੨. ਅਵਿਦੂਰੇਨਿਦਾਨਕਥਾ

ਤੁਸਿਤਪੁਰੇ ਵਸਨ੍ਤੇਯੇਵ ਪਨ ਬੋਧਿਸਤ੍ਤੇ ਬੁਦ੍ਧਕੋਲਾਹਲਂ ਨਾਮ ਉਦਪਾਦਿ. ਲੋਕਸ੍ਮਿਞ੍ਹਿ ਤੀਣਿ ਕੋਲਾਹਲਾਨਿ ਉਪ੍ਪਜ੍ਜਨ੍ਤਿ – ਕਪ੍ਪਕੋਲਾਹਲਂ, ਬੁਦ੍ਧਕੋਲਾਹਲਂ, ਚਕ੍ਕਵਤ੍ਤਿਕੋਲਾਹਲਨ੍ਤਿ. ਤਤ੍ਥ ‘‘ਵਸ੍ਸਸਤਸਹਸ੍ਸਸ੍ਸ ਅਚ੍ਚਯੇਨ ਕਪ੍ਪੁਟ੍ਠਾਨਂ ਭਵਿਸ੍ਸਤੀ’’ਤਿ ਲੋਕਬ੍ਯੂਹਾ ਨਾਮ ਕਾਮਾਵਚਰਦੇਵਾ ਮੁਤ੍ਤਸਿਰਾ ਵਿਕਿਣ੍ਣਕੇਸਾ ਰੁਦਮੁਖਾ ਅਸ੍ਸੂਨਿ ਹਤ੍ਥੇਹਿ ਪੁਞ੍ਛਮਾਨਾ ਰਤ੍ਤਵਤ੍ਥਨਿਵਤ੍ਥਾ ਅਤਿਵਿਯ ਵਿਰੂਪਵੇਸਧਾਰਿਨੋ ਹੁਤ੍ਵਾ ਮਨੁਸ੍ਸਪਥੇ ਵਿਚਰਨ੍ਤਾ ਏਵਂ ਆਰੋਚੇਨ੍ਤਿ ‘‘ਮਾਰਿਸਾ ਇਤੋ ਵਸ੍ਸਸਤਸਹਸ੍ਸਸ੍ਸ ਅਚ੍ਚਯੇਨ ਕਪ੍ਪੁਟ੍ਠਾਨਂ ਭਵਿਸ੍ਸਤਿ, ਅਯਂ ਲੋਕੋ ਵਿਨਸ੍ਸਿਸ੍ਸਤਿ, ਮਹਾਸਮੁਦ੍ਦੋਪਿ ਸੁਸ੍ਸਿਸ੍ਸਤਿ, ਅਯਞ੍ਚ ਮਹਾਪਥਵੀ ਸਿਨੇਰੁ ਚ ਪਬ੍ਬਤਰਾਜਾ ਉਡ੍ਡਯ੍ਹਿਸ੍ਸਨ੍ਤਿ ਵਿਨਸ੍ਸਿਸ੍ਸਨ੍ਤਿ, ਯਾਵ ਬ੍ਰਹ੍ਮਲੋਕਾ ਲੋਕਵਿਨਾਸੋ ਭਵਿਸ੍ਸਤਿ, ਮੇਤ੍ਤਂ ਮਾਰਿਸਾ ਭਾਵੇਥ, ਕਰੁਣਂ, ਮੁਦਿਤਂ, ਉਪੇਕ੍ਖਂ ਮਾਰਿਸਾ ਭਾਵੇਥ, ਮਾਤਰਂ ਉਪਟ੍ਠਹਥ, ਪਿਤਰਂ ਉਪਟ੍ਠਹਥ, ਕੁਲੇ ਜੇਟ੍ਠਾਪਚਾਯਿਨੋ ਹੋਥਾ’’ਤਿ. ਇਦਂ ਕਪ੍ਪਕੋਲਾਹਲਂ ਨਾਮ. ਵਸ੍ਸਸਹਸ੍ਸਸ੍ਸ ਅਚ੍ਚਯੇਨ ਪਨ ਸਬ੍ਬਞ੍ਞੁਬੁਦ੍ਧੋ ਲੋਕੇ ਉਪ੍ਪਜ੍ਜਿਸ੍ਸਤੀਤਿ ਲੋਕਪਾਲਦੇਵਤਾ ‘‘ਇਤੋ ਮਾਰਿਸਾ ਵਸ੍ਸਸਹਸ੍ਸਸ੍ਸ ਅਚ੍ਚਯੇਨ ਬੁਦ੍ਧੋ ਲੋਕੇ ਉਪ੍ਪਜ੍ਜਿਸ੍ਸਤੀ’’ਤਿ ਉਗ੍ਘੋਸੇਨ੍ਤਾ ਆਹਿਣ੍ਡਨ੍ਤਿ. ਇਦਂ ਬੁਦ੍ਧਕੋਲਾਹਲਂ ਨਾਮ. ਵਸ੍ਸਸਤਸ੍ਸ ਅਚ੍ਚਯੇਨ ਚਕ੍ਕਵਤ੍ਤੀ ਰਾਜਾ ਉਪ੍ਪਜ੍ਜਿਸ੍ਸਤੀਤਿ ਦੇਵਤਾ ‘‘ਇਤੋ ਮਾਰਿਸਾ ਵਸ੍ਸਸਤਸ੍ਸ ਅਚ੍ਚਯੇਨ ਚਕ੍ਕਵਤ੍ਤੀ ਰਾਜਾ ਲੋਕੇ ਉਪ੍ਪਜ੍ਜਿਸ੍ਸਤੀ’’ਤਿ ਉਗ੍ਘੋਸੇਨ੍ਤਿਯੋ ਆਹਿਣ੍ਡਨ੍ਤਿ. ਇਦਂ ਚਕ੍ਕਵਤ੍ਤਿਕੋਲਾਹਲਂ ਨਾਮ. ਇਮਾਨਿ ਤੀਣਿ ਕੋਲਾਹਲਾਨਿ ਮਹਨ੍ਤਾਨਿ ਹੋਨ੍ਤਿ.

ਤੇਸੁ ਬੁਦ੍ਧਕੋਲਾਹਲਸਦ੍ਦਂ ਸੁਤ੍ਵਾ ਸਕਲਦਸਸਹਸ੍ਸਚਕ੍ਕਵਾਲ਼ਦੇਵਤਾ ਏਕਤੋ ਸਨ੍ਨਿਪਤਿਤ੍ਵਾ ‘‘ਅਸੁਕੋ ਨਾਮ ਸਤ੍ਤੋ ਬੁਦ੍ਧੋ ਭਵਿਸ੍ਸਤੀ’’ਤਿ ਞਤ੍ਵਾ ਤਂ ਉਪਸਙ੍ਕਮਿਤ੍ਵਾ ਆਯਾਚਨ੍ਤਿ. ਆਯਾਚਮਾਨਾ ਚ ਪੁਬ੍ਬਨਿਮਿਤ੍ਤੇਸੁ ਉਪ੍ਪਨ੍ਨੇਸੁ ਆਯਾਚਨ੍ਤਿ. ਤਦਾ ਪਨ ਸਬ੍ਬਾਪਿ ਦੇਵਤਾ ਏਕੇਕਚਕ੍ਕਵਾਲ਼ੇ ਚਤੁਮਹਾਰਾਜਸਕ੍ਕਸੁਯਾਮਸਨ੍ਤੁਸਿਤਸੁਨਿਮ੍ਮਿਤਵਸਵਤ੍ਤਿਮਹਾਬ੍ਰਹ੍ਮੇਹਿ ਸਦ੍ਧਿਂ ਏਕਚਕ੍ਕਵਾਲ਼ੇ ਸਨ੍ਨਿਪਤਿਤ੍ਵਾ ਤੁਸਿਤਭਵਨੇ ਬੋਧਿਸਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਮਾਰਿਸਾ ਤੁਮ੍ਹੇਹਿ ਦਸ ਪਾਰਮਿਯੋ ਪੂਰੇਨ੍ਤੇਹਿ ਨ ਸਕ੍ਕਸਮ੍ਪਤ੍ਤਿਂ, ਨ ਮਾਰਸਮ੍ਪਤ੍ਤਿਂ, ਨ ਬ੍ਰਹ੍ਮਸਮ੍ਪਤ੍ਤਿਂ, ਨ ਚਕ੍ਕਵਤ੍ਤਿਸਮ੍ਪਤ੍ਤਿਂ ਪਤ੍ਥੇਨ੍ਤੇਹਿ ਪੂਰਿਤਾ, ਲੋਕਨਿਤ੍ਥਰਣਤ੍ਥਾਯ ਪਨ ਸਬ੍ਬਞ੍ਞੁਤਂ ਪਤ੍ਥੇਨ੍ਤੇਹਿ ਪੂਰਿਤਾ, ਸੋ ਵੋ ਇਦਾਨਿ ਕਾਲੋ ਮਾਰਿਸਾ ਬੁਦ੍ਧਤ੍ਤਾਯ ਸਮਯੋ, ਮਾਰਿਸਾ ਬੁਦ੍ਧਤ੍ਤਾਯ ਸਮਯੋ’’ਤਿ ਯਾਚਿਂਸੁ.

ਅਥ ਮਹਾਸਤ੍ਤੋ ਦੇਵਤਾਨਂ ਪਟਿਞ੍ਞਂ ਅਦਤ੍ਵਾਵ ਕਾਲਦੀਪਦੇਸਕੁਲਜਨੇਤ੍ਤਿਆਯੁਪਰਿਚ੍ਛੇਦਵਸੇਨ ਪਞ੍ਚਮਹਾਵਿਲੋਕਨਂ ਨਾਮ ਵਿਲੋਕੇਸਿ. ਤਤ੍ਥ ‘‘ਕਾਲੋ ਨੁ ਖੋ, ਅਕਾਲੋ ਨੁ ਖੋ’’ਤਿ ਪਠਮਂ ਕਾਲਂ ਵਿਲੋਕੇਸਿ. ਤਤ੍ਥ ਵਸ੍ਸਸਤਸਹਸ੍ਸਤੋ ਉਦ੍ਧਂ ਵਡ੍ਢਿਤਆਯੁਕਾਲੋ ਕਾਲੋ ਨਾਮ ਨ ਹੋਤਿ. ਕਸ੍ਮਾ? ਤਦਾ ਹਿ ਸਤ੍ਤਾਨਂ ਜਾਤਿਜਰਾਮਰਣਾਨਿ ਨ ਪਞ੍ਞਾਯਨ੍ਤਿ. ਬੁਦ੍ਧਾਨਞ੍ਚ ਧਮ੍ਮਦੇਸਨਾ ਤਿਲਕ੍ਖਣਮੁਤ੍ਤਾ ਨਾਮ ਨਤ੍ਥਿ. ਤੇਸਂ ‘‘ਅਨਿਚ੍ਚਂ, ਦੁਕ੍ਖਂ, ਅਨਤ੍ਤਾ’’ਤਿ ਕਥੇਨ੍ਤਾਨਂ ‘‘ਕਿਂ ਨਾਮੇਤਂ ਕਥੇਨ੍ਤੀ’’ਤਿ ਨੇਵ ਸੋਤਬ੍ਬਂ ਨ ਸਦ੍ਧਾਤਬ੍ਬਂ ਮਞ੍ਞਨ੍ਤਿ, ਤਤੋ ਅਭਿਸਮਯੋ ਨ ਹੋਤਿ, ਤਸ੍ਮਿਂ ਅਸਤਿ ਅਨਿਯ੍ਯਾਨਿਕਂ ਸਾਸਨਂ ਹੋਤਿ. ਤਸ੍ਮਾ ਸੋ ਅਕਾਲੋ. ਵਸ੍ਸਸਤਤੋ ਊਨਆਯੁਕਾਲੋਪਿ ਕਾਲੋ ਨ ਹੋਤਿ. ਕਸ੍ਮਾ? ਤਦਾ ਸਤ੍ਤਾ ਉਸ੍ਸਨ੍ਨਕਿਲੇਸਾ ਹੋਨ੍ਤਿ, ਉਸ੍ਸਨ੍ਨਕਿਲੇਸਾਨਞ੍ਚ ਦਿਨ੍ਨੋ ਓਵਾਦੋ ਓਵਾਦਟ੍ਠਾਨੇ ਨ ਤਿਟ੍ਠਤਿ, ਉਦਕੇ ਦਣ੍ਡਰਾਜਿ ਵਿਯ ਖਿਪ੍ਪਂ ਵਿਗਚ੍ਛਤਿ. ਤਸ੍ਮਾ ਸੋਪਿ ਅਕਾਲੋ. ਵਸ੍ਸਸਤਸਹਸ੍ਸਤੋ ਪਨ ਪਟ੍ਠਾਯ ਹੇਟ੍ਠਾ, ਵਸ੍ਸਸਤਤੋ ਪਟ੍ਠਾਯ ਉਦ੍ਧਂ ਆਯੁਕਾਲੋ ਕਾਲੋ ਨਾਮ. ਤਦਾ ਚ ਵਸ੍ਸਸਤਕਾਲੋ. ਅਥ ਮਹਾਸਤ੍ਤੋ ‘‘ਨਿਬ੍ਬਤ੍ਤਿਤਬ੍ਬਕਾਲੋ’’ਤਿ ਕਾਲਂ ਪਸ੍ਸਿ.

ਤਤੋ ਦੀਪਂ ਵਿਲੋਕੇਨ੍ਤੋ ਸਪਰਿਵਾਰੇ ਚਤ੍ਤਾਰੋ ਦੀਪੇ ਓਲੋਕੇਤ੍ਵਾ ‘‘ਤੀਸੁ ਦੀਪੇਸੁ ਬੁਦ੍ਧਾ ਨ ਨਿਬ੍ਬਤ੍ਤਨ੍ਤਿ, ਜਮ੍ਬੁਦੀਪੇਯੇਵ ਨਿਬ੍ਬਤ੍ਤਨ੍ਤੀ’’ਤਿ ਦੀਪਂ ਪਸ੍ਸਿ.

ਤਤੋ ‘‘ਜਮ੍ਬੁਦੀਪੋ ਨਾਮ ਮਹਾ ਦਸਯੋਜਨਸਹਸ੍ਸਪਰਿਮਾਣੋ, ਕਤਰਸ੍ਮਿਂ ਨੁ ਖੋ ਪਦੇਸੇ ਬੁਦ੍ਧਾ ਨਿਬ੍ਬਤ੍ਤਨ੍ਤੀ’’ਤਿ ਓਕਾਸਂ ਵਿਲੋਕੇਨ੍ਤੋ ਮਜ੍ਝਿਮਦੇਸਂ ਪਸ੍ਸਿ. ਮਜ੍ਝਿਮਦੇਸੋ ਨਾਮ – ‘‘ਪੁਰਤ੍ਥਿਮਾਯ ਦਿਸਾਯ ਗਜਙ੍ਗਲਂ ਨਾਮ ਨਿਗਮੋ, ਤਸ੍ਸ ਅਪਰੇਨ ਮਹਾਸਾਲੋ, ਤਤੋ ਪਰਂ ਪਚ੍ਚਨ੍ਤਿਮਾ ਜਨਪਦਾ, ਓਰਤੋ ਮਜ੍ਝੇ. ਪੁਬ੍ਬਦਕ੍ਖਿਣਾਯ ਦਿਸਾਯ ਸਲ੍ਲਵਤੀ ਨਾਮ ਨਦੀ, ਤਤੋ ਪਰਂ ਪਚ੍ਚਨ੍ਤਿਮਾ ਜਨਪਦਾ, ਓਰਤੋ ਮਜ੍ਝੇ. ਦਕ੍ਖਿਣਾਯ ਦਿਸਾਯ ਸੇਤਕਣ੍ਣਿਕਂ ਨਾਮ ਨਿਗਮੋ, ਤਤੋ ਪਰਂ ਪਚ੍ਚਨ੍ਤਿਮਾ ਜਨਪਦਾ, ਓਰਤੋ ਮਜ੍ਝੇ. ਪਚ੍ਛਿਮਾਯ ਦਿਸਾਯ ਥੂਣਂ ਨਾਮ ਬ੍ਰਾਹ੍ਮਣਗਾਮੋ, ਤਤੋ ਪਰਂ ਪਚ੍ਚਨ੍ਤਿਮਾ ਜਨਪਦਾ, ਓਰਤੋ ਮਜ੍ਝੇ. ਉਤ੍ਤਰਾਯ ਦਿਸਾਯ ਉਸੀਰਦ੍ਧਜੋ ਨਾਮ ਪਬ੍ਬਤੋ, ਤਤੋ ਪਰਂ ਪਚ੍ਚਨ੍ਤਿਮਾ ਜਨਪਦਾ, ਓਰਤੋ ਮਜ੍ਝੇ’’ਤਿ ਏਵਂ ਵਿਨਯੇ (ਮਹਾਵ. ੨੫੯) ਵੁਤ੍ਤੋ ਪਦੇਸੋ. ਸੋ ਆਯਾਮਤੋ ਤੀਣਿ ਯੋਜਨਸਤਾਨਿ, ਵਿਤ੍ਥਾਰਤੋ ਅਡ੍ਢਤੇਯ੍ਯਾਨਿ, ਪਰਿਕ੍ਖੇਪਤੋ ਨਵ ਯੋਜਨਸਤਾਨੀਤਿ ਏਤਸ੍ਮਿਂ ਪਦੇਸੇ ਬੁਦ੍ਧਾ, ਪਚ੍ਚੇਕਬੁਦ੍ਧਾ, ਅਗ੍ਗਸਾਵਕਾ, ਅਸੀਤਿ ਮਹਾਸਾਵਕਾ, ਚਕ੍ਕਵਤ੍ਤਿਰਾਜਾ ਅਞ੍ਞੇ ਚ ਮਹੇਸਕ੍ਖਾ ਖਤ੍ਤਿਯਬ੍ਰਾਹ੍ਮਣਗਹਪਤਿਮਹਾਸਾਲਾ ਉਪ੍ਪਜ੍ਜਨ੍ਤਿ. ਇਦਞ੍ਚੇਤ੍ਥ ਕਪਿਲਵਤ੍ਥੁ ਨਾਮ ਨਗਰਂ, ਤਤ੍ਥ ਮਯਾ ਨਿਬ੍ਬਤ੍ਤਿਤਬ੍ਬਨ੍ਤਿ ਨਿਟ੍ਠਂ ਅਗਮਾਸਿ.

ਤਤੋ ਕੁਲਂ ਵਿਲੋਕੇਨ੍ਤੋ ‘‘ਬੁਦ੍ਧਾ ਨਾਮ ਵੇਸ੍ਸਕੁਲੇ ਵਾ ਸੁਦ੍ਦਕੁਲੇ ਵਾ ਨ ਨਿਬ੍ਬਤ੍ਤਨ੍ਤਿ, ਲੋਕਸਮ੍ਮਤੇ ਪਨ ਖਤ੍ਤਿਯਕੁਲੇ ਵਾ ਬ੍ਰਾਹ੍ਮਣਕੁਲੇਵਾਤਿ ਦ੍ਵੀਸੁਯੇਵ ਕੁਲੇਸੁ ਨਿਬ੍ਬਤ੍ਤਨ੍ਤਿ. ਇਦਾਨਿ ਚ ਖਤ੍ਤਿਯਕੁਲਂ ਲੋਕਸਮ੍ਮਤਂ, ਤਤ੍ਥ ਨਿਬ੍ਬਤ੍ਤਿਸ੍ਸਾਮਿ. ਸੁਦ੍ਧੋਦਨੋ ਨਾਮ ਰਾਜਾ ਮੇ ਪਿਤਾ ਭਵਿਸ੍ਸਤੀ’’ਤਿ ਕੁਲਂ ਪਸ੍ਸਿ.

ਤਤੋ ਮਾਤਰਂ ਵਿਲੋਕੇਨ੍ਤੋ ‘‘ਬੁਦ੍ਧਮਾਤਾ ਨਾਮ ਲੋਲਾ ਸੁਰਾਧੁਤ੍ਤਾ ਨ ਹੋਤਿ, ਕਪ੍ਪਸਤਸਹਸ੍ਸਂ ਪਨ ਪੂਰਿਤਪਾਰਮੀ ਜਾਤਿਤੋ ਪਟ੍ਠਾਯ ਅਖਣ੍ਡਪਞ੍ਚਸੀਲਾਯੇਵ ਹੋਤਿ. ਅਯਞ੍ਚ ਮਹਾਮਾਯਾ ਨਾਮ ਦੇਵੀ ਏਦਿਸੀ, ਅਯਂ ਮੇ ਮਾਤਾ ਭਵਿਸ੍ਸਤਿ, ਕਿਤ੍ਤਕਂ ਪਨਸ੍ਸਾ ਆਯੂਤਿ ਦਸਨ੍ਨਂ ਮਾਸਾਨਂ ਉਪਰਿ ਸਤ੍ਤ ਦਿਵਸਾਨੀ’’ਤਿ ਪਸ੍ਸਿ.

ਇਤਿ ਇਮਂ ਪਞ੍ਚਮਹਾਵਿਲੋਕਨਂ ਵਿਲੋਕੇਤ੍ਵਾ ‘‘ਕਾਲੋ ਮੇ ਮਾਰਿਸਾ ਬੁਦ੍ਧਭਾਵਾਯਾ’’ਤਿ ਦੇਵਤਾਨਂ ਸਙ੍ਗਹਂ ਕਰੋਨ੍ਤੋ ਪਟਿਞ੍ਞਂ ਦਤ੍ਵਾ ‘‘ਗਚ੍ਛਥ, ਤੁਮ੍ਹੇ’’ਤਿ ਤਾ ਦੇਵਤਾ ਉਯ੍ਯੋਜੇਤ੍ਵਾ ਤੁਸਿਤਦੇਵਤਾਹਿ ਪਰਿਵੁਤੋ ਤੁਸਿਤਪੁਰੇ ਨਨ੍ਦਨਵਨਂ ਪਾਵਿਸਿ. ਸਬ੍ਬਦੇਵਲੋਕੇਸੁ ਹਿ ਨਨ੍ਦਨਵਨਂ ਅਤ੍ਥਿਯੇਵ. ਤਤ੍ਥ ਨਂ ਦੇਵਤਾ ‘‘ਇਤੋ ਚੁਤੋ ਸੁਗਤਿਂ ਗਚ੍ਛ, ਇਤੋ ਚੁਤੋ ਸੁਗਤਿਂ ਗਚ੍ਛਾ’’ਤਿ ਪੁਬ੍ਬੇ ਕਤਕੁਸਲਕਮ੍ਮੋਕਾਸਂ ਸਾਰਯਮਾਨਾ ਵਿਚਰਨ੍ਤਿ. ਸੋ ਏਵਂ ਦੇਵਤਾਹਿ ਕੁਸਲਂ ਸਾਰਯਮਾਨਾਹਿ ਪਰਿਵੁਤੋ ਤਤ੍ਥ ਵਿਚਰਨ੍ਤੋ ਚਵਿਤ੍ਵਾ ਮਹਾਮਾਯਾਯ ਦੇਵਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿ.

ਤਸ੍ਸ ਆਵਿਭਾਵਤ੍ਥਂ ਅਯਮਨੁਪੁਬ੍ਬਿਕਥਾ – ਤਦਾ ਕਿਰ ਕਪਿਲਵਤ੍ਥੁਨਗਰੇ ਆਸਾਲ਼੍ਹਿਨਕ੍ਖਤ੍ਤਂ ਸਙ੍ਘੁਟ੍ਠਂ ਅਹੋਸਿ, ਮਹਾਜਨੋ ਨਕ੍ਖਤ੍ਤਂ ਕੀਲ਼ਤਿ. ਮਹਾਮਾਯਾਪਿ ਦੇਵੀ ਪੁਰੇ ਪੁਣ੍ਣਮਾਯ ਸਤ੍ਤਮਦਿਵਸਤੋ ਪਟ੍ਠਾਯ ਵਿਗਤਸੁਰਾਪਾਨਂ ਮਾਲਾਗਨ੍ਧਵਿਭੂਤਿਸਮ੍ਪਨ੍ਨਂ ਨਕ੍ਖਤ੍ਤਕੀਲ਼ਂ ਅਨੁਭਵਮਾਨਾ ਸਤ੍ਤਮੇ ਦਿਵਸੇ ਪਾਤੋਵ ਉਟ੍ਠਾਯ ਗਨ੍ਧੋਦਕੇਨ ਨ੍ਹਾਯਿਤ੍ਵਾ ਚਤ੍ਤਾਰਿ ਸਤਸਹਸ੍ਸਾਨਿ ਵਿਸ੍ਸਜ੍ਜੇਤ੍ਵਾ ਮਹਾਦਾਨਂ ਦਤ੍ਵਾ ਸਬ੍ਬਾਲਙ੍ਕਾਰਵਿਭੂਸਿਤਾ ਵਰਭੋਜਨਂ ਭੁਞ੍ਜਿਤ੍ਵਾ ਉਪੋਸਥਙ੍ਗਾਨਿ ਅਧਿਟ੍ਠਾਯ ਅਲਙ੍ਕਤਪਟਿਯਤ੍ਤਂ ਸਿਰਿਗਬ੍ਭਂ ਪਵਿਸਿਤ੍ਵਾ ਸਿਰਿਸਯਨੇ ਨਿਪਨ੍ਨਾ ਨਿਦ੍ਦਂ ਓਕ੍ਕਮਮਾਨਾ ਇਮਂ ਸੁਪਿਨਂ ਅਦ੍ਦਸ – ‘ਚਤ੍ਤਾਰੋ ਕਿਰ ਨਂ ਮਹਾਰਾਜਾਨੋ ਸਯਨੇਨੇਵ ਸਦ੍ਧਿਂ ਉਕ੍ਖਿਪਿਤ੍ਵਾ ਹਿਮਵਨ੍ਤਂ ਨੇਤ੍ਵਾ ਸਟ੍ਠਿਯੋਜਨਿਕੇ ਮਨੋਸਿਲਾਤਲੇ ਸਤ੍ਤਯੋਜਨਿਕਸ੍ਸ ਮਹਾਸਾਲਰੁਕ੍ਖਸ੍ਸ ਹੇਟ੍ਠਾ ਠਪੇਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਅਥ ਨੇਸਂ ਦੇਵਿਯੋ ਆਗਨ੍ਤ੍ਵਾ ਦੇਵਿਂ ਅਨੋਤਤ੍ਤਦਹਂ ਨੇਤ੍ਵਾ ਮਨੁਸ੍ਸਮਲਹਰਣਤ੍ਥਂ ਨ੍ਹਾਪੇਤ੍ਵਾ ਦਿਬ੍ਬਵਤ੍ਥਂ ਨਿਵਾਸਾਪੇਤ੍ਵਾ ਗਨ੍ਧੇਹਿ ਵਿਲਿਮ੍ਪਾਪੇਤ੍ਵਾ ਦਿਬ੍ਬਪੁਪ੍ਫਾਨਿ ਪਿਲ਼ਨ੍ਧਾਪੇਤ੍ਵਾ ਤਤੋ ਅਵਿਦੂਰੇ ਏਕੋ ਰਜਤਪਬ੍ਬਤੋ ਅਤ੍ਥਿ, ਤਸ੍ਸ ਅਨ੍ਤੋ ਕਨਕਵਿਮਾਨਂ ਅਤ੍ਥਿ, ਤਤ੍ਥ ਪਾਚੀਨਸੀਸਕਂ ਦਿਬ੍ਬਸਯਨਂ ਪਞ੍ਞਾਪੇਤ੍ਵਾ ਨਿਪਜ੍ਜਾਪੇਸੁਂ. ਅਥ ਬੋਧਿਸਤ੍ਤੋ ਸੇਤਵਰਵਾਰਣੋ ਹੁਤ੍ਵਾ ਤਤੋ ਅਵਿਦੂਰੇ ਏਕੋ ਸੁਵਣ੍ਣਪਬ੍ਬਤੋ ਅਤ੍ਥਿ, ਤਤ੍ਥ ਵਿਚਰਿਤ੍ਵਾ ਤਤੋ ਓਰੁਯ੍ਹ ਰਜਤਪਬ੍ਬਤਂ ਅਭਿਰੁਹਿਤ੍ਵਾ ਉਤ੍ਤਰਦਿਸਤੋ ਆਗਮ੍ਮ ਰਜਤਦਾਮਵਣ੍ਣਾਯ ਸੋਣ੍ਡਾਯ ਸੇਤਪਦੁਮਂ ਗਹੇਤ੍ਵਾ ਕੋਞ੍ਚਨਾਦਂ ਨਦਿਤ੍ਵਾ ਕਨਕਵਿਮਾਨਂ ਪਵਿਸਿਤ੍ਵਾ ਮਾਤੁਸਯਨਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਦਕ੍ਖਿਣਪਸ੍ਸਂ ਫਾਲੇਤ੍ਵਾ ਕੁਚ੍ਛਿਂ ਪਵਿਟ੍ਠਸਦਿਸੋ ਅਹੋਸੀ’ਤਿ. ਏਵਂ ਉਤ੍ਤਰਾਸਾਲ਼੍ਹਨਕ੍ਖਤ੍ਤੇਨ ਪਟਿਸਨ੍ਧਿਂ ਗਣ੍ਹਿ.

ਪੁਨਦਿਵਸੇ ਪਬੁਦ੍ਧਾ ਦੇਵੀ ਤਂ ਸੁਪਿਨਂ ਰਞ੍ਞੋ ਆਰੋਚੇਸਿ. ਰਾਜਾ ਚਤੁਸਟ੍ਠਿਮਤ੍ਤੇ ਬ੍ਰਾਹ੍ਮਣਪਾਮੋਕ੍ਖੇ ਪਕ੍ਕੋਸਾਪੇਤ੍ਵਾ ਗੋਮਯਹਰਿਤੂਪਲਿਤ੍ਤਾਯ ਲਾਜਾਦੀਹਿ ਕਤਮਙ੍ਗਲਸਕ੍ਕਾਰਾਯ ਭੂਮਿਯਾ ਮਹਾਰਹਾਨਿ ਆਸਨਾਨਿ ਪਞ੍ਞਾਪੇਤ੍ਵਾ ਤਤ੍ਥ ਨਿਸਿਨ੍ਨਾਨਂ ਬ੍ਰਾਹ੍ਮਣਾਨਂ ਸਪ੍ਪਿਮਧੁਸਕ੍ਖਰਾਭਿਸਙ੍ਖਤਸ੍ਸ ਵਰਪਾਯਾਸਸ੍ਸ ਸੁਵਣ੍ਣਰਜਤਪਾਤਿਯੋ ਪੂਰੇਤ੍ਵਾ ਸੁਵਣ੍ਣਰਜਤਪਾਤੀਹਿਯੇਵ ਪਟਿਕੁਜ੍ਜਿਤ੍ਵਾ ਅਦਾਸਿ, ਅਞ੍ਞੇਹਿ ਚ ਅਹਤਵਤ੍ਥਕਪਿਲਗਾਵਿਦਾਨਾਦੀਹਿ ਤੇ ਸਨ੍ਤਪ੍ਪੇਸਿ. ਅਥ ਨੇਸਂ ਸਬ੍ਬਕਾਮੇਹਿ ਸਨ੍ਤਪ੍ਪਿਤਾਨਂ ਸੁਪਿਨਂ ਆਰੋਚਾਪੇਤ੍ਵਾ ‘‘ਕਿਂ ਭਵਿਸ੍ਸਤੀ’’ਤਿ ਪੁਚ੍ਛਿ. ਬ੍ਰਾਹ੍ਮਣਾ ਆਹਂਸੁ ‘‘ਮਾ ਚਿਨ੍ਤਯਿ, ਮਹਾਰਾਜ, ਦੇਵਿਯਾ ਤੇ ਕੁਚ੍ਛਿਮ੍ਹਿ ਗਬ੍ਭੋ ਪਤਿਟ੍ਠਿਤੋ, ਸੋ ਚ ਖੋ ਪੁਰਿਸਗਬ੍ਭੋ, ਨ ਇਤ੍ਥਿਗਬ੍ਭੋ, ਪੁਤ੍ਤੋ ਤੇ ਭਵਿਸ੍ਸਤਿ. ਸੋ ਸਚੇ ਅਗਾਰਂ ਅਜ੍ਝਾਵਸਿਸ੍ਸਤਿ, ਰਾਜਾ ਭਵਿਸ੍ਸਤਿ ਚਕ੍ਕਵਤ੍ਤੀ; ਸਚੇ ਅਗਾਰਾ ਨਿਕ੍ਖਮ੍ਮ ਪਬ੍ਬਜਿਸ੍ਸਤਿ, ਬੁਦ੍ਧੋ ਭਵਿਸ੍ਸਤਿ ਲੋਕੇ ਵਿਵਟ੍ਟਚ੍ਛਦੋ’’ਤਿ.

ਬੋਧਿਸਤ੍ਤਸ੍ਸ ਪਨ ਮਾਤੁਕੁਚ੍ਛਿਮ੍ਹਿ ਪਟਿਸਨ੍ਧਿਗ੍ਗਹਣਕ੍ਖਣੇ ਏਕਪ੍ਪਹਾਰੇਨੇਵ ਸਕਲਦਸਸਹਸ੍ਸੀ ਲੋਕਧਾਤੁ ਸਙ੍ਕਮ੍ਪਿ ਸਮ੍ਪਕਮ੍ਪਿ ਸਮ੍ਪਵੇਧਿ. ਬਾਤ੍ਤਿਂਸਪੁਬ੍ਬਨਿਮਿਤ੍ਤਾਨਿ ਪਾਤੁਰਹੇਸੁਂ – ਦਸਸੁ ਚਕ੍ਕਵਾਲ਼ਸਹਸ੍ਸੇਸੁ ਅਪ੍ਪਮਾਣੋ ਓਭਾਸੋ ਫਰਿ. ਤਸ੍ਸ ਤਂ ਸਿਰਿਂ ਦਟ੍ਠੁਕਾਮਾ ਵਿਯ ਅਨ੍ਧਾ ਚਕ੍ਖੂਨਿ ਪਟਿਲਭਿਂਸੁ, ਬਧਿਰਾ ਸਦ੍ਦਂ ਸੁਣਿਂਸੁ, ਮੂਗਾ ਸਮਾਲਪਿਂਸੁ, ਖੁਜ੍ਜਾ ਉਜੁਗਤ੍ਤਾ ਅਹੇਸੁਂ, ਪਙ੍ਗੁਲਾ ਪਦਸਾ ਗਮਨਂ ਪਟਿਲਭਿਂਸੁ, ਬਨ੍ਧਨਗਤਾ ਸਬ੍ਬਸਤ੍ਤਾ ਅਨ੍ਦੁਬਨ੍ਧਨਾਦੀਹਿ ਮੁਚ੍ਚਿਂਸੁ, ਸਬ੍ਬਨਰਕੇਸੁ ਅਗ੍ਗਿ ਨਿਬ੍ਬਾਯਿ, ਪੇਤ੍ਤਿਵਿਸਯੇ ਖੁਪ੍ਪਿਪਾਸਾ ਵੂਪਸਮਿ, ਤਿਰਚ੍ਛਾਨਾਨਂ ਭਯਂ ਨਾਹੋਸਿ, ਸਬ੍ਬਸਤ੍ਤਾਨਂ ਰੋਗੋ ਵੂਪਸਮਿ, ਸਬ੍ਬਸਤ੍ਤਾ ਪਿਯਂਵਦਾ ਅਹੇਸੁਂ, ਮਧੁਰੇਨਾਕਾਰੇਨ ਅਸ੍ਸਾ ਹਸਿਂਸੁ, ਵਾਰਣਾ ਗਜ੍ਜਿਂਸੁ, ਸਬ੍ਬਤੂਰਿਯਾਨਿ ਸਕਸਕਨਿਨ੍ਨਾਦਂ ਮੁਞ੍ਚਿਂਸੁ, ਅਘਟ੍ਟਿਤਾਨਿਯੇਵ ਮਨੁਸ੍ਸਾਨਂ ਹਤ੍ਥੂਪਗਾਦੀਨਿ ਆਭਰਣਾਨਿ ਵਿਰਵਿਂਸੁ, ਸਬ੍ਬਦਿਸਾ ਵਿਪ੍ਪਸਨ੍ਨਾ ਅਹੇਸੁਂ, ਸਤ੍ਤਾਨਂ ਸੁਖਂ ਉਪ੍ਪਾਦਯਮਾਨੋ ਮੁਦੁਸੀਤਲਵਾਤੋ ਵਾਯਿ, ਅਕਾਲਮੇਘੋ ਵਸ੍ਸਿ, ਪਥਵਿਤੋਪਿ ਉਦਕਂ ਉਬ੍ਭਿਜ੍ਜਿਤ੍ਵਾ ਵਿਸ੍ਸਨ੍ਦਿ, ਪਕ੍ਖਿਨੋ ਆਕਾਸਗਮਨਂ ਵਿਜਹਿਂਸੁ, ਨਦਿਯੋ ਅਸਨ੍ਦਮਾਨਾ ਅਟ੍ਠਂਸੁ, ਮਹਾਸਮੁਦ੍ਦੇ ਮਧੁਰਂ ਉਦਕਂ ਅਹੋਸਿ, ਸਬ੍ਬਤ੍ਥਕਮੇਵ ਪਞ੍ਚਵਣ੍ਣੇਹਿ ਪਦੁਮੇਹਿ ਸਞ੍ਛਨ੍ਨਤਲੋ ਅਹੋਸਿ, ਥਲਜਜਲਜਾਦੀਨਿ ਸਬ੍ਬਪੁਪ੍ਫਾਨਿ ਪੁਪ੍ਫਿਂਸੁ, ਰੁਕ੍ਖਾਨਂ ਖਨ੍ਧੇਸੁ ਖਨ੍ਧਪਦੁਮਾਨਿ, ਸਾਖਾਸੁ ਸਾਖਾਪਦੁਮਾਨਿ, ਲਤਾਸੁ ਲਤਾਪਦੁਮਾਨਿ ਪੁਪ੍ਫਿਂਸੁ, ਥਲੇ ਸਿਲਾਤਲਾਨਿ ਭਿਨ੍ਦਿਤ੍ਵਾ ਉਪਰੂਪਰਿ ਸਤ੍ਤ ਸਤ੍ਤ ਹੁਤ੍ਵਾ ਦਣ੍ਡਪਦੁਮਾਨਿ ਨਾਮ ਨਿਕ੍ਖਮਿਂਸੁ, ਆਕਾਸੇ ਓਲਮ੍ਬਕਪਦੁਮਾਨਿ ਨਾਮ ਨਿਬ੍ਬਤ੍ਤਿਂਸੁ, ਸਮਨ੍ਤਤੋ ਪੁਪ੍ਫਵਸ੍ਸਾ ਵਸ੍ਸਿਂਸੁ, ਆਕਾਸੇ ਦਿਬ੍ਬਤੂਰਿਯਾਨਿ ਵਜ੍ਜਿਂਸੁ, ਸਕਲਦਸਸਹਸ੍ਸਿਲੋਕਧਾਤੁ ਵਟ੍ਟੇਤ੍ਵਾ ਵਿਸ੍ਸਟ੍ਠਮਾਲਾਗੁਲ਼ੋ ਵਿਯ, ਉਪ੍ਪੀਲ਼ੇਤ੍ਵਾ ਬਦ੍ਧਮਾਲਾਕਲਾਪੋ ਵਿਯ, ਅਲਙ੍ਕਤਪਟਿਯਤ੍ਤਂ ਮਾਲਾਸਨਂ ਵਿਯ ਚ ਏਕਮਾਲਾਮਾਲਿਨੀ ਵਿਪ੍ਫੁਰਨ੍ਤਵਾਲ਼ਬੀਜਨੀ ਪੁਪ੍ਫਧੂਮਗਨ੍ਧਪਰਿਵਾਸਿਤਾ ਪਰਮਸੋਭਗ੍ਗਪ੍ਪਤ੍ਤਾ ਅਹੋਸਿ.

ਏਵਂ ਗਹਿਤਪਟਿਸਨ੍ਧਿਕਸ੍ਸ ਬੋਧਿਸਤ੍ਤਸ੍ਸ ਪਟਿਸਨ੍ਧਿਤੋ ਪਟ੍ਠਾਯ ਬੋਧਿਸਤ੍ਤਸ੍ਸ ਚੇਵ ਬੋਧਿਸਤ੍ਤਮਾਤੁਯਾ ਚ ਉਪਦ੍ਦਵਨਿਵਾਰਣਤ੍ਥਂ ਖਗ੍ਗਹਤ੍ਥਾ ਚਤ੍ਤਾਰੋ ਦੇਵਪੁਤ੍ਤਾ ਆਰਕ੍ਖਂ ਗਣ੍ਹਿਂਸੁ. ਬੋਧਿਸਤ੍ਤਮਾਤੁ ਪਨ ਪੁਰਿਸੇਸੁ ਰਾਗਚਿਤ੍ਤਂ ਨੁਪ੍ਪਜ੍ਜਿ, ਲਾਭਗ੍ਗਯਸਗ੍ਗਪ੍ਪਤ੍ਤਾ ਚ ਅਹੋਸਿ ਸੁਖਿਨੀ ਅਕਿਲਨ੍ਤਕਾਯਾ. ਬੋਧਿਸਤ੍ਤਞ੍ਚ ਅਨ੍ਤੋਕੁਚ੍ਛਿਗਤਂ ਵਿਪ੍ਪਸਨ੍ਨੇ ਮਣਿਰਤਨੇ ਆਵੁਤਪਣ੍ਡੁਸੁਤ੍ਤਂ ਵਿਯ ਪਸ੍ਸਤਿ. ਯਸ੍ਮਾ ਚ ਬੋਧਿਸਤ੍ਤੇਨ ਵਸਿਤਕੁਚ੍ਛਿ ਨਾਮ ਚੇਤਿਯਗਬ੍ਭਸਦਿਸਾ ਹੋਤਿ, ਨ ਸਕ੍ਕਾ ਅਞ੍ਞੇਨ ਸਤ੍ਤੇਨ ਆਵਸਿਤੁਂ ਵਾ ਪਰਿਭੁਞ੍ਜਿਤੁਂ ਵਾ, ਤਸ੍ਮਾ ਬੋਧਿਸਤ੍ਤਮਾਤਾ ਸਤ੍ਤਾਹਜਾਤੇ ਬੋਧਿਸਤ੍ਤੇ ਕਾਲਂ ਕਤ੍ਵਾ ਤੁਸਿਤਪੁਰੇ ਨਿਬ੍ਬਤ੍ਤਤਿ. ਯਥਾ ਚ ਅਞ੍ਞਾ ਇਤ੍ਥਿਯੋ ਦਸ ਮਾਸੇ ਅਪਤ੍ਵਾਪਿ ਅਤਿਕ੍ਕਮਿਤ੍ਵਾਪਿ ਨਿਸਿਨ੍ਨਾਪਿ ਨਿਪਨ੍ਨਾਪਿ ਵਿਜਾਯਨ੍ਤਿ, ਨ ਏਵਂ ਬੋਧਿਸਤ੍ਤਮਾਤਾ. ਸਾ ਪਨ ਬੋਧਿਸਤ੍ਤਂ ਦਸ ਮਾਸੇ ਕੁਚ੍ਛਿਨਾ ਪਰਿਹਰਿਤ੍ਵਾ ਠਿਤਾਵ ਵਿਜਾਯਤਿ. ਅਯਂ ਬੋਧਿਸਤ੍ਤਮਾਤੁਧਮ੍ਮਤਾ.

ਮਹਾਮਾਯਾਪਿ ਦੇਵੀ ਪਤ੍ਤੇਨ ਤੇਲਂ ਵਿਯ ਦਸ ਮਾਸੇ ਕੁਚ੍ਛਿਨਾ ਬੋਧਿਸਤ੍ਤਂ ਪਰਿਹਰਿਤ੍ਵਾ ਪਰਿਪੁਣ੍ਣਗਬ੍ਭਾ ਞਾਤਿਘਰਂ ਗਨ੍ਤੁਕਾਮਾ ਸੁਦ੍ਧੋਦਨਮਹਾਰਾਜਸ੍ਸ ਆਰੋਚੇਸਿ – ‘‘ਇਚ੍ਛਾਮਹਂ, ਦੇਵ, ਕੁਲਸਨ੍ਤਕਂ ਦੇਵਦਹਨਗਰਂ ਗਨ੍ਤੁ’’ਨ੍ਤਿ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਕਪਿਲਵਤ੍ਥੁਤੋ ਯਾਵ ਦੇਵਦਹਨਗਰਾ ਮਗ੍ਗਂ ਸਮਂ ਕਾਰੇਤ੍ਵਾ ਕਦਲਿਪੁਣ੍ਣਘਟਧਜਪਟਾਕਾਦੀਹਿ ਅਲਙ੍ਕਾਰਾਪੇਤ੍ਵਾ ਦੇਵਿ ਸੁਵਣ੍ਣਸਿਵਿਕਾਯ ਨਿਸੀਦਾਪੇਤ੍ਵਾ ਅਮਚ੍ਚਸਹਸ੍ਸੇਨ ਉਕ੍ਖਿਪਾਪੇਤ੍ਵਾ ਮਹਨ੍ਤੇਨ ਪਰਿਵਾਰੇਨ ਪੇਸੇਸਿ. ਦ੍ਵਿਨ੍ਨਂ ਪਨ ਨਗਰਾਨਂ ਅਨ੍ਤਰੇ ਉਭਯਨਗਰਵਾਸੀਨਮ੍ਪਿ ਲੁਮ੍ਬਿਨੀਵਨਂ ਨਾਮ ਮਙ੍ਗਲਸਾਲਵਨਂ ਅਤ੍ਥਿ, ਤਸ੍ਮਿਂ ਸਮਯੇ ਮੂਲਤੋ ਪਟ੍ਠਾਯ ਯਾਵ ਅਗ੍ਗਸਾਖਾ ਸਬ੍ਬਂ ਏਕਪਾਲਿਫੁਲ੍ਲਂ ਅਹੋਸਿ, ਸਾਖਨ੍ਤਰੇਹਿ ਚੇਵ ਪੁਪ੍ਫਨ੍ਤਰੇਹਿ ਚ ਪਞ੍ਚਵਣ੍ਣਾ ਭਮਰਗਣਾ ਨਾਨਪ੍ਪਕਾਰਾ ਚ ਸਕੁਣਸਙ੍ਘਾ ਮਧੁਰਸ੍ਸਰੇਨ ਵਿਕੂਜਨ੍ਤਾ ਵਿਚਰਨ੍ਤਿ. ਸਕਲਂ ਲੁਮ੍ਬਿਨੀਵਨਂ ਚਿਤ੍ਤਲਤਾਵਨਸਦਿਸਂ, ਮਹਾਨੁਭਾਵਸ੍ਸ ਰਞ੍ਞੋ ਸੁਸਜ੍ਜਿਤਂ ਆਪਾਨਮਣ੍ਡਲਂ ਵਿਯ ਅਹੋਸਿ. ਦੇਵਿਯਾ ਤਂ ਦਿਸ੍ਵਾ ਸਾਲਵਨਕੀਲ਼ਂ ਕੀਲ਼ਿਤੁਕਾਮਤਾਚਿਤ੍ਤਂ ਉਦਪਾਦਿ. ਅਮਚ੍ਚਾ ਦੇਵਿਂ ਗਹੇਤ੍ਵਾ ਸਾਲਵਨਂ ਪਵਿਸਿਂਸੁ. ਸਾ ਮਙ੍ਗਲਸਾਲਮੂਲਂ ਗਨ੍ਤ੍ਵਾ ਸਾਲਸਾਖਂ ਗਣ੍ਹਿਤੁਕਾਮਾ ਅਹੋਸਿ, ਸਾਲਸਾਖਾ ਸੁਸੇਦਿਤਵੇਤ੍ਤਗ੍ਗਂ ਵਿਯ ਓਨਮਿਤ੍ਵਾ ਦੇਵਿਯਾ ਹਤ੍ਥਪਥਂ ਉਪਗਞ੍ਛਿ. ਸਾ ਹਤ੍ਥਂ ਪਸਾਰੇਤ੍ਵਾ ਸਾਖਂ ਅਗ੍ਗਹੇਸਿ. ਤਾਵਦੇਵ ਚਸ੍ਸਾ ਕਮ੍ਮਜਵਾਤਾ ਚਲਿਂਸੁ. ਅਥਸ੍ਸਾ ਸਾਣਿਂ ਪਰਿਕ੍ਖਿਪਿਤ੍ਵਾ ਮਹਾਜਨੋ ਪਟਿਕ੍ਕਮਿ. ਸਾਲਸਾਖਂ ਗਹੇਤ੍ਵਾ ਤਿਟ੍ਠਮਾਨਾਯ ਏਵਸ੍ਸਾ ਗਬ੍ਭਵੁਟ੍ਠਾਨਂ ਅਹੋਸਿ. ਤਙ੍ਖਣਂਯੇਵ ਚਤ੍ਤਾਰੋ ਵਿਸੁਦ੍ਧਚਿਤ੍ਤਾ ਮਹਾਬ੍ਰਹ੍ਮਾਨੋ ਸੁਵਣ੍ਣਜਾਲਂ ਆਦਾਯ ਸਮ੍ਪਤ੍ਤਾ ਤੇਨ ਸੁਵਣ੍ਣਜਾਲੇਨ ਬੋਧਿਸਤ੍ਤਂ ਸਮ੍ਪਟਿਚ੍ਛਿਤ੍ਵਾ ਮਾਤੁ ਪੁਰਤੋ ਠਪੇਤ੍ਵਾ ‘‘ਅਤ੍ਤਮਨਾ, ਦੇਵਿ, ਹੋਹਿ, ਮਹੇਸਕ੍ਖੋ ਤੇ ਪੁਤ੍ਤੋ ਉਪ੍ਪਨ੍ਨੋ’’ਤਿ ਆਹਂਸੁ.

ਯਥਾ ਪਨ ਅਞ੍ਞੇ ਸਤ੍ਤਾ ਮਾਤੁਕੁਚ੍ਛਿਤੋ ਨਿਕ੍ਖਮਨ੍ਤਾ ਪਟਿਕੂਲੇਨ ਅਸੁਚਿਨਾ ਮਕ੍ਖਿਤਾ ਨਿਕ੍ਖਮਨ੍ਤਿ, ਨ ਏਵਂ ਬੋਧਿਸਤ੍ਤੋ. ਸੋ ਪਨ ਧਮ੍ਮਾਸਨਤੋ ਓਤਰਨ੍ਤੋ ਧਮ੍ਮਕਥਿਕੋ ਵਿਯ, ਨਿਸ੍ਸੇਣਿਤੋ ਓਤਰਨ੍ਤੋ ਪੁਰਿਸੋ ਵਿਯ, ਚ ਦ੍ਵੇ ਚ ਹਤ੍ਥੇ ਦ੍ਵੇ ਚ ਪਾਦੇ ਪਸਾਰੇਤ੍ਵਾ ਠਿਤਕੋਵ ਮਾਤੁਕੁਚ੍ਛਿਸਮ੍ਭਵੇਨ ਕੇਨਚਿ ਅਸੁਚਿਨਾ ਅਮਕ੍ਖਿਤੋ ਸੁਦ੍ਧੋ ਵਿਸਦੋ ਕਾਸਿਕਵਤ੍ਥੇ ਨਿਕ੍ਖਿਤ੍ਤਮਣਿਰਤਨਂ ਵਿਯ ਜੋਤਯਨ੍ਤੋ ਮਾਤੁਕੁਚ੍ਛਿਤੋ ਨਿਕ੍ਖਮਿ. ਏਵਂ ਸਨ੍ਤੇਪਿ ਬੋਧਿਸਤ੍ਤਸ੍ਸ ਚ ਬੋਧਿਸਤ੍ਤਮਾਤੁਯਾ ਚ ਸਕ੍ਕਾਰਤ੍ਥਂ ਆਕਾਸਤੋ ਦ੍ਵੇ ਉਦਕਧਾਰਾ ਨਿਕ੍ਖਮਿਤ੍ਵਾ ਬੋਧਿਸਤ੍ਤਸ੍ਸ ਚ ਮਾਤੁਯਾ ਚ ਸਰੀਰੇ ਉਤੁਂ ਗਾਹਾਪੇਸੁਂ.

ਅਥ ਨਂ ਸੁਵਣ੍ਣਜਾਲੇਨ ਪਟਿਗ੍ਗਹੇਤ੍ਵਾ ਠਿਤਾਨਂ ਬ੍ਰਹ੍ਮਾਨਂ ਹਤ੍ਥਤੋ ਚਤ੍ਤਾਰੋ ਮਹਾਰਾਜਾਨੋ ਮਙ੍ਗਲਸਮ੍ਮਤਾਯ ਸੁਖਸਮ੍ਫਸ੍ਸਾਯ ਅਜਿਨਪ੍ਪਵੇਣਿਯਾ ਗਣ੍ਹਿਂਸੁ, ਤੇਸਂ ਹਤ੍ਥਤੋ ਮਨੁਸ੍ਸਾ ਦੁਕੂਲਚੁਮ੍ਬਟਕੇਨ. ਮਨੁਸ੍ਸਾਨਂ ਹਤ੍ਥਤੋ ਮੁਚ੍ਚਿਤ੍ਵਾ ਪਥਵਿਯਂ ਪਤਿਟ੍ਠਾਯ ਪੁਰਤ੍ਥਿਮਦਿਸਂ ਓਲੋਕੇਸਿ, ਅਨੇਕਾਨਿ ਚਕ੍ਕਵਾਲ਼ਸਹਸ੍ਸਾਨਿ ਏਕਙ੍ਗਣਾਨਿ ਅਹੇਸੁਂ. ਤਤ੍ਥ ਦੇਵਮਨੁਸ੍ਸਾ ਗਨ੍ਧਮਾਲਾਦੀਹਿ ਪੂਜਯਮਾਨਾ ‘‘ਮਹਾਪੁਰਿਸ, ਇਧ ਤੁਮ੍ਹੇਹਿ ਸਦਿਸੋ ਅਞ੍ਞੋ ਨਤ੍ਥਿ, ਕੁਤੇਤ੍ਥ ਉਤ੍ਤਰਿਤਰੋ’’ਤਿ ਆਹਂਸੁ. ਏਵਂ ਚਤਸ੍ਸੋ ਦਿਸਾ, ਚਤਸ੍ਸੋ ਅਨੁਦਿਸਾ, ਹੇਟ੍ਠਾ, ਉਪਰੀਤਿ ਦਸ ਦਿਸਾ ਅਨੁਵਿਲੋਕੇਤ੍ਵਾ ਅਤ੍ਤਨਾ ਸਦਿਸਂ ਕਞ੍ਚਿ ਅਦਿਸ੍ਵਾ ‘‘ਅਯਂ ਉਤ੍ਤਰਾਦਿਸਾ’’ਤਿ ਸਤ੍ਤਪਦਵੀਤਿਹਾਰੇਨ ਅਗਮਾਸਿ, ਮਹਾਬ੍ਰਹ੍ਮੁਨਾ ਸੇਤਚ੍ਛਤ੍ਤਂ ਧਾਰਿਯਮਾਨੋ, ਸੁਯਾਮੇਨ ਵਾਲ਼ਬੀਜਨਿਂ, ਅਞ੍ਞਾਹਿ ਚ ਦੇਵਤਾਹਿ ਸੇਸਰਾਜਕਕੁਧਭਣ੍ਡਹਤ੍ਥਾਹਿ ਅਨੁਗਮ੍ਮਮਾਨੋ. ਤਤੋ ਸਤ੍ਤਮਪਦੇ ਠਿਤੋ ‘‘ਅਗ੍ਗੋਹਮਸ੍ਮਿਂ ਲੋਕਸ੍ਸਾ’’ਤਿਆਦਿਕਂ ਆਸਭਿਂ ਵਾਚਂ ਨਿਚ੍ਛਾਰੇਨ੍ਤੋ ਸੀਹਨਾਦਂ ਨਦਿ.

ਬੋਧਿਸਤ੍ਤੋ ਹਿ ਤੀਸੁ ਅਤ੍ਤਭਾਵੇਸੁ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤਮਤ੍ਤੋਵ ਵਾਚਂ ਨਿਚ੍ਛਾਰੇਸਿ ਮਹੋਸਧਤ੍ਤਭਾਵੇ, ਵੇਸ੍ਸਨ੍ਤਰਤ੍ਤਭਾਵੇ, ਇਮਸ੍ਮਿਂ ਅਤ੍ਤਭਾਵੇਤਿ. ਮਹੋਸਧਤ੍ਤਭਾਵੇ ਕਿਰਸ੍ਸ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤਮਤ੍ਤਸ੍ਸੇਵ ਸਕ੍ਕੋ ਦੇਵਰਾਜਾ ਆਗਨ੍ਤ੍ਵਾ ਚਨ੍ਦਨਸਾਰਂ ਹਤ੍ਥੇ ਠਪੇਤ੍ਵਾ ਗਤੋ, ਸੋ ਤਂ ਮੁਟ੍ਠਿਯਂ ਕਤ੍ਵਾਵ ਨਿਕ੍ਖਨ੍ਤੋ. ਅਥ ਨਂ ਮਾਤਾ ‘‘ਤਾਤ, ਕਿਂ ਗਹੇਤ੍ਵਾ ਆਗਤੋਸੀ’’ਤਿ ਪੁਚ੍ਛਿ. ‘‘ਓਸਧਂ, ਅਮ੍ਮਾ’’ਤਿ. ਇਤਿ ਓਸਧਂ ਗਹੇਤ੍ਵਾ ਆਗਤਤ੍ਤਾ ‘‘ਓਸਧਦਾਰਕੋ’’ਤ੍ਵੇਵਸ੍ਸ ਨਾਮਂ ਅਕਂਸੁ. ਤਂ ਓਸਧਂ ਗਹੇਤ੍ਵਾ ਚਾਟਿਯਂ ਪਕ੍ਖਿਪਿਂਸੁ, ਆਗਤਾਗਤਾਨਂ ਅਨ੍ਧਬਧਿਰਾਦੀਨਂ ਤਦੇਵ ਸਬ੍ਬਰੋਗਵੂਪਸਮਾਯ ਭੇਸਜ੍ਜਂ ਅਹੋਸਿ. ਤਤੋ ‘‘ਮਹਨ੍ਤਂ ਇਦਂ ਓਸਧਂ, ਮਹਨ੍ਤਂ ਇਦਂ ਓਸਧ’’ਨ੍ਤਿ ਉਪ੍ਪਨ੍ਨਵਚਨਂ ਉਪਾਦਾਯ ‘‘ਮਹੋਸਧੋ’’ਤ੍ਵੇਵਸ੍ਸ ਨਾਮਂ ਜਾਤਂ. ਵੇਸ੍ਸਨ੍ਤਰਤ੍ਤਭਾਵੇ ਪਨ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤੋ ਦਕ੍ਖਿਣਹਤ੍ਥਂ ਪਸਾਰੇਤ੍ਵਾ ‘‘ਅਤ੍ਥਿ ਨੁ ਖੋ, ਅਮ੍ਮ, ਕਿਞ੍ਚਿ ਗੇਹਸ੍ਮਿਂ, ਦਾਨਂ ਦਸ੍ਸਾਮੀ’’ਤਿ ਵਦਨ੍ਤੋ ਨਿਕ੍ਖਮਿ. ਅਥਸ੍ਸ ਮਾਤਾ ‘‘ਸਧਨੇ ਕੁਲੇ ਨਿਬ੍ਬਤ੍ਤੋਸਿ, ਤਾਤਾ’’ਤਿ ਪੁਤ੍ਤਸ੍ਸ ਹਤ੍ਥਂ ਅਤ੍ਤਨੋ ਹਤ੍ਥਤਲੇ ਕਤ੍ਵਾ ਸਹਸ੍ਸਤ੍ਥਵਿਕਂ ਠਪੇਸਿ. ਇਮਸ੍ਮਿਂ ਪਨ ਅਤ੍ਤਭਾਵੇ ਇਮਂ ਸੀਹਨਾਦਂ ਨਦੀਤਿ ਏਵਂ ਬੋਧਿਸਤ੍ਤੋ ਤੀਸੁ ਅਤ੍ਤਭਾਵੇਸੁ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤਮਤ੍ਤੋਵ ਵਾਚਂ ਨਿਚ੍ਛਾਰੇਸਿ. ਯਥਾ ਚ ਪਟਿਸਨ੍ਧਿਗ੍ਗਹਣਕ੍ਖਣੇ, ਜਾਤਕ੍ਖਣੇਪਿਸ੍ਸ ਦ੍ਵਤ੍ਤਿਂਸ ਪੁਬ੍ਬਨਿਮਿਤ੍ਤਾਨਿ ਪਾਤੁਰਹੇਸੁਂ. ਯਸ੍ਮਿਂ ਪਨ ਸਮਯੇ ਅਮ੍ਹਾਕਂ ਬੋਧਿਸਤ੍ਤੋ ਲੁਮ੍ਬਿਨੀਵਨੇ ਜਾਤੋ, ਤਸ੍ਮਿਂਯੇਵ ਸਮਯੇ ਰਾਹੁਲਮਾਤਾ ਦੇਵੀ, ਆਨਨ੍ਦਤ੍ਥੇਰੋ, ਛਨ੍ਨੋ ਅਮਚ੍ਚੋ, ਕਾਲ਼ੁਦਾਯੀ ਅਮਚ੍ਚੋ, ਕਣ੍ਡਕੋ ਅਸ੍ਸਰਾਜਾ, ਮਹਾਬੋਧਿਰੁਕ੍ਖੋ, ਚਤਸ੍ਸੋ ਨਿਧਿਕੁਮ੍ਭਿਯੋ ਚ ਜਾਤਾ. ਤਤ੍ਥ ਏਕਾ ਗਾਵੁਤਪ੍ਪਮਾਣਾ, ਏਕਾ ਅਡ੍ਢਯੋਜਨਪ੍ਪਮਾਣਾ, ਏਕਾ ਤਿਗਾਵੁਤਪ੍ਪਮਾਣਾ, ਏਕਾ ਯੋਜਨਪ੍ਪਮਾਣਾ ਅਹੋਸੀਤਿ. ਇਮੇ ਸਤ੍ਤ ਸਹਜਾਤਾ ਨਾਮ.

ਉਭਯਨਗਰਵਾਸਿਨੋ ਬੋਧਿਸਤ੍ਤਂ ਗਹੇਤ੍ਵਾ ਕਪਿਲਵਤ੍ਥੁਨਗਰਮੇਵ ਅਗਮਂਸੁ. ਤਂ ਦਿਵਸਂਯੇਵ ਚ ‘‘ਕਪਿਲਵਤ੍ਥੁਨਗਰੇ ਸੁਦ੍ਧੋਦਨਮਹਾਰਾਜਸ੍ਸ ਪੁਤ੍ਤੋ ਜਾਤੋ, ਅਯਂ ਕੁਮਾਰੋ ਬੋਧਿਤਲੇ ਨਿਸੀਦਿਤ੍ਵਾ ਬੁਦ੍ਧੋ ਭਵਿਸ੍ਸਤੀ’’ਤਿ ਤਾਵਤਿਂਸਭਵਨੇ ਹਟ੍ਠਤੁਟ੍ਠਾ ਦੇਵਸਙ੍ਘਾ ਚੇਲੁਕ੍ਖੇਪਾਦੀਨਿ ਪਵਤ੍ਤੇਨ੍ਤਾ ਕੀਲ਼ਿਂਸੁ. ਤਸ੍ਮਿਂ ਸਮਯੇ ਸੁਦ੍ਧੋਦਨਮਹਾਰਾਜਸ੍ਸ ਕੁਲੂਪਕੋ ਅਟ੍ਠਸਮਾਪਤ੍ਤਿਲਾਭੀ ਕਾਲ਼ਦੇਵੀਲੋ ਨਾਮ ਤਾਪਸੋ ਭਤ੍ਤਕਿਚ੍ਚਂ ਕਤ੍ਵਾ ਦਿਵਾਵਿਹਾਰਤ੍ਥਾਯ ਤਾਵਤਿਂਸਭਵਨਂ ਗਨ੍ਤ੍ਵਾ ਤਤ੍ਥ ਦਿਵਾਵਿਹਾਰਂ ਨਿਸਿਨ੍ਨੋ ਤਾ ਦੇਵਤਾ ਕੀਲ਼ਮਾਨਾ ਦਿਸ੍ਵਾ ‘‘ਕਿਂਕਾਰਣਾ ਤੁਮ੍ਹੇ ਏਵਂ ਤੁਟ੍ਠਮਾਨਸਾ ਕੀਲ਼ਥ, ਮਯ੍ਹਮ੍ਪੇਤਂ ਕਾਰਣਂ ਕਥੇਥਾ’’ਤਿ ਪੁਚ੍ਛਿ. ਦੇਵਤਾ ਆਹਂਸੁ ‘‘ਮਾਰਿਸ, ਸੁਦ੍ਧੋਦਨਰਞ੍ਞੋ ਪੁਤ੍ਤੋ ਜਾਤੋ, ਸੋ ਬੋਧਿਤਲੇ ਨਿਸੀਦਿਤ੍ਵਾ ਬੁਦ੍ਧੋ ਹੁਤ੍ਵਾ ਧਮ੍ਮਚਕ੍ਕਂ ਪਵਤ੍ਤੇਸ੍ਸਤਿ, ਤਸ੍ਸ ਅਨਨ੍ਤਂ ਬੁਦ੍ਧਲੀਲ਼ਂ ਦਟ੍ਠੁਂ ਧਮ੍ਮਞ੍ਚ ਸੋਤੁਂ ਲਚ੍ਛਾਮਾਤਿ ਇਮਿਨਾ ਕਾਰਣੇਨ ਤੁਟ੍ਠਾਮ੍ਹਾ’’ਤਿ. ਤਾਪਸੋ ਤਾਸਂ ਵਚਨਂ ਸੁਤ੍ਵਾ ਖਿਪ੍ਪਂ ਦੇਵਲੋਕਤੋ ਓਰੁਯ੍ਹ ਰਾਜਨਿਵੇਸਨਂ ਪਵਿਸਿਤ੍ਵਾ ਪਞ੍ਞਤ੍ਤਾਸਨੇ ਨਿਸਿਨ੍ਨੋ ‘‘ਪੁਤ੍ਤੋ ਕਿਰ ਤੇ, ਮਹਾਰਾਜ, ਜਾਤੋ, ਪਸ੍ਸਿਸ੍ਸਾਮਿ ਨ’’ਨ੍ਤਿ ਆਹ. ਰਾਜਾ ਅਲਙ੍ਕਤਪਟਿਯਤ੍ਤਂ ਕੁਮਾਰਂ ਆਹਰਾਪੇਤ੍ਵਾ ਤਾਪਸਂ ਵਨ੍ਦਾਪੇਤੁਂ ਅਭਿਹਰਿ, ਬੋਧਿਸਤ੍ਤਸ੍ਸ ਪਾਦਾ ਪਰਿਵਤ੍ਤਿਤ੍ਵਾ ਤਾਪਸਸ੍ਸ ਜਟਾਸੁ ਪਤਿਟ੍ਠਹਿਂਸੁ. ਬੋਧਿਸਤ੍ਤਸ੍ਸ ਹਿ ਤੇਨਤ੍ਤਭਾਵੇਨ ਵਨ੍ਦਿਤਬ੍ਬਯੁਤ੍ਤਕੋ ਨਾਮ ਅਞ੍ਞੋ ਨਤ੍ਥਿ. ਸਚੇ ਹਿ ਅਜਾਨਨ੍ਤਾ ਬੋਧਿਸਤ੍ਤਸ੍ਸ ਸੀਸਂ ਤਾਪਸਸ੍ਸ ਪਾਦਮੂਲੇ ਠਪੇਯ੍ਯੁਂ, ਸਤ੍ਤਧਾ ਤਸ੍ਸ ਮੁਦ੍ਧਾ ਫਲੇਯ੍ਯ. ਤਾਪਸੋ ‘‘ਨ ਮੇ ਅਤ੍ਤਾਨਂ ਨਾਸੇਤੁਂ ਯੁਤ੍ਤ’’ਨ੍ਤਿ ਉਟ੍ਠਾਯਾਸਨਾ ਬੋਧਿਸਤ੍ਤਸ੍ਸ ਅਞ੍ਜਲਿਂ ਪਗ੍ਗਹੇਸਿ. ਰਾਜਾ ਤਂ ਅਚ੍ਛਰਿਯਂ ਦਿਸ੍ਵਾ ਅਤ੍ਤਨੋ ਪੁਤ੍ਤਂ ਵਨ੍ਦਿ.

