ਆਣਾਪੇਤਿ ‘‘ਗਚ੍ਛ ਦਿਵਾਟ੍ਠਾਨੇ ਮਞ੍ਚਪੀਠਂ ਪਞ੍ਞਪੇਹੀ’’ਤਿ. ਸੋ ਤਥਾ ਕਤ੍ਵਾ ਨਿਸਿਨ੍ਨੋ. ਥੇਰੋ ਯਥਾਰੁਚਿਂ ਵਿਚਰਿਤ੍ਵਾ ਤਤ੍ਥ ਗਨ੍ਤ੍ਵਾ ਥਵਿਕਂ ਵਾ ਉਤ੍ਤਰਾਸਙ੍ਗਂ ਵਾ ਠਪੇਤਿ, ਤਤੋ ਪਟ੍ਠਾਯ ਥੇਰਸ੍ਸ ਪਲਿਬੋਧੋ. ਨਿਸੀਦਿਤ੍ਵਾ ਸਯਂ ਗਚ੍ਛਨ੍ਤੋ ਨੇਵ ਉਦ੍ਧਰਤਿ, ਨ ਉਦ੍ਧਰਾਪੇਤਿ, ਲੇਡ੍ਡੁਪਾਤਾਤਿਕ੍ਕਮੇ ਪਾਚਿਤ੍ਤਿਯਂ. ਸਚੇ ਪਨ ਥੇਰੋ ਤਤ੍ਥ ਥਵਿਕਂ ਵਾ ਉਤ੍ਤਰਾਸਙ੍ਗਂ ਵਾ ਅਟ੍ਠਪੇਤ੍ਵਾ ਚਙ੍ਕਮਨ੍ਤੋਵ ਦਹਰਂ ‘‘ਗਚ੍ਛ ਤ੍ਵ’’ਨ੍ਤਿ ਭਣਤਿ, ਤੇਨ ‘‘ਇਦਂ ਭਨ੍ਤੇ ਮਞ੍ਚਪੀਠ’’ਨ੍ਤਿ ਆਚਿਕ੍ਖਿਤਬ੍ਬਂ. ਸਚੇ ਥੇਰੋ ਵਤ੍ਤਂ ਜਾਨਾਤਿ ‘‘ਤ੍ਵਂ ਗਚ੍ਛ, ਅਹਂ ਪਾਕਤਿਕਂ ਕਰਿਸ੍ਸਾਮੀ’’ਤਿ ਵਤ੍ਤਬ੍ਬਂ. ਸਚੇ ਬਾਲੋ ਹੋਤਿ ਅਨੁਗ੍ਗਹਿਤਵਤ੍ਤੋ ‘‘ਗਚ੍ਛ, ਮਾ ਇਧ ਤਿਟ੍ਠ, ਨੇਵ ਨਿਸੀਦਿਤੁਂ ਨ ਨਿਪਜ੍ਜਿਤੁਂ ਦੇਮੀ’’ਤਿ ਦਹਰਂ ਤਜ੍ਜੇਤਿਯੇਵ. ਦਹਰੇਨ ‘‘ਭਨ੍ਤੇ ਸੁਖਂ ਸਯਥਾ’’ਤਿ ਕਪ੍ਪਂ ਲਭਿਤ੍ਵਾ ਵਨ੍ਦਿਤ੍ਵਾ ਗਨ੍ਤਬ੍ਬਂ. ਤਸ੍ਮਿਂ ਗਤੇ ਥੇਰਸ੍ਸੇਵ ਪਲਿਬੋਧੋ. ਪੁਰਿਮਨਯੇਨੇਵ ਚਸ੍ਸ ਆਪਤ੍ਤਿ ਵੇਦਿਤਬ੍ਬਾ.

ਅਥ ਪਨ ਆਣਤ੍ਤਿਕ੍ਖਣੇਯੇਵ ਦਹਰੋ ‘‘ਮਯ੍ਹਂ ਭਨ੍ਤੇ ਭਣ੍ਡਕਧੋਵਨਾਦਿ ਕਿਞ੍ਚਿ ਕਰਣੀਯਂ ਅਤ੍ਥੀ’’ਤਿ ਵਦਤਿ, ਥੇਰੋ ਚ ਨਂ ‘‘ਤ੍ਵਂ ਪਞ੍ਞਪੇਤ੍ਵਾ ਗਚ੍ਛਾਹੀ’’ਤਿ ਵਤ੍ਵਾ ਭੋਜਨਸਾਲਤੋ ਨਿਕ੍ਖਮਿਤ੍ਵਾ ਅਞ੍ਞਤ੍ਥ ਗਚ੍ਛਤਿ, ਪਾਦੁਦ੍ਧਾਰੇਨ ਕਾਰੇਤਬ੍ਬੋ. ਸਚੇ ਤਤ੍ਥੇਵ ਗਨ੍ਤ੍ਵਾ ਨਿਸੀਦਤਿ ਪੁਰਿਮਨਯੇਨੇਵ ਚਸ੍ਸ ਲੇਡ੍ਡੁਪਾਤਾਤਿਕ੍ਕਮੇ ਆਪਤ੍ਤਿ. ਸਚੇ ਪਨ ਥੇਰੋ ਸਾਮਣੇਰਂ ਆਣਾਪੇਤਿ, ਸਾਮਣੇਰੇ ਤਤ੍ਥ ਮਞ੍ਚਪੀਠਂ ਪਞ੍ਞਪੇਤ੍ਵਾ ਨਿਸਿਨ੍ਨੇਪਿ ਭੋਜਨਸਾਲਤੋ ਅਞ੍ਞਤ੍ਥ ਗਚ੍ਛਨ੍ਤੋ ਪਾਦੁਦ੍ਧਾਰੇਨ ਕਾਰੇਤਬ੍ਬੋ. ਗਨ੍ਤ੍ਵਾ ਨਿਸਿਨ੍ਨੋ ਪੁਨ ਗਮਨਕਾਲੇ ਲੇਡ੍ਡੁਪਾਤਾਤਿਕ੍ਕਮੇ ਆਪਤ੍ਤਿਯਾ ਕਾਰੇਤਬ੍ਬੋ. ਸਚੇ ਪਨ ਆਣਾਪੇਨ੍ਤੋ ਮਞ੍ਚਪੀਠਂ ਪਞ੍ਞਪੇਤ੍ਵਾ ਤਤ੍ਥੇਵ ਨਿਸੀਦਾਤਿ ਆਣਾਪੇਤਿ, ਯਤ੍ਰਿਚ੍ਛਤਿ ਤਤ੍ਰ ਗਨ੍ਤ੍ਵਾ ਆਗਨ੍ਤੁਂ ਲਭਤਿ. ਸਯਂ ਪਨ ਪਾਕਤਿਕਂ ਅਕਤ੍ਵਾ ਗਚ੍ਛਨ੍ਤਸ੍ਸ ਲੇਡ੍ਡੁਪਾਤਾਤਿਕ੍ਕਮੇ ਪਾਚਿਤ੍ਤਿਯਂ. ਅਨ੍ਤਰਸਨ੍ਨਿਪਾਤੇ ਮਞ੍ਚਪੀਠਾਨਿ ਪਞ੍ਞਪੇਤ੍ਵਾ ਨਿਸਿਨ੍ਨੇਹਿ ਗਮਨਕਾਲੇ ਆਰਾਮਿਕਾਨਂ ਇਮਂ ਪਟਿਸਾਮੇਥਾਤਿ ਵਤ੍ਤਬ੍ਬਂ, ਅਵਤ੍ਵਾ ਗਚ੍ਛਨ੍ਤਾਨਂ ਲੇਡ੍ਡੁਪਾਤਾਤਿਕ੍ਕਮੇ ਆਪਤ੍ਤਿ.

ਮਹਾਧਮ੍ਮਸਵਨਂ ਨਾਮ ਹੋਤਿ ਤਤ੍ਥ ਉਪੋਸਥਾਗਾਰਤੋਪਿ ਭੋਜਨਸਾਲਤੋਪਿ ਆਹਰਿਤ੍ਵਾ ਮਞ੍ਚਪੀਠਾਨਿ ਪਞ੍ਞਪੇਨ੍ਤਿ. ਆਵਾਸਿਕਾਨਂਯੇਵ ਪਲਿਬੋਧੋ. ਸਚੇ ਆਗਨ੍ਤੁਕਾ ‘‘ਇਦਂ ਅਮ੍ਹਾਕਂ ਉਪਜ੍ਝਾਯਸ੍ਸ ਇਦਂ ਆਚਰਿਯਸ੍ਸਾ’’ਤਿ ਗਣ੍ਹਨ੍ਤਿ, ਤਤੋ ਪਟ੍ਠਾਯ ਤੇਸਂਯੇਵ ਪਲਿਬੋਧੋ. ਗਮਨਕਾਲੇ ਪਾਕਤਿਕਂ ਅਕਤ੍ਵਾ ਲੇਡ੍ਡੁਪਾਤਂ ਅਤਿਕ੍ਕਮਨ੍ਤਾਨਂ ਆਪਤ੍ਤਿ. ਮਹਾਪਚ੍ਚਰਿਯਂ ਪੁਨ ਵੁਤ੍ਤਂ – ‘‘ਯਾਵ ਅਞ੍ਞੇ ਨ ਨਿਸੀਦਨ੍ਤਿ, ਤਾਵ ਯੇਹਿ ਪਞ੍ਞਤ੍ਤਂ, ਤੇਸਂ ਭਾਰੋ. ਅਞ੍ਞੇਸੁ ਆਗਨ੍ਤ੍ਵਾ ਨਿਸਿਨ੍ਨੇਸੁ ਨਿਸਿਨ੍ਨਕਾਨਂ ਭਾਰੋ. ਸਚੇ ਤੇ ਅਨੁਦ੍ਧਰਿਤ੍ਵਾ ਵਾ ਅਨੁਦ੍ਧਰਾਪੇਤ੍ਵਾ ਵਾ ਗਚ੍ਛਨ੍ਤਿ, ਦੁਕ੍ਕਟਂ. ਕਸ੍ਮਾ? ਅਨਾਣਤ੍ਤਿਯਾ ਪਞ੍ਞਪਿਤਤ੍ਤਾ’’ਤਿ. ਧਮ੍ਮਾਸਨੇ ਪਞ੍ਞਤ੍ਤੇ ਯਾਵ ਉਸ੍ਸਾਰਕੋ ਵਾ ਧਮ੍ਮਕਥਿਕੋ ਵਾ ਨਾਗਚ੍ਛਤਿ, ਤਾਵ ਪਞ੍ਞਾਪਕਾਨਂ ਪਲਿਬੋਧੋ, ਤਸ੍ਮਿਂ ਆਗਨ੍ਤ੍ਵਾ ਨਿਸਿਨ੍ਨੇ ਤਸ੍ਸ ਪਲਿਬੋਧੋ. ਸਕਲਂ ਅਹੋਰਤ੍ਤਂ ਧਮ੍ਮਸਵਨਂ ਹੋਤਿ, ਅਞ੍ਞੋ ਉਸ੍ਸਾਰਕੋ ਵਾ ਧਮ੍ਮਕਥਿਕੋ ਵਾ ਉਟ੍ਠਹਤਿ, ਅਞ੍ਞੋ ਨਿਸੀਦਤਿ, ਯੋ ਯੋ ਆਗਨ੍ਤ੍ਵਾ ਨਿਸੀਦਤਿ, ਤਸ੍ਸ ਤਸ੍ਸ ਭਾਰੋ. ਉਟ੍ਠਹਨ੍ਤੇਨ ਪਨ ‘‘ਇਦਮਾਸਨਂ ਤੁਮ੍ਹਾਕਂ ਭਾਰੋ’’ਤਿ ਵਤ੍ਵਾ ਗਨ੍ਤਬ੍ਬਂ. ਸਚੇਪਿ ਇਤਰਸ੍ਮਿਂ ਅਨਾਗਤੇਯੇਵ ਪਠਮਂ ਨਿਸਿਨ੍ਨੋ ਉਟ੍ਠਾਯ ਗਚ੍ਛਤਿ, ਤਸ੍ਮਿਞ੍ਚ ਅਨ੍ਤੋਉਪਚਾਰਟ੍ਠੇਯੇਵ ਇਤਰੋ ਆਗਨ੍ਤ੍ਵਾ ਨਿਸੀਦਤਿ, ਉਟ੍ਠਾਯ ਗਤੋ ਆਪਤ੍ਤਿਯਾ ਨ ਕਾਰੇਤਬ੍ਬੋ. ਸਚੇ ਪਨ ਇਤਰਸ੍ਮਿਂ ਅਨਾਗਤੇਯੇਵ ਪਠਮਂ ਨਿਸਿਨ੍ਨੋ ਉਟ੍ਠਾਯਾਸਨਾ ਲੇਡ੍ਡੁਪਾਤਂ ਅਤਿਕ੍ਕਮਤਿ, ਆਪਤ੍ਤਿਯਾ ਕਾਰੇਤਬ੍ਬੋ. ਸਬ੍ਬਤ੍ਥ ਚ ‘‘ਲੇਡ੍ਡੁਪਾਤਾਤਿਕ੍ਕਮੇ ਪਠਮਪਾਦੇ ਦੁਕ੍ਕਟਂ, ਦੁਤਿਯੇ ਪਾਚਿਤ੍ਤਿਯ’’ਨ੍ਤਿ ਅਯਂ ਨਯੋ ਮਹਾਪਚ੍ਚਰਿਯਂ ਵੁਤ੍ਤੋ.

