੩. ਨਨ੍ਦਵਗ੍ਗੋ

੧. ਕਮ੍ਮਵਿਪਾਕਜਸੁਤ੍ਤਵਣ੍ਣਨਾ

੨੧. ਨਨ੍ਦਵਗ੍ਗਸ੍ਸ ਪਠਮੇ ਅਞ੍ਞਤਰੋ ਭਿਕ੍ਖੂਤਿ ਨਾਮਗੋਤ੍ਤੇਨ ਅਪਾਕਟੋ ਏਕੋ ਖੀਣਾਸਵਭਿਕ੍ਖੁ. ਸੋ ਕਿਰ ਰਾਜਗਹਵਾਸੀ ਕੁਲਪੁਤ੍ਤੋ ਮੋਗ੍ਗਲ੍ਲਾਨਤ੍ਥੇਰੇਨ ਸਂਵੇਜਿਤੋ ਸਂਸਾਰਦੋਸਂ ਦਿਸ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਸੀਲਾਨਿ ਸੋਧੇਤ੍ਵਾ ਚਤੁਸਚ੍ਚਕਮ੍ਮਟ੍ਠਾਨਂ ਗਹੇਤ੍ਵਾ ਨ ਚਿਰਸ੍ਸੇਵ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤਂ ਪਾਪੁਣਿ. ਤਸ੍ਸ ਅਪਰਭਾਗੇ ਖਰੋ ਆਬਾਧੋ ਉਪ੍ਪਜ੍ਜਿ, ਸੋ ਪਚ੍ਚਵੇਕ੍ਖਣਾਯ ਅਧਿਵਾਸੇਨ੍ਤੋ ਵਿਹਰਤਿ. ਖੀਣਾਸਵਾਨਞ੍ਹਿ ਚੇਤਸਿਕਦੁਕ੍ਖਂ ਨਾਮ ਨਤ੍ਥਿ, ਕਾਯਿਕਦੁਕ੍ਖਂ ਪਨ ਹੋਤਿਯੇਵ. ਸੋ ਏਕਦਿਵਸਂ ਭਗਵਤੋ ਧਮ੍ਮਂ ਦੇਸੇਨ੍ਤਸ੍ਸ ਨਾਤਿਦੂਰੇ ਠਾਨੇ ਦੁਕ੍ਖਂ ਅਧਿਵਾਸੇਨ੍ਤੋ ਪਲ੍ਲਙ੍ਕੇਨ ਨਿਸੀਦਿ. ਤੇਨ ਵੁਤ੍ਤਂ ‘‘ਭਗਵਤੋ ਅਵਿਦੂਰੇ ਨਿਸਿਨ੍ਨੋ ਹੋਤੀ’’ਤਿਆਦਿ.

ਤਤ੍ਥ ਪਲ੍ਲਙ੍ਕਨ੍ਤਿ ਸਮਨ੍ਤਤੋ ਊਰੁਬਦ੍ਧਾਸਨਂ. ਆਭੁਜਿਤ੍ਵਾਤਿ ਬਨ੍ਧਿਤ੍ਵਾ. ਉਜੁਂ ਕਾਯਂ ਪਣਿਧਾਯਾਤਿ ਉਪਰਿਮਂ ਸਰੀਰਂ ਉਜੁਕਂ ਠਪੇਤ੍ਵਾ ਅਟ੍ਠਾਰਸ ਪਿਟ੍ਠਿਕਣ੍ਟਕੇ ਕੋਟਿਯਾ ਕੋਟਿਂ ਪਟਿਪਾਦੇਤ੍ਵਾ. ਏਵਞ੍ਹਿ ਨਿਸਿਨ੍ਨਸ੍ਸ ਚਮ੍ਮਮਂਸਨ੍ਹਾਰੂਨਿ ਨ ਨਮਨ੍ਤਿ, ਤਸ੍ਮਾ ਸੋ ਤਥਾ ਨਿਸਿਨ੍ਨੋ ਹੋਤਿ. ਪੁਰਾਣਕਮ੍ਮਵਿਪਾਕਜਨ੍ਤਿ ਪੁਬ੍ਬੇ ਕਤਸ੍ਸ ਕਮ੍ਮਸ੍ਸ ਵਿਪਾਕਭਾਵੇਨ ਜਾਤਂ, ਪੁਰਾਣਕਮ੍ਮਵਿਪਾਕੇ ਵਾ ਸੁਖਦੁਕ੍ਖਪ੍ਪਕਾਰੇ ਵਿਪਾਕਵਟ੍ਟਸਮੁਦਾਯੇ ਤਦੇਕਦੇਸਭਾਵੇਨ ਜਾਤਂ. ਕਿਂ ਤਂ? ਦੁਕ੍ਖਂ. ਪੁਰਾਣਕਮ੍ਮਵਿਪਾਕਜਨ੍ਤਿ ਚ ਇਮਿਨਾ ਤਸ੍ਸ ਆਬਾਧਸ੍ਸ ਕਮ੍ਮਸਮੁਟ੍ਠਾਨਤਂ ਦਸ੍ਸੇਨ੍ਤੋ ਓਪਕ੍ਕਮਿਕਉਤੁਵਿਪਰਿਣਾਮਜਾਦਿਭਾਵਂ ਪਟਿਕ੍ਖਿਪਤਿ. ਦੁਕ੍ਖਨ੍ਤਿ ਪਚੁਰਜਨੇਹਿ ਖਮਿਤੁਂ ਅਸਕ੍ਕੁਣੇਯ੍ਯਂ. ਤਿਬ੍ਬਨ੍ਤਿ ਤਿਖਿਣਂ, ਅਭਿਭਵਿਤ੍ਵਾ ਪਵਤ੍ਤਿਯਾ ਬਹਲਂ ਵਾ. ਖਰਨ੍ਤਿ ਕਕ੍ਖਲ਼ਂ. ਕਟੁਕਨ੍ਤਿ ਅਸਾਤਂ. ਅਧਿਵਾਸੇਨ੍ਤੋਤਿ ਉਪਰਿ ਵਾਸੇਨ੍ਤੋ ਸਹਨ੍ਤੋ ਖਮਨ੍ਤੋ.

ਸਤੋ ਸਮ੍ਪਜਾਨੋਤਿ ਵੇਦਨਾਪਰਿਗ੍ਗਾਹਕਾਨਂ ਸਤਿਸਮ੍ਪਜਞ੍ਞਾਨਂ ਵਸੇਨ ਸਤਿਮਾ ਸਮ੍ਪਜਾਨਨ੍ਤੋ ਚ. ਇਦਂ ਵੁਤ੍ਤਂ ਹੋਤਿ – ‘‘ਅਯਂ ਵੇਦਨਾ ਨਾਮ ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚਾ, ਅਨਿਟ੍ਠਾਰਮ੍ਮਣਾਦਿਪਚ੍ਚਯੇ ਪਟਿਚ੍ਚ ਉਪ੍ਪਨ੍ਨਤ੍ਤਾ ਪਟਿਚ੍ਚਸਮੁਪ੍ਪਨ੍ਨਾ, ਉਪ੍ਪਜ੍ਜਿਤ੍ਵਾ ਏਕਨ੍ਤੇਨ ਭਿਜ੍ਜਨਸਭਾਵਤ੍ਤਾ ਖਯਧਮ੍ਮਾ ਵਯਧਮ੍ਮਾ ਵਿਰਾਗਧਮ੍ਮਾ ਨਿਰੋਧਧਮ੍ਮਾ’’ਤਿ ਵੇਦਨਾਯ ਅਨਿਚ੍ਚਤਾਸਲ੍ਲਕ੍ਖਣਵਸੇਨ ਸਤੋਕਾਰਿਤਾਯ ਸਤੋ, ਅਵਿਪਰੀਤਸਭਾਵਪਟਿਵਿਜ੍ਝਨਵਸੇਨ ਸਮ੍ਪਜਾਨੋ ਚ ਹੁਤ੍ਵਾ. ਅਥ ਵਾ ਸਤਿਵੇਪੁਲ੍ਲਪਤ੍ਤਿਯਾ ਸਬ੍ਬਤ੍ਥੇਵ ਕਾਯਵੇਦਨਾਚਿਤ੍ਤਧਮ੍ਮੇਸੁ ਸੁਟ੍ਠੁ ਉਪਟ੍ਠਿਤਸਤਿਤਾਯ ਸਤੋ, ਤਥਾ ਪਞ੍ਞਾਵੇਪੁਲ੍ਲਪ੍ਪਤ੍ਤਿਯਾ ਪਰਿਗ੍ਗਹਿਤਸਙ੍ਖਾਰਤਾਯ ਸਮ੍ਪਜਾਨੋ. ਅਵਿਹਞ੍ਞਮਾਨੋਤਿ ‘‘ਅਸ੍ਸੁਤਵਾ, ਭਿਕ੍ਖਵੇ, ਪੁਥੁਜ੍ਜਨੋ ਅਞ੍ਞਤਰਞ੍ਞਤਰੇਨ ਦੁਕ੍ਖਧਮ੍ਮੇਨ ਫੁਟ੍ਠੋ ਸਮਾਨੋ ਸੋਚਤਿ ਕਿਲਮਤਿ ਪਰਿਦੇਵਤਿ ਉਰਤ੍ਤਾਲ਼ਿਂ ਕਨ੍ਦਤਿ ਸਮ੍ਮੋਹਂ ਆਪਜ੍ਜਤੀ’’ਤਿ ਵੁਤ੍ਤਨਯੇਨ ਅਨ੍ਧਪੁਥੁਜ੍ਜਨੋ ਵਿਯ ਨ ਵਿਹਞ੍ਞਮਾਨੋ ਮਗ੍ਗੇਨੇਵ ਸਮੁਗ੍ਘਾਤਿਤਤ੍ਤਾ ਚੇਤੋਦੁਕ੍ਖਂ ਅਨੁਪ੍ਪਾਦੇਨ੍ਤੋ ਕੇਵਲਂ ਕਮ੍ਮਵਿਪਾਕਜਂ ਸਰੀਰਦੁਕ੍ਖਂ ਅਧਿਵਾਸੇਨ੍ਤੋ ਸਮਾਪਤ੍ਤਿਂ ਸਮਾਪਨ੍ਨੋ ਵਿਯ ਨਿਸਿਨ੍ਨੋ ਹੋਤਿ. ਅਦ੍ਦਸਾਤਿ ਤਂ ਆਯਸ੍ਮਨ੍ਤਂ ਅਧਿਵਾਸਨਖਨ੍ਤਿਯਾ ਤਥਾ ਨਿਸਿਨ੍ਨਂ ਅਦ੍ਦਕ੍ਖਿ.

ਏਤਮਤ੍ਥਨ੍ਤਿ ਏਤਂ ਤਾਦਿਸਸ੍ਸਪਿ ਰੋਗਸ੍ਸ ਵੇਜ੍ਜਾਦੀਹਿ ਤਿਕਿਚ੍ਛਨਤ੍ਥਂ ਅਨੁਸ੍ਸੁਕ੍ਕਾਪਜ੍ਜਨਕਾਰਣਂ ਖੀਣਾਸਵਾਨਂ ਲੋਕਧਮ੍ਮੇਹਿ ਅਨੁਪਲੇਪਿਤਸਙ੍ਖਾਤਂ ਅਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਇਮਂ ਸਙ੍ਖਤਧਮ੍ਮਾਨਂ ਯੇਹਿ ਕੇਹਿਚਿ ਦੁਕ੍ਖਧਮ੍ਮੇਹਿ ਅਵਿਘਾਤਪਤ੍ਤਿਵਿਭਾਵਨਂ ਉਦਾਨਂ ਉਦਾਨੇਸਿ.

ਤਤ੍ਥ ਸਬ੍ਬਕਮ੍ਮਜਹਸ੍ਸਾਤਿ ਪਹੀਨਸਬ੍ਬਕਮ੍ਮਸ੍ਸ. ਅਗ੍ਗਮਗ੍ਗਸ੍ਸ ਹਿ ਉਪ੍ਪਨ੍ਨਕਾਲਤੋ ਪਟ੍ਠਾਯ ਅਰਹਤੋ ਸਬ੍ਬਾਨਿ ਕੁਸਲਾਕੁਸਲਕਮ੍ਮਾਨਿ ਪਹੀਨਾਨਿ ਨਾਮ ਹੋਨ੍ਤਿ ਪਟਿਸਨ੍ਧਿਂ ਦਾਤੁਂ ਅਸਮਤ੍ਥਭਾਵਤੋ, ਯਤੋ ਅਰਿਯਮਗ੍ਗਞਾਣਂ ਕਮ੍ਮਕ੍ਖਯਕਰਨ੍ਤਿ ਵੁਚ੍ਚਤਿ. ਭਿਕ੍ਖੁਨੋਤਿ ਭਿਨ੍ਨਕਿਲੇਸਤਾਯ ਭਿਕ੍ਖੁਨੋ. ਧੁਨਮਾਨਸ੍ਸ ਪੁਰੇ ਕਤਂ ਰਜਨ੍ਤਿ ਅਰਹਤ੍ਤਪ੍ਪਤ੍ਤਿਤੋ ਪੁਬ੍ਬੇ ਕਤਂ ਰਾਗਰਜਾਦਿਮਿਸ੍ਸਤਾਯ ਰਜਨ੍ਤਿ ਲਦ੍ਧਨਾਮਂ ਦੁਕ੍ਖਵੇਦਨੀਯਂ ਕਮ੍ਮਂ ਵਿਪਾਕਪਟਿਸਂਵੇਦਨੇਨ ਤਂ ਧੁਨਨ੍ਤਸ੍ਸ ਵਿਦ੍ਧਂਸੇਨ੍ਤਸ੍ਸ, ਅਰਹਤ੍ਤਪ੍ਪਤ੍ਤਿਯਾ ਪਰਤੋ ਪਨ ਸਾਵਜ੍ਜਕਿਰਿਯਾਯ ਸਮ੍ਭਵੋਯੇਵ ਨਤ੍ਥਿ, ਅਨਵਜ੍ਜਕਿਰਿਯਾ ਚ ਭਵਮੂਲਸ੍ਸ ਸਮੁਚ੍ਛਿਨ੍ਨਤ੍ਤਾ ਸਮੁਚ੍ਛਿਨ੍ਨਮੂਲਤਾਯ ਪੁਪ੍ਫਂ ਵਿਯ ਫਲਦਾਨਸਮਤ੍ਥਤਾਯ ਅਭਾਵਤੋ ਕਿਰਿਯਮਤ੍ਤਾਵ ਹੋਤਿ.

ਅਮਮਸ੍ਸਾਤਿ ਰੂਪਾਦੀਸੁ ਕਤ੍ਥਚਿ ਮਮਨ੍ਤਿ ਗਹਣਾਭਾਵਤੋ ਅਮਮਸ੍ਸ ਮਮਙ੍ਕਾਰਰਹਿਤਸ੍ਸ. ਯਸ੍ਸ ਹਿ ਮਮਙ੍ਕਾਰੋ ਅਤ੍ਥਿ, ਸੋ ਅਤ੍ਤਸਿਨੇਹੇਨ ਵੇਜ੍ਜਾਦੀਹਿ ਸਰੀਰਂ ਪਟਿਜਗ੍ਗਾਪੇਤਿ. ਅਰਹਾ ਪਨ ਅਮਮੋ, ਤਸ੍ਮਾ ਸੋ ਸਰੀਰਜਗ੍ਗਨੇਪਿ ਉਦਾਸੀਨਧਾਤੁਕੋਵ. ਠਿਤਸ੍ਸਾਤਿ ਚਤੁਬ੍ਬਿਧਮ੍ਪਿ ਓਘਂ ਤਰਿਤ੍ਵਾ ਨਿਬ੍ਬਾਨਥਲੇ ਠਿਤਸ੍ਸ, ਪਟਿਸਨ੍ਧਿਗ੍ਗਹਣਵਸੇਨ ਵਾ ਸਨ੍ਧਾਵਨਸ੍ਸ ਅਭਾਵੇਨ ਠਿਤਸ੍ਸ. ਸੇਕ੍ਖਪੁਥੁਜ੍ਜਨਾ ਹਿ ਕਿਲੇਸਾਭਿਸਙ੍ਖਾਰਾਨਂ ਅਪ੍ਪਹੀਨਤ੍ਤਾ ਚੁਤਿਪਟਿਸਨ੍ਧਿਵਸੇਨ ਸਂਸਾਰੇ ਧਾਵਨ੍ਤਿ ਨਾਮ, ਅਰਹਾ ਪਨ ਤਦਭਾਵਤੋ ਠਿਤੋਤਿ ਵੁਚ੍ਚਤਿ. ਅਥ ਵਾ ਦਸਵਿਧੇ ਖੀਣਾਸਵਸਙ੍ਖਾਤੇ ਅਰਿਯਧਮ੍ਮੇ ਠਿਤਸ੍ਸ. ਤਾਦਿਨੋਤਿ ‘‘ਪਟਿਕੂਲੇ ਅਪ੍ਪਟਿਕੂਲਸਞ੍ਞੀ ਵਿਹਰਤੀ’’ਤਿਆਦਿਨਾ (ਪਟਿ. ਮ. ੩.੧੭) ਨਯੇਨ ਵੁਤ੍ਤਾਯ ਪਞ੍ਚਵਿਧਾਯ ਅਰਿਯਿਦ੍ਧਿਯਾ ਅਟ੍ਠਹਿ ਲੋਕਧਮ੍ਮੇਹਿ ਅਕਮ੍ਪਨਿਯਾਯ ਛਲ਼ਙ੍ਗੁਪੇਕ੍ਖਾਯ ਚ ਸਮਨ੍ਨਾਗਤੇਨ ਇਟ੍ਠਾਦੀਸੁ ਏਕਸਦਿਸਤਾਸਙ੍ਖਾਤੇਨ ਤਾਦੀਭਾਵੇਨ ਤਾਦਿਨੋ. ਅਤ੍ਥੋ ਨਤ੍ਥਿ ਜਨਂ ਲਪੇਤਵੇਤਿ ‘‘ਮਮ ਭੇਸਜ੍ਜਾਦੀਨਿ ਕਰੋਥਾ’’ਤਿ ਜਨਂ ਲਪਿਤੁਂ ਕਥੇਤੁਂ ਪਯੋਜਨਂ ਨਤ੍ਥਿ ਸਰੀਰੇ ਨਿਰਪੇਕ੍ਖਭਾਵਤੋ. ਪਣ੍ਡੁਪਲਾਸੋ ਵਿਯ ਹਿ ਬਨ੍ਧਨਾ ਪਵੁਤ੍ਤੋ ਸਯਮੇਵਾਯਂ ਕਾਯੋ ਭਿਜ੍ਜਿਤ੍ਵਾ ਪਤਤੂਤਿ ਖੀਣਾਸਵਾਨਂ ਅਜ੍ਝਾਸਯੋ. ਵੁਤ੍ਤਞ੍ਹੇਤਂ –

‘‘ਨਾਭਿਕਙ੍ਖਾਮਿ ਮਰਣਂ, ਨਾਭਿਕਙ੍ਖਾਮਿ ਜੀਵਿਤਂ;

ਕਾਲਞ੍ਚ ਪਟਿਕਙ੍ਖਾਮਿ, ਨਿਬ੍ਬਿਸਂ ਭਤਕੋ ਯਥਾ’’ਤਿ. (ਥੇਰਗਾ. ੬੦੬);

ਅਥ ਵਾ ਯਂਕਿਞ੍ਚਿ ਨਿਮਿਤ੍ਤਂ ਦਸ੍ਸੇਤ੍ਵਾ ‘‘ਕਿਂ ਅਯ੍ਯਸ੍ਸ ਇਚ੍ਛਿਤਬ੍ਬ’’ਨ੍ਤਿ ਜਨਂ ਲਪੇਤਵੇ ਪਚ੍ਚਯੇਹਿ ਨਿਮਨ੍ਤਨਵਸੇਨ ਲਪਾਪੇਤੁਂ ਖੀਣਾਸਵਸ੍ਸ ਅਤ੍ਥੋ ਨਤ੍ਥਿ ਤਾਦਿਸਸ੍ਸ ਮਿਚ੍ਛਾਜੀਵਸ੍ਸ ਮਗ੍ਗੇਨੇਵ ਸਮੁਗ੍ਘਾਤਿਤਤ੍ਤਾਤਿ ਅਤ੍ਥੋ. ਇਤਿ ਭਗਵਾ ‘‘ਕਿਸ੍ਸਾਯਂ ਥੇਰੋ ਅਤ੍ਤਨੋ ਰੋਗਂ ਵੇਜ੍ਜੇਹਿ ਅਤਿਕਿਚ੍ਛਾਪੇਤ੍ਵਾ ਭਗਵਤੋ ਅਵਿਦੂਰੇ ਨਿਸੀਦਤੀ’’ਤਿ ਚਿਨ੍ਤੇਨ੍ਤਾਨਂ ਤਸ੍ਸ ਅਤਿਕਿਚ੍ਛਾਪਨੇ ਕਾਰਣਂ ਪਕਾਸੇਸਿ.

ਪਠਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਨਨ੍ਦਸੁਤ੍ਤਵਣ੍ਣਨਾ

੨੨. ਦੁਤਿਯੇ ਨਨ੍ਦੋਤਿ ਤਸ੍ਸ ਨਾਮਂ. ਸੋ ਹਿ ਚਕ੍ਕਵਤ੍ਤਿਲਕ੍ਖਣੂਪੇਤਤ੍ਤਾ ਮਾਤਾਪਿਤਰੋ ਸਪਰਿਜਨਂ ਸਕਲਞ੍ਚ ਞਾਤਿਪਰਿਵਟ੍ਟਂ ਨਨ੍ਦਯਨ੍ਤੋ ਜਾਤੋਤਿ ‘‘ਨਨ੍ਦੋ’’ਤਿ ਨਾਮਂ ਲਭਿ. ਭਗਵਤੋ ਭਾਤਾਤਿ ਭਗਵਤੋ ਏਕਪਿਤੁਪੁਤ੍ਤਤਾਯ ਭਾਤਾ. ਨ ਹਿ ਭਗਵਤੋ ਸਹੋਦਰਾ ਉਪ੍ਪਜ੍ਜਨ੍ਤਿ, ਤੇਨ ਵੁਤ੍ਤਂ ‘‘ਮਾਤੁਚ੍ਛਾਪੁਤ੍ਤੋ’’ਤਿ, ਚੂਲ਼ਮਾਤੁਪੁਤ੍ਤੋਤਿ ਅਤ੍ਥੋ. ਮਹਾਪਜਾਪਤਿਗੋਤਮਿਯਾ ਹਿ ਸੋ ਪੁਤ੍ਤੋ. ਅਨਭਿਰਤੋਤਿ ਨ ਅਭਿਰਤੋ. ਬ੍ਰਹ੍ਮਚਰਿਯਨ੍ਤਿ ਬ੍ਰਹ੍ਮਂ ਸੇਟ੍ਠਂ ਉਤ੍ਤਮਂ ਚਰਿਯਂ ਏਕਾਸਨਂ ਏਕਸੇਯ੍ਯਂ ਮੇਥੁਨਵਿਰਤਿਂ. ਸਨ੍ਧਾਰੇਤੁਨ੍ਤਿ ਪਠਮਚਿਤ੍ਤਤੋ ਯਾਵਚਰਿਮਕਚਿਤ੍ਤਂ ਸਮ੍ਮਾ ਪਰਿਪੁਣ੍ਣਂ ਪਰਿਸੁਦ੍ਧਂ ਧਾਰੇਤੁਂ ਪਵਤ੍ਤੇਤੁਂ. ਦੁਤਿਯੇਨ ਚੇਤ੍ਥ ਬ੍ਰਹ੍ਮਚਰਿਯਪਦੇਨ ਮਗ੍ਗਬ੍ਰਹ੍ਮਚਰਿਯਸ੍ਸਾਪਿ ਸਙ੍ਗਹੋ ਵੇਦਿਤਬ੍ਬੋ. ਸਿਕ੍ਖਂ ਪਚ੍ਚਕ੍ਖਾਯਾਤਿ ਉਪਸਮ੍ਪਦਕਾਲੇ ਭਿਕ੍ਖੁਭਾਵੇਨ ਸਦ੍ਧਿਂ ਸਮਾਦਿਨ੍ਨਂ ਨਿਬ੍ਬਤ੍ਤੇਤਬ੍ਬਭਾਵੇਨ ਅਨੁਟ੍ਠਿਤਂ ਤਿਵਿਧਮ੍ਪਿ ਸਿਕ੍ਖਂ ਪਟਿਕ੍ਖਿਪਿਤ੍ਵਾ, ਵਿਸ੍ਸਜ੍ਜੇਤ੍ਵਾਤਿ ਅਤ੍ਥੋ. ਹੀਨਾਯਾਤਿ ਗਿਹਿਭਾਵਾਯ. ਆਵਤ੍ਤਿਸ੍ਸਾਮੀਤਿ ਨਿਵਤ੍ਤਿਸ੍ਸਾਮਿ.

ਕਸ੍ਮਾ ਪਨਾਯਂ ਏਵਮਾਰੋਚੇਸੀਤਿ? ਏਤ੍ਥਾਯਂ ਅਨੁਪੁਬ੍ਬਿਕਥਾ – ਭਗਵਾ ਪਵਤ੍ਤਵਰਧਮ੍ਮਚਕ੍ਕੋ ਰਾਜਗਹਂ ਗਨ੍ਤ੍ਵਾ ਵੇਲ਼ੁਵਨੇ ਵਿਹਰਨ੍ਤੋ ‘‘ਪੁਤ੍ਤਂ ਮੇ ਆਨੇਤ੍ਵਾ ਦਸ੍ਸੇਥਾ’’ਤਿ ਸੁਦ੍ਧੋਦਨਮਹਾਰਾਜੇਨ ਪੇਸਿਤੇਸੁ ਸਹਸ੍ਸਸਹਸ੍ਸਪਰਿਵਾਰੇਸੁ ਦਸਸੁ ਦੂਤੇਸੁ ਸਹ ਪਰਿਵਾਰੇਨ ਅਰਹਤ੍ਤਂ ਪਤ੍ਤੇਸੁ ਸਬ੍ਬਪਚ੍ਛਾ ਗਨ੍ਤ੍ਵਾ ਅਰਹਤ੍ਤਪ੍ਪਤ੍ਤੇਨ ਕਾਲ਼ੁਦਾਯਿਤ੍ਥੇਰੇਨ ਗਮਨਕਾਲਂ ਞਤ੍ਵਾ ਮਗ੍ਗਵਣ੍ਣਨਂ ਵਣ੍ਣੇਤ੍ਵਾ ਜਾਤਿਭੂਮਿਗਮਨਾਯ ਯਾਚਿਤੋ ਵੀਸਤਿਸਹਸ੍ਸਖੀਣਾਸਵਪਰਿਵੁਤ੍ਤੋ ਕਪਿਲਵਤ੍ਥੁਨਗਰਂ ਗਨ੍ਤ੍ਵਾ ਞਾਤਿਸਮਾਗਮੇ ਪੋਕ੍ਖਰਵਸ੍ਸਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਵੇਸ੍ਸਨ੍ਤਰਜਾਤਕਂ (ਜਾ. ੨.੨੨.੧੬੫੫ ਆਦਯੋ) ਕਥੇਤ੍ਵਾ ਪੁਨਦਿਵਸੇ ਪਿਣ੍ਡਾਯ ਪਵਿਟ੍ਠੋ ‘‘ਉਤ੍ਤਿਟ੍ਠੇ ਨਪ੍ਪਮਜ੍ਜੇਯ੍ਯਾ’’ਤਿ (ਧ. ਪ. ੧੬੮) ਗਾਥਾਯ ਪਿਤਰਂ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਤ੍ਵਾ ਨਿਵੇਸਨਂ ਗਨ੍ਤ੍ਵਾ ‘‘ਧਮ੍ਮਞ੍ਚਰੇ’’ਤਿ (ਧ. ਪ. ੧੬੯) ਗਾਥਾਯ ਮਹਾਪਜਾਪਤਿਂ ਸੋਤਾਪਤ੍ਤਿਫਲੇ, ਰਾਜਾਨਂ ਸਕਦਾਗਾਮਿਫਲੇ ਪਤਿਟ੍ਠਾਪੇਸਿ.

ਭਤ੍ਤਕਿਚ੍ਚਾਵਸਾਨੇ ਪਨ ਰਾਹੁਲਮਾਤੁਗੁਣਕਥਂ ਨਿਸ੍ਸਾਯ ਚਨ੍ਦਕਿਨ੍ਨਰੀਜਾਤਕਂ (ਜਾ. ੧.੧੪.੧੮ ਆਦਯੋ) ਕਥੇਤ੍ਵਾ ਤਤਿਯਦਿਵਸੇ ਨਨ੍ਦਕੁਮਾਰਸ੍ਸ ਅਭਿਸੇਕਗੇਹਪ੍ਪਵੇਸਨਵਿਵਾਹਮਙ੍ਗਲੇਸੁ ਵਤ੍ਤਮਾਨੇਸੁ ਪਿਣ੍ਡਾਯ ਪਵਿਸਿਤ੍ਵਾ ਨਨ੍ਦਕੁਮਾਰਸ੍ਸ ਹਤ੍ਥੇ ਪਤ੍ਤਂ ਦਤ੍ਵਾ ਮਙ੍ਗਲਂ ਵਤ੍ਵਾ ਉਟ੍ਠਾਯਾਸਨਾ ਪਕ੍ਕਮਨ੍ਤੋ ਕੁਮਾਰਸ੍ਸ ਹਤ੍ਥਤੋ ਪਤ੍ਤਂ ਨ ਗਣ੍ਹਿ. ਸੋਪਿ ਤਥਾਗਤੇ ਗਾਰਵੇਨ ‘‘ਪਤ੍ਤਂ ਤੇ, ਭਨ੍ਤੇ, ਗਣ੍ਹਥਾ’’ਤਿ ਵਤ੍ਤੁਂ ਨਾਸਕ੍ਖਿ. ਏਵਂ ਪਨ ਚਿਨ੍ਤੇਸਿ, ‘‘ਸੋਪਾਨਸੀਸੇ ਪਤ੍ਤਂ ਗਣ੍ਹਿਸ੍ਸਤੀ’’ਤਿ, ਸਤ੍ਥਾ ਤਸ੍ਮਿਂ ਠਾਨੇ ਨ ਗਣ੍ਹਿ. ਇਤਰੋ ‘‘ਸੋਪਾਨਮੂਲੇ ਗਣ੍ਹਿਸ੍ਸਤੀ’’ਤਿ ਚਿਨ੍ਤੇਸਿ, ਸਤ੍ਥਾ ਤਤ੍ਥਪਿ ਨ ਗਣ੍ਹਿ. ਇਤਰੋ ‘‘ਰਾਜਙ੍ਗਣੇ ਗਣ੍ਹਿਸ੍ਸਤੀ’’ਤਿ ਚਿਨ੍ਤੇਸਿ, ਸਤ੍ਥਾ ਤਤ੍ਥਪਿ ਨ ਗਣ੍ਹਿ. ਕੁਮਾਰੋ ਨਿਵਤ੍ਤਿਤੁਕਾਮੋ ਅਨਿਚ੍ਛਾਯ ਗਚ੍ਛਨ੍ਤੋ ਗਾਰਵੇਨ ‘‘ਪਤ੍ਤਂ ਗਣ੍ਹਥਾ’’ਤਿ ਵਤ੍ਤੁਂ ਨ ਸਕ੍ਕੋਤਿ, ‘‘ਇਧ ਗਣ੍ਹਿਸ੍ਸਤਿ, ਏਤ੍ਥ ਗਣ੍ਹਿਸ੍ਸਤੀ’’ਤਿ ਚਿਨ੍ਤੇਨ੍ਤੋ ਗਚ੍ਛਤਿ.

ਤਸ੍ਮਿਂ ਖਣੇ ਜਨਪਦਕਲ੍ਯਾਣਿਯਾ ਆਚਿਕ੍ਖਿਂਸੁ, ‘‘ਅਯ੍ਯੇ ਭਗਵਾ, ਨਨ੍ਦਰਾਜਾਨਂ ਗਹੇਤ੍ਵਾ ਗਚ੍ਛਤਿ, ਤੁਮ੍ਹੇਹਿ ਵਿਨਾ ਕਰਿਸ੍ਸਤੀ’’ਤਿ. ਸਾ ਉਦਕਬਿਨ੍ਦੂਹਿ ਪਗ੍ਘਰਨ੍ਤੇਹਿ ਅਡ੍ਢੁਲ੍ਲਿਖਿਤੇਹਿ ਕੇਸੇਹਿ ਵੇਗੇਨ ਪਾਸਾਦਂ ਆਰੁਯ੍ਹ ਸੀਹਪਞ੍ਜਰਦ੍ਵਾਰੇ ਠਤ੍ਵਾ ‘‘ਤੁਵਟਂ ਖੋ, ਅਯ੍ਯਪੁਤ੍ਤ, ਆਗਚ੍ਛੇਯ੍ਯਾਸੀ’’ਤਿ ਆਹ. ਤਂ ਤਸ੍ਸਾ ਵਚਨਂ ਤਸ੍ਸ ਹਦਯੇ ਤਿਰਿਯਂ ਪਤਿਤ੍ਵਾ ਵਿਯ ਠਿਤਂ. ਸਤ੍ਥਾਪਿਸ੍ਸ ਹਤ੍ਥਤੋ ਪਤ੍ਤਂ ਅਗ੍ਗਹੇਤ੍ਵਾਵ ਤਂ ਵਿਹਾਰਂ ਨੇਤ੍ਵਾ ‘‘ਪਬ੍ਬਜਿਸ੍ਸਸਿ ਨਨ੍ਦਾ’’ਤਿ ਆਹ. ਸੋ ਬੁਦ੍ਧਗਾਰਵੇਨ ‘‘ਨ ਪਬ੍ਬਜਿਸ੍ਸਾਮੀ’’ਤਿ ਅਵਤ੍ਵਾ, ‘‘ਆਮ, ਪਬ੍ਬਜਿਸ੍ਸਾਮੀ’’ਤਿ ਆਹ. ਸਤ੍ਥਾ ਤੇਨ ਹਿ ਨਨ੍ਦਂ ਪਬ੍ਬਾਜੇਥਾਤਿ ਕਪਿਲਵਤ੍ਥੁਪੁਰਂ ਗਨ੍ਤ੍ਵਾ ਤਤਿਯਦਿਵਸੇ ਤਂ ਪਬ੍ਬਾਜੇਸਿ. ਸਤ੍ਤਮੇ ਦਿਵਸੇ ਮਾਤਰਾ ਅਲਙ੍ਕਰਿਤ੍ਵਾ ਪੇਸਿਤਂ ‘‘ਦਾਯਜ੍ਜਂ ਮੇ, ਸਮਣ, ਦੇਹੀ’’ਤਿ ਵਤ੍ਵਾ ਅਤ੍ਤਨਾ ਸਦ੍ਧਿਂ ਆਰਾਮਾਗਤਂ ਰਾਹੁਲਕੁਮਾਰਂ ਪਬ੍ਬਾਜੇਸਿ. ਪੁਨੇਕਦਿਵਸਂ ਮਹਾਧਮ੍ਮਪਾਲਜਾਤਕਂ (ਜਾ. ੧.੧੦.੯੨ ਆਦਯੋ) ਕਥੇਤ੍ਵਾ ਰਾਜਾਨਂ ਅਨਾਗਾਮਿਫਲੇ ਪਤਿਟ੍ਠਾਪੇਸਿ.

ਇਤਿ ਭਗਵਾ ਮਹਾਪਜਾਪਤਿਂ ਸੋਤਾਪਤ੍ਤਿਫਲੇ, ਪਿਤਰਂ ਤੀਸੁ ਫਲੇਸੁ ਪਤਿਟ੍ਠਾਪੇਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਪੁਨਦੇਵ ਰਾਜਗਹਂ ਗਨ੍ਤ੍ਵਾ ਤਤੋ ਅਨਾਥਪਿਣ੍ਡਿਕੇਨ ਸਾਵਤ੍ਥਿਂ ਆਗਮਨਤ੍ਥਾਯ ਗਹਿਤਪਟਿਞ੍ਞੋ ਨਿਟ੍ਠਿਤੇ ਜੇਤਵਨਮਹਾਵਿਹਾਰੇ ਤਤ੍ਥ ਗਨ੍ਤ੍ਵਾ ਵਾਸਂ ਕਪ੍ਪੇਸਿ. ਏਵਂ ਸਤ੍ਥਰਿ ਜੇਤਵਨੇ ਵਿਹਰਨ੍ਤੇ ਆਯਸ੍ਮਾ ਨਨ੍ਦੋ ਅਤ੍ਤਨੋ ਅਨਿਚ੍ਛਾਯ ਪਬ੍ਬਜਿਤੋ ਕਾਮੇਸੁ ਅਨਾਦੀਨਵਦਸ੍ਸਾਵੀ ਜਨਪਦਕਲ੍ਯਾਣਿਯਾ ਵੁਤ੍ਤਵਚਨਮਨੁਸ੍ਸਰਨ੍ਤੋ ਉਕ੍ਕਣ੍ਠਿਤੋ ਹੁਤ੍ਵਾ ਭਿਕ੍ਖੂਨਂ ਅਤ੍ਤਨੋ ਅਨਭਿਰਤਿਂ ਆਰੋਚੇਸਿ. ਤੇਨ ਵੁਤ੍ਤਂ ‘‘ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਨਨ੍ਦੋ…ਪੇ… ਹੀਨਾਯਾਵਤ੍ਤਿਸ੍ਸਾਮੀ’’ਤਿ.

ਕਸ੍ਮਾ ਪਨ ਨਂ ਭਗਵਾ ਏਵਂ ਪਬ੍ਬਾਜੇਸੀਤਿ? ‘‘ਪੁਰੇਤਰਮੇਵ ਆਦੀਨਵਂ ਦਸ੍ਸੇਤ੍ਵਾ ਕਾਮੇਹਿ ਨਂ ਵਿਵੇਚੇਤੁਂ ਨ ਸਕ੍ਕਾ, ਪਬ੍ਬਾਜੇਤ੍ਵਾ ਪਨ ਉਪਾਯੇਨ ਤਤੋ ਵਿਵੇਚੇਤ੍ਵਾ ਉਪਰਿਵਿਸੇਸਂ ਨਿਬ੍ਬਤ੍ਤੇਸ੍ਸਾਮੀ’’ਤਿ ਵੇਨੇਯ੍ਯਦਮਨਕੁਸਲੋ ਸਤ੍ਥਾ ਏਵਂ ਨਂ ਪਠਮਂ ਪਬ੍ਬਾਜੇਸਿ.

ਸਾਕਿਯਾਨੀਤਿ ਸਕ੍ਯਰਾਜਧੀਤਾ. ਜਨਪਦਕਲ੍ਯਾਣੀਤਿ ਜਨਪਦਮ੍ਹਿ ਕਲ੍ਯਾਣੀ ਰੂਪੇਨ ਉਤ੍ਤਮਾ ਛਸਰੀਰਦੋਸਰਹਿਤਾ, ਪਞ੍ਚਕਲ੍ਯਾਣਸਮਨ੍ਨਾਗਤਾ. ਸਾ ਹਿ ਯਸ੍ਮਾ ਨਾਤਿਦੀਘਾ ਨਾਤਿਰਸ੍ਸਾ ਨਾਤਿਕਿਸਾ ਨਾਤਿਥੂਲਾ ਨਾਤਿਕਾਲ਼ਿਕਾ ਨਚ੍ਚੋਦਾਤਾ ਅਤਿਕ੍ਕਨ੍ਤਾ ਮਾਨੁਸਕਵਣ੍ਣਂ ਅਪ੍ਪਤ੍ਤਾ ਦਿਬ੍ਬਵਣ੍ਣਂ, ਤਸ੍ਮਾ ਛਸਰੀਰਦੋਸਰਹਿਤਾ. ਛਵਿਕਲ੍ਯਾਣਂ ਮਂਸਕਲ੍ਯਾਣਂ ਨਖਕਲ੍ਯਾਣਂ ਅਟ੍ਠਿਕਲ੍ਯਾਣਂ ਵਯਕਲ੍ਯਾਣਨ੍ਤਿ ਇਮੇਹਿ ਪਞ੍ਚਹਿ ਕਲ੍ਯਾਣੇਹਿ ਸਮਨ੍ਨਾਗਤਾ.

