੨੦. ਸਤ੍ਤਤਿਨਿਪਾਤੋ

[੫੩੧] ੧. ਕੁਸਜਾਤਕਵਣ੍ਣਨਾ

ਇਦਂ ਤੇ ਰਟ੍ਠਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਕ੍ਕਣ੍ਠਿਤਭਿਕ੍ਖੁਂ ਆਰਬ੍ਭ ਕਥੇਸਿ. ਏਕੋ ਕਿਰ ਸਾਵਤ੍ਥਿਵਾਸੀ ਕੁਲਪੁਤ੍ਤੋ ਸਾਸਨੇ ਉਰਂ ਦਤ੍ਵਾ ਪਬ੍ਬਜਿਤੋ ਏਕਦਿਵਸਂ ਸਾਵਤ੍ਥਿਯਂ ਪਿਣ੍ਡਾਯ ਚਰਨ੍ਤੋ ਏਕਂ ਅਲਙ੍ਕਤਇਤ੍ਥਿਂ ਦਿਸ੍ਵਾ ਸੁਭਨਿਮਿਤ੍ਤਗ੍ਗਾਹਵਸੇਨ ਓਲੋਕੇਤ੍ਵਾ ਕਿਲੇਸਾਭਿਭੂਤੋ ਅਨਭਿਰਤੋ ਵਿਹਾਸਿ ਦੀਘਕੇਸਨਖੋ ਕਿਲਿਟ੍ਠਚੀਵਰੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨੀਸਨ੍ਥਤਗਤ੍ਤੋ. ਯਥਾ ਹਿ ਦੇਵਲੋਕਾ ਚਵਨਧਮ੍ਮਾਨਂ ਦੇਵਪੁਤ੍ਤਾਨਂ ਪਞ੍ਚ ਪੁਬ੍ਬਨਿਮਿਤ੍ਤਾਨਿ ਪਞ੍ਞਾਯਨ੍ਤਿ, ਮਾਲਾ ਮਿਲਾਯਨ੍ਤਿ, ਵਤ੍ਥਾਨਿ ਕਿਲਿਸ੍ਸਨ੍ਤਿ, ਸਰੀਰੇ ਦੁਬ੍ਬਣ੍ਣਿਯਂ ਓਕ੍ਕਮਤਿ, ਉਭੋਹਿ ਕਚ੍ਛੇਹਿ ਸੇਦਾ ਮੁਚ੍ਚਨ੍ਤਿ, ਦੇਵੋ ਦੇਵਾਸਨੇ ਨਾਭਿਰਮਤਿ, ਏਵਮੇਵ ਸਾਸਨਾ ਚਵਨਧਮ੍ਮਾਨਂ ਉਕ੍ਕਣ੍ਠਿਤਭਿਕ੍ਖੂਨਂ ਪਞ੍ਚ ਪੁਬ੍ਬਨਿਮਿਤ੍ਤਾਨਿ ਪਞ੍ਞਾਯਨ੍ਤਿ, ਸਦ੍ਧਾਪੁਪ੍ਫਾਨਿ ਮਿਲਾਯਨ੍ਤਿ, ਸੀਲਵਤ੍ਥਾਨਿ ਕਿਲਿਸ੍ਸਨ੍ਤਿ, ਸਰੀਰੇ ਮਙ੍ਕੁਤਾਯ ਚੇਵ ਅਯਸਵਸੇਨ ਚ ਦੁਬ੍ਬਣ੍ਣਿਯਂ ਓਕ੍ਕਮਤਿ, ਕਿਲੇਸਸੇਦਾ ਮੁਚ੍ਚਨ੍ਤਿ, ਅਰਞ੍ਞਰੁਕ੍ਖਮੂਲਸੁਞ੍ਞਾਗਾਰੇਸੁ ਨਾਭਿਰਮਨ੍ਤਿ. ਤਸ੍ਸਪਿ ਤਾਨਿ ਪਞ੍ਞਾਯਿਂਸੁ. ਅਥ ਨਂ ਭਿਕ੍ਖੂ ਸਤ੍ਥੁ ਸਨ੍ਤਿਕਂ ਨੇਤ੍ਵਾ ‘‘ਅਯਂ, ਭਨ੍ਤੇ, ਉਕ੍ਕਣ੍ਠਿਤੋ’’ਤਿ ਦਸ੍ਸੇਸੁਂ. ਸਤ੍ਥਾ ‘‘ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਉਕ੍ਕਣ੍ਠਿਤੋਸੀ’’ਤਿ ਤਂ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਮਾ, ਭਿਕ੍ਖੁ, ਕਿਲੇਸਵਸਿਕੋ ਹੋਹਿ, ਮਾਤੁਗਾਮੋ ਨਾਮੇਸ ਪਾਪੋ, ਤਸ੍ਮਿਂ ਪਟਿਬਦ੍ਧਚਿਤ੍ਤਤਂ ਵਿਨੋਦੇਹਿ, ਸਾਸਨੇ ਅਭਿਰਮ, ਮਾਤੁਗਾਮੇ ਪਟਿਬਦ੍ਧਚਿਤ੍ਤਤਾਯ ਹਿ ਤੇਜਵਨ੍ਤੋਪਿ ਪੋਰਾਣਕਪਣ੍ਡਿਤਾ ਨਿਤ੍ਤੇਜਾ ਹੁਤ੍ਵਾ ਅਨਯਬ੍ਯਸਨਂ ਪਾਪੁਣਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਮਲ੍ਲਰਟ੍ਠੇ ਕੁਸਾਵਤੀਰਾਜਧਾਨਿਯਂ ਓਕ੍ਕਾਕੋ ਨਾਮ ਰਾਜਾ ਧਮ੍ਮੇਨ ਸਮੇਨ ਰਜ੍ਜਂ ਕਾਰੇਸਿ. ਤਸ੍ਸ ਸੋਲ਼ਸਨ੍ਨਂ ਇਤ੍ਥਿਸਹਸ੍ਸਾਨਂ ਜੇਟ੍ਠਿਕਾ ਸੀਲਵਤੀ ਨਾਮ ਅਗ੍ਗਮਹੇਸੀ ਅਹੋਸਿ, ਸਾ ਨੇਵ ਪੁਤ੍ਤਂ, ਨ ਧੀਤਰਂ ਲਭਿ. ਅਥਸ੍ਸ ਨਾਗਰਾ ਚੇਵ ਰਟ੍ਠਵਾਸਿਨੋ ਚ ਰਾਜਨਿਵੇਸਨਦ੍ਵਾਰੇ ਸਨ੍ਨਿਪਤਿਤ੍ਵਾ ‘‘ਰਟ੍ਠਂ ਨਸ੍ਸਿਸ੍ਸਤਿ, ਰਟ੍ਠਂ ਨਸ੍ਸਿਸ੍ਸਤੀ’’ਤਿ ਉਪਕ੍ਕੋਸਿਂਸੁ. ਰਾਜਾ ਸੀਹਪਞ੍ਜਰਂ ਉਗ੍ਘਾਟੇਤ੍ਵਾ ‘‘ਮਯਿ ਰਜ੍ਜਂ ਕਾਰੇਨ੍ਤੇ ਅਧਮ੍ਮਕਾਰੋ ਨਾਮ ਨਤ੍ਥਿ, ਕਸ੍ਮਾ ਉਪਕ੍ਕੋਸਥਾ’’ਤਿ ਪੁਚ੍ਛਿ. ‘‘ਸਚ੍ਚਂ, ਦੇਵ, ਅਧਮ੍ਮਕਾਰੋ ਨਾਮ ਨਤ੍ਥਿ, ਅਪਿਚ ਵਂਸਾਨੁਰਕ੍ਖਕੋ ਪਨ ਵੋ ਪੁਤ੍ਤੋ ਨਤ੍ਥਿ, ਅਞ੍ਞੋ ਰਜ੍ਜਂ ਗਹੇਤ੍ਵਾ ਰਟ੍ਠਂ ਨਾਸੇਸ੍ਸਤਿ, ਤਸ੍ਮਾ ਧਮ੍ਮੇਨ ਰਜ੍ਜਂ ਕਾਰੇਤੁਂ ਸਮਤ੍ਥਂ ਪੁਤ੍ਤਂ ਪਤ੍ਥੇਥਾ’’ਤਿ. ‘‘ਪੁਤ੍ਤਂ ਪਤ੍ਥੇਨ੍ਤੋ ਕਿਂ ਕਰੋਮੀ’’ਤਿ? ‘‘ਪਠਮਂ ਤਾਵ ਏਕਂ ਸਤ੍ਤਾਹਂ ਚੁਲ੍ਲਨਾਟਕਂ ਧਮ੍ਮਨਾਟਕਂ ਕਤ੍ਵਾ ਵਿਸ੍ਸਜ੍ਜੇਥ, ਸਚੇ ਸਾ ਪੁਤ੍ਤਂ ਲਭਿਸ੍ਸਤਿ, ਸਾਧੁ, ਨੋ ਚੇ, ਅਥ ਮਜ੍ਝਿਮਨਾਟਕਂ ਵਿਸ੍ਸਜ੍ਜੇਥ, ਤਤੋ ਜੇਟ੍ਠਨਾਟਕਂ, ਅਵਸ੍ਸਂ ਏਤ੍ਤਕਾਸੁ ਇਤ੍ਥੀਸੁ ਏਕਾ ਪੁਞ੍ਞਵਤੀ ਪੁਤ੍ਤਂ ਲਭਿਸ੍ਸਤੀ’’ਤਿ. ਰਾਜਾ ਤੇਸਂ ਵਚਨੇਨ ਤਥਾ ਕਤ੍ਵਾ ਸਤ੍ਤ ਦਿਵਸੇ ਯਥਾਸੁਖਂ ਅਭਿਰਮਿਤ੍ਵਾ ਆਗਤਾਗਤਂ ਪੁਚ੍ਛਿ – ‘‘ਕਚ੍ਚਿ ਵੋ ਪੁਤ੍ਤੋ ਲਦ੍ਧੋ’’ਤਿ? ਸਬ੍ਬਾ ‘‘ਨ ਲਭਾਮ, ਦੇਵਾ’’ਤਿ ਆਹਂਸੁ. ਰਾਜਾ ‘‘ਨ ਮੇ ਪੁਤ੍ਤੋ ਉਪ੍ਪਜ੍ਜਿਸ੍ਸਤੀ’’ਤਿ ਅਨਤ੍ਤਮਨੋ ਅਹੋਸਿ. ਨਾਗਰਾ ਪੁਨ ਤਥੇਵ ਉਪਕ੍ਕੋਸਿਂਸੁ. ਰਾਜਾ ‘‘ਕਿਂ ਉਪਕ੍ਕੋਸਥ, ਮਯਾ ਤੁਮ੍ਹਾਕਂ ਵਚਨੇਨ ਨਾਟਕਾਨਿ ਵਿਸ੍ਸਟ੍ਠਾਨਿ, ਏਕਾਪਿ ਪੁਤ੍ਤਂ ਨ ਲਭਤਿ, ਇਦਾਨਿ ਕਿਂ ਕਰੋਮਾ’’ਤਿ ਆਹ. ‘‘ਦੇਵ, ਏਤਾ ਦੁਸ੍ਸੀਲਾ ਭਵਿਸ੍ਸਨ੍ਤਿ ਨਿਪ੍ਪੁਞ੍ਞਾ, ਨਤ੍ਥਿ ਏਤਾਸਂ ਪੁਤ੍ਤਲਾਭਾਯ ਪੁਞ੍ਞਂ, ਤੁਮ੍ਹੇ ਏਤਾਸੁ ਪੁਤ੍ਤਂ ਅਲਭਨ੍ਤੀਸੁਪਿ ਮਾ ਅਪ੍ਪੋਸ੍ਸੁਕ੍ਕਤਂ ਆਪਜ੍ਜਥ, ਅਗ੍ਗਮਹੇਸੀ ਵੋ ਸੀਲਵਤੀ ਦੇਵੀ ਸੀਲਸਮ੍ਪਨ੍ਨਾ, ਤਂ ਵਿਸ੍ਸਜ੍ਜੇਥ, ਤਸ੍ਸਾ ਪੁਤ੍ਤੋ ਉਪ੍ਪਜ੍ਜਿਸ੍ਸਤੀ’’ਤਿ.

ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ‘‘ਇਤੋ ਕਿਰ ਸਤ੍ਤਮੇ ਦਿਵਸੇ ਰਾਜਾ ਸੀਲਵਤਿਂ ਦੇਵਿਂ ਧਮ੍ਮਨਾਟਕਂ ਕਤ੍ਵਾ ਵਿਸ੍ਸਜ੍ਜੇਸ੍ਸਤਿ, ਪੁਰਿਸਾ ਸਨ੍ਨਿਪਤਨ੍ਤੂ’’ਤਿ ਭੇਰਿਂ ਚਰਾਪੇਤ੍ਵਾ ਸਤ੍ਤਮੇ ਦਿਵਸੇ ਦੇਵਿਂ ਅਲਙ੍ਕਾਰਾਪੇਤ੍ਵਾ ਰਾਜਨਿਵੇਸਨਾ ਓਤਾਰੇਤ੍ਵਾ ਵਿਸ੍ਸਜ੍ਜੇਸਿ. ਤਸ੍ਸਾ ਸੀਲਤੇਜੇਨ ਸਕ੍ਕਸ੍ਸ ਭਵਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ‘‘ਕਿਂ ਨੁ ਖੋ’’ਤਿ ਆਵਜ੍ਜੇਨ੍ਤੋ ਦੇਵਿਯਾ ਪੁਤ੍ਤਪਤ੍ਥਨਭਾਵਂ ਞਤ੍ਵਾ ‘‘ਏਤਿਸ੍ਸਾ ਮਯਾ ਪੁਤ੍ਤਂ ਦਾਤੁਂ ਵਟ੍ਟਤਿ, ਅਤ੍ਥਿ ਨੁ ਖੋ ਦੇਵਲੋਕੇ ਏਤਿਸ੍ਸਾ ਅਨੁਚ੍ਛਵਿਕੋ ਪੁਤ੍ਤੋ’’ਤਿ ਉਪਧਾਰੇਨ੍ਤੋ ਬੋਧਿਸਤ੍ਤਂ ਅਦ੍ਦਸ. ਸੋ ਕਿਰ ਤਦਾ ਤਾਵਤਿਂਸਭਵਨੇ ਆਯੁਂ ਖੇਪੇਤ੍ਵਾ ਉਪਰਿਦੇਵਲੋਕੇ ਨਿਬ੍ਬਤ੍ਤਿਤੁਕਾਮੋ ਅਹੋਸਿ. ਸਕ੍ਕੋ ਤਸ੍ਸ ਵਿਮਾਨਦ੍ਵਾਰਂ ਗਨ੍ਤ੍ਵਾ ਤਂ ਪਕ੍ਕੋਸਿਤ੍ਵਾ, ‘‘ਮਾਰਿਸ, ਤਯਾ ਮਨੁਸ੍ਸਲੋਕਂ ਗਨ੍ਤ੍ਵਾ ਓਕ੍ਕਾਕਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿਤੁਂ ਵਟ੍ਟਤੀ’’ਤਿ ਸਮ੍ਪਟਿਚ੍ਛਾਪੇਤ੍ਵਾ ਅਪਰਮ੍ਪਿ ਦੇਵਪੁਤ੍ਤਂ ‘‘ਤ੍ਵਮ੍ਪਿ ਏਤਿਸ੍ਸਾ ਏਵ ਪੁਤ੍ਤੋ ਭਵਿਸ੍ਸਸੀ’’ਤਿ ਵਤ੍ਵਾ ‘‘ਮਾ ਖੋ ਪਨਸ੍ਸਾ ਕੋਚਿ ਸੀਲਂ ਭਿਨ੍ਦਤੂ’’ਤਿ ਮਹਲ੍ਲਕਬ੍ਰਾਹ੍ਮਣਵੇਸੇਨ ਰਞ੍ਞੋ ਨਿਵੇਸਨਦ੍ਵਾਰਂ ਅਗਮਾਸਿ.

ਮਹਾਜਨੋਪਿ ਨ੍ਹਾਤੋ ਅਲਙ੍ਕਤੋ ‘‘ਅਹਂ ਦੇਵਿਂ ਗਣ੍ਹਿਸ੍ਸਾਮਿ, ਅਹਂ ਦੇਵਿਂ ਗਣ੍ਹਿਸ੍ਸਾਮੀ’’ਤਿ ਰਾਜਦ੍ਵਾਰੇ ਸਨ੍ਨਿਪਤਿਤ੍ਵਾ ਸਕ੍ਕਞ੍ਚ ਦਿਸ੍ਵਾ ‘‘ਤ੍ਵਂ ਕਸ੍ਮਾ ਆਗਤੋਸੀ’’ਤਿ ਪਰਿਹਾਸਮਕਾਸਿ. ਸਕ੍ਕੋ ‘‘ਕਿਂ ਮਂ ਤੁਮ੍ਹੇ ਗਰਹਥ, ਸਚੇਪਿ ਮੇ ਸਰੀਰਂ ਜਿਣ੍ਣਂ, ਰਾਗੋ ਪਨ ਨ ਜੀਰਤਿ, ਸਚੇ ਸੀਲਵਤਿਂ ਲਭਿਸ੍ਸਾਮਿ, ਆਦਾਯ ਨਂ ਗਮਿਸ੍ਸਾਮੀਤਿ ਆਗਤੋਮ੍ਹੀ’’ਤਿ ਵਤ੍ਵਾ ਅਤ੍ਤਨੋ ਆਨੁਭਾਵੇਨ ਸਬ੍ਬੇਸਂ ਪੁਰਤੋਵ ਅਟ੍ਠਾਸਿ. ਅਞ੍ਞੋ ਕੋਚਿ ਤਸ੍ਸ ਤੇਜੇਨ ਪੁਰਤੋ ਭਵਿਤੁਂ ਨਾਸਕ੍ਖਿ. ਸੋ ਤਂ ਸਬ੍ਬਾਲਙ੍ਕਾਰਪਟਿਮਣ੍ਡਿਤਂ ਨਿਵੇਸਨਾ ਨਿਕ੍ਖਮਨ੍ਤਿਞ੍ਞੇਵ ਹਤ੍ਥੇ ਗਹੇਤ੍ਵਾ ਪਕ੍ਕਾਮਿ. ਅਥ ਨਂ ਤਤ੍ਥ ਤਤ੍ਥ ਠਿਤਾ ਗਰਹਿਂਸੁ ‘‘ਪਸ੍ਸਥ, ਭੋ, ਮਹਲ੍ਲਕਬ੍ਰਾਹ੍ਮਣੋ ਏਵਂ ਉਤ੍ਤਮਰੂਪਧਰਂ ਦੇਵਿਂ ਆਦਾਯ ਗਚ੍ਛਤਿ, ਅਤ੍ਤਨੋ ਯੁਤ੍ਤਂ ਨ ਜਾਨਾਤੀ’’ਤਿ. ਦੇਵੀਪਿ ‘‘ਮਹਲ੍ਲਕੋ ਮਂ ਗਹੇਤ੍ਵਾ ਗਚ੍ਛਤੀ’’ਤਿ ਨ ਅਟ੍ਟੀਯਤਿ ਨ ਹਰਾਯਤਿ. ਰਾਜਾਪਿ ਵਾਤਪਾਨੇ ਠਤ੍ਵਾ ‘‘ਕੋ ਨੁ ਖੋ ਦੇਵਿਂ ਗਹੇਤ੍ਵਾ ਗਚ੍ਛਤੀ’’ਤਿ ਓਲੋਕੇਨ੍ਤੋ ਤਂ ਦਿਸ੍ਵਾ ਅਨਤ੍ਤਮਨੋ ਅਹੋਸਿ.

ਸਕ੍ਕੋ ਤਂ ਆਦਾਯ ਨਗਰਦ੍ਵਾਰਤੋ ਨਿਕ੍ਖਮਿਤ੍ਵਾ ਦ੍ਵਾਰਸਮੀਪੇ ਏਕਂ ਘਰਂ ਮਾਪੇਸਿ ਵਿਵਟਦ੍ਵਾਰਂ ਪਞ੍ਞਤ੍ਤਕਟ੍ਠਤ੍ਥਰਿਕਂ. ਅਥ ਨਂ ਸਾ ‘‘ਇਦਂ ਤੇ ਨਿਵੇਸਨ’’ਨ੍ਤਿ ਪੁਚ੍ਛਿ. ਸੋ ‘‘ਆਮ, ਭਦ੍ਦੇ, ਪੁਬ੍ਬੇ ਪਨਾਹਂ ਏਕੋ, ਇਦਾਨਿਮ੍ਹਾ ਮਯਂ ਦ੍ਵੇ ਜਨਾ, ਅਹਂ ਭਿਕ੍ਖਾਯ ਚਰਿਤ੍ਵਾ ਤਣ੍ਡੁਲਾਦੀਨਿ ਆਹਰਿਸ੍ਸਾਮਿ, ਤ੍ਵਂ ਇਮਿਸ੍ਸਾ ਕਟ੍ਠਤ੍ਥਰਿਕਾਯ ਨਿਪਜ੍ਜਾਹੀ’’ਤਿ ਵਤ੍ਵਾ ਤਂ ਮੁਦੁਨਾ ਹਤ੍ਥੇਨ ਪਰਾਮਸਨ੍ਤੋ ਦਿਬ੍ਬਸਮ੍ਫਸ੍ਸਂ ਫਰਾਪੇਤ੍ਵਾ ਤਤ੍ਥ ਨਿਪਜ੍ਜਾਪੇਸਿ. ਸਾ ਦਿਬ੍ਬਸਮ੍ਫਸ੍ਸਫਰਣੇਨ ਸਞ੍ਞਂ ਵਿਸ੍ਸਜ੍ਜੇਸਿ. ਅਥ ਨਂ ਅਤ੍ਤਨੋ ਆਨੁਭਾਵੇਨ ਤਾਵਤਿਂਸਭਵਨਂ ਨੇਤ੍ਵਾ ਅਲਙ੍ਕਤਵਿਮਾਨੇ ਦਿਬ੍ਬਸਯਨੇ ਨਿਪਜ੍ਜਾਪੇਸਿ. ਸਾ ਸਤ੍ਤਮੇ ਦਿਵਸੇ ਪਬੁਜ੍ਝਿਤ੍ਵਾ ਤਂ ਸਮ੍ਪਤ੍ਤਿਂ ਦਿਸ੍ਵਾ ‘‘ਨ ਸੋ ਬ੍ਰਾਹ੍ਮਣੋ ਮਨੁਸ੍ਸੋ, ਸਕ੍ਕੋ ਭਵਿਸ੍ਸਤੀ’’ਤਿ ਅਞ੍ਞਾਸਿ. ਸਕ੍ਕੋਪਿ ਤਸ੍ਮਿਂ ਸਮਯੇ ਪਾਰਿਚ੍ਛਤ੍ਤਕਮੂਲੇ ਦਿਬ੍ਬਨਾਟਕਪਰਿਵੁਤੋ ਨਿਸਿਨ੍ਨੋ ਅਹੋਸਿ. ਸਾ ਸਯਨਾ ਉਟ੍ਠਾਯ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਅਥ ਨਂ ਸਕ੍ਕੋ ‘‘ਵਰਂ ਤੇ, ਦੇਵਿ, ਦਦਾਮਿ, ਗਣ੍ਹਾਹੀ’’ਤਿ ਆਹ. ‘‘ਤੇਨ ਹਿ, ਦੇਵ, ਏਕਂ ਪੁਤ੍ਤਂ ਮੇ ਦੇਹੀ’’ਤਿ. ‘‘ਦੇਵਿ, ਤਿਟ੍ਠਤੁ ਏਕੋ ਪੁਤ੍ਤੋ, ਅਹਂ ਤੇ ਦ੍ਵੇ ਪੁਤ੍ਤੇ ਦਸ੍ਸਾਮਿ. ਤੇਸੁ ਪਨ ਏਕੋ ਪਞ੍ਞਵਾ ਭਵਿਸ੍ਸਤਿ ਵਿਰੂਪਵਾ, ਏਕੋ ਰੂਪਵਾ ਨ ਪਞ੍ਞਵਾ. ਤੇਸੁ ਕਤਰਂ ਪਠਮਂ ਇਚ੍ਛਸੀ’’ਤਿ? ‘‘ਪਞ੍ਞਵਨ੍ਤਂ, ਦੇਵਾ’’ਤਿ. ਸੋ ‘‘ਸਾਧੂ’’ਤਿ ਵਤ੍ਵਾ ਤਸ੍ਸਾ ਕੁਸਤਿਣਂ ਦਿਬ੍ਬਵਤ੍ਥਂ ਦਿਬ੍ਬਚਨ੍ਦਨਂ ਪਾਰਿਚ੍ਛਤ੍ਤਕਪੁਪ੍ਫਂ ਕੋਕਨੁਦਞ੍ਚ ਨਾਮ ਵੀਣਂ ਦਤ੍ਵਾ ਤਂ ਆਦਾਯ ਰਞ੍ਞੋ ਸਯਨਘਰਂ ਪਵਿਸਿਤ੍ਵਾ ਰਞ੍ਞਾ ਸਦ੍ਧਿਂ ਏਕਸਯਨੇ ਨਿਪਜ੍ਜਾਪੇਤ੍ਵਾ ਅਙ੍ਗੁਟ੍ਠਕੇਨ ਤਸ੍ਸਾ ਨਾਭਿਂ ਪਰਾਮਸਿ. ਤਸ੍ਮਿਂ ਖਣੇ ਬੋਧਿਸਤ੍ਤੋ ਤਸ੍ਸਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਸਕ੍ਕੋਪਿ ਸਕਟ੍ਠਾਨਮੇਵ ਗਤੋ. ਪਣ੍ਡਿਤਾ ਦੇਵੀ ਗਬ੍ਭਸ੍ਸ ਪਤਿਟ੍ਠਿਤਭਾਵਂ ਜਾਨਿ.