੧੧੨. ਚਿਮਿਲਿਕਂ ਵਾਤਿਆਦੀਸੁ ਚਿਮਿਲਿਕਾ ਨਾਮ ਸੁਧਾਦਿਪਰਿਕਮ੍ਮਕਤਾਯ ਭੂਮਿਯਾ ਵਣ੍ਣਾਨੁਰਕ੍ਖਣਤ੍ਥਂ ਕਤਾ ਹੋਤਿ, ਤਂ ਹੇਟ੍ਠਾ ਪਤ੍ਥਰਿਤ੍ਵਾ ਉਪਰਿ ਕਟਸਾਰਕਂ ਪਤ੍ਥਰਨ੍ਤਿ. ਉਤ੍ਤਰਤ੍ਥਰਣਂ ਨਾਮ ਮਞ੍ਚਪੀਠਾਨਂ ਉਪਰਿ ਅਤ੍ਥਰਿਤਬ੍ਬਕਂ ਪਚ੍ਚਤ੍ਥਰਣਂ. ਭੂਮਤ੍ਥਰਣਂ ਨਾਮ ਭੂਮਿਯਂ ਅਤ੍ਥਰਿਤਬ੍ਬਾ ਕਟਸਾਰਕਾਦਿਵਿਕਤਿ. ਤਟ੍ਟਿਕਂ ਨਾਮ ਤਾਲਪਣ੍ਣੇਹਿ ਵਾ ਵਾਕੇਹਿ ਵਾ ਕਤਤਟ੍ਟਿਕਾ. ਚਮ੍ਮਖਣ੍ਡੋ ਨਾਮ ਸੀਹਬ੍ਯਗ੍ਘਦੀਪਿਤਰਚ੍ਛਚਮ੍ਮਾਦੀਸੁਪਿ ਯਂਕਿਞ੍ਚਿ ਚਮ੍ਮਂ. ਅਟ੍ਠਕਥਾਸੁ ਹਿ ਸੇਨਾਸਨਪਰਿਭੋਗੇ ਪਟਿਕ੍ਖਿਤ੍ਤਚਮ੍ਮਂ ਨਾਮ ਨ ਦਿਸ੍ਸਤਿ, ਤਸ੍ਮਾ ਸੀਹਚਮ੍ਮਾਦੀਨਂ ਪਰਿਹਰਣੇਯੇਵ ਪਟਿਕ੍ਖੇਪੋ ਵੇਦਿਤਬ੍ਬੋ. ਪਾਦਪੁਞ੍ਛਨੀ ਨਾਮ ਰਜ੍ਜੁਕੇਹਿ ਵਾ ਪਿਲੋਤਿਕਾਹਿ ਵਾ ਪਾਦਪੁਞ੍ਛਨਤ੍ਥਂ ਕਤਾ. ਫਲਕਪੀਠਂ ਨਾਮ ਫਲਕਮਯਂ ਪੀਠਂ. ਅਥ ਵਾ ਫਲਕਞ੍ਚੇਵ ਦਾਰੁਮਯਪੀਠਞ੍ਚ; ਏਤੇਨ ਸਬ੍ਬਮ੍ਪਿ ਦਾਰੁਭਣ੍ਡਾਦਿ ਸਙ੍ਗਹਿਤਂ. ਮਹਾਪਚ੍ਚਰਿਯਂ ਪਨ ਵਿਤ੍ਥਾਰੇਨੇਵ ਵੁਤ੍ਤਂ – ‘‘ਆਧਾਰਕਂ ਪਤ੍ਤਪਿਧਾਨਂ ਪਾਦਕਥਲਿਕਂ ਤਾਲਵਣ੍ਟਂ ਬੀਜਨੀਪਤ੍ਤਕਂ ਯਂਕਿਞ੍ਚਿ ਦਾਰੁਭਣ੍ਡਂ ਅਨ੍ਤਮਸੋ ਪਾਨੀਯਉਲ਼ੁਙ੍ਕਂ ਪਾਨੀਯਸਙ੍ਖਂ ਅਜ੍ਝੋਕਾਸੇ ਨਿਕ੍ਖਿਪਿਤ੍ਵਾ ਗਚ੍ਛਨ੍ਤਸ੍ਸ ਦੁਕ੍ਕਟ’’ਨ੍ਤਿ. ਮਹਾਅਟ੍ਠਕਥਾਯਂ ਪਨ ਏਸ ਨਯੋ ਦੁਤਿਯਸਿਕ੍ਖਾਪਦੇ ਦਸ੍ਸਿਤੋ. ਅਜ੍ਝੋਕਾਸੇ ਰਜਨਂ ਪਚਿਤ੍ਵਾ ਰਜਨਭਾਜਨਂ ਰਜਨਉਲ਼ੁਙ੍ਕੋ ਰਜਨਦੋਣਿਕਾਤਿ ਸਬ੍ਬਂ ਅਗ੍ਗਿਸਾਲਾਯ ਪਟਿਸਾਮੇਤਬ੍ਬਂ. ਸਚੇ ਅਗ੍ਗਿਸਾਲਾ ਨਤ੍ਥਿ, ਅਨੋਵਸ੍ਸਕੇ ਪਬ੍ਭਾਰੇ ਨਿਕ੍ਖਿਪਿਤਬ੍ਬਂ. ਤਸ੍ਮਿਮ੍ਪਿ ਅਸਤਿ ਯਤ੍ਥ ਓਲੋਕੇਨ੍ਤਾ ਭਿਕ੍ਖੂ ਪਸ੍ਸਨ੍ਤਿ, ਤਾਦਿਸੇ ਠਾਨੇ ਠਪੇਤ੍ਵਾਪਿ ਗਨ੍ਤੁਂ ਵਟ੍ਟਤਿ.

ਅਞ੍ਞਸ੍ਸ ਪੁਗ੍ਗਲਿਕੇਤਿ ਯਸ੍ਮਿਂ ਵਿਸ੍ਸਾਸਗ੍ਗਾਹੋ ਨ ਰੁਹਤਿ, ਤਸ੍ਸ ਸਨ੍ਤਕੇ ਦੁਕ੍ਕਟਂ. ਯਸ੍ਮਿਂ ਪਨ ਵਿਸ੍ਸਾਸੋ ਰੁਹਤਿ, ਤਸ੍ਸ ਸਨ੍ਤਕਂ ਅਤ੍ਤਨੋ ਪੁਗ੍ਗਲਿਕਮਿਵ ਹੋਤੀਤਿ ਮਹਾਪਚ੍ਚਰਿਯਾਦੀਸੁ ਵੁਤ੍ਤਂ.

੧੧੩. ਆਪੁਚ੍ਛਂ ਗਚ੍ਛਤੀਤਿ ਯੋ ਭਿਕ੍ਖੁ ਵਾ ਸਾਮਣੇਰੋ ਵਾ ਆਰਾਮਿਕੋ ਵਾ ਲਜ੍ਜੀ ਹੋਤਿ, ਅਤ੍ਤਨੋ ਪਲਿਬੋਧਂ ਵਿਯ ਮਞ੍ਞਤਿ, ਯੋ ਤਥਾਰੂਪਂ ਆਪੁਚ੍ਛਿਤ੍ਵਾ ਗਚ੍ਛਤਿ, ਤਸ੍ਸ ਅਨਾਪਤ੍ਤਿ. ਓਤਾਪੇਨ੍ਤੋ ਗਚ੍ਛਤੀਤਿ ਆਤਪੇ ਓਤਾਪੇਨ੍ਤੋ ਆਗਨ੍ਤ੍ਵਾ ਉਦ੍ਧਰਿਸ੍ਸਾਮੀਤਿ ਗਚ੍ਛਤਿ; ਏਵਂ ਗਚ੍ਛਤੋ ਅਨਾਪਤ੍ਤਿ. ਕੇਨਚਿ ਪਲਿਬੁਦ੍ਧਂ ਹੋਤੀਤਿ ਸੇਨਾਸਨਂ ਕੇਨਚਿ ਉਪਦ੍ਦੁਤਂ ਹੋਤੀਤਿ ਅਤ੍ਥੋ. ਸਚੇਪਿ ਹਿ ਵੁਡ੍ਢਤਰੋ ਭਿਕ੍ਖੁ ਉਟ੍ਠਾਪੇਤ੍ਵਾ ਗਣ੍ਹਾਤਿ, ਸਚੇਪਿ ਯਕ੍ਖੋ ਵਾ ਪੇਤੋ ਵਾ ਆਗਨ੍ਤ੍ਵਾ ਨਿਸੀਦਤਿ, ਕੋਚਿ ਵਾ ਇਸ੍ਸਰੋ ਆਗਨ੍ਤ੍ਵਾ ਗਣ੍ਹਾਤਿ, ਸੇਨਾਸਨਂ ਪਲਿਬੁਦ੍ਧਂ ਹੋਤਿ, ਸੀਹਬ੍ਯਗ੍ਘਾਦੀਸੁ ਵਾ ਪਨ ਤਂ ਪਦੇਸਂ ਆਗਨ੍ਤ੍ਵਾ ਠਿਤੇਸੁਪਿ ਸੇਨਾਸਨਂ ਪਲਿਬੁਦ੍ਧਂ ਹੋਤਿਯੇਵ. ਏਵਂ ਕੇਨਚਿ ਪਲਿਬੁਦ੍ਧੇ ਅਨੁਦ੍ਧਰਿਤ੍ਵਾਪਿ ਗਚ੍ਛਤੋ ਅਨਾਪਤ੍ਤਿ. ਆਪਦਾਸੂਤਿ ਜੀਵਿਤਬ੍ਰਹ੍ਮਚਰਿਯਨ੍ਤਰਾਯੇਸੁ. ਸੇਸਂ ਉਤ੍ਤਾਨਮੇਵਾਤਿ.

ਕਥਿਨਸਮੁਟ੍ਠਾਨਂ – ਕਾਯਵਾਚਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਾਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਪਠਮਸੇਨਾਸਨਸਿਕ੍ਖਾਪਦਂ ਚਤੁਤ੍ਥਂ.

੫. ਦੁਤਿਯਸੇਨਾਸਨਸਿਕ੍ਖਾਪਦਵਣ੍ਣਨਾ

੧੧੬. ਦੁਤਿਯਸੇਨਾਸਨਸਿਕ੍ਖਾਪਦੇ – ਭਿਸੀਤਿ ਮਞ੍ਚਕਭਿਸਿ ਵਾ ਪੀਠਕਭਿਸਿ ਵਾ. ਚਿਮਿਲਿਕਾਦੀਨਿਪਿ ਪੁਰਿਮਸਿਕ੍ਖਾਪਦੇ ਵੁਤ੍ਤਪ੍ਪਕਾਰਾਨਿਯੇਵ. ਨਿਸੀਦਨਨ੍ਤਿ ਸਦਸਂ ਵੇਦਿਤਬ੍ਬਂ. ਪਚ੍ਚਤ੍ਥਰਣਨ੍ਤਿ ਪਾਵਾਰੋ ਕੋਜਵੋਤਿ ਏਤ੍ਤਕਮੇਵ ਵੁਤ੍ਤਂ. ਤਿਣਸਨ੍ਥਾਰੋਤਿ ਯੇਸਂ ਕੇਸਞ੍ਚਿ ਤਿਣਾਨਂ ਸਨ੍ਥਾਰੋ. ਏਸ ਨਯੋ ਪਣ੍ਣਸਨ੍ਥਾਰੇ. ਪਰਿਕ੍ਖੇਪਂ ਅਤਿਕ੍ਕਮਨ੍ਤਸ੍ਸਾਤਿ ਏਤ੍ਥ ਪਠਮਪਾਦਂ ਅਤਿਕ੍ਕਾਮੇਨ੍ਤਸ੍ਸ ਦੁਕ੍ਕਟਂ, ਦੁਤਿਯਾਤਿਕ੍ਕਮੇ ਪਾਚਿਤ੍ਤਿਯਂ. ਅਪਰਿਕ੍ਖਿਤ੍ਤਸ੍ਸ ਉਪਚਾਰੋ ਨਾਮ ਸੇਨਾਸਨਤੋ ਦ੍ਵੇ ਲੇਡ੍ਡੁਪਾਤਾ.