ਤਤ੍ਥ ਅਤ੍ਤਨੋ ਸਰੀਰੋਭਾਸੇਨ ਦਸਦ੍ਵਾਦਸਹਤ੍ਥੇ ਠਾਨੇ ਆਲੋਕਂ ਕਰੋਤਿ, ਪਿਯਙ੍ਗੁਸਮਾ ਵਾ ਸੁਵਣ੍ਣਸਮਾ ਵਾ ਹੋਤਿ, ਅਯਮਸ੍ਸਾ ਛਵਿਕਲ੍ਯਾਣਤਾ. ਚਤ੍ਤਾਰੋ ਪਨਸ੍ਸਾ ਹਤ੍ਥਪਾਦਾ ਮੁਖਪਰਿਯੋਸਾਨਞ੍ਚ ਲਾਖਾਰਸਪਰਿਕਮ੍ਮਕਤਂ ਵਿਯ ਰਤ੍ਤਪਵਾਲ਼ਰਤ੍ਤਕਮ੍ਬਲੇਨ ਸਦਿਸਂ ਹੋਤਿ, ਅਯਮਸ੍ਸਾ ਮਂਸਕਲ੍ਯਾਣਤਾ. ਵੀਸਤਿ ਨਖਪਤ੍ਤਾਨਿ ਮਂਸਤੋ ਅਮੁਤ੍ਤਟ੍ਠਾਨੇ ਲਾਖਾਰਸਪਰਿਕਿਤਾਨਿ ਵਿਯ ਮੁਤ੍ਤਟ੍ਠਾਨੇ ਖੀਰਧਾਰਾਸਦਿਸਾਨਿ ਹੋਨ੍ਤਿ, ਅਯਮਸ੍ਸਾ ਨਖਕਲ੍ਯਾਣਤਾ. ਦ੍ਵਤ੍ਤਿਂਸਦਨ੍ਤਾ ਸੁਫੁਸਿਤਾ ਪਰਿਸੁਦ੍ਧਪਵਾਲ਼ਪਨ੍ਤਿਸਦਿਸਾ ਵਜਿਰਪਨ੍ਤੀ ਵਿਯ ਖਾਯਨ੍ਤਿ, ਅਯਮਸ੍ਸਾ ਅਟ੍ਠਿਕਲ੍ਯਾਣਤਾ. ਵੀਸਤਿਵਸ੍ਸਸਤਿਕਾਪਿ ਸਮਾਨਾ ਸੋਲ਼ਸਵਸ੍ਸੁਦ੍ਦੇਸਿਕਾ ਵਿਯ ਹੋਤਿ ਨਿਪ੍ਪਲਿਤਾ, ਅਯਮਸ੍ਸਾ ਵਯਕਲ੍ਯਾਣਤਾ. ਸੁਨ੍ਦਰੀ ਚ ਹੋਤਿ ਏਵਰੂਪਗੁਣਸਮਨ੍ਨਾਗਤਾ, ਤੇਨ ਵੁਤ੍ਤਂ ‘‘ਜਨਪਦਕਲ੍ਯਾਣੀ’’ਤਿ.

ਘਰਾ ਨਿਕ੍ਖਮਨ੍ਤਸ੍ਸਾਤਿ ਅਨਾਦਰੇ ਸਾਮਿਵਚਨਂ, ਘਰਤੋ ਨਿਕ੍ਖਮਤੋਤਿ ਅਤ੍ਥੋ. ‘‘ਘਰਾ ਨਿਕ੍ਖਮਨ੍ਤ’’ਨ੍ਤਿਪਿ ਪਠਨ੍ਤਿ. ਉਪਡ੍ਢੁਲ੍ਲਿਖਿਤੇਹਿ ਕੇਸੇਹੀਤਿ ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ, ਵਿਪ੍ਪਕਤੁਲ੍ਲਿਖਿਤੇਹਿ ਕੇਸੇਹਿ ਉਪਲਕ੍ਖਿਤਾਤਿ ਅਤ੍ਥੋ. ‘‘ਅਡ੍ਢੁਲ੍ਲਿਖਿਤੇਹੀ’’ਤਿਪਿ ਪਠਨ੍ਤਿ. ਉਲ੍ਲਿਖਨਨ੍ਤਿ ਚ ਫਣਕਾਦੀਹਿ ਕੇਸਸਣ੍ਠਾਪਨਂ, ‘‘ਅਡ੍ਢਕਾਰਵਿਧਾਨ’’ਨ੍ਤਿਪਿ ਵਦਨ੍ਤਿ. ਅਪਲੋਕੇਤ੍ਵਾਤਿ ਸਿਨੇਹਰਸਵਿਪ੍ਫਾਰਸਂਸੂਚਕੇਨ ਅਡ੍ਢਕ੍ਖਿਨਾ ਆਬਨ੍ਧਨ੍ਤੀ ਵਿਯ ਓਲੋਕੇਤ੍ਵਾ. ਮਂ, ਭਨ੍ਤੇਤਿ ਪੁਬ੍ਬੇਪਿ ‘‘ਮ’’ਨ੍ਤਿ ਵਤ੍ਵਾ ਉਕ੍ਕਣ੍ਠਾਕੁਲਚਿਤ੍ਤਤਾਯ ਪੁਨ ‘‘ਮਂ ਏਤਦਵੋਚਾ’’ਤਿ ਆਹ. ਤੁਵਟਨ੍ਤਿ ਸੀਘਂ. ਤਮਨੁਸ੍ਸਰਮਾਨੋਤਿ ਤਂ ਤਸ੍ਸਾ ਵਚਨਂ, ਤਂ ਵਾ ਤਸ੍ਸਾ ਆਕਾਰਸਹਿਤਂ ਵਚਨਂ ਅਨੁਸ੍ਸਰਨ੍ਤੋ.

ਭਗਵਾ ਤਸ੍ਸ ਵਚਨਂ ਸੁਤ੍ਵਾ ‘‘ਉਪਾਯੇਨਸ੍ਸ ਰਾਗਂ ਵੂਪਸਮੇਸ੍ਸਾਮੀ’’ਤਿ ਇਦ੍ਧਿਬਲੇਨ ਨਂ ਤਾਵਤਿਂਸਭਵਨਂ ਨੇਨ੍ਤੋ ਅਨ੍ਤਰਾਮਗ੍ਗੇ ਏਕਸ੍ਮਿਂ ਝਾਮਖੇਤ੍ਤੇ ਝਾਮਖਾਣੁਮਤ੍ਥਕੇ ਨਿਸਿਨ੍ਨਂ ਛਿਨ੍ਨਕਣ੍ਣਨਾਸਾਨਙ੍ਗੁਟ੍ਠਂ ਏਕਂ ਪਲੁਟ੍ਠਮਕ੍ਕਟਿਂ ਦਸ੍ਸੇਤ੍ਵਾ ਤਾਵਤਿਂਸਭਵਨਂ ਨੇਸਿ. ਪਾਲ਼ਿਯਂ ਪਨ ਏਕਕ੍ਖਣੇਨੇਵ ਸਤ੍ਥਾਰਾ ਤਾਵਤਿਂਸਭਵਨਂ ਗਤਂ ਵਿਯ ਵੁਤ੍ਤਂ, ਤਂ ਗਮਨਂ ਅਵਤ੍ਵਾ ਤਾਵਤਿਂਸਭਵਨਂ ਸਨ੍ਧਾਯ ਵੁਤ੍ਤਂ. ਗਚ੍ਛਨ੍ਤੋਯੇਵ ਹਿ ਭਗਵਾ ਆਯਸ੍ਮਤੋ ਨਨ੍ਦਸ੍ਸ ਅਨ੍ਤਰਾਮਗ੍ਗੇ ਤਂ ਪਲੁਟ੍ਠਮਕ੍ਕਟਿਂ ਦਸ੍ਸੇਤਿ. ਯਦਿ ਏਵਂ ਕਥਂ ਸਮਿਞ੍ਜਨਾਦਿਨਿਦਸ੍ਸਨਂ? ਤਂ ਅਨ੍ਤਰਧਾਨਨਿਦਸ੍ਸਨਨ੍ਤਿ ਗਹੇਤਬ੍ਬਂ. ਏਵਂ ਸਤ੍ਥਾ ਤਂ ਤਾਵਤਿਂਸਭਵਨਂ ਨੇਤ੍ਵਾ ਸਕ੍ਕਸ੍ਸ ਦੇਵਰਞ੍ਞੋ ਉਪਟ੍ਠਾਨਂ ਆਗਤਾਨਿ ਕਕੁਟਪਾਦਾਨਿ ਪਞ੍ਚ ਅਚ੍ਛਰਾਸਤਾਨਿ ਅਤ੍ਤਾਨਂ ਵਨ੍ਦਿਤ੍ਵਾ ਠਿਤਾਨਿ ਦਸ੍ਸੇਤ੍ਵਾ ਜਨਪਦਕਲ੍ਯਾਣਿਯਾ ਤਾਸਂ ਪਞ੍ਚਨ੍ਨਂ ਅਚ੍ਛਰਾਸਤਾਨਂ ਰੂਪਸਮ੍ਪਤ੍ਤਿਂ ਪਟਿਚ੍ਚ ਵਿਸੇਸਂ ਪੁਚ੍ਛਿ. ਤੇਨ ਵੁਤ੍ਤਂ – ‘‘ਅਥ ਖੋ ਭਗਵਾ ਆਯਸ੍ਮਨ੍ਤਂ ਨਨ੍ਦਂ ਬਾਹਾਯਂ ਗਹੇਤ੍ਵਾ…ਪੇ… ਕਕੁਟਪਾਦਾਨੀ’’ਤਿ.

ਤਤ੍ਥ ਬਾਹਾਯਂ ਗਹੇਤ੍ਵਾਤਿ ਬਾਹੁਮ੍ਹਿ ਗਹੇਤ੍ਵਾ ਵਿਯ. ਭਗਵਾ ਹਿ ਤਦਾ ਤਾਦਿਸਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਰੇਸਿ, ਯਥਾ ਆਯਸ੍ਮਾ ਨਨ੍ਦੋ ਭੁਜੇ ਗਹੇਤ੍ਵਾ ਭਗਵਤਾ ਨੀਯਮਾਨੋ ਵਿਯ ਅਹੋਸਿ. ਤਤ੍ਥ ਚ ਭਗਵਤਾ ਸਚੇ ਤਸ੍ਸ ਆਯਸ੍ਮਤੋ ਤਾਵਤਿਂਸਦੇਵਲੋਕਸ੍ਸ ਦਸ੍ਸਨਂ ਪਵੇਸਨਮੇਵ ਵਾ ਇਚ੍ਛਿਤਂ ਸਿਯਾ, ਯਥਾਨਿਸਿਨ੍ਨਸ੍ਸੇਵ ਤਸ੍ਸ ਤਂ ਦੇਵਲੋਕਂ ਦਸ੍ਸੇਯ੍ਯ ਲੋਕਵਿਵਰਣਿਦ੍ਧਿਕਾਲੇ ਵਿਯ, ਤਮੇਵ ਵਾ ਇਦ੍ਧਿਯਾ ਤਤ੍ਥ ਪੇਸੇਯ੍ਯ. ਯਸ੍ਮਾ ਪਨਸ੍ਸ ਦਿਬ੍ਬਤ੍ਤਭਾਵਤੋ ਮਨੁਸ੍ਸਤ੍ਤਭਾਵਸ੍ਸ ਯੋ ਨਿਹੀਨਜਿਗੁਚ੍ਛਨੀਯਭਾਵੋ, ਤਸ੍ਸ ਸੁਖਗ੍ਗਹਣਤ੍ਥਂ ਅਨ੍ਤਰਾਮਗ੍ਗੇ ਤਂ ਮਕ੍ਕਟਿਂ ਦਸ੍ਸੇਤੁਕਾਮੋ, ਦੇਵਲੋਕਸਿਰਿਵਿਭਵਸਮ੍ਪਤ੍ਤਿਯੋ ਚ ਓਗਾਹੇਤ੍ਵਾ ਦਸ੍ਸੇਤੁਕਾਮੋ ਅਹੋਸਿ, ਤਸ੍ਮਾ ਤਂ ਗਹੇਤ੍ਵਾ ਤਤ੍ਥ ਨੇਸਿ. ਏਵਞ੍ਹਿਸ੍ਸ ਤਦਤ੍ਥਂ ਬ੍ਰਹ੍ਮਚਰਿਯਵਾਸੇ ਵਿਸੇਸਤੋ ਅਭਿਰਤਿ ਭਵਿਸ੍ਸਤੀਤਿ.

ਕਕੁਟਪਾਦਾਨੀਤਿ ਰਤ੍ਤਵਣ੍ਣਤਾਯ ਪਾਰਾਵਤਸਦਿਸਪਾਦਾਨਿ. ਤਾ ਕਿਰ ਸਬ੍ਬਾਪਿ ਕਸ੍ਸਪਸ੍ਸ ਭਗਵਤੋ ਸਾਵਕਾਨਂ ਪਾਦਮਕ੍ਖਨਤੇਲਦਾਨੇਨ ਤਾਦਿਸਾ ਸੁਕੁਮਾਰਪਾਦਾ ਅਹੇਸੁਂ. ਪਸ੍ਸਸਿ ਨੋਤਿ ਪਸ੍ਸਸਿ ਨੁ. ਅਭਿਰੂਪਤਰਾਤਿ ਵਿਸਿਟ੍ਠਰੂਪਤਰਾ. ਦਸ੍ਸਨੀਯਤਰਾਤਿ ਦਿਵਸਮ੍ਪਿ ਪਸ੍ਸਨ੍ਤਾਨਂ ਅਤਿਤ੍ਤਿਕਰਣਟ੍ਠੇਨ ਪਸ੍ਸਿਤਬ੍ਬਤਰਾ. ਪਾਸਾਦਿਕਤਰਾਤਿ ਸਬ੍ਬਾਵਯਵਸੋਭਾਯ ਸਮਨ੍ਤਤੋ ਪਸਾਦਾਵਹਤਰਾ.

ਕਸ੍ਮਾ ਪਨ ਭਗਵਾ ਅਵਸ੍ਸੁਤਚਿਤ੍ਤਂ ਆਯਸ੍ਮਨ੍ਤਂ ਨਨ੍ਦਂ ਅਚ੍ਛਰਾਯੋ ਓਲੋਕਾਪੇਸਿ? ਸੁਖੇਨੇਵਸ੍ਸ ਕਿਲੇਸੇ ਨੀਹਰਿਤੁਂ. ਯਥਾ ਹਿ ਕੁਸਲੋ ਵੇਜ੍ਜੋ ਉਸ੍ਸਨ੍ਨਦੋਸਂ ਪੁਗ੍ਗਲਂ ਤਿਕਿਚ੍ਛਨ੍ਤੋ ਸਿਨੇਹਪਾਨਾਦਿਨਾ ਪਠਮਂ ਦੋਸੇ ਉਕ੍ਕਿਲੇਦੇਤ੍ਵਾ ਪਚ੍ਛਾ ਵਮਨਵਿਰੇਚਨੇਹਿ ਸਮ੍ਮਦੇਵ ਨੀਹਰਾਪੇਤਿ, ਏਵਂ ਵਿਨੇਯ੍ਯਦਮਨਕੁਸਲੋ ਭਗਵਾ ਉਸ੍ਸਨ੍ਨਰਾਗਂ ਆਯਸ੍ਮਨ੍ਤਂ ਨਨ੍ਦਂ ਦੇਵਚ੍ਛਰਾਯੋ ਦਸ੍ਸੇਤ੍ਵਾ ਉਕ੍ਕਿਲੇਦੇਸਿ ਅਰਿਯਮਗ੍ਗਭੇਸਜ੍ਜੇਨ ਅਨਵਸੇਸਤੋ ਨੀਹਰਿਤੁਕਾਮੋਤਿ ਵੇਦਿਤਬ੍ਬਂ.

ਪਲੁਟ੍ਠਮਕ੍ਕਟੀਤਿ ਝਾਮਙ੍ਗਪਚ੍ਚਙ੍ਗਮਕ੍ਕਟੀ. ਏਵਮੇਵ ਖੋਤਿ ਯਥਾ ਸਾ, ਭਨ੍ਤੇ, ਤੁਮ੍ਹੇਹਿ ਮਯ੍ਹਂ ਦਸ੍ਸਿਤਾ ਛਿਨ੍ਨਕਣ੍ਣਨਾਸਾ ਪਲੁਟ੍ਠਮਕ੍ਕਟੀ ਜਨਪਦਕਲ੍ਯਾਣਿਂ ਉਪਾਦਾਯ, ਏਵਮੇਵ ਜਨਪਦਕਲ੍ਯਾਣੀ ਇਮਾਨਿ ਪਞ੍ਚ ਅਚ੍ਛਰਾਸਤਾਨਿ ਉਪਾਦਾਯਾਤਿ ਅਤ੍ਥੋ. ਪਞ੍ਚਨ੍ਨਂ ਅਚ੍ਛਰਾਸਤਾਨਨ੍ਤਿ ਉਪਯੋਗੇ ਸਾਮਿਵਚਨਂ, ਪਞ੍ਚ ਅਚ੍ਛਰਾਸਤਾਨੀਤਿ ਅਤ੍ਥੋ. ਅਵਯਵਸਮ੍ਬਨ੍ਧੇ ਵਾ ਏਤਂ ਸਾਮਿਵਚਨਂ, ਤੇਨ ਪਞ੍ਚਨ੍ਨਂ ਅਚ੍ਛਰਾਸਤਾਨਂ ਰੂਪਸਮ੍ਪਤ੍ਤਿਂ ਉਪਨਿਧਾਯਾਤਿ ਅਧਿਪ੍ਪਾਯੋ. ਉਪਨਿਧਾਯਾਤਿ ਚ ਸਮੀਪੇ ਠਪੇਤ੍ਵਾ, ਉਪਾਦਾਯਾਤਿ ਅਤ੍ਥੋ. ਸਙ੍ਖ੍ਯਨ੍ਤਿ ਇਤ੍ਥੀਤਿ ਗਣਨਂ. ਕਲਭਾਗਨ੍ਤਿ ਕਲਾਯਪਿ ਭਾਗਂ, ਏਕਂ ਸੋਲ਼ਸਕੋਟ੍ਠਾਸੇ ਕਤ੍ਵਾ ਤਤੋ ਏਕਕੋਟ੍ਠਾਸਂ ਗਹੇਤ੍ਵਾ ਸੋਲ਼ਸਧਾ ਗਣਿਤੇ ਤਤ੍ਥ ਯੋ ਏਕੇਕੋ ਕੋਟ੍ਠਾਸੋ, ਸੋ ਕਲਭਾਗੋਤਿ ਅਧਿਪ੍ਪੇਤੋ, ਤਮ੍ਪਿ ਕਲਭਾਗਂ ਨ ਉਪੇਤੀਤਿ ਵਦਤਿ. ਉਪਨਿਧਿਨ੍ਤਿ ‘‘ਇਮਾਯ ਅਯਂ ਸਦਿਸੀ’’ਤਿ ਉਪਮਾਭਾਵੇਨ ਗਹੇਤ੍ਵਾ ਸਮੀਪੇ ਠਪਨਮ੍ਪਿ.

ਯਤ੍ਥਾਯਂ ਅਨਭਿਰਤੋ, ਤਂ ਬ੍ਰਹ੍ਮਚਰਿਯਂ ਪੁਬ੍ਬੇ ਵੁਤ੍ਤਂ ਪਾਕਟਞ੍ਚਾਤਿ ਤਂ ਅਨਾਮਸਿਤ੍ਵਾ ਤਤ੍ਥ ਅਭਿਰਤਿਯਂ ਆਦਰਜਨਨਤ੍ਥਂ ਅਭਿਰਮ, ਨਨ੍ਦ, ਅਭਿਰਮ, ਨਨ੍ਦਾ’’ਤਿ ਆਮੇਡਿਤਵਸੇਨ ਵੁਤ੍ਤਂ. ਅਹਂ ਤੇ ਪਾਟਿਭੋਗੋਤਿ ਕਸ੍ਮਾ ਭਗਵਾ ਤਸ੍ਸ ਬ੍ਰਹ੍ਮਚਰਿਯਵਾਸਂ ਇਚ੍ਛਨ੍ਤੋ ਅਬ੍ਰਹ੍ਮਚਰਿਯਵਾਸਸ੍ਸ ਪਾਟਿਭੋਗਂ ਉਪਗਞ੍ਛਿ? ਯਤ੍ਥਸ੍ਸ ਆਰਮ੍ਮਣੇ ਰਾਗੋ ਦਲ਼੍ਹਂ ਨਿਪਤਿ, ਤਂ ਆਗਨ੍ਤੁਕਾਰਮ੍ਮਣੇ ਸਙ੍ਕਾਮੇਤ੍ਵਾ ਸੁਖੇਨ ਸਕ੍ਕਾ ਜਹਾਪੇਤੁਨ੍ਤਿ ਪਾਟਿਭੋਗਂ ਉਪਗਞ੍ਛਿ. ਅਨੁਪੁਬ੍ਬਿਕਥਾਯਂ ਸਗ੍ਗਕਥਾ ਇਮਸ੍ਸ ਅਤ੍ਥਸ੍ਸ ਨਿਦਸ੍ਸਨਂ.

ਅਸ੍ਸੋਸੁਨ੍ਤਿ ਕਥਮਸ੍ਸੋਸੁਂ? ਭਗਵਾ ਹਿ ਤਦਾ ਆਯਸ੍ਮਨ੍ਤੇ ਨਨ੍ਦੇ ਵਤ੍ਤਂ ਦਸ੍ਸੇਤ੍ਵਾ ਅਤ੍ਤਨੋ ਦਿਵਾਟ੍ਠਾਨਂ ਗਤੇ ਉਪਟ੍ਠਾਨਂ ਆਗਤਾਨਂ ਭਿਕ੍ਖੂਨਂ ਤਂ ਪਵਤ੍ਤਿਂ ਕਥੇਤ੍ਵਾ ਯਥਾ ਨਾਮ ਕੁਸਲੋ ਪੁਰਿਸੋ ਅਨਿਕ੍ਖਨ੍ਤਂ ਆਣਿਂ ਅਞ੍ਞਾਯ ਆਣਿਯਾ ਨੀਹਰਿਤ੍ਵਾ ਪੁਨ ਤਂ ਹਤ੍ਥਾਦੀਹਿ ਸਞ੍ਚਾਲੇਤ੍ਵਾ ਅਪਨੇਤਿ, ਏਵਮੇਵ ਆਚਿਣ੍ਣਵਿਸਯੇ ਤਸ੍ਸ ਰਾਗਂ ਆਗਨ੍ਤੁਕਵਿਸਯੇਨ ਨੀਹਰਿਤ੍ਵਾ ਪੁਨ ਤਦਪਿ ਬ੍ਰਹ੍ਮਚਰਿਯਮਗ੍ਗਹੇਤੁਂ ਕਤ੍ਵਾ ਅਪਨੇਤੁਕਾਮੋ ‘‘ਏਥ ਤੁਮ੍ਹੇ, ਭਿਕ੍ਖਵੇ, ਨਨ੍ਦਂ ਭਿਕ੍ਖੁਂ ਭਤਕਵਾਦੇਨ ਚ ਉਪਕ੍ਕਿਤਕਵਾਦੇਨ ਚ ਸਮੁਦਾਚਰਥਾ’’ਤਿ ਆਣਾਪੇਸਿ, ਏਵਂ ਭਿਕ੍ਖੂ ਅਸ੍ਸੋਸੁਂ. ਕੇਚਿ ਪਨ ‘‘ਭਗਵਾ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਰੇਸਿ, ਯਥਾ ਤੇ ਭਿਕ੍ਖੂ ਤਮਤ੍ਥਂ ਜਾਨਿਂਸੂ’’ਤਿ ਵਦਨ੍ਤਿ.

ਭਤਕਵਾਦੇਨਾਤਿ ਭਤਕੋਤਿ ਵਾਦੇਨ. ਯੋ ਹਿ ਭਤਿਯਾ ਕਮ੍ਮਂ ਕਰੋਤਿ, ਸੋ ਭਤਕੋਤਿ ਵੁਚ੍ਚਤਿ, ਅਯਮ੍ਪਿ ਆਯਸ੍ਮਾ ਅਚ੍ਛਰਾਸਮ੍ਭੋਗਨਿਮਿਤ੍ਤਂ ਬ੍ਰਹ੍ਮਚਰਿਯਂ ਚਰਨ੍ਤੋ ਭਤਕੋ ਵਿਯ ਹੋਤੀਤਿ ਵੁਤ੍ਤਂ ‘‘ਭਤਕਵਾਦੇਨਾ’’ਤਿ. ਉਪਕ੍ਕਿਤਕਵਾਦੇਨਾਤਿ ਯੋ ਕਹਾਪਣਾਦੀਹਿ ਕਿਞ੍ਚਿ ਕਿਣਾਤਿ, ਸੋ ਉਪਕ੍ਕਿਤਕੋਤਿ ਵੁਚ੍ਚਤਿ, ਅਯਮ੍ਪਿ ਆਯਸ੍ਮਾ ਅਚ੍ਛਰਾਨਂ ਹੇਤੁ ਅਤ੍ਤਨੋ ਬ੍ਰਹ੍ਮਚਰਿਯਂ ਕਿਣਾਤਿ, ਤਸ੍ਮਾ ‘‘ਉਪਕ੍ਕਿਤਕੋ’’ਤਿ ਏਵਂ ਵਚਨੇਨ. ਅਥ ਵਾ ਭਗਵਤੋ ਆਣਾਯ ਅਚ੍ਛਰਾਸਮ੍ਭੋਗਸਙ੍ਖਾਤਾਯ ਭਤਿਯਾ ਬ੍ਰਹ੍ਮਚਰਿਯਵਾਸਸਙ੍ਖਾਤਂ ਜੀਵਿਤਂ ਪਵਤ੍ਤੇਨ੍ਤੋ ਤਾਯ ਭਤਿਯਾ ਯਾਪਨੇ ਭਗਵਤਾ ਭਰਿਯਮਾਨੋ ਵਿਯ ਹੋਤੀਤਿ ‘‘ਭਤਕੋ’’ਤਿ ਵੁਤ੍ਤੋ, ਤਥਾ ਅਚ੍ਛਰਾਸਮ੍ਭੋਗਸਙ੍ਖਾਤਂ ਵਿਕ੍ਕਯਂ ਆਦਾਤਬ੍ਬਂ ਕਤ੍ਵਾ ਭਗਵਤੋ ਆਣਤ੍ਤਿਯਂ ਤਿਟ੍ਠਨ੍ਤੋ ਤੇਨ ਵਿਕ੍ਕਯੇਨ ਭਗਵਤਾ ਉਪਕ੍ਕਿਤੋ ਵਿਯ ਹੋਤੀਤਿ ਵੁਤ੍ਤਂ ‘‘ਉਪਕ੍ਕਿਤਕੋ’’ਤਿ.

ਅਟ੍ਟੀਯਮਾਨੋਤਿ ਪੀਲ਼ਿਯਮਾਨੋ ਦੁਕ੍ਖਾਪਿਯਮਾਨੋ. ਹਰਾਯਮਾਨੋਤਿ ਲਜ੍ਜਮਾਨੋ. ਜਿਗੁਚ੍ਛਮਾਨੋਤਿ ਪਾਟਿਕੁਲ੍ਯਤੋ ਦਹਨ੍ਤੋ. ਏਕੋਤਿ ਅਸਹਾਯੋ. ਵੂਪਕਟ੍ਠੋਤਿ ਵਤ੍ਥੁਕਾਮੇਹਿ ਕਿਲੇਸਕਾਮੇਹਿ ਚ ਕਾਯੇਨ ਚੇਵ ਚਿਤ੍ਤੇਨ ਚ ਵੂਪਕਟ੍ਠੋ. ਅਪ੍ਪਮਤ੍ਤੋਤਿ ਕਮ੍ਮਟ੍ਠਾਨੇ ਸਤਿਂ ਅਵਿਜਹਨ੍ਤੋ. ਆਤਾਪੀਤਿ ਕਾਯਿਕਚੇਤਸਿਕਵੀਰਿਯਾਤਾਪੇਨ ਆਤਾਪਵਾ, ਆਤਾਪੇਤਿ ਕਿਲੇਸੇਤਿ ਆਤਾਪੋ, ਵੀਰਿਯਂ. ਪਹਿਤਤ੍ਤੋਤਿ ਕਾਯੇ ਚ ਜੀਵਿਤੇ ਚ ਅਨਪੇਕ੍ਖਤਾਯ ਪੇਸਿਤਤ੍ਤੋ ਵਿਸ੍ਸਟ੍ਠਅਤ੍ਤਭਾਵੋ, ਨਿਬ੍ਬਾਨੇ ਵਾ ਪੇਸਿਤਚਿਤ੍ਤੋ. ਨ ਚਿਰਸ੍ਸੇਵਾਤਿ ਕਮ੍ਮਟ੍ਠਾਨਾਰਮ੍ਭਤੋ ਨ ਚਿਰੇਨੇਵ. ਯਸ੍ਸਤ੍ਥਾਯਾਤਿ ਯਸ੍ਸ ਅਤ੍ਥਾਯ. ਕੁਲਪੁਤ੍ਤਾਤਿ ਦੁਵਿਧਾ ਕੁਲਪੁਤ੍ਤਾ ਜਾਤਿਕੁਲਪੁਤ੍ਤਾ ਚ ਆਚਾਰਕੁਲਪੁਤ੍ਤਾ ਚ, ਅਯਂ ਪਨ ਉਭਯਥਾਪਿ ਕੁਲਪੁਤ੍ਤੋ. ਸਮ੍ਮਦੇਵਾਤਿ ਹੇਤੁਨਾ ਚ ਕਾਰਣੇਨ ਚ. ਅਗਾਰਸ੍ਮਾਤਿ ਘਰਤੋ. ਅਨਗਾਰਿਯਨ੍ਤਿ ਪਬ੍ਬਜ੍ਜਂ. ਕਸਿਵਣਿਜ੍ਜਾਦਿਕਮ੍ਮਞ੍ਹਿ ਅਗਾਰਸ੍ਸ ਹਿਤਨ੍ਤਿ ਅਗਾਰਿਯਂ ਨਾਮ, ਤਂ ਏਤ੍ਥ ਨਤ੍ਥੀਤਿ ਪਬ੍ਬਜ੍ਜਾ ਅਨਗਾਰਿਯਾਤਿ ਵੁਚ੍ਚਤਿ. ਪਬ੍ਬਜਨ੍ਤੀਤਿ ਉਪਗਚ੍ਛਨ੍ਤਿ. ਤਦਨੁਤ੍ਤਰਨ੍ਤਿ ਤਂ ਅਨੁਤ੍ਤਰਂ. ਬ੍ਰਹ੍ਮਚਰਿਯਪਰਿਯੋਸਾਨਨ੍ਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਪਰਿਯੋਸਾਨਭੂਤਂ ਅਰਹਤ੍ਤਫਲਂ. ਤਸ੍ਸ ਹਿ ਅਤ੍ਥਾਯ ਕੁਲਪੁਤ੍ਤਾ ਇਧ ਪਬ੍ਬਜਨ੍ਤਿ. ਦਿਟ੍ਠੇਵ ਧਮ੍ਮੇਤਿ ਤਸ੍ਮਿਂਯੇਵ ਅਤ੍ਤਭਾਵੇ. ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾਤਿ ਅਤ੍ਤਨਾਯੇਵ ਪਞ੍ਞਾਯ ਪਚ੍ਚਕ੍ਖਂ ਕਤ੍ਵਾ, ਅਪਰਪ੍ਪਚ੍ਚਯੇਨ ਞਤ੍ਵਾਤਿ ਅਤ੍ਥੋ. ਉਪਸਮ੍ਪਜ੍ਜ ਵਿਹਾਸੀਤਿ ਪਾਪੁਣਿਤ੍ਵਾ ਸਮ੍ਪਾਦੇਤ੍ਵਾ ਵਾ ਵਿਹਾਸਿ. ਏਵਂ ਵਿਹਰਨ੍ਤੋਵ ਖੀਣਾ ਜਾਤਿ…ਪੇ… ਅਬ੍ਭਞ੍ਞਾਸੀਤਿ. ਇਮਿਨਾ ਅਸ੍ਸ ਪਚ੍ਚਵੇਕ੍ਖਣਭੂਮਿ ਦਸ੍ਸਿਤਾ.

ਤਤ੍ਥ ਖੀਣਾ ਜਾਤੀਤਿ ਨ ਤਾਵਸ੍ਸ ਅਤੀਤਾ ਜਾਤਿ ਖੀਣਾ ਪੁਬ੍ਬੇਵ ਖੀਣਤ੍ਤਾ, ਨ ਅਨਾਗਤਾ ਅਨਾਗਤਤ੍ਤਾ ਏਵ, ਨ ਪਚ੍ਚੁਪ੍ਪਨ੍ਨਾ ਵਿਜ੍ਜਮਾਨਤ੍ਤਾ. ਮਗ੍ਗਸ੍ਸ ਪਨ ਅਭਾਵਿਤਤ੍ਤਾ ਯਾ ਏਕਚਤੁਪਞ੍ਚਵੋਕਾਰਭਵੇਸੁ ਏਕਚਤੁਪਞ੍ਚਕ੍ਖਨ੍ਧਪ੍ਪਭੇਦਾ ਜਾਤਿ ਉਪ੍ਪਜ੍ਜੇਯ੍ਯ, ਸਾ ਮਗ੍ਗਸ੍ਸ ਭਾਵਿਤਤ੍ਤਾ ਅਨੁਪ੍ਪਾਦਧਮ੍ਮਤਂ ਆਪਜ੍ਜਨੇਨ ਖੀਣਾ. ਤਂ ਸੋ ਮਗ੍ਗਭਾਵਨਾਯ ਪਹੀਨਕਿਲੇਸੇ ਪਚ੍ਚਵੇਕ੍ਖਿਤ੍ਵਾ ਕਿਲੇਸਾਭਾਵੇਨ ਵਿਜ੍ਜਮਾਨਮ੍ਪਿ ਕਮ੍ਮਂ ਆਯਤਿਂ ਅਪ੍ਪਟਿਸਨ੍ਧਿਕਂ ਹੋਤੀਤਿ ਜਾਨਨੇਨ ਅਬ੍ਭਞ੍ਞਾਸਿ. ਵੁਸਿਤਨ੍ਤਿ ਵੁਤ੍ਥਂ ਪਰਿਵੁਤ੍ਥਂ ਕਤਂ ਚਰਿਤਂ, ਨਿਟ੍ਠਾਪਿਤਨ੍ਤਿ ਅਤ੍ਥੋ. ਬ੍ਰਹ੍ਮਚਰਿਯਨ੍ਤਿ ਮਗ੍ਗਬ੍ਰਹ੍ਮਚਰਿਯਂ. ਪੁਥੁਜ੍ਜਨਕਲ੍ਯਾਣਕੇਨ ਹਿ ਸਦ੍ਧਿਂ ਸਤ੍ਤ ਸੇਕ੍ਖਾ ਬ੍ਰਹ੍ਮਚਰਿਯਵਾਸਂ ਵਸਨ੍ਤਿ ਨਾਮ, ਖੀਣਾਸਵੋ ਵੁਤ੍ਥਵਾਸੋ, ਤਸ੍ਮਾ ਸੋ ਅਤ੍ਤਨੋ ਬ੍ਰਹ੍ਮਚਰਿਯਵਾਸਂ ਪਚ੍ਚਵੇਕ੍ਖਨ੍ਤੋ ‘‘ਵੁਸਿਤਂ ਬ੍ਰਹ੍ਮਚਰਿਯ’’ਨ੍ਤਿ ਅਬ੍ਭਞ੍ਞਾਸਿ. ਕਤਂ ਕਰਣੀਯਨ੍ਤਿ ਚਤੂਸੁ ਸਚ੍ਚੇਸੁ ਚਤੂਹਿ ਮਗ੍ਗੇਹਿ ਪਰਿਞ੍ਞਾਪਹਾਨਸਚ੍ਛਿਕਿਰਿਯਾਭਾਵਨਾਵਸੇਨ ਸੋਲ਼ਸਵਿਧਮ੍ਪਿ ਕਿਚ੍ਚਂ ਨਿਟ੍ਠਾਪਿਤਂ. ਪੁਥੁਜ੍ਜਨਕਲ੍ਯਾਣਕਾਦਯੋ ਹਿ ਤਂ ਕਿਚ੍ਚਂ ਕਰੋਨ੍ਤਿ ਨਾਮ, ਖੀਣਾਸਵੋ ਕਤਕਰਣੀਯੋ, ਤਸ੍ਮਾ ਸੋ ਅਤ੍ਤਨੋ ਕਰਣੀਯਂ ਪਚ੍ਚਵੇਕ੍ਖਨ੍ਤੋ ‘‘ਕਤਂ ਕਰਣੀਯ’’ਨ੍ਤਿ ਅਬ੍ਭਞ੍ਞਾਸਿ. ਨਾਪਰਂ ਇਤ੍ਥਤ੍ਤਾਯਾਤਿ ‘‘ਇਦਾਨਿ ਪੁਨ ਇਤ੍ਥਭਾਵਾਯ ਏਵਂ ਸੋਲ਼ਸਕਿਚ੍ਚਭਾਵਾਯ ਕਿਲੇਸਕ੍ਖਯਾਯ ਵਾ ਮਗ੍ਗਭਾਵਨਾਯ ਕਿਚ੍ਚਂ ਮੇ ਨਤ੍ਥੀ’’ਤਿ ਅਬ੍ਭਞ੍ਞਾਸਿ. ਨਾਪਰਂ ਇਤ੍ਥਤ੍ਤਾਯਾਤਿ ਵਾ ‘‘ਇਤ੍ਥਭਾਵਤੋ ਇਮਸ੍ਮਾ ਏਵਂਪਕਾਰਾ ਵਤ੍ਤਮਾਨਕ੍ਖਨ੍ਧਸਨ੍ਤਾਨਾ ਅਪਰਂ ਖਨ੍ਧਸਨ੍ਤਾਨਂ ਮਯ੍ਹਂ ਨਤ੍ਥਿ, ਇਮੇ ਪਨ ਪਞ੍ਚਕ੍ਖਨ੍ਧਾ ਪਰਿਞ੍ਞਾਤਾ ਤਿਟ੍ਠਨ੍ਤਿ ਛਿਨ੍ਨਮੂਲਕਾ ਵਿਯ ਰੁਕ੍ਖਾ, ਤੇ ਚਰਿਮਕਚਿਤ੍ਤਨਿਰੋਧੇਨ ਅਨੁਪਾਦਾਨੋ ਵਿਯ ਜਾਤਵੇਦੋ ਨਿਬ੍ਬਾਯਿਸ੍ਸਨ੍ਤਿ, ਅਪਣ੍ਣਤ੍ਤਿਕਭਾਵਂ ਗਮਿਸ੍ਸਨ੍ਤੀ’’ਤਿ ਅਬ੍ਭਞ੍ਞਾਸਿ. ਅਞ੍ਞਤਰੋਤਿ ਏਕੋ. ਅਰਹਤਨ੍ਤਿ ਭਗਵਤੋ ਸਾਵਕਾਨਂ ਅਰਹਨ੍ਤਾਨਂ ਅਬ੍ਭਨ੍ਤਰੋ ਏਕੋ ਮਹਾਸਾਵਕੋ ਅਹੋਸੀਤਿ ਅਤ੍ਥੋ.