ਅਥ ਨਂ ਪਬੁਦ੍ਧੋ ਰਾਜਾ ਦਿਸ੍ਵਾ, ‘‘ਦੇਵਿ, ਕੇਨ ਨੀਤਾਸੀ’’ਤਿ ਪੁਚ੍ਛਿ. ‘‘ਸਕ੍ਕੇਨ, ਦੇਵਾ’’ਤਿ. ‘‘ਅਹਂ ਪਚ੍ਚਕ੍ਖਤੋ ਏਕਂ ਮਹਲ੍ਲਕਬ੍ਰਾਹ੍ਮਣਂ ਤਂ ਆਦਾਯ ਗਚ੍ਛਨ੍ਤਂ ਅਦ੍ਦਸਂ, ਕਸ੍ਮਾ ਮਂ ਵਞ੍ਚੇਸੀ’’ਤਿ? ‘‘ਸਦ੍ਦਹਥ, ਦੇਵ, ਸਕ੍ਕੋ ਮਂ ਗਹੇਤ੍ਵਾ ਦੇਵਲੋਕਂ ਨੇਸੀ’’ਤਿ. ‘‘ਨ ਸਦ੍ਦਹਾਮਿ, ਦੇਵੀ’’ਤਿ. ਅਥਸ੍ਸ ਸਾ ਸਕ੍ਕਦਤ੍ਤਿਯਂ ਕੁਸਤਿਣਂ ਦਸ੍ਸੇਤ੍ਵਾ ‘‘ਸਦ੍ਦਹਥਾ’’ਤਿ ਆਹ. ਰਾਜਾ ‘‘ਕੁਸਤਿਣਂ ਨਾਮ ਯਤੋ ਕੁਤੋਚਿ ਲਬ੍ਭਤੀ’’ਤਿ ਨ ਸਦ੍ਦਹਿ. ਅਥਸ੍ਸ ਸਾ ਦਿਬ੍ਬਵਤ੍ਥਾਦੀਨਿ ਦਸ੍ਸੇਸਿ. ਰਾਜਾ ਤਾਨਿ ਦਿਸ੍ਵਾ ਸਦ੍ਦਹਿਤ੍ਵਾ, ‘‘ਭਦ੍ਦੇ, ਸਕ੍ਕੋ ਤਾਵ ਤਂ ਨੇਤੁ, ਪੁਤ੍ਤੋ ਪਨ ਤੇ ਲਦ੍ਧੋ’’ਤਿ ਪੁਚ੍ਛਿ. ‘‘ਲਦ੍ਧੋ ਮਹਾਰਾਜ, ਗਬ੍ਭੋ ਮੇ ਪਤਿਟ੍ਠਿਤੋ’’ਤਿ. ਸੋ ਤੁਟ੍ਠੋ ਤਸ੍ਸਾ ਗਬ੍ਭਪਰਿਹਾਰਂ ਅਦਾਸਿ. ਸਾ ਦਸਮਾਸਚ੍ਚਯੇਨ ਪੁਤ੍ਤਂ ਵਿਜਾਯਿ, ਤਸ੍ਸ ਅਞ੍ਞਂ ਨਾਮਂ ਅਕਤ੍ਵਾ ਕੁਸਤਿਣਨਾਮਮੇਵ ਅਕਂਸੁ. ਕੁਸਕੁਮਾਰਸ੍ਸ ਪਦਸਾ ਗਮਨਕਾਲੇ ਇਤਰੋ ਦੇਵਪੁਤ੍ਤੋ ਤਸ੍ਸਾ ਕੁਚ੍ਛਿਯਂ ਪਟਿਸਨ੍ਧਿਂ ਗਣ੍ਹਿ. ਸਾ ਦਸਮਾਸੇ ਪਰਿਪੁਣ੍ਣੇ ਪੁਤ੍ਤਂ ਵਿਜਾਯਿ, ਤਸ੍ਸ ‘‘ਜਯਮ੍ਪਤੀ’’ਤਿ ਨਾਮਂ ਕਰਿਂਸੁ. ਤੇ ਮਹਨ੍ਤੇਨ ਯਸੇਨ ਵਡ੍ਢਿਂਸੁ. ਬੋਧਿਸਤ੍ਤੋ ਪਞ੍ਞਵਾ ਆਚਰਿਯਸ੍ਸ ਸਨ੍ਤਿਕੇ ਕਿਞ੍ਚਿ ਸਿਪ੍ਪਂ ਅਨੁਗ੍ਗਹੇਤ੍ਵਾ ਅਤ੍ਤਨੋਵ ਪਞ੍ਞਾਯ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਾਪੁਣਿ.

ਅਥਸ੍ਸ ਸੋਲ਼ਸਵਸ੍ਸਕਾਲੇ ਰਾਜਾ ਰਜ੍ਜਂ ਦਾਤੁਕਾਮੋ ਦੇਵਿਂ ਆਮਨ੍ਤੇਤ੍ਵਾ ‘‘ਭਦ੍ਦੇ, ਪੁਤ੍ਤਸ੍ਸ ਤੇ ਰਜ੍ਜਂ ਦਤ੍ਵਾ ਨਾਟਕਾਨਿ ਉਪਟ੍ਠਪੇਸ੍ਸਾਮ, ਮਯਂ ਜੀਵਨ੍ਤਾਯੇਵ ਨਂ ਰਜ੍ਜੇ ਪਤਿਟ੍ਠਿਤਂ ਪਸ੍ਸਿਸ੍ਸਾਮ, ਸਕਲਜਮ੍ਬੁਦੀਪੇ ਖੋ ਪਨ ਯਸ੍ਸ ਰਞ੍ਞੋ ਧੀਤਰਂ ਇਚ੍ਛਤਿ, ਤਮਸ੍ਸ ਆਨੇਤ੍ਵਾ ਅਗ੍ਗਮਹੇਸਿਂ ਕਰਿਸ੍ਸਾਮ, ਚਿਤ੍ਤਮਸ੍ਸ ਜਾਨਾਹਿ, ਕਤਰਂ ਰਾਜਧੀਤਰਂ ਰੋਚੇਸੀ’’ਤਿ ਆਹ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ‘‘ਕੁਮਾਰਸ੍ਸ ਇਮਂ ਪਵਤ੍ਤਿਂ ਆਰੋਚੇਤ੍ਵਾ ਚਿਤ੍ਤਂ ਜਾਨਾਹੀ’’ਤਿ ਏਕਂ ਪਰਿਚਾਰਿਕਂ ਪੇਸੇਸਿ. ਸਾ ਗਨ੍ਤ੍ਵਾ ਤਸ੍ਸ ਤਂ ਪਵਤ੍ਤਿਂ ਆਰੋਚੇਸਿ. ਤਂ ਸੁਤ੍ਵਾ ਮਹਾਸਤ੍ਤੋ ਚਿਨ੍ਤੇਸਿ – ‘‘ਅਹਂ ਨ ਰੂਪਵਾ, ਰੂਪਸਮ੍ਪਨ੍ਨਾ ਰਾਜਧੀਤਾ ਆਨੀਤਾਪਿ ਮਂ ਦਿਸ੍ਵਾ ‘ਕਿਂ ਮੇ ਇਮਿਨਾ ਵਿਰੂਪੇਨਾ’ਤਿ ਪਲਾਯਿਸ੍ਸਤਿ ਇਤਿ ਨੋ ਲਜ੍ਜਿਤਬ੍ਬਕਂ ਭਵਿਸ੍ਸਤਿ, ਕਿਂ ਮੇ ਘਰਾਵਾਸੇਨ, ਧਰਮਾਨੇ ਮਾਤਾਪਿਤਰੋ ਉਪਟ੍ਠਹਿਤ੍ਵਾ ਤੇਸਂ ਅਚ੍ਚਯੇਨ ਨਿਕ੍ਖਮਿਤ੍ਵਾ ਪਬ੍ਬਜਿਸ੍ਸਾਮੀ’’ਤਿ. ਸੋ ‘‘ਮਯ੍ਹਂ ਨੇਵ ਰਜ੍ਜੇਨਤ੍ਥੋ, ਨ ਨਾਟਕੇਹਿ, ਅਹਂ ਮਾਤਾਪਿਤੂਨਂ ਅਚ੍ਚਯੇਨ ਪਬ੍ਬਜਿਸ੍ਸਾਮੀ’’ਤਿ ਆਹ. ਸਾ ਗਨ੍ਤ੍ਵਾ ਤਸ੍ਸ ਕਥਂ ਦੇਵਿਯਾ ਆਰੋਚੇਸਿ, ਦੇਵੀਪਿ ਰਞ੍ਞੋ ਆਰੋਚੇਸਿ. ਰਾਜਾ ਅਨਤ੍ਤਮਨੋ ਹੁਤ੍ਵਾ ਪੁਨ ਕਤਿਪਾਹਚ੍ਚਯੇਨ ਸਾਸਨਂ ਪੇਸੇਸਿ. ਸੋਪਿ ਪਟਿਬਾਹਤਿਯੇਵ. ਏਵਂ ਯਾਵਤਤਿਯਂ ਪਟਿਬਾਹਿਤ੍ਵਾ ਚਤੁਤ੍ਥਵਾਰੇ ਚਿਨ੍ਤੇਸਿ – ‘‘ਮਾਤਾਪਿਤੂਹਿ ਸਦ੍ਧਿਂ ਏਕਨ੍ਤੇਨ ਪਟਿਪਕ੍ਖਭਾਵੋ ਨਾਮ ਨ ਯੁਤ੍ਤੋ, ਏਕਂ ਉਪਾਯਂ ਕਰਿਸ੍ਸਾਮੀ’’ਤਿ.

ਸੋ ਕਮ੍ਮਾਰਜੇਟ੍ਠਕਂ ਪਕ੍ਕੋਸਾਪੇਤ੍ਵਾ ਬਹੁਂ ਸੁਵਣ੍ਣਂ ਦਤ੍ਵਾ ‘‘ਏਕਂ ਇਤ੍ਥਿਰੂਪਕਂ ਕਰੋਹੀ’’ਤਿ ਉਯ੍ਯੋਜੇਤ੍ਵਾ ਤਸ੍ਮਿਂ ਪਕ੍ਕਨ੍ਤੇ ਅਞ੍ਞਂ ਸੁਵਣ੍ਣਂ ਗਹੇਤ੍ਵਾ ਸਯਮ੍ਪਿ ਇਤ੍ਥਿਰੂਪਕਂ ਅਕਾਸਿ. ਬੋਧਿਸਤ੍ਤਾਨਞ੍ਹਿ ਅਧਿਪ੍ਪਾਯੋ ਨਾਮ ਸਮਿਜ੍ਝਤਿ. ਤਂ ਸੁਵਣ੍ਣਰੂਪਕਂ ਜਿਵ੍ਹਾਯ ਅਵਣ੍ਣਨੀਯਸੋਭਂ ਅਹੋਸਿ. ਅਥ ਨਂ ਮਹਾਸਤ੍ਤੋ ਖੋਮਂ ਨਿਵਾਸਾਪੇਤ੍ਵਾ ਸਿਰਿਗਬ੍ਭੇ ਠਪਾਪੇਸਿ. ਸੋ ਕਮ੍ਮਾਰਜੇਟ੍ਠਕੇਨ ਆਭਤਰੂਪਕਂ ਦਿਸ੍ਵਾ ਤਂ ਗਰਹਿਤ੍ਵਾ ‘‘ਗਚ੍ਛ ਅਮ੍ਹਾਕਂ ਸਿਰਿਗਬ੍ਭੇ ਠਪਿਤਰੂਪਕਂ ਆਹਰਾ’’ਤਿ ਆਹ. ਸੋ ਸਿਰਿਗਬ੍ਭਂ ਪਵਿਟ੍ਠੋ ਤਂ ਦਿਸ੍ਵਾ ‘‘ਕੁਮਾਰੇਨ ਸਦ੍ਧਿਂ ਅਭਿਰਮਿਤੁਂ ਏਕਾ ਦੇਵਚ੍ਛਰਾ, ਆਗਤਾ ਭਵਿਸ੍ਸਤੀ’’ਤਿ ਹਤ੍ਥਂ ਪਸਾਰੇਤੁਂ ਅਵਿਸਹਨ੍ਤੋ ਨਿਕ੍ਖਮਿਤ੍ਵਾ ‘‘ਦੇਵ, ਸਿਰਿਗਬ੍ਭੇ ਅਯ੍ਯਾ ਏਕਿਕਾਵ ਠਿਤਾ, ਉਪਗਨ੍ਤੁਂ ਨ ਸਕ੍ਕੋਮੀ’’ਤਿ ਆਹ. ‘‘ਤਾਤ, ਗਚ੍ਛ, ਸੁਵਣ੍ਣਰੂਪਕਂ ਏਤਂ, ਆਹਰਾ’’ਤਿ ਪੁਨ ਪੇਸਿਤੋ ਆਹਰਿ. ਕੁਮਾਰੋ ਕਮ੍ਮਾਰੇਨ ਕਤਂ ਰੂਪਕਂ ਸੁਵਣ੍ਣਗਬ੍ਭੇ ਨਿਕ੍ਖਿਪਾਪੇਤ੍ਵਾ ਅਤ੍ਤਨਾ ਕਤਂ ਅਲਙ੍ਕਾਰਾਪੇਤ੍ਵਾ ਰਥੇ ਠਪਾਪੇਤ੍ਵਾ ‘‘ਏਵਰੂਪਂ ਲਭਨ੍ਤੋ ਗਣ੍ਹਾਮੀ’’ਤਿ ਮਾਤੁ ਸਨ੍ਤਿਕਂ ਪਹਿਣਿ.

ਸਾ ਅਮਚ੍ਚੇ ਪਕ੍ਕੋਸਾਪੇਤ੍ਵਾ, ‘‘ਤਾਤਾ, ਮਯ੍ਹਂ ਪੁਤ੍ਤੋ ਮਹਾਪੁਞ੍ਞੋ ਸਕ੍ਕਦਤ੍ਤਿਯੋ ਅਨੁਚ੍ਛਵਿਕਂ ਕੁਮਾਰਿਕਂ ਲਭਿਸ੍ਸਤਿ, ਤੁਮ੍ਹੇ ਏਵਰੂਪਂ ਲਭਨ੍ਤਾ ਗਣ੍ਹਿਸ੍ਸਥ, ਇਮਂ ਰੂਪਕਂ ਪਟਿਚ੍ਛਨ੍ਨਯਾਨੇ ਠਪੇਤ੍ਵਾ ਸਕਲਜਮ੍ਬੁਦੀਪਂ ਚਰਨ੍ਤਾ ਯਸ੍ਸ ਰਞ੍ਞੋ ਏਵਰੂਪਂ ਧੀਤਰਂ ਪਸ੍ਸਥ, ਤਸ੍ਸੇਤਂ ਦਤ੍ਵਾ ‘ਓਕ੍ਕਾਕਰਾਜਾ ਤੁਮ੍ਹੇਹਿ ਸਦ੍ਧਿਂ ਆਵਾਹਂ ਕਰਿਸ੍ਸਤੀ’ਤਿ ਦਿਵਸਂ ਵਵਤ੍ਥਪੇਤ੍ਵਾ ਆਗਚ੍ਛਥਾ’’ਤਿ ਆਹ. ਤੇ ‘‘ਸਾਧੂ’’ਤਿ ਤਂ ਆਦਾਯ ਮਹਨ੍ਤੇਨ ਪਰਿਵਾਰੇਨ ਨਿਕ੍ਖਮਿਤ੍ਵਾ ਵਿਚਰਨ੍ਤਾ ਯਂ ਰਾਜਧਾਨਿਂ ਪਾਪੁਣਨ੍ਤਿ, ਤਤ੍ਥ ਸਾਯਨ੍ਹਸਮਯੇ ਮਹਾਜਨਸ੍ਸ ਸਮੋਸਰਣਟ੍ਠਾਨੇ ਤਂ ਰੂਪਕਂ ਵਤ੍ਥਪੁਪ੍ਫਾਲਙ੍ਕਾਰੇਹਿ ਅਲਙ੍ਕਰਿਤ੍ਵਾ ਸੁਵਣ੍ਣਸਿਵਿਕਂ ਆਰੋਪੇਤ੍ਵਾ ਤਿਤ੍ਥਮਗ੍ਗੇ ਠਪੇਤ੍ਵਾ ਅਮਚ੍ਚਾ ਸਯਂ ਪਟਿਕ੍ਕਮਿਤ੍ਵਾ ਆਗਤਾਗਤਾਨਂ ਕਥਾਸਵਨਤ੍ਥਂ ਏਕਮਨ੍ਤੇ ਤਿਟ੍ਠਨ੍ਤਿ. ਮਹਾਜਨੋ ਤਂ ਓਲੋਕੇਤ੍ਵਾ ‘‘ਸੁਵਣ੍ਣਰੂਪਕ’’ਨ੍ਤਿ ਸਞ੍ਞਂ ਅਕਤ੍ਵਾ ‘‘ਅਯਂ ਮਨੁਸ੍ਸਿਤ੍ਥੀ ਸਮਾਨਾਪਿ ਦੇਵਚ੍ਛਰਪਟਿਭਾਗਾ ਅਤਿਵਿਯ ਸੋਭਤਿ, ਕਿਂ ਨੁ ਖੋ ਏਤ੍ਥ ਠਿਤਾ, ਕੁਤੋ ਵਾ ਆਗਤਾ, ਅਮ੍ਹਾਕਂ ਨਗਰੇ ਏਵਰੂਪਾ ਨਤ੍ਥੀ’’ਤਿ ਵਣ੍ਣੇਨ੍ਤੋ ਪਕ੍ਕਮਤਿ. ਤਂ ਸੁਤ੍ਵਾ ਅਮਚ੍ਚਾ ‘‘ਸਚੇ ਇਧ ਏਵਰੂਪਾ ਦਾਰਿਕਾ ਭਵੇਯ੍ਯ, ‘ਅਸੁਕਾ ਰਾਜਧੀਤਾ ਵਿਯ ਅਸੁਕਾ ਅਮਚ੍ਚਧੀਤਾ ਵਿਯਾ’ਤਿ ਵਦੇਯ੍ਯੁਂ, ਅਦ੍ਧਾ ਇਧ ਏਵਰੂਪਾ ਨਤ੍ਥੀ’’ਤਿ ਤਂ ਆਦਾਯ ਅਞ੍ਞਂ ਨਗਰਂ ਗਚ੍ਛਨ੍ਤਿ.

ਤੇ ਏਵਂ ਵਿਚਰਨ੍ਤਾ ਅਨੁਪੁਬ੍ਬੇਨ ਮਦ੍ਦਰਟ੍ਠੇ ਸਾਗਲਨਗਰਂ ਸਮ੍ਪਾਪੁਣਿਂਸੁ. ਤਤ੍ਥ ਮਦ੍ਦਰਞ੍ਞੋ ਅਟ੍ਠ ਧੀਤਰੋ ਉਤ੍ਤਮਰੂਪਧਰਾ ਦੇਵਚ੍ਛਰਪਟਿਭਾਗਾ, ਤਾਸਂ ਸਬ੍ਬਜੇਟ੍ਠਿਕਾ ਪਭਾਵਤੀ ਨਾਮ. ਤਸ੍ਸਾ ਸਰੀਰਤੋ ਬਾਲਸੂਰਿਯਸ੍ਸ ਪਭਾ ਵਿਯ ਪਭਾ ਨਿਚ੍ਛਰਨ੍ਤਿ, ਅਨ੍ਧਕਾਰੇਪਿ ਚਤੁਹਤ੍ਥੇ ਅਨ੍ਤੋਗਬ੍ਭੇ ਪਦੀਪਕਿਚ੍ਚਂ ਨਤ੍ਥਿ, ਸਬ੍ਬੋ ਗਬ੍ਭੋ ਏਕੋਭਾਸੋਵ ਹੋਤਿ. ਧਾਤੀ ਪਨਸ੍ਸਾ ਖੁਜ੍ਜਾ, ਸਾ ਪਭਾਵਤਿਂ ਭੋਜੇਤ੍ਵਾ ਤਸ੍ਸਾ ਸੀਸਨ੍ਹਾਪਨਤ੍ਥਂ ਅਟ੍ਠਹਿ ਵਣ੍ਣਦਾਸੀਹਿ ਅਟ੍ਠ ਘਟੇ ਗਾਹਾਪੇਤ੍ਵਾ ਸਾਯਨ੍ਹਸਮਯੇ ਉਦਕਤ੍ਥਾਯ ਗਚ੍ਛਨ੍ਤੀ ਤਿਤ੍ਥਮਗ੍ਗੇ ਠਿਤਂ ਤਂ ਰੂਪਕਂ ਦਿਸ੍ਵਾ ‘‘ਪਭਾਵਤੀ’’ਤਿ ਸਞ੍ਞਾਯ ‘‘ਅਯਂ ਦੁਬ੍ਬਿਨੀਤਾ ‘ਸੀਸਂ ਨ੍ਹਾਯਿਸ੍ਸਾਮੀ’ਤਿ ਅਮ੍ਹੇ ਉਦਕਤ੍ਥਾਯ ਪੇਸੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਤਿਤ੍ਥਮਗ੍ਗੇ ਠਿਤਾ’’ਤਿ ਕੁਜ੍ਝਿਤ੍ਵਾ ‘‘ਅਰੇ ਕੁਲਲਜ੍ਜਾਪਨਿਕੇ ਅਮ੍ਹੇਹਿ ਪੁਰਿਮਤਰਂ ਆਗਨ੍ਤ੍ਵਾ ਕਸ੍ਮਾ ਇਧ ਠਿਤਾਸਿ, ਸਚੇ ਰਾਜਾ ਜਾਨਿਸ੍ਸਤਿ, ਨਾਸੇਸ੍ਸਤਿ ਨੋ’’ਤਿ ਵਤ੍ਵਾ ਹਤ੍ਥੇਨ ਗਣ੍ਡਪਸ੍ਸੇ ਪਹਰਿ, ਹਤ੍ਥਤਲਂ ਭਿਜ੍ਜਮਾਨਂ ਵਿਯ ਜਾਤਂ. ਤਤੋ ‘‘ਸੁਵਣ੍ਣਰੂਪਕ’’ਨ੍ਤਿ ਞਤ੍ਵਾ ਹਸਮਾਨਾ ਤਾਸਂ ਵਣ੍ਣਦਾਸੀਨਂ ਸਨ੍ਤਿਕਂ ਗਚ੍ਛਨ੍ਤੀ ‘‘ਪਸ੍ਸਥੇਤਂ ਮੇ ਕਮ੍ਮਂ, ਮਮ ਧੀਤਾਤਿਸਞ੍ਞਾਯ ਪਹਾਰਂ ਅਦਾਸਿਂ, ਅਯਂ ਮਮ ਧੀਤੁ ਸਨ੍ਤਿਕੇ ਕਿਮਗ੍ਘਤਿ, ਕੇਵਲਂ ਮੇ ਹਤ੍ਥੋ ਦੁਕ੍ਖਾਪਿਤੋ’’ਤਿ ਆਹ.

ਅਥ ਨਂ ਰਾਜਦੂਤਾ ਗਹੇਤ੍ਵਾ ‘‘ਤ੍ਵਂ ‘ਮਮ ਧੀਤਾ ਇਤੋ ਅਭਿਰੂਪਤਰਾ’ਤਿ ਵਦਨ੍ਤੀ ਕਂ ਨਾਮ ਕਥੇਸੀ’’ਤਿ ਆਹਂਸੁ. ‘‘ਮਦ੍ਦਰਞ੍ਞੋ ਧੀਤਰਂ ਪਭਾਵਤਿਂ, ਇਦਂ ਰੂਪਕਂ ਤਸ੍ਸਾ ਸੋਲ਼ਸਿਮ੍ਪਿ ਕਲਂ ਨ ਅਗ੍ਘਤੀ’’ਤਿ. ਤੇ ਤੁਟ੍ਠਮਾਨਸਾ ਰਾਜਦ੍ਵਾਰਂ ਗਨ੍ਤ੍ਵਾ ‘‘ਓਕ੍ਕਾਕਰਞ੍ਞੋ ਦੂਤਾ ਦ੍ਵਾਰੇ ਠਿਤਾ’’ਤਿ ਪਟਿਹਾਰੇਸੁਂ. ਰਾਜਾ ਆਸਨਾ ਵੁਟ੍ਠਾਯ ਠਿਤਕੋਵ ‘‘ਪਕ੍ਕੋਸਥਾ’’ਤਿ ਆਹ. ਤੇ ਪਵਿਸਿਤ੍ਵਾ ਰਾਜਾਨਂ ਵਨ੍ਦਿਤ੍ਵਾ ‘‘ਮਹਾਰਾਜ, ਅਮ੍ਹਾਕਂ ਰਾਜਾ ਤੁਮ੍ਹਾਕਂ ਆਰੋਗ੍ਯਂ ਪੁਚ੍ਛਤੀ’’ਤਿ ਵਤ੍ਵਾ ਕਤਸਕ੍ਕਾਰਸਮ੍ਮਾਨਾ ‘‘ਕਿਮਤ੍ਥਂ ਆਗਤਤ੍ਥਾ’’ਤਿ ਪੁਟ੍ਠਾ ‘‘ਅਮ੍ਹਾਕਂ ਰਞ੍ਞੋ ਸੀਹਸ੍ਸਰੋ ਪੁਤ੍ਤੋ ਕੁਸਕੁਮਾਰੋ ਨਾਮ, ਰਾਜਾ ਤਸ੍ਸ ਰਜ੍ਜਂ ਦਾਤੁਕਾਮੋ ਅਮ੍ਹੇ ਤੁਮ੍ਹਾਕਂ ਸਨ੍ਤਿਕਂ ਪਹਿਣਿ, ਤੁਮ੍ਹਾਕਂ ਕਿਰ ਧੀਤਾ ਪਭਾਵਤੀ, ਤਂ ਤਸ੍ਸ ਦੇਥ, ਇਮਞ੍ਚ ਸੁਵਣ੍ਣਰੂਪਕਂ ਦੇਯ੍ਯਧਮ੍ਮਂ ਗਣ੍ਹਥਾ’’ਤਿ ਤਂ ਰੂਪਕਂ ਤਸ੍ਸ ਅਦਂਸੁ. ਸੋਪਿ ‘‘ਏਵਰੂਪੇਨ ਮਹਾਰਾਜੇਨ ਸਦ੍ਧਿਂ ਵਿਵਾਹਮਙ੍ਗਲਂ ਭਵਿਸ੍ਸਤੀ’’ਤਿ ਤੁਟ੍ਠਚਿਤ੍ਤੋ ਸਮ੍ਪਟਿਚ੍ਛਿ. ਅਥ ਨਂ ਦੂਤਾ ਆਹਂਸੁ – ‘‘ਮਹਾਰਾਜ, ਅਮ੍ਹੇਹਿ ਨ ਸਕ੍ਕਾ ਪਪਞ੍ਚਂ ਕਾਤੁਂ, ਕੁਮਾਰਿਕਾਯ ਲਦ੍ਧਭਾਵਂ ਰਞ੍ਞੋ ਆਰੋਚੇਸ੍ਸਾਮ, ਅਥ ਨਂ ਸੋ ਆਗਨ੍ਤ੍ਵਾ ਆਦਾਯ ਗਮਿਸ੍ਸਤੀ’’ਤਿ. ਸੋ ‘‘ਸਾਧੂ’’ਤਿ ਵਤ੍ਵਾ ਤੇਸਂ ਸਕ੍ਕਾਰਂ ਕਤ੍ਵਾ ਵਿਸ੍ਸਜ੍ਜੇਸਿ. ਤੇ ਗਨ੍ਤ੍ਵਾ ਰਞ੍ਞੋ ਚ ਦੇਵਿਯਾ ਚ ਆਰੋਚੇਸੁਂ. ਰਾਜਾ ਮਹਨ੍ਤੇਨ ਪਰਿਵਾਰੇਨ ਕੁਸਾਵਤਿਤੋ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਸਾਗਲਨਗਰਂ ਪਾਪੁਣਿ. ਮਦ੍ਦਰਾਜਾ ਪਚ੍ਚੁਗ੍ਗਨ੍ਤ੍ਵਾ ਤਂ ਨਗਰਂ ਪਵੇਸੇਤ੍ਵਾ ਮਹਨ੍ਤਂ ਸਕ੍ਕਾਰਮਕਾਸਿ.

ਸੀਲਵਤੀ ਦੇਵੀ ਪਣ੍ਡਿਤਤ੍ਤਾ ‘‘ਕੋ ਜਾਨਾਤਿ, ਕਿਂ ਭਵਿਸ੍ਸਤੀ’’ਤਿ ਏਕਾਹਦ੍ਵੀਹਚ੍ਚਯੇਨ ਮਦ੍ਦਰਾਜਾਨਂ ਆਹ – ‘‘ਮਹਾਰਾਜ, ਸੁਣਿਸਂ ਦਟ੍ਠੁਕਾਮਾਮ੍ਹੀ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਂ ਪਕ੍ਕੋਸਾਪੇਸਿ. ਪਭਾਵਤੀ ਸਬ੍ਬਾਲਙ੍ਕਾਰਪਟਿਮਣ੍ਡਿਤਾ ਧਾਤਿਗਣਪਰਿਵੁਤਾ ਆਗਨ੍ਤ੍ਵਾ ਸਸ੍ਸੁਂ ਵਨ੍ਦਿ. ਸਾ ਤਂ ਦਿਸ੍ਵਾ ਚਿਨ੍ਤੇਸਿ – ‘‘ਅਯਂ ਕੁਮਾਰਿਕਾ ਅਭਿਰੂਪਾ, ਮਯ੍ਹਂ ਪੁਤ੍ਤੋ ਵਿਰੂਪੋ. ਸਚੇ ਏਸਾ ਤਂ ਪਸ੍ਸਿਸ੍ਸਤਿ, ਏਕਾਹਮ੍ਪਿ ਅਵਸਿਤ੍ਵਾ ਪਲਾਯਿਸ੍ਸਤਿ, ਉਪਾਯਂ ਕਰਿਸ੍ਸਾਮੀ’’ਤਿ. ਸਾ ਮਦ੍ਦਰਾਜਾਨਂ ਆਮਨ੍ਤੇਤ੍ਵਾ, ‘‘ਮਹਾਰਾਜ, ਸੁਣਿਸਾ ਮੇ ਪੁਤ੍ਤਸ੍ਸ ਅਨੁਚ੍ਛਵਿਕਾ, ਅਪਿਚ ਖੋ ਪਨ ਅਮ੍ਹਾਕਂ ਕੁਲਪਵੇਣਿਯਾ ਆਗਤਂ ਚਾਰਿਤ੍ਤਂ ਅਤ੍ਥਿ, ਸਚੇ ਅਯਂ ਤਸ੍ਮਿਂ ਚਾਰਿਤ੍ਤੇ ਵਤ੍ਤਿਸ੍ਸਤਿ, ਨੇਸ੍ਸਾਮਿ ਨ’’ਨ੍ਤਿ ਆਹ. ‘‘ਕਿਂ ਪਨ ਵੋ ਚਾਰਿਤ੍ਤ’’ਨ੍ਤਿ. ‘‘ਅਮ੍ਹਾਕਂ ਵਂਸੇ ਯਾਵ ਏਕਸ੍ਸ ਗਬ੍ਭਸ੍ਸ ਪਤਿਟ੍ਠਾਨਂ ਹੋਤਿ, ਤਾਵ ਦਿਵਾ ਸਾਮਿਕਂ ਪਸ੍ਸਿਤੁਂ ਨ ਲਭਤਿ. ਸਚੇ ਏਸਾ ਤਥਾ ਕਰਿਸ੍ਸਤਿ, ਨੇਸ੍ਸਾਮਿ ਨ’’ਨ੍ਤਿ. ਰਾਜਾ ‘‘ਕਿਂ, ਅਮ੍ਮ, ਸਕ੍ਖਿਸ੍ਸਸਿ ਏਵਂ ਵਤ੍ਤਿਤੁ’’ਨ੍ਤਿ ਧੀਤਰਂ ਪੁਚ੍ਛਿ. ਸਾ ‘‘ਆਮ ਤਾਤਾ’’ਤਿ ਆਹ. ਤਤੋ ਓਕ੍ਕਾਕਰਾਜਾ ਮਦ੍ਦਰਞ੍ਞੋ ਬਹੁਂ ਧਨਂ ਦਤ੍ਵਾ ਤਂ ਆਦਾਯ ਪਕ੍ਕਾਮਿ. ਮਦ੍ਦਰਾਜਾਪਿ ਮਹਨ੍ਤੇਨ ਪਰਿਵਾਰੇਨ ਧੀਤਰਂ ਉਯ੍ਯੋਜੇਸਿ.

ਓਕ੍ਕਾਕੋ ਕੁਸਾਵਤਿਂ ਗਨ੍ਤ੍ਵਾ ਨਗਰਂ ਅਲਙ੍ਕਾਰਾਪੇਤ੍ਵਾ ਸਬ੍ਬਬਨ੍ਧਨਾਨਿ ਮੋਚੇਤ੍ਵਾ ਪੁਤ੍ਤਸ੍ਸ ਅਭਿਸੇਕਂ ਕਤ੍ਵਾ ਰਜ੍ਜਂ ਦਤ੍ਵਾ ਪਭਾਵਤਿਂ ਅਗ੍ਗਮਹੇਸਿਂ ਕਾਰੇਤ੍ਵਾ ਨਗਰੇ ‘‘ਕੁਸਰਾਜਸ੍ਸ ਆਣਾ’’ਤਿ ਭੇਰਿਂ ਚਰਾਪੇਸਿ. ਸਕਲਜਮ੍ਬੁਦੀਪਤਲੇ ਰਾਜਾਨੋ ਯੇਸਂ ਧੀਤਰੋ ਅਤ੍ਥਿ, ਤੇ ਕੁਸਰਞ੍ਞੋ ਧੀਤਰੋ ਪਹਿਣਿਂਸੁ. ਯੇਸਂ ਪੁਤ੍ਤਾ ਅਤ੍ਥਿ, ਤੇ ਤੇਨ ਸਦ੍ਧਿਂ ਮਿਤ੍ਤਭਾਵਂ ਆਕਙ੍ਖਨ੍ਤਾ ਪੁਤ੍ਤੇ ਉਪਟ੍ਠਾਕੇ ਕਤ੍ਵਾ ਪਹਿਣਿਂਸੁ. ਬੋਧਿਸਤ੍ਤਸ੍ਸ ਨਾਟਕਪਰਿਵਾਰੋ ਮਹਾ ਅਹੋਸਿ, ਮਹਨ੍ਤੇਨ ਯਸੇਨ ਰਜ੍ਜਂ ਕਾਰੇਸਿ. ਸੋ ਪਭਾਵਤਿਂ ਦਿਵਾ ਪਸ੍ਸਿਤੁਂ ਨ ਲਭਤਿ, ਸਾਪਿ ਤਂ ਦਿਵਾ ਪਸ੍ਸਿਤੁਂ ਨ ਲਭਤਿ, ਉਭਿਨ੍ਨਂ ਰਤ੍ਤਿਦਸ੍ਸਨਮੇਵ ਹੋਤਿ. ਤਤ੍ਥ ਪਭਾਵਤਿਯਾ ਸਰੀਰਪ੍ਪਭਾਪਿ ਅਬ੍ਬੋਹਾਰਿਕਾ ਅਹੋਸਿ. ਬੋਧਿਸਤ੍ਤੋ ਸਿਰਿਗਬ੍ਭਤੋ ਰਤ੍ਤਿਂਯੇਵ ਨਿਕ੍ਖਮਤਿ.

ਸੋ ਕਤਿਪਾਹਚ੍ਚਯੇਨ ਪਭਾਵਤਿਂ ਦਿਵਾ ਦਟ੍ਠੁਕਾਮੋ ਮਾਤੁਯਾ ਆਰੋਚੇਸਿ. ਸਾ ‘‘ਮਾ ਤੇ ਤਾਤ, ਰੁਚ੍ਚਿ, ਯਾਵ ਏਕਂ ਪੁਤ੍ਤਂ ਲਭਸਿ, ਤਾਵ ਆਗਮੇਹੀ’’ਤਿ, ਪਟਿਕ੍ਖਿਪਿ. ਸੋ ਪੁਨਪ੍ਪੁਨਂ ਯਾਚਿਯੇਵ. ਅਥ ਨਂ ਸਾ ਆਹ – ‘‘ਤੇਨ ਹਿ ਹਤ੍ਥਿਸਾਲਂ ਗਨ੍ਤ੍ਵਾ ਹਤ੍ਥਿਮੇਣ੍ਡਵੇਸੇਨ ਤਿਟ੍ਠ, ਅਹਂ ਤਂ ਤਤ੍ਥ ਆਨੇਸ੍ਸਾਮਿ, ਅਥ ਨਂ ਅਕ੍ਖੀਨਿ ਪੂਰੇਤ੍ਵਾ ਓਲੋਕੇਯ੍ਯਾਸਿ, ਮਾ ਚ ਅਤ੍ਤਾਨਂ ਜਾਨਾਪੇਹੀ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਹਤ੍ਥਿਸਾਲਂ ਅਗਮਾਸਿ. ਅਥਸ੍ਸ ਮਾਤਾ ਹਤ੍ਥਿਸਾਲਂ ਅਲਙ੍ਕਾਰਾਪੇਤ੍ਵਾ ਪਭਾਵਤਿਂ ‘‘ਏਹਿ ਸਾਮਿਕਸ੍ਸ ਹਤ੍ਥਿਨੋ ਪਸ੍ਸਾਮਾ’’ਤਿ ਤਤ੍ਥ ਨੇਤ੍ਵਾ ‘‘ਅਯਂ ਹਤ੍ਥੀ ਅਸੁਕੋ ਨਾਮ, ਅਯਂ ਹਤ੍ਥੀ ਅਸੁਕੋ ਨਾਮਾ’’ਤਿ ਤਸ੍ਸਾ ਦਸ੍ਸੇਸਿ. ਤਤ੍ਥ ਤਂ ਰਾਜਾ ਮਾਤੁ ਪਚ੍ਛਤੋ ਗਚ੍ਛਨ੍ਤਿਂ ਦਿਸ੍ਵਾ ਹਤ੍ਥਿਗੋਪਕਵੇਸੇਨ ਹਤ੍ਥਿਛਕਣਪਿਣ੍ਡੇਨ ਪਿਟ੍ਠਿਯਂ ਪਹਰਿ. ਸਾ ਕੁਦ੍ਧਾ ‘‘ਰਞ੍ਞੋ ਕਥੇਤ੍ਵਾ ਤੇ ਹਤ੍ਥਂ ਛਿਨ੍ਦਾਪੇਸ੍ਸਾਮੀ’’ਤਿ ਵਤ੍ਵਾ ਦੇਵਿਂ ਉਜ੍ਝਾਪੇਸਿ. ਰਾਜਮਾਤਾ ‘‘ਮਾ ਅਮ੍ਮ ਕੁਜ੍ਝੀ’’ਤਿ ਸੁਣਿਸਂ ਸਞ੍ਞਾਪੇਤ੍ਵਾ ਪਿਟ੍ਠਿਂ ਪਰਿਮਜ੍ਜਿ. ਪੁਨਪਿ ਰਾਜਾ ਤਂ ਦਟ੍ਠੁਕਾਮੋ ਹੁਤ੍ਵਾ ਅਸ੍ਸਸਾਲਾਯ ਅਸ੍ਸਗੋਪਕਵੇਸੇਨ ਤਂ ਦਿਸ੍ਵਾ ਤਥੇਵ ਅਸ੍ਸਛਕਣਪਿਣ੍ਡੇਨ ਪਹਰਿ. ਤਦਾਪਿ ਤਂ ਕੁਦ੍ਧਂ ਸਸ੍ਸੁ ਸਞ੍ਞਾਪੇਸਿ.

ਪੁਨੇਕਦਿਵਸੇ ਪਭਾਵਤੀ ਮਹਾਸਤ੍ਤਂ ਪਸ੍ਸਿਤੁਕਾਮਾ ਹੁਤ੍ਵਾ ਸਸ੍ਸੁਯਾ ਆਰੋਚੇਤ੍ਵਾ ‘‘ਅਲਂ ਮਾ ਤੇ ਰੁਚ੍ਚੀ’’ਤਿ ਪਟਿਕ੍ਖਿਤ੍ਤਾਪਿ ਪੁਨਪ੍ਪੁਨਂ ਯਾਚਿ. ਅਥ ਨਂ ਸਾ ਆਹ – ‘‘ਤੇਨ ਹਿ ਸ੍ਵੇ ਮਮ ਪੁਤ੍ਤੋ ਨਗਰਂ ਪਦਕ੍ਖਿਣਂ ਕਰਿਸ੍ਸਤਿ, ਤ੍ਵਂ ਸੀਹਪਞ੍ਜਰਂ ਵਿਵਰਿਤ੍ਵਾ ਤਂ ਪਸ੍ਸੇਯ੍ਯਾਸੀ’’ਤਿ. ਏਵਞ੍ਚ ਪਨ ਵਤ੍ਵਾ ਪੁਨਦਿਵਸੇ ਨਗਰਂ ਅਲਙ੍ਕਾਰਾਪੇਤ੍ਵਾ ਜਯਮ੍ਪਤਿਕੁਮਾਰਂ ਰਾਜਵੇਸਂ ਗਾਹਾਪੇਤ੍ਵਾ ਹਤ੍ਥਿਪਿਟ੍ਠੇ ਨਿਸੀਦਾਪੇਤ੍ਵਾ ਬੋਧਿਸਤ੍ਤਂ ਪਚ੍ਛਿਮਾਸਨੇ ਨਿਸੀਦਾਪੇਤ੍ਵਾ ਨਗਰਂ ਪਦਕ੍ਖਿਣਂ ਕਾਰਾਪੇਸਿ. ਸਾ ਪਭਾਵਤਿਂ ਆਦਾਯ ਸੀਹਪਞ੍ਜਰੇ ਠਤ੍ਵਾ ‘‘ਪਸ੍ਸ ਤਵ ਸਾਮਿਕਸ੍ਸ ਸਿਰਿਸੋਭਗ੍ਗ’’ਨ੍ਤਿ ਆਹ. ਸਾ ‘‘ਅਨੁਚ੍ਛਵਿਕੋ ਮੇ ਸਾਮਿਕੋ ਲਦ੍ਧੋ’’ਤਿ ਅਤ੍ਤਮਨਾ ਅਹੋਸਿ. ਤਂ ਦਿਵਸਂ ਪਨ ਮਹਾਸਤ੍ਤੋ ਹਤ੍ਥਿਮੇਣ੍ਡਵੇਸੇਨ ਜਯਮ੍ਪਤਿਸ੍ਸ ਪਚ੍ਛਿਮਾਸਨੇ ਨਿਸੀਦਿਤ੍ਵਾ ਯਥਾਧਿਪ੍ਪਾਯੇਨ ਪਭਾਵਤਿਂ ਓਲੋਕੇਨ੍ਤੋ ਹਤ੍ਥਵਿਕਾਰਾਦਿਵਸੇਨ ਚਿਤ੍ਤਰੁਚਿਯਾ ਕੇਲ਼ਿਂ ਦਸ੍ਸੇਸਿ. ਹਤ੍ਥਿਮ੍ਹਿ ਅਤਿਕ੍ਕਨ੍ਤੇ ਰਾਜਮਾਤਾ ਪਭਾਵਤਿਂ ਪੁਚ੍ਛਿ – ‘‘ਦਿਟ੍ਠੋ ਤੇ, ਅਮ੍ਮ, ਸਾਮਿਕੋ’’ਤਿ. ‘‘ਆਮ ਅਯ੍ਯੇ, ਪਚ੍ਛਿਮਾਸਨੇ ਪਨਸ੍ਸ ਨਿਸਿਨ੍ਨੋ ਹਤ੍ਥਿਮੇਣ੍ਡੋ ਅਤਿਵਿਯ ਦੁਬ੍ਬਿਨੀਤੋ, ਮਯ੍ਹਂ ਹਤ੍ਥਵਿਕਾਰਾਦੀਨਿ ਦਸ੍ਸੇਸਿ, ਕਸ੍ਮਾ ਏਵਰੂਪਂ ਅਲਕ੍ਖਿਕਂ ਰਞ੍ਞੋ ਪਚ੍ਛਿਮਾਸਨੇ ਨਿਸੀਦਾਪੇਸੁਂ, ਨੀਹਰਾਪੇਹਿ ਨ’’ਨ੍ਤਿ? ‘‘ਅਮ੍ਮ, ਰਞ੍ਞੋ ਪਚ੍ਛਿਮਾਸਨੇ ਰਕ੍ਖਾ ਨਾਮ ਇਚ੍ਛਿਤਬ੍ਬਾ’’ਤਿ.