ਤਾਪਸੋ ਅਤੀਤੇ ਚਤ੍ਤਾਲੀਸ ਕਪ੍ਪੇ, ਅਨਾਗਤੇ ਚਤ੍ਤਾਲੀਸਾਤਿ ਅਸੀਤਿ ਕਪ੍ਪੇ ਅਨੁਸ੍ਸਰਤਿ. ਬੋਧਿਸਤ੍ਤਸ੍ਸ ਲਕ੍ਖਣਸਮ੍ਪਤ੍ਤਿਂ ਦਿਸ੍ਵਾ ‘‘ਭਵਿਸ੍ਸਤਿ ਨੁ ਖੋ ਬੁਦ੍ਧੋ, ਉਦਾਹੁ ਨੋ’’ਤਿ ਆਵਜ੍ਜੇਤ੍ਵਾ ਉਪਧਾਰੇਨ੍ਤੋ ‘‘ਨਿਸ੍ਸਂਸਯਂ ਬੁਦ੍ਧੋ ਭਵਿਸ੍ਸਤੀ’’ਤਿ ਞਤ੍ਵਾ ‘‘ਅਚ੍ਛਰਿਯਪੁਰਿਸੋ ਅਯ’’ਨ੍ਤਿ ਸਿਤਂ ਅਕਾਸਿ. ਤਤੋ ‘‘ਅਹਂ ਇਮਂ ਬੁਦ੍ਧਭੂਤਂ ਦਟ੍ਠੁਂ ਲਭਿਸ੍ਸਾਮਿ ਨੁ ਖੋ, ਨੋ’’ਤਿ ਉਪਧਾਰੇਨ੍ਤੋ ‘‘ਨ ਲਭਿਸ੍ਸਾਮਿ, ਅਨ੍ਤਰਾਯੇਵ ਕਾਲਂ ਕਤ੍ਵਾ ਬੁਦ੍ਧਸਤੇਨਪਿ ਬੁਦ੍ਧਸਹਸ੍ਸੇਨਪਿ ਗਨ੍ਤ੍ਵਾ ਬੋਧੇਤੁਂ ਅਸਕ੍ਕੁਣੇਯ੍ਯੇ ਅਰੂਪਭਵੇ ਨਿਬ੍ਬਤ੍ਤਿਸ੍ਸਾਮੀ’’ਤਿ ਦਿਸ੍ਵਾ ‘‘ਏਵਰੂਪਂ ਨਾਮ ਅਚ੍ਛਰਿਯਪੁਰਿਸਂ ਬੁਦ੍ਧਭੂਤਂ ਦਟ੍ਠੁਂ ਨ ਲਭਿਸ੍ਸਾਮਿ, ਮਹਤੀ ਵਤ ਮੇ ਜਾਨਿ ਭਵਿਸ੍ਸਤੀ’’ਤਿ ਪਰੋਦਿ.

ਮਨੁਸ੍ਸਾ ਦਿਸ੍ਵਾ ‘‘ਅਮ੍ਹਾਕਂ ਅਯ੍ਯੋ ਇਦਾਨੇਵ ਹਸਿਤ੍ਵਾ ਪੁਨ ਪਰੋਦਿ. ਕਿਂ ਨੁ ਖੋ, ਭਨ੍ਤੇ, ਅਮ੍ਹਾਕਂ ਅਯ੍ਯਪੁਤ੍ਤਸ੍ਸ ਕੋਚਿ ਅਨ੍ਤਰਾਯੋ ਭਵਿਸ੍ਸਤੀ’’ਤਿ ਪੁਚ੍ਛਿਂਸੁ. ‘‘ਨਤ੍ਥੇਤਸ੍ਸ ਅਨ੍ਤਰਾਯੋ, ਨਿਸ੍ਸਂਸਯੇਨ ਬੁਦ੍ਧੋ ਭਵਿਸ੍ਸਤੀ’’ਤਿ. ਅਥ ‘‘ਕਸ੍ਮਾ ਪਰੋਦਿਤ੍ਥਾ’’ਤਿ? ‘‘ਏਵਰੂਪਂ ਪੁਰਿਸਂ ਬੁਦ੍ਧਭੂਤਂ ਦਟ੍ਠੁਂ ਨ ਲਭਿਸ੍ਸਾਮਿ, ‘ਮਹਤੀ ਵਤ ਮੇ ਜਾਨਿ ਭਵਿਸ੍ਸਤੀ’ਤਿ ਅਤ੍ਤਾਨਂ ਅਨੁਸੋਚਨ੍ਤੋ ਰੋਦਾਮੀ’’ਤਿ ਆਹ. ਤਤੋ ਸੋ ‘‘ਕਿਂ ਨੁ ਖੋ ਮੇ ਞਾਤਕੇਸੁ ਕੋਚਿ ਏਤਂ ਬੁਦ੍ਧਭੂਤਂ ਦਟ੍ਠੁਂ ਲਭਿਸ੍ਸਤਿ, ਨ ਲਭਿਸ੍ਸਤੀ’’ਤਿ ਉਪਧਾਰੇਨ੍ਤੋ ਅਤ੍ਤਨੋ ਭਾਗਿਨੇਯ੍ਯਂ ਨਾਲ਼ਕਦਾਰਕਂ ਅਦ੍ਦਸ. ਸੋ ਭਗਿਨਿਯਾ ਗੇਹਂ ਗਨ੍ਤ੍ਵਾ ‘‘ਕਹਂ ਤੇ ਪੁਤ੍ਤੋ ਨਾਲ਼ਕੋ’’ਤਿ? ‘‘ਅਤ੍ਥਿ ਗੇਹੇ, ਅਯ੍ਯਾ’’ਤਿ. ‘‘ਪਕ੍ਕੋਸਾਹਿ ਨ’’ਨ੍ਤਿ ਪਕ੍ਕੋਸਾਪੇਤ੍ਵਾ ਅਤ੍ਤਨੋ ਸਨ੍ਤਿਕਂ ਆਗਤਂ ਕੁਮਾਰਂ ਆਹ – ‘‘ਤਾਤ, ਸੁਦ੍ਧੋਦਨਮਹਾਰਾਜਸ੍ਸ ਕੁਲੇ ਪੁਤ੍ਤੋ ਜਾਤੋ, ਬੁਦ੍ਧਙ੍ਕੁਰੋ ਏਸ, ਪਞ੍ਚਤਿਂਸ ਵਸ੍ਸਾਨਿ ਅਤਿਕ੍ਕਮਿਤ੍ਵਾ ਬੁਦ੍ਧੋ ਭਵਿਸ੍ਸਤਿ, ਤ੍ਵਂ ਏਤਂ ਦਟ੍ਠੁਂ ਲਭਿਸ੍ਸਸਿ, ਅਜ੍ਜੇਵ ਪਬ੍ਬਜਾਹੀ’’ਤਿ. ਸਤ੍ਤਾਸੀਤਿਕੋਟਿਧਨੇ ਕੁਲੇ ਨਿਬ੍ਬਤ੍ਤਦਾਰਕੋਪਿ ‘‘ਨ ਮਂ ਮਾਤੁਲੋ ਅਨਤ੍ਥੇ ਨਿਯੋਜੇਸ੍ਸਤੀ’’ਤਿ ਚਿਨ੍ਤੇਤ੍ਵਾ ਤਾਵਦੇਵ ਅਨ੍ਤਰਾਪਣਤੋ ਕਾਸਾਯਾਨਿ ਚੇਵ ਮਤ੍ਤਿਕਾਪਤ੍ਤਞ੍ਚ ਆਹਰਾਪੇਤ੍ਵਾ ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ‘‘ਯੋ ਲੋਕੇ ਉਤ੍ਤਮਪੁਗ੍ਗਲੋ, ਤਂ ਉਦ੍ਦਿਸ੍ਸ ਮਯ੍ਹਂ ਪਬ੍ਬਜ੍ਜਾ’’ਤਿ ਬੋਧਿਸਤ੍ਤਾਭਿਮੁਖਂ ਅਞ੍ਜਲਿਂ ਪਗ੍ਗਯ੍ਹ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਪਤ੍ਤਂ ਥਵਿਕਾਯ ਪਕ੍ਖਿਪਿਤ੍ਵਾ ਅਂਸਕੂਟੇ ਲਗ੍ਗੇਤ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਸਮਣਧਮ੍ਮਂ ਅਕਾਸਿ. ਸੋ ਪਰਮਾਭਿਸਮ੍ਬੋਧਿਂ ਪਤ੍ਤਂ ਤਥਾਗਤਂ ਉਪਸਙ੍ਕਮਿਤ੍ਵਾ ਨਾਲ਼ਕਪਟਿਪਦਂ ਕਥਾਪੇਤ੍ਵਾ ਪੁਨ ਹਿਮਵਨ੍ਤਂ ਪਵਿਸਿਤ੍ਵਾ ਅਰਹਤ੍ਤਂ ਪਤ੍ਵਾ ਉਕ੍ਕਟ੍ਠਪਟਿਪਦਂ ਪਟਿਪਨ੍ਨੋ ਸਤ੍ਤੇਵ ਮਾਸੇ ਆਯੁਂ ਪਾਲੇਤ੍ਵਾ ਏਕਂ ਸੁਵਣ੍ਣਪਬ੍ਬਤਂ ਨਿਸ੍ਸਾਯ ਠਿਤਕੋਵ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਿ.

ਬੋਧਿਸਤ੍ਤਮ੍ਪਿ ਖੋ ਪਞ੍ਚਮੇ ਦਿਵਸੇ ਸੀਸਂ ਨ੍ਹਾਪੇਤ੍ਵਾ ‘‘ਨਾਮਗ੍ਗਹਣਂ ਗਣ੍ਹਿਸ੍ਸਾਮਾ’’ਤਿ ਰਾਜਭਵਨਂ ਚਤੁਜ੍ਜਾਤਿਕਗਨ੍ਧੇਹਿ ਵਿਲਿਮ੍ਪਿਤ੍ਵਾ ਲਾਜਾਪਞ੍ਚਮਕਾਨਿ ਪੁਪ੍ਫਾਨਿ ਵਿਕਿਰਿਤ੍ਵਾ ਅਸਮ੍ਭਿਨ੍ਨਪਾਯਾਸਂ ਪਚਾਪੇਤ੍ਵਾ ਤਿਣ੍ਣਂ ਵੇਦਾਨਂ ਪਾਰਙ੍ਗਤੇ ਅਟ੍ਠਸਤਬ੍ਰਾਹ੍ਮਣੇ ਨਿਮਨ੍ਤੇਤ੍ਵਾ ਰਾਜਭਵਨੇ ਨਿਸੀਦਾਪੇਤ੍ਵਾ ਸੁਭੋਜਨਂ ਭੋਜੇਤ੍ਵਾ ਮਹਾਸਕ੍ਕਾਰਂ ਕਤ੍ਵਾ ‘‘ਕਿਂ ਨੁ ਖੋ ਭਵਿਸ੍ਸਤੀ’’ਤਿ ਲਕ੍ਖਣਾਨਿ ਪਰਿਗ੍ਗਹਾਪੇਸੁਂ. ਤੇਸੁ –

‘‘ਰਾਮੋ ਧਜੋ ਲਕ੍ਖਣੋ ਚਾਪਿ ਮਨ੍ਤੀ, ਕੋਣ੍ਡਞ੍ਞੋ ਚ ਭੋਜੋ ਸੁਯਾਮੋ ਸੁਦਤ੍ਤੋ;

ਏਤੇ ਤਦਾ ਅਟ੍ਠ ਅਹੇਸੁਂ ਬ੍ਰਾਹ੍ਮਣਾ, ਛਲ਼ਙ੍ਗਵਾ ਮਨ੍ਤਂ ਵਿਯਾਕਰਿਂਸੂ’’ਤਿ. –

ਇਮੇ ਅਟ੍ਠੇਵ ਬ੍ਰਾਹ੍ਮਣਾ ਲਕ੍ਖਣਪਰਿਗ੍ਗਾਹਕਾ ਅਹੇਸੁਂ. ਪਟਿਸਨ੍ਧਿਗ੍ਗਹਣਦਿਵਸੇ ਸੁਪਿਨੋਪਿ ਏਤੇਹੇਵ ਪਰਿਗ੍ਗਹਿਤੋ. ਤੇਸੁ ਸਤ੍ਤ ਜਨਾ ਦ੍ਵੇ ਅਙ੍ਗੁਲਿਯੋ ਉਕ੍ਖਿਪਿਤ੍ਵਾ ਦ੍ਵੇਧਾ ਬ੍ਯਾਕਰਿਂਸੁ – ‘‘ਇਮੇਹਿ ਲਕ੍ਖਣੇਹਿ ਸਮਨ੍ਨਾਗਤੋ ਅਗਾਰਂ ਅਜ੍ਝਾਵਸਮਾਨੋ ਰਾਜਾ ਹੋਤਿ ਚਕ੍ਕਵਤ੍ਤੀ, ਪਬ੍ਬਜਮਾਨੋ ਬੁਦ੍ਧੋ’’ਤਿ, ਸਬ੍ਬਂ ਚਕ੍ਕਵਤ੍ਤਿਰਞ੍ਞੋ ਸਿਰਿਵਿਭਵਂ ਆਚਿਕ੍ਖਿਂਸੁ. ਤੇਸਂ ਪਨ ਸਬ੍ਬਦਹਰੋ ਗੋਤ੍ਤਤੋ ਕੋਣ੍ਡਞ੍ਞੋ ਨਾਮ ਮਾਣਵੋ ਬੋਧਿਸਤ੍ਤਸ੍ਸ ਵਰਲਕ੍ਖਣਨਿਪ੍ਫਤ੍ਤਿਂ ਓਲੋਕੇਤ੍ਵਾ – ‘‘ਇਮਸ੍ਸ ਅਗਾਰਮਜ੍ਝੇ ਠਾਨਕਾਰਣਂ ਨਤ੍ਥਿ, ਏਕਨ੍ਤੇਨੇਸ ਵਿਵਟ੍ਟਚ੍ਛਦੋ ਬੁਦ੍ਧੋ ਭਵਿਸ੍ਸਤੀ’’ਤਿ ਏਕਮੇਵ ਅਙ੍ਗੁਲਿਂ ਉਕ੍ਖਿਪਿਤ੍ਵਾ ਏਕਂਸਬ੍ਯਾਕਰਣਂ ਬ੍ਯਾਕਾਸਿ. ਅਯਞ੍ਹਿ ਕਤਾਧਿਕਾਰੋ ਪਚ੍ਛਿਮਭਵਿਕਸਤ੍ਤੋ ਪਞ੍ਞਾਯ ਇਤਰੇ ਸਤ੍ਤ ਜਨੇ ਅਭਿਭਵਿਤ੍ਵਾ ‘‘ਇਮੇਹਿ ਲਕ੍ਖਣੇਹਿ ਸਮਨ੍ਨਾਗਤਸ੍ਸ ਅਗਾਰਮਜ੍ਝੇ ਠਾਨਂ ਨਾਮ ਨਤ੍ਥਿ, ਅਸਂਸਯਂ ਬੁਦ੍ਧੋ ਭਵਿਸ੍ਸਤੀ’’ਤਿ ਏਕਮੇਵ ਗਤਿਂ ਅਦ੍ਦਸ, ਤਸ੍ਮਾ ਏਕਂ ਅਙ੍ਗੁਲਿਂ ਉਕ੍ਖਿਪਿਤ੍ਵਾ ਏਵਂ ਬ੍ਯਾਕਾਸਿ. ਅਥਸ੍ਸ ਨਾਮਂ ਗਣ੍ਹਨ੍ਤਾ ਸਬ੍ਬਲੋਕਸ੍ਸ ਅਤ੍ਥਸਿਦ੍ਧਿਕਰਤ੍ਤਾ ‘‘ਸਿਦ੍ਧਤ੍ਥੋ’’ਤਿ ਨਾਮਮਕਂਸੁ.

ਅਥ ਤੇ ਬ੍ਰਾਹ੍ਮਣਾ ਅਤ੍ਤਨੋ ਘਰਾਨਿ ਗਨ੍ਤ੍ਵਾ ਪੁਤ੍ਤੇ ਆਮਨ੍ਤਯਿਂਸੁ – ‘‘ਤਾਤਾ, ਅਮ੍ਹੇ ਮਹਲ੍ਲਕਾ, ਸੁਦ੍ਧੋਦਨਮਹਾਰਾਜਸ੍ਸ ਪੁਤ੍ਤਂ ਸਬ੍ਬਞ੍ਞੁਤਂ ਪਤ੍ਤਂ ਮਯਂ ਸਮ੍ਭਵੇਯ੍ਯਾਮ ਵਾ ਨੋ ਵਾ, ਤੁਮ੍ਹੇ ਤਸ੍ਮਿਂ ਕੁਮਾਰੇ ਸਬ੍ਬਞ੍ਞੁਤਂ ਪਤ੍ਤੇ ਤਸ੍ਸ ਸਾਸਨੇ ਪਬ੍ਬਜੇਯ੍ਯਾਥਾ’’ਤਿ. ਤੇ ਸਤ੍ਤਪਿ ਜਨਾ ਯਾਵਤਾਯੁਕਂ ਠਤ੍ਵਾ ਯਥਾਕਮ੍ਮਂ ਗਤਾ, ਕੋਣ੍ਡਞ੍ਞਮਾਣਵੋਵ ਅਰੋਗੋ ਅਹੋਸਿ. ਸੋ ਮਹਾਸਤ੍ਤੇ ਵੁਡ੍ਢਿਮਨ੍ਵਾਯ ਮਹਾਭਿਨਿਕ੍ਖਮਨਂ ਅਭਿਨਿਕ੍ਖਮਿਤ੍ਵਾ ਅਨੁਕ੍ਕਮੇਨ ਉਰੁਵੇਲਂ ਗਨ੍ਤ੍ਵਾ ‘‘ਰਮਣੀਯੋ, ਵਤ ਅਯਂ ਭੂਮਿਭਾਗੋ, ਅਲਂ ਵਤਿਦਂ ਕੁਲਪੁਤ੍ਤਸ੍ਸ ਪਧਾਨਤ੍ਥਿਕਸ੍ਸ ਪਧਾਨਾਯਾ’’ਤਿ ਚਿਤ੍ਤਂ ਉਪ੍ਪਾਦੇਤ੍ਵਾ ਤਤ੍ਥ ਵਾਸਂ ਉਪਗਤੇ ‘‘ਮਹਾਪੁਰਿਸੋ ਪਬ੍ਬਜਿਤੋ’’ਤਿ ਸੁਤ੍ਵਾ ਤੇਸਂ ਬ੍ਰਾਹ੍ਮਣਾਨਂ ਪੁਤ੍ਤੇ ਉਪਸਙ੍ਕਮਿਤ੍ਵਾ ਏਵਮਾਹ ‘‘ਸਿਦ੍ਧਤ੍ਥਕੁਮਾਰੋ ਕਿਰ ਪਬ੍ਬਜਿਤੋ, ਸੋ ਨਿਸ੍ਸਂਸਯਂ ਬੁਦ੍ਧੋ ਭਵਿਸ੍ਸਤਿ. ਸਚੇ ਤੁਮ੍ਹਾਕਂ ਪਿਤਰੋ ਅਰੋਗਾ ਅਸ੍ਸੁ, ਅਜ੍ਜ ਨਿਕ੍ਖਮਿਤ੍ਵਾ ਪਬ੍ਬਜੇਯ੍ਯੁਂ. ਸਚੇ ਤੁਮ੍ਹੇਪਿ ਇਚ੍ਛੇਯ੍ਯਾਥ, ਏਥ, ਅਹਂ ਤਂ ਪੁਰਿਸਂ ਅਨੁਪਬ੍ਬਜਿਸ੍ਸਾਮੀ’’ਤਿ. ਤੇ ਸਬ੍ਬੇ ਏਕਚ੍ਛਨ੍ਦਾ ਭਵਿਤੁਂ ਨਾਸਕ੍ਖਿਂਸੁ, ਤਯੋ ਜਨਾ ਨ ਪਬ੍ਬਜਿਂਸੁ. ਕੋਣ੍ਡਞ੍ਞਬ੍ਰਾਹ੍ਮਣਂ ਜੇਟ੍ਠਕਂ ਕਤ੍ਵਾ ਇਤਰੇ ਚਤ੍ਤਾਰੋ ਪਬ੍ਬਜਿਂਸੁ. ਤੇ ਪਞ੍ਚਪਿ ਜਨਾ ਪਞ੍ਚਵਗ੍ਗਿਯਤ੍ਥੇਰਾ ਨਾਮ ਜਾਤਾ.

ਤਦਾ ਪਨ ਰਾਜਾ ‘‘ਕਿਂ ਦਿਸ੍ਵਾ ਮਯ੍ਹਂ ਪੁਤ੍ਤੋ ਪਬ੍ਬਜਿਸ੍ਸਤੀ’’ਤਿ ਪੁਚ੍ਛਿ. ‘‘ਚਤ੍ਤਾਰਿ ਪੁਬ੍ਬਨਿਮਿਤ੍ਤਾਨੀ’’ਤਿ. ‘‘ਕਤਰਞ੍ਚ ਕਤਰਞ੍ਚਾ’’ਤਿ? ‘‘ਜਰਾਜਿਣ੍ਣਂ, ਬ੍ਯਾਧਿਤਂ, ਕਾਲਕਤਂ, ਪਬ੍ਬਜਿਤ’’ਨ੍ਤਿ. ਰਾਜਾ ‘‘ਇਤੋ ਪਟ੍ਠਾਯ ਏਵਰੂਪਾਨਂ ਮਮ ਪੁਤ੍ਤਸ੍ਸ ਸਨ੍ਤਿਕਂ ਉਪਸਙ੍ਕਮਿਤੁਂ ਮਾ ਅਦਤ੍ਥ, ਮਯ੍ਹਂ ਪੁਤ੍ਤਸ੍ਸ ਬੁਦ੍ਧਭਾਵੇਨ ਕਮ੍ਮਂ ਨਤ੍ਥਿ, ਅਹਂ ਮਮ ਪੁਤ੍ਤਂ ਦ੍ਵਿਸਹਸ੍ਸਦੀਪਪਰਿਵਾਰਾਨਂ ਚਤੁਨ੍ਨਂ ਮਹਾਦੀਪਾਨਂ ਇਸ੍ਸਰਿਯਾਧਿਪਚ੍ਚਂ ਰਜ੍ਜਂ ਕਾਰੇਨ੍ਤਂ ਛਤ੍ਤਿਂਸਯੋਜਨਪਰਿਮਣ੍ਡਲਾਯ ਪਰਿਸਾਯ ਪਰਿਵੁਤਂ ਗਗਨਤਲੇ ਵਿਚਰਮਾਨਂ ਪਸ੍ਸਿਤੁਕਾਮੋ’’ਤਿ. ਏਵਞ੍ਚ ਪਨ ਵਤ੍ਵਾ ਇਮੇਸਂ ਚਤੁਪ੍ਪਕਾਰਾਨਂ ਨਿਮਿਤ੍ਤਾਨਂ ਕੁਮਾਰਸ੍ਸ ਚਕ੍ਖੁਪਥੇ ਆਗਮਨਨਿਵਾਰਣਤ੍ਥਂ ਚਤੂਸੁ ਦਿਸਾਸੁ ਗਾਵੁਤੇ ਗਾਵੁਤੇ ਆਰਕ੍ਖਂ ਠਪੇਸਿ. ਤਂ ਦਿਵਸਂ ਪਨ ਮਙ੍ਗਲਟ੍ਠਾਨੇ ਸਨ੍ਨਿਪਤਿਤੇਸੁ ਅਸੀਤਿਯਾ ਞਾਤਿਕੁਲਸਹਸ੍ਸੇਸੁ ਏਕੇਕੋ ਏਕਮੇਕਂ ਪੁਤ੍ਤਂ ਪਟਿਜਾਨਿ – ‘‘ਅਯਂ ਬੁਦ੍ਧੋ ਵਾ ਹੋਤੁ ਰਾਜਾ ਵਾ, ਮਯਂ ਏਕਮੇਕਂ ਪੁਤ੍ਤਂ ਦਸ੍ਸਾਮ. ਸਚੇਪਿ ਬੁਦ੍ਧੋ ਭਵਿਸ੍ਸਤਿ, ਖਤ੍ਤਿਯਸਮਣੇਹੇਵ ਪੁਰਕ੍ਖਤਪਰਿਵਾਰਿਤੋ ਵਿਚਰਿਸ੍ਸਤਿ. ਸਚੇਪਿ ਰਾਜਾ ਭਵਿਸ੍ਸਤਿ, ਖਤ੍ਤਿਯਕੁਮਾਰੇਹੇਵ ਪੁਰਕ੍ਖਤਪਰਿਵਾਰਿਤੋ ਵਿਚਰਿਸ੍ਸਤੀ’’ਤਿ. ਰਾਜਾਪਿ ਬੋਧਿਸਤ੍ਤਸ੍ਸ ਉਤ੍ਤਮਰੂਪਸਮ੍ਪਨ੍ਨਾ ਵਿਗਤਸਬ੍ਬਦੋਸਾ ਧਾਤਿਯੋ ਪਚ੍ਚੁਪਟ੍ਠਾਪੇਸਿ. ਬੋਧਿਸਤ੍ਤੋ ਅਨਨ੍ਤੇਨ ਪਰਿਵਾਰੇਨ ਮਹਨ੍ਤੇਨ ਸਿਰਿਸੋਭਗ੍ਗੇਨ ਵਡ੍ਢਤਿ.

ਅਥੇਕਦਿਵਸਂ ਰਞ੍ਞੋ ਵਪ੍ਪਮਙ੍ਗਲਂ ਨਾਮ ਅਹੋਸਿ. ਤਂ ਦਿਵਸਂ ਸਕਲਨਗਰਂ ਦੇਵਵਿਮਾਨਂ ਵਿਯ ਅਲਙ੍ਕਰੋਨ੍ਤਿ. ਸਬ੍ਬੇ ਦਾਸਕਮ੍ਮਕਰਾਦਯੋ ਅਹਤਵਤ੍ਥਨਿਵਤ੍ਥਾ ਗਨ੍ਧਮਾਲਾਦਿਪਟਿਮਣ੍ਡਿਤਾ ਰਾਜਕੁਲੇ ਸਨ੍ਨਿਪਤਨ੍ਤਿ. ਰਞ੍ਞੋ ਕਮ੍ਮਨ੍ਤੇ ਨਙ੍ਗਲਸਹਸ੍ਸਂ ਯੋਜੀਯਤਿ. ਤਸ੍ਮਿਂ ਪਨ ਦਿਵਸੇ ਏਕੇਨੂਨਅਟ੍ਠਸਤਨਙ੍ਗਲਾਨਿ ਸਦ੍ਧਿਂ ਬਲਿਬਦ੍ਦਰਸ੍ਮਿਯੋਤ੍ਤੇਹਿ ਰਜਤਪਰਿਕ੍ਖਤਾਨਿ ਹੋਨ੍ਤਿ, ਰਞ੍ਞੋ ਆਲਮ੍ਬਨਨਙ੍ਗਲਂ ਪਨ ਰਤ੍ਤਸੁਵਣ੍ਣਪਰਿਕ੍ਖਤਂ ਹੋਤਿ. ਬਲਿਬਦ੍ਦਾਨਂ ਸਿਙ੍ਗਰਸ੍ਮਿਪਤੋਦਾਪਿ ਸੁਵਣ੍ਣਪਰਿਕ੍ਖਤਾਵ ਹੋਨ੍ਤਿ. ਰਾਜਾ ਮਹਤਾ ਪਰਿਵਾਰੇਨ ਨਿਕ੍ਖਨ੍ਤੋ ਪੁਤ੍ਤਂ ਗਹੇਤ੍ਵਾ ਅਗਮਾਸਿ. ਕਮ੍ਮਨ੍ਤਟ੍ਠਾਨੇ ਏਕੋ ਜਮ੍ਬੁਰੁਕ੍ਖੋ ਬਹਲਪਲਾਸੋ ਸਨ੍ਦਚ੍ਛਾਯੋ ਅਹੋਸਿ. ਤਸ੍ਸ ਹੇਟ੍ਠਾ ਕੁਮਾਰਸ੍ਸ ਸਯਨਂ ਪਞ੍ਞਪਾਪੇਤ੍ਵਾ ਉਪਰਿ ਸੁਵਣ੍ਣਤਾਰਕਖਚਿਤਂ ਵਿਤਾਨਂ ਬਨ੍ਧਾਪੇਤ੍ਵਾ ਸਾਣਿਪਾਕਾਰੇਨ ਪਰਿਕ੍ਖਿਪਾਪੇਤ੍ਵਾ ਆਰਕ੍ਖਂ ਠਪਾਪੇਤ੍ਵਾ ਰਾਜਾ ਸਬ੍ਬਾਲਙ੍ਕਾਰਂ ਅਲਙ੍ਕਰਿਤ੍ਵਾ ਅਮਚ੍ਚਗਣਪਰਿਵੁਤੋ ਨਙ੍ਗਲਕਰਣਟ੍ਠਾਨਂ ਅਗਮਾਸਿ. ਤਤ੍ਥ ਰਾਜਾ ਸੁਵਣ੍ਣਨਙ੍ਗਲਂ ਗਣ੍ਹਾਤਿ, ਅਮਚ੍ਚਾ ਏਕੇਨੂਨਟ੍ਠਸਤਰਜਤਨਙ੍ਗਲਾਨਿ, ਕਸ੍ਸਕਾ ਸੇਸਨਙ੍ਗਲਾਨਿ. ਤੇ ਤਾਨਿ ਗਹੇਤ੍ਵਾ ਇਤੋ ਚਿਤੋ ਚ ਕਸਨ੍ਤਿ. ਰਾਜਾ ਪਨ ਓਰਤੋ ਵਾ ਪਾਰਂ ਗਚ੍ਛਤਿ, ਪਾਰਤੋ ਵਾ ਓਰਂ ਆਗਚ੍ਛਤਿ. ਏਤਸ੍ਮਿਂ ਠਾਨੇ ਮਹਾਸਮ੍ਪਤ੍ਤਿ ਅਹੋਸਿ. ਬੋਧਿਸਤ੍ਤਂ ਪਰਿਵਾਰੇਤ੍ਵਾ ਨਿਸਿਨ੍ਨਾ ਧਾਤਿਯੋ ‘‘ਰਞ੍ਞੋ ਸਮ੍ਪਤ੍ਤਿਂ ਪਸ੍ਸਿਸ੍ਸਾਮਾ’’ਤਿ ਅਨ੍ਤੋਸਾਣਿਤੋ ਬਹਿ ਨਿਕ੍ਖਨ੍ਤਾ. ਬੋਧਿਸਤ੍ਤੋ ਇਤੋ ਚਿਤੋ ਚ ਓਲੋਕੇਨ੍ਤੋ ਕਞ੍ਚਿ ਅਦਿਸ੍ਵਾ ਵੇਗੇਨ ਉਟ੍ਠਾਯ ਪਲ੍ਲਙ੍ਕਂ ਆਭੁਜਿਤ੍ਵਾ ਆਨਾਪਾਨੇ ਪਰਿਗ੍ਗਹੇਤ੍ਵਾ ਪਠਮਜ੍ਝਾਨਂ ਨਿਬ੍ਬਤ੍ਤੇਸਿ. ਧਾਤਿਯੋ ਖਜ੍ਜਭੋਜ੍ਜਨ੍ਤਰੇ ਵਿਚਰਮਾਨਾ ਥੋਕਂ ਚਿਰਾਯਿਂਸੁ. ਸੇਸਰੁਕ੍ਖਾਨਂ ਛਾਯਾ ਨਿਵਤ੍ਤਾ, ਤਸ੍ਸ ਪਨ ਰੁਕ੍ਖਸ੍ਸ ਪਰਿਮਣ੍ਡਲਾ ਹੁਤ੍ਵਾ ਅਟ੍ਠਾਸਿ. ਧਾਤਿਯੋ ‘‘ਅਯ੍ਯਪੁਤ੍ਤੋ ਏਕਤੋ’’ਤਿ ਵੇਗੇਨ ਸਾਣਿਂ ਉਕ੍ਖਿਪਿਤ੍ਵਾ ਅਨ੍ਤੋ ਪਵਿਸਮਾਨਾ ਬੋਧਿਸਤ੍ਤਂ ਸਯਨੇ ਪਲ੍ਲਙ੍ਕੇਨ ਨਿਸਿਨ੍ਨਂ ਤਞ੍ਚ ਪਾਟਿਹਾਰਿਯਂ ਦਿਸ੍ਵਾ ਗਨ੍ਤ੍ਵਾ ਰਞ੍ਞੋ ਆਰੋਚੇਸੁਂ – ‘‘ਦੇਵ, ਕੁਮਾਰੋ ਏਵਂ ਨਿਸਿਨ੍ਨੋ, ਅਞ੍ਞੇਸਂ ਰੁਕ੍ਖਾਨਂ ਛਾਯਾ ਨਿਵਤ੍ਤਾ, ਜਮ੍ਬੁਰੁਕ੍ਖਸ੍ਸ ਪਨ ਪਰਿਮਣ੍ਡਲਾ ਠਿਤਾ’’ਤਿ. ਰਾਜਾ ਵੇਗੇਨਾਗਨ੍ਤ੍ਵਾ ਪਾਟਿਹਾਰਿਯਂ ਦਿਸ੍ਵਾ – ‘‘ਇਦਂ ਤੇ, ਤਾਤ, ਦੁਤਿਯਂ ਵਨ੍ਦਨ’’ਨ੍ਤਿ ਪੁਤ੍ਤਂ ਵਨ੍ਦਿ.