ਅਞ੍ਞਤਰਾ ਦੇਵਤਾਤਿ ਅਧਿਗਤਮਗ੍ਗਾ ਏਕਾ ਬ੍ਰਹ੍ਮਦੇਵਤਾ. ਸਾ ਹਿ ਸਯਂ ਅਸੇਕ੍ਖਤ੍ਤਾ ਅਸੇਕ੍ਖਵਿਸਯਂ ਅਬ੍ਭਞ੍ਞਾਸਿ. ਸੇਕ੍ਖਾ ਹਿ ਤਂ ਤਂ ਸੇਕ੍ਖਵਿਸਯਂ, ਪੁਥੁਜ੍ਜਨਾ ਚ ਅਤ੍ਤਨੋ ਪੁਥੁਜ੍ਜਨਵਿਸਯਮੇਵ ਜਾਨਨ੍ਤਿ. ਅਭਿਕ੍ਕਨ੍ਤਾਯ ਰਤ੍ਤਿਯਾਤਿ ਪਰਿਕ੍ਖੀਣਾਯ ਰਤ੍ਤਿਯਾ, ਮਜ੍ਝਿਮਯਾਮੇਤਿ ਅਤ੍ਥੋ. ਅਭਿਕ੍ਕਨ੍ਤਵਣ੍ਣਾਤਿ ਅਤਿਉਤ੍ਤਮਵਣ੍ਣਾ. ਕੇਵਲਕਪ੍ਪਨ੍ਤਿ ਅਨਵਸੇਸੇਨ ਸਮਨ੍ਤਤੋ. ਓਭਾਸੇਤ੍ਵਾਤਿ ਅਤ੍ਤਨੋ ਪਭਾਯ ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਜੇਤਵਨਂ ਏਕੋਭਾਸਂ ਕਤ੍ਵਾ. ਤੇਨੁਪਸਙ੍ਕਮੀਤਿ ਆਯਸ੍ਮਤੋ ਨਨ੍ਦਸ੍ਸ ਅਰਹਤ੍ਤਪ੍ਪਤ੍ਤਿਂ ਵਿਦਿਤ੍ਵਾ ਪੀਤਿਸੋਮਨਸ੍ਸਜਾਤਾ ‘‘ਤਂ ਭਗਵਤੋ ਪਟਿਵੇਦੇਸ੍ਸਾਮੀ’’ਤਿ ਉਪਸਙ੍ਕਮਿ.

ਆਸਵਾਨਂ ਖਯਾਤਿ ਏਤ੍ਥ ਆਸਵਨ੍ਤੀਤਿ ਆਸਵਾ, ਚਕ੍ਖੁਦ੍ਵਾਰਾਦੀਹਿ ਪਵਤ੍ਤਨ੍ਤੀਤਿ ਅਤ੍ਥੋ. ਅਥ ਵਾ ਆਗੋਤ੍ਰਭੁਂ ਆਭਵਗ੍ਗਂ ਵਾ ਸਵਨ੍ਤੀਤਿ ਆਸਵਾ, ਏਤੇ ਧਮ੍ਮੇ ਏਤਞ੍ਚ ਓਕਾਸਂ ਅਨ੍ਤੋ ਕਰਿਤ੍ਵਾ ਪਵਤ੍ਤਨ੍ਤੀਤਿ ਅਤ੍ਥੋ. ਚਿਰਪਾਰਿਵਾਸਿਯਟ੍ਠੇਨ ਮਦਿਰਾਦਿਆਸਵਾ ਵਿਯਾਤਿ ਆਸਵਾ. ‘‘ਪੁਰਿਮਾ, ਭਿਕ੍ਖਵੇ, ਕੋਟਿ ਨ ਪਞ੍ਞਾਯਤਿ ਅਵਿਜ੍ਜਾਯਾ’’ਤਿਆਦਿਵਚਨੇਹਿ (ਅ. ਨਿ. ੧੦.੬੧) ਨੇਸਂ ਚਿਰਪਾਰਿਵਾਸਿਯਤਾ ਵੇਦਿਤਬ੍ਬਾ. ਅਥ ਵਾ ਆਯਤਂ ਸਂਸਾਰਦੁਕ੍ਖਂ ਸਵਨ੍ਤਿ ਪਸਵਨ੍ਤੀਤਿਪਿ, ਆਸਵਾ. ਪੁਰਿਮੋ ਚੇਤ੍ਥ ਅਤ੍ਥੋ ਕਿਲੇਸੇਸੁ ਯੁਜ੍ਜਤਿ, ਪਚ੍ਛਿਮੋ ਕਮ੍ਮੇਪਿ. ਨ ਕੇਵਲਞ੍ਚ ਕਮ੍ਮਕਿਲੇਸਾ ਏਵ ਆਸਵਾ, ਅਥ ਖੋ ਨਾਨਪ੍ਪਕਾਰਾ ਉਪਦ੍ਦਵਾਪਿ. ਤਥਾ ਹਿ ‘‘ਨਾਹਂ, ਚੁਨ੍ਦ, ਦਿਟ੍ਠਧਮ੍ਮਿਕਾਨਂਯੇਵ ਆਸਵਾਨਂ ਸਂਵਰਾਯ ਧਮ੍ਮਂ ਦੇਸੇਮੀ’’ਤਿ ਏਤ੍ਥ (ਦੀ. ਨਿ. ੩.੧੮੨) ਵਿਵਾਦਮੂਲਭੂਤਾ ਕਿਲੇਸਾ ਆਸਵਾਤਿ ਆਗਤਾ.

‘‘ਯੇਨ ਦੇਵੂਪਪਤ੍ਯਸ੍ਸ, ਗਨ੍ਧਬ੍ਬੋ ਵਾ ਵਿਹਙ੍ਗਮੋ;

ਯਕ੍ਖਤ੍ਤਂ ਯੇਨ ਗਚ੍ਛੇਯ੍ਯ, ਮਨੁਸ੍ਸਤ੍ਤਞ੍ਚ ਅਬ੍ਬਜੇ;

ਤੇ ਮਯ੍ਹਂ ਆਸਵਾ ਖੀਣਾ, ਵਿਦ੍ਧਸ੍ਤਾ ਵਿਨਲੀਕਤਾ’’ਤਿ. (ਅ. ਨਿ. ੪.੩੬) –

ਏਤ੍ਥ ਤੇਭੂਮਿਕਂ ਕਮ੍ਮਂ ਅਵਸੇਸਾ ਚ ਅਕੁਸਲਾ ਧਮ੍ਮਾ ਆਸਵਾਤਿ ਆਗਤਾ. ‘‘ਦਿਟ੍ਠਧਮ੍ਮਿਕਾਨਂ ਆਸਵਾਨਂ ਸਂਵਰਾਯ, ਸਮ੍ਪਰਾਯਿਕਾਨਂ ਆਸਵਾਨਂ ਪਟਿਘਾਤਾਯਾ’’ਤਿ (ਪਾਰਾ. ੩੯) ਪਰੂਪਘਾਤਵਿਪ੍ਪਟਿਸਾਰਵਧਬਨ੍ਧਾਦਯੋ ਚੇਵ ਅਪਾਯਦੁਕ੍ਖਭੂਤਾ ਚ ਨਾਨਪ੍ਪਕਾਰਾ ਉਪਦ੍ਦਵਾ.

ਤੇ ਪਨੇਤੇ ਆਸਵਾ ਵਿਨਯੇ – ‘‘ਦਿਟ੍ਠਧਮ੍ਮਿਕਾਨਂ ਆਸਵਾਨਂ ਸਂਵਰਾਯ ਸਮ੍ਪਰਾਯਿਕਾਨਂ ਆਸਵਾਨਂ ਪਟਿਘਾਤਾਯਾ’’ਤਿ (ਪਾਰਾ. ੩੯) ਦ੍ਵਿਧਾ ਆਗਤਾ. ਸਲ਼ਾਯਤਨੇ ‘‘ਤਯੋਮੇ, ਆਵੁਸੋ, ਆਸਵਾ – ਕਾਮਾਸਵੋ, ਭਵਾਸਵੋ, ਅਵਿਜ੍ਜਾਸਵੋ’’ਤਿ (ਦੀ. ਨਿ. ੩.੩੦੫) ਤਿਧਾ ਆਗਤਾ, ਤਥਾ ਅਞ੍ਞੇਸੁ ਚ ਸੁਤ੍ਤਨ੍ਤੇਸੁ. ਅਭਿਧਮ੍ਮੇ ਤੇਯੇਵ ਦਿਟ੍ਠਾਸਵੇਨ ਸਦ੍ਧਿਂ ਚਤੁਧਾ ਆਗਤਾ. ਨਿਬ੍ਬੇਧਿਕਪਰਿਯਾਯੇ ‘‘ਅਤ੍ਥਿ, ਭਿਕ੍ਖਵੇ, ਆਸਵਾ ਨਿਰਯਗਾਮਿਨਿਯਾ’’ਤਿਆਦਿਨਾ (ਅ. ਨਿ. ੬.੬੩) ਪਞ੍ਚਧਾ ਆਗਤਾ. ਛਕ੍ਕਨਿਪਾਤੇ ‘‘ਅਤ੍ਥਿ, ਭਿਕ੍ਖਵੇ, ਆਸਵਾ ਸਂਵਰਾਯ ਪਹਾਤਬ੍ਬਾ’’ਤਿਆਦਿਨਾ (ਅ. ਨਿ. ੬.੫੮) ਨਯੇਨ ਛਧਾ ਆਗਤਾ. ਸਬ੍ਬਾਸਵਪਰਿਯਾਯੇ (ਮ. ਨਿ. ੧.੨੨) ਤੇਯੇਵ ਦਸ੍ਸਨਪਹਾਤਬ੍ਬੇਹਿ ਸਦ੍ਧਿਂ ਸਤ੍ਤਧਾ ਆਗਤਾ. ਇਧ ਪਨ ਅਭਿਧਮ੍ਮਨਯੇਨ ਚਤ੍ਤਾਰੋ ਆਸਵਾ ਵੇਦਿਤਬ੍ਬਾ.

ਖਯਾਤਿ ਏਤ੍ਥ ਪਨ ‘‘ਯੋ ਆਸਵਾਨਂ ਖਯੋ ਭੇਦੋ ਪਰਿਭੇਦੋ’’ਤਿਆਦੀਸੁ ਆਸਵਾਨਂ ਸਰਸਭੇਦੋ ਆਸਵਕ੍ਖਯੋਤਿ ਵੁਤ੍ਤੋ. ‘‘ਜਾਨਤੋ ਅਹਂ, ਭਿਕ੍ਖਵੇ, ਪਸ੍ਸਤੋ ਆਸਵਾਨਂ ਖਯਂ ਵਦਾਮੀ’’ਤਿਆਦੀਸੁ (ਮ. ਨਿ. ੧.੧੫) ਆਸਵਾਨਂ ਆਯਤਿਂ ਅਨੁਪ੍ਪਾਦੋ ਆਸਵਕ੍ਖਯੋਤਿ ਵੁਤ੍ਤੋ.

‘‘ਸੇਕ੍ਖਸ੍ਸ ਸਿਕ੍ਖਮਾਨਸ੍ਸ, ਉਜੁਮਗ੍ਗਾਨੁਸਾਰਿਨੋ;

ਖਯਸ੍ਮਿਂ ਪਠਮਂ ਞਾਣਂ, ਤਤੋ ਅਞ੍ਞਾ ਅਨਨ੍ਤਰਾ’’ਤਿ. (ਇਤਿਵੁ. ੬੨) –

ਆਦੀਸੁ ਮਗ੍ਗੋ ਆਸਵਕ੍ਖਯੋਤਿ ਵੁਤ੍ਤੋ. ‘‘ਆਸਵਾਨਂ ਖਯਾ ਸਮਣੋ ਹੋਤੀ’’ਤਿਆਦੀਸੁ (ਮ. ਨਿ. ੧.੪੩੮) ਫਲਂ.

‘‘ਪਰਵਜ੍ਜਾਨੁਪਸ੍ਸਿਸ੍ਸ, ਨਿਚ੍ਚਂ ਉਜ੍ਝਾਨਸਞ੍ਞਿਨੋ;

ਆਸਵਾ ਤਸ੍ਸ ਵਡ੍ਢਨ੍ਤਿ, ਆਰਾ ਸੋ ਆਸਵਕ੍ਖਯਾ’’ਤਿ. –

ਆਦੀਸੁ (ਧ. ਪ. ੨੫੩) ਨਿਬ੍ਬਾਨਂ. ਇਧ ਪਨ ਆਸਵਾਨਂ ਅਚ੍ਚਨ੍ਤਖਯੋ ਅਨੁਪ੍ਪਾਦੋ ਵਾ ਮਗ੍ਗੋ ਵਾ ‘‘ਆਸਵਾਨਂ ਖਯੋ’’ਤਿ ਵੁਤ੍ਤੋ.

ਅਨਾਸਵਨ੍ਤਿ ਪਟਿਪਸ੍ਸਦ੍ਧਿਵਸੇਨ ਸਬ੍ਬਸੋ ਪਹੀਨਾਸਵਂ. ਚੇਤੋਵਿਮੁਤ੍ਤਿਨ੍ਤਿ ਅਰਹਤ੍ਤਫਲਸਮਾਧਿਂ. ਪਞ੍ਞਾਵਿਮੁਤ੍ਤਿਨ੍ਤਿ ਅਰਹਤ੍ਤਫਲਪਞ੍ਞਂ. ਉਭਯਵਚਨਂ ਮਗ੍ਗੇ ਵਿਯ ਫਲੇਪਿ ਸਮਥਵਿਪਸ੍ਸਨਾਨਂ ਯੁਗਨਨ੍ਧਭਾਵਦਸ੍ਸਨਤ੍ਥਂ. ਞਾਣਨ੍ਤਿ ਸਬ੍ਬਞ੍ਞੁਤਞ੍ਞਾਣਂ. ਦੇਵਤਾਯ ਵਚਨਸਮਨਨ੍ਤਰਮੇਵ ‘‘ਕਥਂ ਨੁ ਖੋ’’ਤਿ ਆਵਜ੍ਜੇਨ੍ਤਸ੍ਸ ਭਗਵਤੋ ਞਾਣਂ ਉਪ੍ਪਜ੍ਜਿ ‘‘ਨਨ੍ਦੇਨ ਅਰਹਤ੍ਤਂ ਸਚ੍ਛਿਕਤ’’ਨ੍ਤਿ. ਸੋ ਹਿ ਆਯਸ੍ਮਾ ਸਹਾਯਭਿਕ੍ਖੂਹਿ ਤਥਾ ਉਪ੍ਪਣ੍ਡਿਯਮਾਨੋ ‘‘ਭਾਰਿਯਂ ਵਤ ਮਯਾ ਕਤਂ, ਯੋਹਂ ਏਵਂ ਸ੍ਵਾਕ੍ਖਾਤੇ ਧਮ੍ਮਵਿਨਯੇ ਪਬ੍ਬਜਿਤ੍ਵਾ ਅਚ੍ਛਰਾਨਂ ਪਟਿਲਾਭਾਯ ਸਤ੍ਥਾਰਂ ਪਾਟਿਭੋਗਂ ਅਕਾਸਿ’’ਨ੍ਤਿ ਉਪ੍ਪਨ੍ਨਸਂਵੇਗੋ ਹਿਰੋਤ੍ਤਪ੍ਪਂ ਪਚ੍ਚੁਪਟ੍ਠਪੇਤ੍ਵਾ ਘਟੇਨ੍ਤੋ ਵਾਯਮਨ੍ਤੋ ਅਰਹਤ੍ਤਂ ਪਤ੍ਵਾ ਚਿਨ੍ਤੇਸਿ – ‘‘ਯਂਨੂਨਾਹਂ ਭਗਵਨ੍ਤਂ ਏਤਸ੍ਮਾ ਪਟਿਸ੍ਸਵਾ ਮੋਚੇਯ੍ਯ’’ਨ੍ਤਿ. ਸੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਅਤ੍ਤਨੋ ਅਧਿਪ੍ਪਾਯਂ ਸਤ੍ਥੁ ਆਰੋਚੇਸਿ. ਤੇਨ ਵੁਤ੍ਤਂ – ‘‘ਅਥ ਖੋ ਆਯਸ੍ਮਾ ਨਨ੍ਦੋ…ਪੇ… ਏਤਸ੍ਮਾ ਪਟਿਸ੍ਸਵਾ’’ਤਿ. ਤਤ੍ਥ ਪਟਿਸ੍ਸਵਾਤਿ ਪਾਟਿਭੋਗਪ੍ਪਟਿਸ੍ਸਵਾ, ‘‘ਅਚ੍ਛਰਾਨਂ ਪਟਿਲਾਭਾਯ ਅਹਂ ਪਟਿਭੂਤੋ’’ਤਿ ਪਟਿਞ੍ਞਾਯ.

ਅਥਸ੍ਸ ਭਗਵਾ ‘‘ਯਸ੍ਮਾ ਤਯਾ ਅਞ੍ਞਾ ਆਰਾਧਿਤਾਤਿ ਞਾਤਮੇਤਂ ਮਯਾ, ਦੇਵਤਾਪਿ ਮੇ ਆਰੋਚੇਸਿ, ਤਸ੍ਮਾ ਨਾਹਂ ਪਟਿਸ੍ਸਵਾ ਇਦਾਨਿ ਮੋਚੇਤਬ੍ਬੋ ਅਰਹਤ੍ਤਪ੍ਪਤ੍ਤਿਯਾਵ ਮੋਚਿਤਤ੍ਤਾ’’ਤਿ ਆਹ. ਤੇਨ ਵੁਤ੍ਤਂ ‘‘ਯਦੇਵ ਖੋ ਤੇ ਨਨ੍ਦਾ’’ਤਿਆਦਿ. ਤਤ੍ਥ ਯਦੇਵਾਤਿ ਯਦਾ ਏਵ. ਤੇਤਿ ਤਵ. ਮੁਤ੍ਤੋਤਿ ਪਮੁਤ੍ਤੋ. ਇਦਂ ਵੁਤ੍ਤਂ ਹੋਤਿ – ਯਸ੍ਮਿਂਯੇਵ ਕਾਲੇ ਆਸਵੇਹਿ ਤਵ ਚਿਤ੍ਤਂ ਵਿਮੁਤ੍ਤਂ, ਅਥ ਅਨਨ੍ਤਰਮੇਵਾਹਂ ਤਤੋ ਪਾਟਿਭੋਗਤੋ ਮੁਤ੍ਤੋਤਿ.

ਸੋਪਿ ਆਯਸ੍ਮਾ ਵਿਪਸ੍ਸਨਾਕਾਲੇਯੇਵ ‘‘ਯਦੇਵਾਹਂ ਇਨ੍ਦ੍ਰਿਯਾਸਂਵਰਂ ਨਿਸ੍ਸਾਯ ਇਮਂ ਵਿਪ੍ਪਕਾਰਂ ਪਤ੍ਤੋ, ਤਮੇਵ ਸੁਟ੍ਠੁ ਨਿਗ੍ਗਹੇਸ੍ਸਾਮੀ’’ਤਿ ਉਸ੍ਸਾਹਜਾਤੋ ਬਲਵਹਿਰੋਤ੍ਤਪ੍ਪੋ ਤਤ੍ਥ ਚ ਕਤਾਧਿਕਾਰਤ੍ਤਾ ਇਨ੍ਦ੍ਰਿਯਸਂਵਰੇ ਉਕ੍ਕਟ੍ਠਪਟਿਪਦਮ੍ਪਿ ਅਗਮਾਸਿ. ਵੁਤ੍ਤਞ੍ਹੇਤਂ –

‘‘ਸਚੇ, ਭਿਕ੍ਖਵੇ, ਨਨ੍ਦਸ੍ਸ ਪੁਰਤ੍ਥਿਮਾ ਦਿਸਾ ਆਲੋਕੇਤਬ੍ਬਾ ਹੋਤਿ, ਸਬ੍ਬਂ ਚੇਤਸੋ ਸਮਨ੍ਨਾਹਰਿਤ੍ਵਾ ਨਨ੍ਦੋ ਪੁਰਤ੍ਥਿਮਂ ਦਿਸਂ ਆਲੋਕੇਤਿ ‘ਏਵਂ ਮੇ ਪੁਰਤ੍ਥਿਮਂ ਦਿਸਂ ਆਲੋਕਯਤੋ ਨ ਅਭਿਜ੍ਝਾਦੋਮਨਸ੍ਸਾ ਪਾਪਕਾ ਅਕੁਸਲਾ ਧਮ੍ਮਾ ਅਨ੍ਵਾਸ੍ਸਵੇਯ੍ਯੁ’ਨ੍ਤਿ, ਇਤਿਹ ਤਤ੍ਥ ਸਮ੍ਪਜਾਨੋ ਹੋਤਿ.

‘‘ਸਚੇ, ਭਿਕ੍ਖਵੇ, ਨਨ੍ਦਸ੍ਸ ਪਚ੍ਛਿਮਾ…ਪੇ… ਉਤ੍ਤਰਾ… ਦਕ੍ਖਿਣਾ… ਉਦ੍ਧਂ… ਅਧੋ… ਅਨੁਦਿਸਾ ਆਲੋਕੇਤਬ੍ਬਾ ਹੋਤਿ, ਸਬ੍ਬਂ ਚੇਤਸੋ ਸਮਨ੍ਨਾਹਰਿਤ੍ਵਾ ਨਨ੍ਦੋ ਅਨੁਦਿਸਂ ਆਲੋਕੇਤਿ ‘ਏਵਂ ਮੇ…ਪੇ… ਸਮ੍ਪਜਾਨੋ ਹੋਤੀ’’’ਤਿ (ਅ. ਨਿ. ੮.੯).

ਤੇਨੇਵ ਤਂ ਆਯਸ੍ਮਨ੍ਤਂ ਸਤ੍ਥਾ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰਾਨਂ ਯਦਿਦਂ ਨਨ੍ਦੋ’’ਤਿ (ਅ. ਨਿ. ੧.੨੩੦) ਏਤਦਗ੍ਗੇ ਠਪੇਸਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਆਯਸ੍ਮਤੋ ਨਨ੍ਦਸ੍ਸ ਸਬ੍ਬਾਸਵੇ ਖੇਪੇਤ੍ਵਾ ਸੁਖਾਦੀਸੁ ਤਾਦਿਭਾਵਪ੍ਪਤ੍ਤਿਸਙ੍ਖਾਤਂ ਅਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਤਦਤ੍ਥਵਿਭਾਵਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਯਸ੍ਸ ਨਿਤ੍ਤਿਣ੍ਣੋ ਪਙ੍ਕੋਤਿ ਯੇਨ ਅਰਿਯਪੁਗ੍ਗਲੇਨ ਅਰਿਯਮਗ੍ਗਸੇਤੁਨਾ ਸਬ੍ਬੋ ਦਿਟ੍ਠਿਪਙ੍ਕੋ ਸਂਸਾਰਪਙ੍ਕੋ ਏਵ ਵਾ ਨਿਬ੍ਬਾਨਪਾਰਗਮਨੇਨ ਤਿਣ੍ਣੋ. ਮਦ੍ਦਿਤੋ ਕਾਮਕਣ੍ਡਕੋਤਿ ਯੇਨ ਸਤ੍ਤਾਨਂ ਵਿਜ੍ਝਨਤੋ. ‘‘ਕਾਮਕਣ੍ਡਕੋ’’ਤਿ ਲਦ੍ਧਨਾਮੋ ਸਬ੍ਬੋ ਕਿਲੇਸਕਾਮੋ ਸਬ੍ਬੋ ਕਾਮਵਿਸੂਕੋ ਅਗ੍ਗਞਾਣਦਣ੍ਡੇਨ ਮਦ੍ਦਿਤੋ ਭਗ੍ਗੋ ਅਨਵਸੇਸਤੋ ਮਥਿਤੋ. ਮੋਹਕ੍ਖਯਂ ਅਨੁਪ੍ਪਤ੍ਤੋਤਿ ਏਵਂਭੂਤੋ ਚ ਦੁਕ੍ਖਾਦਿਵਿਸਯਸ੍ਸ ਸਬ੍ਬਸ੍ਸ ਸਮ੍ਮੋਹਸ੍ਸ ਖੇਪਨੇਨ ਮੋਹਕ੍ਖਯਂ ਪਤ੍ਤੋ, ਅਰਹਤ੍ਤਫਲਂ ਨਿਬ੍ਬਾਨਞ੍ਚ ਅਨੁਪ੍ਪਤ੍ਤੋ. ਸੁਖਦੁਕ੍ਖੇਸੁ ਨ ਵੇਧਤੀ ਸ ਭਿਕ੍ਖੂਤਿ ਸੋ ਭਿਨ੍ਨਕਿਲੇਸੋ ਭਿਕ੍ਖੁ ਇਟ੍ਠਾਰਮ੍ਮਣਸਮਾਯੋਗਤੋ ਉਪ੍ਪਨ੍ਨੇਸੁ ਸੁਖੇਸੁ ਅਨਿਟ੍ਠਾਰਮ੍ਮਣਸਮਾਯੋਗਤੋ ਉਪ੍ਪਨ੍ਨੇਸੁ ਦੁਕ੍ਖੇਸੁ ਚ ਨ ਵੇਧਤਿ ਨ ਕਮ੍ਪਤਿ, ਤਂ ਨਿਮਿਤ੍ਤਂ ਚਿਤ੍ਤਵਿਕਾਰਂ ਨਾਪਜ੍ਜਤਿ. ‘‘ਸੁਖਦੁਕ੍ਖੇਸੂ’’ਤਿ ਚ ਦੇਸਨਾਮਤ੍ਤਂ, ਸਬ੍ਬੇਸੁਪਿ ਲੋਕਧਮ੍ਮੇਸੁ ਨ ਵੇਧਤੀਤਿ ਵੇਦਿਤਬ੍ਬਂ.

ਦੁਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਯਸੋਜਸੁਤ੍ਤਵਣ੍ਣਨਾ

੨੩. ਤਤਿਯੇ ਯਸੋਜਪ੍ਪਮੁਖਾਨੀਤਿ ਏਤ੍ਥ ਯਸੋਜੋਤਿ ਤਸ੍ਸ ਥੇਰਸ੍ਸ ਨਾਮਂ, ਤਂ ਪੁਬ੍ਬਙ੍ਗਮਂ ਕਤ੍ਵਾ ਪਬ੍ਬਜਿਤਤ੍ਤਾ ਵਿਚਰਣਤੋ ਚ ਤਾਨਿ ਪਞ੍ਚ ਭਿਕ੍ਖੁਸਤਾਨਿ ‘‘ਯਸੋਜਪ੍ਪਮੁਖਾਨੀ’’ਤਿ ਵੁਤ੍ਤਾਨਿ.

ਤੇਸਂ ਅਯਂ ਪੁਬ੍ਬਯੋਗੋ – ਅਤੀਤੇ ਕਿਰ ਕਸ੍ਸਪਦਸਬਲਸ੍ਸ ਸਾਸਨੇ ਅਞ੍ਞਤਰੋ ਭਿਕ੍ਖੁ ਆਰਞ੍ਞਕੋ ਅਰਞ੍ਞੇ ਪਿਟ੍ਠਿਪਾਸਾਣੇ ਕਤਪਣ੍ਣਕੁਟਿਯਂ ਵਿਹਰਤਿ. ਤਸ੍ਮਿਞ੍ਚ ਸਮਯੇ ਪਞ੍ਚਸਤਾ ਚੋਰਾ ਗਾਮਘਾਤਕਾਦੀਨਿ ਕਤ੍ਵਾ ਚੋਰਿਕਾਯ ਜੀਵਨ੍ਤਾ ਚੋਰਕਮ੍ਮਂ ਕਤ੍ਵਾ ਜਨਪਦਮਨੁਸ੍ਸੇਹਿ ਅਨੁਬਦ੍ਧਾ ਪਲਾਯਮਾਨਾ ਅਰਞ੍ਞਂ ਪਵਿਸਿਤ੍ਵਾ ਤਤ੍ਥ ਕਿਞ੍ਚਿ ਗਹਣਂ ਵਾ ਪਟਿਸਰਣਂ ਵਾ ਅਪਸ੍ਸਨ੍ਤਾ ਅਵਿਦੂਰੇ ਤਂ ਭਿਕ੍ਖੁਂ ਪਾਸਾਣੇ ਨਿਸਿਨ੍ਨਂ ਦਿਸ੍ਵਾ ਵਨ੍ਦਿਤ੍ਵਾ ਤਂ ਪਵਤ੍ਤਿਂ ਆਚਿਕ੍ਖਿਤ੍ਵਾ ‘‘ਅਮ੍ਹਾਕਂ, ਭਨ੍ਤੇ, ਪਟਿਸਰਣਂ ਹੋਥਾ’’ਤਿ ਯਾਚਿਂਸੁ. ਥੇਰੋ ‘‘ਤੁਮ੍ਹਾਕਂ ਸੀਲਸਦਿਸਂ ਪਟਿਸਰਣਂ ਨਤ੍ਥਿ, ਸਬ੍ਬੇ ਪਞ੍ਚ ਸੀਲਾਨਿ ਸਮਾਦਿਯਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਸੀਲਾਨਿ ਸਮਾਦਿਯਿਂਸੁ. ਥੇਰੋ ‘‘ਤੁਮ੍ਹੇ ਇਦਾਨਿ ਸੀਲੇਸੁ ਪਤਿਟ੍ਠਿਤਾ, ਅਤ੍ਤਨੋ ਜੀਵਿਤਂ ਵਿਨਾਸਯਨ੍ਤੇਸੁਪਿ ਮਾ ਮਨਂ ਪਦੋਸਯਿਤ੍ਥਾ’’ਤਿ ਕਕਚੂਪਮਵਿਧਿਂ (ਮ. ਨਿ. ੧.੨੨੨ ਆਦਯੋ) ਆਚਿਕ੍ਖਿ. ਤੇ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਂਸੁ. ਅਥ ਤੇ ਜਾਨਪਦਾ ਤਂ ਸਮ੍ਪਤ੍ਤਾ ਇਤੋ ਚਿਤੋ ਚ ਗਵੇਸਨ੍ਤਾ ਤੇ ਚੋਰੇ ਦਿਸ੍ਵਾ ਸਬ੍ਬੇਵ ਜੀਵਿਤਾ ਵੋਰੋਪੇਸੁਂ. ਤੇ ਤੇਸੁ ਮਨੋਪਦੋਸਮਤ੍ਤਮ੍ਪਿ ਅਕਤ੍ਵਾ ਅਕ੍ਖਣ੍ਡਸੀਲਾ ਕਾਲਂ ਕਤ੍ਵਾ ਕਾਮਾਵਚਰਦੇਵੇਸੁ ਨਿਬ੍ਬਤ੍ਤਿਂਸੁ. ਤੇਸੁ ਜੇਟ੍ਠਚੋਰੋ ਜੇਟ੍ਠਦੇਵਪੁਤ੍ਤੋ ਅਹੋਸਿ, ਇਤਰੇ ਤਸ੍ਸੇਵ ਪਰਿਵਾਰਾ.

ਤੇ ਅਪਰਾਪਰਂ ਸਂਸਰਨ੍ਤਾ ਏਕਂ ਬੁਦ੍ਧਨ੍ਤਰਂ ਦੇਵਲੋਕੇ ਖੇਪੇਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਦੇਵਲੋਕਤੋ ਚਵਿਤ੍ਵਾ ਜੇਟ੍ਠਦੇਵਪੁਤ੍ਤੋ ਸਾਵਤ੍ਥਿਨਗਰਦ੍ਵਾਰੇ ਕੇਵਟ੍ਟਗਾਮੇ ਪਞ੍ਚਸਤਕੁਲਗਾਮਜੇਟ੍ਠਕਸ੍ਸ ਕੇਵਟ੍ਟਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਯਸੋਜੋਤਿਸ੍ਸ ਨਾਮਂ ਅਕਂਸੁ. ਇਤਰੇਪਿ ਅਵਸੇਸਕੇਵਟ੍ਟਾਨਂ ਪੁਤ੍ਤਾ ਹੁਤ੍ਵਾ ਨਿਬ੍ਬਤ੍ਤਿਂਸੁ. ਤੇ ਪੁਬ੍ਬਸਨ੍ਨਿਵਾਸੇਨ ਸਬ੍ਬੇਪਿ ਸਹਾਯਕਾ ਹੁਤ੍ਵਾ ਸਹਪਂਸੁਕੀਲ਼ਿਤਂ ਕੀਲ਼ਨ੍ਤਾ ਅਨੁਪੁਬ੍ਬੇਨ ਵਯਪ੍ਪਤ੍ਤਾ ਅਹੇਸੁਂ, ਯਸੋਜੋ ਤੇਸਂ ਅਗ੍ਗੋ ਅਹੋਸਿ. ਤੇ ਸਬ੍ਬੇਵ ਏਕਤੋ ਹੁਤ੍ਵਾ ਜਾਲਾਨਿ ਗਹੇਤ੍ਵਾ ਨਦਿਤਲ਼ਾਕਾਦੀਸੁ ਮਚ੍ਛੇ ਬਨ੍ਧਨ੍ਤਾ ਵਿਚਰਨ੍ਤਿ.

ਅਥੇਕਦਿਵਸਂ ਅਚਿਰਵਤਿਯਾ ਨਦਿਯਾ ਜਾਲੇ ਖਿਤ੍ਤੇ ਸੁਵਣ੍ਣਵਣ੍ਣੋ ਮਚ੍ਛੋ ਅਨ੍ਤੋਜਾਲੇ ਪਾਵਿਸਿ. ਤਂ ਦਿਸ੍ਵਾ ਸਬ੍ਬੇਪਿ ਕੇਵਟ੍ਟਾ ‘‘ਅਮ੍ਹਾਕਂ ਪੁਤ੍ਤਾ ਮਚ੍ਛੇ ਬਨ੍ਧਨ੍ਤਾ ਸੁਵਣ੍ਣਵਣ੍ਣਂ ਮਚ੍ਛਂ ਬਨ੍ਧਿਂਸੂ’’ਤਿ ਹਟ੍ਠਤੁਟ੍ਠਾ ਅਹੇਸੁਂ. ਅਥ ਤੇ ਪਞ੍ਚਸਤਾਪਿ ਸਹਾਯਕਾ ਮਚ੍ਛਂ ਨਾਵਾਯ ਪਕ੍ਖਿਪਿਤ੍ਵਾ ਨਾਵਂ ਉਕ੍ਖਿਪਿਤ੍ਵਾ ਰਞ੍ਞੋ ਦਸ੍ਸੇਸੁਂ. ਰਾਜਾ ਤਂ ਦਿਸ੍ਵਾ ‘‘ਭਗਵਾ ਏਤਸ੍ਸ ਸੁਵਣ੍ਣਵਣ੍ਣਕਾਰਣਂ ਜਾਨਿਸ੍ਸਤੀ’’ਤਿ ਮਚ੍ਛਂ ਗਾਹਾਪੇਤ੍ਵਾ ਭਗਵਤੋ ਦਸ੍ਸੇਸਿ. ਸਤ੍ਥਾ ‘‘ਅਯਂ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨੇ ਓਸਕ੍ਕਮਾਨੇ ਪਬ੍ਬਜਿਤ੍ਵਾ ਮਿਚ੍ਛਾ ਪਟਿਪਜ੍ਜਨ੍ਤੋ ਸਾਸਨਂ ਓਸਕ੍ਕਾਪੇਤ੍ਵਾ ਨਿਰਯੇ ਨਿਬ੍ਬਤ੍ਤੋ ਏਕਂ ਬੁਦ੍ਧਨ੍ਤਰਂ ਨਿਰਯੇ ਪਚ੍ਚਿਤ੍ਵਾ ਤਤੋ ਚੁਤੋ ਅਚਿਰਵਤਿਯਂ ਮਚ੍ਛੋ ਹੁਤ੍ਵਾ ਨਿਬ੍ਬਤ੍ਤੋ’’ਤਿ ਵਤ੍ਵਾ ਤਸ੍ਸ ਮਾਤੁਭਗਿਨੀਨਞ੍ਚ ਨਿਰਯੇ ਨਿਬ੍ਬਤ੍ਤਭਾਵਂ, ਤਸ੍ਸ ਭਾਤਿਕਤ੍ਥੇਰਸ੍ਸ ਪਰਿਨਿਬ੍ਬੁਤਭਾਵਞ੍ਚ ਤੇਨੇਵ ਕਥਾਪੇਤ੍ਵਾ ਇਮਿਸ੍ਸਾ ਅਟ੍ਠੁਪ੍ਪਤ੍ਤਿਯਾ ਕਪਿਲਸੁਤ੍ਤਂ ਦੇਸੇਸਿ.

ਸਤ੍ਥੁ ਦੇਸਨਂ ਸੁਤ੍ਵਾ ਤੇ ਪਞ੍ਚਸਤਾ ਕੇਵਟ੍ਟਪੁਤ੍ਤਾ ਸਂਵੇਗਜਾਤਾ ਹੁਤ੍ਵਾ ਭਗਵਤੋ ਸਨ੍ਤਿਕੇ ਪਬ੍ਬਜਿਤ੍ਵਾ, ਉਪਸਮ੍ਪਨ੍ਨਾ ਹੁਤ੍ਵਾ ਵਿਵੇਕਵਾਸਂ ਵਸਨ੍ਤਾ ਭਗਵਨ੍ਤਂ ਦਸ੍ਸਨਾਯ ਆਗਮਂਸੁ. ਤੇਨ ਵੁਤ੍ਤਂ – ‘‘ਤੇਨ ਖੋ ਪਨ ਸਮਯੇਨ ਯਸੋਜਪ੍ਪਮੁਖਾਨਿ ਪਞ੍ਚਮਤ੍ਤਾਨਿ ਭਿਕ੍ਖੁਸਤਾਨੀ’’ਤਿਆਦਿ.

ਤਤ੍ਥ ਤੇਧਾਤਿ ਤੇ ਇਧ. ਨੇਵਾਸਿਕੇਹੀਤਿ ਨਿਬਦ੍ਧਵਾਸਂ ਵਸਮਾਨੇਹਿ. ਪਟਿਸਮ੍ਮੋਦਮਾਨਾਤਿ ਨੇਵਾਸਿਕਭਿਕ੍ਖੂਹਿ ‘‘ਕਚ੍ਚਾਵੁਸੋ, ਖਮਨੀਯ’’ਨ੍ਤਿਆਦਿਨਾ ਪਟਿਸਨ੍ਥਾਰਵਸੇਨ ਸਮ੍ਮੋਦਨਾਯ ਕਤਾਯ ‘‘ਆਮਾਵੁਸੋ, ਖਮਨੀਯ’’ਨ੍ਤਿਆਦਿਨਾ, ਪੁਨ ਸਮ੍ਮੋਦਮਾਨਾ ਤੇਹਿ ਸਦ੍ਧਿਂ ਸਮਪ੍ਪਵਤ੍ਤਮੋਦਾ. ਸੇਨਾਸਨਾਨਿ ਪਞ੍ਞਾਪਯਮਾਨਾਤਿ ਆਚਰਿਯੁਪਜ੍ਝਾਯਾਨਂ ਅਤ੍ਤਨੋ ਚ ਪਾਪੁਣਕਾਨਿ ਸੇਨਾਸਨਾਨਿ ਪੁਚ੍ਛਿਤ੍ਵਾ ਤੇਹਿ ਨੇਵਾਸਿਕੇਹਿ ਤੇਸਂ ‘‘ਇਦਂ ਤੁਮ੍ਹਾਕਂ ਆਚਰਿਯਾਨਂ, ਇਦਂ ਤੁਮ੍ਹਾਕਂ ਉਪਜ੍ਝਾਯਾਨਂ, ਇਦਂ ਤੁਮ੍ਹਾਕਂ ਪਾਪੁਣਾਤੀ’’ਤਿ ਸੇਨਾਸਨਾਨਿ ਸਂਵਿਧਾਪੇਤ੍ਵਾ ਅਤ੍ਤਨਾ ਚ ਤਤ੍ਥ ਗਨ੍ਤ੍ਵਾ, ਦ੍ਵਾਰਕਵਾਟਾਨਿ ਵਿਵਰਿਤ੍ਵਾ, ਮਞ੍ਚਪੀਠਕਟਸਾਰਕਾਦੀਨਿ ਨੀਹਰਿਤ੍ਵਾ ਪਪ੍ਫੋਟੇਤ੍ਵਾ ਯਥਾਠਾਨਂ ਠਪਨਾਦਿਵਸੇਨ ਪਞ੍ਞਾਪੇਨ੍ਤਾ ਚ.

