੨੨. ਮਹਾਨਿਪਾਤੋ
[੫੩੮] ੧. ਮੂਗਪਕ੍ਖਜਾਤਕਵਣ੍ਣਨਾ
ਮਾ ਪਣ੍ਡਿਚ੍ਚਯਂ ਵਿਭਾਵਯਾਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਮਹਾਭਿਨਿਕ੍ਖਮਨਂ ਆਰਬ੍ਭ ਕਥੇਸਿ. ਏਕਦਿਵਸਞ੍ਹਿ ਭਿਕ੍ਖੂ ਧਮ੍ਮਸਭਾਯਂ ਸਨ੍ਨਿਸਿਨ੍ਨਾ ਭਗਵਤੋ ਨੇਕ੍ਖਮ੍ਮਪਾਰਮਿਂ ਵਣ੍ਣਯਨ੍ਤਾ ਨਿਸੀਦਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਭਿਕ੍ਖਵੇ, ਇਦਾਨਿ ਮਮ ਪੂਰਿਤਪਾਰਮਿਸ੍ਸ ਰਜ੍ਜਂ ਛਡ੍ਡੇਤ੍ਵਾ ਮਹਾਭਿਨਿਕ੍ਖਮਨਂ ਨਾਮ ਅਨਚ੍ਛਰਿਯਂ. ਅਹਞ੍ਹਿ ਪੁਬ੍ਬੇ ਅਪਰਿਪਕ੍ਕੇ ਞਾਣੇ ਪਾਰਮਿਯੋ ਪੂਰੇਨ੍ਤੋਪਿ ਰਜ੍ਜਂ ਛਡ੍ਡੇਤ੍ਵਾ ਨਿਕ੍ਖਨ੍ਤੋਯੇਵਾ’’ਤਿ ਵਤ੍ਵਾ ਤੇਹਿ ਯਾਚਿਤੋ ਅਤੀਤਂ ਆਹਰਿ.
ਅਤੀਤੇ ਕਾਸਿਰਟ੍ਠੇ ਬਾਰਾਣਸਿਯਂ ਕਾਸਿਰਾਜਾ ਨਾਮ ਧਮ੍ਮੇਨ ਰਜ੍ਜਂ ਕਾਰੇਸਿ. ਤਸ੍ਸ ਸੋਲ਼ਸਸਹਸ੍ਸਾ ਇਤ੍ਥਿਯੋ ਅਹੇਸੁਂ. ਤਾਸੁ ਏਕਾਪਿ ਪੁਤ੍ਤਂ ਵਾ ਧੀਤਰਂ ਵਾ ਨ ਲਭਿ. ਨਾਗਰਾ ‘‘ਅਮ੍ਹਾਕਂ ਰਞ੍ਞੋ ਵਂਸਾਨੁਰਕ੍ਖਕੋ ਏਕੋਪਿ ਪੁਤ੍ਤੋ ਨਤ੍ਥੀ’’ਤਿ ਰਾਜਙ੍ਗਣੇ ਸਨ੍ਨਿਪਤਿਤ੍ਵਾ ਕੁਸਜਾਤਕੇ (ਜਾ. ੨.੨੦.੧ ਆਦਯੋ) ਆਗਤਨਯੇਨੇਵ ਰਾਜਾਨਂ ਏਵਮਾਹਂਸੁ ‘‘ਦੇਵ, ਪੁਤ੍ਤਂ ਪਤ੍ਥੇਥਾ’’ਤਿ. ਰਾਜਾ ਤੇਸਂ ਵਚਨਂ ਸੁਤ੍ਵਾ ਸੋਲ਼ਸਸਹਸ੍ਸਾ ਇਤ੍ਥਿਯੋ ‘‘ਤੁਮ੍ਹੇ ਪੁਤ੍ਤਂ ਪਤ੍ਥੇਥਾ’’ਤਿ ਆਣਾਪੇਸਿ. ਤਾ ਚਨ੍ਦਾਦੀਨਂ ਦੇਵਤਾਨਂ ਆਯਾਚਨਉਪਟ੍ਠਾਨਾਦੀਨਿ ਕਤ੍ਵਾ ਪਤ੍ਥੇਨ੍ਤਿਯੋਪਿ ਪੁਤ੍ਤਂ ਵਾ ਧੀਤਰਂ ਵਾ ਨ ਲਭਿਂਸੁ. ਅਗ੍ਗਮਹੇਸੀ ਪਨਸ੍ਸ ਮਦ੍ਦਰਾਜਧੀਤਾ ਚਨ੍ਦਾਦੇਵੀ ਨਾਮ ਸੀਲਸਮ੍ਪਨ੍ਨਾ ਅਹੋਸਿ. ਰਾਜਾ ‘‘ਭਦ੍ਦੇ, ਤ੍ਵਮ੍ਪਿ ਪੁਤ੍ਤਂ ਪਤ੍ਥੇਹੀ’’ਤਿ ਆਹ. ਸਾ ਪੁਣ੍ਣਮਦਿਵਸੇ ਉਪੋਸਥਂ ਸਮਾਦਿਯਿਤ੍ਵਾ ਚੂਲ਼ਸਯਨੇ ਨਿਪਨ੍ਨਾਵ ਅਤ੍ਤਨੋ ਸੀਲਂ ਆਵਜ੍ਜੇਤ੍ਵਾ ‘‘ਸਚਾਹਂ ਅਖਣ੍ਡਸੀਲਾ ਇਮਿਨਾ ਮੇ ਸਚ੍ਚੇਨ ਪੁਤ੍ਤੋ ਉਪ੍ਪਜ੍ਜਤੂ’’ਤਿ ਸਚ੍ਚਕਿਰਿਯਂ ਅਕਾਸਿ.
ਤਸ੍ਸਾ ਸੀਲਤੇਜੇਨ ਸਕ੍ਕਸ੍ਸ ਭਵਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ਆਵਜ੍ਜੇਨ੍ਤੋ ਤਂ ਕਾਰਣਂ ਞਤ੍ਵਾ ‘‘ਚਨ੍ਦਾਦੇਵੀ ਪੁਤ੍ਤਂ ਪਤ੍ਥੇਤਿ, ਹਨ੍ਦਾਹਂ ਪੁਤ੍ਤਂ ਦਸ੍ਸਾਮੀ’’ਤਿ ਤਸ੍ਸਾਨੁਚ੍ਛਵਿਕਂ ਪੁਤ੍ਤਂ ਉਪਧਾਰੇਨ੍ਤੋ ਬੋਧਿਸਤ੍ਤਂ ਪਸ੍ਸਿ. ਬੋਧਿਸਤ੍ਤੋਪਿ ਤਦਾਵੀਸਤਿਵਸ੍ਸਾਨਿ ਬਾਰਾਣਸਿਯਂ ਰਜ੍ਜਂ ਕਾਰੇਤ੍ਵਾ ਤਤੋ ਚੁਤੋ ਉਸ੍ਸਦਨਿਰਯੇ ਨਿਬ੍ਬਤ੍ਤਿਤ੍ਵਾ ਅਸੀਤਿਵਸ੍ਸਸਹਸ੍ਸਾਨਿ ਤਤ੍ਥ ਪਚ੍ਚਿਤ੍ਵਾ ਤਤੋ ਚਵਿਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਤਤ੍ਥਾਪਿ ਯਾਵਤਾਯੁਕਂ ਠਤ੍ਵਾ ਤਤੋ ਚਵਿਤ੍ਵਾ ਉਪਰਿਦੇਵਲੋਕਂ ਗਨ੍ਤੁਕਾਮੋ ਅਹੋਸਿ. ਸਕ੍ਕੋ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਮਾਰਿਸ, ਤਯਿ ਮਨੁਸ੍ਸਲੋਕੇ ਉਪ੍ਪਨ੍ਨੇ ਪਾਰਮਿਯੋ ਚ ਤੇ ਪੂਰਿਸ੍ਸਨ੍ਤਿ, ਮਹਾਜਨਸ੍ਸ ਵੁਡ੍ਢਿ ਚ ਭਵਿਸ੍ਸਤਿ, ਅਯਂ ਕਾਸਿਰਞ੍ਞੋ ਚਨ੍ਦਾਦੇਵੀ ਨਾਮ ਅਗ੍ਗਮਹੇਸੀ ਪੁਤ੍ਤਂ ਪਤ੍ਥੇਤਿ, ਤਸ੍ਸਾ ਕੁਚ੍ਛਿਯਂ ਉਪ੍ਪਜ੍ਜਾਹੀ’’ਤਿ ਵਤ੍ਵਾ ਅਞ੍ਞੇਸਞ੍ਚ ਚਵਨਧਮ੍ਮਾਨਂ ਪਞ੍ਚਸਤਾਨਂ ਦੇਵਪੁਤ੍ਤਾਨਂ ਪਟਿਞ੍ਞਂ ਗਹੇਤ੍ਵਾ ਸਕਟ੍ਠਾਨਮੇਵ ਅਗਮਾਸਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਪਞ੍ਚਹਿ ਦੇਵਪੁਤ੍ਤਸਤੇਹਿ ਸਦ੍ਧਿਂ ਦੇਵਲੋਕਤੋ ਚਵਿਤ੍ਵਾ ਸਯਂ ਚਨ੍ਦਾਦੇਵਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਇਤਰੇ ਪਨ ਦੇਵਪੁਤ੍ਤਾ ਅਮਚ੍ਚਭਰਿਯਾਨਂ ਕੁਚ੍ਛੀਸੁ ਪਟਿਸਨ੍ਧਿਂ ਗਣ੍ਹਿਂਸੁ.
ਤਦਾ ਚਨ੍ਦਾਦੇਵਿਯਾ ਕੁਚ੍ਛਿ ਵਜਿਰਪੁਣ੍ਣਾ ਵਿਯ ਅਹੋਸਿ. ਸਾ ਗਬ੍ਭਸ੍ਸ ਪਤਿਟ੍ਠਿਤਭਾਵਂ ਞਤ੍ਵਾ ਰਞ੍ਞੋ ਆਰੋਚੇਸਿ. ਤਂ ਸੁਤ੍ਵਾ ਰਾਜਾ ਗਬ੍ਭਸ੍ਸ ਪਰਿਹਾਰਂ ਦਾਪੇਸਿ. ਸਾ ਪਰਿਪੁਣ੍ਣਗਬ੍ਭਾ ਦਸਮਾਸਚ੍ਚਯੇਨ ਧਞ੍ਞਪੁਞ੍ਞਲਕ੍ਖਣਸਮ੍ਪਨ੍ਨਂ ਪੁਤ੍ਤਂ ਵਿਜਾਯਿ. ਤਂ ਦਿਵਸਮੇਵ ਅਮਚ੍ਚਗੇਹੇਸੁ ਪਞ੍ਚ ਕੁਮਾਰਸਤਾਨਿ ਜਾਯਿਂਸੁ. ਤਸ੍ਮਿਂ ਖਣੇ ਰਾਜਾ ਅਮਚ੍ਚਗਣਪਰਿਵੁਤੋ ਮਹਾਤਲੇ ਨਿਸਿਨ੍ਨੋ ਅਹੋਸਿ. ਅਥਸ੍ਸ ‘‘ਪੁਤ੍ਤੋ, ਤੇ ਦੇਵ, ਜਾਤੋ’’ਤਿ ਆਰੋਚਯਿਂਸੁ. ਤੇਸਂ ਵਚਨਂ ਸੁਤ੍ਵਾ ਰਞ੍ਞੋ ਪੁਤ੍ਤਪੇਮਂ ਉਪ੍ਪਜ੍ਜਿਤ੍ਵਾ ਛਵਿਯਾਦੀਨਿ ਛਿਨ੍ਦਿਤ੍ਵਾ ਅਟ੍ਠਿਮਿਞ੍ਜਂ ਆਹਚ੍ਚ ਅਟ੍ਠਾਸਿ, ਅਬ੍ਭਨ੍ਤਰੇ ਪੀਤਿ ਉਪ੍ਪਜ੍ਜਿ, ਹਦਯਂ ਸੀਤਲਂ ਜਾਤਂ. ਸੋ ਅਮਚ੍ਚੇ ਪੁਚ੍ਛਿ ‘‘ਤੁਟ੍ਠਾ ਨੁ ਖੋ ਤੁਮ੍ਹੇ, ਮਮ ਪੁਤ੍ਤੋ ਜਾਤੋ’’ਤਿ? ‘‘ਕਿਂ ਕਥੇਥ, ਦੇਵ, ਮਯਂ ਪੁਬ੍ਬੇ ਅਨਾਥਾ, ਇਦਾਨਿ ਪਨ ਸਨਾਥਾ ਜਾਤਾ, ਸਾਮਿਕੋ ਨੋ ਲਦ੍ਧੋ’’ਤਿ ਆਹਂਸੁ. ਰਾਜਾ ਮਹਾਸੇਨਗੁਤ੍ਤਂ ਪਕ੍ਕੋਸਾਪੇਤ੍ਵਾ ਆਣਾਪੇਸਿ ‘‘ਮਮ ਪੁਤ੍ਤਸ੍ਸ ਪਰਿਵਾਰੋ ਲਦ੍ਧੁਂ ਵਟ੍ਟਤਿ, ਗਚ੍ਛ ਤ੍ਵਂ ਅਮਚ੍ਚਗੇਹੇਸੁ ਅਜ੍ਜ ਜਾਤਾ ਦਾਰਕਾ ਕਿਤ੍ਤਕਾ ਨਾਮਾਤਿ ਓਲੋਕੇਹੀ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਅਮਚ੍ਚਗੇਹਾਨਿ ਗਨ੍ਤ੍ਵਾ ਓਲੋਕੇਨ੍ਤੋ ਪਞ੍ਚ ਕੁਮਾਰਸਤਾਨਿ ਦਿਸ੍ਵਾ ਪੁਨਾਗਨ੍ਤ੍ਵਾ ਰਞ੍ਞੋ ਆਰੋਚੇਸਿ.
ਰਾਜਾ ਪਞ੍ਚਨ੍ਨਂ ਦਾਰਕਸਤਾਨਂ ਕੁਮਾਰਪਸਾਧਨਾਨਿ ਪੇਸੇਤ੍ਵਾ ਪੁਨ ਪਞ੍ਚ ਧਾਤਿਸਤਾਨਿ ਚ ਦਾਪੇਸਿ. ਮਹਾਸਤ੍ਤਸ੍ਸ ਪਨ ਅਤਿਦੀਘਾਦਿਦੋਸਵਜ੍ਜਿਤਾ ਅਲਮ੍ਬਤ੍ਥਨਿਯੋ ਮਧੁਰਥਞ੍ਞਾਯੋ ਚਤੁਸਟ੍ਠਿ ਧਾਤਿਯੋ ਅਦਾਸਿ. ਅਤਿਦੀਘਾਯ ਹਿ ਇਤ੍ਥਿਯਾ ਪਸ੍ਸੇ ਨਿਸੀਦਿਤ੍ਵਾ ਥਞ੍ਞਂ ਪਿਵਤੋ ਦਾਰਕਸ੍ਸ ਗੀਵਾ ਦੀਘਾ ਹੋਤਿ, ਅਤਿਰਸ੍ਸਾਯ ਪਸ੍ਸੇ ਨਿਸੀਦਿਤ੍ਵਾ ਥਞ੍ਞਂ ਪਿਵਨ੍ਤੋ ਦਾਰਕੋ ਨਿਪ੍ਪੀਲ਼ਿਤਖਨ੍ਧਟ੍ਠਿਕੋ ਹੋਤਿ, ਅਤਿਕਿਸਾਯ ਪਸ੍ਸੇ ਨਿਸੀਦਿਤ੍ਵਾ ਥਞ੍ਞਂ ਪਿਵਤੋ ਦਾਰਕਸ੍ਸ ਊਰੂ ਰੁਜ੍ਜਨ੍ਤਿ, ਅਤਿਥੂਲਾਯ ਪਸ੍ਸੇ ਨਿਸੀਦਿਤ੍ਵਾ ਥਞ੍ਞਂ ਪਿਵਨ੍ਤੋ ਦਾਰਕੋ ਪਕ੍ਖਪਾਦੋ ਹੋਤਿ, ਅਤਿਕਾਲ਼ਿਕਾਯ ਖੀਰਂ ਅਤਿਸੀਤਲਂ ਹੋਤਿ, ਅਤਿਓਦਾਤਾਯ ਖੀਰਂ ਅਤਿਉਣ੍ਹਂ ਹੋਤਿ, ਲਮ੍ਬਤ੍ਥਨਿਯਾ ਪਸ੍ਸੇ ਨਿਸੀਦਿਤ੍ਵਾ ਥਞ੍ਞਂ ਪਿਵਨ੍ਤੋ ਦਾਰਕੋ ਨਿਪ੍ਪੀਲ਼ਿਤਨਾਸਿਕੋ ਹੋਤਿ. ਕਾਸਾਨਞ੍ਚ ਪਨ ਇਤ੍ਥੀਨਂ ਖੀਰਂ ਅਤਿਅਮ੍ਬਿਲਂ ਹੋਤਿ, ਸਾਸਾਨਞ੍ਚ ਪਨ ਇਤ੍ਥੀਨਂ ਖੀਰਂ ਅਤਿਕਟੁਕਾਦਿਭੇਦਂ ਹੋਤਿ, ਤਸ੍ਮਾ ਤੇ ਸਬ੍ਬੇਪਿ ਦੋਸੇ ਵਿਵਜ੍ਜੇਤ੍ਵਾ ਅਲਮ੍ਬਤ੍ਥਨਿਯੋ ਮਧੁਰਥਞ੍ਞਾਯੋ ਚਤੁਸਟ੍ਠਿ ਧਾਤਿਯੋ ਦਤ੍ਵਾ ਮਹਨ੍ਤਂ ਸਕ੍ਕਾਰਂ ਕਤ੍ਵਾ ਚਨ੍ਦਾਦੇਵਿਯਾਪਿ ਵਰਂ ਅਦਾਸਿ. ਸਾਪਿ ਗਹਿਤਕਂ ਕਤ੍ਵਾ ਠਪੇਸਿ.
