੪. ਅਨਮਤਗ੍ਗਸਂਯੁਤ੍ਤਂ

੧. ਪਠਮਵਗ੍ਗੋ

੧. ਤਿਣਕਟ੍ਠਸੁਤ੍ਤਵਣ੍ਣਨਾ

੧੨੪. ਅਨਮਤਗ੍ਗਸਂਯੁਤ੍ਤਸ੍ਸ ਪਠਮੇ ਅਨਮਤਗ੍ਗੋਤਿ ਅਨੁ ਅਮਤਗ੍ਗੋ, ਵਸ੍ਸਸਤਂ ਵਸ੍ਸਸਹਸ੍ਸਂ ਞਾਣੇਨ ਅਨੁਗਨ੍ਤ੍ਵਾਪਿ ਅਮਤਗ੍ਗੋ ਅਵਿਦਿਤਗ੍ਗੋ, ਨਾਸ੍ਸ ਸਕ੍ਕਾ ਇਤੋ ਵਾ ਏਤ੍ਤੋ ਵਾ ਅਗ੍ਗਂ ਜਾਨਿਤੁਂ, ਅਪਰਿਚ੍ਛਿਨ੍ਨਪੁਬ੍ਬਾਪਰਕੋਟਿਕੋਤਿ ਅਤ੍ਥੋ. ਸਂਸਾਰੋਤਿ ਖਨ੍ਧਾਦੀਨਂ ਅਵਿਚ੍ਛਿਨ੍ਨਪ੍ਪਵਤ੍ਤਾ ਪਟਿਪਾਟਿ. ਪੁਬ੍ਬਾ ਕੋਟਿ ਨ ਪਞ੍ਞਾਯਤੀਤਿ ਪੁਰਿਮਮਰਿਯਾਦਾ ਨ ਦਿਸ੍ਸਤਿ. ਯਦਗ੍ਗੇਨ ਚਸ੍ਸ ਪੁਰਿਮਾ ਕੋਟਿ ਨ ਪਞ੍ਞਾਯਤਿ, ਪਚ੍ਛਿਮਾਪਿ ਤਦਗ੍ਗੇਨੇਵ ਨ ਪਞ੍ਞਾਯਤਿ, ਵੇਮਜ੍ਝੇਯੇਵ ਪਨ ਸਤ੍ਤਾ ਸਂਸਰਨ੍ਤਿ. ਪਰਿਯਾਦਾਨਂ ਗਚ੍ਛੇਯ੍ਯਾਤਿ ਇਦਂ ਉਪਮਾਯ ਖੁਦ੍ਦਕਤ੍ਤਾ ਵੁਤ੍ਤਂ. ਬਾਹਿਰਸਮਯਸ੍ਮਿਞ੍ਹਿ ਅਤ੍ਥੋ ਪਰਿਤ੍ਤੋ ਹੋਤਿ, ਉਪਮਾ ਮਹਤੀ. ‘‘ਹਤ੍ਥੀ ਵਿਯ ਅਯਂ ਗੋਣੋ, ਗੋਣੋ ਵਿਯ ਸੂਕਰੋ, ਸਮੁਦ੍ਦੋ ਵਿਯ ਤਲ਼ਾਕ’’ਨ੍ਤਿ ਹਿ ਵੁਤ੍ਤੇ ਨ ਤੇਸਂ ਤਾਦਿਸਂ ਪਮਾਣਂ ਹੋਤਿ. ਬੁਦ੍ਧਸਮਯੇ ਪਨ ਉਪਮਾ ਪਰਿਤ੍ਤਾ, ਅਤ੍ਥੋ ਮਹਾ. ਪਾਲ਼ਿਯਞ੍ਹਿ ਏਕੋ ਜਮ੍ਬੁਦੀਪੋ ਗਹਿਤੋ, ਏਵਰੂਪਾਨਂ ਪਨ ਜਮ੍ਬੁਦੀਪਾਨਂ ਸਤੇਪਿ ਸਹਸ੍ਸੇਪਿ ਸਤਸਹਸ੍ਸੇਪਿ ਤਿਣਾਦੀਨਿ ਤੇਨ ਉਪਕ੍ਕਮੇਨ ਪਰਿਯਾਦਾਨਂ ਗਚ੍ਛੇਯ੍ਯੁਂ, ਨ ਤ੍ਵੇਵ ਪੁਰਿਸਸ੍ਸ ਮਾਤੁ ਮਾਤਰੋਤਿ. ਦੁਕ੍ਖਂ ਪਚ੍ਚਨੁਭੂਤਨ੍ਤਿ ਤੁਮ੍ਹੇਹਿ ਦੁਕ੍ਖਂ ਅਨੁਭੂਤਂ. ਤਿਬ੍ਬਨ੍ਤਿ ਤਸ੍ਸੇਵ ਵੇਵਚਨਂ. ਬ੍ਯਸਨਨ੍ਤਿ ਞਾਤਿਬ੍ਯਸਨਾਦਿਅਨੇਕਵਿਧਂ. ਕਟਸੀਤਿ ਸੁਸਾਨਂ, ਪਥਵੀਯੇਵ ਵਾ. ਸਾ ਹਿ ਪੁਨਪ੍ਪੁਨਂ ਮਰਨ੍ਤੇਹਿ ਸਰੀਰਨਿਕ੍ਖੇਪੇਨ ਵਡ੍ਢਿਤਾ. ਅਲਮੇਵਾਤਿ ਯੁਤ੍ਤਮੇਵ. ਪਠਮਂ.

