੫. ਅਨਙ੍ਗਣਸੁਤ੍ਤਵਣ੍ਣਨਾ

੫੭. ਏਵਂ ਮੇ ਸੁਤਂ…ਪੇ… ਆਯਸ੍ਮਾ ਸਾਰਿਪੁਤ੍ਤੋਤਿ ਅਨਙ੍ਗਣਸੁਤ੍ਤਂ. ਤਤ੍ਰਾਯਂ ਅਨੁਤ੍ਤਾਨਪਦਵਣ੍ਣਨਾ – ਯਥਾ ਚੇਤ੍ਥ, ਏਵਂ ਸਬ੍ਬਸੁਤ੍ਤੇਸੁ. ਤਸ੍ਮਾ ਇਤੋ ਪਰਂ ਏਤ੍ਤਕਮ੍ਪਿ ਅਵਤ੍ਵਾ ਅਪੁਬ੍ਬਪਦਵਣ੍ਣਨਂਯੇਵ ਕਰਿਸ੍ਸਾਮ.

ਚਤ੍ਤਾਰੋਤਿ ਗਣਨਪਰਿਚ੍ਛੇਦੋ. ਪੁਗ੍ਗਲਾਤਿ ਸਤ੍ਤਾ ਨਰਾ ਪੋਸਾ. ਏਤ੍ਤਾਵਤਾ ਚ ਪੁਗ੍ਗਲਵਾਦੀ ਮਹਾਥੇਰੋਤਿ ਨ ਗਹੇਤਬ੍ਬਂ, ਅਯਞ੍ਹਿ ਆਯਸ੍ਮਾ ਬੁਦ੍ਧਪੁਤ੍ਤਾਨਂ ਸੇਟ੍ਠੋ, ਸੋ ਬੁਦ੍ਧਸ੍ਸ ਭਗਵਤੋ ਦੇਸਨਂ ਅਵਿਲੋਮੇਨ੍ਤੋਯੇਵ ਦੇਸੇਤਿ.

ਸਮ੍ਮੁਤਿਪਰਮਤ੍ਥਦੇਸਨਾਕਥਾਵਣ੍ਣਨਾ

ਬੁਦ੍ਧਸ੍ਸ ਭਗਵਤੋ ਦੁਵਿਧਾ ਦੇਸਨਾ ਸਮ੍ਮੁਤਿਦੇਸਨਾ, ਪਰਮਤ੍ਥਦੇਸਨਾ ਚਾਤਿ. ਤਤ੍ਥ ਪੁਗ੍ਗਲੋ ਸਤ੍ਤੋ ਇਤ੍ਥੀ ਪੁਰਿਸੋ ਖਤ੍ਤਿਯੋ ਬ੍ਰਾਹ੍ਮਣੋ ਦੇਵੋ ਮਾਰੋਤਿ ਏਵਰੂਪਾ ਸਮ੍ਮੁਤਿਦੇਸਨਾ. ਅਨਿਚ੍ਚਂ ਦੁਕ੍ਖਂ ਅਨਤ੍ਤਾ, ਖਨ੍ਧਾ ਧਾਤੂ ਆਯਤਨਾਨਿ ਸਤਿਪਟ੍ਠਾਨਾਤਿ ਏਵਰੂਪਾ ਪਰਮਤ੍ਥਦੇਸਨਾ.

ਤਤ੍ਥ ਭਗਵਾ ਯੇ ਸਮ੍ਮੁਤਿਵਸੇਨ ਦੇਸਨਂ ਸੁਤ੍ਵਾ ਅਤ੍ਥਂ ਪਟਿਵਿਜ੍ਝਿਤ੍ਵਾ ਮੋਹਂ ਪਹਾਯ ਵਿਸੇਸਂ ਅਧਿਗਨ੍ਤੁਂ ਸਮਤ੍ਥਾ, ਤੇਸਂ ਸਮ੍ਮੁਤਿਦੇਸਨਂ ਦੇਸੇਤਿ. ਯੇ ਪਨ ਪਰਮਤ੍ਥਵਸੇਨ ਦੇਸਨਂ ਸੁਤ੍ਵਾ ਅਤ੍ਥਂ ਪਟਿਵਿਜ੍ਝਿਤ੍ਵਾ ਮੋਹਂ ਪਹਾਯ ਵਿਸੇਸਮਧਿਗਨ੍ਤੁਂ ਸਮਤ੍ਥਾ, ਤੇਸਂ ਪਰਮਤ੍ਥਦੇਸਨਂ ਦੇਸੇਤਿ. ਤਤ੍ਥਾਯਂ ਉਪਮਾ, ਯਥਾ ਹਿ ਦੇਸਭਾਸਾਕੁਸਲੋ ਤਿਣ੍ਣਂ ਵੇਦਾਨਂ ਅਤ੍ਥਸਂਵਣ੍ਣਨਕੋ ਆਚਰਿਯੋ ਯੇ ਦਮਿਲ਼ਭਾਸਾਯ ਵੁਤ੍ਤੇ ਅਤ੍ਥਂ ਜਾਨਨ੍ਤਿ, ਤੇਸਂ ਦਮਿਲ਼ਭਾਸਾਯ ਆਚਿਕ੍ਖਤਿ. ਯੇ ਅਨ੍ਧਕਭਾਸਾਦੀਸੁ ਅਞ੍ਞਤਰਾਯ, ਤੇਸਂ ਤਾਯ ਤਾਯ ਭਾਸਾਯ. ਏਵਂ ਤੇ ਮਾਣਵਕਾ ਛੇਕਂ ਬ੍ਯਤ੍ਤਂ ਆਚਰਿਯਮਾਗਮ੍ਮ ਖਿਪ੍ਪਮੇਵ ਸਿਪ੍ਪਂ ਉਗ੍ਗਣ੍ਹਨ੍ਤਿ. ਤਤ੍ਥ ਆਚਰਿਯੋ ਵਿਯ ਬੁਦ੍ਧੋ ਭਗਵਾ. ਤਯੋ ਵੇਦਾ ਵਿਯ ਕਥੇਤਬ੍ਬਭਾਵੇਨ ਠਿਤਾਨਿ ਤੀਣਿ ਪਿਟਕਾਨਿ. ਦੇਸਭਾਸਾਕੋਸਲ੍ਲਮਿਵ ਸਮ੍ਮੁਤਿਪਰਮਤ੍ਥਕੋਸਲ੍ਲਂ. ਨਾਨਾਦੇਸਭਾਸਾ ਮਾਣਵਕਾ ਵਿਯ ਸਮ੍ਮੁਤਿਪਰਮਤ੍ਥਦੇਸਨਾਪਟਿਵਿਜ੍ਝਨਸਮਤ੍ਥਾ ਵੇਨੇਯ੍ਯਸਤ੍ਤਾ. ਆਚਰਿਯਸ੍ਸ ਦਮਿਲ਼ਭਾਸਾਦਿਆਚਿਕ੍ਖਨਂ ਵਿਯ ਭਗਵਤੋ ਸਮ੍ਮੁਤਿਪਰਮਤ੍ਥਵਸੇਨ ਦੇਸਨਾ ਵੇਦਿਤਬ੍ਬਾ. ਆਹ ਚੇਤ੍ਥ –

‘‘ਦੁਵੇ ਸਚ੍ਚਾਨਿ ਅਕ੍ਖਾਸਿ, ਸਮ੍ਬੁਦ੍ਧੋ ਵਦਤਂ ਵਰੋ;

ਸਮ੍ਮੁਤਿਂ ਪਰਮਤ੍ਥਞ੍ਚ, ਤਤਿਯਂ ਨੂਪਲਬ੍ਭਤਿ.

ਸਙ੍ਕੇਤਵਚਨਂ ਸਚ੍ਚਂ, ਲੋਕਸਮ੍ਮੁਤਿਕਾਰਣਾ;

ਪਰਮਤ੍ਥਵਚਨਂ ਸਚ੍ਚਂ, ਧਮ੍ਮਾਨਂ ਭੂਤਕਾਰਣਾ.

ਤਸ੍ਮਾ ਵੋਹਾਰਕੁਸਲਸ੍ਸ, ਲੋਕਨਾਥਸ੍ਸ ਸਤ੍ਥੁਨੋ;

ਸਮ੍ਮੁਤਿਂ ਵੋਹਰਨ੍ਤਸ੍ਸ, ਮੁਸਾਵਾਦੋ ਨ ਜਾਯਤੀ’’ਤਿ.

ਅਪਿਚ ਅਟ੍ਠਹਿ ਕਾਰਣੇਹਿ ਭਗਵਾ ਪੁਗ੍ਗਲਕਥਂ ਕਥੇਤਿ – ਹਿਰੋਤ੍ਤਪ੍ਪਦੀਪਨਤ੍ਥਂ, ਕਮ੍ਮਸ੍ਸਕਤਾਦੀਪਨਤ੍ਥਂ, ਪਚ੍ਚਤ੍ਤਪੁਰਿਸਕਾਰਦੀਪਨਤ੍ਥਂ, ਆਨਨ੍ਤਰਿਯਦੀਪਨਤ੍ਥਂ, ਬ੍ਰਹ੍ਮਵਿਹਾਰਦੀਪਨਤ੍ਥਂ, ਪੁਬ੍ਬੇਨਿਵਾਸਦੀਪਨਤ੍ਥਂ, ਦਕ੍ਖਿਣਾਵਿਸੁਦ੍ਧਿਦੀਪਨਤ੍ਥਂ, ਲੋਕਸਮ੍ਮੁਤਿਯਾ ਅਪ੍ਪਹਾਨਤ੍ਥਞ੍ਚਾਤਿ. ‘‘ਖਨ੍ਧਧਾਤੁਆਯਤਨਾਨਿ ਹਿਰੀਯਨ੍ਤਿ ਓਤ੍ਤਪ੍ਪਨ੍ਤੀ’’ਤਿ ਹਿ ਵੁਤ੍ਤੇ ਮਹਾਜਨੋ ਨ ਜਾਨਾਤਿ, ਸਮ੍ਮੋਹਮਾਪਜ੍ਜਤਿ, ਪਟਿਸਤ੍ਤੁ ਹੋਤਿ ‘‘ਕਿਮਿਦਂ ਖਨ੍ਧਧਾਤੁਆਯਤਨਾਨਿ ਹਿਰੀਯਨ੍ਤਿ ਓਤ੍ਤਪ੍ਪਨ੍ਤਿ ਨਾਮਾ’’ਤਿ. ‘‘ਇਤ੍ਥੀ ਹਿਰੀਯਤਿ ਓਤ੍ਤਪ੍ਪਤਿ ਪੁਰਿਸੋ ਖਤ੍ਤਿਯੋ ਬ੍ਰਾਹ੍ਮਣੋ ਦੇਵੋ ਮਾਰੋ’’ਤਿ ਵੁਤ੍ਤੇ ਪਨ ਜਾਨਾਤਿ, ਨ ਸਮ੍ਮੋਹਮਾਪਜ੍ਜਤਿ, ਨ ਪਟਿਸਤ੍ਤੁ ਹੋਤਿ. ਤਸ੍ਮਾ ਭਗਵਾ ਹਿਰੋਤ੍ਤਪ੍ਪਦੀਪਨਤ੍ਥਂ ਪੁਗ੍ਗਲਕਥਂ ਕਥੇਤਿ.

‘‘ਖਨ੍ਧਾ ਕਮ੍ਮਸ੍ਸਕਾ ਧਾਤੁਯੋ ਆਯਤਨਾਨੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਤਸ੍ਮਾ ਭਗਵਾ ਕਮ੍ਮਸ੍ਸਕਤਾਦੀਪਨਤ੍ਥਂ ਪੁਗ੍ਗਲਕਥਂ ਕਥੇਤਿ.

‘‘ਵੇਲ਼ੁਵਨਾਦਯੋ ਮਹਾਵਿਹਾਰਾ ਖਨ੍ਧੇਹਿ ਕਾਰਾਪਿਤਾ ਧਾਤੂਹਿ ਆਯਤਨੇਹੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਤਸ੍ਮਾ ਭਗਵਾ ਪਚ੍ਚਤ੍ਤਪੁਰਿਸਕਾਰਦੀਪਨਤ੍ਥਂ ਪੁਗ੍ਗਲਕਥਂ ਕਥੇਤਿ.

‘‘ਖਨ੍ਧਾ ਮਾਤਰਂ ਜੀਵਿਤਾ ਵੋਰੋਪੇਨ੍ਤਿ ਪਿਤਰਂ ਅਰਹਨ੍ਤਂ ਰੁਹਿਰੁਪ੍ਪਾਦਕਮ੍ਮਂ ਕਰੋਨ੍ਤਿ, ਸਙ੍ਘਭੇਦਕਮ੍ਮਂ ਕਰੋਨ੍ਤਿ, ਧਾਤੁਯੋ ਆਯਤਨਾਨੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਤਸ੍ਮਾ ਭਗਵਾ ਆਨਨ੍ਤਰਿਯਦੀਪਨਤ੍ਥਂ ਪੁਗ੍ਗਲਕਥਂ ਕਥੇਤਿ. ‘‘ਖਨ੍ਧਾ ਮੇਤ੍ਤਾਯਨ੍ਤਿ ਧਾਤੁਯੋ ਆਯਤਨਾਨੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਤਸ੍ਮਾ ਭਗਵਾ ਬ੍ਰਹ੍ਮਵਿਹਾਰਦੀਪਨਤ੍ਥਂ ਪੁਗ੍ਗਲਕਥਂ ਕਥੇਤਿ.

‘‘ਖਨ੍ਧਾ ਪੁਬ੍ਬੇਨਿਵਾਸਮਨੁਸ੍ਸਰਨ੍ਤਿ ਧਾਤੁਯੋ ਆਯਤਨਾਨੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਤਸ੍ਮਾ ਭਗਵਾ ਪੁਬ੍ਬੇਨਿਵਾਸਦੀਪਨਤ੍ਥਂ ਪੁਗ੍ਗਲਕਥਂ ਕਥੇਤਿ. ‘‘ਖਨ੍ਧਾ ਦਾਨਂ ਪਟਿਗ੍ਗਣ੍ਹਨ੍ਤਿ ਧਾਤੁਯੋ ਆਯਤਨਾਨੀ’’ਤਿ ਵੁਤ੍ਤੇਪਿ ਮਹਾਜਨੋ ਨ ਜਾਨਾਤਿ, ਸਮ੍ਮੋਹਮਾਪਜ੍ਜਤਿ, ਪਟਿਸਤ੍ਤੁ ਹੋਤਿ ‘‘ਕਿਮਿਦਂ ਖਨ੍ਧਧਾਤੁਆਯਤਨਾਨਿ ਪਟਿਗ੍ਗਣ੍ਹਨ੍ਤਿ ਨਾਮਾ’’ਤਿ. ‘‘ਪੁਗ੍ਗਲਾ ਪਟਿਗ੍ਗਣ੍ਹਨ੍ਤਿ ਸੀਲਵਨ੍ਤੋ ਕਲ੍ਯਾਣਧਮ੍ਮਾ’’ਤਿ ਵੁਤ੍ਤੇ ਪਨ ਜਾਨਾਤਿ, ਨ ਸਮ੍ਮੋਹਮਾਪਜ੍ਜਤਿ, ਨ ਪਟਿਸਤ੍ਤੁ ਹੋਤਿ. ਤਸ੍ਮਾ ਭਗਵਾ ਦਕ੍ਖਿਣਾਵਿਸੁਦ੍ਧਿਦੀਪਨਤ੍ਥਂ ਪੁਗ੍ਗਲਕਥਂ ਕਥੇਤਿ.

ਲੋਕਸਮ੍ਮੁਤਿਞ੍ਚ ਬੁਦ੍ਧਾ ਭਗਵਨ੍ਤੋ ਨਪ੍ਪਜਹਨ੍ਤਿ, ਲੋਕਸਮਞ੍ਞਾਯ ਲੋਕਨਿਰੁਤ੍ਤਿਯਂ ਲੋਕਾਭਿਲਾਪੇ ਠਿਤਾਯੇਵ ਧਮ੍ਮਂ ਦੇਸੇਨ੍ਤਿ. ਤਸ੍ਮਾ ਭਗਵਾ ਲੋਕਸਮ੍ਮੁਤਿਯਾ ਅਪ੍ਪਹਾਨਤ੍ਥਮ੍ਪਿ ਪੁਗ੍ਗਲਕਥਂ ਕਥੇਤਿ. ਤਸ੍ਮਾ ਅਯਮ੍ਪਿ ਆਯਸ੍ਮਾ ਲੋਕਵੋਹਾਰਕੁਸਲਤਾਯ ਬੁਦ੍ਧਸ੍ਸ ਭਗਵਤੋ ਦੇਸਨਂ ਅਵਿਲੋਮੇਨ੍ਤੋ ਲੋਕਸਮ੍ਮੁਤਿਯਂ ਠਤ੍ਵਾਵ ਚਤ੍ਤਾਰੋਮੇ, ਆਵੁਸੋ, ਪੁਗ੍ਗਲਾਤਿ ਆਹ. ਤਸ੍ਮਾ ਏਤ੍ਥ ਪਰਮਤ੍ਥਵਸੇਨ ਅਗ੍ਗਹੇਤ੍ਵਾ ਸਮ੍ਮੁਤਿਵਸੇਨੇਵ ਪੁਗ੍ਗਲੋ ਵੇਦਿਤਬ੍ਬੋ.