ਰਾਜਾ ਕੁਮਾਰਸ੍ਸ ਨਾਮਗ੍ਗਹਣਦਿਵਸੇ ਲਕ੍ਖਣਪਾਠਕੇ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ਤੇਸਂ ਮਹਨ੍ਤਂ ਸਕ੍ਕਾਰਂ ਕਤ੍ਵਾ ਕੁਮਾਰਸ੍ਸ ਅਨ੍ਤਰਾਯਾਭਾਵਂ ਪੁਚ੍ਛਿ. ਤੇ ਤਸ੍ਸ ਲਕ੍ਖਣਸਮ੍ਪਤ੍ਤਿਂ ਦਿਸ੍ਵਾ ‘‘ਮਹਾਰਾਜ, ਧਞ੍ਞਪੁਞ੍ਞਲਕ੍ਖਣਸਮ੍ਪਨ੍ਨੋ ਅਯਂ ਕੁਮਾਰੋ, ਤਿਟ੍ਠਤੁ ਏਕਦੀਪੋ, ਦ੍ਵਿਸਹਸ੍ਸਪਰਿਵਾਰਾਨਂ ਚਤੁਨ੍ਨਮ੍ਪਿ ਮਹਾਦੀਪਾਨਂ ਰਜ੍ਜਂ ਕਾਰੇਤੁਂ ਸਮਤ੍ਥੋ ਹੋਤਿ, ਨਾਸ੍ਸ ਕੋਚਿ ਅਨ੍ਤਰਾਯੋ ਪਞ੍ਞਾਯਤੀ’’ਤਿ ਵਦਿਂਸੁ. ਰਾਜਾ ਤੇਸਂ ਵਚਨਂ ਸੁਤ੍ਵਾ ਤੁਸ੍ਸਿਤ੍ਵਾ ਕੁਮਾਰਸ੍ਸ ਨਾਮਂ ਕਰੋਨ੍ਤੋ ਯਸ੍ਮਾ ਕੁਮਾਰਸ੍ਸ ਜਾਤਦਿਵਸੇ ਸਕਲਕਾਸਿਰਟ੍ਠੇ ਦੇਵੋ ਵਸ੍ਸਿ, ਯਸ੍ਮਾ ਚ ਰਞ੍ਞੋ ਚੇਵ ਅਮਚ੍ਚਾਨਞ੍ਚ ਹਦਯਂ ਸੀਤਲਂ ਜਾਤਂ, ਯਸ੍ਮਾ ਚ ਤੇਮਯਮਾਨੋ ਜਾਤੋ, ਤਸ੍ਮਾ ‘‘ਤੇਮਿਯਕੁਮਾਰੋ’’ਤਿਸ੍ਸ ਨਾਮਂ ਅਕਾਸਿ. ਅਥ ਨਂ ਧਾਤਿਯੋ ਏਕਮਾਸਿਕਂ ਅਲਙ੍ਕਰਿਤ੍ਵਾ ਰਞ੍ਞੋ ਸਨ੍ਤਿਕਂ ਆਨਯਿਂਸੁ. ਰਾਜਾ ਪਿਯਪੁਤ੍ਤਂ ਆਲਿਙ੍ਗਿਤ੍ਵਾ ਸੀਸੇ ਚੁਮ੍ਬਿਤ੍ਵਾ ਅਙ੍ਕੇ ਨਿਸੀਦਾਪੇਤ੍ਵਾ ਰਮਯਮਾਨੋ ਨਿਸੀਦਿ.
ਤਸ੍ਮਿਂ ਖਣੇ ਚਤ੍ਤਾਰੋ ਚੋਰਾ ਆਨੀਤਾ. ਰਾਜਾ ਤੇ ਦਿਸ੍ਵਾ ‘‘ਤੇਸੁ ਏਕਸ੍ਸ ਚੋਰਸ੍ਸ ਸਕਣ੍ਟਕਾਹਿ ਕਸਾਹਿ ਪਹਾਰਸਹਸ੍ਸਂ ਕਰੋਥ, ਏਕਸ੍ਸ ਸਙ੍ਖਲਿਕਾਯ ਬਨ੍ਧਿਤ੍ਵਾ ਬਨ੍ਧਨਾਗਾਰਪਵੇਸਨਂ ਕਰੋਥ, ਏਕਸ੍ਸ ਸਰੀਰੇ ਸਤ੍ਤਿਪਹਾਰਂ ਕਰੋਥ, ਏਕਸ੍ਸ ਸੂਲਾਰੋਪਨਂ ਕਰੋਥਾ’’ਤਿ ਆਣਾਪੇਸਿ. ਅਥ ਮਹਾਸਤ੍ਤੋ ਪਿਤੁ ਵਚਨਂ ਸੁਤ੍ਵਾ ਭੀਤਤਸਿਤੋ ਹੁਤ੍ਵਾ ‘‘ਅਹੋ ਮਮ ਪਿਤਾ ਰਜ੍ਜਂ ਨਿਸ੍ਸਾਯ ਅਤਿਭਾਰਿਯਂ ਨਿਰਯਗਾਮਿਕਮ੍ਮਂ ਅਕਾਸੀ’’ਤਿ ਚਿਨ੍ਤੇਸਿ. ਪੁਨਦਿਵਸੇ ਪਨ ਤਂ ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਅਲਙ੍ਕਤਸਿਰਿਸਯਨੇ ਨਿਪਜ੍ਜਾਪੇਸੁਂ. ਸੋ ਥੋਕਂ ਨਿਦ੍ਦਾਯਿਤ੍ਵਾ ਪਬੁਦ੍ਧੋ ਅਕ੍ਖੀਨਿ ਉਮ੍ਮੀਲੇਤ੍ਵਾ ਸੇਤਚ੍ਛਤ੍ਤਂ ਓਲੋਕੇਨ੍ਤੋ ਮਹਨ੍ਤਂ ਸਿਰਿਵਿਭਵਂ ਪਸ੍ਸਿ. ਅਥਸ੍ਸ ਪਕਤਿਯਾਪਿ ਭੀਤਤਸਿਤਸ੍ਸ ਅਤਿਰੇਕਤਰਂ ਭਯਂ ਉਪ੍ਪਜ੍ਜਿ. ਸੋ ‘‘ਕੁਤੋ ਨੁ ਖੋ ਅਹਂ ਇਮਂ ਚੋਰਗੇਹਂ ਆਗਤੋਮ੍ਹੀ’’ਤਿ ਉਪਧਾਰੇਨ੍ਤੋ ਜਾਤਿਸ੍ਸਰਞਾਣੇਨ ਦੇਵਲੋਕਤੋ ਆਗਤਭਾਵਂ ਞਤ੍ਵਾ ਤਤੋ ਪਰਂ ਓਲੋਕੇਨ੍ਤੋ ਉਸ੍ਸਦਨਿਰਯੇ ਪਕ੍ਕਭਾਵਂ ਪਸ੍ਸਿ, ਤਤੋ ਪਰਂ ਓਲੋਕੇਨ੍ਤੋ ਤਸ੍ਮਿਂਯੇਵ ਨਗਰੇ ਰਾਜਭਾਵਂ ਅਞ੍ਞਾਸਿ.
ਅਥਸ੍ਸ ‘‘ਅਹਂ ਵੀਸਤਿਵਸ੍ਸਾਨਿ ਬਾਰਾਣਸਿਯਂ ਰਜ੍ਜਂ ਕਾਰੇਤ੍ਵਾ ਅਸੀਤਿਵਸ੍ਸਸਹਸ੍ਸਾਨਿ ਉਸ੍ਸਦਨਿਰਯੇ ਪਚ੍ਚਿਂ, ਇਦਾਨਿ ਪੁਨਪਿ ਇਮਸ੍ਮਿਂਯੇਵ ਚੋਰਗੇਹੇ ਨਿਬ੍ਬਤ੍ਤੋਮ੍ਹਿ, ਪਿਤਾ ਮੇ ਹਿਯ੍ਯੋ ਚਤੂਸੁ ਚੋਰੇਸੁ ਆਨੀਤੇਸੁ ਤਥਾਰੂਪਂ ਫਰੁਸਂ ਨਿਰਯਸਂਵਤ੍ਤਨਿਕਂ ਕਥਂ ਕਥੇਸਿ, ਸਚਾਹਂ ਰਜ੍ਜਂ ਕਾਰੇਸ੍ਸਾਮਿ, ਪੁਨਪਿ ਨਿਰਯੇ ਨਿਬ੍ਬਤ੍ਤਿਤ੍ਵਾ ਮਹਾਦੁਕ੍ਖਂ ਅਨੁਭਵਿਸ੍ਸਾਮੀ’’ਤਿ ਆਵਜ੍ਜੇਨ੍ਤਸ੍ਸ ਮਹਨ੍ਤਂ ਭਯਂ ਉਪ੍ਪਜ੍ਜਿ. ਬੋਧਿਸਤ੍ਤਸ੍ਸ ਕਞ੍ਚਨਵਣ੍ਣਂ ਸਰੀਰਂ ਹਤ੍ਥੇਨ ਪਰਿਮਦ੍ਦਿਤਂ ਪਦੁਮਂ ਵਿਯ ਮਿਲਾਤਂ ਦੁਬ੍ਬਣ੍ਣਂ ਅਹੋਸਿ. ਸੋ ‘‘ਕਥਂ ਨੁ ਖੋ ਇਮਮ੍ਹਾ ਚੋਰਗੇਹਾ ਮੁਚ੍ਚੇਯ੍ਯ’’ਨ੍ਤਿ ਚਿਨ੍ਤੇਨ੍ਤੋ ਨਿਪਜ੍ਜਿ. ਅਥ ਨਂ ਏਕਸ੍ਮਿਂ ਅਤ੍ਤਭਾਵੇ ਮਾਤੁਭੂਤਪੁਬ੍ਬਾ ਛਤ੍ਤੇ ਅਧਿਵਤ੍ਥਾ ਦੇਵਧੀਤਾ ਅਸ੍ਸਾਸੇਤ੍ਵਾ ‘‘ਤਾਤ ਤੇਮਿਯਕੁਮਾਰ, ਮਾ ਭਾਯਿ, ਮਾ ਸੋਚਿ, ਮਾ ਚਿਨ੍ਤਯਿ. ਸਚੇ ਇਤੋ ਮੁਚ੍ਚਿਤੁਕਾਮੋਸਿ, ਤ੍ਵਂ ਅਪੀਠਸਪ੍ਪੀਪਿ ਪੀਠਸਪ੍ਪੀ ਵਿਯ ਹੋਹਿ, ਅਬਧਿਰੋਪਿ ਬਧਿਰੋ ਵਿਯ ਹੋਹਿ, ਅਮੂਗੋਪਿ ਮੂਗੋ ਵਿਯ ਹੋਹਿ, ਇਮਾਨਿ ਤੀਣਿ ਅਙ੍ਗਾਨਿ ਅਧਿਟ੍ਠਾਯ ਅਤ੍ਤਨੋ ਪਣ੍ਡਿਤਭਾਵਂ ਮਾ ਪਕਾਸੇਹੀ’’ਤਿ ਵਤ੍ਵਾ ਪਠਮਂ ਗਾਥਮਾਹ –
੧. ‘‘ਮਾ ਪਣ੍ਡਿਚ੍ਚਯਂ ਵਿਭਾਵਯ, ਬਾਲਮਤੋ ਭਵ ਸਬ੍ਬਪਾਣਿਨਂ;
ਸਬ੍ਬੋ ਤਂ ਜਨੋ ਓਚਿਨਾਯਤੁ, ਏਵਂ ਤਵ ਅਤ੍ਥੋ ਭਵਿਸ੍ਸਤੀ’’ਤਿ.
ਤਤ੍ਥ ਪਣ੍ਡਿਚ੍ਚਯਨ੍ਤਿ ਪਣ੍ਡਿਚ੍ਚਂ, ਅਯਮੇਵ ਵਾ ਪਾਠੋ. ਬਾਲਮਤੋਤਿ ਬਾਲੋ ਇਤਿ ਸਮ੍ਮਤੋ. ਸਬ੍ਬੋ ਜਨੋਤਿ ਸਕਲੋ ਅਨ੍ਤੋਜਨੋ ਚੇਵ ਬਹਿਜਨੋ ਚ. ਓਚਿਨਾਯਤੂਤਿ ‘‘ਨੀਹਰਥੇਤਂ ਕਾਲ਼ਕਣ੍ਣਿ’’ਨ੍ਤਿ ਅਵਮਞ੍ਞਤੁ, ਅਵਜਾਨਾਤੂਤਿ ਅਤ੍ਥੋ.
ਸੋ ਤਸ੍ਸਾ ਵਚਨੇਨ ਅਸ੍ਸਾਸਂ ਪਟਿਲਭਿਤ੍ਵਾ –
੨. ‘‘ਕਰੋਮਿ ਤੇ ਤਂ ਵਚਨਂ, ਯਂ ਮਂ ਭਣਸਿ ਦੇਵਤੇ;
ਅਤ੍ਥਕਾਮਾਸਿ ਮੇ ਅਮ੍ਮ, ਹਿਤਕਾਮਾਸਿ ਦੇਵਤੇ’’ਤਿ. –
ਇਮਂ ਗਾਥਂ ਵਤ੍ਵਾ ਤਾਨਿ ਤੀਣਿ ਅਙ੍ਗਾਨਿ ਅਧਿਟ੍ਠਾਸਿ. ਸਾ ਚ ਦੇਵਧੀਤਾ ਅਨ੍ਤਰਧਾਯਿ. ਰਾਜਾ ਪੁਤ੍ਤਸ੍ਸ ਅਨੁਕ੍ਕਣ੍ਠਨਤ੍ਥਾਯ ਤਾਨਿ ਪਞ੍ਚ ਕੁਮਾਰਸਤਾਨਿ ਤਸ੍ਸ ਸਨ੍ਤਿਕੇਯੇਵ ਠਪੇਸਿ. ਤੇ ਦਾਰਕਾ ਥਞ੍ਞਤ੍ਥਾਯ ਰੋਦਨ੍ਤਿ ਪਰਿਦੇਵਨ੍ਤਿ. ਮਹਾਸਤ੍ਤੋ ਪਨ ਨਿਰਯਭਯਤਜ੍ਜਿਤੋ ‘‘ਰਜ੍ਜਤੋ ਮੇ ਸੁਸ੍ਸਿਤ੍ਵਾ ਮਤਮੇਵ ਸੇਯ੍ਯੋ’’ਤਿ ਨ ਰੋਦਤਿ ਨ ਪਰਿਦੇਵਤਿ. ਅਥਸ੍ਸ ਧਾਤਿਯੋ ਤਂ ਪਵਤ੍ਤਿਂ ਞਤ੍ਵਾ ਚਨ੍ਦਾਦੇਵਿਯਾ ਆਰੋਚਯਿਂਸੁ. ਸਾਪਿ ਰਞ੍ਞੋ ਆਰੋਚੇਸਿ. ਰਾਜਾ ਨੇਮਿਤ੍ਤਕੇ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ਪੁਚ੍ਛਿ. ਅਥ ਬ੍ਰਾਹ੍ਮਣਾ ਆਹਂਸੁ ‘‘ਦੇਵ, ਕੁਮਾਰਸ੍ਸ ਪਕਤਿਵੇਲਂ ਅਤਿਕ੍ਕਮਿਤ੍ਵਾ ਥਞ੍ਞਂ ਦਾਤੁਂ ਵਟ੍ਟਤਿ, ਏਵਂ ਸੋ ਰੋਦਮਾਨੋ ਥਨਂ ਦਲ਼੍ਹਂ ਗਹੇਤ੍ਵਾ ਸਯਮੇਵ ਪਿਵਿਸ੍ਸਤੀ’’ਤਿ. ਤਤੋ ਪਟ੍ਠਾਯ ਧਾਤਿਯੋ ਕੁਮਾਰਸ੍ਸ ਪਕਤਿਵੇਲਂ ਅਤਿਕ੍ਕਮਿਤ੍ਵਾ ਥਞ੍ਞਂ ਦੇਨ੍ਤਿ. ਦਦਮਾਨਾ ਚ ਕਦਾਚਿ ਏਕਵਾਰਂ ਅਤਿਕ੍ਕਮਿਤ੍ਵਾ ਦੇਨ੍ਤਿ, ਕਦਾਚਿ ਸਕਲਦਿਵਸਂ ਖੀਰਂ ਨ ਦੇਨ੍ਤਿ.