੨. ਪਥਵੀਸੁਤ੍ਤਵਣ੍ਣਨਾ

੧੨੫. ਦੁਤਿਯੇ ਮਹਾਪਥਵਿਨ੍ਤਿ ਚਕ੍ਕਵਾਲ਼ਪਰਿਯਨ੍ਤਂ ਮਹਾਪਥਵਿਂ. ਨਿਕ੍ਖਿਪੇਯ੍ਯਾਤਿ ਤਂ ਪਥਵਿਂ ਭਿਨ੍ਦਿਤ੍ਵਾ ਵੁਤ੍ਤਪ੍ਪਮਾਣਂ ਗੁਲ਼ਿਕਂ ਕਰਿਤ੍ਵਾ ਏਕਮਨ੍ਤਂ ਠਪੇਯ੍ਯ. ਦੁਤਿਯਂ.

੩. ਅਸ੍ਸੁਸੁਤ੍ਤਵਣ੍ਣਨਾ

੧੨੬. ਤਤਿਯੇ ਕਨ੍ਦਨ੍ਤਾਨਨ੍ਤਿ ਸਸਦ੍ਦਂ ਰੁਦਮਾਨਾਨਂ. ਪਸ੍ਸਨ੍ਨਨ੍ਤਿ ਸਨ੍ਦਿਤਂ ਪਵਤ੍ਤਂ. ਚਤੂਸੁ ਮਹਾਸਮੁਦ੍ਦੇਸੂਤਿ ਸਿਨੇਰੁਰਸ੍ਮੀਹਿ ਪਰਿਚ੍ਛਿਨ੍ਨੇਸੁ ਚਤੂਸੁ ਮਹਾਸਮੁਦ੍ਦੇਸੁ. ਸਿਨੇਰੁਸ੍ਸ ਹਿ ਪਾਚੀਨਪਸ੍ਸਂ ਰਜਤਮਯਂ, ਦਕ੍ਖਿਣਪਸ੍ਸਂ ਮਣਿਮਯਂ, ਪਚ੍ਛਿਮਪਸ੍ਸਂ ਫਲਿਕਮਯਂ, ਉਤ੍ਤਰਪਸ੍ਸਂ ਸੁਵਣ੍ਣਮਯਂ. ਪੁਬ੍ਬਦਕ੍ਖਿਣਪਸ੍ਸੇਹਿ ਨਿਕ੍ਖਨ੍ਤਾ ਰਜਤਮਣਿਰਸ੍ਮਿਯੋ ਏਕਤੋ ਹੁਤ੍ਵਾ ਮਹਾਸਮੁਦ੍ਦਪਿਟ੍ਠੇਨ ਗਨ੍ਤ੍ਵਾ ਚਕ੍ਕਵਾਲ਼ਪਬ੍ਬਤਂ ਆਹਚ੍ਚ ਤਿਟ੍ਠਨ੍ਤਿ, ਦਕ੍ਖਿਣਪਚ੍ਛਿਮਪਸ੍ਸੇਹਿ ਨਿਕ੍ਖਨ੍ਤਾ ਮਣਿਫਲਿਕਰਸ੍ਮਿਯੋ, ਪਚ੍ਛਿਮੁਤ੍ਤਰਪਸ੍ਸੇਹਿ ਨਿਕ੍ਖਨ੍ਤਾ ਫਲਿਕਸੁਵਣ੍ਣਰਸ੍ਮਿਯੋ, ਉਤ੍ਤਰਪਾਚੀਨਪਸ੍ਸੇਹਿ ਨਿਕ੍ਖਨ੍ਤਾ ਸੁਵਣ੍ਣਰਜਤਰਸ੍ਮਿਯੋ ਏਕਤੋ ਹੁਤ੍ਵਾ ਮਹਾਸਮੁਦ੍ਦਪਿਟ੍ਠੇਨ ਗਨ੍ਤ੍ਵਾ ਚਕ੍ਕਵਾਲ਼ਪਬ੍ਬਤਂ ਆਹਚ੍ਚ ਤਿਟ੍ਠਨ੍ਤਿ. ਤਾਸਂ ਰਸ੍ਮੀਨਂ ਅਨ੍ਤਰੇਸੁ ਚਤ੍ਤਾਰੋ ਮਹਾਸਮੁਦ੍ਦਾ ਹੋਨ੍ਤਿ. ਤੇ ਸਨ੍ਧਾਯ ਵੁਤ੍ਤਂ ‘‘ਚਤੂਸੁ ਮਹਾਸਮੁਦ੍ਦੇਸੂ’’ਤਿ. ਞਾਤਿਬ੍ਯਸਨਨ੍ਤਿਆਦੀਸੁ ਬ੍ਯਸਨਨ੍ਤਿ ਵਿਅਸਨਂ, ਵਿਨਾਸੋਤਿ ਅਤ੍ਥੋ. ਞਾਤੀਨਂ ਬ੍ਯਸਨਂ ਞਾਤਿਬ੍ਯਸਨਂ, ਭੋਗਾਨਂ ਬ੍ਯਸਨਂ ਭੋਗਬ੍ਯਸਨਂ. ਰੋਗੋ ਪਨ ਸਯਮੇਵ ਆਰੋਗ੍ਯਂ ਵਿਯਸਤਿ ਵਿਨਾਸੇਤੀਤਿ ਬ੍ਯਸਨਂ, ਰੋਗੋਵ ਬ੍ਯਸਨਂ ਰੋਗਬ੍ਯਸਨਂ. ਤਤਿਯਂ.

੪. ਖੀਰਸੁਤ੍ਤਵਣ੍ਣਨਾ

੧੨੭. ਚਤੁਤ੍ਥੇ ਮਾਤੁਥਞ੍ਞਨ੍ਤਿ ਏਕਨਾਮਿਕਾਯ ਮਨੁਸ੍ਸਮਾਤੁ ਖੀਰਂ. ਇਮੇਸਞ੍ਹਿ ਸਤ੍ਤਾਨਂ ਗਣ੍ਡੁਪ੍ਪਾਦਕਿਪਿਲ੍ਲਿਕਾਦੀਸੁ ਵਾ ਮਚ੍ਛਕਚ੍ਛਪਾਦੀਸੁ ਵਾ ਪਕ੍ਖਿਜਾਤੇਸੁ ਵਾ ਨਿਬ੍ਬਤ੍ਤਕਾਲੇ ਮਾਤੁਖੀਰਮੇਵ ਨਤ੍ਥਿ, ਅਜਪਸੁਮਹਿਂਸਾਦੀਸੁ ਨਿਬ੍ਬਤ੍ਤਕਾਲੇ ਖੀਰਂ ਅਤ੍ਥਿ, ਤਥਾ ਮਨੁਸ੍ਸੇਸੁ. ਤਤ੍ਥ ਅਜਾਦਿਕਾਲੇ ਚ ਮਨੁਸ੍ਸੇਸੁ ਚਾਪਿ ‘‘ਦੇਵੀ ਸੁਮਨਾ ਤਿਸ੍ਸਾ’’ਤਿ ਏਵਂ ਨਾਨਾਨਾਮਿਕਾਨਂ ਕੁਚ੍ਛਿਯਂ ਨਿਬ੍ਬਤ੍ਤਕਾਲੇ ਅਗ੍ਗਹੇਤ੍ਵਾ ਤਿਸ੍ਸਾਤਿ ਏਕਨਾਮਿਕਾਯ ਏਵ ਮਾਤੁ ਕੁਚ੍ਛਿਯਂ ਨਿਬ੍ਬਤ੍ਤਕਾਲੇ ਪੀਤਂ ਥਞ੍ਞਂ ਚਤੂਸੁ ਮਹਾਸਮੁਦ੍ਦੇਸੁ ਉਦਕਤੋ ਬਹੁਤਰਨ੍ਤਿ ਵੇਦਿਤਬ੍ਬਂ. ਚਤੁਤ੍ਥਂ.

