੧. ਸੁਤ੍ਤਨ੍ਤਭਾਜਨੀਯਵਣ੍ਣਨਾ

੧੭੨. ਇਦਾਨਿ ਤਦਨਨ੍ਤਰੇ ਧਾਤੁਵਿਭਙ੍ਗੇ ਸਬ੍ਬਾ ਧਾਤੁਯੋ ਛਹਿ ਛਹਿ ਧਾਤੂਹਿ ਸਙ੍ਖਿਪਿਤ੍ਵਾ ਤੀਹਿ ਛਕ੍ਕੇਹਿ ਸੁਤ੍ਤਨ੍ਤਭਾਜਨੀਯਂ ਦਸ੍ਸੇਨ੍ਤੋ ਛ ਧਾਤੁਯੋਤਿਆਦਿਮਾਹ. ਤਤ੍ਥ ਛਾਤਿ ਗਣਨਪਰਿਚ੍ਛੇਦੋ. ਧਾਤੁਯੋਤਿ ਪਰਿਚ੍ਛਿਨ੍ਨਧਮ੍ਮਨਿਦਸ੍ਸਨਂ. ਪਥਵੀਧਾਤੂਤਿਆਦੀਸੁ ਧਾਤ੍ਵਟ੍ਠੋ ਨਾਮ ਸਭਾਵਟ੍ਠੋ, ਸਭਾਵਟ੍ਠੋ ਨਾਮ ਸੁਞ੍ਞਤਟ੍ਠੋ, ਸੁਞ੍ਞਤਟ੍ਠੋ ਨਾਮ ਨਿਸ੍ਸਤ੍ਤਟ੍ਠੋਤਿ ਏਵਂ ਸਭਾਵਸੁਞ੍ਞਤਨਿਸ੍ਸਤ੍ਤਟ੍ਠੇਨ ਪਥਵੀਯੇਵ ਧਾਤੁ ਪਥਵੀਧਾਤੁ. ਆਪੋਧਾਤੁਆਦੀਸੁਪਿ ਏਸੇਵ ਨਯੋ. ਏਵਮੇਤ੍ਥ ਪਦਸਮਾਸਂ ਵਿਦਿਤ੍ਵਾ ਏਵਮਤ੍ਥੋ ਵੇਦਿਤਬ੍ਬੋ – ਪਥਵੀਧਾਤੂਤਿ ਪਤਿਟ੍ਠਾਨਧਾਤੁ. ਆਪੋਧਾਤੂਤਿ ਆਬਨ੍ਧਨਧਾਤੁ. ਤੇਜੋਧਾਤੂਤਿ ਪਰਿਪਾਚਨਧਾਤੁ. ਵਾਯੋਧਾਤੂਤਿ ਵਿਤ੍ਥਮ੍ਭਨਧਾਤੁ. ਆਕਾਸਧਾਤੂਤਿ ਅਸਮ੍ਫੁਟ੍ਠਧਾਤੁ. ਵਿਞ੍ਞਾਣਧਾਤੂਤਿ ਵਿਜਾਨਨਧਾਤੁ.

੧੭੩. ਪਥਵੀਧਾਤੁਦ੍ਵਯਨ੍ਤਿ ਪਥਵੀਧਾਤੁ ਦ੍ਵੇ ਅਯਂ. ਅਯਂ ਪਥਵੀਧਾਤੁ ਨਾਮ ਨ ਏਕਾ ਏਵ ਅਜ੍ਝਤ੍ਤਿਕਬਾਹਿਰਭੇਦੇਨ ਪਨ ਦ੍ਵੇ ਧਾਤੁਯੋ ਏਵਾਤਿ ਅਤ੍ਥੋ. ਤੇਨੇਵਾਹ – ‘‘ਅਤ੍ਥਿ ਅਜ੍ਝਤ੍ਤਿਕਾ ਅਤ੍ਥਿ ਬਾਹਿਰਾ’’ਤਿ. ਤਤ੍ਥ ਅਜ੍ਝਤ੍ਤਿਕਾਤਿ ਸਤ੍ਤਸਨ੍ਤਾਨਪਰਿਯਾਪਨ੍ਨਾ ਨਿਯਕਜ੍ਝਤ੍ਤਾ. ਬਾਹਿਰਾਤਿ ਸਙ੍ਖਾਰਸਨ੍ਤਾਨਪਰਿਯਾਪਨ੍ਨਾ ਅਨਿਨ੍ਦ੍ਰਿਯਬਦ੍ਧਾ. ਅਜ੍ਝਤ੍ਤਂ ਪਚ੍ਚਤ੍ਤਨ੍ਤਿ ਉਭਯਮ੍ਪੇਤਂ ਨਿਯਕਜ੍ਝਤ੍ਤਾਧਿਵਚਨਮੇਵ. ਇਦਾਨਿ ਤਂ ਸਭਾਵਾਕਾਰਤੋ ਦਸ੍ਸੇਤੁਂ ਕਕ੍ਖਲ਼ਨ੍ਤਿਆਦਿ ਵੁਤ੍ਤਂ. ਤਤ੍ਥ ਕਕ੍ਖਲ਼ਨ੍ਤਿ ਥਦ੍ਧਂ. ਖਰਿਗਤਨ੍ਤਿ ਫਰੁਸਂ. ਕਕ੍ਖਲ਼ਤ੍ਤਨ੍ਤਿ ਕਕ੍ਖਲ਼ਭਾਵੋ. ਕਕ੍ਖਲ਼ਭਾਵੋਤਿ ਕਕ੍ਖਲ਼ਸਭਾਵੋ. ਅਜ੍ਝਤ੍ਤਂ ਉਪਾਦਿਨ੍ਨਨ੍ਤਿ ਨਿਯਕਜ੍ਝਤ੍ਤਸਙ੍ਖਾਤਂ ਉਪਾਦਿਨ੍ਨਂ. ਉਪਾਦਿਨ੍ਨਂ ਨਾਮ ਸਰੀਰਟ੍ਠਕਂ. ਸਰੀਰਟ੍ਠਕਞ੍ਹਿ ਕਮ੍ਮਸਮੁਟ੍ਠਾਨਂ ਵਾ ਹੋਤੁ ਮਾ ਵਾ, ਤਂ ਸਨ੍ਧਾਯ ਉਪਾਦਿਨ੍ਨਮ੍ਪਿ ਅਤ੍ਥਿ ਅਨੁਪਾਦਿਨ੍ਨਮ੍ਪਿ; ਆਦਿਨ੍ਨਗ੍ਗਹਿਤਪਰਾਮਟ੍ਠਵਸੇਨ ਪਨ ਸਬ੍ਬਮ੍ਪੇਤਂ ਉਪਾਦਿਨ੍ਨਮੇਵਾਤਿ ਦਸ੍ਸੇਤੁਂ ‘‘ਅਜ੍ਝਤ੍ਤਂ ਉਪਾਦਿਨ੍ਨ’’ਨ੍ਤਿ ਆਹ.