ਵੀਮਂਸਨਕਣ੍ਡਂ
ਸੋ ਨਿਰਯਭਯਤਜ੍ਜਿਤੋ ਸੁਸ੍ਸਨ੍ਤੋਪਿ ਥਞ੍ਞਤ੍ਥਾਯ ਨ ਰੋਦਤਿ, ਨ ਪਰਿਦੇਵਤਿ. ਅਥ ਨਂ ਅਰੋਦਨ੍ਤਮ੍ਪਿ ਦਿਸ੍ਵਾ ‘‘ਪੁਤ੍ਤੋ ਮੇ ਛਾਤੋ’’ਤਿ ਮਾਤਾ ਵਾ ਥਞ੍ਞਂ ਪਾਯੇਤਿ, ਕਦਾਚਿ ਧਾਤਿਯੋ ਵਾ ਪਾਯੇਨ੍ਤਿ. ਸੇਸਦਾਰਕਾ ਥਞ੍ਞਂ ਅਲਦ੍ਧਵੇਲਾਯਮੇਵ ਰੋਦਨ੍ਤਿ ਪਰਿਦੇਵਨ੍ਤਿ. ਮਹਾਸਤ੍ਤੋ ਪਨ ਨਿਰਯਭਯਤਜ੍ਜਿਤੋ ਨ ਰੋਦਤਿ, ਨ ਪਰਿਦੇਵਤਿ, ਨ ਨਿਦ੍ਦਾਯਤਿ, ਨ ਹਤ੍ਥਪਾਦੇ ਸਮਿਞ੍ਜਤਿ, ਨ ਸਦ੍ਦਂ ਕਰੋਤਿ. ਅਥਸ੍ਸ ਧਾਤਿਯੋ ‘‘ਪੀਠਸਪ੍ਪੀਨਂ ਹਤ੍ਥਪਾਦਾ ਨਾਮ ਨ ਏਵਰੂਪਾ ਹੋਨ੍ਤਿ, ਮੂਗਾਨਂ ਹਨੁਕਪਰਿਯੋਸਾਨਂ ਨਾਮ ਨ ਏਵਰੂਪਂ ਹੋਤਿ, ਬਧਿਰਾਨਂ ਕਣ੍ਣਸੋਤਾਨਿ ਨਾਮ ਨ ਏਵਰੂਪਾਨਿ ਹੋਨ੍ਤਿ, ਭਵਿਤਬ੍ਬਮੇਤ੍ਥ ਕਾਰਣੇਨ, ਵੀਮਂਸਿਸ੍ਸਾਮ ਨ’’ਨ੍ਤਿ ਚਿਨ੍ਤੇਤ੍ਵਾ ‘‘ਖੀਰੇਨ ਤਾਵ ਨਂ ਵੀਮਂਸਿਸ੍ਸਾਮਾ’’ਤਿ ਸਕਲਦਿਵਸਂ ਖੀਰਂ ਨ ਦੇਨ੍ਤਿ. ਸੋ ਸੁਸ੍ਸਨ੍ਤੋਪਿ ਖੀਰਤ੍ਥਾਯ ਸਦ੍ਦਂ ਨ ਕਰੋਤਿ. ਅਥਸ੍ਸ ਮਾਤਾ ‘‘ਪੁਤ੍ਤੋ ਮੇ ਛਾਤੋ’’ਤਿ ਸਯਮੇਵ ਥਞ੍ਞਂ ਪਾਯੇਤਿ. ਏਵਂ ਅਨ੍ਤਰਨ੍ਤਰਾ ਖੀਰਂ ਅਦਤ੍ਵਾ ਏਕਸਂਵਚ੍ਛਰਂ ਵੀਮਂਸਨ੍ਤਾਪਿਸ੍ਸ ਅਨ੍ਤਰਂ ਨ ਪਸ੍ਸਿਂਸੁ.
ਤਤੋ ਅਮਚ੍ਚਾਦਯੋ ਰਞ੍ਞੋ ਆਰੋਚੇਸੁਂ ‘‘ਏਕਵਸ੍ਸਿਕਦਾਰਕਾ ਨਾਮ ਪੂਵਖਜ੍ਜਕਂ ਪਿਯਾਯਨ੍ਤਿ, ਤੇਨ ਨਂ ਵੀਮਂਸਿਸ੍ਸਾਮਾ’’ਤਿ ਪਞ੍ਚ ਕੁਮਾਰਸਤਾਨਿ ਤਸ੍ਸ ਸਨ੍ਤਿਕੇਯੇਵ ਨਿਸੀਦਾਪੇਤ੍ਵਾ ਨਾਨਾਪੂਵਖਜ੍ਜਕਾਨਿ ਉਪਨਾਮੇਤ੍ਵਾ ਬੋਧਿਸਤ੍ਤਸ੍ਸ ਅਵਿਦੂਰੇ ਠਪੇਤ੍ਵਾ ‘‘ਯਥਾਰੁਚਿ ਤਾਨਿ ਪੂਵਖਜ੍ਜਕਾਨਿ ਗਣ੍ਹਥਾ’’ਤਿ ਪਟਿਚ੍ਛਨ੍ਨਟ੍ਠਾਨੇ ਤਿਟ੍ਠਨ੍ਤਿ. ਸੇਸਦਾਰਕਾ ਕਲਹਂ ਕਰੋਨ੍ਤਾ ਅਞ੍ਞਮਞ੍ਞਂ ਪਹਰਨ੍ਤਾ ਤਂ ਤਂ ਗਹੇਤ੍ਵਾ ਖਾਦਨ੍ਤਿ. ਮਹਾਸਤ੍ਤੋ ਪਨ ਅਤ੍ਤਾਨਂ ਓਵਦਿਤ੍ਵਾ ‘‘ਤਾਤ ਤੇਮਿਯਕੁਮਾਰ, ਨਿਰਯਭਯਂ ਇਚ੍ਛਨ੍ਤੋ ਪੂਵਖਜ੍ਜਕਂ ਇਚ੍ਛਾਹੀ’’ਤਿ ਨਿਰਯਭਯਤਜ੍ਜਿਤੋ ਪੂਵਖਜ੍ਜਕਂ ਨ ਓਲੋਕੇਸਿ. ਏਵਂ ਪੂਵਖਜ੍ਜਕੇਨਪਿ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਤਤੋ ‘‘ਦ੍ਵਿਵਸ੍ਸਿਕਦਾਰਕਾ ਨਾਮ ਫਲਾਫਲਂ ਪਿਯਾਯਨ੍ਤਿ, ਤੇਨ ਨਂ ਵੀਮਂਸਿਸ੍ਸਾਮਾ’’ਤਿ ਨਾਨਾਫਲਾਨਿ ਉਪਨਾਮੇਤ੍ਵਾ ਬੋਧਿਸਤ੍ਤਸ੍ਸ ਅਵਿਦੂਰੇ ਠਪੇਤ੍ਵਾ ਵੀਮਂਸਿਂਸੁ. ਸੇਸਦਾਰਕਾ ਕਲਹਂ ਕਤ੍ਵਾ ਯੁਜ੍ਝਨ੍ਤਾ ਤਂ ਤਂ ਗਹੇਤ੍ਵਾ ਖਾਦਨ੍ਤਿ. ਸੋ ਨਿਰਯਭਯਤਜ੍ਜਿਤੋ ਤਮ੍ਪਿ ਨ ਓਲੋਕੇਸਿ. ਏਵਂ ਫਲਾਫਲੇਨਪਿ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਤਤੋ ‘‘ਤਿਵਸ੍ਸਿਕਦਾਰਕਾ ਨਾਮ ਕੀਲ਼ਨਭਣ੍ਡਕਂ ਪਿਯਾਯਨ੍ਤਿ, ਤੇਨ ਨਂ ਵੀਮਂਸਿਸ੍ਸਾਮਾ’’ਤਿ ਨਾਨਾਸੁਵਣ੍ਣਮਯਾਨਿ ਹਤ੍ਥਿਅਸ੍ਸਰੂਪਕਾਦੀਨਿ ਕਾਰਾਪੇਤ੍ਵਾ ਬੋਧਿਸਤ੍ਤਸ੍ਸ ਅਵਿਦੂਰੇ ਠਪੇਸੁਂ. ਸੇਸਦਾਰਕਾ ਅਞ੍ਞਮਞ੍ਞਂ ਵਿਲੁਮ੍ਪਨ੍ਤਾ ਗਣ੍ਹਿਂਸੁ. ਮਹਾਸਤ੍ਤੋ ਪਨ ਨ ਕਿਞ੍ਚਿ ਓਲੋਕੇਸਿ. ਏਵਂ ਕੀਲ਼ਨਭਣ੍ਡਕੇਨਪਿ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਤਤੋ ‘‘ਚਤੁਵਸ੍ਸਿਕਦਾਰਕਾ ਨਾਮ ਭੋਜਨਂ ਪਿਯਾਯਨ੍ਤਿ, ਤੇਨ ਨਂ ਵੀਮਂਸਿਸ੍ਸਾਮਾ’’ਤਿ ਨਾਨਾਭੋਜਨਾਨਿ ਉਪਨਾਮੇਸੁਂ. ਸੇਸਦਾਰਕਾ ਤਂ ਪਿਣ੍ਡਂ ਪਿਣ੍ਡਂ ਕਤ੍ਵਾ ਭੁਞ੍ਜਨ੍ਤਿ. ਮਹਾਸਤ੍ਤੋ ਪਨ ਅਤ੍ਤਾਨਂ ਓਵਦਿਤ੍ਵਾ ‘‘ਤਾਤ ਤੇਮਿਯਕੁਮਾਰ, ਅਲਦ੍ਧਭੋਜਨਾਨਂ ਤੇ ਅਤ੍ਤਭਾਵਾਨਂ ਗਣਨਾ ਨਾਮ ਨਤ੍ਥੀ’’ਤਿ ਨਿਰਯਭਯਤਜ੍ਜਿਤੋ ਤਮ੍ਪਿ ਨ ਓਲੋਕੇਸਿ. ਅਥਸ੍ਸ ਮਾਤਾ ਸਯਮੇਵ ਹਦਯੇਨ ਭਿਜ੍ਜਮਾਨੇਨ ਵਿਯ ਅਸਹਨ੍ਤੇਨ ਸਹਤ੍ਥੇਨ ਭੋਜਨਂ ਭੋਜੇਸਿ. ਏਵਂ ਭੋਜਨੇਨਪਿ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਤਤੋ ‘‘ਪਞ੍ਚਵਸ੍ਸਿਕਦਾਰਕਾ ਨਾਮ ਅਗ੍ਗਿਨੋ ਭਾਯਨ੍ਤਿ, ਤੇਨ ਨਂ ਵੀਮਂਸਿਸ੍ਸਾਮਾ’’ਤਿ ਰਾਜਙ੍ਗਣੇ ਅਨੇਕਦ੍ਵਾਰਯੁਤ੍ਤਂ ਮਹਨ੍ਤਂ ਗੇਹਂ ਕਾਰੇਤ੍ਵਾ ਤਾਲਪਣ੍ਣੇਹਿ ਛਾਦੇਤ੍ਵਾ ਤਂ ਸੇਸਦਾਰਕੇਹਿ ਪਰਿਵੁਤਂ ਤਸ੍ਸ ਮਜ੍ਝੇ ਨਿਸੀਦਾਪੇਤ੍ਵਾ ਅਗ੍ਗਿਂ ਦੇਨ੍ਤਿ. ਸੇਸਦਾਰਕਾ ਅਗ੍ਗਿਂ ਦਿਸ੍ਵਾ ਵਿਰਵਨ੍ਤਾ ਪਲਾਯਿਂਸੁ. ਮਹਾਸਤ੍ਤੋ ਪਨ ਚਿਨ੍ਤੇਸਿ ‘‘ਨਿਰਯਅਗ੍ਗਿਸਨ੍ਤਾਪਨਤੋ ਇਦਮੇਵ ਅਗ੍ਗਿਸਨ੍ਤਾਪਨਂ ਸਤਗੁਣੇਨ ਸਹਸ੍ਸਗੁਣੇਨ ਸਤਸਹਸ੍ਸਗੁਣੇਨ ਵਰਤਰ’’ਨ੍ਤਿ ਨਿਰੋਧਸਮਾਪਨ੍ਨੋ ਮਹਾਥੇਰੋ ਵਿਯ ਨਿਚ੍ਚਲੋਵ ਅਹੋਸਿ. ਅਥ ਨਂ ਅਗ੍ਗਿਮ੍ਹਿ ਆਗਚ੍ਛਨ੍ਤੇ ਗਹੇਤ੍ਵਾ ਅਪਨੇਨ੍ਤਿ. ਏਵਂ ਅਗ੍ਗਿਨਾਪਿ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਤਤੋ ‘‘ਛਵਸ੍ਸਿਕਦਾਰਕਾ ਨਾਮ ਮਤ੍ਤਹਤ੍ਥਿਨੋ ਭਾਯਨ੍ਤਿ, ਤੇਨ ਨਂ ਵੀਮਂਸਿਸ੍ਸਾਮਾ’’ਤਿ ਏਕਂ ਹਤ੍ਥਿਂ ਸੁਸਿਕ੍ਖਿਤਂ ਸਿਕ੍ਖਾਪੇਤ੍ਵਾ ਬੋਧਿਸਤ੍ਤਂ ਸੇਸਦਾਰਕੇਹਿ ਪਰਿਵੁਤਂ ਰਾਜਙ੍ਗਣੇ ਨਿਸੀਦਾਪੇਤ੍ਵਾ ਤਂ ਹਤ੍ਥਿਂ ਮੁਞ੍ਚਨ੍ਤਿ. ਸੋ ਕੋਞ੍ਚਨਾਦਂ ਨਦਨ੍ਤੋ ਸੋਣ੍ਡਾਯ ਭੂਮਿਯਂ ਪੋਥੇਨ੍ਤੋ ਭਯਂ ਦਸ੍ਸੇਨ੍ਤੋ ਆਗਚ੍ਛਤਿ. ਸੇਸਦਾਰਕਾ ਤਂ ਦਿਸ੍ਵਾ ਮਰਣਭਯਭੀਤਾ ਦਿਸਾਵਿਦਿਸਾਸੁ ਪਲਾਯਿਂਸੁ. ਮਹਾਸਤ੍ਤੋ ਪਨ ਮਤ੍ਤਹਤ੍ਥਿਂ ਆਗਚ੍ਛਨ੍ਤਂ ਦਿਸ੍ਵਾ ਚਿਨ੍ਤੇਸਿ ‘‘ਚਣ੍ਡਨਿਰਯੇ ਪਚ੍ਚਨਤੋ ਚਣ੍ਡਹਤ੍ਥਿਨੋ ਹਤ੍ਥੇ ਮਰਣਮੇਵ ਸੇਯ੍ਯੋ’’ਤਿ ਨਿਰਯਭਯਤਜ੍ਜਿਤੋ ਤਤ੍ਥੇਵ ਨਿਸੀਦਿ. ਸੁਸਿਕ੍ਖਿਤੋ ਹਤ੍ਥੀ ਮਹਾਸਤ੍ਤਂ ਪੁਪ੍ਫਕਲਾਪਂ ਵਿਯ ਉਕ੍ਖਿਪਿਤ੍ਵਾ ਅਪਰਾਪਰਂ ਕਤ੍ਵਾ ਅਕਿਲਮੇਤ੍ਵਾਵ ਗਚ੍ਛਤਿ. ਏਵਂ ਹਤ੍ਥਿਨਾਪਿ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਤਤੋ ‘‘ਸਤ੍ਤਵਸ੍ਸਿਕਦਾਰਕਾ ਨਾਮ ਸਪ੍ਪਸ੍ਸ ਭਾਯਨ੍ਤਿ, ਤੇਨ ਨਂ ਵੀਮਂਸਿਸ੍ਸਾਮਾ’’ਤਿ ਬੋਧਿਸਤ੍ਤਂ ਸੇਸਦਾਰਕੇਹਿ ਸਦ੍ਧਿਂ ਰਾਜਙ੍ਗਣੇ ਨਿਸੀਦਾਪੇਤ੍ਵਾ ਉਦ੍ਧਟਦਾਠੇ ਕਤਮੁਖਬਨ੍ਧੇ ਸਪ੍ਪੇ ਵਿਸ੍ਸਜ੍ਜੇਸੁਂ. ਸੇਸਦਾਰਕਾ ਤੇ ਦਿਸ੍ਵਾ ਵਿਰਵਨ੍ਤਾ ਪਲਾਯਿਂਸੁ. ਮਹਾਸਤ੍ਤੋ ਪਨ ਨਿਰਯਭਯਂ ਆਵਜ੍ਜੇਤ੍ਵਾ ‘‘ਚਣ੍ਡਸਪ੍ਪਸ੍ਸ ਮੁਖੇ ਵਿਨਾਸਮੇਵ ਵਰਤਰ’’ਨ੍ਤਿ ਨਿਰੋਧਸਮਾਪਨ੍ਨੋ ਮਹਾਥੇਰੋ ਵਿਯ ਨਿਚ੍ਚਲੋਵ ਅਹੋਸਿ. ਅਥਸ੍ਸ ਸਪ੍ਪੋ ਸਕਲਸਰੀਰਂ ਵੇਠੇਤ੍ਵਾ ਮਤ੍ਥਕੇ ਫਣਂ ਕਤ੍ਵਾ ਅਚ੍ਛਿ. ਤਦਾਪਿ ਸੋ ਨਿਚ੍ਚਲੋਵ ਅਹੋਸਿ. ਏਵਂ ਸਪ੍ਪੇਨਪਿ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਤਤੋ ‘‘ਅਟ੍ਠਵਸ੍ਸਿਕਦਾਰਕਾ ਨਾਮ ਨਟਸਮਜ੍ਜਂ ਪਿਯਾਯਨ੍ਤਿ, ਤੇਨ ਨਂ ਵੀਮਂਸਿਸ੍ਸਾਮਾ’’ਤਿ ਤਂ ਪਞ੍ਚਦਾਰਕਸਤੇਹਿ ਸਦ੍ਧਿਂ ਰਾਜਙ੍ਗਣੇ ਨਿਸੀਦਾਪੇਤ੍ਵਾ ਨਟਸਮਜ੍ਜਂ ਕਾਰਾਪੇਸੁਂ. ਸੇਸਦਾਰਕਾ ਤਂ ਨਟਸਮਜ੍ਜਂ ਦਿਸ੍ਵਾ ‘‘ਸਾਧੁ ਸਾਧੂ’’ਤਿ ਵਦਨ੍ਤਾ ਮਹਾਹਸਿਤਂ ਹਸਨ੍ਤਿ. ਮਹਾਸਤ੍ਤੋ ਪਨ ‘‘ਨਿਰਯੇ ਨਿਬ੍ਬਤ੍ਤਕਾਲੇ ਤਵ ਖਣਮਤ੍ਤਮ੍ਪਿ ਹਾਸੋ ਵਾ ਸੋਮਨਸ੍ਸਂ ਵਾ ਨਤ੍ਥੀ’’ਤਿ ਨਿਰਯਭਯਂ ਆਵਜ੍ਜੇਤ੍ਵਾ ਨਿਚ੍ਚਲੋਵ ਅਹੋਸਿ, ਤਂ ਨ ਓਲੋਕੇਸਿ. ਏਵਂ ਨਟਸਮਜ੍ਜੇਨਪਿ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਤਤੋ ‘‘ਨਵਵਸ੍ਸਿਕਦਾਰਕਾ ਨਾਮ ਅਸਿਨੋ ਭਾਯਨ੍ਤਿ, ਤੇਨ ਨਂ ਵੀਮਂਸਿਸ੍ਸਾਮਾ’’ਤਿ ਤਂ ਪਞ੍ਚਦਾਰਕਸਤੇਹਿ ਸਦ੍ਧਿਂ ਰਾਜਙ੍ਗਣੇ ਨਿਸੀਦਾਪੇਤ੍ਵਾ ਦਾਰਕਾਨਂ ਕੀਲ਼ਨਕਾਲੇ ਏਕੋ ਪੁਰਿਸੋ ਫਲਿਕਵਣ੍ਣਂ ਅਸਿਂ ਗਹੇਤ੍ਵਾ ਪਰਿਬ੍ਭਮਨ੍ਤੋ ਨਦਨ੍ਤੋ ਵਗ੍ਗਨ੍ਤੋ ਤਾਸੇਨ੍ਤੋ ਲਙ੍ਘਨ੍ਤੋ ਅਪ੍ਫੋਟੇਨ੍ਤੋ ਮਹਾਸਦ੍ਦਂ ਕਰੋਨ੍ਤੋ ‘‘ਕਾਸਿਰਞ੍ਞੋ ਕਿਰ ਕਾਲ਼ਕਣ੍ਣੀ ਏਕੋ ਪੁਤ੍ਤੋ ਅਤ੍ਥਿ, ਸੋ ਕੁਹਿਂ, ਸੀਸਮਸ੍ਸ ਛਿਨ੍ਦਿਸ੍ਸਾਮੀ’’ਤਿ ਅਭਿਧਾਵਤਿ. ਤਂ ਪੁਰਿਸਂ ਦਿਸ੍ਵਾ ਸੇਸਦਾਰਕਾ ਭੀਤਤਸਿਤਾ ਹੁਤ੍ਵਾ ਵਿਰਵਨ੍ਤਾ ਦਿਸਾਵਿਦਿਸਾਸੁ ਪਲਾਯਿਂਸੁ. ਮਹਾਸਤ੍ਤੋ ਪਨ ਨਿਰਯਭਯਂ ਆਵਜ੍ਜੇਤ੍ਵਾ ਅਜਾਨਨ੍ਤੋ ਵਿਯ ਨਿਸੀਦਿ. ਅਥ ਨਂ ਸੋ ਪੁਰਿਸੋ ਅਸਿਨਾ ਸੀਸੇ ਪਰਾਮਸਿਤ੍ਵਾ ‘‘ਸੀਸਂ ਤੇ ਛਿਨ੍ਦਿਸ੍ਸਾਮੀ’’ਤਿ ਤਾਸੇਨ੍ਤੋਪਿ ਤਾਸੇਤੁਂ ਅਸਕ੍ਕੋਨ੍ਤੋ ਅਪਗਮਿ. ਏਵਂ ਖਗ੍ਗੇਨਪਿ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਤਤੋ ਦਸਵਸ੍ਸਿਕਕਾਲੇ ਪਨਸ੍ਸ ਬਧਿਰਭਾਵਵੀਮਂਸਨਤ੍ਥਂ ਸਿਰਿਸਯਨੇ ਨਿਸੀਦਾਪੇਤ੍ਵਾ ਸਾਣਿਯਾ ਪਰਿਕ੍ਖਿਪਾਪੇਤ੍ਵਾ ਚਤੂਸੁ ਪਸ੍ਸੇਸੁ ਛਿਦ੍ਦਾਨਿ ਕਤ੍ਵਾ ਤਸ੍ਸ ਅਦਸ੍ਸੇਤ੍ਵਾ ਹੇਟ੍ਠਾਸਯਨੇ ਸਙ੍ਖਧਮਕੇ ਨਿਸੀਦਾਪੇਤ੍ਵਾ ਏਕਪ੍ਪਹਾਰੇਨੇਵ ਸਙ੍ਖੇ ਧਮਾਪੇਨ੍ਤਿ, ਏਕਨਿਨ੍ਨਾਦਂ ਅਹੋਸਿ. ਅਮਚ੍ਚਾ ਚਤੂਸੁ ਪਸ੍ਸੇਸੁ ਠਤ੍ਵਾ ਸਾਣਿਯਾ ਛਿਦ੍ਦੇਹਿ ਓਲੋਕੇਨ੍ਤਾਪਿ ਮਹਾਸਤ੍ਤਸ੍ਸ ਏਕਦਿਵਸਮ੍ਪਿ ਸਤਿਸਮ੍ਮੋਸਂ ਵਾ ਹਤ੍ਥਪਾਦਵਿਕਾਰਂ ਵਾ ਫਨ੍ਦਨਮਤ੍ਤਂ ਵਾ ਨ ਪਸ੍ਸਿਂਸੁ. ਏਵਂ ਏਕਸਂਵਚ੍ਛਰਂ ਸਙ੍ਖਸਦ੍ਦੇਨਪਿ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਤਤੋ ਪਰਮ੍ਪਿ ਏਕਾਦਸਵਸ੍ਸਿਕਕਾਲੇ ਏਕਸਂਵਚ੍ਛਰਂ ਤਥੇਵ ਭੇਰਿਸਦ੍ਦੇਨ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਤਤੋ ਦ੍ਵਾਦਸਵਸ੍ਸਿਕਕਾਲੇ ‘‘ਦੀਪੇਨ ਨਂ ਵੀਮਂਸਿਸ੍ਸਾਮਾ’’ਤਿ ‘‘ਰਤ੍ਤਿਭਾਗੇ ਅਨ੍ਧਕਾਰੇ ਹਤ੍ਥਂ ਵਾ ਪਾਦਂ ਵਾ ਫਨ੍ਦਾਪੇਤਿ ਨੁ ਖੋ, ਨੋ’’ਤਿ ਘਟੇਸੁ ਦੀਪੇ ਜਾਲੇਤ੍ਵਾ ਸੇਸਦੀਪੇ ਨਿਬ੍ਬਾਪੇਤ੍ਵਾ ਥੋਕਂ ਅਨ੍ਧਕਾਰੇ ਸਯਾਪੇਤ੍ਵਾ ਘਟੇਹਿ ਦੀਪੇ ਉਕ੍ਖਿਪਿਤ੍ਵਾ ਏਕਪ੍ਪਹਾਰੇਨੇਵ ਆਲੋਕਂ ਕਤ੍ਵਾ ਇਰਿਯਾਪਥਂ ਉਪਧਾਰੇਨ੍ਤਿ. ਏਵਂ ਦੀਪੇਨਪਿ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਕਿਞ੍ਚਿ ਫਨ੍ਦਨਮਤ੍ਤਮ੍ਪਿ ਨ ਪਸ੍ਸਿਂਸੁ.
ਤਤੋ ਤੇਰਸਵਸ੍ਸਿਕਕਾਲੇ ‘‘ਫਾਣਿਤੇਨ ਨਂ ਵੀਮਂਸਿਸ੍ਸਾਮਾ’’ਤਿ ਸਕਲਸਰੀਰਂ ਫਾਣਿਤੇਨ ਮਕ੍ਖੇਤ੍ਵਾ ਬਹੁਮਕ੍ਖਿਕੇ ਠਾਨੇ ਨਿਪਜ੍ਜਾਪੇਸੁਂ. ਮਕ੍ਖਿਕਾ ਉਟ੍ਠਹਨ੍ਤਿ, ਤਾ ਤਸ੍ਸ ਸਕਲਸਰੀਰਂ ਪਰਿਵਾਰੇਤ੍ਵਾ ਸੂਚੀਹਿ ਵਿਜ੍ਝਮਾਨਾ ਵਿਯ ਖਾਦਨ੍ਤਿ. ਸੋ ਨਿਰੋਧਸਮਾਪਨ੍ਨੋ ਮਹਾਥੇਰੋ ਵਿਯ ਨਿਚ੍ਚਲੋਵ ਅਹੋਸਿ. ਏਵਂ ਫਾਣਿਤੇਨਪਿ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਕਿਞ੍ਚਿ ਫਨ੍ਦਨਮਤ੍ਤਮ੍ਪਿ ਨ ਪਸ੍ਸਿਂਸੁ.
ਅਥਸ੍ਸ ਚੁਦ੍ਦਸਵਸ੍ਸਿਕਕਾਲੇ ‘‘ਇਦਾਨਿ ਪਨੇਸ ਮਹਲ੍ਲਕੋ ਜਾਤੋ ਸੁਚਿਕਾਮੋ ਅਸੁਚਿਜਿਗੁਚ੍ਛਕੋ, ਅਸੁਚਿਨਾ ਨਂ ਵੀਮਂਸਿਸ੍ਸਾਮਾ’’ਤਿ ਤਤੋ ਪਟ੍ਠਾਯ ਨਂ ਨੇਵ ਨ੍ਹਾਪੇਨ੍ਤਿ ਨ ਚ ਆਚਮਾਪੇਨ੍ਤਿ. ਸੋ ਉਚ੍ਚਾਰਪਸ੍ਸਾਵਂ ਕਤ੍ਵਾ ਤਤ੍ਥੇਵ ਪਲਿਪਨ੍ਨੋ ਸਯਤਿ. ਦੁਗ੍ਗਨ੍ਧਭਾਵੇਨ ਪਨਸ੍ਸ ਅਨ੍ਤਰੁਧੀਨਂ ਨਿਕ੍ਖਮਨਕਾਲੋ ਵਿਯ ਅਹੋਸਿ, ਅਸੁਚਿਗਨ੍ਧੇਨ ਮਕ੍ਖਿਕਾ ਖਾਦਨ੍ਤਿ. ਸੋ ਨਿਚ੍ਚਲੋਵ ਅਹੋਸਿ. ਅਥ ਨਂ ਪਰਿਵਾਰੇਤ੍ਵਾ ਠਿਤਾ ਧਾਤਿਯੋ ਆਹਂਸੁ ‘‘ਤਾਤ ਤੇਮਿਯਕੁਮਾਰ, ਤ੍ਵਂ ਮਹਲ੍ਲਕੋ ਜਾਤੋ, ਕੋ ਤਂ ਸਬ੍ਬਦਾ ਪਟਿਜਗ੍ਗਿਸ੍ਸਤਿ, ਕਿਂ ਨ ਲਜ੍ਜਸਿ, ਕਸ੍ਮਾ ਨਿਪਨ੍ਨੋਸਿ, ਉਟ੍ਠਾਯ ਤੇ ਸਰੀਰਂ ਪਟਿਜਗ੍ਗਾਹੀ’’ਤਿ ਅਕ੍ਕੋਸਨ੍ਤਿ ਪਰਿਭਾਸਨ੍ਤਿ. ਸੋ ਤਥਾਰੂਪੇ ਪਟਿਕੂਲੇ ਗੂਥਰਾਸਿਮ੍ਹਿ ਨਿਮੁਗ੍ਗੋਪਿ ਦੁਗ੍ਗਨ੍ਧਭਾਵੇਨ ਯੋਜਨਸਤਮਤ੍ਥਕੇ ਠਿਤਾਨਮ੍ਪਿ ਹਦਯੁਪ੍ਪਤਨਸਮਤ੍ਥਸ੍ਸ ਗੂਥਨਿਰਯਸ੍ਸ ਦੁਗ੍ਗਨ੍ਧਭਾਵਂ ਆਵਜ੍ਜੇਤ੍ਵਾ ਨਿਚ੍ਚਲੋਵ ਅਹੋਸਿ. ਏਵਂ ਅਸੁਚਿਨਾਪਿ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਤਤੋ ਪਨ੍ਨਰਸਵਸ੍ਸਿਕਕਾਲੇ ‘‘ਅਙ੍ਗਾਰੇਨ ਨਂ ਵੀਮਂਸਿਸ੍ਸਾਮਾ’’ਤਿ ਅਥਸ੍ਸ ਹੇਟ੍ਠਾਮਞ੍ਚਕੇ ਅਗ੍ਗਿਕਪਲ੍ਲਾਨਿ ਠਪਯਿਂਸੁ ‘‘ਅਪ੍ਪੇਵ ਨਾਮ ਉਣ੍ਹੇਨ ਪੀਲ਼ਿਤੋ ਦੁਕ੍ਖਵੇਦਨਂ ਅਸਹਨ੍ਤੋ ਵਿਪ੍ਫਨ੍ਦਨਾਕਾਰਂ ਦਸ੍ਸੇਯ੍ਯਾ’’ਤਿ. ਅਥਸ੍ਸ ਸਰੀਰੇ ਫੋਟਾਨਿ ਉਟ੍ਠਹਨ੍ਤਿ. ਮਹਾਸਤ੍ਤੋ ‘‘ਅਵੀਚਿਨਿਰਯਸਨ੍ਤਾਪੋ ਯੋਜਨਸਤਮਤ੍ਥਕੇ ਫਰਤਿ, ਤਮ੍ਹਾ ਦੁਕ੍ਖਤੋ ਇਦਂ ਦੁਕ੍ਖਂ ਸਤਗੁਣੇਨ ਸਹਸ੍ਸਗੁਣੇਨ ਸਤਸਹਸ੍ਸਗੁਣੇਨ ਵਰਤਰ’’ਨ੍ਤਿ ਅਧਿਵਾਸੇਤ੍ਵਾ ਨਿਚ੍ਚਲੋਵ ਅਹੋਸਿ. ਅਥਸ੍ਸ ਮਾਤਾਪਿਤਰੋ ਭਿਜ੍ਜਮਾਨਹਦਯਾ ਵਿਯ ਮਨੁਸ੍ਸੇ ਪਟਿਕ੍ਕਮਾਪੇਤ੍ਵਾ ਤਂ ਤਤੋ ਅਗ੍ਗਿਸਨ੍ਤਾਪਨਤੋ ਅਪਨੇਤ੍ਵਾ ‘‘ਤਾਤ ਤੇਮਿਯਕੁਮਾਰ, ਮਯਂ ਤਵ ਅਪੀਠਸਪ੍ਪਿਆਦਿਭਾਵਂ ਜਾਨਾਮ. ਨ ਹਿ ਏਤੇਸਂ ਏਵਰੂਪਾਨਿ ਹਤ੍ਥਪਾਦਕਣ੍ਣਸੋਤਾਨਿ ਹੋਨ੍ਤਿ, ਤ੍ਵਂ ਅਮ੍ਹੇਹਿ ਪਤ੍ਥੇਤ੍ਵਾ ਲਦ੍ਧਪੁਤ੍ਤਕੋ, ਮਾ ਨੋ ਨਾਸੇਹਿ, ਸਕਲਜਮ੍ਬੁਦੀਪੇ ਵਸਨ੍ਤਾਨਂ ਰਾਜੂਨਂ ਸਨ੍ਤਿਕੇ ਗਰਹਤੋ ਨੋ ਮੋਚੇਹੀ’’ਤਿ ਯਾਚਿਂਸੁ. ਏਵਂ ਸੋ ਤੇਹਿ ਯਾਚਿਤੋਪਿ ਅਸੁਣਨ੍ਤੋ ਵਿਯ ਹੁਤ੍ਵਾ ਨਿਚ੍ਚਲੋਵ ਨਿਪਜ੍ਜਿ. ਅਥਸ੍ਸ ਮਾਤਾਪਿਤਰੋ ਰੋਦਮਾਨਾ ਪਰਿਦੇਵਮਾਨਾ ਪਟਿਕ੍ਕਮਨ੍ਤਿ. ਏਕਦਾ ਮਾਤਾ ਏਕਿਕਾ ਉਪਸਙ੍ਕਮਿਤ੍ਵਾ ਯਾਚਤਿ, ਏਕਦਾ ਪਿਤਾ ਏਕਕੋਵ ਉਪਸਙ੍ਕਮਿਤ੍ਵਾ ਯਾਚਤਿ. ਏਵਂ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਅਥਸ੍ਸ ਸੋਲ਼ਸਵਸ੍ਸਿਕਕਾਲੇ ਅਮਚ੍ਚਬ੍ਰਾਹ੍ਮਣਾਦਯੋ ਚਿਨ੍ਤਯਿਂਸੁ ‘‘ਪੀਠਸਪ੍ਪੀ ਵਾ ਹੋਤੁ, ਮੂਗੋ ਵਾ ਬਧਿਰੋ ਵਾ ਹੋਤੁ, ਵਯੇ ਪਰਿਣਤੇ ਰਜਨੀਯੇ ਅਰਜ੍ਜਨ੍ਤਾ ਨਾਮ ਨਤ੍ਥਿ, ਦੁਸ੍ਸਨੀਯੇ ਅਦੁਸ੍ਸਨ੍ਤਾ ਨਾਮ ਨਤ੍ਥਿ, ਸਮਯੇ ਸਮ੍ਪਤ੍ਤੇ ਪੁਪ੍ਫਵਿਕਸਨਂ ਵਿਯ ਹਿ ਧਮ੍ਮਤਾ ਏਸਾ, ਨਾਟਕਾਨਮ੍ਪਿਸ੍ਸ ਪਚ੍ਚੁਪਟ੍ਠਾਪੇਤ੍ਵਾ ਤਾਹਿ ਨਂ ਵੀਮਂਸਿਸ੍ਸਾਮਾ’’ਤਿ. ਤਤੋ ਉਤ੍ਤਮਰੂਪਧਰਾ ਦੇਵਕਞ੍ਞਾਯੋ ਵਿਯ ਵਿਲਾਸਸਮ੍ਪਨ੍ਨਾ ਨਾਟਕਿਤ੍ਥਿਯੋ ਪਕ੍ਕੋਸਾਪੇਤ੍ਵਾ ‘‘ਯਾ ਕੁਮਾਰਂ ਹਸਾਪੇਤੁਂ ਵਾ ਕਿਲੇਸੇਹਿ ਬਨ੍ਧਿਤੁਂ ਵਾ ਸਕ੍ਕੋਤਿ, ਸਾ ਤਸ੍ਸ ਅਗ੍ਗਮਹੇਸੀ ਭਵਿਸ੍ਸਤੀ’’ਤਿ ਵਤ੍ਵਾ ਕੁਮਾਰਂ ਗਨ੍ਧੋਦਕੇਨ ਨ੍ਹਾਪੇਤ੍ਵਾ ਦੇਵਪੁਤ੍ਤਂ ਵਿਯ ਅਲਙ੍ਕਰਿਤ੍ਵਾ ਦੇਵਵਿਮਾਨਸਦਿਸੇ ਸਿਰਿਗਬ੍ਭੇ ਸੁਪਞ੍ਞਤ੍ਤੇ ਸਿਰਿਸਯਨੇ ਆਰੋਪੇਤ੍ਵਾ ਗਨ੍ਧਦਾਮਪੁਪ੍ਫਦਾਮਧੂਮਵਾਸਚੁਣ੍ਣਾਦੀਹਿ ਅਨ੍ਤੋਗਬ੍ਭਂ ਏਕਗਨ੍ਧਸਮੋਦਕਂ ਕਤ੍ਵਾ ਪਟਿਕ੍ਕਮਿਂਸੁ. ਅਥ ਨਂ ਤਾ ਇਤ੍ਥਿਯੋ ਪਰਿਵਾਰੇਤ੍ਵਾ ਨਚ੍ਚਗੀਤੇਹਿ ਚੇਵ ਮਧੁਰਵਚਨਾਦੀਹਿ ਚ ਨਾਨਪ੍ਪਕਾਰੇਹਿ ਅਭਿਰਮਾਪੇਤੁਂ ਵਾਯਮਿਂਸੁ. ਸੋ ਬੁਦ੍ਧਿਸਮ੍ਪਨ੍ਨਤਾਯ ਤਾ ਇਤ੍ਥਿਯੋ ਅਨੋਲੋਕੇਤ੍ਵਾ ‘‘ਇਮਾ ਇਤ੍ਥਿਯੋ ਮਮ ਸਰੀਰਸਮ੍ਫਸ੍ਸਂ ਮਾ ਵਿਨ੍ਦਨ੍ਤੂ’’ਤਿ ਅਧਿਟ੍ਠਹਿਤ੍ਵਾ ਅਸ੍ਸਾਸਪਸ੍ਸਾਸੇ ਸਨ੍ਨਿਰੁਮ੍ਭਿ, ਅਥਸ੍ਸ ਸਰੀਰਂ ਥਦ੍ਧਂ ਅਹੋਸਿ. ਤਾ ਤਸ੍ਸ ਸਰੀਰਸਮ੍ਫਸ੍ਸਂ ਅਵਿਨ੍ਦਨ੍ਤਿਯੋ ਹੁਤ੍ਵਾ ‘‘ਥਦ੍ਧਸਰੀਰੋ ਏਸ, ਨਾਯਂ ਮਨੁਸ੍ਸੋ, ਯਕ੍ਖੋ ਭਵਿਸ੍ਸਤੀ’’ਤਿ ਭੀਤਤਸਿਤਾ ਹੁਤ੍ਵਾ ਅਤ੍ਤਾਨਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤਿਯੋ ਪਲਾਯਿਂਸੁ. ਏਵਂ ਨਾਟਕੇਨਪਿ ਏਕਸਂਵਚ੍ਛਰਂ ਅਨ੍ਤਰਨ੍ਤਰਾ ਵੀਮਂਸਨ੍ਤਾਪਿਸ੍ਸ ਨੇਵ ਅਨ੍ਤਰਂ ਪਸ੍ਸਿਂਸੁ.