ਅਥ ਅਨੁਕ੍ਕਮੇਨ ਬੋਧਿਸਤ੍ਤੋ ਸੋਲ਼ਸਵਸ੍ਸੁਦ੍ਦੇਸਿਕੋ ਜਾਤੋ. ਰਾਜਾ ਬੋਧਿਸਤ੍ਤਸ੍ਸ ਤਿਣ੍ਣਂ ਉਤੂਨਂ ਅਨੁਚ੍ਛਵਿਕੇ ਤਯੋ ਪਾਸਾਦੇ ਕਾਰੇਸਿ – ਏਕਂ ਨਵਭੂਮਕਂ, ਏਕਂ ਸਤ੍ਤਭੂਮਕਂ, ਏਕਂ ਪਞ੍ਚਭੂਮਕਂ, ਚਤ੍ਤਾਲੀਸਸਹਸ੍ਸਾ ਚ ਨਾਟਕਿਤ੍ਥਿਯੋ ਉਪਟ੍ਠਾਪੇਸਿ. ਬੋਧਿਸਤ੍ਤੋ ਦੇਵੋ ਵਿਯ ਅਚ੍ਛਰਾਸਙ੍ਘਪਰਿਵੁਤੋ, ਅਲਙ੍ਕਤਨਾਟਕਪਰਿਵੁਤੋ, ਨਿਪ੍ਪੁਰਿਸੇਹਿ ਤੂਰਿਯੇਹਿ ਪਰਿਚਾਰਿਯਮਾਨੋ ਮਹਾਸਮ੍ਪਤ੍ਤਿਂ ਅਨੁਭਵਨ੍ਤੋ ਉਤੁਵਾਰੇਨ ਤੇਸੁ ਪਾਸਾਦੇਸੁ ਵਿਹਰਤਿ. ਰਾਹੁਲਮਾਤਾ ਪਨਸ੍ਸ ਦੇਵੀ ਅਗ੍ਗਮਹੇਸੀ ਅਹੋਸਿ.

ਤਸ੍ਸੇਵਂ ਮਹਾਸਮ੍ਪਤ੍ਤਿਂ ਅਨੁਭਵਨ੍ਤਸ੍ਸ ਏਕਦਿਵਸਂ ਞਾਤਿਸਙ੍ਘਸ੍ਸ ਅਬ੍ਭਨ੍ਤਰੇ ਅਯਂ ਕਥਾ ਉਦਪਾਦਿ – ‘‘ਸਿਦ੍ਧਤ੍ਥੋ ਕੀਲ਼ਾਪਸੁਤੋਵ ਵਿਚਰਤਿ, ਕਿਞ੍ਚਿ ਸਿਪ੍ਪਂ ਨ ਸਿਕ੍ਖਤਿ, ਸਙ੍ਗਾਮੇ ਪਚ੍ਚੁਪਟ੍ਠਿਤੇ ਕਿਂ ਕਰਿਸ੍ਸਤੀ’’ਤਿ. ਰਾਜਾ ਬੋਧਿਸਤ੍ਤਂ ਪਕ੍ਕੋਸਾਪੇਤ੍ਵਾ – ‘‘ਤਾਤ, ਤਵ ਞਾਤਕਾ ‘ਸਿਦ੍ਧਤ੍ਥੋ ਕਿਞ੍ਚਿ ਸਿਪ੍ਪਂ ਅਸਿਕ੍ਖਿਤ੍ਵਾ ਕੀਲ਼ਾਪਸੁਤੋਵ ਵਿਚਰਤੀ’ਤਿ ਵਦਨ੍ਤਿ, ਏਤ੍ਥ ਕਿਂ ਪਤ੍ਤਕਾਲੇ ਮਞ੍ਞਸੀ’’ਤਿ. ਦੇਵ, ਮਮ ਸਿਪ੍ਪਂ ਸਿਕ੍ਖਨਕਿਚ੍ਚਂ ਨਤ੍ਥਿ, ਨਗਰੇ ਮਮ ਸਿਪ੍ਪਦਸ੍ਸਨਤ੍ਥਂ ਭੇਰਿਂ ਚਰਾਪੇਥ ‘‘ਇਤੋ ਸਤ੍ਤਮੇ ਦਿਵਸੇ ਞਾਤਕਾਨਂ ਸਿਪ੍ਪਂ ਦਸ੍ਸੇਸ੍ਸਾਮੀ’’ਤਿ. ਰਾਜਾ ਤਥਾ ਅਕਾਸਿ. ਬੋਧਿਸਤ੍ਤੋ ਅਕ੍ਖਣਵੇਧਿਵਾਲਵੇਧਿਧਨੁਗ੍ਗਹੇ ਸਨ੍ਨਿਪਾਤਾਪੇਤ੍ਵਾ ਮਹਾਜਨਸ੍ਸ ਮਜ੍ਝੇ ਅਞ੍ਞੇਹਿ ਧਨੁਗ੍ਗਹੇਹਿ ਅਸਾਧਾਰਣਂ ਞਾਤਕਾਨਂ ਦ੍ਵਾਦਸਵਿਧਂ ਸਿਪ੍ਪਂ ਦਸ੍ਸੇਸਿ. ਤਂ ਸਰਭਙ੍ਗਜਾਤਕੇ ਆਗਤਨਯੇਨੇਵ ਵੇਦਿਤਬ੍ਬਂ. ਤਦਾਸ੍ਸ ਞਾਤਿਸਙ੍ਘੋ ਨਿਕ੍ਕਙ੍ਖੋ ਅਹੋਸਿ.

ਅਥੇਕਦਿਵਸਂ ਬੋਧਿਸਤ੍ਤੋ ਉਯ੍ਯਾਨਭੂਮਿਂ ਗਨ੍ਤੁਕਾਮੋ ਸਾਰਥਿਂ ਆਮਨ੍ਤੇਤ੍ਵਾ ‘‘ਰਥਂ ਯੋਜੇਹੀ’’ਤਿ ਆਹ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਮਹਾਰਹਂ ਉਤ੍ਤਮਰਥਂ ਸਬ੍ਬਾਲਙ੍ਕਾਰੇਨ ਅਲਙ੍ਕਰਿਤ੍ਵਾ ਕੁਮੁਦਪਤ੍ਤਵਣ੍ਣੇ ਚਤ੍ਤਾਰੋ ਮਙ੍ਗਲਸਿਨ੍ਧਵੇ ਯੋਜੇਤ੍ਵਾ ਬੋਧਿਸਤ੍ਤਸ੍ਸ ਪਟਿਵੇਦੇਸਿ. ਬੋਧਿਸਤ੍ਤੋ ਦੇਵਵਿਮਾਨਸਦਿਸਂ ਰਥਂ ਅਭਿਰੁਹਿਤ੍ਵਾ ਉਯ੍ਯਾਨਾਭਿਮੁਖੋ ਅਗਮਾਸਿ. ਦੇਵਤਾ ‘‘ਸਿਦ੍ਧਤ੍ਥਕੁਮਾਰਸ੍ਸ ਅਭਿਸਮ੍ਬੁਜ੍ਝਨਕਾਲੋ ਆਸਨ੍ਨੋ, ਪੁਬ੍ਬਨਿਮਿਤ੍ਤਂ ਦਸ੍ਸੇਸ੍ਸਾਮਾ’’ਤਿ ਏਕਂ ਦੇਵਪੁਤ੍ਤਂ ਜਰਾਜਜ੍ਜਰਂ ਖਣ੍ਡਦਨ੍ਤਂ ਪਲਿਤਕੇਸਂ ਵਙ੍ਕਂ ਓਭਗ੍ਗਸਰੀਰਂ ਦਣ੍ਡਹਤ੍ਥਂ ਪਵੇਧਮਾਨਂ ਕਤ੍ਵਾ ਦਸ੍ਸੇਸੁਂ. ਤਂ ਬੋਧਿਸਤ੍ਤੋ ਚੇਵ ਸਾਰਥਿ ਚ ਪਸ੍ਸਨ੍ਤਿ. ਤਤੋ ਬੋਧਿਸਤ੍ਤੋ ਸਾਰਥਿਂ – ‘‘ਸਮ੍ਮ, ਕੋ ਨਾਮੇਸ ਪੁਰਿਸੋ, ਕੇਸਾਪਿਸ੍ਸ ਨ ਯਥਾ ਅਞ੍ਞੇਸ’’ਨ੍ਤਿ ਮਹਾਪਦਾਨੇ ਆਗਤਨਯੇਨ ਪੁਚ੍ਛਿਤ੍ਵਾ ਤਸ੍ਸ ਵਚਨਂ ਸੁਤ੍ਵਾ ‘‘ਧੀਰਤ੍ਥੁ ਵਤ ਭੋ ਜਾਤਿ, ਯਤ੍ਰ ਹਿ ਨਾਮ ਜਾਤਸ੍ਸ ਜਰਾ ਪਞ੍ਞਾਯਿਸ੍ਸਤੀ’’ਤਿ ਸਂਵਿਗ੍ਗਹਦਯੋ ਤਤੋਵ ਪਟਿਨਿਵਤ੍ਤਿਤ੍ਵਾ ਪਾਸਾਦਮੇਵ ਅਭਿਰੁਹਿ. ਰਾਜਾ ‘‘ਕਿਂ ਕਾਰਣਾ ਮਮ ਪੁਤ੍ਤੋ ਖਿਪ੍ਪਂ ਪਟਿਨਿਵਤ੍ਤੀ’’ਤਿ ਪੁਚ੍ਛਿ. ‘‘ਜਿਣ੍ਣਕਂ ਪੁਰਿਸਂ ਦਿਸ੍ਵਾ ਦੇਵਾ’’ਤਿ. ‘‘ਜਿਣ੍ਣਕਂ ਦਿਸ੍ਵਾ ਪਬ੍ਬਜਿਸ੍ਸਤੀਤਿ ਆਹਂਸੁ, ਕਸ੍ਮਾ ਮਂ ਨਾਸੇਥ, ਸੀਘਂ ਪੁਤ੍ਤਸ੍ਸ ਨਾਟਕਾਨਿ ਸਜ੍ਜੇਥ, ਸਮ੍ਪਤ੍ਤਿਂ ਅਨੁਭਵਨ੍ਤੋ ਪਬ੍ਬਜ੍ਜਾਯ ਸਤਿਂ ਨ ਕਰਿਸ੍ਸਤੀ’’ਤਿ ਵਤ੍ਵਾ ਆਰਕ੍ਖਂ ਵਡ੍ਢੇਤ੍ਵਾ ਸਬ੍ਬਦਿਸਾਸੁ ਅਡ੍ਢਯੋਜਨੇ ਅਡ੍ਢਯੋਜਨੇ ਠਪੇਸਿ.

ਪੁਨੇਕਦਿਵਸਂ ਬੋਧਿਸਤ੍ਤੋ ਤਥੇਵ ਉਯ੍ਯਾਨਂ ਗਚ੍ਛਨ੍ਤੋ ਦੇਵਤਾਹਿ ਨਿਮ੍ਮਿਤਂ ਬ੍ਯਾਧਿਤਂ ਪੁਰਿਸਂ ਦਿਸ੍ਵਾ ਪੁਰਿਮਨਯੇਨੇਵ ਪੁਚ੍ਛਿਤ੍ਵਾ ਸਂਵਿਗ੍ਗਹਦਯੋ ਨਿਵਤ੍ਤਿਤ੍ਵਾ ਪਾਸਾਦਂ ਅਭਿਰੁਹਿ. ਰਾਜਾਪਿ ਪੁਚ੍ਛਿਤ੍ਵਾ ਹੇਟ੍ਠਾ ਵੁਤ੍ਤਨਯੇਨੇਵ ਸਂਵਿਦਹਿਤ੍ਵਾ ਪੁਨ ਵਡ੍ਢੇਤ੍ਵਾ ਸਮਨ੍ਤਾ ਤਿਗਾਵੁਤਪ੍ਪਮਾਣੇ ਪਦੇਸੇ ਆਰਕ੍ਖਂ ਠਪੇਸਿ. ਅਪਰਂ ਏਕਦਿਵਸਂ ਬੋਧਿਸਤ੍ਤੋ ਤਥੇਵ ਉਯ੍ਯਾਨਂ ਗਚ੍ਛਨ੍ਤੋ ਦੇਵਤਾਹਿ ਨਿਮ੍ਮਿਤਂ ਕਾਲਕਤਂ ਦਿਸ੍ਵਾ ਪੁਰਿਮਨਯੇਨੇਵ ਪੁਚ੍ਛਿਤ੍ਵਾ ਸਂਵਿਗ੍ਗਹਦਯੋ ਪੁਨ ਨਿਵਤ੍ਤਿਤ੍ਵਾ ਪਾਸਾਦਂ ਅਭਿਰੁਹਿ. ਰਾਜਾਪਿ ਪੁਚ੍ਛਿਤ੍ਵਾ ਹੇਟ੍ਠਾ ਵੁਤ੍ਤਨਯੇਨੇਵ ਸਂਵਿਦਹਿਤ੍ਵਾ ਪੁਨ ਵਡ੍ਢੇਤ੍ਵਾ ਸਮਨ੍ਤਾ ਯੋਜਨਪ੍ਪਮਾਣੇ ਪਦੇਸੇ ਆਰਕ੍ਖਂ ਠਪੇਸਿ. ਅਪਰਂ ਪਨ ਏਕਦਿਵਸਂ ਉਯ੍ਯਾਨਂ ਗਚ੍ਛਨ੍ਤੋ ਤਥੇਵ ਦੇਵਤਾਹਿ ਨਿਮ੍ਮਿਤਂ ਸੁਨਿਵਤ੍ਥਂ ਸੁਪਾਰੁਤਂ ਪਬ੍ਬਜਿਤਂ ਦਿਸ੍ਵਾ ‘‘ਕੋ ਨਾਮੇਸੋ ਸਮ੍ਮਾ’’ਤਿ ਸਾਰਥਿਂ ਪੁਚ੍ਛਿ. ਸਾਰਥਿ ਕਿਞ੍ਚਾਪਿ ਬੁਦ੍ਧੁਪ੍ਪਾਦਸ੍ਸ ਅਭਾਵਾ ਪਬ੍ਬਜਿਤਂ ਵਾ ਪਬ੍ਬਜਿਤਗੁਣੇ ਵਾ ਨ ਜਾਨਾਤਿ, ਦੇਵਤਾਨੁਭਾਵੇਨ ਪਨ ‘‘ਪਬ੍ਬਜਿਤੋ ਨਾਮਾਯਂ ਦੇਵਾ’’ਤਿ ਵਤ੍ਵਾ ਪਬ੍ਬਜ੍ਜਾਯ ਗੁਣੇ ਵਣ੍ਣੇਸਿ. ਬੋਧਿਸਤ੍ਤੋ ਪਬ੍ਬਜ੍ਜਾਯ ਰੁਚਿਂ ਉਪ੍ਪਾਦੇਤ੍ਵਾ ਤਂ ਦਿਵਸਂ ਉਯ੍ਯਾਨਂ ਅਗਮਾਸਿ. ਦੀਘਭਾਣਕਾ ਪਨਾਹੁ ‘‘ਚਤ੍ਤਾਰਿ ਨਿਮਿਤ੍ਤਾਨਿ ਏਕਦਿਵਸੇਨੇਵ ਦਿਸ੍ਵਾ ਅਗਮਾਸੀ’’ਤਿ.

ਸੋ ਤਤ੍ਥ ਦਿਵਸਭਾਗਂ ਕੀਲ਼ਿਤ੍ਵਾ ਮਙ੍ਗਲਪੋਕ੍ਖਰਣਿਯਂ ਨ੍ਹਾਯਿਤ੍ਵਾ ਅਤ੍ਥਙ੍ਗਤੇ ਸੂਰਿਯੇ ਮਙ੍ਗਲਸਿਲਾਪਟ੍ਟੇ ਨਿਸੀਦਿ ਅਤ੍ਤਾਨਂ ਅਲਙ੍ਕਾਰਾਪੇਤੁਕਾਮੋ. ਅਥਸ੍ਸ ਪਰਿਚਾਰਕਪੁਰਿਸਾ ਨਾਨਾਵਣ੍ਣਾਨਿ ਦੁਸ੍ਸਾਨਿ ਨਾਨਪ੍ਪਕਾਰਾ ਆਭਰਣਵਿਕਤਿਯੋ ਮਾਲਾਗਨ੍ਧਵਿਲੇਪਨਾਨਿ ਚ ਆਦਾਯ ਸਮਨ੍ਤਾ ਪਰਿਵਾਰੇਤ੍ਵਾ ਅਟ੍ਠਂਸੁ. ਤਸ੍ਮਿਂ ਖਣੇ ਸਕ੍ਕਸ੍ਸ ਨਿਸਿਨ੍ਨਾਸਨਂ ਉਣ੍ਹਂ ਅਹੋਸਿ. ਸੋ ‘‘ਕੋ ਨੁ ਖੋ ਮਂ ਇਮਮ੍ਹਾ ਠਾਨਾ ਚਾਵੇਤੁਕਾਮੋ’’ਤਿ ਉਪਧਾਰੇਨ੍ਤੋ ਬੋਧਿਸਤ੍ਤਸ੍ਸ ਅਲਙ੍ਕਾਰੇਤੁਕਾਮਤਂ ਞਤ੍ਵਾ ਵਿਸ੍ਸਕਮ੍ਮਂ ਆਮਨ੍ਤੇਸਿ ‘‘ਸਮ੍ਮ ਵਿਸ੍ਸਕਮ੍ਮ, ਸਿਦ੍ਧਤ੍ਥਕੁਮਾਰੋ ਅਜ੍ਜ ਅਡ੍ਢਰਤ੍ਤਸਮਯੇ ਮਹਾਭਿਨਿਕ੍ਖਮਨਂ ਨਿਕ੍ਖਮਿਸ੍ਸਤਿ, ਅਯਮਸ੍ਸ ਪਚ੍ਛਿਮੋ ਅਲਙ੍ਕਾਰੋ, ਉਯ੍ਯਾਨਂ ਗਨ੍ਤ੍ਵਾ ਮਹਾਪੁਰਿਸਂ ਦਿਬ੍ਬਾਲਙ੍ਕਾਰੇਹਿ ਅਲਙ੍ਕਰੋਹੀ’’ਤਿ. ਸੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਦੇਵਤਾਨੁਭਾਵੇਨ ਤਙ੍ਖਣਂਯੇਵ ਉਪਸਙ੍ਕਮਿਤ੍ਵਾ ਤਸ੍ਸੇਵ ਕਪ੍ਪਕਸਦਿਸੋ ਹੁਤ੍ਵਾ ਕਪ੍ਪਕਸ੍ਸ ਹਤ੍ਥਤੋ ਵੇਠਨਦੁਸ੍ਸਂ ਗਹੇਤ੍ਵਾ ਬੋਧਿਸਤ੍ਤਸ੍ਸ ਸੀਸਂ ਵੇਠੇਸਿ. ਬੋਧਿਸਤ੍ਤੋ ਹਤ੍ਥਸਮ੍ਫਸ੍ਸੇਨੇਵ ‘‘ਨਾਯਂ ਮਨੁਸ੍ਸੋ, ਦੇਵਪੁਤ੍ਤੋ ਏਸੋ’’ਤਿ ਅਞ੍ਞਾਸਿ. ਵੇਠਨੇਨ ਵੇਠਿਤਮਤ੍ਤੇ ਸੀਸੇ ਮੋਲ਼ਿਯਂ ਮਣਿਰਤਨਾਕਾਰੇਨ ਦੁਸ੍ਸਸਹਸ੍ਸਂ ਅਬ੍ਭੁਗ੍ਗਞ੍ਛਿ. ਪੁਨ ਵੇਠੇਨ੍ਤਸ੍ਸ ਦੁਸ੍ਸਸਹਸ੍ਸਨ੍ਤਿ ਦਸਕ੍ਖਤ੍ਤੁਂ ਵੇਠੇਨ੍ਤਸ੍ਸ ਦਸ ਦੁਸ੍ਸਸਹਸ੍ਸਾਨਿ ਅਬ੍ਭੁਗ੍ਗਚ੍ਛਿਂਸੁ. ‘‘ਸੀਸਂ ਖੁਦ੍ਦਕਂ, ਦੁਸ੍ਸਾਨਿ ਬਹੂਨਿ, ਕਥਂ ਅਬ੍ਭੁਗ੍ਗਤਾਨੀ’’ਤਿ ਨ ਚਿਨ੍ਤੇਤਬ੍ਬਂ. ਤੇਸੁ ਹਿ ਸਬ੍ਬਮਹਨ੍ਤਂ ਆਮਲਕਪੁਪ੍ਫਪ੍ਪਮਾਣਂ, ਅਵਸੇਸਾਨਿ ਕੁਸੁਮ੍ਬਕਪੁਪ੍ਫਪ੍ਪਮਾਣਾਨਿ ਅਹੇਸੁਂ. ਬੋਧਿਸਤ੍ਤਸ੍ਸ ਸੀਸਂ ਕਿਞ੍ਜਕ੍ਖਗਵਚ੍ਛਿਤਂ ਵਿਯ ਕੁਯ੍ਯਕਪੁਪ੍ਫਂ ਅਹੋਸਿ.

ਅਥਸ੍ਸ ਸਬ੍ਬਾਲਙ੍ਕਾਰਪਟਿਮਣ੍ਡਿਤਸ੍ਸ ਸਬ੍ਬਤਾਲਾਵਚਰੇਸੁ ਸਕਾਨਿ ਸਕਾਨਿ ਪਟਿਭਾਨਾਨਿ ਦਸ੍ਸਯਨ੍ਤੇਸੁ, ਬ੍ਰਾਹ੍ਮਣੇਸੁ ‘‘ਜਯਨਨ੍ਦਾ’’ਤਿਆਦਿਵਚਨੇਹਿ, ਸੂਤਮਾਗਧਾਦੀਸੁ ਨਾਨਪ੍ਪਕਾਰੇਹਿ ਮਙ੍ਗਲਵਚਨਤ੍ਥੁਤਿਘੋਸੇਹਿ ਸਮ੍ਭਾਵੇਨ੍ਤੇਸੁ ਸਬ੍ਬਾਲਙ੍ਕਾਰਪਟਿਮਣ੍ਡਿਤਂ ਰਥਵਰਂ ਅਭਿਰੁਹਿ. ਤਸ੍ਮਿਂ ਸਮਯੇ ‘‘ਰਾਹੁਲਮਾਤਾ ਪੁਤ੍ਤਂ ਵਿਜਾਤਾ’’ਤਿ ਸੁਤ੍ਵਾ ਸੁਦ੍ਧੋਦਨਮਹਾਰਾਜਾ ‘‘ਪੁਤ੍ਤਸ੍ਸ ਮੇ ਤੁਟ੍ਠਿਂ ਨਿਵੇਦੇਥਾ’’ਤਿ ਸਾਸਨਂ ਪਹਿਣਿ. ਬੋਧਿਸਤ੍ਤੋ ਤਂ ਸੁਤ੍ਵਾ ‘‘ਰਾਹੁ ਜਾਤੋ, ਬਨ੍ਧਨਂ ਜਾਤ’’ਨ੍ਤਿ ਆਹ. ਰਾਜਾ ‘‘ਕਿਂ ਮੇ ਪੁਤ੍ਤੋ ਅਵਚਾ’’ਤਿ ਪੁਚ੍ਛਿਤ੍ਵਾ ਤਂ ਵਚਨਂ ਸੁਤ੍ਵਾ ‘‘ਇਤੋ ਪਟ੍ਠਾਯ ਮੇ ਨਤ੍ਤਾ ਰਾਹੁਲਕੁਮਾਰੋਯੇਵ ਨਾਮ ਹੋਤੂ’’ਤਿ ਆਹ.

ਬੋਧਿਸਤ੍ਤੋਪਿ ਖੋ ਰਥਵਰਂ ਆਰੁਯ੍ਹ ਮਹਨ੍ਤੇਨ ਯਸੇਨ ਅਤਿਮਨੋਰਮੇਨ ਸਿਰਿਸੋਭਗ੍ਗੇਨ ਨਗਰਂ ਪਾਵਿਸਿ. ਤਸ੍ਮਿਂ ਸਮਯੇ ਕਿਸਾਗੋਤਮੀ ਨਾਮ ਖਤ੍ਤਿਯਕਞ੍ਞਾ ਉਪਰਿਪਾਸਾਦਵਰਤਲਗਤਾ ਨਗਰਂ ਪਦਕ੍ਖਿਣਂ ਕੁਰੁਮਾਨਸ੍ਸ ਬੋਧਿਸਤ੍ਤਸ੍ਸ ਰੂਪਸਿਰਿਂ ਦਿਸ੍ਵਾ ਪੀਤਿਸੋਮਨਸ੍ਸਜਾਤਾ ਇਦਂ ਉਦਾਨਂ ਉਦਾਨੇਸਿ –

‘‘ਨਿਬ੍ਬੁਤਾ ਨੂਨ ਸਾ ਮਾਤਾ, ਨਿਬ੍ਬੁਤੋ ਨੂਨ ਸੋ ਪਿਤਾ;

ਨਿਬ੍ਬੁਤਾ ਨੂਨ ਸਾ ਨਾਰੀ, ਯਸ੍ਸਾਯਂ ਈਦਿਸੋ ਪਤੀ’’ਤਿ.

ਬੋਧਿਸਤ੍ਤੋ ਤਂ ਸੁਤ੍ਵਾ ਚਿਨ੍ਤੇਸਿ ‘‘ਅਯਂ ਏਵਮਾਹ ‘ਏਵਰੂਪਂ ਅਤ੍ਤਭਾਵਂ ਪਸ੍ਸਨ੍ਤਿਯਾ ਮਾਤੁ ਹਦਯਂ ਨਿਬ੍ਬਾਯਤਿ, ਪਿਤੁ ਹਦਯਂ ਨਿਬ੍ਬਾਯਤਿ, ਪਜਾਪਤਿਯਾ ਹਦਯਂ ਨਿਬ੍ਬਾਯਤੀ’ਤਿ! ਕਿਸ੍ਮਿਂ ਨੁ ਖੋ ਨਿਬ੍ਬੁਤੇ ਹਦਯਂ ਨਿਬ੍ਬੁਤਂ ਨਾਮ ਹੋਤੀ’’ਤਿ? ਅਥਸ੍ਸ ਕਿਲੇਸੇਸੁ ਵਿਰਤ੍ਤਮਾਨਸਸ੍ਸ ਏਤਦਹੋਸਿ – ‘‘ਰਾਗਗ੍ਗਿਮ੍ਹਿ ਨਿਬ੍ਬੁਤੇ ਨਿਬ੍ਬੁਤਂ ਨਾਮ ਹੋਤਿ, ਦੋਸਗ੍ਗਿਮ੍ਹਿ ਨਿਬ੍ਬੁਤੇ ਨਿਬ੍ਬੁਤਂ ਨਾਮ ਹੋਤਿ, ਮੋਹਗ੍ਗਿਮ੍ਹਿ ਨਿਬ੍ਬੁਤੇ ਨਿਬ੍ਬੁਤਂ ਨਾਮ ਹੋਤਿ, ਮਾਨਦਿਟ੍ਠਿਆਦੀਸੁ ਸਬ੍ਬਕਿਲੇਸਦਰਥੇਸੁ ਨਿਬ੍ਬੁਤੇਸੁ ਨਿਬ੍ਬੁਤਂ ਨਾਮ ਹੋਤਿ. ਅਯਂ ਮੇ ਸੁਸ੍ਸਵਨਂ ਸਾਵੇਸਿ, ਅਹਞ੍ਹਿ ਨਿਬ੍ਬਾਨਂ ਗਵੇਸਨ੍ਤੋ ਚਰਾਮਿ, ਅਜ੍ਜੇਵ ਮਯਾ ਘਰਾਵਾਸਂ ਛਡ੍ਡੇਤ੍ਵਾ ਨਿਕ੍ਖਮ੍ਮ ਪਬ੍ਬਜਿਤ੍ਵਾ ਨਿਬ੍ਬਾਨਂ ਗਵੇਸਿਤੁਂ ਵਟ੍ਟਤਿ, ਅਯਂ ਇਮਿਸ੍ਸਾ ਆਚਰਿਯਭਾਗੋ ਹੋਤੂ’’ਤਿ ਕਣ੍ਠਤੋ ਓਮੁਞ੍ਚਿਤ੍ਵਾ ਕਿਸਾਗੋਤਮਿਯਾ ਸਤਸਹਸ੍ਸਗ੍ਘਨਕਂ ਮੁਤ੍ਤਾਹਾਰਂ ਪੇਸੇਸਿ. ਸਾ ‘‘ਸਿਦ੍ਧਤ੍ਥਕੁਮਾਰੋ ਮਯਿ ਪਟਿਬਦ੍ਧਚਿਤ੍ਤੋ ਹੁਤ੍ਵਾ ਪਣ੍ਣਾਕਾਰਂ ਪੇਸੇਸੀ’’ਤਿ ਸੋਮਨਸ੍ਸਜਾਤਾ ਅਹੋਸਿ.

ਬੋਧਿਸਤ੍ਤੋਪਿ ਮਹਨ੍ਤੇਨ ਸਿਰਿਸੋਭਗ੍ਗੇਨ ਅਤ੍ਤਨੋ ਪਾਸਾਦਂ ਅਭਿਰੁਹਿਤ੍ਵਾ ਸਿਰਿਸਯਨੇ ਨਿਪਜ੍ਜਿ. ਤਾਵਦੇਵ ਚ ਨਂ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਨਚ੍ਚਗੀਤਾਦੀਸੁ ਸੁਸਿਕ੍ਖਿਤਾ ਦੇਵਕਞ੍ਞਾ ਵਿਯ ਰੂਪਸੋਭਗ੍ਗਪ੍ਪਤ੍ਤਾ ਇਤ੍ਥਿਯੋ ਨਾਨਾਤੂਰਿਯਾਨਿ ਗਹੇਤ੍ਵਾ ਸਮ੍ਪਰਿਵਾਰਯਿਤ੍ਵਾ ਅਭਿਰਮਾਪੇਨ੍ਤਿਯੋ ਨਚ੍ਚਗੀਤਵਾਦਿਤਾਨਿ ਪਯੋਜਯਿਂਸੁ. ਬੋਧਿਸਤ੍ਤੋ ਕਿਲੇਸੇਸੁ ਵਿਰਤ੍ਤਚਿਤ੍ਤਤਾਯ ਨਚ੍ਚਾਦੀਸੁ ਅਨਭਿਰਤੋ ਮੁਹੁਤ੍ਤਂ ਨਿਦ੍ਦਂ ਓਕ੍ਕਮਿ. ਤਾਪਿ ਇਤ੍ਥਿਯੋ ‘‘ਯਸ੍ਸਤ੍ਥਾਯ ਮਯਂ ਨਚ੍ਚਾਦੀਨਿ ਪਯੋਜੇਮ, ਸੋ ਨਿਦ੍ਦਂ ਉਪਗਤੋ, ਇਦਾਨਿ ਕਿਮਤ੍ਥਂ ਕਿਲਮਾਮਾ’’ਤਿ ਗਹਿਤਗ੍ਗਹਿਤਾਨਿ ਤੂਰਿਯਾਨਿ ਅਜ੍ਝੋਤ੍ਥਰਿਤ੍ਵਾ ਨਿਪਜ੍ਜਿਂਸੁ, ਗਨ੍ਧਤੇਲਪ੍ਪਦੀਪਾ ਝਾਯਨ੍ਤਿ. ਬੋਧਿਸਤ੍ਤੋ ਪਬੁਜ੍ਝਿਤ੍ਵਾ ਸਯਨਪਿਟ੍ਠੇ ਪਲ੍ਲਙ੍ਕੇਨ ਨਿਸਿਨ੍ਨੋ ਅਦ੍ਦਸ ਤਾ ਇਤ੍ਥਿਯੋ ਤੂਰਿਯਭਣ੍ਡਾਨਿ ਅਵਤ੍ਥਰਿਤ੍ਵਾ ਨਿਦ੍ਦਾਯਨ੍ਤਿਯੋ – ਏਕਚ੍ਚਾ ਪਗ੍ਘਰਿਤਖੇਲ਼ਾ, ਲਾਲਾਕਿਲਿਨ੍ਨਗਤ੍ਤਾ, ਏਕਚ੍ਚਾ ਦਨ੍ਤੇ ਖਾਦਨ੍ਤਿਯੋ, ਏਕਚ੍ਚਾ ਕਾਕਚ੍ਛਨ੍ਤਿਯੋ, ਏਕਚ੍ਚਾ ਵਿਪ੍ਪਲਪਨ੍ਤਿਯੋ, ਏਕਚ੍ਚਾ ਵਿਵਟਮੁਖਾ, ਏਕਚ੍ਚਾ ਅਪਗਤਵਤ੍ਥਾ, ਪਾਕਟਬੀਭਚ੍ਛਸਮ੍ਬਾਧਟ੍ਠਾਨਾ. ਸੋ ਤਾਸਂ ਤਂ ਵਿਪ੍ਪਕਾਰਂ ਦਿਸ੍ਵਾ ਭਿਯ੍ਯੋਸੋਮਤ੍ਤਾਯ ਕਾਮੇਸੁ ਵਿਰਤ੍ਤਚਿਤ੍ਤੋ ਅਹੋਸਿ. ਤਸ੍ਸ ਅਲਙ੍ਕਤਪਟਿਯਤ੍ਤਂ ਸਕ੍ਕਭਵਨਸਦਿਸਮ੍ਪਿ ਤਂ ਮਹਾਤਲਂ ਅਪਵਿਦ੍ਧਨਾਨਾਕੁਣਪਭਰਿਤਂ ਆਮਕਸੁਸਾਨਂ ਵਿਯ ਉਪਟ੍ਠਾਸਿ, ਤਯੋ ਭਵਾ ਆਦਿਤ੍ਤਗੇਹਸਦਿਸਾ ਖਾਯਿਂਸੁ – ‘‘ਉਪਦ੍ਦੁਤਂ ਵਤ ਭੋ, ਉਪਸ੍ਸਟ੍ਠਂ ਵਤ ਭੋ’’ਤਿ ਉਦਾਨਂ ਪਵਤ੍ਤੇਸਿ, ਅਤਿਵਿਯ ਪਬ੍ਬਜ੍ਜਾਯ ਚਿਤ੍ਤਂ ਨਮਿ.