ਸਾ ਚਿਨ੍ਤੇਸਿ – ‘‘ਅਯਂ ਹਤ੍ਥਿਮੇਣ੍ਡੋ ਅਤਿਵਿਯ ਨਿਬ੍ਭਯੋ, ਰਾਜਾਨਂ ‘ਰਾਜਾ’ਤਿਪਿ ਨ ਮਞ੍ਞਤਿ, ਕਿਂ ਨੁ ਖੋ ਏਸੋਵ ਕੁਸਰਾਜਾ, ਅਦ੍ਧਾ ਹਿ ਏਸੋ ਅਤਿਵਿਯ ਵਿਰੂਪੋ ਏਵ ਭਵਿਸ੍ਸਤਿ, ਤੇਨੇਵ ਮਂ ਨ ਦਸ੍ਸੇਨ੍ਤੀ’’ਤਿ. ਸਾ ਖੁਜ੍ਜਂ ਕਣ੍ਣਮੂਲੇ ਆਹ – ‘‘ਅਮ੍ਮ, ਗਚ੍ਛ ਤਾਵ ਜਾਨਾਹਿ, ਕਿਂ ਪੁਰਿਮਾਸਨੇ ਨਿਸਿਨ੍ਨਕੋ ਰਾਜਾ, ਉਦਾਹੁ ਪਚ੍ਛਿਮਾਸਨੇ’’ਤਿ? ‘‘ਕਥਂ ਪਨਾਹਂ ਜਾਨਿਸ੍ਸਾਮੀ’’ਤਿ. ‘‘ਸਚੇ ਹਿ ਸੋ ਰਾਜਾ ਭਵਿਸ੍ਸਤਿ, ਪਠਮਤਰਂ ਹਤ੍ਥਿਪਿਟ੍ਠਿਤੋ ਓਤਰਿਸ੍ਸਤਿ, ਇਮਾਯ ਸਞ੍ਞਾਯ ਜਾਨਾਹੀ’’ਤਿ. ਸਾ ਗਨ੍ਤ੍ਵਾ ਏਕਮਨ੍ਤੇ ਠਿਤਾ ਪਠਮਂ ਮਹਾਸਤ੍ਤਂ ਓਤਰਨ੍ਤਂ ਅਦ੍ਦਸ, ਪਚ੍ਛਾ ਜਯਮ੍ਪਤਿਕੁਮਾਰਂ. ਮਹਾਸਤ੍ਤੋਪਿ ਇਤੋ ਚਿਤੋ ਚ ਓਲੋਕੇਨ੍ਤੋ ਖੁਜ੍ਜਂ ਦਿਸ੍ਵਾ ‘‘ਇਮਿਨਾ ਨਾਮ ਕਾਰਣੇਨ ਏਸਾ ਆਗਤਾ ਭਵਿਸ੍ਸਤੀ’’ਤਿ ਞਤ੍ਵਾ ਤਂ ਪਕ੍ਕੋਸਾਪੇਤ੍ਵਾ ‘‘ਇਮਂ ਅਨ੍ਤਰਂ ਪਭਾਵਤਿਯਾ ਮਾ ਕਥੇਹੀ’’ਤਿ ਦਲ਼੍ਹਂ ਵਤ੍ਵਾ ਉਯ੍ਯੋਜੇਸਿ. ਸਾ ਗਨ੍ਤ੍ਵਾ ‘‘ਪੁਰਿਮਾਸਨੇ ਨਿਸਿਨ੍ਨੋ ਪਠਮਂ ਓਤਰੀ’’ਤਿ ਆਹ. ਪਭਾਵਤੀ ਤਸ੍ਸਾ ਵਚਨਂ ਸਦ੍ਦਹਿ.

ਮਹਾਸਤ੍ਤੋਪਿ ਪੁਨ ਦਟ੍ਠੁਕਾਮੋ ਹੁਤ੍ਵਾ ਮਾਤਰਂ ਯਾਚਿ. ਸਾ ਪਟਿਕ੍ਖਿਪਿਤੁਂ ਅਸਕ੍ਕੋਨ੍ਤੀ ‘‘ਤੇਨ ਹਿ ਅਞ੍ਞਾਤਕਵੇਸੇਨ ਉਯ੍ਯਾਨਂ ਗਚ੍ਛਾਹੀ’’ਤਿ ਆਹ. ਸੋ ਉਯ੍ਯਾਨਂ ਗਨ੍ਤ੍ਵਾ ਪੋਕ੍ਖਰਣਿਯਂ ਗਲਪ੍ਪਮਾਣਂ ਉਦਕਂ ਪਵਿਸਿਤ੍ਵਾ ਪਦੁਮਿਨਿਪਤ੍ਤੇਨ ਸੀਸਂ ਛਾਦੇਤ੍ਵਾ ਪੁਪ੍ਫਿਤਪਦੁਮੇਨ ਮੁਖਂ ਆਵਰਿਤ੍ਵਾ ਅਟ੍ਠਾਸਿ. ਮਾਤਾਪਿਸ੍ਸ ਪਭਾਵਤਿਂ ਉਯ੍ਯਾਨਂ ਨੇਤ੍ਵਾ ਸਾਯਨ੍ਹਸਮਯੇ ‘‘ਇਮੇ ਰੁਕ੍ਖੇ ਪਸ੍ਸ, ਸਕੁਣੇ ਪਸ੍ਸ, ਮਿਗੇ ਪਸ੍ਸਾ’’ਤਿ ਪਲੋਭਯਮਾਨਾ ਪੋਕ੍ਖਰਣੀਤੀਰਂ ਪਾਯਾਸਿ. ਸਾ ਪਞ੍ਚਵਿਧਪਦੁਮਸਞ੍ਛਨ੍ਨਂ ਪੋਕ੍ਖਰਣਿਂ ਦਿਸ੍ਵਾ ਨ੍ਹਾਯਿਤੁਕਾਮਾ ਪਰਿਚਾਰਿਕਾਹਿ ਸਦ੍ਧਿਂ ਪੋਕ੍ਖਰਣਿਂ ਓਤਰਿਤ੍ਵਾ ਕੀਲ਼ਨ੍ਤੀ ਤਂ ਪਦੁਮਂ ਦਿਸ੍ਵਾ ਵਿਚਿਨਿਤੁਕਾਮਾ ਹਤ੍ਥਂ ਪਸਾਰੇਸਿ. ਅਥ ਨਂ ਰਾਜਾ ਪਦੁਮਿਨਿਪਤ੍ਤਂ ਅਪਨੇਤ੍ਵਾ ‘‘ਅਹਂ ਕੁਸਰਾਜਾ’’ਤਿ ਵਤ੍ਵਾ ਹਤ੍ਥੇ ਗਣ੍ਹਿ. ਸਾ ਤਸ੍ਸ ਮੁਖਂ ਦਿਸ੍ਵਾ ‘‘ਯਕ੍ਖੋ ਮਂ ਗਣ੍ਹੀ’’ਤਿ ਵਿਰਵਿਤ੍ਵਾ ਤਤ੍ਥੇਵ ਵਿਸਞ੍ਞਿਤਂ ਪਤ੍ਤਾ. ਅਥਸ੍ਸਾ ਰਾਜਾ ਹਤ੍ਥਂ ਮੁਞ੍ਚਿ. ਸਾ ਸਞ੍ਞਂ ਪਟਿਲਭਿਤ੍ਵਾ ‘‘ਕੁਸਰਾਜਾ ਕਿਰ ਮਂ ਹਤ੍ਥੇ ਗਣ੍ਹਿ, ਇਮਿਨਾਵਾਹਂ ਹਤ੍ਥਿਸਾਲਾਯ ਹਤ੍ਥਿਛਕਣਪਿਣ੍ਡੇਨ, ਅਸ੍ਸਸਾਲਾਯ ਅਸ੍ਸਛਕਣਪਿਣ੍ਡੇਨ ਪਹਟਾ, ਅਯਮੇਵ ਮਂ ਹਤ੍ਥਿਸ੍ਸ ਪਚ੍ਛਿਮਾਸਨੇ ਨਿਸੀਦਿਤ੍ਵਾ ਉਪ੍ਪਣ੍ਡੇਸਿ, ਕਿਂ ਮੇ ਏਵਰੂਪੇਨ ਦੁਮ੍ਮੁਖੇਨ ਪਤਿਨਾ, ਇਮਂ ਜਹਿਤ੍ਵਾ ਅਹਂ ਜੀਵਨ੍ਤੀ ਅਞ੍ਞਂ ਪਤਿਂ ਲਭਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਅਤ੍ਤਨਾ ਸਦ੍ਧਿਂ ਆਗਤੇ ਅਮਚ੍ਚੇ ਪਕ੍ਕੋਸਾਪੇਤ੍ਵਾ ‘‘ਮਮ ਯਾਨਵਾਹਨਂ ਸਜ੍ਜਂ ਕਰੋਥ, ਅਜ੍ਜੇਵ ਗਮਿਸ੍ਸਾਮੀ’’ਤਿ ਆਹਂ. ਤੇ ਰਞ੍ਞੋ ਆਰੋਚੇਸੁਂ. ਰਾਜਾ ਚਿਨ੍ਤੇਸਿ – ‘‘ਸਚੇ ਗਨ੍ਤੁਂ ਨ ਲਭਿਸ੍ਸਤਿ, ਹਦਯਮਸ੍ਸਾ ਫਲਿਸ੍ਸਤਿ, ਗਚ੍ਛਤੁ ਪੁਨ ਤਂ ਅਤ੍ਤਨੋ ਬਲੇਨ ਆਨੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਅਥਸ੍ਸਾ ਗਮਨਂ ਅਨੁਜਾਨਿ. ਸਾ ਪਿਤੁਨਗਰਮੇਵ ਅਗਮਾਸਿ.

ਮਹਾਸਤ੍ਤੋਪਿ ਉਯ੍ਯਾਨਤੋ ਨਗਰਂ ਪਵਿਸਿਤ੍ਵਾ ਅਲਙ੍ਕਤਪਾਸਾਦਂ ਅਭਿਰੁਹਿ. ਬੋਧਿਸਤ੍ਤਞ੍ਹਿ ਸਾ ਪੁਬ੍ਬਪਤ੍ਥਨਾਵਸੇਨ ਨ ਇਚ੍ਛਿ, ਸੋਪਿ ਪੁਬ੍ਬਕਮ੍ਮਵਸੇਨੇਵ ਵਿਰੂਪੋ ਅਹੋਸਿ. ਅਤੀਤੇ ਕਿਰ ਬਾਰਾਣਸਿਯਂ ਦ੍ਵਾਰਗਾਮੇ ਉਪਰਿਮਵੀਥਿਯਾ ਚ ਹੇਟ੍ਠਿਮਵੀਥਿਯਾ ਚ ਦ੍ਵੇ ਕੁਲਾਨਿ ਵਸਿਂਸੁ. ਏਕਸ੍ਸ ਕੁਲਸ੍ਸ ਦ੍ਵੇ ਪੁਤ੍ਤਾ ਅਹੇਸੁਂ. ਏਕਸ੍ਸ ਏਕਾਵ ਧੀਤਾ ਅਹੋਸਿ. ਦ੍ਵੀਸੁ ਪੁਤ੍ਤੇਸੁ ਬੋਧਿਸਤ੍ਤੋ ਕਨਿਟ੍ਠੋ. ਤਂ ਕੁਮਾਰਿਕਂ ਜੇਟ੍ਠਕਸ੍ਸ ਅਦਂਸੁ. ਕਨਿਟ੍ਠੋ ਅਦਾਰਭਰਣੋ ਭਾਤੁ ਸਨ੍ਤਿਕੇਯੇਵ ਵਸਿ. ਅਥੇਕਦਿਵਸਂ ਤਸ੍ਮਿਂ ਘਰੇ ਅਤਿਰਸਕਪੂਵੇ ਪਚਿਂਸੁ. ਬੋਧਿਸਤ੍ਤੋ ਅਰਞ੍ਞਂ ਗਤੋ ਹੋਤਿ. ਤਸ੍ਸ ਪੂਵਂ ਠਪੇਤ੍ਵਾ ਅਵਸੇਸੇ ਭਾਜੇਤ੍ਵਾ ਖਾਦਿਂਸੁ. ਤਸ੍ਮਿਂ ਖਣੇ ਪਚ੍ਚੇਕਬੁਦ੍ਧੋ ਭਿਕ੍ਖਾਯ ਘਰਦ੍ਵਾਰਂ ਅਗਮਾਸਿ. ਬੋਧਿਸਤ੍ਤਸ੍ਸ ਭਾਤੁਜਾਯਾ ‘‘ਚੂਲ਼ਪਤਿਨੋ ਅਞ੍ਞਂ ਪੂਵਂ ਪਚਿਸ੍ਸਾਮੀ’’ਤਿ ਤਂ ਗਹੇਤ੍ਵਾ ਪਚ੍ਚੇਕਬੁਦ੍ਧਸ੍ਸ ਅਦਾਸਿ. ਸੋਪਿ ਤਂ ਖਣਞ੍ਞੇਵ ਅਰਞ੍ਞਤੋ ਆਗਚ੍ਛਿ. ਅਥ ਨਂ ਸਾ ਆਹ – ‘‘ਸਾਮਿ, ਚਿਤ੍ਤਂ ਪਸਾਦੇਹਿ, ਤਵ ਕੋਟ੍ਠਾਸੋ ਪਚ੍ਚੇਕਬੁਦ੍ਧਸ੍ਸ ਦਿਨ੍ਨੋ’’ਤਿ. ਸੋ ‘‘ਤਵ ਕੋਟ੍ਠਾਸਂ ਖਾਦਿਤ੍ਵਾ ਮਮ ਕੋਟ੍ਠਾਸਂ ਦੇਸਿ, ਅਹਂ ਕਿਂ ਖਾਦਿਸ੍ਸਾਮੀ’’ਤਿ ਕੁਦ੍ਧੋ ਪਚ੍ਚੇਕਬੁਦ੍ਧਂ ਅਨੁਗਨ੍ਤ੍ਵਾ ਪਤ੍ਤਤੋ ਪੂਵਂ ਗਣ੍ਹਿ. ਸਾ ਮਾਤੁ ਘਰਂ ਗਨ੍ਤ੍ਵਾ ਨਵਵਿਲੀਨਂ ਚਮ੍ਪਕਪੁਪ੍ਫਵਣ੍ਣਂ ਸਪ੍ਪਿਂ ਆਹਰਿਤ੍ਵਾ ਪਚ੍ਚੇਕਬੁਦ੍ਧਸ੍ਸ ਪਤ੍ਤਂ ਪੂਰੇਸਿ, ਤਂ ਓਭਾਸਂ ਮੁਞ੍ਚਿ. ਸਾ ਤਂ ਦਿਸ੍ਵਾ ਪਤ੍ਥਨਂ ਪਟ੍ਠਪੇਸਿ – ‘‘ਭਨ੍ਤੇ, ਇਮਿਨਾ ਦਾਨਬਲੇਨ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਮੇ ਸਰੀਰਂ ਓਭਾਸਜਾਤਂ ਹੋਤੁ, ਉਤ੍ਤਮਰੂਪਧਰਾ ਚ ਭਵੇਯ੍ਯਂ, ਇਮਿਨਾ ਚ ਮੇ ਅਸਪ੍ਪੁਰਿਸੇਨ ਸਦ੍ਧਿਂ ਏਕਟ੍ਠਾਨੇ ਵਾਸੋ ਮਾ ਅਹੋਸੀ’’ਤਿ. ਇਤਿ ਸਾ ਇਮਿਸ੍ਸਾ ਪੁਬ੍ਬਪਤ੍ਥਨਾਯ ਵਸੇਨ ਤਂ ਨ ਇਚ੍ਛਿ. ਬੋਧਿਸਤ੍ਤੋਪਿ ਤਂ ਪੂਵ ਤਸ੍ਮਿਂ ਸਪ੍ਪਿਪਤ੍ਤੇ ਓਸੀਦਾਪੇਤ੍ਵਾ ਪਤ੍ਥਨਂ ਪਟ੍ਠਪੇਸਿ – ‘‘ਭਨ੍ਤੇ, ਇਮਂ ਯੋਜਨਸਤੇ ਵਸਨ੍ਤਿਮ੍ਪਿ ਆਨੇਤ੍ਵਾ ਮਮ ਪਾਦਪਰਿਚਾਰਿਕਂ ਕਾਤੁਂ ਸਮਤ੍ਥੋ ਭਵੇਯ੍ਯ’’ਨ੍ਤਿ. ਤਤ੍ਥ ਯਂ ਸੋ ਕੁਦ੍ਧੋ ਗਨ੍ਤ੍ਵਾ ਪੂਵਂ ਗਣ੍ਹਿ, ਤਸ੍ਸ ਪੁਬ੍ਬਕਮ੍ਮਸ੍ਸ ਵਸੇਨ ਵਿਰੂਪੋ ਅਹੋਸਿ, ਪੁਬ੍ਬਪਤ੍ਥਨਾਯ ਸਾ ਚ ਤਂ ਨ ਇਚ੍ਛੀਤਿ.

ਸੋ ਪਭਾਵਤਿਯਾ ਗਤਾਯ ਸੋਕਪ੍ਪਤ੍ਤੋ ਅਹੋਸਿ, ਨਾਨਾਕਾਰੇਹਿ ਪਰਿਚਾਰਯਮਾਨਾਪਿ ਨਂ ਸੇਸਿਤ੍ਥਿਯੋ ਓਲੋਕਾਪੇਤੁਮ੍ਪਿ ਨਾਸਕ੍ਖਿਂਸੁ,, ਪਭਾਵਤਿਰਹਿਤਮਸ੍ਸ ਸਕਲਮ੍ਪਿ ਨਿਵੇਸਨਂ ਤੁਚ੍ਛਂ ਵਿਯ ਖਾਯਿ. ਸੋ ‘‘ਇਦਾਨਿ ਸਾਗਲਨਗਰਂ ਪਤ੍ਤਾ ਭਵਿਸ੍ਸਤੀ’’ਤਿ ਪਚ੍ਚੂਸਸਮਯੇ ਮਾਤੁ ਸਨ੍ਤਿਕਂ ਗਨ੍ਤ੍ਵਾ, ‘‘ਅਮ੍ਮ, ਅਹਂ ਪਭਾਵਤਿਂ ਆਨੇਸ੍ਸਾਮਿ, ਤੁਮ੍ਹੇ ਰਜ੍ਜਂ ਅਨੁਸਾਸਥਾ’’ਤਿ ਵਦਨ੍ਤੋ ਪਠਮਂ ਗਾਥਮਾਹ –

੧. ‘‘ਇਦਂ ਤੇ ਰਟ੍ਠਂ ਸਧਨਂ ਸਯੋਗ੍ਗਂ, ਸਕਾਯੁਰਂ ਸਬ੍ਬਕਾਮੂਪਪਨ੍ਨਂ;

ਇਦਂ ਤੇ ਰਜ੍ਜਂ ਅਨੁਸਾਸ ਅਮ੍ਮ, ਗਚ੍ਛਾਮਹਂ ਯਤ੍ਥ ਪਿਯਾ ਪਭਾਵਤੀ’’ਤਿ.

ਤਤ੍ਥ ਸਯੋਗ੍ਗਨ੍ਤਿ ਹਤ੍ਥਿਯੋਗ੍ਗਾਦਿਸਹਿਤਂ. ਸਕਾਯੁਰਨ੍ਤਿ ਸਪਞ੍ਚਰਾਜਕਕੁਧਭਣ੍ਡਂ. ਅਨੁਸਾਸ, ਅਮ੍ਮਾਤਿ ਸੋ ਕਿਰ ਪੁਰਿਸਸ੍ਸ ਰਜ੍ਜਂ ਦਤ੍ਵਾ ਪੁਨ ਗਣ੍ਹਨਂ ਨਾਮ ਨ ਯੁਤ੍ਤਨ੍ਤਿ ਪਿਤੁ ਵਾ ਭਾਤੁ ਵਾ ਅਨਿਯ੍ਯਾਦੇਤ੍ਵਾ ਮਾਤੁ ਨਿਯ੍ਯਾਦੇਨ੍ਤੋ ਏਵਮਾਹ.

ਸਾ ਤਸ੍ਸ ਕਥਂ ਸੁਤ੍ਵਾ ‘‘ਤੇਨ ਹਿ, ਤਾਤ, ਅਪ੍ਪਮਤ੍ਤੋ ਭਵੇਯ੍ਯਾਸਿ, ਮਾਤੁਗਾਮੋ ਨਾਮ ਅਪਰਿਸੁਦ੍ਧਹਦਯੋ’’ਤਿ ਵਤ੍ਵਾ ਨਾਨਗ੍ਗਰਸਭੋਜਨਸ੍ਸ ਸੁਵਣ੍ਣਕਰੋਟਿਂ ਪੂਰੇਤ੍ਵਾ ‘‘ਇਦਂ ਅਨ੍ਤਰਾਮਗ੍ਗੇ ਭੁਞ੍ਜੇਯ੍ਯਾਸੀ’’ਤਿ ਵਤ੍ਵਾ ਉਯ੍ਯੋਜੇਸਿ. ਸੋ ਤਂ ਆਦਾਯ ਮਾਤਰਂ ਵਨ੍ਦਿਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ‘‘ਜੀਵਨ੍ਤੋ ਪੁਨ ਤੁਮ੍ਹੇ ਪਸ੍ਸਿਸ੍ਸਾਮੀ’’ਤਿ ਵਤ੍ਵਾ ਸਿਰਿਗਬ੍ਭਂ ਪਵਿਸਿਤ੍ਵਾ ਪਞ੍ਚਾਵੁਧਂ ਸਨ੍ਨਯ੍ਹਿਤ੍ਵਾ ਭਤ੍ਤਕਰੋਟਿਯਾ ਸਦ੍ਧਿਂ ਕਹਾਪਣਸਹਸ੍ਸਂ ਪਸਿਬ੍ਬਕੇ ਕਤ੍ਵਾ ਕੋਕਨੁਦਞ੍ਚ ਵੀਣਂ ਆਦਾਯ ਨਗਰਾ ਨਿਕ੍ਖਮਿਤ੍ਵਾ ਮਗ੍ਗਂ ਪਟਿਪਜ੍ਜਿਤ੍ਵਾ ਮਹਬ੍ਬਲੋ ਮਹਾਥਾਮੋ ਯਾਵ ਮਜ੍ਝਨ੍ਹਿਕਾ ਪਣ੍ਣਾਸ ਯੋਜਨਾਨਿ ਗਨ੍ਤ੍ਵਾ ਭਤ੍ਤਂ ਭੁਞ੍ਜਿਤ੍ਵਾ ਸੇਸਦਿਵਸਭਾਗੇਨ ਪੁਨ ਪਣ੍ਣਾਸ ਯੋਜਨਾਨਿ ਗਨ੍ਤ੍ਵਾ ਏਕਾਹੇਨੇਵ ਯੋਜਨਸਤਿਕਂ ਮਗ੍ਗਂ ਖੇਪੇਤ੍ਵਾ ਸਾਯਨ੍ਹਸਮਯੇ ਨ੍ਹਤ੍ਵਾ ਸਾਗਲਨਗਰਂ ਪਾਵਿਸਿ. ਤਸ੍ਮਿਂ ਪਵਿਟ੍ਠਮਤ੍ਤੇਯੇਵ ਤਸ੍ਸ ਤੇਜੇਨ ਪਭਾਵਤੀ ਸਯਨਪਿਟ੍ਠੇ ਸਣ੍ਠਾਤੁਂ ਅਸਕ੍ਕੋਨ੍ਤੀ ਓਤਰਿਤ੍ਵਾ ਭੂਮਿਯਂ ਨਿਪਜ੍ਜਿ. ਬੋਧਿਸਤ੍ਤਂ ਕਿਲਨ੍ਤਿਨ੍ਦ੍ਰਿਯਂ ਵੀਥਿਯਾ ਗਚ੍ਛਨ੍ਤਂ ਅਞ੍ਞਤਰਾ ਇਤ੍ਥੀ ਦਿਸ੍ਵਾ ਪਕ੍ਕੋਸਾਪੇਤ੍ਵਾ ਨਿਸੀਦਾਪੇਤ੍ਵਾ ਪਾਦੇ ਧੋਵਾਪੇਤ੍ਵਾ ਸਯਨਂ ਦਾਪੇਸਿ. ਸੋ ਕਿਲਨ੍ਤਕਾਯੋ ਨਿਪਜ੍ਜਿਤ੍ਵਾ ਨਿਦ੍ਦਂ ਓਕ੍ਕਮਿ.