ਏਵਂ ਸੋਲ਼ਸ ਸਂਵਚ੍ਛਰਾਨਿ ਸੋਲ਼ਸਹਿ ਮਹਾਵੀਮਂਸਾਹਿ ਚੇਵ ਅਨੇਕਾਹਿ ਖੁਦ੍ਦਕਵੀਮਂਸਾਹਿ ਚ ਵੀਮਂਸਮਾਨਾਪਿ ਤਸ੍ਸ ਚਿਤ੍ਤਂ ਪਰਿਗ੍ਗਣ੍ਹਿਤੁਂ ਨਾਸਕ੍ਖਿਂਸੁ.
ਵੀਮਂਸਨਕਣ੍ਡਂ ਨਿਟ੍ਠਿਤਂ.
ਰਜ੍ਜਯਾਚਨਕਣ੍ਡਂ
ਤਤੋ ਰਾਜਾ ਵਿਪ੍ਪਟਿਸਾਰੀ ਹੁਤ੍ਵਾ ਲਕ੍ਖਣਪਾਠਕੇ ਬ੍ਰਾਹ੍ਮਣੇ ਪਕ੍ਕੋਸਾਪੇਤ੍ਵਾ ‘‘ਤੁਮ੍ਹੇ ਕੁਮਾਰਸ੍ਸ ਜਾਤਕਾਲੇ ‘ਧਞ੍ਞਪੁਞ੍ਞਲਕ੍ਖਣਸਮ੍ਪਨ੍ਨੋ ਅਯਂ ਕੁਮਾਰੋ, ਨਾਸ੍ਸ ਕੋਚਿ ਅਨ੍ਤਰਾਯੋ ਪਞ੍ਞਾਯਤੀ’ਤਿ ਮੇ ਕਥਯਿਤ੍ਥ, ਇਦਾਨਿ ਪਨ ਸੋ ਪੀਠਸਪ੍ਪੀ ਮੂਗਬਧਿਰੋ ਜਾਤੋ, ਕਥਾ ਵੋ ਨ ਸਮੇਤੀ’’ਤਿ ਆਹ. ਬ੍ਰਾਹ੍ਮਣਾ ਵਦਿਂਸੁ ‘‘ਮਹਾਰਾਜ, ਆਚਰਿਯੇਹਿ ਅਦਿਟ੍ਠਕਂ ਨਾਮ ਨਤ੍ਥਿ, ਅਪਿਚ ਖੋ ਪਨ, ਦੇਵ, ‘ਰਾਜਕੁਲੇਹਿ ਪਤ੍ਥੇਤ੍ਵਾ ਲਦ੍ਧਪੁਤ੍ਤਕੋ ਕਾਲ਼ਕਣ੍ਣੀ’ਤਿ ਵੁਤ੍ਤੇ ‘ਤੁਮ੍ਹਾਕਂ ਦੋਮਨਸ੍ਸਂ ਸਿਯਾ’ਤਿ ਨ ਕਥਯਿਮ੍ਹਾ’’ਤਿ. ਅਥ ਨੇ ਰਾਜਾ ਏਵਮਾਹ ‘‘ਇਦਾਨਿ ਪਨ ਕਿਂ ਕਾਤੁਂ ਵਟ੍ਟਤੀ’’ਤਿ? ‘‘ਮਹਾਰਾਜ, ਇਮਸ੍ਮਿਂ ਕੁਮਾਰੇ ਇਮਸ੍ਮਿਂ ਗੇਹੇ ਵਸਨ੍ਤੇ ਤਯੋ ਅਨ੍ਤਰਾਯਾ ਪਞ੍ਞਾਯਿਸ੍ਸਨ੍ਤਿ – ਜੀਵਿਤਸ੍ਸ ਵਾ ਅਨ੍ਤਰਾਯੋ, ਸੇਤਚ੍ਛਤ੍ਤਸ੍ਸ ਵਾ ਅਨ੍ਤਰਾਯੋ, ਅਗ੍ਗਮਹੇਸਿਯਾ ਵਾ ਅਨ੍ਤਰਾਯੋ’’ਤਿ. ‘‘ਤਸ੍ਮਾ, ਦੇਵ, ਪਪਞ੍ਚਂ ਅਕਤ੍ਵਾ ਅਵਮਙ੍ਗਲਰਥੇ ਅਵਮਙ੍ਗਲਅਸ੍ਸੇ ਯੋਜੇਤ੍ਵਾ ਤਤ੍ਥ ਨਂ ਨਿਪਜ੍ਜਾਪੇਤ੍ਵਾ ਪਚ੍ਛਿਮਦ੍ਵਾਰੇਨ ਨੀਹਰਿਤ੍ਵਾ ਆਮਕਸੁਸਾਨੇ ਚਤੁਬ੍ਭਿਤ੍ਤਿਕਂ ਆਵਾਟਂ ਖਣਿਤ੍ਵਾ ਨਿਖਣਿਤੁਂ ਵਟ੍ਟਤੀ’’ਤਿ. ਰਾਜਾ ਅਨ੍ਤਰਾਯਭਯੇਨ ਭੀਤੋ ਤੇਸਂ ਵਚਨਂ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ.
ਤਦਾ ਚਨ੍ਦਾਦੇਵੀ ਤਂ ਪਵਤ੍ਤਿਂ ਸੁਤ੍ਵਾ ਤੁਰਿਤਤੁਰਿਤਾਵ ਏਕਿਕਾ ਰਾਜਾਨਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਦੇਵ, ਤੁਮ੍ਹੇਹਿ ਮਯ੍ਹਂ ਵਰੋ ਦਿਨ੍ਨੋ, ਮਯਾ ਚ ਗਹਿਤਕੋ ਕਤ੍ਵਾ ਠਪਿਤੋ, ਇਦਾਨਿ ਤਂ ਮੇ ਦੇਥਾ’’ਤਿ ਯਾਚਿ. ‘‘ਗਣ੍ਹਾਹਿ, ਦੇਵੀ’’ਤਿ. ‘‘ਦੇਵ, ਪੁਤ੍ਤਸ੍ਸ ਮੇ ਰਜ੍ਜਂ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਕਿਂਕਾਰਣਾ, ਦੇਵਾ’’ਤਿ. ‘‘ਪੁਤ੍ਤੋ, ਤੇ ਦੇਵਿ, ਕਾਲ਼ਕਣ੍ਣੀ’’ਤਿ. ‘‘ਤੇਨ ਹਿ, ਦੇਵ, ਯਾਵਜੀਵਂ ਅਦਦਨ੍ਤਾਪਿ ਸਤ੍ਤ ਵਸ੍ਸਾਨਿ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਛ ਵਸ੍ਸਾਨਿ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਪਞ੍ਚ ਵਸ੍ਸਾਨਿ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਚਤ੍ਤਾਰਿ ਵਸ੍ਸਾਨਿ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਤੀਣਿ ਵਸ੍ਸਾਨਿ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਦ੍ਵੇ ਵਸ੍ਸਾਨਿ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਏਕਵਸ੍ਸਂ ਰਜ੍ਜਂ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਸਤ੍ਤ ਮਾਸਾਨਿ ਰਜ੍ਜਂ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਛ ਮਾਸਾਨਿ ਰਜ੍ਜਂ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਪਞ੍ਚ ਮਾਸਾਨਿ ਰਜ੍ਜਂ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਚਤ੍ਤਾਰਿ ਮਾਸਾਨਿ ਰਜ੍ਜਂ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਤੀਣਿ ਮਾਸਾਨਿ ਰਜ੍ਜਂ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਦ੍ਵੇ ਮਾਸਾਨਿ ਰਜ੍ਜਂ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਏਕਮਾਸਂ ਰਜ੍ਜਂ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਅਡ੍ਢਮਾਸਂ ਰਜ੍ਜਂ ਦੇਥਾ’’ਤਿ. ‘‘ਨ ਸਕ੍ਕਾ, ਦੇਵੀ’’ਤਿ. ‘‘ਤੇਨ ਹਿ, ਦੇਵ, ਸਤ੍ਤ ਦਿਵਸਾਨਿ ਰਜ੍ਜਂ ਦੇਥਾ’’ਤਿ. ਰਾਜਾ ‘‘ਸਾਧੁ, ਦੇਵਿ, ਗਣ੍ਹਾਹੀ’’ਤਿ ਆਹ. ਸਾ ਤਸ੍ਮਿਂ ਖਣੇ ਪੁਤ੍ਤਂ ਅਲਙ੍ਕਾਰਾਪੇਤ੍ਵਾ ‘‘ਤੇਮਿਯਕੁਮਾਰਸ੍ਸ ਇਦਂ ਰਜ੍ਜ’’ਨ੍ਤਿ ਨਗਰੇ ਭੇਰਿਂ ਚਰਾਪੇਤ੍ਵਾ ਸਕਲਨਗਰਂ ਅਲਙ੍ਕਾਰਾਪੇਤ੍ਵਾ ਪੁਤ੍ਤਂ ਹਤ੍ਥਿਕ੍ਖਨ੍ਧਂ ਆਰੋਪੇਤ੍ਵਾ ਸੇਤਚ੍ਛਤ੍ਤਂ ਤਸ੍ਸ ਮਤ੍ਥਕੇ ਕਾਰਾਪੇਤ੍ਵਾ ਨਗਰਂ ਪਦਕ੍ਖਿਣਂ ਕਤ੍ਵਾ ਪੁਨ ਆਗਨ੍ਤ੍ਵਾ ਅਨ੍ਤੋਨਗਰਂ ਪਵੇਸੇਤ੍ਵਾ ਤਂ ਸਿਰਿਸਯਨੇ ਨਿਪਜ੍ਜਾਪੇਤ੍ਵਾ ਪਿਯਪੁਤ੍ਤਂ ਸਬ੍ਬਰਤ੍ਤਿਂ ਯਾਚਿ ‘‘ਤਾਤ ਤੇਮਿਯਕੁਮਾਰ, ਤਂ ਨਿਸ੍ਸਾਯ ਸੋਲ਼ਸ ਵਸ੍ਸਾਨਿ ਨਿਦ੍ਦਂ ਅਲਭਿਤ੍ਵਾ ਰੋਦਮਾਨਾਯ ਮੇ ਅਕ੍ਖੀਨਿ ਉਪਕ੍ਕਾਨਿ, ਸੋਕੇਨ ਮੇ ਹਦਯਂ ਭਿਜ੍ਜਮਾਨਂ ਵਿਯ ਅਹੋਸਿ, ਅਹਂ ਤਵ ਅਪੀਠਸਪ੍ਪਿਆਦਿਭਾਵਂ ਜਾਨਾਮਿ, ਮਾ ਮਂ ਅਨਾਥਂ ਕਰੀ’’ਤਿ. ਸਾ ਇਮਿਨਾ ਉਪਾਯੇਨੇਵ ਪੁਨਦਿਵਸੇਪਿ ਪੁਨਦਿਵਸੇਪੀਤਿ ਪਞ੍ਚ ਦਿਵਸਾਨਿ ਯਾਚਿ.
ਰਜ੍ਜਯਾਚਨਕਣ੍ਡਂ ਨਿਟ੍ਠਿਤਂ.
ਅਥ ਛਟ੍ਠੇ ਦਿਵਸੇ ਰਾਜਾ ਸੁਨਨ੍ਦਂ ਨਾਮ ਸਾਰਥਿਂ ਪਕ੍ਕੋਸਾਪੇਤ੍ਵਾ ‘‘ਤਾਤ, ਸੁਨਨ੍ਦਸਾਰਥਿ ਸ੍ਵੇ ਪਾਤੋਵ ਅਵਮਙ੍ਗਲਰਥੇ ਅਵਮਙ੍ਗਲਅਸ੍ਸੇ ਯੋਜੇਤ੍ਵਾ ਕੁਮਾਰਂ ਤਤ੍ਥ ਨਿਪਜ੍ਜਾਪੇਤ੍ਵਾ ਪਚ੍ਛਿਮਦ੍ਵਾਰੇਨ ਨੀਹਰਿਤ੍ਵਾ ਆਮਕਸੁਸਾਨੇ ਚਤੁਬ੍ਭਿਤ੍ਤਿਕਂ ਆਵਾਟਂ ਖਣਿਤ੍ਵਾ ਤਤ੍ਥ ਨਂ ਪਕ੍ਖਿਪਿਤ੍ਵਾ ਕੁਦ੍ਦਾਲਪਿਟ੍ਠੇਨ ਮਤ੍ਥਕਂ ਭਿਨ੍ਦਿਤ੍ਵਾ ਜੀਵਿਤਕ੍ਖਯਂ ਪਾਪੇਤ੍ਵਾ ਉਪਰਿ ਪਂਸੁਂ ਦਤ੍ਵਾ ਪਥਵਿਵਡ੍ਢਨਕਮ੍ਮਂ ਕਤ੍ਵਾ ਨ੍ਹਤ੍ਵਾ ਏਹੀ’’ਤਿ ਆਣਾਪੇਸਿ. ਸੋ ‘‘ਸਾਧੁ, ਦੇਵਾ’’ਤਿ ਸਮ੍ਪਟਿਚ੍ਛਿ. ਅਥ ਛਟ੍ਠਮ੍ਪਿ ਰਤ੍ਤਿਂ ਦੇਵੀ ਕੁਮਾਰਂ ਯਾਚਿਤ੍ਵਾ ‘‘ਤਾਤ ਤੇਮਿਯਕੁਮਾਰ, ਤਵ ਪਿਤਾ ਕਾਸਿਰਾਜਾ ਤਂ ਸ੍ਵੇ ਪਾਤੋਵ ਆਮਕਸੁਸਾਨੇ ਨਿਖਣਿਤੁਂ ਆਣਾਪੇਸਿ, ਸ੍ਵੇ ਪਾਤੋਵ ਮਰਣਂ ਪਾਪੁਣਿਸ੍ਸਸਿ ਪੁਤ੍ਤਾ’’ਤਿ ਆਹ. ਤਂ ਸੁਤ੍ਵਾ ਮਹਾਸਤ੍ਤਸ੍ਸ ‘‘ਤਾਤ ਤੇਮਿਯਕੁਮਾਰ, ਸੋਲ਼ਸ ਵਸ੍ਸਾਨਿ ਤਯਾ ਕਤੋ ਵਾਯਾਮੋ ਇਦਾਨਿ ਮਤ੍ਥਕਂ ਪਕ੍ਕੋ’’ਤਿ ਚਿਨ੍ਤੇਨ੍ਤਸ੍ਸ ਅਬ੍ਭਨ੍ਤਰੇ ਪੀਤਿ ਉਪ੍ਪਜ੍ਜਿ. ਮਾਤੁਯਾ ਪਨਸ੍ਸ ਹਦਯਂ ਭਿਜ੍ਜਮਾਨਂ ਵਿਯ ਅਹੋਸਿ, ਏਵਂ ਸਨ੍ਤੇਪਿ ‘‘ਮਨੋਰਥੋ ਮਤ੍ਥਕਂ ਪਾਪੁਣਿਸ੍ਸਤੀ’’ਤਿ ਮਾਤੁਯਾ ਸਦ੍ਧਿਂ ਨਾਲਪਿ.
ਅਥਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਾਤੋਵ ਸੁਨਨ੍ਦੋ ਸਾਰਥਿ ਰਥਂ ਯੋਜੇਨ੍ਤੋ ਦੇਵਤਾਨੁਭਾਵੇਨ ਮਹਾਸਤ੍ਤਸ੍ਸ ਪਾਰਮਿਤਾਨੁਭਾਵੇਨ ਚ ਮਙ੍ਗਲਰਥੇ ਮਙ੍ਗਲਅਸ੍ਸੇ ਯੋਜੇਤ੍ਵਾ ਰਥਂ ਰਾਜਦ੍ਵਾਰੇ ਠਪੇਤ੍ਵਾ ਮਹਾਤਲਂ ਅਭਿਰੁਹਿਤ੍ਵਾ ਸਿਰਿਗਬ੍ਭਂ ਪਵਿਸਿਤ੍ਵਾ ਦੇਵਿਂ ਵਨ੍ਦਿਤ੍ਵਾ ਏਵਮਾਹ – ‘‘ਦੇਵਿ, ਮਯ੍ਹਂ ਮਾ ਕੁਜ੍ਝ, ਰਞ੍ਞੋ ਆਣਾ’’ਤਿ ਵਤ੍ਵਾ ਪੁਤ੍ਤਂ ਆਲਿਙ੍ਗਿਤ੍ਵਾ ਨਿਪਨ੍ਨਂ ਦੇਵਿਂ ਪਿਟ੍ਠਿਹਤ੍ਥੇਨ ਅਪਨੇਤ੍ਵਾ ਪੁਪ੍ਫਕਲਾਪਂ ਵਿਯ ਕੁਮਾਰਂ ਉਕ੍ਖਿਪਿਤ੍ਵਾ ਪਾਸਾਦਾ ਓਤਰਿ. ਤਦਾ ਚਨ੍ਦਾਦੇਵੀ ਉਰਂ ਪਹਰਿਤ੍ਵਾ ਮਹਨ੍ਤੇਨ ਸਦ੍ਦੇਨ ਪਰਿਦੇਵਿਤ੍ਵਾ ਮਹਾਤਲੇ ਓਹੀਯਿ. ਅਥ ਨਂ ਮਹਾਸਤ੍ਤੋ ਓਲੋਕੇਤ੍ਵਾ ‘‘ਮਯਿ ਅਕਥੇਨ੍ਤੇ ਮਾਤਾ ਹਦਯੇਨ ਫਲਿਤੇਨ ਮਰਿਸ੍ਸਤੀ’’ਤਿ ਕਥੇਤੁਕਾਮੋ ਹੁਤ੍ਵਾਪਿ ‘‘ਸਚੇ ਅਹਂ ਕਥੇਸ੍ਸਾਮਿ, ਸੋਲ਼ਸ ਵਸ੍ਸਾਨਿ ਕਤੋ ਵਾਯਾਮੋ ਮੇ ਮੋਘੋ ਭਵਿਸ੍ਸਤਿ, ਅਕਥੇਨ੍ਤੋ ਪਨਾਹਂ ਅਤ੍ਤਨੋ ਚ ਮਾਤਾਪਿਤੂਨਞ੍ਚ ਮਹਾਜਨਸ੍ਸ ਚ ਪਚ੍ਚਯੋ ਭਵਿਸ੍ਸਾਮੀ’’ਤਿ ਅਧਿਵਾਸੇਸਿ.
ਅਥ ਨਂ ਸਾਰਥਿ ਰਥਂ ਆਰੋਪੇਤ੍ਵਾ ‘‘ਪਚ੍ਛਿਮਦ੍ਵਾਰਾਭਿਮੁਖਂ ਰਥਂ ਪੇਸੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਰਥਂ ਪੇਸੇਸਿ. ਤਦਾ ਮਹਾਸਤ੍ਤਸ੍ਸ ਪਾਰਮਿਤਾਨੁਭਾਵੇਨ ਦੇਵਤਾਵਿਗ੍ਗਹਿਤੋ ਹੁਤ੍ਵਾ ਰਥਂ ਨਿਵਤ੍ਤਾਪੇਤ੍ਵਾ ਪਾਚੀਨਦ੍ਵਾਰਾਭਿਮੁਖਂ ਰਥਂ ਪੇਸੇਸਿ, ਅਥ ਰਥਚਕ੍ਕਂ ਉਮ੍ਮਾਰੇ ਪਤਿਹਞ੍ਞਿ. ਮਹਾਸਤ੍ਤੋਪਿ ਤਸ੍ਸ ਸਦ੍ਦਂ ਸੁਤ੍ਵਾ ‘‘ਮਨੋਰਥੋ ਮੇ ਮਤ੍ਥਕਂ ਪਤ੍ਤੋ’’ਤਿ ਸੁਟ੍ਠੁਤਰਂ ਤੁਟ੍ਠਚਿਤ੍ਤੋ ਅਹੋਸਿ. ਰਥੋ ਨਗਰਾ ਨਿਕ੍ਖਮਿਤ੍ਵਾ ਦੇਵਤਾਨੁਭਾਵੇਨ ਤਿਯੋਜਨਿਕਂ ਠਾਨਂ ਗਤੋ. ਤਤ੍ਥ ਵਨਘਟਂ ਸਾਰਥਿਸ੍ਸ ਆਮਕਸੁਸਾਨਂ ਵਿਯ ਉਪਟ੍ਠਾਸਿ. ਸੋ ‘‘ਇਦਂ ਠਾਨਂ ਫਾਸੁਕ’’ਨ੍ਤਿ ਸਲ੍ਲਕ੍ਖੇਤ੍ਵਾ ਰਥਂ ਮਗ੍ਗਾ ਓਕ੍ਕਮਾਪੇਤ੍ਵਾ ਮਗ੍ਗਪਸ੍ਸੇ ਠਪੇਤ੍ਵਾ ਰਥਾ ਓਰੁਯ੍ਹ ਮਹਾਸਤ੍ਤਸ੍ਸ ਆਭਰਣਭਣ੍ਡਂ ਓਮੁਞ੍ਚਿਤ੍ਵਾ ਭਣ੍ਡਿਕਂ ਕਤ੍ਵਾ ਏਕਮਨ੍ਤਂ ਠਪੇਤ੍ਵਾ ਕੁਦ੍ਦਾਲਂ ਆਦਾਯ ਰਥਸ੍ਸ ਅਵਿਦੂਰੇ ਠਾਨੇ ਚਤੁਬ੍ਭਿਤ੍ਤਿਕਂ ਆਵਾਟਂ ਖਣਿਤੁਂ ਆਰਭਿ.
ਤਤੋ ਬੋਧਿਸਤ੍ਤੋ ਚਿਨ੍ਤੇਸਿ ‘‘ਅਯਂ ਮੇ ਵਾਯਾਮਕਾਲੋ, ਅਹਞ੍ਹਿ ਸੋਲ਼ਸ ਵਸ੍ਸਾਨਿ ਹਤ੍ਥਪਾਦੇ ਨ ਚਾਲੇਸਿਂ, ਕਿਂ ਨੁ ਖੋ ਮੇ ਬਲਂ ਅਤ੍ਥਿ, ਉਦਾਹੁ ਨੋ’’ਤਿ. ਸੋ ਉਟ੍ਠਾਯ ਵਾਮਹਤ੍ਥੇਨ ਦਕ੍ਖਿਣਹਤ੍ਥਂ, ਦਕ੍ਖਿਣਹਤ੍ਥੇਨ ਵਾਮਹਤ੍ਥਂ ਪਰਾਮਸਨ੍ਤੋ ਉਭੋਹਿ ਹਤ੍ਥੇਹਿ ਪਾਦੇ ਸਮ੍ਬਾਹਿਤ੍ਵਾ ਰਥਾ ਓਤਰਿਤੁਂ ਚਿਤ੍ਤਂ ਉਪ੍ਪਾਦੇਸਿ. ਤਾਵਦੇਵਸ੍ਸ ਪਾਦਪਤਿਤਟ੍ਠਾਨੇ ਵਾਤਪੁਣ੍ਣਭਸ੍ਤਚਮ੍ਮਂ ਵਿਯ ਮਹਾਪਥਵੀ ਅਬ੍ਭੁਗ੍ਗਨ੍ਤ੍ਵਾ ਰਥਸ੍ਸ ਪਚ੍ਛਿਮਨ੍ਤਂ ਆਹਚ੍ਚ ਅਟ੍ਠਾਸਿ. ਮਹਾਸਤ੍ਤੋ ਰਥਾ ਓਤਰਿਤ੍ਵਾ ਕਤਿਪਯੇ ਵਾਰੇ ਅਪਰਾਪਰਂ ਚਙ੍ਕਮਿਤ੍ਵਾ ‘‘ਇਮਿਨਾਵ ਨਿਯਾਮੇਨ ਏਕਦਿਵਸਂ ਯੋਜਨਸਤਮ੍ਪਿ ਮੇ ਗਨ੍ਤੁਂ ਬਲਂ ਅਤ੍ਥੀ’’ਤਿ ਞਤ੍ਵਾ ‘‘ਸਚੇ, ਸਾਰਥਿ, ਮਯਾ ਸਦ੍ਧਿਂ ਵਿਰੁਜ੍ਝੇਯ੍ਯ, ਅਤ੍ਥਿ ਨੁ ਖੋ ਮੇ ਤੇਨ ਸਹ ਪਟਿਵਿਰੁਜ੍ਝਿਤੁਂ ਬਲ’’ਨ੍ਤਿ ਉਪਧਾਰੇਨ੍ਤੋ ਰਥਸ੍ਸ ਪਚ੍ਛਿਮਨ੍ਤਂ ਗਹੇਤ੍ਵਾ ਕੁਮਾਰਕਾਨਂ ਕੀਲ਼ਨਯਾਨਕਂ ਵਿਯ ਉਕ੍ਖਿਪਿਤ੍ਵਾ ਰਥਂ ਪਰਿਬ੍ਭਮੇਨ੍ਤੋ ਅਟ੍ਠਾਸਿ. ਅਥਸ੍ਸ ‘‘ਅਤ੍ਥਿ ਮੇ ਤੇਨ ਸਹ ਪਟਿਵਿਰੁਜ੍ਝਿਤੁਂ ਬਲ’’ਨ੍ਤਿ ਸਲ੍ਲਕ੍ਖੇਤ੍ਵਾ ਪਸਾਧਨਤ੍ਥਾਯ ਚਿਤ੍ਤਂ ਉਪ੍ਪਜ੍ਜਿ.
ਤਂਖਣਞ੍ਞੇਵ ਸਕ੍ਕਸ੍ਸ ਭਵਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ਆਵਜ੍ਜੇਨ੍ਤੋ ਤਂ ਕਾਰਣਂ ਞਤ੍ਵਾ ‘‘ਤੇਮਿਯਕੁਮਾਰਸ੍ਸ ਮਨੋਰਥੋ ਮਤ੍ਥਕਂ ਪਤ੍ਤੋ, ਇਦਾਨਿ ਪਸਾਧਨਤ੍ਥਾਯ ਚਿਤ੍ਤਂ ਉਪ੍ਪਨ੍ਨਂ, ਕਿਂ ਏਤਸ੍ਸ ਮਾਨੁਸਕੇਨ ਪਸਾਧਨੇਨਾ’’ਤਿ ਦਿਬ੍ਬਪਸਾਧਨਂ ਗਾਹਾਪੇਤ੍ਵਾ ਵਿਸ੍ਸਕਮ੍ਮਦੇਵਪੁਤ੍ਤਂ ਪਕ੍ਕੋਸਾਪੇਤ੍ਵਾ ‘‘ਤਾਤ ਵਿਸ੍ਸਕਮ੍ਮ ਦੇਵਪੁਤ੍ਤ, ਤ੍ਵਂ ਗਚ੍ਛ, ਕਾਸਿਰਾਜਸ੍ਸ ਪੁਤ੍ਤਂ ਤੇਮਿਯਕੁਮਾਰਂ ਅਲਙ੍ਕਰੋਹੀ’’ਤਿ ਆਣਾਪੇਸਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਾਵਤਿਂਸਭਵਨਤੋ ਓਤਰਿਤ੍ਵਾ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਦਸਹਿ ਦੁਸ੍ਸਸਹਸ੍ਸੇਹਿ ਵੇਠਨਂ ਕਤ੍ਵਾ ਦਿਬ੍ਬੇਹਿ ਚੇਵ ਮਾਨੁਸਕੇਹਿ ਚ ਅਲਙ੍ਕਾਰੇਹਿ ਸਕ੍ਕਂ ਵਿਯ ਤਂ ਅਲਙ੍ਕਰਿਤ੍ਵਾ ਸਕਟ੍ਠਾਨਮੇਵ ਗਤੋ. ਸੋ ਦੇਵਰਾਜਲੀਲਾਯ ਸਾਰਥਿਸ੍ਸ ਖਣਨੋਕਾਸਂ ਗਨ੍ਤ੍ਵਾ ਆਵਾਟਤੀਰੇ ਠਤ੍ਵਾ ਪੁਚ੍ਛਨ੍ਤੋ ਤਤਿਯਂ ਗਾਥਮਾਹ –
੩. ‘‘ਕਿਂ ਨੁ ਸਨ੍ਤਰਮਾਨੋਵ, ਕਾਸੁਂ ਖਣਸਿ ਸਾਰਥਿ;
ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਕਿਂ ਕਾਸੁਯਾ ਕਰਿਸ੍ਸਸੀ’’ਤਿ.
ਤਤ੍ਥ ਕਾਸੁਨ੍ਤਿ ਆਵਾਟਂ.
ਤਂ ਸੁਤ੍ਵਾ ਸਾਰਥਿ ਆਵਾਟਂ ਖਣਨ੍ਤੋ ਉਦ੍ਧਂ ਅਨੋਲੋਕੇਤ੍ਵਾਵ ਚਤੁਤ੍ਥਂ ਗਾਥਾਮਾਹ –
੪. ‘‘ਰਞ੍ਞੋ ਮੂਗੋ ਚ ਪਕ੍ਖੋ ਚ, ਪੁਤ੍ਤੋ ਜਾਤੋ ਅਚੇਤਸੋ;
ਸੋਮ੍ਹਿ ਰਞ੍ਞਾ ਸਮਜ੍ਝਿਟ੍ਠੋ, ਪੁਤ੍ਤਂ ਮੇ ਨਿਖਣਂ ਵਨੇ’’ਤਿ.
ਤਤ੍ਥ ਪਕ੍ਖੋਤਿ ਪੀਠਸਪ੍ਪੀ. ‘‘ਮੂਗੋ’’ਤਿ ਵਚਨੇਨੇਵ ਪਨਸ੍ਸ ਬਧਿਰਭਾਵੋਪਿ ਸਿਜ੍ਝਤਿ ਬਧਿਰਸ੍ਸ ਹਿ ਪਟਿਵਚਨਂ ਕਥੇਤੁਂ ਅਸਕ੍ਕੁਣੇਯ੍ਯਤ੍ਤਾ. ਅਚੇਤਸੋਤਿ ਅਚਿਤ੍ਤਕੋ ਵਿਯ ਜਾਤੋ. ਸੋਲ਼ਸ ਵਸ੍ਸਾਨਿ ਅਕਥਿਤਤ੍ਤਾ ਏਵਮਾਹ. ਸਮਜ੍ਝਿਟ੍ਠੋਤਿ ਆਣਤ੍ਤੋ, ਪੇਸਿਤੋਤਿ ਅਤ੍ਥੋ. ਨਿਖਣਂ ਵਨੇਤਿ ਵਨੇ ਨਿਖਣੇਯ੍ਯਾਸਿ.