ਸਨ੍ਤੋ ਸਂਵਿਜ੍ਜਮਾਨਾਤਿ ਲੋਕਸਙ੍ਕੇਤਵਸੇਨ ਅਤ੍ਥਿ ਉਪਲਬ੍ਭਮਾਨਾ. ਲੋਕਸ੍ਮਿਨ੍ਤਿ ਸਤ੍ਤਲੋਕੇ. ਸਾਙ੍ਗਣੋਵ ਸਮਾਨੋਤਿਆਦੀਸੁ ਪਨ ਅਙ੍ਗਣਨ੍ਤਿ ਕਤ੍ਥਚਿ ਕਿਲੇਸਾ ਵੁਚ੍ਚਨ੍ਤਿ. ਯਥਾਹ ‘‘ਤਤ੍ਥ ਕਤਮਾਨਿ ਤੀਣਿ ਅਙ੍ਗਣਾਨਿ? ਰਾਗੋ ਅਙ੍ਗਣਂ, ਦੋਸੋ ਅਙ੍ਗਣਂ, ਮੋਹੋ ਅਙ੍ਗਣ’’ਨ੍ਤਿ (ਵਿਭ. ੯੨੪). ਕਤ੍ਥਚਿ ਯਂਕਿਞ੍ਚਿ ਮਲਂ ਵਾ ਪਙ੍ਕੋ ਵਾ, ਯਥਾਹ ‘‘ਤਸ੍ਸੇਵ ਰਜਸ੍ਸ ਵਾ ਅਙ੍ਗਣਸ੍ਸ ਵਾ ਪਹਾਨਾਯ ਵਾਯਮਤੀ’’ਤਿ. ਕਤ੍ਥਚਿ ਤਥਾਰੂਪੋ ਭੂਮਿਭਾਗੋ, ਸੋ ਬੋਧਿਯਙ੍ਗਣਂ ਚੇਤਿਯਙ੍ਗਣਨ੍ਤਿਆਦੀਨਂ ਵਸੇਨ ਵੇਦਿਤਬ੍ਬੋ. ਇਧ ਪਨ ਨਾਨਪ੍ਪਕਾਰਾ ਤਿਬ੍ਬਕਿਲੇਸਾ ‘‘ਅਙ੍ਗਣ’’ਨ੍ਤਿ ਅਧਿਪ੍ਪੇਤਾ. ਤਥਾ ਹਿ ਵਕ੍ਖਤਿ ‘‘ਪਾਪਕਾਨਂ ਖੋ ਏਤਂ, ਆਵੁਸੋ, ਅਕੁਸਲਾਨਂ ਇਚ੍ਛਾਵਚਰਾਨਂ ਅਧਿਵਚਨਂ, ਯਦਿਦਂ ਅਙ੍ਗਣ’’ਨ੍ਤਿ (ਮ. ਨਿ. ੧.੬੦). ਸਹ ਅਙ੍ਗਣੇਨ ਸਾਙ੍ਗਣੋ.

ਸਾਙ੍ਗਣੋਵ ਸਮਾਨੋਤਿ ਸਕਿਲੇਸੋਯੇਵ ਸਨ੍ਤੋ. ਅਤ੍ਥਿ ਮੇ ਅਜ੍ਝਤ੍ਤਂ ਅਙ੍ਗਣਨ੍ਤਿ ਯਥਾਭੂਤਂ ਨਪ੍ਪਜਾਨਾਤੀਤਿ ਮਯ੍ਹਂ ਅਤ੍ਤਨੋ ਚਿਤ੍ਤਸਨ੍ਤਾਨੇ ਕਿਲੇਸੋ ਅਤ੍ਥੀਤਿਪਿ ਨ ਜਾਨਾਤਿ. ‘‘ਇਮੇ ਕਿਲੇਸਾ ਨਾਮ ਕਕ੍ਖਲ਼ਾ ਵਾਲ਼ਾ ਜਹਿਤਬ੍ਬਾ ਨ ਗਹਿਤਬ੍ਬਾ ਵਿਸਦੁਟ੍ਠਸਲ੍ਲਸਦਿਸਾ’’ਤਿ ਏਵਂ ਯਾਥਾਵਸਰਸਤੋਪਿ ਨ ਜਾਨਾਤਿ. ਯੋ ਅਤ੍ਥੀਤਿ ਚ ਜਾਨਾਤਿ, ਏਵਞ੍ਚ ਜਾਨਾਤਿ. ਸੋ ‘‘ਅਤ੍ਥਿ ਮੇ ਅਜ੍ਝਤ੍ਤਂ ਅਙ੍ਗਣਨ੍ਤਿ ਯਥਾਭੂਤਂ ਪਜਾਨਾਤੀ’’ਤਿ ਵੁਚ੍ਚਤਿ. ਯਸ੍ਸ ਪਨ ਨ ਚ ਮਗ੍ਗੇਨ ਸਮੂਹਤਾ ਕਿਲੇਸਾ, ਨ ਚ ਉਪ੍ਪਜ੍ਜਨ੍ਤਿ ਯੇਨ ਵਾ ਤੇਨ ਵਾ ਵਾਰਿਤਤ੍ਤਾ, ਅਯਮਿਧ ਅਨਙ੍ਗਣੋਤਿ ਅਧਿਪ੍ਪੇਤੋ. ਨਤ੍ਥਿ ਮੇ ਅਜ੍ਝਤ੍ਤਂ ਅਙ੍ਗਣਨ੍ਤਿ ਯਥਾਭੂਤਂ ਨਪ੍ਪਜਾਨਾਤੀਤਿ ‘‘ਮਯ੍ਹਂ ਕਿਲੇਸਾ ਯੇਨ ਵਾ ਤੇਨ ਵਾ ਵਾਰਿਤਤ੍ਤਾ ਨਤ੍ਥਿ, ਨ ਮਗ੍ਗੇਨ ਸਮੂਹਤਤ੍ਤਾ’’ਤਿ ਨ ਜਾਨਾਤਿ, ‘‘ਤੇ ਉਪ੍ਪਜ੍ਜਮਾਨਾ ਮਹਾਅਨਤ੍ਥਂ ਕਰਿਸ੍ਸਨ੍ਤਿ ਕਕ੍ਖਲ਼ਾ ਵਾਲ਼ਾ ਵਿਸਦੁਟ੍ਠਸਲ੍ਲਸਦਿਸਾ’’ਤਿ ਏਵਂ ਯਾਥਾਵਸਰਸਤੋਪਿ ਨ ਜਾਨਾਤਿ. ਯੋ ਪਨ ‘‘ਇਮਿਨਾ ਕਾਰਣੇਨ ਨਤ੍ਥੀ’’ਤਿ ਚ ਜਾਨਾਤਿ, ਏਵਞ੍ਚ ਜਾਨਾਤਿ, ਸੋ ‘‘ਨਤ੍ਥਿ ਮੇ ਅਜ੍ਝਤ੍ਤਂ ਅਙ੍ਗਣਨ੍ਤਿ ਯਥਾਭੂਤਂ ਪਜਾਨਾਤੀ’’ਤਿ ਵੁਚ੍ਚਤਿ. ਤਤ੍ਰਾਤਿ ਤੇਸੁ ਚਤੂਸੁ ਪੁਗ੍ਗਲੇਸੁ, ਤੇਸੁ ਵਾ ਦ੍ਵੀਸੁ ਸਾਙ੍ਗਣੇਸੁ, ਯ੍ਵਾਯਨ੍ਤਿ ਯੋ ਅਯਂ, ਯਾਯਨ੍ਤਿਪਿ ਪਾਠੋ.

੫੮. ਕੋ ਨੁ ਖੋ, ਆਵੁਸੋ, ਸਾਰਿਪੁਤ੍ਤ, ਹੇਤੁ ਕੋ ਪਚ੍ਚਯੋਤਿ ਉਭਯੇਨਾਪਿ ਕਾਰਣਮੇਵ ਪੁਚ੍ਛਤਿ. ਯੇਨਿਮੇਸਨ੍ਤਿ ਯੇਨ ਹੇਤੁਨਾ ਯੇਨ ਪਚ੍ਚਯੇਨ ਇਮੇਸਂ ਦ੍ਵਿਨ੍ਨਂ ਏਕੋ ਸੇਟ੍ਠਪੁਰਿਸੋ ਏਕੋ ਹੀਨਪੁਰਿਸੋਤਿ ਅਕ੍ਖਾਯਤਿ, ਸੋ ਕੋ ਹੇਤੁ ਕੋ ਪਚ੍ਚਯੋਤਿ ਏਵਮੇਤ੍ਥ ਸਮ੍ਬਨ੍ਧੋ ਵੇਦਿਤਬ੍ਬੋ. ਤਤ੍ਥ ਕਿਞ੍ਚਾਪਿ ‘‘ਨਪ੍ਪਜਾਨਾਤਿ ਪਜਾਨਾਤੀ’’ਤਿ ਏਵਂ ਵੁਤ੍ਤਂ, ਪਜਾਨਨਾ ਨਪ੍ਪਜਾਨਨਾਤਿ ਇਦਮੇਵ ਉਭਯਂ ਹੇਤੁ ਚੇਵ ਪਚ੍ਚਯੋ ਚ.

੫੯. ਥੇਰੋ ਪਨ ਅਤ੍ਤਨੋ ਵਿਚਿਤ੍ਰਪਟਿਭਾਨਤਾਯ ਤਂ ਪਾਕਟਤਰਂ ਕਤ੍ਵਾ ਦਸ੍ਸੇਤੁਂ ਪੁਨ ਤਤ੍ਰਾਵੁਸੋਤਿਆਦਿਮਾਹ. ਤਤ੍ਥ ਤਸ੍ਸੇਤਂ ਪਾਟਿਕਙ੍ਖਨ੍ਤਿ ਤਸ੍ਸ ਪੁਗ੍ਗਲਸ੍ਸ ਏਤਂ ਪਾਟਿਕਙ੍ਖਿਤਬ੍ਬਂ. ਇਦਮੇਵ ਏਸ ਪਾਪੁਣਿਸ੍ਸਤਿ, ਨ ਅਞ੍ਞਨ੍ਤਿ ਇਚ੍ਛਿਤਬ੍ਬਂ, ਅਵਸ੍ਸਂ ਭਾਵੀਤਿ ਵੁਤ੍ਤਂ ਹੋਤਿ. ‘‘ਨ ਛਨ੍ਦਂ ਜਨੇਸ੍ਸਤੀ’’ਤਿਆਦਿਨਾ ਨਯੇਨ ਵੁਤ੍ਤਂ ਅਛਨ੍ਦਜਨਨਾਦਿਂ ਸਨ੍ਧਾਯਾਹ.

ਤਤ੍ਥ ਚ ਨ ਛਨ੍ਦਂ ਜਨੇਸ੍ਸਤੀਤਿ ਅਪ੍ਪਜਾਨਨ੍ਤੋ ਤਸ੍ਸ ਅਙ੍ਗਣਸ੍ਸ ਪਹਾਨਤ੍ਥਂ ਕਤ੍ਤੁਕਮ੍ਯਤਾਛਨ੍ਦਂ ਨ ਜਨੇਸ੍ਸਤਿ. ਨ ਵਾਯਮਿਸ੍ਸਤੀਤਿ ਤਤੋ ਬਲਵਤਰਂ ਵਾਯਾਮਂ ਨ ਕਰਿਸ੍ਸਤਿ, ਨ ਵੀਰਿਯਂ ਆਰਭਿਸ੍ਸਤੀਤਿ ਥਾਮਗਤਵੀਰਿਯਂ ਪਨ ਨੇਵ ਆਰਭਿਸ੍ਸਤਿ, ਨ ਪਵਤ੍ਤੇਸ੍ਸਤੀਤਿ ਵੁਤ੍ਤਂ ਹੋਤਿ. ਸਾਙ੍ਗਣੋਤਿ ਇਮੇਹਿ ਰਾਗਾਦੀਹਿ ਅਙ੍ਗਣੇਹਿ ਸਾਙ੍ਗਣੋ. ਸਂਕਿਲਿਟ੍ਠਚਿਤ੍ਤੋਤਿ ਤੇਹਿਯੇਵ ਸੁਟ੍ਠੁਤਰਂ ਕਿਲਿਟ੍ਠਚਿਤ੍ਤੋ ਮਲੀਨਚਿਤ੍ਤੋ ਵਿਬਾਧਿਤਚਿਤ੍ਤੋ ਉਪਤਾਪਿਤਚਿਤ੍ਤੋ ਚ ਹੁਤ੍ਵਾ. ਕਾਲਂ ਕਰਿਸ੍ਸਤੀਤਿ ਮਰਿਸ੍ਸਤਿ.

ਸੇਯ੍ਯਥਾਪੀਤਿ ਯਥਾ ਨਾਮ. ਕਂਸਪਾਤੀਤਿ ਕਂਸਲੋਹਭਾਜਨਂ. ਆਭਤਾਤਿ ਆਨੀਤਾ. ਆਪਣਾ ਵਾ ਕਮ੍ਮਾਰਕੁਲਾ ਵਾਤਿ ਆਪਣਤੋ ਵਾ ਕਂਸਪਾਤਿਕਾਰਕਾਨਂ ਕਮ੍ਮਾਰਾਨਂ ਘਰਤੋ ਵਾ. ਰਜੇਨਾਤਿ ਆਗਨ੍ਤੁਕਰਜੇਨ ਪਂਸੁਆਦਿਨਾ. ਮਲੇਨਾਤਿ ਤਤ੍ਥੇਵ ਉਟ੍ਠਿਤੇਨ ਲੋਹਮਲੇਨ. ਪਰਿਯੋਨਦ੍ਧਾਤਿ ਸਞ੍ਛਨ੍ਨਾ. ਨ ਚੇਵ ਪਰਿਭੁਞ੍ਜੇਯ੍ਯੁਨ੍ਤਿ ਉਦਕਖਾਦਨੀਯਪਕ੍ਖਿਪਨਾਦੀਹਿ ਪਰਿਭੋਗਂ ਨ ਕਰੇਯ੍ਯੁਂ. ਨ ਚ ਪਰਿਯੋਦਪੇਯ੍ਯੁਨ੍ਤਿ ਧੋਵਨਘਂਸਨਾਦੀਹਿ ਨ ਪਰਿਸੁਦ੍ਧਂ ਕਾਰਾਪੇਯ੍ਯੁਂ. ਰਜਾਪਥੇਤਿ ਰਜਪਥੇ. ਅਯਮੇਵ ਵਾ ਪਾਠੋ, ਰਜਸ੍ਸ ਆਗਮਨਟ੍ਠਾਨੇ ਵਾ ਵੁਟ੍ਠਾਨੁਟ੍ਠਾਨੇ ਵਾ ਹੇਟ੍ਠਾਮਞ੍ਚੇ ਵਾ ਥੁਸਕੋਟ੍ਠਕੇ ਵਾ ਭਾਜਨਨ੍ਤਰੇ ਵਾ, ਯਤ੍ਥ ਰਜੇਨ ਓਕਿਰੀਯਤੀਤਿ ਅਤ੍ਥੋ. ਸਂਕਿਲਿਟ੍ਠਤਰਾ ਅਸ੍ਸ ਮਲਗ੍ਗਹਿਤਾਤਿ ਏਤ੍ਥ ਰਜਾਪਥੇ ਨਿਕ੍ਖਿਪਨੇਨ ਸਂਕਿਲਿਟ੍ਠਤਰਾ, ਅਪਰਿਭੋਗਾਪਰਿਯੋਦਪਨੇਹਿ ਮਲਗ੍ਗਹਿਤਤਰਾਤਿ ਵੁਤ੍ਤਂ ਹੋਤਿ, ਪਟਿਪੁਚ੍ਛਾਵਚਨਞ੍ਚੇਤਂ. ਤੇਨਸ੍ਸ ਏਵਮਤ੍ਥੋ ਵੇਦਿਤਬ੍ਬੋ, ਆਵੁਸੋ, ਸਾ ਕਂਸਪਾਤਿ ਏਵਂ ਕਰੀਯਮਾਨਾ ਅਪਰੇਨ ਕਾਲੇਨ ਸਂਕਿਲਿਟ੍ਠਤਰਾ ਚ ਮਲਗ੍ਗਹਿਤਤਰਾ ਚ ਮਤ੍ਤਿਕਪਾਤੀਤਿ ਵਾ ਕਂਸਪਾਤੀਤਿ ਵਾ ਇਤਿਪਿ ਦੁਜ੍ਜਾਨਾ ਭਵੇਯ੍ਯ ਨੁ ਖੋ ਨੋਤਿ, ਥੇਰੋ ਤਂ ਪਟਿਜਾਨਨ੍ਤੋ ਆਹ ‘‘ਏਵਮਾਵੁਸੋ’’ਤਿ. ਪੁਨ ਧਮ੍ਮਸੇਨਾਪਤਿ ਓਪਮ੍ਮਂ ਸਮ੍ਪਟਿਪਾਦੇਨ੍ਤੋ, ਏਵਮੇਵ ਖੋਤਿਆਦਿਮਾਹ. ਤਤ੍ਥੇਵਂ ਓਪਮ੍ਮਸਂਸਨ੍ਦਨਾ ਵੇਦਿਤਬ੍ਬਾ – ਕਿਲਿਟ੍ਠਕਂਸਪਾਤਿਸਦਿਸੋ ਸਾਙ੍ਗਣੋ ਪੁਗ੍ਗਲੋ. ਸਂਕਿਲਿਟ੍ਠਕਂਸਪਾਤਿਯਾ ਨਪਰਿਭੁਞ੍ਜਨਮਾਦਿਂ ਕਤ੍ਵਾ ਰਜਾਪਥਨਿਕ੍ਖੇਪੋ ਵਿਯ ਤਸ੍ਸ ਪੁਗ੍ਗਲਸ੍ਸ ਪਬ੍ਬਜ੍ਜਂ ਲਭਮਾਨਸ੍ਸ ਵੇਜ੍ਜਕਮ੍ਮਾਦੀਸੁ ਪਸੁਤਪੁਗ੍ਗਲਸਨ੍ਤਿਕੇ ਪਬ੍ਬਜ੍ਜਾਪਟਿਲਾਭੋ. ਸਂਕਿਲਿਟ੍ਠਕਂਸਪਾਤਿਯਾ ਪੁਨ ਸਂਕਿਲਿਟ੍ਠਤਰਭਾਵੋ ਵਿਯ ਤਸ੍ਸ ਪੁਗ੍ਗਲਸ੍ਸ ਅਨੁਕ੍ਕਮੇਨ ਆਚਰਿਯੁਪਜ੍ਝਾਯਾਨਂ ਅਨੁਸਿਕ੍ਖਤੋ ਵੇਜ੍ਜਕਮ੍ਮਾਦਿਕਰਣਂ, ਏਤ੍ਥ ਠਿਤਸ੍ਸ ਸਾਙ੍ਗਣਕਾਲਕਿਰਿਯਾ. ਅਥ ਵਾ ਅਨੁਕ੍ਕਮੇਨ ਦੁਕ੍ਕਟਦੁਬ੍ਭਾਸਿਤਵੀਤਿਕ੍ਕਮਨਂ, ਏਤ੍ਥ ਠਿਤਸ੍ਸ ਸਾਙ੍ਗਣਕਾਲਕਿਰਿਯਾ. ਅਥ ਵਾ ਅਨੁਕ੍ਕਮੇਨ ਪਾਚਿਤ੍ਤਿਯਥੁਲ੍ਲਚ੍ਚਯਵੀਤਿਕ੍ਕਮਨਂ, ਸਙ੍ਘਾਦਿਸੇਸਵੀਤਿਕ੍ਕਮਨਂ, ਪਾਰਾਜਿਕਵੀਤਿਕ੍ਕਮਨਂ, ਮਾਤੁਘਾਤਾਦਿਆਨਨ੍ਤਰਿਯਕਰਣਂ, ਏਤ੍ਥ ਠਿਤਸ੍ਸ ਸਾਙ੍ਗਣਕਾਲਕਿਰਿਯਾਤਿ.