ਅਨਾਪੁਚ੍ਛਂ ਵਾ ਗਚ੍ਛੇਯ੍ਯਾਤਿ ਏਤ੍ਥ ਭਿਕ੍ਖੁਮ੍ਹਿ ਸਤਿ ਭਿਕ੍ਖੁ ਆਪੁਚ੍ਛਿਤਬ੍ਬੋ. ਤਸ੍ਮਿਂ ਅਸਤਿ ਸਾਮਣੇਰੋ, ਤਸ੍ਮਿਂ ਅਸਤਿ ਆਰਾਮਿਕੋ, ਤਸ੍ਮਿਮ੍ਪਿ ਅਸਤਿ ਯੇਨ ਵਿਹਾਰੋ ਕਾਰਿਤੋ ਸੋ ਵਿਹਾਰਸਾਮਿਕੋ, ਤਸ੍ਸ ਵਾ ਕੁਲੇ ਯੋ ਕੋਚਿ ਆਪੁਚ੍ਛਿਤਬ੍ਬੋ. ਤਸ੍ਮਿਮ੍ਪਿ ਅਸਤਿ ਚਤੂਸੁ ਪਾਸਾਣੇਸੁ ਮਞ੍ਚਂ ਠਪੇਤ੍ਵਾ ਮਞ੍ਚੇ ਅਵਸੇਸਮਞ੍ਚਪੀਠਾਨਿ ਆਰੋਪੇਤ੍ਵਾ ਉਪਰਿ ਭਿਸਿਆਦਿਕਂ ਦਸਵਿਧਮ੍ਪਿ ਸੇਯ੍ਯਂ ਰਾਸਿਂ ਕਰਿਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਾਨਿ ਪਿਦਹਿਤ੍ਵਾ ਗਮਿਯਵਤ੍ਤਂ ਪੂਰੇਤ੍ਵਾ ਗਨ੍ਤਬ੍ਬਂ. ਸਚੇ ਪਨ ਸੇਨਾਸਨਂ ਓਵਸ੍ਸਤਿ, ਛਦਨਤ੍ਥਞ੍ਚ ਤਿਣਂ ਵਾ ਇਟ੍ਠਕਾ ਵਾ ਆਨੀਤਾ ਹੋਨ੍ਤਿ, ਸਚੇ ਉਸ੍ਸਹਤਿ, ਛਾਦੇਤਬ੍ਬਂ. ਨੋ ਚੇ ਸਕ੍ਕੋਤਿ, ਯੋ ਓਕਾਸੋ ਅਨੋਵਸ੍ਸਕੋ, ਤਤ੍ਥ ਮਞ੍ਚਪੀਠਾਦੀਨਿ ਨਿਕ੍ਖਿਪਿਤ੍ਵਾ ਗਨ੍ਤਬ੍ਬਂ. ਸਚੇ ਸਬ੍ਬਮ੍ਪਿ ਓਵਸ੍ਸਤਿ, ਉਸ੍ਸਹਨ੍ਤੇਨ ਅਨ੍ਤੋਗਾਮੇ ਉਪਾਸਕਾਨਂ ਘਰੇ ਠਪੇਤਬ੍ਬਂ. ਸਚੇ ਤੇਪਿ ‘‘ਸਙ੍ਘਿਕਂ ਨਾਮ ਭਨ੍ਤੇ ਭਾਰਿਯਂ, ਅਗ੍ਗਿਦਾਹਾਦੀਨਂ ਭਾਯਾਮਾ’’ਤਿ ਨ ਸਮ੍ਪਟਿਚ੍ਛਨ੍ਤਿ, ਅਜ੍ਝੋਕਾਸੇਪਿ ਪਾਸਾਣਾਨਂ ਉਪਰਿ ਮਞ੍ਚਂ ਠਪੇਤ੍ਵਾ ਸੇਸਂ ਪੁਬ੍ਬੇ ਵੁਤ੍ਤਨਯੇਨੇਵ ਨਿਕ੍ਖਿਪਿਤ੍ਵਾ ਤਿਣੇਹਿ ਚ ਪਣ੍ਣੇਹਿ ਚ ਪਟਿਚ੍ਛਾਦੇਤ੍ਵਾ ਗਨ੍ਤੁਂ ਵਟ੍ਟਤਿ. ਯਞ੍ਹਿ ਤਤ੍ਥ ਅਙ੍ਗਮਤ੍ਤਮ੍ਪਿ ਅਵਸਿਸ੍ਸਤਿ, ਤਂ ਅਞ੍ਞੇਸਂ ਤਤ੍ਥ ਆਗਤਾਨਂ ਭਿਕ੍ਖੂਨਂ ਉਪਕਾਰਂ ਭਵਿਸ੍ਸਤੀਤਿ.

੧੧੭. ਵਿਹਾਰਸ੍ਸ ਉਪਚਾਰੇਤਿਆਦੀਸੁ ਵਿਹਾਰਸ੍ਸੂਪਚਾਰੋ ਨਾਮ ਪਰਿਵੇਣਂ. ਉਪਟ੍ਠਾਨਸਾਲਾਤਿ ਪਰਿਵੇਣਭੋਜਨਸਾਲਾ. ਮਣ੍ਡਪੋਤਿ ਪਰਿਵੇਣਮਣ੍ਡਪੋ. ਰੁਕ੍ਖਮੂਲਨ੍ਤਿ ਪਰਿਵੇਣਰੁਕ੍ਖਮੂਲਂ. ਅਯਂ ਤਾਵ ਨਯੋ ਕੁਰੁਨ੍ਦਟ੍ਠਕਥਾਯਂ ਵੁਤ੍ਤੋ. ਕਿਞ੍ਚਾਪਿ ਵੁਤ੍ਤੋ, ਅਥ ਖੋ ਵਿਹਾਰੋਤਿ ਅਨ੍ਤੋਗਬ੍ਭੋ ਵਾ ਅਞ੍ਞਂ ਵਾ ਸਬ੍ਬਪਰਿਚ੍ਛਨ੍ਨਂ ਗੁਤ੍ਤਸੇਨਾਸਨਂ ਵੇਦਿਤਬ੍ਬਂ. ਵਿਹਾਰਸ੍ਸ ਉਪਚਾਰੇਤਿ ਤਸ੍ਸ ਬਹਿ ਆਸਨ੍ਨੇ ਓਕਾਸੇ. ਉਪਟ੍ਠਾਨਸਾਲਾਯਂ ਵਾਤਿ ਭੋਜਨਸਾਲਾਯਂ ਵਾ. ਮਣ੍ਡਪੇ ਵਾਤਿ ਅਪਰਿਚ੍ਛਨ੍ਨੇ ਪਰਿਚ੍ਛਨ੍ਨੇ ਵਾਪਿ ਬਹੂਨਂ ਸਨ੍ਨਿਪਾਤਮਣ੍ਡਪੇ. ਰੁਕ੍ਖਮੂਲੇ ਵਤ੍ਤਬ੍ਬਂ ਨਤ੍ਥਿ. ਆਪਤ੍ਤਿ ਦੁਕ੍ਕਟਸ੍ਸਾਤਿ ਵੁਤ੍ਤਪ੍ਪਕਾਰਞ੍ਹਿ ਦਸਵਿਧਂ ਸੇਯ੍ਯਂ ਅਨ੍ਤੋਗਬ੍ਭਾਦਿਮ੍ਹਿ ਗੁਤ੍ਤਟ੍ਠਾਨੇ ਪਞ੍ਞਪੇਤ੍ਵਾ ਗਚ੍ਛਨ੍ਤਸ੍ਸ ਯਸ੍ਮਾ ਸੇਯ੍ਯਾਪਿ ਸੇਨਾਸਨਮ੍ਪਿ ਉਪਚਿਕਾਹਿ ਪਲੁਜ੍ਜਤਿ, ਵਮ੍ਮਿਕਰਾਸਿਯੇਵ ਹੋਤਿ, ਤਸ੍ਮਾ ਪਾਚਿਤ੍ਤਿਯਂ ਵੁਤ੍ਤਂ. ਬਹਿ ਪਨ ਉਪਟ੍ਠਾਨਸਾਲਾਦੀਸੁ ਪਞ੍ਞਪੇਤ੍ਵਾ ਗਚ੍ਛਨ੍ਤਸ੍ਸ ਸੇਯ੍ਯਾਮਤ੍ਤਮੇਵ ਨਸ੍ਸੇਯ੍ਯ, ਠਾਨਸ੍ਸ ਅਗੁਤ੍ਤਤਾਯ ਨ ਸੇਨਾਸਨਂ, ਤਸ੍ਮਾ ਏਤ੍ਥ ਦੁਕ੍ਕਟਂ ਵੁਤ੍ਤਂ. ਮਞ੍ਚਂ ਵਾ ਪੀਠਂ ਵਾਤਿ ਏਤ੍ਥ ਯਸ੍ਮਾ ਨ ਸਕ੍ਕਾ ਮਞ੍ਚਪੀਠਂ ਸਹਸਾ ਉਪਚਿਕਾਹਿ ਖਾਯਿਤੁਂ, ਤਸ੍ਮਾ ਤਂ ਵਿਹਾਰੇਪਿ ਸਨ੍ਥਰਿਤ੍ਵਾ ਗਚ੍ਛਨ੍ਤਸ੍ਸ ਦੁਕ੍ਕਟਂ ਵੁਤ੍ਤਂ. ਵਿਹਾਰੂਪਚਾਰੇ ਪਨ ਤਂ ਵਿਹਾਰਚਾਰਿਕਂ ਆਹਿਣ੍ਡਨ੍ਤਾਪਿ ਦਿਸ੍ਵਾ ਪਟਿਸਾਮੇਸ੍ਸਨ੍ਤਿ.

੧੧੮. ਉਦ੍ਧਰਿਤ੍ਵਾ ਗਚ੍ਛਤੀਤਿ ਏਤ੍ਥ ਉਦ੍ਧਰਿਤ੍ਵਾ ਗਚ੍ਛਨ੍ਤੇਨ ਮਞ੍ਚਪੀਠਕਵਾਟਂ ਸਬ੍ਬਂ ਅਪਨੇਤ੍ਵਾ ਸਂਹਰਿਤ੍ਵਾ ਚੀਵਰਵਂਸੇ ਲਗ੍ਗੇਤ੍ਵਾ ਗਨ੍ਤਬ੍ਬਂ. ਪਚ੍ਛਾ ਆਗਨ੍ਤ੍ਵਾ ਵਸਨਕਭਿਕ੍ਖੁਨਾਪਿ ਪੁਨ ਮਞ੍ਚਪੀਠਂ ਵਾ ਪਞ੍ਞਪੇਤ੍ਵਾ ਸਯਿਤ੍ਵਾ ਗਚ੍ਛਨ੍ਤੇਨ ਤਥੇਵ ਕਾਤਬ੍ਬਂ. ਅਨ੍ਤੋਕੁਟ੍ਟਤੋ ਸੇਯ੍ਯਂ ਬਹਿਕੁਟ੍ਟੇ ਪਞ੍ਞਪੇਤ੍ਵਾ ਵਸਨ੍ਤੇਨ ਗਮਨਕਾਲੇ ਗਹਿਤਟ੍ਠਾਨੇਯੇਵ ਪਟਿਸਾਮੇਤਬ੍ਬਂ. ਉਪਰਿਪਾਸਾਦਤੋ ਓਰੋਪੇਤ੍ਵਾ ਹੇਟ੍ਠਾਪਾਸਾਦੇ ਵਸਨ੍ਤਸ੍ਸਪਿ ਏਸੇਵ ਨਯੋ. ਰਤ੍ਤਿਟ੍ਠਾਨਦਿਵਾਟ੍ਠਾਨੇਸੁ ਮਞ੍ਚਪੀਠਂ ਪਞ੍ਞਪੇਤ੍ਵਾਪਿ ਗਮਨਕਾਲੇ ਪੁਨ ਗਹਿਤਟ੍ਠਾਨੇਯੇਵ ਠਪੇਤਬ੍ਬਂ.