ਅਥ ਨਂ ਮਹਾਸਤ੍ਤੋ ਆਹ –
੫. ‘‘ਨ ਬਧਿਰੋ ਨ ਮੂਗੋਸ੍ਮਿ, ਨ ਪਕ੍ਖੋ ਨ ਚ ਵੀਕਲੋ;
ਅਧਮ੍ਮਂ ਸਾਰਥਿ ਕਯਿਰਾ, ਮਂ ਚੇ ਤ੍ਵਂ ਨਿਖਣਂ ਵਨੇ.
੬. ‘‘ਊਰੂ ਬਾਹੁਞ੍ਚ ਮੇ ਪਸ੍ਸ, ਭਾਸਿਤਞ੍ਚ ਸੁਣੋਹਿ ਮੇ;
ਅਧਮ੍ਮਂ ਸਾਰਥਿ ਕਯਿਰਾ, ਮਂ ਚੇ ਤ੍ਵਂ ਨਿਖਣਂ ਵਨੇ’’ਤਿ.
ਤਤ੍ਥ ਨ ਬਧਿਰੋਤਿ ਸਮ੍ਮ ਸਾਰਥਿ, ਸਚੇ ਤਂ ਰਾਜਾ ਏਵਰੂਪਂ ਪੁਤ੍ਤਂ ਮਾਰਾਪੇਤੁਂ ਆਣਾਪੇਸਿ, ਅਹਂ ਪਨ ਏਵਰੂਪੋ ਨ ਭਵਾਮੀਤਿ ਦੀਪੇਤੁਂ ਏਵਮਾਹ. ਮਂ ਚੇ ਤ੍ਵਂ ਨਿਖਣਂ ਵਨੇਤਿ ਸਚੇ ਬਧਿਰਭਾਵਾਦਿਵਿਰਹਿਤਂ ਏਵਰੂਪਂ ਮਂ ਵਨੇ ਨਿਖਣੇਯ੍ਯਾਸਿ, ਅਧਮ੍ਮਂ ਕਮ੍ਮਂ ਕਰੇਯ੍ਯਾਸੀਤਿ ਅਤ੍ਥੋ. ‘‘ਊਰੂ’’ਤਿ ਇਦਂ ਸੋ ਪੁਰਿਮਗਾਥਂ ਸੁਤ੍ਵਾਪਿ ਨਂ ਅਨੋਲੋਕੇਨ੍ਤਮੇਵ ਦਿਸ੍ਵਾ ‘‘ਅਲਙ੍ਕਤਸਰੀਰਮਸ੍ਸ ਦਸ੍ਸੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਆਹ. ਤਸ੍ਸਤ੍ਥੋ – ਸਮ੍ਮ ਸਾਰਥਿ, ਇਮੇ ਕਞ੍ਚਨਕਦਲਿਕ੍ਖਨ੍ਧਸਦਿਸੇ ਊਰੂ, ਕਨਕਚ੍ਛਵਿਂ ਬਾਹੁਞ੍ਚ ਮੇ ਪਸ੍ਸ, ਮਧੁਰਵਚਨਞ੍ਚ ਮੇ ਸੁਣਾਹੀਤਿ.
ਤਤੋ ਸਾਰਥਿ ਏਵਂ ਚਿਨ੍ਤੇਸਿ ‘‘ਕੋ ਨੁ ਖੋ ਏਸ, ਆਗਤਕਾਲਤੋ ਪਟ੍ਠਾਯ ਅਤ੍ਤਾਨਮੇਵ ਵਣ੍ਣੇਤੀ’’ਤਿ. ਸੋ ਆਵਾਟਖਣਨਂ ਪਹਾਯ ਉਦ੍ਧਂ ਓਲੋਕੇਨ੍ਤੋ ਤਸ੍ਸ ਰੂਪਸਮ੍ਪਤ੍ਤਿਂ ਦਿਸ੍ਵਾ ‘‘ਅਯਂ ਪੁਰਿਸੋ ਕੋ ਨੁ ਖੋ, ਮਨੁਸ੍ਸੋ ਵਾ ਦੇਵੋ ਵਾ’’ਤਿ ਅਜਾਨਨ੍ਤੋ ਇਮਂ ਗਾਥਮਾਹ –
੭. ‘‘ਦੇਵਤਾ ਨੁਸਿ ਗਨ੍ਧਬ੍ਬੋ, ਅਦੁ ਸਕ੍ਕੋ ਪੁਰਿਨ੍ਦਦੋ;
ਕੋ ਵਾ ਤ੍ਵਂ ਕਸ੍ਸ ਵਾ ਪੁਤ੍ਤੋ, ਕਥਂ ਜਾਨੇਮੁ ਤਂ ਮਯ’’ਨ੍ਤਿ.
ਅਥਸ੍ਸ ਮਹਾਸਤ੍ਤੋ ਅਤ੍ਤਾਨਂ ਆਚਿਕ੍ਖਿਤ੍ਵਾ ਧਮ੍ਮਂ ਦੇਸੇਨ੍ਤੋ ਆਹ –
੮. ‘‘ਨਮ੍ਹਿ ਦੇਵੋ ਨ ਗਨ੍ਧਬ੍ਬੋ, ਨਮ੍ਹਿ ਸਕ੍ਕੋ ਪੁਰਿਨ੍ਦਦੋ;
ਕਾਸਿਰਞ੍ਞੋ ਅਹਂ ਪੁਤ੍ਤੋ, ਯਂ ਕਾਸੁਯਾ ਨਿਹਞ੍ਞਸਿ.
੯. ‘‘ਤਸ੍ਸ ਰਞ੍ਞੋ ਅਹਂ ਪੁਤ੍ਤੋ, ਯਂ ਤ੍ਵਂ ਸਮ੍ਮੂਪਜੀਵਸਿ;
ਅਧਮ੍ਮਂ ਸਾਰਥਿ ਕਯਿਰਾ, ਮਂ ਚੇ ਤ੍ਵਂ ਨਿਖਣਂ ਵਨੇ.
੧੦. ‘‘ਯਸ੍ਸ ਰੁਕ੍ਖਸ੍ਸ ਛਾਯਾਯ, ਨਿਸੀਦੇਯ੍ਯ ਸਯੇਯ੍ਯ ਵਾ;
ਨ ਤਸ੍ਸ ਸਾਖਂ ਭਞ੍ਜੇਯ੍ਯ, ਮਿਤ੍ਤਦੁਬ੍ਭੋ ਹਿ ਪਾਪਕੋ.
੧੧. ‘‘ਯਥਾ ਰੁਕ੍ਖੋ ਤਥਾ ਰਾਜਾ, ਯਥਾ ਸਾਖਾ ਤਥਾ ਅਹਂ;
ਯਥਾ ਛਾਯੂਪਗੋ ਪੋਸੋ, ਏਵਂ ਤ੍ਵਮਸਿ ਸਾਰਥਿ;
ਅਧਮ੍ਮਂ ਸਾਰਥਿ ਕਯਿਰਾ, ਮਂ ਚੇ ਤ੍ਵਂ ਨਿਖਣਂ ਵਨੇ’’ਤਿ.
ਤਤ੍ਥ ਨਿਹਞ੍ਞਸੀਤਿ ਨਿਹਨਿਸ੍ਸਸਿ. ਯਂ ਤ੍ਵਂ ਏਤ੍ਥ ਨਿਹਨਿਸ੍ਸਾਮੀਤਿ ਸਞ੍ਞਾਯ ਕਾਸੁਂ ਖਣਸਿ, ਸੋ ਅਹਨ੍ਤਿ ਦੀਪੇਤਿ. ਸੋ ‘‘ਰਾਜਪੁਤ੍ਤੋ ਅਹ’’ਨ੍ਤਿ ਵੁਤ੍ਤੇਪਿ ਨ ਸਦ੍ਦਹਤਿਯੇਵ, ਮਧੁਰਕਥਾਯ ਪਨਸ੍ਸ ਬਜ੍ਝਿਤ੍ਵਾ ਧਮ੍ਮਂ ਸੁਣਨ੍ਤੋ ਅਟ੍ਠਾਸਿ. ਮਿਤ੍ਤਦੁਬ੍ਭੋਤਿ ਪਰਿਭੁਤ੍ਤਛਾਯਸ੍ਸ ਰੁਕ੍ਖਸ੍ਸ ਪਤ੍ਤਂ ਵਾ ਸਾਖਂ ਵਾ ਅਙ੍ਕੁਰਂ ਵਾ ਭਞ੍ਜਨ੍ਤੋ ਮਿਤ੍ਤਘਾਤਕੋ ਹੋਤਿ ਲਾਮਕਪੁਰਿਸੋ, ਕਿਮਙ੍ਗਂ ਪਨ ਸਾਮਿਪੁਤ੍ਤਘਾਤਕੋ. ਛਾਯੂਪਗੋਤਿ ਪਰਿਭੋਗਤ੍ਥਾਯ ਛਾਯਂ ਉਪਗਤੋ ਪੁਰਿਸੋ ਵਿਯ ਰਾਜਾਨਂ ਨਿਸ੍ਸਾਯ ਜੀਵਮਾਨੋ ਤ੍ਵਨ੍ਤਿ ਵਦਤਿ.
ਸੋ ਏਵਂ ਕਥੇਨ੍ਤੇਪਿ ਬੋਧਿਸਤ੍ਤੇ ਨ ਸਦ੍ਦਹਤਿਯੇਵ. ਅਥ ਮਹਾਸਤ੍ਤੋ ‘‘ਸਦ੍ਦਹਾਪੇਸ੍ਸਾਮਿ ਨ’’ਨ੍ਤਿ ਦੇਵਤਾਨਂ ਸਾਧੁਕਾਰੇਨ ਚੇਵ ਅਤ੍ਤਨੋ ਘੋਸੇਨ ਚ ਵਨਘਟਂ ਉਨ੍ਨਾਦੇਨ੍ਤੋ ਦਸ ਮਿਤ੍ਤਪੂਜਗਾਥਾ ਨਾਮ ਆਰਭਿ –
੧੨. ‘‘ਪਹੂਤਭਕ੍ਖੋ ਭਵਤਿ, ਵਿਪ੍ਪਵੁਟ੍ਠੋ ਸਕਂਘਰਾ;
ਬਹੂ ਨਂ ਉਪਜੀਵਨ੍ਤਿ, ਯੋ ਮਿਤ੍ਤਾਨਂ ਨ ਦੁਬ੍ਭਤਿ.
੧੩. ‘‘ਯਂ ਯਂ ਜਨਪਦਂ ਯਾਤਿ, ਨਿਗਮੇ ਰਾਜਧਾਨਿਯੋ;
ਸਬ੍ਬਤ੍ਥ ਪੂਜਿਤੋ ਹੋਤਿ, ਯੋ ਮਿਤ੍ਤਾਨਂ ਨ ਦੁਬ੍ਭਤਿ.
੧੪. ‘‘ਨਾਸ੍ਸ ਚੋਰਾ ਪਸਾਹਨ੍ਤਿ, ਨਾਤਿਮਞ੍ਞਨ੍ਤਿ ਖਤ੍ਤਿਯਾ;
ਸਬ੍ਬੇ ਅਮਿਤ੍ਤੇ ਤਰਤਿ, ਯੋ ਮਿਤ੍ਤਾਨਂ ਨ ਦੁਬ੍ਭਤਿ.
੧੫. ‘‘ਅਕ੍ਕੁਦ੍ਧੋ ਸਘਰਂ ਏਤਿ, ਸਭਾਯਂ ਪਟਿਨਨ੍ਦਿਤੋ;
ਞਾਤੀਨਂ ਉਤ੍ਤਮੋ ਹੋਤਿ, ਯੋ ਮਿਤ੍ਤਾਨਂ ਨ ਦੁਬ੍ਭਤਿ.
੧੬. ‘‘ਸਕ੍ਕਤ੍ਵਾ ਸਕ੍ਕਤੋ ਹੋਤਿ, ਗਰੁ ਹੋਤਿ ਸਗਾਰਵੋ;
ਵਣ੍ਣਕਿਤ੍ਤਿਭਤੋ ਹੋਤਿ, ਯੋ ਮਿਤ੍ਤਾਨਂ ਨ ਦੁਬ੍ਭਤਿ.
੧੭. ‘‘ਪੂਜਕੋ ਲਭਤੇ ਪੂਜਂ, ਵਨ੍ਦਕੋ ਪਟਿਵਨ੍ਦਨਂ;
ਯਸੋਕਿਤ੍ਤਿਞ੍ਚ ਪਪ੍ਪੋਤਿ, ਯੋ ਮਿਤ੍ਤਾਨਂ ਨ ਦੁਬ੍ਭਤਿ.
੧੮. ‘‘ਅਗ੍ਗਿ ਯਥਾ ਪਜ੍ਜਲਤਿ, ਦੇਵਤਾਵ ਵਿਰੋਚਤਿ;
ਸਿਰਿਯਾ ਅਜਹਿਤੋ ਹੋਤਿ, ਯੋ ਮਿਤ੍ਤਾਨਂ ਨ ਦੁਬ੍ਭਤਿ.
੧੯. ‘‘ਗਾਵੋ ਤਸ੍ਸ ਪਜਾਯਨ੍ਤਿ, ਖੇਤ੍ਤੇ ਵੁਤ੍ਤਂ ਵਿਰੂਹਤਿ;
ਵੁਤ੍ਤਾਨਂ ਫਲਮਸ੍ਨਾਤਿ, ਯੋ ਮਿਤ੍ਤਾਨਂ ਨ ਦੁਬ੍ਭਤਿ.
੨੦. ‘‘ਦਰਿਤੋ ਪਬ੍ਬਤਾਤੋ ਵਾ, ਰੁਕ੍ਖਤੋ ਪਤਿਤੋ ਨਰੋ;
ਚੁਤੋ ਪਤਿਟ੍ਠਂ ਲਭਤਿ, ਯੋ ਮਿਤ੍ਤਾਨਂ ਨ ਦੁਬ੍ਭਤਿ.
੨੧. ‘‘ਵਿਰੂਲ਼੍ਹਮੂਲਸਨ੍ਤਾਨਂ, ਨਿਗ੍ਰੋਧਮਿਵ ਮਾਲੁਤੋ;
ਅਮਿਤ੍ਤਾ ਨਪ੍ਪਸਾਹਨ੍ਤਿ, ਯੋ ਮਿਤ੍ਤਾਨਂ ਨ ਦੁਬ੍ਭਤੀ’’ਤਿ.
ਤਤ੍ਥ ਸਕਂ ਘਰਾਤਿ ਸਕਘਰਾ, ਅਯਮੇਵ ਵਾ ਪਾਠੋ. ਨ ਦੁਬ੍ਭਤੀਤਿ ਨ ਦੁਸ੍ਸਤਿ. ਮਿਤ੍ਤਾਨਨ੍ਤਿ ਬੁਦ੍ਧਾਦੀਨਂ ਕਲ੍ਯਾਣਮਿਤ੍ਤਾਨਂ ਨ ਦੁਬ੍ਭਤਿ. ‘‘ਸਬ੍ਬਤ੍ਥ ਪੂਜਿਤੋ ਹੋਤੀ’’ਤਿ ਇਦਂ ਸੀਵਲਿਵਤ੍ਥੁਨਾ ਵਣ੍ਣੇਤਬ੍ਬਂ. ਨ ਪਸਾਹਨ੍ਤੀਤਿ ਪਸਯ੍ਹਕਾਰਂ ਕਾਤੁਂ ਨ ਸਕ੍ਕੋਨ੍ਤਿ. ਇਦਂ ਸਂਕਿਚ੍ਚਸਾਮਣੇਰਵਤ੍ਥੁਨਾ ਦੀਪੇਤਬ੍ਬਂ. ‘‘ਨਾਤਿਮਞ੍ਞਨ੍ਤਿ ਖਤ੍ਤਿਯਾ’’ਤਿ ਇਦਂ ਜੋਤਿਕਸੇਟ੍ਠਿਵਤ੍ਥੁਨਾ ਦੀਪੇਤਬ੍ਬਂ. ਤਰਤੀਤਿ ਅਤਿਕ੍ਕਮਤਿ. ਸਘਰਨ੍ਤਿ ਅਤ੍ਤਘਰਂ. ਮਿਤ੍ਤਾਨਂ ਦੁਬ੍ਭਨ੍ਤੋ ਅਤ੍ਤਨੋ ਘਰਂ ਆਗਚ੍ਛਨ੍ਤੋਪਿ ਘਟ੍ਟਿਤਚਿਤ੍ਤੋ ਕੁਦ੍ਧੋਵ ਆਗਚ੍ਛਤਿ, ਅਯਂ ਪਨ ਅਕੁਦ੍ਧੋਵ ਸਕਘਰਂ ਏਤਿ. ਪਟਿਨਨ੍ਦਿਤੋਤਿ ਬਹੂਨਂ ਸਨ੍ਨਿਪਾਤਟ੍ਠਾਨੇ ਅਮਿਤ੍ਤਦੁਬ੍ਭਿਨੋ ਗੁਣਕਥਂ ਕਥੇਨ੍ਤਿ, ਤਾਯ ਸੋ ਪਟਿਨਨ੍ਦਿਤੋ ਹੋਤਿ ਪਮੁਦਿਤਚਿਤ੍ਤੋ.
