੧੦. ਦਸਕਨਿਪਾਤੋ

[੪੩੯] ੧. ਚਤੁਦ੍ਵਾਰਜਾਤਕਵਣ੍ਣਨਾ

ਚਤੁਦ੍ਵਾਰਮਿਦਂ ਨਗਰਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਦੁਬ੍ਬਚਭਿਕ੍ਖੁਂ ਆਰਬ੍ਭ ਕਥੇਸਿ. ਪਚ੍ਚੁਪ੍ਪਨ੍ਨਵਤ੍ਥੁ ਨਵਕਨਿਪਾਤਸ੍ਸ ਪਠਮਜਾਤਕੇ ਵਿਤ੍ਥਾਰਿਤਮੇਵ. ਇਧ ਪਨ ਸਤ੍ਥਾ ਤਂ ਭਿਕ੍ਖੁਂ ‘‘ਸਚ੍ਚਂ ਕਿਰ ਤ੍ਵਂ ਭਿਕ੍ਖੁ ਦੁਬ੍ਬਚੋ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ‘‘ਪੁਬ੍ਬੇਪਿ ਤ੍ਵਂ ਭਿਕ੍ਖੁ ਦੁਬ੍ਬਚਤਾਯ ਪਣ੍ਡਿਤਾਨਂ ਵਚਨਂ ਅਕਤ੍ਵਾ ਖੁਰਚਕ੍ਕਂ ਆਪਾਦੇਸੀ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਕਸ੍ਸਪਦਸਬਲਸ੍ਸ ਕਾਲੇ ਬਾਰਾਣਸਿਯਂ ਅਸੀਤਿਕੋਟਿਵਿਭਵਸ੍ਸ ਸੇਟ੍ਠਿਨੋ ਏਕੋ ਪੁਤ੍ਤੋ ਮਿਤ੍ਤਵਿਨ੍ਦਕੋ ਨਾਮ ਅਹੋਸਿ. ਤਸ੍ਸ ਮਾਤਾਪਿਤਰੋ ਸੋਤਾਪਨ੍ਨਾ ਅਹੇਸੁਂ, ਸੋ ਪਨ ਦੁਸ੍ਸੀਲੋ ਅਸ੍ਸਦ੍ਧੋ. ਅਥ ਨਂ ਅਪਰਭਾਗੇ ਪਿਤਰਿ ਕਾਲਕਤੇ ਮਾਤਾ ਕੁਟੁਮ੍ਬਂ ਵਿਚਾਰੇਨ੍ਤੀ ਆਹ – ‘‘ਤਾਤ, ਤਯਾ ਦੁਲ੍ਲਭਂ ਮਨੁਸ੍ਸਤ੍ਤਂ ਲਦ੍ਧਂ, ਦਾਨਂ ਦੇਹਿ, ਸੀਲਂ ਰਕ੍ਖਾਹਿ, ਉਪੋਸਥਕਮ੍ਮਂ ਕਰੋਹਿ, ਧਮ੍ਮਂ ਸੁਣਾਹੀ’’ਤਿ. ਅਮ੍ਮ, ਨ ਮਯ੍ਹਂ ਦਾਨਾਦੀਹਿ ਅਤ੍ਥੋ, ਮਾ ਮਂ ਕਿਞ੍ਚਿ ਅਵਚੁਤ੍ਥ, ਅਹਂ ਯਥਾਕਮ੍ਮਂ ਗਮਿਸ੍ਸਾਮੀਤਿ. ਏਵਂ ਵਦਨ੍ਤਮ੍ਪਿ ਨਂ ਏਕਦਿਵਸਂ ਪੁਣ੍ਣਮੁਪੋਸਥਦਿਵਸੇ ਮਾਤਾ ਆਹ – ‘‘ਤਾਤ, ਅਜ੍ਜ ਅਭਿਲਕ੍ਖਿਤੋ ਮਹਾਉਪੋਸਥਦਿਵਸੋ, ਅਜ੍ਜ ਉਪੋਸਥਂ ਸਮਾਦਿਯਿਤ੍ਵਾ ਵਿਹਾਰਂ ਗਨ੍ਤ੍ਵਾ ਸਬ੍ਬਰਤ੍ਤਿਂ ਧਮ੍ਮਂ ਸੁਤ੍ਵਾ ਏਹਿ, ਅਹਂ ਤੇ ਸਹਸ੍ਸਂ ਦਸ੍ਸਾਮੀ’’ਤਿ. ਸੋ ‘‘ਸਾਧੂ’’ਤਿ ਧਨਲੋਭੇਨ ਉਪੋਸਥਂ ਸਮਾਦਿਯਿਤ੍ਵਾ ਭੁਤ੍ਤਪਾਤਰਾਸੋ ਵਿਹਾਰਂ ਗਨ੍ਤ੍ਵਾ ਦਿਵਸਂ ਵੀਤਿਨਾਮੇਤ੍ਵਾ ਰਤ੍ਤਿਂ ਯਥਾ ਏਕਮ੍ਪਿ ਧਮ੍ਮਪਦਂ ਕਣ੍ਣਂ ਨ ਪਹਰਤਿ, ਤਥਾ ਏਕਸ੍ਮਿਂ ਪਦੇਸੇ ਨਿਪਜ੍ਜਿਤ੍ਵਾ ਨਿਦ੍ਦਂ ਓਕ੍ਕਮਿਤ੍ਵਾ ਪੁਨਦਿਵਸੇ ਪਾਤੋਵ ਮੁਖਂ ਧੋਵਿਤ੍ਵਾ ਗੇਹਂ ਗਨ੍ਤ੍ਵਾ ਨਿਸੀਦਿ.

ਮਾਤਾ ਪਨਸ੍ਸ ‘‘ਅਜ੍ਜ ਮੇ ਪੁਤ੍ਤੋ ਧਮ੍ਮਂ ਸੁਤ੍ਵਾ ਪਾਤੋਵ ਧਮ੍ਮਕਥਿਕਤ੍ਥੇਰਂ ਆਦਾਯ ਆਗਮਿਸ੍ਸਤੀ’’ਤਿ ਯਾਗੁਂ ਖਾਦਨੀਯਂ ਭੋਜਨੀਯਂ ਪਟਿਯਾਦੇਤ੍ਵਾ ਆਸਨਂ ਪਞ੍ਞਪੇਤ੍ਵਾ ਤਸ੍ਸਾਗਮਨਂ ਪਟਿਮਾਨੇਨ੍ਤੀ ਤਂ ਏਕਕਂ ਆਗਤਂ ਦਿਸ੍ਵਾ ‘‘ਤਾਤ, ਧਮ੍ਮਕਥਿਕੋ ਕੇਨ ਨ ਆਨੀਤੋ’’ਤਿ ਵਤ੍ਵਾ ‘‘ਨ ਮਯ੍ਹਂ ਧਮ੍ਮਕਥਿਕੇਨ ਅਤ੍ਥੋ’’ਤਿ ਵੁਤ੍ਤੇ ‘‘ਤੇਨ ਹਿ ਯਾਗੁਂ ਪਿਵਾ’’ਤਿ ਆਹ. ਸੋ ‘‘ਤੁਮ੍ਹੇਹਿ ਮਯ੍ਹਂ ਸਹਸ੍ਸਂ ਪਟਿਸ੍ਸੁਤਂ, ਤਂ ਤਾਵ ਮੇ ਦੇਥ, ਪਚ੍ਛਾ ਪਿਵਿਸ੍ਸਾਮੀ’’ਤਿ ਆਹ. ‘‘ਪਿਵ, ਤਾਤ, ਪਚ੍ਛਾ ਦਸ੍ਸਾਮੀ’’ਤਿ. ‘‘ਗਹੇਤ੍ਵਾਵ ਪਿਵਿਸ੍ਸਾਮੀ’’ਤਿ. ਅਥਸ੍ਸ ਮਾਤਾ ਸਹਸ੍ਸਭਣ੍ਡਿਕਂ ਪੁਰਤੋ ਠਪੇਸਿ. ਸੋ ਯਾਗੁਂ ਪਿਵਿਤ੍ਵਾ ਸਹਸ੍ਸਭਣ੍ਡਿਕਂ ਗਹੇਤ੍ਵਾ ਵੋਹਾਰਂ ਕਰੋਨ੍ਤੋ ਨ ਚਿਰਸ੍ਸੇਵ ਵੀਸਸਤਸਹਸ੍ਸਂ ਉਪ੍ਪਾਦੇਸਿ. ਅਥਸ੍ਸ ਏਤਦਹੋਸਿ – ‘‘ਨਾਵਂ ਉਪਟ੍ਠਪੇਤ੍ਵਾ ਵੋਹਾਰਂ ਕਰਿਸ੍ਸਾਮੀ’’ਤਿ. ਸੋ ਨਾਵਂ ਉਪਟ੍ਠਪੇਤ੍ਵਾ ‘‘ਅਮ੍ਮ, ਅਹਂ ਨਾਵਾਯ ਵੋਹਾਰਂ ਕਰਿਸ੍ਸਾਮੀ’’ਤਿ ਆਹ. ਅਥ ਨਂ ਮਾਤਾ ‘‘ਤ੍ਵਂ ਤਾਤ, ਏਕਪੁਤ੍ਤਕੋ, ਇਮਸ੍ਮਿਂ ਘਰੇ ਧਨਮ੍ਪਿ ਬਹੁ, ਸਮੁਦ੍ਦੋ ਅਨੇਕਾਦੀਨਵੋ, ਮਾ ਗਮੀ’’ਤਿ ਨਿਵਾਰੇਸਿ. ਸੋ ‘‘ਅਹਂ ਗਮਿਸ੍ਸਾਮੇਵ, ਨ ਸਕ੍ਕਾ ਮਂ ਨਿਵਾਰੇਤੁ’’ਨ੍ਤਿ ਵਤ੍ਵਾ ‘‘ਅਹਂ ਤਂ, ਤਾਤ, ਵਾਰੇਸ੍ਸਾਮੀ’’ਤਿ ਮਾਤਰਾ ਹਤ੍ਥੇ ਗਹਿਤੋ ਹਤ੍ਥਂ ਵਿਸ੍ਸਜ੍ਜਾਪੇਤ੍ਵਾ ਮਾਤਰਂ ਪਹਰਿਤ੍ਵਾ ਪਾਤੇਤ੍ਵਾ ਅਨ੍ਤਰਂ ਕਤ੍ਵਾ ਗਨ੍ਤ੍ਵਾ ਨਾਵਾਯ ਸਮੁਦ੍ਦਂ ਪਕ੍ਖਨ੍ਦਿ.

ਨਾਵਾ ਸਤ੍ਤਮੇ ਦਿਵਸੇ ਮਿਤ੍ਤਵਿਨ੍ਦਕਂ ਨਿਸ੍ਸਾਯ ਸਮੁਦ੍ਦਪਿਟ੍ਠੇ ਨਿਚ੍ਚਲਾ ਅਟ੍ਠਾਸਿ. ਕਾਲ਼ਕਣ੍ਣਿਸਲਾਕਾ ਕਰਿਯਮਾਨਾ ਮਿਤ੍ਤਵਿਨ੍ਦਕਸ੍ਸੇਵ ਹਤ੍ਥੇ ਤਿਕ੍ਖਤ੍ਤੁਂ ਪਤਿ. ਅਥਸ੍ਸ ਉਲ਼ੁਮ੍ਪਂ ਦਤ੍ਵਾ ‘‘ਇਮਂ ਏਕਂ ਨਿਸ੍ਸਾਯ ਬਹੂ ਮਾ ਨਸ੍ਸਨ੍ਤੂ’’ਤਿ ਤਂ ਸਮੁਦ੍ਦਪਿਟ੍ਠੇ ਖਿਪਿਂਸੁ. ਤਾਵਦੇਵ ਨਾਵਾ ਜਵੇਨ ਮਹਾਸਮੁਦ੍ਦਂ ਪਕ੍ਖਨ੍ਦਿ. ਸੋਪਿ ਉਲ਼ੁਮ੍ਪੇ ਨਿਪਜ੍ਜਿਤ੍ਵਾ ਏਕਂ ਦੀਪਕਂ ਪਾਪੁਣਿ. ਤਤ੍ਥ ਫਲਿਕਵਿਮਾਨੇ ਚਤਸ੍ਸੋ ਵੇਮਾਨਿਕਪੇਤਿਯੋ ਅਦ੍ਦਸ. ਤਾ ਸਤ੍ਤਾਹਂ ਦੁਕ੍ਖਂ ਅਨੁਭਵਨ੍ਤਿ, ਸਤ੍ਤਾਹਂ ਸੁਖਂ. ਸੋ ਤਾਹਿ ਸਦ੍ਧਿਂ ਸਤ੍ਤਾਹਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿ. ਅਥ ਨਂ ਤਾ ਦੁਕ੍ਖਾਨੁਭਵਨਤ੍ਥਾਯ ਗਚ੍ਛਮਾਨਾ ‘‘ਸਾਮਿ, ਮਯਂ ਸਤ੍ਤਮੇ ਦਿਵਸੇ ਆਗਮਿਸ੍ਸਾਮ, ਯਾਵ ਮਯਂ ਆਗਚ੍ਛਾਮ, ਤਾਵ ਅਨੁਕ੍ਕਣ੍ਠਮਾਨੋ ਇਧੇਵ ਵਸਾ’’ਤਿ ਵਤ੍ਵਾ ਅਗਮਂਸੁ. ਸੋ ਤਣ੍ਹਾਵਸਿਕੋ ਹੁਤ੍ਵਾ ਤਸ੍ਮਿਂਯੇਵ ਫਲਕੇ ਨਿਪਜ੍ਜਿਤ੍ਵਾ ਪੁਨ ਸਮੁਦ੍ਦਪਿਟ੍ਠੇਨ ਗਚ੍ਛਨ੍ਤੋ ਅਪਰਂ ਦੀਪਕਂ ਪਤ੍ਵਾ ਤਤ੍ਥ ਰਜਤਵਿਮਾਨੇ ਅਟ੍ਠ ਵੇਮਾਨਿਕਪੇਤਿਯੋ ਦਿਸ੍ਵਾ ਏਤੇਨੇਵ ਉਪਾਯੇਨ ਅਪਰਸ੍ਮਿਂ ਦੀਪਕੇ ਮਣਿਵਿਮਾਨੇ ਸੋਲ਼ਸ, ਅਪਰਸ੍ਮਿਂ ਦੀਪਕੇ ਕਨਕਵਿਮਾਨੇ ਦ੍ਵਤ੍ਤਿਂਸ ਵੇਮਾਨਿਕਪੇਤਿਯੋ ਦਿਸ੍ਵਾ ਤਾਹਿ ਸਦ੍ਧਿਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਾਸਮ੍ਪਿ ਦੁਕ੍ਖਂ ਅਨੁਭਵਿਤੁਂ ਗਤਕਾਲੇ ਪੁਨ ਸਮੁਦ੍ਦਪਿਟ੍ਠੇਨ ਗਚ੍ਛਨ੍ਤੋ ਏਕਂ ਪਾਕਾਰਪਰਿਕ੍ਖਿਤ੍ਤਂ ਚਤੁਦ੍ਵਾਰਂ ਨਗਰਂ ਅਦ੍ਦਸ. ਉਸ੍ਸਦਨਿਰਯੋ ਕਿਰੇਸ, ਬਹੂਨਂ ਨੇਰਯਿਕਸਤ੍ਤਾਨਂ ਕਮ੍ਮਕਰਣਾਨੁਭਵਨਟ੍ਠਾਨਂ ਮਿਤ੍ਤਵਿਨ੍ਦਕਸ੍ਸ ਅਲਙ੍ਕਤਪਟਿਯਤ੍ਤਨਗਰਂ ਵਿਯ ਹੁਤ੍ਵਾ ਉਪਟ੍ਠਾਸਿ.

ਸੋ ‘‘ਇਮਂ ਨਗਰਂ ਪਵਿਸਿਤ੍ਵਾ ਰਾਜਾ ਭਵਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਖੁਰਚਕ੍ਕਂ ਉਕ੍ਖਿਪਿਤ੍ਵਾ ਸੀਸੇ ਪਚ੍ਚਮਾਨਂ ਨੇਰਯਿਕਸਤ੍ਤਂ ਅਦ੍ਦਸ. ਅਥਸ੍ਸ ਤਂ ਤਸ੍ਸ ਸੀਸੇ ਖੁਰਚਕ੍ਕਂ ਪਦੁਮਂ ਵਿਯ ਹੁਤ੍ਵਾ ਉਪਟ੍ਠਾਸਿ. ਉਰੇ ਪਞ੍ਚਙ੍ਗਿਕਬਨ੍ਧਨਂ ਉਰਚ੍ਛਦਪਸਾਧਨਂ ਹੁਤ੍ਵਾ ਸੀਸਤੋ ਗਲਨ੍ਤਂ ਲੋਹਿਤਂ ਲੋਹਿਤਚਨ੍ਦਨਵਿਲੇਪਨਂ ਵਿਯ ਹੁਤ੍ਵਾ ਪਰਿਦੇਵਨਸਦ੍ਦੋ ਮਧੁਰਸਰੋ ਗੀਤਸਦ੍ਦੋ ਵਿਯ ਹੁਤ੍ਵਾ ਉਪਟ੍ਠਾਸਿ. ਸੋ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਭੋ ਪੁਰਿਸ, ਚਿਰਂ ਤਯਾ ਪਦੁਮਂ ਧਾਰਿਤਂ, ਦੇਹਿ ਮੇ ਏਤ’’ਨ੍ਤਿ ਆਹ. ‘‘ਸਮ੍ਮ, ਨਯਿਦਂ ਪਦੁਮਂ, ਖੁਰਚਕ੍ਕਂ ਏਤ’’ਨ੍ਤਿ. ‘‘ਤ੍ਵਂ ਮਯ੍ਹਂ ਅਦਾਤੁਕਾਮਤਾਯ ਏਵਂ ਵਦਸੀ’’ਤਿ. ਨੇਰਯਿਕਸਤ੍ਤੋ ਚਿਨ੍ਤੇਸਿ ‘‘ਮਯ੍ਹਂ ਕਮ੍ਮਂ ਖੀਣਂ ਭਵਿਸ੍ਸਤਿ, ਇਮਿਨਾਪਿ ਮਯਾ ਵਿਯ ਮਾਤਰਂ ਪਹਰਿਤ੍ਵਾ ਆਗਤੇਨ ਭਵਿਤਬ੍ਬਂ, ਦਸ੍ਸਾਮਿਸ੍ਸ ਖੁਰਚਕ੍ਕ’’ਨ੍ਤਿ. ਅਥ ਨਂ ‘‘ਏਹਿ ਭੋ, ਗਣ੍ਹ ਇਮ’’ਨ੍ਤਿ ਵਤ੍ਵਾ ਖੁਰਚਕ੍ਕਂ ਤਸ੍ਸ ਸੀਸੇ ਖਿਪਿ, ਤਂ ਤਸ੍ਸ ਮਤ੍ਥਕਂ ਪਿਸਮਾਨਂ ਭਸ੍ਸਿ. ਤਸ੍ਮਿਂ ਖਣੇ ਮਿਤ੍ਤਵਿਨ੍ਦਕੋ ਤਸ੍ਸ ਖੁਰਚਕ੍ਕਭਾਵਂ ਞਤ੍ਵਾ ‘‘ਤਵ ਖੁਰਚਕ੍ਕਂ ਗਣ੍ਹ, ਤਵ ਖੁਰਚਕ੍ਕਂ ਗਣ੍ਹਾ’’ਤਿ ਵੇਦਨਾਪ੍ਪਤ੍ਤੋ ਪਰਿਦੇਵਿ, ਇਤਰੋ ਅਨ੍ਤਰਧਾਯਿ. ਤਦਾ ਬੋਧਿਸਤ੍ਤੋ ਰੁਕ੍ਖਦੇਵਤਾ ਹੁਤ੍ਵਾ ਮਹਨ੍ਤੇਨ ਪਰਿਵਾਰੇਨ ਉਸ੍ਸਦਚਾਰਿਕਂ ਚਰਮਾਨੋ ਤਂ ਠਾਨਂ ਪਾਪੁਣਿ. ਮਿਤ੍ਤਵਿਨ੍ਦਕੋ ਤਂ ਓਲੋਕੇਤ੍ਵਾ ‘‘ਸਾਮਿ ਦੇਵਰਾਜ, ਇਦਂ ਮਂ ਚਕ੍ਕਂ ਸਣ੍ਹਕਰਣਿਯਂ ਵਿਯ ਤਿਲਾਨਿ ਪਿਸਮਾਨਂ ਓਤਰਤਿ, ਕਿਂ ਨੁ ਖੋ ਮਯਾ ਪਾਪਂ ਪਕਤ’’ਨ੍ਤਿ ਪੁਚ੍ਛਨ੍ਤੋ ਦ੍ਵੇ ਗਾਥਾ ਅਭਾਸਿ –

੧. ‘‘ਚਤੁਦ੍ਵਾਰਮਿਦਂ ਨਗਰਂ, ਆਯਸਂ ਦਲ਼੍ਹਪਾਕਾਰਂ;

ਓਰੁਦ੍ਧਪਟਿਰੁਦ੍ਧੋਸ੍ਮਿ, ਕਿਂ ਪਾਪਂ ਪਕਤਂ ਮਯਾ.

੨. ‘‘ਸਬ੍ਬੇ ਅਪਿਹਿਤਾ ਦ੍ਵਾਰਾ, ਓਰੁਦ੍ਧੋਸ੍ਮਿ ਯਥਾ ਦਿਜੋ;

ਕਿਮਾਧਿਕਰਣਂ ਯਕ੍ਖ, ਚਕ੍ਕਾਭਿਨਿਹਤੋ ਅਹ’’ਨ੍ਤਿ.

ਤਤ੍ਥ ਦਲ਼੍ਹਪਾਕਾਰਨ੍ਤਿ ਥਿਰਪਾਕਾਰਂ. ‘‘ਦਲ਼੍ਹਤੋਰਣ’’ਨ੍ਤਿਪਿ ਪਾਠੋ, ਥਿਰਦ੍ਵਾਰਨ੍ਤਿ ਅਤ੍ਥੋ. ਓਰੁਦ੍ਧਪਟਿਰੁਦ੍ਧੋਸ੍ਮੀਤਿ ਅਨ੍ਤੋ ਕਤ੍ਵਾ ਸਮਨ੍ਤਾ ਪਾਕਾਰੇਨ ਰੁਦ੍ਧੋ, ਪਲਾਯਨਟ੍ਠਾਨਂ ਨ ਪਞ੍ਞਾਯਤਿ. ਕਿਂ ਪਾਪਂ ਪਕਤਨ੍ਤਿ ਕਿਂ ਨੁ ਖੋ ਮਯਾ ਪਾਪਕਮ੍ਮਂ ਕਤਂ. ਅਪਿਹਿਤਾਤਿ ਥਕਿਤਾ. ਯਥਾ ਦਿਜੋਤਿ ਪਞ੍ਜਰੇ ਪਕ੍ਖਿਤ੍ਤੋ ਸਕੁਣੋ ਵਿਯ. ਕਿਮਾਧਿਕਰਣਨ੍ਤਿ ਕਿਂ ਕਾਰਣਂ. ਚਕ੍ਕਾਭਿਨਿਹਤੋਤਿ ਚਕ੍ਕੇਨ ਅਭਿਨਿਹਤੋ.

ਅਥਸ੍ਸ ਦੇਵਰਾਜਾ ਕਾਰਣਂ ਕਥੇਤੁਂ ਛ ਗਾਥਾ ਅਭਾਸਿ –

੩. ‘‘ਲਦ੍ਧਾ ਸਤਸਹਸ੍ਸਾਨਿ, ਅਤਿਰੇਕਾਨਿ ਵੀਸਤਿ;

ਅਨੁਕਮ੍ਪਕਾਨਂ ਞਾਤੀਨਂ, ਵਚਨਂ ਸਮ੍ਮ ਨਾਕਰਿ.

੪. ‘‘ਲਙ੍ਘਿਂ ਸਮੁਦ੍ਦਂ ਪਕ੍ਖਨ੍ਦਿ, ਸਾਗਰਂ ਅਪ੍ਪਸਿਦ੍ਧਿਕਂ;

ਚਤੁਬ੍ਭਿ ਅਟ੍ਠਜ੍ਝਗਮਾ, ਅਟ੍ਠਾਹਿਪਿ ਚ ਸੋਲ਼ਸ.

੫. ‘‘ਸੋਲ਼ਸਾਹਿ ਚ ਬਾਤ੍ਤਿਂਸ, ਅਤਿਚ੍ਛਂ ਚਕ੍ਕਮਾਸਦੋ;

ਇਚ੍ਛਾਹਤਸ੍ਸ ਪੋਸਸ੍ਸ, ਚਕ੍ਕਂ ਭਮਤਿ ਮਤ੍ਥਕੇ.

੬. ‘‘ਉਪਰਿਵਿਸਾਲਾ ਦੁਪ੍ਪੂਰਾ, ਇਚ੍ਛਾ ਵਿਸਟਗਾਮਿਨੀ;

ਯੇ ਚ ਤਂ ਅਨੁਗਿਜ੍ਝਨ੍ਤਿ, ਤੇ ਹੋਨ੍ਤਿ ਚਕ੍ਕਧਾਰਿਨੋ.

੭. ‘‘ਬਹੁਭਣ੍ਡਂ ਅਵਹਾਯ, ਮਗ੍ਗਂ ਅਪ੍ਪਟਿਵੇਕ੍ਖਿਯ;

ਯੇਸਞ੍ਚੇਤਂ ਅਸਙ੍ਖਾਤਂ, ਤੇ ਹੋਨ੍ਤਿ ਚਕ੍ਕਧਾਰਿਨੋ.

੮. ‘‘ਕਮ੍ਮਂ ਸਮੇਕ੍ਖੇ ਵਿਪੁਲਞ੍ਚ ਭੋਗਂ, ਇਚ੍ਛਂ ਨ ਸੇਵੇਯ੍ਯ ਅਨਤ੍ਥਸਂਹਿਤਂ;

ਕਰੇਯ੍ਯ ਵਾਕ੍ਯਂ ਅਨੁਕਮ੍ਪਕਾਨਂ, ਤਂ ਤਾਦਿਸਂ ਨਾਤਿਵਤ੍ਤੇਯ੍ਯ ਚਕ੍ਕ’’ਨ੍ਤਿ.

ਤਤ੍ਥ ਲਦ੍ਧਾ ਸਤਸਹਸ੍ਸਾਨਿ, ਅਤਿਰੇਕਾਨਿ ਵੀਸਤੀਤਿ ਤ੍ਵਂ ਉਪੋਸਥਂ ਕਤ੍ਵਾ ਮਾਤੁ ਸਨ੍ਤਿਕਾ ਸਹਸ੍ਸਂ ਗਹੇਤ੍ਵਾ ਵੋਹਾਰਂ ਕਰੋਨ੍ਤੋ ਸਤਸਹਸ੍ਸਾਨਿ ਚ ਅਤਿਰੇਕਾਨਿ ਵੀਸਤਿਸਹਸ੍ਸਾਨਿ ਲਭਿਤ੍ਵਾ. ਨਾਕਰੀਤਿ ਤੇਨ ਧਨੇਨ ਅਸਨ੍ਤੁਟ੍ਠੋ ਨਾਵਾਯ ਸਮੁਦ੍ਦਂ ਪਵਿਸਨ੍ਤੋ ਸਮੁਦ੍ਦੇ ਆਦੀਨਵਞ੍ਚ ਕਥੇਤ੍ਵਾ ਮਾਤੁਯਾ ਵਾਰਿਯਮਾਨੋਪਿ ਅਨੁਕਮ੍ਪਕਾਨਂ ਞਾਤੀਨਂ ਵਚਨਂ ਨ ਕਰੋਸਿ, ਸੋਤਾਪਨ੍ਨਂ ਮਾਤਰਂ ਪਹਰਿਤ੍ਵਾ ਅਨ੍ਤਰਂ ਕਤ੍ਵਾ ਨਿਕ੍ਖਨ੍ਤੋਯੇਵਾਸੀਤਿ ਦੀਪੇਤਿ.

ਲਙ੍ਘਿਨ੍ਤਿ ਨਾਵਂ ਉਲ੍ਲਙ੍ਘਨਸਮਤ੍ਥਂ. ਪਕ੍ਖਨ੍ਦੀਤਿ ਪਕ੍ਖਨ੍ਦੋਸਿ. ਅਪ੍ਪਸਿਦ੍ਧਿਕਨ੍ਤਿ ਮਨ੍ਦਸਿਦ੍ਧਿਂ ਵਿਨਾਸਬਹੁਲਂ. ਚਤੁਬ੍ਭਿ ਅਟ੍ਠਾਤਿ ਅਥ ਨਂ ਨਿਸ੍ਸਾਯ ਠਿਤਾਯ ਨਾਵਾਯ ਫਲਕਂ ਦਤ੍ਵਾ ਸਮੁਦ੍ਦੇ ਖਿਤ੍ਤੋਪਿ ਤ੍ਵਂ ਮਾਤਰਂ ਨਿਸ੍ਸਾਯ ਏਕਦਿਵਸਂ ਕਤਸ੍ਸ ਉਪੋਸਥਕਮ੍ਮਸ੍ਸ ਨਿਸ੍ਸਨ੍ਦੇਨ ਫਲਿਕਵਿਮਾਨੇ ਚਤਸ੍ਸੋ ਇਤ੍ਥਿਯੋ ਲਭਿਤ੍ਵਾ ਤਤੋ ਰਜਤਵਿਮਾਨੇ ਅਟ੍ਠ, ਮਣਿਵਿਮਾਨੇ ਸੋਲ਼ਸ, ਕਨਕਵਿਮਾਨੇ ਦ੍ਵਤ੍ਤਿਂਸ ਅਧਿਗਤੋਸੀਤਿ. ਅਤਿਚ੍ਛਂ ਚਕ੍ਕਮਾਸਦੋਤਿ ਅਥ ਤ੍ਵਂ ਯਥਾਲਦ੍ਧੇਨ ਅਸਨ੍ਤੁਟ੍ਠੋ ‘‘ਅਤ੍ਰ ਉਤ੍ਤਰਿਤਰਂ ਲਭਿਸ੍ਸਾਮੀ’’ਤਿ ਏਵਂ ਲਦ੍ਧਂ ਲਦ੍ਧਂ ਅਤਿਕ੍ਕਮਨਲੋਭਸਙ੍ਖਾਤਾਯ ਅਤਿਚ੍ਛਾਯ ਸਮਨ੍ਨਾਗਤਤ੍ਤਾ ਅਤਿਚ੍ਛੋ ਪਾਪਪੁਗ੍ਗਲੋ ਤਸ੍ਸ ਉਪੋਸਥਕਮ੍ਮਸ੍ਸ ਖੀਣਤ੍ਤਾ ਦ੍ਵਤ੍ਤਿਂਸ ਇਤ੍ਥਿਯੋ ਅਤਿਕ੍ਕਮਿਤ੍ਵਾ ਇਮਂ ਪੇਤਨਗਰਂ ਆਗਨ੍ਤ੍ਵਾ ਤਸ੍ਸ ਮਾਤੁਪਹਾਰਦਾਨਅਕੁਸਲਸ੍ਸ ਨਿਸ੍ਸਨ੍ਦੇਨ ਇਦਂ ਖੁਰਚਕ੍ਕਂ ਸਮ੍ਪਤ੍ਤੋਸਿ. ‘‘ਅਤ੍ਰਿਚ੍ਛ’’ਨ੍ਤਿਪਿ ਪਾਠੋ, ਅਤ੍ਰ ਅਤ੍ਰ ਇਚ੍ਛਮਾਨੋਤਿ ਅਤ੍ਥੋ. ‘‘ਅਤ੍ਰਿਚ੍ਛਾ’’ਤਿਪਿ ਪਾਠੋ, ਅਤ੍ਰਿਚ੍ਛਾਯਾਤਿ ਅਤ੍ਥੋ. ਭਮਤੀਤਿ ਤਸ੍ਸ ਤੇ ਇਚ੍ਛਾਹਤਸ੍ਸ ਪੋਸਸ੍ਸ ਇਦਂ ਚਕ੍ਕਂ ਮਤ੍ਥਕਂ ਪਿਸਮਾਨਂ ਇਦਾਨਿ ਕੁਮ੍ਭਕਾਰਚਕ੍ਕਂ ਵਿਯ ਮਤ੍ਥਕੇ ਭਮਤੀਤਿ ਅਤ੍ਥੋ.

ਯੇ ਚ ਤਂ ਅਨੁਗਿਜ੍ਝਨ੍ਤੀਤਿ ਤਣ੍ਹਾ ਨਾਮੇਸਾ ਗਚ੍ਛਨ੍ਤੀ ਉਪਰੂਪਰਿ ਵਿਸਾਲਾ ਹੋਤਿ, ਸਮੁਦ੍ਦੋ ਵਿਯ ਚ ਦੁਪ੍ਪੂਰਾ, ਰੂਪਾਦੀਸੁ ਤਸ੍ਸ ਤਸ੍ਸ ਇਚ੍ਛਨਇਚ੍ਛਾਯ ਵਿਸਟਗਾਮਿਨੀ, ਤਂ ਏਵਰੂਪਂ ਤਣ੍ਹਂ ਯੇ ਚ ਅਨੁਗਿਜ੍ਝਨ੍ਤਿ ਗਿਦ੍ਧਾ ਗਧਿਤਾ ਹੁਤ੍ਵਾ ਪੁਨਪ੍ਪੁਨਂ ਅਲ੍ਲੀਯਨ੍ਤਿ. ਤੇ ਹੋਨ੍ਤਿ ਚਕ੍ਕਧਾਰਿਨੋਤਿ ਤੇ ਏਵਂ ਪਚ੍ਚਨ੍ਤਾ ਖੁਰਚਕ੍ਕਂ ਧਾਰੇਨ੍ਤਿ. ਬਹੁਭਣ੍ਡਨ੍ਤਿ ਮਾਤਾਪਿਤੂਨਂ ਸਨ੍ਤਕਂ ਬਹੁਧਨਂ ਓਹਾਯ. ਮਗ੍ਗਨ੍ਤਿ ਗਨ੍ਤਬ੍ਬਂ ਅਪ੍ਪਸਿਦ੍ਧਿਕਂ ਸਮੁਦ੍ਦਮਗ੍ਗਂ ਅਪਚ੍ਚਵੇਕ੍ਖਿਤ੍ਵਾ ਯਥਾ ਤ੍ਵਂ ਪਟਿਪਨ੍ਨੋ, ਏਵਮੇਵ ਅਞ੍ਞੇਸਮ੍ਪਿ ਯੇਸਞ੍ਚੇਤਂ ਅਸਙ੍ਖਾਤਂ ਅਵੀਮਂਸਿਤਂ, ਤੇ ਯਥਾ ਤ੍ਵਂ ਤਥੇਵ ਤਣ੍ਹਾਵਸਿਕਾ ਹੁਤ੍ਵਾ ਧਨਂ ਪਹਾਯ ਗਮਨਮਗ੍ਗਂ ਅਨਪੇਕ੍ਖਿਤ੍ਵਾ ਪਟਿਪਨ੍ਨਾ ਚਕ੍ਕਧਾਰਿਨੋ ਹੋਨ੍ਤਿ. ਕਮ੍ਮਂ ਸਮੇਕ੍ਖੇਤਿ ਤਸ੍ਮਾ ਪਣ੍ਡਿਤੋ ਪੁਰਿਸੋ ਅਤ੍ਤਨਾ ਕਤ੍ਤਬ੍ਬਕਮ੍ਮਂ ‘‘ਸਦੋਸਂ ਨੁ ਖੋ, ਨਿਦ੍ਦੋਸ’’ਨ੍ਤਿ ਸਮੇਕ੍ਖੇਯ੍ਯ ਪਚ੍ਚਵੇਕ੍ਖੇਯ੍ਯ. ਵਿਪੁਲਞ੍ਚ ਭੋਗਨ੍ਤਿ ਅਤ੍ਤਨੋ ਧਮ੍ਮਲਦ੍ਧਂ ਧਨਰਾਸਿਮ੍ਪਿ ਸਮੇਕ੍ਖੇਯ੍ਯ. ਨਾਤਿਵਤ੍ਤੇਯ੍ਯਾਤਿ ਤਂ ਤਾਦਿਸਂ ਪੁਗ੍ਗਲਂ ਇਦਂ ਚਕ੍ਕਂ ਨ ਅਤਿਵਤ੍ਤੇਯ੍ਯ ਨਾਵਤ੍ਥਰੇਯ੍ਯ. ‘‘ਨਾਤਿਵਤ੍ਤੇਤੀ’’ਤਿਪਿ ਪਾਠੋ, ਨਾਵਤ੍ਥਰਤੀਤਿ ਅਤ੍ਥੋ.

ਤਂ ਸੁਤ੍ਵਾ ਮਿਤ੍ਤਵਿਨ੍ਦਕੋ ‘‘ਇਮਿਨਾ ਦੇਵਪੁਤ੍ਤੇਨ ਮਯਾ ਕਤਕਮ੍ਮਂ ਤਥਤੋ ਞਾਤਂ, ਅਯਂ ਮਯ੍ਹਂ ਪਚ੍ਚਨਪਮਾਣਮ੍ਪਿ ਜਾਨਿਸ੍ਸਤਿ, ਪੁਚ੍ਛਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਨਵਮਂ ਗਾਥਮਾਹ –

੯. ‘‘ਕੀਵਚਿਰਂ ਨੁ ਮੇ ਯਕ੍ਖ, ਚਕ੍ਕਂ ਸਿਰਸਿ ਠਸ੍ਸਤਿ;

ਕਤਿ ਵਸ੍ਸਸਹਸ੍ਸਾਨਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ.

ਅਥਸ੍ਸ ਕਥੇਨ੍ਤੋ ਮਹਾਸਤ੍ਤੋ ਦਸਮਂ ਗਾਥਮਾਹ –

੧੦. ‘‘ਅਤਿਸਰੋ ਪਚ੍ਚਸਰੋ, ਮਿਤ੍ਤਵਿਨ੍ਦ ਸੁਣੋਹਿ ਮੇ;

ਚਕ੍ਕਂ ਤੇ ਸਿਰਸਿ ਮਾਵਿਦ੍ਧਂ, ਨ ਤਂ ਜੀਵਂ ਪਮੋਕ੍ਖਸੀ’’ਤਿ.

ਤਤ੍ਥ ਅਤਿਸਰੋਤਿ ਅਤਿਸਰੀਤਿਪਿ ਅਤਿਸਰੋ, ਅਤਿਸਰਿਸ੍ਸਤੀਤਿਪਿ ਅਤਿਸਰੋ. ਪਚ੍ਚਸਰੋਤਿ ਤਸ੍ਸੇਵ ਵੇਵਚਨਂ. ਇਦਂ ਵੁਤ੍ਤਂ ਹੋਤਿ – ਸਮ੍ਮ ਮਿਤ੍ਤਵਿਨ੍ਦਕ, ਸੁਣੋਹਿ ਮੇ ਵਚਨਂ, ਤ੍ਵਞ੍ਹਿ ਅਤਿਦਾਰੁਣਸ੍ਸ ਕਮ੍ਮਸ੍ਸ ਕਤਤ੍ਤਾ ਅਤਿਸਰੋ, ਤਸ੍ਸ ਪਨ ਨ ਸਕ੍ਕਾ ਵਸ੍ਸਗਣਨਾਯ ਵਿਪਾਕੋ ਪਞ੍ਞਾਪੇਤੁਨ੍ਤਿ ਅਪਰਿਮਾਣਂ ਅਤਿਮਹਨ੍ਤਂ ਵਿਪਾਕਦੁਕ੍ਖਂ ਸਰਿਸ੍ਸਸਿ ਪਟਿਪਜ੍ਜਿਸ੍ਸਸੀਤਿ ਅਤਿਸਰੋ. ਤੇਨ ਤੇ ‘‘ਏਤ੍ਤਕਾਨਿ ਵਸ੍ਸਸਹਸ੍ਸਾਨੀ’’ਤਿ ਵਤ੍ਤੁਂ ਨ ਸਕ੍ਕੋਮਿ. ਸਿਰਸਿਮਾਵਿਦ੍ਧਨ੍ਤਿ ਯਂ ਪਨ ਤੇ ਇਦਂ ਚਕ੍ਕਂ ਸਿਰਸ੍ਮਿਂ ਆਵਿਦ੍ਧਂ ਕੁਮ੍ਭਕਾਰਚਕ੍ਕਮਿਵ ਭਮਤਿ. ਨ ਤਂ ਜੀਵਂ ਪਮੋਕ੍ਖਸੀਤਿ ਤਂ ਤ੍ਵਂ ਯਾਵ ਤੇ ਕਮ੍ਮਵਿਪਾਕੋ ਨ ਖੀਯਤਿ, ਤਾਵ ਜੀਵਮਾਨੋ ਨ ਪਮੋਕ੍ਖਸਿ, ਕਮ੍ਮਵਿਪਾਕੇ ਪਨ ਖੀਣੇ ਇਦਂ ਚਕ੍ਕਂ ਪਹਾਯ ਯਥਾਕਮ੍ਮਂ ਗਮਿਸ੍ਸਸੀਤਿ.