੫. ਪਬ੍ਬਤਸੁਤ੍ਤਵਣ੍ਣਨਾ

੧੨੮. ਪਞ੍ਚਮੇ ਸਕ੍ਕਾ ਪਨ, ਭਨ੍ਤੇਤਿ ਸੋ ਕਿਰ ਭਿਕ੍ਖੁ ਚਿਨ੍ਤੇਸਿ – ‘‘ਸਤ੍ਥਾ ਅਨਮਤਗ੍ਗਸ੍ਸ ਸਂਸਾਰਸ੍ਸ ਦੀਘਤਮਤ੍ਤਾ ‘ਨ ਸੁਕਰਂ ਨ ਸੁਕਰ’ਨ੍ਤਿ ਕਥੇਤਿਯੇਵ, ਕਥਂ ਨਚ੍ਛਿਨ੍ਦਤਿ, ਸਕ੍ਕਾ ਨੁ ਖੋ ਉਪਮਂ ਕਾਰਾਪੇਤੁ’’ਨ੍ਤਿ. ਤਸ੍ਮਾ ਏਵਮਾਹ. ਕਾਸਿਕੇਨਾਤਿ ਤਯੋ ਕਪ੍ਪਾਸਂਸੂ ਏਕਤੋ ਗਹੇਤ੍ਵਾ ਕਨ੍ਤਿਤਸੁਤ੍ਤਮਯੇਨ ਅਤਿਸੁਖੁਮਵਤ੍ਥੇਨ. ਤੇਨ ਪਨ ਪਰਿਮਟ੍ਠੇ ਕਿਤ੍ਤਕਂ ਖੀਯੇਯ੍ਯਾਤਿ. ਸਾਸਪਮਤ੍ਤਂ. ਪਞ੍ਚਮਂ.

੬. ਸਾਸਪਸੁਤ੍ਤਵਣ੍ਣਨਾ

੧੨੯. ਛਟ੍ਠੇ ਆਯਸਂ ਨਗਰਨ੍ਤਿ ਆਯਸੇਨ ਪਾਕਾਰੇਨ ਪਰਿਕ੍ਖਿਤ੍ਤਂ ਨਗਰਂ, ਨ ਪਨ ਅਨ੍ਤੋ ਆਯਸੇਹਿ ਏਕਭੂਮਿਕਾਦਿਪਾਸਾਦੇਹਿ ਆਕਿਣ੍ਣਨ੍ਤਿ ਦਟ੍ਠਬ੍ਬਂ. ਛਟ੍ਠਂ.

੭. ਸਾਵਕਸੁਤ੍ਤਵਣ੍ਣਨਾ

੧੩੦. ਸਤ੍ਤਮੇ ਅਨੁਸ੍ਸਰੇਯ੍ਯੁਨ੍ਤਿ ਏਕੇਨ ਕਪ੍ਪਸਤਸਹਸ੍ਸੇ ਅਨੁਸ੍ਸਰਿਤੇ ਅਪਰੋ ਤਸ੍ਸ ਠਿਤਟ੍ਠਾਨਤੋ ਅਞ੍ਞਂ ਸਤਸਹਸ੍ਸਂ, ਅਞ੍ਞੋਪਿ ਅਞ੍ਞਨ੍ਤਿ ਏਵਂ ਚਤ੍ਤਾਰੋਪਿ ਚਤ੍ਤਾਰਿਸਤਸਹਸ੍ਸਾਨਿ ਅਨੁਸ੍ਸਰੇਯ੍ਯੁਂ. ਸਤ੍ਤਮਂ.