ਸਕ੍ਕਤ੍ਵਾ ਸਕ੍ਕਤੋ ਹੋਤੀਤਿ ਪਰਂ ਸਕ੍ਕਤ੍ਵਾ ਸਯਮ੍ਪਿ ਪਰੇਹਿ ਸਕ੍ਕਤੋ ਹੋਤਿ. ਗਰੁ ਹੋਤਿ ਸਗਾਰਵੋਤਿ ਪਰੇਸੁ ਸਗਾਰਵੋ ਸਯਮ੍ਪਿ ਪਰੇਹਿ ਗਰੁਕੋ ਹੋਤਿ. ਵਣ੍ਣਕਿਤ੍ਤਿਭਤੋਤਿ ਭਤਵਣ੍ਣਕਿਤ੍ਤਿ, ਗੁਣਞ੍ਚੇਵ ਕਿਤ੍ਤਿਸਦ੍ਦਞ੍ਚ ਉਕ੍ਖਿਪਿਤ੍ਵਾ ਚਰਨ੍ਤੋ ਨਾਮ ਹੋਤੀਤਿ ਅਤ੍ਥੋ. ਪੂਜਕੋਤਿ ਮਿਤ੍ਤਾਨਂ ਪੂਜਕੋ ਹੁਤ੍ਵਾ ਸਯਮ੍ਪਿ ਪੂਜਂ ਲਭਤਿ. ਵਨ੍ਦਕੋਤਿ ਬੁਦ੍ਧਾਦੀਨਂ ਕਲ੍ਯਾਣਮਿਤ੍ਤਾਨਂ ਵਨ੍ਦਕੋ ਹੁਤ੍ਵਾ ਪੁਨਬ੍ਭਵੇ ਪਟਿਵਨ੍ਦਨਂ ਲਭਤਿ. ਯਸੋਕਿਤ੍ਤਿਞ੍ਚਾਤਿ ਇਸ੍ਸਰਿਯਪਰਿਵਾਰਞ੍ਚੇਵ ਗੁਣਕਿਤ੍ਤਿਞ੍ਚ ਪਪ੍ਪੋਤਿ. ਇਮਾਯ ਗਾਥਾਯ ਚਿਤ੍ਤਗਹਪਤਿਨੋ ਵਤ੍ਥੁ (ਧ. ਪ. ੭੩-੭੪) ਕਥੇਤਬ੍ਬਂ.
ਪਜ੍ਜਲਤੀਤਿ ਇਸ੍ਸਰਿਯਪਰਿਵਾਰੇਨ ਪਜ੍ਜਲਤਿ. ਸਿਰਿਯਾ ਅਜਹਿਤੋ ਹੋਤੀਤਿ ਏਤ੍ਥ ਅਨਾਥਪਿਣ੍ਡਿਕਸ੍ਸ ਵਤ੍ਥੁ (ਧ. ਪ. ੧੧੯-੧੨੦) ਕਥੇਤਬ੍ਬਂ. ਅਸ੍ਨਾਤੀਤਿ ਪਰਿਭੁਞ੍ਜਤਿ. ‘‘ਪਤਿਟ੍ਠਂ ਲਭਤੀ’’ਤਿ ਇਦਂ ਚੂਲ਼ਪਦੁਮਜਾਤਕੇਨ (ਜਾ. ੧.੨.੮੫-੮੬) ਦੀਪੇਤਬ੍ਬਂ. ਵਿਰੂਲ਼੍ਹਮੂਲਸਨ੍ਤਾਨਨ੍ਤਿ ਵਡ੍ਢਿਤਮੂਲਪਾਰੋਹਂ. ਅਮਿਤ੍ਤਾ ਨਪ੍ਪਸਾਹਨ੍ਤੀਤਿ ਏਤ੍ਥ ਕੁਰਰਘਰਿਯਸੋਣਤ੍ਥੇਰਸ੍ਸ ਮਾਤੁ ਗੇਹਂ ਪਵਿਟ੍ਠਚੋਰਵਤ੍ਥੁ ਕਥੇਤਬ੍ਬਂ.
ਸੁਨਨ੍ਦੋ ਸਾਰਥਿ ਏਤ੍ਤਕਾਹਿ ਗਾਥਾਹਿ ਧਮ੍ਮਂ ਦੇਸੇਨ੍ਤਮ੍ਪਿ ਤਂ ਅਸਞ੍ਜਾਨਿਤ੍ਵਾ ‘‘ਕੋ ਨੁ ਖੋ ਅਯ’’ਨ੍ਤਿ ਆਵਾਟਖਣਨਂ ਪਹਾਯ ਰਥਸਮੀਪਂ ਗਨ੍ਤ੍ਵਾ ਤਤ੍ਥ ਤਞ੍ਚ ਪਸਾਧਨਭਣ੍ਡਞ੍ਚ ਉਭਯਂ ਅਦਿਸ੍ਵਾ ਪੁਨ ਆਗਨ੍ਤ੍ਵਾ ਓਲੋਕੇਨ੍ਤੋ ਤਂ ਸਞ੍ਜਾਨਿਤ੍ਵਾ ਤਸ੍ਸ ਪਾਦੇਸੁ ਪਤਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਯਾਚਨ੍ਤੋ ਇਮਂ ਗਾਥਮਾਹ –
੨੨. ‘‘ਏਹਿ ਤਂ ਪਟਿਨੇਸ੍ਸਾਮਿ, ਰਾਜਪੁਤ੍ਤ ਸਕਂ ਘਰਂ;
ਰਜ੍ਜਂ ਕਾਰੇਹਿ ਭਦ੍ਦਨ੍ਤੇ, ਕਿਂ ਅਰਞ੍ਞੇ ਕਰਿਸ੍ਸਸੀ’’ਤਿ.
ਅਥ ਨਂ ਮਹਾਸਤ੍ਤੋ ਆਹ –
੨੩. ‘‘ਅਲਂ ਮੇ ਤੇਨ ਰਜ੍ਜੇਨ, ਞਾਤਕੇਹਿ ਧਨੇਨ ਵਾ;
ਯਂ ਮੇ ਅਧਮ੍ਮਚਰਿਯਾਯ, ਰਜ੍ਜਂ ਲਬ੍ਭੇਥ ਸਾਰਥੀ’’ਤਿ.
ਤਤ੍ਥ ਅਲਨ੍ਤਿ ਪਟਿਕ੍ਖੇਪਵਚਨਂ.
ਸਾਰਥਿ ਆਹ –
੨੪. ‘‘ਪੁਣ੍ਣਪਤ੍ਤਂ ਮਂ ਲਾਭੇਹਿ, ਰਾਜਪੁਤ੍ਤ ਇਤੋ ਗਤੋ;
ਪਿਤਾ ਮਾਤਾ ਚ ਮੇ ਦਜ੍ਜੁਂ, ਰਾਜਪੁਤ੍ਤ ਤਯੀ ਗਤੇ.
੨੫. ‘‘ਓਰੋਧਾ ਚ ਕੁਮਾਰਾ ਚ, ਵੇਸਿਯਾਨਾ ਚ ਬ੍ਰਾਹ੍ਮਣਾ;
ਤੇਪਿ ਅਤ੍ਤਮਨਾ ਦਜ੍ਜੁਂ, ਰਾਜਪੁਤ੍ਤ ਤਯੀ ਗਤੇ.
੨੬. ‘‘ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;
ਤੇਪਿ ਅਤ੍ਤਮਨਾ ਦਜ੍ਜੁਂ, ਰਾਜਪੁਤ੍ਤ ਤਯੀ ਗਤੇ.
੨੭. ‘‘ਬਹੁਧਞ੍ਞਾ ਜਾਨਪਦਾ, ਨੇਗਮਾ ਚ ਸਮਾਗਤਾ;
ਉਪਾਯਨਾਨਿ ਮੇ ਦਜ੍ਜੁਂ, ਰਾਜਪੁਤ੍ਤ ਤਯੀ ਗਤੇ’’ਤਿ.
ਤਤ੍ਥ ਪੁਣ੍ਣਪਤ੍ਤਨ੍ਤਿ ਤੁਟ੍ਠਿਦਾਯਂ. ਦਜ੍ਜੁਨ੍ਤਿ ਸਤ੍ਤਰਤਨਵਸ੍ਸਂ ਵਸ੍ਸਨ੍ਤਾ ਵਿਯ ਮਮ ਅਜ੍ਝਾਸਯਪੂਰਣਂ ਤੁਟ੍ਠਿਦਾਯਂ ਦਦੇਯ੍ਯੁਂ. ਇਦਂ ਸੋ ‘‘ਅਪ੍ਪੇਵ ਨਾਮ ਮਯਿ ਅਨੁਕਮ੍ਪਾਯ ਗਚ੍ਛੇਯ੍ਯਾ’’ਤਿ ਚਿਨ੍ਤੇਤ੍ਵਾ ਆਹ. ਵੇਸਿਯਾਨਾ ਚਾਤਿ ਵੇਸ੍ਸਾ ਚ. ਉਪਾਯਨਾਨੀਤਿ ਪਣ੍ਣਾਕਾਰਾਨਿ.
ਅਥ ਨਂ ਮਹਾਸਤ੍ਤੋ ਆਹ –
੨੮. ‘‘ਪਿਤੁ ਮਾਤੁ ਚਹਂ ਚਤ੍ਤੋ, ਰਟ੍ਠਸ੍ਸ ਨਿਗਮਸ੍ਸ ਚ;
ਅਥੋ ਸਬ੍ਬਕੁਮਾਰਾਨਂ, ਨਤ੍ਥਿ ਮਯ੍ਹਂ ਸਕਂ ਘਰਂ.
੨੯. ‘‘ਅਨੁਞ੍ਞਾਤੋ ਅਹਂ ਮਤ੍ਯਾ, ਸਞ੍ਚਤ੍ਤੋ ਪਿਤਰਾ ਮਹਂ;
ਏਕੋਰਞ੍ਞੇ ਪਬ੍ਬਜਿਤੋ, ਨ ਕਾਮੇ ਅਭਿਪਤ੍ਥਯੇ’’ਤਿ.
ਤਤ੍ਥ ਪਿਤੁ ਮਾਤੁ ਚਾਤਿ ਪਿਤਰਾ ਚ ਮਾਤਰਾ ਚ ਅਹਂ ਚਤ੍ਤੋ. ਇਤਰੇਸੁਪਿ ਏਸੇਵ ਨਯੋ. ਮਤ੍ਯਾਤਿ ਸਮ੍ਮ ਸਾਰਥਿ, ਅਹਂ ਸਤ੍ਤਾਹਂ ਰਜ੍ਜਂ ਪਰਿਚ੍ਛਿਨ੍ਦਿਤ੍ਵਾ ਵਰਂ ਗਣ੍ਹਨ੍ਤਿਯਾ ਮਾਤਰਾ ਅਨੁਞ੍ਞਾਤੋ ਨਾਮ. ਸਞ੍ਛਤ੍ਤੋਤਿ ਸੁਟ੍ਠੁ ਚਤ੍ਤੋ. ਪਬ੍ਬਜਿਤੋਤਿ ਪਬ੍ਬਜਿਤ੍ਵਾ ਅਰਞ੍ਞੇ ਵਸਨਤ੍ਥਾਯ ਨਿਕ੍ਖਨ੍ਤੋਤਿ ਅਤ੍ਥੋ.
ਏਵਂ ਮਹਾਸਤ੍ਤਸ੍ਸ ਅਤ੍ਤਨੋ ਗੁਣੇ ਕਥੇਨ੍ਤਸ੍ਸ ਪੀਤਿ ਉਪ੍ਪਜ੍ਜਿ, ਤਤੋ ਪੀਤਿਵੇਗੇਨ ਉਦਾਨਂ ਉਦਾਨੇਨ੍ਤੋ ਆਹ –
੩੦. ‘‘ਅਪਿ ਅਤਰਮਾਨਾਨਂ, ਫਲਾਸਾਵ ਸਮਿਜ੍ਝਤਿ;
ਵਿਪਕ੍ਕਬ੍ਰਹ੍ਮਚਰਿਯੋਸ੍ਮਿ, ਏਵਂ ਜਾਨਾਹਿ ਸਾਰਥਿ.
੩੧. ‘‘ਅਪਿ ਅਤਰਮਾਨਾਨਂ, ਸਮ੍ਮਦਤ੍ਥੋ ਵਿਪਚ੍ਚਤਿ;
ਵਿਪਕ੍ਕਬ੍ਰਹ੍ਮਚਰਿਯੋਸ੍ਮਿ, ਨਿਕ੍ਖਨ੍ਤੋ ਅਕੁਤੋਭਯੋ’’ਤਿ.
ਤਤ੍ਥ ਫਲਾਸਾਵਾਤਿ ਅਤਰਮਾਨਸ੍ਸ ਮਮ ਸੋਲ਼ਸਵਸ੍ਸੇਹਿ ਕਤਵਾਯਾਮਸ੍ਸ ਸਮਿਦ੍ਧਂ ਅਜ੍ਝਾਸਯਫਲਂ ਦਸ੍ਸੇਤੁਂ ਏਵਮਾਹ. ਵਿਪਕ੍ਕਬ੍ਰਹ੍ਮਚਰਿਯੋਸ੍ਮੀਤਿ ਨਿਟ੍ਠਪ੍ਪਤ੍ਤਮਨੋਰਥੋ. ਸਮ੍ਮਦਤ੍ਥੋ ਵਿਪਚ੍ਚਤੀਤਿ ਸਮ੍ਮਾ ਉਪਾਯੇਨ ਕਾਰਣੇਨ ਕਤ੍ਤਬ੍ਬਕਿਚ੍ਚਂ ਸਮ੍ਪਜ੍ਜਤਿ.
ਸਾਰਥਿ ਆਹ –
੩੨. ‘‘ਏਵਂ ਵਗ੍ਗੁਕਥੋ ਸਨ੍ਤੋ, ਵਿਸਟ੍ਠਵਚਨੋ ਚਸਿ;
ਕਸ੍ਮਾ ਪਿਤੁ ਚ ਮਾਤੁਚ੍ਚ, ਸਨ੍ਤਿਕੇ ਨ ਭਣੀ ਤਦਾ’’ਤਿ.
ਤਤ੍ਥ ਵਗ੍ਗੁਕਥੋਤਿ ਸਖਿਲਕਥੋ.
ਤਤੋ ਮਹਾਸਤ੍ਤੋ ਆਹ –
੩੩. ‘‘ਨਾਹਂ ਅਸਨ੍ਧਿਤਾ ਪਕ੍ਖੋ, ਨ ਬਧਿਰੋ ਅਸੋਤਤਾ;
ਨਾਹਂ ਅਜਿਵ੍ਹਤਾ ਮੂਗੋ, ਮਾ ਮਂ ਮੂਗਮਧਾਰਯਿ.
੩੪. ‘‘ਪੁਰਿਮਂ ਸਰਾਮਹਂ ਜਾਤਿਂ, ਯਤ੍ਥ ਰਜ੍ਜਮਕਾਰਯਿਂ;
ਕਾਰਯਿਤ੍ਵਾ ਤਹਿਂ ਰਜ੍ਜਂ, ਪਾਪਤ੍ਥਂ ਨਿਰਯਂ ਭੁਸਂ.
੩੫. ‘‘ਵੀਸਤਿਞ੍ਚੇਵ ਵਸ੍ਸਾਨਿ, ਤਹਿਂ ਰਜ੍ਜਮਕਾਰਯਿਂ;
ਅਸੀਤਿਵਸ੍ਸਸਹਸ੍ਸਾਨਿ, ਨਿਰਯਮ੍ਹਿ ਅਪਚ੍ਚਿਸਂ.
੩੬. ‘‘ਤਸ੍ਸ ਰਜ੍ਜਸ੍ਸਹਂ ਭੀਤੋ, ਮਾ ਮਂ ਰਜ੍ਜਾਭਿਸੇਚਯੁਂ;
ਤਸ੍ਮਾ ਪਿਤੁ ਚ ਮਾਤੁਚ੍ਚ, ਸਨ੍ਤਿਕੇ ਨ ਭਣਿਂ ਤਦਾ.
੩੭. ‘‘ਉਚ੍ਛਙ੍ਗੇ ਮਂ ਨਿਸਾਦੇਤ੍ਵਾ, ਪਿਤਾ ਅਤ੍ਥਾਨੁਸਾਸਤਿ;
ਏਕਂ ਹਨਥ ਬਨ੍ਧਥ, ਏਕਂ ਖਾਰਾਪਤਚ੍ਛਿਕਂ;
ਏਕਂ ਸੂਲਸ੍ਮਿਂ ਉਪ੍ਪੇਥ, ਇਚ੍ਚਸ੍ਸ ਮਨੁਸਾਸਤਿ.
੩੮. ‘‘ਤਾਯਾਹਂ ਫਰੁਸਂ ਸੁਤ੍ਵਾ, ਵਾਚਾਯੋ ਸਮੁਦੀਰਿਤਾ;
ਅਮੂਗੋ ਮੂਗਵਣ੍ਣੇਨ, ਅਪਕ੍ਖੋ ਪਕ੍ਖਸਮ੍ਮਤੋ;
ਸਕੇ ਮੁਤ੍ਤਕਰੀਸਸ੍ਮਿਂ, ਅਚ੍ਛਾਹਂ ਸਮ੍ਪਰਿਪ੍ਲੁਤੋ.
੩੯. ‘‘ਕਸਿਰਞ੍ਚ ਪਰਿਤ੍ਤਞ੍ਚ, ਤਞ੍ਚ ਦੁਕ੍ਖੇਨ ਸਂਯੁਤਂ;
ਕੋਮਂ ਜੀਵਿਤਮਾਗਮ੍ਮ, ਵੇਰਂ ਕਯਿਰਾਥ ਕੇਨਚਿ.
੪੦. ‘‘ਪਞ੍ਞਾਯ ਚ ਅਲਾਭੇਨ, ਧਮ੍ਮਸ੍ਸ ਚ ਅਦਸ੍ਸਨਾ;
ਕੋਮਂ ਜੀਵਿਤਮਾਗਮ੍ਮ, ਵੇਰਂ ਕਯਿਰਾਥ ਕੇਨਚਿ.
੪੧. ‘‘ਅਪਿ ਅਤਰਮਾਨਾਨਂ, ਫਲਾਸਾਵ ਸਮਿਜ੍ਝਤਿ;