ਇਦਂ ਵਤ੍ਵਾ ਦੇਵਪੁਤ੍ਤੋ ਅਤ੍ਤਨੋ ਦੇਵਟ੍ਠਾਨਮੇਵ ਗਤੋ, ਇਤਰੋਪਿ ਮਹਾਦੁਕ੍ਖਂ ਪਟਿਪਜ੍ਜਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਮਿਤ੍ਤਵਿਨ੍ਦਕੋ ਅਯਂ ਦੁਬ੍ਬਚਭਿਕ੍ਖੁ ਅਹੋਸਿ, ਦੇਵਰਾਜਾ ਪਨ ਅਹਮੇਵ ਅਹੋਸਿ’’ਨ੍ਤਿ.

ਚਤੁਦ੍ਵਾਰਜਾਤਕਵਣ੍ਣਨਾ ਪਠਮਾ.

[੪੪੦] ੨. ਕਣ੍ਹਜਾਤਕਵਣ੍ਣਨਾ

ਕਣ੍ਹੋ ਵਤਾਯਂ ਪੁਰਿਸੋਤਿ ਇਦਂ ਸਤ੍ਥਾ ਕਪਿਲਵਤ੍ਥੁਂ ਉਪਨਿਸ੍ਸਾਯ ਨਿਗ੍ਰੋਧਾਰਾਮੇ ਵਿਹਰਨ੍ਤੋ ਸਿਤਪਾਤੁਕਮ੍ਮਂ ਆਰਬ੍ਭ ਕਥੇਸਿ. ਤਦਾ ਕਿਰ ਸਤ੍ਥਾ ਸਾਯਨ੍ਹਸਮਯੇ ਨਿਗ੍ਰੋਧਾਰਾਮੇ ਭਿਕ੍ਖੁਸਙ੍ਘਪਰਿਵੁਤੋ ਜਙ੍ਘਵਿਹਾਰਂ ਅਨੁਚਙ੍ਕਮਮਾਨੋ ਅਞ੍ਞਤਰਸ੍ਮਿਂ ਪਦੇਸੇ ਸਿਤਂ ਪਾਤ੍ਵਾਕਾਸਿ. ਆਨਨ੍ਦਤ੍ਥੇਰੋ ‘‘ਕੋ ਨੁ ਖੋ ਹੇਤੁ, ਕੋ ਪਚ੍ਚਯੋ ਭਗਵਤੋ ਸਿਤਸ੍ਸ ਪਾਤੁਕਮ੍ਮਾਯ, ਨ ਅਹੇਤੁ ਤਥਾਗਤਾ ਸਿਤਂ ਪਾਤੁਕਰੋਨ੍ਤਿ, ਪੁਚ੍ਛਿਸ੍ਸਾਮਿ ਤਾਵਾ’’ਤਿ ਅਞ੍ਜਲਿਂ ਪਗ੍ਗਯ੍ਹ ਸਿਤਕਾਰਣਂ ਪੁਚ੍ਛਿ. ਅਥਸ੍ਸ ਸਤ੍ਥਾ ‘‘ਭੂਤਪੁਬ੍ਬਂ, ਆਨਨ੍ਦ, ਕਣ੍ਹੋ ਨਾਮ ਇਸਿ ਅਹੋਸਿ, ਸੋ ਇਮਸ੍ਮਿਂ ਭੂਮਿਪ੍ਪਦੇਸੇ ਵਿਹਾਸਿ ਝਾਯੀ ਝਾਨਰਤੋ, ਤਸ੍ਸ ਸੀਲਤੇਜੇਨ ਸਕ੍ਕਸ੍ਸ ਭਵਨਂ ਕਮ੍ਪੀ’’ਤਿ ਸਿਤਕਾਰਣਂ ਵਤ੍ਵਾ ਤਸ੍ਸ ਵਤ੍ਥੁਨੋ ਅਪਾਕਟਤ੍ਤਾ ਥੇਰੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬਾਰਾਣਸਿਯਂ ਏਕੇਨ ਅਸੀਤਿਕੋਟਿਵਿਭਵੇਨ ਅਪੁਤ੍ਤਕੇਨ ਬ੍ਰਾਹ੍ਮਣੇਨ ਸੀਲਂ ਸਮਾਦਿਯਿਤ੍ਵਾ ਪੁਤ੍ਤੇ ਪਤ੍ਥਿਤੇ ਬੋਧਿਸਤ੍ਤੋ ਤਸ੍ਸ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ. ਕਾਲ਼ਵਣ੍ਣਤ੍ਤਾ ਪਨਸ੍ਸ ਨਾਮਗ੍ਗਹਣਦਿਵਸੇ ‘‘ਕਣ੍ਹਕੁਮਾਰੋ’’ਤਿ ਨਾਮਂ ਅਕਂਸੁ. ਸੋ ਸੋਲ਼ਸਵਸ੍ਸਕਾਲੇ ਮਣਿਪਟਿਮਾ ਵਿਯ ਸੋਭਗ੍ਗਪ੍ਪਤ੍ਤੋ ਹੁਤ੍ਵਾ ਪਿਤਰਾ ਸਿਪ੍ਪੁਗ੍ਗਹਣਤ੍ਥਾਯ ਪੇਸਿਤੋ ਤਕ੍ਕਸਿਲਾਯਂ ਸਬ੍ਬਸਿਪ੍ਪਾਨਿ ਉਗ੍ਗਹੇਤ੍ਵਾ ਪਚ੍ਚਾਗਚ੍ਛਿ. ਅਥ ਨਂ ਪਿਤਾ ਅਨੁਰੂਪੇਨ ਦਾਰੇਨ ਸਂਯੋਜੇਸਿ. ਸੋ ਅਪਰਭਾਗੇ ਮਾਤਾਪਿਤੂਨਂ ਅਚ੍ਚਯੇਨ ਸਬ੍ਬਿਸ੍ਸਰਿਯਂ ਪਟਿਪਜ੍ਜਿ. ਅਥੇਕਦਿਵਸਂ ਰਤਨਕੋਟ੍ਠਾਗਾਰਾਨਿ ਵਿਲੋਕੇਤ੍ਵਾ ਵਰਪਲ੍ਲਙ੍ਕਮਜ੍ਝਗਤੋ ਸੁਵਣ੍ਣਪਟ੍ਟਂ ਆਹਰਾਪੇਤ੍ਵਾ ‘‘ਏਤ੍ਤਕਂ ਧਨਂ ਅਸੁਕੇਨ ਉਪ੍ਪਾਦਿਤਂ, ਏਤ੍ਤਕਂ ਅਸੁਕੇਨਾ’’ਤਿ ਪੁਬ੍ਬਞਾਤੀਹਿ ਸੁਵਣ੍ਣਪਟ੍ਟੇ ਲਿਖਿਤਾਨਿ ਅਕ੍ਖਰਾਨਿ ਦਿਸ੍ਵਾ ਚਿਨ੍ਤੇਸਿ ‘‘ਯੇਹਿ ਇਮਂ ਧਨਂ ਉਪ੍ਪਾਦਿਤਂ, ਤੇ ਨ ਪਞ੍ਞਾਯਨ੍ਤਿ, ਧਨਮੇਵ ਪਞ੍ਞਾਯਤਿ, ਏਕੋਪਿ ਇਦਂ ਧਨਂ ਗਹੇਤ੍ਵਾ ਗਤੋ ਨਾਮ ਨਤ੍ਥਿ, ਨ ਖੋ ਪਨ ਸਕ੍ਕਾ ਧਨਭਣ੍ਡਿਕਂ ਬਨ੍ਧਿਤ੍ਵਾ ਪਰਲੋਕਂ ਗਨ੍ਤੁਂ. ਪਞ੍ਚਨ੍ਨਂ ਵੇਰਾਨਂ ਸਾਧਾਰਣਭਾਵੇਨ ਹਿ ਅਸਾਰਸ੍ਸ ਧਨਸ੍ਸ ਦਾਨਂ ਸਾਰੋ, ਬਹੁਰੋਗਸਾਧਾਰਣਭਾਵੇਨ ਅਸਾਰਸ੍ਸ ਸਰੀਰਸ੍ਸ ਸੀਲਵਨ੍ਤੇਸੁ ਅਭਿਵਾਦਨਾਦਿਕਮ੍ਮਂ ਸਾਰੋ, ਅਨਿਚ੍ਚਾਭਿਭੂਤਭਾਵੇਨ ਅਸਾਰਸ੍ਸ ਜੀਵਿਤਸ੍ਸ ਅਨਿਚ੍ਚਾਦਿਵਸੇਨ ਵਿਪਸ੍ਸਨਾਯੋਗੋ ਸਾਰੋ, ਤਸ੍ਮਾ ਅਸਾਰੇਹਿ ਭੋਗੇਹਿ ਸਾਰਗ੍ਗਹਣਤ੍ਥਂ ਦਾਨਂ ਦਸ੍ਸਾਮੀ’’ਤਿ.

ਸੋ ਆਸਨਾ ਵੁਟ੍ਠਾਯ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਰਾਜਾਨਂ ਆਪੁਚ੍ਛਿਤ੍ਵਾ ਮਹਾਦਾਨਂ ਪਵਤ੍ਤੇਸਿ. ਯਾਵ ਸਤ੍ਤਮਾ ਦਿਵਸਾ ਧਨਂ ਅਪਰਿਕ੍ਖੀਯਮਾਨਂ ਦਿਸ੍ਵਾ ‘‘ਕਿਂ ਮੇ ਧਨੇਨ, ਯਾਵ ਮਂ ਜਰਾ ਨਾਭਿਭਵਤਿ, ਤਾਵਦੇਵ ਪਬ੍ਬਜਿਤ੍ਵਾ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕਪਰਾਯਣੋ ਭਵਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗੇਹੇ ਸਬ੍ਬਦ੍ਵਾਰਾਨਿ ਵਿਵਰਾਪੇਤ੍ਵਾ ‘‘ਦਿਨ੍ਨਂ ਮੇ, ਹਰਨ੍ਤੂ’’ਤਿ ਅਸੁਚਿਂ ਵਿਯ ਜਿਗੁਚ੍ਛਨ੍ਤੋ ਵਤ੍ਥੁਕਾਮੇ ਪਹਾਯ ਮਹਾਜਨਸ੍ਸ ਰੋਦਨ੍ਤਸ੍ਸ ਪਰਿਦੇਵਨ੍ਤਸ੍ਸ ਨਗਰਾ ਨਿਕ੍ਖਮਿਤ੍ਵਾ ਹਿਮਵਨ੍ਤਪਦੇਸਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਤ੍ਤਨੋ ਵਸਨਤ੍ਥਾਯ ਰਮਣੀਯਂ ਭੂਮਿਭਾਗਂ ਓਲੋਕੇਨ੍ਤੋ ਇਮਂ ਠਾਨਂ ਪਤ੍ਵਾ ‘‘ਇਧ ਵਸਿਸ੍ਸਾਮੀ’’ਤਿ ਏਕਂ ਇਨ੍ਦਵਾਰੁਣੀਰੁਕ੍ਖਂ ਗੋਚਰਗਾਮਂ ਅਧਿਟ੍ਠਾਯ ਤਸ੍ਸੇਵ ਰੁਕ੍ਖਸ੍ਸ ਮੂਲੇ ਵਿਹਾਸਿ. ਗਾਮਨ੍ਤਸੇਨਾਸਨਂ ਪਹਾਯ ਆਰਞ੍ਞਿਕੋ ਅਹੋਸਿ, ਪਣ੍ਣਸਾਲਂ ਅਕਤ੍ਵਾ ਰੁਕ੍ਖਮੂਲਿਕੋ ਅਹੋਸਿ, ਅਬ੍ਭੋਕਾਸਿਕੋ ਨੇਸਜ੍ਜਿਕੋ. ਸਚੇ ਨਿਪਜ੍ਜਿਤੁਕਾਮੋ, ਭੂਮਿਯਂਯੇਵ ਨਿਪਜ੍ਜਤਿ, ਦਨ੍ਤਮੂਸਲਿਕੋ ਹੁਤ੍ਵਾ ਅਨਗ੍ਗਿਪਕ੍ਕਮੇਵ ਖਾਦਤਿ, ਥੁਸਪਰਿਕ੍ਖਿਤ੍ਤਂ ਕਿਞ੍ਚਿ ਨ ਖਾਦਤਿ, ਏਕਦਿਵਸਂ ਏਕਵਾਰਮੇਵ ਖਾਦਤਿ, ਏਕਾਸਨਿਕੋ ਅਹੋਸਿ. ਖਮਾਯ ਪਥਵੀਆਪਤੇਜਵਾਯੁਸਮੋ ਹੁਤ੍ਵਾ ਏਤੇ ਏਤ੍ਤਕੇ ਧੁਤਙ੍ਗਗੁਣੇ ਸਮਾਦਾਯ ਵਤ੍ਤਤਿ, ਇਮਸ੍ਮਿਂ ਕਿਰ ਜਾਤਕੇ ਬੋਧਿਸਤ੍ਤੋ ਪਰਮਪ੍ਪਿਚ੍ਛੋ ਅਹੋਸਿ. ਸੋ ਨ ਚਿਰਸ੍ਸੇਵ ਅਭਿਞ੍ਞਾ ਚ ਸਮਾਪਤ੍ਤਿਯੋ ਚ ਨਿਬ੍ਬਤ੍ਤੇਤ੍ਵਾ ਝਾਨਕੀਲ਼ਂ ਕੀਲ਼ਨ੍ਤੋ ਤਤ੍ਥੇਵ ਵਸਤਿ, ਫਲਾਫਲਤ੍ਥਮ੍ਪਿ ਅਞ੍ਞਤ੍ਥ ਨ ਗਚ੍ਛਤਿ, ਰੁਕ੍ਖਸ੍ਸ ਫਲਿਤਕਾਲੇ ਫਲਂ ਖਾਦਤਿ, ਪੁਪ੍ਫਿਤਕਾਲੇ ਪੁਪ੍ਫਂ ਖਾਦਤਿ, ਸਪਤ੍ਤਕਾਲੇ ਪਤ੍ਤਾਨਿ ਖਾਦਤਿ, ਨਿਪ੍ਪਤ੍ਤਕਾਲੇ ਪਪਟਿਕਂ ਖਾਦਤਿ. ਏਵਂ ਪਰਮਸਨ੍ਤੁਟ੍ਠੋ ਹੁਤ੍ਵਾ ਇਮਸ੍ਮਿਂ ਠਾਨੇ ਚਿਰਂ ਵਸਤਿ.

ਸੋ ਏਕਦਿਵਸਂ ਪੁਬ੍ਬਣ੍ਹਸਮਯੇ ਤਸ੍ਸ ਰੁਕ੍ਖਸ੍ਸ ਪਕ੍ਕਾਨਿ ਫਲਾਨਿ ਗਣ੍ਹਿ, ਗਣ੍ਹਨ੍ਤੋ ਪਨ ਲੋਲੁਪ੍ਪਚਾਰੇਨ ਉਟ੍ਠਾਯ ਅਞ੍ਞਸ੍ਮਿਂ ਪਦੇਸੇ ਨ ਗਣ੍ਹਾਤਿ, ਯਥਾਨਿਸਿਨ੍ਨੋਵ ਹਤ੍ਥਂ ਪਸਾਰੇਤ੍ਵਾ ਹਤ੍ਥਪ੍ਪਸਾਰਣਟ੍ਠਾਨੇ ਠਿਤਾਨਿ ਫਲਾਨਿ ਸਂਹਰਤਿ, ਤੇਸੁਪਿ ਮਨਾਪਾਮਨਾਪਂ ਅਵਿਚਿਨਿਤ੍ਵਾ ਸਮ੍ਪਤ੍ਤਸਮ੍ਪਤ੍ਤਮੇਵ ਗਣ੍ਹਾਤਿ. ਏਵਂ ਪਰਮਸਨ੍ਤੁਟ੍ਠਸ੍ਸ ਤਸ੍ਸ ਸੀਲਤੇਜੇਨ ਸਕ੍ਕਸ੍ਸ ਪਣ੍ਡੁਕਮ੍ਬਲਸਿਲਾਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਤਂ ਕਿਰ ਸਕ੍ਕਸ੍ਸ ਆਯੁਕ੍ਖਯੇਨ ਵਾ ਉਣ੍ਹਂ ਹੋਤਿ ਪੁਞ੍ਞਕ੍ਖਯੇਨ ਵਾ, ਅਞ੍ਞਸ੍ਮਿਂ ਵਾ ਮਹਾਨੁਭਾਵਸਤ੍ਤੇ ਤਂ ਠਾਨਂ ਪਤ੍ਥੇਨ੍ਤੇ, ਧਮ੍ਮਿਕਾਨਂ ਵਾ ਮਹਿਦ੍ਧਿਕਸਮਣਬ੍ਰਾਹ੍ਮਣਾਨਂ ਸੀਲਤੇਜੇਨ ਉਣ੍ਹਂ ਹੋਤਿ. ਸਕ੍ਕੋ ‘‘ਕੋ ਨੁ ਖੋ ਮਂ ਠਾਨਾ ਚਾਵੇਤੁਕਾਮੋ’’ਤਿ ਆਵਜ੍ਜੇਤ੍ਵਾ ਇਮਸ੍ਮਿਂ ਪਦੇਸੇ ਵਸਨ੍ਤਂ ਕਣ੍ਹਂ ਇਸਿਂ ਰੁਕ੍ਖਫਲਾਨਿ ਉਚ੍ਚਿਨਨ੍ਤਂ ਦਿਸ੍ਵਾ ਚਿਨ੍ਤੇਸਿ ‘‘ਅਯਂ ਇਸਿ ਘੋਰਤਪੋ ਪਰਮਜਿਤਿਨ੍ਦ੍ਰਿਯੋ, ਇਮਂ ਧਮ੍ਮਕਥਾਯ ਸੀਹਨਾਦਂ ਨਦਾਪੇਤ੍ਵਾ ਸੁਕਾਰਣਂ ਸੁਤ੍ਵਾ ਵਰੇਨ ਸਨ੍ਤਪ੍ਪੇਤ੍ਵਾ ਇਮਮਸ੍ਸ ਰੁਕ੍ਖਂ ਧੁਵਫਲਂ ਕਤ੍ਵਾ ਆਗਮਿਸ੍ਸਾਮੀ’’ਤਿ. ਸੋ ਮਹਨ੍ਤੇਨਾਨੁਭਾਵੇਨ ਸੀਘਂ ਓਤਰਿਤ੍ਵਾ ਤਸ੍ਮਿਂ ਰੁਕ੍ਖਮੂਲੇ ਤਸ੍ਸ ਪਿਟ੍ਠਿਪਸ੍ਸੇ ਠਤ੍ਵਾ ‘‘ਅਤ੍ਤਨੋ ਅਵਣ੍ਣੇ ਕਥਿਤੇ ਕੁਜ੍ਝਿਸ੍ਸਤਿ ਨੁ ਖੋ, ਨੋ’’ਤਿ ਵੀਮਂਸਨ੍ਤੋ ਪਠਮਂ ਗਾਥਮਾਹ –

੧੧. ‘‘ਕਣ੍ਹੋ ਵਤਾਯਂ ਪੁਰਿਸੋ, ਕਣ੍ਹਂ ਭੁਞ੍ਜਤਿ ਭੋਜਨਂ;

ਕਣ੍ਹੇ ਭੂਮਿਪਦੇਸਸ੍ਮਿਂ, ਨ ਮਯ੍ਹਂ ਮਨਸੋ ਪਿਯੋ’’ਤਿ.

ਤਤ੍ਥ ਕਣ੍ਹੋਤਿ ਕਾਲ਼ਵਣ੍ਣੋ. ਭੋਜਨਨ੍ਤਿ ਰੁਕ੍ਖਫਲਭੋਜਨਂ.