ਸੋ ‘‘ਅਜ੍ਜੇਵ ਮਯਾ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤੁਂ ਵਟ੍ਟਤੀ’’ਤਿ ਸਯਨਾ ਉਟ੍ਠਾਯ ਦ੍ਵਾਰਸਮੀਪਂ ਗਨ੍ਤ੍ਵਾ ‘‘ਕੋ ਏਤ੍ਥਾ’’ਤਿ ਆਹ. ਉਮ੍ਮਾਰੇ ਸੀਸਂ ਕਤ੍ਵਾ ਨਿਪਨ੍ਨੋ ਛਨ੍ਨੋ ‘‘ਅਹਂ ਅਯ੍ਯਪੁਤ੍ਤ ਛਨ੍ਨੋ’’ਤਿ ਆਹ. ‘‘ਅਹਂ ਅਜ੍ਜ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤੁਕਾਮੋ, ਏਕਂ ਮੇ ਅਸ੍ਸਂ ਕਪ੍ਪੇਹੀ’’ਤਿ ਆਹ. ਸੋ ‘‘ਸਾਧੁ ਦੇਵਾ’’ਤਿ ਅਸ੍ਸਭਣ੍ਡਿਕਂ ਗਹੇਤ੍ਵਾ ਅਸ੍ਸਸਾਲਂ ਗਨ੍ਤ੍ਵਾ ਗਨ੍ਧਤੇਲਪਦੀਪੇਸੁ ਜਲਨ੍ਤੇਸੁ ਸੁਮਨਪਟ੍ਟਵਿਤਾਨਸ੍ਸ ਹੇਟ੍ਠਾ ਰਮਣੀਯੇ ਭੂਮਿਭਾਗੇ ਠਿਤਂ ਕਣ੍ਡਕਂ ਅਸ੍ਸਰਾਜਾਨਂ ਦਿਸ੍ਵਾ ‘‘ਅਜ੍ਜ ਮਯਾ ਇਮਮੇਵ ਕਪ੍ਪੇਤੁਂ ਵਟ੍ਟਤੀ’’ਤਿ ਕਣ੍ਡਕਂ ਕਪ੍ਪੇਸਿ. ਸੋ ਕਪ੍ਪਿਯਮਾਨੋਵ ਅਞ੍ਞਾਸਿ ‘‘ਅਯਂ ਕਪ੍ਪਨਾ ਅਤਿਗਾਲ਼੍ਹਾ, ਅਞ੍ਞੇਸੁ ਦਿਵਸੇਸੁ ਉਯ੍ਯਾਨਕੀਲ਼ਾਦਿਗਮਨੇ ਕਪ੍ਪਨਾ ਵਿਯ ਨ ਹੋਤਿ, ਮਯ੍ਹਂ ਅਯ੍ਯਪੁਤ੍ਤੋ ਅਜ੍ਜ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤੁਕਾਮੋ ਭਵਿਸ੍ਸਤੀ’’ਤਿ. ਤਤੋ ਤੁਟ੍ਠਮਾਨਸੋ ਮਹਾਹਸਿਤਂ ਹਸਿ. ਸੋ ਸਦ੍ਦੋ ਸਕਲਨਗਰਂ ਪਤ੍ਥਰਿਤ੍ਵਾ ਗਚ੍ਛੇਯ੍ਯ, ਦੇਵਤਾ ਪਨ ਤਂ ਸਦ੍ਦਂ ਨਿਰੁਮ੍ਭਿਤ੍ਵਾ ਨ ਕਸ੍ਸਚਿ ਸੋਤੁਂ ਅਦਂਸੁ.

ਬੋਧਿਸਤ੍ਤੋਪਿ ਖੋ ਛਨ੍ਨਂ ਪੇਸੇਤ੍ਵਾਵ ‘‘ਪੁਤ੍ਤਂ ਤਾਵ ਪਸ੍ਸਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਨਿਸਿਨ੍ਨਪਲ੍ਲਙ੍ਕਤੋ ਉਟ੍ਠਾਯ ਰਾਹੁਲਮਾਤਾਯ ਵਸਨਟ੍ਠਾਨਂ ਗਨ੍ਤ੍ਵਾ ਗਬ੍ਭਦ੍ਵਾਰਂ ਵਿਵਰਿ. ਤਸ੍ਮਿਂ ਖਣੇ ਅਨ੍ਤੋਗਬ੍ਭੇ ਗਨ੍ਧਤੇਲਪਦੀਪੋ ਝਾਯਤਿ, ਰਾਹੁਲਮਾਤਾ ਸੁਮਨਮਲ੍ਲਿਕਾਦੀਨਂ ਪੁਪ੍ਫਾਨਂ ਅਮ੍ਬਣਮਤ੍ਤੇਨ ਅਭਿਪ੍ਪਕਿਣ੍ਣਸਯਨੇ ਪੁਤ੍ਤਸ੍ਸ ਮਤ੍ਥਕੇ ਹਤ੍ਥਂ ਠਪੇਤ੍ਵਾ ਨਿਦ੍ਦਾਯਤਿ. ਬੋਧਿਸਤ੍ਤੋ ਉਮ੍ਮਾਰੇ ਪਾਦਂ ਠਪੇਤ੍ਵਾ ਠਿਤਕੋਵ ਓਲੋਕੇਤ੍ਵਾ ‘‘ਸਚਾਹਂ ਦੇਵਿਯਾ ਹਤ੍ਥਂ ਅਪਨੇਤ੍ਵਾ ਮਮ ਪੁਤ੍ਤਂ ਗਣ੍ਹਿਸ੍ਸਾਮਿ, ਦੇਵੀ ਪਬੁਜ੍ਝਿਸ੍ਸਤਿ, ਏਵਂ ਮੇ ਗਮਨਨ੍ਤਰਾਯੋ ਭਵਿਸ੍ਸਤਿ, ਬੁਦ੍ਧੋ ਹੁਤ੍ਵਾਵ ਆਗਨ੍ਤ੍ਵਾ ਪੁਤ੍ਤਂ ਪਸ੍ਸਿਸ੍ਸਾਮੀ’’ਤਿ ਪਾਸਾਦਤਲਤੋ ਓਤਰਿ. ਯਂ ਪਨ ਜਾਤਕਟ੍ਠਕਥਾਯਂ ‘‘ਤਦਾ ਸਤ੍ਤਾਹਜਾਤੋ ਰਾਹੁਲਕੁਮਾਰੋ ਹੋਤੀ’’ਤਿ ਵੁਤ੍ਤਂ, ਤਂ ਸੇਸਟ੍ਠਕਥਾਸੁ ਨਤ੍ਥਿ, ਤਸ੍ਮਾ ਇਦਮੇਵ ਗਹੇਤਬ੍ਬਂ.

ਏਵਂ ਬੋਧਿਸਤ੍ਤੋ ਪਾਸਾਦਤਲਾ ਓਤਰਿਤ੍ਵਾ ਅਸ੍ਸਸਮੀਪਂ ਗਨ੍ਤ੍ਵਾ ਏਵਮਾਹ – ‘‘ਤਾਤ ਕਣ੍ਡਕ, ਤ੍ਵਂ ਅਜ੍ਜ ਏਕਰਤ੍ਤਿਂ ਮਂ ਤਾਰਯ, ਅਹਂ ਤਂ ਨਿਸ੍ਸਾਯ ਬੁਦ੍ਧੋ ਹੁਤ੍ਵਾ ਸਦੇਵਕਂ ਲੋਕਂ ਤਾਰੇਸ੍ਸਾਮੀ’’ਤਿ. ਤਤੋ ਉਲ੍ਲਙ੍ਘਿਤ੍ਵਾ ਕਣ੍ਡਕਸ੍ਸ ਪਿਟ੍ਠਿਂ ਅਭਿਰੁਹਿ. ਕਣ੍ਡਕੋ ਗੀਵਤੋ ਪਟ੍ਠਾਯ ਆਯਾਮੇਨ ਅਟ੍ਠਾਰਸਹਤ੍ਥੋ ਹੋਤਿ ਤਦਨੁਚ੍ਛਵਿਕੇਨ ਉਬ੍ਬੇਧੇਨ ਸਮਨ੍ਨਾਗਤੋ ਥਾਮਜਵਸਮ੍ਪਨ੍ਨੋ ਸਬ੍ਬਸੇਤੋ ਧੋਤਸਙ੍ਖਸਦਿਸੋ. ਸੋ ਸਚੇ ਹਸੇਯ੍ਯ ਵਾ ਪਦਸਦ੍ਦਂ ਵਾ ਕਰੇਯ੍ਯ, ਸਦ੍ਦੋ ਸਕਲਨਗਰਂ ਅਵਤ੍ਥਰੇਯ੍ਯ. ਤਸ੍ਮਾ ਦੇਵਤਾ ਅਤ੍ਤਨੋ ਆਨੁਭਾਵੇਨ ਤਸ੍ਸ ਯਥਾ ਨ ਕੋਚਿ ਸੁਣਾਤਿ, ਏਵਂ ਹਸਿਤਸਦ੍ਦਂ ਸਨ੍ਨਿਰੁਮ੍ਭਿਤ੍ਵਾ ਅਕ੍ਕਮਨਅਕ੍ਕਮਨਪਦਵਾਰੇ ਹਤ੍ਥਤਲਾਨਿ ਉਪਨਾਮੇਸੁਂ. ਬੋਧਿਸਤ੍ਤੋ ਅਸ੍ਸਵਰਸ੍ਸ ਪਿਟ੍ਠਿਵੇਮਜ੍ਝਗਤੋ ਛਨ੍ਨਂ ਅਸ੍ਸਸ੍ਸ ਵਾਲਧਿਂ ਗਾਹਾਪੇਤ੍ਵਾ ਅਡ੍ਢਰਤ੍ਤਸਮਯੇ ਮਹਾਦ੍ਵਾਰਸਮੀਪਂ ਪਤ੍ਤੋ. ਤਦਾ ਪਨ ਰਾਜਾ ‘‘ਏਵਂ ਬੋਧਿਸਤ੍ਤੋ ਯਾਯ ਕਾਯਚਿ ਵੇਲਾਯ ਨਗਰਦ੍ਵਾਰਂ ਵਿਵਰਿਤ੍ਵਾ ਨਿਕ੍ਖਮਿਤੁਂ ਨ ਸਕ੍ਖਿਸ੍ਸਤੀ’’ਤਿ ਦ੍ਵੀਸੁ ਦ੍ਵਾਰਕਵਾਟੇਸੁ ਏਕੇਕਂ ਪੁਰਿਸਸਹਸ੍ਸੇਨ ਵਿਵਰਿਤਬ੍ਬਂ ਕਾਰਾਪੇਸਿ. ਬੋਧਿਸਤ੍ਤੋ ਥਾਮਬਲਸਮ੍ਪਨ੍ਨੋ, ਹਤ੍ਥਿਗਣਨਾਯ ਕੋਟਿਸਹਸ੍ਸਹਤ੍ਥੀਨਂ ਬਲਂ ਧਾਰੇਤਿ, ਪੁਰਿਸਗਣਨਾਯ ਦਸਕੋਟਿਸਹਸ੍ਸਪੁਰਿਸਾਨਂ. ਸੋ ਚਿਨ੍ਤੇਸਿ ‘‘ਸਚੇ ਦ੍ਵਾਰਂ ਨ ਵਿਵਰੀਯਤਿ, ਅਜ੍ਜ ਕਣ੍ਡਕਸ੍ਸ ਪਿਟ੍ਠੇ ਨਿਸਿਨ੍ਨੋਵ ਵਾਲਧਿਂ ਗਹੇਤ੍ਵਾ ਠਿਤੇਨ ਛਨ੍ਨੇਨ ਸਦ੍ਧਿਂਯੇਵ ਕਣ੍ਡਕਂ ਊਰੂਹਿ ਨਿਪ੍ਪੀਲ਼ੇਤ੍ਵਾ ਅਟ੍ਠਾਰਸਹਤ੍ਥੁਬ੍ਬੇਧਂ ਪਾਕਾਰਂ ਉਪ੍ਪਤਿਤ੍ਵਾ ਅਤਿਕ੍ਕਮਿਸ੍ਸਾਮੀ’’ਤਿ. ਛਨ੍ਨੋਪਿ ਚਿਨ੍ਤੇਸਿ ‘‘ਸਚੇ ਦ੍ਵਾਰਂ ਨ ਵਿਵਰੀਯਤਿ, ਅਹਂ ਅਯ੍ਯਪੁਤ੍ਤਂ ਖਨ੍ਧੇ ਨਿਸੀਦਾਪੇਤ੍ਵਾ ਕਣ੍ਡਕਂ ਦਕ੍ਖਿਣੇਨ ਹਤ੍ਥੇਨ ਕੁਚ੍ਛਿਯਂ ਪਰਿਕ੍ਖਿਪਨ੍ਤੋ ਉਪਕਚ੍ਛਨ੍ਤਰੇ ਕਤ੍ਵਾ ਪਾਕਾਰਂ ਉਪ੍ਪਤਿਤ੍ਵਾ ਅਤਿਕ੍ਕਮਿਸ੍ਸਾਮੀ’’ਤਿ. ਕਣ੍ਡਕੋਪਿ ਚਿਨ੍ਤੇਸਿ ‘‘ਸਚੇ ਦ੍ਵਾਰਂ ਨ ਵਿਵਰੀਯਤਿ, ਅਹਂ ਅਤ੍ਤਨੋ ਸਾਮਿਕਂ ਪਿਟ੍ਠਿਯਂ ਯਥਾਨਿਸਿਨ੍ਨਮੇਵ ਛਨ੍ਨੇਨ ਵਾਲਧਿਂ ਗਹੇਤ੍ਵਾ ਠਿਤੇਨ ਸਦ੍ਧਿਂਯੇਵ ਉਕ੍ਖਿਪਿਤ੍ਵਾ ਪਾਕਾਰਂ ਉਪ੍ਪਤਿਤ੍ਵਾ ਅਤਿਕ੍ਕਮਿਸ੍ਸਾਮੀ’’ਤਿ. ਸਚੇ ਦ੍ਵਾਰਂ ਨ ਅਵਾਪੁਰੀਯਿਤ੍ਥ, ਯਥਾਚਿਨ੍ਤਿਤਮੇਵ ਤੇਸੁ ਤੀਸੁ ਜਨੇਸੁ ਅਞ੍ਞਤਰੋ ਸਮ੍ਪਾਦੇਯ੍ਯ. ਦ੍ਵਾਰੇ ਅਧਿਵਤ੍ਥਾ ਦੇਵਤਾ ਪਨ ਦ੍ਵਾਰਂ ਵਿਵਰਿ.

ਤਸ੍ਮਿਂਯੇਵ ਖਣੇ ਮਾਰੋ ‘‘ਬੋਧਿਸਤ੍ਤਂ ਨਿਵਤ੍ਤੇਸ੍ਸਾਮੀ’’ਤਿ ਆਗਨ੍ਤ੍ਵਾ ਆਕਾਸੇ ਠਿਤੋ ਆਹ – ‘‘ਮਾਰਿਸ, ਮਾ ਨਿਕ੍ਖਮ, ਇਤੋ ਤੇ ਸਤ੍ਤਮੇ ਦਿਵਸੇ ਚਕ੍ਕਰਤਨਂ ਪਾਤੁਭਵਿਸ੍ਸਤਿ, ਦ੍ਵਿਸਹਸ੍ਸਪਰਿਤ੍ਤਦੀਪਪਰਿਵਾਰਾਨਂ ਚਤੁਨ੍ਨਂ ਮਹਾਦੀਪਾਨਂ ਰਜ੍ਜਂ ਕਾਰੇਸ੍ਸਸਿ, ਨਿਵਤ੍ਤ ਮਾਰਿਸਾ’’ਤਿ. ‘‘ਕੋਸਿ ਤ੍ਵ’’ਨ੍ਤਿ? ‘‘ਅਹਂ ਵਸਵਤ੍ਤੀ’’ਤਿ. ‘‘ਮਾਰ, ਜਾਨਾਮਹਂ ਮਯ੍ਹਂ ਚਕ੍ਕਰਤਨਸ੍ਸ ਪਾਤੁਭਾਵਂ, ਅਨਤ੍ਥਿਕੋਹਂ ਰਜ੍ਜੇਨ, ਦਸਸਹਸ੍ਸਿਲੋਕਧਾਤੁਂ ਉਨ੍ਨਾਦੇਤ੍ਵਾ ਬੁਦ੍ਧੋ ਭਵਿਸ੍ਸਾਮੀ’’ਤਿ ਆਹ. ਮਾਰੋ ‘‘ਇਤੋ ਦਾਨਿ ਤੇ ਪਟ੍ਠਾਯ ਕਾਮਵਿਤਕ੍ਕਂ ਵਾ ਬ੍ਯਾਪਾਦਵਿਤਕ੍ਕਂ ਵਾ ਵਿਹਿਂਸਾਵਿਤਕ੍ਕਂ ਵਾ ਚਿਨ੍ਤਿਤਕਾਲੇ ਜਾਨਿਸ੍ਸਾਮੀ’’ਤਿ ਓਤਾਰਾਪੇਕ੍ਖੋ ਛਾਯਾ ਵਿਯ ਅਨਪਗਚ੍ਛਨ੍ਤੋ ਅਨੁਬਨ੍ਧਿ.

ਬੋਧਿਸਤ੍ਤੋਪਿ ਹਤ੍ਥਗਤਂ ਚਕ੍ਕਵਤ੍ਤਿਰਜ੍ਜਂ ਖੇਲ਼ਪਿਣ੍ਡਂ ਵਿਯ ਅਨਪੇਕ੍ਖੋ ਛਡ੍ਡੇਤ੍ਵਾ ਮਹਨ੍ਤੇਨ ਸਕ੍ਕਾਰੇਨ ਨਗਰਾ ਨਿਕ੍ਖਮਿ ਆਸਾਲ਼੍ਹਿਪੁਣ੍ਣਮਾਯ ਉਤ੍ਤਰਾਸਾਲ਼੍ਹਨਕ੍ਖਤ੍ਤੇ ਵਤ੍ਤਮਾਨੇ. ਨਿਕ੍ਖਮਿਤ੍ਵਾ ਚ ਪੁਨ ਨਗਰਂ ਓਲੋਕੇਤੁਕਾਮੋ ਜਾਤੋ. ਏਵਞ੍ਚ ਪਨਸ੍ਸ ਚਿਤ੍ਤੇ ਉਪ੍ਪਨ੍ਨਮਤ੍ਤੇਯੇਵ ‘‘ਮਹਾਪੁਰਿਸ, ਨ ਤਯਾ ਨਿਵਤ੍ਤਿਤ੍ਵਾ ਓਲੋਕਨਕਮ੍ਮਂ ਕਤ’’ਨ੍ਤਿ ਵਦਮਾਨਾ ਵਿਯ ਮਹਾਪਥਵੀ ਕੁਲਾਲਚਕ੍ਕਂ ਵਿਯ ਭਿਜ੍ਜਿਤ੍ਵਾ ਪਰਿਵਤ੍ਤਿ. ਬੋਧਿਸਤ੍ਤੋ ਨਗਰਾਭਿਮੁਖੋ ਠਤ੍ਵਾ ਨਗਰਂ ਓਲੋਕੇਤ੍ਵਾ ਤਸ੍ਮਿਂ ਪਥਵਿਪ੍ਪਦੇਸੇ ਕਣ੍ਡਕਨਿਵਤ੍ਤਨਚੇਤਿਯਟ੍ਠਾਨਂ ਦਸ੍ਸੇਤ੍ਵਾ ਗਨ੍ਤਬ੍ਬਮਗ੍ਗਾਭਿਮੁਖਂ ਕਣ੍ਡਕਂ ਕਤ੍ਵਾ ਪਾਯਾਸਿ ਮਹਨ੍ਤੇਨ ਸਕ੍ਕਾਰੇਨ ਉਲ਼ਾਰੇਨ ਸਿਰਿਸੋਭਗ੍ਗੇਨ. ਤਦਾ ਕਿਰਸ੍ਸ ਦੇਵਤਾ ਪੁਰਤੋ ਸਟ੍ਠਿ ਉਕ੍ਕਾਸਹਸ੍ਸਾਨਿ ਧਾਰਯਿਂਸੁ, ਪਚ੍ਛਤੋ ਸਟ੍ਠਿ, ਦਕ੍ਖਿਣਪਸ੍ਸਤੋ ਸਟ੍ਠਿ, ਵਾਮਪਸ੍ਸਤੋ ਸਟ੍ਠਿ, ਅਪਰਾ ਦੇਵਤਾ ਚਕ੍ਕਵਾਲ਼ਮੁਖਵਟ੍ਟਿਯਂ ਅਪਰਿਮਾਣਾ ਉਕ੍ਕਾ ਧਾਰਯਿਂਸੁ, ਅਪਰਾ ਦੇਵਤਾ ਚ ਨਾਗਸੁਪਣ੍ਣਾਦਯੋ ਚ ਦਿਬ੍ਬੇਹਿ ਗਨ੍ਧੇਹਿ ਮਾਲਾਹਿ ਚੁਣ੍ਣੇਹਿ ਧੂਮੇਹਿ ਪੂਜਯਮਾਨਾ ਗਚ੍ਛਨ੍ਤਿ. ਪਾਰਿਚ੍ਛਤ੍ਤਕਪੁਪ੍ਫੇਹਿ ਚੇਵ ਮਨ੍ਦਾਰਵਪੁਪ੍ਫੇਹਿ ਚ ਘਨਮੇਘਵੁਟ੍ਠਿਕਾਲੇ ਧਾਰਾਹਿ ਵਿਯ ਨਭਂ ਨਿਰਨ੍ਤਰਂ ਅਹੋਸਿ, ਦਿਬ੍ਬਾਨਿ ਸਂਗੀਤਾਨਿ ਪਵਤ੍ਤਿਂਸੁ, ਸਮਨ੍ਤਤੋ ਅਟ੍ਠਸਟ੍ਠਿ ਤੂਰਿਯਸਤਸਹਸ੍ਸਾਨਿ ਪਵਜ੍ਜਿਂਸੁ, ਸਮੁਦ੍ਦਕੁਚ੍ਛਿਯਂ ਮੇਘਤ੍ਥਨਿਤਕਾਲੋ ਵਿਯ ਯੁਗਨ੍ਧਰਕੁਚ੍ਛਿਯਂ ਸਾਗਰਨਿਗ੍ਘੋਸਕਾਲੋ ਵਿਯ ਵਤ੍ਤਤਿ.

ਇਮਿਨਾ ਸਿਰਿਸੋਭਗ੍ਗੇਨ ਗਚ੍ਛਨ੍ਤੋ ਬੋਧਿਸਤ੍ਤੋ ਏਕਰਤ੍ਤੇਨੇਵ ਤੀਣਿ ਰਜ੍ਜਾਨਿ ਅਤਿਕ੍ਕਮ੍ਮ ਤਿਂਸਯੋਜਨਮਤ੍ਥਕੇ ਅਨੋਮਾਨਦੀਤੀਰਂ ਪਾਪੁਣਿ. ‘‘ਕਿਂ ਪਨ ਅਸ੍ਸੋ ਤਤੋ ਪਰਂ ਗਨ੍ਤੁਂ ਨ ਸਕ੍ਕੋਤੀ’’ਤਿ? ‘‘ਨੋ, ਨ ਸਕ੍ਕੋ’’ਤਿ. ਸੋ ਹਿ ਏਕਂ ਚਕ੍ਕਵਾਲ਼ਗਬ੍ਭਂ ਨਾਭਿਯਾ ਠਿਤਚਕ੍ਕਸ੍ਸ ਨੇਮਿਵਟ੍ਟਿਂ ਮਦ੍ਦਨ੍ਤੋ ਵਿਯ ਅਨ੍ਤਨ੍ਤੇਨ ਚਰਿਤ੍ਵਾ ਪੁਰੇਪਾਤਰਾਸਮੇਵ ਆਗਨ੍ਤ੍ਵਾ ਅਤ੍ਤਨੋ ਸਮ੍ਪਾਦਿਤਂ ਭਤ੍ਤਂ ਭੁਞ੍ਜਿਤੁਂ ਸਮਤ੍ਥੋ. ਤਦਾ ਪਨ ਦੇਵਨਾਗਸੁਪਣ੍ਣਾਦੀਹਿ ਆਕਾਸੇ ਠਤ੍ਵਾ ਓਸ੍ਸਟ੍ਠੇਹਿ ਗਨ੍ਧਮਾਲਾਦੀਹਿ ਯਾਵ ਊਰੁਪ੍ਪਦੇਸਾ ਸਞ੍ਛਨ੍ਨਂ ਸਰੀਰਂ ਆਕਡ੍ਢਿਤ੍ਵਾ ਗਨ੍ਧਮਾਲਾਜਟਂ ਛਿਨ੍ਦਨ੍ਤਸ੍ਸ ਅਤਿਪ੍ਪਪਞ੍ਚੋ ਅਹੋਸਿ, ਤਸ੍ਮਾ ਤਿਂਸਯੋਜਨਮਤ੍ਤਮੇਵ ਅਗਮਾਸਿ. ਅਥ ਬੋਧਿਸਤ੍ਤੋ ਨਦੀਤੀਰੇ ਠਤ੍ਵਾ ਛਨ੍ਨਂ ਪੁਚ੍ਛਿ – ‘‘ਕਿਨ੍ਨਾਮਾ ਅਯਂ ਨਦੀ’’ਤਿ? ‘‘ਅਨੋਮਾ ਨਾਮ, ਦੇਵਾ’’ਤਿ. ‘‘ਅਮ੍ਹਾਕਮ੍ਪਿ ਪਬ੍ਬਜ੍ਜਾ ਅਨੋਮਾ ਭਵਿਸ੍ਸਤੀ’’ਤਿ ਪਣ੍ਹਿਯਾ ਘਟ੍ਟੇਨ੍ਤੋ ਅਸ੍ਸਸ੍ਸ ਸਞ੍ਞਂ ਅਦਾਸਿ. ਅਸ੍ਸੋ ਉਪ੍ਪਤਿਤ੍ਵਾ ਅਟ੍ਠੂਸਭਵਿਤ੍ਥਾਰਾਯ ਨਦਿਯਾ ਪਾਰਿਮਤੀਰੇ ਅਟ੍ਠਾਸਿ.

ਬੋਧਿਸਤ੍ਤੋ ਅਸ੍ਸਪਿਟ੍ਠਿਤੋ ਓਰੁਯ੍ਹ ਰਜਤਪਟ੍ਟਸਦਿਸੇ ਵਾਲੁਕਾਪੁਲਿਨੇ ਠਤ੍ਵਾ ਛਨ੍ਨਂ ਆਮਨ੍ਤੇਸਿ – ‘‘ਸਮ੍ਮ, ਛਨ੍ਨ, ਤ੍ਵਂ ਮਯ੍ਹਂ ਆਭਰਣਾਨਿ ਚੇਵ ਕਣ੍ਡਕਞ੍ਚ ਆਦਾਯ ਗਚ੍ਛ, ਅਹਂ ਪਬ੍ਬਜਿਸ੍ਸਾਮੀ’’ਤਿ. ‘‘ਅਹਮ੍ਪਿ, ਦੇਵ, ਪਬ੍ਬਜਿਸ੍ਸਾਮੀ’’ਤਿ. ਬੋਧਿਸਤ੍ਤੋ ‘‘ਨ ਲਬ੍ਭਾ ਤਯਾ ਪਬ੍ਬਜਿਤੁਂ, ਗਚ੍ਛ ਤ੍ਵ’’ਨ੍ਤਿ ਤਿਕ੍ਖਤ੍ਤੁਂ ਪਟਿਬਾਹਿਤ੍ਵਾ ਆਭਰਣਾਨਿ ਚੇਵ ਕਣ੍ਡਕਞ੍ਚ ਪਟਿਚ੍ਛਾਪੇਤ੍ਵਾ ਚਿਨ੍ਤੇਸਿ ‘‘ਇਮੇ ਮਯ੍ਹਂ ਕੇਸਾ ਸਮਣਸਾਰੁਪ੍ਪਾ ਨ ਹੋਨ੍ਤੀ’’ਤਿ. ਅਞ੍ਞੋ ਬੋਧਿਸਤ੍ਤਸ੍ਸ ਕੇਸੇ ਛਿਨ੍ਦਿਤੁਂ ਯੁਤ੍ਤਰੂਪੋ ਨਤ੍ਥਿ, ਤਤੋ ‘‘ਸਯਮੇਵ ਖਗ੍ਗੇਨ ਛਿਨ੍ਦਿਸ੍ਸਾਮੀ’’ਤਿ ਦਕ੍ਖਿਣੇਨ ਹਤ੍ਥੇਨ ਅਸਿਂ ਗਣ੍ਹਿਤ੍ਵਾ ਵਾਮਹਤ੍ਥੇਨ ਮੋਲ਼ਿਯਾ ਸਦ੍ਧਿਂ ਚੂਲ਼ਂ ਗਹੇਤ੍ਵਾ ਛਿਨ੍ਦਿ, ਕੇਸਾ ਦ੍ਵਙ੍ਗੁਲਮਤ੍ਤਾ ਹੁਤ੍ਵਾ ਦਕ੍ਖਿਣਤੋ ਆਵਤ੍ਤਮਾਨਾ ਸੀਸਂ ਅਲ੍ਲੀਯਿਂਸੁ. ਤੇਸਂ ਯਾਵਜੀਵਂ ਤਦੇਵ ਪਮਾਣਂ ਅਹੋਸਿ, ਮਸ੍ਸੁ ਚ ਤਦਨੁਰੂਪਂ, ਪੁਨ ਕੇਸਮਸ੍ਸੁਓਹਾਰਣਕਿਚ੍ਚਂ ਨਾਮ ਨਾਹੋਸਿ. ਬੋਧਿਸਤ੍ਤੋ ਸਹ ਮੋਲ਼ਿਯਾ ਚੁਲ਼ਂ ਗਹੇਤ੍ਵਾ ‘‘ਸਚਾਹਂ ਬੁਦ੍ਧੋ ਭਵਿਸ੍ਸਾਮਿ, ਆਕਾਸੇ ਤਿਟ੍ਠਤੁ, ਨੋ ਚੇ, ਭੂਮਿਯਂ ਪਤਤੂ’’ਤਿ ਅਨ੍ਤਲਿਕ੍ਖੇ ਖਿਪਿ. ਤਂ ਚੂਲ਼ਾਮਣਿਵੇਠਨਂ ਯੋਜਨਪ੍ਪਮਾਣਂ ਠਾਨਂ ਗਨ੍ਤ੍ਵਾ ਆਕਾਸੇ ਅਟ੍ਠਾਸਿ. ਸਕ੍ਕੋ ਦੇਵਰਾਜਾ ਦਿਬ੍ਬਚਕ੍ਖੁਨਾ ਓਲੋਕੇਤ੍ਵਾ ਯੋਜਨਿਯਰਤਨਚਙ੍ਕੋਟਕੇਨ ਸਮ੍ਪਟਿਚ੍ਛਿਤ੍ਵਾ ਤਾਵਤਿਂਸਭਵਨੇ ਚੂਲ਼ਾਮਣਿਚੇਤਿਯਂ ਨਾਮ ਪਤਿਟ੍ਠਾਪੇਸਿ.

‘‘ਛੇਤ੍ਵਾਨ ਮੋਲ਼ਿਂ ਵਰਗਨ੍ਧਵਾਸਿਤਂ, ਵੇਹਾਯਸਂ ਉਕ੍ਖਿਪਿ ਅਗ੍ਗਪੁਗ੍ਗਲੋ;

ਸਹਸ੍ਸਨੇਤ੍ਤੋ ਸਿਰਸਾ ਪਟਿਗ੍ਗਹਿ, ਸੁਵਣ੍ਣਚਙ੍ਕੋਟਵਰੇਨ ਵਾਸਵੋ’’ਤਿ.

ਪੁਨ ਬੋਧਿਸਤ੍ਤੋ ਚਿਨ੍ਤੇਸਿ ‘‘ਇਮਾਨਿ ਕਾਸਿਕਵਤ੍ਥਾਨਿ ਮਯ੍ਹਂ ਨ ਸਮਣਸਾਰੁਪ੍ਪਾਨੀ’’ਤਿ. ਅਥਸ੍ਸ ਕਸ੍ਸਪਬੁਦ੍ਧਕਾਲੇ ਪੁਰਾਣਸਹਾਯਕੋ ਘਟੀਕਾਰਮਹਾਬ੍ਰਹ੍ਮਾ ਏਕਂ ਬੁਦ੍ਧਨ੍ਤਰਂ ਜਰਂ ਅਪਤ੍ਤੇਨ ਮਿਤ੍ਤਭਾਵੇਨ ਚਿਨ੍ਤੇਸਿ – ‘‘ਅਜ੍ਜ ਮੇ ਸਹਾਯਕੋ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤੋ, ਸਮਣਪਰਿਕ੍ਖਾਰਮਸ੍ਸ ਗਹੇਤ੍ਵਾ ਗਚ੍ਛਿਸ੍ਸਾਮੀ’’ਤਿ.