ਆਪੁਚ੍ਛਂ ਗਚ੍ਛਤੀਤਿ ਏਤ੍ਥਾਯਂ ਆਪੁਚ੍ਛਿਤਬ੍ਬਾਨਾਪੁਚ੍ਛਿਤਬ੍ਬਵਿਨਿਚ੍ਛਯੋ – ਯਾ ਤਾਵ ਭੂਮਿਯਂ ਦੀਘਸਾਲਾ ਵਾ ਪਣ੍ਣਸਾਲਾ ਵਾ ਹੋਤਿ, ਯਂ ਵਾ ਰੁਕ੍ਖਤ੍ਥਮ੍ਭੇਸੁ, ਕਤਗੇਹਂ ਉਪਚਿਕਾਨਂ ਉਟ੍ਠਾਨਟ੍ਠਾਨਂ ਹੋਤਿ, ਤਤੋ ਪਕ੍ਕਮਨ੍ਤੇਨ ਤਾਵ ਆਪੁਚ੍ਛਿਤ੍ਵਾਵ ਪਕ੍ਕਮਿਤਬ੍ਬਂ. ਤਸ੍ਮਿਞ੍ਹਿ ਕਤਿਪਯਾਨਿ ਦਿਵਸਾਨਿ ਅਜਗ੍ਗਿਯਮਾਨੇ ਵਮ੍ਮਿਕਾਵ ਸਨ੍ਤਿਟ੍ਠਨ੍ਤਿ. ਯਂ ਪਨ ਪਾਸਾਣਪਿਟ੍ਠਿਯਂ ਵਾ ਪਾਸਾਣਤ੍ਥਮ੍ਭੇਸੁ ਵਾ ਕਤਸੇਨਾਸਨਂ ਸਿਲੁਚ੍ਚਯਲੇਣਂ ਵਾ ਸੁਧਾਲਿਤ੍ਤਸੇਨਾਸਨਂ ਵਾ ਯਤ੍ਥ ਉਪਚਿਕਾਸਙ੍ਕਾ ਨਤ੍ਥਿ, ਤਤੋ ਪਕ੍ਕਮਨ੍ਤਸ੍ਸ ਆਪੁਚ੍ਛਿਤ੍ਵਾਪਿ ਅਨਾਪੁਚ੍ਛਿਤ੍ਵਾਪਿ ਗਨ੍ਤੁਂ ਵਟ੍ਟਤਿ, ਆਪੁਚ੍ਛਨਂ ਪਨ ਵਤ੍ਤਂ. ਸਚੇ ਤਾਦਿਸੇਪਿ ਸੇਨਾਸਨੇ ਏਕੇਨ ਪਸ੍ਸੇਨ ਉਪਚਿਕਾ ਆਰੋਹਨ੍ਤਿ, ਆਪੁਚ੍ਛਿਤ੍ਵਾਵ ਗਨ੍ਤਬ੍ਬਂ. ਯੋ ਪਨ ਆਗਨ੍ਤੁਕੋ ਭਿਕ੍ਖੁ ਸਙ੍ਘਿਕਂ ਸੇਨਾਸਨਂ ਗਹੇਤ੍ਵਾ ਵਸਨ੍ਤਂ ਭਿਕ੍ਖੁਂ ਅਨੁਵਤ੍ਤਨ੍ਤੋ ਅਤ੍ਤਨੋ ਸੇਨਾਸਨਂ ਅਗ੍ਗਹੇਤ੍ਵਾ ਵਸਤਿ, ਯਾਵ ਸੋ ਨ ਗਣ੍ਹਾਤਿ, ਤਾਵ ਤਂ ਸੇਨਾਸਨਂ ਪੁਰਿਮਭਿਕ੍ਖੁਸ੍ਸੇਵ ਪਲਿਬੋਧੋ. ਯਦਾ ਪਨ ਸੋ ਸੇਨਾਸਨਂ ਗਹੇਤ੍ਵਾ ਅਤ੍ਤਨੋ ਇਸ੍ਸਰਿਯੇਨ ਵਸਤਿ, ਤਤੋ ਪਟ੍ਠਾਯ ਆਗਨ੍ਤੁਕਸ੍ਸੇਵ ਪਲਿਬੋਧੋ. ਸਚੇ ਉਭੋਪਿ ਵਿਭਜਿਤ੍ਵਾ ਗਣ੍ਹਨ੍ਤਿ, ਉਭਿਨ੍ਨਮ੍ਪਿ ਪਲਿਬੋਧੋ. ਮਹਾਪਚ੍ਚਰਿਯਂ ਪਨ ਵੁਤ੍ਤਂ – ‘‘ਸਚੇ ਦ੍ਵੇ ਤਯੋ ਏਕਤੋ ਹੁਤ੍ਵਾ ਪਞ੍ਞਪੇਨ੍ਤਿ, ਗਮਨਕਾਲੇ ਸਬ੍ਬੇਹਿਪਿ ਆਪੁਚ੍ਛਿਤਬ੍ਬਂ. ਤੇਸੁ ਚੇ ਪਠਮਂ ਗਚ੍ਛਨ੍ਤੋ ‘ਪਚ੍ਛਿਮੋ ਜਗ੍ਗਿਸ੍ਸਤੀ’ਤਿ ਆਭੋਗਂ ਕਤ੍ਵਾ ਗਚ੍ਛਤਿ ਵਟ੍ਟਤਿ. ਪਚ੍ਛਿਮਸ੍ਸ ਆਭੋਗੇਨ ਮੁਤ੍ਤਿ ਨਤ੍ਥਿ. ਬਹੂ ਏਕਂ ਪੇਸੇਤ੍ਵਾ ਸਨ੍ਥਰਾਪੇਨ੍ਤਿ, ਗਮਨਕਾਲੇ ਸਬ੍ਬੇਹਿ ਵਾ ਆਪੁਚ੍ਛਿਤਬ੍ਬਂ, ਏਕਂ ਵਾ ਪੇਸੇਤ੍ਵਾ ਆਪੁਚ੍ਛਿਤਬ੍ਬਂ. ਅਞ੍ਞਤੋ ਮਞ੍ਚਪੀਠਾਦੀਨਿ ਆਨੇਤ੍ਵਾ ਅਞ੍ਞਤ੍ਰ ਵਸਿਤ੍ਵਾਪਿ ਗਮਨਕਾਲੇ ਤਤ੍ਥੇਵ ਨੇਤਬ੍ਬਾਨਿ. ਸਚੇ ਅਞ੍ਞਾਵਾਸਤੋ ਆਨੇਤ੍ਵਾ ਵਸਮਾਨਸ੍ਸ ਅਞ੍ਞੋ ਵੁਡ੍ਢਤਰੋ ਆਗਚ੍ਛਤਿ, ਨ ਪਟਿਬਾਹਿਤਬ੍ਬੋ, ‘ਮਯਾ ਭਨ੍ਤੇ ਅਞ੍ਞਾਵਾਸਤੋ ਆਨੀਤਂ, ਪਾਕਤਿਕਂ ਕਰੇਯ੍ਯਾਥਾ’ਤਿ ਵਤ੍ਤਬ੍ਬਂ. ਤੇਨ ‘ਏਵਂ ਕਰਿਸ੍ਸਾਮੀ’ਤਿ ਸਮ੍ਪਟਿਚ੍ਛਿਤੇ ਇਤਰਸ੍ਸ ਗਨ੍ਤੁਂ ਵਟ੍ਟਤਿ. ਏਵਮਞ੍ਞਤ੍ਥ ਹਰਿਤ੍ਵਾਪਿ ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਨ੍ਤਸ੍ਸ ਨਟ੍ਠਂ ਵਾ ਜਿਣ੍ਣਂ ਵਾ ਚੋਰੇਹਿ ਵਾ ਹਟਂ ਗੀਵਾ ਨ ਹੋਤਿ, ਪੁਗ੍ਗਲਿਕਪਰਿਭੋਗੇਨ ਪਰਿਭੁਞ੍ਜਨ੍ਤਸ੍ਸ ਪਨ ਗੀਵਾ ਹੋਤਿ. ਅਞ੍ਞਸ੍ਸ ਮਞ੍ਚਪੀਠਂ ਪਨ ਸਙ੍ਘਿਕਪਰਿਭੋਗੇਨ ਵਾ ਪੁਗ੍ਗਲਿਕਪਰਿਭੋਗੇਨ ਵਾ ਪਰਿਭੁਞ੍ਜਨ੍ਤਸ੍ਸ ਨਟ੍ਠਂ ਗੀਵਾਯੇਵ’’.

ਕੇਨਚਿ ਪਲਿਬੁਦ੍ਧਂ ਹੋਤੀਤਿ ਵੁਡ੍ਢਤਰਭਿਕ੍ਖੂਇਸ੍ਸਰਿਯਯਕ੍ਖਸੀਹਵਾਲ਼ਮਿਗਕਣ੍ਹਸਪ੍ਪਾਦੀਸੁ ਯੇਨ ਕੇਨਚਿ ਸੇਨਾਸਨਂ ਪਲਿਬੁਦ੍ਧਂ ਹੋਤਿ. ਸਾਪੇਕ੍ਖੋ ਗਨ੍ਤ੍ਵਾ ਤਤ੍ਥ ਠਿਤੋ ਆਪੁਚ੍ਛਤਿ, ਕੇਨਚਿ ਪਲਿਬੁਦ੍ਧੋ ਹੋਤੀਤਿ ਅਜ੍ਜੇਵ ਆਗਨ੍ਤ੍ਵਾ ਪਟਿਜਗ੍ਗਿਸ੍ਸਾਮੀਤਿ ਏਵਂ ਸਾਪੇਕ੍ਖੋ ਨਦੀਪਾਰਂ ਵਾ ਗਾਮਨ੍ਤਰਂ ਵਾ ਗਨ੍ਤ੍ਵਾ ਯਤ੍ਥਸ੍ਸ ਗਮਨਚਿਤ੍ਤਂ ਉਪ੍ਪਨ੍ਨਂ, ਤਤ੍ਥੇਵ ਠਿਤੋ ਕਞ੍ਚਿ ਪੇਸੇਤ੍ਵਾ ਆਪੁਚ੍ਛਤਿ, ਨਦੀਪੂਰਰਾਜਚੋਰਾਦੀਸੁ ਵਾ ਕੇਨਚਿ ਪਲਿਬੁਦ੍ਧੋ ਹੋਤਿ ਉਪਦ੍ਦੁਤੋ, ਨ ਸਕ੍ਕੋਤਿ ਪਚ੍ਚਾਗਨ੍ਤੁਂ, ਏਵਂਭੂਤਸ੍ਸਪਿ ਅਨਾਪਤ੍ਤਿ. ਸੇਸਂ ਪਠਮਸਿਕ੍ਖਾਪਦੇ ਵੁਤ੍ਤਨਯਮੇਵ ਸਦ੍ਧਿਂ ਸਮੁਟ੍ਠਾਨਾਦੀਹੀਤਿ.

ਦੁਤਿਯਸੇਨਾਸਨਸਿਕ੍ਖਾਪਦਂ ਪਞ੍ਚਮਂ.