ਕਣ੍ਹੋ ਇਸਿ ਸਕ੍ਕਸ੍ਸ ਵਚਨਂ ਸੁਤ੍ਵਾ ‘‘ਕੋ ਨੁ ਖੋ ਮਯਾ ਸਦ੍ਧਿਂ ਕਥੇਤੀ’’ਤਿ ਦਿਬ੍ਬਚਕ੍ਖੁਨਾ ਉਪਧਾਰੇਨ੍ਤੋ ‘‘ਸਕ੍ਕੋ’’ਤਿ ਞਤ੍ਵਾ ਅਨਿਵਤ੍ਤਿਤ੍ਵਾ ਅਨੋਲੋਕੇਤ੍ਵਾਵ ਦੁਤਿਯਂ ਗਾਥਮਾਹ –

੧੨. ‘‘ਨ ਕਣ੍ਹੋ ਤਚਸਾ ਹੋਤਿ, ਅਨ੍ਤੋਸਾਰੋ ਹਿ ਬ੍ਰਾਹ੍ਮਣੋ;

ਯਸ੍ਮਿਂ ਪਾਪਾਨਿ ਕਮ੍ਮਾਨਿ, ਸ ਵੇ ਕਣ੍ਹੋ ਸੁਜਮ੍ਪਤੀ’’ਤਿ.

ਤਤ੍ਥ ਤਚਸਾਤਿ ਤਚੇਨ ਕਣ੍ਹੋ ਨਾਮ ਨ ਹੋਤੀਤਿ ਅਤ੍ਥੋ. ਅਨ੍ਤੋਸਾਰੋਤਿ ਅਬ੍ਭਨ੍ਤਰੇ ਸੀਲਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਸਾਰੇਹਿ ਸਮਨ੍ਨਾਗਤੋ. ਏਵਰੂਪੋ ਹਿ ਬਾਹਿਤਪਾਪਤ੍ਤਾ ਬ੍ਰਾਹ੍ਮਣੋ ਨਾਮ ਹੋਤਿ. ਸ ਵੇਤਿ ਯਸ੍ਮਿਂ ਪਨ ਪਾਪਾਨਿ ਕਮ੍ਮਾਨਿ ਅਤ੍ਥਿ, ਸੋ ਯਤ੍ਥ ਕਤ੍ਥਚਿ ਕੁਲੇ ਜਾਤੋਪਿ ਯੇਨ ਕੇਨਚਿ ਸਰੀਰਵਣ੍ਣੇਨ ਸਮਨ੍ਨਾਗਤੋਪਿ ਕਾਲ਼ਕੋਵ.

ਏਵਞ੍ਚ ਪਨ ਵਤ੍ਵਾ ਇਮੇਸਂ ਸਤ੍ਤਾਨਂ ਕਣ੍ਹਭਾਵਕਰਾਨਿ ਪਾਪਕਮ੍ਮਾਨਿ ਏਕਵਿਧਾਦਿਭੇਦੇਹਿ ਵਿਤ੍ਥਾਰੇਤ੍ਵਾ ਸਬ੍ਬਾਨਿਪਿ ਤਾਨਿ ਗਰਹਿਤ੍ਵਾ ਸੀਲਾਦਯੋ ਗੁਣੇ ਪਸਂਸਿਤ੍ਵਾ ਆਕਾਸੇ ਚਨ੍ਦਂ ਉਟ੍ਠਾਪੇਨ੍ਤੋ ਵਿਯ ਸਕ੍ਕਸ੍ਸ ਧਮ੍ਮਂ ਦੇਸੇਸਿ. ਸਕ੍ਕੋ ਤਸ੍ਸ ਧਮ੍ਮਕਥਂ ਸੁਤ੍ਵਾ ਪਮੁਦਿਤੋ ਸੋਮਨਸ੍ਸਜਾਤੋ ਮਹਾਸਤ੍ਤਂ ਵਰੇਨ ਨਿਮਨ੍ਤੇਨ੍ਤੋ ਤਤਿਯਂ ਗਾਥਮਾਹ –

੧੩. ‘‘ਏਤਸ੍ਮਿਂ ਤੇ ਸੁਲਪਿਤੇ, ਪਤਿਰੂਪੇ ਸੁਭਾਸਿਤੇ;

ਵਰਂ ਬ੍ਰਾਹ੍ਮਣ ਤੇ ਦਮ੍ਮਿ, ਯਂ ਕਿਞ੍ਚਿ ਮਨਸਿਚ੍ਛਸੀ’’ਤਿ.

ਤਤ੍ਥ ਏਤਸ੍ਮਿਨ੍ਤਿ ਯਂ ਇਦਂ ਤਯਾ ਸਬ੍ਬਞ੍ਞੁਬੁਦ੍ਧੇਨ ਵਿਯ ਸੁਲਪਿਤਂ, ਤਸ੍ਮਿਂ ਸੁਲਪਿਤੇ ਤੁਮ੍ਹਾਕਮੇਵ ਅਨੁਚ੍ਛਵਿਕਤ੍ਤਾ ਪਤਿਰੂਪੇ ਸੁਭਾਸਿਤੇ ਯਂ ਕਿਞ੍ਚਿ ਮਨਸਾ ਇਚ੍ਛਸਿ, ਸਬ੍ਬਂ ਤੇ ਯਂ ਵਰਂ ਇਚ੍ਛਿਤਂ ਪਤ੍ਥਿਤਂ, ਤਂ ਦਮ੍ਮੀਤਿ ਅਤ੍ਥੋ.

ਤਂ ਸੁਤ੍ਵਾ ਮਹਾਸਤ੍ਤੋ ਚਿਨ੍ਤੇਸਿ ‘‘ਅਯਂ ਕਿਂ ਨੁ ਖੋ ਅਤ੍ਤਨੋ ਅਵਣ੍ਣੇ ਕਥਿਤੇ ਕੁਜ੍ਝਿਸ੍ਸਤਿ, ਨੋਤਿ ਮਂ ਵੀਮਂਸਨ੍ਤੋ ਮਯ੍ਹਂ ਛਵਿਵਣ੍ਣਞ੍ਚ ਭੋਜਨਞ੍ਚ ਵਸਨਟ੍ਠਾਨਞ੍ਚ ਗਰਹਿਤ੍ਵਾ ਇਦਾਨਿ ਮਯ੍ਹਂ ਅਕੁਦ੍ਧਭਾਵਂ ਞਤ੍ਵਾ ਪਸਨ੍ਨਚਿਤ੍ਤੋ ਵਰਂ ਦੇਤਿ, ਮਂ ਖੋ ਪਨੇਸ ‘ਸਕ੍ਕਿਸ੍ਸਰਿਯਬ੍ਰਹ੍ਮਿਸ੍ਸਰਿਯਾਨਂ ਅਤ੍ਥਾਯ ਬ੍ਰਹ੍ਮਚਰਿਯਂ ਚਰਤੀ’ਤਿਪਿ ਮਞ੍ਞੇਯ੍ਯ, ਤਤ੍ਰਸ੍ਸ ਨਿਕ੍ਕਙ੍ਖਭਾਵਤ੍ਥਂ ਮਯ੍ਹਂ ਪਰੇਸੁ ਕੋਧੋ ਵਾ ਦੋਸੋ ਵਾ ਮਾ ਉਪ੍ਪਜ੍ਜਤੁ, ਪਰਸਮ੍ਪਤ੍ਤਿਯਂ ਲੋਭੋ ਵਾ ਪਰੇਸੁ ਸਿਨੇਹੋ ਵਾ ਮਾ ਉਪ੍ਪਜ੍ਜਤੁ, ਮਜ੍ਝਤ੍ਤੋਵ ਭਵੇਯ੍ਯਨ੍ਤਿ ਇਮੇ ਮਯਾ ਚਤ੍ਤਾਰੋ ਵਰੇ ਗਹੇਤੁਂ ਵਟ੍ਟਤੀ’’ਤਿ. ਸੋ ਤਸ੍ਸ ਨਿਕ੍ਕਙ੍ਖਭਾਵਤ੍ਥਾਯ ਚਤ੍ਤਾਰੋ ਵਰੇ ਗਣ੍ਹਨ੍ਤੋ ਚਤੁਤ੍ਥਂ ਗਾਥਮਾਹ –

੧੪. ‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਸੁਨਿਕ੍ਕੋਧਂ ਸੁਨਿਦ੍ਦੋਸਂ, ਨਿਲ੍ਲੋਭਂ ਵੁਤ੍ਤਿਮਤ੍ਤਨੋ;

ਨਿਸ੍ਨੇਹਮਭਿਕਙ੍ਖਾਮਿ, ਏਤੇ ਮੇ ਚਤੁਰੋ ਵਰੇ’’ਤਿ.

ਤਤ੍ਥ ਵਰਞ੍ਚੇ ਮੇ ਅਦੋ ਸਕ੍ਕਾਤਿ ਸਚੇ ਤ੍ਵਂ ਮਯ੍ਹਂ ਵਰਂ ਅਦਾਸਿ. ਸੁਨਿਕ੍ਕੋਧਨ੍ਤਿ ਅਕੁਜ੍ਝਨਵਸੇਨ ਸੁਟ੍ਠੁ ਨਿਕ੍ਕੋਧਂ. ਸੁਨਿਦ੍ਦੋਸਨ੍ਤਿ ਅਦੁਸ੍ਸਨਵਸੇਨ ਸੁਟ੍ਠੁ ਨਿਦ੍ਦੋਸਂ. ਨਿਲ੍ਲੋਭਨ੍ਤਿ ਪਰਸਮ੍ਪਤ੍ਤੀਸੁ ਨਿਲ੍ਲੋਭਂ. ਵੁਤ੍ਤਿਮਤ੍ਤਨੋਤਿ ਏਵਰੂਪਂ ਅਤ੍ਤਨੋ ਵੁਤ੍ਤਿਂ. ਨਿਸ੍ਨੇਹਨ੍ਤਿ ਪੁਤ੍ਤਧੀਤਾਦੀਸੁ ਵਾ ਸਵਿਞ੍ਞਾਣਕੇਸੁ ਧਨਧਞ੍ਞਾਦੀਸੁ ਵਾ ਅਵਿਞ੍ਞਾਣਕੇਸੁ ਅਤ੍ਤਨੋ ਸਨ੍ਤਕੇਸੁਪਿ ਨਿਸ੍ਨੇਹਂ ਅਪਗਤਲੋਭਂ. ਅਭਿਕਙ੍ਖਾਮੀਤਿ ਏਵਰੂਪਂ ਇਮੇਹਿ ਚਤੂਹਙ੍ਗੇਹਿ ਸਮਨ੍ਨਾਗਤਂ ਅਤ੍ਤਨੋ ਵੁਤ੍ਤਿਂ ਅਭਿਕਙ੍ਖਾਮਿ. ਏਤੇ ਮੇ ਚਤੁਰੋ ਵਰੇਤਿ ਏਤੇ ਨਿਕ੍ਕੋਧਾਦਿਕੇ ਚਤੁਰੋ ਮਯ੍ਹਂ ਵਰੇ ਦੇਹੀਤਿ.

ਕਿਂ ਪਨੇਸ ਨ ਜਾਨਾਤਿ ‘‘ਯਥਾ ਨ ਸਕ੍ਕਾ ਸਕ੍ਕਸ੍ਸ ਸਨ੍ਤਿਕੇ ਵਰਂ ਗਹੇਤ੍ਵਾ ਵਰੇਨ ਕੋਧਾਦਯੋ ਹਨਿਤੁ’’ਨ੍ਤਿ. ਨੋ ਨ ਜਾਨਾਤਿ, ਸਕ੍ਕੇ ਖੋ ਪਨ ਵਰਂ ਦੇਨ੍ਤੇ ਨ ਗਣ੍ਹਾਮੀਤਿ ਵਚਨਂ ਨ ਯੁਤ੍ਤਨ੍ਤਿ ਤਸ੍ਸ ਚ ਨਿਕ੍ਕਙ੍ਖਭਾਵਤ੍ਥਾਯ ਗਣ੍ਹਿ. ਤਤੋ ਸਕ੍ਕੋ ਚਿਨ੍ਤੇਸਿ ‘‘ਕਣ੍ਹਪਣ੍ਡਿਤੋ ਵਰਂ ਗਣ੍ਹਨ੍ਤੋ ਅਤਿਵਿਯ ਅਨਵਜ੍ਜੇ ਵਰੇ ਗਣ੍ਹਿ, ਏਤੇਸੁ ਵਰੇਸੁ ਗੁਣਦੋਸਂ ਏਤਮੇਵ ਪੁਚ੍ਛਿਸ੍ਸਾਮੀ’’ਤਿ. ਅਥ ਨਂ ਪੁਚ੍ਛਨ੍ਤੋ ਪਞ੍ਚਮਂ ਗਾਥਮਾਹ –

੧੫. ‘‘ਕਿਂਨੁ ਕੋਧੇ ਵਾ ਦੋਸੇ ਵਾ, ਲੋਭੇ ਸ੍ਨੇਹੇ ਚ ਬ੍ਰਾਹ੍ਮਣ;

ਆਦੀਨਵਂ ਤ੍ਵਂ ਪਸ੍ਸਸਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ.

ਤਸ੍ਸਤ੍ਥੋ – ਬ੍ਰਾਹ੍ਮਣ ਕਿਂ ਨੁ ਖੋ ਤ੍ਵਂ ਕੋਧੇ ਦੋਸੇ ਲੋਭੇ ਸ੍ਨੇਹੇ ਚ ਆਦੀਨਵਂ ਪਸ੍ਸਸਿ, ਤਂ ਤਾਵ ਮੇ ਪੁਚ੍ਛਿਤੋ ਅਕ੍ਖਾਹਿ, ਨ ਹਿ ਮਯਂ ਏਤ੍ਥ ਆਦੀਨਵਂ ਜਾਨਾਮਾਤਿ.

ਅਥ ਨਂ ਮਹਾਸਤ੍ਤੋ ‘‘ਤੇਨ ਹਿ ਸੁਣਾਹੀ’’ਤਿ ਵਤ੍ਵਾ ਚਤਸ੍ਸੋ ਗਾਥਾ ਅਭਾਸਿ –

੧੬. ‘‘ਅਪ੍ਪੋ ਹੁਤ੍ਵਾ ਬਹੁ ਹੋਤਿ, ਵਡ੍ਢਤੇ ਸੋ ਅਖਨ੍ਤਿਜੋ;

ਆਸਙ੍ਗੀ ਬਹੁਪਾਯਾਸੋ, ਤਸ੍ਮਾ ਕੋਧਂ ਨ ਰੋਚਯੇ.

੧੭. ‘‘ਦੁਟ੍ਠਸ੍ਸ ਫਰੁਸਾ ਵਾਚਾ, ਪਰਾਮਾਸੋ ਅਨਨ੍ਤਰਾ;

ਤਤੋ ਪਾਣਿ ਤਤੋ ਦਣ੍ਡੋ, ਸਤ੍ਥਸ੍ਸ ਪਰਮਾ ਗਤਿ;

ਦੋਸੋ ਕੋਧਸਮੁਟ੍ਠਾਨੋ, ਤਸ੍ਮਾ ਦੋਸਂ ਨ ਰੋਚਯੇ.

੧੮. ‘‘ਆਲੋਪਸਾਹਸਾਕਾਰਾ, ਨਿਕਤੀ ਵਞ੍ਚਨਾਨਿ ਚ;

ਦਿਸ੍ਸਨ੍ਤਿ ਲੋਭਧਮ੍ਮੇਸੁ, ਤਸ੍ਮਾ ਲੋਭਂ ਨ ਰੋਚਯੇ.

੧੯. ‘‘ਸ੍ਨੇਹਸਙ੍ਗਥਿਤਾ ਗਨ੍ਥਾ, ਸੇਨ੍ਤਿ ਮਨੋਮਯਾ ਪੁਥੂ;

ਤੇ ਭੁਸਂ ਉਪਤਾਪੇਨ੍ਤਿ, ਤਸ੍ਮਾ ਸ੍ਨੇਹਂ ਨ ਰੋਚਯੇ’’ਤਿ.

ਤਤ੍ਥ ਅਖਨ੍ਤਿਜੋਤਿ ਸੋ ਅਨਧਿਵਾਸਕਜਾਤਿਕਸ੍ਸ ਅਖਨ੍ਤਿਤੋ ਜਾਤੋ ਕੋਧੋ ਪਠਮਂ ਪਰਿਤ੍ਤੋ ਹੁਤ੍ਵਾ ਪਚ੍ਛਾ ਬਹੁ ਹੋਤਿ ਅਪਰਾਪਰਂ ਵਡ੍ਢਤਿ. ਤਸ੍ਸ ਵਡ੍ਢਨਭਾਵੋ ਖਨ੍ਤਿਵਾਦੀਜਾਤਕੇਨ (ਜਾ. ੧.੪.੪੯ ਆਦਯੋ) ਚੇਵ ਚੂਲ਼ਧਮ੍ਮਪਾਲਜਾਤਕੇਨ (ਜਾ. ੧.੫.੪੪ ਆਦਯੋ) ਚ ਵਣ੍ਣੇਤਬ੍ਬੋ. ਅਪਿਚ ਤਿਸ੍ਸਾਮਚ੍ਚਸ੍ਸਪੇਤ੍ਥ ਭਰਿਯਂ ਆਦਿਂ ਕਤ੍ਵਾ ਸਬ੍ਬਂ ਸਪਰਿਜਨਂ ਮਾਰੇਤ੍ਵਾ ਪਚ੍ਛਾ ਅਤ੍ਤਨੋ ਮਾਰਿਤਵਤ੍ਥੁ ਕਥੇਤਬ੍ਬਂ. ਆਸਙ੍ਗੀਤਿ ਆਸਙ੍ਗਕਰਣੋ. ਯਸ੍ਸ ਉਪ੍ਪਜ੍ਜਤਿ, ਤਂ ਆਸਤ੍ਤਂ ਲਗ੍ਗਿਤਂ ਕਰੋਤਿ, ਤਂ ਵਤ੍ਥੁਂ ਵਿਸ੍ਸਜ੍ਜੇਤ੍ਵਾ ਗਨ੍ਤੁਂ ਨ ਦੇਤਿ, ਨਿਵਤ੍ਤਿਤ੍ਵਾ ਅਕ੍ਕੋਸਨਾਦੀਨਿ ਕਾਰੇਤਿ. ਬਹੁਪਾਯਾਸੋਤਿ ਬਹੁਨਾ ਕਾਯਿਕਚੇਤਸਿਕਦੁਕ੍ਖਸਙ੍ਖਾਤੇਨ ਉਪਾਯਾਸੇਨ ਕਿਲਮਥੇਨ ਸਮਨ੍ਨਾਗਤੋ. ਕੋਧਂ ਨਿਸ੍ਸਾਯ ਹਿ ਕੋਧਵਸੇਨ ਅਰਿਯਾਦੀਸੁ ਕਤਵੀਤਿਕ੍ਕਮਾ ਦਿਟ੍ਠਧਮ੍ਮੇ ਚੇਵ ਸਮ੍ਪਰਾਯੇ ਚ ਵਧਬਨ੍ਧਵਿਪ੍ਪਟਿਸਾਰਾਦੀਨਿ ਚੇਵ ਪਞ੍ਚਵਿਧਬਨ੍ਧਨਕਮ੍ਮਕਰਣਾਦੀਨਿ ਚ ਬਹੂਨਿ ਦੁਕ੍ਖਾਨਿ ਅਨੁਭਵਨ੍ਤੀਤਿ ਕੋਧੋ ਬਹੁਪਾਯਾਸੋ ਨਾਮ. ਤਸ੍ਮਾਤਿ ਯਸ੍ਮਾ ਏਸ ਏਵਂ ਅਨੇਕਾਦੀਨਵੋ, ਤਸ੍ਮਾ ਕੋਧਂ ਨ ਰੋਚੇਮਿ.