ਪਤ੍ਤਚੀਵਰਾਨਿ ਪਟਿਸਾਮਯਮਾਨਾਤਿ, ‘‘ਭਨ੍ਤੇ, ਇਮਂ ਮੇ ਪਤ੍ਤਂ ਠਪੇਥ, ਇਦਂ ਚੀਵਰਂ, ਇਦਂ ਥਾਲਕਂ, ਇਦਂ ਉਦਕਤੁਮ੍ਬਂ, ਇਦਂ ਮੇ ਕਤ੍ਤਰਯਟ੍ਠਿ’’ਨ੍ਤਿ ਏਵਂ ਸਮਣਪਰਿਕ੍ਖਾਰਂ ਸਂਗੋਪਯਮਾਨਾ. ਉਚ੍ਚਾਸਦ੍ਦਾ ਮਹਾਸਦ੍ਦਾਤਿ ਉਦ੍ਧਂ ਗਤਟ੍ਠੇਨ ਉਚ੍ਚੋ ਸਦ੍ਦੋ ਯੇਸਨ੍ਤੇ ਉਚ੍ਚਾਸਦ੍ਦਾ ਅਕਾਰਸ੍ਸ ਆਕਾਰਂ ਕਤ੍ਵਾ. ਸਮਨ੍ਤਤੋ ਪਤ੍ਥਟਟ੍ਠੇਨ ਮਹਨ੍ਤੋ ਸਦ੍ਦੋ ਯੇਸਨ੍ਤੇ ਮਹਾਸਦ੍ਦਾ. ਕੇਵਟ੍ਟਾ ਮਞ੍ਞੇ ਮਚ੍ਛਵਿਲੋਪੇਤਿ ਕੇਵਟ੍ਟਾ ਵਿਯ ਮਚ੍ਛਵਿਲੁਮ੍ਪਨੇ. ਯਥਾ ਨਾਮ ਕੇਵਟ੍ਟਾ ਉਦਕੇ ਵਟ੍ਟਨਤੋ ਮਚ੍ਛਗ੍ਗਹਣਤ੍ਥਂ ਪਵਤ੍ਤਨਤੋ ‘‘ਕੇਵਟ੍ਟਾ’’ਤਿ ਲਦ੍ਧਨਾਮਾ ਮਚ੍ਛਬਨ੍ਧਾ ਮਚ੍ਛਗ੍ਗਹਣਤ੍ਥਂ ਜਲੇ ਜਾਲਂ ਪਕ੍ਖਿਪਿਤ੍ਵਾ ‘‘ਪਵਿਟ੍ਠੋ ਨ ਪਵਿਟ੍ਠੋ, ਗਹਿਤੋ ਨ ਗਹਿਤੋ’’ਤਿਆਦਿਨਾ ਉਚ੍ਚਾਸਦ੍ਦਮਹਾਸਦ੍ਦਾ ਹੋਨ੍ਤਿ. ਯਥਾ ਚ ਤੇ ਮਚ੍ਛਪਚ੍ਛਿਆਦੀਨਿ ਠਪਿਤਟ੍ਠਾਨੇ ਮਹਾਜਨੇ ਗਨ੍ਤ੍ਵਾ ‘‘ਮਯ੍ਹਂ ਏਕਂ ਮਚ੍ਛਂ ਦੇਥ, ਮਯ੍ਹਂ ਏਕਂ ਮਚ੍ਛਫਾਲਂ ਦੇਥ, ਅਮੁਕਸ੍ਸ ਦਿਨ੍ਨੋ ਮਹਨ੍ਤੋ, ਮਯ੍ਹਂ ਖੁਦ੍ਦਕੋ’’ਤਿਆਦੀਨਿ ਵਤ੍ਵਾ ਵਿਲੁਮ੍ਪਮਾਨੇ ਤੇਸਂ ਪਟਿਸੇਧਨਾਦਿਵਸੇਨ ਉਚ੍ਚਾਸਦ੍ਦਮਹਾਸਦ੍ਦਾ ਚ ਹੋਨ੍ਤਿ, ਏਵਮੇਤੇ ਭਿਕ੍ਖੂਤਿ ਦਸ੍ਸੇਤਿ. ਤੇਤੇਤਿ ਤੇ ਏਤੇ. ਕਿਂਨੂਤਿ ਕਿਸ੍ਸ ਨੁ, ਕਿਮਤ੍ਥਂ ਨੂਤਿ ਅਤ੍ਥੋ. ਤੇਮੇਤਿ ਤੇ ਇਮੇ. ਪਣਾਮੇਮੀਤਿ ਨੀਹਰਾਮਿ. ਵੋਤਿ ਤੁਮ੍ਹੇ. ਨ ਵੋ ਮਮ ਸਨ੍ਤਿਕੇ ਵਤ੍ਥਬ੍ਬਨ੍ਤਿ ਤੁਮ੍ਹੇਹਿ ਮਯ੍ਹਂ ਸਨ੍ਤਿਕੇ ਨ ਵਸਿਤਬ੍ਬਂ. ਯੇ ਤੁਮ੍ਹੇ ਮਾਦਿਸਸ੍ਸ ਬੁਦ੍ਧਸ੍ਸ ਵਸਨਟ੍ਠਾਨਂ ਆਗਨ੍ਤ੍ਵਾ ਏਵਂ ਮਹਾਸਦ੍ਦਂ ਕਰੋਥ, ਅਤ੍ਤਨੋ ਧਮ੍ਮਤਾਯ ਵਸਨ੍ਤਾ ਕਿਂ ਨਾਮ ਸਾਰੁਪ੍ਪਂ ਕਰਿਸ੍ਸਥ, ਤੁਮ੍ਹਾਦਿਸਾਨਂ ਮਮ ਸਨ੍ਤਿਕੇ ਵਸਨਕਿਚ੍ਚਂ ਨਤ੍ਥੀਤਿ ਦੀਪੇਤਿ. ਏਵਂ ਪਣਾਮਿਤੇਸੁ ਚ ਭਗਵਤਾ ਤੇਸੁ ਏਕਭਿਕ੍ਖੁਪਿ ‘‘ਭਗਵਾ ਤੁਮ੍ਹੇ ਮਹਾਸਦ੍ਦਮਤ੍ਤਕੇਨ ਅਮ੍ਹੇ ਪਣਾਮੇਥਾ’’ਤਿ ਵਾ ਅਞ੍ਞਂ ਵਾ ਕਿਞ੍ਚਿ ਪਟਿਵਚਨਂ ਅਵਤ੍ਵਾ ਬੁਦ੍ਧਗਾਰਵੇਨ ਸਬ੍ਬੇ ਭਗਵਤੋ ਵਚਨਂ ਸਮ੍ਪਟਿਚ੍ਛਨ੍ਤਾ ‘‘ਏਵਂ, ਭਨ੍ਤੇ’’ਤਿ ਵਤ੍ਵਾ ਨਿਕ੍ਖਮਿਂਸੁ. ਏਵਂ ਪਨ ਤੇਸਂ ਅਹੋਸਿ ‘‘ਮਯਂ ਸਤ੍ਥਾਰਂ ਪਸ੍ਸਿਸ੍ਸਾਮ, ਧਮ੍ਮਂ ਸੋਸ੍ਸਾਮ, ਸਤ੍ਥੁ ਸਨ੍ਤਿਕੇ ਵਸਿਸ੍ਸਾਮਾਤਿ ਆਗਤਾ, ਏਵਰੂਪਸ੍ਸ ਪਨ ਗਰੁਨੋ ਸਤ੍ਥੁ ਸਨ੍ਤਿਕਂ ਆਗਨ੍ਤ੍ਵਾ ਮਹਾਸਦ੍ਦਂ ਕਰਿਮ੍ਹਾ, ਅਮ੍ਹਾਕਮੇਵ ਦੋਸੋਯਂ, ਪਣਾਮਿਤਮ੍ਹਾ ਤਤੋ, ਨ ਲਦ੍ਧਂ ਸਤ੍ਥੁ ਸਨ੍ਤਿਕੇ ਵਤ੍ਥੁਂ, ਸਮਨ੍ਤਪਾਸਾਦਿਕਂ ਸੁਵਣ੍ਣਵਣ੍ਣਂ ਸਰੀਰਂ ਓਲੋਕੇਤੁਂ, ਮਧੁਰਸ੍ਸਰੇਨ ਦੇਸਿਤਂ ਧਮ੍ਮਂ ਸੋਤੁ’’ਨ੍ਤਿ. ਤੇ ਬਲਵਦੋਮਨਸ੍ਸਜਾਤਾ ਹੁਤ੍ਵਾ ਪਕ੍ਕਮਿਂਸੁ.

ਸਂਸਾਮੇਤ੍ਵਾਤਿ ਸੁਗੁਤ੍ਤਂ ਕਤ੍ਵਾ. ਵਜ੍ਜੀਤਿ ਏਵਂਨਾਮਕੋ ਜਨਪਦੋ, ਵਜ੍ਜੀ ਨਾਮ ਜਾਨਪਦਿਨੋ ਰਾਜਕੁਮਾਰਾ, ਤੇਸਂ ਨਿਵਾਸੋ ਏਕੋਪਿ ਜਨਪਦੋ ਰੁਲ਼੍ਹੀਵਸੇਨ ‘‘ਵਜ੍ਜੀ’’ਤ੍ਵੇਵ ਵੁਚ੍ਚਤਿ. ਤੇਨ ਵੁਤ੍ਤਂ ‘‘ਵਜ੍ਜੀਸੂ’’ਤਿ. ਵਗ੍ਗੁਮੁਦਾਤਿ ਏਵਂਨਾਮ ਲੋਕਸ੍ਸ ਪੁਞ੍ਞਸਮ੍ਮਤਾ ਏਕਾ ਨਦੀ. ‘‘ਵਗ੍ਗਮੁਦਾ’’ਤਿਪਿ ਪਾਠੋ. ਅਤ੍ਥਕਾਮੇਨਾਤਿ ਕਿਞ੍ਚਿ ਪਯੋਜਨਂ ਅਨਪੇਕ੍ਖਿਤ੍ਵਾ ਅਤ੍ਥਮੇਵ ਇਚ੍ਛਨ੍ਤੇਨ. ਹਿਤੇਸਿਨਾਤਿ ਅਤ੍ਥਂ ਇਚ੍ਛਨ੍ਤੇਨ, ‘‘ਕਿਨ੍ਤਿ ਮੇ ਸਾਵਕਾ ਵਟ੍ਟਦੁਕ੍ਖਾ ਪਰਿਮੁਚ੍ਚੇਯ੍ਯੁ’’ਨ੍ਤਿ ਤਸ੍ਸ ਅਤ੍ਥਸਙ੍ਖਾਤਸ੍ਸ ਅਤ੍ਥਸ੍ਸ ਵਾ ਹੇਤੁਭੂਤਸ੍ਸ ਹਿਤਸ੍ਸ ਏਸਨਸੀਲੇਨ. ਤਤੋ ਏਵ ਅਤ੍ਤਨੋ ਸਰੀਰਖੇਦਂ ਅਗਣੇਤ੍ਵਾ ਦੂਰੇਪਿ ਵੇਨੇਯ੍ਯਸਨ੍ਤਿਕਂ ਗਨ੍ਤ੍ਵਾ ਅਨੁਕਮ੍ਪਨਤੋ ਅਨੁਕਮ੍ਪਕੇਨ. ਤਮੇਵ ਅਨੁਕਮ੍ਪਂ ਉਪਾਦਾਯ ਮਯਂ ਪਣਾਮਿਤਾ, ਨ ਅਤ੍ਤਨੋ ਵੇਯ੍ਯਾਵਚ੍ਚਾਦਿਪਚ੍ਚਾਸੀਸਾਯ. ਯਸ੍ਮਾ ਧਮ੍ਮਗਰੁਨੋ ਬੁਦ੍ਧਾ ਭਗਵਨ੍ਤੋ ਸਮ੍ਮਾਪਟਿਪਤ੍ਤਿਯਾਵ ਪੂਜੇਤਬ੍ਬਾ, ਯੇ ਉਚ੍ਚਾਸਦ੍ਦਕਰਣਮਤ੍ਤੇਪਿ ਪਣਾਮੇਨ੍ਤਿ, ਤਸ੍ਮਾ ਹਨ੍ਦ ਮਯਂ, ਆਵੁਸੋ, ਤਥਾ ਵਿਹਾਰਂ ਕਪ੍ਪੇਮ ਸਬ੍ਬਤ੍ਥ ਸਤਿਸਮ੍ਪਜਞ੍ਞਯੋਗੇਨ ਅਪਣ੍ਣਕਪ੍ਪਟਿਪਦਂ ਪੂਰੇਨ੍ਤਾ ਯਥਾਗਹਿਤਕਮ੍ਮਟ੍ਠਾਨਂ ਮਤ੍ਥਕਂ ਪਾਪੇਨ੍ਤਾ ਚਤੁਇਰਿਯਾਪਥਵਿਹਾਰਂ ਕਪ੍ਪੇਮ ਵਿਹਰਾਮ. ਯਥਾ ਨੋ ਵਿਹਰਤਨ੍ਤਿ ਯਥਾ ਅਮ੍ਹੇਸੁ ਵਿਹਰਨ੍ਤੇਸੁ, ਭਗਵਾ ਅਤ੍ਤਮਨੋ ਅਸ੍ਸ, ਸਮ੍ਮਾਪਟਿਪਤ੍ਤਿਯਾ ਪੂਜਾਯ ਆਰਾਧਿਤੋ ਭਵੇਯ੍ਯਾਤਿ ਅਤ੍ਥੋ.

ਤੇਨੇਵਨ੍ਤਰਵਸ੍ਸੇਨਾਤਿ ਤਸ੍ਮਿਂਯੇਵ ਅਨ੍ਤਰਵਸ੍ਸੇ ਮਹਾਪਵਾਰਣਂ ਅਨਤਿਕ੍ਕਮਿਤ੍ਵਾਵ. ਸਬ੍ਬੇਵ ਤਿਸ੍ਸੋ ਵਿਜ੍ਜਾ ਸਚ੍ਛਾਕਂਸੂਤਿ ਸਬ੍ਬੇਯੇਵ ਤੇ ਪਞ੍ਚਸਤਾ ਭਿਕ੍ਖੂ ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ ਦਿਬ੍ਬਚਕ੍ਖੁਞਾਣਂ ਆਸਵਕ੍ਖਯਞਾਣਨ੍ਤਿ ਇਮਾ ਤਿਸ੍ਸੋ ਪੁਬ੍ਬੇਨਿਵੁਤ੍ਥਕ੍ਖਨ੍ਧਪ੍ਪਟਿਚ੍ਛਾਦਕਮੋਹਕ੍ਖਨ੍ਧਾਦੀਨਂ ਵਿਨਿਵਿਜ੍ਝਨਟ੍ਠੇਨ ਵਿਜ੍ਜਾ ਅਤ੍ਤਪਚ੍ਚਕ੍ਖਾ ਅਕਂਸੁ. ਲੋਕਿਯਾਭਿਞ੍ਞਾਸੁ ਇਮਾਯੇਵ ਦ੍ਵੇ ਅਭਿਞ੍ਞਾ ਆਸਵਕ੍ਖਯਞਾਣਸ੍ਸ ਬਹੂਪਕਾਰਾ, ਨ ਤਥਾ ਦਿਬ੍ਬਸੋਤਚੇਤੋਪਰਿਯਇਦ੍ਧਿਵਿਧਞਾਣਾਨੀਤਿ ਦਸ੍ਸਨਤ੍ਥਂ ਵਿਜ੍ਜਤ੍ਤਯਮੇਵੇਤ੍ਥ ਤੇਸਂ ਭਿਕ੍ਖੂਨਂ ਅਧਿਗਮਦਸ੍ਸਨਵਸੇਨ ਉਦ੍ਧਟਂ. ਤਥਾ ਹਿ ਵੇਰਞ੍ਜਸੁਤ੍ਤੇ (ਅ. ਨਿ. ੮.੧੧) ਭਗਵਾ ਵੇਰਞ੍ਜਬ੍ਰਾਹ੍ਮਣਸ੍ਸ ਅਤ੍ਤਨੋ ਅਧਿਗਮਂ ਦਸ੍ਸੇਨ੍ਤੋ ਵਿਜ੍ਜਤ੍ਤਯਮੇਵ ਦੇਸੇਸਿ, ਨ ਦਿਬ੍ਬਸੋਤਞਾਣਾਦੀਨਂ ਅਭਾਵਤੋ. ਏਵਂ ਤੇਸਮ੍ਪਿ ਭਿਕ੍ਖੂਨਂ ਵਿਜ੍ਜਮਾਨਾਨਿਪਿ ਦਿਬ੍ਬਸੋਤਞਾਣਾਦੀਨਿ ਨ ਉਦ੍ਧਟਾਨਿ. ਛਲ਼ਭਿਞ੍ਞਾ ਹਿ ਤੇ ਭਿਕ੍ਖੂ. ਏਵਞ੍ਚ ਕਤ੍ਵਾ ‘‘ਵਗ੍ਗੁਮੁਦਾਯ ਨਦਿਯਾ ਤੀਰੇ ਅਨ੍ਤਰਹਿਤਾ ਮਹਾਵਨੇ ਕੂਟਾਗਾਰਸਾਲਾਯਂ ਭਗਵਤੋ ਸਮ੍ਮੁਖੇ ਪਾਤੁਰਹੇਸੁ’’ਨ੍ਤਿ ਤੇਸਂ ਭਿਕ੍ਖੂਨਂ ਇਦ੍ਧਿਵਲ਼ਞ੍ਜਨਂ ਵਕ੍ਖਤਿ.

ਯਥਾਭਿਰਨ੍ਤਨ੍ਤਿ ਯਥਾਭਿਰਤਿਂ ਯਥਾਜ੍ਝਾਸਯਂ. ਬੁਦ੍ਧਾਨਞ੍ਹਿ ਏਕਸ੍ਮਿਂ ਠਾਨੇ ਵਸਨ੍ਤਾਨਂ ਛਾਯੂਦਕਵਿਪਤ੍ਤਿਂ ਵਾ ਅਫਾਸੁਕਸੇਨਾਸਨਂ ਵਾ ਮਨੁਸ੍ਸਾਨਂ ਅਸ੍ਸਦ੍ਧਾਦਿਭਾਵਂ ਵਾ ਆਗਮ੍ਮ ਅਨਭਿਰਤਿ ਨਾਮ ਨਤ੍ਥਿ, ਤੇਸਂ ਸਮ੍ਪਤ੍ਤਿਯਾ ‘‘ਫਾਸੁਂ ਵਿਹਰਾਮਾ’’ਤਿ ਚਿਰਵਿਹਾਰੋਪਿ ਨਤ੍ਥਿ. ਯਤ੍ਥ ਪਨ ਭਗਵਤਿ ਵਿਹਰਨ੍ਤੇ ਮਨੁਸ੍ਸਾ ਸਰਣੇਸੁ ਵਾ ਪਤਿਟ੍ਠਹਨ੍ਤਿ, ਸੀਲਾਨਿ ਵਾ ਸਮਾਦਿਯਨ੍ਤਿ ਪਬ੍ਬਜਨ੍ਤਿ, ਸੋਤਾਪਤ੍ਤਿਮਗ੍ਗਾਦੀਨਿ ਵਾ ਪਾਪੁਣਨ੍ਤਿ, ਸਤ੍ਥਾ ਤਾਸੁ ਸਮ੍ਪਤ੍ਤੀਸੁ ਤੇਸਂ ਪਤਿਟ੍ਠਾਪਨਤ੍ਥਂ ਵਸਤਿ, ਤਦਭਾਵੇ ਪਕ੍ਕਮਤਿ. ਤਦਾ ਹਿ ਸਾਵਤ੍ਥਿਯਂ ਕਤ੍ਤਬ੍ਬਬੁਦ੍ਧਕਿਚ੍ਚਂ ਨਾਹੋਸਿ. ਤੇਨ ਵੁਤ੍ਤਂ – ‘‘ਅਥ ਖੋ ਭਗਵਾ ਸਾਵਤ੍ਥਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਵੇਸਾਲੀ ਤੇਨ ਚਾਰਿਕਂ ਪਕ੍ਕਾਮੀ’’ਤਿ.

ਚਾਰਿਕਂ ਚਰਮਾਨੋਤਿ ਅਦ੍ਧਾਨਗਮਨਂ ਗਚ੍ਛਨ੍ਤੋ. ਚਾਰਿਕਾ ਚ ਨਾਮੇਸਾ ਭਗਵਤੋ ਦੁਵਿਧਾ ਤੁਰਿਤਚਾਰਿਕਾ ਅਤੁਰਿਤਚਾਰਿਕਾਤਿ. ਤਤ੍ਥ ਦੂਰੇਪਿ ਬੋਧਨੇਯ੍ਯਪੁਗ੍ਗਲਂ ਦਿਸ੍ਵਾ ਤਸ੍ਸ ਬੋਧਨਤ੍ਥਂ ਸਹਸਾ ਗਮਨਂ ਤੁਰਿਤਚਾਰਿਕਾ ਨਾਮ, ਸਾ ਮਹਾਕਸ੍ਸਪਪਚ੍ਚੁਗ੍ਗਮਨਾਦੀਸੁ ਦਟ੍ਠਬ੍ਬਾ. ਯਾ ਪਨ ਗਾਮਨਿਗਮਰਾਜਧਾਨੀਪਟਿਪਾਟਿਯਾ ਦੇਵਸਿਕਂ ਯੋਜਨਦ੍ਧਯੋਜਨਵਸੇਨ ਪਿਣ੍ਡਪਾਤਚਰਿਯਾਦੀਹਿ ਲੋਕਂ ਅਨੁਗ੍ਗਣ੍ਹਨ੍ਤੋ ਗਚ੍ਛਤਿ, ਅਯਂ ਅਤੁਰਿਤਚਾਰਿਕਾ ਨਾਮ, ਅਯਮੇਵ ਇਧਾਧਿਪ੍ਪੇਤਾ. ਤਦਵਸਰੀਤਿ ਤੇਨ ਅਵਸਰਿ, ਤਂ ਵਾ ਅਵਸਰਿ, ਤਤ੍ਥ ਅਵਸਰਿ, ਪਾਵਿਸੀਤਿ ਅਤ੍ਥੋ.

ਤਤ੍ਰਾਤਿ ਤਸ੍ਸਂ. ਸੁਦਨ੍ਤਿ ਨਿਪਾਤਮਤ੍ਤਂ. ਵੇਸਾਲਿਯਨ੍ਤਿ ਤਿਕ੍ਖਤ੍ਤੁਂ ਵਿਸਾਲੀਭੂਤਤ੍ਤਾ ‘‘ਵੇਸਾਲੀ’’ਤਿ ਲਦ੍ਧਨਾਮੇ ਲਿਚ੍ਛਵਿਰਾਜੂਨਂ ਨਗਰੇ. ਮਹਾਵਨੇਤਿ ਮਹਾਵਨਂ ਨਾਮ ਸਯਂਜਾਤਂ ਅਰੋਪਿਮਂ ਸਪਰਿਚ੍ਛੇਦਂ ਮਹਨ੍ਤਂ ਵਨਂ. ਕਪਿਲਵਤ੍ਥੁਸਾਮਨ੍ਤਾ ਪਨ ਮਹਾਵਨਂ ਹਿਮਵਨ੍ਤੇਨ ਸਹ ਏਕਾਬਦ੍ਧਂ ਅਪਰਿਚ੍ਛੇਦਂ ਹੁਤ੍ਵਾ ਮਹਾਸਮੁਦ੍ਦਂ ਆਹਚ੍ਚ ਠਿਤਂ. ਇਦਂ ਤਾਦਿਸਂ ਨ ਹੋਤਿ, ਸਪਰਿਚ੍ਛੇਦਂ ਮਹਨ੍ਤਂ ਵਨਨ੍ਤਿ ਮਹਾਵਨਂ. ਕੂਟਾਗਾਰਸਾਲਾਯਨ੍ਤਿ ਤਸ੍ਮਿਂ ਮਹਾਵਨੇ ਭਗਵਨ੍ਤਂ ਉਦ੍ਦਿਸ੍ਸ ਕਤੇ ਆਰਾਮੇ ਕੂਟਾਗਾਰਂ ਅਨ੍ਤੋ ਕਤ੍ਵਾ ਹਂਸਵਟ੍ਟਕਚ੍ਛਨ੍ਨੇਨ ਕਤਾ ਸਬ੍ਬਾਕਾਰਸਮ੍ਪਨ੍ਨਾ ਬੁਦ੍ਧਸ੍ਸ ਭਗਵਤੋ ਗਨ੍ਧਕੁਟਿ ਕੂਟਾਗਾਰਸਾਲਾ ਨਾਮ, ਤਸ੍ਸਂ ਕੂਟਾਗਾਰਸਾਲਾਯਂ. ਵਗ੍ਗੁਮੁਦਾਤੀਰਿਯਾਨਨ੍ਤਿ ਵਗ੍ਗੁਮੁਦਾਤੀਰਵਾਸੀਨਂ. ਚੇਤਸਾ ਚੇਤੋ ਪਰਿਚ੍ਚ ਮਨਸਿ ਕਰਿਤ੍ਵਾਤਿ ਅਤ੍ਤਨੋ ਚਿਤ੍ਤੇਨ ਤੇਸਂ ਚਿਤ੍ਤਂ ਪਰਿਚ੍ਛਿਜ੍ਜ ਮਨਸਿ ਕਰਿਤ੍ਵਾ, ਚੇਤੋਪਰਿਯਞਾਣੇਨ ਵਾ ਸਬ੍ਬਞ੍ਞੁਤਞ੍ਞਾਣੇਨ ਵਾ ਤੇਹਿ ਅਧਿਗਤਵਿਸੇਸਂ ਜਾਨਿਤ੍ਵਾਤਿ ਅਤ੍ਥੋ.

ਆਲੋਕਜਾਤਾ ਵਿਯਾਤਿ ਸਞ੍ਜਾਤਾਲੋਕਾ ਵਿਯ. ਇਤਰਂ ਤਸ੍ਸੇਵ ਵੇਵਚਨਂ, ਚਨ੍ਦਸਹਸ੍ਸਸੂਰਿਯਸਹਸ੍ਸੇਹਿ ਓਭਾਸਿਤਾ ਵਿਯਾਤਿ ਅਤ੍ਥੋ. ਯਸ੍ਮਾ ਤੇ ਯਸੋਜਪ੍ਪਮੁਖਾ ਪਞ੍ਚਸਤਾ ਭਿਕ੍ਖੂ ਸਬ੍ਬਸੋ ਅਵਿਜ੍ਜਨ੍ਧਕਾਰਵਿਧਮਨੇਨ ਆਲੋਕਭੂਤਾ ਓਭਾਸਭੂਤਾ ਹੁਤ੍ਵਾ ਵਿਹਰਨ੍ਤਿ, ਤਸ੍ਮਾ ਭਗਵਾ ਤੇਹਿ ਠਿਤਦਿਸਾਯ ‘‘ਆਲੋਕਜਾਤਾ ਵਿਯ ਮੇ, ਆਨਨ੍ਦ, ਏਸਾ ਦਿਸਾ’’ਤਿਆਦਿਨਾ ਵਣ੍ਣਭਣਨਾਪਦੇਸੇਨ ਤੇ ਭਿਕ੍ਖੂ ਪਸਂਸਤਿ. ਤੇਨ ਵੁਤ੍ਤਂ – ‘‘ਯਸ੍ਸਂ ਦਿਸਾਯਂ ਵਗ੍ਗੁਮੁਦਾਤੀਰਿਯਾ ਭਿਕ੍ਖੂ ਵਿਹਰਨ੍ਤੀ’’ਤਿ. ਅਪ੍ਪਟਿਕੂਲਾਤਿ ਨ ਪਟਿਕੂਲਾ, ਮਨਾਪਾ ਮਨੋਹਰਾਤਿ ਅਤ੍ਥੋ. ਯਸ੍ਮਿਞ੍ਹਿ ਪਦੇਸੇ ਸੀਲਾਦਿਗੁਣਸਮ੍ਪਨ੍ਨਾ ਮਹੇਸਿਨੋ ਵਿਹਰਨ੍ਤਿ, ਤਂ ਕਿਞ੍ਚਾਪਿ ਉਕ੍ਕੂਲਵਿਕੂਲਵਿਸਮਦੁਗ੍ਗਾਕਾਰਂ, ਅਥ ਖੋ ਮਨੁਞ੍ਞਂ ਰਮਣੀਯਮੇਵ. ਵੁਤ੍ਤਞ੍ਹੇਤਂ –

‘‘ਗਾਮੇ ਵਾ ਯਦਿ ਵਾਰਞ੍ਞੇ, ਨਿਨ੍ਨੇ ਵਾ ਯਦਿ ਵਾ ਥਲੇ;

ਯਤ੍ਥ ਅਰਹਨ੍ਤੋ ਵਿਹਰਨ੍ਤਿ, ਤਂ ਭੂਮਿਰਾਮਣੇਯ੍ਯਕ’’ਨ੍ਤਿ. (ਧ. ਪ. ੯੮);

ਪਹਿਣੇਯ੍ਯਾਸੀਤਿ ਪੇਸੇਯ੍ਯਾਸਿ. ਸਤ੍ਥਾ ਆਯਸ੍ਮਨ੍ਤਾਨਂ ਦਸ੍ਸਨਕਾਮੋਤਿ ਤੇਸਂ ਭਿਕ੍ਖੂਨਂ ਸਨ੍ਤਿਕੇ ਪਹੇਣਾਕਾਰਦਸ੍ਸਨਂ. ਇਤਿ ਭਗਵਾ ਯਦਤ੍ਥਂ ਤੇ ਭਿਕ੍ਖੂ ਪਣਾਮੇਸਿ, ਤਮਤ੍ਥਂ ਮਤ੍ਥਕਪ੍ਪਤ੍ਤਂ ਦਿਸ੍ਵਾ ਆਰਦ੍ਧਚਿਤ੍ਤੋ ਤੇਸਂ ਦਸ੍ਸਨਕਾਮਤਂ ਥੇਰਸ੍ਸ ਆਰੋਚੇਸਿ. ਏਵਂ ਕਿਰਸ੍ਸ ਅਹੋਸਿ ‘‘ਅਹਂ ਇਮੇ ਉਚ੍ਚਾਸਦ੍ਦਮਹਾਸਦ੍ਦਕਰਣੇ ਪਣਾਮੇਸ੍ਸਾਮਿ, ਅਥ ਤੇ ਭਦ੍ਰੋ ਅਸ੍ਸਾਜਾਨੀਯੋ ਵਿਯ ਕਸਾਭਿਘਾਤੇਨ, ਤੇਨ ਚੋਦਿਤਾ ਸਂਵੇਗਪ੍ਪਤ੍ਤਾ ਮਮਾਰਾਧਨਤ੍ਥਂ ਅਰਞ੍ਞਂ ਪਵਿਸਿਤ੍ਵਾ ਘਟੇਨ੍ਤਾ ਵਾਯਮਨ੍ਤਾ ਖਿਪ੍ਪਮੇਵ ਅਰਹਤ੍ਤਂ ਸਚ੍ਛਿਕਰਿਸ੍ਸਨ੍ਤੀ’’ਤਿ. ਇਦਾਨਿ ਤੇ ਅਗ੍ਗਫਲਪ੍ਪਤ੍ਤੇ ਦਿਸ੍ਵਾ ਤਾਯ ਅਰਹਤ੍ਤਪ੍ਪਤ੍ਤਿਯਾ ਆਰਾਧਿਤਚਿਤ੍ਤੋ ਤੇਸਂ ਦਸ੍ਸਨਕਾਮੋ ਹੁਤ੍ਵਾ ਏਵਂ ਧਮ੍ਮਭਣ੍ਡਾਗਾਰਿਕਂ ਆਣਾਪੇਸਿ.

ਸੋ ਭਿਕ੍ਖੂਤਿ ਆਨਨ੍ਦਤ੍ਥੇਰੇਨ ਤਥਾ ਆਣਤ੍ਤੋ ਛਲ਼ਭਿਞ੍ਞੋ ਏਕੋ ਭਿਕ੍ਖੁ. ਪਮੁਖੇਤਿ ਸਮ੍ਮੁਖੇ. ਆਨੇਞ੍ਜਸਮਾਧਿਨਾਤਿ ਚਤੁਤ੍ਥਜ੍ਝਾਨਪਾਦਕੇਨ ਅਗ੍ਗਫਲਸਮਾਧਿਨਾ, ‘‘ਅਰੂਪਜ੍ਝਾਨਪਾਦਕੇਨਾ’’ਤਿਪਿ ਵਦਨ੍ਤਿ. ‘‘ਆਨੇਞ੍ਜੇਨ ਸਮਾਧਿਨਾ’’ਤਿਪਿ ਪਾਠੋ. ਕਸ੍ਮਾ ਪਨ ਭਗਵਾ ਤੇਸਂ ਭਿਕ੍ਖੂਨਂ ਆਗਮਨਂ ਜਾਨਨ੍ਤੋ ਪਟਿਸਨ੍ਥਾਰਂ ਅਕਤ੍ਵਾ ਸਮਾਪਤ੍ਤਿਂਯੇਵ ਸਮਾਪਜ੍ਜਿ? ਤੇਸਂ ਅਤ੍ਤਨਾ ਸਮਾਪਨ੍ਨਸਮਾਪਤ੍ਤਿਂ ਜਾਨਿਤ੍ਵਾ ਸਮਾਪਜ੍ਜਨਤ੍ਥਂ, ਤੇਸਂ ਪੁਬ੍ਬੇ ਪਣਾਮਿਤਾਨਂ ਇਦਾਨਿ ਅਤ੍ਤਨਾ ਸਮਾਨਸਮ੍ਭੋਗਦਸ੍ਸਨਤ੍ਥਂ, ਆਨੁਭਾਵਦੀਪਨਤ੍ਥਂ, ਵਿਨਾ ਵਚੀਭੇਦੇਨ ਅਞ੍ਞਬ੍ਯਾਕਰਣਦੀਪਨਤ੍ਥਞ੍ਚ. ਅਪਰੇ ਪਨਾਹੁ ‘‘ਪੁਬ੍ਬੇ ਪਣਾਮਿਤਾਨਂ ਇਦਾਨਿ ਅਤ੍ਤਨੋ ਸਨ੍ਤਿਕਂ ਆਗਤਾਨਂ ਅਨੁਤ੍ਤਰਸੁਖੁਪ੍ਪਾਦਨੇਨ ਅਨਞ੍ਞਸਾਧਾਰਣਪਟਿਸਨ੍ਥਾਰਕਰਣਤ੍ਥ’’ਨ੍ਤਿ. ਤੇਪਿ ਆਯਸ੍ਮਨ੍ਤੋ ਭਗਵਤੋ ਅਜ੍ਝਾਸਯਂ ਞਤ੍ਵਾ ਤਂਯੇਵ ਸਮਾਪਤ੍ਤਿਂ ਸਮਾਪਜ੍ਜਿਂਸੁ. ਤੇਨ ਵੁਤ੍ਤਂ – ‘‘ਕਤਮੇਨ ਨੁ ਖੋ ਭਗਵਾ ਵਿਹਾਰੇਨ ਏਤਰਹਿ ਵਿਹਰਤੀ’’ਤਿਆਦਿ.

ਏਤ੍ਥ ਚ ਰੂਪਾਵਚਰਚਤੁਤ੍ਥਜ੍ਝਾਨਂ ਕੋਸਜ੍ਜਾਦੀਨਂ ਪਾਰਿਪਨ੍ਤਿਕਧਮ੍ਮਾਨਂ ਸੁਵਿਦੂਰਭਾਵਤੋ ਇਦ੍ਧਿਯਾ ਮੂਲਭੂਤੇਹਿ ਅਨੋਣਮਨਾਦੀਹਿ ਸੋਲ਼ਸਹਿ ਵੋਦਾਨਧਮ੍ਮੇਹਿ ਸਮਨ੍ਨਾਗਮਨਤੋ ਆਨੇਞ੍ਜਪ੍ਪਤ੍ਤਂ ਸਯਂ ਅਨਿਞ੍ਜਨਟ੍ਠੇਨ ਆਨੇਞ੍ਜਨ੍ਤਿ ਵੁਚ੍ਚਤਿ. ਵੁਤ੍ਤਞ੍ਹੇਤਂ –

‘‘ਅਨੋਣਤਂ ਚਿਤ੍ਤਂ ਕੋਸਜ੍ਜੇ ਨ ਇਞ੍ਜਤੀਤਿ ਆਨੇਞ੍ਜਂ. ਅਨੁਣ੍ਣਤਂ ਚਿਤ੍ਤਂ ਉਦ੍ਧਚ੍ਚੇ ਨ ਇਞ੍ਜਤੀਤਿ ਆਨੇਞ੍ਜਂ. ਅਨਭਿਰਤਂ ਚਿਤ੍ਤਂ ਰਾਗੇ ਨ ਇਞ੍ਜਤੀਤਿ ਆਨੇਞ੍ਜਂ. ਅਨਪਨਤਂ ਚਿਤ੍ਤਂ ਬ੍ਯਾਪਾਦੇ ਨ ਇਞ੍ਜਤੀਤਿ ਆਨੇਞ੍ਜਂ. ਅਨਿਸ੍ਸਿਤਂ ਚਿਤ੍ਤਂ ਦਿਟ੍ਠਿਯਾ ਨ ਇਞ੍ਜਤੀਤਿ ਆਨੇਞ੍ਜਂ. ਅਪ੍ਪਟਿਬਦ੍ਧਂ ਚਿਤ੍ਤਂ ਛਨ੍ਦਰਾਗੇ ਨ ਇਞ੍ਜਤੀਤਿ ਆਨੇਞ੍ਜਂ. ਵਿਪ੍ਪਮੁਤ੍ਤਂ ਚਿਤ੍ਤਂ ਕਾਮਰਾਗੇ ਨ ਇਞ੍ਜਤੀਤਿ ਆਨੇਞ੍ਜਂ. ਵਿਸਂਯੁਤ੍ਤਂ ਚਿਤ੍ਤਂ ਕਿਲੇਸੇ ਨ ਇਞ੍ਜਤੀਤਿ ਆਨੇਞ੍ਜਂ. ਵਿਮਰਿਯਾਦਿਕਤਂ ਚਿਤ੍ਤਂ ਕਿਲੇਸਮਰਿਯਾਦਾਯ ਨ ਇਞ੍ਜਤੀਤਿ ਆਨੇਞ੍ਜਂ. ਏਕਤ੍ਤਗਤਂ ਚਿਤ੍ਤਂ ਨਾਨਤ੍ਤਕਿਲੇਸੇ ਨ ਇਞ੍ਜਤੀਤਿ ਆਨੇਞ੍ਜਂ. ਸਦ੍ਧਾਯ ਪਰਿਗ੍ਗਹਿਤਂ ਚਿਤ੍ਤਂ ਅਸ੍ਸਦ੍ਧਿਯੇ ਨ ਇਞ੍ਜਤੀਤਿ ਆਨੇਞ੍ਜਂ. ਵੀਰਿਯੇਨ ਪਰਿਗ੍ਗਹਿਤਂ ਚਿਤ੍ਤਂ ਕੋਸਜ੍ਜੇ ਨ ਇਞ੍ਜਤੀਤਿ ਆਨੇਞ੍ਜਂ. ਸਤਿਯਾ ਪਰਿਗ੍ਗਹਿਤਂ ਚਿਤ੍ਤਂ ਪਮਾਦੇ ਨ ਇਞ੍ਜਤੀਤਿ ਆਨੇਞ੍ਜਂ. ਸਮਾਧਿਨਾ ਪਰਿਗ੍ਗਹਿਤਂ ਚਿਤ੍ਤਂ ਉਦ੍ਧਚ੍ਚੇ ਨ ਇਞ੍ਜਤੀਤਿ ਆਨੇਞ੍ਜਂ. ਪਞ੍ਞਾਯ ਪਰਿਗ੍ਗਹਿਤਂ ਚਿਤ੍ਤਂ ਅਵਿਜ੍ਜਾਯ ਨ ਇਞ੍ਜਤੀਤਿ ਆਨੇਞ੍ਜਂ. ਓਭਾਸਗਤਂ ਚਿਤ੍ਤਂ ਅਵਿਜ੍ਜਨ੍ਧਕਾਰੇ ਨ ਇਞ੍ਜਤੀਤਿ ਆਨੇਞ੍ਜ’’ਨ੍ਤਿ.