ਸਂਕਿਲਿਟ੍ਠਚਿਤ੍ਤੋ ਕਾਲਂ ਕਰਿਸ੍ਸਤੀਤਿ ਏਤ੍ਥ ਚ ਅਕੁਸਲਚਿਤ੍ਤੇਨ ਕਾਲਂ ਕਰਿਸ੍ਸਤੀਤਿ ਨ ਏਵਮਤ੍ਥੋ ਦਟ੍ਠਬ੍ਬੋ. ਸਬ੍ਬਸਤ੍ਤਾ ਹਿ ਪਕਤਿਚਿਤ੍ਤੇਨ ਭਵਙ੍ਗਚਿਤ੍ਤੇਨੇਵ ਕਾਲਂ ਕਰੋਨ੍ਤਿ. ਅਯਂ ਪਨ ਅਵਿਸੋਧੇਤ੍ਵਾ ਚਿਤ੍ਤਸਨ੍ਤਾਨਂ ਕਾਲਂ ਕਰਿਸ੍ਸਤੀਤਿ ਏਤਮਤ੍ਥਂ ਸਨ੍ਧਾਯ ਏਵਂ ਵੁਤ੍ਤੋਤਿ ਵੇਦਿਤਬ੍ਬੋ.

ਦੁਤਿਯਵਾਰੇ ਪਰਿਯੋਦਪੇਯ੍ਯੁਨ੍ਤਿ ਧੋਵਨਘਂਸਨਸਣ੍ਹਛਾਰਿਕਾਪਰਿਮਜ੍ਜਨਾਦੀਹਿ ਪਰਿਸੁਦ੍ਧਂ ਆਦਾਸਮਣ੍ਡਲਸਦਿਸਂ ਕਰੇਯ੍ਯੁਂ. ਨ ਚ ਨਂ ਰਜਾਪਥੇਤਿ ਪੁਬ੍ਬੇ ਵੁਤ੍ਤਪ੍ਪਕਾਰੇ ਠਾਨੇ ਅਨਿਕ੍ਖਿਪਿਤ੍ਵਾ ਕਰਣ੍ਡਮਞ੍ਜੂਸਾਦੀਸੁ ਵਾ ਠਪੇਯ੍ਯੁਂ, ਪਲਿਵੇਠੇਤ੍ਵਾ ਵਾ ਨਾਗਦਨ੍ਤੇ ਲਗੇਯ੍ਯੁਂ. ਸੇਸਂ ਵੁਤ੍ਤਨਯਾਨੁਸਾਰੇਨੇਵ ਗਹੇਤਬ੍ਬਂ.

ਉਪਮਾਸਂਸਨ੍ਦਨਾ ਚੇਤ੍ਥ ਏਵਂ ਵੇਦਿਤਬ੍ਬਾ – ਕਿਲਿਟ੍ਠਕਂਸਪਾਤਿਸਦਿਸੋ ਸਾਙ੍ਗਣੋ ਭਬ੍ਬਪੁਗ੍ਗਲੋ. ਕਿਲਿਟ੍ਠਕਂਸਪਾਤਿਯਾ ਪਰਿਭੁਞ੍ਜਨਮਾਦਿਂ ਕਤ੍ਵਾ ਸੁਦ੍ਧਟ੍ਠਾਨੇ ਠਪਨਂ ਵਿਯ ਤਸ੍ਸ ਪੁਗ੍ਗਲਸ੍ਸ ਪਬ੍ਬਜ੍ਜਂ ਲਭਮਾਨਸ੍ਸ ਪੇਸਲਭਿਕ੍ਖੂਨਂ ਸਨ੍ਤਿਕੇ ਪਬ੍ਬਜ੍ਜਾਪਟਿਲਾਭੋ. ਯੇ ਓਵਦਨ੍ਤਿ ਅਨੁਸਾਸਨ੍ਤਿ ਅਪ੍ਪਮਤ੍ਤਕਮ੍ਪਿ ਪਮਾਦਂ ਦਿਸ੍ਵਾ ਦਣ੍ਡਕਮ੍ਮਂ ਕਤ੍ਵਾ ਪੁਨਪ੍ਪੁਨਂ ਸਿਕ੍ਖਾਪੇਨ੍ਤਿ, ਸਂਕਿਲਿਟ੍ਠਕਂਸਪਾਤਿਯਾ ਅਪਰਕਾਲੇ ਪਰਿਸੁਦ੍ਧਪਰਿਯੋਦਾਤਭਾਵੋ ਵਿਯ ਤਸ੍ਸ ਪੁਗ੍ਗਲਸ੍ਸ ਆਚਰਿਯੁਪਜ੍ਝਾਯਾਨਂ ਅਨੁਸਿਕ੍ਖਤੋ ਅਨੁਕ੍ਕਮੇਨ ਸਮ੍ਮਾਵਤ੍ਤਪਟਿਪਤ੍ਤਿ, ਏਤ੍ਥ ਠਿਤਸ੍ਸ ਅਨਙ੍ਗਣਕਾਲਕਿਰਿਯਾ. ਅਥ ਵਾ ਅਨੁਕ੍ਕਮੇਨ ਪਰਿਸੁਦ੍ਧੇ ਸੀਲੇ ਪਤਿਟ੍ਠਾਯ ਅਤ੍ਤਨੋ ਅਨੁਰੂਪਂ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਧੁਤਙ੍ਗਾਨਿ ਸਮਾਦਾਯ ਅਤ੍ਤਨੋ ਅਨੁਕੂਲਕਮ੍ਮਟ੍ਠਾਨਂ ਗਹੇਤ੍ਵਾ ਗਾਮਨ੍ਤਸੇਨਾਸਨਵਾਸਂ ਮੁਞ੍ਚਿਤ੍ਵਾ ਪਨ੍ਤਸੇਨਾਸਨਵਾਸੋ, ਏਤ੍ਥ ਠਿਤਸ੍ਸ ਅਨਙ੍ਗਣਕਾਲਕਿਰਿਯਾ. ਅਥ ਵਾ ਅਨੁਕ੍ਕਮੇਨ ਕਸਿਣਪਰਿਕਮ੍ਮਂ ਕਤ੍ਵਾ ਅਟ੍ਠਸਮਾਪਤ੍ਤਿਨਿਬ੍ਬਤ੍ਤਨੇਨ ਕਿਲੇਸਵਿਕ੍ਖਮ੍ਭਨਂ, ਵਿਪਸ੍ਸਨਾਪਾਦਕਜ੍ਝਾਨਾ ਵੁਟ੍ਠਾਯ ਵਿਪਸ੍ਸਨਾਯ ਕਿਲੇਸਾਨਂ ਤਦਙ੍ਗਨਿਵਾਰਣਂ, ਸੋਤਾਪਤ੍ਤਿਫਲਾਧਿਗਮੋ…ਪੇ… ਅਰਹਤ੍ਤਸਚ੍ਛਿਕਿਰਿਯਾਤਿ ਏਤ੍ਥ ਠਿਤਸ੍ਸ ਅਚ੍ਚਨ੍ਤਂ ਅਨਙ੍ਗਣਕਾਲਕਿਰਿਯਾ ਏਵ.

ਤਤਿਯਵਾਰੇ ਸੁਭਨਿਮਿਤ੍ਤਨ੍ਤਿ ਰਾਗਟ੍ਠਾਨਿਯਂ ਇਟ੍ਠਾਰਮ੍ਮਣਂ. ਮਨਸਿ ਕਰਿਸ੍ਸਤੀਤਿ ਤਸ੍ਮਿਂ ਵਿਪਨ੍ਨਸ੍ਸਤਿ ਤਂ ਨਿਮਿਤ੍ਤਂ ਆਵਜ੍ਜਿਸ੍ਸਤਿ. ਤਸ੍ਸ ਸੁਭਨਿਮਿਤ੍ਤਸ੍ਸ ਮਨਸਿਕਾਰਾਤਿ ਤਸ੍ਸ ਪੁਗ੍ਗਲਸ੍ਸ ਸੁਭਨਿਮਿਤ੍ਤਮਨਸਿਕਾਰਕਾਰਣਾ. ਅਨੁਦ੍ਧਂਸੇਸ੍ਸਤੀਤਿ ਹਿਂਸਿਸ੍ਸਤਿ ਅਧਿਭਵਿਸ੍ਸਤਿ. ਰਾਗੋ ਹਿ ਉਪ੍ਪਜ੍ਜਨ੍ਤੋ ਕੁਸਲਵਾਰਂ ਪਚ੍ਛਿਨ੍ਦਿਤ੍ਵਾ ਸਯਮੇਵ ਅਕੁਸਲਜਵਨਂ ਹੁਤ੍ਵਾ ਤਿਟ੍ਠਨ੍ਤੋ ਕੁਸਲਚਿਤ੍ਤਂ ਅਨੁਦ੍ਧਂਸੇਤੀਤਿ ਵੇਦਿਤਬ੍ਬੋ. ਸੇਸਂ ਵੁਤ੍ਤਨਯਾਨੁਸਾਰੇਨੇਵ ਗਹੇਤਬ੍ਬਂ.

ਓਪਮ੍ਮਸਂਸਨ੍ਦਨਾ ਪਨੇਤ੍ਥ ਏਵਂ ਵੇਦਿਤਬ੍ਬਾ – ਪਰਿਸੁਦ੍ਧਕਂਸਪਾਤਿਸਦਿਸੋ ਪਕਤਿਯਾ ਅਪ੍ਪਕਿਲੇਸੋ ਅਨਙ੍ਗਣਪੁਗ੍ਗਲੋ. ਪਰਿਸੁਦ੍ਧਕਂਸਪਾਤਿਯਾ ਨਪਰਿਭੁਞ੍ਜਨਂ ਆਦਿਂ ਕਤ੍ਵਾ ਰਜਾਪਥੇ ਨਿਕ੍ਖੇਪੋ ਵਿਯ ਤਸ੍ਸ ਪੁਗ੍ਗਲਸ੍ਸ ਪਬ੍ਬਜ੍ਜਂ ਲਭਮਾਨਸ੍ਸਾਤਿ ਇਤੋ ਪਰਂ ਸਬ੍ਬਂ ਪਠਮਵਾਰਸਦਿਸਮੇਵ.

ਚਤੁਤ੍ਥਵਾਰੇ ਸੁਭਨਿਮਿਤ੍ਤਂ ਨ ਮਨਸਿ ਕਰਿਸ੍ਸਤੀਤਿ ਤਸ੍ਮਿਂ ਸਤਿਵਿਰਹਾਭਾਵਤੋ ਤਂ ਨਿਮਿਤ੍ਤਂ ਨਾਵਜ੍ਜਿਸ੍ਸਤਿ, ਸੇਸਂ ਦੁਤਿਯਵਾਰਾਨੁਸਾਰੇਨ ਵੇਦਿਤਬ੍ਬਂ. ‘‘ਅਯਂ ਖੋ, ਆਵੁਸੋ’’ਤਿਆਦਿ ‘‘ਕੋ ਨੁ ਖੋ, ਆਵੁਸੋ’’ਤਿਆਦਿਮ੍ਹਿ ਵੁਤ੍ਤਨਯਮੇਵ.

੬੦. ਇਦਾਨਿ ਤਂ ਅਙ੍ਗਣਂ ਨਾਨਪ੍ਪਕਾਰਤੋ ਪਾਕਟਂ ਕਾਰਾਪੇਤੁਕਾਮੇਨਾਯਸ੍ਮਤਾ ਮਹਾਮੋਗ੍ਗਲ੍ਲਾਨੇਨ ‘‘ਅਙ੍ਗਣਂ ਅਙ੍ਗਣ’’ਨ੍ਤਿਆਦਿਨਾ ਨਯੇਨ ਪੁਟ੍ਠੋ ਤਂ ਬ੍ਯਾਕਰੋਨ੍ਤੋ ਪਾਪਕਾਨਂ ਖੋ ਏਤਂ, ਆਵੁਸੋਤਿਆਦਿਮਾਹ. ਤਤ੍ਥ ਇਚ੍ਛਾਵਚਰਾਨਨ੍ਤਿ ਇਚ੍ਛਾਯ ਅਵਚਰਾਨਂ, ਇਚ੍ਛਾਵਸੇਨ ਓਤਿਣ੍ਣਾਨਂ ਪਵਤ੍ਤਾਨਂ ਨਾਨਪ੍ਪਕਾਰਾਨਂ ਕੋਪਅਪ੍ਪਚ੍ਚਯਾਨਨ੍ਤਿ ਅਤ੍ਥੋ. ਯਂ ਇਧੇਕਚ੍ਚਸ੍ਸਾਤਿ ਯੇਨ ਇਧੇਕਚ੍ਚਸ੍ਸ ਏਵਂ ਇਚ੍ਛਾ ਉਪ੍ਪਜ੍ਜੇਯ੍ਯ, ਤਂ ਠਾਨਂ ਤਂ ਕਾਰਣਂ ਵਿਜ੍ਜਤਿ ਅਤ੍ਥਿ, ਉਪਲਬ੍ਭਤੀਤਿ ਵੁਤ੍ਤਂ ਹੋਤਿ. ਆਪਨ੍ਨੋ ਅਸ੍ਸਨ੍ਤਿ ਆਪਨ੍ਨੋ ਭਵੇਯ੍ਯਂ. ਨ ਚ ਮਂ ਭਿਕ੍ਖੂ ਜਾਨੇਯ੍ਯੁਨ੍ਤਿ ਭਿਕ੍ਖੂ ਚ ਮਂ ਨ ਜਾਨੇਯ੍ਯੁਂ. ਕਿਂ ਪਨੇਤ੍ਥ ਠਾਨਂ, ਲਾਭਤ੍ਥਿਕਤਾ. ਲਾਭਤ੍ਥਿਕੋ ਹਿ ਭਿਕ੍ਖੁ ਪਕਤਿਯਾਪਿ ਚ ਕਤਪੁਞ੍ਞੋ ਮਨੁਸ੍ਸੇਹਿ ਸਕ੍ਕਤੋ ਗਰੁਕਤੋ ਏਵਂ ਚਿਨ੍ਤੇਤਿ ‘‘ਆਪਤ੍ਤਿਂ ਆਪਨ੍ਨਂ ਭਿਕ੍ਖੁਂ ਥੇਰਾ ਞਤ੍ਵਾ ਮਜ੍ਝਿਮਾਨਂ ਆਰੋਚੇਨ੍ਤਿ, ਤੇ ਨਵਕਾਨਂ, ਨਵਕਾ ਵਿਹਾਰੇ ਵਿਘਾਸਾਦਾਦੀਨਂ, ਤੇ ਓਵਾਦਂ ਆਗਤਾਨਂ ਭਿਕ੍ਖੁਨੀਨਂ, ਏਵਂ ਕਮੇਨ ਚਤਸ੍ਸੋ ਪਰਿਸਾ ਜਾਨਨ੍ਤਿ. ਏਵਮਸ੍ਸ ਲਾਭਨ੍ਤਰਾਯੋ ਹੋਤਿ. ਅਹੋ ਵਤਾਹਂ ਆਪਤ੍ਤਿਞ੍ਚ ਵਤ ਆਪਨ੍ਨੋ ਅਸ੍ਸਂ, ਨ ਚ ਮਂ ਭਿਕ੍ਖੂ ਜਾਨੇਯ੍ਯੁ’’ਨ੍ਤਿ.