ਅਥ ਸਾ ਤਸ੍ਮਿਂ ਨਿਦ੍ਦਮੁਪਗਤੇ ਭਤ੍ਤਂ ਸਮ੍ਪਾਦੇਤ੍ਵਾ ਤਂ ਪਬੋਧੇਤ੍ਵਾ ਭਤ੍ਤਂ ਭੋਜੇਸਿ. ਸੋ ਤੁਟ੍ਠੋ ਤਸ੍ਸਾ ਸਦ੍ਧਿਂ ਭਤ੍ਤਕਰੋਟਿਯਾ ਕਹਾਪਣਸਹਸ੍ਸਂ ਅਦਾਸਿ. ਸੋ ਪਞ੍ਚਾਵੁਧਂ ਤਤ੍ਥੇਵ ਠਪੇਤ੍ਵਾ ‘‘ਗਨ੍ਤਬ੍ਬਟ੍ਠਾਨਂ ਮੇ ਅਤ੍ਥੀ’’ਤਿ ਵਤ੍ਵਾ ਵੀਣਂ ਆਦਾਯ ਹਤ੍ਥਿਸਾਲਂ ਗਨ੍ਤ੍ਵਾ ‘‘ਅਜ੍ਜ ਮੇ ਇਧ ਵਸਿਤੁਂ ਦੇਥ, ਗਨ੍ਧਬ੍ਬਂ ਵੋ ਕਰਿਸ੍ਸਾਮੀ’’ਤਿ ਵਤ੍ਵਾ ਹਤ੍ਥਿਗੋਪਕੇਹਿ ਅਨੁਞ੍ਞਾਤੋ ਏਕਮਨ੍ਤੇ ਨਿਪਜ੍ਜਿਤ੍ਵਾ ਥੋਕਂ ਨਿਦ੍ਦਾਯਿਤ੍ਵਾ ਪਟਿਪ੍ਪਸ੍ਸਦ੍ਧਦਰਥੋ ਉਟ੍ਠਾਯ ਵੀਣਂ ਮੁਞ੍ਚਿਤ੍ਵਾ ‘‘ਸਾਗਲਨਗਰਵਾਸਿਨੋ ਇਮਂ ਸਦ੍ਦਂ ਸੁਣਨ੍ਤੂ’’ਤਿ ਵੀਣਂ ਵਾਦੇਨ੍ਤੋ ਗਾਯਿ. ਪਭਾਵਤੀ ਭੂਮਿਯਂ ਨਿਪਨ੍ਨਾ ਤਂ ਸਦ੍ਦਂ ਸੁਤ੍ਵਾਵ ‘‘ਅਯਂ ਨ ਅਞ੍ਞਸ੍ਸ ਵੀਣਾਸਦ੍ਦੋ, ਨਿਸ੍ਸਂਸਯਂ ਕੁਸਰਾਜਾ ਮਮਤ੍ਥਾਯ ਆਗਤੋ’’ਤਿ ਅਞ੍ਞਾਸਿ. ਮਦ੍ਦਰਾਜਾਪਿ ਤਂ ਸਦ੍ਦਂ ਸੁਤ੍ਵਾ ‘‘ਅਤਿਵਿਯ ਮਧੁਰਂ ਵਾਦੇਤਿ, ਸ੍ਵੇ ਏਤਂ ਪਕ੍ਕੋਸਾਪੇਤ੍ਵਾ ਮਮ ਗਨ੍ਧਬ੍ਬਂ ਕਾਰੇਸ੍ਸਾਮੀ’’ਤਿ ਚਿਨ੍ਤੇਸਿ.

ਬੋਧਿਸਤ੍ਤੋ ‘‘ਨ ਸਕ੍ਕਾ ਇਧ ਵਸਮਾਨੇਨ ਪਭਾਵਤੀ ਦਟ੍ਠੁਂ, ਅਟ੍ਠਾਨਮੇਤ’’ਨ੍ਤਿ ਪਾਤੋਵ ਨਿਕ੍ਖਮਿਤ੍ਵਾ ਸਾਯਂ ਭੁਤ੍ਤਗੇਹੇਯੇਵ ਪਾਤਰਾਸਂ ਭੁਞ੍ਜਿਤ੍ਵਾ ਵੀਣਂ ਠਪੇਤ੍ਵਾ ਰਾਜਕੁਮ੍ਭਕਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸ ਅਨ੍ਤੇਵਾਸਿਕਭਾਵਂ ਉਪਗਨ੍ਤ੍ਵਾ ਏਕਦਿਵਸੇਨੇਵ ਘਰਂ ਮਤ੍ਤਿਕਾਯ ਪੂਰੇਤ੍ਵਾ ‘‘ਭਾਜਨਾਨਿ ਕਰੋਮਿ ਆਚਰਿਯਾ’’ਤਿ ਵਤ੍ਵਾ, ‘‘ਆਮ, ਕਾਰੋਹੀ’’ਤਿ ਵੁਤ੍ਤੇ ਏਕਂ ਮਤ੍ਤਿਕਾਪਿਣ੍ਡਂ ਚਕ੍ਕੇ ਠਪੇਤ੍ਵਾ ਚਕ੍ਕਂ ਆਵਿਞ੍ਛਿ, ਸਕਿਂ ਆਵਿਦ੍ਧਮੇਵ ਯਾਵ ਮਜ੍ਝਨ੍ਹਿਕਾਤਿਕ੍ਕਮਾ ਭਮਿਯੇਵ. ਸੋ ਨਾਨਾਵਣ੍ਣਾਨਿ ਖੁਦ੍ਦਕਮਹਨ੍ਤਾਨਿ ਭਾਜਨਾਨਿ ਕਤ੍ਵਾ ਪਭਾਵਤਿਯਾ ਅਤ੍ਥਾਯ ਭਾਜਨਂ ਕਰੋਨ੍ਤੋ ਨਾਨਾਰੂਪਾਨਿ ਸਮੁਟ੍ਠਾਪੇਸਿ. ਬੋਧਿਸਤ੍ਤਾਨਞ੍ਹਿ ਅਧਿਪ੍ਪਾਯੋ ਨਾਮ ਸਮਿਜ੍ਝਤਿ, ‘‘ਤਾਨਿ ਰੂਪਾਨਿ ਪਭਾਵਤੀਯੇਵ ਪਸ੍ਸਤੂ’’ਤਿ ਅਧਿਟ੍ਠਾਸਿ. ਸੋ ਸਬ੍ਬਭਾਜਨਾਨਿ ਸੁਕ੍ਖਾਪੇਤ੍ਵਾ ਪਚਿਤ੍ਵਾ ਗੇਹਂ ਪੂਰੇਸਿ. ਕੁਮ੍ਭਕਾਰੋ ਨਾਨਾਭਾਜਨਾਨਿ ਗਹੇਤ੍ਵਾ ਰਾਜਕੁਲਂ ਅਗਮਾਸਿ. ਰਾਜਾ ਦਿਸ੍ਵਾ ‘‘ਕੇਨਿਮਾਨਿ ਕਤਾਨੀ’’ਤਿ ਪੁਚ੍ਛਿ. ‘‘ਮਯਾ, ਦੇਵਾ’’ਤਿ. ‘‘ਅਹਂ ਤਯਾ ਕਤਾਨਿ ਜਾਨਾਮਿ, ਕਥੇਹਿ, ਕੇਨ ਕਤਾਨੀ’’ਤਿ? ‘‘ਅਨ੍ਤੇਵਾਸਿਕੇਨ ਮੇ ਦੇਵਾ’’ਤਿ. ‘‘ਨ ਤੇ ਸੋ ਅਨ੍ਤੇਵਾਸੀ, ਆਚਰਿਯੋ ਤੇ ਸੋ, ਤ੍ਵਂ ਤਸ੍ਸ ਸਨ੍ਤਿਕੇ ਸਿਪ੍ਪਂ ਸਿਕ੍ਖ, ਇਤੋ ਪਟ੍ਠਾਯ ਚ ਸੋ ਮਮ ਧੀਤਾਨਂ ਭਾਜਨਾਨਿ ਕਰੋਤੁ, ਇਮਞ੍ਚਸ੍ਸ ਸਹਸ੍ਸਂ ਦੇਹੀ’’ਤਿ ਸਹਸ੍ਸਂ ਦਾਪੇਤ੍ਵਾ ‘‘ਨਾਨਾਵਣ੍ਣਾਨਿ ਇਮਾਨਿ ਖੁਦ੍ਦਕਭਾਜਨਾਨਿ ਮਮ ਧੀਤਾਨਂ ਦੇਹੀ’’ਤਿ ਆਹ.

ਸੋ ਤਾਨਿ ਤਾਸਂ ਸਨ੍ਤਿਕਂ ਨੇਤ੍ਵਾ ‘‘ਇਮਾਨਿ ਵੋ ਕੀਲ਼ਨਤ੍ਥਾਯ ਖੁਦ੍ਦਕਭਾਜਨਾਨੀ’’ਤਿ ਆਹ. ਤਾ ਸਬ੍ਬਾ ਆਗਮਿਂਸੁ. ਕੁਮ੍ਭਕਾਰੋ ਮਹਾਸਤ੍ਤੇਨ ਪਭਾਵਤਿਯਾ ਅਤ੍ਥਾਯ ਕਤਭਾਜਨਮੇਵ ਤਸ੍ਸਾ ਅਦਾਸਿ. ਸਾ ਚ ਭਾਜਨਂ ਗਹੇਤ੍ਵਾ ਤਤ੍ਥ ਅਤ੍ਤਨੋ ਚ ਮਹਾਸਤ੍ਤਸ੍ਸ ਚ ਖੁਜ੍ਜਾਯ ਚ ਰੂਪਂ ਪਸ੍ਸਿਤ੍ਵਾ ‘‘ਇਦਂ ਨ ਅਞ੍ਞੇਨ ਕਤਂ, ਕੁਸਰਾਜੇਨੇਵ ਕਤ’’ਨ੍ਤਿ ਞਤ੍ਵਾ ਕੁਜ੍ਝਿਤ੍ਵਾ ਭੂਮਿਯਂ ਖਿਪਿਤ੍ਵਾ ‘‘ਇਮਿਨਾ ਮਯ੍ਹਂ ਅਤ੍ਥੋ ਨਤ੍ਥਿ, ਇਚ੍ਛਨ੍ਤਾਨਂ ਦੇਹੀ’’ਤਿ ਆਹ. ਅਥਸ੍ਸਾ ਭਗਿਨਿਯੋ ਕੁਦ੍ਧਭਾਵਂ ਞਤ੍ਵਾ ‘‘ਖੁਦ੍ਦਕਭਾਜਨਂ ਕੁਸਰਞ੍ਞਾ ਕਤਨ੍ਤਿ ਮਞ੍ਞਸਿ, ਇਦਂ ਤੇਨ ਨ ਕਤਂ, ਕੁਮ੍ਭਕਾਰੇਨੇਵ ਕਤਂ, ਗਣ੍ਹਾਹਿ ਨ’’ਨ੍ਤਿ ਅਵਹਸਿਂਸੁ. ਸਾ ਤੇਨ ਕਤਭਾਵਂ ਤਸ੍ਸ ਚ ਆਗਤਭਾਵਂ ਤਾਸਂ ਨ ਕਥੇਸਿ. ਕੁਮ੍ਭਕਾਰੋ ਸਹਸ੍ਸਂ ਬੋਧਿਸਤ੍ਤਸ੍ਸ ਦਤ੍ਵਾ ‘‘ਤਾਤ, ਰਾਜਾ ਤੇ ਤੁਟ੍ਠੋ, ਇਤੋ ਕਿਰ ਪਟ੍ਠਾਯ ਰਾਜਧੀਤਾਨਂ ਭਾਜਨਾਨਿ ਕਰੇਯ੍ਯਾਸਿ, ਅਹਂ ਤਾਸਂ ਹਰਿਸ੍ਸਾਮੀ’’ਤਿ ਆਹ.

ਸੋ ‘‘ਇਧਾਪਿ ਵਸਨ੍ਤੇਨ ਨ ਸਕ੍ਕਾ ਪਭਾਵਤੀ ਦਟ੍ਠੁ’’ਨ੍ਤਿ ਤਂ ਸਹਸ੍ਸਂ ਤਸ੍ਸੇਵ ਦਤ੍ਵਾ ਰਾਜੁਪਟ੍ਠਾਕਸ੍ਸ ਨਲ਼ਕਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸ ਅਨ੍ਤੇਵਾਸਿਕੋ ਹੁਤ੍ਵਾ ਪਭਾਵਤਿਯਾ ਅਤ੍ਥਾਯ ਤਾਲਵਣ੍ਟਂ ਕਤ੍ਵਾ ਤਤ੍ਥੇਵ ਸੇਤਚ੍ਛਤ੍ਤਞ੍ਚ ਆਪਾਨਭੂਮਿਞ੍ਚ ਵਤ੍ਥਂ ਗਹੇਤ੍ਵਾ ਠਿਤਂ ਪਭਾਵਤਿਞ੍ਚਾਤਿ ਨਾਨਾਰੂਪਾਨਿ ਦਸ੍ਸੇਸਿ. ਨਲ਼ਕਾਰੋ ਤਞ੍ਚ ਅਞ੍ਞਞ੍ਚ ਤੇਨ ਕਤਭਣ੍ਡਕਂ ਆਦਾਯ ਰਾਜਕੁਲਂ ਅਗਮਾਸਿ. ਰਾਜਾ ਦਿਸ੍ਵਾ ‘‘ਕੇਨਿਮਾਨਿ ਕਤਾਨੀ’’ਤਿ ਪੁਚ੍ਛਿਤ੍ਵਾ ਪੁਰਿਮਨਯੇਨੇਵ ਸਹਸ੍ਸਂ ਦਤ੍ਵਾ ‘‘ਇਮਾਨਿ ਨਲ਼ਕਾਰਭਣ੍ਡਾਨਿ ਮਮ ਧੀਤਾਨਂ ਦੇਹੀ’’ਤਿ ਆਹ. ਸੋਪਿ ਬੋਧਿਸਤ੍ਤੇਨ ਪਭਾਵਤਿਯਾ ਅਤ੍ਥਾਯ ਕਤਂ ਤਾਲਵਣ੍ਟਂ ਤਸ੍ਸਾਯੇਵ ਅਦਾਸਿ. ਤਤ੍ਰਪਿ ਰੂਪਾਨਿ ਅਞ੍ਞੋ ਜਨੋ ਨ ਪਸ੍ਸਤਿ, ਪਭਾਵਤੀ ਪਨ ਦਿਸ੍ਵਾ ਕੁਸਰਞ੍ਞਾ ਕਤਭਾਵਂ ਞਤ੍ਵਾ ‘‘ਗਣ੍ਹਿਤੁਕਾਮਾ ਗਣ੍ਹਨ੍ਤੂ’’ਤਿ ਕੁਦ੍ਧਾ ਭੂਮਿਯਂ ਖਿਪਿ. ਅਥ ਨਂ ਸੇਸਾ ਅਵਹਸਿਂਸੁ. ਨਲ਼ਕਾਰੋ ਸਹਸ੍ਸਂ ਆਹਰਿਤ੍ਵਾ ਬੋਧਿਸਤ੍ਤਸ੍ਸ ਦਤ੍ਵਾ ਤਂ ਪਵਤ੍ਤਿਂ ਆਰੋਚੇਸਿ.

ਸੋ ‘‘ਇਦਮ੍ਪਿ ਮਯ੍ਹਂ ਅਵਸਨਟ੍ਠਾਨ’’ਨ੍ਤਿ ਸਹਸ੍ਸਂ ਤਸ੍ਸੇਵ ਦਤ੍ਵਾ ਰਾਜਮਾਲਾਕਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਨ੍ਤੇਵਾਸਿਕਭਾਵਂ ਉਪਗਨ੍ਤ੍ਵਾ ਨਾਨਾਵਿਧਂ ਮਾਲਾਵਿਕਤਿਂ ਗਨ੍ਥਿਤ੍ਵਾ ਪਭਾਵਤਿਯਾ ਅਤ੍ਥਾਯ ਨਾਨਾਰੂਪਵਿਚਿਤ੍ਰਂ ਏਕਂ ਚੁਮ੍ਬਟਕਂ ਅਕਾਸਿ. ਮਾਲਾਕਾਰੋ ਤਂ ਸਬ੍ਬਂ ਆਦਾਯ ਰਾਜਕੁਲਂ ਅਗਮਾਸਿ. ਰਾਜਾ ਦਿਸ੍ਵਾ ‘‘ਕੇਨਿਮਾਨਿ ਗਨ੍ਥਿਤਾਨੀ’’ਤਿ ਪੁਚ੍ਛਿ. ‘‘ਮਯਾ, ਦੇਵਾ’’ਤਿ. ‘‘ਅਹਂ ਤਯਾ ਗਨ੍ਥਿਤਾਨਿ ਜਾਨਾਮਿ, ਕਥੇਹਿ, ਕੇਨ ਗਨ੍ਥਿਤਾਨੀ’’ਤਿ? ‘‘ਅਨ੍ਤੇਵਾਸਿਕੇਨ ਮੇ, ਦੇਵਾ’’ਤਿ. ‘‘ਨ ਸੋ ਅਨ੍ਤੇਵਾਸੀ, ਆਚਰਿਯੋ ਤੇ ਸੋ, ਤ੍ਵਂ ਤਸ੍ਸ ਸਨ੍ਤਿਕੇ ਸਿਪ੍ਪਂ ਸਿਕ੍ਖ, ਇਤੋ ਪਟ੍ਠਾਯ ਚ ਸੋ ਮਮ ਧੀਤਾਨਂ ਪੁਪ੍ਫਾਨਿ ਗਨ੍ਥਤੁ, ਇਮਞ੍ਚਸ੍ਸ ਸਹਸ੍ਸਂ ਦੇਹੀ’’ਤਿ ਸਹਸ੍ਸਂ ਦਤ੍ਵਾ ‘‘ਇਮਾਨਿ ਪੁਪ੍ਫਾਨਿ ਮਮ ਧੀਤਾਨਂ ਦੇਹੀ’’ਤਿ ਆਹ. ਸੋਪਿ ਬੋਧਿਸਤ੍ਤੇਨ ਪਭਾਵਤਿਯਾ ਅਤ੍ਥਾਯ ਕਤਂ ਚੁਮ੍ਬਟਕਂ ਤਸ੍ਸਾਯੇਵ ਅਦਾਸਿ. ਸਾ ਤਤ੍ਥ ਅਤ੍ਤਨੋ ਚ ਰਞ੍ਞੋ ਚ ਰੂਪੇਹਿ ਸਦ੍ਧਿਂ ਨਾਨਾਰੂਪਾਨਿ ਦਿਸ੍ਵਾ ਤੇਨ ਕਤਭਾਵਂ ਞਤ੍ਵਾ ਕੁਜ੍ਝਿਤ੍ਵਾ ਭੂਮਿਯਂ ਖਿਪਿ. ਸੇਸਾ ਭਗਿਨਿਯੋ ਤਂ ਤਥੇਵ ਅਵਹਸਿਂਸੁ. ਮਾਲਾਕਾਰੋਪਿ ਸਹਸ੍ਸਂ ਆਹਰਿਤ੍ਵਾ ਬੋਧਿਸਤ੍ਤਸ੍ਸ ਦਤ੍ਵਾ ਤਂ ਪਵਤ੍ਤਿਂ ਆਰੋਚੇਸਿ.

ਸੋ ‘‘ਇਦਮ੍ਪਿ ਮਯ੍ਹਂ ਅਵਸਨਟ੍ਠਾਨ’’ਨ੍ਤਿ ਸਹਸ੍ਸਂ ਤਸ੍ਸੇਵ ਦਤ੍ਵਾ ਰਞ੍ਞੋ ਸੂਦਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਨ੍ਤੇਵਾਸਿਕਭਾਵਂ ਉਪਗਚ੍ਛਿ. ਅਥੇਕਦਿਵਸਂ ਸੂਦੋ ਰਞ੍ਞੋ ਭੋਜਨਵਿਕਤਿਂ ਹਰਨ੍ਤੋ ਅਤ੍ਤਨੋ ਅਤ੍ਥਾਯ ਪਚਿਤੁਂ ਬੋਧਿਸਤ੍ਤਸ੍ਸ ਅਟ੍ਠਿਮਂਸਂ ਅਦਾਸਿ. ਸੋ ਤਂ ਤਥਾ ਸਮ੍ਪਾਦੇਸਿ, ਯਥਾਸ੍ਸ ਗਨ੍ਧੋ ਸਕਲਨਗਰਂ ਅਵਤ੍ਥਰਿ. ਰਾਜਾ ਤਂ ਘਾਯਿਤ੍ਵਾ ‘‘ਕਿਂ ਤੇ ਮਹਾਨਸੇ ਅਞ੍ਞਮ੍ਪਿ ਮਂਸਂ ਪਚਸੀ’’ਤਿ ਪੁਚ੍ਛਿ. ‘‘ਨਤ੍ਥਿ, ਦੇਵ, ਅਪਿਚ ਖੋ ਪਨ ਮੇ ਅਨ੍ਤੇਵਾਸਿਕਸ੍ਸ ਅਟ੍ਠਿਮਂਸਂ ਪਚਨਤ੍ਥਾਯ ਦਿਨ੍ਨਂ, ਤਸ੍ਸੇਵ ਸੋ ਗਨ੍ਧੋ ਭਵਿਸ੍ਸਤੀ’’ਤਿ. ਰਾਜਾ ਆਹਰਾਪੇਤ੍ਵਾ ਤਤੋ ਥੋਕਂ ਜਿਵ੍ਹਗ੍ਗੇ ਠਪੇਸਿ, ਤਾਵਦੇਵ ਸਤ੍ਤ ਰਸਹਰਣਿਸਹਸ੍ਸਾਨਿ ਖੋਭੇਨ੍ਤਂ ਫਰਿ. ਰਾਜਾ ਰਸਤਣ੍ਹਾਯ ਬਜ੍ਝਿਤ੍ਵਾ ਸਹਸ੍ਸਂ ਦਤ੍ਵਾ ‘‘ਇਤੋ ਪਟ੍ਠਾਯ ਤਵ ਅਨ੍ਤੇਵਾਸਿਨਾ ਮਮ ਚ ਧੀਤਾਨਞ੍ਚ ਮੇ ਭਤ੍ਤਂ ਪਚਾਪੇਤ੍ਵਾ ਤ੍ਵਂ ਮਯ੍ਹਂ ਆਹਰ, ਸੋ ਮੇ ਧੀਤਾਨਂ ਹਰਤੂ’’ਤਿ ਆਹ. ਸੂਦੋ ਗਨ੍ਤ੍ਵਾ ਤਸ੍ਸ ਆਰੋਚੇਸਿ. ਸੋ ਤਂ ਸੁਤ੍ਵਾ ‘‘ਇਦਾਨਿ ਮੇ ਮਨੋਰਥੋ ਮਤ੍ਥਕਂ ਪਤ੍ਤੋ, ਇਦਾਨਿ ਪਨਾਹਂ ਪਭਾਵਤਿਂ ਦਟ੍ਠੁਂ ਲਭਿਸ੍ਸਾਮੀ’’ਤਿ ਤੁਟ੍ਠੋ ਤਂ ਸਹਸ੍ਸਂ ਤਸ੍ਸੇਵ ਦਤ੍ਵਾ ਪੁਨਦਿਵਸੇ ਭਤ੍ਤਂ ਸਮ੍ਪਾਦੇਤ੍ਵਾ ਰਞ੍ਞੋ ਭਤ੍ਤਭਾਜਨਾਨਿ ਪੇਸੇਤ੍ਵਾ ਰਾਜਧੀਤਾਨਂ ਭਤ੍ਤਕਾਜਂ ਸਯਂ ਗਹੇਤ੍ਵਾ ਪਭਾਵਤਿਯਾ ਵਸਨਪਾਸਾਦਂ ਅਭਿਰੁਹਿ. ਸਾ ਤਂ ਭਤ੍ਤਕਾਜਂ ਆਦਾਯ ਪਾਸਾਦਂ ਅਭਿਰੁਹਨ੍ਤਂ ਦਿਸ੍ਵਾ ਚਿਨ੍ਤੇਸਿ – ‘‘ਅਯਂ ਅਤ੍ਤਨੋ ਅਨਨੁਚ੍ਛਵਿਕਂ ਦਾਸਕਮ੍ਮਕਰੇਹਿ ਕਤ੍ਤਬ੍ਬਂ ਕਰੋਤਿ. ਸਚੇ ਪਨਾਹਂ ਕਤਿਪਾਹਂ ਤੁਣ੍ਹੀ ਭਵਿਸ੍ਸਾਮਿ, ‘ਇਦਾਨਿ ਮਂ ਏਸਾ ਰੋਚਤੀ’ਤਿ ਸਞ੍ਞੀ ਹੁਤ੍ਵਾ ਕਤ੍ਥਚਿ ਅਗਨ੍ਤ੍ਵਾ ਮਂ ਓਲੋਕੇਨ੍ਤੋ ਇਧੇਵ ਵਸਿਸ੍ਸਤਿ, ਇਦਾਨੇਵ ਤਂ ਅਕ੍ਕੋਸਿਤ੍ਵਾ ਪਰਿਭਾਸਿਤ੍ਵਾ ਮੁਹੁਤ੍ਤਮ੍ਪਿ ਇਧ ਵਸਿਤੁਂ ਅਦਤ੍ਵਾ ਪਲਾਪੇਸ੍ਸਾਮੀ’’ਤਿ. ਸਾ ਦ੍ਵਾਰਂ ਅਡ੍ਢਵਿਵਟਂ ਕਤ੍ਵਾ ਏਕਂ ਹਤ੍ਥਂ ਕਵਾਟੇ ਲਗ੍ਗੇਤ੍ਵਾ ਏਕੇਨ ਹਤ੍ਥੇਨ ਅਗ੍ਗਲ਼ਂ ਉਪ੍ਪੀਲ਼ੇਤ੍ਵਾ ਦੁਤਿਯਂ ਗਾਥਮਾਹ –

੨. ‘‘ਅਨੁਜ੍ਜੁਭੂਤੇਨ ਹਰਂ ਮਹਨ੍ਤਂ, ਦਿਵਾ ਚ ਰਤ੍ਤੋ ਚ ਨਿਸੀਥਕਾਲੇ;

ਪਟਿਗਚ੍ਛ ਤ੍ਵਂ ਖਿਪ੍ਪਂ ਕੁਸਾਵਤਿਂ ਕੁਸ, ਨਿਚ੍ਛਾਮਿ ਦੁਬ੍ਬਣ੍ਣਮਹਂ ਵਸਨ੍ਤ’’ਨ੍ਤਿ.