ਰੂਪਾਵਚਰਚਤੁਤ੍ਥਜ੍ਝਾਨਮੇਵ ਚ ਰੂਪਵਿਰਾਗਭਾਵਨਾਵਸੇਨ ਪਵਤ੍ਤਿਤਂ, ਆਰਮ੍ਮਣਵਿਭਾਗੇਨ ਚਤੁਬ੍ਬਿਧਂ ਅਰੂਪਾਵਚਰਜ੍ਝਾਨਨ੍ਤਿ ਏਤੇਸਂ ਪਞ੍ਚਨ੍ਨਂ ਝਾਨਾਨਂ ਆਨੇਞ੍ਜਵੋਹਾਰੋ. ਤੇਸਂ ਯਂ ਕਿਞ੍ਚਿ ਪਾਦਕਂ ਕਤ੍ਵਾ ਸਮਾਪਨ੍ਨਾ ਅਰਹਤ੍ਤਫਲਸਮਾਪਤ੍ਤਿ ਆਨੇਞ੍ਜਸਮਾਧੀਤਿ ਪੋਰਾਣਾ.

ਅਭਿਕ੍ਕਨ੍ਤਾਯਾਤਿ ਅਤੀਤਾਯ. ਨਿਕ੍ਖਨ੍ਤੇਤਿ ਨਿਗ੍ਗਤੇ, ਅਪਗਤੇਤਿ ਅਤ੍ਥੋ. ਤੁਣ੍ਹੀ ਅਹੋਸੀਤਿ ਭਗਵਾ ਅਰਿਯੇਨ ਤੁਣ੍ਹੀਭਾਵੇਨ ਤੁਣ੍ਹੀ ਅਹੋਸਿ. ਉਦ੍ਧਸ੍ਤੇ ਅਰੁਣੇਤਿ ਉਗ੍ਗਤੇ ਅਰੁਣੇ, ਅਰੁਣੋ ਨਾਮ ਪੁਰਤ੍ਥਿਮਦਿਸਾਯ ਸੂਰਿਯੋਦਯਤੋ ਪੁਰੇਤਰਮੇਵ ਉਟ੍ਠਿਤੋਭਾਸੋ. ਨਨ੍ਦਿਮੁਖਿਯਾਤਿ ਰਤ੍ਤਿਯਾ ਅਰੁਣਸ੍ਸ ਉਗ੍ਗਤਤ੍ਤਾ ਏਵ ਅਰੁਣਪ੍ਪਭਾਯ ਸੂਰਿਯਾਲੋਕੂਪਜੀਵਿਨੋ ਸਤ੍ਤੇ ਨਨ੍ਦਾਪਨਮੁਖਿਯਾ ਵਿਯ ਰਤ੍ਤਿਯਾ ਜਾਤਾਯ, ਵਿਭਾਯਮਾਨਾਯਾਤਿ ਅਤ੍ਥੋ.

ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਹਿਤ੍ਵਾਤਿ ਯਥਾਪਰਿਚ੍ਛੇਦਂ ਤਤੋ ਆਨੇਞ੍ਜਸਮਾਧਿਤੋ ਅਰਹਤ੍ਤਫਲਸਮਾਪਤ੍ਤਿਤੋ ਉਟ੍ਠਾਯ. ਸਚੇ ਖੋ ਤ੍ਵਂ, ਆਨਨ੍ਦ, ਜਾਨੇਯ੍ਯਾਸੀਤਿ ਭਗਵਾ ‘‘ਇਮੇ ਚ ਭਿਕ੍ਖੂ ਏਤ੍ਤਕਂ ਕਾਲਂ ਇਮਿਨਾ ਨਾਮ ਸਮਾਪਤ੍ਤਿਸੁਖੇਨ ਵੀਤਿਨਾਮੇਨ੍ਤੀ’’ਤਿ, ਆਨਨ੍ਦ, ਯਦਿ ਤ੍ਵਂ ਜਾਨੇਯ੍ਯਾਸਿ. ਏਤ੍ਤਕਮ੍ਪਿ ਤੇ ਨਪ੍ਪਟਿਭਾਸੇਯ੍ਯਾਤਿ ਲੋਕਿਯਪਟਿਸਮ੍ਮੋਦਨਂ ਸਨ੍ਧਾਯ ਯਦਿਦਂ ਤੇ ‘‘ਅਭਿਕ੍ਕਨ੍ਤਾ, ਭਨ੍ਤੇ, ਰਤ੍ਤੀ’’ਤਿਆਦਿਨਾ ਤਿਕ੍ਖਤ੍ਤੁਂ ਪਟਿਭਾਨਂ ਉਪਟ੍ਠਿਤਂ, ਤਯਿਦਂ ਏਤ੍ਤਕਮ੍ਪਿ ਤੇ ਨ ਉਪਟ੍ਠਹੇਯ੍ਯ. ਯਸ੍ਮਾ ਚ ਖੋ ਤ੍ਵਂ, ਆਨਨ੍ਦ, ਸੇਕ੍ਖੋ ਅਸੇਕ੍ਖਂ ਸਮਾਪਤ੍ਤਿਵਿਹਾਰਂ ਨ ਜਾਨਾਸਿ, ਤਸ੍ਮਾ ਮਂ ਇਮੇਸਂ ਭਿਕ੍ਖੂਨਂ ਲੋਕਿਯਪਟਿਸਮ੍ਮੋਦਨਂ ਕਾਰੇਤੁਂ ਉਸ੍ਸੁਕ੍ਕਂ ਆਪਜ੍ਜਿ. ਅਹਂ ਪਨ ਇਮੇਹਿ ਭਿਕ੍ਖੂਹਿ ਸਦ੍ਧਿਂ ਲੋਕੁਤ੍ਤਰਪਟਿਸਮ੍ਮੋਦਨੇਨੇਵ ਤਿਯਾਮਰਤ੍ਤਿਂ ਵੀਤਿਨਾਮੇਸਿਨ੍ਤਿ ਦਸ੍ਸੇਨ੍ਤੋ ਭਗਵਾ ਆਹ – ‘‘ਅਹਞ੍ਚ, ਆਨਨ੍ਦ, ਇਮਾਨਿ ਚ ਪਞ੍ਚ ਭਿਕ੍ਖੁਸਤਾਨਿ ਸਬ੍ਬੇਵ ਆਨੇਞ੍ਜਸਮਾਧਿਨਾ ਨਿਸੀਦਿਮ੍ਹਾ’’ਤਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਤੇਸਂ ਭਿਕ੍ਖੂਨਂ ਅਤ੍ਤਨਾ ਸਮਂ ਆਨੇਞ੍ਜਸਮਾਧਿਸਮਾਪਜ੍ਜਨਸਮਤ੍ਥਤਾਸਙ੍ਖਾਤਂ ਵਸੀਭਾਵਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਇਮਂ ਤੇਸਂ ਭਿਕ੍ਖੂਨਂ ਅਨਵਸੇਸਰਾਗਾਦਿਪ੍ਪਹਾਨਸਂਸਿਦ੍ਧਿਤਾਦਿਸਭਾਵਦੀਪਨਂ ਉਦਾਨਂ ਉਦਾਨੇਸਿ.

ਤਤ੍ਥ ਯਸ੍ਸ ਜਿਤੋ ਕਾਮਕਣ੍ਡਕੋਤਿ ਕੁਸਲਪਕ੍ਖਵਿਜ੍ਝਨਟ੍ਠੇਨ ਕਣ੍ਡਕਭੂਤੋ ਕਿਲੇਸਕਾਮੋ ਯੇਨ ਅਰਿਯਪੁਗ੍ਗਲੇਨ ਅਨਵਸੇਸਂ ਜਿਤੋ ਪਹੀਨੋ, ਏਤੇਨਸ੍ਸ ਅਨੁਨਯਾਭਾਵਂ ਦਸ੍ਸੇਤਿ. ‘‘ਗਾਮਕਣ੍ਟਕੋ’’ਤਿਪਿ ਪਾਠੋ. ਤਸ੍ਸਤ੍ਥੋ – ਗਾਮੇ ਕਣ੍ਟਕੋ ਕਣ੍ਟਕਟ੍ਠਾਨਿਯੋ ਸਕਲੋ ਵਤ੍ਥੁਕਾਮੋ ਯਸ੍ਸ ਜਿਤੋਤਿ. ਜਯੋ ਚਸ੍ਸ ਤਪ੍ਪਟਿਬਦ੍ਧਛਨ੍ਦਰਾਗਪ੍ਪਹਾਨੇਨੇਵ ਵੇਦਿਤਬ੍ਬੋ, ਤੇਨ ਤੇਸਂ ਅਨਾਗਾਮਿਮਗ੍ਗੋ ਵੁਤ੍ਤੋ ਹੋਤਿ. ਅਕ੍ਕੋਸੋ ਚ ਜਿਤੋਤਿ ਸਮ੍ਬਨ੍ਧੋ. ਵਧੋ ਚ ਬਨ੍ਧਨਞ੍ਚਾਤਿ ਏਤ੍ਥਾਪਿ ਏਸੇਵ ਨਯੋ. ਤੇਸੁ ਅਕ੍ਕੋਸਜਯੇਨ ਵਚੀਦੁਚ੍ਚਰਿਤਾਭਾਵੋ, ਇਤਰੇਨ ਕਾਯਦੁਚ੍ਚਰਿਤਾਭਾਵੋ ਦਸ੍ਸਿਤੋ. ਤੇਨ ਤਂਨਿਮਿਤ੍ਤਕਸ੍ਸ ਬ੍ਯਾਪਾਦਸ੍ਸ ਅਨਵਸੇਸਪ੍ਪਹਾਨੇਨ ਤਤਿਯਮਗ੍ਗੋ ਵੁਤ੍ਤੋ ਹੋਤਿ. ਅਥ ਵਾ ਅਕ੍ਕੋਸਾਦਿਜਯਵਚਨੇਨ ਤਤਿਯਮਗ੍ਗੋ ਵੁਤ੍ਤੋ ਹੋਤਿ, ਅਕ੍ਕੋਸਾਦੀਨਂ ਅਚ੍ਚਨ੍ਤਖਮਨਂ ਤਤ੍ਥ ਪਕਾਸਿਤਂ ਹੋਤਿ, ਉਭਯਥਾਪਿ ਨੇਸਂ ਵਿਰੋਧਾਭਾਵਂ ਦਸ੍ਸੇਤਿ. ਪਬ੍ਬਤੋ ਵਿਯ ਸੋ ਠਿਤੋ ਅਨੇਜੋਤਿ ਏਜਾ ਵੁਚ੍ਚਤਿ ਚਲਨਕਿਲੇਸਪਰਿਪਨ੍ਥੋ, ਏਜਾਹੇਤੂਨਂ ਅਵਸੇਸਕਿਲੇਸਾਨਂ ਅਭਾਵੇਨ ਅਨੇਜੋ, ਅਨੇਜਤ੍ਤਾਯੇਵ ਸਬ੍ਬਕਿਲੇਸੇਹਿ ਪਰਵਾਦਵਾਤੇਹਿ ਚ ਅਕਮ੍ਪਨੀਯਤ੍ਤਾ ਠਿਤੋ ਏਕਗ੍ਘਨਪਬ੍ਬਤਸਦਿਸੋ. ਸੁਖਦੁਕ੍ਖੇਸੁ ਨ ਵੇਧਤਿ ਸ ਭਿਕ੍ਖੂਤਿ ਸੋ ਭਿਨ੍ਨਕਿਲੇਸੋ ਭਿਕ੍ਖੁ ਸੁਖਦੁਕ੍ਖਨਿਮਿਤ੍ਤਂ ਨ ਕਮ੍ਪਤੀਤਿ ਹੇਟ੍ਠਾ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਇਤਿ ਭਗਵਾ ਤੇਸਂ ਪਞ੍ਚਸਤਾਨਂ ਭਿਕ੍ਖੂਨਂ ਅਰਹਤ੍ਤਾਧਿਗਮੇਨ ਤਾਦਿਭਾਵਪ੍ਪਤ੍ਤਿਂ ਏਕਜ੍ਝਂ ਕਤ੍ਵਾ ਏਕਪੁਗ੍ਗਲਾਧਿਟ੍ਠਾਨਂ ਉਦਾਨਂ ਉਦਾਨੇਸੀਤਿ.

ਤਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਸਾਰਿਪੁਤ੍ਤਸੁਤ੍ਤਵਣ੍ਣਨਾ

੨੪. ਚਤੁਤ੍ਥੇ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾਤਿ ਆਰਮ੍ਮਣਾਭਿਮੁਖਂ ਸਤਿਂ ਠਪਯਿਤ੍ਵਾ ਮੁਖਸਮੀਪੇ ਕਤ੍ਵਾ. ਤਥਾ ਹਿ ਵਿਭਙ੍ਗੇ ਵੁਤ੍ਤਂ –

‘‘ਅਯਂ ਸਤਿ ਉਪਟ੍ਠਿਤਾ ਹੋਤਿ ਸੁਪਟ੍ਠਿਤਾ ਨਾਸਿਕਗ੍ਗੇ ਵਾ ਮੁਖਨਿਮਿਤ੍ਤੇ ਵਾ, ਤੇਨ ਵੁਚ੍ਚਤਿ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ’’ਤਿ (ਵਿਭ. ੫੩੭).

ਅਥ ਵਾ ‘‘ਪਰੀਤਿ ਪਰਿਗ੍ਗਹਟ੍ਠੋ, ਮੁਖਨ੍ਤਿ ਨਿਯ੍ਯਾਨਟ੍ਠੋ, ਸਤੀਤਿ ਉਪਟ੍ਠਾਨਟ੍ਠੋ, ਤੇਨ ਵੁਚ੍ਚਤਿ ‘ਪਰਿਮੁਖਂ ਸਤਿ’’’ਨ੍ਤਿ. ਏਵਂ ਪਟਿਸਮ੍ਭਿਦਾਯਂ (ਪਟਿ. ਮ. ੧.੧੬੪) ਵੁਤ੍ਤਨਯੇਨਪੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਤਤ੍ਰਾਯਂ ਸਙ੍ਖੇਪਤ੍ਥੋ – ਪਰਿਗ੍ਗਹਿਤਨਿਯ੍ਯਾਨਸਤਿਂ ਕਤ੍ਵਾਤਿ. ਨਿਯ੍ਯਾਨਨ੍ਤਿ ਚ ਸਤਿਯਾ ਓਗਾਹਿਤਬ੍ਬਂ ਆਰਮ੍ਮਣਂ ਦਟ੍ਠਬ੍ਬਂ. ਏਤ੍ਥ ਚ ਪੁਰਿਮੋ ਪਚ੍ਛਿਮੋ ਚ ਅਤ੍ਥੋ ਸਬ੍ਬਸਙ੍ਗਾਹਕਵਸੇਨ, ਇਤਰੋ ਸਮਾਪਤ੍ਤਿਯਾ ਪੁਬ੍ਬਭਾਗਸਮਨ੍ਨਾਹਾਰਵਸੇਨ ਦਟ੍ਠਬ੍ਬੋ. ਸਤੀਤਿ ਵਾ ਸਤਿਸੀਸੇਨ ਝਾਨਂ ਵੁਤ੍ਤਂ ‘‘ਯੇ ਕਾਯਗਤਾਸਤਿਂ ਪਰਿਭੁਞ੍ਜਨ੍ਤੀ’’ਤਿਆਦੀਸੁ (ਅ. ਨਿ. ੧.੬੦੦) ਵਿਯ. ਕਤਮਂ ਪਨ ਤਂ ਝਾਨਨ੍ਤਿ? ਰੂਪਾਵਚਰਚਤੁਤ੍ਥਜ੍ਝਾਨਂ ਪਾਦਕਂ ਕਤ੍ਵਾ ਸਮਾਪਨ੍ਨਂ ਅਰਹਤ੍ਤਫਲਜ੍ਝਾਨਂ. ਕਥਂ ਪਨੇਤਂ ਜਾਨਿਤਬ੍ਬਨ੍ਤਿ? ਆਨੇਞ੍ਜਸਮਾਧਿਯੋਗੇਨ ਥੇਰਸ੍ਸ ਸਵਿਸੇਸਂ ਨਿਚ੍ਚਲਭਾਵਂ ਕੇਨਚਿ ਅਕਮ੍ਪਨੀਯਤਞ੍ਚ ਪਬ੍ਬਤੋਪਮਾਯ ਪਕਾਸੇਨ੍ਤੋ ਭਗਵਾ ਇਮਂ ਉਦਾਨਂ ਅਭਾਸੀਤਿ ਗਾਥਾਯ ਏਵ ਅਯਮਤ੍ਥੋ ਵਿਞ੍ਞਾਯਤਿ. ਨ ਚਾਯਂ ਨਿਸਜ੍ਜਾ ਥੇਰਸ੍ਸ ਸਚ੍ਚਪ੍ਪਟਿਵੇਧਾਯ, ਅਥ ਖੋ ਦਿਟ੍ਠਧਮ੍ਮਸੁਖਵਿਹਾਰਾਯ. ਪੁਬ੍ਬੇਯੇਵ ਹਿ ਸੂਕਰਖਤਲੇਣੇ (ਮ. ਨਿ. ੨.੨੦੧) ਅਤ੍ਤਨੋ ਭਾਗਿਨੇਯ੍ਯਸ੍ਸ ਦੀਘਨਖਪਰਿਬ੍ਬਾਜਕਸ੍ਸ ਭਗਵਤਿ ਧਮ੍ਮਂ ਦੇਸੇਨ੍ਤੇ ਅਯਂ ਮਹਾਥੇਰੋ ਸਚ੍ਚਪ੍ਪਟਿਵੇਧਕਿਚ੍ਚਂ ਮਤ੍ਥਕਂ ਪਾਪੇਸੀਤਿ.

ਏਤਮਤ੍ਥਨ੍ਤਿ ਏਤਂ ਥੇਰਸ੍ਸ ਆਨੇਞ੍ਜਸਮਾਧਿਯੋਗੇਨ ਤਾਦਿਭਾਵਪ੍ਪਤ੍ਤਿਯਾ ਚ ਕੇਨਚਿ ਅਕਮ੍ਪਨੀਯਤਾਸਙ੍ਖਾਤਂ ਅਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ ਤਦਤ੍ਥਵਿਭਾਵਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਯਥਾਪਿ ਪਬ੍ਬਤੋ ਸੇਲੋਤਿ ਯਥਾ ਸਿਲਾਮਯੋ ਏਕਗ੍ਘਨਸਿਲਾਪਬ੍ਬਤੋ, ਨ ਪਂਸੁਪਬ੍ਬਤੋ ਨ ਮਿਸ੍ਸਕਪਬ੍ਬਤੋਤਿ ਅਤ੍ਥੋ. ਅਚਲੋ ਸੁਪ੍ਪਤਿਟ੍ਠਿਤੋਤਿ ਸੁਪ੍ਪਤਿਟ੍ਠਿਤਮੂਲੋ ਪਕਤਿਵਾਤੇਹਿ ਅਚਲੋ ਅਕਮ੍ਪਨੀਯੋ ਹੋਤਿ. ਏਵਂ ਮੋਹਕ੍ਖਯਾ ਭਿਕ੍ਖੁ, ਪਬ੍ਬਤੋਵ ਨ ਵੇਧਤੀਤਿ ਮੋਹਸ੍ਸ ਅਨਵਸੇਸਪ੍ਪਹਾਨਾ ਮੋਹਮੂਲਕਤ੍ਤਾ ਚ ਸਬ੍ਬਾਕੁਸਲਾਨਂ ਪਹੀਨਸਬ੍ਬਾਕੁਸਲੋ ਭਿਕ੍ਖੁ, ਯਥਾ ਸੋ ਪਬ੍ਬਤੋ ਪਕਤਿਵਾਤੇਹਿ, ਏਵਂ ਲੋਕਧਮ੍ਮੇਹਿ ਨ ਵੇਧਤਿ ਨ ਕਮ੍ਪਤਿ. ਮੋਹਕ੍ਖਯੋਤਿ ਵਾ ਯਸ੍ਮਾ ਨਿਬ੍ਬਾਨਂ ਅਰਹਤ੍ਤਞ੍ਚ ਵੁਚ੍ਚਤਿ, ਤਸ੍ਮਾ ਮੋਹਕ੍ਖਯਸ੍ਸ ਹੇਤੁ ਨਿਬ੍ਬਾਨਸ੍ਸ ਅਰਹਤ੍ਤਸ੍ਸ ਵਾ ਅਧਿਗਤਤ੍ਤਾ ਚਤੂਸੁ ਅਰਿਯਸਚ੍ਚੇਸੁ ਸੁਪ੍ਪਤਿਟ੍ਠਿਤੋ ਅਸਮਾਪਨ੍ਨਕਾਲੇਪਿ ਯਥਾਵੁਤ੍ਤਪਬ੍ਬਤੋ ਵਿਯ ਨ ਕੇਨਚਿ ਵੇਧਤਿ, ਪਗੇਵ ਸਮਾਪਨ੍ਨਕਾਲੇਤਿ ਅਧਿਪ੍ਪਾਯੋ.

ਚਤੁਤ੍ਥਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਮਹਾਮੋਗ੍ਗਲ੍ਲਾਨਸੁਤ੍ਤਵਣ੍ਣਨਾ

੨੫. ਪਞ੍ਚਮੇ ਕਾਯਗਤਾਯ ਸਤਿਯਾਤਿ ਕਾਯਾਨੁਪਸ੍ਸਨਾਵਸੇਨ ਕਾਯੇ ਗਤਾਯ ਕਾਯਾਰਮ੍ਮਣਾਯ ਸਤਿਯਾ, ਇਤ੍ਥਮ੍ਭੂਤਲਕ੍ਖਣੇ ਇਦਂ ਕਰਣਵਚਨਂ. ਅਜ੍ਝਤ੍ਤਨ੍ਤਿ ਇਧ ਅਜ੍ਝਤ੍ਤਂ ਨਾਮ ਨਿਯਕਜ੍ਝਤ੍ਤਂ, ਤਸ੍ਮਾ ਅਤ੍ਤਨਿ ਅਤ੍ਤਸਨ੍ਤਾਨੇਤਿ ਅਤ੍ਥੋ. ਅਥ ਵਾ ਯਸ੍ਮਾ ਕਮ੍ਮਟ੍ਠਾਨਭੂਤੋ ਕੇਸਾਦਿਕੋ ਦ੍ਵਤ੍ਤਿਂਸਕੋਟ੍ਠਾਸਸਮੁਦਾਯੋ ਇਧ ਕਾਯੋਤਿ ਅਧਿਪ੍ਪੇਤੋ, ਤਸ੍ਮਾ ਅਜ੍ਝਤ੍ਤਨ੍ਤਿ ਪਦਸ੍ਸ ਗੋਚਰਜ੍ਝਤ੍ਤਨ੍ਤਿ ਅਤ੍ਥੋ ਵੇਦਿਤਬ੍ਬੋ. ਸੂਪਟ੍ਠਿਤਾਯਾਤਿ ਨਿਯਕਜ੍ਝਤ੍ਤਭੂਤੇ ਗੋਚਰਜ੍ਝਤ੍ਤਭੂਤੇ ਵਾ ਕਾਯੇ ਸੁਟ੍ਠੁ ਉਪਟ੍ਠਿਤਾਯ. ਕਾ ਪਨਾਯਂ ਸਤਿ, ਯਾ ‘‘ਅਜ੍ਝਤ੍ਤਂ ਸੂਪਟ੍ਠਿਤਾ’’ਤਿ ਵੁਤ੍ਤਾ? ਯ੍ਵਾਯਂ ਭਗਵਤਾ ‘‘ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ ਲੋਮਾ’’ਤਿਆਦਿਨਾ (ਦੀ. ਨਿ. ੨.੩੭੭; ਮ. ਨਿ. ੧.੧੧੦; ਖੁ. ਪਾ. ੩.ਦ੍ਵਤ੍ਤਿਂਸਾਕਾਰ) ਅਜ੍ਝਤ੍ਤਕੇਸਾਦਿਕੋ ਦ੍ਵਤ੍ਤਿਂਸਾਕਾਰੋ ਕਾਯੋ ਵੁਤ੍ਤੋ, ਤਤ੍ਥ ਯਾ ਪਟਿਕੂਲਮਨਸਿਕਾਰਂ ਪਵਤ੍ਤੇਨ੍ਤਸ੍ਸ ਉਪਚਾਰਪ੍ਪਨਾਵਸੇਨ ਕਾਯੇ ਉਪਟ੍ਠਿਤਾ ਸਤਿ, ਸਾ ‘‘ਕਾਯਗਤਾ ਸਤੀ’’ਤਿ ਵੁਚ੍ਚਤਿ. ਯਥਾ ਚਾਯਂ, ਏਵਂ ਆਨਾਪਾਨਚਤੁਇਰਿਯਾਪਥਸਤਿਸਮ੍ਪਜਞ੍ਞਾਨਂ ਵਸੇਨ ਉਦ੍ਧੁਮਾਤਕਵਿਨੀਲਕਾਦਿਵਸੇਨ ਚ ਮਨਸਿਕਾਰਂ ਪਵਤ੍ਤੇਨ੍ਤਸ੍ਸ ਯਥਾਰਹਂ ਉਪਚਾਰਪ੍ਪਨਾਵਸੇਨ ਕਾਯੇ ਉਪਟ੍ਠਿਤਾ ਸਤਿ ‘‘ਕਾਯਗਤਾ ਸਤੀ’’ਤਿ ਵੁਚ੍ਚਤਿ. ਇਧ ਪਨ ਅਜ੍ਝਤ੍ਤਂ ਕਾਯਗਤਾ ਸਤਿ ਪਥਵੀਆਦਿਕਾ ਚਤਸ੍ਸੋ ਧਾਤੁਯੋ ਸਸਮ੍ਭਾਰਸਙ੍ਖੇਪਾਦੀਸੁ ਚਤੂਸੁ ਯੇਨ ਕੇਨਚਿ ਏਕੇਨਾਕਾਰੇਨ ਵਵਤ੍ਥਪੇਤ੍ਵਾ ਤੇਸਂ ਅਨਿਚ੍ਚਾਦਿਲਕ੍ਖਣਸਲ੍ਲਕ੍ਖਣਵਸੇਨ ਉਪਟ੍ਠਿਤਾ ਵਿਪਸ੍ਸਨਾਸਮ੍ਪਯੁਤ੍ਤਾ ਸਤਿ ‘‘ਕਾਯਗਤਾ ਸਤੀ’’ਤਿ ਅਧਿਪ੍ਪੇਤਾ. ਥੇਰੋ ਪਨ ਤਥਾ ਵਿਪਸ੍ਸਿਤ੍ਵਾ ਅਤ੍ਤਨੋ ਫਲਸਮਾਪਤ੍ਤਿਮੇਵ ਸਮਾਪਜ੍ਜਿਤ੍ਵਾ ਨਿਸੀਦਿ. ਇਧਾਪਿ ਗਾਥਾਯ ਏਵਂ ਇਮਸ੍ਸ ਅਤ੍ਥਸ੍ਸ ਵਿਞ੍ਞਾਤਬ੍ਬਤਾ ‘‘ਨ ਚਾਯਂ ਨਿਸਜ੍ਜਾ’’ਤਿਆਦਿਨਾ ਵੁਤ੍ਤਨਯਾਨੁਸਾਰੇਨ ਯੋਜੇਤਬ੍ਬਾ.

ਏਤਮਤ੍ਥਨ੍ਤਿ ਏਤਂ ਥੇਰਸ੍ਸ ਚਤੁਧਾਤੁਵਵਤ੍ਥਾਨਮੁਖੇਨ ਕਾਯਾਨੁਪਸ੍ਸਨਾਸਤਿਪਟ੍ਠਾਨੇਨ ਵਿਪਸ੍ਸਨਂ ਓਗਾਹੇਤ੍ਵਾ ਫਲਸਮਾਪਤ੍ਤਿਸਮਾਪਜ੍ਜਨਸਙ੍ਖਾਤਂ ਅਤ੍ਥਂ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਇਮਂ ਸਤਿਪਟ੍ਠਾਨਭਾਵਨਾਯ ਨਿਬ੍ਬਾਨਾਧਿਗਮਦੀਪਕਂ ਉਦਾਨਂ ਉਦਾਨੇਸਿ.

ਤਤ੍ਥ ਸਤਿ ਕਾਯਗਤਾ ਉਪਟ੍ਠਿਤਾਤਿ ਪੁਬ੍ਬੇ ਵੁਤ੍ਤਲਕ੍ਖਣਾ ਸਤਿ ਸਦ੍ਧਾਪੁਬ੍ਬਙ੍ਗਮਾਨਂ ਸਮਾਧਿਵੀਰਿਯਪਞ੍ਞਾਨਂ ਯਥਾਸਕਂ ਕਿਚ੍ਚਨਿਪ੍ਫਾਦਨੇਨ ਸਹਾਯਭਾਵਂ ਆਪਨ੍ਨਤ੍ਤਾ ਪਹੀਨਪ੍ਪਟਿਪਕ੍ਖਾ ਤਤੋ ਏਵ ਤਿਕ੍ਖਵਿਸਦਭੂਤਾ ਚ ਯਥਾਵੁਤ੍ਤਕਾਯਸਂਵਰਣਵਸੇਨ ਏਕਤ੍ਥਸਮੋਸਰਣਵਸੇਨ ਚ ਅਵਿਪਰੀਤਸਭਾਵਂ ਸਲ੍ਲਕ੍ਖੇਨ੍ਤੀ ਉਪਗਨ੍ਤ੍ਵਾ ਠਿਤਾ ਹੋਤਿ, ਏਤੇਨ ਕਾਯਸਙ੍ਖਾਤਾਨਂ ਚਤੁਨ੍ਨਂ ਧਾਤੂਨਂ ਤਨ੍ਨਿਸ੍ਸਿਤਾਨਞ੍ਚ ਉਪਾਦਾਰੂਪਾਨਂ ਸਲ੍ਲਕ੍ਖਣਵਸੇਨ, ਪਚ੍ਚਯੇ ਵਵਤ੍ਥਪੇਤ੍ਵਾ ਤਤੋ ਪਰਂ ਤੇਸਂ ਅਨਿਚ੍ਚਾਦਿਲਕ੍ਖਣਸਲ੍ਲਕ੍ਖਣਵਸੇਨ ਚ ਪਵਤ੍ਤਂ ਞਾਣਪਰਮ੍ਪਰਾਗਤਂ ਸਤਿਂ ਦਸ੍ਸੇਤਿ, ਸਤਿਸੀਸੇਨ ਵਾ ਤਂਸਮ੍ਪਯੁਤ੍ਤਂ ਪਰਿਞ੍ਞਾਤ੍ਤਯਪਰਿਯਾਪਨ੍ਨਞਾਣਪਰਮ੍ਪਰਮੇਵ ਦਸ੍ਸੇਤਿ. ਛਸੁ ਫਸ੍ਸਾਯਤਨੇਸੁ ਸਂਵੁਤੋਤਿ ਯਥਾਵੁਤ੍ਤਾਯ ਕਾਯੇ ਉਪਟ੍ਠਿਤਾਯ ਸਤਿਯਾ ਸਮਨ੍ਨਾਗਤੋ ਚਕ੍ਖਾਦੀਸੁ ਫਸ੍ਸਸ੍ਸ ਕਾਰਣਭੂਤੇਸੁ ਛਸੁ ਦ੍ਵਾਰੇਸੁ ਕਾਯਾਨੁਪਸ੍ਸਨਾਯ ਅਭਾਵਿਤਾਯ ਉਪ੍ਪਜ੍ਜਨਾਰਹਾਨਂ ਅਭਿਜ੍ਝਾਦੀਨਂ ਤਸ੍ਸਾ ਭਾਵਿਤਤ੍ਤਾ ਞਾਣਪ੍ਪਵਤ੍ਤਿਂ ਪਟਿਵੇਧੇਨ੍ਤੋ ਤੇ ਪਿਦਹਨ੍ਤੋ ‘‘ਤਤ੍ਥ ਸਂਵੁਤੋ’’ਤਿ ਵੁਚ੍ਚਤਿ, ਏਤੇਨ ਞਾਣਸਂਵਰਂ ਦਸ੍ਸੇਤਿ.

ਸਤਤਂ ਭਿਕ੍ਖੁ ਸਮਾਹਿਤੋਤਿ ਸੋ ਭਿਕ੍ਖੁ ਏਵਂ ਉਪਟ੍ਠਿਤਸ੍ਸਤਿ ਸਬ੍ਬਤ੍ਥ ਚ ਸਂਵੁਤੋ ਪੁਥੁਤ੍ਤਾਰਮ੍ਮਣੇ ਚਿਤ੍ਤਂ ਅਵਿਸ੍ਸਜ੍ਜੇਤ੍ਵਾ ਅਨਿਚ੍ਚਾਦਿਵਸੇਨ ਸਮ੍ਮਸਨ੍ਤੋ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਞਾਣੇ ਤਿਕ੍ਖੇ ਸੂਰੇ ਵਹਨ੍ਤੇ ਵਿਪਸ੍ਸਨਾਸਮਾਧਿਨਾ ਤਾਵ ਸਤਤਂ ਨਿਰਨ੍ਤਰਂ ਸਮਾਹਿਤੋ ਅਨੁਲੋਮਞਾਣਾਨਨ੍ਤਰਂ ਗੋਤ੍ਰਭੁਞਾਣੋਦਯਤੋ ਪਟ੍ਠਾਯ. ਜਞ੍ਞਾ ਨਿਬ੍ਬਾਨਮਤ੍ਤਨੋਤਿ ਅਞ੍ਞੇਸਂ ਪੁਥੁਜ੍ਜਨਾਨਂ ਸੁਪਿਨਨ੍ਤੇਪਿ ਅਗੋਚਰਭਾਵਤੋ, ਅਰਿਯਾਨਂ ਪਨ ਤਸ੍ਸ ਤਸ੍ਸੇਵ ਆਵੇਣਿਕਤ੍ਤਾ ਅਤ੍ਤਸਦਿਸਤ੍ਤਾ ਚ ‘‘ਅਤ੍ਤਾ’’ਤਿ ਲਦ੍ਧਵੋਹਾਰਸ੍ਸ ਮਗ੍ਗਫਲਞਾਣਸ੍ਸ ਸਾਤਿਸਯਵਿਸਯਭਾਵਤੋ ਏਕਨ੍ਤਸੁਖਾਵਹਂ ਨਿਬ੍ਬਾਨਂ ਅਸਙ੍ਖਤਧਾਤੁ ‘‘ਅਤ੍ਤਨੋ’’ਤਿ ਵੁਤ੍ਤਂ, ਤਂ ਨਿਬ੍ਬਾਨਂ ਜਞ੍ਞਾ ਜਾਨੇਯ੍ਯ, ਮਗ੍ਗਫਲਞਾਣੇਹਿ ਪਟਿਵਿਜ੍ਝੇਯ੍ਯ, ਸਚ੍ਛਿਕਰੇਯ੍ਯਾਤਿ ਅਤ੍ਥੋ. ਏਤੇਨ ਅਰਿਯਾਨਂ ਨਿਬ੍ਬਾਨੇ ਅਧਿਮੁਤ੍ਤਤਂ ਦਸ੍ਸੇਤਿ. ਅਰਿਯਾ ਹਿ ਅਧਿਚਿਤ੍ਤਪ੍ਪਵਤ੍ਤਿਕਾਲੇਪਿ ਏਕਨ੍ਤੇਨੇਵ ਨਿਬ੍ਬਾਨੇ ਨਿਨ੍ਨਪੋਣਪਬ੍ਭਾਰਭਾਵੇਨ ਵਿਹਰਨ੍ਤਿ. ਏਤ੍ਥ ਚ ਯਸ੍ਸ ਸਤਿ ਕਾਯਗਤਾ ਉਪਟ੍ਠਿਤਾ, ਸੋ ਭਿਕ੍ਖੁ ਛਸੁ ਫਸ੍ਸਾਯਤਨੇਸੁ ਸਂਵੁਤੋ, ਤਤੋ ਏਵ ਸਤਤਂ ਸਮਾਹਿਤੋ ਅਤ੍ਤਪਚ੍ਚਕ੍ਖਕਰਣੇਨ ਨਿਬ੍ਬਾਨਂ ਅਤ੍ਤਨੋ ਜਾਨੇਯ੍ਯਾਤਿ ਏਵਂ ਗਾਥਾਪਦਾਨਂ ਸਮ੍ਬਨ੍ਧੋ ਵੇਦਿਤਬ੍ਬੋ. ਏਵਂ ਕਾਯਾਨੁਪਸ੍ਸਨਾਸਤਿਪਟ੍ਠਾਨਮੁਖੇਨ ਯਾਵ ਅਰਹਤ੍ਤਾ ਏਕਸ੍ਸ ਭਿਕ੍ਖੁਨੋ ਨਿਯ੍ਯਾਨਮਗ੍ਗਂ ਦਸ੍ਸੇਤਿ ਧਮ੍ਮਰਾਜਾ.

ਅਪਰੋ ਨਯੋ – ਸਤਿ ਕਾਯਗਤਾ ਉਪਟ੍ਠਿਤਾਤਿ ਏਤੇਨ ਕਾਯਾਨੁਪਸ੍ਸਨਾਸਤਿਪਟ੍ਠਾਨਂ ਦਸ੍ਸੇਤਿ. ਛਸੁ ਫਸ੍ਸਾਯਤਨੇਸੁ ਸਂਵੁਤੋਤਿ ਫਸ੍ਸੋ ਆਯਤਨਂ ਕਾਰਣਂ ਏਤੇਸਨ੍ਤਿ ਫਸ੍ਸਾਯਤਨਾਨਿ, ਤੇਸੁ ਫਸ੍ਸਾਯਤਨੇਸੁ. ਫਸ੍ਸਹੇਤੁਕੇਸੁ ਫਸ੍ਸਪਚ੍ਚਯਾ ਨਿਬ੍ਬਤ੍ਤੇਸੁ ਛਸੁ ਚਕ੍ਖੁਸਮ੍ਫਸ੍ਸਜਾਦਿਵੇਦਯਿਤੇਸੁ ਤਣ੍ਹਾਦੀਨਂ ਅਪ੍ਪਵਤ੍ਤਿਯਾ ਸਂਵੁਤੋ, ਏਤੇਨ ਵੇਦਨਾਨੁਪਸ੍ਸਨਾਸਤਿਪਟ੍ਠਾਨਂ ਦਸ੍ਸੇਤਿ. ਸਤਤਂ ਭਿਕ੍ਖੁ ਸਮਾਹਿਤੋਤਿ ਸਤਤਂ ਨਿਚ੍ਚਕਾਲਂ ਨਿਰਨ੍ਤਰਂ ਵਿਕ੍ਖੇਪਾਭਾਵਤੋ ਸਮਾਹਿਤੋ ਭਿਕ੍ਖੁ. ਸੋ ਚਾਯਂ ਅਵਿਕ੍ਖੇਪੋ ਸਬ੍ਬਸੋ ਸਤਿਪਟ੍ਠਾਨਭਾਵਨਾਯ ਮਤ੍ਥਕਪ੍ਪਤ੍ਤਾਯ ਹੋਤਿ. ਸਮ੍ਮਸਨ੍ਤੋ ਹਿ ਅਤੀਤਾਦਿਭੇਦਭਿਨ੍ਨੇਸੁ ਪਞ੍ਚੁਪਾਦਾਨਕ੍ਖਨ੍ਧੇਸੁ ਅਨਵਸੇਸਤੋਵ ਪਰਿਗ੍ਗਹੇਤ੍ਵਾ ਸਮ੍ਮਸਤੀਤਿ. ਏਤੇਨ ਸੇਸਸਤਿਪਟ੍ਠਾਨੇ ਦਸ੍ਸੇਤਿ. ਜਞ੍ਞਾ ਨਿਬ੍ਬਾਨਮਤ੍ਤਨੋਤਿ ਏਵਂ ਚਤੁਸਤਿਪਟ੍ਠਾਨਭਾਵਨਂ ਮਤ੍ਥਕਂ ਪਾਪੇਤ੍ਵਾ ਠਿਤੋ ਭਿਨ੍ਨਕਿਲੇਸੋ ਭਿਕ੍ਖੁ ਅਤ੍ਤਨੋ ਕਿਲੇਸਨਿਬ੍ਬਾਨਂ ਪਚ੍ਚਵੇਕ੍ਖਣਞਾਣੇਨ ਸਯਮੇਵ ਜਾਨੇਯ੍ਯਾਤਿ ਅਤ੍ਥੋ.