ਦੁਟ੍ਠਸ੍ਸਾਤਿ ਕੁਜ੍ਝਨਲਕ੍ਖਣੇਨ ਕੋਧੇਨ ਕੁਜ੍ਝਿਤ੍ਵਾ ਅਪਰਭਾਗੇ ਦੁਸ੍ਸਨਲਕ੍ਖਣੇਨ ਦੋਸੇਨ ਦੁਟ੍ਠਸ੍ਸ ਪਠਮਂ ਤਾਵ ‘‘ਅਰੇ, ਦਾਸ, ਪੇਸ੍ਸਾ’’ਤਿ ਫਰੁਸਵਾਚਾ ਨਿਚ੍ਛਰਤਿ, ਵਾਚਾਯ ਅਨਨ੍ਤਰਾ ਆਕਡ੍ਢਨਵਿਕਡ੍ਢਨਵਸੇਨ ਹਤ੍ਥਪਰਾਮਾਸੋ, ਤਤੋ ਅਨਨ੍ਤਰਾ ਉਪਕ੍ਕਮਨਵਸੇਨ ਪਾਣਿ ਪਵਤ੍ਤਤਿ, ਤਤੋ ਦਣ੍ਡੋ, ਦਣ੍ਡਪ੍ਪਹਾਰੇ ਅਤਿਕ੍ਕਮਿਤ੍ਵਾ ਪਨ ਏਕਤੋਧਾਰਉਭਤੋਧਾਰਸ੍ਸ ਸਤ੍ਥਸ੍ਸ ਪਰਮਾ ਗਤਿ, ਸਬ੍ਬਪਰਿਯਨ੍ਤਾ ਸਤ੍ਥਨਿਪ੍ਫਤ੍ਤਿ ਹੋਤਿ. ਯਦਾ ਹਿ ਸਤ੍ਥੇਨ ਪਰਂ ਜੀਵਿਤਾ ਵੋਰੋਪੇਤ੍ਵਾ ਪਚ੍ਛਾ ਤੇਨੇਵ ਸਤ੍ਥੇਨ ਅਤ੍ਤਾਨਂ ਜੀਵਿਤਾ ਵੋਰੋਪੇਤਿ, ਤਦਾ ਦੋਸੋ ਮਤ੍ਥਕਪ੍ਪਤ੍ਤੋ ਹੋਤਿ. ਦੋਸੋ ਕੋਧਸਮੁਟ੍ਠਾਨੋਤਿ ਯਥਾ ਅਨਮ੍ਬਿਲਂ ਤਕ੍ਕਂ ਵਾ ਕਞ੍ਜਿਕਂ ਵਾ ਪਰਿਣਾਮਵਸੇਨ ਪਰਿਵਤ੍ਤਿਤ੍ਵਾ ਅਮ੍ਬਿਲਂ ਹੋਤਿ, ਤਂ ਏਕਜਾਤਿਕਮ੍ਪਿ ਸਮਾਨਂ ਅਮ੍ਬਿਲਂ ਅਨਮ੍ਬਿਲਨ੍ਤਿ ਨਾਨਾ ਵੁਚ੍ਚਤਿ, ਤਥਾ ਪੁਬ੍ਬਕਾਲੇ ਕੋਧੋ ਪਰਿਣਮਿਤ੍ਵਾ ਅਪਰਭਾਗੇ ਦੋਸੋ ਹੋਤਿ. ਸੋ ਅਕੁਸਲਮੂਲਤ੍ਤੇਨ ਏਕਜਾਤਿਕੋਪਿ ਸਮਾਨੋ ਕੋਧੋ ਦੋਸੋਤਿ ਨਾਨਾ ਵੁਚ੍ਚਤਿ. ਯਥਾ ਅਨਮ੍ਬਿਲਤੋ ਅਮ੍ਬਿਲਂ, ਏਵਂ ਸੋਪਿ ਕੋਧਤੋ ਸਮੁਟ੍ਠਾਤੀਤਿ ਕੋਧਸਮੁਟ੍ਠਾਨੋ. ਤਸ੍ਮਾਤਿ ਯਸ੍ਮਾ ਏਵਂ ਅਨੇਕਾਦੀਨਵੋ ਦੋਸੋ, ਤਸ੍ਮਾ ਦੋਸਮ੍ਪਿ ਨ ਰੋਚੇਮਿ.

ਆਲੋਪਸਾਹਸਾਕਾਰਾਤਿ ਦਿਵਾ ਦਿਵਸ੍ਸੇਵ ਗਾਮਂ ਪਹਰਿਤ੍ਵਾ ਵਿਲੁਮ੍ਪਨਾਨਿ ਚ ਆਵੁਧਂ ਸਰੀਰੇ ਠਪੇਤ੍ਵਾ ‘‘ਇਦਂ ਨਾਮ ਮੇ ਦੇਹੀ’’ਤਿ ਸਾਹਸਾਕਾਰਾ ਚ. ਨਿਕਤੀ ਵਞ੍ਚਨਾਨਿ ਚਾਤਿ ਪਤਿਰੂਪਕਂ ਦਸ੍ਸੇਤ੍ਵਾ ਪਰਸ੍ਸ ਹਰਣਂ ਨਿਕਤਿ ਨਾਮ, ਸਾ ਅਸੁਵਣ੍ਣਮੇਵ ‘‘ਸੁਵਣ੍ਣ’’ਨ੍ਤਿ ਕੂਟਕਹਾਪਣਂ ‘‘ਕਹਾਪਣੋ’’ਤਿ ਦਤ੍ਵਾ ਪਰਸਨ੍ਤਕਗ੍ਗਹਣੇ ਦਟ੍ਠਬ੍ਬਾ. ਪਟਿਭਾਨਵਸੇਨ ਪਨ ਉਪਾਯਕੁਸਲਤਾਯ ਪਰਸਨ੍ਤਕਗ੍ਗਹਣਂ ਵਞ੍ਚਨਂ ਨਾਮ. ਤਸ੍ਸੇਵਂ ਪਵਤ੍ਤਿ ਦਟ੍ਠਬ੍ਬਾ – ਏਕੋ ਕਿਰ ਉਜੁਜਾਤਿਕੋ ਗਾਮਿਕਪੁਰਿਸੋ ਅਰਞ੍ਞਤੋ ਸਸਕਂ ਆਨੇਤ੍ਵਾ ਨਦੀਤੀਰੇ ਠਪੇਤ੍ਵਾ ਨ੍ਹਾਯਿਤੁਂ ਓਤਰਿ. ਅਥੇਕੋ ਧੁਤ੍ਤੋ ਤਂ ਸਸਕਂ ਸੀਸੇ ਕਤ੍ਵਾ ਨ੍ਹਾਯਿਤੁਂ ਓਤਿਣ੍ਣੋ. ਇਤਰੋ ਉਤ੍ਤਰਿਤ੍ਵਾ ਸਸਕਂ ਅਪਸ੍ਸਨ੍ਤੋ ਇਤੋ ਚਿਤੋ ਚ ਵਿਲੋਕੇਸਿ. ਤਮੇਨਂ ਧੁਤ੍ਤੋ ‘‘ਕਿਂ ਭੋ ਵਿਲੋਕੇਸੀ’’ਤਿ ਵਤ੍ਵਾ ‘‘ਇਮਸ੍ਮਿਂ ਮੇ ਠਾਨੇ ਸਸਕੋ ਠਪਿਤੋ, ਤਂ ਨ ਪਸ੍ਸਾਮੀ’’ਤਿ ਵੁਤ੍ਤੇ ‘‘ਅਨ੍ਧਬਾਲ, ਤ੍ਵਂ ਨ ਜਾਨਾਸਿ, ਸਸਕਾ ਨਾਮ ਨਦੀਤੀਰੇ ਠਪਿਤਾ ਪਲਾਯਨ੍ਤਿ, ਪਸ੍ਸ ਅਹਂ ਅਤ੍ਤਨੋ ਸਸਕਂ ਸੀਸੇ ਠਪੇਤ੍ਵਾਵ ਨ੍ਹਾਯਾਮੀ’’ਤਿ ਆਹ. ਸੋ ਅਪ੍ਪਟਿਭਾਨਤਾਯ ‘‘ਏਵਂ ਭਵਿਸ੍ਸਤੀ’’ਤਿ ਪਕ੍ਕਾਮਿ. ਏਕਕਹਾਪਣੇਨ ਮਿਗਪੋਤਕਂ ਗਹੇਤ੍ਵਾ ਪੁਨ ਤਂ ਦਤ੍ਵਾ ਦ੍ਵਿਕਹਾਪਣਗ੍ਘਨਕਸ੍ਸ ਮਿਗਸ੍ਸ ਗਹਿਤਵਤ੍ਥੁਪੇਤ੍ਥ ਕਥੇਤਬ੍ਬਂ. ਦਿਸ੍ਸਨ੍ਤਿ ਲੋਭਧਮ੍ਮੇਸੂਤਿ ਸਕ੍ਕ, ਇਮੇ ਆਲੋਪਾਦਯੋ ਪਾਪਧਮ੍ਮਾ ਲੋਭਸਭਾਵੇਸੁ ਲੋਭਾਭਿਭੂਤੇਸੁ ਸਤ੍ਤੇਸੁ ਦਿਸ੍ਸਨ੍ਤਿ. ਨ ਹਿ ਅਲੁਦ੍ਧਾ ਏਵਰੂਪਾਨਿ ਕਮ੍ਮਾਨਿ ਕਰੋਨ੍ਤਿ. ਏਵਂ ਲੋਭੋ ਅਨੇਕਾਦੀਨਵੋ, ਤਸ੍ਮਾ ਲੋਭਮ੍ਪਿ ਨ ਰੋਚੇਮਿ.

ਸ੍ਨੇਹਸਙ੍ਗਥਿਤਾ ਗਨ੍ਥਾਤਿ ਆਰਮ੍ਮਣੇਸੁ ਅਲ੍ਲੀਯਨਲਕ੍ਖਣੇਨ ਸ੍ਨੇਹੇਨ ਸਙ੍ਗਥਿਤਾ ਪੁਨਪ੍ਪੁਨਂ ਉਪ੍ਪਾਦਵਸੇਨ ਘਟਿਤਾ ਸੁਤ੍ਤੇਨ ਪੁਪ੍ਫਾਨਿ ਵਿਯ ਬਦ੍ਧਾ ਨਾਨਪ੍ਪਕਾਰੇਸੁ ਆਰਮ੍ਮਣੇਸੁ ਪਵਤ੍ਤਮਾਨਾ ਅਭਿਜ੍ਝਾਕਾਯਗਨ੍ਥਾ. ਸੇਨ੍ਤਿ ਮਨੋਮਯਾ ਪੁਥੂਤਿ ਤੇ ਪੁਥੂਸੁ ਆਰਮ੍ਮਣੇਸੁ ਉਪ੍ਪਨ੍ਨਾ ਸੁਵਣ੍ਣਾਦੀਹਿ ਨਿਬ੍ਬਤ੍ਤਾਨਿ ਸੁਵਣ੍ਣਾਦਿਮਯਾਨਿ ਆਭਰਣਾਦੀਨਿ ਵਿਯ ਮਨੇਨ ਨਿਬ੍ਬਤ੍ਤਤ੍ਤਾ ਮਨੋਮਯਾ ਅਭਿਜ੍ਝਾਕਾਯਗਨ੍ਥਾ ਤੇਸੁ ਆਰਮ੍ਮਣੇਸੁ ਸੇਨ੍ਤਿ ਅਨੁਸੇਨ੍ਤਿ. ਤੇ ਭੁਸਂ ਉਪਤਾਪੇਨ੍ਤੀਤਿ ਤੇ ਏਵਂ ਅਨੁਸਯਿਤਾ ਬਲਵਤਾਪਂ ਜਨੇਨ੍ਤਾ ਭੁਸਂ ਉਪਤਾਪੇਨ੍ਤਿ ਅਤਿਕਿਲਮੇਨ੍ਤਿ. ਤੇਸਂ ਪਨ ਭੁਸਂ ਉਪਤਾਪਨੇ ‘‘ਸਲ੍ਲਵਿਦ੍ਧੋਵ ਰੁਪ੍ਪਤੀ’’ਤਿ (ਸੁ. ਨਿ. ੭੭੩) ਗਾਥਾਯ ਵਤ੍ਥੁ, ‘‘ਪਿਯਜਾਤਿਕਾ ਹਿ ਗਹਪਤਿ, ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ ਪਿਯਪ੍ਪਭੁਤਿਕਾ’’ (ਮ. ਨਿ. ੨.੩੫੩), ‘‘ਪਿਯਤੋ ਜਾਯਤੀ ਸੋਕੋ’’ਤਿਆਦੀਨਿ (ਧ. ਪ. ੨੧੨) ਸੁਤ੍ਤਾਨਿ ਚ ਆਹਰਿਤਬ੍ਬਾਨਿ. ਅਪਿਚ ਮਙ੍ਗਲਬੋਧਿਸਤ੍ਤਸ੍ਸ ਦਾਰਕੇ ਦਤ੍ਵਾ ਬਲਵਸੋਕੇਨ ਹਦਯਂ ਫਲਿ, ਵੇਸ੍ਸਨ੍ਤਰਬੋਧਿਸਤ੍ਤਸ੍ਸ ਮਹਨ੍ਤਂ ਦੋਮਨਸ੍ਸਂ ਉਦਪਾਦਿ. ਏਵਂ ਪੂਰਿਤਪਾਰਮੀਨਂ ਮਹਾਸਤ੍ਤਾਨਂ ਪੇਮਂ ਉਪਤਾਪਂ ਕਰੋਤਿਯੇਵ. ਅਯਂ ਸ੍ਨੇਹੇ ਆਦੀਨਵੋ, ਤਸ੍ਮਾ ਸ੍ਨੇਹਮ੍ਪਿ ਨ ਰੋਚੇਮੀਤਿ.

ਸਕ੍ਕੋ ਪਞ੍ਹਵਿਸ੍ਸਜ੍ਜਨਂ ਸੁਤ੍ਵਾ ‘‘ਕਣ੍ਹਪਣ੍ਡਿਤ ਤਯਾ ਇਮੇ ਪਞ੍ਹਾ ਬੁਦ੍ਧਲੀਲ਼ਾਯ ਸਾਧੁਕਂ ਕਥਿਤਾ, ਅਤਿਵਿਯ ਤੁਟ੍ਠੋਸ੍ਮਿ ਤੇ, ਅਪਰਮ੍ਪਿ ਵਰਂ ਗਣ੍ਹਾਹੀ’’ਤਿ ਵਤ੍ਵਾ ਦਸਮਂ ਗਾਥਮਾਹ –

੨੦. ‘‘ਏਤਸ੍ਮਿਂ ਤੇ ਸੁਲਪਿਤੇ, ਪਤਿਰੂਪੇ ਸੁਭਾਸਿਤੇ;

ਵਰਂ ਬ੍ਰਾਹ੍ਮਣ ਤੇ ਦਮ੍ਮਿ, ਯਂ ਕਿਞ੍ਚਿ ਮਨਸਿਚ੍ਛਸੀ’’ਤਿ.

ਤਤੋ ਬੋਧਿਸਤ੍ਤੋ ਅਨਨ੍ਤਰਗਾਥਮਾਹ –

੨੧. ‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਅਰਞ੍ਞੇ ਮੇ ਵਿਹਰਤੋ, ਨਿਚ੍ਚਂ ਏਕਵਿਹਾਰਿਨੋ;

ਆਬਾਧਾ ਮਾ ਉਪ੍ਪਜ੍ਜੇਯ੍ਯੁਂ, ਅਨ੍ਤਰਾਯਕਰਾ ਭੁਸਾ’’ਤਿ.

ਤਤ੍ਥ ਅਨ੍ਤਰਾਯਕਰਾ ਭੁਸਾਤਿ ਇਮਸ੍ਸ ਮੇ ਤਪੋਕਮ੍ਮਸ੍ਸ ਅਨ੍ਤਰਾਯਕਰਾ.

ਤਂ ਸੁਤ੍ਵਾ ਸਕ੍ਕੋ ‘‘ਕਣ੍ਹਪਣ੍ਡਿਤੋ ਵਰਂ ਗਣ੍ਹਨ੍ਤੋ ਨ ਆਮਿਸਸਨ੍ਨਿਸ੍ਸਿਤਂ ਗਣ੍ਹਾਤਿ, ਤਪੋਕਮ੍ਮਨਿਸ੍ਸਿਤਮੇਵ ਗਣ੍ਹਾਤੀ’’ਤਿ ਚਿਨ੍ਤੇਤ੍ਵਾ ਭਿਯ੍ਯੋਸੋਮਤ੍ਤਾਯ ਪਸਨ੍ਨੋ ਅਪਰਮ੍ਪਿ ਵਰਂ ਦਦਮਾਨੋ ਇਤਰਂ ਗਾਥਮਾਹ –

੨੨. ‘‘ਏਤਸ੍ਮਿਂ ਤੇ ਸੁਲਪਿਤੇ, ਪਤਿਰੂਪੇ ਸੁਭਾਸਿਤੇ;

ਵਰਂ ਬ੍ਰਾਹ੍ਮਣ ਤੇ ਦਮ੍ਮਿ, ਯਂ ਕਿਞ੍ਚਿ ਮਨਸਿਚ੍ਛਸੀ’’ਤਿ.

ਬੋਧਿਸਤ੍ਤੋਪਿ ਵਰਗ੍ਗਹਣਾਪਦੇਸੇਨ ਤਸ੍ਸ ਧਮ੍ਮਂ ਦੇਸੇਨ੍ਤੋ ਓਸਾਨਗਾਥਮਾਹ –

੨੩. ‘‘ਵਰਞ੍ਚੇ ਮੇ ਅਦੋ ਸਕ੍ਕ, ਸਬ੍ਬਭੂਤਾਨਮਿਸ੍ਸਰ;

ਨ ਮਨੋ ਵਾ ਸਰੀਰਂ ਵਾ, ਮਂ-ਕਤੇ ਸਕ੍ਕ ਕਸ੍ਸਚਿ;

ਕਦਾਚਿ ਉਪਹਞ੍ਞੇਥ, ਏਤਂ ਸਕ੍ਕ ਵਰਂ ਵਰੇ’’ਤਿ.

ਤਤ੍ਥ ਮਨੋ ਵਾਤਿ ਮਨੋਦ੍ਵਾਰਂ ਵਾ. ਸਰੀਰਂ ਵਾਤਿ ਕਾਯਦ੍ਵਾਰਂ ਵਾ, ਵਚੀਦ੍ਵਾਰਮ੍ਪਿ ਏਤੇਸਂ ਗਹਣੇਨ ਗਹਿਤਮੇਵਾਤਿ ਵੇਦਿਤਬ੍ਬਂ. ਮਂ-ਕਤੇਤਿ ਮਮ ਕਾਰਣਾ. ਉਪਹਞ੍ਞੇਥਾਤਿ ਉਪਘਾਤਂ ਆਪਜ੍ਜੇਯ੍ਯ ਅਪਰਿਸੁਦ੍ਧਂ ਅਸ੍ਸ. ਇਦਂ ਵੁਤ੍ਤਂ ਹੋਤਿ – ਸਕ੍ਕ ਦੇਵਰਾਜ, ਮਮ ਕਾਰਣਾ ਮਂ ਨਿਸ੍ਸਾਯ ਮਮ ਅਨਤ੍ਥਕਾਮਤਾਯ ਕਸ੍ਸਚਿ ਸਤ੍ਤਸ੍ਸ ਕਿਸ੍ਮਿਞ੍ਚਿ ਕਾਲੇ ਇਦਂ ਤਿਵਿਧਮ੍ਪਿ ਕਮ੍ਮਦ੍ਵਾਰਂ ਨ ਉਪਹਞ੍ਞੇਥ, ਪਾਣਾਤਿਪਾਤਾਦੀਹਿ ਦਸਹਿ ਅਕੁਸਲਕਮ੍ਮਪਥੇਹਿ ਵਿਮੁਤ੍ਤਂ ਪਰਿਸੁਦ੍ਧਮੇਵ ਭਵੇਯ੍ਯਾਤਿ.