ਤਸ੍ਸਤ੍ਥੋ – ਮਹਾਰਾਜ, ਤ੍ਵਂ ਭਤ੍ਤਕਾਰਕੋ ਹੁਤ੍ਵਾ ਉਜੁਕੇਨ ਚਿਤ੍ਤੇਨ ਯੋਪਿ ਤੇ ਸੀਸਂ ਭਿਨ੍ਦੇਯ੍ਯ, ਤਸ੍ਸਪੇਤਂ ਕਮ੍ਮਂ ਨ ਕਰੋਸਿ, ਅਨੁਜੁਭੂਤੇਨ ਪਨ ਚਿਤ੍ਤੇਨ ਮਮਤ੍ਥਾਯ ਏਤਂ ਮਹਨ੍ਤਂ ਕਾਜਂ ਹਰਨ੍ਤੋ ਦਿਵਾ ਚ ਰਤ੍ਤੋ ਚ ਨਿਸੀਥਕਾਲੇ ਚ ਮਹਨ੍ਤਂ ਦੁਕ੍ਖਂ ਅਨੁਭਵਿਸ੍ਸਸਿ, ਕਿਂ ਤੇ ਤੇਨ ਅਨੁਭੂਤੇਨ ਦੁਕ੍ਖੇਨ, ਤ੍ਵਂ ਅਤ੍ਤਨੋ ਨਗਰਂ ਕੁਸਾਵਤਿਮੇਵ ਪਟਿਗਚ੍ਛ, ਅਞ੍ਞਂ ਅਤ੍ਤਨਾ ਸਦਿਸਿਂ ਅਤਿਰਸਕਪੂਵਸਣ੍ਠਾਨਮੁਖਿਂ ਯਕ੍ਖਿਨਿਂ ਅਗ੍ਗਮਹੇਸਿਂ ਕਤ੍ਵਾ ਰਜ੍ਜਂ ਕਾਰੇਹੀਤਿ. ਨਿਚ੍ਛਾਮਿ ਦੁਬ੍ਬਣ੍ਣਮਹਂ ਵਸਨ੍ਤਨ੍ਤਿ ਅਹਂ ਪਨ ਤਂ ਦੁਬ੍ਬਣ੍ਣਂ ਦੁਸ੍ਸਣ੍ਠਿਤਂ ਇਧ ਵਸਨ੍ਤਂ ਨ ਇਚ੍ਛਾਮੀਤਿ.

ਸੋ ‘‘ਪਭਾਵਤਿਯਾ ਮੇ ਸਨ੍ਤਿਕਾ ਕਥਾ ਲਦ੍ਧਾ’’ਤਿ ਤੁਟ੍ਠਚਿਤ੍ਤੋ ਤਿਸ੍ਸੋ ਗਾਥਾ ਅਭਾਸਿ –

੩. ‘‘ਨਾਹਂ ਗਮਿਸ੍ਸਾਮਿ ਇਤੋ ਕੁਸਾਵਤਿਂ, ਪਭਾਵਤੀ ਵਣ੍ਣਪਲੋਭਿਤੋ ਤਵ;

ਰਮਾਮਿ ਮਦ੍ਦਸ੍ਸ ਨਿਕੇਤਰਮ੍ਮੇ, ਹਿਤ੍ਵਾਨ ਰਟ੍ਠਂ ਤਵ ਦਸ੍ਸਨੇ ਰਤੋ.

੪. ‘‘ਪਭਾਵਤੀ ਵਣ੍ਣਪਲੋਭਿਤੋ ਤਵ, ਸਮ੍ਮੂਲ਼੍ਹਰੂਪੋ ਵਿਚਰਾਮਿ ਮੇਦਿਨਿਂ;

ਦਿਸਂ ਨ ਜਾਨਾਮਿ ਕੁਤੋਮ੍ਹਿ ਆਗਤੋ, ਤਯਮ੍ਹਿ ਮਤ੍ਤੋ ਮਿਗਮਨ੍ਦਲੋਚਨੇ.

੫. ‘‘ਸੁਵਣ੍ਣਚੀਰਵਸਨੇ, ਜਾਤਰੂਪਸੁਮੇਖਲੇ;

ਸੁਸ੍ਸੋਣਿ ਤਵ ਕਾਮਾ ਹਿ, ਨਾਹਂ ਰਜ੍ਜੇਨ ਮਤ੍ਥਿਕੋ’’ਤਿ.

ਤਤ੍ਥ ਰਮਾਮੀਤਿ ਅਭਿਰਮਾਮਿ ਨ ਉਕ੍ਕਣ੍ਠਾਮਿ. ਸਮ੍ਮੂਲ਼੍ਹਰੂਪੋਤਿ ਕਿਲੇਸਸਮ੍ਮੂਲ਼੍ਹੋ ਹੁਤ੍ਵਾ. ਤਯਮ੍ਹਿ ਮਤ੍ਤੋਤਿ ਤਯਿ ਮਤ੍ਤੋਮ੍ਹਿ, ਤਯਾ ਵਾ ਮਤ੍ਤੋਮ੍ਹਿ. ਸੁਵਣ੍ਣਚੀਰਵਸਨੇਤਿ ਸੁਵਣ੍ਣਖਚਿਤਵਤ੍ਥਵਸਨੇ. ਨਾਹਂ ਰਜ੍ਜੇਨ ਮਤ੍ਥਿਕੋਤਿ ਨ ਅਹਂ ਰਜ੍ਜੇਨ ਅਤ੍ਥਿਕੋ.

ਏਵਂ ਵੁਤ੍ਤੇ ਸਾ ਚਿਨ੍ਤੇਸਿ – ‘‘ਅਹਂ ਏਤਂ ‘ਵਿਪ੍ਪਟਿਸਾਰੀ ਭਵਿਸ੍ਸਤੀ’ਤਿ ਪਰਿਭਾਸਾਮਿ, ਅਯਂ ਪਨ ਰਜ੍ਜਿਤ੍ਵਾਵ ਕਥੇਤਿ, ਸਚੇ ਖੋ ਪਨ ਮਂ ‘ਅਹਂ ਕੁਸਰਾਜਾ’ਤਿ ਵਤ੍ਵਾ ਹਤ੍ਥੇ ਗਣ੍ਹੇਯ੍ਯ, ਕੋ ਤਂ ਨਿਵਾਰੇਯ੍ਯ, ਕੋਚਿ ਨੋ ਇਮਂ ਕਥਂ ਸੁਣੇਯ੍ਯਾ’’ਤਿ ਦ੍ਵਾਰਂ ਥਕੇਤ੍ਵਾ ਸੂਚਿਂ ਦਤ੍ਵਾ ਅਨ੍ਤੋ ਅਟ੍ਠਾਸਿ. ਸੋਪਿ ਭਤ੍ਤਕਾਜਂ ਆਹਰਿਤ੍ਵਾ ਭਤ੍ਤਂ ਵਡ੍ਢੇਤ੍ਵਾ ਰਾਜਧੀਤਰੋ ਭੋਜੇਸਿ. ਪਭਾਵਤੀ ‘‘ਗਚ੍ਛ ਕੁਸਰਾਜੇਨ ਪਕ੍ਕਭਤ੍ਤਂ ਆਹਰਾ’’ਤਿ ਖੁਜ੍ਜਂ ਪੇਸੇਸਿ. ਸਾ ਆਹਰਿਤ੍ਵਾ ‘‘ਭੁਞ੍ਜਾਹੀ’’ਤਿ ਆਹ. ਨਾਹਂ ਤੇਨ ਪਕ੍ਕਭਤ੍ਤਂ ਭੁਞ੍ਜਾਮਿ, ਤ੍ਵਂ ਭੁਞ੍ਜਿਤ੍ਵਾ ਅਤ੍ਤਨੋ ਲਦ੍ਧਨਿਵਾਪਂ ਗਹੇਤ੍ਵਾ ਭਤ੍ਤਂ ਪਚਿਤ੍ਵਾ ਆਹਰ, ਕੁਸਰਞ੍ਞੋ ਆਗਤਭਾਵਞ੍ਚ ਮਾ ਕਸ੍ਸਚਿ ਆਰੋਚੇਸੀਤਿ. ਖੁਜ੍ਜਾ ਤਤੋ ਪਟ੍ਠਾਯ ਤਸ੍ਸਾ ਕੋਟ੍ਠਾਸਂ ਆਹਰਿਤ੍ਵਾ ਸਯਂ ਭੁਞ੍ਜਤਿ, ਅਤ੍ਤਨੋ ਕੋਟ੍ਠਾਸਂ ਤਸ੍ਸਾ ਉਪਨੇਤਿ. ਕੁਸਰਾਜਾਪਿ ਤਤੋ ਪਟ੍ਠਾਯ ਤਂ ਪਸ੍ਸਿਤੁਂ ਅਲਭਨ੍ਤੋ ਚਿਨ੍ਤੇਸਿ – ‘‘ਅਤ੍ਥਿ ਨੁ ਖੋ ਪਭਾਵਤਿਯਾ ਮਯਿ ਸਿਨੇਹੋ, ਉਦਾਹੁ ਨਤ੍ਥਿ, ਵੀਮਂਸਿਸ੍ਸਾਮਿ ਨ’’ਨ੍ਤਿ. ਸੋ ਪਨ ਰਾਜਧੀਤਰੋ ਭੋਜੇਤ੍ਵਾ ਭਤ੍ਤਕਾਜਂ ਆਦਾਯ ਨਿਕ੍ਖਨ੍ਤੋ ਤਸ੍ਸਾ ਗਬ੍ਭਦ੍ਵਾਰੇ ਪਾਸਾਦਤਲਂ ਪਾਦੇਨ ਪਹਰਿਤ੍ਵਾ ਭਾਜਨਾਨਿ ਘਟ੍ਟੇਤ੍ਵਾ ਨਿਤ੍ਥੁਨਿਤ੍ਵਾ ਵਿਸਞ੍ਞੀ ਹੁਤ੍ਵਾ ਵਿਯ ਅਵਕੁਜ੍ਜੋ ਪਤਿ. ਸਾ ਤਸ੍ਸ ਨਿਤ੍ਥੁਨਿਤਸਦ੍ਦੇਨ ਦ੍ਵਾਰਂ ਵਿਵਰਿਤ੍ਵਾ ਤਂ ਭਤ੍ਤਕਾਜੇਨ ਓਤ੍ਥਤਂ ਦਿਸ੍ਵਾ ਚਿਨ੍ਤੇਸਿ – ‘‘ਅਯਂ ਸਕਲਜਮ੍ਬੁਦੀਪੇ ਅਗ੍ਗਰਾਜਾ ਮਂ ਨਿਸ੍ਸਾਯ ਰਤ੍ਤਿਨ੍ਦਿਵਂ ਦੁਕ੍ਖਂ ਅਨੁਭੋਤਿ, ਸੁਖੁਮਾਲਤਾਯ ਭਤ੍ਤਕਾਜੇਨ ਅਵਤ੍ਥਤੋ ਪਤਤਿ, ਜੀਵਤਿ ਨੁ ਖੋ, ਨੋ ਵਾ’’ਤਿ. ਸਾ ਗਬ੍ਭਤੋ ਨਿਕ੍ਖਮਿਤ੍ਵਾ ਤਸ੍ਸ ਨਾਸਵਾਤਂ ਉਪਧਾਰੇਤੁਂ ਗੀਵਂ ਪਸਾਰੇਤ੍ਵਾ ਮੁਖਂ ਓਲੋਕੇਸਿ. ਸੋ ਮੁਖਪੂਰਂ ਖੇਲ਼ਂ ਗਹੇਤ੍ਵਾ ਤਸ੍ਸਾ ਸਰੀਰੇ ਪਾਤੇਸਿ. ਸਾ ਤਂ ਪਰਿਭਾਸਿਤ੍ਵਾ ਗਬ੍ਭਂ ਪਵਿਸਿਤ੍ਵਾ ਦ੍ਵਾਰਂ ਅਡ੍ਢਵਿਵਟਂ ਥਕੇਤ੍ਵਾ ਠਿਤਾ ਗਾਥਮਾਹ –

੬. ‘‘ਅਬ੍ਭੂਤਿ ਤਸ੍ਸ ਭੋ ਹੋਤਿ, ਯੋ ਅਨਿਚ੍ਛਨ੍ਤਮਿਚ੍ਛਤਿ;

ਅਕਾਮਂ ਰਾਜ ਕਾਮੇਸਿ, ਅਕਨ੍ਤਂ ਕਨ੍ਤੁਮਿਚ੍ਛਸੀ’’ਤਿ.

ਤਤ੍ਥ ਅਬ੍ਭੂਤੀਤਿ ਅਭੂਤਿ, ਅਵੁਡ੍ਢੀਤਿ ਅਤ੍ਥੋ.

ਸੋ ਪਨ ਪਟਿਬਦ੍ਧਚਿਤ੍ਤਤਾਯ ਅਕ੍ਕੋਸਿਯਮਾਨੋਪਿ ਪਰਿਭਾਸਿਯਮਾਨੋਪਿ ਵਿਪ੍ਪਟਿਸਾਰਂ ਅਨੁਪ੍ਪਾਦੇਤ੍ਵਾਵ ਅਨਨ੍ਤਰਂ ਗਾਥਮਾਹ –

੭. ‘‘ਅਕਾਮਂ ਵਾ ਸਕਾਮਂ ਵਾ, ਯੋ ਨਰੋ ਲਭਤੇ ਪਿਯਂ;

ਲਾਭਮੇਤ੍ਥ ਪਸਂਸਾਮ, ਅਲਾਭੋ ਤਤ੍ਥ ਪਾਪਕੋ’’ਤਿ.

ਸਾਪਿ ਤਸ੍ਮਿਂ ਏਵਂ ਕਥੇਨ੍ਤੇਪਿ ਅਨੋਸਕ੍ਕਿਤ੍ਵਾ ਥਦ੍ਧਤਰਵਚਨਂ ਵਤ੍ਵਾ ਪਲਾਪੇਤੁਕਾਮਾ ਇਤਰਂ ਗਾਥਮਾਹ –

੮. ‘‘ਪਾਸਾਣਸਾਰਂ ਖਣਸਿ, ਕਣਿਕਾਰਸ੍ਸ ਦਾਰੁਨਾ;

ਵਾਤਂ ਜਾਲੇਨ ਬਾਧੇਸਿ, ਯੋ ਅਨਿਚ੍ਛਨ੍ਤਮਿਚ੍ਛਸੀ’’ਤਿ.

ਤਤ੍ਥ ਕਣਿਕਾਰਸ੍ਸ ਦਾਰੁਨਾਤਿ ਕਣਿਕਾਰਕਟ੍ਠੇਨ. ਬਾਧੇਸੀਤਿ ਬਨ੍ਧਸੀਤਿ.

ਤਂ ਸੁਤ੍ਵਾ ਰਾਜਾ ਤਿਸ੍ਸੋ ਗਾਥਾਯੋ ਅਭਾਸਿ –

੯. ‘‘ਪਾਸਾਣੋ ਨੂਨ ਤੇ ਹਦਯੇ, ਓਹਿਤੋ ਮੁਦੁਲਕ੍ਖਣੇ;

ਯੋ ਤੇ ਸਾਤਂ ਨ ਵਿਨ੍ਦਾਮਿ, ਤਿਰੋਜਨਪਦਾਗਤੋ.

੧੦. ‘‘ਯਦਾ ਮਂ ਭਕੁਟਿਂ ਕਤ੍ਵਾ, ਰਾਜਪੁਤ੍ਤੀ ਉਦਿਕ੍ਖਤਿ;

ਆਲ਼ਾਰਿਕੋ ਤਦਾ ਹੋਮਿ, ਰਞ੍ਞੋ ਮਦ੍ਦਸ੍ਸਨ੍ਤੇਪੁਰੇ.

੧੧. ‘‘ਯਦਾ ਉਮ੍ਹਯਮਾਨਾ ਮਂ, ਰਾਜਪੁਤ੍ਤੀ ਉਦਿਕ੍ਖਤਿ;

ਨਾਲ਼ਾਰਿਕੋ ਤਦਾ ਹੋਮਿ, ਰਾਜਾ ਹੋਮਿ ਤਦਾ ਕੁਸੋ’’ਤਿ.

ਤਤ੍ਥ ਮੁਦੁਲਕ੍ਖਣੇਤਿ ਮੁਦੁਨਾ ਇਤ੍ਥਿਲਕ੍ਖਣੇਨ ਸਮਨ੍ਨਾਗਤੇ. ਯੋਤਿ ਯੋ ਅਹਂ ਤਿਰੋਰਟ੍ਠਾ ਆਗਤੋ ਤਵ ਸਨ੍ਤਿਕੇ ਵਸਨ੍ਤੋ ਪਟਿਸਨ੍ਥਾਰਮਤ੍ਤਮ੍ਪਿ ਸਾਤਂ ਨ ਲਭਾਮਿ, ਸੋ ਏਵਂ ਮਞ੍ਞਾਮਿ, ਮਯਿ ਸਿਨੇਹੁਪ੍ਪਤ੍ਤਿਨਿਵਾਰਣਾਯ ਨੂਨ ਤਵ ਹਦਯੇ ਪਾਸਾਣੋ ਠਪਿਤੋ. ਭਕੁਟਿਂ ਕਤ੍ਵਾਤਿ ਕੋਧਵਸੇਨ ਵਲਿਵਿਸਮਂ ਨਲਾਟਂ ਕਤ੍ਵਾ. ਆਲ਼ਾਰਿਕੋਤਿ ਭਤ੍ਤਕਾਰਕੋ. ਤਸ੍ਮਿਂ ਖਣੇ ਅਹਂ ਮਦ੍ਦਰਞ੍ਞੋ ਅਨ੍ਤੇਪੁਰੇ ਭਤ੍ਤਕਾਰਕਦਾਸੋ ਵਿਯ ਹੋਮੀਤਿ ਵਦਤਿ. ਉਮ੍ਹਯਮਾਨਾਤਿ ਪਹਟ੍ਠਾਕਾਰਂ ਦਸ੍ਸੇਤ੍ਵਾ ਹਸਮਾਨਾ. ਰਾਜਾ ਹੋਮੀਤਿ ਤਸ੍ਮਿਂ ਖਣੇ ਅਹਂ ਕੁਸਾਵਤੀਨਗਰੇ ਰਜ੍ਜਂ ਕਾਰੇਨ੍ਤੋ ਰਾਜਾ ਵਿਯ ਹੋਮਿ, ਕਸ੍ਮਾਸਿ ਏਵਂ ਫਰੁਸਾ, ਇਤੋ ਪਟ੍ਠਾਯ ਮਾ ਏਵਰੂਪਂ ਕਰਿ, ਭਦ੍ਦੇਤਿ.

ਸਾ ਤਸ੍ਸ ਵਚਨਂ ਸੁਤ੍ਵਾ ਚਿਨ੍ਤੇਸਿ – ‘‘ਅਯਂ ਅਤਿਵਿਯ ਅਲ੍ਲੀਯਿਤ੍ਵਾ ਕਥੇਤਿ, ਮੁਸਾਵਾਦਂ ਕਤ੍ਵਾ ਉਪਾਯੇਨ ਨਂ ਇਤੋ ਪਲਾਪੇਸ੍ਸਾਮੀ’’ਤਿ ਗਾਥਮਾਹ –

੧੨. ‘‘ਸਚੇ ਹਿ ਵਚਨਂ ਸਚ੍ਚਂ, ਨੇਮਿਤ੍ਤਾਨਂ ਭਵਿਸ੍ਸਤਿ;

ਨੇਵ ਮੇ ਤ੍ਵਂ ਪਤੀ ਅਸ੍ਸ, ਕਾਮਂ ਛਿਨ੍ਦਨ੍ਤੁ ਸਤ੍ਤਧਾ’’ਤਿ.

ਤਸ੍ਸਤ੍ਥੋ – ਮਹਾਰਾਜ, ਮਯਾ ‘‘ਅਯਂ ਕੁਸਰਾਜਾ ਮਯ੍ਹਂ ਪਤਿ ਭਵਿਸ੍ਸਤਿ, ਨ ਭਵਿਸ੍ਸਤੀ’’ਤਿ ਬਹੂ ਨਿਮਿਤ੍ਤਪਾਠਕਾ ਪੁਚ੍ਛਿਤਾ, ਤੇ ‘‘ਕਾਮਂ ਕਿਰ ਮਂ ਸਤ੍ਤਧਾ ਛਿਨ੍ਦਨ੍ਤੁ, ਨੇਵ ਮੇ ਤ੍ਵਂ ਪਤਿ ਭਵਿਸ੍ਸਸੀ’’ਤਿ ਵਦਿਂਸੂਤਿ.

ਤਂ ਸੁਤ੍ਵਾ ਰਾਜਾ ਤਂ ਪਟਿਬਾਹਨ੍ਤੋ ‘‘ਭਦ੍ਦੇ, ਮਯਾਪਿ ਅਤ੍ਤਨੋ ਰਟ੍ਠੇ ਨੇਮਿਤ੍ਤਕਾ ਪੁਚ੍ਛਿਤਾ, ਤੇ ‘ਅਞ੍ਞਤ੍ਰ ਸੀਹਸ੍ਸਰਕੁਸਰਾਜਤੋ ਤਵ ਪਤਿ ਨਾਮ ਅਞ੍ਞੋ ਨਤ੍ਥੀ’ਤਿ ਬ੍ਯਾਕਰਿਂਸੁ, ਅਹਮ੍ਪਿ ਅਤ੍ਤਨੋ ਞਾਣਬਲਨਿਮਿਤ੍ਤੇਨ ਏਵਮੇਵ ਕਥੇਸਿ’’ਨ੍ਤਿ ਵਤ੍ਵਾ ਅਨਨ੍ਤਰਂ ਗਾਥਮਾਹ –

੧੩. ‘‘ਸਚੇ ਹਿ ਵਚਨਂ ਸਚ੍ਚਂ, ਅਞ੍ਞੇਸਂ ਯਦਿ ਵਾ ਮਮ;

ਨੇਵ ਤੁਯ੍ਹਂ ਪਤੀ ਅਤ੍ਥਿ, ਅਞ੍ਞੋ ਸੀਹਸ੍ਸਰਾ ਕੁਸਾ’’ਤਿ.

ਤਸ੍ਸਤ੍ਥੋ – ਯਦਿ ਹਿ ਅਞ੍ਞੇਸਂ ਨੇਮਿਤ੍ਤਾਨਂ ਵਚਨਂ ਸਚ੍ਚਂ, ਯਦਿ ਵਾ ਮਮ ਵਚਨਂ ਸਚ੍ਚਂ, ਤਵ ਅਞ੍ਞੋ ਪਤਿ ਨਾਮ ਨਤ੍ਥੀਤਿ.