ਅਥ ਵਾ ਸਤਿ ਕਾਯਗਤਾ ਉਪਟ੍ਠਿਤਾਤਿ ਅਤ੍ਤਨੋ ਪਰੇਸਞ੍ਚ ਕਾਯਸ੍ਸ ਯਥਾਸਭਾਵਪਰਿਞ੍ਞਾਦੀਪਨੇਨ ਥੇਰਸ੍ਸ ਸਤਿਵੇਪੁਲ੍ਲਪ੍ਪਤ੍ਤਿ ਦੀਪਿਤਾ. ਛਸੁ ਫਸ੍ਸਾਯਤਨੇਸੁ ਸਂਵੁਤੋਤਿ ਚਕ੍ਖਾਦੀਸੁ ਛਸੁ ਦ੍ਵਾਰੇਸੁ ਅਚ੍ਚਨ੍ਤਸਂਵਰਦੀਪਨੇਨ ਸਤਤਵਿਹਾਰਿਵਸੇਨ ਥੇਰਸ੍ਸ ਸਮ੍ਪਜਞ੍ਞਪ੍ਪਕਾਸਿਨੀ ਪਞ੍ਞਾਵੇਪੁਲ੍ਲਪ੍ਪਤ੍ਤਿ ਦੀਪਿਤਾ. ਸਤਤਂ ਭਿਕ੍ਖੁ ਸਮਾਹਿਤੋਤਿ ਸਮਾਪਤ੍ਤਿਬਹੁਲਤਾਦਸ੍ਸਨੇਨ ਨਵਾਨੁਪੁਬ੍ਬਵਿਹਾਰਸਮਾਪਤ੍ਤਿਯੋ ਦਸ੍ਸਿਤਾ. ਏਵਂਭੂਤੋ ਪਨ ਭਿਕ੍ਖੁ ਜਞ੍ਞਾ ਨਿਬ੍ਬਾਨਮਤ੍ਤਨੋਤਿ ਕਤਕਿਚ੍ਚਤ੍ਤਾ ਉਤ੍ਤਰਿ ਕਰਣੀਯਾਭਾਵਤੋ ਕੇਵਲਂ ਅਤ੍ਤਨੋ ਅਨੁਪਾਦਿਸੇਸਨਿਬ੍ਬਾਨਮੇਵ ਜਾਨੇਯ੍ਯ ਚਿਨ੍ਤੇਯ੍ਯ, ਅਞ੍ਞਮ੍ਪਿ ਤਸ੍ਸ ਚਿਨ੍ਤੇਤਬ੍ਬਂ ਨਤ੍ਥੀਤਿ ਅਧਿਪ੍ਪਾਯੋ.

ਪਞ੍ਚਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਪਿਲਿਨ੍ਦਵਚ੍ਛਸੁਤ੍ਤਵਣ੍ਣਨਾ

੨੬. ਛਟ੍ਠੇ ਪਿਲਿਨ੍ਦਵਚ੍ਛੋਤਿ ਪਿਲਿਨ੍ਦਾਤਿਸ੍ਸ ਨਾਮਂ, ਵਚ੍ਛੋਤਿ ਗੋਤ੍ਤਵਸੇਨ ਥੇਰਂ ਸਞ੍ਜਾਨਨ੍ਤਿ. ਵਸਲਵਾਦੇਨ ਸਮੁਦਾਚਰਤੀਤਿ ‘‘ਏਹਿ, ਵਸਲ, ਅਪੇਹਿ, ਵਸਲਾ’’ਤਿਆਦਿਨਾ ਭਿਕ੍ਖੂ ਵਸਲਵਾਦੇਨ ਵੋਹਰਤਿ ਆਲਪਤਿ. ਸਮ੍ਬਹੁਲਾ ਭਿਕ੍ਖੂਤਿ ਬਹੂ ਭਿਕ੍ਖੂ. ਤੇ ਥੇਰਂ ਤਥਾ ਸਮੁਦਾਚਰਨ੍ਤਂ ਦਿਸ੍ਵਾ ‘‘ਅਰਹਾਵ ਸਮਾਨੋ ਅਪ੍ਪਹੀਨਵਾਸਨਤ੍ਤਾ ਏਵਂ ਭਣਤੀ’’ਤਿ ਅਜਾਨਨ੍ਤਾ ‘‘ਦੋਸਨ੍ਤਰੋ ਮਞ੍ਞੇ ਅਯਂ ਥੇਰੋ ਏਵਂ ਸਮੁਦਾਚਰਤੀ’’ਤਿ ਚਿਨ੍ਤੇਤ੍ਵਾ ਉਲ੍ਲਪਨਾਧਿਪ੍ਪਾਯਾ ਤਂ ਤਤੋ ਵੁਟ੍ਠਾਪੇਤੁਂ ਭਗਵਤੋ ਆਰੋਚੇਸੁਂ. ਤੇਨ ਵੁਤ੍ਤਂ – ‘‘ਆਯਸ੍ਮਾ, ਭਨ੍ਤੇ, ਪਿਲਿਨ੍ਦਵਚ੍ਛੋ ਭਿਕ੍ਖੂ ਵਸਲਵਾਦੇਨ ਸਮੁਦਾਚਰਤੀ’’ਤਿ. ਕੇਚਿ ਪਨਾਹੁ – ‘‘ਇਮਂ ਥੇਰਂ ਭਿਕ੍ਖੂ ‘ਅਰਹਾ’ਤਿ ਸਞ੍ਜਾਨਨ੍ਤਿ, ਅਯਞ੍ਚ ਭਿਕ੍ਖੂ ਫਰੁਸਵਚਨੇਨ ਏਵਂ ਸਮੁਦਾਚਰਤਿ, ‘ਅਭੂਤੋ ਏਵ ਨੁ ਖੋ ਇਮਸ੍ਮਿਂ ਉਤ੍ਤਰਿਮਨੁਸ੍ਸਧਮ੍ਮੋ’ਤਿ ਵਾਸਨਾਵਸੇਨ ਤਸ੍ਸ ਤਥਾ ਸਮੁਦਾਚਾਰਂ ਅਜਾਨਨ੍ਤਾ ਅਰਿਯਭਾਵਞ੍ਚਸ੍ਸ ਅਸਦ੍ਦਹਨ੍ਤਾ ਉਜ੍ਝਾਨਸਞ੍ਞਿਨੋ ਭਗਵਤੋ ਤਮਤ੍ਥਂ ਆਰੋਚੇਸੁ’’ਨ੍ਤਿ. ਭਗਵਾ ਥੇਰਸ੍ਸ ਦੋਸਨ੍ਤਰਾਭਾਵਂ ਪਕਾਸੇਤੁਕਾਮੋ ਏਕੇਨ ਭਿਕ੍ਖੁਨਾ ਤਂ ਪਕ੍ਕੋਸਾਪੇਤ੍ਵਾ ਸਮ੍ਮੁਖਾ ਤਸ੍ਸ ‘‘ਪੁਬ੍ਬਾਚਿਣ੍ਣਵਸੇਨਾਯਂ ਤਥਾ ਸਮੁਦਾਚਰਤਿ, ਨ ਫਰੁਸਵਚਨਾਧਿਪ੍ਪਾਯੋ’’ਤਿ ਆਹ. ਤੇਨ ਵੁਤ੍ਤਂ – ‘‘ਅਥ ਖੋ ਭਗਵਾ ਅਞ੍ਞਤਰਂ ਭਿਕ੍ਖੁਂ ਆਮਨ੍ਤੇਸੀ’’ਤਿਆਦਿ.

ਤਤ੍ਥ ਪੁਬ੍ਬੇਨਿਵਾਸਂ ਮਨਸਿ ਕਰਿਤ੍ਵਾਤਿ ਸਤ੍ਥਾ ‘‘ਸਚ੍ਚਂ ਕਿਰ ਤ੍ਵਂ, ਵਚ੍ਛ, ਭਿਕ੍ਖੂ ਵਸਲਵਾਦੇਨ ਸਮੁਦਾਚਰਸੀ’’ਤਿ ਥੇਰਂ ਪੁਚ੍ਛਿਤ੍ਵਾ ਤੇਨ ‘‘ਏਵਂ, ਭਨ੍ਤੇ’’ਤਿ ਵੁਤ੍ਤੇ ‘‘ਅਯਂ ਵਚ੍ਛੋ ਕਿਲੇਸਵਾਸਨਾਯ ਵਸਲਵਾਦਂ ਨ ਪਰਿਚ੍ਚਜਤਿ, ਕਿਂ ਨੁ ਖੋ ਅਤੀਤੇਸੁਪਿ ਅਤ੍ਤਭਾਵੇਸੁ ਬ੍ਰਾਹ੍ਮਣਜਾਤਿਕੋ ਅਹੋਸੀ’’ਤਿ ਆਵਜ੍ਜੇਨ੍ਤੋ ਪੁਬ੍ਬੇਨਿਵਾਸਞਾਣੇਨ ਸਬ੍ਬਞ੍ਞੁਤਞ੍ਞਾਣੇਨ ਵਾ ਤਸ੍ਸ ਪੁਬ੍ਬੇਨਿਵਾਸਂ ਅਤੀਤਾਸੁ ਜਾਤੀਸੁ ਨਿਵੁਤ੍ਥਕ੍ਖਨ੍ਧਸਨ੍ਤਾਨਂ ਮਨਸਿ ਕਰਿਤ੍ਵਾ ਹਤ੍ਥਤਲੇ ਠਪਿਤਂ ਆਮਲਕਂ ਵਿਯ ਪਚ੍ਚਕ੍ਖਕਰਣਵਸੇਨ ਅਤ੍ਤਨੋ ਮਨਸਿ ਕਤ੍ਵਾ. ਭਿਕ੍ਖੂ ਆਮਨ੍ਤੇਸੀਤਿ ਤੇ ਭਿਕ੍ਖੂ ਸਞ੍ਞਾਪੇਤੁਂ ਆਲਪਿ, ਅਭਾਸਿ. ਤੇਨ ਵੁਤ੍ਤਂ ‘‘ਮਾ ਖੋ ਤੁਮ੍ਹੇ, ਭਿਕ੍ਖਵੇ’’ਤਿਆਦਿ.

ਤਤ੍ਥ ਮਾਤਿ ਪਟਿਸੇਧੇ ਨਿਪਾਤੋ, ਤਸ੍ਸ ‘‘ਉਜ੍ਝਾਯਿਤ੍ਥਾ’’ਤਿ ਇਮਿਨਾ ਸਮ੍ਬਨ੍ਧੋ. ਮਾ ਉਜ੍ਝਾਯਿਤ੍ਥਾਤਿ ਮਾ ਹੇਟ੍ਠਾ ਕਤ੍ਵਾ ਚਿਨ੍ਤਯਿਤ੍ਥ, ਓਲੋਕਯਿਤ੍ਥਾਤਿ ਅਤ੍ਥੋ. ਵਚ੍ਛਸ੍ਸ ਭਿਕ੍ਖੁਨੋਤਿ ਚ ਉਜ੍ਝਾਯਨਸ੍ਸ ਉਸੂਯਨਤ੍ਥਤ੍ਤਾ ਸਮ੍ਪਦਾਨਵਚਨਂ. ਇਦਾਨਿਸ੍ਸ ਅਨੁਜ੍ਝਾਯਿਤਬ੍ਬੇ ਕਾਰਣਂ ਦਸ੍ਸੇਨ੍ਤੋ ‘‘ਨ, ਭਿਕ੍ਖਵੇ, ਵਚ੍ਛੋ ਦੋਸਨ੍ਤਰੋ ਭਿਕ੍ਖੂ ਵਸਲਵਾਦੇਨ ਸਮੁਦਾਚਰਤੀ’’ਤਿ ਆਹ. ਤਸ੍ਸਤ੍ਥੋ – ਭਿਕ੍ਖਵੇ, ਅਯਂ ਵਚ੍ਛੋ ਦੋਸਨ੍ਤਰੋ ਦੋਸਚਿਤ੍ਤੋ ਦੋਸੇਨ ਬ੍ਯਾਪਾਦੇਨ ਦੂਸਿਤਚਿਤ੍ਤੋ ਹੁਤ੍ਵਾ ਭਿਕ੍ਖੂ ਵਸਲਵਾਦੇਨ ਨ ਸਮੁਦਾਚਰਤਿ, ਮਗ੍ਗੇਨੇਵ ਚਸ੍ਸ ਬ੍ਯਾਪਾਦੋ ਸਮੁਗ੍ਘਾਤਿਤੋ. ਏਵਂ ਅਦੋਸਨ੍ਤਰਤ੍ਤੇਪਿ ਤਸ੍ਸ ਤਥਾ ਸਮੁਦਾਚਾਰਸ੍ਸ ਪੁਰਿਮਜਾਤਿਸਿਦ੍ਧਂ ਕਾਰਣਂ ਦਸ੍ਸੇਨ੍ਤੋ ‘‘ਵਚ੍ਛਸ੍ਸ, ਭਿਕ੍ਖਵੇ’’ਤਿਆਦਿਮਾਹ.

ਤਤ੍ਥ ਅਬ੍ਬੋਕਿਣ੍ਣਾਨੀਤਿ ਖਤ੍ਤਿਯਾਦਿਜਾਤਿਅਨ੍ਤਰੇਹਿ ਅਵੋਮਿਸ੍ਸਾਨਿ ਅਨਨ੍ਤਰਿਤਾਨਿ. ਪਞ੍ਚ ਜਾਤਿਸਤਾਨਿ ਬ੍ਰਾਹ੍ਮਣਕੁਲੇ ਪਚ੍ਚਾਜਾਤਾਨੀਤਿ ਸਬ੍ਬਾਨਿ ਤਾਨਿ ਵਚ੍ਛਸ੍ਸ ਪਞ੍ਚ ਜਾਤਿਸਤਾਨਿ ਪਟਿਪਾਟਿਯਾ ਬ੍ਰਾਹ੍ਮਣਕੁਲੇ ਏਵ ਜਾਤਾਨਿ, ਅਹੇਸੁਨ੍ਤਿ ਅਤ੍ਥੋ. ਸੋ ਤਸ੍ਸ ਵਸਲਵਾਦੋ ਦੀਘਰਤ੍ਤਂ ਸਮੁਦਾਚਿਣ੍ਣੋਤਿ ਯੋ ਏਤਰਹਿ ਖੀਣਾਸਵੇਨਪਿ ਸਤਾ ਪਵਤ੍ਤਿਯਤਿ, ਸੋ ਤਸ੍ਸ ਵਚ੍ਛਸ੍ਸ ਭਿਕ੍ਖੁਨੋ ਵਸਲਵਾਦੋ ਦੀਘਰਤ੍ਤਂ ਇਤੋ ਜਾਤਿਤੋ ਪਟ੍ਠਾਯ ਉਦ੍ਧਂ ਆਰੋਹਨਵਸੇਨ ਪਞ੍ਚਜਾਤਿਸਤਮਤ੍ਤਂ ਕਾਲਂ ਬ੍ਰਾਹ੍ਮਣਜਾਤਿਕਤ੍ਤਾ ਸਮੁਦਾਚਿਣ੍ਣੋ ਸਮੁਦਾਚਰਿਤੋ ਅਹੋਸਿ. ਬ੍ਰਾਹ੍ਮਣਾ ਹਿ ਜਾਤਿਸਿਦ੍ਧੇਨ ਮਾਨੇਨ ਥਦ੍ਧਾ ਅਞ੍ਞਂ ਵਸਲਵਾਦੇਨ ਸਮੁਦਾਚਰਨ੍ਤਿ. ‘‘ਅਜ੍ਝਾਚਿਣ੍ਣੋ’’ਤਿਪਿ ਪਠਨ੍ਤਿ, ਸੋ ਏਵ ਅਤ੍ਥੋ. ਤੇਨਾਤਿ ਤੇਨ ਦੀਘਰਤ੍ਤਂ ਤਥਾ ਸਮੁਦਾਚਿਣ੍ਣਭਾਵੇਨ, ਏਤੇਨਸ੍ਸ ਤਥਾ ਸਮੁਦਾਚਾਰਸ੍ਸ ਕਾਰਣਂ ਵਾਸਨਾਤਿ ਦਸ੍ਸੇਤਿ. ਕਾ ਪਨਾਯਂ ਵਾਸਨਾ ਨਾਮ? ਯਂ ਕਿਲੇਸਰਹਿਤਸ੍ਸਾਪਿ ਸਨ੍ਤਾਨੇ ਅਪ੍ਪਹੀਨਕਿਲੇਸਾਨਂ ਸਮਾਚਾਰਸਦਿਸਸਮਾਚਾਰਹੇਤੁਭੂਤਂ, ਅਨਾਦਿਕਾਲਭਾਵਿਤੇਹਿ ਕਿਲੇਸੇਹਿ ਆਹਿਤਂ ਸਾਮਤ੍ਥਿਯਮਤ੍ਤਂ, ਤਥਾਰੂਪਾ ਅਧਿਮੁਤ੍ਤੀਤਿ ਵਦਨ੍ਤਿ. ਤਂ ਪਨੇਤਂ ਅਭਿਨੀਹਾਰਸਮ੍ਪਤ੍ਤਿਯਾ ਞੇਯ੍ਯਾਵਰਣਪ੍ਪਹਾਨਵਸੇਨ ਯਤ੍ਥ ਕਿਲੇਸਾ ਪਹੀਨਾ, ਤਤ੍ਥ ਭਗਵਤੋ ਸਨ੍ਤਾਨੇ ਨਤ੍ਥਿ. ਯਤ੍ਥ ਪਨ ਤਥਾ ਕਿਲੇਸਾ ਨ ਪਹੀਨਾ, ਤਤ੍ਥ ਸਾਵਕਾਨਂ ਪਚ੍ਚੇਕਬੁਦ੍ਧਾਨਞ੍ਚ ਸਨ੍ਤਾਨੇ ਅਤ੍ਥਿ, ਤਤੋ ਤਥਾਗਤੋਵ ਅਨਾਵਰਣਞਾਣਦਸ੍ਸਨੋ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਆਯਸ੍ਮਤੋ ਪਿਲਿਨ੍ਦਵਚ੍ਛਸ੍ਸ ਸਤਿਪਿ ਵਸਲਸਮੁਦਾਚਾਰੇ ਦੋਸਨ੍ਤਰਾਭਾਵਸਙ੍ਖਾਤਂ ਅਤ੍ਥਂ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਤਸ੍ਸ ਅਗ੍ਗਫਲਾਧਿਗਮਵਿਭਾਵਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਯਮ੍ਹਿ ਨ ਮਾਯਾ ਵਸਤਿ ਨ ਮਾਨੋਤਿ ਯਸ੍ਮਿਂ ਅਰਿਯਪੁਗ੍ਗਲੇ ਸਨ੍ਤਦੋਸਪ੍ਪਟਿਚ੍ਛਾਦਨਲਕ੍ਖਣਾ ਮਾਯਾ, ‘‘ਸੇਯ੍ਯੋਹਮਸ੍ਮੀ’’ਤਿਆਦਿਨਾ ਸਮ੍ਪਗ੍ਗਹਵਸੇਨ ਪਵਤ੍ਤੋ ਉਣ੍ਣਤਿਲਕ੍ਖਣੋ ਮਾਨੋ ਚ ਨ ਵਸਤਿ, ਮਗ੍ਗੇਨ ਸਮੁਗ੍ਘਾਤਿਤਤ੍ਤਾ ਨ ਪਵਤ੍ਤਤਿ ਨ ਉਪ੍ਪਜ੍ਜਤਿ. ਯੋ ਵੀਤਲੋਭੋ ਅਮਮੋ ਨਿਰਾਸੋਤਿ ਯੋ ਚ ਰਾਗਾਦਿਪਰਿਯਾਯਵਸੇਨ ਪਵਤ੍ਤਸ੍ਸ ਆਰਮ੍ਮਣਗ੍ਗਹਣਲਕ੍ਖਣਸ੍ਸ ਲੋਭਸ੍ਸ ਸਬ੍ਬਥਾ ਵਿਗਤਤ੍ਤਾ ਵੀਤਲੋਭੋ, ਤਤੋ ਏਵ ਰੂਪਾਦੀਸੁ ਕਤ੍ਥਚਿ ਮਮਾਯਨਾਭਾਵਤੋ ਅਮਮੋ ਅਪਰਿਗ੍ਗਹੋ, ਅਨਾਗਤਾਨਮ੍ਪਿ ਭਵਾਦੀਨਂ ਅਨਾਸੀਸਨਤੋ ਨਿਰਾਸੋ. ਪਨੁਣ੍ਣਕੋਧੋਤਿ ਕੁਜ੍ਝਨਲਕ੍ਖਣਸ੍ਸ ਕੋਧਸ੍ਸ ਅਨਾਗਾਮਿਮਗ੍ਗੇਨ ਸਬ੍ਬਸੋ ਪਹੀਨਤ੍ਤਾ ਪਨੁਣ੍ਣਕੋਧੋ ਸਮੁਚ੍ਛਿਨ੍ਨਾਘਾਤੋ. ਅਭਿਨਿਬ੍ਬੁਤਤ੍ਤੋਤਿ ਯੋ ਏਵਂ ਮਾਯਾਮਾਨਲੋਭਕੋਧਾਨਂ ਸਮੁਗ੍ਘਾਤੇਨ ਤਦੇਕਟ੍ਠਤਾਯ ਸਬ੍ਬਸ੍ਸ ਸਂਕਿਲੇਸਪਕ੍ਖਸ੍ਸ ਸੁਪ੍ਪਹੀਨਤ੍ਤਾ ਸਬ੍ਬਸੋ ਕਿਲੇਸਪਰਿਨਿਬ੍ਬਾਨੇਨ ਅਭਿਨਿਬ੍ਬੁਤਚਿਤ੍ਤੋ ਸੀਤਿਭੂਤੋ. ਸੋ ਬ੍ਰਾਹ੍ਮਣੋ ਸੋ ਸਮਣੋ ਸ ਭਿਕ੍ਖੂਤਿ ਸੋ ਏਵਰੂਪੋ ਖੀਣਾਸਵੋ ਸਬ੍ਬਸੋ ਬਾਹਿਤਪਾਪਤ੍ਤਾ ਬ੍ਰਾਹ੍ਮਣੋ, ਸੋ ਏਵ ਸਮਿਤਪਾਪਤ੍ਤਾ ਸਮਚਰਿਯਾਯ ਚ ਸਮਣੋ, ਸੋ ਏਵ ਚ ਸਬ੍ਬਸੋ ਭਿਨ੍ਨਕਿਲੇਸਤ੍ਤਾ ਭਿਕ੍ਖੁ ਨਾਮ. ਏਵਂਭੂਤੋ ਚ, ਭਿਕ੍ਖਵੇ, ਵਚ੍ਛੋ ਸੋ ਕਥਂ ਦੋਸਨ੍ਤਰੋ ਕਿਞ੍ਚਿ ਕਾਯਕਮ੍ਮਾਦਿਂ ਪਵਤ੍ਤੇਯ੍ਯ, ਕੇਵਲਂ ਪਨ ਵਾਸਨਾਯ ਅਪ੍ਪਹੀਨਤ੍ਤਾ ਵਸਲਵਾਦੇਨ ਸਮੁਦਾਚਰਤੀਤਿ.

ਛਟ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਸਕ੍ਕੁਦਾਨਸੁਤ੍ਤਵਣ੍ਣਨਾ

੨੭. ਸਤ੍ਤਮੇ ਸਤ੍ਤਾਹਂ ਏਕਪਲ੍ਲਙ੍ਕੇਨ ਨਿਸਿਨ੍ਨੋ ਹੋਤਿ ਅਞ੍ਞਤਰਂ ਸਮਾਧਿਂ ਸਮਾਪਜ੍ਜਿਤ੍ਵਾਤਿ ਏਤ੍ਥ ਕੇਚਿ ਤਾਵ ਆਹੁ ‘‘ਅਰਹਤ੍ਤਫਲਸਮਾਧਿ ਇਧ ‘ਅਞ੍ਞਤਰੋ ਸਮਾਧੀ’ਤਿ ਅਧਿਪ੍ਪੇਤੋ’’ਤਿ. ਤਞ੍ਹਿ ਸੋ ਆਯਸ੍ਮਾ ਬਹੁਲਂ ਸਮਾਪਜ੍ਜਤਿ ਦਿਟ੍ਠਧਮ੍ਮਸੁਖਵਿਹਾਰਤ੍ਥਂ, ਪਹੋਤਿ ਚ ਸਤ੍ਤਾਹਮ੍ਪਿ ਫਲਸਮਾਪਤ੍ਤਿਯਾ ਵੀਤਿਨਾਮੇਤੁਂ. ਤਥਾ ਹਿ ਭਗਵਤਾ –

‘‘ਅਹਂ, ਭਿਕ੍ਖਵੇ, ਯਾਵਦੇ ਆਕਙ੍ਖਾਮਿ ਵਿਵਿਚ੍ਚੇਵ ਕਾਮੇਹਿ, ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ…ਪੇ… ਵਿਹਰਾਮਿ. ਕਸ੍ਸਪੋਪਿ, ਭਿਕ੍ਖਵੇ, ਯਾਵਦੇ ਆਕਙ੍ਖਤਿ ਵਿਵਿਚ੍ਚੇਵ ਕਾਮੇਹਿ…ਪੇ… ਵਿਹਰਤੀ’’ਤਿ (ਸਂ. ਨਿ. ੨.੧੫੨) –

ਆਦਿਨਾ ਨਵਾਨੁਪੁਬ੍ਬਵਿਹਾਰਛਲ਼ਭਿਞ੍ਞਾਦਿਭੇਦੇ ਉਤ੍ਤਰਿਮਨੁਸ੍ਸਧਮ੍ਮੇ ਅਤ੍ਤਨਾ ਸਮਸਮਟ੍ਠਾਨੇ ਠਪਿਤੋ, ਨ ਚੇਤ੍ਥ ‘‘ਯਦਿ ਏਵਂ ਥੇਰੋ ਯਮਕਪਾਟਿਹਾਰਿਯਮ੍ਪਿ ਕਰੇਯ੍ਯਾ’’ਤਿ ਵਤ੍ਤਬ੍ਬਂ ਸਾਵਕਸਾਧਾਰਣਾਨਂਯੇਵ ਝਾਨਾਦੀਨਂ ਅਧਿਪ੍ਪੇਤਤ੍ਤਾਤਿ.

ਪੋਰਾਣਾ ਪਨਾਹੁ – ਅਞ੍ਞਤਰਂ ਸਮਾਧਿਂ ਸਮਾਪਜ੍ਜਿਤ੍ਵਾਤਿ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ. ਕਥਂ ਪਨ ਨਿਰੋਧਸਮਾਪਤ੍ਤਿ ਸਮਾਧੀਤਿ ਵੁਤ੍ਤਾ? ਸਮਾਧਾਨਟ੍ਠੇਨ. ਕੋ ਪਨਾਯਂ ਸਮਾਧਾਨਟ੍ਠੋ? ਸਮ੍ਮਦੇਵ ਆਧਾਤਬ੍ਬਤਾ. ਯਾ ਹਿ ਏਸਾ ਪਚ੍ਚਨੀਕਧਮ੍ਮੇਹਿ ਅਕਮ੍ਪਨੀਯਾ ਬਲਪ੍ਪਤ੍ਤਿਯਾ ਸਮਥਬਲਂ ਵਿਪਸ੍ਸਨਾਬਲਨ੍ਤਿ ਇਮੇਹਿ ਦ੍ਵੀਹਿ ਬਲੇਹਿ, ਅਨਿਚ੍ਚਦੁਕ੍ਖਾਨਤ੍ਤਨਿਬ੍ਬਿਦਾਵਿਰਾਗਨਿਰੋਧਪਟਿਨਿਸ੍ਸਗ੍ਗਵਿਵਟ੍ਟਾਨੁਪਸ੍ਸਨਾ ਚਤ੍ਤਾਰਿ ਮਗ੍ਗਞਾਣਾਨਿ ਚਤ੍ਤਾਰਿ ਚ ਫਲਞਾਣਾਨੀਤਿ ਇਮੇਸਂ ਸੋਲ਼ਸਨ੍ਨਂ ਞਾਣਾਨਂ ਵਸੇਨ ਸੋਲ਼ਸਹਿ ਞਾਣਚਰਿਯਾਹਿ, ਪਠਮਜ੍ਝਾਨਸਮਾਧਿਆਦਯੋ ਅਟ੍ਠ ਸਮਾਧੀ ਏਕਜ੍ਝਂ ਕਤ੍ਵਾ ਗਹਿਤੋ ਤੇਸਂ ਉਪਚਾਰਸਮਾਧਿ ਚਾਤਿ ਇਮੇਸਂ ਨਵਨ੍ਨਂ ਸਮਾਧੀਨਂ ਵਸੇਨ ਨਵਹਿ ਸਮਾਧਿਚਰਿਯਾਹਿ ਕਾਯਸਙ੍ਖਾਰੋ ਵਚੀਸਙ੍ਖਾਰੋ ਚਿਤ੍ਤਸਙ੍ਖਾਰੋਤਿ ਇਮੇਸਂ ਤਿਣ੍ਣਂ ਸਙ੍ਖਾਰਾਨਂ ਤਤ੍ਥ ਤਤ੍ਥ ਪਟਿਪ੍ਪਸ੍ਸਦ੍ਧਿਯਾ ਤਥਾ ਵਿਹਰਿਤੁਕਾਮੇਨ ਯਥਾਵੁਤ੍ਤੇਸੁ ਠਾਨੇਸੁ ਵਸੀਭਾਵਪ੍ਪਤ੍ਤੇਨ ਅਰਹਤਾ ਅਨਾਗਾਮਿਨਾ ਵਾ ਯਥਾਧਿਪ੍ਪੇਤਂ ਕਾਲਂ ਚਿਤ੍ਤਚੇਤਸਿਕਸਨ੍ਤਾਨਸ੍ਸ ਸਮ੍ਮਦੇਵ ਅਪ੍ਪਵਤ੍ਤਿ ਆਧਾਤਬ੍ਬਾ, ਤਸ੍ਸਾ ਤਥਾ ਸਮਾਧਾਤਬ੍ਬਤਾ ਇਧ ਸਮਾਧਾਨਟ੍ਠੋ, ਤੇਨਾਯਂ ਵਿਹਾਰੋ ਸਮਾਧੀਤਿ ਵੁਤ੍ਤੋ, ਨ ਅਵਿਕ੍ਖੇਪਟ੍ਠੇਨ. ਏਤੇਨਸ੍ਸ ਸਮਾਪਤ੍ਤਿਅਤ੍ਥੋਪਿ ਵੁਤ੍ਤੋਤਿ ਵੇਦਿਤਬ੍ਬੋ. ਇਮਞ੍ਹਿ ਨਿਰੋਧਸਮਾਪਤ੍ਤਿਂ ਸਨ੍ਧਾਯ ਪਟਿਸਮ੍ਭਿਦਾਮਗ੍ਗੇ –

‘‘ਕਥਂ ਦ੍ਵੀਹਿ ਬਲੇਹਿ ਸਮਨ੍ਨਾਗਤਤ੍ਤਾ ਤਿਣ੍ਣਂ ਸਙ੍ਖਾਰਾਨਂ ਪਟਿਪ੍ਪਸ੍ਸਦ੍ਧਿਯਾ ਸੋਲ਼ਸਹਿ ਞਾਣਚਰਿਯਾਹਿ ਨਵਹਿ ਸਮਾਧਿਚਰਿਯਾਹਿ ਵਸੀਭਾਵਤਾਯ ਸਞ੍ਞਾਨਿਰੋਧਸਮਾਪਤ੍ਤਿਯਾ ਞਾਣ’’ਨ੍ਤਿ (ਪਟਿ. ਮ. ੧.੮੩) –

ਪੁਚ੍ਛਿਤ੍ਵਾ ‘‘ਦ੍ਵੀਹਿ ਬਲੇਹੀ’’ਤਿ ਦ੍ਵੇ ਬਲਾਨਿ ਸਮਥਬਲਂ ਵਿਪਸ੍ਸਨਾਬਲਨ੍ਤਿ ਵਿਤ੍ਥਾਰੋ. ਸਾਯਂ ਨਿਰੋਧਸਮਾਪਤ੍ਤਿਕਥਾ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੨.੮੬੭ ਆਦਯੋ) ਸਂਵਣ੍ਣਿਤਾਵ. ਕਸ੍ਮਾ ਪਨਾਯਂ ਥੇਰੋ ਫਲਸਮਾਪਤ੍ਤਿਂ ਅਸਮਾਪਜ੍ਜਿਤ੍ਵਾ ਨਿਰੋਧਂ ਸਮਾਪਜ੍ਜਿ? ਸਤ੍ਤੇਸੁ ਅਨੁਕਮ੍ਪਾਯ. ਅਯਞ੍ਹਿ ਮਹਾਥੇਰੋ ਸਬ੍ਬਾਪਿ ਸਮਾਪਤ੍ਤਿਯੋ ਵਲ਼ਞ੍ਜੇਤਿ, ਸਤ੍ਤਾਨੁਗ੍ਗਹੇਨ ਪਨ ਯੇਭੁਯ੍ਯੇਨ ਨਿਰੋਧਂ ਸਮਾਪਜ੍ਜਤਿ. ਤਞ੍ਹਿ ਸਮਾਪਜ੍ਜਿਤ੍ਵਾ ਵੁਟ੍ਠਿਤਸ੍ਸ ਕਤੋ ਅਪ੍ਪਕੋਪਿ ਸਕ੍ਕਾਰੋ ਵਿਸੇਸਤੋ ਮਹਪ੍ਫਲੋ ਮਹਾਨਿਸਂਸੋ ਹੋਤੀਤਿ.

ਵੁਟ੍ਠਾਸੀਤਿ ਅਰਹਤ੍ਤਫਲਚਿਤ੍ਤੁਪ੍ਪਤ੍ਤਿਯਾ ਵੁਟ੍ਠਾਸਿ. ਨਿਰੋਧਂ ਸਮਾਪਨ੍ਨੋ ਹਿ ਅਰਹਾ ਚੇ ਅਰਹਤ੍ਤਫਲਸ੍ਸ, ਅਨਾਗਾਮੀ ਚੇ ਅਨਾਗਾਮਿਫਲਸ੍ਸ ਉਪ੍ਪਾਦੇਨ ਵੁਟ੍ਠਿਤੋ ਨਾਮ ਹੋਤਿ.

ਤੇਨ ਖੋ ਪਨ ਸਮਯੇਨ ਸਕ੍ਕੋ ਦੇਵਾਨਮਿਨ੍ਦੋ ਆਯਸ੍ਮਤੋ ਮਹਾਕਸ੍ਸਪਸ੍ਸ ਪਿਣ੍ਡਪਾਤਂ ਦਾਤੁਕਾਮੋ ਹੋਤੀਤਿ ਕਥਂ ਤਸ੍ਸ ਦਾਤੁਕਾਮਤਾ ਜਾਤਾ? ਯਾਨਿ ‘‘ਤਾਨਿ ਪਞ੍ਚਮਤ੍ਤਾਨਿ ਦੇਵਤਾਸਤਾਨੀ’’ਤਿ ਵੁਤ੍ਤਾਨਿ, ਤਾ ਸਕ੍ਕਸ੍ਸ ਦੇਵਰਞ੍ਞੋ ਪਰਿਚਾਰਿਕਾ ਕਕੁਟਪਾਦਿਨਿਯੋ ਪੁਬ੍ਬੇ ‘‘ਅਯ੍ਯੋ ਮਹਾਕਸ੍ਸਪੋ ਰਾਜਗਹਂ ਪਿਣ੍ਡਾਯ ਪਵਿਸਤਿ, ਗਚ੍ਛਥ ਥੇਰਸ੍ਸ ਦਾਨਂ ਦੇਥਾ’’ਤਿ ਸਕ੍ਕੇਨ ਪੇਸਿਤਾ ਉਪਗਨ੍ਤ੍ਵਾ ਦਿਬ੍ਬਾਹਾਰਂ ਦਾਤੁਕਾਮਾ ਠਿਤਾ ਥੇਰੇਨ ਪਟਿਕ੍ਖਿਤ੍ਤਾ ਦੇਵਲੋਕਮੇਵ ਗਤਾ. ਇਦਾਨਿ ਪੁਰਿਮਪ੍ਪਟਿਕ੍ਖੇਪਂ ਚਿਨ੍ਤੇਤ੍ਵਾ ‘‘ਕਦਾਚਿ ਗਣ੍ਹੇਯ੍ਯਾ’’ਤਿ ਸਮਾਪਤ੍ਤਿਤੋ ਵੁਟ੍ਠਿਤਸ੍ਸ ਥੇਰਸ੍ਸ ਦਾਨਂ ਦਾਤੁਕਾਮਾ ਸਕ੍ਕਸ੍ਸ ਅਨਾਰੋਚੇਤ੍ਵਾ ਸਯਮੇਵ ਆਗਨ੍ਤ੍ਵਾ ਦਿਬ੍ਬਭੋਜਨਾਨਿ ਉਪਨੇਨ੍ਤਿਯੋ ਪੁਰਿਮਨਯੇਨੇਵ ਥੇਰੇਨ ਪਟਿਕ੍ਖਿਤ੍ਤਾ ਦੇਵਲੋਕਂ ਗਨ੍ਤ੍ਵਾ ਸਕ੍ਕੇਨ ‘‘ਕਹਂ ਗਤਤ੍ਥਾ’’ਤਿ ਪੁਟ੍ਠਾ ਤਮਤ੍ਥਂ ਆਰੋਚੇਤ੍ਵਾ ‘‘ਦਿਨ੍ਨੋ ਵੋ ਥੇਰਸ੍ਸ ਪਿਣ੍ਡਪਾਤੋ’’ਤਿ ਸਕ੍ਕੇਨ ਵੁਤ੍ਤੇ ‘‘ਗਣ੍ਹਿਤੁਂ ਨ ਇਚ੍ਛਤੀ’’ਤਿ. ‘‘ਕਿਂ ਕਥੇਸੀ’’ਤਿ? ‘‘‘ਦੁਗ੍ਗਤਾਨਂ ਸਙ੍ਗਹਂ ਕਰਿਸ੍ਸਾਮੀ’ਤਿ ਆਹ, ਦੇਵਾ’’ਤਿ. ‘‘ਤੁਮ੍ਹੇ ਕੇਨਾਕਾਰੇਨ ਗਤਾ’’ਤਿ? ‘‘ਇਮਿਨਾਵ, ਦੇਵਾ’’ਤਿ. ਸਕ੍ਕੋ ‘‘ਤੁਮ੍ਹਾਦਿਸਿਯੋ ਥੇਰਸ੍ਸ ਪਿਣ੍ਡਪਾਤਂ ਕਿਂ ਦਸ੍ਸਨ੍ਤੀ’’ਤਿ? ਸਯਂ ਦਾਤੁਕਾਮੋ, ਜਰਾਜਿਣ੍ਣੋ ਖਣ੍ਡਦਨ੍ਤੋ ਪਲਿਤਕੇਸੋ ਓਭਗ੍ਗਸਰੀਰੋ ਮਹਲ੍ਲਕੋ ਤਨ੍ਤਵਾਯੋ ਹੁਤ੍ਵਾ, ਸੁਜਮ੍ਪਿ ਅਸੁਰਧੀਤਰਂ ਤਥਾਰੂਪਿਮੇਵ ਮਹਲ੍ਲਿਕਂ ਕਤ੍ਵਾ, ਏਕਂ ਪੇਸਕਾਰਵੀਥਿਂ ਮਾਪੇਤ੍ਵਾ ਤਨ੍ਤਂ ਪਸਾਰੇਨ੍ਤੋ ਅਚ੍ਛਿ, ਸੁਜਾ ਤਸਰਂ ਪੂਰੇਤਿ. ਤੇਨ ਵੁਤ੍ਤਂ – ‘‘ਤੇਨ ਖੋ ਪਨ ਸਮਯੇਨ ਸਕ੍ਕੋ ਦੇਵਾਨਮਿਨ੍ਦੋ…ਪੇ… ਤਸਰਂ ਪੂਰੇਤੀ’’ਤਿ.