‘‘ਤਿਚੀਵਰਞ੍ਚ ਪਤ੍ਤੋ ਚ, ਵਾਸੀ ਸੂਚਿ ਚ ਬਨ੍ਧਨਂ;

ਪਰਿਸ੍ਸਾਵਨੇਨ ਅਟ੍ਠੇਤੇ, ਯੁਤ੍ਤਯੋਗਸ੍ਸ ਭਿਕ੍ਖੁਨੋ’’ਤਿ. –

ਇਮੇ ਅਟ੍ਠ ਸਮਣਪਰਿਕ੍ਖਾਰੇ ਆਹਰਿਤ੍ਵਾ ਅਦਾਸਿ. ਬੋਧਿਸਤ੍ਤੋ ਅਰਹਦ੍ਧਜਂ ਨਿਵਾਸੇਤ੍ਵਾ ਉਤ੍ਤਮਪਬ੍ਬਜ੍ਜਾਵੇਸਂ ਗਣ੍ਹਿਤ੍ਵਾ ‘‘ਛਨ੍ਨ, ਮਮ ਵਚਨੇਨ ਮਾਤਾਪਿਤੂਨਂ ਆਰੋਗ੍ਯਂ ਵਦੇਹੀ’’ਤਿ ਵਤ੍ਵਾ ਉਯ੍ਯੋਜੇਸਿ. ਛਨ੍ਨੋ ਬੋਧਿਸਤ੍ਤਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਕਣ੍ਡਕੋ ਪਨ ਛਨ੍ਨੇਨ ਸਦ੍ਧਿਂ ਮਨ੍ਤਯਮਾਨਸ੍ਸ ਬੋਧਿਸਤ੍ਤਸ੍ਸ ਵਚਨਂ ਸੁਣਨ੍ਤੋ ਠਤ੍ਵਾ ‘‘ਨਤ੍ਥਿ ਦਾਨਿ ਮਯ੍ਹਂ ਪੁਨ ਸਾਮਿਨੋ ਦਸ੍ਸਨ’’ਨ੍ਤਿ ਚਕ੍ਖੁਪਥਂ ਵਿਜਹਨ੍ਤੋ ਸੋਕਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਹਦਯੇਨ ਫਲਿਤੇਨ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਕਣ੍ਡਕੋ ਨਾਮ ਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਛਨ੍ਨਸ੍ਸ ਪਠਮਂ ਏਕੋਵ ਸੋਕੋ ਅਹੋਸਿ, ਕਣ੍ਡਕਸ੍ਸ ਪਨ ਕਾਲਕਿਰਿਯਾਯ ਦੁਤਿਯੇਨ ਸੋਕੇਨ ਪੀਲ਼ਿਤੋ ਰੋਦਨ੍ਤੋ ਪਰਿਦੇਵਨ੍ਤੋ ਨਗਰਂ ਅਗਮਾਸਿ.

ਬੋਧਿਸਤ੍ਤੋਪਿ ਪਬ੍ਬਜਿਤ੍ਵਾ ਤਸ੍ਮਿਂਯੇਵ ਪਦੇਸੇ ਅਨੁਪਿਯਂ ਨਾਮ ਅਮ੍ਬਵਨਂ ਅਤ੍ਥਿ, ਤਤ੍ਥ ਸਤ੍ਤਾਹਂ ਪਬ੍ਬਜ੍ਜਾਸੁਖੇਨ ਵੀਤਿਨਾਮੇਤ੍ਵਾ ਏਕਦਿਵਸੇਨੇਵ ਤਿਂਸਯੋਜਨਮਗ੍ਗਂ ਪਦਸਾ ਗਨ੍ਤ੍ਵਾ ਰਾਜਗਹਂ ਪਾਵਿਸਿ. ਪਵਿਸਿਤ੍ਵਾ ਸਪਦਾਨਂ ਪਿਣ੍ਡਾਯ ਚਰਿ. ਸਕਲਨਗਰਂ ਬੋਧਿਸਤ੍ਤਸ੍ਸ ਰੂਪਦਸ੍ਸਨੇਨ ਧਨਪਾਲਕੇਨ ਪਵਿਟ੍ਠਰਾਜਗਹਂ ਵਿਯ ਅਸੁਰਿਨ੍ਦੇਨ ਪਵਿਟ੍ਠਦੇਵਨਗਰਂ ਵਿਯ ਚ ਸਙ੍ਖੋਭਂ ਅਗਮਾਸਿ. ਰਾਜਪੁਰਿਸਾ ਗਨ੍ਤ੍ਵਾ ‘‘ਦੇਵ, ਏਵਰੂਪੋ ਨਾਮ ਸਤ੍ਤੋ ਨਗਰੇ ਪਿਣ੍ਡਾਯ ਚਰਤਿ, ‘ਦੇਵੋ ਵਾ ਮਨੁਸ੍ਸੋ ਵਾ ਨਾਗੋ ਵਾ ਸੁਪਣ੍ਣੋ ਵਾ ਕੋ ਨਾਮੇਸੋ’ਤਿ ਨ ਜਾਨਾਮਾ’’ਤਿ ਆਰੋਚੇਸੁਂ. ਰਾਜਾ ਪਾਸਾਦਤਲੇ ਠਤ੍ਵਾ ਮਹਾਪੁਰਿਸਂ ਦਿਸ੍ਵਾ ਅਚ੍ਛਰਿਯਬ੍ਭੁਤਜਾਤੋ ਪੁਰਿਸੇ ਆਣਾਪੇਸਿ – ‘‘ਗਚ੍ਛਥ ਭਣੇ, ਵੀਮਂਸਥ, ਸਚੇ ਅਮਨੁਸ੍ਸੋ ਭਵਿਸ੍ਸਤਿ, ਨਗਰਾ ਨਿਕ੍ਖਮਿਤ੍ਵਾ ਅਨ੍ਤਰਧਾਯਿਸ੍ਸਤਿ, ਸਚੇ ਦੇਵਤਾ ਭਵਿਸ੍ਸਤਿ, ਆਕਾਸੇਨ ਗਚ੍ਛਿਸ੍ਸਤਿ, ਸਚੇ ਨਾਗੋ ਭਵਿਸ੍ਸਤਿ, ਪਥਵਿਯਂ ਨਿਮੁਜ੍ਜਿਤ੍ਵਾ ਗਮਿਸ੍ਸਤਿ, ਸਚੇ ਮਨੁਸ੍ਸੋ ਭਵਿਸ੍ਸਤਿ, ਯਥਾਲਦ੍ਧਂ ਭਿਕ੍ਖਂ ਪਰਿਭੁਞ੍ਜਿਸ੍ਸਤੀ’’ਤਿ.

ਮਹਾਪੁਰਿਸੋਪਿ ਖੋ ਮਿਸ੍ਸਕਭਤ੍ਤਂ ਸਂਹਰਿਤ੍ਵਾ ‘‘ਅਲਂ ਮੇ ਏਤ੍ਤਕਂ ਯਾਪਨਾਯਾ’’ਤਿ ਞਤ੍ਵਾ ਪਵਿਟ੍ਠਦ੍ਵਾਰੇਨੇਵ ਨਗਰਾ ਨਿਕ੍ਖਮਿਤ੍ਵਾ ਪਣ੍ਡਵਪਬ੍ਬਤਚ੍ਛਾਯਾਯ ਪੁਰਤ੍ਥਾਭਿਮੁਖੋ ਨਿਸੀਦਿਤ੍ਵਾ ਆਹਾਰਂ ਪਰਿਭੁਞ੍ਜਿਤੁਂ ਆਰਦ੍ਧੋ. ਅਥਸ੍ਸ ਅਨ੍ਤਾਨਿ ਪਰਿਵਤ੍ਤਿਤ੍ਵਾ ਮੁਖੇਨ ਨਿਕ੍ਖਮਨਾਕਾਰਪ੍ਪਤ੍ਤਾਨਿ ਵਿਯ ਅਹੇਸੁਂ. ਤਤੋ ਤੇਨ ਅਤ੍ਤਭਾਵੇਨ ਏਵਰੂਪਸ੍ਸ ਆਹਾਰਸ੍ਸ ਚਕ੍ਖੁਨਾਪਿ ਅਦਿਟ੍ਠਪੁਬ੍ਬਤਾਯ ਤੇਨ ਪਟਿਕੂਲਾਹਾਰੇਨ ਅਟ੍ਟਿਯਮਾਨੋ ਏਵਂ ਅਤ੍ਤਨਾਵ ਅਤ੍ਤਾਨਂ ਓਵਦਿ ‘‘ਸਿਦ੍ਧਤ੍ਥ, ਤ੍ਵਂ ਸੁਲਭਨ੍ਨਪਾਨੇ ਕੁਲੇ ਤਿਵਸ੍ਸਿਕਗਨ੍ਧਸਾਲਿਭੋਜਨਂ ਨਾਨਗ੍ਗਰਸੇਹਿ ਭੁਞ੍ਜਨਟ੍ਠਾਨੇ ਨਿਬ੍ਬਤ੍ਤਿਤ੍ਵਾਪਿ ਏਕਂ ਪਂਸੁਕੂਲਿਕਂ ਦਿਸ੍ਵਾ ‘ਕਦਾ ਨੁ ਖੋ ਅਹਮ੍ਪਿ ਏਵਰੂਪੋ ਹੁਤ੍ਵਾ ਪਿਣ੍ਡਾਯ ਚਰਿਤ੍ਵਾ ਭੁਞ੍ਜਿਸ੍ਸਾਮਿ, ਭਵਿਸ੍ਸਤਿ ਨੁ ਖੋ ਮੇ ਸੋ ਕਾਲੋ’ਤਿ ਚਿਨ੍ਤੇਤ੍ਵਾ ਨਿਕ੍ਖਨ੍ਤੋ, ਇਦਾਨਿ ਕਿਂ ਨਾਮੇਤਂ ਕਰੋਸੀ’’ਤਿ. ਏਵਂ ਅਤ੍ਤਨਾਵ ਅਤ੍ਤਾਨਂ ਓਵਦਿਤ੍ਵਾ ਨਿਬ੍ਬਿਕਾਰੋ ਹੁਤ੍ਵਾ ਆਹਾਰਂ ਪਰਿਭੁਞ੍ਜਿ.

ਰਾਜਪੁਰਿਸਾ ਤਂ ਪਵਤ੍ਤਿਂ ਦਿਸ੍ਵਾ ਗਨ੍ਤ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾ ਦੂਤਵਚਨਂ ਸੁਤ੍ਵਾ ਵੇਗੇਨ ਨਗਰਾ ਨਿਕ੍ਖਮਿਤ੍ਵਾ ਬੋਧਿਸਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਇਰਿਯਾਪਥਸ੍ਮਿਂਯੇਵ ਪਸੀਦਿਤ੍ਵਾ ਬੋਧਿਸਤ੍ਤਸ੍ਸ ਸਬ੍ਬਂ ਇਸ੍ਸਰਿਯਂ ਨਿਯ੍ਯਾਦੇਸਿ. ਬੋਧਿਸਤ੍ਤੋ ‘‘ਮਯ੍ਹਂ, ਮਹਾਰਾਜ, ਵਤ੍ਥੁਕਾਮੇਹਿ ਵਾ ਕਿਲੇਸਕਾਮੇਹਿ ਵਾ ਅਤ੍ਥੋ ਨਤ੍ਥਿ, ਅਹਂ ਪਰਮਾਭਿਸਮ੍ਬੋਧਿਂ ਪਤ੍ਥਯਨ੍ਤੋ ਨਿਕ੍ਖਨ੍ਤੋ’’ਤਿ ਆਹ. ਰਾਜਾ ਅਨੇਕਪ੍ਪਕਾਰਂ ਯਾਚਨ੍ਤੋਪਿ ਤਸ੍ਸ ਚਿਤ੍ਤਂ ਅਲਭਿਤ੍ਵਾ ‘‘ਅਦ੍ਧਾ ਤ੍ਵਂ ਬੁਦ੍ਧੋ ਭਵਿਸ੍ਸਸਿ, ਬੁਦ੍ਧਭੂਤੇਨ ਪਨ ਤੇ ਪਠਮਂ ਮਮ ਵਿਜਿਤਂ ਆਗਨ੍ਤਬ੍ਬ’’ਨ੍ਤਿ ਪਟਿਞ੍ਞਂ ਗਣ੍ਹਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ‘‘ਪਬ੍ਬਜ੍ਜਂ ਕਿਤ੍ਤਯਿਸ੍ਸਾਮਿ, ਯਥਾ ਪਬ੍ਬਜਿ ਚਕ੍ਖੁਮਾ’’ਤਿ ਇਮਂ ਪਬ੍ਬਜ੍ਜਾਸੁਤ੍ਤਂ (ਸੁ. ਨਿ. ੪੦੭ ਆਦਯੋ) ਸਦ੍ਧਿਂ ਅਟ੍ਠਕਥਾਯ ਓਲੋਕੇਤ੍ਵਾ ਵੇਦਿਤਬ੍ਬੋ.

ਬੋਧਿਸਤ੍ਤੋਪਿ ਰਞ੍ਞੋ ਪਟਿਞ੍ਞਂ ਦਤ੍ਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਆਲ਼ਾਰਞ੍ਚ ਕਾਲਾਮਂ ਉਦਕਞ੍ਚ ਰਾਮਪੁਤ੍ਤਂ ਉਪਸਙ੍ਕਮਿਤ੍ਵਾ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ‘‘ਨਾਯਂ ਮਗ੍ਗੋ ਬੋਧਾਯਾ’’ਤਿ ਤਮ੍ਪਿ ਸਮਾਪਤ੍ਤਿਭਾਵਨਂ ਅਨਲਙ੍ਕਰਿਤ੍ਵਾ ਸਦੇਵਕਸ੍ਸ ਲੋਕਸ੍ਸ ਅਤ੍ਤਨੋ ਥਾਮਵੀਰਿਯਸਨ੍ਦਸ੍ਸਨਤ੍ਥਂ ਮਹਾਪਧਾਨਂ ਪਦਹਿਤੁਕਾਮੋ ਉਰੁਵੇਲਂ ਗਨ੍ਤ੍ਵਾ ‘‘ਰਮਣੀਯੋ ਵਤਾਯਂ ਭੂਮਿਭਾਗੋ’’ਤਿ ਤਤ੍ਥੇਵ ਵਾਸਂ ਉਪਗਨ੍ਤ੍ਵਾ ਮਹਾਪਧਾਨਂ ਪਦਹਿ. ਤੇਪਿ ਖੋ ਕੋਣ੍ਡਞ੍ਞਪ੍ਪਮੁਖਾ ਪਞ੍ਚ ਪਬ੍ਬਜਿਤਾ ਗਾਮਨਿਗਮਰਾਜਧਾਨੀਸੁ ਭਿਕ੍ਖਾਯ ਚਰਨ੍ਤਾ ਤਤ੍ਥ ਬੋਧਿਸਤ੍ਤਂ ਸਮ੍ਪਾਪੁਣਿਂਸੁ. ਅਥ ਨਂ ਛਬ੍ਬਸ੍ਸਾਨਿ ਮਹਾਪਧਾਨਂ ਪਦਹਨ੍ਤਂ ‘‘ਇਦਾਨਿ ਬੁਦ੍ਧੋ ਭਵਿਸ੍ਸਤਿ, ਇਦਾਨਿ ਬੁਦ੍ਧੋ ਭਵਿਸ੍ਸਤੀ’’ਤਿ ਪਰਿਵੇਣਸਮ੍ਮਜ੍ਜਨਾਦਿਕਾਯ ਵਤ੍ਤਪਟਿਪਤ੍ਤਿਯਾ ਉਪਟ੍ਠਹਮਾਨਾ ਸਨ੍ਤਿਕਾਵਚਰਾਵਸ੍ਸ ਅਹੇਸੁਂ. ਬੋਧਿਸਤ੍ਤੋਪਿ ਖੋ ‘‘ਕੋਟਿਪ੍ਪਤ੍ਤਂ ਦੁਕ੍ਕਰਕਾਰਿਯਂ ਕਰਿਸ੍ਸਾਮੀ’’ਤਿ ਏਕਤਿਲਤਣ੍ਡੁਲਾਦੀਹਿਪਿ ਵੀਤਿਨਾਮੇਸਿ, ਸਬ੍ਬਸੋਪਿ ਆਹਾਰੂਪਚ੍ਛੇਦਂ ਅਕਾਸਿ, ਦੇਵਤਾਪਿ ਲੋਮਕੂਪੇਹਿ ਓਜਂ ਉਪਸਂਹਰਮਾਨਾ ਪਟਿਕ੍ਖਿਪਿ.

ਅਥਸ੍ਸ ਤਾਯ ਨਿਰਾਹਾਰਤਾਯ ਪਰਮਕਸਿਮਾਨਪ੍ਪਤ੍ਤਕਾਯਸ੍ਸ ਸੁਵਣ੍ਣਵਣ੍ਣੋ ਕਾਯੋ ਕਾਲ਼ਵਣ੍ਣੋ ਅਹੋਸਿ. ਬਾਤ੍ਤਿਂਸਮਹਾਪੁਰਿਸਲਕ੍ਖਣਾਨਿ ਪਟਿਚ੍ਛਨ੍ਨਾਨਿ ਅਹੇਸੁਂ. ਅਪ੍ਪੇਕਦਾ ਅਪ੍ਪਾਣਕਂ ਝਾਨਂ ਝਾਯਨ੍ਤੋ ਮਹਾਵੇਦਨਾਹਿ ਅਭਿਤੁਨ੍ਨੋ ਵਿਸਞ੍ਞੀਭੂਤੋ ਚਙ੍ਕਮਨਕੋਟਿਯਂ ਪਤਤਿ. ਅਥ ਨਂ ਏਕਚ੍ਚਾ ਦੇਵਤਾ ‘‘ਕਾਲਕਤੋ ਸਮਣੋ ਗੋਤਮੋ’’ਤਿ ਵਦਨ੍ਤਿ, ਏਕਚ੍ਚਾ ‘‘ਵਿਹਾਰੋਵੇਸੋ ਅਰਹਤ’’ਨ੍ਤਿ ਆਹਂਸੁ. ਤਤ੍ਥ ਯਾਸਂ ‘‘ਕਾਲਕਤੋ’’ਤਿ ਅਹੋਸਿ, ਤਾ ਗਨ੍ਤ੍ਵਾ ਸੁਦ੍ਧੋਦਨਮਹਾਰਾਜਸ੍ਸ ਆਰੋਚੇਸੁਂ ‘‘ਤੁਮ੍ਹਾਕਂ ਪੁਤ੍ਤੋ ਕਾਲਕਤੋ’’ਤਿ. ਮਮ ਪੁਤ੍ਤੋ ਬੁਦ੍ਧੋ ਹੁਤ੍ਵਾ ਕਾਲਕਤੋ, ਅਹੁਤ੍ਵਾਤਿ? ਬੁਦ੍ਧੋ ਭਵਿਤੁਂ ਨਾਸਕ੍ਖਿ, ਪਧਾਨਭੂਮਿਯਂਯੇਵ ਪਤਿਤ੍ਵਾ ਕਾਲਕਤੋਤਿ. ਇਦਂ ਸੁਤ੍ਵਾ ਰਾਜਾ ‘‘ਨਾਹਂ ਸਦ੍ਦਹਾਮਿ, ਮਮ ਪੁਤ੍ਤਸ੍ਸ ਬੋਧਿਂ ਅਪ੍ਪਤ੍ਵਾ ਕਾਲਕਿਰਿਯਾ ਨਾਮ ਨਤ੍ਥੀ’’ਤਿ ਪਟਿਕ੍ਖਿਪਿ. ਕਸ੍ਮਾ ਪਨ ਰਾਜਾ ਨ ਸਦ੍ਦਹਤੀਤਿ? ਕਾਲ਼ਦੇਵੀਲਤਾਪਸਸ੍ਸ ਵਨ੍ਦਾਪਨਦਿਵਸੇ ਜਮ੍ਬੁਰੁਕ੍ਖਮੂਲੇ ਚ ਪਾਟਿਹਾਰਿਯਾਨਂ ਦਿਟ੍ਠਤ੍ਤਾ.

ਪੁਨ ਬੋਧਿਸਤ੍ਤੇ ਸਞ੍ਞਂ ਪਟਿਲਭਿਤ੍ਵਾ ਉਟ੍ਠਿਤੇ ਤਾ ਦੇਵਤਾ ਗਨ੍ਤ੍ਵਾ ‘‘ਅਰੋਗੋ ਤੇ ਮਹਾਰਾਜ ਪੁਤ੍ਤੋ’’ਤਿ ਆਰੋਚੇਨ੍ਤਿ. ਰਾਜਾ ‘‘ਜਾਨਾਮਹਂ ਪੁਤ੍ਤਸ੍ਸ ਅਮਰਣਭਾਵ’’ਨ੍ਤਿ ਵਦਤਿ. ਮਹਾਸਤ੍ਤਸ੍ਸ ਛਬ੍ਬਸ੍ਸਾਨਿ ਦੁਕ੍ਕਰਕਾਰਿਯਂ ਕਰੋਨ੍ਤਸ੍ਸ ਆਕਾਸੇ ਗਣ੍ਠਿਕਰਣਕਾਲੋ ਵਿਯ ਅਹੋਸਿ. ਸੋ ‘‘ਅਯਂ ਦੁਕ੍ਕਰਕਾਰਿਕਾ ਨਾਮ ਬੋਧਾਯ ਮਗ੍ਗੋ ਨ ਹੋਤੀ’’ਤਿ ਓਲ਼ਾਰਿਕਂ ਆਹਾਰਂ ਆਹਾਰੇਤੁਂ ਗਾਮਨਿਗਮੇਸੁ ਪਿਣ੍ਡਾਯ ਚਰਿਤ੍ਵਾ ਆਹਾਰਂ ਆਹਰਿ, ਅਥਸ੍ਸ ਬਾਤ੍ਤਿਂਸਮਹਾਪੁਰਿਸਲਕ੍ਖਣਾਨਿ ਪਾਕਤਿਕਾਨਿ ਅਹੇਸੁਂ, ਕਾਯੋ ਸੁਵਣ੍ਣਵਣ੍ਣੋ ਅਹੋਸਿ. ਪਞ੍ਚਵਗ੍ਗਿਯਾ ਭਿਕ੍ਖੂ ‘‘ਅਯਂ ਛਬ੍ਬਸ੍ਸਾਨਿ ਦੁਕ੍ਕਰਕਾਰਿਕਂ ਕਰੋਨ੍ਤੋਪਿ ਸਬ੍ਬਞ੍ਞੁਤਂ ਪਟਿਵਿਜ੍ਝਿਤੁਂ ਨਾਸਕ੍ਖਿ, ਇਦਾਨਿ ਗਾਮਾਦੀਸੁ ਪਿਣ੍ਡਾਯ ਚਰਿਤ੍ਵਾ ਓਲ਼ਾਰਿਕਂ ਆਹਾਰਂ ਆਹਰਿਯਮਾਨੋ ਕਿਂ ਸਕ੍ਖਿਸ੍ਸਤਿ, ਬਾਹੁਲਿਕੋ ਏਸ ਪਧਾਨਵਿਬ੍ਭਨ੍ਤੋ, ਸੀਸਂ ਨ੍ਹਾਯਿਤੁਕਾਮਸ੍ਸ ਉਸ੍ਸਾਵਬਿਨ੍ਦੁਤਕ੍ਕਨਂ ਵਿਯ ਅਮ੍ਹਾਕਂ ਏਤਸ੍ਸ ਸਨ੍ਤਿਕਾ ਵਿਸੇਸਤਕ੍ਕਨਂ, ਕਿਂ ਨੋ ਇਮਿਨਾ’’ਤਿ ਮਹਾਪੁਰਿਸਂ ਪਹਾਯ ਅਤ੍ਤਨੋ ਅਤ੍ਤਨੋ ਪਤ੍ਤਚੀਵਰਂ ਗਹੇਤ੍ਵਾ ਅਟ੍ਠਾਰਸਯੋਜਨਮਗ੍ਗਂ ਗਨ੍ਤ੍ਵਾ ਇਸਿਪਤਨਂ ਪਵਿਸਿਂਸੁ.

ਤੇਨ ਖੋ ਪਨ ਸਮਯੇਨ ਉਰੁਵੇਲਾਯਂ ਸੇਨਾਨਿਗਮੇ ਸੇਨਾਨਿਕੁਟੁਮ੍ਬਿਕਸ੍ਸ ਗੇਹੇ ਨਿਬ੍ਬਤ੍ਤਾ ਸੁਜਾਤਾ ਨਾਮ ਦਾਰਿਕਾ ਵਯਪ੍ਪਤ੍ਤਾ ਏਕਸ੍ਮਿਂ ਨਿਗ੍ਰੋਧਰੁਕ੍ਖੇ ਪਤ੍ਥਨਂ ਅਕਾਸਿ ‘‘ਸਚੇ ਸਮਜਾਤਿਕਂ ਕੁਲਘਰਂ ਗਨ੍ਤ੍ਵਾ ਪਠਮਗਬ੍ਭੇ ਪੁਤ੍ਤਂ ਲਭਿਸ੍ਸਾਮਿ, ਅਨੁਸਂਵਚ੍ਛਰਂ ਤੇ ਸਤਸਹਸ੍ਸਪਰਿਚ੍ਚਾਗੇਨ ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ. ਤਸ੍ਸਾ ਸਾ ਪਤ੍ਥਨਾ ਸਮਿਜ੍ਝਿ. ਸਾ ਮਹਾਸਤ੍ਤਸ੍ਸ ਦੁਕ੍ਕਰਕਾਰਿਕਂ ਕਰੋਨ੍ਤਸ੍ਸ ਛਟ੍ਠੇ ਵਸ੍ਸੇ ਪਰਿਪੁਣ੍ਣੇ ਵਿਸਾਖਪੁਣ੍ਣਮਾਯਂ ਬਲਿਕਮ੍ਮਂ ਕਾਤੁਕਾਮਾ ਹੁਤ੍ਵਾ ਪੁਰੇਤਰਂ ਧੇਨੁਸਹਸ੍ਸਂ ਲਟ੍ਠਿਮਧੁਕਵਨੇ ਚਰਾਪੇਤ੍ਵਾ ਤਾਸਂ ਖੀਰਂ ਪਞ੍ਚ ਧੇਨੁਸਤਾਨਿ ਪਾਯੇਤ੍ਵਾ ਤਾਸਂ ਖੀਰਂ ਅਡ੍ਢਤਿਯਾਨੀਤਿ ਏਵਂ ਯਾਵ ਸੋਲ਼ਸਨ੍ਨਂ ਧੇਨੂਨਂ ਖੀਰਂ ਅਟ੍ਠ ਧੇਨੁਯੋ ਪਿਵਨ੍ਤਿ, ਤਾਵ ਖੀਰਸ੍ਸ ਬਹਲਤਞ੍ਚ ਮਧੁਰਤਞ੍ਚ ਓਜਵਨ੍ਤਤਞ੍ਚ ਪਤ੍ਥਯਮਾਨਾ ਖੀਰਪਰਿਵਤ੍ਤਨਂ ਨਾਮ ਅਕਾਸਿ. ਸਾ ਵਿਸਾਖਪੁਣ੍ਣਮਦਿਵਸੇ ‘‘ਪਾਤੋਵ ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਤਾ ਅਟ੍ਠ ਧੇਨੁਯੋ ਦੁਹਾਪੇਸਿ. ਵਚ੍ਛਕਾ ਧੇਨੂਨਂ ਥਨਮੂਲਂ ਨਾਗਮਿਂਸੁ, ਥਨਮੂਲੇ ਪਨ ਨਵਭਾਜਨੇ ਉਪਨੀਤਮਤ੍ਤੇ ਅਤ੍ਤਨੋ ਧਮ੍ਮਤਾਯ ਖੀਰਧਾਰਾ ਪਵਤ੍ਤਿਂਸੁ. ਤਂ ਅਚ੍ਛਰਿਯਂ ਦਿਸ੍ਵਾ ਸੁਜਾਤਾ ਸਹਤ੍ਥੇਨੇਵ ਖੀਰਂ ਗਹੇਤ੍ਵਾ ਨਵਭਾਜਨੇ ਪਕ੍ਖਿਪਿਤ੍ਵਾ ਸਹਤ੍ਥੇਨੇਵ ਅਗ੍ਗਿਂ ਕਤ੍ਵਾ ਪਚਿਤੁਂ ਆਰਭਿ.

ਤਸ੍ਮਿਂ ਪਾਯਾਸੇ ਪਚ੍ਚਮਾਨੇ ਮਹਨ੍ਤਮਹਨ੍ਤਾ ਬੁਬ੍ਬੁਲ਼ਾ ਉਟ੍ਠਹਿਤ੍ਵਾ ਦਕ੍ਖਿਣਾਵਤ੍ਤਾ ਹੁਤ੍ਵਾ ਸਞ੍ਚਰਨ੍ਤਿ, ਏਕਫੁਸਿਤਮ੍ਪਿ ਬਹਿ ਨ ਪਤਤਿ, ਉਦ੍ਧਨਤੋ ਅਪ੍ਪਮਤ੍ਤਕੋਪਿ ਧੂਮੋ ਨ ਉਟ੍ਠਹਤਿ. ਤਸ੍ਮਿਂ ਸਮਯੇ ਚਤ੍ਤਾਰੋ ਲੋਕਪਾਲਾ ਆਗਨ੍ਤ੍ਵਾ ਉਦ੍ਧਨੇ ਆਰਕ੍ਖਂ ਗਣ੍ਹਿਂਸੁ, ਮਹਾਬ੍ਰਹ੍ਮਾ ਛਤ੍ਤਂ ਧਾਰੇਸਿ, ਸਕ੍ਕੋ ਅਲਾਤਾਨਿ ਸਮਾਨੇਨ੍ਤੋ ਅਗ੍ਗਿਂ ਜਾਲੇਸਿ. ਦੇਵਤਾ ਦ੍ਵਿਸਹਸ੍ਸਦੀਪਪਰਿਵਾਰੇਸੁ ਚਤੂਸੁ ਮਹਾਦੀਪੇਸੁ ਦੇਵਾਨਞ੍ਚ ਮਨੁਸ੍ਸਾਨਞ੍ਚ ਉਪਕਪ੍ਪਨਓਜਂ ਅਤ੍ਤਨੋ ਦੇਵਾਨੁਭਾਵੇਨ ਦਣ੍ਡਕਬਦ੍ਧਂ ਮਧੁਪਟਲਂ ਪੀਲ਼ੇਤ੍ਵਾ ਮਧੁਂ ਗਣ੍ਹਮਾਨਾ ਵਿਯ ਸਂਹਰਿਤ੍ਵਾ ਤਤ੍ਥ ਪਕ੍ਖਿਪਿਂਸੁ. ਅਞ੍ਞੇਸੁ ਹਿ ਕਾਲੇਸੁ ਦੇਵਤਾ ਕਬਲ਼ੇ ਕਬਲ਼ੇ ਓਜਂ ਪਕ੍ਖਿਪਨ੍ਤਿ, ਸਮ੍ਬੋਧਿਦਿਵਸੇ ਚ ਪਨ ਪਰਿਨਿਬ੍ਬਾਨਦਿਵਸੇ ਚ ਉਕ੍ਖਲਿਯਂਯੇਵ ਪਕ੍ਖਿਪਨ੍ਤਿ. ਸੁਜਾਤਾ ਏਕਦਿਵਸੇਯੇਵ ਤਤ੍ਥ ਅਤ੍ਤਨੋ ਪਾਕਟਾਨਿ ਅਨੇਕਾਨਿ ਅਚ੍ਛਰਿਯਾਨਿ ਦਿਸ੍ਵਾ ਪੁਣ੍ਣਂ ਦਾਸਿਂ ਆਮਨ੍ਤੇਸਿ ‘‘ਅਮ੍ਮ ਪੁਣ੍ਣੇ, ਅਜ੍ਜ ਅਮ੍ਹਾਕਂ ਦੇਵਤਾ ਅਤਿਵਿਯ ਪਸਨ੍ਨਾ, ਮਯਾ ਏਤ੍ਤਕੇ ਕਾਲੇ ਏਵਰੂਪਂ ਅਚ੍ਛਰਿਯਂ ਨਾਮ ਨ ਦਿਟ੍ਠਪੁਬ੍ਬਂ, ਵੇਗੇਨ ਗਨ੍ਤ੍ਵਾ ਦੇਵਟ੍ਠਾਨਂ ਪਟਿਜਗ੍ਗਾਹੀ’’ਤਿ. ਸਾ ‘‘ਸਾਧੁ, ਅਯ੍ਯੇ’’ਤਿ ਤਸ੍ਸਾ ਵਚਨਂ ਸਮ੍ਪਟਿਚ੍ਛਿਤ੍ਵਾ ਤੁਰਿਤਤੁਰਿਤਾ ਰੁਕ੍ਖਮੂਲਂ ਅਗਮਾਸਿ.

ਬੋਧਿਸਤ੍ਤੋਪਿ ਖੋ ਤਸ੍ਮਿਂ ਰਤ੍ਤਿਭਾਗੇ ਪਞ੍ਚ ਮਹਾਸੁਪਿਨੇ ਦਿਸ੍ਵਾ ਪਰਿਗ੍ਗਣ੍ਹਨ੍ਤੋ ‘‘ਨਿਸ੍ਸਂਸਯੇਨਾਹਂ ਅਜ੍ਜ ਬੁਦ੍ਧੋ ਭਵਿਸ੍ਸਾਮੀ’’ਤਿ ਕਤਸਨ੍ਨਿਟ੍ਠਾਨੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਕਤਸਰੀਰਪਟਿਜਗ੍ਗਨੋ ਭਿਕ੍ਖਾਚਾਰਕਾਲਂ ਆਗਮਯਮਾਨੋ ਪਾਤੋਵ ਆਗਨ੍ਤ੍ਵਾ ਤਸ੍ਮਿਂ ਰੁਕ੍ਖਮੂਲੇ ਨਿਸੀਦਿ ਅਤ੍ਤਨੋ ਪਭਾਯ ਸਕਲਰੁਕ੍ਖਂ ਓਭਾਸਯਮਾਨੋ. ਅਥ ਖੋ ਸਾ ਪੁਣ੍ਣਾ ਆਗਨ੍ਤ੍ਵਾ ਅਦ੍ਦਸ ਬੋਧਿਸਤ੍ਤਂ ਰੁਕ੍ਖਮੂਲੇ ਪਾਚੀਨਲੋਕਧਾਤੁਂ ਓਲੋਕਯਮਾਨਂ ਨਿਸਿਨ੍ਨਂ, ਸਰੀਰਤੋ ਚਸ੍ਸ ਨਿਕ੍ਖਨ੍ਤਾਹਿ ਪਭਾਹਿ ਸਕਲਰੁਕ੍ਖਂ ਸੁਵਣ੍ਣਵਣ੍ਣਂ. ਦਿਸ੍ਵਾ ਤਸ੍ਸਾ ਏਤਦਹੋਸਿ – ‘‘ਅਜ੍ਜ ਅਮ੍ਹਾਕਂ ਦੇਵਤਾ ਰੁਕ੍ਖਤੋ ਓਰੁਯ੍ਹ ਸਹਤ੍ਥੇਨੇਵ ਬਲਿਕਮ੍ਮਂ ਸਮ੍ਪਟਿਚ੍ਛਿਤੁਂ ਨਿਸਿਨ੍ਨਾ ਮਞ੍ਞੇ’’ਤਿ ਉਬ੍ਬੇਗਪ੍ਪਤ੍ਤਾ ਹੁਤ੍ਵਾ ਵੇਗੇਨਾਗਨ੍ਤ੍ਵਾ ਸੁਜਾਤਾਯ ਏਤਮਤ੍ਥਂ ਆਰੋਚੇਸਿ.