੮-੯. ਗਙ੍ਗਾਸੁਤ੍ਤਾਦਿਵਣ੍ਣਨਾ

੧੩੧-੧੩੨. ਅਟ੍ਠਮੇ ਯਾ ਏਤਸ੍ਮਿਂ ਅਨ੍ਤਰੇ ਵਾਲਿਕਾਤਿ ਯਾ ਏਤਸ੍ਮਿਂ ਆਯਾਮਤੋ ਪਞ੍ਚਯੋਜਨਸਤਿਕੇ ਅਨ੍ਤਰੇ ਵਾਲਿਕਾ. ਨਵਮੇ ਵਤ੍ਤਬ੍ਬਂ ਨਤ੍ਥਿ. ਅਟ੍ਠਮਨਵਮਾਨਿ.

੧੦. ਪੁਗ੍ਗਲਸੁਤ੍ਤਵਣ੍ਣਨਾ

੧੩੩. ਦਸਮੇ ਅਟ੍ਠਿਕਙ੍ਕਲੋਤਿਆਦੀਨਿ ਤੀਣਿਪਿ ਰਾਸਿਵੇਵਚਨਾਨੇਵ. ਇਮੇਸਂ ਪਨ ਸਤ੍ਤਾਨਂ ਸਅਟ੍ਠਿਕਾਲਤੋ ਅਨਟ੍ਠਿਕਾਲੋਵ ਬਹੁਤਰੋ. ਗਣ੍ਡੁਪ੍ਪਾਦਕਾਦਿਪਾਣਭੂਤਾਨਞ੍ਹਿ ਏਤੇਸਂ ਅਟ੍ਠਿਮੇਵ ਨਤ੍ਥਿ, ਮਚ੍ਛਕਚ੍ਛਪਾਦਿਭੂਤਾਨਂ ਪਨ ਅਟ੍ਠਿਮੇਵ ਬਹੁਤਰਂ, ਤਸ੍ਮਾ ਅਨਟ੍ਠਿਕਾਲਞ੍ਚ ਬਹੁਅਟ੍ਠਿਕਾਲਞ੍ਚ ਅਗ੍ਗਹੇਤ੍ਵਾ ਸਮਟ੍ਠਿਕਾਲੋਵ ਗਹੇਤਬ੍ਬੋ. ਉਤ੍ਤਰੋ ਗਿਜ੍ਝਕੂਟਸ੍ਸਾਤਿ ਗਿਜ੍ਝਕੂਟਸ੍ਸ ਉਤ੍ਤਰਪਸ੍ਸੇ ਠਿਤੋ. ਮਗਧਾਨਂ ਗਿਰਿਬ੍ਬਜੇਤਿ ਮਗਧਰਟ੍ਠਸ੍ਸ ਗਿਰਿਬ੍ਬਜੇ, ਗਿਰਿਪਰਿਕ੍ਖੇਪੇ ਠਿਤੋਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ. ਦਸਮਂ.

ਪਠਮੋ ਵਗ੍ਗੋ.

੨. ਦੁਤਿਯਵਗ੍ਗੋ

੧. ਦੁਗ੍ਗਤਸੁਤ੍ਤਵਣ੍ਣਨਾ

੧੩੪. ਦੁਤਿਯਵਗ੍ਗਸ੍ਸ ਪਠਮੇ ਦੁਗ੍ਗਤਨ੍ਤਿ ਦਲਿਦ੍ਦਂ ਕਪਣਂ. ਦੁਰੂਪੇਤਨ੍ਤਿ ਦੁਸ੍ਸਣ੍ਠਾਨੇਹਿ ਹਤ੍ਥਪਾਦੇਹਿ ਉਪੇਤਂ. ਪਠਮਂ.