ਤਤ੍ਥ ਤਨ੍ਤਂ ਵਿਨਾਤੀਤਿ ਪਸਾਰਿਤਤਨ੍ਤਂ ਵਿਨਨ੍ਤੋ ਵਿਯ ਹੋਤਿ. ਤਸਰਂ ਪੂਰੇਤੀਤਿ ਤਸਰਵਟ੍ਟਿਂ ਵਡ੍ਢੇਨ੍ਤੀ ਵਿਯ. ਯੇਨ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਨਿਵੇਸਨਂ ਤੇਨੁਪਸਙ੍ਕਮੀਤਿ ਥੇਰੋ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ‘‘ਦੁਗ੍ਗਤਜਨਸਙ੍ਗਹਂ ਕਰਿਸ੍ਸਾਮੀ’’ਤਿ ਨਗਰਾਭਿਮੁਖੋ ਗਚ੍ਛਨ੍ਤੋ ਬਹਿਨਗਰੇ ਸਕ੍ਕੇਨ ਮਾਪਿਤਂ ਪੇਸਕਾਰਵੀਥਿਂ ਪਟਿਪਜ੍ਜਿਤ੍ਵਾ ਓਲੋਕੇਨ੍ਤੋ ਅਦ੍ਦਸ ਓਲੁਗ੍ਗਵਿਲੁਗ੍ਗਜਿਣ੍ਣਸਾਲਂ ਤਤ੍ਥ ਚ ਤੇ ਜਾਯਮ੍ਪਤਿਕੇ ਯਥਾਵੁਤ੍ਤਰੂਪੇ ਤਨ੍ਤਵਾਯਕਮ੍ਮਂ ਕਰੋਨ੍ਤੇ ਦਿਸ੍ਵਾ ਚਿਨ੍ਤੇਸਿ – ‘‘ਇਮੇ ਮਹਲ੍ਲਕਕਾਲੇਪਿ ਕਮ੍ਮਂ ਕਰੋਨ੍ਤਿ. ਇਮਸ੍ਮਿਂ ਨਗਰੇ ਇਮੇਹਿ ਦੁਗ੍ਗਤਤਰਾ ਨਤ੍ਥਿ ਮਞ੍ਞੇ. ਇਮੇਹਿ ਦਿਨ੍ਨਂ ਸਾਕਮਤ੍ਤਮ੍ਪਿ ਗਹੇਤ੍ਵਾ ਇਮੇਸਂ ਸਙ੍ਗਹਂ ਕਰਿਸ੍ਸਾਮੀ’’ਤਿ. ਸੋ ਤੇਸਂ ਗੇਹਾਭਿਮੁਖੋ ਅਗਮਾਸਿ. ਸਕ੍ਕੋ ਤਂ ਆਗਚ੍ਛਨ੍ਤਂ ਦਿਸ੍ਵਾ ਸੁਜਂ ਆਹ – ‘‘ਭਦ੍ਦੇ, ਮਯ੍ਹਂ ਅਯ੍ਯੋ ਇਤੋ ਆਗਚ੍ਛਤਿ, ਤਂ ਤ੍ਵਂ ਅਪਸ੍ਸਨ੍ਤੀ ਵਿਯ ਤੁਣ੍ਹੀ ਹੁਤ੍ਵਾ ਨਿਸੀਦ. ਖਣੇਨੇਵ ਵਞ੍ਚੇਤ੍ਵਾ ਪਿਣ੍ਡਪਾਤਂ ਦਸ੍ਸਾਮਾ’’ਤਿ ਥੇਰੋ ਗਨ੍ਤ੍ਵਾ ਗੇਹਦ੍ਵਾਰੇ ਅਟ੍ਠਾਸਿ. ਤੇਪਿ ਅਪਸ੍ਸਨ੍ਤਾ ਵਿਯ ਅਤ੍ਤਨੋ ਕਮ੍ਮਮੇਵ ਕਰੋਨ੍ਤਾ ਥੋਕਂ ਆਗਮਯਿਂਸੁ. ਅਥ ਸਕ੍ਕੋ ‘‘ਗੇਹਦ੍ਵਾਰੇ ਠਿਤੋ ਏਕੋ ਥੇਰੋ ਵਿਯ ਖਾਯਤਿ, ਉਪਧਾਰੇਹਿ ਤਾਵਾ’’ਤਿ ਆਹ. ‘‘ਤੁਮ੍ਹੇ ਗਨ੍ਤ੍ਵਾ ਉਪਧਾਰੇਥ, ਸਾਮੀ’’ਤਿ. ਸੋ ਗੇਹਾ ਨਿਕ੍ਖਮਿਤ੍ਵਾ ਥੇਰਂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਉਭੋਹਿ ਹਤ੍ਥੇਹਿ ਜਣ੍ਣੁਕਾਨਿ ਓਲੁਮ੍ਬਿਤ੍ਵਾ ਨਿਤ੍ਥੁਨਨ੍ਤੋ ਉਟ੍ਠਾਯ ‘‘ਕਤਰਤ੍ਥੇਰੋ ਨੁ ਖੋ ਅਯ੍ਯੋ’’ਤਿ ਥੋਕਂ ਓਸਕ੍ਕਿਤ੍ਵਾ ‘‘ਅਕ੍ਖੀਨਿ ਮੇ ਧੂਮਾਯਨ੍ਤੀ’’ਤਿ ਵਤ੍ਵਾ ਨਲਾਟੇ ਹਤ੍ਥਂ ਠਪੇਤ੍ਵਾ ਉਦ੍ਧਂ ਉਲ੍ਲੋਕੇਤ੍ਵਾ ‘‘ਅਹੋ ਦੁਕ੍ਖਂ ਅਯ੍ਯੋ ਨੋ ਮਹਾਕਸ੍ਸਪਤ੍ਥੇਰੋਵ ਚਿਰਸ੍ਸਂ ਮੇ ਕੁਟਿਦ੍ਵਾਰਂ ਆਗਤੋ. ਅਤ੍ਥਿ ਨੁ ਖੋ ਕਿਞ੍ਚਿ ਗੇਹੇ’’ਤਿ ਆਹ. ਸੁਜਾ ਥੋਕਂ ਆਕੁਲਾ ਵਿਯ ਹੁਤ੍ਵਾ ‘‘ਅਤ੍ਥਿ, ਸਾਮੀ’’ਤਿ ਪਟਿਵਚਨਂ ਅਦਾਸਿ. ਸਕ੍ਕੋ, ‘‘ਭਨ੍ਤੇ, ਲੂਖਂ ਵਾ ਪਣੀਤਂ ਵਾਤਿ ਅਚਿਨ੍ਤੇਤ੍ਵਾ ਸਙ੍ਗਹਂ ਨੋ ਕਰੋਥਾ’’ਤਿ ਪਤ੍ਤਂ ਗਣ੍ਹਿ. ਥੇਰੋ ਪਤ੍ਤਂ ਦੇਨ੍ਤੋ ‘‘ਇਮੇਸਂ ਏਵ ਦੁਗ੍ਗਤਾਨਂ ਜਰਾਜਿਣ੍ਣਾਨਂ ਮਯਾ ਸਙ੍ਗਹੋ ਕਾਤਬ੍ਬੋ’’ਤਿ ਚਿਨ੍ਤੇਸਿ. ਸੋ ਅਨ੍ਤੋ ਪਵਿਸਿਤ੍ਵਾ ਘਟਿਓਦਨਂ ਨਾਮ ਘਟਿਤੋ ਉਦ੍ਧਰਿਤ੍ਵਾ, ਪਤ੍ਤਂ ਪੂਰੇਤ੍ਵਾ, ਥੇਰਸ੍ਸ ਹਤ੍ਥੇ ਠਪੇਸਿ. ਤੇਨ ਵੁਤ੍ਤਂ – ‘‘ਅਦ੍ਦਸਾ ਖੋ ਸਕ੍ਕੋ ਦੇਵਾਨਮਿਨ੍ਦੋ…ਪੇ… ਅਦਾਸੀ’’ਤਿ.

ਤਤ੍ਥ ਘਟਿਯਾਤਿ ਭਤ੍ਤਘਟਿਤੋ. ‘‘ਘਟਿਓਦਨ’’ਨ੍ਤਿਪਿ ਪਾਠੋ, ਤਸ੍ਸ ਘਟਿਓਦਨਂ ਨਾਮ ਦੇਵਾਨਂ ਕੋਚਿ ਆਹਾਰਵਿਸੇਸੋਤਿ ਅਤ੍ਥਂ ਵਦਨ੍ਤਿ. ਉਦ੍ਧਰਿਤ੍ਵਾਤਿ ਕੁਤੋਚਿ ਭਾਜਨਤੋ ਉਦ੍ਧਰਿਤ੍ਵਾ. ਅਨੇਕਸੂਪੋ ਸੋ ਏਵ ਆਹਾਰੋ ਪਤ੍ਤੇ ਪਕ੍ਖਿਪਿਤ੍ਵਾ ਥੇਰਸ੍ਸ ਹਤ੍ਥੇ ਠਪਨਕਾਲੇ ਕਪਣਾਨਂ ਉਪਕਪ੍ਪਨਕਲੂਖਾਹਾਰੋ ਵਿਯ ਪਞ੍ਞਾਯਿਤ੍ਥ, ਹਤ੍ਥੇ ਠਪਿਤਮਤ੍ਤੇ ਪਨ ਅਤ੍ਤਨੋ ਦਿਬ੍ਬਸਭਾਵੇਨੇਵ ਅਟ੍ਠਾਸਿ. ਅਨੇਕਸੂਪੋਤਿ ਮੁਗ੍ਗਮਾਸਾਦਿਸੂਪੇਹਿ ਚੇਵ ਖਜ੍ਜਵਿਕਤੀਹਿ ਚ ਅਨੇਕਵਿਧਸੂਪੋ. ਅਨੇਕਬ੍ਯਞ੍ਜਨੋਤਿ ਨਾਨਾਵਿਧਉਤ੍ਤਰਿਭਙ੍ਗੋ. ਅਨੇਕਰਸਬ੍ਯਞ੍ਜਨੋਤਿ ਅਨੇਕੇਹਿ ਸੂਪੇਹਿ ਚੇਵ ਬ੍ਯਞ੍ਜਨੇਹਿ ਚ ਮਧੁਰਾਦਿਮੂਲਰਸਾਨਞ੍ਚੇਵ ਸਮ੍ਭਿਨ੍ਨਰਸਾਨਞ੍ਚ ਅਭਿਬ੍ਯਞ੍ਜਕੋ, ਨਾਨਗ੍ਗਰਸਸੂਪਬ੍ਯਞ੍ਜਨੋਤਿ ਅਤ੍ਥੋ.

ਸੋ ਕਿਰ ਪਿਣ੍ਡਪਾਤੋ ਥੇਰਸ੍ਸ ਹਤ੍ਥੇ ਠਪਿਤਕਾਲੇ ਰਾਜਗਹਨਗਰਂ ਅਤ੍ਤਨੋ ਦਿਬ੍ਬਗਨ੍ਧੇਨ ਅਜ੍ਝੋਤ੍ਥਰਿ, ਤਤੋ ਥੇਰੋ ਚਿਨ੍ਤੇਸਿ – ‘‘ਅਯਂ ਪੁਰਿਸੋ ਅਪ੍ਪੇਸਕ੍ਖੋ, ਪਿਣ੍ਡਪਾਤੋ ਅਤਿਵਿਯ ਪਣੀਤੋ ਸਕ੍ਕਸ੍ਸ ਭੋਜਨਸਦਿਸੋ. ਕੋ ਨੁ ਖੋ ਏਸੋ’’ਤਿ? ਅਥ ਨਂ ‘‘ਸਕ੍ਕੋ’’ਤਿ ਞਤ੍ਵਾ ਆਹ – ‘‘ਭਾਰਿਯਂ ਤੇ, ਕੋਸਿਯ, ਕਮ੍ਮਂ ਕਤਂ ਦੁਗ੍ਗਤਾਨਂ ਸਮ੍ਪਤ੍ਤਿਂ ਵਿਲੁਮ੍ਪਨ੍ਤੇਨ, ਅਜ੍ਜ ਮਯ੍ਹਂ ਦਾਨਂ ਦਤ੍ਵਾ ਕੋਚਿਦੇਵ ਦੁਗ੍ਗਤੋ ਸੇਨਾਪਤਿਟ੍ਠਾਨਂ ਵਾ ਸੇਟ੍ਠਿਟ੍ਠਾਨਂ ਵਾ ਲਭੇਯ੍ਯਾ’’ਤਿ. ‘‘ਕੋ ਮਯਾ ਦੁਗ੍ਗਤਤਰੋ ਅਤ੍ਥਿ, ਭਨ੍ਤੇ’’ਤਿ? ‘‘ਕਥਂ ਤ੍ਵਂ ਦੁਗ੍ਗਤੋ ਦੇਵਰਜ੍ਜਸਿਰਿਂ ਅਨੁਭਵਨ੍ਤੋ’’ਤਿ? ‘‘ਭਨ੍ਤੇ, ਏਵਂ ਨਾਮੇਤਂ, ਮਯਾ ਪਨ ਅਨੁਪ੍ਪਨ੍ਨੇ ਬੁਦ੍ਧੇ ਕਲ੍ਯਾਣਕਮ੍ਮਂ ਕਤਂ, ਬੁਦ੍ਧੁਪ੍ਪਾਦੇ ਪਨ ਵਤ੍ਤਮਾਨੇ ਪੁਞ੍ਞਕਮ੍ਮਂ ਕਤ੍ਵਾ ਚੂਲ਼ਰਥਦੇਵਪੁਤ੍ਤੋ ਮਹਾਰਥਦੇਵਪੁਤ੍ਤੋ ਅਨੇਕਵਣ੍ਣਦੇਵਪੁਤ੍ਤੋਤਿ ਇਮੇ ਤਯੋ ਦੇਵਪੁਤ੍ਤਾ ਮਮਾਸਨ੍ਨਟ੍ਠਾਨੇ ਨਿਬ੍ਬਤ੍ਤਾ ਮਹਾਤੇਜਵਨ੍ਤਤਰਾ. ਅਹਂ ਤੇਸੁ ਦੇਵਪੁਤ੍ਤੇਸੁ ‘ਨਕ੍ਖਤ੍ਤਂ ਕੀਲ਼ਿਸ੍ਸਾਮਾ’ਤਿ ਪਰਿਚਾਰਿਕਾਯੋ ਗਹੇਤ੍ਵਾ ਅਨ੍ਤਰਵੀਥਿਂ ਓਤਿਣ੍ਣੇਸੁ ਪਲਾਯਿਤ੍ਵਾ ਗੇਹਂ ਪਵਿਸਾਮਿ. ਤੇਸਞ੍ਹਿ ਸਰੀਰਤੋ ਤੇਜੋ ਮਮ ਸਰੀਰਂ ਓਤ੍ਥਰਤਿ, ਮਮ ਸਰੀਰਤੋ ਤੇਜੋ ਤੇਸਂ ਸਰੀਰਂ ਨ ਓਤ੍ਥਰਤਿ. ਕੋ ਮਯਾ ਦੁਗ੍ਗਤਤਰੋ, ਭਨ੍ਤੇ’’ਤਿ? ‘‘ਏਵਂ ਸਨ੍ਤੇਪਿ ਇਤੋ ਪਟ੍ਠਾਯ ਮਯ੍ਹਂ ਮਾ ਏਵਂ ਵਞ੍ਚੇਤ੍ਵਾ ਦਾਨਮਦਾਸੀ’’ਤਿ. ‘‘ਵਞ੍ਚੇਤ੍ਵਾ ਤੁਮ੍ਹਾਕਂ ਦਾਨੇ ਦਿਨ੍ਨੇ ਮਯ੍ਹਂ ਕੁਸਲਂ ਅਤ੍ਥਿ ਨਤ੍ਥੀ’’ਤਿ? ‘‘ਅਤ੍ਥਿ, ਆਵੁਸੋ’’ਤਿ. ‘‘ਏਵਂ ਸਨ੍ਤੇ ਕੁਸਲਕਰਣਂ ਨਾਮ ਮਯ੍ਹਂ ਭਾਰੋ, ਭਨ੍ਤੇ’’ਤਿ ਵਤ੍ਵਾ ਥੇਰਂ ਵਨ੍ਦਿਤ੍ਵਾ ਸੁਜਂ ਆਦਾਯ ਥੇਰਂ ਪਦਕ੍ਖਿਣਂ ਕਤ੍ਵਾ, ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ‘‘ਅਹੋ ਦਾਨਂ ਪਰਮਦਾਨਂ, ਕਸ੍ਸਪੇ ਸੁਪ੍ਪਤਿਟ੍ਠਿਤ’’ਨ੍ਤਿ ਤਿਕ੍ਖਤ੍ਤੁਂ ਉਦਾਨਂ ਉਦਾਨੇਸਿ. ਤੇਨ ਵੁਤ੍ਤਂ ‘‘ਅਥ ਖੋ ਆਯਸ੍ਮਤੋ ਮਹਾਕਸ੍ਸਪਸ੍ਸ ਏਤਦਹੋਸੀ’’ਤਿਆਦਿ.

ਤਤ੍ਥ ਕੋਸਿਯਾਤਿ ਸਕ੍ਕਂ ਦੇਵਾਨਮਿਨ੍ਦਂ ਗੋਤ੍ਤੇਨ ਆਲਪਤਿ. ਪੁਞ੍ਞੇਨ ਅਤ੍ਥੋਤਿ ਪੁਞ੍ਞੇਨ ਪਯੋਜਨਂ. ਅਤ੍ਥੀਤਿ ਵਚਨਸੇਸੋ. ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾਤਿ ਪਥਵਿਤੋ ਵੇਹਾਸਂ ਅਭਿਉਗ੍ਗਨ੍ਤ੍ਵਾ. ਆਕਾਸੇ ਅਨ੍ਤਲਿਕ੍ਖੇਤਿ ਆਕਾਸਮੇਵ ਪਰਿਯਾਯਸਦ੍ਦੇਨ ਅਨ੍ਤਲਿਕ੍ਖੇਤਿ ਵਦਨ੍ਤਿ. ਅਥ ਵਾ ਅਨ੍ਤਲਿਕ੍ਖਸਙ੍ਖਾਤੇ ਆਕਾਸੇ ਨ ਕਸਿਣੁਗ੍ਘਾਟਿਮਾਦਿਆਕਾਸੇਤਿ ਵਿਸੇਸੇਨ੍ਤੋ ਵਦਤਿ. ਅਹੋ ਦਾਨਨ੍ਤਿ ਏਤ੍ਥ ਅਹੋਤਿ ਅਚ੍ਛਰਿਯਤ੍ਥੇ ਨਿਪਾਤੋ. ਸਕ੍ਕੋ ਹਿ ਦੇਵਾਨਮਿਨ੍ਦੋ, ‘‘ਯਸ੍ਮਾ ਨਿਰੋਧਾ ਵੁਟ੍ਠਿਤਸ੍ਸ ਅਯ੍ਯਸ੍ਸ ਮਹਾਕਸ੍ਸਪਤ੍ਥੇਰਸ੍ਸ ਸਕ੍ਕਚ੍ਚਂ ਸਹਤ੍ਥੇਨ ਚਿਤ੍ਤੀਕਤ੍ਵਾ ਅਨਪਵਿਦ੍ਧਂ ਕਾਲੇਨ ਪਰੇਸਂ ਅਨੁਪਹਚ੍ਚ, ਸਮ੍ਮਾਦਿਟ੍ਠਿਂ ਪੁਰਕ੍ਖਤ੍ਵਾ ਇਦਮੀਦਿਸਂ ਮਯਾ ਦਿਬ੍ਬਭੋਜਨਦਾਨਂ ਦਿਨ੍ਨਂ, ਤਸ੍ਮਾ ਖੇਤ੍ਤਸਮ੍ਪਤ੍ਤਿ ਦੇਯ੍ਯਧਮ੍ਮਸਮ੍ਪਤ੍ਤਿ ਚਿਤ੍ਤਸਮ੍ਪਤ੍ਤੀਤਿ, ਤਿਵਿਧਾਯਪਿ ਸਮ੍ਪਤ੍ਤਿਯਾ ਸਮਨ੍ਨਾਗਤਤ੍ਤਾ ਸਬ੍ਬਙ੍ਗਸਮ੍ਪਨ੍ਨਂ ਵਤ ਮਯਾ ਦਾਨਂ ਪਵਤ੍ਤਿਤ’’ਨ੍ਤਿ ਅਚ੍ਛਰਿਯਬ੍ਭੁਤਚਿਤ੍ਤਜਾਤੋ ਤਦਾ ਅਤ੍ਤਨੋ ਹਦਯਬ੍ਭਨ੍ਤਰਗਤਂ ਪੀਤਿਸੋਮਨਸ੍ਸਂ ਸਮੁਗ੍ਗਿਰਨ੍ਤੋ ‘‘ਅਹੋ ਦਾਨ’’ਨ੍ਤਿ ਵਤ੍ਵਾ ਤਸ੍ਸ ਦਾਨਸ੍ਸ ਵੁਤ੍ਤਨਯੇਨ ਉਤ੍ਤਮਦਾਨਭਾਵਂ ਖੇਤ੍ਤਙ੍ਗਤਭਾਵਞ੍ਚ ਪਕਾਸੇਨ੍ਤੋ ‘‘ਪਰਮਦਾਨਂ ਕਸ੍ਸਪੇ ਸੁਪ੍ਪਤਿਟ੍ਠਿਤ’’ਨ੍ਤਿ ਉਦਾਨਂ ਉਦਾਨੇਸਿ.

ਏਵਂ ਪਨ ਸਕ੍ਕਸ੍ਸ ਉਦਾਨੇਨ੍ਤਸ੍ਸ ਭਗਵਾ ਵਿਹਾਰੇ ਠਿਤੋਯੇਵ ਦਿਬ੍ਬਸੋਤੇਨ ਸਦ੍ਦਂ ਸੁਤ੍ਵਾ ‘‘ਪਸ੍ਸਥ, ਭਿਕ੍ਖਵੇ, ਸਕ੍ਕਂ ਦੇਵਾਨਮਿਨ੍ਦਂ ਉਦਾਨਂ ਉਦਾਨੇਤ੍ਵਾ ਆਕਾਸੇਨ ਗਚ੍ਛਨ੍ਤ’’ਨ੍ਤਿ ਭਿਕ੍ਖੂਨਂ ਵਤ੍ਵਾ ਤੇਹਿ ‘‘ਕਿਂ ਪਨ, ਭਨ੍ਤੇ, ਤੇਨ ਕਤ’’ਨ੍ਤਿ ਪੁਟ੍ਠੋ ‘‘ਮਮ ਪੁਤ੍ਤਸ੍ਸ ਕਸ੍ਸਪਸ੍ਸ ਵਞ੍ਚੇਤ੍ਵਾ ਦਾਨਂ ਅਦਾਸਿ, ਤੇਨ ਚ ਅਤ੍ਤਮਨੋ ਉਦਾਨੇਸੀ’’ਤਿ ਆਹ. ਤੇਨ ਵੁਤ੍ਤਂ ‘‘ਅਸ੍ਸੋਸਿ ਖੋ ਭਗਵਾ ਦਿਬ੍ਬਾਯ ਸੋਤਧਾਤੁਯਾ’’ਤਿਆਦਿ.

ਤਤ੍ਥ ਦਿਬ੍ਬਾਯ ਸੋਤਧਾਤੁਯਾਤਿ ਦਿਬ੍ਬਸਦਿਸਤ੍ਤਾ ਦਿਬ੍ਬਾ. ਦੇਵਤਾਨਞ੍ਹਿ ਸੁਚਰਿਤਕਮ੍ਮਨਿਬ੍ਬਤ੍ਤਾ ਪਿਤ੍ਤਸੇਮ੍ਹਰੁਹਿਰਾਦੀਹਿ ਅਪਲਿਬੁਦ੍ਧਾ ਉਪਕ੍ਕਿਲੇਸਵਿਨਿਮੁਤ੍ਤਤਾਯ ਦੂਰੇਪਿ ਆਰਮ੍ਮਣਂ ਗਹੇਤੁਂ ਸਮਤ੍ਥਾ ਦਿਬ੍ਬਪਸਾਦਸੋਤਧਾਤੁ ਹੋਤਿ. ਅਯਞ੍ਚਾਪਿ ਭਗਵਤੋ ਵੀਰਿਯਭਾਵਨਾਬਲਨਿਬ੍ਬਤ੍ਤਾ ਞਾਣਮਯਾ ਸੋਤਧਾਤੁ ਤਾਦਿਸਾ ਏਵਾਤਿ ਦਿਬ੍ਬਸਦਿਸਤ੍ਤਾ ਦਿਬ੍ਬਾ. ਅਪਿ ਚ ਦਿਬ੍ਬਵਿਹਾਰਵਸੇਨ ਪਟਿਲਦ੍ਧਤ੍ਤਾ ਅਤ੍ਤਨਾ ਚ ਦਿਬ੍ਬਵਿਹਾਰਸਨ੍ਨਿਸ੍ਸਿਤਤ੍ਤਾਪਿ ਦਿਬ੍ਬਾ. ਸਵਨਟ੍ਠੇਨ ਚ ਸਭਾਵਧਾਰਣਟ੍ਠੇਨ ਚ ਸੋਤਧਾਤੁ, ਸੋਤਧਾਤੁਯਾਪਿ ਕਿਚ੍ਚਕਰਣੇਨ ਸੋਤਧਾਤੁ ਵਿਯਾਤਿ ਸੋਤਧਾਤੁ, ਤਾਯ ਦਿਬ੍ਬਾਯ ਸੋਤਧਾਤੁਯਾ. ਵਿਸੁਦ੍ਧਾਯਾਤਿ ਪਰਿਸੁਦ੍ਧਾਯ ਨਿਰੁਪਕ੍ਕਿਲੇਸਾਯ. ਅਤਿਕ੍ਕਨ੍ਤਮਾਨੁਸਿਕਾਯਾਤਿ ਮਨੁਸ੍ਸੂਪਚਾਰਂ ਅਤਿਕ੍ਕਮਿਤ੍ਵਾ ਸਦ੍ਦਸ੍ਸਵਨੇਨ ਮਾਨੁਸਿਕਮਂਸਸੋਤਧਾਤੁਂ ਅਤਿਕ੍ਕਮਿਤ੍ਵਾ ਠਿਤਾਯ.

ਏਤਮਤ੍ਥਂ ਵਿਦਿਤ੍ਵਾਤਿ ‘‘ਸਮ੍ਮਾਪਟਿਪਤ੍ਤਿਯਾ ਗੁਣਵਿਸੇਸੇ ਪਤਿਟ੍ਠਿਤਂ ਪੁਰਿਸਾਤਿਸਯਂ ਦੇਵਾਪਿ ਮਨੁਸ੍ਸਾਪਿ ਆਦਰਜਾਤਾ ਅਤਿਵਿਯ ਪਿਹਯਨ੍ਤੀ’’ਤਿ ਇਮਮਤ੍ਥਂ ਵਿਦਿਤ੍ਵਾ ਤਦਤ੍ਥਦੀਪਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਰ ਪਿਣ੍ਡਪਾਤਿਕਙ੍ਗਸਙ੍ਖਾਤਂ ਧੁਤਙ੍ਗਂ ਸਮਾਦਾਯ ਤਸ੍ਸ ਪਰਿਪੂਰਣੇਨ ਪਿਣ੍ਡਪਾਤਿਕਸ੍ਸ. ਨਨੁ ਚਾਯਂ ਗਾਥਾ ਆਯਸ੍ਮਨ੍ਤਂ ਮਹਾਕਸ੍ਸਪਂ ਨਿਮਿਤ੍ਤਂ ਕਤ੍ਵਾ ਭਾਸਿਤਾ, ਥੇਰੋ ਚ ਸਬ੍ਬੇਸਂ ਧੁਤਵਾਦਾਨਂ ਅਗ੍ਗੋ ਤੇਰਸਧੁਤਙ੍ਗਧਰੋ, ਸੋ ਕਸ੍ਮਾ ਏਕੇਨੇਵ ਧੁਤਙ੍ਗੇਨ ਕਿਤ੍ਤਿਤੋਤਿ? ਅਟ੍ਠੁਪ੍ਪਤ੍ਤਿਵਸੇਨਾਯਂ ਨਿਦ੍ਦੇਸੋ. ਅਥ ਵਾ ਦੇਸਨਾਮਤ੍ਤਮੇਤਂ, ਇਮਿਨਾ ਦੇਸਨਾਸੀਸੇਨ ਸਬ੍ਬੇਪਿਸ੍ਸ ਧੁਤਙ੍ਗਾ ਵੁਤ੍ਤਾਤਿ ਵੇਦਿਤਬ੍ਬਾ. ਅਥ ਵਾ ‘‘ਯਥਾਪਿ ਭਮਰੋ ਪੁਪ੍ਫ’’ਨ੍ਤਿ (ਧ. ਪ. ੪੯) ਗਾਥਾਯ ਵੁਤ੍ਤਨਯੇਨ ਪਰਮਪ੍ਪਿਚ੍ਛਤਾਯ ਕੁਲਾਨੁਦ੍ਦਯਤਾਯ ਚਸ੍ਸ ਸਬ੍ਬਂ ਪਿਣ੍ਡਪਾਤਿਕਵਤ੍ਤਂ ਅਕ੍ਖਣ੍ਡੇਤ੍ਵਾ ਤਤ੍ਥ ਸਾਤਿਸਯਂ ਪਟਿਪਤ੍ਤਿਯਾ ਪਕਾਸਨਤ੍ਥਂ ‘‘ਪਿਣ੍ਡਪਾਤਿਕਸ੍ਸਾ’’ਤਿ ਵੁਤ੍ਤਂ. ਪਿਣ੍ਡਪਾਤਿਕਸ੍ਸਾਤਿ ਚ ਪਿਹਯਨ੍ਤੀਤਿ ਪਦਂ ਅਪੇਕ੍ਖਿਤ੍ਵਾ ਸਮ੍ਪਦਾਨਵਚਨਂ, ਤਂ ਉਪਯੋਗਤ੍ਥੇ ਦਟ੍ਠਬ੍ਬਂ. ਅਤ੍ਤਭਰਸ੍ਸਾਤਿ ‘‘ਅਪ੍ਪਾਨਿ ਚ ਤਾਨਿ ਸੁਲਭਾਨਿ ਅਨਵਜ੍ਜਾਨੀ’’ਤਿ (ਅ. ਨਿ. ੪.੨੭; ਇਤਿਵੁ. ੧੦੧) ਏਵਂ ਵੁਤ੍ਤੇਹਿ ਅਪ੍ਪਾਨਵਜ੍ਜਸੁਲਭਰੂਪੇਹਿ ਚਤੂਹਿ ਪਚ੍ਚਯੇਹਿ ਅਤ੍ਤਾਨਮੇਵ ਭਰਨ੍ਤਸ੍ਸ. ਅਨਞ੍ਞਪੋਸਿਨੋਤਿ ਆਮਿਸਸਙ੍ਗਣ੍ਹਨੇਨ ਅਞ੍ਞੇ ਸਿਸ੍ਸਾਦਿਕੇ ਪੋਸੇਤੁਂ ਅਨੁਸ੍ਸੁਕ੍ਕਤਾਯ ਅਨਞ੍ਞਪੋਸਿਨੋ. ਪਦਦ੍ਵਯੇਨਸ੍ਸ ਕਾਯਪਰਿਹਾਰਿਕੇਨ ਚੀਵਰੇਨ ਕੁਚ੍ਛਿਪਰਿਹਾਰਿਕੇਨ ਪਿਣ੍ਡਪਾਤੇਨ ਵਿਚਰਣਤੋ ਸਲ੍ਲਹੁਕਵੁਤ੍ਤਿਤਂ ਸੁਭਰਤਂ ਪਰਮਞ੍ਚ ਸਨ੍ਤੁਟ੍ਠਿਂ ਦਸ੍ਸੇਤਿ. ਅਥ ਵਾ ਅਤ੍ਤਭਰਸ੍ਸਾਤਿ ਏਕਵਚਨਿਚ੍ਛਾਯ ਅਤ੍ਤਭਾਵਸਙ੍ਖਾਤਂ ਏਕਂਯੇਵ ਇਮਂ ਅਤ੍ਤਾਨਂ ਭਰਤਿ, ਨ ਇਤੋ ਪਰਂ ਅਞ੍ਞਨ੍ਤਿ ਅਤ੍ਤਭਰੋ, ਤਤੋ ਏਵ ਅਤ੍ਤਨਾ ਅਞ੍ਞਸ੍ਸ ਪੋਸੇਤਬ੍ਬਸ੍ਸ ਅਭਾਵਤੋ ਅਨਞ੍ਞਪੋਸੀ, ਤਸ੍ਸ ਅਤ੍ਤਭਰਸ੍ਸ ਅਨਞ੍ਞਪੋਸਿਨੋ. ਪਦਦ੍ਵਯੇਨਪਿ ਖੀਣਾਸਵਭਾਵੇਨ ਆਯਤਿਂ ਅਨਾਦਾਨਤਂ ਦਸ੍ਸੇਤਿ.

ਦੇਵਾ ਪਿਹਯਨ੍ਤਿ…ਪੇ… ਸਤੀਮਤੋਤਿ ਤਂ ਅਗ੍ਗਫਲਾਧਿਗਮੇਨ ਸਬ੍ਬਕਿਲੇਸਦਰਥਪਰਿਲ਼ਾਹਾਨਂ ਵੂਪਸਮੇਨ ਪਟਿਪ੍ਪਸ੍ਸਦ੍ਧਿਯਾ ਉਪਸਨ੍ਤਂ, ਸਤਿਵੇਪੁਲ੍ਲਪ੍ਪਤ੍ਤਿਯਾ ਨਿਚ੍ਚਕਾਲਂ ਸਤੋਕਾਰਿਤਾਯ ਸਤਿਮਨ੍ਤਂ, ਤਤੋ ਏਵ ਇਟ੍ਠਾਨਿਟ੍ਠਾਦੀਸੁ ਤਾਦਿਲਕ੍ਖਣਪ੍ਪਤ੍ਤਂ ਖੀਣਾਸਵਂ ਸਕ੍ਕਾਦਯੋ ਦੇਵਾ ਪਿਹਯਨ੍ਤਿ ਪਤ੍ਥੇਨ੍ਤਿ, ਤਸ੍ਸ ਸੀਲਾਦਿਗੁਣਵਿਸੇਸੇਸੁ ਬਹੁਮਾਨਂ ਉਪ੍ਪਾਦੇਨ੍ਤਾ ਆਦਰਂ ਜਨੇਨ੍ਤਿ, ਪਗੇਵ ਮਨੁਸ੍ਸਾਤਿ.

ਸਤ੍ਤਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਪਿਣ੍ਡਪਾਤਿਕਸੁਤ੍ਤਵਣ੍ਣਨਾ

੨੮. ਅਟ੍ਠਮੇ ਪਚ੍ਛਾਭਤ੍ਤਨ੍ਤਿ ਏਕਾਸਨਿਕਖਲੁਪਚ੍ਛਾਭਤ੍ਤਿਕਾਨਂ ਪਾਤੋਵ ਭੁਤ੍ਤਾਨਂ ਅਨ੍ਤੋਮਜ੍ਝਨ੍ਹਿਕੋਪਿ ਪਚ੍ਛਾਭਤ੍ਤਮੇਵ, ਇਧ ਪਨ ਪਕਤਿਭਤ੍ਤਸ੍ਸੇਵ ਪਚ੍ਛਤੋ ਪਚ੍ਛਾਭਤ੍ਤਨ੍ਤਿ ਵੇਦਿਤਬ੍ਬਂ. ਪਿਣ੍ਡਪਾਤਪਟਿਕ੍ਕਨ੍ਤਾਨਨ੍ਤਿ ਪਿਣ੍ਡਪਾਤਤੋ ਪਟਿਕ੍ਕਨ੍ਤਾਨਂ, ਪਿਣ੍ਡਪਾਤਂ ਪਰਿਯੇਸਿਤ੍ਵਾ ਭਤ੍ਤਕਿਚ੍ਚਸ੍ਸ ਨਿਟ੍ਠਾਪਨਵਸੇਨ ਤਤੋ ਨਿਵਤ੍ਤਾਨਂ. ਕਰੇਰਿਮਣ੍ਡਲਮਾਲ਼ੇਤਿ ਏਤ੍ਥ ਕਰੇਰੀਤਿ ਵਰੁਣਰੁਕ੍ਖਸ੍ਸ ਨਾਮਂ. ਸੋ ਕਿਰ ਗਨ੍ਧਕੁਟਿਯਾ ਮਣ੍ਡਪਸ੍ਸ ਸਾਲਾਯ ਚ ਅਨ੍ਤਰੇ ਹੋਤਿ, ਤੇਨ ਗਨ੍ਧਕੁਟੀਪਿ ‘‘ਕਰੇਰਿਕੁਟਿਕਾ’’ਤਿ ਵੁਚ੍ਚਤਿ, ਮਣ੍ਡਪੋਪਿ ਸਾਲਾਪਿ ‘‘ਕਰੇਰਿਮਣ੍ਡਲਮਾਲ਼ੋ’’ਤਿ. ਤਸ੍ਮਾ ਕਰੇਰਿਰੁਕ੍ਖਸ੍ਸ ਅਵਿਦੂਰੇ ਕਤੇ ਨਿਸੀਦਨਸਾਲਸਙ੍ਖਾਤੇ ਮਣ੍ਡਲਮਾਲ਼ੇ. ਤਿਣਪਣ੍ਣਚ੍ਛਦਨਂ ਅਨੋਵਸ੍ਸਕਂ ‘‘ਮਣ੍ਡਲਮਾਲ਼ੋ’’ਤਿ ਵਦਨ੍ਤਿ, ਅਤਿਮੁਤ੍ਤਕਾਦਿਲਤਾਮਣ੍ਡਪੋ ‘‘ਮਣ੍ਡਲਮਾਲ਼ੋ’’ਤਿ ਅਪਰੇ.