ਸਾ ਤਸ੍ਸ ਵਚਨਂ ਸੁਤ੍ਵਾ ‘‘ਨ ਸਕ੍ਕਾ ਇਮਂ ਲਜ੍ਜਾਪੇਤੁਂ ਵਾ ਪਲਾਪੇਤੁਂ ਵਾ, ਕਿਂ ਮੇ ਇਮਿਨਾ’’ਤਿ ਦ੍ਵਾਰਂ ਪਿਧਾਯ ਅਤ੍ਤਾਨਂ ਨ ਦਸ੍ਸੇਸਿ. ਸੋਪਿ ਕਾਜਂ ਗਹੇਤ੍ਵਾ ਓਤਰਿ, ਤਤੋ ਪਟ੍ਠਾਯ ਤਂ ਦਟ੍ਠੁਂ ਨ ਲਭਤਿ, ਭਤ੍ਤਕਾਰਕਕਮ੍ਮਂ ਕਰੋਨ੍ਤੋ ਅਤਿਵਿਯ ਕਿਲਮਤਿ, ਭੁਤ੍ਤਪਾਤਰਾਸੋ ਦਾਰੂਨਿ ਫਾਲੇਤਿ, ਭਾਜਨਾਨਿ ਧੋਵਤਿ, ਕਾਜੇਨ ਉਦਕਂ ਆਹਰਤਿ, ਸਯਨ੍ਤੋ ਅਮ੍ਬਣਪਿਟ੍ਠੇ ਸਯਤਿ, ਪਾਤੋ ਵੁਟ੍ਠਾਯ ਯਾਗੁਆਦੀਨਿ ਪਚਤਿ ਹਰਤਿ ਭੋਜੇਤਿ, ਨਨ੍ਦਿਰਾਗਂ ਨਿਸ੍ਸਾਯ ਅਤਿਦੁਕ੍ਖਂ ਅਨੁਭੋਤਿ. ਸੋ ਏਕਦਿਵਸਂ ਭਤ੍ਤਗੇਹਦ੍ਵਾਰੇਨ ਗਚ੍ਛਨ੍ਤਿਂ ਖੁਜ੍ਜਂ ਦਿਸ੍ਵਾ ਪਕ੍ਕੋਸਿ. ਸਾ ਪਭਾਵਤਿਯਾ ਭਯੇਨ ਤਸ੍ਸ ਸਨ੍ਤਿਕਂ ਗਨ੍ਤੁਂ ਅਵਿਸਹਨ੍ਤੀ ਤੁਰਿਤਤੁਰਿਤਾ ਵਿਯ ਗਚ੍ਛਤਿ. ਅਥ ਨਂ ਵੇਗੇਨ ਉਪਗਨ੍ਤ੍ਵਾ ‘‘ਖੁਜ੍ਜੇ’’ਤਿ ਆਹ.

ਸਾ ਨਿਵਤ੍ਤਿਤ੍ਵਾ ਠਿਤਾ ‘‘ਕੋ ਏਸੋ’’ਤਿ ਵਤ੍ਵਾ ‘‘ਤੁਮ੍ਹਾਕਂ ਸਦ੍ਦਂ ਨ ਸੁਣਾਮੀ’’ਤਿ ਆਹ. ਅਥ ਨਂ ‘‘ਖੁਜ੍ਜੇ ਤ੍ਵਮ੍ਪਿ ਸਾਮਿਨੀਪਿ ਤੇ ਉਭੋਪਿ ਅਤਿਵਿਯ ਥਦ੍ਧਾ, ਏਤ੍ਤਕਂ ਕਾਲਂ ਤੁਮ੍ਹਾਕਂ ਸਨ੍ਤਿਕੇ ਵਸਨ੍ਤੋ ਆਰੋਗ੍ਯਸਾਸਨਮਤ੍ਤਮ੍ਪਿ ਨ ਲਭਾਮਿ, ਦੇਯ੍ਯਧਮ੍ਮਂ ਪਨ ਕਿਂ ਦਸ੍ਸਥ, ਤਿਟ੍ਠਤੁ ਤਾਵੇਤਂ, ਅਪਿ ਮੇ ਪਭਾਵਤਿਂ ਮੁਦੁਕਂ ਕਤ੍ਵਾ ਦਸ੍ਸੇਤੁਂ ਸਕ੍ਖਿਸ੍ਸਸੀ’’ਤਿ ਆਹ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਅਥ ਨਂ ‘‘ਸਚੇ ਮੇ ਤਂ ਦਸ੍ਸੇਤੁਂ ਸਕ੍ਖਿਸ੍ਸਸਿ, ਖੁਜ੍ਜਭਾਵਂ ਤੇ ਉਜੁਕਂ ਕਤ੍ਵਾ ਗੀਵੇਯ੍ਯਕਂ ਦਸ੍ਸਾਮੀ’’ਤਿ ਪਲੋਭੇਨ੍ਤੋ ਪਞ੍ਚ ਗਾਥਾਯੋ ਅਭਾਸਿ –

੧੪. ‘‘ਨੇਕ੍ਖਂ ਗੀਵਂ ਤੇ ਕਾਰੇਸ੍ਸਂ, ਪਤ੍ਵਾ ਖੁਜ੍ਜੇ ਕੁਸਾਵਤਿਂ;

ਸਚੇ ਮਂ ਨਾਗਨਾਸੂਰੂ, ਓਲੋਕੇਯ੍ਯ ਪਭਾਵਤੀ.

੧੫. ‘‘ਨੇਕ੍ਖਂ ਗੀਵਂ ਤੇ ਕਾਰੇਸ੍ਸਂ, ਪਤ੍ਵਾ ਖੁਜ੍ਜੇ ਕੁਸਾਵਤਿਂ;

ਸਚੇ ਮਂ ਨਾਗਨਾਸੂਰੂ, ਆਲਪੇਯ੍ਯ ਪਭਾਵਤੀ.

੧੬. ‘‘ਨੇਕ੍ਖਂ ਗੀਵਂ ਤੇ ਕਾਰੇਸ੍ਸਂ, ਪਤ੍ਵਾ ਖੁਜ੍ਜੇ ਕੁਸਾਵਤਿਂ;

ਸਚੇ ਮਂ ਨਾਗਨਾਸੂਰੂ, ਉਮ੍ਹਾਯੇਯ੍ਯ ਪਭਾਵਤੀ.

੧੭. ‘‘ਨੇਕ੍ਖਂ ਗੀਵਂ ਤੇ ਕਾਰੇਸ੍ਸਂ, ਪਤ੍ਵਾ ਖੁਜ੍ਜੇ ਕੁਸਾਵਤਿਂ;

ਸਚੇ ਮਂ ਨਾਗਨਾਸੂਰੂ, ਪਮ੍ਹਾਯੇਯ੍ਯ ਪਭਾਵਤੀ.

੧੮. ‘‘ਨੇਕ੍ਖਂ ਗੀਵਂ ਤੇ ਕਾਰੇਸ੍ਸਂ, ਪਤ੍ਵਾ ਖੁਜ੍ਜੇ ਕੁਸਾਵਤਿਂ;

ਸਚੇ ਮਂ ਨਾਗਨਾਸੂਰੂ, ਪਾਣੀਹਿ ਉਪਸਮ੍ਫੁਸੇ’’ਤਿ.

ਤਤ੍ਥ ਨੇਕ੍ਖਂ ਗੀਵਂ ਤੇਤਿ ਤਵ ਗੀਵੇਯ੍ਯਂ ਸਬ੍ਬਸੁਵਣ੍ਣਮਯਮੇਵ ਕਾਰੇਸ੍ਸਾਮੀਤਿ ਅਤ੍ਥੋ. ‘‘ਨੇਕ੍ਖਂ ਗੀਵਂ ਤੇ ਕਰਿਸ੍ਸਾਮੀ’’ਤਿਪਿ ਪਾਠੋ, ਤਵ ਗੀਵਾਯ ਨੇਕ੍ਖਮਯਂ ਪਿਲ਼ਨ੍ਧਨਂ ਪਿਲ਼ਨ੍ਧੇਸ੍ਸਾਮੀਤਿ ਅਤ੍ਥੋ. ਓਲੋਕੇਯ੍ਯਾਤਿ ਸਚੇ ਤਵ ਵਚਨੇਨ ਮਂ ਪਭਾਵਤੀ ਓਲੋਕੇਯ੍ਯ, ਸਚੇ ਮਂ ਤਾਯ ਓਲੋਕਾਪੇਤੁਂ ਸਕ੍ਖਿਸ੍ਸਸੀਤਿ ਅਤ੍ਥੋ. ‘‘ਆਲਪੇਯ੍ਯਾ’’ਤਿਆਦੀਸੁਪਿ ਏਸੇਵ ਨਯੋ. ਏਤ੍ਥ ਪਨ ਉਮ੍ਹਾਯੇਯ੍ਯਾਤਿ ਮਨ੍ਦਹਸਿਤਵਸੇਨ ਪਰਿਹਾਸੇਯ੍ਯ. ਪਮ੍ਹਾਯੇਯ੍ਯਾਤਿ ਮਹਾਹਸਿਤਵਸੇਨ ਪਰਿਹਾਸੇਯ੍ਯ.

ਸਾ ਤਸ੍ਸ ਵਚਨਂ ਸੁਤ੍ਵਾ ‘‘ਗਚ੍ਛਥ ਤੁਮ੍ਹੇ, ਦੇਵ, ਕਤਿਪਾਹਚ੍ਚਯੇਨ ਨਂ ਤੁਮ੍ਹਾਕਂ ਵਸੇ ਕਰਿਸ੍ਸਾਮਿ, ਪਸ੍ਸਥ ਮੇ ਪਰਕ੍ਕਮ’’ਨ੍ਤਿ ਵਤ੍ਵਾ ਤਂ ਕਰਣੀਯਂ ਤੀਰੇਤ੍ਵਾ ਪਭਾਵਤਿਯਾ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸਾ ਵਸਨਗਬ੍ਭਂ ਸੋਧੇਨ੍ਤੀ ਵਿਯ ਪਹਰਣਯੋਗ੍ਗਂ ਲੇਡ੍ਡੁਖਣ੍ਡਮ੍ਪਿ ਅਸੇਸੇਤ੍ਵਾ ਅਨ੍ਤਮਸੋ ਪਾਦੁਕਾਪਿ ਨੀਹਰਿਤ੍ਵਾ ਸਕਲਗਬ੍ਭਂ ਸਮ੍ਮਜ੍ਜਿਤ੍ਵਾ ਗਬ੍ਭਦ੍ਵਾਰੇ ਉਮ੍ਮਾਰਂ ਅਨ੍ਤਰਂ ਕਤ੍ਵਾ ਉਚ੍ਚਾਸਨਂ ਪਞ੍ਞਪੇਤ੍ਵਾ ਪਭਾਵਤਿਯਾ ਏਕਂ ਨੀਚਪੀਠਕਂ ਅਤ੍ਥਰਿਤ੍ਵਾ ‘‘ਏਹਿ, ਅਮ੍ਮ, ਸੀਸੇ ਤੇ ਊਕਾ ਵਿਚਿਨਿਸ੍ਸਾਮੀ’’ਤਿ ਤਂ ਤਤ੍ਥ ਪੀਠਕੇ ਨਿਸੀਦਾਪੇਤ੍ਵਾ ਅਤ੍ਤਨੋ ਊਰੁਅਨ੍ਤਰੇ ਤਸ੍ਸਾ ਸੀਸਂ ਠਪੇਤ੍ਵਾ ਥੋਕਂ ਕਣ੍ਡੁਯਿਤ੍ਵਾ ‘‘ਅਹੋ ਇਮਿਸ੍ਸਾ ਸੀਸੇ ਬਹੂ ਊਕਾ’’ਤਿ ਸਕਸੀਸਤੋ ਊਕਾ ਗਹੇਤ੍ਵਾ ਤਸ੍ਸਾ ਹਤ੍ਥੇ ਠਪੇਤ੍ਵਾ ‘‘ਪਸ੍ਸ ਕਿਤ੍ਤਕਾ ਤੇ ਸੀਸੇ ਊਕਾ’’ਤਿ ਪਿਯਕਥਂ ਕਥੇਤ੍ਵਾ ਮਹਾਸਤ੍ਤਸ੍ਸ ਗੁਣਂ ਕਥੇਨ੍ਤੀ ਗਾਥਮਾਹ –

੧੯. ‘‘ਨ ਹਿ ਨੂਨਾਯਂ ਰਾਜਪੁਤ੍ਤੀ, ਕੁਸੇ ਸਾਤਮ੍ਪਿ ਵਿਨ੍ਦਤਿ;

ਆਲ਼ਾਰਿਕੇ ਭਤੇ ਪੋਸੇ, ਵੇਤਨੇਨ ਅਨਤ੍ਥਿਕੇ’’ਤਿ.

ਤਸ੍ਸਤ੍ਥੋ – ਏਕਂਸੇਨ ਅਯਂ ਰਾਜਪੁਤ੍ਤੀ ਪੁਬ੍ਬੇ ਕੁਸਾਵਤੀਨਗਰੇ ਕੁਸਨਰਿਨ੍ਦਸ੍ਸ ਸਨ੍ਤਿਕੇ ਮਾਲਾਗਨ੍ਧਵਿਲੇਪਨਵਤ੍ਥਾਲਙ੍ਕਾਰਵਸੇਨ ਅਪ੍ਪਮਤ੍ਤਕਮ੍ਪਿ ਸਾਤਂ ਨ ਵਿਨ੍ਦਤਿ ਨ ਲਭਤਿ, ਤਮ੍ਬੂਲਮਤ੍ਤਮ੍ਪਿ ਏਤੇਨ ਏਤਿਸ੍ਸਾ ਦਿਨ੍ਨਪੁਬ੍ਬਂ ਨ ਭਵਿਸ੍ਸਤਿ. ਕਿਂਕਾਰਣਾ? ਇਤ੍ਥਿਯੋ ਨਾਮ ਏਕਦਿਵਸਮ੍ਪਿ ਅਙ੍ਕਂ ਅਵਤ੍ਥਰਿਤ੍ਵਾ ਨਿਪਨ੍ਨਸਾਮਿਕਮ੍ਹਿ ਹਦਯਂ ਭਿਨ੍ਦਿਤੁਂ ਨ ਸਕ੍ਕੋਨ੍ਤਿ, ਅਯਂ ਪਨ ਆਲ਼ਾਰਿਕੇ ਭਤੇ ਪੋਸੇ ਆਲ਼ਾਰਿਕਤ੍ਤਞ੍ਚ ਭਤਕਤ੍ਤਞ੍ਚ ਉਪਗਤੇ ਏਤਸ੍ਮਿਂ ਪੁਰਿਸੇ ਮੂਲੇਨਪਿ ਅਨਤ੍ਥਿਕੇ ਕੇਵਲਂ ਤਂਯੇਵ ਨਿਸ੍ਸਾਯ ਰਜ੍ਜਂ ਪਹਾਯ ਆਗਨ੍ਤ੍ਵਾ ਏਵਂ ਦੁਕ੍ਖਂ ਅਨੁਭਵਨ੍ਤੇ ਪਟਿਸਨ੍ਥਾਰਮਤ੍ਤਮ੍ਪਿ ਨ ਕਰੋਤਿ, ਸਚੇਪਿ ਤੇ, ਅਮ੍ਮ, ਤਸ੍ਮਿਂ ਸਿਨੇਹੋ ਨਤ੍ਥਿ, ਸਕਲਜਮ੍ਬੁਦੀਪੇ ਅਗ੍ਗਰਾਜਾ ਮਂ ਨਿਸ੍ਸਾਯ ਕਿਲਮਤੀਤਿ ਤਸ੍ਸ ਕਿਞ੍ਚਿਦੇਵ ਦਾਤੁਂ ਅਰਹਸੀਤਿ.

ਸਾ ਤਂ ਸੁਤ੍ਵਾ ਖੁਜ੍ਜਾਯ ਕੁਜ੍ਝਿ. ਅਥ ਨਂ ਖੁਜ੍ਜਾ ਗੀਵਾਯਂ ਗਹੇਤ੍ਵਾ ਅਨ੍ਤੋਗਬ੍ਭੇ ਖਿਪਿਤ੍ਵਾ ਸਯਂ ਬਹਿ ਹੁਤ੍ਵਾ ਦ੍ਵਾਰਂ ਪਿਧਾਯ ਆਵਿਞ੍ਛਨਰਜ੍ਜੁਮ੍ਹਿ ਓਲਮ੍ਬਨ੍ਤੀ ਅਟ੍ਠਾਸਿ. ਪਭਾਵਤੀ ਤਂ ਗਹੇਤੁਂ ਅਸਕ੍ਕੋਨ੍ਤੀ ਦ੍ਵਾਰਮੂਲੇ ਠਤ੍ਵਾ ਅਕ੍ਕੋਸਨ੍ਤੀ ਇਤਰਂ ਗਾਥਮਾਹ –

੨੦. ‘‘ਨ ਹਿ ਨੂਨਾਯਂ ਸਾ ਖੁਜ੍ਜਾ, ਲਭਤਿ ਜਿਵ੍ਹਾਯ ਛੇਦਨਂ;

ਸੁਨਿਸਿਤੇਨ ਸਤ੍ਥੇਨ, ਏਵਂ ਦੁਬ੍ਭਾਸਿਤਂ ਭਣ’’ਨ੍ਤਿ.

ਤਤ੍ਥ ਸੁਨਿਸਿਤੇਨਾਤਿ ਸੁਟ੍ਠੁ ਨਿਸਿਤੇਨ ਤਿਖਿਣਸਤ੍ਥੇਨ. ਏਵਂ ਦੁਬ੍ਭਾਸਿਤਨ੍ਤਿ ਏਵਂ ਅਸੋਤਬ੍ਬਯੁਤ੍ਤਕਂ ਦੁਬ੍ਭਾਸਿਤਂ ਭਣਨ੍ਤੀ.

ਅਥ ਖੁਜ੍ਜਾ ਆਵਿਞ੍ਚਨਰਜ੍ਜੁਂ ਗਹੇਤ੍ਵਾ ਠਿਤਾਵ ‘‘ਨਿਪ੍ਪਞ੍ਞੇ ਦੁਬ੍ਬਿਨੀਤੇ ਤਵ ਰੂਪਂ ਕਿਂ ਕਰਿਸ੍ਸਤਿ, ਕਿਂ ਮਯਂ ਤਵ ਰੂਪਂ ਖਾਦਿਤ੍ਵਾ ਯਾਪੇਸ੍ਸਾਮਾ’’ਤਿ ਵਤ੍ਵਾ ਤੇਰਸਹਿ ਗਾਥਾਹਿ ਬੋਧਿਸਤ੍ਤਸ੍ਸ ਗੁਣਂ ਪਕਾਸੇਨ੍ਤੀ ਖੁਜ੍ਜਾਗਜ੍ਜਿਤਂ ਨਾਮ ਗਜ੍ਜਿ –

੨੧. ‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਹਾਯਸੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੨. ‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਹਦ੍ਧਨੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੩. ‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਹਬ੍ਬਲੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੪. ‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਹਾਰਟ੍ਠੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੫. ‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਹਾਰਾਜਾਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੬. ‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਸੀਹਸ੍ਸਰੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੭. ‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਵਗ੍ਗੁਸ੍ਸਰੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੮. ‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਬਿਨ੍ਦੁਸ੍ਸਰੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੨੯. ‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਞ੍ਜੁਸ੍ਸਰੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੩੦. ‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਮਧੁਸ੍ਸਰੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੩੧. ‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਸਤਸਿਪ੍ਪੋਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੩੨. ‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਖਤ੍ਤਿਯੋਤਿਪਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯਂ.

੩੩. ‘‘ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ ਪਭਾਵਤਿ;

ਕੁਸਰਾਜਾਤਿ ਕਤ੍ਵਾਨ, ਕਰਸ੍ਸੁ ਰੁਚਿਰੇ ਪਿਯ’’ਨ੍ਤਿ.

ਤਤ੍ਥ ਮਾ ਨਂ ਰੂਪੇਨ ਪਾਮੇਸਿ, ਆਰੋਹੇਨ, ਪਭਾਵਤੀਤਿ ਅਰੇ ਪਭਾਵਤਿ, ਮਾ ਤ੍ਵਂ ਏਤਂ ਕੁਸਨਰਿਨ੍ਦਂ ਅਤ੍ਤਨੋ ਰੂਪੇਨ ਆਰੋਹਪਰਿਣਾਹੇਨ ਪਮਿਨਿ, ਏਵਂ ਪਮਾਣਂ ਗਣ੍ਹਿ. ਮਹਾਯਸੋਤਿ ਮਹਾਨੁਭਾਵੋ ਸੋਤਿ ਏਵਂ ਹਦਯੇ ਕਤ੍ਵਾਨ ਰੁਚਿਰੇ ਪਿਯਦਸ੍ਸਨੇ ਕਰਸ੍ਸੁ ਤਸ੍ਸ ਪਿਯਂ. ਆਨੁਭਾਵੋਯੇਵ ਹਿਸ੍ਸ ਰੂਪਨ੍ਤਿ ਵਦਤਿ. ਏਸ ਨਯੋ ਸਬ੍ਬਤ੍ਥ. ਅਪਿ ਚ ਮਹਾਯਸੋਤਿ ਮਹਾਪਰਿਵਾਰੋ. ਮਹਦ੍ਧਨੋਤਿ ਮਹਾਭੋਗੋ. ਮਹਬ੍ਬਲੋਤਿ ਮਹਾਥਾਮੋ. ਮਹਾਰਟ੍ਠੋਤਿ ਵਿਪੁਲਰਟ੍ਠੋ. ਮਹਾਰਾਜਾਤਿ ਸਕਲਜਮ੍ਬੁਦੀਪੇ ਅਗ੍ਗਰਾਜਾ. ਸੀਹਸ੍ਸਰੋਤਿ ਸੀਹਸਦ੍ਦਸਮਾਨਸਦ੍ਦੋ. ਵਗ੍ਗੁਸ੍ਸਰੋਤਿ ਲੀਲਾਯੁਤ੍ਤਸ੍ਸਰੋ. ਬਿਨ੍ਦੁਸ੍ਸਰੋਤਿ ਸਮ੍ਪਿਣ੍ਡਿਤਘਨਸ੍ਸਰੋ. ਮਞ੍ਜੁਸ੍ਸਰੋਤਿ ਸੁਨ੍ਦਰਸ੍ਸਰੋ. ਮਧੁਸ੍ਸਰੋਤਿ ਮਧੁਰਯੁਤ੍ਤਸ੍ਸਰੋ. ਸਤਸਿਪ੍ਪੋਤਿ ਪਰੇਸਂ ਸਨ੍ਤਿਕੇ ਅਸਿਕ੍ਖਿਤ੍ਵਾ ਅਤ੍ਤਨੋ ਬਲੇਨੇਵ ਨਿਪ੍ਫਨ੍ਨਅਨੇਕਸਤਸਿਪ੍ਪੋ. ਖਤ੍ਤਿਯੋਤਿ ਓਕ੍ਕਾਕਪਵੇਣਿਯਂ ਜਾਤੋ ਅਸਮ੍ਭਿਨ੍ਨਖਤ੍ਤਿਯੋ. ਕੁਸਰਾਜਾਤਿ ਸਕ੍ਕਦਤ੍ਤਿਯਕੁਸਤਿਣਸਮਾਨਨਾਮੋ ਰਾਜਾ. ਏਵਰੂਪੋ ਹਿ ਅਞ੍ਞੋ ਰਾਜਾ ਨਾਮ ਨਤ੍ਥੀਤਿ ਜਾਨਿਤ੍ਵਾ ਏਤਸ੍ਸ ਪਿਯਂ ਕਰੋਹੀਤਿ ਖੁਜ੍ਜਾ ਏਤ੍ਤਕਾਹਿ ਗਾਥਾਹਿ ਤਸ੍ਸ ਗੁਣਂ ਕਥੇਸਿ.