੨. ਸੁਖਿਤਸੁਤ੍ਤਵਣ੍ਣਨਾ

੧੩੫. ਦੁਤਿਯੇ ਸੁਖਿਤਨ੍ਤਿ ਸੁਖਸਮਪ੍ਪਿਤਂ ਮਹਦ੍ਧਨਂ ਮਹਾਭੋਗਂ. ਸੁਸਜ੍ਜਿਤਨ੍ਤਿ ਅਲਙ੍ਕਤਪਟਿਯਤ੍ਤਂ ਹਤ੍ਥਿਕ੍ਖਨ੍ਧਗਤਂ ਮਹਾਪਰਿਵਾਰਂ. ਦੁਤਿਯਂ.

੩. ਤਿਂਸਮਤ੍ਤਸੁਤ੍ਤਵਣ੍ਣਨਾ

੧੩੬. ਤਤਿਯੇ ਪਾਵੇਯ੍ਯਕਾਤਿ ਪਾਵੇਯ੍ਯਦੇਸਵਾਸਿਨੋ. ਸਬ੍ਬੇ ਆਰਞ੍ਞਿਕਾਤਿਆਦੀਸੁ ਧੁਤਙ੍ਗਸਮਾਦਾਨਵਸੇਨ ਤੇਸਂ ਆਰਞ੍ਞਿਕਾਦਿਭਾਵੋ ਵੇਦਿਤਬ੍ਬੋ. ਸਬ੍ਬੇ ਸਸਂਯੋਜਨਾਤਿ ਸਬ੍ਬੇ ਸਬਨ੍ਧਨਾ, ਕੇਚਿ ਸੋਤਾਪਨ੍ਨਾ, ਕੇਚਿ ਸਕਦਾਗਾਮਿਨੋ, ਕੇਚਿ ਅਨਾਗਾਮਿਨੋ. ਤੇਸੁ ਹਿ ਪੁਥੁਜ੍ਜਨੋ ਵਾ ਖੀਣਾਸਵੋ ਵਾ ਨਤ੍ਥਿ. ਗੁਨ੍ਨਨ੍ਤਿਆਦੀਸੁ ਸੇਤਕਾਲ਼ਾਦਿਵਣ੍ਣੇਸੁ ਏਕੇਕਵਣ੍ਣਕਾਲੋਵ ਗਹੇਤਬ੍ਬੋ. ਪਾਰਿਪਨ੍ਥਕਾਤਿ ਪਰਿਪਨ੍ਥੇ ਤਿਟ੍ਠਨਕਾ ਪਨ੍ਥਘਾਤਚੋਰਾ. ਪਾਰਦਾਰਿਕਾਤਿ ਪਰਦਾਰਚਾਰਿਤ੍ਤਂ ਆਪਜ੍ਜਨਕਾ. ਤਤਿਯਂ.

੪-੯. ਮਾਤੁਸੁਤ੍ਤਾਦਿਵਣ੍ਣਨਾ

੧੩੭-੧੪੨. ਚਤੁਤ੍ਥਾਦੀਸੁ ਲਿਙ੍ਗਨਿਯਮੇਨ ਚੇਵ ਚਕ੍ਕਵਾਲ਼ਨਿਯਮੇਨ ਚ ਅਤ੍ਥੋ ਵੇਦਿਤਬ੍ਬੋ. ਪੁਰਿਸਾਨਞ੍ਹਿ ਮਾਤੁਗਾਮਕਾਲੋ, ਮਾਤੁਗਾਮਾਨਞ੍ਚ ਪੁਰਿਸਕਾਲੋਤਿ ਏਵਮੇਤ੍ਥ ਲਿਙ੍ਗਨਿਯਮੋ. ਇਮਮ੍ਹਾ ਚਕ੍ਕਵਾਲ਼ਾ ਸਤ੍ਤਾ ਪਰਚਕ੍ਕਵਾਲ਼ਂ, ਪਰਚਕ੍ਕਵਾਲ਼ਾ ਚ ਇਮਂ ਚਕ੍ਕਵਾਲ਼ਂ ਸਂਸਰਨ੍ਤਿ. ਤੇਸੁ ਇਮਸ੍ਮਿਂ ਚਕ੍ਕਵਾਲ਼ੇ ਮਾਤੁਗਾਮਕਾਲੇ ਮਾਤੁਭੂਤਞ੍ਞੇਵ ਦਸ੍ਸੇਨ੍ਤੋ ਯੋ ਨਮਾਤਾਭੂਤਪੁਬ੍ਬੋਤਿ ਆਹ. ਯੋ ਨਪਿਤਾਭੂਤਪੁਬ੍ਬੋਤਿਆਦੀਸੁਪਿ ਏਸੇਵ ਨਯੋ. ਚਤੁਤ੍ਥਾਦੀਨਿ.