ਯਂ ਤਂ ਭਿਕ੍ਖੁਂ ਭਿਕ੍ਖੂ ਜਾਨੇਯ੍ਯੁਨ੍ਤਿ ਯੇਨ ਕਾਰਣੇਨ ਤਂ ਭਿਕ੍ਖੁਂ ਅਞ੍ਞੇ ਭਿਕ੍ਖੂ ਜਾਨੇਯ੍ਯੁਂ, ਤਂ ਕਾਰਣਂ ਵਿਜ੍ਜਤਿ ਖੋ ਪਨ ਅਤ੍ਥਿਯੇਵ, ਨੋ ਨਤ੍ਥਿ. ਥੇਰਾ ਹਿ ਞਤ੍ਵਾ ਮਜ੍ਝਿਮਾਨਂ ਆਰੋਚੇਨ੍ਤਿ. ਏਵਂ ਸੋ ਪੁਬ੍ਬੇ ਵੁਤ੍ਤਨਯੇਨ ਚਤੂਸੁ ਪਰਿਸਾਸੁ ਪਾਕਟੋ ਹੋਤਿ. ਏਵਂ ਪਾਕਟੋ ਚ ਅਯਸਾਭਿਭੂਤੋ ਗਾਮਸਤਮ੍ਪਿ ਪਵਿਸਿਤ੍ਵਾ ਉਮ੍ਮਾਰਸਤੇਸੁ ਠਾਨੇਸੁ ਉਞ੍ਛਿਤ੍ਵਾ ਯਥਾਧੋਤੇਨ ਪਤ੍ਤੇਨ ਨਿਕ੍ਖਮਤਿ. ਤਤੋ ਜਾਨਨ੍ਤਿ ਮਂ ਭਿਕ੍ਖੂ ਆਪਤ੍ਤਿਂ ਆਪਨ੍ਨੋਤਿ ਤੇਹਿ ਚਮ੍ਹਿ ਏਵਂ ਨਾਸਿਤੋਤਿ ਚਿਨ੍ਤੇਤ੍ਵਾ, ਇਤਿ ਸੋ ਕੁਪਿਤੋ ਹੋਤਿ ਅਪ੍ਪਤੀਤੋ ਸੋ ਇਮਿਨਾ ਕਾਰਣੇਨ ਕੁਪਿਤੋ ਚੇਵ ਹੋਤਿ ਕੋਧਾਭਿਭੂਤੋ ਅਪ੍ਪਤੀਤੋ ਚ ਦੋਮਨਸ੍ਸਾਭਿਭੂਤੋ.

ਯੋ ਚੇਵ ਖੋ, ਆਵੁਸੋ, ਕੋਪੋ ਯੋ ਚ ਅਪ੍ਪਚ੍ਚਯੋ ਉਭਯਮੇਤਂ ਅਙ੍ਗਣਨ੍ਤਿ, ਆਵੁਸੋ, ਯੋ ਚਾਯਂ ਸਙ੍ਖਾਰਕ੍ਖਨ੍ਧਸਙ੍ਗਹਿਤੋ ਕੋਪੋ, ਯੋ ਚ ਵੇਦਨਾਕ੍ਖਨ੍ਧਸਙ੍ਗਹਿਤੋ ਅਪ੍ਪਚ੍ਚਯੋ, ਏਤਂ ਉਭਯਂ ਅਙ੍ਗਣਨ੍ਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਇਦਞ੍ਚ ਤਾਦਿਸਾਨਂ ਪੁਗ੍ਗਲਾਨਂ ਵਸੇਨ ਵੁਤ੍ਤਂ. ਲੋਭੋ ਪਨ ਇਮਸ੍ਸ ਅਙ੍ਗਣਸ੍ਸ ਪੁਬ੍ਬਭਾਗਵਸੇਨ, ਮੋਹੋ ਸਮ੍ਪਯੋਗਵਸੇਨਾਪਿ ਗਹਿਤੋਯੇਵ ਹੋਤਿ.

ਅਨੁਰਹੋ ਮਨ੍ਤਿ ਪੁਰਿਮਸਦਿਸਮੇਵ ਭਿਕ੍ਖੁਂ ਗਹੇਤ੍ਵਾ ਵਿਹਾਰਪਚ੍ਚਨ੍ਤੇ ਸੇਨਾਸਨਂ ਪਵੇਸੇਤ੍ਵਾ ਦ੍ਵਾਰਂ ਥਕੇਤ੍ਵਾ ਚੋਦੇਨ੍ਤੇ ਇਚ੍ਛਤਿ. ਠਾਨਂ ਖੋ ਪਨੇਤਨ੍ਤਿ ਏਤਂ ਕਾਰਣਂ ਵਿਜ੍ਜਤਿ, ਯਂ ਤਂ ਭਿਕ੍ਖੁਂ ਚਤੁਪਰਿਸਮਜ੍ਝੇ ਆਨੇਤ੍ਵਾ ਬ੍ਯਤ੍ਤਾ ਵਿਨੀਤਾ ‘‘ਤਯਾ ਅਸੁਕਮ੍ਹਿ ਨਾਮ ਠਾਨੇ ਵੇਜ੍ਜਕਮ੍ਮਂ ਕਤ’’ਨ੍ਤਿਆਦਿਨਾ ਨਯੇਨ ਚੋਦੇਯ੍ਯੁਂ. ਸੋ ਚਤੂਸੁ ਪਰਿਸਾਸੁ ਪਾਕਟੋ ਹੋਤਿ. ਏਵਂ ਪਾਕਟੋ ਚ ਅਯਸਾਭਿਭੂਤੋਤਿ ਸਬ੍ਬਂ ਪੁਰਿਮਸਦਿਸਮੇਵ.

ਸਪ੍ਪਟਿਪੁਗ੍ਗਲੋਤਿ ਸਮਾਨੋ ਪੁਗ੍ਗਲੋ. ਸਮਾਨੋਤਿ ਸਾਪਤ੍ਤਿਕੋ. ਪਟਿਪੁਗ੍ਗਲੋਤਿ ਚੋਦਕੋ. ਅਯਂ ਸਾਪਤ੍ਤਿਕੇਨੇਵ ਚੋਦਨਂ ਇਚ੍ਛਤਿ, ਤ੍ਵਮ੍ਪਿ ਇਮਞ੍ਚਿਮਞ੍ਚ ਆਪਤ੍ਤਿਂ ਆਪਨ੍ਨੋ, ਤਂ ਤਾਵ ਪਟਿਕਰੋਹਿ ਪਚ੍ਛਾ ਮਂ ਚੋਦੇਸ੍ਸਸੀਤਿ ਵਤ੍ਤੁਂ ਸਕ੍ਕਾਤਿ ਮਞ੍ਞਮਾਨੋ. ਅਪਿਚ ਜਾਤਿਆਦੀਹਿਪਿ ਸਮਾਨੋ ਪੁਗ੍ਗਲੋ ਸਪ੍ਪਟਿਪੁਗ੍ਗਲੋ. ਅਯਞ੍ਹਿ ਅਤ੍ਤਨੋ ਜਾਤਿਯਾ ਕੁਲੇਨ ਬਾਹੁਸਚ੍ਚੇਨ ਬ੍ਯਤ੍ਤਤਾਯ ਧੁਤਙ੍ਗੇਨਾਤਿ ਏਵਮਾਦੀਹਿਪਿ ਸਮਾਨੇਨੇਵ ਚੋਦਨਂ ਇਚ੍ਛਤਿ, ਤਾਦਿਸੇਨ ਵੁਤ੍ਤਂ ਨਾਤਿਦੁਕ੍ਖਂ ਹੋਤੀਤਿ ਮਞ੍ਞਮਾਨੋ. ਅਪ੍ਪਟਿਪੁਗ੍ਗਲੋਤਿ ਏਤ੍ਥ ਅਯੁਤ੍ਤੋ ਪਟਿਪੁਗ੍ਗਲੋ ਅਪ੍ਪਟਿਪੁਗ੍ਗਲੋ. ਇਮੇਹਿ ਆਪਤ੍ਤਾਦੀਹਿ ਅਸਦਿਸਤ੍ਤਾ ਪਟਿਸਤ੍ਤੁ ਪਟਿਸਲ੍ਲੋ ਚੋਦਕੋ ਭਵਿਤੁਂ ਅਯੁਤ੍ਤੋਤਿ ਵੁਤ੍ਤਂ ਹੋਤਿ. ਇਤਿ ਸੋ ਕੁਪਿਤੋਤਿ ਇਤਿ ਸੋ ਇਮਾਯ ਅਪ੍ਪਟਿਪੁਗ੍ਗਲਚੋਦਨਾਯ ਏਵਂ ਕੁਪਿਤੋ ਹੋਤਿ.

ਚਤੁਤ੍ਥਵਾਰੇ ਅਹੋ ਵਤਾਤਿ ‘‘ਅਹੋ ਵਤ ਰੇ ਅਮ੍ਹਾਕਂ ਪਣ੍ਡਿਤਕਾ, ਅਹੋ ਵਤ ਰੇ ਅਮ੍ਹਾਕਂ ਬਹੁਸ੍ਸੁਤਕਾ ਤੇਵਿਜ੍ਜਕਾ’’ਤਿ (ਦੀ. ਨਿ. ੧.੨੯੧) ਗਰਹਾਯਂ ਦਿਸ੍ਸਤਿ. ‘‘ਅਹੋ ਵਤ ਮਂ ਦਹਰਂਯੇਵ ਸਮਾਨਂ ਰਜ੍ਜੇ ਅਭਿਸਿਞ੍ਚੇਯ੍ਯੁ’’ਨ੍ਤਿ (ਮਹਾਵ. ੫੭) ਪਤ੍ਥਨਾਯਂ. ਇਧ ਪਤ੍ਥਨਾਯਮੇਵ. ਪਟਿਪੁਚ੍ਛਿਤ੍ਵਾ ਪਟਿਪੁਚ੍ਛਿਤ੍ਵਾਤਿ ਪੁਨਪ੍ਪੁਨਂ ਪੁਚ੍ਛਿਤ੍ਵਾ. ਅਯਂ ਭਿਕ੍ਖੁ ਲਾਭਤ੍ਥਿਕੋ ਭਗਵਤੋ ਅਤ੍ਤਾਨਂ ਪਟਿਪੁਚ੍ਛਿਤਬ੍ਬਂ ਇਚ੍ਛਤਿ, ਤਞ੍ਚ ਖੋ ਅਨੁਮਤਿਪੁਚ੍ਛਾਯ, ਨੋ ਮਗ੍ਗਂ ਵਾ ਫਲਂ ਵਾ ਵਿਪਸ੍ਸਨਂ ਵਾ ਅਨ੍ਤਰਂ ਕਤ੍ਵਾ. ਅਯਞ੍ਹਿ ਪਸ੍ਸਤਿ ਭਗਵਨ੍ਤਂ ਸਾਰਿਪੁਤ੍ਤਾਦਯੋ ਮਹਾਥੇਰੇ ‘‘ਤਂ ਕਿਂ ਮਞ੍ਞਸਿ, ਸਾਰਿਪੁਤ੍ਤ, ਮੋਗ੍ਗਲ੍ਲਾਨ, ਕਸ੍ਸਪ, ਰਾਹੁਲ ਚਕ੍ਖੁਂ ਨਿਚ੍ਚਂ ਵਾ ਅਨਿਚ੍ਚਂ ਵਾ’’ਤਿ ਏਵਂ ਪਰਿਸਮਜ੍ਝੇ ਪਟਿਪੁਚ੍ਛਿਤ੍ਵਾ ਪਟਿਪੁਚ੍ਛਿਤ੍ਵਾ ਧਮ੍ਮਂ ਦੇਸੇਨ੍ਤਂ, ਮਨੁਸ੍ਸੇ ਚ ‘‘ਤੇਸ ਪਣ੍ਡਿਤਾ ਥੇਰਾ ਸਤ੍ਥੁ ਚਿਤ੍ਤਂ ਆਰਾਧੇਨ੍ਤੀ’’ਤਿ ਵਣ੍ਣਂ ਭਣਨ੍ਤੇ, ਲਾਭਸਕ੍ਕਾਰਞ੍ਚ ਉਪਹਰਨ੍ਤੇ. ਤਸ੍ਮਾ ਤਂ ਲਾਭਸਕ੍ਕਾਰਂ ਇਚ੍ਛਨ੍ਤੋ ਏਵਂ ਚਿਨ੍ਤੇਤ੍ਵਾ ਨਿਖਣਿਤ੍ਵਾ ਠਪਿਤਖਾਣੁ ਵਿਯ ਭਗਵਤੋ ਪੁਰਤੋਵ ਹੋਤਿ.

ਇਤਿ ਸੋ ਕੁਪਿਤੋਤਿ ਅਥ ਭਗਵਾ ਤਂ ਅਮਨਸਿਕਰਿਤ੍ਵਾਵ ਅਞ੍ਞਂ ਥੇਰਂ ਪਟਿਪੁਚ੍ਛਿਤ੍ਵਾ ਧਮ੍ਮਂ ਦੇਸੇਤਿ, ਤੇਨ ਸੋ ਕੁਪਿਤੋ ਹੋਤਿ ਭਗਵਤੋ ਚ ਥੇਰਸ੍ਸ ਚ. ਕਥਂ ਭਗਵਤੋ ਕੁਪ੍ਪਤਿ? ‘‘ਅਹਂ ਪਬ੍ਬਜਿਤਕਾਲਤੋ ਪਭੁਤਿ ਗਨ੍ਧਕੁਟਿਪਰਿਵੇਣਤੋ ਬਹਿਨਿਕ੍ਖਮਨਂ ਨ ਜਾਨਾਮਿ, ਸਬ੍ਬਕਾਲਂ ਛਾਯਾਵ ਨ ਵਿਜਹਾਮਿ, ਮਂ ਨਾਮ ਪੁਚ੍ਛਿਤ੍ਵਾ ਧਮ੍ਮਦੇਸਨਾਮਤ੍ਤਮ੍ਪਿ ਨਤ੍ਥਿ. ਤਂਮੁਹੁਤ੍ਤਂ ਦਿਟ੍ਠਮਤ੍ਤਕਮੇਵ ਥੇਰਂ ਪੁਚ੍ਛਿਤ੍ਵਾ ਧਮ੍ਮਂ ਦੇਸੇਤੀ’’ਤਿ ਏਵਂ ਭਗਵਤੋ ਕੁਪ੍ਪਤਿ. ਕਥਂ ਥੇਰਸ੍ਸ ਕੁਪ੍ਪਤਿ? ‘‘ਅਯਂ ਮਹਲ੍ਲਕਤ੍ਥੇਰੋ ਭਗਵਤੋ ਪੁਰਤੋ ਖਾਣੁ ਵਿਯ ਨਿਸੀਦਤਿ, ਕਦਾ ਨੁ ਖੋ ਇਮਂ ਧਮ੍ਮਕਮ੍ਮਿਕਾ ਅਭਬ੍ਬਟ੍ਠਾਨਂ ਪਾਪੇਤ੍ਵਾ ਨੀਹਰਿਸ੍ਸਨ੍ਤਿ, ਅਯਞ੍ਹਿ ਯਦਿ ਇਮਸ੍ਮਿਂ ਵਿਹਾਰੇ ਨ ਭਵੇਯ੍ਯ, ਅਵਸ੍ਸਂ ਭਗਵਾ ਮਯਾ ਸਦ੍ਧਿਂ ਸਲ੍ਲਪੇਯ੍ਯਾ’’ਤਿ ਏਵਂ ਥੇਰਸ੍ਸ ਕੁਪ੍ਪਤਿ.