ਪਭਾਵਤੀ ਤਸ੍ਸਾ ਵਚਨਂ ਸੁਤ੍ਵਾ ‘‘ਖੁਜ੍ਜੇ ਅਤਿਵਿਯ ਗਜ੍ਜਸਿ, ਹਤ੍ਥੇਨ ਪਾਪੁਣਨ੍ਤੀ ਸਸਾਮਿਕਭਾਵਂ ਤੇ ਜਾਨਾਪੇਸ੍ਸਾਮੀ’’ਤਿ ਖੁਜ੍ਜਂ ਤਜ੍ਜੇਸਿ. ਸਾਪਿ ਤਂ ‘‘ਅਹਂ ਤਂ ਰਕ੍ਖਮਾਨਾ ਪਿਤੁਨੋ ਤੇ ਕੁਸਰਾਜਸ੍ਸ ਆਗਤਭਾਵਂ ਨਾਰੋਚੇਸਿਂ, ਹੋਤੁ, ਅਜ੍ਜ ਰਞ੍ਞੋ ਆਰੋਚੇਸ੍ਸਾਮੀ’’ਤਿ ਮਹਨ੍ਤੇਨ ਸਦ੍ਦੇਨ ਭਾਯਾਪੇਸਿ. ਸਾਪਿ ‘‘ਕੋਚਿਦੇਵ ਸੁਣੇਯ੍ਯਾ’’ਤਿ ਖੁਜ੍ਜਂ ਸਞ੍ਞਾਪੇਸਿ. ਬੋਧਿਸਤ੍ਤੋਪਿ ਤਂ ਪਸ੍ਸਿਤੁਂ ਅਲਭਨ੍ਤੋ ਸਤ੍ਤ ਮਾਸੇ ਦੁਬ੍ਭੋਜਨੇਨ ਦੁਕ੍ਖਸੇਯ੍ਯਾਯ ਕਿਲਮਨ੍ਤੋ ਚਿਨ੍ਤੇਸਿ – ‘‘ਕੋ ਮੇ ਏਤਾਯ ਅਤ੍ਥੋ, ਸਤ੍ਤ ਮਾਸੇ ਵਸਨ੍ਤੋ ਏਤਂ ਪਸ੍ਸਿਤੁਮ੍ਪਿ ਨ ਲਭਾਮਿ, ਅਤਿਵਿਯ ਕਕ੍ਖਲ਼ਾ ਸਾਹਸਿਕਾ, ਗਨ੍ਤ੍ਵਾ ਮਾਤਾਪਿਤਰੋ ਪਸ੍ਸਿਸ੍ਸਾਮੀ’’ਤਿ. ਤਸ੍ਮਿਂ ਖਣੇ ਸਕ੍ਕੋ ਆਵਜ੍ਜੇਨ੍ਤੋ ਤਸ੍ਸ ਉਕ੍ਕਣ੍ਠਿਤਭਾਵਂ ਞਤ੍ਵਾ ‘‘ਰਾਜਾ ਸਤ੍ਤ ਮਾਸੇ ਪਭਾਵਤਿਂ ਦਟ੍ਠੁਮ੍ਪਿ ਨ ਲਭਿ, ਲਭਨਾਕਾਰਮਸ੍ਸ ਕਰਿਸ੍ਸਾਮੀ’’ਤਿ ਮਦ੍ਦਰਞ੍ਞੋ ਦੂਤੇ ਕਤ੍ਵਾ ਸਤ੍ਤਨ੍ਨਂ ਰਾਜੂਨਂ ਦੂਤਂ ਪਾਹੇਨ੍ਤੋ ‘‘ਪਭਾਵਤੀ, ਕੁਸਰਾਜਂ ਛਡ੍ਡੇਤ੍ਵਾ ਆਗਤਾ, ਆਗਚ੍ਛਨ੍ਤੁ ਪਭਾਵਤਿਂ ਗਣ੍ਹਨ੍ਤੂ’’ਤਿ ਏਕੇਕਸ੍ਸ ਵਿਸੁਂ ਵਿਸੁਂ ਸਾਸਨਂ ਪਹਿਣਿ. ਤੇ ਮਹਾਪਰਿਵਾਰੇਨ ਗਨ੍ਤ੍ਵਾ ਨਗਰਂ ਪਤ੍ਵਾ ਅਞ੍ਞਮਞ੍ਞਸ੍ਸ ਆਗਤਕਾਰਣਂ ਨ ਜਾਨਨ੍ਤਿ. ਤੇ ‘‘ਤ੍ਵਂ ਕਸ੍ਮਾ ਆਗਤੋ, ਤ੍ਵਂ ਕਸ੍ਮਾ ਆਗਤੋਸੀ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਞਤ੍ਵਾ ਕੁਜ੍ਝਿਤ੍ਵਾ ‘‘ਏਕਂ ਕਿਰ ਧੀਤਰਂ ਸਤ੍ਤਨ੍ਨਂ ਦਸ੍ਸਤਿ, ਪਸ੍ਸਥਸ੍ਸ ਅਨਾਚਾਰਂ, ਉਪ੍ਪਣ੍ਡੇਤਿ ਨੋ, ਗਣ੍ਹਥ ਨ’’ਨ੍ਤਿ ‘‘ਸਬ੍ਬੇਸਮ੍ਪਿ ਅਮ੍ਹਾਕਂ ਪਭਾਵਤਿਂ ਦੇਤੁ ਯੁਦ੍ਧਂ ਵਾ’’ਤਿ ਸਾਸਨਾਨਿ ਪਹਿਣਿਤ੍ਵਾ ਨਗਰਂ ਪਰਿਵਾਰਯਿਂਸੁ. ਮਦ੍ਦਰਾਜਾ ਸਾਸਨਂ ਸੁਤ੍ਵਾ ਭੀਤਤਸਿਤੋ ਅਮਚ੍ਚੇ ਆਮਨ੍ਤੇਤ੍ਵਾ ‘‘ਕਿਂ ਕਰੋਮਾ’’ਤਿ ਪੁਚ੍ਛਿ. ਅਥ ਨਂ ਅਮਚ੍ਚਾ ‘‘ਦੇਵ, ਸਤ੍ਤਪਿ ਰਾਜਾਨੋ ਪਭਾਵਤਿਂ ਨਿਸ੍ਸਾਯ ਆਗਤਾ, ‘ਸਚੇ ਨ ਦਸ੍ਸਤਿ, ਪਾਕਾਰਂ ਭਿਨ੍ਦਿਤ੍ਵਾ ਨਗਰਂ ਪਵਿਸਿਤ੍ਵਾ ਜੀਵਿਤਕ੍ਖਯਂ ਪਾਪੇਤ੍ਵਾ ਤਂ ਗਣ੍ਹਿਸ੍ਸਾਮਾ’ਤਿ ਵਦਨ੍ਤਿ, ਪਾਕਾਰੇ ਅਭਿਨ੍ਨੇਯੇਵ ਤੇਸਂ ਪਭਾਵਤਿਂ ਪੇਸੇਸ੍ਸਾਮਾ’’ਤਿ ਵਤ੍ਵਾ ਗਾਥਮਾਹਂਸੁ –

੩੪. ‘‘ਏਤੇ ਨਾਗਾ ਉਪਤ੍ਥਦ੍ਧਾ, ਸਬ੍ਬੇ ਤਿਟ੍ਠਨ੍ਤਿ ਵਮ੍ਮਿਤਾ;

ਪੁਰਾ ਮਦ੍ਦਨ੍ਤਿ ਪਾਕਾਰਂ, ਆਨੇਨ੍ਤੇਤਂ ਪਭਾਵਤਿ’’ਨ੍ਤਿ.

ਤਤ੍ਥ ਉਪਤ੍ਥਦ੍ਧਾਤਿ ਅਤਿਥਦ੍ਧਾ ਦਪ੍ਪਿਤਾ. ਆਨੇਨ੍ਤੇਤਂ ਪਭਾਵਤਿਨ੍ਤਿ ਆਨੇਨ੍ਤੁ ਏਤਂ ਪਭਾਵਤਿਨ੍ਤਿ ਸਾਸਨਾਨਿ ਪਹਿਣਿਂਸੁ. ਤਸ੍ਮਾ ਯਾਵ ਏਤੇ ਨਾਗਾ ਪਾਕਾਰਂ ਨ ਮਦ੍ਦਨ੍ਤਿ, ਤਾਵ ਨੇਸਂ ਪਭਾਵਤਿਂ ਪੇਸੇਹਿ, ਮਹਾਰਾਜਾਤਿ.

ਤਂ ਸੁਤ੍ਵਾ ਰਾਜਾ ‘‘ਸਚਾਹਂ ਏਕਸ੍ਸ ਪਭਾਵਤਿਂ ਪੇਸੇਸ੍ਸਾਮਿ, ਸੇਸਾ ਯੁਦ੍ਧਂ ਕਰਿਸ੍ਸਨ੍ਤਿ, ਨ ਸਕ੍ਕਾ ਏਕਸ੍ਸ ਦਾਤੁਂ, ਸਕਲਜਮ੍ਬੁਦੀਪੇ ਅਗ੍ਗਰਾਜਾਨਂ ‘ਵਿਰੂਪੋ’ਤਿ ਛਡ੍ਡੇਤ੍ਵਾ ਆਗਤਾ ਆਗਮਨਸ੍ਸ ਫਲਂ ਲਭਤੁ, ਵਧਿਤ੍ਵਾਨ ਨਂ ਸਤ੍ਤ ਖਣ੍ਡਾਨਿ ਕਤ੍ਵਾ ਸਤ੍ਤਨ੍ਨਂ ਖਤ੍ਤਿਯਾਨਂ ਪੇਸੇਸ੍ਸਾਮੀ’’ਤਿ ਵਦਨ੍ਤੋ ਅਨਨ੍ਤਰਂ ਗਾਥਮਾਹ –

੩੫. ‘‘ਸਤ੍ਤ ਬਿਲੇ ਕਰਿਤ੍ਵਾਨ, ਅਹਮੇਤਂ ਪਭਾਵਤਿਂ;

ਖਤ੍ਤਿਯਾਨਂ ਪਦਸ੍ਸਾਮਿ, ਯੇ ਮਂ ਹਨ੍ਤੁਂ ਇਧਾਗਤਾ’’ਤਿ.

ਤਸ੍ਸ ਸਾ ਕਥਾ ਸਕਲਨਿਵੇਸਨੇ ਪਾਕਟਾ ਅਹੋਸਿ. ਪਰਿਚਾਰਿਕਾ ਗਨ੍ਤ੍ਵਾ ‘‘ਰਾਜਾ ਕਿਰ ਤਂ ਸਤ੍ਤ ਖਣ੍ਡਾਨਿ ਕਤ੍ਵਾ ਸਤ੍ਤਨ੍ਨਂ ਰਾਜੂਨਂ ਪੇਸੇਸ੍ਸਤੀ’’ਤਿ ਪਭਾਵਤਿਯਾ ਆਰੋਚੇਸੁਂ. ਸਾ ਮਰਣਭਯਭੀਤਾ ਆਸਨਾ ਵੁਟ੍ਠਾਯ ਭਗਿਨੀਹਿ ਪਰਿਵੁਤਾ ਮਾਤੁ ਸਿਰਿਗਬ੍ਭਂ ਅਗਮਾਸਿ. ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਆਹ –

੩੬. ‘‘ਅਵੁਟ੍ਠਹਿ ਰਾਜਪੁਤ੍ਤੀ, ਸਾਮਾ ਕੋਸੇਯ੍ਯਵਾਸਿਨੀ;

ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ, ਦਾਸੀਗਣਪੁਰਕ੍ਖਤਾ’’ਤਿ.

ਤਤ੍ਥ ਸਾਮਾਤਿ ਸੁਵਣ੍ਣਵਣ੍ਣਾ. ਕੋਸੇਯ੍ਯਵਾਸਿਨੀਤਿ ਸੁਵਣ੍ਣਖਚਿਤਕੋਸੇਯ੍ਯਨਿਵਸਨਾ.

ਸਾ ਮਾਤੁ ਸਨ੍ਤਿਕਂ ਗਨ੍ਤ੍ਵਾ ਮਾਤਰਂ ਵਨ੍ਦਿਤ੍ਵਾ ਪਰਿਦੇਵਮਾਨਾ ਆਹ –

੩੭. ‘‘ਤਂ ਨੂਨ ਕਕ੍ਕੂਪਨਿਸੇਵਿਤਂ ਮੁਖਂ, ਆਦਾਸਦਨ੍ਤਾਥਰੁਪਚ੍ਚਵੇਕ੍ਖਿਤਂ;

ਸੁਭਂ ਸੁਨੇਤ੍ਤਂ ਵਿਰਜਂ ਅਨਙ੍ਗਣਂ, ਛੁਦ੍ਧਂ ਵਨੇ ਠਸ੍ਸਤਿ ਖਤ੍ਤਿਯੇਹਿ.

੩੮. ‘‘ਤੇ ਨੂਨ ਮੇ ਅਸਿਤੇ ਵੇਲ੍ਲਿਤਗ੍ਗੇ, ਕੇਸੇ ਮੁਦੂ ਚਨ੍ਦਨਸਾਰਲਿਤ੍ਤੇ;

ਸਮਾਕੁਲੇ ਸੀਵਥਿਕਾਯ ਮਜ੍ਝੇ, ਪਾਦੇਹਿ ਗਿਜ੍ਝਾ ਪਰਿਕਡ੍ਢਿਸ੍ਸਨ੍ਤਿ.

੩੯. ‘‘ਤਾ ਨੂਨ ਮੇ ਤਮ੍ਬਨਖਾ ਸੁਲੋਮਾ, ਬਾਹਾ ਮੁਦੂ ਚਨ੍ਦਨਸਾਰਲਿਤ੍ਤਾ;

ਛਿਨ੍ਨਾ ਵਨੇ ਉਜ੍ਝਿਤਾ ਖਤ੍ਤਿਯੇਹਿ, ਗਯ੍ਹ ਧਙ੍ਕੋ ਗਚ੍ਛਤਿ ਯੇਨਕਾਮਂ.

੪੦. ‘‘ਤੇ ਨੂਨ ਤਾਲੂਪਨਿਭੇ ਅਲਮ੍ਬੇ, ਨਿਸੇਵਿਤੇ ਕਾਸਿਕਚਨ੍ਦਨੇਨ;

ਥਨੇਸੁ ਮੇ ਲਮ੍ਬਿਸ੍ਸਤਿ ਸਿਙ੍ਗਾਲੋ, ਮਾਤੂਵ ਪੁਤ੍ਤੋ ਤਰੁਣੋ ਤਨੂਜੋ.

੪੧. ‘‘ਤਂ ਨੂਨ ਸੋਣਿਂ ਪੁਥੁਲਂ ਸੁਕੋਟ੍ਟਿਤਂ, ਨਿਸੇਵਿਤਂ ਕਞ੍ਚਨਮੇਖਲਾਹਿ;

ਛਿਨ੍ਨਂ ਵਨੇ ਖਤ੍ਤਿਯੇਹੀ ਅਵਤ੍ਥਂ, ਸਿਙ੍ਗਾਲਸਙ੍ਘਾ ਪਰਿਕਡ੍ਢਿਸ੍ਸਨ੍ਤਿ.

੪੨. ‘‘ਸੋਣਾ ਧਙ੍ਕਾ ਸਿਙ੍ਗਾਲਾ ਚ, ਯੇ ਚਞ੍ਞੇ ਸਨ੍ਤਿ ਦਾਠਿਨੋ;

ਅਜਰਾ ਨੂਨ ਹੇਸ੍ਸਨ੍ਤਿ, ਭਕ੍ਖਯਿਤ੍ਵਾ ਪਭਾਵਤਿਂ.

੪੩. ‘‘ਸਚੇ ਮਂਸਾਨਿ ਹਰਿਂਸੁ, ਖਤ੍ਤਿਯਾ ਦੂਰਗਾਮਿਨੋ;

ਅਟ੍ਠੀਨਿ ਅਮ੍ਮ ਯਾਚਿਤ੍ਵਾ, ਅਨੁਪਥੇ ਦਹਾਥ ਨਂ.

੪੪. ‘‘ਖੇਤ੍ਤਾਨਿ ਅਮ੍ਮ ਕਾਰੇਤ੍ਵਾ, ਕਣਿਕਾਰੇਤ੍ਥ ਰੋਪਯ;

ਯਦਾ ਤੇ ਪੁਪ੍ਫਿਤਾ ਅਸ੍ਸੁ, ਹੇਮਨ੍ਤਾਨਂ ਹਿਮਚ੍ਚਯੇ;

ਸਰੇਯ੍ਯਾਥ ਮਮਂ ਅਮ੍ਮ, ਏਵਂਵਣ੍ਣਾ ਪਭਾਵਤੀ’’ਤਿ.

ਤਤ੍ਥ ਕਕ੍ਕੂਪਨਿਸੇਵਿਤਨ੍ਤਿਲ ਕਕ੍ਕੂਪਨਿਸੇਵਿਤਨ੍ਤਿ ਸਾਸਪਕਕ੍ਕਲੋਣਕਕ੍ਕਮਤ੍ਤਿਕਕਕ੍ਕਤਿਲਕਕ੍ਕਹਲਿਦ੍ਦਿਕਕ੍ਕਮੁਖਚੁਣ੍ਣਕੇਹਿ ਇਮੇਹਿ ਪਞ੍ਚਹਿ ਕਕ੍ਕੇਹਿ ਉਪਨਿਸੇਵਿਤਂ. ਆਦਾਸਦਨ੍ਤਾਥਰੁਪਚ੍ਚਵੇਕ੍ਖਿਤਨ੍ਤਿ ਦਨ੍ਤਮਯਥਰੁਮ੍ਹਿ ਆਦਾਸੇ ਪਚ੍ਚਵੇਕ੍ਖਿਤਂ ਤਤ੍ਥ ਓਲੋਕੇਤ੍ਵਾ ਮਣ੍ਡਿਤਂ. ਸੁਭਨ੍ਤਿ ਸੁਭਮੁਖਂ. ਵਿਰਜਨ੍ਤਿ ਵਿਗਤਰਜਂ ਨਿਮ੍ਮਲਂ. ਅਨਙ੍ਗਣਨ੍ਤਿ ਗਣ੍ਡਪਿਲ਼ਕਾਦਿਦੋਸਰਹਿਤਂ. ਛੁਦ੍ਧਨ੍ਤਿ ਅਮ੍ਮ ਏਵਰੂਪਂ ਮਮ ਮੁਖਂ ਅਦ੍ਧਾ ਇਦਾਨਿ ਖਤ੍ਤਿਯੇਹਿ ਛਡ੍ਡਿਤਂ ਵਨੇ ਅਰਞ੍ਞੇ ਠਸ੍ਸਤੀਤਿ ਪਰਿਦੇਵਤਿ. ਅਸਿਤੇਤਿ ਕਾਲ਼ਕੇ. ਵੇਲ੍ਲਿਤਗ੍ਗੇਤਿ ਉਨ੍ਨਤਗ੍ਗੇ. ਸੀਵਥਿਕਾਯਾਤਿ ਸੁਸਾਨਮ੍ਹਿ. ਪਰਿਕਡ੍ਢਿਸ੍ਸਨ੍ਤੀਤਿ ਏਵਰੂਪੇ ਮਮ ਕੇਸੇ ਮਨੁਸ੍ਸਮਂਸਖਾਦਕਾ ਗਿਜ੍ਝਾ ਪਾਦੇਹਿ ਪਹਰਿਤ੍ਵਾ ਨੂਨ ਪਰਿਕਡ੍ਢਿਸ੍ਸਨ੍ਤਿ. ਗਯ੍ਹ ਧਙ੍ਕੋ ਗਚ੍ਛਤਿ ਯੇਨਕਾਮਨ੍ਤਿ ਅਮ੍ਮ ਮਮ ਏਵਰੂਪਂ ਬਾਹਂ ਨੂਨ ਧਙ੍ਕੋ ਗਹੇਤ੍ਵਾ ਲੁਞ੍ਜਿਤ੍ਵਾ ਖਾਦਨ੍ਤੋ ਯੇਨਕਾਮਂ ਗਚ੍ਛਿਸ੍ਸਤਿ.

ਤਾਲੂਪਨਿਭੇਤਿ ਸੁਵਣ੍ਣਤਾਲਫਲਸਦਿਸੇ. ਕਾਸਿਕਚਨ੍ਦਨੇਨਾਤਿ ਸੁਖੁਮਚਨ੍ਦਨੇਨ ਨਿਸੇਵਿਤੇ. ਥਨੇਸੁ ਮੇਤਿ ਅਮ੍ਮ ਮਮ ਸੁਸਾਨੇ ਪਤਿਤਾਯ ਏਵਰੂਪੇ ਥਨੇ ਦਿਸ੍ਵਾ ਮੁਖੇਨ ਡਂਸਿਤ੍ਵਾ ਤੇਸੁ ਮੇ ਥਨੇਸੁ ਅਤ੍ਤਨੋ ਤਨੁਜੋ ਮਾਤੁ ਤਰੁਣਪੁਤ੍ਤੋ ਵਿਯ ਨੂਨ ਸਿਙ੍ਗਾਲੋ ਲਮ੍ਬਿਸ੍ਸਤਿ. ਸੋਣਿਨ੍ਤਿ ਕਟਿਂ. ਸੁਕੋਟ੍ਟਿਤਨ੍ਤਿ ਗੋਹਨੁਕੇਨ ਪਹਰਿਤ੍ਵਾ ਸੁਵਡ੍ਢਿਤਂ. ਅਵਤ੍ਥਨ੍ਤਿ ਛਡ੍ਡਿਤਂ. ਭਕ੍ਖਯਿਤ੍ਵਾਤਿ ਅਮ੍ਮ ਏਤੇ ਏਤ੍ਤਕਾ ਨੂਨ ਮਮ ਮਂਸਂ ਖਾਦਿਤ੍ਵਾ ਅਜਰਾ ਭਵਿਸ੍ਸਨ੍ਤਿ.

ਸਚੇ ਮਂਸਾਨਿ ਹਰਿਂਸੂਤਿ ਅਮ੍ਮ ਸਚੇ ਤੇ ਖਤ੍ਤਿਯਾ ਮਯਿਂ ਪਟਿਬਦ੍ਧਚਿਤ੍ਤਾ ਮਮ ਮਂਸਾਨਿ ਹਰੇਯ੍ਯੁਂ, ਅਥ ਤੁਮ੍ਹੇ ਅਟ੍ਠੀਨਿ ਯਾਚਿਤ੍ਵਾ ਅਨੁਪਥੇ ਦਹਾਥਨਂ, ਜਙ੍ਘਮਗ੍ਗਮਹਾਮਗ੍ਗਾਨਂ ਅਨ੍ਤਰੇ ਦਹੇਯ੍ਯਾਥਾਤਿ ਵਦਤਿ. ਖੇਤ੍ਤਾਨੀਤਿ ਅਮ੍ਮ ਮਮ ਝਾਪਿਤਟ੍ਠਾਨੇ ਮਾਲਾਦਿਵਤ੍ਥੂਨਿ ਕਾਰੇਤ੍ਵਾ ਏਤ੍ਥ ਏਤੇਸੁ ਖੇਤ੍ਤੇਸੁ ਕਣਿਕਾਰਰੁਕ੍ਖੇ ਰੋਪਯ. ਹਿਮਚ੍ਚਯੇਤਿ ਹਿਮਪਾਤਾਤਿਕ੍ਕਮੇ ਫਗ੍ਗੁਣਮਾਸੇ. ਸਰੇਯ੍ਯਾਥਾਤਿ ਤੇਸਂ ਪੁਪ੍ਫਾਨਂ ਸੁਵਣ੍ਣਚਙ੍ਕੋਟਕਂ ਪੂਰੇਤ੍ਵਾ ਊਰੂਸੁ ਠਪੇਤ੍ਵਾ ਮਮ ਧੀਤਾ ਪਭਾਵਤੀ ਏਵਂਵਣ੍ਣਾਤਿ ਸਰੇਯ੍ਯਾਥ.