੬. ਅਨੁਪਖਜ੍ਜਸਿਕ੍ਖਾਪਦਵਣ੍ਣਨਾ

੧੧੯. ਛਟ੍ਠਸਿਕ੍ਖਾਪਦੇ – ਪਲਿਬੁਨ੍ਧੇਨ੍ਤੀਤਿ ਪਠਮਤਰਂ ਗਨ੍ਤ੍ਵਾ ਪਤ੍ਤਚੀਵਰਂ ਅਤਿਹਰਿਤ੍ਵਾ ਰੁਮ੍ਭਿਤ੍ਵਾ ਤਿਟ੍ਠਨ੍ਤਿ. ਥੇਰਾ ਭਿਕ੍ਖੂ ਵੁਟ੍ਠਾਪੇਨ੍ਤੀਤਿ ‘‘ਅਮ੍ਹਾਕਂ ਆਵੁਸੋ ਪਾਪੁਣਾਤੀ’’ਤਿ ਵਸ੍ਸਗ੍ਗੇਨ ਗਹੇਤ੍ਵਾ ਵੁਟ੍ਠਾਪੇਨ੍ਤਿ. ਅਨੁਪਖਜ੍ਜ ਸੇਯ੍ਯਂ ਕਪ੍ਪੇਨ੍ਤੀਤਿ ‘‘ਤੁਮ੍ਹਾਕਂ ਭਨ੍ਤੇ ਮਞ੍ਚਟ੍ਠਾਨਂਯੇਵ ਪਾਪੁਣਾਤਿ, ਨ ਸਬ੍ਬੋ ਵਿਹਾਰੋ. ਅਮ੍ਹਾਕਂ ਦਾਨਿ ਇਦਂ ਠਾਨਂ ਪਾਪੁਣਾਤੀ’’ਤਿ ਅਨੁਪਵਿਸਿਤ੍ਵਾ ਮਞ੍ਚਪੀਠਂ ਪਞ੍ਞਪੇਤ੍ਵਾ ਨਿਸੀਦਨ੍ਤਿਪਿ ਨਿਪਜ੍ਜਨ੍ਤਿਪਿ ਸਜ੍ਝਾਯਮ੍ਪਿ ਕਰੋਨ੍ਤਿ.

੧੨੦. ਜਾਨਨ੍ਤਿ ‘‘ਅਨੁਟ੍ਠਾਪਨੀਯੋ ਅਯ’’ਨ੍ਤਿ ਜਾਨਨ੍ਤੋ; ਤੇਨੇਵਸ੍ਸ ਵਿਭਙ੍ਗੇ ‘‘ਵੁਡ੍ਢੋਤਿ ਜਾਨਾਤੀ’’ਤਿਆਦਿ ਵੁਤ੍ਤਂ. ਵੁਡ੍ਢੋ ਹਿ ਅਤ੍ਤਨੋ ਵੁਡ੍ਢਤਾਯ ਅਨੁਟ੍ਠਾਪਨੀਯੋ, ਗਿਲਾਨੋ ਗਿਲਾਨਤਾਯ, ਸਙ੍ਘੋ ਪਨ ਭਣ੍ਡਾਗਾਰਿਕਸ੍ਸ ਵਾ ਧਮ੍ਮਕਥਿਕਵਿਨਯਧਰਾਦੀਨਂ ਵਾ ਗਣਵਾਚਕਆਚਰਿਯਸ੍ਸ ਵਾ ਬਹੂਪਕਾਰਤਂ ਗੁਣਵਿਸਿਟ੍ਠਤਞ੍ਚ ਸਲ੍ਲਕ੍ਖੇਨ੍ਤੋ ਧੁਵਵਾਸਤ੍ਥਾਯ ਵਿਹਾਰਂ ਸਮ੍ਮਨ੍ਨਿਤ੍ਵਾ ਦੇਤਿ, ਤਸ੍ਮਾ ਯਸ੍ਸ ਸਙ੍ਘੇਨ ਦਿਨ੍ਨੋ, ਸੋਪਿ ਅਨੁਟ੍ਠਾਪਨੀਯੋ. ਕਾਮਞ੍ਚੇਤ੍ਥ ਗਿਲਾਨਸ੍ਸਾਪਿ ਸਙ੍ਘੋਯੇਵ ਅਨੁਚ੍ਛਵਿਕਂ ਸੇਨਾਸਨਂ ਦੇਤਿ, ਗਿਲਾਨੋ ਪਨ ‘‘ਅਪਲੋਕੇਤ੍ਵਾ ਸਙ੍ਘੇਨ ਅਦਿਨ੍ਨਸੇਨਾਸਨੋਪਿ ਨ ਪੀਲ਼ੇਤਬ੍ਬੋ ਅਨੁਕਮ੍ਪਿਤਬ੍ਬੋ’’ਤਿ ਦਸ੍ਸੇਤੁਂ ਵਿਸੁਂ ਵੁਤ੍ਤੋ.

੧੨੧. ਉਪਚਾਰੇਤਿ ਏਤ੍ਥ ਮਞ੍ਚਪੀਠਾਨਂ ਤਾਵ ਮਹਲ੍ਲਕੇ ਵਿਹਾਰੇ ਸਮਨ੍ਤਾ ਦਿਯਡ੍ਢੋ ਹਤ੍ਥੋ ਉਪਚਾਰੋ, ਖੁਦ੍ਦਕੇ ਯਤੋ ਪਹੋਤਿ ਤਤੋ ਦਿਯਡ੍ਢੋ ਹਤ੍ਥੋ, ਪਾਦੇ ਧੋਵਿਤ੍ਵਾ ਪਵਿਸਨ੍ਤਸ੍ਸ ਪਸ੍ਸਾਵਤ੍ਥਾਯ ਨਿਕ੍ਖਮਨ੍ਤਸ੍ਸ ਚ ਯਾਵ ਦ੍ਵਾਰੇ ਨਿਕ੍ਖਿਤ੍ਤਪਾਦਧੋਵਨਪਾਸਾਣਤੋ ਪਸ੍ਸਾਵਟ੍ਠਾਨਤੋ ਚ ਮਞ੍ਚਪੀਠਂ, ਤਾਵ ਦਿਯਡ੍ਢਹਤ੍ਥਵਿਤ੍ਥਾਰੋ ਮਗ੍ਗੋ ਉਪਚਾਰੋ ਨਾਮ. ਤਸ੍ਮਿਂ ਮਞ੍ਚਸ੍ਸ ਵਾ ਪੀਠਸ੍ਸ ਵਾ ਉਪਚਾਰੇ ਠਿਤਸ੍ਸ ਵਾ ਭਿਕ੍ਖੁਨੋ ਪਵਿਸਨ੍ਤਸ੍ਸ ਵਾ ਨਿਕ੍ਖਮਨ੍ਤਸ੍ਸ ਵਾ ਉਪਚਾਰੇ ਯੋ ਅਨੁਪਖਜ੍ਜ ਸੇਯ੍ਯਂ ਕਪ੍ਪੇਤੁਕਾਮੋ ਸੇਯ੍ਯਂ ਸਨ੍ਥਰਤਿ ਵਾ ਸਨ੍ਥਰਾਪੇਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ.

ਅਭਿਨਿਸੀਦਤਿ ਵਾ ਅਭਿਨਿਪਜ੍ਜਤਿ ਵਾਤਿ ਏਤ੍ਥ ਅਭਿਨਿਸੀਦਨਮਤ੍ਤੇਨ ਅਭਿਨਿਪਜ੍ਜਨਮਤ੍ਤੇਨੇਵ ਵਾ ਪਾਚਿਤ੍ਤਿਯਂ. ਸਚੇ ਪਨ ਦ੍ਵੇਪਿ ਕਰੋਤਿ, ਦ੍ਵੇ ਪਾਚਿਤ੍ਤਿਯਾਨਿ. ਉਟ੍ਠਾਯੁਟ੍ਠਾਯ ਨਿਸੀਦਤੋ ਵਾ ਨਿਪਜ੍ਜਤੋ ਵਾ ਪਯੋਗੇ ਪਯੋਗੇ ਪਾਚਿਤ੍ਤਿਯਂ.

੧੨੨. ਉਪਚਾਰਂ ਠਪੇਤ੍ਵਾ ਸੇਯ੍ਯਂ ਸਨ੍ਥਰਤਿ ਵਾ ਸਨ੍ਥਰਾਪੇਤਿ ਵਾਤਿ ਇਮਸ੍ਮਿਂ ਇਤੋ ਪਰੇ ਚ ‘‘ਵਿਹਾਰਸ੍ਸ ਉਪਚਾਰੇ’’ਤਿਆਦਿਕੇ ਦੁਕ੍ਕਟਵਾਰੇਪਿ ਯਥਾ ਇਧ ਅਭਿਨਿਸੀਦਨਮਤ੍ਤੇ ਅਭਿਨਿਪਜ੍ਜਨਮਤ੍ਤੇ ਉਭਯਕਰਣੇ ਪਯੋਗਭੇਦੇ ਚ ਪਾਚਿਤ੍ਤਿਯਪ੍ਪਭੇਦੋ ਵੁਤ੍ਤੋ, ਏਵਂ ਦੁਕ੍ਕਟਪ੍ਪਭੇਦੋ ਵੇਦਿਤਬ੍ਬੋ. ਏਵਰੂਪੇਨ ਹਿ ਵਿਸਭਾਗਪੁਗ੍ਗਲੇਨ ਏਕਵਿਹਾਰੇ ਵਾ ਏਕਪਰਿਵੇਣੇ ਵਾ ਵਸਨ੍ਤੇਨ ਅਤ੍ਥੋ ਨਤ੍ਥਿ, ਤਸ੍ਮਾ ਸਬ੍ਬਤ੍ਥੇਵਸ੍ਸ ਨਿਵਾਸੋ ਵਾਰਿਤੋ. ਅਞ੍ਞਸ੍ਸ ਪੁਗ੍ਗਲਿਕੇਤਿ ਇਧਾਪਿ ਵਿਸ੍ਸਾਸਿਕਸ੍ਸ ਪੁਗ੍ਗਲਿਕਂ ਅਤ੍ਤਨੋ ਪੁਗ੍ਗਲਿਕਸਦਿਸਮੇਵ, ਤਤ੍ਥ ਅਨਾਪਤ੍ਤਿ.

੧੨੩. ਆਪਦਾਸੂਤਿ ਸਚੇ ਬਹਿ ਵਸਨ੍ਤਸ੍ਸ ਜੀਵਿਤਬ੍ਰਹ੍ਮਚਰਿਯਨ੍ਤਰਾਯੋ ਹੋਤਿ, ਏਵਰੂਪਾਸੁ ਆਪਦਾਸੁ ਯੋ ਪਵਿਸਤਿ, ਤਸ੍ਸਾਪਿ ਅਨਾਪਤ੍ਤਿ. ਸੇਸਂ ਉਤ੍ਤਾਨਮੇਵਾਤਿ. ਪਠਮਪਾਰਾਜਿਕਸਮੁਟ੍ਠਾਨਂ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਅਨੁਪਖਜ੍ਜਸਿਕ੍ਖਾਪਦਂ ਛਟ੍ਠਂ.

੭. ਨਿਕ੍ਕਡ੍ਢਨਸਿਕ੍ਖਾਪਦਵਣ੍ਣਨਾ

੧੨੬. ਸਤ੍ਤਮਸਿਕ੍ਖਾਪਦੇ – ਏਕੇਨ ਪਯੋਗੇਨ ਬਹੁਕੇਪਿ ਦ੍ਵਾਰੇ ਅਤਿਕ੍ਕਾਮੇਤੀਤਿ ਯੇ ਚਤੁਭੂਮਕਪਞ੍ਚਭੂਮਕਾ ਪਾਸਾਦਾ ਛਸਤ੍ਤਕੋਟ੍ਠਕਾਨਿ ਵਾ ਚਤੁਸ੍ਸਾਲਾਨਿ, ਤਾਦਿਸੇਸੁ ਸੇਨਾਸਨੇਸੁ ਹਤ੍ਥੇਸੁ ਵਾ ਗੀਵਾਯ ਵਾ ਗਹੇਤ੍ਵਾ ਅਨ੍ਤਰਾ ਅਟ੍ਠਪੇਨ੍ਤੋ ਏਕੇਨ ਪਯੋਗੇਨ ਅਤਿਕ੍ਕਾਮੇਤਿ, ਏਕਮੇਵ ਪਾਚਿਤ੍ਤਿਯਂ. ਠਪੇਤ੍ਵਾ ਠਪੇਤ੍ਵਾ ਨਾਨਾਪਯੋਗੇਹਿ ਅਤਿਕ੍ਕਾਮੇਨ੍ਤਸ੍ਸ ਦ੍ਵਾਰਗਣਨਾਯ ਪਾਚਿਤ੍ਤਿਯਾਨਿ. ਹਤ੍ਥੇਨ ਅਨਾਮਸਿਤ੍ਵਾ ‘‘ਨਿਕ੍ਖਮਾ’’ਤਿ ਵਤ੍ਵਾ ਵਾਚਾਯ ਨਿਕ੍ਕਡ੍ਢਨ੍ਤਸ੍ਸਾਪਿ ਏਸੇਵ ਨਯੋ.