ਸੁਜਾਤਾ ਤਸ੍ਸਾ ਵਚਨਂ ਸੁਤ੍ਵਾ ਤੁਟ੍ਠਮਾਨਸਾ ਹੁਤ੍ਵਾ ‘‘ਅਜ੍ਜ ਦਾਨਿ ਪਟ੍ਠਾਯ ਮਮ ਜੇਟ੍ਠਧੀਤੁਟ੍ਠਾਨੇ ਤਿਟ੍ਠਾਹੀ’’ਤਿ ਧੀਤੁ ਅਨੁਚ੍ਛਵਿਕਂ ਸਬ੍ਬਾਲਙ੍ਕਾਰਂ ਅਦਾਸਿ. ਯਸ੍ਮਾ ਪਨ ਬੁਦ੍ਧਭਾਵਂ ਪਾਪੁਣਨਦਿਵਸੇ ਸਤਸਹਸ੍ਸਗ੍ਘਨਿਕਂ ਸੁਵਣ੍ਣਪਾਤਿਂ ਲਦ੍ਧੁਂ ਵਟ੍ਟਤਿ, ਤਸ੍ਮਾ ਸਾ ‘‘ਸੁਵਣ੍ਣਪਾਤਿਯਂ ਪਾਯਾਸਂ ਪਕ੍ਖਿਪਿਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਾਦੇਤ੍ਵਾ ਸਤਸਹਸ੍ਸਗ੍ਘਨਿਕਂ ਸੁਵਣ੍ਣਪਾਤਿਂ ਨੀਹਰਾਪੇਤ੍ਵਾ ਤਤ੍ਥ ਪਾਯਾਸਂ ਪਕ੍ਖਿਪਿਤੁਕਾਮਾ ਪਕ੍ਕਭਾਜਨਂ ਆਵਜ੍ਜੇਸਿ. ‘ਸਬ੍ਬੋ ਪਾਯਾਸੋ ਪਦੁਮਪਤ੍ਤਾ ਉਦਕਂ ਵਿਯ ਵਿਨਿਵਤ੍ਤਿਤ੍ਵਾ ਪਾਤਿਯਂ ਪਤਿਟ੍ਠਾਸਿ, ਏਕਪਾਤਿਪੂਰਮਤ੍ਤੋਵ ਅਹੋਸਿ’. ਸਾ ਤਂ ਪਾਤਿਂ ਅਞ੍ਞਾਯ ਸੁਵਣ੍ਣਪਾਤਿਯਾ ਪਟਿਕੁਜ੍ਜਿਤ੍ਵਾ ਓਦਾਤਵਤ੍ਥੇਨ ਵੇਠੇਤ੍ਵਾ ਸਬ੍ਬਾਲਙ੍ਕਾਰੇਹਿ ਅਤ੍ਤਭਾਵਂ ਅਲਙ੍ਕਰਿਤ੍ਵਾ ਤਂ ਪਾਤਿਂ ਅਤ੍ਤਨੋ ਸੀਸੇ ਠਪੇਤ੍ਵਾ ਮਹਨ੍ਤੇਨ ਆਨੁਭਾਵੇਨ ਨਿਗ੍ਰੋਧਰੁਕ੍ਖਮੂਲਂ ਗਨ੍ਤ੍ਵਾ ਬੋਧਿਸਤ੍ਤਂ ਓਲੋਕੇਤ੍ਵਾ ਬਲਵਸੋਮਨਸ੍ਸਜਾਤਾ ‘‘ਰੁਕ੍ਖਦੇਵਤਾ’’ਤਿ ਸਞ੍ਞਾਯ ਦਿਟ੍ਠਟ੍ਠਾਨਤੋ ਪਟ੍ਠਾਯ ਓਨਤੋਨਤਾ ਗਨ੍ਤ੍ਵਾ ਸੀਸਤੋ ਪਾਤਿਂ ਓਤਾਰੇਤ੍ਵਾ ਵਿਵਰਿਤ੍ਵਾ ਸੁਵਣ੍ਣਭਿਙ੍ਕਾਰੇਨ ਗਨ੍ਧਪੁਪ੍ਫਵਾਸਿਤਂ ਉਦਕਂ ਗਹੇਤ੍ਵਾ ਬੋਧਿਸਤ੍ਤਂ ਉਪਗਨ੍ਤ੍ਵਾ ਅਟ੍ਠਾਸਿ. ਘਟੀਕਾਰਮਹਾਬ੍ਰਹ੍ਮੁਨਾ ਦਿਨ੍ਨੋ ਮਤ੍ਤਿਕਾਪਤ੍ਤੋ ਏਤ੍ਤਕਂ ਅਦ੍ਧਾਨਂ ਬੋਧਿਸਤ੍ਤਂ ਅਵਿਜਹਿਤ੍ਵਾ ਤਸ੍ਮਿਂ ਖਣੇ ਅਦਸ੍ਸਨਂ ਗਤੋ, ਬੋਧਿਸਤ੍ਤੋ ਪਤ੍ਤਂ ਅਪਸ੍ਸਨ੍ਤੋ ਦਕ੍ਖਿਣਹਤ੍ਥਂ ਪਸਾਰੇਤ੍ਵਾ ਉਦਕਂ ਸਮ੍ਪਟਿਚ੍ਛਿ. ਸੁਜਾਤਾ ਸਹੇਵ ਪਾਤਿਯਾ ਪਾਯਾਸਂ ਮਹਾਪੁਰਿਸਸ੍ਸ ਹਤ੍ਥੇ ਠਪੇਸਿ, ਮਹਾਪੁਰਿਸੋ ਸੁਜਾਤਂ ਓਲੋਕੇਸਿ. ਸਾ ਆਕਾਰਂ ਸਲ੍ਲਕ੍ਖੇਤ੍ਵਾ ‘‘ਅਯ੍ਯ, ਮਯਾ ਤੁਮ੍ਹਾਕਂ ਪਰਿਚ੍ਚਤ੍ਤਂ, ਗਣ੍ਹਿਤ੍ਵਾ ਯਥਾਰੁਚਿਂ ਗਚ੍ਛਥਾ’’ਤਿ ਵਨ੍ਦਿਤ੍ਵਾ ‘‘ਯਥਾ ਮਯ੍ਹਂ ਮਨੋਰਥੋ ਨਿਪ੍ਫਨ੍ਨੋ, ਏਵਂ ਤੁਮ੍ਹਾਕਮ੍ਪਿ ਨਿਪ੍ਫਜ੍ਜਤੂ’’ਤਿ ਵਤ੍ਵਾ ਸਤਸਹਸ੍ਸਗ੍ਘਨਿਕਾਯ ਸੁਵਣ੍ਣਪਾਤਿਯਾ ਪੁਰਾਣਪਣ੍ਣੇ ਵਿਯ ਅਨਪੇਕ੍ਖਾ ਹੁਤ੍ਵਾ ਪਕ੍ਕਾਮਿ.

ਬੋਧਿਸਤ੍ਤੋਪਿ ਖੋ ਨਿਸਿਨ੍ਨਟ੍ਠਾਨਾ ਉਟ੍ਠਾਯ ਰੁਕ੍ਖਂ ਪਦਕ੍ਖਿਣਂ ਕਤ੍ਵਾ ਪਾਤਿਂ ਆਦਾਯ ਨੇਰਞ੍ਜਰਾਯ ਤੀਰਂ ਗਨ੍ਤ੍ਵਾ ਅਨੇਕੇਸਂ ਬੋਧਿਸਤ੍ਤਸਹਸ੍ਸਾਨਂ ਅਭਿਸਮ੍ਬੁਜ੍ਝਨਦਿਵਸੇ ਓਤਰਿਤ੍ਵਾ ਨ੍ਹਾਨਟ੍ਠਾਨਂ ਸੁਪ੍ਪਤਿਟ੍ਠਿਤਤਿਤ੍ਥਂ ਨਾਮ ਅਤ੍ਥਿ, ਤਸ੍ਸ ਤੀਰੇ ਪਾਤਿਂ ਠਪੇਤ੍ਵਾ ਓਤਰਿਤ੍ਵਾ ਨ੍ਹਤ੍ਵਾ ਅਨੇਕਬੁਦ੍ਧਸਤਸਹਸ੍ਸਾਨਂ ਨਿਵਾਸਨਂ ਅਰਹਦ੍ਧਜਂ ਨਿਵਾਸੇਤ੍ਵਾ ਪੁਰਤ੍ਥਾਭਿਮੁਖੋ ਨਿਸੀਦਿਤ੍ਵਾ ਏਕਟ੍ਠਿਤਾਲਪਕ੍ਕਪ੍ਪਮਾਣੇ ਏਕੂਨਪਞ੍ਞਾਸ ਪਿਣ੍ਡੇ ਕਤ੍ਵਾ ਸਬ੍ਬਂ ਅਪ੍ਪੋਦਕਂ ਮਧੁਪਾਯਾਸਂ ਪਰਿਭੁਞ੍ਜਿ. ਸੋ ਏਵ ਹਿਸ੍ਸ ਬੁਦ੍ਧਭੂਤਸ੍ਸ ਸਤ੍ਤਸਤ੍ਤਾਹਂ ਬੋਧਿਮਣ੍ਡੇ ਵਸਨ੍ਤਸ੍ਸ ਏਕੂਨਪਞ੍ਞਾਸ ਦਿਵਸਾਨਿ ਆਹਾਰੋ ਅਹੋਸਿ. ਏਤ੍ਤਕਂ ਕਾਲਂ ਨੇਵ ਅਞ੍ਞੋ ਆਹਾਰੋ ਅਤ੍ਥਿ, ਨ ਨ੍ਹਾਨਂ, ਨ ਮੁਖਧੋਵਨਂ, ਨ ਸਰੀਰਵਲ਼ਞ੍ਜੋ, ਝਾਨਸੁਖੇਨ ਮਗ੍ਗਸੁਖੇਨ ਫਲਸੁਖੇਨ ਚ ਵੀਤਿਨਾਮੇਸਿ. ਤਂ ਪਨ ਪਾਯਾਸਂ ਪਰਿਭੁਞ੍ਜਿਤ੍ਵਾ ਸੁਵਣ੍ਣਪਾਤਿਂ ਗਹੇਤ੍ਵਾ ‘‘ਸਚਾਹਂ, ਅਜ੍ਜ ਬੁਦ੍ਧੋ ਭਵਿਤੁਂ ਸਕ੍ਖਿਸ੍ਸਾਮਿ, ਅਯਂ ਪਾਤਿ ਪਟਿਸੋਤਂ ਗਚ੍ਛਤੁ, ਨੋ ਚੇ ਸਕ੍ਖਿਸ੍ਸਾਮਿ, ਅਨੁਸੋਤਂ ਗਚ੍ਛਤੂ’’ਤਿ ਵਤ੍ਵਾ ਨਦੀਸੋਤੇ ਪਕ੍ਖਿਪਿ. ਸਾ ਸੋਤਂ ਛਿਨ੍ਦਮਾਨਾ ਨਦੀਮਜ੍ਝਂ ਗਨ੍ਤ੍ਵਾ ਮਜ੍ਝਮਜ੍ਝਟ੍ਠਾਨੇਨੇਵ ਜਵਸਮ੍ਪਨ੍ਨੋ ਅਸ੍ਸੋ ਵਿਯ ਅਸੀਤਿਹਤ੍ਥਮਤ੍ਤਟ੍ਠਾਨਂ ਪਟਿਸੋਤਂ ਗਨ੍ਤ੍ਵਾ ਏਕਸ੍ਮਿਂ ਆਵਟ੍ਟੇ ਨਿਮੁਜ੍ਜਿਤ੍ਵਾ ਕਾਲ਼ਨਾਗਰਾਜਭਵਨਂ ਗਨ੍ਤ੍ਵਾ ਤਿਣ੍ਣਂ ਬੁਦ੍ਧਾਨਂ ਪਰਿਭੋਗਪਾਤਿਯੋ ‘‘ਕਿਲਿ ਕਿਲੀ’’ਤਿ ਰਵਂ ਕਾਰਯਮਾਨਾ ਪਹਰਿਤ੍ਵਾਵ ਤਾਸਂ ਸਬ੍ਬਹੇਟ੍ਠਿਮਾ ਹੁਤ੍ਵਾ ਅਟ੍ਠਾਸਿ. ਕਾਲ਼ੋ ਨਾਗਰਾਜਾ ਤਂ ਸਦ੍ਦਂ ਸੁਤ੍ਵਾ ‘‘ਹਿਯ੍ਯੋ ਏਕੋ ਬੁਦ੍ਧੋ ਨਿਬ੍ਬਤ੍ਤੋ, ਪੁਨ ਅਜ੍ਜ ਏਕੋ ਨਿਬ੍ਬਤ੍ਤੋ’’ਤਿ ਵਤ੍ਵਾ ਅਨੇਕੇਹਿ ਪਦਸਤੇਹਿ ਥੁਤਿਯੋ ਵਦਮਾਨੋ ਉਟ੍ਠਾਸਿ. ਤਸ੍ਸ ਕਿਰ ਮਹਾਪਥਵਿਯਾ ਏਕਯੋਜਨਤਿਗਾਵੁਤਪ੍ਪਮਾਣਂ ਨਭਂ ਪੂਰੇਤ੍ਵਾ ਆਰੋਹਨਕਾਲੋ ‘‘ਅਜ੍ਜ ਵਾ ਹਿਯ੍ਯੋ ਵਾ’’ਤਿ ਸਦਿਸੋ ਅਹੋਸਿ.

ਬੋਧਿਸਤ੍ਤੋਪਿ ਨਦੀਤੀਰਮ੍ਹਿ ਸੁਪੁਪ੍ਫਿਤਸਾਲਵਨੇ ਦਿਵਾਵਿਹਾਰਂ ਕਤ੍ਵਾ ਸਾਯਨ੍ਹਸਮਯੇ ਪੁਪ੍ਫਾਨਂ ਵਣ੍ਟਤੋ ਮੁਚ੍ਚਨਕਾਲੇ ਦੇਵਤਾਹਿ ਅਲਙ੍ਕਤੇਨ ਅਟ੍ਠੂਸਭਵਿਤ੍ਥਾਰੇਨ ਮਗ੍ਗੇਨ ਸੀਹੋ ਵਿਯ ਵਿਜਮ੍ਭਮਾਨੋ ਬੋਧਿਰੁਕ੍ਖਾਭਿਮੁਖੋ ਪਾਯਾਸਿ. ਨਾਗਯਕ੍ਖਸੁਪਣ੍ਣਾਦਯੋ ਦਿਬ੍ਬੇਹਿ ਗਨ੍ਧਪੁਪ੍ਫਾਦੀਹਿ ਪੂਜਯਿਂਸੁ, ਦਿਬ੍ਬਸਙ੍ਗੀਤਾਦੀਨਿ ਪਵਤ੍ਤਯਿਂਸੁ, ਦਸਸਹਸ੍ਸੀ ਲੋਕਧਾਤੁ ਏਕਗਨ੍ਧਾ ਏਕਮਾਲਾ ਏਕਸਾਧੁਕਾਰਾ ਅਹੋਸਿ. ਤਸ੍ਮਿਂ ਸਮਯੇ ਸੋਤ੍ਥਿਯੋ ਨਾਮ ਤਿਣਹਾਰਕੋ ਤਿਣਂ ਆਦਾਯ ਪਟਿਪਥੇ ਆਗਚ੍ਛਨ੍ਤੋ ਮਹਾਪੁਰਿਸਸ੍ਸ ਆਕਾਰਂ ਞਤ੍ਵਾ ਅਟ੍ਠ ਤਿਣਮੁਟ੍ਠਿਯੋ ਅਦਾਸਿ. ਬੋਧਿਸਤ੍ਤੋ ਤਿਣਂ ਗਹੇਤ੍ਵਾ ਬੋਧਿਮਣ੍ਡਂ ਆਰੁਯ੍ਹ ਦਕ੍ਖਿਣਦਿਸਾਭਾਗੇ ਉਤ੍ਤਰਾਭਿਮੁਖੋ ਅਟ੍ਠਾਸਿ. ਤਸ੍ਮਿਂ ਖਣੇ ਦਕ੍ਖਿਣਚਕ੍ਕਵਾਲ਼ਂ ਓਸੀਦਿਤ੍ਵਾ ਹੇਟ੍ਠਾ ਅਵੀਚਿਸਮ੍ਪਤ੍ਤਂ ਵਿਯ ਅਹੋਸਿ, ਉਤ੍ਤਰਚਕ੍ਕਵਾਲ਼ਂ ਉਲ੍ਲਙ੍ਘਿਤ੍ਵਾ ਉਪਰਿ ਭਵਗ੍ਗਪ੍ਪਤ੍ਤਂ ਵਿਯ ਅਹੋਸਿ. ਬੋਧਿਸਤ੍ਤੋ ‘‘ਇਦਂ ਸਮ੍ਬੋਧਿਂ ਪਾਪੁਣਨਟ੍ਠਾਨਂ ਨ ਭਵਿਸ੍ਸਤਿ ਮਞ੍ਞੇ’’ਤਿ ਪਦਕ੍ਖਿਣਂ ਕਰੋਨ੍ਤੋ ਪਚ੍ਛਿਮਦਿਸਾਭਾਗਂ ਗਨ੍ਤ੍ਵਾ ਪੁਰਤ੍ਥਾਭਿਮੁਖੋ ਅਟ੍ਠਾਸਿ, ਤਤੋ ਪਚ੍ਛਿਮਚਕ੍ਕਵਾਲ਼ਂ ਓਸੀਦਿਤ੍ਵਾ ਹੇਟ੍ਠਾ ਅਵੀਚਿਸਮ੍ਪਤ੍ਤਂ ਵਿਯ ਅਹੋਸਿ, ਪੁਰਤ੍ਥਿਮਚਕ੍ਕਵਾਲ਼ਂ ਉਲ੍ਲਙ੍ਘਿਤ੍ਵਾ ਉਪਰਿ ਭਵਗ੍ਗਪ੍ਪਤ੍ਤਂ ਵਿਯ ਅਹੋਸਿ. ਠਿਤਟ੍ਠਿਤਟ੍ਠਾਨੇ ਕਿਰਸ੍ਸ ਨੇਮਿਵਟ੍ਟਿਪਰਿਯਨ੍ਤੇ ਅਕ੍ਕਨ੍ਤੇ ਨਾਭਿਯਾ ਪਤਿਟ੍ਠਿਤਮਹਾਸਕਟਚਕ੍ਕਂ ਵਿਯ ਮਹਾਪਥਵੀ ਓਨਤੁਨ੍ਨਤਾ ਅਹੋਸਿ. ਬੋਧਿਸਤ੍ਤੋ ‘‘ਇਦਮ੍ਪਿ ਸਮ੍ਬੋਧਿਂ ਪਾਪੁਣਨਟ੍ਠਾਨਂ ਨ ਭਵਿਸ੍ਸਤਿ ਮਞ੍ਞੇ’’ਤਿ ਪਦਕ੍ਖਿਣਂ ਕਰੋਨ੍ਤੋ ਉਤ੍ਤਰਦਿਸਾਭਾਗਂ ਗਨ੍ਤ੍ਵਾ ਦਕ੍ਖਿਣਾਭਿਮੁਖੋ ਅਟ੍ਠਾਸਿ, ਤਤੋ ਉਤ੍ਤਰਚਕ੍ਕਵਾਲ਼ਂ ਓਸੀਦਿਤ੍ਵਾ ਹੇਟ੍ਠਾ ਅਵੀਚਿਸਮ੍ਪਤ੍ਤਂ ਵਿਯ ਅਹੋਸਿ, ਦਕ੍ਖਿਣਚਕ੍ਕਵਾਲ਼ਂ ਉਲ੍ਲਙ੍ਘਿਤ੍ਵਾ ਉਪਰਿ ਭਵਗ੍ਗਪ੍ਪਤ੍ਤਂ ਵਿਯ ਅਹੋਸਿ. ਬੋਧਿਸਤ੍ਤੋ ‘‘ਇਦਮ੍ਪਿ ਸਮ੍ਬੋਧਿਂ ਪਾਪੁਣਨਟ੍ਠਾਨਂ ਨ ਭਵਿਸ੍ਸਤਿ ਮਞ੍ਞੇ’’ਤਿ ਪਦਕ੍ਖਿਣਂ ਕਰੋਨ੍ਤੋ ਪੁਰਤ੍ਥਿਮਦਿਸਾਭਾਗਂ ਗਨ੍ਤ੍ਵਾ ਪਚ੍ਛਿਮਾਭਿਮੁਖੋ ਅਟ੍ਠਾਸਿ. ਪੁਰਤ੍ਥਿਮਦਿਸਾਭਾਗੇ ਪਨ ਸਬ੍ਬਬੁਦ੍ਧਾਨਂ ਪਲ੍ਲਙ੍ਕਟ੍ਠਾਨਂ, ਤਂ ਨੇਵ ਛਮ੍ਭਤਿ, ਨ ਕਮ੍ਪਤਿ. ਮਹਾਸਤ੍ਤੋ ‘‘ਇਦਂ ਸਬ੍ਬਬੁਦ੍ਧਾਨਂ ਅਵਿਜਹਿਤਂ ਅਚਲਟ੍ਠਾਨਂ ਕਿਲੇਸਪਞ੍ਜਰਵਿਦ੍ਧਂਸਨਟ੍ਠਾਨ’’ਨ੍ਤਿ ਞਤ੍ਵਾ ਤਾਨਿ ਤਿਣਾਨਿ ਅਗ੍ਗੇ ਗਹੇਤ੍ਵਾ ਚਾਲੇਸਿ, ਤਾਵਦੇਵ ਚੁਦ੍ਦਸਹਤ੍ਥੋ ਪਲ੍ਲਙ੍ਕੋ ਅਹੋਸਿ. ਤਾਨਿਪਿ ਖੋ ਤਿਣਾਨਿ ਤਥਾਰੂਪੇਨ ਸਣ੍ਠਾਨੇਨ ਸਣ੍ਠਹਿਂਸੁ, ਯਥਾਰੂਪਂ ਸੁਕੁਸਲੋਪਿ ਚਿਤ੍ਤਕਾਰੋ ਵਾ ਪੋਤ੍ਥਕਾਰੋ ਵਾ ਆਲਿਖਿਤੁਮ੍ਪਿ ਸਮਤ੍ਥੋ ਨਤ੍ਥਿ. ਬੋਧਿਸਤ੍ਤੋ ਬੋਧਿਕ੍ਖਨ੍ਧਂ ਪਿਟ੍ਠਿਤੋ ਕਤ੍ਵਾ ਪੁਰਤ੍ਥਾਭਿਮੁਖੋ ਦਲ਼੍ਹਮਾਨਸੋ ਹੁਤ੍ਵਾ –

‘‘ਕਾਮਂ ਤਚੋ ਚ ਨ੍ਹਾਰੁ ਚ, ਅਟ੍ਠਿ ਚ ਅਵਸਿਸ੍ਸਤੁ;

ਉਪਸੁਸ੍ਸਤੁ ਨਿਸ੍ਸੇਸਂ, ਸਰੀਰੇ ਮਂਸਲੋਹਿਤਂ’’.

ਨ ਤ੍ਵੇਵਾਹਂ ਸਮ੍ਮਾਸਮ੍ਬੋਧਿਂ ਅਪ੍ਪਤ੍ਵਾ ਇਮਂ ਪਲ੍ਲਙ੍ਕਂ ਭਿਨ੍ਦਿਸ੍ਸਾਮੀਤਿ ਅਸਨਿਸਤਸਨ੍ਨਿਪਾਤੇਨਪਿ ਅਭੇਜ੍ਜਰੂਪਂ ਅਪਰਾਜਿਤਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸੀਦਿ.

ਤਸ੍ਮਿਂ ਸਮਯੇ ਮਾਰੋ ਦੇਵਪੁਤ੍ਤੋ ‘‘ਸਿਦ੍ਧਤ੍ਥਕੁਮਾਰੋ ਮਯ੍ਹਂ ਵਸਂ ਅਤਿਕ੍ਕਮਿਤੁਕਾਮੋ, ਨ ਦਾਨਿਸ੍ਸ ਅਤਿਕ੍ਕਮਿਤੁਂ ਦਸ੍ਸਾਮੀ’’ਤਿ ਮਾਰਬਲਸ੍ਸ ਸਨ੍ਤਿਕਂ ਗਨ੍ਤ੍ਵਾ ਏਤਮਤ੍ਥਂ ਆਰੋਚੇਤ੍ਵਾ ਮਾਰਘੋਸਨਂ ਨਾਮ ਘੋਸਾਪੇਤ੍ਵਾ ਮਾਰਬਲਂ ਆਦਾਯ ਨਿਕ੍ਖਮਿ. ਸਾ ਮਾਰਸੇਨਾ ਮਾਰਸ੍ਸ ਪੁਰਤੋ ਦ੍ਵਾਦਸਯੋਜਨਾ ਹੋਤਿ, ਦਕ੍ਖਿਣਤੋ ਚ ਵਾਮਤੋ ਚ ਦ੍ਵਾਦਸਯੋਜਨਾ, ਪਚ੍ਛਤੋ ਯਾਵ ਚਕ੍ਕਵਾਲ਼ਪਰਿਯਨ੍ਤਂ ਕਤ੍ਵਾ ਠਿਤਾ, ਉਦ੍ਧਂ ਨਵਯੋਜਨੁਬ੍ਬੇਧਾ, ਯਸ੍ਸਾ ਉਨ੍ਨਦਨ੍ਤਿਯਾ ਉਨ੍ਨਾਦਸਦ੍ਦੋ ਯੋਜਨਸਹਸ੍ਸਤੋ ਪਟ੍ਠਾਯ ਪਥਵਿਉਨ੍ਦ੍ਰਿਯਨਸਦ੍ਦੋ ਵਿਯ ਸੁਯ੍ਯਤਿ. ਅਥ ਮਾਰੋ ਦੇਵਪੁਤ੍ਤੋ ਦਿਯਡ੍ਢਯੋਜਨਸਤਿਕਂ ਗਿਰਿਮੇਖਲਂ ਨਾਮ ਹਤ੍ਥਿਂ ਅਭਿਰੁਹਿਤ੍ਵਾ ਬਾਹੁਸਹਸ੍ਸਂ ਮਾਪੇਤ੍ਵਾ ਨਾਨਾਵੁਧਾਨਿ ਅਗ੍ਗਹੇਸਿ. ਅਵਸੇਸਾਯਪਿ ਮਾਰਪਰਿਸਾਯ ਦ੍ਵੇ ਜਨਾ ਏਕਸਦਿਸਂ ਆਵੁਧਂ ਨ ਗਣ੍ਹਿਂਸੁ, ਨਾਨਪ੍ਪਕਾਰਵਣ੍ਣਾ ਨਾਨਪ੍ਪਕਾਰਮੁਖਾ ਹੁਤ੍ਵਾ ਮਹਾਸਤ੍ਤਂ ਅਜ੍ਝੋਤ੍ਥਰਮਾਨਾ ਆਗਮਿਂਸੁ.

ਦਸਸਹਸ੍ਸਚਕ੍ਕਵਾਲ਼ਦੇਵਤਾ ਪਨ ਮਹਾਸਤ੍ਤਸ੍ਸ ਥੁਤਿਯੋ ਵਦਮਾਨਾ ਅਟ੍ਠਂਸੁ. ਸਕ੍ਕੋ ਦੇਵਰਾਜਾ ਵਿਜਯੁਤ੍ਤਰਸਙ੍ਖਂ ਧਮਮਾਨੋ ਅਟ੍ਠਾਸਿ. ਸੋ ਕਿਰ ਸਙ੍ਖੋ ਵੀਸਹਤ੍ਥਸਤਿਕੋ ਹੋਤਿ. ਸਕਿਂ ਵਾਤਂ ਗਾਹਾਪੇਤ੍ਵਾ ਧਮਨ੍ਤੋ ਚਤ੍ਤਾਰੋ ਮਾਸੇ ਸਦ੍ਦਂ ਕਰਿਤ੍ਵਾ ਨਿਸ੍ਸਦ੍ਦੋ ਹੋਤਿ. ਮਹਾਕਾਲ਼ਨਾਗਰਾਜਾ ਅਤਿਰੇਕਪਦਸਤੇਨ ਵਣ੍ਣਂ ਵਦਨ੍ਤੋ ਅਟ੍ਠਾਸਿ, ਮਹਾਬ੍ਰਹ੍ਮਾ ਸੇਤਚ੍ਛਤ੍ਤਂ ਧਾਰਯਮਾਨੋ ਅਟ੍ਠਾਸਿ. ਮਾਰਬਲੇ ਪਨ ਬੋਧਿਮਣ੍ਡਂ ਉਪਸਙ੍ਕਮਨ੍ਤੇ ਤੇਸਂ ਏਕੋਪਿ ਠਾਤੁਂ ਨਾਸਕ੍ਖਿ, ਸਮ੍ਮੁਖਸਮ੍ਮੁਖਟ੍ਠਾਨੇਨੇਵ ਪਲਾਯਿਂਸੁ. ਕਾਲ਼ੋ ਨਾਗਰਾਜਾ ਪਥਵਿਯਂ ਨਿਮੁਜ੍ਜਿਤ੍ਵਾ ਪਞ੍ਚਯੋਜਨਸਤਿਕਂ ਮਞ੍ਜੇਰਿਕਨਾਗਭਵਨਂ ਗਨ੍ਤ੍ਵਾ ਉਭੋਹਿ ਹਤ੍ਥੇਹਿ ਮੁਖਂ ਪਿਦਹਿਤ੍ਵਾ ਨਿਪਨ੍ਨੋ. ਸਕ੍ਕੋ ਵਿਜਯੁਤ੍ਤਰਸਙ੍ਖਂ ਪਿਟ੍ਠਿਯਂ ਕਤ੍ਵਾ ਚਕ੍ਕਵਾਲ਼ਮੁਖਵਟ੍ਟਿਯਂ ਅਟ੍ਠਾਸਿ. ਮਹਾਬ੍ਰਹ੍ਮਾ ਸੇਤਚ੍ਛਤ੍ਤਂ ਚਕ੍ਕਵਾਲ਼ਕੋਟਿਯਂ ਠਪੇਤ੍ਵਾ ਬ੍ਰਹ੍ਮਲੋਕਮੇਵ ਅਗਮਾਸਿ. ਏਕਾ ਦੇਵਤਾਪਿ ਠਾਤੁਂ ਸਮਤ੍ਥਾ ਨਾਹੋਸਿ, ਮਹਾਪੁਰਿਸੋ ਏਕਕੋਵ ਨਿਸੀਦਿ.

ਮਾਰੋਪਿ ਅਤ੍ਤਨੋ ਪਰਿਸਂ ਆਹ ‘‘ਤਾਤਾ ਸੁਦ੍ਧੋਦਨਪੁਤ੍ਤੇਨ ਸਿਦ੍ਧਤ੍ਥੇਨ ਸਦਿਸੋ ਅਞ੍ਞੋ ਪੁਰਿਸੋ ਨਾਮ ਨਤ੍ਥਿ, ਮਯਂ ਸਮ੍ਮੁਖਾ ਯੁਦ੍ਧਂ ਦਾਤੁਂ ਨ ਸਕ੍ਖਿਸ੍ਸਾਮ, ਪਚ੍ਛਾਭਾਗੇਨ ਦਸ੍ਸਾਮਾ’’ਤਿ. ਮਹਾਪੁਰਿਸੋਪਿ ਤੀਣਿ ਪਸ੍ਸਾਨਿ ਓਲੋਕੇਤ੍ਵਾ ਸਬ੍ਬਦੇਵਤਾਨਂ ਪਲਾਤਤ੍ਤਾ ਸੁਞ੍ਞਾਨਿ ਅਦ੍ਦਸ. ਪੁਨ ਉਤ੍ਤਰਪਸ੍ਸੇਨ ਮਾਰਬਲਂ ਅਜ੍ਝੋਤ੍ਥਰਮਾਨਂ ਦਿਸ੍ਵਾ ‘‘ਅਯਂ ਏਤ੍ਤਕੋ ਜਨੋ ਮਂ ਏਕਕਂ ਸਨ੍ਧਾਯ ਮਹਨ੍ਤਂ ਵਾਯਾਮਂ ਪਰਕ੍ਕਮਂ ਕਰੋਤਿ, ਇਮਸ੍ਮਿਂ ਠਾਨੇ ਮਯ੍ਹਂ ਮਾਤਾ ਵਾ ਪਿਤਾ ਵਾ ਭਾਤਾ ਵਾ ਅਞ੍ਞੋ ਵਾ ਕੋਚਿ ਞਾਤਕੋ ਨਤ੍ਥਿ, ਇਮਾ ਪਨ ਦਸ ਪਾਰਮਿਯੋਵ ਮਯ੍ਹਂ ਦੀਘਰਤ੍ਤਂ ਪੁਟ੍ਠਪਰਿਜਨਸਦਿਸਾ, ਤਸ੍ਮਾ ਪਾਰਮਿਯੋਵ ਫਲਕਂ ਕਤ੍ਵਾ ਪਾਰਮਿਸਤ੍ਥੇਨੇਵ ਪਹਰਿਤ੍ਵਾ ਅਯਂ ਬਲਕਾਯੋ ਮਯਾ ਵਿਦ੍ਧਂਸੇਤੁਂ ਵਟ੍ਟਤੀ’’ਤਿ ਦਸ ਪਾਰਮਿਯੋ ਆਵਜ੍ਜਮਾਨੋ ਨਿਸੀਦਿ.