ਪੁਰਕ੍ਖਤ੍ਵਾ ਪੁਰਕ੍ਖਤ੍ਵਾਤਿ ਪੁਰਤੋ ਪੁਰਤੋ ਕਤ੍ਵਾ, ਸਮ੍ਪਰਿਵਾਰੇਤ੍ਵਾਤਿ ਵੁਤ੍ਤਂ ਹੋਤਿ. ਅਯਮ੍ਪਿ ਲਾਭਤ੍ਥਿਕੋਯੇਵ, ਅਯਞ੍ਹਿ ਪਸ੍ਸਤਿ ਬਹੁਸ੍ਸੁਤੇ ਭਿਕ੍ਖੂ ਮਹਾਪਰਿਵਾਰੇਨ ਗਾਮਂ ਪਵਿਸਨ੍ਤੇ, ਚੇਤਿਯਂ ਵਨ੍ਦਨ੍ਤੇ, ਤੇਸਞ੍ਚ ਤਂ ਸਮ੍ਪਤ੍ਤਿਂ ਦਿਸ੍ਵਾ ਉਪਾਸਕੇ ਪਸਨ੍ਨੇ ਪਸਨ੍ਨਾਕਾਰਂ ਕਰੋਨ੍ਤੇ. ਤਸ੍ਮਾ ਏਵਂ ਇਚ੍ਛਤਿ. ਕੁਪਿਤੋਤਿ ਅਯਮ੍ਪਿ ਦ੍ਵੀਸੁ ਠਾਨੇਸੁ ਕੁਪ੍ਪਤਿ ਭਿਕ੍ਖੂਨਂ ਥੇਰਸ੍ਸ ਚ. ਕਥਂ ਭਿਕ੍ਖੂਨਂ? ‘‘ਇਮੇ ਯਦੇਵ ਮਯ੍ਹਂ ਉਪ੍ਪਜ੍ਜਤਿ ਚੀਵਰਂ ਵਾ ਪਿਣ੍ਡਪਾਤੋ ਵਾ, ਤਂ ਗਹੇਤ੍ਵਾ ਪਰਿਭੁਞ੍ਜਨ੍ਤਿ, ਮਯ੍ਹਂ ਪਨ ਪਤ੍ਤਚੀਵਰਂ ਗਹੇਤ੍ਵਾ ਪਿਟ੍ਠਿਤੋ ਆਗਚ੍ਛਨ੍ਤੋਪਿ ਨਤ੍ਥੀ’’ਤਿ ਏਵਂ ਭਿਕ੍ਖੂਨਂ ਕੁਪ੍ਪਤਿ. ਕਥਂ ਥੇਰਸ੍ਸ? ‘‘ਏਸੋ ਮਹਲ੍ਲਕਤ੍ਥੇਰੋ ਤੇਸੁ ਤੇਸੁ ਠਾਨੇਸੁ ਸਯਮੇਵ ਪਞ੍ਞਾਯਤਿ, ਕੁਦਾਸ੍ਸੁ ਨਾਮ ਨਂ ਧਮ੍ਮਕਮ੍ਮਿਕਾ ਨਿਕ੍ਕਡ੍ਢਿਸ੍ਸਨ੍ਤਿ, ਇਮਸ੍ਮਿਂ ਅਸਤਿ ਅਵਸ੍ਸਂ ਮਂਯੇਵ ਪਰਿਵਾਰੇਸ੍ਸਨ੍ਤੀ’’ਤਿ.

ਭਤ੍ਤਗ੍ਗੇਤਿ ਭੋਜਨਟ੍ਠਾਨੇ. ਅਗ੍ਗਾਸਨਨ੍ਤਿ ਸਙ੍ਘਤ੍ਥੇਰਾਸਨਂ. ਅਗ੍ਗੋਦਕਨ੍ਤਿ ਦਕ੍ਖਿਣੋਦਕਂ. ਅਗ੍ਗਪਿਣ੍ਡਨ੍ਤਿ ਸਙ੍ਘਤ੍ਥੇਰਪਿਣ੍ਡਂ. ਸਬ੍ਬਤ੍ਥ ਵਾ ਅਗ੍ਗਨ੍ਤਿ ਪਣੀਤਾਧਿਵਚਨਮੇਤਂ. ਤਤ੍ਥ ਅਹਮੇਵ ਲਭੇਯ੍ਯਨ੍ਤਿ ਇਚ੍ਛਾ ਨਾਤਿਮਹਾਸਾਵਜ੍ਜਾ. ਨ ਅਞ੍ਞੋ ਭਿਕ੍ਖੁ ਲਭੇਯ੍ਯਾਤਿ ਪਨ ਅਤਿਮਹਾਸਾਵਜ੍ਜਾ. ਅਯਮ੍ਪਿ ਲਾਭਤ੍ਥਿਕੋ ਪਾਸਾਦਿਕੋ ਹੋਤਿ ਚੀਵਰਧਾਰਣਾਦੀਹਿ, ਕਦਾਚਿ ਪਬ੍ਬਜਤਿ, ਕਦਾਚਿ ਵਿਬ੍ਭਮਤਿ. ਤੇਨ ਸੋ ਪੁਬ੍ਬੇ ਲਦ੍ਧਪੁਬ੍ਬਂ ਆਸਨਾਦਿਂ ਪਚ੍ਛਾ ਅਲਭਨ੍ਤੋ ਏਵਂ ਚਿਨ੍ਤੇਸਿ. ਨ ਸੋ ਭਿਕ੍ਖੁ ਲਭੇਯ੍ਯਾਤਿ ਨ ਸੋ ਭਿਕ੍ਖੁ ਥੇਰਾਨਂ ਅਗ੍ਗਾਸਨਾਦੀਸੁ ਤਦਨੁਸਾਰੇਨ ਮਜ੍ਝਿਮਾਨਂ ਅਞ੍ਞੇਸਞ੍ਚ ਨਵਾਨਂ ਕਦਾਚਿ ਯਂ ਵਾ ਤਂ ਵਾ ਸਬ੍ਬਨਿਹੀਨਂ ਆਸਨਾਦਿਂ ਲਭਤਿ. ਕੁਪਿਤੋਤਿ ਅਯਮ੍ਪਿ ਦ੍ਵੀਸੁ ਠਾਨੇਸੁ ਕੁਪ੍ਪਤਿ ਮਨੁਸ੍ਸਾਨਞ੍ਚ ਥੇਰਾਨਞ੍ਚ. ਕਥਂ ਮਨੁਸ੍ਸਾਨਂ? ‘‘ਇਮੇ ਮਙ੍ਗਲਾਦੀਸੁ ਮਂ ਨਿਸ੍ਸਾਯ ਭਿਕ੍ਖੂ ਲਭਨ੍ਤਿ, ਏਤੇ, ‘ਭਨ੍ਤੇ, ਏਤ੍ਤਕੇ ਭਿਕ੍ਖੂ ਗਹੇਤ੍ਵਾ ਅਮ੍ਹਾਕਂ ਅਨੁਕਮ੍ਪਂ ਕਰੋਥਾ’ਤਿ ਵਦਨ੍ਤਿ, ਇਦਾਨਿ ਤਂਮੁਹੁਤ੍ਤਂ ਦਿਟ੍ਠਮਤ੍ਤਕਂ ਮਹਲ੍ਲਕਤ੍ਥੇਰਂ ਗਹੇਤ੍ਵਾ ਗਤਾ, ਹੋਤੁ ਇਦਾਨਿ, ਨੇਸਂ ਕਿਚ੍ਚੇ ਉਪ੍ਪਨ੍ਨੇ ਜਾਨਿਸ੍ਸਾਮੀ’’ਤਿ ਏਵਂ ਮਨੁਸ੍ਸਾਨਂ ਕੁਪ੍ਪਤਿ. ਕਥਂ ਥੇਰਾਨਂ? ‘‘ਇਮੇ ਨਾਮ ਯਦਿ ਨ ਭਵੇਯ੍ਯੁਂ, ਮਂਯੇਵ ਮਨੁਸ੍ਸਾ ਨਿਮਨ੍ਤੇਯ੍ਯੁ’’ਨ੍ਤਿ ਏਵਂ ਥੇਰਾਨਂ ਕੁਪ੍ਪਤਿ.

ਅਨੁਮੋਦੇਯ੍ਯਨ੍ਤਿ ਅਨੁਮੋਦਨਂ ਕਰੇਯ੍ਯਂ. ਅਯਮ੍ਪਿ ਲਾਭਤ੍ਥਿਕੋ ਯਂ ਵਾ ਤਂ ਵਾ ਖਣ੍ਡਾਨੁਮੋਦਨਂ ਜਾਨਾਤਿ, ‘‘ਸੋ ਅਨੁਮੋਦਨਟ੍ਠਾਨੇ ਬਹੂ ਮਾਤੁਗਾਮਾ ਆਗਚ੍ਛਨ੍ਤਿ, ਤਾ ਮਂ ਸਞ੍ਜਾਨਿਤ੍ਵਾ ਤਤੋ ਪਭੁਤਿ ਥਾਲਕਭਿਕ੍ਖਂ ਦਸ੍ਸਨ੍ਤੀ’’ਤਿ ਪਤ੍ਥੇਨ੍ਤੋ ਏਵਂ ਚਿਨ੍ਤੇਸਿ. ਠਾਨਨ੍ਤਿ ਬਹੁਸ੍ਸੁਤਾਨਂ ਅਨੁਮੋਦਨਾ ਭਾਰੋ, ਤੇਨ ਬਹੁਸ੍ਸੁਤੋ ਅਨੁਮੋਦੇਯ੍ਯਾਤਿ ਵੁਤ੍ਤਂ ਹੋਤਿ. ਕੁਪਿਤੋਤਿ ਅਯਮ੍ਪਿ ਤੀਸੁ ਠਾਨੇਸੁ ਕੁਪ੍ਪਤਿ ਮਨੁਸ੍ਸਾਨਂ ਥੇਰਸ੍ਸ ਧਮ੍ਮਕਥਿਕਸ੍ਸ ਚ. ਕਥਂ ਮਨੁਸ੍ਸਾਨਂ? ‘‘ਇਮੇ ਪੁਬ੍ਬੇ ਮਂਯੇਵ ਉਪਸਙ੍ਕਮਿਤ੍ਵਾ ਯਾਚਨ੍ਤਿ ‘ਅਮ੍ਹਾਕਂ ਨਾਗਤ੍ਥੇਰੋ ਅਮ੍ਹਾਕਂ ਸੁਮਨਤ੍ਥੇਰੋ ਅਨੁਮੋਦਤੂ’ਤਿ, ਅਜ੍ਜ ਪਨ ਨਾਵੋਚੁ’’ਨ੍ਤਿ ਏਵਂ ਮਨੁਸ੍ਸਾਨਂ ਕੁਪ੍ਪਤਿ. ਕਥਂ ਥੇਰਸ੍ਸ? ‘‘ਅਯਂ ਸਙ੍ਘਤ੍ਥੇਰੋ ‘ਤੁਮ੍ਹਾਕਂ ਕੁਲੁਪਕਂ ਨਾਗਤ੍ਥੇਰਂ ਸੁਮਨਤ੍ਥੇਰਂ ਉਪਸਙ੍ਕਮਥ, ਅਯਂ ਅਨੁਮੋਦਿਸ੍ਸਤੀ’ਤਿ ਨ ਭਣਤੀ’’ਤਿ ਏਵਂ ਥੇਰਸ੍ਸ ਕੁਪ੍ਪਤਿ. ਕਥਂ ਧਮ੍ਮਕਥਿਕਸ੍ਸ? ‘‘ਥੇਰੇਨ ਵੁਤ੍ਤਮਤ੍ਤੇਯੇਵ ਪਹਾਰਂ ਲਦ੍ਧਕੁਕ੍ਕੁਟੋ ਵਿਯ ਤੁਰਿਤਤੁਰਿਤਂ ਵਸ੍ਸਤਿ, ਇਮਂ ਨਾਮ ਨਿਕ੍ਕਡ੍ਢਨ੍ਤਾ ਨਤ੍ਥਿ, ਇਮਸ੍ਮਿਞ੍ਹਿ ਅਸਤਿ ਅਹਮੇਵ ਅਨੁਮੋਦੇਯ੍ਯ’’ਨ੍ਤਿ ਏਵਂ ਧਮ੍ਮਕਥਿਕਸ੍ਸ ਕੁਪ੍ਪਤਿ.

ਆਰਾਮਗਤਾਨਨ੍ਤਿ ਵਿਹਾਰੇ ਸਨ੍ਨਿਪਤਿਤਾਨਂ. ਅਯਮ੍ਪਿ ਲਾਭਤ੍ਥਿਕੋ ਯਂ ਵਾ ਤਂ ਵਾ ਖਣ੍ਡਧਮ੍ਮਕਥਂ ਜਾਨਾਤਿ, ਸੋ ਪਸ੍ਸਤਿ ਤਾਦਿਸੇਸੁ ਠਾਨੇਸੁ ਦ੍ਵਿਯੋਜਨਤਿਯੋਜਨਤੋ ਸਨ੍ਨਿਪਤਿਤ੍ਵਾ ਭਿਕ੍ਖੂ ਸਬ੍ਬਰਤ੍ਤਿਕਾਨਿ ਧਮ੍ਮਸ੍ਸਵਨਾਨਿ ਸੁਣਨ੍ਤੇ, ਤੁਟ੍ਠਚਿਤ੍ਤੇ ਚ ਦਹਰੇ ਵਾ ਸਾਮਣੇਰੇ ਵਾ ਸਾਧੁ ਸਾਧੂਤਿ ਮਹਾਸਦ੍ਦੇਨ ਸਾਧੁਕਾਰਂ ਦੇਨ੍ਤੇ, ਤਤੋ ਦੁਤਿਯਦਿਵਸੇ ਅਨ੍ਤੋਗਾਮਗਤੇ ਭਿਕ੍ਖੂ ਉਪਾਸਕਾ ਪੁਚ੍ਛਨ੍ਤਿ ‘‘ਕੇ, ਭਨ੍ਤੇ, ਧਮ੍ਮਂ ਕਥੇਸੁ’’ਨ੍ਤਿ. ਤੇ ਭਣਨ੍ਤਿ ‘‘ਅਸੁਕੋ ਚ ਅਸੁਕੋ ਚਾ’’ਤਿ. ਤਂ ਸੁਤ੍ਵਾ ਪਸਨ੍ਨਾ ਮਨੁਸ੍ਸਾ ਧਮ੍ਮਕਥਿਕਾਨਂ ਮਹਾਸਕ੍ਕਾਰਂ ਕਰੋਨ੍ਤਿ. ਸੋ ਤਂ ਇਚ੍ਛਮਾਨੋ ਏਵਂ ਚਿਨ੍ਤੇਸਿ. ਠਾਨਨ੍ਤਿ ਬਹੁਸ੍ਸੁਤਾਨਂ ਵਿਨਿਚ੍ਛਯਕੁਸਲਾਨਂ ਧਮ੍ਮਦੇਸਨਾ ਭਾਰੋ, ਤੇਨ ਬਹੁਸ੍ਸੁਤੋ ਦੇਸੇਯ੍ਯਾਤਿ ਵੁਤ੍ਤਂ ਹੋਤਿ. ਕੁਪਿਤੋਤਿ ਚਤੁਪ੍ਪਦਿਕਂ ਗਾਥਮ੍ਪਿ ਵਤ੍ਤੁਂ ਓਕਾਸਂ ਅਲਭਮਾਨੋ ਕੁਪਿਤੋ ਹੋਤਿ ਅਤ੍ਤਨੋ ਮਨ੍ਦਭਾਵਸ੍ਸ ‘‘ਅਹਞ੍ਹਿ ਮਨ੍ਦੋ ਦੁਪ੍ਪਞ੍ਞੋ ਕੁਤੋ ਲਭਿਸ੍ਸਾਮਿ ਦੇਸੇਤੁ’’ਨ੍ਤਿ.