ਅਞ੍ਞਂ ਆਣਾਪੇਤੀਤਿ ਏਤ੍ਥ ‘‘ਇਮਂ ਨਿਕ੍ਕਡ੍ਢਾ’’ਤਿ ਆਣਤ੍ਤਿਮਤ੍ਤੇ ਦੁਕ੍ਕਟਂ. ਸਚੇ ਸੋ ਸਕਿਂ ਆਣਤ੍ਤੋ ਬਹੁਕੇਪਿ ਦ੍ਵਾਰੇ ਅਤਿਕ੍ਕਾਮੇਤਿ, ਏਕਂ ਪਾਚਿਤ੍ਤਿਯਂ. ਸਚੇ ਪਨ ‘‘ਏਤ੍ਤਕਾਨਿ ਦ੍ਵਾਰਾਨਿ ਨਿਕ੍ਕਡ੍ਢਾਹੀ’’ਤਿ ਵਾ ‘‘ਯਾਵ ਮਹਾਦ੍ਵਾਰਂ ਤਾਵ ਨਿਕ੍ਕਡ੍ਢਾਹੀ’’ਤਿ ਵਾ ਏਵਂ ਨਿਯਾਮੇਤ੍ਵਾ ਆਣਤ੍ਤੋ ਹੋਤਿ, ਦ੍ਵਾਰਗਣਨਾਯ ਪਾਚਿਤ੍ਤਿਯਾਨਿ.

ਤਸ੍ਸ ਪਰਿਕ੍ਖਾਰਨ੍ਤਿ ਯਂਕਿਞ੍ਚਿ ਤਸ੍ਸ ਸਨ੍ਤਕਂ ਪਤ੍ਤਚੀਵਰਪਰਿਸ੍ਸਾਵਨਧਮਕਰਣਮਞ੍ਚਪੀਠਭਿਸਿਬਿਮ੍ਬੋਹਨਾਦਿਭੇਦਂ, ਅਨ੍ਤਮਸੋ ਰਜਨਛਲ੍ਲਿਮ੍ਪਿ; ਯੋ ਨਿਕ੍ਕਡ੍ਢਤਿ ਵਾ ਨਿਕ੍ਕਡ੍ਢਾਪੇਤਿ ਵਾ; ਤਸ੍ਸ ਵਤ੍ਥੁਗਣਨਾਯ ਦੁਕ੍ਕਟਾਨਿ. ਗਾਲ਼੍ਹਂ ਬਨ੍ਧਿਤ੍ਵਾ ਠਪਿਤੇਸੁ ਪਨ ਏਕਾਵ ਆਪਤ੍ਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ.

੧੨੭. ਅਞ੍ਞਸ੍ਸ ਪੁਗ੍ਗਲਿਕੇਤਿ ਇਧਾਪਿ ਵਿਸ੍ਸਾਸਿਕਪੁਗ੍ਗਲਿਕਂ ਅਤ੍ਤਨੋ ਪੁਗ੍ਗਲਿਕਸਦਿਸਮੇਵ. ਯਥਾ ਚ ਇਧ; ਏਵਂ ਸਬ੍ਬਤ੍ਥ. ਯਤ੍ਰ ਪਨ ਵਿਸੇਸੋ ਭਵਿਸ੍ਸਤਿ, ਤਤ੍ਰ ਵਕ੍ਖਾਮ.

੧੨੮. ਅਲਜ੍ਜਿਂ ਨਿਕ੍ਕਡ੍ਢਤਿ ਵਾਤਿਆਦੀਸੁ ਭਣ੍ਡਨਕਾਰਕਕਲਹਕਾਰਕਮੇਵ ਸਕਲਸਙ੍ਘਾਰਾਮਤੋ ਨਿਕ੍ਕਡ੍ਢਿਤੁਂ ਲਭਤਿ, ਸੋ ਹਿ ਪਕ੍ਖਂ ਲਭਿਤ੍ਵਾ ਸਙ੍ਘਮ੍ਪਿ ਭਿਨ੍ਦੇਯ੍ਯ. ਅਲਜ੍ਜੀਆਦਯੋ ਪਨ ਅਤ੍ਤਨੋ ਵਸਨਟ੍ਠਾਨਤੋਯੇਵ ਨਿਕ੍ਕਡ੍ਢਿਤਬ੍ਬਾ, ਸਕਲਸਙ੍ਘਾਰਾਮਤੋ ਨਿਕ੍ਕਡ੍ਢਿਤੁਂ ਨ ਵਟ੍ਟਤਿ. ਉਮ੍ਮਤ੍ਤਕਸ੍ਸਾਤਿ ਸਯਂ ਉਮ੍ਮਤ੍ਤਕਸ੍ਸ ਅਨਾਪਤ੍ਤਿ. ਸੇਸਂ ਉਤ੍ਤਾਨਮੇਵਾਤਿ.

ਤਿਸਮੁਟ੍ਠਾਨਂ – ਕਾਯਚਿਤ੍ਤਤੋ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਨਿਕ੍ਕਡ੍ਢਨਸਿਕ੍ਖਾਪਦਂ ਸਤ੍ਤਮਂ.

੮. ਵੇਹਾਸਕੁਟਿਸਿਕ੍ਖਾਪਦਵਣ੍ਣਨਾ

੧੨੯. ਅਟ੍ਠਮਸਿਕ੍ਖਾਪਦੇ – ਉਪਰਿਵੇਹਾਸਕੁਟਿਯਾਤਿ ਉਪਰਿ ਅਚ੍ਛਨ੍ਨਤਲਾਯ ਦ੍ਵਿਭੂਮਿਕਕੁਟਿਯਾ ਵਾ ਤਿਭੂਮਿਕਾਦਿਕੁਟਿਯਾ ਵਾ. ਮਞ੍ਚਂ ਸਹਸਾ ਅਭਿਨਿਸੀਦੀਤਿ ਮਞ੍ਚਂ ਸਹਸਾ ਅਭਿਭਵਿਤ੍ਵਾ ਅਜ੍ਝੋਤ੍ਥਰਿਤ੍ਵਾ ਨਿਸੀਦਿ. ਭੁਮ੍ਮਤ੍ਥੇ ਵਾ ਏਤਂ ਉਪਯੋਗਵਚਨਂ; ਮਞ੍ਚੇ ਨਿਸੀਦੀਤਿ ਅਤ੍ਥੋ. ਅਭੀਤਿ ਇਦਂ ਪਨ ਪਦਸੋਭਨਤ੍ਥਂ ਉਪਸਗ੍ਗਮਤ੍ਤਮੇਵ. ਨਿਪ੍ਪਤਿਤ੍ਵਾਤਿ ਨਿਪਤਿਤ੍ਵਾ ਨਿਕ੍ਖਮਿਤ੍ਵਾ ਵਾ. ਤਸ੍ਸ ਹਿ ਉਪਰਿ ਆਣੀਪਿ ਨ ਦਿਨ੍ਨਾ, ਤਸ੍ਮਾ ਨਿਕ੍ਖਨ੍ਤੋ. ਵਿਸ੍ਸਰਮਕਾਸੀਤਿ ਵਿਰੂਪਂ ਆਤੁਰਸ੍ਸਰਮਕਾਸਿ.

੧੩੧. ਵੇਹਾਸਕੁਟਿ ਨਾਮ ਮਜ੍ਝਿਮਸ੍ਸ ਪੁਰਿਸਸ੍ਸ ਅਸੀਸਘਟ੍ਟਾਤਿ ਯਾ ਪਮਾਣਮਜ੍ਝਿਮਸ੍ਸ ਪੁਰਿਸਸ੍ਸ ਸਬ੍ਬਹੇਟ੍ਠਿਮਾਹਿ ਤੁਲਾਹਿ ਸੀਸਂ ਨ ਘਟ੍ਟੇਤਿ, ਏਤੇਨ ਇਧ ਅਧਿਪ੍ਪੇਤਾ ਵੇਹਾਸਕੁਟਿ ਦਸ੍ਸਿਤਾ ਹੋਤਿ, ਨ ਵੇਹਾਸਕੁਟਿਲਕ੍ਖਣਂ. ਯਾ ਹਿ ਕਾਚਿ ਉਪਰਿ ਅਚ੍ਛਿਨ੍ਨਤਲਾ ਦ੍ਵਿਭੂਮਿਕਾ ਕੁਟਿ ਤਿਭੂਮਿਕਾਦਿਕੁਟਿ ਵਾ ‘‘ਵੇਹਾਸਕੁਟੀ’’ਤਿ ਵੁਚ੍ਚਤਿ. ਇਧ ਪਨ ਅਸੀਸਘਟ੍ਟਾ ਅਧਿਪ੍ਪੇਤਾ. ਅਭਿਨਿਸੀਦਨਾਦੀਸੁ ਪੁਬ੍ਬੇ ਵੁਤ੍ਤਨਯੇਨੇਵ ਪਯੋਗਵਸੇਨ ਆਪਤ੍ਤਿਭੇਦੋ ਵੇਦਿਤਬ੍ਬੋ.

੧੩੩. ਅਵੇਹਾਸਕੁਟਿਯਾਤਿ ਭੂਮਿਯਂ ਕਤਪਣ੍ਣਸਾਲਾਦੀਸੁ ਅਨਾਪਤ੍ਤਿ. ਨ ਹਿ ਸਕ੍ਕਾ ਤਤ੍ਥ ਪਰਸ੍ਸ ਪੀਲ਼ਾ ਕਾਤੁਂ. ਸੀਸਘਟ੍ਟਾਯਾਤਿ ਯਾਯਂ ਸੀਸਘਟ੍ਟਾ ਹੋਤਿ, ਤਤ੍ਥਾਪਿ ਅਨਾਪਤ੍ਤਿ. ਨ ਹਿ ਸਕ੍ਕਾ ਤਤ੍ਥ ਹੇਟ੍ਠਾਪਾਸਾਦੇ ਅਨੋਣਤੇਨ ਵਿਚਰਿਤੁਂ, ਤਸ੍ਮਾ ਅਸਞ੍ਚਰਣਟ੍ਠਾਨਤ੍ਤਾ ਪਰਪੀਲ਼ਾ ਨ ਭਵਿਸ੍ਸਤਿ. ਹੇਟ੍ਠਾ ਅਪਰਿਭੋਗਂ ਹੋਤੀਤਿ ਯਸ੍ਸਾ ਹੇਟ੍ਠਾ ਦਬ੍ਬਸਮ੍ਭਾਰਾਦੀਨਂ ਨਿਕ੍ਖਿਤ੍ਤਤ੍ਤਾ ਅਪਰਿਭੋਗਂ ਹੋਤਿ, ਤਤ੍ਥਾਪਿ ਅਨਾਪਤ੍ਤਿ. ਪਦਰਸਞ੍ਚਿਤਂ ਹੋਤੀਤਿ ਯਸ੍ਸਾ ਉਪਰਿਮਤਲਂ ਦਾਰੁਫਲਕੇਹਿ ਵਾ ਘਨਸਨ੍ਥਤਂ ਹੋਤਿ, ਸੁਧਾਦਿਪਰਿਕਮ੍ਮਕਤਂ ਵਾ ਤਤ੍ਥਾਪਿ ਅਨਾਪਤ੍ਤਿ. ਪਟਾਣਿ ਦਿਨ੍ਨਾ ਹੋਤੀਤਿ ਮਞ੍ਚਪੀਠਾਨਂ ਪਾਦਸਿਖਾਸੁ ਆਣੀ ਦਿਨ੍ਨਾ ਹੋਤਿ, ਯਤ੍ਥ ਨਿਸੀਦਨ੍ਤੇਪਿ ਨ ਨਿਪ੍ਪਤਨ੍ਤਿ, ਤਾਦਿਸੇ ਮਞ੍ਚਪੀਠੇ ਨਿਸੀਦਤੋਪਿ ਅਨਾਪਤ੍ਤਿ. ਤਸ੍ਮਿਂ ਠਿਤੋਤਿ ਆਹਚ੍ਚਪਾਦਕੇ ਮਞ੍ਚੇ ਵਾ ਪੀਠੇ ਵਾ ਠਿਤੋ ਉਪਰਿ ਨਾਗਦਨ੍ਤਕਾਦੀਸੁ ਲਗ੍ਗਿਤਕਂ ਚੀਵਰਂ ਵਾ ਕਿਞ੍ਚਿ ਵਾ ਗਣ੍ਹਾਤਿ ਵਾ, ਅਞ੍ਞਂ ਵਾ ਲਗ੍ਗੇਤਿ, ਤਸ੍ਸਾਪਿ ਅਨਾਪਤ੍ਤਿ. ਸੇਸਂ ਉਤ੍ਤਾਨਮੇਵ. ਏਲ਼ਕਲੋਮਸਮੁਟ੍ਠਾਨਂ – ਕਾਯਤੋ ਚ ਕਾਯਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਵੇਹਾਸਕੁਟਿਸਿਕ੍ਖਾਪਦਂ ਅਟ੍ਠਮਂ.