੧੦. ਵੇਪੁਲ੍ਲਪਬ੍ਬਤਸੁਤ੍ਤਵਣ੍ਣਨਾ

੧੪੩. ਦਸਮੇ ਭੂਤਪੁਬ੍ਬਨ੍ਤਿ ਅਤੀਤਕਾਲੇ ਏਕਂ ਅਪਦਾਨਂ ਆਹਰਿਤ੍ਵਾ ਦਸ੍ਸੇਤਿ. ਸਮਞ੍ਞਾ ਉਦਪਾਦੀਤਿ ਪਞ੍ਞਤ੍ਤਿ ਅਹੋਸਿ. ਚਤੂਹੇਨ ਆਰੋਹਨ੍ਤੀਤਿ ਇਦਂ ਥਾਮਮਜ੍ਝਿਮੇ ਸਨ੍ਧਾਯ ਵੁਤ੍ਤਂ. ਅਗ੍ਗਨ੍ਤਿ ਉਤ੍ਤਮਂ. ਭਦ੍ਦਯੁਗਨ੍ਤਿ ਸੁਨ੍ਦਰਯੁਗਲਂ. ਤੀਹੇਨ ਆਰੋਹਨ੍ਤੀਤਿ ਏਤ੍ਤਾਵਤਾ ਕਿਰ ਦ੍ਵਿਨ੍ਨਂ ਬੁਦ੍ਧਾਨਂ ਅਨ੍ਤਰੇ ਯੋਜਨਂ ਪਥਵੀ ਉਸ੍ਸਨ੍ਨਾ, ਸੋ ਪਬ੍ਬਤੋ ਤਿਯੋਜਨੁਬ੍ਬੇਧੋ ਜਾਤੋ.