ਇਤਿ ਮਹਾਸਤ੍ਤੋ ਛਸੁਪਿ ਠਾਨੇਸੁ ਵਰਂ ਗਣ੍ਹਨ੍ਤੋ ਨੇਕ੍ਖਮ੍ਮਨਿਸ੍ਸਿਤਮੇਵ ਗਣ੍ਹਿ, ਜਾਨਾਤਿ ਚੇਸ ‘‘ਸਰੀਰਂ ਨਾਮ ਬ੍ਯਾਧਿਧਮ੍ਮਂ, ਨ ਤਂ ਸਕ੍ਕਾ ਸਕ੍ਕੇਨ ਅਬ੍ਯਾਧਿਧਮ੍ਮਂ ਕਾਤੁ’’ਨ੍ਤਿ. ਸਤ੍ਤਾਨਞ੍ਹਿ ਤੀਸੁ ਦ੍ਵਾਰੇਸੁ ਪਰਿਸੁਦ੍ਧਭਾਵੋ ਅਸਕ੍ਕਾਯਤ੍ਤੋਵ, ਏਵਂ ਸਨ੍ਤੇਪਿ ਤਸ੍ਸ ਧਮ੍ਮਦੇਸਨਤ੍ਥਂ ਇਮੇ ਵਰੇ ਗਣ੍ਹਿ. ਸਕ੍ਕੋਪਿ ਤਂ ਰੁਕ੍ਖਂ ਧੁਵਫਲਂ ਕਤ੍ਵਾ ਮਹਾਸਤ੍ਤਂ ਵਨ੍ਦਿਤ੍ਵਾ ਸਿਰਸਿ ਅਞ੍ਜਲਿਂ ਪਤਿਟ੍ਠਪੇਤ੍ਵਾ ‘‘ਅਰੋਗਾ ਇਧੇਵ ਵਸਥਾ’’ਤਿ ਵਤ੍ਵਾ ਸਕਟ੍ਠਾਨਮੇਵ ਗਤੋ. ਬੋਧਿਸਤ੍ਤੋਪਿ ਅਪਰਿਹੀਨਜ੍ਝਾਨੋ ਬ੍ਰਹ੍ਮਲੋਕੂਪਗੋ ਅਹੋਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ‘‘ਆਨਨ੍ਦ, ਪੁਬ੍ਬੇ ਮਯਾ ਨਿਵੁਤ੍ਥਭੂਮਿਪ੍ਪਦੇਸੋ ਚੇਸੋ’’ਤਿ ਵਤ੍ਵਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਸਕ੍ਕੋ ਅਨੁਰੁਦ੍ਧੋ ਅਹੋਸਿ, ਕਣ੍ਹਪਣ੍ਡਿਤੋ ਪਨ ਅਹਮੇਵ ਅਹੋਸਿ’’ਨ੍ਤਿ.

ਕਣ੍ਹਜਾਤਕਵਣ੍ਣਨਾ ਦੁਤਿਯਾ.

[੪੪੧] ੩. ਚਤੁਪੋਸਥਿਕਜਾਤਕਵਣ੍ਣਨਾ

੨੪-੩੮. ਯੋ ਕੋਪਨੇਯ੍ਯੋਤਿ ਇਦਂ ਚਤੁਪੋਸਥਿਕਜਾਤਕਂ ਪੁਣ੍ਣਕਜਾਤਕੇ ਆਵਿ ਭਵਿਸ੍ਸਤਿ.

ਚਤੁਪੋਸਥਿਕਜਾਤਕਵਣ੍ਣਨਾ ਤਤਿਯਾ.

[੪੪੨] ੪. ਸਙ੍ਖਜਾਤਕਵਣ੍ਣਨਾ

ਬਹੁਸ੍ਸੁਤੋਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸਬ੍ਬਪਰਿਕ੍ਖਾਰਦਾਨਂ ਆਰਬ੍ਭ ਕਥੇਸਿ. ਸਾਵਤ੍ਥਿਯਂ ਕਿਰੇਕੋ ਉਪਾਸਕੋ ਤਥਾਗਤਸ੍ਸ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਚਿਤ੍ਤੋ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਅਤ੍ਤਨੋ ਘਰਦ੍ਵਾਰੇ ਮਣ੍ਡਪਂ ਕਾਰੇਤ੍ਵਾ ਅਲਙ੍ਕਰਿਤ੍ਵਾ ਪੁਨਦਿਵਸੇ ਤਥਾਗਤਸ੍ਸ ਕਾਲਂ ਆਰੋਚਾਪੇਸਿ. ਸਤ੍ਥਾ ਪਞ੍ਚਸਤਭਿਕ੍ਖੁਪਰਿਵਾਰੋ ਤਤ੍ਥ ਗਨ੍ਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਉਪਾਸਕੋ ਸਪੁਤ੍ਤਦਾਰੋ ਸਪਰਿਜਨੋ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਪੁਨ ਸ੍ਵਾਤਨਾਯਾਤਿ ਏਵਂ ਸਤ੍ਤਾਹਂ ਨਿਮਨ੍ਤੇਤ੍ਵਾ ਮਹਾਦਾਨਂ ਪਵਤ੍ਤੇਤ੍ਵਾ ਸਤ੍ਤਮੇ ਦਿਵਸੇ ਸਬ੍ਬਪਰਿਕ੍ਖਾਰਂ ਅਦਾਸਿ. ਤਂ ਪਨ ਦਦਮਾਨੋ ਉਪਾਹਨਦਾਨਂ ਉਸ੍ਸਨ੍ਨਂ ਕਤ੍ਵਾ ਅਦਾਸਿ. ਦਸਬਲਸ੍ਸ ਦਿਨ੍ਨੋ ਉਪਾਹਨਸਙ੍ਘਾਟੋ ਸਹਸ੍ਸਗ੍ਘਨਕੋ ਅਹੋਸਿ, ਦ੍ਵਿਨ੍ਨਂ ਅਗ੍ਗਸਾਵਕਾਨਂ ਪਞ੍ਚਸਤਗ੍ਘਨਕੋ, ਸੇਸਾਨਂ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਸਤਗ੍ਘਨਕੋ. ਇਤਿ ਸੋ ਸਬ੍ਬਪਰਿਕ੍ਖਾਰਦਾਨਂ ਦਤ੍ਵਾ ਅਤ੍ਤਨੋ ਪਰਿਸਾਯ ਸਦ੍ਧਿਂ ਭਗਵਤੋ ਸਨ੍ਤਿਕੇ ਨਿਸੀਦਿ. ਅਥਸ੍ਸ ਸਤ੍ਥਾ ਮਧੁਰੇਨ ਸਰੇਨ ਅਨੁਮੋਦਨਂ ਕਰੋਨ੍ਤੋ ‘‘ਉਪਾਸਕ, ਉਲ਼ਾਰਂ ਤੇ ਸਬ੍ਬਪਰਿਕ੍ਖਾਰਦਾਨਂ, ਅਤ੍ਤਮਨੋ ਹੋਹਿ, ਪੁਬ੍ਬੇ ਅਨੁਪ੍ਪਨ੍ਨੇ ਬੁਦ੍ਧੇ ਪਚ੍ਚੇਕਬੁਦ੍ਧਸ੍ਸ ਏਕਂ ਉਪਾਹਨਸਙ੍ਘਾਟਂ ਦਤ੍ਵਾ ਨਾਵਾਯ ਭਿਨ੍ਨਾਯ ਅਪ੍ਪਤਿਟ੍ਠੇ ਮਹਾਸਮੁਦ੍ਦੇਪਿ ਉਪਾਹਨਦਾਨਨਿਸ੍ਸਨ੍ਦੇਨ ਪਤਿਟ੍ਠਂ ਲਭਿਂਸੁ, ਤ੍ਵਂ ਪਨ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਬ੍ਬਪਰਿਕ੍ਖਾਰਦਾਨਂ ਅਦਾਸਿ, ਤਸ੍ਸ ਤੇ ਉਪਾਹਨਦਾਨਸ੍ਸ ਫਲਂ ਕਸ੍ਮਾ ਨ ਪਤਿਟ੍ਠਾ ਭਵਿਸ੍ਸਤੀ’’ਤਿ ਵਤ੍ਵਾ ਤੇਨ ਯਾਚਿਤੋ ਅਤੀਤਂ ਆਹਰਿ.

ਅਤੀਤੇ ਅਯਂ ਬਾਰਾਣਸੀ ਮੋਲ਼ਿਨੀ ਨਾਮ ਅਹੋਸਿ. ਮੋਲ਼ਿਨਿਨਗਰੇ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਸਙ੍ਖੋ ਨਾਮ ਬ੍ਰਾਹ੍ਮਣੋ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਪਹੂਤਵਿਤ੍ਤੁਪਕਰਣੋ ਪਹੂਤਧਨਧਞ੍ਞਸੁਵਣ੍ਣਰਜਤੋ ਚਤੂਸੁ ਨਗਰਦ੍ਵਾਰੇਸੁ ਨਗਰਮਜ੍ਝੇ ਨਿਵੇਸਨਦ੍ਵਾਰੇ ਚਾਤਿ ਛਸੁ ਠਾਨੇਸੁ ਛ ਦਾਨਸਾਲਾਯੋ ਕਾਰੇਤ੍ਵਾ ਦੇਵਸਿਕਂ ਛਸਤਸਹਸ੍ਸਾਨਿ ਵਿਸ੍ਸਜ੍ਜੇਨ੍ਤੋ ਕਪਣਦ੍ਧਿਕਾਨਂ ਮਹਾਦਾਨਂ ਪਵਤ੍ਤੇਸਿ. ਸੋ ਏਕਦਿਵਸਂ ਚਿਨ੍ਤੇਸਿ ‘‘ਅਹਂ ਗੇਹੇ ਧਨੇ ਖੀਣੇ ਦਾਤੁਂ ਨ ਸਕ੍ਖਿਸ੍ਸਾਮਿ, ਅਪਰਿਕ੍ਖੀਣੇਯੇਵ ਧਨੇ ਨਾਵਾਯ ਸੁਵਣ੍ਣਭੂਮਿਂ ਗਨ੍ਤ੍ਵਾ ਧਨਂ ਆਹਰਿਸ੍ਸਾਮੀ’’ਤਿ. ਸੋ ਨਾਵਂ ਬਨ੍ਧਾਪੇਤ੍ਵਾ ਭਣ੍ਡਸ੍ਸ ਪੂਰਾਪੇਤ੍ਵਾ ਪੁਤ੍ਤਦਾਰਂ ਆਮਨ੍ਤੇਤ੍ਵਾ ‘‘ਯਾਵਾਹਂ ਆਗਚ੍ਛਾਮਿ, ਤਾਵ ਮੇ ਦਾਨਂ ਅਨੁਪਚ੍ਛਿਨ੍ਦਿਤ੍ਵਾ ਪਵਤ੍ਤੇਯ੍ਯਾਥਾ’’ਤਿ ਵਤ੍ਵਾ ਦਾਸਕਮ੍ਮਕਰਪਰਿਵੁਤੋ ਛਤ੍ਤਂ ਆਦਾਯ ਉਪਾਹਨਂ ਆਰੁਯ੍ਹ ਮਜ੍ਝਨ੍ਹਿਕਸਮਯੇ ਪਟ੍ਟਨਗਾਮਾਭਿਮੁਖੋ ਪਾਯਾਸਿ. ਤਸ੍ਮਿਂ ਖਣੇ ਗਨ੍ਧਮਾਦਨੇ ਏਕੋ ਪਚ੍ਚੇਕਬੁਦ੍ਧੋ ਆਵਜ੍ਜੇਤ੍ਵਾ ਤਂ ਧਨਾਹਰਣਤ੍ਥਾਯ ਗਚ੍ਛਨ੍ਤਂ ਦਿਸ੍ਵਾ ‘‘ਮਹਾਪੁਰਿਸੋ ਧਨਂ ਆਹਰਿਤੁਂ ਗਚ੍ਛਤਿ, ਭਵਿਸ੍ਸਤਿ ਨੁ ਖੋ ਅਸ੍ਸ ਸਮੁਦ੍ਦੇ ਅਨ੍ਤਰਾਯੋ, ਨੋ’’ਤਿ ਆਵਜ੍ਜੇਤ੍ਵਾ ‘‘ਭਵਿਸ੍ਸਤੀ’’ਤਿ ਞਤ੍ਵਾ ‘‘ਏਸ ਮਂ ਦਿਸ੍ਵਾ ਛਤ੍ਤਞ੍ਚ ਉਪਾਹਨਞ੍ਚ ਮਯ੍ਹਂ ਦਤ੍ਵਾ ਉਪਾਹਨਦਾਨਨਿਸ੍ਸਨ੍ਦੇਨ ਸਮੁਦ੍ਦੇ ਭਿਨ੍ਨਾਯ ਨਾਵਾਯ ਪਤਿਟ੍ਠਂ ਲਭਿਸ੍ਸਤਿ, ਕਰਿਸ੍ਸਾਮਿਸ੍ਸ ਅਨੁਗ੍ਗਹ’’ਨ੍ਤਿ ਆਕਾਸੇਨਾਗਨ੍ਤ੍ਵਾ ਤਸ੍ਸਾਵਿਦੂਰੇ ਓਤਰਿਤ੍ਵਾ ਚਣ੍ਡਵਾਤਾਤਪੇ ਅਙ੍ਗਾਰਸਨ੍ਥਰਸਦਿਸਂ ਉਣ੍ਹਵਾਲੁਕਂ ਮਦ੍ਦਨ੍ਤੋ ਤਸ੍ਸ ਅਭਿਮੁਖੋ ਆਗਚ੍ਛਿ.

ਸੋ ਤਂ ਦਿਸ੍ਵਾਵ ‘‘ਪੁਞ੍ਞਕ੍ਖੇਤ੍ਤਂ ਮੇ ਆਗਤਂ, ਅਜ੍ਜ ਮਯਾ ਏਤ੍ਥ ਦਾਨਬੀਜਂ ਰੋਪੇਤੁਂ ਵਟ੍ਟਤੀ’’ਤਿ ਤੁਟ੍ਠਚਿਤ੍ਤੋ ਵੇਗੇਨ ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਭਨ੍ਤੇ, ਮਯ੍ਹਂ ਅਨੁਗ੍ਗਹਤ੍ਥਾਯ ਥੋਕਂ ਮਗ੍ਗਾ ਓਕ੍ਕਮ੍ਮ ਇਮਂ ਰੁਕ੍ਖਮੂਲਂ ਉਪਸਙ੍ਕਮਥਾ’’ਤਿ ਵਤ੍ਵਾ ਤਸ੍ਮਿਂ ਰੁਕ੍ਖਮੂਲਂ ਉਪਸਙ੍ਕਮਨ੍ਤੇ ਰੁਕ੍ਖਮੂਲੇ ਵਾਲੁਕਂ ਉਸ੍ਸਾਪੇਤ੍ਵਾ ਉਤ੍ਤਰਾਸਙ੍ਗਂ ਪਞ੍ਞਪੇਤ੍ਵਾ ਪਚ੍ਚੇਕਬੁਦ੍ਧਂ ਨਿਸੀਦਾਪੇਤ੍ਵਾ ਵਨ੍ਦਿਤ੍ਵਾ ਵਾਸਿਤਪਰਿਸ੍ਸਾਵਿਤੇਨ ਉਦਕੇਨ ਪਾਦੇ ਧੋਵਿਤ੍ਵਾ ਗਨ੍ਧਤੇਲੇਨ ਮਕ੍ਖੇਤ੍ਵਾ ਅਤ੍ਤਨੋ ਉਪਾਹਨਾ ਓਮੁਞ੍ਚਿਤ੍ਵਾ ਪਪ੍ਫੋਟੇਤ੍ਵਾ ਗਨ੍ਧਤੇਲੇਨ ਮਕ੍ਖੇਤ੍ਵਾ ਤਸ੍ਸ ਪਾਦੇਸੁ ਪਟਿਮੁਞ੍ਚਿਤ੍ਵਾ ‘‘ਭਨ੍ਤੇ, ਇਮਾ ਉਪਾਹਨਾ ਆਰੁਯ੍ਹ ਛਤ੍ਤਂ ਮਤ੍ਥਕੇ ਕਤ੍ਵਾ ਗਚ੍ਛਥਾ’’ਤਿ ਛਤ੍ਤੁਪਾਹਨਂ ਅਦਾਸਿ. ਸੋ ਅਸ੍ਸ ਅਨੁਗ੍ਗਹਤ੍ਥਾਯ ਤਂ ਗਹੇਤ੍ਵਾ ਪਸਾਦਸਂਵਡ੍ਢਨਤ੍ਥਂ ਪਸ੍ਸਨ੍ਤਸ੍ਸੇਵਸ੍ਸ ਉਪ੍ਪਤਿਤ੍ਵਾ ਗਨ੍ਧਮਾਦਨਮੇਵ ਅਗਮਾਸਿ. ਬੋਧਿਸਤ੍ਤੋਪਿ ਤਂ ਦਿਸ੍ਵਾ ਅਤਿਵਿਯ ਪਸਨ੍ਨਚਿਤ੍ਤੋ ਪਟ੍ਟਨਂ ਗਨ੍ਤ੍ਵਾ ਨਾਵਂ ਅਭਿਰੁਹਿ. ਅਥਸ੍ਸ ਮਹਾਸਮੁਦ੍ਦਂ ਪਟਿਪਨ੍ਨਸ੍ਸ ਸਤ੍ਤਮੇ ਦਿਵਸੇ ਨਾਵਾ ਵਿਵਰਂ ਅਦਾਸਿ, ਉਦਕਂ ਉਸ੍ਸਿਞ੍ਚਿਤੁਂ ਨਾਸਕ੍ਖਿਂਸੁ. ਮਹਾਜਨੋ ਮਰਣਭਯਭੀਤੋ ਅਤ੍ਤਨੋ ਅਤ੍ਤਨੋ ਦੇਵਤਾ ਨਮਸ੍ਸਿਤ੍ਵਾ ਮਹਾਵਿਰਵਂ ਵਿਰਵਿ. ਮਹਾਸਤ੍ਤੋ ਏਕਂ ਉਪਟ੍ਠਾਕਂ ਗਹੇਤ੍ਵਾ ਸਕਲਸਰੀਰਂ ਤੇਲੇਨ ਮਕ੍ਖੇਤ੍ਵਾ ਸਪ੍ਪਿਨਾ ਸਦ੍ਧਿਂ ਸਕ੍ਖਰਚੁਣ੍ਣਂ ਯਾਵਦਤ੍ਥਂ ਖਾਦਿਤ੍ਵਾ ਤਮ੍ਪਿ ਖਾਦਾਪੇਤ੍ਵਾ ਤੇਨ ਸਦ੍ਧਿਂ ਕੂਪਕਯਟ੍ਠਿਮਤ੍ਥਕਂ ਆਰੁਯ੍ਹ ‘‘ਇਮਾਯ ਦਿਸਾਯ ਅਮ੍ਹਾਕਂ ਨਗਰ’’ਨ੍ਤਿ ਦਿਸਂ ਵਵਤ੍ਥਪੇਤ੍ਵਾ ਮਚ੍ਛਕਚ੍ਛਪਪਰਿਪਨ੍ਥਤੋ ਅਤ੍ਤਾਨਂ ਮੋਚੇਨ੍ਤੋ ਤੇਨ ਸਦ੍ਧਿਂ ਉਸਭਮਤ੍ਤਂ ਅਤਿਕ੍ਕਮਿਤ੍ਵਾ ਪਤਿ. ਮਹਾਜਨੋ ਵਿਨਾਸਂ ਪਾਪੁਣਿ. ਮਹਾਸਤ੍ਤੋ ਪਨ ਉਪਟ੍ਠਾਕੇਨ ਸਦ੍ਧਿਂ ਸਮੁਦ੍ਦਂ ਤਰਿਤੁਂ ਆਰਭਿ. ਤਸ੍ਸ ਤਰਨ੍ਤਸ੍ਸੇਵ ਸਤ੍ਤਮੋ ਦਿਵਸੋ ਜਾਤੋ. ਸੋ ਤਸ੍ਮਿਮ੍ਪਿ ਕਾਲੇ ਲੋਣੋਦਕੇਨ ਮੁਖਂ ਵਿਕ੍ਖਾਲੇਤ੍ਵਾ ਉਪੋਸਥਿਕੋ ਅਹੋਸਿਯੇਵ.

ਤਦਾ ਪਨ ਚਤੂਹਿ ਲੋਕਪਾਲੇਹਿ ਮਣਿਮੇਖਲਾ ਨਾਮ ਦੇਵਧੀਤਾ ‘‘ਸਚੇ ਸਮੁਦ੍ਦੇ ਨਾਵਾਯ ਭਿਨ੍ਨਾਯ ਤਿਸਰਣਗਤਾ ਵਾ ਸੀਲਸਮ੍ਪਨ੍ਨਾ ਵਾ ਮਾਤਾਪਿਤੁਪਟ੍ਠਾਕਾ ਵਾ ਮਨੁਸ੍ਸਾ ਦੁਕ੍ਖਪ੍ਪਤ੍ਤਾ ਹੋਨ੍ਤਿ, ਤੇ ਰਕ੍ਖੇਯ੍ਯਾਸੀ’’ਤਿ ਸਮੁਦ੍ਦੇ ਆਰਕ੍ਖਣਤ੍ਥਾਯ ਠਪਿਤਾ ਹੋਤਿ. ਸਾ ਅਤ੍ਤਨੋ ਇਸ੍ਸਰਿਯੇਨ ਸਤ੍ਤਾਹਮਨੁਭਵਿਤ੍ਵਾ ਪਮਜ੍ਜਿਤ੍ਵਾ ਸਤ੍ਤਮੇ ਦਿਵਸੇ ਸਮੁਦ੍ਦਂ ਓਲੋਕੇਨ੍ਤੀ ਸੀਲਾਚਾਰਸਂਯੁਤ੍ਤਂ ਸਙ੍ਖਬ੍ਰਾਹ੍ਮਣਂ ਦਿਸ੍ਵਾ ‘‘ਇਮਸ੍ਸ ਸਤ੍ਤਮੋ ਦਿਵਸੋ ਸਮੁਦ੍ਦੇ ਪਤਿਤਸ੍ਸ, ਸਚੇ ਸੋ ਮਰਿਸ੍ਸਤਿ ਅਤਿਵਿਯ ਗਾਰਯ੍ਹਾ ਮੇ ਭਵਿਸ੍ਸਤੀ’’ਤਿ ਸਂਵਿਗ੍ਗਮਾਨਹਦਯਾ ਹੁਤ੍ਵਾ ਏਕਂ ਸੁਵਣ੍ਣਪਾਤਿਂ ਨਾਨਗ੍ਗਰਸਭੋਜਨਸ੍ਸ ਪੂਰੇਤ੍ਵਾ ਵਾਤਵੇਗੇਨ ਤਤ੍ਥ ਗਨ੍ਤ੍ਵਾ ਤਸ੍ਸ ਪੁਰਤੋ ਆਕਾਸੇ ਠਤ੍ਵਾ ‘‘ਬ੍ਰਾਹ੍ਮਣ, ਤ੍ਵਂ ਸਤ੍ਤਾਹਂ ਨਿਰਾਹਾਰੋ, ਇਦਂ ਦਿਬ੍ਬਭੋਜਨਂ ਭੁਞ੍ਜਾ’’ਤਿ ਆਹ. ਸੋ ਤਂ ਓਲੋਕੇਤ੍ਵਾ ‘‘ਅਪਨੇਹਿ ਤਵ ਭਤ੍ਤਂ, ਅਹਂ ਉਪੋਸਥਿਕੋ’’ਤਿ ਆਹ. ਅਥਸ੍ਸ ਉਪਟ੍ਠਾਕੋ ਪਚ੍ਛਤੋ ਆਗਤੋ ਦੇਵਤਂ ਅਦਿਸ੍ਵਾ ਸਦ੍ਦਮੇਵ ਸੁਤ੍ਵਾ ‘‘ਅਯਂ ਬ੍ਰਾਹ੍ਮਣੋ ਪਕਤਿਸੁਖੁਮਾਲੋ ਸਤ੍ਤਾਹਂ ਨਿਰਾਹਾਰਤਾਯ ਦੁਕ੍ਖਿਤੋ ਮਰਣਭਯੇਨ ਵਿਲਪਤਿ ਮਞ੍ਞੇ, ਅਸ੍ਸਾਸੇਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਪਠਮਂ ਗਾਥਮਾਹ –

੩੯. ‘‘ਬਹੁਸ੍ਸੁਤੋ ਸੁਤਧਮ੍ਮੋਸਿ ਸਙ੍ਖ, ਦਿਟ੍ਠਾ ਤਯਾ ਸਮਣਬ੍ਰਾਹ੍ਮਣਾ ਚ;

ਅਥਕ੍ਖਣੇ ਦਸ੍ਸਯਸੇ ਵਿਲਾਪਂ, ਅਞ੍ਞੋ ਨੁ ਕੋ ਤੇ ਪਟਿਮਨ੍ਤਕੋ ਮਯਾ’’ਤਿ.

ਤਤ੍ਥ ਸੁਤਧਮ੍ਮੋਸੀਤਿ ਧਮ੍ਮੋਪਿ ਤਯਾ ਧਮ੍ਮਿਕਸਮਣਬ੍ਰਾਹ੍ਮਣਾਨਂ ਸਨ੍ਤਿਕੇ ਸੁਤੋ ਅਸਿ. ਦਿਟ੍ਠਾ ਤਯਾਤਿ ਤੇਸਂ ਪਚ੍ਚਯੇ ਦੇਨ੍ਤੇਨ ਵੇਯ੍ਯਾਵਚ੍ਚਂ ਕਰੋਨ੍ਤੇਨ ਧਮ੍ਮਿਕਸਮਣਬ੍ਰਾਹ੍ਮਣਾ ਚ ਤਯਾ ਦਿਟ੍ਠਾ. ਏਵਂ ਅਕਰੋਨ੍ਤੋ ਹਿ ਪਸ੍ਸਨ੍ਤੋਪਿ ਤੇ ਨ ਪਸ੍ਸਤਿਯੇਵ. ਅਥਕ੍ਖਣੇਤਿ ਅਥ ਅਕ੍ਖਣੇ ਸਲ੍ਲਪਨ੍ਤਸ੍ਸ ਕਸ੍ਸਚਿ ਅਭਾਵੇਨ ਵਚਨਸ੍ਸ ਅਨੋਕਾਸੇ. ਦਸ੍ਸਯਸੇਤਿ ‘‘ਅਹਂ ਉਪੋਸਥਿਕੋ’’ਤਿ ਵਦਨ੍ਤੋ ਵਿਲਾਪਂ ਦਸ੍ਸੇਸਿ. ਪਟਿਮਨ੍ਤਕੋਤਿ ਮਯਾ ਅਞ੍ਞੋ ਕੋ ਤਵ ਪਟਿਮਨ੍ਤਕੋ ਪਟਿਵਚਨਦਾਯਕੋ, ਕਿਂਕਾਰਣਾ ਏਵਂ ਵਿਪ੍ਪਲਪਸੀਤਿ?

ਸੋ ਤਸ੍ਸ ਵਚਨਂ ਸੁਤ੍ਵਾ ‘‘ਇਮਸ੍ਸ ਦੇਵਤਾ ਨ ਪਞ੍ਞਾਯਤਿ ਮਞ੍ਞੇ’’ਤਿ ਚਿਨ੍ਤੇਤ੍ਵਾ ‘‘ਸਮ੍ਮ, ਨਾਹਂ ਮਰਣਸ੍ਸ ਭਾਯਾਮਿ, ਅਤ੍ਥਿ ਪਨ ਮੇ ਅਞ੍ਞੋ ਪਟਿਮਨ੍ਤਕੋ’’ਤਿ ਵਤ੍ਵਾ ਦੁਤਿਯਂ ਗਾਥਮਾਹ –

੪੦. ‘‘ਸੁਬ੍ਭੂ ਸੁਭਾ ਸੁਪ੍ਪਟਿਮੁਕ੍ਕਕਮ੍ਬੁ, ਪਗ੍ਗਯ੍ਹ ਸੋਵਣ੍ਣਮਯਾਯ ਪਾਤਿਯਾ;

‘ਭੁਞ੍ਜਸ੍ਸੁ ਭਤ੍ਤਂ’ ਇਤਿ ਮਂ ਵਦੇਤਿ, ਸਦ੍ਧਾਵਿਤ੍ਤਾ, ਤਮਹਂ ਨੋਤਿ ਬ੍ਰੂਮੀ’’ਤਿ.

ਤਤ੍ਥ ਸੁਬ੍ਭੂਤਿ ਸੁਭਮੁਖਾ. ਸੁਭਾਤਿ ਪਾਸਾਦਿਕਾ ਉਤ੍ਤਮਰੂਪਧਰਾ. ਸੁਪ੍ਪਟਿਮੁਕ੍ਕਕਮ੍ਬੂਤਿ ਪਟਿਮੁਕ੍ਕਸੁਵਣ੍ਣਾਲਙ੍ਕਾਰਾ. ਪਗ੍ਗਯ੍ਹਾਤਿ ਸੁਵਣ੍ਣਪਾਤਿਯਾ ਭਤ੍ਤਂ ਗਹੇਤ੍ਵਾ ਉਕ੍ਖਿਪਿਤ੍ਵਾ. ਸਦ੍ਧਾਵਿਤ੍ਤਾਤਿ ਸਦ੍ਧਾ ਚੇਵ ਤੁਟ੍ਠਚਿਤ੍ਤਾ ਚ. ‘‘ਸਦ੍ਧਂ ਚਿਤ੍ਤ’’ਨ੍ਤਿਪਿ ਪਾਠੋ, ਤਸ੍ਸਤ੍ਥੋ ਸਦ੍ਧਨ੍ਤਿ ਸਦ੍ਦਹਨ੍ਤਂ, ਚਿਤ੍ਤਨ੍ਤਿ ਤੁਟ੍ਠਚਿਤ੍ਤਂ. ਤਮਹਂ ਨੋਤੀਤਿ ਤਮਹਂ ਦੇਵਤਂ ਉਪੋਸਥਿਕਤ੍ਤਾ ਪਟਿਕ੍ਖਿਪਨ੍ਤੋ ਨੋਤਿ ਬ੍ਰੂਮਿ, ਨ ਵਿਪ੍ਪਲਪਾਮਿ ਸਮ੍ਮਾਤਿ.

ਅਥਸ੍ਸ ਸੋ ਤਤਿਯਂ ਗਾਥਮਾਹ –

੪੧. ‘‘ਏਤਾਦਿਸਂ ਬ੍ਰਾਹ੍ਮਣ ਦਿਸ੍ਵਾਨ ਯਕ੍ਖਂ, ਪੁਚ੍ਛੇਯ੍ਯ ਪੋਸੋ ਸੁਖਮਾਸਿਸਾਨੋ;

ਉਟ੍ਠੇਹਿ ਨਂ ਪਞ੍ਜਲਿਕਾਭਿਪੁਚ੍ਛ, ਦੇਵੀ ਨੁਸਿ ਤ੍ਵਂ ਉਦ ਮਾਨੁਸੀ ਨੂ’’ਤਿ.

ਤਤ੍ਥ ਸੁਖਮਾਸਿਸਾਨੋਤਿ ਏਤਾਦਿਸਂ ਯਕ੍ਖਂ ਦਿਸ੍ਵਾ ਅਤ੍ਤਨੋ ਸੁਖਂ ਆਸੀਸਨ੍ਤੋ ਪਣ੍ਡਿਤੋ ਪੁਰਿਸੋ ‘‘ਅਮ੍ਹਾਕਂ ਸੁਖਂ ਭਵਿਸ੍ਸਤਿ, ਨ ਭਵਿਸ੍ਸਤੀ’’ਤਿ ਪੁਚ੍ਛੇਯ੍ਯ. ਉਟ੍ਠੇਹੀਤਿ ਉਦਕਤੋ ਉਟ੍ਠਾਨਾਕਾਰਂ ਦਸ੍ਸੇਨ੍ਤੋ ਉਟ੍ਠਹ. ਪਞ੍ਜਲਿਕਾਭਿਪੁਚ੍ਛਾਤਿ ਅਞ੍ਜਲਿਕੋ ਹੁਤ੍ਵਾ ਅਭਿਪੁਚ੍ਛ. ਉਦ ਮਾਨੁਸੀਤਿ ਉਦਾਹੁ ਮਹਿਦ੍ਧਿਕਾ ਮਾਨੁਸੀ ਤ੍ਵਨ੍ਤਿ.

ਬੋਧਿਸਤ੍ਤੋ ‘‘ਯੁਤ੍ਤਂ ਕਥੇਸੀ’’ਤਿ ਤਂ ਪੁਚ੍ਛਨ੍ਤੋ ਚਤੁਤ੍ਥਂ ਗਾਥਮਾਹ –

੪੨. ‘‘ਯਂ ਤ੍ਵਂ ਸੁਖੇਨਾਭਿਸਮੇਕ੍ਖਸੇ ਮਂ, ਭੁਞ੍ਜਸ੍ਸੁ ਭਤ੍ਤਂ ਇਤਿ ਮਂ ਵਦੇਸਿ;

ਪੁਚ੍ਛਾਮਿ ਤਂ ਨਾਰਿ ਮਹਾਨੁਭਾਵੇ, ਦੇਵੀ ਨੁਸਿ ਤ੍ਵਂ ਉਦ ਮਾਨੁਸੀ ਨੂ’’ਤਿ.

ਤਤ੍ਥ ਯਂ ਤ੍ਵਨ੍ਤਿ ਯਸ੍ਮਾ ਤ੍ਵਂ ਸੁਖੇਨ ਮਂ ਅਭਿਸਮੇਕ੍ਖਸੇ, ਪਿਯਚਕ੍ਖੂਹਿ ਓਲੋਕੇਸਿ. ਪੁਚ੍ਛਾਮਿ ਤਨ੍ਤਿ ਤੇਨ ਕਾਰਣੇਨ ਤਂ ਪੁਚ੍ਛਾਮਿ.

ਤਤੋ ਦੇਵਧੀਤਾ ਦ੍ਵੇ ਗਾਥਾ ਅਭਾਸਿ –

੪੩. ‘‘ਦੇਵੀ ਅਹਂ ਸਙ੍ਖ ਮਹਾਨੁਭਾਵਾ, ਇਧਾਗਤਾ ਸਾਗਰਵਾਰਿਮਜ੍ਝੇ;

ਅਨੁਕਮ੍ਪਿਕਾ ਨੋ ਚ ਪਦੁਟ੍ਠਚਿਤ੍ਤਾ, ਤਵੇਵ ਅਤ੍ਥਾਯ ਇਧਾਗਤਾਸ੍ਮਿ.

੪੪. ‘‘ਇਧਨ੍ਨਪਾਨਂ ਸਯਨਾਸਨਞ੍ਚ, ਯਾਨਾਨਿ ਨਾਨਾਵਿਵਿਧਾਨਿ ਸਙ੍ਖ;

ਸਬ੍ਬਸ੍ਸ ਤ੍ਯਾਹਂ ਪਟਿਪਾਦਯਾਮਿ, ਯਂ ਕਿਞ੍ਚਿ ਤੁਯ੍ਹਂ ਮਨਸਾਭਿਪਤ੍ਥਿਤ’’ਨ੍ਤਿ.

ਤਤ੍ਥ ਇਧਾਤਿ ਇਮਸ੍ਮਿਂ ਮਹਾਸਮੁਦ੍ਦੇ. ਨਾਨਾਵਿਵਿਧਾਨੀਤਿ ਬਹੂਨਿ ਚ ਅਨੇਕਪ੍ਪਕਾਰਾਨਿ ਚ ਹਤ੍ਥਿਯਾਨਅਸ੍ਸਯਾਨਾਦੀਨਿ ਅਤ੍ਥਿ. ਸਬ੍ਬਸ੍ਸ ਤ੍ਯਾਹਨ੍ਤਿ ਤਸ੍ਸ ਅਨ੍ਨਪਾਨਾਦਿਨੋ ਸਬ੍ਬਸ੍ਸ ਸਾਮਿਕਂ ਕਤ੍ਵਾ ਤਂ ਤੇ ਅਨ੍ਨਪਾਨਾਦਿਂ ਪਟਿਪਾਦਯਾਮਿ ਦਦਾਮਿ. ਯਂ ਕਿਞ੍ਚੀਤਿ ਅਞ੍ਞਮ੍ਪਿ ਯਂ ਕਿਞ੍ਚਿ ਮਨਸਾ ਇਚ੍ਛਿਤਂ, ਤਂ ਸਬ੍ਬਂ ਤੇ ਦਮ੍ਮੀਤਿ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਅਯਂ ਦੇਵਧੀਤਾ ਸਮੁਦ੍ਦਪਿਟ੍ਠੇ ਮਯ੍ਹਂ ‘ਇਦਞ੍ਚਿਦਞ੍ਚ ਦਮ੍ਮੀ’ਤਿ ਵਦਤਿ, ਕਿਂ ਨੁ ਖੋ ਏਸਾ ਮਯਾ ਕਤੇਨ ਪੁਞ੍ਞਕਮ੍ਮੇਨ ਦਾਤੁਕਾਮਾ, ਉਦਾਹੁ ਅਤ੍ਤਨੋ ਬਲੇਨ, ਪੁਚ੍ਛਿਸ੍ਸਾਮਿ ਤਾਵ ਨ’’ਨ੍ਤਿ ਚਿਨ੍ਤੇਤ੍ਵਾ ਪੁਚ੍ਛਨ੍ਤੋ ਸਤ੍ਤਮਂ ਗਾਥਮਾਹ –

੪੫. ‘‘ਯਂ ਕਿਞ੍ਚਿ ਯਿਟ੍ਠਞ੍ਚ ਹੁਤਞ੍ਚ ਮਯ੍ਹਂ, ਸਬ੍ਬਸ੍ਸ ਨੋ ਇਸ੍ਸਰਾ ਤ੍ਵਂ ਸੁਗਤ੍ਤੇ;

ਸੁਸ੍ਸੋਣਿ ਸੁਬ੍ਭਮੁ ਸੁਵਿਲਗ੍ਗਮਜ੍ਝੇ, ਕਿਸ੍ਸ ਮੇ ਕਮ੍ਮਸ੍ਸ ਅਯਂ ਵਿਪਾਕੋ’’ਤਿ.

ਤਤ੍ਥ ਯਿਟ੍ਠਨ੍ਤਿ ਦਾਨਵਸੇਨ ਯਜਿਤਂ. ਹੁਤਨ੍ਤਿ ਆਹੁਨਪਾਹੁਨਵਸੇਨ ਦਿਨ੍ਨਂ. ਸਬ੍ਬਸ੍ਸ ਨੋ ਇਸ੍ਸਰਾ ਤ੍ਵਨ੍ਤਿ ਤਸ੍ਸ ਅਮ੍ਹਾਕਂ ਪੁਞ੍ਞਕਮ੍ਮਸ੍ਸ ਤ੍ਵਂ ਇਸ੍ਸਰਾ, ‘‘ਇਮਸ੍ਸ ਅਯਂ ਵਿਪਾਕੋ, ਇਮਸ੍ਸ ਅਯ’’ਨ੍ਤਿ ਬ੍ਯਾਕਰਿਤੁਂ ਸਮਤ੍ਥਾਤਿ ਅਤ੍ਥੋ. ਸੁਸ੍ਸੋਣੀਤਿ ਸੁਨ੍ਦਰਊਰੁਲਕ੍ਖਣੇ. ਸੁਬ੍ਭਮੂਤਿ ਸੁਨ੍ਦਰਭਮੁਕੇ. ਸੁਵਿਲਗ੍ਗਮਜ੍ਝੇਤਿ ਸੁਟ੍ਠੁਵਿਲਗ੍ਗਿਤਤਨੁਮਜ੍ਝੇ. ਕਿਸ੍ਸ ਮੇਤਿ ਮਯਾ ਕਤਕਮ੍ਮੇਸੁ ਕਤਰਕਮ੍ਮਸ੍ਸ ਅਯਂ ਵਿਪਾਕੋ, ਯੇਨਾਹਂ ਅਪ੍ਪਤਿਟ੍ਠੇ ਸਮੁਦ੍ਦੇ ਪਤਿਟ੍ਠਂ ਲਭਾਮੀਤਿ.

ਤਂ ਸੁਤ੍ਵਾ ਦੇਵਧੀਤਾ ‘‘ਅਯਂ ਬ੍ਰਾਹ੍ਮਣੋ ‘ਯਂ ਤੇਨ ਕੁਸਲਂ ਕਤਂ, ਤਂ ਕਮ੍ਮਂ ਨ ਜਾਨਾਤੀ’ਤਿ ਅਞ੍ਞਾਯ ਪੁਚ੍ਛਤਿ ਮਞ੍ਞੇ, ਕਥਯਿਸ੍ਸਾਮਿ ਦਾਨਿਸ੍ਸਾ’’ਤਿ ਤਂ ਕਥੇਨ੍ਤੀ ਅਟ੍ਠਮਂ ਗਾਥਮਾਹ –

੪੬. ‘‘ਘਮ੍ਮੇ ਪਥੇ ਬ੍ਰਾਹ੍ਮਣ ਏਕਭਿਕ੍ਖੁਂ, ਉਗ੍ਘਟ੍ਟਪਾਦਂ ਤਸਿਤਂ ਕਿਲਨ੍ਤਂ;

ਪਟਿਪਾਦਯੀ ਸਙ੍ਖ ਉਪਾਹਨਾਨਿ, ਸਾ ਦਕ੍ਖਿਣਾ ਕਾਮਦੁਹਾ ਤਵਜ੍ਜਾ’’ਤਿ.

ਤਤ੍ਥ ਏਕਭਿਕ੍ਖੁਨ੍ਤਿ ਏਕਂ ਪਚ੍ਚੇਕਬੁਦ੍ਧਂ ਸਨ੍ਧਾਯਾਹ. ਉਗ੍ਘਟ੍ਟਪਾਦਨ੍ਤਿ ਉਣ੍ਹਵਾਲੁਕਾਯ ਘਟ੍ਟਿਤਪਾਦਂ. ਤਸਿਤਨ੍ਤਿ ਪਿਪਾਸਿਤਂ. ਪਟਿਪਾਦਯੀਤਿ ਪਟਿਪਾਦੇਸਿ, ਯੋਜੇਸੀਤਿ ਅਤ੍ਥੋ. ਕਾਮਦੁਹਾਤਿ ਸਬ੍ਬਕਾਮਦਾਯਿਕਾ.

ਤਂ ਸੁਤ੍ਵਾ ਮਹਾਸਤ੍ਤੋ ‘‘ਏਵਰੂਪੇਪਿ ਨਾਮ ਅਪ੍ਪਤਿਟ੍ਠੇ ਮਹਾਸਮੁਦ੍ਦੇ ਮਯਾ ਦਿਨ੍ਨਉਪਾਹਨਦਾਨਂ ਮਮ ਸਬ੍ਬਕਾਮਦਦਂ ਜਾਤਂ, ਅਹੋ ਸੁਦਿਨ੍ਨਂ ਮੇ ਪਚ੍ਚੇਕਬੁਦ੍ਧਸ੍ਸ ਦਾਨ’’ਨ੍ਤਿ ਤੁਟ੍ਠਚਿਤ੍ਤੋ ਨਵਮਂ ਗਾਥਮਾਹ –

੪੭. ‘‘ਸਾ ਹੋਤੁ ਨਾਵਾ ਫਲਕੂਪਪਨ੍ਨਾ, ਅਨਵਸ੍ਸੁਤਾ ਏਰਕਵਾਤਯੁਤ੍ਤਾ;

ਅਞ੍ਞਸ੍ਸ ਯਾਨਸ੍ਸ ਨ ਹੇਤ੍ਥ ਭੂਮਿ, ਅਜ੍ਜੇਵ ਮਂ ਮੋਲ਼ਿਨਿਂ ਪਾਪਯਸ੍ਸੂ’’ਤਿ.

ਤਸ੍ਸਤ੍ਥੋ – ਦੇਵਤੇ, ਏਵਂ ਸਨ੍ਤੇ ਮਯ੍ਹਂ ਏਕਂ ਨਾਵਂ ਮਾਪੇਹਿ, ਖੁਦ੍ਦਕਂ ਪਨ ਏਕਦੋਣਿਕਨਾਵਂ ਮਾਪੇਹਿ, ਯਂ ਨਾਵਂ ਮਾਪੇਸ੍ਸਸਿ, ਸਾ ਹੋਤੁ ਨਾਵਾ ਬਹੂਹਿ ਸੁਸਿਬ੍ਬਿਤੇਹਿ ਫਲਕੇਹਿ ਉਪਪਨ੍ਨਾ, ਉਦਕਪਵੇਸਨਸ੍ਸਾਭਾਵੇਨ ਅਨਵਸ੍ਸੁਤਾ, ਏਰਕੇਨ ਸਮ੍ਮਾ ਗਹੇਤ੍ਵਾ ਗਚ੍ਛਨ੍ਤੇਨ ਵਾਤੇਨ ਯੁਤ੍ਤਾ, ਠਪੇਤ੍ਵਾ ਦਿਬ੍ਬਨਾਵਂ ਅਞ੍ਞਸ੍ਸ ਯਾਨਸ੍ਸ ਏਤ੍ਥ ਭੂਮਿ ਨਤ੍ਥਿ, ਤਾਯ ਪਨ ਦਿਬ੍ਬਨਾਵਾਯ ਅਜ੍ਜੇਵ ਮਂ ਮੋਲ਼ਿਨਿਨਗਰਂ ਪਾਪਯਸ੍ਸੂਤਿ.

ਦੇਵਧੀਤਾ ਤਸ੍ਸ ਵਚਨਂ ਸੁਤ੍ਵਾ ਤੁਟ੍ਠਚਿਤ੍ਤਾ ਸਤ੍ਤਰਤਨਮਯਂ ਨਾਵਂ ਮਾਪੇਸਿ. ਸਾ ਦੀਘਤੋ ਅਟ੍ਠਉਸਭਾ ਅਹੋਸਿ ਵਿਤ੍ਥਾਰਤੋ ਚਤੁਉਸਭਾ, ਗਮ੍ਭੀਰਤੋ ਵੀਸਤਿਯਟ੍ਠਿਕਾ. ਤਸ੍ਸਾ ਇਨ੍ਦਨੀਲਮਯਾ ਤਯੋ ਕੂਪਕਾ, ਸੋਵਣ੍ਣਮਯਾਨਿ ਯੋਤ੍ਤਾਨਿ ਰਜਤਮਯਾਨਿ ਪਤ੍ਤਾਨਿ ਸੋਵਣ੍ਣਮਯਾਨਿ ਚ ਫਿਯਾਰਿਤ੍ਤਾਨਿ ਅਹੇਸੁਂ. ਦੇਵਤਾ ਤਂ ਨਾਵਂ ਸਤ੍ਤਨ੍ਨਂ ਰਤਨਾਨਂ ਪੂਰੇਤ੍ਵਾ ਬ੍ਰਾਹ੍ਮਣਂ ਆਲਿਙ੍ਗਿਤ੍ਵਾ ਅਲਙ੍ਕਤਨਾਵਾਯ ਆਰੋਪੇਸਿ, ਉਪਟ੍ਠਾਕਂ ਪਨਸ੍ਸ ਨ ਓਲੋਕੇਸਿ. ਬ੍ਰਾਹ੍ਮਣੋ ਅਤ੍ਤਨਾ ਕਤਕਲ੍ਯਾਣਤੋ ਤਸ੍ਸ ਪਤ੍ਤਿਂ ਅਦਾਸਿ, ਸੋ ਅਨੁਮੋਦਿ. ਤਦਾ ਦੇਵਤਾ ਤਮ੍ਪਿ ਆਲਿਙ੍ਗਿਤ੍ਵਾ ਨਾਵਾਯ ਪਤਿਟ੍ਠਾਪੇਸਿ. ਅਥ ਨਂ ਨਾਵਂ ਮੋਲ਼ਿਨਿਨਗਰਂ ਨੇਤ੍ਵਾ ਬ੍ਰਾਹ੍ਮਣਸ੍ਸ ਘਰੇ ਧਨਂ ਪਤਿਟ੍ਠਾਪੇਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਅਗਮਾਸਿ. ਸਤ੍ਥਾ ਅਭਿਸਮ੍ਬੁਦ੍ਧੋ ਹੁਤ੍ਵਾ –

੪੮. ‘‘ਸਾ ਤਤ੍ਥ ਵਿਤ੍ਤਾ ਸੁਮਨਾ ਪਤੀਤਾ, ਨਾਵਂ ਸੁਚਿਤ੍ਤਂ ਅਭਿਨਿਮ੍ਮਿਨਿਤ੍ਵਾ;

ਆਦਾਯ ਸਙ੍ਖਂ ਪੁਰਿਸੇਨ ਸਦ੍ਧਿਂ, ਉਪਾਨਯੀ ਨਗਰਂ ਸਾਧੁਰਮ੍ਮ’’ਨ੍ਤਿ. –

ਇਮਂ ਓਸਾਨਗਾਥਂ ਅਭਾਸਿ.

ਤਤ੍ਥ ਸਾਤਿ ਭਿਕ੍ਖਵੇ, ਸਾ ਦੇਵਤਾ ਤਤ੍ਥ ਸਮੁਦ੍ਦਮਜ੍ਝੇ ਤਸ੍ਸ ਵਚਨਂ ਸੁਤ੍ਵਾ ਵਿਤ੍ਤਿਸਙ੍ਖਾਤਾਯ ਪੀਤਿਯਾ ਸਮਨ੍ਨਾਗਤਤ੍ਤਾ ਵਿਤ੍ਤਾ. ਸੁਮਨਾਤਿ ਸੁਨ੍ਦਰਮਨਾ ਪਾਮੋਜ੍ਜੇਨ ਪਤੀਤਚਿਤ੍ਤਾ ਹੁਤ੍ਵਾ ਵਿਚਿਤ੍ਰਨਾਵਂ ਨਿਮ੍ਮਿਨਿਤ੍ਵਾ ਬ੍ਰਾਹ੍ਮਣਂ ਪਰਿਚਾਰਕੇਨ ਸਦ੍ਧਿਂ ਆਦਾਯ ਸਾਧੁਰਮ੍ਮਂ ਅਤਿਰਮਣੀਯਂ ਨਗਰਂ ਉਪਾਨਯੀਤਿ.

ਬ੍ਰਾਹ੍ਮਣੋਪਿ ਯਾਵਜੀਵਂ ਅਪਰਿਮਿਤਧਨਂ ਗੇਹਂ ਅਜ੍ਝਾਵਸਨ੍ਤੋ ਦਾਨਂ ਦਤ੍ਵਾ ਸੀਲਂ ਰਕ੍ਖਿਤ੍ਵਾ ਜੀਵਿਤਪਰਿਯੋਸਾਨੇ ਸਪਰਿਸੋ ਦੇਵਨਗਰਂ ਪਰਿਪੂਰੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਸਚ੍ਚਾਨਿ ਪਕਾਸੇਤ੍ਵਾ ਜਾਤਕਂ ਸਮੋਧਾਨੇਸਿ, ਸਚ੍ਚਪਰਿਯੋਸਾਨੇ ਉਪਾਸਕੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿ.

ਤਦਾ ਦੇਵਧੀਤਾ ਉਪ੍ਪਲਵਣ੍ਣਾ ਅਹੋਸਿ, ਉਪਟ੍ਠਾਕਪੁਰਿਸੋ ਆਨਨ੍ਦੋ, ਸਙ੍ਖਬ੍ਰਾਹ੍ਮਣੋ ਪਨ ਅਹਮੇਵ ਅਹੋਸਿਨ੍ਤਿ.

ਸਙ੍ਖਜਾਤਕਵਣ੍ਣਨਾ ਚਤੁਤ੍ਥਾ.

[੪੪੩] ੫. ਚੂਲ਼ਬੋਧਿਜਾਤਕਵਣ੍ਣਨਾ

ਯੋ ਤੇ ਇਮਂ ਵਿਸਾਲਕ੍ਖਿਨ੍ਤਿ ਇਦਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਏਕਂ ਕੋਧਨਂ ਭਿਕ੍ਖੁਂ ਆਰਬ੍ਭ ਕਥੇਸਿ. ਸੋ ਕਿਰ ਭਿਕ੍ਖੁ ਨਿਯ੍ਯਾਨਿਕੇ ਬੁਦ੍ਧਸਾਸਨੇ ਪਬ੍ਬਜਿਤ੍ਵਾਪਿ ਕੋਧਂ ਨਿਗ੍ਗਹੇਤੁਂ ਨਾਸਕ੍ਖਿ, ਕੋਧਨੋ ਅਹੋਸਿ ਉਪਾਯਾਸਬਹੁਲੋ, ਅਪ੍ਪਮ੍ਪਿ ਵੁਤ੍ਤੋ ਸਮਾਨੋ ਅਭਿਸਜ੍ਜਿ ਕੁਪ੍ਪਿ ਬ੍ਯਾਪਜ੍ਜਿ ਪਤਿਟ੍ਠਯਿ. ਸਤ੍ਥਾ ਤਸ੍ਸ ਕੋਧਨਭਾਵਂ ਸੁਤ੍ਵਾ ਪਕ੍ਕੋਸਾਪੇਤ੍ਵਾ ‘‘ਸਚ੍ਚਂ ਕਿਰ ਤ੍ਵਂ ਕੋਧਨੋ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ ਭਨ੍ਤੇ’’ਤਿ ਵੁਤ੍ਤੇ ‘‘ਭਿਕ੍ਖੁ ਕੋਧੋ ਨਾਮ ਵਾਰੇਤਬ੍ਬੋ, ਏਵਰੂਪੋ ਹਿ ਇਧਲੋਕੇ ਚ ਪਰਲੋਕੇ ਚ ਅਨਤ੍ਥਕਾਰਕੋ, ਤ੍ਵਂ ਨਿਕ੍ਕੋਧਸ੍ਸ ਬੁਦ੍ਧਸ੍ਸ ਸਾਸਨੇ ਪਬ੍ਬਜਿਤ੍ਵਾ ਕਸ੍ਮਾ ਕੁਜ੍ਝਸਿ, ਪੋਰਾਣਕਪਣ੍ਡਿਤਾ ਬਾਹਿਰਸਾਸਨੇ ਪਬ੍ਬਜਿਤ੍ਵਾਪਿ ਕੋਧਂ ਨ ਕਰਿਂਸੂ’’ਤਿ ਵਤ੍ਵਾ ਅਤੀਤਂ ਆਹਰਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਅਞ੍ਞਤਰਸ੍ਮਿਂ ਕਾਸਿਨਿਗਮੇ ਏਕੋ ਬ੍ਰਾਹ੍ਮਣੋ ਅਡ੍ਢੋ ਮਹਦ੍ਧਨੋ ਮਹਾਭੋਗੋ ਅਪੁਤ੍ਤਕੋ ਅਹੋਸਿ, ਤਸ੍ਸ ਬ੍ਰਾਹ੍ਮਣੀ ਪੁਤ੍ਤਂ ਪਤ੍ਥੇਸਿ. ਤਦਾ ਬੋਧਿਸਤ੍ਤੋ ਬ੍ਰਹ੍ਮਲੋਕਾ ਚਵਿਤ੍ਵਾ ਤਸ੍ਸਾ ਕੁਚ੍ਛਿਯਂ ਨਿਬ੍ਬਤ੍ਤਿ, ਤਸ੍ਸ ਨਾਮਗ੍ਗਹਣਦਿਵਸੇ ‘‘ਬੋਧਿਕੁਮਾਰੋ’’ਤਿ ਨਾਮਂ ਕਰਿਂਸੁ. ਤਸ੍ਸ ਵਯਪ੍ਪਤ੍ਤਕਾਲੇ ਤਕ੍ਕਸਿਲਂ ਗਨ੍ਤ੍ਵਾ ਸਬ੍ਬਸਿਪ੍ਪਾਨਿ ਉਗ੍ਗਣ੍ਹਿਤ੍ਵਾ ਪਚ੍ਚਾਗਤਸ੍ਸ ਅਨਿਚ੍ਛਨ੍ਤਸ੍ਸੇਵ ਮਾਤਾਪਿਤਰੋ ਸਮਾਨਜਾਤਿਕਾ ਕੁਲਾ ਕੁਮਾਰਿਕਂ ਆਨੇਸੁਂ. ਸਾਪਿ ਬ੍ਰਹ੍ਮਲੋਕਾ ਚੁਤਾਵ ਉਤ੍ਤਮਰੂਪਧਰਾ ਦੇਵਚ੍ਛਰਪਟਿਭਾਗਾ. ਤੇਸਂ ਅਨਿਚ੍ਛਮਾਨਾਨਞ੍ਞੇਵ ਅਞ੍ਞਮਞ੍ਞਂ ਆਵਾਹਵਿਵਾਹਂ ਕਰਿਂਸੁ. ਉਭਿਨ੍ਨਂ ਪਨੇਤੇਸਂ ਕਿਲੇਸਸਮੁਦਾਚਾਰੋ ਨਾਮ ਨ ਭੂਤਪੁਬ੍ਬੋ, ਸਂਰਾਗਵਸੇਨ ਅਞ੍ਞਮਞ੍ਞਸ੍ਸ ਓਲੋਕਨਂ ਨਾਮ ਨਾਹੋਸਿ, ਸੁਪਿਨੇਪਿ ਮੇਥੁਨਧਮ੍ਮੋ ਨਾਮ ਨ ਦਿਟ੍ਠਪੁਬ੍ਬੋ, ਏਵਂ ਪਰਿਸੁਦ੍ਧਸੀਲਾ ਅਹੇਸੁਂ.

ਅਥਾਪਰਭਾਗੇ ਮਹਾਸਤ੍ਤੋ ਮਾਤਾਪਿਤੂਸੁ ਕਾਲਕਤੇਸੁ ਤੇਸਂ ਸਰੀਰਕਿਚ੍ਚਂ ਕਤ੍ਵਾ ਤਂ ਪਕ੍ਕੋਸਿਤ੍ਵਾ ‘‘ਭਦ੍ਦੇ, ਤ੍ਵਂ ਇਮਂ ਅਸੀਤਿਕੋਟਿਧਨਂ ਗਹੇਤ੍ਵਾ ਸੁਖੇਨ ਜੀਵਾਹੀ’’ਤਿ ਆਹ. ‘‘ਕਿਂ ਕਰਿਸ੍ਸਥ ਤੁਮ੍ਹੇ ਪਨ, ਅਯ੍ਯਪੁਤ੍ਤਾ’’ਤਿ? ‘‘ਮਯ੍ਹਂ ਧਨੇਨ ਕਿਚ੍ਚਂ ਨਤ੍ਥਿ, ਹਿਮਵਨ੍ਤਪਦੇਸਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਤ੍ਤਨੋ ਪਤਿਟ੍ਠਂ ਕਰਿਸ੍ਸਾਮੀ’’ਤਿ. ‘‘ਕਿਂ ਪਨ ਅਯ੍ਯਪੁਤ੍ਤ ਪਬ੍ਬਜ੍ਜਾ ਨਾਮ ਪੁਰਿਸਾਨਞ੍ਞੇਵ ਵਟ੍ਟਤੀ’’ਤਿ? ‘‘ਇਤ੍ਥੀਨਮ੍ਪਿ ਵਟ੍ਟਤਿ, ਭਦ੍ਦੇ’’ਤਿ. ‘‘ਤੇਨ ਹਿ ਅਹਂ ਤੁਮ੍ਹੇਹਿ ਛਟ੍ਟਿਤਖੇਲ਼ਂ ਨ ਗਣ੍ਹਿਸ੍ਸਾਮਿ, ਮਯ੍ਹਮ੍ਪਿ ਧਨੇਨ ਕਿਚ੍ਚਂ ਨਤ੍ਥਿ, ਅਹਮ੍ਪਿ ਪਬ੍ਬਜਿਸ੍ਸਾਮੀ’’ਤਿ. ‘‘ਸਾਧੁ, ਭਦ੍ਦੇ’’ਤਿ. ਤੇ ਉਭੋਪਿ ਮਹਾਦਾਨਂ ਦਤ੍ਵਾ ਨਿਕ੍ਖਮਿਤ੍ਵਾ ਰਮਣੀਯੇ ਭੂਮਿਭਾਗੇ ਅਸ੍ਸਮਂ ਕਤ੍ਵਾ ਪਬ੍ਬਜਿਤ੍ਵਾ ਉਞ੍ਛਾਚਰਿਯਾਯ ਫਲਾਫਲੇਹਿ ਯਾਪੇਨ੍ਤਾ ਤਤ੍ਥ ਦਸਮਤ੍ਤਾਨਿ ਸਂਵਚ੍ਛਰਾਨਿ ਵਸਿਂਸੁ, ਝਾਨਂ ਪਨ ਨੇਸਂ ਨ ਤਾਵ ਉਪ੍ਪਜ੍ਜਤਿ. ਤੇ ਤਤ੍ਥ ਪਬ੍ਬਜ੍ਜਾਸੁਖੇਨੇਵ ਦਸ ਸਂਵਚ੍ਛਰੇ ਵਸਿਤ੍ਵਾ ਲੋਣਮ੍ਬਿਲਸੇਵਨਤ੍ਥਾਯ ਜਨਪਦਚਾਰਿਕਂ ਚਰਨ੍ਤਾ ਅਨੁਪੁਬ੍ਬੇਨ ਬਾਰਾਣਸਿਂ ਪਤ੍ਵਾ ਰਾਜੁਯ੍ਯਾਨੇ ਵਸਿਂਸੁ.