ਕਾਲੇਨ ਕਾਲਨ੍ਤਿ ਕਾਲੇ ਕਾਲੇ ਅਨ੍ਤਰਨ੍ਤਰਾ, ਤਸ੍ਮਿਂ ਤਸ੍ਮਿਂ ਸਮਯੇਤਿ ਅਤ੍ਥੋ. ਮਨਾਪਿਕੇਤਿ ਮਨਵਡ੍ਢਕੇ, ਪਿਯਰੂਪੇ ਇਟ੍ਠੇਤਿ ਅਤ੍ਥੋ. ਇਟ੍ਠਾਨਿਟ੍ਠਭਾਵੋ ਚ ਪੁਗ੍ਗਲਵਸੇਨ ਚ ਦ੍ਵਾਰਵਸੇਨ ਚ ਗਹੇਤਬ੍ਬੋ. ਏਕਚ੍ਚਸ੍ਸ ਹਿ ਇਟ੍ਠਾਭਿਮਤੋ ਏਕਚ੍ਚਸ੍ਸ ਅਨਿਟ੍ਠੋ ਹੋਤਿ, ਏਕਚ੍ਚਸ੍ਸ ਅਨਿਟ੍ਠਾਭਿਮਤੋ ਏਕਚ੍ਚਸ੍ਸ ਇਟ੍ਠੋ. ਤਥਾ ਏਕਸ੍ਸ ਦ੍ਵਾਰਸ੍ਸ ਇਟ੍ਠੋ ਅਞ੍ਞਸ੍ਸ ਅਨਿਟ੍ਠੋ. ਵਿਪਾਕਵਸੇਨ ਪਨੇਤ੍ਥ ਵਿਨਿਚ੍ਛਯੋ ਵੇਦਿਤਬ੍ਬੋ. ਕੁਸਲਵਿਪਾਕੋ ਹਿ ਏਕਨ੍ਤੇਨ ਇਟ੍ਠੋ, ਅਕੁਸਲਵਿਪਾਕੋ ਅਨਿਟ੍ਠੋ ਏਵਾਤਿ. ਚਕ੍ਖੁਨਾ ਰੂਪੇ ਪਸ੍ਸਿਤੁਨ੍ਤਿ ਗਾਮਂ ਪਿਣ੍ਡਾਯ ਪਵਿਟ੍ਠੋ ਉਪਾਸਕੇਹਿ ਗੇਹਂ ਪਵੇਸੇਤ੍ਵਾ ਪੂਜਾਸਕ੍ਕਾਰਕਰਣਤ੍ਥਂ ਉਪਨੀਤੇਸੁ ਆਸਨਵਿਤਾਨਾਦੀਸੁ ਨਾਨਾਵਿਰਾਗਸਮੁਜ੍ਜਲਵਣ੍ਣਸਙ੍ਖਾਤੇ ਰਜਨੀਯੇ ਅਞ੍ਞੇ ਚ ਸਵਿਞ੍ਞਾਣਕਰੂਪੇ ਚਕ੍ਖੁਦ੍ਵਾਰਿਕਵਿਞ੍ਞਾਣੇਹਿ ਪਸ੍ਸਿਤੁਂ. ਸਦ੍ਦੇਤਿ ਤਥੇਵ ਇਸ੍ਸਰਜਨਾਨਂ ਗੇਹਂ ਪਵਿਟ੍ਠੋ ਤੇਸਂ ਪਯੁਤ੍ਤੇ ਗੀਤਵਾਦਿਤਸਦ੍ਦੇ ਸੋਤੁਂ. ਗਨ੍ਧੇਤਿ ਤਥਾ ਤੇਹਿ ਪੂਜਾਸਕ੍ਕਾਰਵਸੇਨ ਉਪਨੀਤੇ ਪੁਪ੍ਫਧੂਮਾਦਿਗਨ੍ਧੇ ਘਾਯਿਤੁਂ. ਰਸੇਤਿ ਤੇਹਿ ਦਿਨ੍ਨਾਹਾਰਪਰਿਭੋਗੇ ਨਾਨਗ੍ਗਰਸੇ ਸਾਯਿਤੁਂ. ਫੋਟ੍ਠਬ੍ਬੇਤਿ ਮਹਗ੍ਘਪਚ੍ਚਤ੍ਥਰਣੇਸੁ ਆਸਨੇਸੁ ਨਿਸਿਨ੍ਨਕਾਲੇ ਸੁਖਸਮ੍ਫਸ੍ਸੇ ਫੋਟ੍ਠਬ੍ਬੇ ਫੁਸਿਤੁਂ. ਏਵਞ੍ਚ ਪਞ੍ਚਦ੍ਵਾਰਿਕਇਟ੍ਠਾਰਮ੍ਮਣਪ੍ਪਟਿਲਾਭਂ ਕਿਤ੍ਤੇਤ੍ਵਾ ਇਦਾਨਿ ਮਨੋਦ੍ਵਾਰਿਕਇਟ੍ਠਾਰਮ੍ਮਣਪ੍ਪਟਿਲਾਭਂ ਦਸ੍ਸੇਤੁਂ ‘‘ਸਕ੍ਕਤੋ’’ਤਿਆਦਿ ਵੁਤ੍ਤਂ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ.

ਕਿਂ ਪਨ ਅਪਿਣ੍ਡਪਾਤਿਕਾਨਂ ਅਯਂ ਨਯੋ ਨ ਲਬ੍ਭਤੀਤਿ? ਲਬ੍ਭਤਿ. ਤੇਸਮ੍ਪਿ ਹਿ ਨਿਮਨ੍ਤਨਸਲਾਕਭਤ੍ਤਾਦਿਅਤ੍ਥਂ ਗਾਮਂ ਗਤਕਾਲੇ ਉਲ਼ਾਰਵਿਭਵਾ ਉਪਾਸਕਾ ਤਥਾ ਸਕ੍ਕਾਰਸਮ੍ਮਾਨਂ ਕਰੋਨ੍ਤਿਯੇਵ, ਤਂ ਪਨ ਅਨਿਯਤਂ. ਪਿਣ੍ਡਪਾਤਿਕਾਨਂ ਪਨ ਤਦਾ ਨਿਚ੍ਚਮੇਵ ਤਤ੍ਥ ਪੂਜਾਸਕ੍ਕਾਰਂ ਕਰਿਯਮਾਨਂ ਦਿਸ੍ਵਾ, ਸਕ੍ਕਾਰਗਰੁਤਾਯ ਅਨਿਸ੍ਸਰਣਮਗ੍ਗੇ ਠਤ੍ਵਾ, ਅਯੋਨਿਸੋਮਨਸਿਕਾਰਵਸੇਨ ਤੇ ਭਿਕ੍ਖੂ ਏਵਮਾਹਂਸੁ. ਤੇਨੇਵਾਹ – ‘‘ਹਨ੍ਦਾਵੁਸੋ, ਮਯਮ੍ਪਿ ਪਿਣ੍ਡਪਾਤਿਕਾ ਹੋਮਾ’’ਤਿਆਦਿ.

ਤਤ੍ਥ ਹਨ੍ਦਾਤਿ ਵੋਸ੍ਸਗ੍ਗਤ੍ਥੇ ਨਿਪਾਤੋ. ਲਚ੍ਛਾਮਾਤਿ ਲਭਿਸ੍ਸਾਮ. ਤੇਨੁਪਸਙ੍ਕਮੀਤਿ ਤਤ੍ਥ ਸੁਰਭਿਗਨ੍ਧਕੁਟਿਯਂ ਨਿਸਿਨ੍ਨੋ ਤੇਸਂ ਤਂ ਕਥਾਸਲ੍ਲਾਪਂ ਸੁਤ੍ਵਾ ‘‘ਇਮੇ ਭਿਕ੍ਖੂ ਮਾਦਿਸਸ੍ਸ ਨਾਮ ਬੁਦ੍ਧਸ੍ਸ ਸਾਸਨੇ ਪਬ੍ਬਜਿਤ੍ਵਾ ਮਯਾ ਸਦ੍ਧਿਂ ਏਕਵਿਹਾਰੇ ਵਸਨ੍ਤਾਪਿ ਏਵਂ ਅਯੋਨਿਸੋਮਨਸਿਕਾਰਵਸੇਨ ਕਥਂ ਪਵਤ੍ਤੇਨ੍ਤਿ, ਸਲ੍ਲੇਖੇ ਨ ਵਤ੍ਤਨ੍ਤਿ, ਹਨ੍ਦ ਤੇ ਤਤੋ ਨਿਵਾਰੇਤ੍ਵਾ ਸਲ੍ਲੇਖਵਿਹਾਰੇ ਨਿਯੋਜੇਸ੍ਸਾਮੀ’’ਤਿ ਮਣ੍ਡਲਮਾਲ਼ਂ ਉਪਸਙ੍ਕਮਿ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

ਏਤਮਤ੍ਥਂ ਵਿਦਿਤ੍ਵਾਤਿ ‘‘ਅਪ੍ਪਿਚ੍ਛਤਾਸਨ੍ਤੁਟ੍ਠਿਤਾਸਲ੍ਲੇਖਾਨਂ ਵਸੇਨ ਕਿਲੇਸੇ ਧੁਨਿਤੁਂ ਤਣ੍ਹਂ ਵਿਸੋਸੇਤੁਂ ਪਟਿਪਨ੍ਨੋਤਿ ਪਿਣ੍ਡਪਾਤਿਕਸ੍ਸ ਸਤੋ ਦੇਵਾ ਪਿਹਯਨ੍ਤਿ, ਤਸ੍ਸ ਪਟਿਪਤ੍ਤਿਯਾ ਆਦਰਜਾਤਾ ਪਿਯਾਯਨ੍ਤਿ, ਨ ਇਤੋ ਅਞ੍ਞਥਾ’’ਤਿ ਇਮਮਤ੍ਥਂ ਵਿਦਿਤ੍ਵਾ ਤਦਤ੍ਥਦੀਪਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਨੋ ਚੇ ਸਦ੍ਦਸਿਲੋਕਨਿਸ੍ਸਿਤੋਤਿ ‘‘ਅਹੋ ਅਯ੍ਯੋ ਅਪ੍ਪਿਚ੍ਛੋ ਸਨ੍ਤੁਟ੍ਠੋ ਪਰਮਸਲ੍ਲੇਖਵੁਤ੍ਤੀ’’ਤਿਆਦਿਨਾ ਪਰੇਹਿ ਕਿਤ੍ਤਿਤਬ੍ਬਸਦ੍ਦਸਙ੍ਖਾਤਂ ਸਿਲੋਕਂ. ਤਣ੍ਹਾਯ ਨਿਸ੍ਸਿਤੋ ਨ ਹੋਤਿ ਚੇਤਿ ਅਤ੍ਥੋ. ਸਦ੍ਦੋ ਵਾ ਸਮ੍ਮੁਖਾ ਵਣ੍ਣਭਣਨਥੁਤਿਘੋਸੋ, ਸਿਲੋਕੋ ਪਰਮ੍ਮੁਖਭੂਤਾ ਪਸਂਸਾ ਪਤ੍ਥਟਯਸਤਾ ਵਾ. ਸੇਸਂ ਅਨਨ੍ਤਰਸੁਤ੍ਤੇ ਵੁਤ੍ਤਨਯਮੇਵ.

ਅਟ੍ਠਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਸਿਪ੍ਪਸੁਤ੍ਤਵਣ੍ਣਨਾ

੨੯. ਨਵਮੇ ਕੋ ਨੁ ਖੋ, ਆਵੁਸੋ, ਸਿਪ੍ਪਂ ਜਾਨਾਤੀਤਿ, ਆਵੁਸੋ, ਅਮ੍ਹੇਸੁ ਇਧ ਸਨ੍ਨਿਪਤਿਤੇਸੁ ਕੋ ਨੁ ਜੀਵਿਤਨਿਮਿਤ੍ਤਂ ਸਿਕ੍ਖਿਤਬ੍ਬਟ੍ਠੇਨ ‘‘ਸਿਪ੍ਪ’’ਨ੍ਤਿ ਲਦ੍ਧਨਾਮਂ ਯਂਕਿਞ੍ਚਿ ਆਜੀਵਂ ਵਿਜਾਨਾਤਿ? ਕੋ ਕਿਂ ਸਿਪ੍ਪਂ ਸਿਕ੍ਖੀਤਿ ਕੋ ਦੀਘਰਤ੍ਤਂ ਸਿਪ੍ਪਾਚਰਿਯਕੁਲਂ ਪਯਿਰੁਪਾਸਿਤ੍ਵਾ ਆਗਮਤੋ ਪਯੋਗਤੋ ਚ ਹਤ੍ਥਿਸਿਪ੍ਪਾਦੀਸੁ ਕਿਂ ਸਿਪ੍ਪਂ ਸਿਕ੍ਖਿ? ਕਤਰਂ ਸਿਪ੍ਪਂ ਸਿਪ੍ਪਾਨਂ ਅਗ੍ਗਨ੍ਤਿ ਸਬ੍ਬਸਿਪ੍ਪਾਨਂ ਅਗਾਰਯ੍ਹਤਾਯ ਮਹਪ੍ਫਲਤਾਯ ਅਕਿਚ੍ਛਸਿਦ੍ਧਿਯਾ ਚ ਕਤਰਂ ਸਿਪ੍ਪਂ ਅਗ੍ਗਂ ਉਤ੍ਤਮਂ? ਯਂ ਨਿਸ੍ਸਾਯ ਸੁਖੇਨ ਸਕ੍ਕਾ ਜੀਵਿਤੁਨ੍ਤਿ ਅਧਿਪ੍ਪਾਯੋ. ਤਤ੍ਥੇਕਚ੍ਚੇਤਿ ਤੇਸੁ ਭਿਕ੍ਖੂਸੁ ਏਕਚ੍ਚੇ ਭਿਕ੍ਖੂ. ਯੇ ਹਤ੍ਥਾਚਰਿਯਕੁਲਾ ਪਬ੍ਬਜਿਤਾ ਤੇ. ਏਵਮਾਹਂਸੂਤਿ ਤੇ ਏਵਂ ਭਣਿਂਸੁ. ਇਤੋ ਪਰਮ੍ਪਿ ‘‘ਏਕਚ੍ਚੇ’’ਤਿ ਵੁਤ੍ਤਟ੍ਠਾਨੇ ਏਸੇਵ ਨਯੋ. ਹਤ੍ਥਿਸਿਪ੍ਪਨ੍ਤਿ ਯਂ ਹਤ੍ਥੀਨਂ ਪਰਿਗ੍ਗਣ੍ਹਨਦਮਨਸਾਰਣਰੋਗਤਿਕਿਚ੍ਛਾਦਿਭੇਦਂ ਕਤ੍ਤਬ੍ਬਂ, ਤਂ ਉਦ੍ਦਿਸ੍ਸ ਪਵਤ੍ਤਂ ਸਬ੍ਬਮ੍ਪਿ ਸਿਪ੍ਪਂ ਇਧ ‘‘ਹਤ੍ਥਿਸਿਪ੍ਪ’’ਨ੍ਤਿ ਅਧਿਪ੍ਪੇਤਂ. ਅਸ੍ਸਸਿਪ੍ਪਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਰਥਸਿਪ੍ਪਂ ਪਨ ਰਥਯੋਗ੍ਗਾਨਂ ਦਮਨਸਾਰਣਾਦਿਵਿਧਾਨਵਸੇਨ ਚੇਵ ਰਥਸ੍ਸ ਕਰਣਵਸੇਨ ਚ ਵੇਦਿਤਬ੍ਬਂ. ਧਨੁਸਿਪ੍ਪਨ੍ਤਿ ਇਸ੍ਸਾਸਸਿਪ੍ਪਂ, ਯੋ ਧਨੁਬ੍ਬੇਧੋਤਿ ਵੁਚ੍ਚਤਿ. ਥਰੁਸਿਪ੍ਪਨ੍ਤਿ ਸੇਸਆਵੁਧਸਿਪ੍ਪਂ. ਮੁਦ੍ਦਾਸਿਪ੍ਪਨ੍ਤਿ ਹਤ੍ਥਮੁਦ੍ਦਾਯ ਗਣਨਸਿਪ੍ਪਂ. ਗਣਨਸਿਪ੍ਪਨ੍ਤਿ ਅਚ੍ਛਿਦ੍ਦਕਗਣਨਸਿਪ੍ਪਂ. ਸਙ੍ਖਾਨਸਿਪ੍ਪਨ੍ਤਿ ਸਙ੍ਕਲਨਪਟੁਪ੍ਪਾਦਨਾਦਿਵਸੇਨ ਪਿਣ੍ਡਗਣਨਸਿਪ੍ਪਂ. ਤਂ ਯਸ੍ਸ ਪਗੁਣਂ ਹੋਤਿ, ਸੋ ਰੁਕ੍ਖਮ੍ਪਿ ਦਿਸ੍ਵਾ ‘‘ਏਤ੍ਤਕਾਨਿ ਏਤ੍ਥ ਪਣ੍ਣਾਨੀ’’ਤਿ ਗਣਿਤੁਂ ਜਾਨਾਤਿ. ਲੇਖਾਸਿਪ੍ਪਨ੍ਤਿ ਨਾਨਾਕਾਰੇਹਿ ਅਕ੍ਖਰਲਿਖਨਸਿਪ੍ਪਂ, ਲਿਪਿਞਾਣਂ ਵਾ. ਕਾਵੇਯ੍ਯਸਿਪ੍ਪਨ੍ਤਿ ਅਤ੍ਤਨੋ ਚਿਨ੍ਤਾਵਸੇਨ ਵਾ ਪਰਤੋ ਪਟਿਲਦ੍ਧਸੁਤਵਸੇਨ ਵਾ, ‘‘ਇਮਸ੍ਸ ਅਯਮਤ੍ਥੋ, ਏਵਂ ਨਂ ਯੋਜੇਸ੍ਸਾਮੀ’’ਤਿ ਏਵਂ ਅਤ੍ਥਵਸੇਨ ਵਾ, ਕਿਞ੍ਚਿਦੇਵ ਕਬ੍ਬਂ ਦਿਸ੍ਵਾ, ‘‘ਤਪ੍ਪਟਿਭਾਗਂ ਕਬ੍ਬਂ ਕਰਿਸ੍ਸਾਮੀ’’ਤਿ ਠਾਨੁਪ੍ਪਤ੍ਤਿਕਪਟਿਭਾਨਵਸੇਨ ਵਾ ਚਿਨ੍ਤਾਕਵਿਆਦੀਨਂ ਚਤੁਨ੍ਨਂ ਕਵੀਨਂ ਕਬ੍ਬਕਰਣਸਿਪ੍ਪਂ. ਵੁਤ੍ਤਞ੍ਹੇਤਂ ਭਗਵਤਾ –

‘‘ਚਤ੍ਤਾਰੋਮੇ, ਭਿਕ੍ਖਵੇ, ਕਵੀ – ਚਿਨ੍ਤਾਕਵਿ, ਸੁਤਕਵਿ, ਅਤ੍ਥਕਵਿ, ਪਟਿਭਾਨਕਵੀ’’ਤਿ (ਅ. ਨਿ. ੪.੨੩੧).

ਲੋਕਾਯਤਸਿਪ੍ਪਨ੍ਤਿ ‘‘ਕਾਕੋ ਸੇਤੋ ਅਟ੍ਠੀਨਂ ਸੇਤਤ੍ਤਾ, ਬਲਾਕਾ ਰਤ੍ਤਾ ਲੋਹਿਤਸ੍ਸ ਰਤ੍ਤਤ੍ਤਾ’’ਤਿ ਏਵਮਾਦਿਨਯਪ੍ਪਵਤ੍ਤਂ ਪਰਲੋਕਨਿਬ੍ਬਾਨਾਨਂ ਪਟਿਸੇਧਕਂ ਵਿਤਣ੍ਡਸਤ੍ਥਸਿਪ੍ਪਂ. ਖਤ੍ਤਵਿਜ੍ਜਾਸਿਪ੍ਪਨ੍ਤਿ ਅਬ੍ਭੇਯ੍ਯਮਾਸੁਰਕ੍ਖਾਦਿਨੀਤਿਸਤ੍ਥਸਿਪ੍ਪਂ. ਇਮਾਨਿ ਕਿਰ ਦ੍ਵਾਦਸ ਮਹਾਸਿਪ੍ਪਾਨਿ ਨਾਮ. ਤੇਨੇਵਾਹ ਤਤ੍ਥ ਤਤ੍ਥ ‘‘ਸਿਪ੍ਪਾਨਂ ਅਗ੍ਗ’’ਨ੍ਤਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਸਬ੍ਬਸਿਪ੍ਪਾਯਤਨਾਨਂ ਜੀਵਿਕਤ੍ਥਤਾਯ ਵਟ੍ਟਦੁਕ੍ਖਤੋ ਅਨਿਸ੍ਸਰਣਭਾਵਂ, ਸੀਲਾਦੀਨਂਯੇਵ ਪਨ ਸੁਪਰਿਸੁਦ੍ਧਾਨਂ ਨਿਸ੍ਸਰਣਭਾਵਂ, ਤਂ ਸਮਙ੍ਗਿਨੋਯੇਵ ਚ ਭਿਕ੍ਖੁਭਾਵਂ ਸਬ੍ਬਾਕਾਰਤੋ ਵਿਦਿਤ੍ਵਾ ਤਦਤ੍ਥਵਿਭਾਵਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਅਸਿਪ੍ਪਜੀਵੀਤਿ ਚਤੁਨ੍ਨਂ ਤਣ੍ਹੁਪ੍ਪਾਦਾਨਂ ਸਮੁਚ੍ਛੇਦਵਿਕ੍ਖਮ੍ਭਨੇਨ ਪਚ੍ਚਯਾਸਾਯ ਵਿਸੋਸਿਤਤ੍ਤਾ ਯਂਕਿਞ੍ਚਿ ਸਿਪ੍ਪਂ ਉਪਨਿਸ੍ਸਾਯ ਜੀਵਿਕਂ ਨ ਕਪ੍ਪੇਤੀਤਿ ਅਸਿਪ੍ਪਜੀਵੀ, ਏਤੇਨ ਆਜੀਵਪਾਰਿਸੁਦ੍ਧਿਸੀਲਂ ਦਸ੍ਸੇਤਿ. ਲਹੂਤਿ ਅਪ੍ਪਕਿਚ੍ਚਤਾਯ ਸਲ੍ਲਹੁਕਵੁਤ੍ਤਿਤਾਯ ਚ ਲਹੁ ਅਬਹੁਲਸਮ੍ਭਾਰੋ, ਏਤੇਨ ਚਤੁਪਚ੍ਚਯਸਨ੍ਤੋਸਸਿਦ੍ਧਂ ਸੁਭਰਤਂ ਦਸ੍ਸੇਤਿ. ਅਤ੍ਥਕਾਮੋਤਿ ਸਦੇਵਕਸ੍ਸ ਲੋਕਸ੍ਸ ਅਤ੍ਥਮੇਵ ਕਾਮੇਤੀਤਿ ਅਤ੍ਥਕਾਮੋ, ਏਤੇਨ ਸਤ੍ਤਾਨਂ ਅਨਤ੍ਥਪਰਿਵਜ੍ਜਨਸ੍ਸ ਪਕਾਸਿਤਤ੍ਤਾ ਪਾਤਿਮੋਕ੍ਖਸਂਵਰਸੀਲਂ ਦਸ੍ਸੇਤਿ ਪਾਣਾਤਿਪਾਤਾਦਿਅਨਤ੍ਥਵਿਰਮਣਪਰਿਦੀਪਨਤੋ. ਯਤਿਨ੍ਦ੍ਰਿਯੋਤਿ ਚਕ੍ਖਾਦੀਨਂ ਛਨ੍ਨਂ ਇਨ੍ਦ੍ਰਿਯਾਨਂ ਅਭਿਜ੍ਝਾਦ੍ਯਪ੍ਪਵਤ੍ਤਿਤੋ ਸਂਯਮੇਨ ਯਤਿਨ੍ਦ੍ਰਿਯੋ, ਏਤੇਨ ਇਨ੍ਦ੍ਰਿਯਸਂਵਰਸੀਲਂ ਵੁਤ੍ਤਂ. ਸਬ੍ਬਧਿ ਵਿਪ੍ਪਮੁਤ੍ਤੋਤਿ ਏਵਂ ਸੁਪਰਿਸੁਦ੍ਧਸੀਲੋ ਚਤੁਪਚ੍ਚਯਸਨ੍ਤੋਸੇ ਅਵਟ੍ਠਿਤੋ ਸਪ੍ਪਚ੍ਚਯਂ ਨਾਮਰੂਪਂ ਪਰਿਗ੍ਗਹੇਤ੍ਵਾ ਅਨਿਚ੍ਚਾਦਿਵਸੇਨ ਸਙ੍ਖਾਰੇ ਸਮ੍ਮਸਨ੍ਤੋ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਤਤੋ ਪਰਂ ਪਟਿਪਾਟਿਯਾ ਪਵਤ੍ਤਿਤੇਹਿ ਚਤੂਹਿ ਅਰਿਯਮਗ੍ਗੇਹਿ ਸਂਯੋਜਨਾਨਂ ਪਹੀਨਤ੍ਤਾ ਸਬ੍ਬਧਿ ਸਬ੍ਬਤ੍ਥ ਭਵਾਦੀਸੁ ਵਿਪ੍ਪਮੁਤ੍ਤੋ.

ਅਨੋਕਸਾਰੀ ਅਮਮੋ ਨਿਰਾਸੋਤਿ ਤਥਾ ਸਬ੍ਬਧਿ ਵਿਪ੍ਪਮੁਤ੍ਤਤ੍ਤਾ ਏਵ ਓਕਸਙ੍ਖਾਤੇਸੁ ਛਸੁਪਿ ਆਯਤਨੇਸੁ ਤਣ੍ਹਾਭਿਸਰਣਸ੍ਸ ਅਭਾਵੇਨ ਅਨੋਕਸਾਰੀ, ਰੂਪਾਦੀਸੁ ਕਤ੍ਥਚਿ ਮਮਙ੍ਕਾਰਾਭਾਵਤੋ ਅਮਮੋ, ਸਬ੍ਬੇਨ ਸਬ੍ਬਂ ਅਨਾਸੀਸਨਤੋ ਨਿਰਾਸੋ. ਹਿਤ੍ਵਾ ਮਾਨਂ ਏਕਚਰੋ ਸ ਭਿਕ੍ਖੂਤਿ ਏਵਂਭੂਤੋ ਚ ਸੋ ਅਰਹਤ੍ਤਮਗ੍ਗਪ੍ਪਤ੍ਤਿਸਮਕਾਲਮੇਵ ਅਨਵਸੇਸਂ ਮਾਨਂ ਹਿਤ੍ਵਾ ਪਜਹਿਤ੍ਵਾ ਇਮੇ ਭਿਕ੍ਖੂ ਵਿਯ ਗਣਸਙ੍ਗਣਿਕਂ ਅਕਤ੍ਵਾ ਪਵਿਵੇਕਕਾਮਤਾਯ ਤਣ੍ਹਾਸਹਾਯਵਿਰਹੇਨ ਚ ਸਬ੍ਬਿਰਿਯਾਪਥੇਸੁ ਏਕਚਰੋ, ਸੋ ਸਬ੍ਬਸੋ ਭਿਨ੍ਨਕਿਲੇਸਤ੍ਤਾ ਪਰਮਤ੍ਥਤੋ ਭਿਕ੍ਖੁ ਨਾਮ. ਏਤ੍ਥ ਚ ‘‘ਅਸਿਪ੍ਪਜੀਵੀ’’ਤਿਆਦਿਨਾ ਲੋਕਿਯਗੁਣਾ ਕਥਿਤਾ, ‘‘ਸਬ੍ਬਧਿ ਵਿਪ੍ਪਮੁਤ੍ਤੋ’’ਤਿਆਦਿਨਾ ਲੋਕੁਤ੍ਤਰਗੁਣਾ ਕਥਿਤਾ. ਤਤ੍ਥ ਅਸਿਪ੍ਪਜੀਵੀਤਿਆਦਿ ‘‘ਵਿਭਵੇ ਠਿਤਸ੍ਸੇਵ ਅਯਂ ਧਮ੍ਮੋ, ਨ ਸਿਪ੍ਪਂ ਨਿਸ੍ਸਾਯ ਮਿਚ੍ਛਾਜੀਵੇਨ ਜੀਵਿਕਂ ਕਪ੍ਪੇਨ੍ਤਸ੍ਸ, ਤਸ੍ਮਾ ਸਿਪ੍ਪੇਸੁ ਸਾਰਗ੍ਗਹਣਂ ਵਿਸ੍ਸਜ੍ਜੇਤ੍ਵਾ ਅਧਿਸੀਲਾਦੀਸੁਯੇਵ ਤੁਮ੍ਹੇਹਿ ਸਿਕ੍ਖਿਤਬ੍ਬ’’ਨ੍ਤਿ ਦਸ੍ਸੇਤਿ.

ਨਵਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਲੋਕਸੁਤ੍ਤਵਣ੍ਣਨਾ

੩੦. ਦਸਮੇ ਬੁਦ੍ਧਚਕ੍ਖੁਨਾਤਿ ਏਤ੍ਥ ਆਸਯਾਨੁਸਯਞਾਣਂ ਇਨ੍ਦ੍ਰਿਯਪਰੋਪਰਿਯਤ੍ਤਞਾਣਞ੍ਚ ਬੁਦ੍ਧਚਕ੍ਖੁ ਨਾਮ. ਯਥਾਹ –

‘‘ਅਦ੍ਦਸਾ ਖੋ ਭਗਵਾ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਸਤ੍ਤੇ ਅਪ੍ਪਰਜਕ੍ਖੇ ਮਹਾਰਜਕ੍ਖੇ ਤਿਕ੍ਖਿਨ੍ਦ੍ਰਿਯੇ ਮੁਦਿਨ੍ਦ੍ਰਿਯੇ’’ਤਿਆਦਿ (ਮ. ਨਿ. ੧.੨੮੩; ੨.੩੩੯).

ਲੋਕਨ੍ਤਿ ਤਯੋ ਲੋਕਾ – ਓਕਾਸਲੋਕੋ, ਸਙ੍ਖਾਰਲੋਕੋ, ਸਤ੍ਤਲੋਕੋਤਿ. ਤਤ੍ਥ –

‘‘ਯਾਵਤਾ ਚਨ੍ਦਿਮਸੂਰਿਯਾ ਪਰਿਹਰਨ੍ਤਿ,

ਦਿਸਾ ਭਨ੍ਤਿ ਵਿਰੋਚਨਾ;

ਤਾਵ ਸਹਸ੍ਸਧਾ ਲੋਕੋ,

ਏਤ੍ਥ ਤੇ ਵਤ੍ਤਤੀ ਵਸੋ’’ਤਿ. –

ਆਦੀਸੁ (ਮ. ਨਿ. ੧.੫੦੩) ਓਕਾਸਲੋਕੋ. ‘‘ਏਕੋ ਲੋਕੋ – ਸਬ੍ਬੇ ਸਤ੍ਤਾ ਆਹਾਰਟ੍ਠਿਤਿਕਾ, ਦ੍ਵੇ ਲੋਕਾ – ਨਾਮਞ੍ਚ ਰੂਪਞ੍ਚ, ਤਯੋ ਲੋਕਾ – ਤਿਸ੍ਸੋ ਵੇਦਨਾ, ਚਤ੍ਤਾਰੋ ਲੋਕਾ – ਚਤ੍ਤਾਰੋ ਆਹਾਰਾ, ਪਞ੍ਚ ਲੋਕਾ – ਪਞ੍ਚੁਪਾਦਾਨਕ੍ਖਨ੍ਧਾ, ਛ ਲੋਕਾ – ਛ ਅਜ੍ਝਤ੍ਤਿਕਾਨਿ ਆਯਤਨਾਨਿ, ਸਤ੍ਤ ਲੋਕਾ – ਸਤ੍ਤ ਵਿਞ੍ਞਾਣਟ੍ਠਿਤਿਯੋ, ਅਟ੍ਠ ਲੋਕਾ – ਅਟ੍ਠ ਲੋਕਧਮ੍ਮਾ, ਨਵ ਲੋਕਾ – ਨਵ ਸਤ੍ਤਾਵਾਸਾ, ਦਸ ਲੋਕਾ – ਦਸਾਯਤਨਾਨਿ, ਦ੍ਵਾਦਸ ਲੋਕਾ – ਦ੍ਵਾਦਸਾਯਤਨਾਨਿ, ਅਟ੍ਠਾਰਸ ਲੋਕਾ – ਅਟ੍ਠਾਰਸ ਧਾਤੁਯੋ’’ਤਿਆਦੀਸੁ (ਪਟਿ. ਮ. ੧.੧੧੨) ਸਙ੍ਖਾਰਲੋਕੋ. ‘‘ਸਸ੍ਸਤੋ ਲੋਕੋ, ਅਸਸ੍ਸਤੋ ਲੋਕੋ’’ਤਿਆਦੀਸੁ ਸਤ੍ਤਲੋਕੋ ਵੁਤ੍ਤੋ. ਇਧਾਪਿ ਸਤ੍ਤਲੋਕੋ ਵੇਦਿਤਬ੍ਬੋ.

ਤਤ੍ਥ ਲੋਕੀਯਤਿ ਵਿਚਿਤ੍ਤਾਕਾਰਤੋ ਦਿਸ੍ਸਤੀਤਿ ਚਕ੍ਕਵਾਲ਼ਸਙ੍ਖਾਤੋ ਲੋਕੋ ਓਕਾਸਲੋਕੋ, ਸਙ੍ਖਾਰੋ ਲੁਜ੍ਜਤਿ ਪਲੁਜ੍ਜਤੀਤਿ ਲੋਕੋ, ਲੋਕੀਯਤਿ ਏਤ੍ਥ ਪੁਞ੍ਞਪਾਪਂ ਤਬ੍ਬਿਪਾਕੋ ਚਾਤਿ ਸਤ੍ਤਲੋਕੋ. ਤੇਸੁ ਭਗਵਾ ਮਹਾਕਰੁਣਾਯ ਅਨੁਕਮ੍ਪਮਾਨੋ ਸਂਸਾਰਦੁਕ੍ਖਤੋ ਮੋਚੇਤੁਕਾਮੋ ਸਤ੍ਤਲੋਕਂ ਓਲੋਕੇਸਿ. ਕਤਮਸ੍ਸ ਪਨ ਸਤ੍ਤਾਹਸ੍ਸ ਅਚ੍ਚਯੇਨ ਓਲੋਕੇਸਿ? ਪਠਮਸ੍ਸ ਸਤ੍ਤਾਹਸ੍ਸ. ਭਗਵਾ ਹਿ ਪਲ੍ਲਙ੍ਕਸਤ੍ਤਾਹਸ੍ਸ ਪਰਿਯੋਸਾਨੇ ਪਚ੍ਛਿਮਯਾਮਾਵਸਾਨੇ ‘‘ਯਦਾ ਹਵੇ ਪਾਤੁਭਵਨ੍ਤਿ ਧਮ੍ਮਾ…ਪੇ… ਸੂਰਿਯੋਵ ਓਭਾਸਯਮਨ੍ਤਲਿਕ੍ਖ’’ਨ੍ਤਿ (ਉਦਾ. ੧-੩; ਕਥਾ. ੩੨੧; ਮਹਾਵ. ੧-੩) ਇਮਂ ਅਰਿਯਮਗ੍ਗਾਨੁਭਾਵਦੀਪਕਂ ਉਦਾਨਂ ਉਦਾਨੇਤ੍ਵਾ, ‘‘ਅਹਂ ਤਾਵ ਏਵਂ ਸੁਦੁਤ੍ਤਰਂ ਸਂਸਾਰਮਹੋਘਂ ਇਮਾਯ ਧਮ੍ਮਨਾਵਾਯ ਸਮੁਤ੍ਤਰਿਤ੍ਵਾ ਨਿਬ੍ਬਾਨਪਾਰੇ ਠਿਤੋ, ਹਨ੍ਦ ਦਾਨਿ ਲੋਕਮ੍ਪਿ ਤਾਰੇਸ੍ਸਾਮਿ, ਕੀਦਿਸੋ ਨੁ ਖੋ ਲੋਕੋ’’ਤਿ ਲੋਕਂ ਵੋਲੋਕੇਸਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਅਥ ਖੋ ਭਗਵਾ ਤਸ੍ਸ ਸਤ੍ਤਾਹਸ੍ਸ ਅਚ੍ਚਯੇਨ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਹਿਤ੍ਵਾ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਸੀ’’ਤਿ.

ਤਤ੍ਥ ਵੋਲੋਕੇਸੀਤਿ ਵਿਵਿਧੇਹਿ ਆਕਾਰੇਹਿ ਪਸ੍ਸਿ, ਹਤ੍ਥਤਲੇ ਠਪਿਤਆਮਲਕਂ ਵਿਯ ਅਤ੍ਤਨੋ ਞਾਣੇਨ ਪਚ੍ਚਕ੍ਖਂ ਅਕਾਸਿ. ਅਨੇਕੇਹਿ ਸਨ੍ਤਾਪੇਹੀਤਿਆਦਿ ਵੋਲੋਕਿਤਾਕਾਰਦਸ੍ਸਨਂ. ਅਨੇਕੇਹਿ ਸਨ੍ਤਾਪੇਹੀਤਿ ਅਨੇਕੇਹਿ ਦੁਕ੍ਖੇਹਿ. ਦੁਕ੍ਖਞ੍ਹਿ ਸਨ੍ਤਾਪਨਪੀਲ਼ਨਟ੍ਠੇਨ ਸਨ੍ਤਾਪੋਤਿ ਵੁਚ੍ਚਤਿ. ਯਥਾਹ – ‘‘ਦੁਕ੍ਖਸ੍ਸ ਪੀਲ਼ਨਟ੍ਠੋ ਸਙ੍ਖਤਟ੍ਠੋ ਸਨ੍ਤਾਪਟ੍ਠੋ ਵਿਪਰਿਣਾਮਟ੍ਠੋ’’ਤਿ (ਪਟਿ. ਮ. ੧.੧੭). ਤਞ੍ਚ ਦੁਕ੍ਖਦੁਕ੍ਖਾਦਿਵਸੇਨ ਚੇਵ ਜਾਤਿਆਦਿਵਸੇਨ ਚ ਅਨੇਕਪ੍ਪਕਾਰਂ. ਤੇਨ ਵੁਤ੍ਤਂ ‘‘ਅਨੇਕੇਹਿ ਸਨ੍ਤਾਪੇਹੀ’’ਤਿ. ਅਨੇਕੇਹਿ ਦੁਕ੍ਖੇਹਿ ਸਨ੍ਤਪ੍ਪਮਾਨੇ ਪੀਲ਼ਿਯਮਾਨੇ ਬਾਧਿਯਮਾਨੇ. ਪਰਿਲ਼ਾਹੇਹੀਤਿ ਪਰਿਦਾਹੇਹਿ. ਪਰਿਡਯ੍ਹਮਾਨੇਤਿ ਇਨ੍ਧਨਂ ਵਿਯ ਅਗ੍ਗਿਨਾ ਸਮਨ੍ਤਤੋ ਡਯ੍ਹਮਾਨੇ. ਰਾਗਜੇਹੀਤਿ ਰਾਗਸਮ੍ਭੂਤੇਹਿ. ਏਸ ਨਯੋ ਸੇਸੇਸੁਪਿ. ਰਾਗਾਦਯੋ ਹਿ ਯਸ੍ਮਿਂ ਸਨ੍ਤਾਨੇ ਉਪ੍ਪਜ੍ਜਨ੍ਤਿ, ਤਂ ਨਿਦ੍ਦਹਨ੍ਤਾ ਵਿਯ ਵਿਬਾਧੇਨ੍ਤਿ, ਤੇਨ ਵੁਤ੍ਤਂ – ‘‘ਤਯੋਮੇ, ਭਿਕ੍ਖਵੇ, ਅਗ੍ਗੀ – ਰਾਗਗ੍ਗਿ, ਦੋਸਗ੍ਗਿ, ਮੋਹਗ੍ਗੀ’’ਤਿ (ਇਤਿਵੁ. ੯੩). ਯਤੋ ਤੇ ਚਿਤ੍ਤਂ ਕਾਯਞ੍ਚ ਕਿਲੇਸੇਨ੍ਤੀਤਿ ਕਿਲੇਸਾਤਿ ਵੁਚ੍ਚਨ੍ਤਿ. ਏਤ੍ਥ ਚ ਪਰਿਡਯ੍ਹਮਾਨੇਤਿ ਏਤੇਨ ਭਗਵਾ ਰਾਗਾਦਿਕਿਲੇਸਾਨਂ ਪਵਤ੍ਤਿਦੁਕ੍ਖਤਂ, ਤੇਨ ਚ ਸਤ੍ਤਾਨਂ ਅਭਿਭੂਤਤਂ ਦਸ੍ਸੇਤਿ. ਸਨ੍ਤਪ੍ਪਮਾਨੇਤਿ ਇਮਿਨਾ ਪਨ ਤੇਸਂ ਕਾਲਨ੍ਤਰਦੁਕ੍ਖਤਂ, ਤੇਨ ਨਿਰਨ੍ਤਰੋਪਦ੍ਦਵਤਞ੍ਚ ਦਸ੍ਸੇਤਿ.