੯. ਮਹਲ੍ਲਕਵਿਹਾਰਸਿਕ੍ਖਾਪਦਵਣ੍ਣਨਾ

੧੩੫. ਨਵਮਸਿਕ੍ਖਾਪਦੇ – ਯਾਵ ਦ੍ਵਾਰਕੋਸਾਤਿ ਏਤ੍ਥ ਦ੍ਵਾਰਕੋਸੋ ਨਾਮ ਪਿਟ੍ਠਸਙ੍ਘਾਟਸ੍ਸ ਸਮਨ੍ਤਾ ਕਵਾਟਵਿਤ੍ਥਾਰਪ੍ਪਮਾਣੋ ਓਕਾਸੋ. ਮਹਾਪਚ੍ਚਰਿਯਂ ਪਨ ‘‘ਦ੍ਵਾਰਬਾਹਤੋ ਪਟ੍ਠਾਯ ਦਿਯਡ੍ਢੋ ਹਤ੍ਥੋ’’ਤਿ ਵੁਤ੍ਤਂ. ਕੁਰੁਨ੍ਦਿਯਂ ਪਨ ‘‘ਦ੍ਵਾਰਸ੍ਸ ਉਭੋਸੁ ਪਸ੍ਸੇਸੁ ਕਵਾਟਪ੍ਪਮਾਣ’’ਨ੍ਤਿ. ਮਹਾਅਟ੍ਠਕਥਾਯਂ ‘‘ਕਵਾਟਂ ਨਾਮ ਦਿਯਡ੍ਢਹਤ੍ਥਮ੍ਪਿ ਹੋਤਿ ਦ੍ਵਿਹਤ੍ਥਮ੍ਪਿ ਅਡ੍ਢਤੇਯ੍ਯਹਤ੍ਥਮ੍ਪੀ’’ਤਿ ਵੁਤ੍ਤਂ, ਤਂ ਸੁਵੁਤ੍ਤਂ. ਤਦੇਵ ਹਿ ਸਨ੍ਧਾਯ ਭਗਵਤਾਪਿ ‘‘ਪਿਟ੍ਠਸਙ੍ਘਾਟਸ੍ਸ ਸਮਨ੍ਤਾ ਹਤ੍ਥਪਾਸਾ’’ਤਿ ਅਯਂ ਉਕ੍ਕਟ੍ਠਨਿਦ੍ਦੇਸੋ ਕਤੋ. ਅਗ੍ਗਲ਼ਟ੍ਠਪਨਾਯਾਤਿ ਸਕਵਾਟਕਦ੍ਵਾਰਬਨ੍ਧਟ੍ਠਪਨਾਯ; ਸਕਵਾਟਕਸ੍ਸ ਦ੍ਵਾਰਬਨ੍ਧਸ੍ਸ ਨਿਚ੍ਚਲਭਾਵਤ੍ਥਾਯਾਤਿ ਅਤ੍ਥੋ. ਦ੍ਵਾਰਟ੍ਠਪਨਾਯਾਤਿ ਇਦਮ੍ਪਿ ਹਿ ਪਦਭਾਜਨਂ ਇਮਮੇਵਤ੍ਥਂ ਸਨ੍ਧਾਯ ਭਾਸਿਤਂ. ਅਯਂ ਪਨੇਤ੍ਥ ਅਧਿਪ੍ਪਾਯੋ – ਕਵਾਟਞ੍ਹਿ ਲਹੁਪਰਿਵਟ੍ਟਕਂ ਵਿਵਰਣਕਾਲੇ ਭਿਤ੍ਤਿਂ ਆਹਨਤਿ, ਪਿਦਹਨਕਾਲੇ ਦ੍ਵਾਰਬਨ੍ਧਂ. ਤੇਨ ਆਹਨਨੇਨ ਭਿਤ੍ਤਿ ਕਮ੍ਪਤਿ, ਤਤੋ ਮਤ੍ਤਿਕਾ ਚਲਤਿ, ਚਲਿਤ੍ਵਾ ਸਿਥਿਲਾ ਵਾ ਹੋਤਿ ਪਤਤਿ ਵਾ. ਤੇਨਾਹ ਭਗਵਾ ‘‘ਯਾਵ ਦ੍ਵਾਰਕੋਸਾ ਅਗ੍ਗਲ਼ਟ੍ਠਪਨਾਯਾ’’ਤਿ. ਤਤ੍ਥ ਕਿਞ੍ਚਾਪਿ ‘‘ਇਦਂ ਨਾਮ ਕਤ੍ਤਬ੍ਬ’’ਨ੍ਤਿ ਨੇਵ ਮਾਤਿਕਾਯਂ ਨ ਪਦਭਾਜਨੇ ਵੁਤ੍ਤਂ, ਅਟ੍ਠੁਪ੍ਪਤ੍ਤਿਯਂ ਪਨ ‘‘ਪੁਨਪ੍ਪੁਨਂ ਛਾਦਾਪੇਸਿ ਪੁਨਪ੍ਪੁਨਂ ਲੇਪਾਪੇਸੀ’’ਤਿ ਅਧਿਕਾਰਤੋ ਯਾਵ ਦ੍ਵਾਰਕੋਸਾ ਅਗ੍ਗਲ਼ਟ੍ਠਪਨਾਯ ਪੁਨਪ੍ਪੁਨਂ ਲਿਮ੍ਪਿਤਬ੍ਬੋ ਵਾ ਲੇਪਾਪੇਤਬ੍ਬੋ ਵਾਤਿ ਏਵਮਤ੍ਥੋ ਦਟ੍ਠਬ੍ਬੋ.

ਯਂ ਪਨ ਪਦਭਾਜਨੇ ‘‘ਪਿਟ੍ਠਸਙ੍ਘਾਟਸ੍ਸ ਸਮਨ੍ਤਾ ਹਤ੍ਥਪਾਸਾ’’ਤਿ ਵੁਤ੍ਤਂ. ਤਤ੍ਥ ਯਸ੍ਸ ਵੇਮਜ੍ਝੇ ਦ੍ਵਾਰਂ ਹੋਤਿ, ਉਪਰਿਭਾਗੇ ਉਚ੍ਚਾ ਭਿਤ੍ਤਿ, ਤਸ੍ਸ ਤੀਸੁ ਦਿਸਾਸੁ ਸਮਨ੍ਤਾ ਹਤ੍ਥਪਾਸਾ ਉਪਚਾਰੋ ਹੋਤਿ, ਖੁਦ੍ਦਕਸ੍ਸ ਵਿਹਾਰਸ੍ਸ ਦ੍ਵੀਸੁ ਦਿਸਾਸੁ ਉਪਚਾਰੋ ਹੋਤਿ. ਤਤ੍ਰਾਪਿ ਯਂ ਭਿਤ੍ਤਿਂ ਵਿਵਰਿਯਮਾਨਂ ਕਵਾਟਂ ਆਹਨਤਿ, ਸਾ ਅਪਰਿਪੂਰਉਪਚਾਰਾਪਿ ਹੋਤਿ. ਉਕ੍ਕਟ੍ਠਪਰਿਚ੍ਛੇਦੇਨ ਪਨ ਤੀਸੁ ਦਿਸਾਸੁ ਸਮਨ੍ਤਾ ਹਤ੍ਥਪਾਸਾ ਦ੍ਵਾਰਸ੍ਸ ਨਿਚ੍ਚਲਭਾਵਤ੍ਥਾਯ ਲੇਪੋ ਅਨੁਞ੍ਞਾਤੋ. ਸਚੇ ਪਨਸ੍ਸ ਦ੍ਵਾਰਸ੍ਸ ਅਧੋਭਾਗੇਪਿ ਲੇਪੋਕਾਸੋ ਅਤ੍ਥਿ, ਤਮ੍ਪਿ ਲਿਮ੍ਪਿਤੁਂ ਵਟ੍ਟਤਿ. ਆਲੋਕਸਨ੍ਧਿਪਰਿਕਮ੍ਮਾਯਾਤਿ ਏਤ੍ਥ ਆਲੋਕਸਨ੍ਧੀਤਿ ਵਾਤਪਾਨਕਵਾਟਕਾ ਵੁਚ੍ਚਨ੍ਤਿ, ਤੇਪਿ ਵਿਵਰਣਕਾਲੇ ਵਿਦਤ੍ਥਿਮਤ੍ਤਮ੍ਪਿ ਅਤਿਰੇਕਮ੍ਪਿ ਭਿਤ੍ਤਿਪ੍ਪਦੇਸਂ ਪਹਰਨ੍ਤਿ. ਉਪਚਾਰੋ ਪਨੇਤ੍ਥ ਸਬ੍ਬਦਿਸਾਸੁ ਲਬ੍ਭਤਿ, ਤਸ੍ਮਾ ਸਬ੍ਬਦਿਸਾਸੁ ਕਵਾਟਵਿਤ੍ਥਾਰਪ੍ਪਮਾਣੋ ਓਕਾਸੋ ਆਲੋਕਸਨ੍ਧਿਪਰਿਕਮ੍ਮਤ੍ਥਾਯ ਲਿਮ੍ਪਿਤਬ੍ਬੋ ਵਾ ਲੇਪਾਪੇਤਬ੍ਬੋ ਵਾਤਿ ਅਯਮੇਤ੍ਥ ਅਧਿਪ੍ਪਾਯੋ.

ਸੇਤਵਣ੍ਣਨ੍ਤਿਆਦਿਕਂ ਨ ਮਾਤਿਕਾਯ ਪਦਭਾਜਨਂ. ਇਮਿਨਾ ਹਿ ਵਿਹਾਰਸ੍ਸ ਭਾਰਿਕਤ੍ਤਂ ਨਾਮ ਨਤ੍ਥੀਤਿ ਪਦਭਾਜਨੇਯੇਵ ਅਨੁਞ੍ਞਾਤਂ, ਤਸ੍ਮਾ ਸਬ੍ਬਮੇਤਂ ਯਥਾਸੁਖਂ ਕਤ੍ਤਬ੍ਬਂ.

ਏਵਂ ਲੇਪਕਮ੍ਮੇ ਯਂ ਕਤ੍ਤਬ੍ਬਂ, ਤਂ ਦਸ੍ਸੇਤ੍ਵਾ ਪੁਨ ਛਦਨੇ ਕਤ੍ਤਬ੍ਬਂ ਦਸ੍ਸੇਤੁਂ ‘‘ਦ੍ਵਤ੍ਤਿਚ੍ਛਦਨਸ੍ਸਾ’’ਤਿਆਦਿ ਵੁਤ੍ਤਂ. ਤਤ੍ਥ ਦ੍ਵਤ੍ਤਿਚ੍ਛਦਨਸ੍ਸ ਪਰਿਯਾਯਨ੍ਤਿ ਛਦਨਸ੍ਸ ਦ੍ਵਤ੍ਤਿਪਰਿਯਾਯਂ; ਪਰਿਯਾਯੋ ਵੁਚ੍ਚਤਿ ਪਰਿਕ੍ਖੇਪੋ, ਪਰਿਕ੍ਖੇਪਦ੍ਵਯਂ ਵਾ ਪਰਿਕ੍ਖੇਪਤ੍ਤਯਂ ਵਾ ਅਧਿਟ੍ਠਾਤਬ੍ਬਨ੍ਤਿ ਅਤ੍ਥੋ. ਅਪ੍ਪਹਰਿਤੇ ਠਿਤੇਨਾਤਿ ਅਹਰਿਤੇ ਠਿਤੇਨ. ਹਰਿਤਨ੍ਤਿ ਚੇਤ੍ਥ ਸਤ੍ਤਧਞ੍ਞਭੇਦਂ ਪੁਬ੍ਬਣ੍ਣਂ ਮੁਗ੍ਗਮਾਸਤਿਲਕੁਲਤ੍ਥਅਲਾਬੁਕੁਮ੍ਭਣ੍ਡਾਦਿਭੇਦਞ੍ਚ ਅਪਰਣ੍ਣਂ ਅਧਿਪ੍ਪੇਤਂ. ਤੇਨੇਵਾਹ – ‘‘ਹਰਿਤਂ ਨਾਮ ਪੁਬ੍ਬਣ੍ਣਂ ਅਪਰਣ੍ਣ’’ਨ੍ਤਿ.

ਸਚੇ ਹਰਿਤੇ ਠਿਤੋ ਅਧਿਟ੍ਠਾਤਿ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਪਨ ਯਸ੍ਮਿਮ੍ਪਿ ਖੇਤ੍ਤੇ ਵੁਤ੍ਤਂ ਬੀਜਂ ਨ ਤਾਵ ਸਮ੍ਪਜ੍ਜਤਿ, ਵਸ੍ਸੇ ਵਾ ਪਨ ਪਤਿਤੇ ਸਮ੍ਪਜ੍ਜਿਸ੍ਸਤਿ, ਤਮ੍ਪਿ ਹਰਿਤਸਙ੍ਖ੍ਯਮੇਵ ਗਚ੍ਛਤਿ. ਤਸ੍ਮਾ ਏਵਰੂਪੇ ਖੇਤ੍ਤੇਪਿ ਠਿਤੇਨ ਨ ਅਧਿਟ੍ਠਾਤਬ੍ਬਂ, ਅਹਰਿਤੇਯੇਵ ਠਿਤੇਨ ਅਧਿਟ੍ਠਾਤਬ੍ਬਂ. ਤਤ੍ਰਾਪਿ ਅਯਂ ਪਰਿਚ੍ਛੇਦੋ, ਪਿਟ੍ਠਿਵਂਸਸ੍ਸ ਵਾ ਕੂਟਾਗਾਰਕਣ੍ਣਿਕਾਯ ਵਾ ਉਪਰਿ ਥੁਪਿਕਾਯ ਵਾ ਪਸ੍ਸੇ ਨਿਸਿਨ੍ਨੋ ਛਦਨਮੁਖਵਟ੍ਟਿਅਨ੍ਤੇਨ ਓਲੋਕੇਨ੍ਤੋ ਯਸ੍ਮਿਂ ਭੂਮਿਭਾਗੇ ਠਿਤਂ ਪਸ੍ਸਤਿ, ਯਸ੍ਮਿਞ੍ਚ ਭੂਮਿਭਾਗੇ ਠਿਤੋ, ਤਂ ਉਪਰਿ ਨਿਸਿਨ੍ਨਕਂ ਪਸ੍ਸਤਿ, ਤਸ੍ਮਿਂ ਠਾਨੇ ਅਧਿਟ੍ਠਾਤਬ੍ਬਂ. ਤਸ੍ਸ ਅਨ੍ਤੋ ਅਹਰਿਤੇਪਿ ਠਤ੍ਵਾ ਅਧਿਟ੍ਠਾਤੁਂ ਨ ਲਬ੍ਭਤਿ. ਕਸ੍ਮਾ? ਵਿਹਾਰਸ੍ਸ ਹਿ ਪਤਨ੍ਤਸ੍ਸ ਅਯਂ ਪਤਨੋਕਾਸੋਤਿ.

੧੩੬. ਮਗ੍ਗੇਨ ਛਾਦੇਨ੍ਤਸ੍ਸਾਤਿ ਏਤ੍ਥ ਮਗ੍ਗੇਨ ਛਾਦਨਂ ਨਾਮ ਅਪਰਿਕ੍ਖਿਪਿਤ੍ਵਾ ਉਜੁਕਮੇਵ ਛਾਦਨਂ; ਤਂ ਇਟ੍ਠਕਸਿਲਾਸੁਧਾਹਿ ਲਬ੍ਭਤਿ. ਦ੍ਵੇ ਮਗ੍ਗੇ ਅਧਿਟ੍ਠਹਿਤ੍ਵਾਤਿ ਦ੍ਵੇ ਮਗ੍ਗਾ ਸਚੇ ਦੁਚ੍ਛਨ੍ਨਾ ਹੋਨ੍ਤਿ, ਅਪਨੇਤ੍ਵਾਪਿ ਪੁਨਪ੍ਪੁਨਂ ਛਾਦੇਤੁਂ ਲਬ੍ਭਤਿ, ਤਸ੍ਮਾ ਯਥਾ ਇਚ੍ਛਤਿ; ਤਥਾ ਦ੍ਵੇ ਮਗ੍ਗੇ ਅਧਿਟ੍ਠਹਿਤ੍ਵਾ ਤਤਿਯਂਮਗ੍ਗਂ ‘‘ਇਦਾਨਿ ਏਵਂ ਛਾਦੇਹੀ’’ਤਿ ਆਣਾਪੇਤ੍ਵਾ ਪਕ੍ਕਮਿਤਬ੍ਬਂ. ਪਰਿਯਾਯੇਨਾਤਿ ਪਰਿਕ੍ਖੇਪੇਨ. ਏਵਂਛਦਨਂ ਪਨ ਤਿਣਪਣ੍ਣੇਹਿ ਲਬ੍ਭਤਿ. ਤਸ੍ਮਾ ਇਧਾਪਿ ਯਥਾ ਇਚ੍ਛਤਿ ਤਥਾ ਦ੍ਵੇ ਪਰਿਯਾਯੇ ਅਧਿਟ੍ਠਹਿਤ੍ਵਾ ਤਤਿਯਂ ਪਰਿਯਾਯਂ ‘‘ਇਦਾਨਿ ਏਵਂ ਛਾਦੇਹੀ’’ਤਿ ਆਣਾਪੇਤ੍ਵਾ ਪਕ੍ਕਮਿਤਬ੍ਬਂ. ਸਚੇ ਨ ਪਕ੍ਕਮਤਿ, ਤੁਣ੍ਹੀਭੂਤੇਨ ਠਾਤਬ੍ਬਂ. ਸਬ੍ਬਮ੍ਪਿ ਚੇਤਂ ਛਦਨਂ ਛਦਨੂਪਰਿ ਵੇਦਿਤਬ੍ਬਂ. ਉਪਰੂਪਰਿਚ੍ਛਨ੍ਨੋ ਹਿ ਵਿਹਾਰੋ ਚਿਰਂ ਅਨੋਵਸ੍ਸਕੋ ਹੋਤੀਤਿ ਮਞ੍ਞਮਾਨਾ ਏਵਂ ਛਾਦੇਨ੍ਤਿ. ਤਤੋ ਚੇ ਉਤ੍ਤਰਿਨ੍ਤਿ ਤਿਣ੍ਣਂ ਮਗ੍ਗਾਨਂ ਵਾ ਪਰਿਯਾਯਾਨਂ ਵਾ ਉਪਰਿ ਚਤੁਤ੍ਥੇ ਮਗ੍ਗੇ ਵਾ ਪਰਿਯਾਯੇ ਵਾ.

੧੩੭. ਕਰਲ਼ੇ ਕਰਲ਼ੇਤਿ ਤਿਣਮੁਟ੍ਠਿਯਂ ਤਿਣਮੁਟ੍ਠਿਯਂ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ. ਛਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਮਹਲ੍ਲਕਵਿਹਾਰਸਿਕ੍ਖਾਪਦਂ ਨਵਮਂ.

੧੦. ਸਪ੍ਪਾਣਕਸਿਕ੍ਖਾਪਦਵਣ੍ਣਨਾ

੧੪੦. ਦਸਮਸਿਕ੍ਖਾਪਦੇ – ਜਾਨਂ ਸਪ੍ਪਾਣਕਨ੍ਤਿ ਸਪ੍ਪਾਣਕਂ ਏਤਨ੍ਤਿ ਯਥਾ ਤਥਾ ਵਾ ਜਾਨਨ੍ਤੋ. ਸਿਞ੍ਚੇਯ੍ਯ ਵਾ ਸਿਞ੍ਚਾਪੇਯ੍ਯ ਵਾਤਿ ਤੇਨ ਉਦਕੇਨ ਸਯਂ ਵਾ ਸਿਞ੍ਚੇਯ੍ਯ, ਅਞ੍ਞਂ ਵਾ ਆਣਾਪੇਤ੍ਵਾ ਸਿਞ੍ਚਾਪੇਯ੍ਯ. ਪਾਲ਼ਿਯਂ ਪਨ ‘‘ਸਿਞ੍ਚੇਯ੍ਯਾਤਿ ਸਯਂ ਸਿਞ੍ਚਤੀ’’ਤਿ ਈਦਿਸਾਨਂ ਵਚਨਾਨਂ ਅਤ੍ਥੋ ਪੁਬ੍ਬੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਤਤ੍ਥ ਧਾਰਂ ਅਵਿਚ੍ਛਿਨ੍ਦਿਤ੍ਵਾ ਸਿਞ੍ਚਨ੍ਤਸ੍ਸ ਏਕਸ੍ਮਿਂ ਉਦਕਘਟੇ ਏਕਾਵ ਆਪਤ੍ਤਿ. ਏਸ ਨਯੋ ਸਬ੍ਬਭਾਜਨੇਸੁ. ਧਾਰਂ ਵਿਚ੍ਛਿਨ੍ਦਨ੍ਤਸ੍ਸ ਪਨ ਪਯੋਗੇ ਪਯੋਗੇ ਆਪਤ੍ਤਿ. ਮਾਤਿਕਂ ਸਮ੍ਮੁਖਂ ਕਰੋਤਿ, ਦਿਵਸਮ੍ਪਿ ਸਨ੍ਦਤੁ, ਏਕਾਵ ਆਪਤ੍ਤਿ. ਸਚੇ ਤਤ੍ਥ ਤਤ੍ਥ ਬਨ੍ਧਿਤ੍ਵਾ ਅਞ੍ਞਤੋ ਅਞ੍ਞਤੋ ਨੇਤਿ, ਪਯੋਗੇ ਪਯੋਗੇ ਆਪਤ੍ਤਿ. ਸਕਟਭਾਰਮਤ੍ਤਞ੍ਚੇਪਿ ਤਿਣਂ ਏਕਪਯੋਗੇਨ ਉਦਕੇ ਪਕ੍ਖਿਪਤਿ, ਏਕਾਵ ਆਪਤ੍ਤਿ. ਏਕੇਕਂ ਤਿਣਂ ਵਾ ਪਣ੍ਣਂ ਵਾ ਪਕ੍ਖਿਪਨ੍ਤਸ੍ਸ ਪਯੋਗੇ ਪਯੋਗੇ ਆਪਤ੍ਤਿ. ਮਤ੍ਤਿਕਾਯਪਿ ਅਞ੍ਞੇਸੁਪਿ ਕਟ੍ਠਗੋਮਯਾਦੀਸੁ ਏਸੇਵ ਨਯੋ. ਇਦਂ ਪਨ ਮਹਾਉਦਕਂ ਸਨ੍ਧਾਯ ਨ ਵੁਤ੍ਤਂ, ਯਂ ਤਿਣੇ ਵਾ ਮਤ੍ਤਿਕਾਯ ਵਾ ਪਕ੍ਖਿਤ੍ਤਾਯ ਪਰਿਯਾਦਾਨਂ ਗਚ੍ਛਤਿ, ਆਵਿਲਂ ਵਾ ਹੋਤਿ, ਯਤ੍ਥ ਪਾਣਕਾ ਮਰਨ੍ਤਿ, ਤਾਦਿਸਂ ਉਦਕਂ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.

ਤਿਸਮੁਟ੍ਠਾਨਂ – ਕਾਯਚਿਤ੍ਤਤੋ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ ਤਿਵੇਦਨਨ੍ਤਿ.

ਸਪ੍ਪਾਣਕਸਿਕ੍ਖਾਪਦਂ ਦਸਮਂ.

ਸਮਤ੍ਤੋ ਵਣ੍ਣਨਾਕ੍ਕਮੇਨ ਸੇਨਾਸਨਵਗ੍ਗੋ ਦੁਤਿਯੋ.