ਇਦਾਨਿ ਤਮੇਵ ਪਥਵੀਧਾਤੁਂ ਵਤ੍ਥੁਵਸੇਨ ਦਸ੍ਸੇਤੁਂ ਸੇਯ੍ਯਥਿਦਂ ਕੇਸਾ ਲੋਮਾਤਿਆਦਿ ਵੁਤ੍ਤਂ. ਤਤ੍ਥ ਸੇਯ੍ਯਥਿਦਨ੍ਤਿ ਨਿਪਾਤੋ. ਤਸ੍ਸਤ੍ਥੋ – ਯਾ ਸਾ ਅਜ੍ਝਤ੍ਤਿਕਾ ਪਥਵੀਧਾਤੁ ਸਾ ਕਤਮਾ? ਯਂ ਵਾ ਅਜ੍ਝਤ੍ਤਂ ਪਚ੍ਚਤ੍ਤਂ ਕਕ੍ਖਲ਼ਂ ਨਾਮ ਤਂ ਕਤਮਨ੍ਤਿ? ਕੇਸਾ ਲੋਮਾਤਿਆਦਿ ਤਸ੍ਸਾ ਅਜ੍ਝਤ੍ਤਿਕਾਯ ਪਥਵੀਧਾਤੁਯਾ ਵਤ੍ਥੁਵਸੇਨ ਪਭੇਦਦਸ੍ਸਨਂ. ਇਦਂ ਵੁਤ੍ਤਂ ਹੋਤਿ – ਕੇਸਾ ਨਾਮ ਅਜ੍ਝਤ੍ਤਾ ਉਪਾਦਿਨ੍ਨਾ ਸਰੀਰਟ੍ਠਕਾ ਕਕ੍ਖਲ਼ਤ੍ਤਲਕ੍ਖਣਾ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ. ਲੋਮਾ ਨਾਮ…ਪੇ… ਕਰੀਸਂ ਨਾਮ. ਇਧ ਪਨ ਅਵੁਤ੍ਤਮ੍ਪਿ ਪਟਿਸਮ੍ਭਿਦਾਮਗ੍ਗੇ (ਪਟਿ. ਮ. ੧.੪) ਪਾਲ਼ਿਆਰੁਲ਼੍ਹਂ ਮਤ੍ਥਲੁਙ੍ਗਂ ਆਹਰਿਤ੍ਵਾ ਮਤ੍ਥਲੁਙ੍ਗਂ ਨਾਮ ਅਜ੍ਝਤ੍ਤਂ ਉਪਾਦਿਨ੍ਨਂ ਸਰੀਰਟ੍ਠਕਂ ਕਕ੍ਖਲ਼ਤ੍ਤਲਕ੍ਖਣਂ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ. ਪਰਤੋ ਆਪੋਧਾਤੁਆਦੀਨਂ ਨਿਦ੍ਦੇਸੇ ਪਿਤ੍ਤਾਦੀਸੁਪਿ ਏਸੇਵ ਨਯੋ.

ਇਮਿਨਾ ਕਿਂ ਦਸ੍ਸਿਤਂ ਹੋਤਿ? ਧਾਤੁਮਨਸਿਕਾਰੋ. ਇਮਸ੍ਮਿਂ ਪਨ ਧਾਤੁਮਨਸਿਕਾਰੇ ਕਮ੍ਮਂ ਕਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਉਤ੍ਤਮਤ੍ਥਂ ਅਰਹਤ੍ਤਂ ਪਾਪੁਣਿਤੁਕਾਮੇਨ ਕਿਂ ਕਤ੍ਤਬ੍ਬਂ? ਚਤੁਪਾਰਿਸੁਦ੍ਧਿਸੀਲਂ ਸੋਧੇਤਬ੍ਬਂ. ਸੀਲਵਤੋ ਹਿ ਕਮ੍ਮਟ੍ਠਾਨਭਾਵਨਾ ਇਜ੍ਝਤਿ. ਤਸ੍ਸ ਸੋਧਨਵਿਧਾਨਂ ਵਿਸੁਦ੍ਧਿਮਗ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਵਿਸੁਦ੍ਧਸੀਲੇਨ ਪਨ ਸੀਲੇ ਪਤਿਟ੍ਠਾਯ ਦਸ ਪੁਬ੍ਬਪਲਿਬੋਧਾ ਛਿਨ੍ਦਿਤਬ੍ਬਾ. ਤੇਸਮ੍ਪਿ ਛਿਨ੍ਦਨਵਿਧਾਨਂ ਵਿਸੁਦ੍ਧਿਮਗ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਛਿਨ੍ਨਪਲਿਬੋਧੇਨ ਧਾਤੁਮਨਸਿਕਾਰਕਮ੍ਮਟ੍ਠਾਨਂ ਉਗ੍ਗਣ੍ਹਿਤਬ੍ਬਂ. ਆਚਰਿਯੇਨਾਪਿ ਧਾਤੁਮਨਸਿਕਾਰਕਮ੍ਮਟ੍ਠਾਨਂ ਉਗ੍ਗਣ੍ਹਾਪੇਨ੍ਤੇਨ ਸਤ੍ਤਵਿਧਂ ਉਗ੍ਗਹਕੋਸਲ੍ਲਂ ਦਸਵਿਧਞ੍ਚ ਮਨਸਿਕਾਰਕੋਸਲ੍ਲਂ ਆਚਿਕ੍ਖਿਤਬ੍ਬਂ. ਅਨ੍ਤੇਵਾਸਿਕੇਨਾਪਿ ਆਚਰਿਯਸ੍ਸ ਸਨ੍ਤਿਕੇ ਬਹੁਵਾਰੇ ਸਜ੍ਝਾਯਂ ਕਤ੍ਵਾ ਨਿਜ੍ਜਟਂ ਪਗੁਣਂ ਕਮ੍ਮਟ੍ਠਾਨਂ ਕਾਤਬ੍ਬਂ. ਵੁਤ੍ਤਞ੍ਹੇਤਂ ਅਟ੍ਠਕਥਾਯਂ – ‘‘ਆਦਿਕਮ੍ਮਿਕੇਨ ਭਿਕ੍ਖੁਨਾ ਜਰਾਮਰਣਾ ਮੁਚ੍ਚਿਤੁਕਾਮੇਨ ਸਤ੍ਤਹਾਕਾਰੇਹਿ ਉਗ੍ਗਹਕੋਸਲ੍ਲਂ ਇਚ੍ਛਿਤਬ੍ਬਂ, ਦਸਹਾਕਾਰੇਹਿ ਮਨਸਿਕਾਰਕੋਸਲ੍ਲਂ ਇਚ੍ਛਿਤਬ੍ਬ’’ਨ੍ਤਿ.

ਤਤ੍ਥ ਵਚਸਾ, ਮਨਸਾ, ਵਣ੍ਣਤੋ, ਸਣ੍ਠਾਨਤੋ, ਦਿਸਤੋ, ਓਕਾਸਤੋ, ਪਰਿਚ੍ਛੇਦਤੋਤਿ ਇਮੇਹਿ ਸਤ੍ਤਹਾਕਾਰੇਹਿ ਇਮਸ੍ਮਿਂ ਧਾਤੁਮਨਸਿਕਾਰਕਮ੍ਮਟ੍ਠਾਨੇ ‘ਉਗ੍ਗਹਕੋਸਲ੍ਲਂ’ ਇਚ੍ਛਿਤਬ੍ਬਂ. ਅਨੁਪੁਬ੍ਬਤੋ, ਨਾਤਿਸੀਘਤੋ, ਨਾਤਿਸਣਿਕਤੋ, ਵਿਕ੍ਖੇਪਪਟਿਬਾਹਨਤੋ, ਪਣ੍ਣਤ੍ਤਿਸਮਤਿਕ੍ਕਮਤੋ, ਅਨੁਪੁਬ੍ਬਮੁਞ੍ਚਨਤੋ, ਲਕ੍ਖਣਤੋ, ਤਯੋ ਚ ਸੁਤ੍ਤਨ੍ਤਾਤਿ ਇਮੇਹਿ ਦਸਹਾਕਾਰੇਹਿ ‘ਮਨਸਿਕਾਰਕੋਸਲ੍ਲਂ’ ਇਚ੍ਛਿਤਬ੍ਬਂ. ਤਦੁਭਯਮ੍ਪਿ ਪਰਤੋ ਸਤਿਪਟ੍ਠਾਨਵਿਭਙ੍ਗੇ ਆਵਿ ਭਵਿਸ੍ਸਤਿ.