ਅਪ੍ਪਂ ਵਾ ਭਿਯ੍ਯੋਤਿ ਵਸ੍ਸਸਤਤੋ ਉਤ੍ਤਰਿਂ ਅਪ੍ਪਂ ਦਸ ਵਾ ਵੀਸਂ ਵਾ ਵਸ੍ਸਾਨਿ. ਪੁਨ ਵਸ੍ਸਸਤਮੇਵ ਜੀਵਨਕੋ ਨਾਮ ਨਤ੍ਥਿ, ਉਤ੍ਤਮਕੋਟਿਯਾ ਪਨ ਸਟ੍ਠਿ ਵਾ ਅਸੀਤਿ ਵਾ ਵਸ੍ਸਾਨਿ ਜੀਵਨ੍ਤਿ. ਵਸ੍ਸਸਤਂ ਪਨ ਅਪ੍ਪਤ੍ਵਾ ਪਞ੍ਚਵਸ੍ਸਦਸਵਸ੍ਸਾਦਿਕਾਲੇ ਮੀਯਮਾਨਾਵ ਬਹੁਕਾ. ਏਤ੍ਥ ਚ ਕਕੁਸਨ੍ਧੋ ਭਗਵਾ ਚਤ੍ਤਾਲੀਸਵਸ੍ਸਸਹਸ੍ਸਾਯੁਕਕਾਲੇ, ਕੋਣਾਗਮਨੋ ਤਿਂਸਵਸ੍ਸਸਹਸ੍ਸਾਯੁਕਕਾਲੇ ਨਿਬ੍ਬਤ੍ਤੋਤਿ ਇਦਂ ਅਨੁਪੁਬ੍ਬੇਨ ਪਰਿਹੀਨਸਦਿਸਂ ਕਤਂ, ਨ ਪਨ ਏਵਂ ਪਰਿਹੀਨਂ, ਵਡ੍ਢਿਤ੍ਵਾ ਵਡ੍ਢਿਤ੍ਵਾ ਪਰਿਹੀਨਨ੍ਤਿ ਵੇਦਿਤਬ੍ਬਂ. ਕਥਂ? ਕਕੁਸਨ੍ਧੋ ਤਾਵ ਭਗਵਾ ਇਮਸ੍ਮਿਂਯੇਵ ਕਪ੍ਪੇ ਚਤ੍ਤਾਲੀਸਵਸ੍ਸਸਹਸ੍ਸਾਯੁਕਕਾਲੇ ਨਿਬ੍ਬਤ੍ਤੋ ਆਯੁਪ੍ਪਮਾਣਂ ਪਞ੍ਚ ਕੋਟ੍ਠਾਸੇ ਕਤ੍ਵਾ ਚਤ੍ਤਾਰੋ ਠਤ੍ਵਾ ਪਞ੍ਚਮੇ ਵਿਜ੍ਜਮਾਨੇਯੇਵ ਪਰਿਨਿਬ੍ਬੁਤੋ. ਤਂ ਆਯੁ ਪਰਿਹਾਯਮਾਨਂ ਦਸਵਸ੍ਸਕਾਲਂ ਪਤ੍ਵਾ ਪੁਨ ਵਡ੍ਢਮਾਨਂ ਅਸਙ੍ਖੇਯ੍ਯਂ ਹੁਤ੍ਵਾ ਤਤੋ ਪਰਿਹਾਯਮਾਨਂ ਤਿਂਸਵਸ੍ਸਸਹਸ੍ਸਾਯੁਕਕਾਲੇ ਠਿਤਂ, ਤਦਾ ਕੋਣਾਗਮਨੋ ਨਿਬ੍ਬਤ੍ਤੋ. ਤਸ੍ਮਿਮ੍ਪਿ ਤਥੇਵ ਪਰਿਨਿਬ੍ਬੁਤੇ ਤਂ ਆਯੁ ਦਸਵਸ੍ਸਕਾਲਂ ਪਤ੍ਵਾ ਪੁਨ ਵਡ੍ਢਮਾਨਂ ਅਸਙ੍ਖੇਯ੍ਯਂ ਹੁਤ੍ਵਾ ਪਰਿਹਾਯਿਤ੍ਵਾ ਵੀਸਵਸ੍ਸਸਹਸ੍ਸਕਾਲੇ ਠਿਤਂ, ਤਦਾ ਕਸ੍ਸਪੋ ਭਗਵਾ ਨਿਬ੍ਬਤ੍ਤੋ. ਤਸ੍ਮਿਮ੍ਪਿ ਤਥੇਵ ਪਰਿਨਿਬ੍ਬੁਤੇ ਤਂ ਆਯੁ ਦਸਵਸ੍ਸਕਾਲਂ ਪਤ੍ਵਾ ਪੁਨ ਵਡ੍ਢਮਾਨਂ ਅਸਙ੍ਖੇਯ੍ਯਂ ਹੁਤ੍ਵਾ ਪਰਿਹਾਯਿਤ੍ਵਾ ਵਸ੍ਸਸਤਕਾਲਂ ਪਤ੍ਤਂ, ਅਥ ਅਮ੍ਹਾਕਂ ਸਮ੍ਮਾਸਮ੍ਬੁਦ੍ਧੋ ਨਿਬ੍ਬਤ੍ਤੋ. ਏਵਂ ਅਨੁਪੁਬ੍ਬੇਨ ਪਰਿਹਾਯਿਤ੍ਵਾ ਵਡ੍ਢਿਤ੍ਵਾ ਵਡ੍ਢਿਤ੍ਵਾ ਪਰਿਹੀਨਨ੍ਤਿ ਵੇਦਿਤਬ੍ਬਂ. ਤਤ੍ਥ ਚ ਯਂ ਆਯੁਪਰਿਮਾਣੇਸੁ ਮਨ੍ਦੇਸੁ ਬੁਦ੍ਧਾ ਨਿਬ੍ਬਤ੍ਤਨ੍ਤਿ, ਤੇਸਮ੍ਪਿ ਤਦੇਵ ਆਯੁਪਰਿਮਾਣਂ ਹੋਤੀਤਿ. ਦਸਮਂ.

ਦੁਤਿਯੋ ਵਗ੍ਗੋ.

ਅਨਮਤਗ੍ਗਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.