ਭਿਕ੍ਖੁਨੀਨਨ੍ਤਿ ਓਵਾਦਤ੍ਥਂ ਵਾ ਉਦ੍ਦੇਸਤ੍ਥਂ ਵਾ ਪਰਿਪੁਚ੍ਛਤ੍ਥਂ ਵਾ ਪੂਜਾਕਰਣਤ੍ਥਂ ਵਾ ਆਰਾਮਂ ਆਗਨ੍ਤ੍ਵਾ ਸਨ੍ਨਿਪਤਿਤਭਿਕ੍ਖੁਨੀਨਂ. ਅਯਮ੍ਪਿ ਲਾਭਤ੍ਥਿਕੋ, ਤਸ੍ਸੇਵਂ ਹੋਤਿ ਇਮਾ ਮਹਾਕੁਲਾ ਪਬ੍ਬਜਿਤਾ ਭਿਕ੍ਖੁਨਿਯੋ, ਤਾਸੁ ਕੁਲੇਸੁ ਪਵਿਸੇਤ੍ਵਾ ਨਿਸਿਨ੍ਨਾਸੁ ਮਨੁਸ੍ਸਾ ਪੁਚ੍ਛਿਸ੍ਸਨ੍ਤਿ ‘‘ਕਸ੍ਸ ਸਨ੍ਤਿਕੇ ਓਵਾਦਂ ਵਾ ਉਦ੍ਦੇਸਂ ਵਾ ਪਰਿਪੁਚ੍ਛਂ ਵਾ ਗਣ੍ਹਥਾ’’ਤਿ. ਤਤੋ ਵਕ੍ਖਨ੍ਤਿ ‘‘ਅਸੁਕੋ ਨਾਮ ਅਯ੍ਯੋ ਬਹੁਸ੍ਸੁਤੋ, ਤਸ੍ਸ ਦੇਥ ਕਰੋਥਾ’’ਤਿ, ਤੇਨਸ੍ਸ ਏਵਂ ਇਚ੍ਛਾ ਉਪ੍ਪਜ੍ਜਤਿ. ਠਾਨਨ੍ਤਿ ਓਵਾਦਾਦਯੋ ਨਾਮ ਬਹੁਸ੍ਸੁਤਾਨਂ ਭਾਰੋ, ਤੇਨ ਬਹੁਸ੍ਸੁਤੋ ਦੇਸੇਯ੍ਯਾਤਿ ਵੁਤ੍ਤਂ ਹੋਤਿ. ਕੁਪਿਤੋਤਿ ਅਯਮ੍ਪਿ ਦ੍ਵੀਸੁ ਠਾਨੇਸੁ ਕੁਪ੍ਪਤਿ, ਤਾਸਞ੍ਚ ਭਿਕ੍ਖੁਨੀਨਂ ‘‘ਇਮਾ ਪੁਬ੍ਬੇ ਮਂ ਨਿਸ੍ਸਾਯ ਉਪੋਸਥਪ੍ਪਵਾਰਣਾਦੀਨਿ ਲਭਨ੍ਤਿ, ਤਾ ਇਦਾਨਿ ਤਂਮੁਹੁਤ੍ਤਂ ਦਿਟ੍ਠਮਤ੍ਤਕਮਹਲ੍ਲਕਤ੍ਥੇਰਸ੍ਸ ਸਨ੍ਤਿਕਂ ਗਤਾ’’ਤਿ. ਧਮ੍ਮਕਥਿਕਸ੍ਸ ਚ ‘‘ਏਸ ਇਮਾਸਂ ਸਹਸਾ ਓਵਾਦਂ ਅਦਾਸਿਯੇਵਾ’’ਤਿ.

ਉਪਾਸਕਾਨਨ੍ਤਿ, ਆਰਾਮਗਤਾਨਂ ਉਪਾਸਕਾਨਂ. ਨਿਸ੍ਸਟ੍ਠਕਮ੍ਮਨ੍ਤਾ ਨਾਮ ਮਹਾਉਪਾਸਕਾ ਹੋਨ੍ਤਿ, ਤੇ ਪੁਤ੍ਤਭਾਤੁਕਾਨਂ ਕਮ੍ਮਂ ਨਿਯ੍ਯਾਤੇਤ੍ਵਾ ਧਮ੍ਮਂ ਸੁਣਨ੍ਤਾ ਵਿਚਰਨ੍ਤਿ, ਅਯਂ ਤੇਸਂ ਦੇਸੇਤੁਂ ਇਚ੍ਛਤਿ, ਕਿਂ ਕਾਰਣਾ? ਇਮੇ ਪਸੀਦਿਤ੍ਵਾ ਉਪਾਸਿਕਾਨਮ੍ਪਿ ਆਰੋਚੇਸ੍ਸਨ੍ਤਿ, ਤਤੋ ਸਦ੍ਧਿਂ ਉਪਾਸਿਕਾਹਿ ਮਯ੍ਹਮੇਵ ਲਾਭਸਕ੍ਕਾਰਂ ਉਪਹਰਿਸ੍ਸਨ੍ਤੀਤਿ. ਠਾਨਂ ਬਹੁਸ੍ਸੁਤੇਨੇਵ ਯੋਜੇਤਬ੍ਬਂ. ਕੁਪਿਤੋਤਿ ਅਯਮ੍ਪਿ ਦ੍ਵੀਸੁ ਠਾਨੇਸੁ ਕੁਪ੍ਪਤਿ, ਉਪਾਸਕਾਨਞ੍ਚ ‘‘ਇਮੇ ਅਞ੍ਞਤ੍ਥ ਸੁਣਨ੍ਤਿ, ਅਮ੍ਹਾਕਂ ਕੁਲੁਪਕਸ੍ਸ ਸਨ੍ਤਿਕੇ ਸੁਣਾਮਾਤਿ ਨਾਗਚ੍ਛਨ੍ਤਿ, ਹੋਤੁ ਇਦਾਨਿ, ਤੇਸਂ ਉਪ੍ਪਨ੍ਨੇ ਕਿਚ੍ਚੇ ਜਾਨਿਸ੍ਸਾਮੀ’’ਤਿ ਧਮ੍ਮਕਥਿਕਸ੍ਸ ਚ, ‘‘ਅਯਮੇਤੇਸਂ ਦੇਸੇਤੀ’’ਤਿ.

ਉਪਾਸਿਕਾਨਨ੍ਤਿ ਆਰਾਮਗਤਾਨਂ. ਉਪਾਸਿਕਾ ਨਾਮ ਆਸਨਪੂਜਾਦਿਕਰਣਤ੍ਥਂ ਵਾ ਉਪੋਸਥਦਿਵਸੇ ਵਾ ਧਮ੍ਮਸ੍ਸਵਨਤ੍ਥਂ ਸਨ੍ਨਿਪਤਿਤਾ. ਸੇਸਂ ਉਪਾਸਕਵਾਰੇ ਵੁਤ੍ਤਨਯਮੇਵ.

ਸਕ੍ਕਰੇਯ੍ਯੁਨ੍ਤਿ ਸਕ੍ਕਚ੍ਚਞ੍ਚ ਕਰੇਯ੍ਯੁਂ, ਸੁਨ੍ਦਰਞ੍ਚ ਕਰੇਯ੍ਯੁਂ. ਇਮਿਨਾ ਅਤ੍ਤਨਿ ਕਾਰਂ ਕਰੀਯਮਾਨਂ ਸਕ੍ਕਚ੍ਚਂ ਕਤਞ੍ਚ ਸੁਨ੍ਦਰਞ੍ਚ ਪਤ੍ਥੇਤਿ. ਗਰੁਂ ਕਰੇਯ੍ਯੁਨ੍ਤਿ ਭਾਰਿਯਂ ਕਰੇਯ੍ਯੁਂ. ਇਮਿਨਾ ਭਿਕ੍ਖੂਹਿ ਅਤ੍ਤਾਨਂ ਗਰੁਟ੍ਠਾਨੇ ਠਪੀਯਮਾਨਂ ਪਤ੍ਥੇਤਿ. ਮਾਨੇਯ੍ਯੁਨ੍ਤਿ ਪਿਯਾਯੇਯ੍ਯੁਂ. ਪੂਜੇਯ੍ਯੁਨ੍ਤਿ ਏਵਂ ਸਕ੍ਕਰੋਨ੍ਤਾ ਗਰੁਂ ਕਰੋਨ੍ਤਾ ਮਾਨੇਨ੍ਤਾ ਪਚ੍ਚਯੇਹਿ ਪੂਜੇਯ੍ਯੁਨ੍ਤਿ ਪਚ੍ਚਯਪੂਜਂ ਪਤ੍ਥੇਤਿ. ਠਾਨਨ੍ਤਿ ‘‘ਪਿਯੋ ਗਰੁ ਭਾਵਨਿਯੋ’’ਤਿ ਵੁਤ੍ਤਪ੍ਪਕਾਰੋ ਬਹੁਸ੍ਸੁਤੋ ਚ ਸੀਲਵਾ ਚ ਏਤਂ ਵਿਧਿਂ ਅਰਹਤਿ ਤੇਨ ਭਿਕ੍ਖੂ ਏਵਰੂਪਂ ਏਵਂ ਕਰੇਯ੍ਯੁਨ੍ਤਿ ਵੁਤ੍ਤਂ ਹੋਤਿ. ਕੁਪਿਤੋਤਿ ਅਯਮ੍ਪਿ ਦ੍ਵੀਸੁ ਠਾਨੇਸੁ ਕੁਪ੍ਪਤਿ ਭਿਕ੍ਖੂਨਞ੍ਚ ‘‘ਇਮੇ ਏਤਂ ਸਕ੍ਕਰੋਨ੍ਤੀ’’ਤਿ ਥੇਰਸ੍ਸ ਚ ‘‘ਇਮਸ੍ਮਿਂ ਅਸਤਿ ਮਂਯੇਵ ਸਕ੍ਕਰੇਯ੍ਯੁ’’ਨ੍ਤਿ. ਏਸ ਨਯੋ ਇਤੋ ਪਰੇਸੁ ਤੀਸੁ ਵਾਰੇਸੁ.

ਪਣੀਤਾਨਂ ਚੀਵਰਾਨਨ੍ਤਿ ਪਟ੍ਟਦੁਕੂਲਪਟ੍ਟੁਣ੍ਣਕੋਸੇਯ੍ਯਾਦੀਨਂ ਮਹਗ੍ਘਸੁਖੁਮਸੁਖਸਮ੍ਫਸ੍ਸਾਨਂ ਚੀਵਰਾਨਂ. ਇਧਾਪਿ ਅਹਮੇਵ ਲਾਭੀ ਅਸ੍ਸਨ੍ਤਿ ਇਚ੍ਛਾ ਨਾਤਿਮਹਾਸਾਵਜ੍ਜਾ. ਨ ਅਞ੍ਞੋ ਭਿਕ੍ਖੁ ਲਾਭੀ ਅਸ੍ਸਾਤਿ ਪਨ ਮਹਾਸਾਵਜ੍ਜਾ.

ਪਣੀਤਾਨਂ ਪਿਣ੍ਡਪਾਤਾਨਨ੍ਤਿ ਸਪ੍ਪਿਤੇਲਮਧੁਸਕ੍ਕਰਾਦਿਪੂਰਿਤਾਨਂ ਸੇਟ੍ਠਪਿਣ੍ਡਪਾਤਾਨਂ. ਪਣੀਤਾਨਂ ਸੇਨਾਸਨਾਨਨ੍ਤਿ ਅਨੇਕਸਤਸਹਸ੍ਸਗ੍ਘਨਕਾਨਂ ਮਞ੍ਚਪੀਠਾਦੀਨਂ ਪਣੀਤਾਨਂ. ਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾਨਨ੍ਤਿ ਸਪ੍ਪਿਤੇਲਮਧੁਫਾਣਿਤਾਦੀਨਂ ਉਤ੍ਤਮਭੇਸਜ੍ਜਾਨਂ. ਸਬ੍ਬਤ੍ਥਾਪਿ ਠਾਨਂ ਬਹੁਸ੍ਸੁਤੇਹਿ ਪੁਞ੍ਞਵਨ੍ਤੇਹਿ ਚ ਯੋਜੇਤਬ੍ਬਂ. ਕੁਪਿਤੋਤਿ ਸਬ੍ਬਤ੍ਥਾਪਿ ਦ੍ਵੀਸੁ ਠਾਨੇਸੁ ਕੁਪ੍ਪਤਿ, ਮਨੁਸ੍ਸਾਨਞ੍ਚ ‘‘ਇਮੇਸਂ ਨਾਮ ਪਰਿਚਿਤਭਾਵੋਪਿ ਨਤ੍ਥਿ, ਦੀਘਰਤ੍ਤਂ ਏਕਤੋ ਵਸਨ੍ਤਸ੍ਸ ਪਂਸੁਕੂਲਤ੍ਥਾਯ ਵਾ ਪਿਣ੍ਡਪਾਤਤ੍ਥਾਯ ਵਾ ਸਪ੍ਪਿਤੇਲਾਦਿਕਾਰਣਾ ਵਾ ਘਰਪਟਿਪਾਟਿਯਾ ਚਰਨ੍ਤਸ੍ਸਾਪਿ ਮੇ ਏਕਦਿਵਸਮ੍ਪਿ ਕਿਞ੍ਚਿ ਪਣੀਤਂ ਪਚ੍ਚਯਂ ਨ ਦੇਨ੍ਤਿ. ਆਗਨ੍ਤੁਕਂ ਮਹਲ੍ਲਕਂ ਪਨ ਦਿਸ੍ਵਾਵ ਯਂ ਇਚ੍ਛਤਿ, ਤਂ ਦੇਨ੍ਤੀ’’ਤਿ, ਥੇਰਸ੍ਸ ਚ ‘‘ਅਯਮ੍ਪਿ ਮਹਲ੍ਲਕੋ ਇਮੇਸਂ ਅਤ੍ਤਾਨਂ ਦਸ੍ਸੇਨ੍ਤੋਯੇਵ ਚਰਤਿ, ਕੁਦਾਸ੍ਸੁ ਨਾਮ ਨਂ ਧਮ੍ਮਕਮ੍ਮਿਕਾ ਨਿਕ੍ਕਡ੍ਢੇਯ੍ਯੁਂ, ਏਵਂ ਇਮਸ੍ਮਿਂ ਅਸਤਿ ਅਹਮੇਵ ਲਾਭੀ ਅਸ੍ਸ’’ਨ੍ਤਿ.

ਇਮੇਸਂ ਖੋ, ਏਤਂ ਆਵੁਸੋਤਿ ਇਮੇਸਂ ਹੇਟ੍ਠਾ ਏਕੂਨਵੀਸਤਿਵਾਰੇਹਿ ਵੁਤ੍ਤਾਨਂ ਇਚ੍ਛਾਵਚਰਾਨਂ.

੬੧. ਦਿਸ੍ਸਨ੍ਤਿ ਚੇਵ ਸੂਯਨ੍ਤਿ ਚਾਤਿ ਨ ਇਚ੍ਛਾਵਚਰਾ ਚਕ੍ਖੁਨਾ ਦਿਸ੍ਸਨ੍ਤਿ, ਨ ਸੋਤੇਨ ਸੂਯਨ੍ਤਿ, ਮਨੋਵਿਞ੍ਞਾਣਵਿਸਯਤ੍ਤਾ. ਅਪ੍ਪਹੀਨਇਚ੍ਛਾਵਚਰਸ੍ਸ ਪਨ ਪੁਗ੍ਗਲਸ੍ਸ ਇਚ੍ਛਾਵਚਰਵਸੇਨ ਪਵਤ੍ਤਕਾਯਕਮ੍ਮਂ ਦਿਸ੍ਵਾ ਦਿਟ੍ਠਾ ਵਿਯ ਵਚੀਕਮ੍ਮਂ ਸੁਤ੍ਵਾ ਸੁਤਾ ਵਿਯ ਚ ਹੋਨ੍ਤਿ, ਤੇਨ ਵੁਤ੍ਤਂ ‘‘ਦਿਸ੍ਸਨ੍ਤਿ ਚੇਵ ਸੂਯਨ੍ਤਿ ਚਾ’’ਤਿ. ਪਚ੍ਚਕ੍ਖਕਾਲੇ ਦਿਸ੍ਸਨ੍ਤਿ, ‘‘ਅਸੁਕੋ ਕਿਰ ਭਿਕ੍ਖੁ ਈਦਿਸੋ’’ਤਿ ਤਿਰੋਕ੍ਖਕਾਲੇ ਸੂਯਨ੍ਤਿ. ਕਿਞ੍ਚਾਪੀਤਿ ਅਨੁਗ੍ਗਹਗਰਹਵਚਨਂ. ਤੇਨ ਆਰਞ੍ਞਿਕਤ੍ਤਂ ਅਨੁਗ੍ਗਣ੍ਹਾਤਿ, ਇਚ੍ਛਾਵਚਰਾਨਂ ਅਪ੍ਪਹਾਨਂ ਗਰਹਤਿ.

ਤਤ੍ਰਾਯਂ ਯੋਜਨਾ, ਕਿਞ੍ਚਾਪਿ ਸੋ ਭਿਕ੍ਖੁ ਗਾਮਨ੍ਤਸੇਨਾਸਨਂ ਪਟਿਕ੍ਖਿਪਿਤ੍ਵਾ ਆਰਞ੍ਞਿਕੋ ਹੋਤਿ, ਅਨ੍ਤੇ ਪਨ੍ਤਸੇਨਾਸਨੇ ਵਸਤਿ, ਇਮੇ ਚਸ੍ਸ ਏਤ੍ਤਕਾ ਇਚ੍ਛਾਵਚਰਾ ਅਪ੍ਪਹੀਨਾ. ਕਿਞ੍ਚਾਪਿ ਸੋ ਅਤਿਰੇਕਲਾਭਂ ਪਟਿਕ੍ਖਿਪਿਤ੍ਵਾ ਪਿਣ੍ਡਪਾਤਿਕੋ ਹੋਤਿ. ਕਿਞ੍ਚਾਪਿ ਸੋ ਲੋਲੁਪ੍ਪਚਾਰਂ ਵਜ੍ਜੇਤ੍ਵਾ ਸਪਦਾਨਚਾਰੀ ਹੋਤਿ. ਕਿਞ੍ਚਾਪਿ ਸੋ ਗਹਪਤਿਚੀਵਰਂ ਪਟਿਕ੍ਖਿਪਿਤ੍ਵਾ ਪਂਸੁਕੂਲਿਕੋ ਹੋਤਿ.