ਏਵਂ ਉਗ੍ਗਹਿਤਕਮ੍ਮਟ੍ਠਾਨੇਨ ਪਨ ਵਿਸੁਦ੍ਧਿਮਗ੍ਗੇ ਵੁਤ੍ਤੇ ਅਟ੍ਠਾਰਸ ਸੇਨਾਸਨਦੋਸੇ ਵਜ੍ਜੇਤ੍ਵਾ ਪਞ੍ਚਙ੍ਗਸਮਨ੍ਨਾਗਤੇ ਸੇਨਾਸਨੇ ਵਸਨ੍ਤੇਨ ਅਤ੍ਤਨਾਪਿ ਪਞ੍ਚਹਿ ਪਧਾਨਿਯਙ੍ਗੇਹਿ ਸਮਨ੍ਨਾਗਤੇਨ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੇਨ ਵਿਵਿਤ੍ਤੋਕਾਸਗਤੇਨ ਕਮ੍ਮਟ੍ਠਾਨਂ ਮਨਸਿਕਾਤਬ੍ਬਂ. ਮਨਸਿਕਰੋਨ੍ਤੇਨ ਚ ਵਣ੍ਣਸਣ੍ਠਾਨਦਿਸੋਕਾਸਪਰਿਚ੍ਛੇਦਵਸੇਨ ਕੇਸਾਦੀਸੁ ਏਕੇਕਕੋਟ੍ਠਾਸਂ ਮਨਸਿਕਰਿਤ੍ਵਾ ਅਵਸਾਨੇ ਏਵਂ ਮਨਸਿਕਾਰੋ ਪਵਤ੍ਤੇਤਬ੍ਬੋ – ਇਮੇ ਕੇਸਾ ਨਾਮ ਸੀਸਕਟਾਹਪਲਿਵੇਠਨਚਮ੍ਮੇ ਜਾਤਾ. ਤਤ੍ਥ ਯਥਾ ਵਮ੍ਮਿਕਮਤ੍ਥਕੇ ਜਾਤੇਸੁ ਕੁਣ੍ਠਤਿਣੇਸੁ ਨ ਵਮ੍ਮਿਕਮਤ੍ਥਕੋ ਜਾਨਾਤਿ ‘ਮਯਿ ਕੁਣ੍ਠਤਿਣਾਨਿ ਜਾਤਾਨੀ’ਤਿ, ਨਾਪਿ ਕੁਣ੍ਠਤਿਣਾਨਿ ਜਾਨਨ੍ਤਿ ‘ਮਯਂ ਵਮ੍ਮਿਕਮਤ੍ਥਕੇ ਜਾਤਾਨੀ’ਤਿ, ਏਵਮੇਵ ਨ ਸੀਸਕਟਾਹਪਲਿਵੇਠਨਚਮ੍ਮਂ ਜਾਨਾਤਿ ‘ਮਯਿ ਕੇਸਾ ਜਾਤਾ’ਤਿ, ਨਾਪਿ ਕੇਸਾ ਜਾਨਨ੍ਤਿ ‘ਮਯਂ ਸੀਸਕਟਾਹਪਲਿਵੇਠਨਚਮ੍ਮੇ ਜਾਤਾ’ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਕੇਸਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਲੋਮਾ ਸਰੀਰਵੇਠਨਚਮ੍ਮੇ ਜਾਤਾ. ਤਤ੍ਥ ਯਥਾ ਸੁਞ੍ਞਗਾਮਟ੍ਠਾਨੇ ਜਾਤੇਸੁ ਦਬ੍ਬਤਿਣੇਸੁ ਨ ਸੁਞ੍ਞਗਾਮਟ੍ਠਾਨਂ ਜਾਨਾਤਿ ‘ਮਯਿ ਦਬ੍ਬਤਿਣਾਨਿ ਜਾਤਾਨੀ’ਤਿ, ਨਾਪਿ ਦਬ੍ਬਤਿਣਾਨਿ ਜਾਨਨ੍ਤਿ ‘ਮਯਂ ਸੁਞ੍ਞਗਾਮਟ੍ਠਾਨੇ ਜਾਤਾਨੀ’ਤਿ, ਏਵਮੇਵ ਨ ਸਰੀਰਵੇਠਨਚਮ੍ਮਂ ਜਾਨਾਤਿ ‘ਮਯਿ ਲੋਮਾ ਜਾਤਾ’ਤਿ, ਨਾਪਿ ਲੋਮਾ ਜਾਨਨ੍ਤਿ ‘ਮਯਂ ਸਰੀਰਵੇਠਨਚਮ੍ਮੇ ਜਾਤਾ’ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਲੋਮਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਨਖਾ ਅਙ੍ਗੁਲੀਨਂ ਅਗ੍ਗੇਸੁ ਜਾਤਾ. ਤਤ੍ਥ ਯਥਾ ਕੁਮਾਰਕੇਸੁ ਦਣ੍ਡਕੇਹਿ ਮਧੁਕਟ੍ਠਿਕੇ ਵਿਜ੍ਝਿਤ੍ਵਾ ਕੀਲ਼ਨ੍ਤੇਸੁ ਨ ਦਣ੍ਡਕਾ ਜਾਨਨ੍ਤਿ ‘ਅਮ੍ਹੇਸੁ ਮਧੁਕਟ੍ਠਿਕਾ ਠਪਿਤਾ’ਤਿ, ਨਾਪਿ ਮਧੁਕਟ੍ਠਿਕਾ ਜਾਨਨ੍ਤਿ ‘ਮਯਂ ਦਣ੍ਡਕੇਸੁ ਠਪਿਤਾ’ਤਿ, ਏਵਮੇਵ ਨ ਅਙ੍ਗੁਲਿਯੋ ਜਾਨਨ੍ਤਿ ‘ਅਮ੍ਹਾਕਂ ਅਗ੍ਗੇਸੁ ਨਖਾ ਜਾਤਾ’ਤਿ, ਨਾਪਿ ਨਖਾ ਜਾਨਨ੍ਤਿ ‘ਮਯਂ ਅਙ੍ਗੁਲੀਨਂ ਅਗ੍ਗੇਸੁ ਜਾਤਾ’ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਨਖਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਦਨ੍ਤਾ ਹਨੁਕਟ੍ਠਿਕੇਸੁ ਜਾਤਾ. ਤਤ੍ਥ ਯਥਾ ਵਡ੍ਢਕੀਹਿ ਪਾਸਾਣਉਦੁਕ੍ਖਲੇਸੁ ਕੇਨਚਿਦੇਵ ਸਿਲੇਸਜਾਤੇਨ ਬਨ੍ਧਿਤ੍ਵਾ ਠਪਿਤਥਮ੍ਭੇਸੁ ਨ ਉਦੁਕ੍ਖਲਾਨਿ ਜਾਨਨ੍ਤਿ ‘ਅਮ੍ਹੇਸੁ ਥਮ੍ਭਾ ਠਿਤਾ’ਤਿ, ਨਾਪਿ ਥਮ੍ਭਾ ਜਾਨਨ੍ਤਿ ‘ਮਯਂ ਉਦੁਕ੍ਖਲੇਸੁ ਠਿਤਾ’ਤਿ, ਏਵਮੇਵ ਨ ਹਨੁਕਟ੍ਠਿਕਾ ਜਾਨਨ੍ਤਿ ‘ਅਮ੍ਹੇਸੁ ਦਨ੍ਤਾ ਜਾਤਾ’ਤਿ, ਨਾਪਿ ਦਨ੍ਤਾ ਜਾਨਨ੍ਤਿ ‘ਮਯਂ ਹਨੁਕਟ੍ਠਿਕੇਸੁ ਜਾਤਾ’ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਦਨ੍ਤਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਤਚੋ ਸਕਲਸਰੀਰਂ ਪਰਿਯੋਨਨ੍ਧਿਤ੍ਵਾ ਠਿਤੋ. ਤਤ੍ਥ ਯਥਾ ਅਲ੍ਲਗੋਚਮ੍ਮਪਰਿਯੋਨਦ੍ਧਾਯ ਮਹਾਵੀਣਾਯ ਨ ਮਹਾਵੀਣਾ ਜਾਨਾਤਿ ‘ਅਹਂ ਅਲ੍ਲਗੋਚਮ੍ਮੇਨ ਪਰਿਯੋਨਦ੍ਧਾ’ਤਿ, ਨਾਪਿ ਅਲ੍ਲਗੋਚਮ੍ਮਂ ਜਾਨਾਤਿ ‘ਮਯਾ ਮਹਾਵੀਣਾ ਪਰਿਯੋਦ੍ਧਾ’ਤਿ, ਏਵਮੇਵ ਨ ਸਰੀਰਂ ਜਾਨਾਤਿ ‘ਅਹਂ ਤਚੇਨ ਪਰਿਯੋਨਦ੍ਧ’ਨ੍ਤਿ, ਨਾਪਿ ਤਚੋ ਜਾਨਾਤਿ ‘ਮਯਾ ਸਰੀਰਂ ਪਰਿਯੋਨਦ੍ਧਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਤਚੋ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਮਂਸਂ ਅਟ੍ਠਿਸਙ੍ਘਾਟਂ ਅਨੁਲਿਮ੍ਪਿਤ੍ਵਾ ਠਿਤਂ. ਤਤ੍ਥ ਯਥਾ ਮਹਾਮਤ੍ਤਿਕਾਯ ਲਿਤ੍ਤਾਯ ਭਿਤ੍ਤਿਯਾ ਨ ਭਿਤ੍ਤਿ ਜਾਨਾਤਿ ‘ਅਹਂ ਮਹਾਮਤ੍ਤਿਕਾਯ ਲਿਤ੍ਤਾ’ਤਿ, ਨਾਪਿ ਮਹਾਮਤ੍ਤਿਕਾ ਜਾਨਾਤਿ ‘ਮਯਾ ਮਹਾਭਿਤ੍ਤਿ ਲਿਤ੍ਤਾ’ਤਿ, ਏਵਮੇਵ ਨ ਅਟ੍ਠਿਸਙ੍ਘਾਟੋ ਜਾਨਾਤਿ ‘ਅਹਂ ਨਵਮਂਸਪੇਸਿਸਤਪ੍ਪਭੇਦੇਨ ਮਂਸੇਨ ਲਿਤ੍ਤੋ’ਤਿ, ਨਾਪਿ ਮਂਸਂ ਜਾਨਾਤਿ ‘ਮਯਾ ਅਟ੍ਠਿਸਙ੍ਘਾਟੋ ਲਿਤ੍ਤੋ’ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਮਂਸਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਨ੍ਹਾਰੁ ਸਰੀਰਬ੍ਭਨ੍ਤਰੇ ਅਟ੍ਠੀਨਿ ਆਬਨ੍ਧਮਾਨਾ ਠਿਤਾ. ਤਤ੍ਥ ਯਥਾ ਵਲ੍ਲੀਹਿ ਵਿਨਦ੍ਧੇਸੁ ਕੁਟ੍ਟਦਾਰੂਸੁ ਨ ਕੁਟ੍ਟਦਾਰੂਨਿ ਜਾਨਨ੍ਤਿ ‘ਮਯਂ ਵਲ੍ਲੀਹਿ ਵਿਨਦ੍ਧਾਨੀ’ਤਿ, ਨਾਪਿ ਵਲ੍ਲਿਯੋ ਜਾਨਨ੍ਤਿ ‘ਅਮ੍ਹੇਹਿ ਕੁਟ੍ਟਦਾਰੂਨਿ ਵਿਨਦ੍ਧਾਨੀ’ਤਿ, ਏਵਮੇਵ ਨ ਅਟ੍ਠੀਨਿ ਜਾਨਨ੍ਤਿ ‘ਮਯਂ ਨ੍ਹਾਰੂਹਿ ਆਬਦ੍ਧਾਨੀ’ਤਿ, ਨਾਪਿ ਨ੍ਹਾਰੂ ਜਾਨਨ੍ਤਿ ‘ਅਮ੍ਹੇਹਿ ਅਟ੍ਠੀਨਿ ਆਬਦ੍ਧਾਨੀ’ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਨ੍ਹਾਰੁ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਅਟ੍ਠੀਸੁ ਪਣ੍ਹਿਕਟ੍ਠਿ ਗੋਪ੍ਫਕਟ੍ਠਿਂ ਉਕ੍ਖਿਪਿਤ੍ਵਾ ਠਿਤਂ. ਗੋਪ੍ਫਕਟ੍ਠਿ ਜਙ੍ਘਟ੍ਠਿਂ ਉਕ੍ਖਿਪਿਤ੍ਵਾ ਠਿਤਂ. ਜਙ੍ਘਟ੍ਠਿ ਊਰੁਟ੍ਠਿਂ ਉਕ੍ਖਿਪਿਤ੍ਵਾ ਠਿਤਂ. ਊਰੁਟ੍ਠਿ ਕਟਿਟ੍ਠਿਂ ਉਕ੍ਖਿਪਿਤ੍ਵਾ ਠਿਤਂ. ਕਟਿਟ੍ਠਿ ਪਿਟ੍ਠਿਕਣ੍ਟਕਂ ਉਕ੍ਖਿਪਿਤ੍ਵਾ ਠਿਤਂ. ਪਿਟ੍ਠਿਕਣ੍ਟਕੋ ਗੀਵਟ੍ਠਿਂ ਉਕ੍ਖਿਪਿਤ੍ਵਾ ਠਿਤੋ. ਗੀਵਟ੍ਠਿ ਸੀਸਟ੍ਠਿਂ ਉਕ੍ਖਿਪਿਤ੍ਵਾ ਠਿਤਂ. ਸੀਸਟ੍ਠਿ ਗੀਵਟ੍ਠਿਕੇ ਪਤਿਟ੍ਠਿਤਂ. ਗੀਵਟ੍ਠਿ ਪਿਟ੍ਠਿਕਣ੍ਟਕੇ ਪਤਿਟ੍ਠਿਤਂ. ਪਿਟ੍ਠਿਕਣ੍ਟਕੋ ਕਟਿਟ੍ਠਿਮ੍ਹਿ ਪਤਿਟ੍ਠਿਤੋ. ਕਟਿਟ੍ਠਿ ਊਰੁਟ੍ਠਿਕੇ ਪਤਿਟ੍ਠਿਤਂ. ਊਰੁਟ੍ਠਿ ਜਙ੍ਘਟ੍ਠਿਕੇ ਪਤਿਟ੍ਠਿਤਂ. ਜਙ੍ਘਟ੍ਠਿ ਗੋਪ੍ਫਕਟ੍ਠਿਕੇ ਪਤਿਟ੍ਠਿਤਂ. ਗੋਪ੍ਫਕਟ੍ਠਿ ਪਣ੍ਹਿਕਟ੍ਠਿਕੇ ਪਤਿਟ੍ਠਿਤਂ.