ਅਥ ਖੋ ਮਾਰੋ ਦੇਵਪੁਤ੍ਤੋ ‘‘ਏਤੇਨੇਵ ਸਿਦ੍ਧਤ੍ਥਂ ਪਲਾਪੇਸ੍ਸਾਮੀ’’ਤਿ ਵਾਤਮਣ੍ਡਲਂ ਸਮੁਟ੍ਠਾਪੇਸਿ. ਤਙ੍ਖਣਂਯੇਵ ਪੁਰਤ੍ਥਿਮਾਦਿਭੇਦਾ ਵਾਤਾ ਸਮੁਟ੍ਠਹਿਤ੍ਵਾ ਅਡ੍ਢਯੋਜਨਏਕਯੋਜਨਦ੍ਵਿਯੋਜਨਤਿਯੋਜਨਪ੍ਪਮਾਣਾਨਿ ਪਬ੍ਬਤਕੂਟਾਨਿ ਪਦਾਲੇਤ੍ਵਾ ਵਨਗਚ੍ਛਰੁਕ੍ਖਾਦੀਨਿ ਉਮ੍ਮੂਲੇਤ੍ਵਾ ਸਮਨ੍ਤਾ ਗਾਮਨਿਗਮੇ ਚੁਣ੍ਣਵਿਚੁਣ੍ਣਂ ਕਾਤੁਂ ਸਮਤ੍ਥਾਪਿ ਮਹਾਪੁਰਿਸਸ੍ਸ ਪੁਞ੍ਞਤੇਜੇਨ ਵਿਹਤਾਨੁਭਾਵਾ ਬੋਧਿਸਤ੍ਤਂ ਪਤ੍ਵਾ ਚੀਵਰਕਣ੍ਣਮਤ੍ਤਮ੍ਪਿ ਚਾਲੇਤੁਂ ਨਾਸਕ੍ਖਿਂਸੁ. ਤਤੋ ‘‘ਉਦਕੇਨ ਨ ਅਜ੍ਝੋਤ੍ਥਰਿਤ੍ਵਾ ਮਾਰੇਸ੍ਸਾਮੀ’’ਤਿ ਮਹਾਵਸ੍ਸਂ ਸਮੁਟ੍ਠਾਪੇਸਿ. ਤਸ੍ਸਾਨੁਭਾਵੇਨ ਉਪਰੂਪਰਿ ਸਤਪਟਲਸਹਸ੍ਸਪਟਲਾਦਿਭੇਦਾ ਵਲਾਹਕਾ ਉਟ੍ਠਹਿਤ੍ਵਾ ਵਸ੍ਸਿਂਸੁ. ਵੁਟ੍ਠਿਧਾਰਾਵੇਗੇਨ ਪਥਵੀ ਛਿਦ੍ਦਾ ਅਹੋਸਿ. ਵਨਰੁਕ੍ਖਾਦੀਨਂ ਉਪਰਿਭਾਗੇਨ ਮਹਾਮੇਘੋ ਆਗਨ੍ਤ੍ਵਾ ਮਹਾਸਤ੍ਤਸ੍ਸ ਚੀਵਰੇ ਉਸ੍ਸਾਵਬਿਨ੍ਦੁਟ੍ਠਾਨਮਤ੍ਤਮ੍ਪਿ ਤੇਮੇਤੁਂ ਨਾਸਕ੍ਖਿ. ਤਤੋ ਪਾਸਾਣਵਸ੍ਸਂ ਸਮੁਟ੍ਠਾਪੇਸਿ. ਮਹਨ੍ਤਾਨਿ ਮਹਨ੍ਤਾਨਿ ਪਬ੍ਬਤਕੂਟਾਨਿ ਧੂਮਾਯਨ੍ਤਾਨਿ ਪਜ੍ਜਲਨ੍ਤਾਨਿ ਆਕਾਸੇਨਾਗਨ੍ਤ੍ਵਾ ਬੋਧਿਸਤ੍ਤਂ ਪਤ੍ਵਾ ਦਿਬ੍ਬਮਾਲਾਗੁਲ਼ਭਾਵਂ ਆਪਜ੍ਜਿਂਸੁ. ਤਤੋ ਪਹਰਣਵਸ੍ਸਂ ਸਮੁਟ੍ਠਾਪੇਸਿ. ਏਕਤੋਧਾਰਾਉਭਤੋਧਾਰਾਅਸਿਸਤ੍ਤਿਖੁਰਪ੍ਪਾਦਯੋ ਧੂਮਾਯਨ੍ਤਾ ਪਜ੍ਜਲਨ੍ਤਾ ਆਕਾਸੇਨਾਗਨ੍ਤ੍ਵਾ ਬੋਧਿਸਤ੍ਤਂ ਪਤ੍ਵਾ ਦਿਬ੍ਬਪੁਪ੍ਫਾਨਿ ਅਹੇਸੁਂ. ਤਤੋ ਅਙ੍ਗਾਰਵਸ੍ਸਂ ਸਮੁਟ੍ਠਾਪੇਸਿ. ਕਿਂਸੁਕਵਣ੍ਣਾ ਅਙ੍ਗਾਰਾ ਆਕਾਸੇਨਾਗਨ੍ਤ੍ਵਾ ਬੋਧਿਸਤ੍ਤਸ੍ਸ ਪਾਦਮੂਲੇ ਦਿਬ੍ਬਪੁਪ੍ਫਾਨਿ ਹੁਤ੍ਵਾ ਵਿਕਿਰਿਂਸੁ. ਤਤੋ ਕੁਕ੍ਕੁਲ਼ਵਸ੍ਸਂ ਸਮੁਟ੍ਠਾਪੇਸਿ. ਅਚ੍ਚੁਣ੍ਹੋ ਅਗ੍ਗਿਵਣ੍ਣੋ ਕੁਕ੍ਕੁਲ਼ੋ ਆਕਾਸੇਨਾਗਨ੍ਤ੍ਵਾ ਬੋਧਿਸਤ੍ਤਸ੍ਸ ਪਾਦਮੂਲੇ ਦਿਬ੍ਬਚਨ੍ਦਨਚੁਣ੍ਣਂ ਹੁਤ੍ਵਾ ਨਿਪਤਿ. ਤਤੋ ਵਾਲੁਕਾਵਸ੍ਸਂ ਸਮੁਟ੍ਠਾਪੇਸਿ. ਅਤਿਸੁਖੁਮਵਾਲੁਕਾ ਧੂਮਾਯਨ੍ਤਾ ਪਜ੍ਜਲਨ੍ਤਾ ਆਕਾਸੇਨਾਗਨ੍ਤ੍ਵਾ ਬੋਧਿਸਤ੍ਤਸ੍ਸ ਪਾਦਮੂਲੇ ਦਿਬ੍ਬਪੁਪ੍ਫਾਨਿ ਹੁਤ੍ਵਾ ਨਿਪਤਿਂਸੁ. ਤਤੋ ਕਲਲਵਸ੍ਸਂ ਸਮੁਟ੍ਠਾਪੇਸਿ. ਤਂ ਕਲਲਂ ਧੂਮਾਯਨ੍ਤਂ ਪਜ੍ਜਲਨ੍ਤਂ ਆਕਾਸੇਨਾਗਨ੍ਤ੍ਵਾ ਬੋਧਿਸਤ੍ਤਸ੍ਸ ਪਾਦਮੂਲੇ ਦਿਬ੍ਬਵਿਲੇਪਨਂ ਹੁਤ੍ਵਾ ਨਿਪਤਿ. ਤਤੋ ‘‘ਇਮਿਨਾ ਭਿਂਸੇਤ੍ਵਾ ਸਿਦ੍ਧਤ੍ਥਂ ਪਲਾਪੇਸ੍ਸਾਮੀ’’ਤਿ ਅਨ੍ਧਕਾਰਂ ਸਮੁਟ੍ਠਾਪੇਸਿ. ਤਂ ਚਤੁਰਙ੍ਗਸਮਨ੍ਨਾਗਤਂ ਵਿਯ ਮਹਾਤਮਂ ਹੁਤ੍ਵਾ ਬੋਧਿਸਤ੍ਤਂ ਪਤ੍ਵਾ ਸੂਰਿਯਪ੍ਪਭਾਵਿਹਤਂ ਵਿਯ ਅਨ੍ਧਕਾਰਂ ਅਨ੍ਤਰਧਾਯਿ.

ਏਵਂ ਮਾਰੋ ਇਮਾਹਿ ਨਵਹਿ ਵਾਤਵਸ੍ਸਪਾਸਾਣਪਹਰਣਅਙ੍ਗਾਰਕੁਕ੍ਕੁਲ਼ਵਾਲੁਕਾਕਲਲਅਨ੍ਧਕਾਰਵੁਟ੍ਠੀਹਿ ਬੋਧਿਸਤ੍ਤਂ ਪਲਾਪੇਤੁਂ ਅਸਕ੍ਕੋਨ੍ਤੋ ‘‘ਕਿਂ ਭਣੇ, ਤਿਟ੍ਠਥ, ਇਮਂ ਸਿਦ੍ਧਤ੍ਥਕੁਮਾਰਂ ਗਣ੍ਹਥ ਹਨਥ ਪਲਾਪੇਥਾ’’ਤਿ ਪਰਿਸਂ ਆਣਾਪੇਤ੍ਵਾ ਸਯਮ੍ਪਿ ਗਿਰਿਮੇਖਲਸ੍ਸ ਹਤ੍ਥਿਨੋ ਖਨ੍ਧੇ ਨਿਸਿਨ੍ਨੋ ਚਕ੍ਕਾਵੁਧਂ ਆਦਾਯ ਬੋਧਿਸਤ੍ਤਂ ਉਪਸਙ੍ਕਮਿਤ੍ਵਾ ‘‘ਸਿਦ੍ਧਤ੍ਥ ਉਟ੍ਠਾਹਿ ਏਤਸ੍ਮਾ ਪਲ੍ਲਙ੍ਕਾ, ਨਾਯਂ ਤੁਯ੍ਹਂ ਪਾਪੁਣਾਤਿ, ਮਯ੍ਹਂ ਏਵ ਪਾਪੁਣਾਤੀ’’ਤਿ ਆਹ. ਮਹਾਸਤ੍ਤੋ ਤਸ੍ਸ ਵਚਨਂ ਸੁਤ੍ਵਾ ਅਵੋਚ – ‘‘ਮਾਰ, ਨੇਵ ਤਯਾ ਦਸ ਪਾਰਮਿਯੋ ਪੂਰਿਤਾ, ਨ ਉਪਪਾਰਮਿਯੋ, ਨ ਪਰਮਤ੍ਥਪਾਰਮਿਯੋ, ਨਾਪਿ ਪਞ੍ਚ ਮਹਾਪਰਿਚ੍ਚਾਗਾ ਪਰਿਚ੍ਚਤ੍ਤਾ, ਨ ਞਾਤਤ੍ਥਚਰਿਯਾ, ਨ ਲੋਕਤ੍ਥਚਰਿਯਾ, ਨ ਬੁਦ੍ਧਿਚਰਿਯਾ ਪੂਰਿਤਾ, ਸਬ੍ਬਾ ਤਾ ਮਯਾਯੇਵ ਪੂਰਿਤਾ, ਤਸ੍ਮਾ ਨਾਯਂ ਪਲ੍ਲਙ੍ਕੋ ਤੁਯ੍ਹਂ ਪਾਪੁਣਾਤਿ, ਮਯ੍ਹੇਵੇਸੋ ਪਾਪੁਣਾਤੀ’’ਤਿ.

ਮਾਰੋ ਕੁਦ੍ਧੋ ਕੋਧਵੇਗਂ ਅਸਹਨ੍ਤੋ ਮਹਾਪੁਰਿਸਸ੍ਸ ਚਕ੍ਕਾਵੁਧਂ ਵਿਸ੍ਸਜ੍ਜੇਸਿ. ਤਂ ਤਸ੍ਸ ਦਸ ਪਾਰਮਿਯੋ ਆਵਜ੍ਜੇਨ੍ਤਸ੍ਸ ਉਪਰਿਭਾਗੇ ਮਾਲਾਵਿਤਾਨਂ ਹੁਤ੍ਵਾ ਅਟ੍ਠਾਸਿ. ਤਂ ਕਿਰ ਖੁਰਧਾਰਚਕ੍ਕਾਵੁਧਂ ਅਞ੍ਞਦਾ ਤੇਨ ਕੁਦ੍ਧੇਨ ਵਿਸ੍ਸਟ੍ਠਂ ਏਕਘਨਪਾਸਾਣਤ੍ਥਮ੍ਭੇ ਵਂਸਕਲ਼ੀਰੇ ਵਿਯ ਛਿਨ੍ਦਨ੍ਤਂ ਗਚ੍ਛਤਿ, ਇਦਾਨਿ ਪਨ ਤਸ੍ਮਿਂ ਮਾਲਾਵਿਤਾਨਂ ਹੁਤ੍ਵਾ ਠਿਤੇ ਅਵਸੇਸਾ ਮਾਰਪਰਿਸਾ ‘‘ਇਦਾਨਿ ਪਲ੍ਲਙ੍ਕਤੋ ਵੁਟ੍ਠਾਯ ਪਲਾਯਿਸ੍ਸਤੀ’’ਤਿ ਮਹਨ੍ਤਮਹਨ੍ਤਾਨਿ ਸੇਲਕੂਟਾਨਿ ਵਿਸ੍ਸਜ੍ਜੇਸੁਂ. ਤਾਨਿਪਿ ਮਹਾਪੁਰਿਸਸ੍ਸ ਦਸ ਪਾਰਮਿਯੋ ਆਵਜ੍ਜੇਨ੍ਤਸ੍ਸ ਮਾਲਾਗੁਲ਼ਭਾਵਂ ਆਪਜ੍ਜਿਤ੍ਵਾ ਭੂਮਿਯਂ ਪਤਿਂਸੁ. ਦੇਵਤਾ ਚਕ੍ਕਵਾਲ਼ਮੁਖਵਟ੍ਟਿਯਂ ਠਿਤਾ ਗੀਵਂ ਪਸਾਰੇਤ੍ਵਾ ਸੀਸਂ ਉਕ੍ਖਿਪਿਤ੍ਵਾ ‘‘ਨਟ੍ਠੋ ਵਤ ਸੋ ਸਿਦ੍ਧਤ੍ਥਕੁਮਾਰਸ੍ਸ ਰੂਪਗ੍ਗਪ੍ਪਤ੍ਤੋ ਅਤ੍ਤਭਾਵੋ, ਕਿਂ ਨੁ ਖੋ ਕਰਿਸ੍ਸਤੀ’’ਤਿ ਓਲੋਕੇਨ੍ਤਿ.

ਤਤੋ ਮਹਾਪੁਰਿਸੋ ‘‘ਪੂਰਿਤਪਾਰਮੀਨਂ ਬੋਧਿਸਤ੍ਤਾਨਂ ਅਭਿਸਮ੍ਬੁਜ੍ਝਨਦਿਵਸੇ ਪਤ੍ਤਪਲ੍ਲਙ੍ਕੋ ਮਯ੍ਹਂਵ ਪਾਪੁਣਾਤੀ’’ਤਿ ਵਤ੍ਵਾ ਠਿਤਂ ਮਾਰਂ ਆਹ – ‘‘ਮਾਰ ਤੁਯ੍ਹਂ ਦਾਨਸ੍ਸ ਦਿਨ੍ਨਭਾਵੇ ਕੋ ਸਕ੍ਖੀ’’ਤਿ. ਮਾਰੋ ‘‘ਇਮੇ ਏਤ੍ਤਕਾ ਜਨਾ ਸਕ੍ਖਿਨੋ’’ਤਿ ਮਾਰਬਲਾਭਿਮੁਖਂ ਹਤ੍ਥਂ ਪਸਾਰੇਸਿ. ਤਸ੍ਮਿਂ ਖਣੇ ਮਾਰਪਰਿਸਾਯ ‘‘ਅਹਂ ਸਕ੍ਖੀ, ਅਹਂ ਸਕ੍ਖੀ’’ਤਿ ਪਵਤ੍ਤਸਦ੍ਦੋ ਪਥਵਿਉਨ੍ਦ੍ਰਿਯਨਸਦ੍ਦਸਦਿਸੋ ਅਹੋਸਿ. ਅਥ ਮਾਰੋ ਮਹਾਪੁਰਿਸਂ ਆਹ ‘‘ਸਿਦ੍ਧਤ੍ਥ, ਤੁਯ੍ਹਂ ਦਾਨਸ੍ਸ ਦਿਨ੍ਨਭਾਵੇ ਕੋ ਸਕ੍ਖੀ’’ਤਿ. ਮਹਾਪੁਰਿਸੋ ‘‘ਤੁਯ੍ਹਂ ਤਾਵ ਦਾਨਸ੍ਸ ਦਿਨ੍ਨਭਾਵੇ ਸਚੇਤਨਾ ਸਕ੍ਖਿਨੋ, ਮਯ੍ਹਂ ਪਨ ਇਮਸ੍ਮਿਂ ਠਾਨੇ ਸਚੇਤਨੋ ਕੋਚਿ ਸਕ੍ਖੀ ਨਾਮ ਨਤ੍ਥਿ, ਤਿਟ੍ਠਤੁ ਤਾਵ ਮੇ ਅਵਸੇਸਤ੍ਤਭਾਵੇਸੁ ਦਿਨ੍ਨਦਾਨਂ, ਵੇਸ੍ਸਨ੍ਤਰਤ੍ਤਭਾਵੇ ਪਨ ਠਤ੍ਵਾ ਮਯ੍ਹਂ ਸਤ੍ਤਸਤਕਮਹਾਦਾਨਸ੍ਸ ਦਿਨ੍ਨਭਾਵੇ ਅਯਂ ਅਚੇਤਨਾਪਿ ਘਨਮਹਾਪਥਵੀ ਸਕ੍ਖੀ’’ਤਿ ਚੀਵਰਗਬ੍ਭਨ੍ਤਰਤੋ ਦਕ੍ਖਿਣਹਤ੍ਥਂ ਅਭਿਨੀਹਰਿਤ੍ਵਾ ‘‘ਵੇਸ੍ਸਨ੍ਤਰਤ੍ਤਭਾਵੇ ਠਤ੍ਵਾ ਮਯ੍ਹਂ ਸਤ੍ਤਸਤਕਮਹਾਦਾਨਸ੍ਸ ਦਿਨ੍ਨਭਾਵੇ ਤ੍ਵਂ ਸਕ੍ਖੀ ਨ ਸਕ੍ਖੀ’’ਤਿ ਮਹਾਪਥਵਿਅਭਿਮੁਖਂ ਹਤ੍ਥਂ ਪਸਾਰੇਸਿ. ਮਹਾਪਥਵੀ ‘‘ਅਹਂ ਤੇ ਤਦਾ ਸਕ੍ਖੀ’’ਤਿ ਵਿਰਵਸਤੇਨ ਵਿਰਵਸਹਸ੍ਸੇਨ ਵਿਰਵਸਤਸਹਸ੍ਸੇਨ ਮਾਰਬਲਂ ਅਵਤ੍ਥਰਮਾਨਾ ਵਿਯ ਉਨ੍ਨਦਿ.

ਤਤੋ ਮਹਾਪੁਰਿਸੇ ‘‘ਦਿਨ੍ਨਂ ਤੇ ਸਿਦ੍ਧਤ੍ਥ ਮਹਾਦਾਨਂ ਉਤ੍ਤਮਦਾਨ’’ਨ੍ਤਿ ਵੇਸ੍ਸਨ੍ਤਰਦਾਨਂ ਸਮ੍ਮਸਨ੍ਤੇ ਦਿਯਡ੍ਢਯੋਜਨਸਤਿਕੋ ਗਿਰਿਮੇਖਲਹਤ੍ਥੀ ਜਣ੍ਣੁਕੇਹਿ ਪਥਵਿਯਂ ਪਤਿਟ੍ਠਾਸਿ, ਮਾਰਪਰਿਸਾ ਦਿਸਾਵਿਦਿਸਾ ਪਲਾਯਿ, ਦ੍ਵੇ ਏਕਮਗ੍ਗੇਨ ਗਤਾ ਨਾਮ ਨਤ੍ਥਿ, ਸੀਸਾਭਰਣਾਨਿ ਚੇਵ ਨਿਵਤ੍ਥਵਤ੍ਥਾਨਿ ਚ ਪਹਾਯ ਸਮ੍ਮੁਖਸਮ੍ਮੁਖਦਿਸਾਹਿਯੇਵ ਪਲਾਯਿਂਸੁ. ਤਤੋ ਦੇਵਸਙ੍ਘਾ ਪਲਾਯਮਾਨਂ ਮਾਰਬਲਂ ਦਿਸ੍ਵਾ ‘‘ਮਾਰਸ੍ਸ ਪਰਾਜਯੋ ਜਾਤੋ, ਸਿਦ੍ਧਤ੍ਥਕੁਮਾਰਸ੍ਸ ਜਯੋ, ਜਯਪੂਜਂ ਕਰਿਸ੍ਸਾਮਾ’’ਤਿ ਨਾਗਾ ਨਾਗਾਨਂ, ਸੁਪਣ੍ਣਾ ਸੁਪਣ੍ਣਾਨਂ, ਦੇਵਤਾ ਦੇਵਤਾਨਂ, ਬ੍ਰਹ੍ਮਾਨੋ ਬ੍ਰਹ੍ਮਾਨਂ, ਉਗ੍ਘੋਸੇਤ੍ਵਾ ਗਨ੍ਧਮਾਲਾਦਿਹਤ੍ਥਾ ਮਹਾਪੁਰਿਸਸ੍ਸ ਸਨ੍ਤਿਕਂ ਬੋਧਿਪਲ੍ਲਙ੍ਕਂ ਅਗਮਂਸੁ.

ਏਵਂ ਗਤੇਸੁ ਚ ਪਨ ਤੇਸੁ –

‘‘ਜਯੋ ਹਿ ਬੁਦ੍ਧਸ੍ਸ ਸਿਰੀਮਤੋ ਅਯਂ, ਮਾਰਸ੍ਸ ਚ ਪਾਪਿਮਤੋ ਪਰਾਜਯੋ;

ਉਗ੍ਘੋਸਯੁਂ ਬੋਧਿਮਣ੍ਡੇ ਪਮੋਦਿਤਾ, ਜਯਂ ਤਦਾ ਨਾਗਗਣਾ ਮਹੇਸਿਨੋ.

‘‘ਜਯੋ ਹਿ ਬੁਦ੍ਧਸ੍ਸ ਸਿਰੀਮਤੋ ਅਯਂ, ਮਾਰਸ੍ਸ ਚ ਪਾਪਿਮਤੋ ਪਰਾਜਯੋ;

ਉਗ੍ਘੋਸਯੁਂ ਬੋਧਿਮਣ੍ਡੇ ਪਮੋਦਿਤਾ, ਸੁਪਣ੍ਣਸਙ੍ਘਾਪਿ ਜਯਂ ਮਹੇਸਿਨੋ.

‘‘ਜਯੋ ਹਿ ਬੁਦ੍ਧਸ੍ਸ ਸਿਰੀਮਤੋ ਅਯਂ, ਮਾਰਸ੍ਸ ਚ ਪਾਪਿਮਤੋ ਪਰਾਜਯੋ;

ਉਗ੍ਘੋਸਯੁਂ ਬੋਧਿਮਣ੍ਡੇ ਪਮੋਦਿਤਾ, ਜਯਂ ਤਦਾ ਦੇਵਗਣਾ ਮਹੇਸਿਨੋ.

‘‘ਜਯੋ ਹਿ ਬੁਦ੍ਧਸ੍ਸ ਸਿਰੀਮਤੋ ਅਯਂ, ਮਾਰਸ੍ਸ ਚ ਪਾਪਿਮਤੋ ਪਰਾਜਯੋ;

ਉਗ੍ਘੋਸਯੁਂ ਬੋਧਿਮਣ੍ਡੇ ਪਮੋਦਿਤਾ, ਜਯਂ ਤਦਾ ਬ੍ਰਹ੍ਮਗਣਾਪਿ ਤਾਦਿਨੋ’’ਤਿ.

ਅਵਸੇਸਾ ਦਸਸੁ ਚਕ੍ਕਵਾਲ਼ਸਹਸ੍ਸੇਸੁ ਦੇਵਤਾ ਮਾਲਾਗਨ੍ਧਵਿਲੇਪਨੇਹਿ ਚ ਪੂਜਯਮਾਨਾ ਨਾਨਪ੍ਪਕਾਰਾ ਥੁਤਿਯੋ ਚ ਵਦਮਾਨਾ ਅਟ੍ਠਂਸੁ. ਏਵਂ ਅਨਤ੍ਥਙ੍ਗਤੇਯੇਵ ਸੂਰਿਯੇ ਮਹਾਪੁਰਿਸੋ ਮਾਰਬਲਂ ਵਿਧਮੇਤ੍ਵਾ ਚੀਵਰੂਪਰਿ ਪਤਮਾਨੇਹਿ ਬੋਧਿਰੁਕ੍ਖਙ੍ਕੁਰੇਹਿ ਰਤ੍ਤਪਵਾਲ਼ਪਲ੍ਲਵੇਹਿ ਵਿਯ ਪੂਜਿਯਮਾਨੋ ਪਠਮਯਾਮੇ ਪੁਬ੍ਬੇਨਿਵਾਸਞਾਣਂ ਅਨੁਸ੍ਸਰਿਤ੍ਵਾ, ਮਜ੍ਝਿਮਯਾਮੇ ਦਿਬ੍ਬਚਕ੍ਖੁਂ ਵਿਸੋਧੇਤ੍ਵਾ, ਪਚ੍ਛਿਮਯਾਮੇ ਪਟਿਚ੍ਚਸਮੁਪ੍ਪਾਦੇ ਞਾਣਂ ਓਤਾਰੇਸਿ. ਅਥਸ੍ਸ ਦ੍ਵਾਦਸਪਦਿਕਂ ਪਚ੍ਚਯਾਕਾਰਂ ਵਟ੍ਟਵਿਵਟ੍ਟਵਸੇਨ ਅਨੁਲੋਮਪਟਿਲੋਮਤੋ ਸਮ੍ਮਸਨ੍ਤਸ੍ਸ ਦਸਸਹਸ੍ਸੀ ਲੋਕਧਾਤੁ ਉਦਕਪਰਿਯਨ੍ਤਂ ਕਤ੍ਵਾ ਦ੍ਵਾਦਸਕ੍ਖਤ੍ਤੁਂ ਸਮ੍ਪਕਮ੍ਪਿ.

ਮਹਾਪੁਰਿਸੇ ਪਨ ਦਸਸਹਸ੍ਸਿਲੋਕਧਾਤੁਂ ਉਨ੍ਨਾਦੇਤ੍ਵਾ ਅਰੁਣੁਗ੍ਗਮਨਵੇਲਾਯ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਨ੍ਤੇ ਸਕਲਦਸਸਹਸ੍ਸੀ ਲੋਕਧਾਤੁ ਅਲਙ੍ਕਤਪਟਿਯਤ੍ਤਾ ਅਹੋਸਿ. ਪਾਚੀਨਚਕ੍ਕਵਾਲ਼ਮੁਖਵਟ੍ਟਿਯਂ ਉਸ੍ਸਾਪਿਤਾਨਂ ਧਜਾਨਂ ਪਟਾਕਾਨਂ ਰਂਸਿਯੋ ਪਚ੍ਛਿਮਚਕ੍ਕਵਾਲ਼ਮੁਖਵਟ੍ਟਿਯਂ ਪਹਰਨ੍ਤਿ, ਤਥਾ ਪਚ੍ਛਿਮਚਕ੍ਕਵਾਲ਼ਮੁਖਵਟ੍ਟਿਯਂ ਉਸ੍ਸਾਪਿਤਾਨਂ ਪਾਚੀਨਚਕ੍ਕਵਾਲ਼ਮੁਖਵਟ੍ਟਿਯਂ, ਦਕ੍ਖਿਣਚਕ੍ਕਵਾਲ਼ਮੁਖਵਟ੍ਟਿਯਂ ਉਸ੍ਸਾਪਿਤਾਨਂ ਉਤ੍ਤਰਚਕ੍ਕਵਾਲ਼ਮੁਖਵਟ੍ਟਿਯਂ, ਉਤ੍ਤਰਚਕ੍ਕਵਾਲ਼ਮੁਖਵਟ੍ਟਿਯਂ ਉਸ੍ਸਾਪਿਤਾਨਂ ਦਕ੍ਖਿਣਚਕ੍ਕਵਾਲ਼ਮੁਖਵਟ੍ਟਿਯਂ ਪਹਰਨ੍ਤਿ, ਪਥਵਿਤਲੇ ਉਸ੍ਸਾਪਿਤਾਨਂ ਪਨ ਧਜਾਨਂ ਪਟਾਕਾਨਂ ਬ੍ਰਹ੍ਮਲੋਕਂ ਆਹਚ੍ਚ ਅਟ੍ਠਂਸੁ, ਬ੍ਰਹ੍ਮਲੋਕੇ ਬਦ੍ਧਾਨਂ ਪਥਵਿਤਲੇ ਪਤਿਟ੍ਠਹਿਂਸੁ, ਦਸਸਹਸ੍ਸਚਕ੍ਕਵਾਲ਼ੇਸੁ ਪੁਪ੍ਫੂਪਗਰੁਕ੍ਖਾ ਪੁਪ੍ਫਂ ਗਣ੍ਹਿਂਸੁ, ਫਲੂਪਗਰੁਕ੍ਖਾ ਫਲਪਿਣ੍ਡੀਭਾਰਭਰਿਤਾ ਅਹੇਸੁਂ. ਖਨ੍ਧੇਸੁ ਖਨ੍ਧਪਦੁਮਾਨਿ ਪੁਪ੍ਫਿਂਸੁ, ਸਾਖਾਸੁ ਸਾਖਾਪਦੁਮਾਨਿ, ਲਤਾਸੁ ਲਤਾਪਦੁਮਾਨਿ, ਆਕਾਸੇ ਓਲਮ੍ਬਕਪਦੁਮਾਨਿ, ਸਿਲਾਤਲਾਨਿ ਭਿਨ੍ਦਿਤ੍ਵਾ ਉਪਰੂਪਰਿ ਸਤ੍ਤ ਸਤ੍ਤ ਹੁਤ੍ਵਾ ਦਣ੍ਡਕਪਦੁਮਾਨਿ ਉਟ੍ਠਹਿਂਸੁ. ਦਸਸਹਸ੍ਸੀ ਲੋਕਧਾਤੁ ਵਟ੍ਟੇਤ੍ਵਾ ਵਿਸ੍ਸਟ੍ਠਮਾਲਾਗੁਲ਼ਾ ਵਿਯ ਸੁਸਨ੍ਥਤਪੁਪ੍ਫਸਨ੍ਥਾਰੋ ਵਿਯ ਚ ਅਹੋਸਿ. ਚਕ੍ਕਵਾਲ਼ਨ੍ਤਰੇਸੁ ਅਟ੍ਠਯੋਜਨਸਹਸ੍ਸਲੋਕਨ੍ਤਰਿਕਾ ਸਤ੍ਤਸੂਰਿਯਪ੍ਪਭਾਯਪਿ ਅਨੋਭਾਸਿਤਪੁਬ੍ਬਾ ਏਕੋਭਾਸਾ ਅਹੇਸੁਂ, ਚਤੁਰਾਸੀਤਿਯੋਜਨਸਹਸ੍ਸਗਮ੍ਭੀਰੋ ਮਹਾਸਮੁਦ੍ਦੋ ਮਧੁਰੋਦਕੋ ਅਹੋਸਿ, ਨਦਿਯੋ ਨਪ੍ਪਵਤ੍ਤਿਂਸੁ, ਜਚ੍ਚਨ੍ਧਾ ਰੂਪਾਨਿ ਪਸ੍ਸਿਂਸੁ, ਜਾਤਿਬਧਿਰਾ ਸਦ੍ਦਂ ਸੁਣਿਂਸੁ, ਜਾਤਿਪੀਠਸਪ੍ਪਿਨੋ ਪਦਸਾ ਗਚ੍ਛਿਂਸੁ, ਅਨ੍ਦੁਬਨ੍ਧਨਾਦੀਨਿ ਛਿਜ੍ਜਿਤ੍ਵਾ ਪਤਿਂਸੁ.

ਏਵਂ ਅਪਰਿਮਾਣੇਨ ਸਿਰਿਵਿਭਵੇਨ ਪੂਜਿਯਮਾਨੋ ਮਹਾਪੁਰਿਸੋ ਅਨੇਕਪ੍ਪਕਾਰੇਸੁ ਅਚ੍ਛਰਿਯਧਮ੍ਮੇਸੁ ਪਾਤੁਭੂਤੇਸੁ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿਤ੍ਵਾ ਸਬ੍ਬਬੁਦ੍ਧਾਨਂ ਅਵਿਜਹਿਤਂ ਉਦਾਨਂ ਉਦਾਨੇਸਿ –

‘‘ਅਨੇਕਜਾਤਿਸਂਸਾਰਂ, ਸਨ੍ਧਾਵਿਸ੍ਸਂ ਅਨਿਬ੍ਬਿਸਂ;

ਗਹਕਾਰਂ ਗਵੇਸਨ੍ਤੋ, ਦੁਕ੍ਖਾ ਜਾਤਿ ਪੁਨਪ੍ਪੁਨਂ.

‘‘ਗਹਕਾਰਕ ਦਿਟ੍ਠੋਸਿ, ਪੁਨ ਗੇਹਂ ਨ ਕਾਹਸਿ;

ਸਬ੍ਬਾ ਤੇ ਫਾਸੁਕਾ ਭਗ੍ਗਾ, ਗਹਕੂਟਂ ਵਿਸਙ੍ਖਤਂ;

ਵਿਸਙ੍ਖਾਰਗਤਂ ਚਿਤ੍ਤਂ, ਤਣ੍ਹਾਨਂ ਖਯਮਜ੍ਝਗਾ’’ਤਿ. (ਧ. ਪ. ੧੫੩-੧੫੪);

ਇਤਿ ਤੁਸਿਤਪੁਰਤੋ ਪਟ੍ਠਾਯ ਯਾਵ ਅਯਂ ਬੋਧਿਮਣ੍ਡੇ ਸਬ੍ਬਞ੍ਞੁਤਪ੍ਪਤ੍ਤਿ, ਏਤ੍ਤਕਂ ਠਾਨਂ ਅਵਿਦੂਰੇਨਿਦਾਨਂ ਨਾਮਾਤਿ ਵੇਦਿਤਬ੍ਬਂ.

ਅਵਿਦੂਰੇਨਿਦਾਨਕਥਾ ਨਿਟ੍ਠਿਤਾ.