ਲੂਖਚੀਵਰਧਰੋਤਿ ਏਤ੍ਥ ਪਨ ਲੂਖਨ੍ਤਿ ਸਤ੍ਥਲੂਖਂ ਸੁਤ੍ਤਲੂਖਂ ਰਜਨਲੂਖਨ੍ਤਿ ਤੀਹਿ ਕਾਰਣੇਹਿ ਲੂਖਂ ਵੇਦਿਤਬ੍ਬਂ. ਤਤ੍ਥ ਸਤ੍ਥੇਨ ਖਣ੍ਡਾਖਣ੍ਡਿਕਂ ਛਿਨ੍ਨਂ ਸਤ੍ਥਲੂਖਂ ਨਾਮ, ਤਂ ਅਗ੍ਘੇਨ ਪਰਿਹਾਯਤਿ, ਥੂਲਦੀਘਸੁਤ੍ਤਕੇਨ ਸਿਬ੍ਬਿਤਂ ਸੁਤ੍ਤਲੂਖਂ ਨਾਮ, ਤਂ ਫਸ੍ਸੇਨ ਪਰਿਹਾਯਤਿ ਖਰਸਮ੍ਫਸ੍ਸਂ ਹੋਤਿ. ਰਜਨੇਨ ਰਤ੍ਤਂ ਰਜਨਲੂਖਂ ਨਾਮ, ਤਂ ਵਣ੍ਣੇਨ ਪਰਿਹਾਯਤਿ ਦੁਬ੍ਬਣ੍ਣਂ ਹੋਤਿ. ਕਿਞ੍ਚਾਪਿ ਸੋ ਭਿਕ੍ਖੁ ਏਵਂ ਸਤ੍ਥਲੂਖਸੁਤ੍ਤਲੂਖਰਜਨਲੂਖਚੀਵਰਧਰੋ ਹੋਤਿ, ਇਮੇ ਚਸ੍ਸ ਏਤ੍ਤਕਾ ਇਚ੍ਛਾਵਚਰਾ ਅਪ੍ਪਹੀਨਾ ਦਿਸ੍ਸਨ੍ਤਿ ਚੇਵ ਸੂਯਨ੍ਤਿ ਚ, ਅਥ ਖੋ ਨਂ ਵਿਞ੍ਞੂ ਸਬ੍ਰਹ੍ਮਚਾਰੀ ਨੇਵ ਸਕ੍ਕਰੋਨ੍ਤਿ…ਪੇ… ਨ ਪੂਜੇਨ੍ਤੀਤਿ. ਤਂ ਕਿਸ੍ਸ ਹੇਤੂਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ, ਕਿਸ੍ਸ ਹੇਤੂਤਿ ਕਿਂ ਕਾਰਣਾ. ਤੇ ਹਿ ਤਸ੍ਸ…ਪੇ… ਸੂਯਨ੍ਤਿ ਚ ਯਸ੍ਮਾ ਤਸ੍ਸ ਤੇ ਪਾਪਕਾ ਸੂਯਨ੍ਤਿ ਚਾਤਿ ਵੁਤ੍ਤਂ ਹੋਤਿ. ਇਮੇਸਂ ਇਚ੍ਛਾਵਚਰਾਨਂ ਅਪ੍ਪਹੀਨਤ੍ਤਾਤਿ ਅਯਮੇਤ੍ਥ ਅਧਿਪ੍ਪਾਯੋ.

ਇਦਾਨਿ ਤਮਤ੍ਥਂ ਉਪਮਾਯ ਪਾਕਟਂ ਕਰੋਨ੍ਤੋ ਸੇਯ੍ਯਥਾਪੀਤਿਆਦਿਮਾਹ. ਤਤ੍ਥ ਕੁਣਪਨ੍ਤਿ ਮਤਕਲ਼ੇਵਰਂ. ਅਹਿਸ੍ਸ ਕੁਣਪਂ ਅਹਿਕੁਣਪਂ. ਏਵਂ ਇਤਰਾਨਿ. ਅਤਿਪਟਿਕੂਲਜਿਗੁਚ੍ਛਨੀਯਭਾਵਤੋ ਚੇਤ੍ਥ ਇਮਾਨੇਵ ਤੀਣਿ ਵੁਤ੍ਤਾਨੀਤਿ ਵੇਦਿਤਬ੍ਬਾਨਿ. ਅਞ੍ਞੇਸਞ੍ਹਿ ਸਸਸੂਕਰਾਦੀਨਂ ਕੁਣਪਂ ਮਨੁਸ੍ਸਾ ਕਟੁਕਭਣ੍ਡਾਦੀਹਿ ਅਭਿਸਙ੍ਖਰਿਤ੍ਵਾ ਪਰਿਭੁਞ੍ਜਨ੍ਤਿਪਿ. ਇਮੇਸਂ ਪਨ ਕੁਣਪਂ ਅਭਿਨਵਮ੍ਪਿ ਜਿਗੁਚ੍ਛਨ੍ਤਿਯੇਵ, ਕੋ ਪਨ ਵਾਦੋ ਕਾਲਾਤਿਕ੍ਕਮੇਨ ਪੂਤਿਭੂਤੇ. ਰਚਯਿਤ੍ਵਾਤਿ ਵਡ੍ਢੇਤ੍ਵਾ, ਪਰਿਪੂਰੇਤ੍ਵਾਤਿ ਅਤ੍ਥੋ, ਕੁਣਪਂ ਗਹੇਤ੍ਵਾ ਕਂਸਪਾਤਿਯਂ ਪਕ੍ਖਿਪਿਤ੍ਵਾਤਿ ਵੁਤ੍ਤਂ ਹੋਤਿ. ਅਞ੍ਞਿਸ੍ਸਾਤਿ ਅਪਰਾਯ. ਪਟਿਕੁਜ੍ਜਿਤ੍ਵਾਤਿ ਪਿਦਹਿਤ੍ਵਾ. ਅਨ੍ਤਰਾਪਣਨ੍ਤਿ ਆਪਣਾਨਮਨ੍ਤਰੇ ਮਹਾਜਨਸਂਕਿਣ੍ਣਂ ਰਚ੍ਛਾਮੁਖਂ. ਪਟਿਪਜ੍ਜੇਯ੍ਯੁਨ੍ਤਿ ਗਚ੍ਛੇਯ੍ਯੁਂ. ਜਞ੍ਞਜਞ੍ਞਂ ਵਿਯਾਤਿ ਚੋਕ੍ਖਚੋਕ੍ਖਂ ਵਿਯ ਮਨਾਪਮਨਾਪਂ ਵਿਯ. ਅਪਿਚ ਵਧੁਕਾਪਣ੍ਣਾਕਾਰਂ ਵਿਯਾਤਿ ਵੁਤ੍ਤਂ ਹੋਤਿ. ਵਧੁਕਾਤਿ ਜਨੇਤ੍ਤਿ ਵੁਚ੍ਚਤਿ, ਤਸ੍ਸਾ ਨੀਯਮਾਨਂ ਪਣ੍ਣਾਕਾਰਂ ਜਞ੍ਞਂ, ਉਭਯਤ੍ਥਾਪਿ ਆਦਰਵਸੇਨ ਵਾ ਪਸਂਸਾਵਸੇਨ ਵਾ ਪੁਨਰੁਤ੍ਤਂ. ‘‘ਜਞ੍ਞਜਞ੍ਞਂ ਬ੍ਯਾ’’ਤਿਪਿ ਪਾਠੋ.

ਅਪਾਪੁਰਿਤ੍ਵਾਤਿ ਵਿਵਰਿਤ੍ਵਾ. ਤਸ੍ਸ ਸਹ ਦਸ੍ਸਨੇਨ ਅਮਨਾਪਤਾ ਚ ਸਣ੍ਠਹੇਯ੍ਯਾਤਿ ਤਸ੍ਸ ਕੁਣਪਸ੍ਸ ਦਸ੍ਸਨੇਨ ਸਹੇਵ ਤਸ੍ਸ ਜਨਸ੍ਸ ਅਮਨਾਪਤਾ ਤਿਟ੍ਠੇਯ੍ਯ. ਅਮਨਾਪਤਾਤਿ ਚ ‘‘ਅਮਨਾਪਮਿਦ’’ਨ੍ਤਿ ਉਪ੍ਪਨ੍ਨਚਿਤ੍ਤਚੇਤਸਿਕਾਨਮੇਤਂ ਅਧਿਵਚਨਂ. ਏਸ ਨਯੋ ਪਟਿਕੁਲ੍ਯਜੇਗੁਚ੍ਛਤਾਸੁ. ਜਿਘਚ੍ਛਿਤਾਨਮ੍ਪੀਤਿ ਛਾਤਾਨਮ੍ਪਿ. ਨ ਭੋਤ੍ਤੁਕਮ੍ਯਤਾ ਅਸ੍ਸਾਤਿ ਭੁਞ੍ਜਿਤੁਕਾਮਤਾ ਨ ਭਵੇਯ੍ਯ. ਪਗੇਵ ਸੁਹਿਤਾਨਨ੍ਤਿ ਧਾਤਾਨਂ ਪਨ ਪਠਮਤਰਮੇਵ ਭੁਞ੍ਜਿਤੁਕਾਮਤਾ ਨ ਭਵੇਯ੍ਯਾਤਿ ਵੁਤ੍ਤਂ ਹੋਤਿ.

ਤਤ੍ਰਾਯਂ ਉਪਮਾਸਂਸਨ੍ਦਨਾ – ਪਰਿਸੁਦ੍ਧਕਂਸਪਾਤਿਸਦਿਸਂ ਇਮਸ੍ਸ ਪਬ੍ਬਜ੍ਜਾਲਿਙ੍ਗਂ, ਕੁਣਪਰਚਨਂ ਵਿਯ ਇਚ੍ਛਾਵਚਰਾਨਂ ਅਪ੍ਪਹਾਨਂ, ਅਪਰਕਂਸਪਾਤਿਯਾ ਪਟਿਕੁਜ੍ਝਨਂ ਵਿਯ ਆਰਞ੍ਞਿਕਙ੍ਗਾਦੀਹਿ ਇਚ੍ਛਾਵਚਰਪ੍ਪਟਿਚ੍ਛਾਦਨਂ, ਕਂਸਪਾਤਿਂ ਵਿਵਰਿਤ੍ਵਾ ਕੁਣਪਦਸ੍ਸਨੇਨ ਜਨਸ੍ਸ ਅਮਨਾਪਤਾ ਵਿਯ ਆਰਞ੍ਞਿਕਙ੍ਗਾਦੀਨਿ ਅਨਾਦਿਯਿਤ੍ਵਾ ਇਚ੍ਛਾਵਚਰਦਸ੍ਸਨੇਨ ਸਬ੍ਰਹ੍ਮਚਾਰੀਨਂ ਅਸਕ੍ਕਾਰਕਰਣਾਦਿਤਾਤਿ.

੬੨. ਸੁਕ੍ਕਪਕ੍ਖੇ ਪਨ, ਕਿਞ੍ਚਾਪੀਤਿ ਅਨੁਗ੍ਗਹਪਸਂਸਾਵਚਨਂ, ਤੇਨ ਆਰਞ੍ਞਿਕਤ੍ਤਂ ਅਨੁਗ੍ਗਣ੍ਹਾਤਿ, ਇਚ੍ਛਾਵਚਰਪ੍ਪਹਾਨਂ ਪਸਂਸਤਿ. ਨੇਮਨ੍ਤਨਿਕੋਤਿ ਨਿਮਨ੍ਤਨਪਟਿਗ੍ਗਾਹਕੋ. ਵਿਚਿਤਕਾਲ਼ਕਨ੍ਤਿ ਵਿਚਿਨਿਤ੍ਵਾ ਅਪਨੀਤਕਾਲ਼ਕਂ. ਅਨੇਕਸੂਪਂ ਅਨੇਕਬ੍ਯਞ੍ਜਨਨ੍ਤਿ ਏਤ੍ਥ ਸੂਪੋ ਨਾਮ ਹਤ੍ਥਹਾਰਿਯੋ ਵੁਚ੍ਚਤਿ. ਬ੍ਯਞ੍ਜਨਨ੍ਤਿ ਉਤ੍ਤਰਿਭਙ੍ਗਂ, ਤੇਨ ਮਚ੍ਛਮਂਸਮੁਗ੍ਗਸੂਪਾਦੀਹਿ ਅਨੇਕਸੂਪਂ, ਨਾਨਪ੍ਪਕਾਰਮਂਸਾਦਿਬ੍ਯਞ੍ਜਨੇਹਿ ਅਨੇਕਬ੍ਯਞ੍ਜਨਨ੍ਤਿ ਵੁਤ੍ਤਂ ਹੋਤਿ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਉਪਮਾਸਂਸਨ੍ਦਨੇ ਚ ਸਾਲਿਵਰਭਤ੍ਤਰਚਨਂ ਵਿਯ ਇਚ੍ਛਾਵਚਰਪ੍ਪਹਾਨਂ, ਅਪਰਕਂਸਪਾਤਿਯਾ ਪਟਿਕੁਜ੍ਝਨਂ ਵਿਯ ਅਪ੍ਪਿਚ੍ਛਤਾਸਮੁਟ੍ਠਾਨੇਹਿ ਗਾਮਨ੍ਤਵਿਹਾਰਾਦੀਹਿ ਇਚ੍ਛਾਵਚਰਪ੍ਪਹਾਨਪ੍ਪਟਿਚ੍ਛਾਦਕਂ, ਕਂਸਪਾਤਿਂ ਵਿਵਰਿਤ੍ਵਾ ਸਾਲਿਵਰਭਤ੍ਤਦਸ੍ਸਨੇਨ ਜਨਸ੍ਸ ਮਨਾਪਤਾ ਵਿਯ ਗਾਮਨ੍ਤਵਿਹਾਰਾਦੀਨਿ ਅਨਾਦਿਯਿਤ੍ਵਾ ਇਚ੍ਛਾਵਚਰਪ੍ਪਹਾਨਦਸ੍ਸਨੇਨ ਸਬ੍ਰਹ੍ਮਚਾਰੀਨਂ ਸਕ੍ਕਾਰਕਰਣਾਦਿਤਾ ਵੇਦਿਤਬ੍ਬਾ.

੬੩. ਉਪਮਾ ਮਂ, ਆਵੁਸੋ ਸਾਰਿਪੁਤ੍ਤ, ਪਟਿਭਾਤੀਤਿ ਮਯ੍ਹਂ, ਆਵੁਸੋ ਸਾਰਿਪੁਤ੍ਤ, ਉਪਮਾ ਉਪਟ੍ਠਾਤਿ. ਏਕਂ ਉਪਮਂ ਵਤ੍ਤੁਕਾਮੋ ਅਹਨ੍ਤਿ ਅਧਿਪ੍ਪਾਯੋ. ਪਟਿਭਾਤੁ ਤਨ੍ਤਿ ਤੁਯ੍ਹਂ ਪਟਿਭਾਤੁ ਉਪਟ੍ਠਾਤੁ, ਵਦ ਤ੍ਵਨ੍ਤਿ ਅਧਿਪ੍ਪਾਯੋ. ਏਕਮਿਦਾਹਨ੍ਤਿ ਏਤ੍ਥ ਇਦਾਤਿ ਨਿਪਾਤਮਤ੍ਤਂ, ਏਕਸ੍ਮਿਂ ਸਮਯੇ ਅਹਨ੍ਤਿ ਵੁਤ੍ਤਂ ਹੋਤਿ, ਭੁਮ੍ਮਤ੍ਥੇ ਉਪਯੋਗਵਚਨਂ. ਰਾਜਗਹੇ ਵਿਹਰਾਮਿ ਗਿਰਿਬ੍ਬਜੇਤਿ, ਰਾਜਗਹਨ੍ਤਿ ਤਸ੍ਸ ਨਗਰਸ੍ਸ ਨਾਮਂ. ਸਮਨ੍ਤਤੋ ਪਨ ਗਿਰਿਪਰਿਕ੍ਖੇਪੇਨ ਵਜੋ ਵਿਯ ਸਣ੍ਠਿਤਤ੍ਤਾ ਗਿਰਿਬ੍ਬਜਨ੍ਤਿ ਵੁਚ੍ਚਤਿ. ਤਸ੍ਮਿਂ ਨਗਰੇ ਵਿਹਰਾਮਿ, ਤਂ ਨਿਸ੍ਸਾਯ ਅਹਂ ਵਿਹਰਾਮੀਤਿ ਵੁਤ੍ਤਂ ਹੋਤਿ. ਅਥ ਖ੍ਵਾਹਨ੍ਤਿ ਅਥ ਖੋ ਅਹਂ. ਏਤ੍ਥ ਚ ਅਥਾਤਿ ਅਞ੍ਞਾਧਿਕਾਰਵਚਨਾਰਮ੍ਭੇ ਨਿਪਾਤੋ. ਖੋਤਿ ਪਦਪੂਰਣਮਤ੍ਤੇ. ਪੁਬ੍ਬਣ੍ਹਸਮਯਨ੍ਤਿ ਦਿਵਸਸ੍ਸ ਪੁਬ੍ਬਭਾਗਸਮਯਂ. ਪੁਬ੍ਬਣ੍ਹਸਮਯੇਤਿ ਅਤ੍ਥੋ, ਪੁਬ੍ਬਣ੍ਹੇ ਵਾ ਸਮਯਂ ਪੁਬ੍ਬਣ੍ਹਸਮਯਂ, ਪੁਬ੍ਬਣ੍ਹੇ ਏਕਂ ਖਣਨ੍ਤਿ ਵੁਤ੍ਤਂ ਹੋਤਿ, ਏਵਂ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ ਲਬ੍ਭਤਿ. ਨਿਵਾਸੇਤ੍ਵਾਤਿ ਪਰਿਦਹਿਤ੍ਵਾ, ਵਿਹਾਰਨਿਵਾਸਨਪਰਿਵਤ੍ਤਨਵਸੇਨੇਤਂ ਵੇਦਿਤਬ੍ਬਂ. ਗਾਮਪ੍ਪਵੇਸਨਤ੍ਥਾਯ ਵਾ ਸਣ੍ਠਪੇਤ੍ਵਾ ਨਿਵਾਸਨਵਸੇਨ, ਨ ਹਿ ਸੋ ਤਤੋ ਪੁਬ੍ਬੇ ਅਨਿਵਤ੍ਥੋ ਅਹੋਸਿ.

ਪਤ੍ਤਚੀਵਰਮਾਦਾਯਾਤਿ ਪਤ੍ਤਂ ਹਤ੍ਥੇਨ ਚੀਵਰਂ ਕਾਯੇਨ ਆਦਿਯਿਤ੍ਵਾ. ਪਿਣ੍ਡਾਯਾਤਿ ਪਿਣ੍ਡਪਾਤਤ੍ਥਾਯ. ਸਮੀਤੀਤਿ ਤਸ੍ਸ ਨਾਮਂ. ਯਾਨਕਾਰਪੁਤ੍ਤੋਤਿ ਰਥਕਾਰਪੁਤ੍ਤੋ. ਪਣ੍ਡੁਪੁਤ੍ਤੋਤਿ ਪਣ੍ਡੁਸ੍ਸ ਪੁਤ੍ਤੋ. ਆਜੀਵਕੋਤਿ ਨਗ੍ਗਸਮਣਕੋ. ਪੁਰਾਣਯਾਨਕਾਰਪੁਤ੍ਤੋਤਿ ਪੋਰਾਣਯਾਨਕਾਰਕੁਲਸ੍ਸ ਪੁਤ੍ਤੋ. ਪਚ੍ਚੁਪਟ੍ਠਿਤੋਤਿ ਉਪਗਨ੍ਤ੍ਵਾ ਠਿਤੋ. ਵਙ੍ਕਂ ਨਾਮ ਏਕਤੋ ਕੁਟਿਲਂ. ਜਿਮ੍ਹਂ ਨਾਮ ਸਪ੍ਪਗਤਮਗ੍ਗਸਦਿਸਂ. ਦੋਸਨ੍ਤਿ ਫੇਗ੍ਗੁਵਿਸਮਗਣ੍ਠਿਕਾਦਿ. ਯਥਾ ਯਥਾਤਿ ਕਾਲਤ੍ਥੇ ਨਿਪਾਤੋ, ਯਦਾ ਯਦਾ ਯਸ੍ਮਿਂ ਤਸ੍ਮਿਂ ਕਾਲੇਤਿ ਵੁਤ੍ਤਂ ਹੋਤਿ. ਤਥਾ ਤਥਾਤਿ ਅਯਮ੍ਪਿ ਕਾਲਤ੍ਥੋਯੇਵ, ਤਸ੍ਮਿਂ ਤਸ੍ਮਿਂ ਕਾਲੇਤਿ ਵੁਤ੍ਤਂ ਹੋਤਿ. ਸੋ ਅਤ੍ਤਨੋ ਸੁਤ੍ਤਾਨੁਲੋਮੇਨ ਚਿਨ੍ਤੇਸਿ, ਇਤਰੋ ਤੇਨ ਚਿਨ੍ਤਿਤਕ੍ਖਣੇ ਚਿਨ੍ਤਿਤਟ੍ਠਾਨਮੇਵ ਤਚ੍ਛਤਿ. ਅਤ੍ਤਮਨੋਤਿ ਸਕਮਨੋ ਤੁਟ੍ਠਮਨੋ ਪੀਤਿਸੋਮਨਸ੍ਸੇਹਿ ਗਹਿਤਮਨੋ. ਅਤ੍ਤਮਨਵਾਚਂ ਨਿਚ੍ਛਾਰੇਸੀਤਿ ਅਤ੍ਤਮਨਤਾਯ ਵਾਚਂ, ਅਤ੍ਤਮਨਭਾਵਸ੍ਸ ਵਾ ਯੁਤ੍ਤਂ ਵਾਚਂ ਨਿਚ੍ਛਾਰੇਸਿ ਉਦੀਰਯਿ, ਪਬ੍ਯਾਹਰੀਤਿ ਵੁਤ੍ਤਂ ਹੋਤਿ. ਹਦਯਾ ਹਦਯਂ ਮਞ੍ਞੇ ਅਞ੍ਞਾਯਾਤਿ ਚਿਤ੍ਤੇਨ ਚਿਤ੍ਤਂ ਜਾਨਿਤ੍ਵਾ ਵਿਯ.

ਅਸ੍ਸਦ੍ਧਾਤਿ ਬੁਦ੍ਧਧਮ੍ਮਸਙ੍ਘੇਸੁ ਸਦ੍ਧਾਵਿਰਹਿਤਾ. ਜੀਵਿਕਤ੍ਥਾਤਿ ਇਣਭਯਾਦੀਹਿ ਪੀਲ਼ਿਤਾ ਬਹਿ ਜੀਵਿਤੁਂ ਅਸਕ੍ਕੋਨ੍ਤਾ ਇਧ ਜੀਵਿਕਤ੍ਥਿਕਾ ਹੁਤ੍ਵਾ. ਨ ਸਦ੍ਧਾਤਿ ਨ ਸਦ੍ਧਾਯ. ਸਠਾ ਮਾਯਾਵਿਨੋਤਿ ਮਾਯਾਸਾਠੇਯ੍ਯੇਹਿ ਯੁਤ੍ਤਾ. ਕੇਤਬਿਨੋਤਿ ਸਿਕ੍ਖਿਤਕੇਰਾਟਿਕਾ, ਨਿਪ੍ਫਨ੍ਨਥਾਮਗਤਸਾਠੇਯ੍ਯਾਤਿ ਵੁਤ੍ਤਂ ਹੋਤਿ. ਸਾਠੇਯ੍ਯਞ੍ਹਿ ਅਭੂਤਗੁਣਦਸ੍ਸਨਤੋ ਅਭੂਤਭਣ੍ਡਗੁਣਦਸ੍ਸਨਸਮਂ ਕਤ੍ਵਾ ‘‘ਕੇਰਾਟਿਯ’’ਨ੍ਤਿ ਵੁਚ੍ਚਤਿ. ਉਨ੍ਨਲ਼ਾਤਿ ਉਗ੍ਗਤਨਲ਼ਾ, ਉਟ੍ਠਿਤਤੁਚ੍ਛਮਾਨਾਤਿ ਵੁਤ੍ਤਂ ਹੋਤਿ. ਚਪਲਾਤਿ ਪਤ੍ਤਚੀਵਰਮਣ੍ਡਨਾਦਿਨਾ ਚਾਪਲ੍ਲੇਨ ਯੁਤ੍ਤਾ. ਮੁਖਰਾਤਿ ਮੁਖਖਰਾ, ਖਰਵਚਨਾਤਿ ਵੁਤ੍ਤਂ ਹੋਤਿ, ਵਿਕਿਣ੍ਣਵਾਚਾਤਿ ਅਸਂਯਤਵਚਨਾ, ਦਿਵਸਮ੍ਪਿ ਨਿਰਤ੍ਥਕਵਚਨਪ੍ਪਲਾਪਿਨੋ. ਇਨ੍ਦ੍ਰਿਯੇਸੁ ਅਗੁਤ੍ਤਦ੍ਵਾਰਾਤਿ ਛਸੁ ਇਨ੍ਦ੍ਰਿਯੇਸੁ ਅਸਂਵੁਤਕਮ੍ਮਦ੍ਵਾਰਾ. ਭੋਜਨੇ ਅਮਤ੍ਤਞ੍ਞੁਨੋਤਿ ਭੋਜਨੇ ਯਾ ਮਤ੍ਤਾ ਜਾਨਿਤਬ੍ਬਾ ਪਰਿਯੇਸਨਪਟਿਗ੍ਗਹਣਪਰਿਭੋਗੇਸੁ ਯੁਤ੍ਤਤਾ, ਤਸ੍ਸਾ ਅਜਾਨਨਕਾ. ਜਾਗਰਿਯਂ ਅਨਨੁਯੁਤ੍ਤਾਤਿ ਜਾਗਰੇ ਅਨਨੁਯੁਤ੍ਤਾ. ਸਾਮਞ੍ਞੇ ਅਨਪੇਕ੍ਖਵਨ੍ਤੋਤਿ ਸਮਣਧਮ੍ਮੇ ਨਿਰਪੇਕ੍ਖਾ, ਧਮ੍ਮਾਨੁਧਮ੍ਮਪ੍ਪਟਿਪਤ੍ਤਿਰਹਿਤਾਤਿ ਅਤ੍ਥੋ. ਸਿਕ੍ਖਾਯ ਨ ਤਿਬ੍ਬਗਾਰਵਾਤਿ ਸਿਕ੍ਖਾਪਦੇਸੁ ਬਹੁਲਗਾਰਵਾ ਨ ਹੋਨ੍ਤਿ, ਆਪਤ੍ਤਿਵੀਤਿਕ੍ਕਮਬਹੁਲਾ ਵਾ. ਬਾਹੁਲਿਕਾਤਿਆਦਿ ਧਮ੍ਮਦਾਯਾਦੇ ਵੁਤ੍ਤਂ, ਕੁਸੀਤਾਤਿਆਦਿ ਭਯਭੇਰਵੇ. ਧਮ੍ਮਪਰਿਯਾਯੇਨਾਤਿ ਧਮ੍ਮਦੇਸਨਾਯ.

ਸਦ੍ਧਾ ਅਗਾਰਸ੍ਮਾਤਿ ਪਕਤਿਯਾਪਿ ਸਦ੍ਧਾ, ਪਬ੍ਬਜਿਤਾਪਿ ਸਦ੍ਧਾਯ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤਾ. ਪਿਵਨ੍ਤਿ ਮਞ੍ਞੇ ਘਸਨ੍ਤਿ ਮਞ੍ਞੇਤਿ ਪਿਵਨ੍ਤਿ ਵਿਯ ਘਸਨ੍ਤਿ ਵਿਯ. ਅਤ੍ਤਮਨਵਾਚਂ ਨਿਚ੍ਛਾਰੇਨ੍ਤਾ ਵਚਸਾ ਪਿਵਨ੍ਤਿ ਵਿਯ, ਅਬ੍ਭਨੁਮੋਦਨ੍ਤਾ ਮਨਸਾ ਘਸਨ੍ਤਿ ਵਿਯ. ਸਾਧੁ ਵਤਾਤਿ ਸੁਨ੍ਦਰਂ ਵਤ. ਸਬ੍ਰਹ੍ਮਚਾਰੀਤਿ ਰਸ੍ਸਮ੍ਪਿ ਵਟ੍ਟਤਿ ਦੀਘਮ੍ਪਿ. ਰਸ੍ਸੇ ਸਤਿ ਸਾਰਿਪੁਤ੍ਤਸ੍ਸ ਉਪਰਿ ਹੋਤਿ, ਦੀਘੇ ਸਤਿ ਸਬ੍ਰਹ੍ਮਚਾਰੀਨਂ. ਯਦਾ ਸਾਰਿਪੁਤ੍ਤਸ੍ਸ ਉਪਰਿ ਹੋਤਿ, ਤਦਾ ਸਬ੍ਰਹ੍ਮਚਾਰੀ ਸਾਰਿਪੁਤ੍ਤੋ ਅਮ੍ਹੇ ਅਕੁਸਲਾ ਵੁਟ੍ਠਾਪੇਤ੍ਵਾਤਿ ਅਤ੍ਥੋ. ਯਦਾ ਸਬ੍ਰਹ੍ਮਚਾਰੀਨਂ, ਤਦਾ ਸਬ੍ਰਹ੍ਮਚਾਰਯੋ ਅਕੁਸਲਾ ਵੁਟ੍ਠਾਪੇਤ੍ਵਾਤਿ ਅਤ੍ਥੋ. ਦਹਰੋਤਿ ਤਰੁਣੋ. ਯੁਵਾਤਿ ਯੋਬ੍ਬਨਭਾਵੇ ਠਿਤੋ. ਮਣ੍ਡਨਕਜਾਤਿਕੋਤਿ ਅਲਙ੍ਕਾਰਕਸਭਾਵੋ. ਤਤ੍ਥ ਕੋਚਿ ਤਰੁਣੋਪਿ ਯੁਵਾ ਨ ਹੋਤਿ ਯਥਾ ਅਤਿਤਰੁਣੋ, ਕੋਚਿ ਯੁਵਾਪਿ ਮਣ੍ਡਨਕਜਾਤਿਕੋ ਨ ਹੋਤਿ ਯਥਾ ਉਪਸਨ੍ਤਸਭਾਵੋ, ਆਲਸਿਯਬ੍ਯਸਨਾਦੀਹਿ ਵਾ ਅਭਿਭੂਤੋ, ਇਧ ਪਨ ਦਹਰੋ ਚੇਵ ਯੁਵਾ ਚ ਮਣ੍ਡਨਕਜਾਤਿਕੋ ਚ ਅਧਿਪ੍ਪੇਤੋ, ਤਸ੍ਮਾ ਏਵਮਾਹ. ਉਪ੍ਪਲਾਦੀਨਿ ਲੋਕਸਮ੍ਮਤਤ੍ਤਾ ਵੁਤ੍ਤਾਨਿ. ਇਤਿਹ ਤੇਤਿ ਏਵਂ ਤੇ. ਉਭੋ ਮਹਾਨਾਗਾਤਿ ਦ੍ਵੇਪਿ ਮਹਾਨਾਗਾ, ਦ੍ਵੇਪਿ ਹਿ ਏਤੇ ਅਗ੍ਗਸਾਵਕਾ ‘‘ਮਹਾਨਾਗਾ’’ਤਿ ਵੁਚ੍ਚਨ੍ਤਿ. ਤਤ੍ਰਾਯਂ ਵਚਨਤ੍ਥੋ, ਛਨ੍ਦਾਦੀਹਿ ਨ ਗਚ੍ਛਨ੍ਤੀਤਿ ਨਾਗਾ, ਤੇਨ ਤੇਨ ਮਗ੍ਗੇਨ ਪਹੀਨੇ ਕਿਲੇਸੇ ਨ ਆਗਚ੍ਛਨ੍ਤੀਤਿ ਨਾਗਾ, ਨਾਨਪ੍ਪਕਾਰਕਂ ਆਗੁਂ ਨ ਕਰੋਨ੍ਤੀਤਿ ਨਾਗਾ, ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੋ ਪਨ ਮਹਾਨਿਦ੍ਦੇਸੇ (ਮਹਾਨਿ. ੮੦) ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਅਪਿਚ –

‘‘ਆਗੁਂ ਨ ਕਰੋਤਿ ਕਿਞ੍ਚਿ ਲੋਕੇ,

ਸਬ੍ਬਸਂਯੋਗੇ ਵਿਸਜ੍ਜ ਬਨ੍ਧਨਾਨਿ;

ਸਬ੍ਬਤ੍ਥ ਨ ਸਜ੍ਜਤੀ ਵਿਮੁਤ੍ਤੋ,

ਨਾਗੋ ਤਾਦਿ ਪਵੁਚ੍ਚਤੇ ਤਥਤ੍ਤਾ’’ਤਿ. (ਸੁ. ਨਿ. ੫੨੭; ਮਹਾਨਿ. ੮੦);

ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਮਹਨ੍ਤਾ ਨਾਗਾ ਮਹਾਨਾਗਾ, ਅਞ੍ਞੇਹਿ ਖੀਣਾਸਵਨਾਗੇਹਿ ਪੁਜ੍ਜਤਰਾ ਚ ਪਾਸਂਸਤਰਾ ਚਾਤਿ ਅਤ੍ਥੋ. ਅਞ੍ਞਮਞ੍ਞਸ੍ਸਾਤਿ ਅਞ੍ਞੋ ਅਞ੍ਞਸ੍ਸ. ਸਮਨੁਮੋਦਿਂਸੂਤਿ ਸਮਂ ਅਨੁਮੋਦਿਂਸੁ. ਤਤ੍ਥ ਇਮਾਯ ਉਪਮਾਯ ਮਹਾਮੋਗ੍ਗਲ੍ਲਾਨੋ ਅਨੁਮੋਦਿ, ਪਟਿਭਾਤੁ ਤਂ ਆਵੁਸੋਤਿ ਧਮ੍ਮਸੇਨਾਪਤਿ. ਤੇਨ ਵੁਤ੍ਤਂ ‘‘ਅਞ੍ਞਮਞ੍ਞਸ੍ਸ ਸੁਭਾਸਿਤਂ ਸਮਨੁਮੋਦਿਂਸੂ’’ਤਿ.

ਸਮ੍ਮੁਤਿਪਰਮਤ੍ਥਦੇਸਨਾਕਥਾਵਣ੍ਣਨਾ ਨਿਟ੍ਠਿਤਾ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਅਨਙ੍ਗਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.