ਤਤ੍ਥ ਯਥਾ ਇਟ੍ਠਕਦਾਰੁਗੋਮਯਾਦਿਸਞ੍ਚਯੇਸੁ ਨ ਹੇਟ੍ਠਿਮਾ ਹੇਟ੍ਠਿਮਾ ਜਾਨਨ੍ਤਿ ‘ਮਯਂ ਉਪਰਿਮੇ ਉਪਰਿਮੇ ਉਕ੍ਖਿਪਿਤ੍ਵਾ ਠਿਤਾ’ਤਿ, ਨਾਪਿ ਉਪਰਿਮਾ ਉਪਰਿਮਾ ਜਾਨਨ੍ਤਿ ‘ਮਯਂ ਹੇਟ੍ਠਿਮੇਸੁ ਹੇਟ੍ਠਿਮੇਸੁ ਪਤਿਟ੍ਠਿਤਾ’ਤਿ, ਏਵਮੇਵ ਨ ਪਣ੍ਹਿਕਟ੍ਠਿ ਜਾਨਾਤਿ ‘ਅਹਂ ਗੋਪ੍ਫਕਟ੍ਠਿਂ ਉਕ੍ਖਿਪਿਤ੍ਵਾ ਠਿਤ’ਨ੍ਤਿ, ਨ ਗੋਪ੍ਫਕਟ੍ਠਿ ਜਾਨਾਤਿ ‘ਅਹਂ ਜਙ੍ਘਟ੍ਠਿਂ ਉਕ੍ਖਿਪਿਤ੍ਵਾ ਠਿਤ’ਨ੍ਤਿ, ਨ ਜਙ੍ਘਟ੍ਠਿ ਜਾਨਾਤਿ ‘ਅਹਂ ਊਰੁਟ੍ਠਿਂ ਉਕ੍ਖਿਪਿਤ੍ਵਾ ਠਿਤ’ਨ੍ਤਿ, ਨ ਊਰੁਟ੍ਠਿ ਜਾਨਾਤਿ ‘ਅਹਂ ਕਟਿਟ੍ਠਿਂ ਉਕ੍ਖਿਪਿਤ੍ਵਾ ਠਿਤ’ਨ੍ਤਿ, ਨ ਕਟਿਟ੍ਠਿ ਜਾਨਾਤਿ ‘ਅਹਂ ਪਿਟ੍ਠਿਕਣ੍ਟਕਂ ਉਕ੍ਖਿਪਿਤ੍ਵਾ ਠਿਤ’ਨ੍ਤਿ, ਨ ਪਿਟ੍ਠਿਕਣ੍ਟਕੋ ਜਾਨਾਤਿ ‘ਅਹਂ ਗੀਵਟ੍ਠਿਂ ਉਕ੍ਖਿਪਿਤ੍ਵਾ ਠਿਤੋ’ਤਿ, ਨ ਗੀਵਟ੍ਠਿ ਜਾਨਾਤਿ ‘ਅਹਂ ਸੀਸਟ੍ਠਿਂ ਉਕ੍ਖਿਪਿਤ੍ਵਾ ਠਿਤ’ਨ੍ਤਿ, ਨ ਸੀਸਟ੍ਠਿ ਜਾਨਾਤਿ ‘ਅਹਂ ਗੀਵਟ੍ਠਿਮ੍ਹਿ ਪਤਿਟ੍ਠਿਤ’ਨ੍ਤਿ, ਨ ਗੀਵਟ੍ਠਿ ਜਾਨਾਤਿ ‘ਅਹਂ ਪਿਟ੍ਠਿਕਣ੍ਟਕੇ ਪਤਿਟ੍ਠਿਤ’ਨ੍ਤਿ, ਨ ਪਿਟ੍ਠਿਕਣ੍ਟਕੋ ਜਾਨਾਤਿ ‘ਅਹਂ ਕਟਿਟ੍ਠਿਮ੍ਹਿ ਪਤਿਟ੍ਠਿਤੋ’ਤਿ, ਨ ਕਟਿਟ੍ਠਿ ਜਾਨਾਤਿ ‘ਅਹਂ ਊਰੁਟ੍ਠਿਮ੍ਹਿ ਪਤਿਟ੍ਠਿਤ’ਨ੍ਤਿ, ਨ ਊਰੁਟ੍ਠਿ ਜਾਨਾਤਿ ‘ਅਹਂ ਜਙ੍ਘਟ੍ਠਿਮ੍ਹਿ ਪਤਿਟ੍ਠਿਤ’ਨ੍ਤਿ, ਨ ਜਙ੍ਘਟ੍ਠਿ ਜਾਨਾਤਿ ‘ਅਹਂ ਗੋਪ੍ਫਕਟ੍ਠਿਮ੍ਹਿ ਪਤਿਟ੍ਠਿਤ’ਨ੍ਤਿ, ਨ ਗੋਪ੍ਫਕਟ੍ਠਿ ਜਾਨਾਤਿ ‘ਅਹਂ ਪਣ੍ਹਿਕਟ੍ਠਿਮ੍ਹਿ ਪਤਿਟ੍ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਅਟ੍ਠਿ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਅਟ੍ਠਿਮਿਞ੍ਜਂ ਤੇਸਂ ਤੇਸਂ ਅਟ੍ਠੀਨਂ ਅਬ੍ਭਨ੍ਤਰੇ ਠਿਤਂ. ਤਤ੍ਥ ਯਥਾ ਵੇਲ਼ੁਪਬ੍ਬਾਦੀਨਂ ਅਨ੍ਤੋ ਪਕ੍ਖਿਤ੍ਤੇਸੁ ਸਿਨ੍ਨਵੇਤ੍ਤਗ੍ਗਾਦੀਸੁ ਨ ਵੇਲ਼ੁਪਬ੍ਬਾਦੀਨਿ ਜਾਨਨ੍ਤਿ ‘ਅਮ੍ਹੇਸੁ ਵੇਤ੍ਤਗ੍ਗਾਦੀਨਿ ਪਕ੍ਖਿਤ੍ਤਾਨੀ’ਤਿ, ਨਾਪਿ ਵੇਤ੍ਤਗ੍ਗਾਦੀਨਿ ਜਾਨਨ੍ਤਿ ‘ਮਯਂ ਵੇਲ਼ੁਪਬ੍ਬਾਦੀਸੁ ਠਿਤਾਨੀਤਿ, ਏਵਮੇਵ ਨ ਅਟ੍ਠੀਨਿ ਜਾਨਨ੍ਤਿ ‘ਅਮ੍ਹਾਕਂ ਅਨ੍ਤੋ ਅਟ੍ਠਿਮਿਞ੍ਜਂ ਠਿਤ’ਨ੍ਤਿ, ਨਾਪਿ ਅਟ੍ਠਿਮਿਞ੍ਜਂ ਜਾਨਾਤਿ ‘ਅਹਂ ਅਟ੍ਠੀਨਂ ਅਨ੍ਤੋ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਅਟ੍ਠਿਮਿਞ੍ਜਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਵਕ੍ਕਂ ਗਲਵਾਟਕਤੋ ਨਿਕ੍ਖਨ੍ਤੇਨ ਏਕਮੂਲੇਨ ਥੋਕਂ ਗਨ੍ਤ੍ਵਾ ਦ੍ਵਿਧਾ ਭਿਨ੍ਨੇਨ ਥੂਲਨ੍ਹਾਰੁਨਾ ਵਿਨਿਬਦ੍ਧਂ ਹੁਤ੍ਵਾ ਹਦਯਮਂਸਂ ਪਰਿਕ੍ਖਿਪਿਤ੍ਵਾ ਠਿਤਂ. ਤਤ੍ਥ ਯਥਾ ਵਣ੍ਟੁਪਨਿਬਦ੍ਧੇ ਅਮ੍ਬਫਲਦ੍ਵਯੇ ਨ ਵਣ੍ਟਂ ਜਾਨਾਤਿ ‘ਮਯਾ ਅਮ੍ਬਫਲਦ੍ਵਯਂ ਉਪਨਿਬਦ੍ਧ’ਨ੍ਤਿ, ਨਾਪਿ ਅਮ੍ਬਫਲਦ੍ਵਯਂ ਜਾਨਾਤਿ ‘ਅਹਂ ਵਣ੍ਟੇਨ ਉਪਨਿਬਦ੍ਧ’ਨ੍ਤਿ, ਏਵਮੇਵ ਨ ਥੂਲਨ੍ਹਾਰੁ ਜਾਨਾਤਿ ‘ਮਯਾ ਵਕ੍ਕਂ ਉਪਨਿਬਦ੍ਧ’ਨ੍ਤਿ, ਨਾਪਿ ਵਕ੍ਕਂ ਜਾਨਾਤਿ ‘ਅਹਂ ਥੂਲਨ੍ਹਾਰੁਨਾ ਉਪਨਿਬਦ੍ਧ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਵਕ੍ਕਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਹਦਯਂ ਸਰੀਰਬ੍ਭਨ੍ਤਰੇ ਉਰਟ੍ਠਿਪਞ੍ਜਰਮਜ੍ਝਂ ਨਿਸ੍ਸਾਯ ਠਿਤਂ. ਤਤ੍ਥ ਯਥਾ ਜਿਣ੍ਣਸਨ੍ਦਮਾਨਿਕਪਞ੍ਜਰਬ੍ਭਨ੍ਤਰਂ ਨਿਸ੍ਸਾਯ ਠਪਿਤਾਯ ਮਂਸਪੇਸਿਯਾ ਨ ਜਿਣ੍ਣਸਨ੍ਦਮਾਨਿਕਪਞ੍ਜਰਬ੍ਭਨ੍ਤਰਂ ਜਾਨਾਤਿ ‘ਮਂ ਨਿਸ੍ਸਾਯ ਮਂਸਪੇਸਿ ਠਪਿਤਾ’ਤਿ, ਨਾਪਿ ਮਂਸਪੇਸਿ ਜਾਨਾਤਿ ‘ਅਹਂ ਜਿਣ੍ਣਸਨ੍ਦਮਾਨਿਕਪਞ੍ਜਰਬ੍ਭਨ੍ਤਰਂ ਨਿਸ੍ਸਾਯ ਠਿਤਾ’ਤਿ, ਏਵਮੇਵ ਨ ਉਰਟ੍ਠਿਪਞ੍ਜਰਬ੍ਭਨ੍ਤਰਂ ਜਾਨਾਤਿ ‘ਮਂ ਨਿਸ੍ਸਾਯ ਹਦਯਂ ਠਿਤ’ਨ੍ਤਿ, ਨਾਪਿ ਹਦਯਂ ਜਾਨਾਤਿ ‘ਅਹਂ ਉਰਟ੍ਠਿਪਞ੍ਜਰਬ੍ਭਨ੍ਤਰਂ ਨਿਸ੍ਸਾਯ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਹਦਯਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਯਕਨਂ ਅਨ੍ਤੋਸਰੀਰੇ ਦ੍ਵਿਨ੍ਨਂ ਥਨਾਨਂ ਅਬ੍ਭਨ੍ਤਰੇ ਦਕ੍ਖਿਣਪਸ੍ਸਂ ਨਿਸ੍ਸਾਯ ਠਿਤਂ. ਤਤ੍ਥ ਯਥਾ ਉਕ੍ਖਲਿਕਪਾਲਪਸ੍ਸਮ੍ਹਿ ਲਗ੍ਗੇ ਯਮਕਮਂਸਪਿਣ੍ਡੇ ਨ ਉਕ੍ਖਲਿਕਪਾਲਪਸ੍ਸਂ ਜਾਨਾਤਿ ‘ਮਯਿ ਯਮਕਮਂਸਪਿਣ੍ਡੋ ਲਗ੍ਗੋ’ਤਿ, ਨਾਪਿ ਯਮਕਮਂਸਪਿਣ੍ਡੋ ਜਾਨਾਤਿ ‘ਅਹਂ ਉਕ੍ਖਲਿਕਪਾਲਪਸ੍ਸੇ ਲਗ੍ਗੋ’ਤਿ, ਏਵਮੇਵ ਨ ਥਨਾਨਂ ਅਬ੍ਭਨ੍ਤਰੇ ਦਕ੍ਖਿਣਪਸ੍ਸਂ ਜਾਨਾਤਿ ‘ਮਂ ਨਿਸ੍ਸਾਯ ਯਕਨਂ ਠਿਤ’ਨ੍ਤਿ, ਨਾਪਿ ਯਕਨਂ ਜਾਨਾਤਿ ‘ਅਹਂ ਥਨਾਨਂ ਅਬ੍ਭਨ੍ਤਰੇ ਦਕ੍ਖਿਣਪਸ੍ਸਂ ਨਿਸ੍ਸਾਯ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਯਕਨਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਕਿਲੋਮਕੇਸੁ ਪਟਿਚ੍ਛਨ੍ਨਕਿਲੋਮਕਂ ਹਦਯਞ੍ਚ ਵਕ੍ਕਞ੍ਚ ਪਰਿਵਾਰੇਤ੍ਵਾ ਠਿਤਂ, ਅਪਟਿਚ੍ਛਨ੍ਨਕਿਲੋਮਕਂ ਸਕਲਸਰੀਰੇ ਚਮ੍ਮਸ੍ਸ ਹੇਟ੍ਠਤੋ ਮਂਸਂ ਪਰਿਯੋਨਨ੍ਧਿਤ੍ਵਾ ਠਿਤਂ. ਤਤ੍ਥ ਯਥਾ ਪਿਲੋਤਿਕਪਲਿਵੇਠਿਤੇ ਮਂਸੇ ਨ ਮਂਸਂ ਜਾਨਾਤਿ ‘ਅਹਂ ਪਿਲੋਤਿਕਾਯ ਪਲਿਵੇਠਿਤ’ਨ੍ਤਿ, ਨਾਪਿ ਪਿਲੋਤਿਕਾ ਜਾਨਾਤਿ ‘ਮਯਾ ਮਂਸਂ ਪਲਿਵੇਠਿਤ’ਨ੍ਤਿ, ਏਵਮੇਵ ਨ ਵਕ੍ਕਹਦਯਾਨਿ ਸਕਲਸਰੀਰੇ ਮਂਸਞ੍ਚ ਜਾਨਾਤਿ ‘ਅਹਂ ਕਿਲੋਮਕੇਨ ਪਟਿਚ੍ਛਨ੍ਨ’ਨ੍ਤਿ, ਨਾਪਿ ਕਿਲੋਮਕਂ ਜਾਨਾਤਿ ‘ਮਯਾ ਵਕ੍ਕਹਦਯਾਨਿ ਸਕਲਸਰੀਰੇ ਮਂਸਞ੍ਚ ਪਟਿਚ੍ਛਨ੍ਨ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਕਿਲੋਮਕਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਪਿਹਕਂ ਹਦਯਸ੍ਸ ਵਾਮਪਸ੍ਸੇ ਉਦਰਪਟਲਸ੍ਸ ਮਤ੍ਥਕਪਸ੍ਸਂ ਨਿਸ੍ਸਾਯ ਠਿਤਂ. ਤਤ੍ਥ ਯਥਾ ਕੋਟ੍ਠਕਮਤ੍ਥਕਪਸ੍ਸਂ ਨਿਸ੍ਸਾਯ ਠਿਤਾਯ ਗੋਮਯਪਿਣ੍ਡਿਯਾ ਨ ਕੋਟ੍ਠਕਮਤ੍ਥਕਪਸ੍ਸਂ ਜਾਨਾਤਿ ‘ਗੋਮਯਪਿਣ੍ਡਿ ਮਂ ਨਿਸ੍ਸਾਯ ਠਿਤਾ’ਤਿ, ਨਾਪਿ ਗੋਮਯਪਿਣ੍ਡਿ ਜਾਨਾਤਿ ‘ਅਹਂ ਕੋਟ੍ਠਕਮਤ੍ਥਕਪਸ੍ਸਂ ਨਿਸ੍ਸਾਯ ਠਿਤਾ’ਤਿ, ਏਵਮੇਵ ਨ ਉਦਰਪਟਲਸ੍ਸ ਮਤ੍ਥਕਪਸ੍ਸਂ ਜਾਨਾਤਿ ‘ਪਿਹਕਂ ਮਂ ਨਿਸ੍ਸਾਯ ਠਿਤ’ਨ੍ਤਿ, ਨਾਪਿ ਪਿਹਕਂ ਜਾਨਾਤਿ ‘ਅਹਂ ਉਦਰਪਟਲਸ੍ਸ ਮਤ੍ਥਕਪਸ੍ਸਂ ਨਿਸ੍ਸਾਯ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਪਿਹਕਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਪਪ੍ਫਾਸਂ ਸਰੀਰਬ੍ਭਨ੍ਤਰੇ ਦ੍ਵਿਨ੍ਨਂ ਥਨਾਨਂ ਅਬ੍ਭਨ੍ਤਰੇ ਹਦਯਞ੍ਚ ਯਕਨਞ੍ਚ ਉਪਰਿਛਾਦੇਤ੍ਵਾ ਓਲਮ੍ਬਨ੍ਤਂ ਠਿਤਂ. ਤਤ੍ਥ ਯਥਾ ਜਿਣ੍ਣਕੋਟ੍ਠਬ੍ਭਨ੍ਤਰੇ ਓਲਮ੍ਬਮਾਨੇ ਸਕੁਣਕੁਲਾਵਕੇ ਨ ਜਿਣ੍ਣਕੋਟ੍ਠਬ੍ਭਨ੍ਤਰਂ ਜਾਨਾਤਿ ‘ਮਯਿ ਸਕੁਣਕੁਲਾਵਕੋ ਓਲਮ੍ਬਮਾਨੋ ਠਿਤੋ’ਤਿ, ਨਾਪਿ ਸਕੁਣਕੁਲਾਵਕੋ ਜਾਨਾਤਿ ‘ਅਹਂ ਜਿਣ੍ਣਕੋਟ੍ਠਬ੍ਭਨ੍ਤਰੇ ਓਲਮ੍ਬਮਾਨੋ ਠਿਤੋ’ਤਿ, ਏਵਮੇਵ ਨ ਸਰੀਰਬ੍ਭਨ੍ਤਰਂ ਜਾਨਾਤਿ ‘ਮਯਿ ਪਪ੍ਫਾਸਂ ਓਲਮ੍ਬਮਾਨਂ ਠਿਤ’ਨ੍ਤਿ, ਨਾਪਿ ਪਪ੍ਫਾਸਂ ਜਾਨਾਤਿ ‘ਅਹਂ ਏਵਰੂਪੇ ਸਰੀਰਬ੍ਭਨ੍ਤਰੇ ਓਲਮ੍ਬਮਾਨਂ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਪਪ੍ਫਾਸਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਅਨ੍ਤਂ ਗਲਵਾਟਕਤੋ ਕਰੀਸਮਗ੍ਗਪਰਿਯਨ੍ਤੇ ਸਰੀਰਬ੍ਭਨ੍ਤਰੇ ਠਿਤਂ. ਤਤ੍ਥ ਯਥਾ ਲੋਹਿਤਦੋਣਿਕਾਯ ਓਭੁਜਿਤ੍ਵਾ ਠਪਿਤੇ ਛਿਨ੍ਨਸੀਸਧਮਨਿਕਲ਼ੇਵਰੇ ਨ ਲੋਹਿਤਦੋਣਿ ਜਾਨਾਤਿ ‘ਮਯਿ ਧਮਨਿਕਲ਼ੇਵਰਂ ਠਿਤ’ਨ੍ਤਿ, ਨਾਪਿ ਧਮਨਿਕਲ਼ੇਵਰਂ ਜਾਨਾਤਿ ‘ਅਹਂ ਲੋਹਿਤਦੋਣਿਕਾਯਂ ਠਿਤ’ਨ੍ਤਿ, ਏਵਮੇਵ ਨ ਸਰੀਰਬ੍ਭਨ੍ਤਰਂ ਜਾਨਾਤਿ ‘ਮਯਿ ਅਨ੍ਤਂ ਠਿਤ’ਨ੍ਤਿ, ਨਾਪਿ ਅਨ੍ਤਂ ਜਾਨਾਤਿ ‘ਅਹਂ ਸਰੀਰਬ੍ਭਨ੍ਤਰੇ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਅਨ੍ਤਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਅਨ੍ਤਗੁਣਂ ਅਨ੍ਤਨ੍ਤਰੇ ਏਕਵੀਸਤਿ ਅਨ੍ਤਭੋਗੇ ਬਨ੍ਧਿਤ੍ਵਾ ਠਿਤਂ. ਤਤ੍ਥ ਯਥਾ ਪਾਦਪੁਞ੍ਛਨਰਜ੍ਜੁਮਣ੍ਡਲਕਂ ਸਿਬ੍ਬੇਤ੍ਵਾ ਠਿਤੇਸੁ ਰਜ੍ਜੁਕੇਸੁ ਨ ਪਾਦਪੁਞ੍ਛਨਰਜ੍ਜੁਮਣ੍ਡਲਕਂ ਜਾਨਾਤਿ ‘ਰਜ੍ਜੁਕਾ ਮਂ ਸਿਬ੍ਬੇਤ੍ਵਾ ਠਿਤਾ’ਤਿ, ਨਾਪਿ ਰਜ੍ਜੁਕਾ ਜਾਨਨ੍ਤਿ ‘ਮਯਂ ਪਾਦਪੁਞ੍ਛਨਰਜ੍ਜੁਮਣ੍ਡਲਕਂ ਸਿਬ੍ਬੇਤ੍ਵਾ ਠਿਤਾ’ਤਿ, ਏਵਮੇਵ ਨ ਅਨ੍ਤਂ ਜਾਨਾਤਿ ‘ਅਨ੍ਤਗੁਣਂ ਮਂ ਆਬਨ੍ਧਿਤ੍ਵਾ ਠਿਤ’ਨ੍ਤਿ, ਨਾਪਿ ਅਨ੍ਤਗੁਣਂ ਜਾਨਾਤਿ ‘ਅਹਂ ਅਨ੍ਤਂ ਬਨ੍ਧਿਤ੍ਵਾ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਅਨ੍ਤਗੁਣਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਉਦਰਿਯਂ ਉਦਰੇ ਠਿਤਂ ਅਸਿਤਪੀਤਖਾਯਿਤਸਾਯਿਤਂ. ਤਤ੍ਥ ਯਥਾ ਸੁਵਾਨਦੋਣਿਯਂ ਠਿਤੇ ਸੁਵਾਨਵਮਥੁਮ੍ਹਿ ਨ ਸੁਵਾਨਦੋਣਿ ਜਾਨਾਤਿ ‘ਮਯਿ ਸੁਵਾਨਵਮਥੁ ਠਿਤੋ’ਤਿ, ਨਾਪਿ ਸੁਵਾਨਵਮਥੁ ਜਾਨਾਤਿ ‘ਅਹਂ ਸੁਵਾਨਦੋਣਿਯਂ ਠਿਤੋ’ਤਿ, ਏਵਮੇਵ ਨ ਉਦਰਂ ਜਾਨਾਤਿ ‘ਮਯਿ ਉਦਰਿਯਂ ਠਿਤ’ਨ੍ਤਿ, ਨਾਪਿ ਉਦਰਿਯਂ ਜਾਨਾਤਿ ‘ਅਹਂ ਉਦਰੇ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਉਦਰਿਯਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਕਰੀਸਂ ਪਕ੍ਕਾਸਯਸਙ੍ਖਾਤੇ ਅਟ੍ਠਙ੍ਗੁਲਵੇਲ਼ੁਪਬ੍ਬਸਦਿਸੇ ਅਨ੍ਤਪਰਿਯੋਸਾਨੇ ਠਿਤਂ. ਤਤ੍ਥ ਯਥਾ ਵੇਲ਼ੁਪਬ੍ਬੇ ਓਮਦ੍ਦਿਤ੍ਵਾ ਪਕ੍ਖਿਤ੍ਤਾਯ ਸਣ੍ਹਪਣ੍ਡੁਮਤ੍ਤਿਕਾਯ ਨ ਵੇਲ਼ੁਪਬ੍ਬਂ ਜਾਨਾਤਿ ‘ਮਯਿ ਪਣ੍ਡੁਮਤ੍ਤਿਕਾ ਠਿਤਾ’ਤਿ, ਨਾਪਿ ਪਣ੍ਡੁਮਤ੍ਤਿਕਾ ਜਾਨਾਤਿ ‘ਅਹਂ ਵੇਲ਼ੁਪਬ੍ਬੇ ਠਿਤਾ’ਤਿ, ਏਵਮੇਵ ਨ ਪਕ੍ਕਾਸਯੋ ਜਾਨਾਤਿ ‘ਮਯਿ ਕਰੀਸਂ ਠਿਤ’ਨ੍ਤਿ, ਨਾਪਿ ਕਰੀਸਂ ਜਾਨਾਤਿ ‘ਅਹਂ ਪਕ੍ਕਾਸਯੇ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਕਰੀਸਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਮਤ੍ਥਲੁਙ੍ਗਂ ਸੀਸਕਟਾਹਬ੍ਭਨ੍ਤਰੇ ਠਿਤਂ. ਤਤ੍ਥ ਯਥਾ ਪੁਰਾਣਲਾਬੁਕਟਾਹੇ ਪਕ੍ਖਿਤ੍ਤਾਯ ਪਿਟ੍ਠਪਿਣ੍ਡਿਯਾ ਨ ਲਾਬੁਕਟਾਹਂ ਜਾਨਾਤਿ ‘ਮਯਿ ਪਿਟ੍ਠਪਿਣ੍ਡਿ ਠਿਤਾ’ਤਿ, ਨਾਪਿ ਪਿਟ੍ਠਪਿਣ੍ਡਿ ਜਾਨਾਤਿ ‘ਅਹਂ ਲਾਬੁਕਟਾਹੇ ਠਿਤਾ’ਤਿ, ਏਵਮੇਵ ਨ ਸੀਸਕਟਾਹਬ੍ਭਨ੍ਤਰਂ ਜਾਨਾਤਿ ‘ਮਯਿ ਮਤ੍ਥਲੁਙ੍ਗਂ ਠਿਤ’ਨ੍ਤਿ, ਨਾਪਿ ਮਤ੍ਥਲੁਙ੍ਗਂ ਜਾਨਾਤਿ ‘ਅਹਂ ਸੀਸਕਟਾਹਬ੍ਭਨ੍ਤਰੇ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਮਤ੍ਥਲੁਙ੍ਗਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

ਯਂ ਵਾ ਪਨਞ੍ਞਮ੍ਪੀਤਿ ਇਮਿਨਾ ਆਪੋਕੋਟ੍ਠਾਸਾਦੀਸੁ ਤੀਸੁ ਅਨੁਗਤਂ ਪਥਵੀਧਾਤੁਂ ਲਕ੍ਖਣਵਸੇਨ ਯੇਵਾਪਨਕਂ ਪਥਵਿਂ ਕਤ੍ਵਾ ਦਸ੍ਸੇਤਿ.

ਬਾਹਿਰਪਥਵੀਧਾਤੁਨਿਦ੍ਦੇਸੇ ਅਯੋਤਿ ਕਾਲ਼ਲੋਹਂ. ਲੋਹਨ੍ਤਿ ਜਾਤਿਲੋਹਂ, ਵਿਜਾਤਿਲੋਹਂ, ਕਿਤ੍ਤਿਮਲੋਹਂ, ਪਿਸਾਚਲੋਹਨ੍ਤਿ ਚਤੁਬ੍ਬਿਧਂ. ਤਤ੍ਥ ਅਯੋ, ਸਜ੍ਝੁ, ਸੁਵਣ੍ਣਂ, ਤਿਪੁ, ਸੀਸਂ, ਤਮ੍ਬਲੋਹਂ, ਵੇਕਨ੍ਤਕਨ੍ਤਿ ਇਮਾਨਿ ਸਤ੍ਤ ਜਾਤਿਲੋਹਾਨਿ ਨਾਮ. ਨਾਗਨਾਸਿਕਲੋਹਂ ਵਿਜਾਤਿਲੋਹਂ ਨਾਮ. ਕਂਸਲੋਹਂ, ਵਟ੍ਟਲੋਹਂ, ਆਰਕੂਟਨ੍ਤਿ ਤੀਣਿ ਕਿਤ੍ਤਿਮਲੋਹਾਨਿ ਨਾਮ. ਮੋਰਕ੍ਖਕਂ, ਪੁਥੁਕਂ, ਮਲਿਨਕਂ, ਚਪਲਕਂ, ਸੇਲਕਂ, ਆਟਕਂ, ਭਲ੍ਲਕਂ, ਦੂਸਿਲੋਹਨ੍ਤਿ ਅਟ੍ਠ ਪਿਸਾਚਲੋਹਾਨਿ ਨਾਮ. ਤੇਸੁ ਪਞ੍ਚ ਜਾਤਿਲੋਹਾਨਿ ਪਾਲ਼ਿਯਂ ਵਿਸੁਂ ਵੁਤ੍ਤਾਨੇਵ. ਤਮ੍ਬਲੋਹਂ, ਵੇਕਨ੍ਤਕਲੋਹਨ੍ਤਿ ਇਮੇਹਿ ਪਨ ਦ੍ਵੀਹਿ ਜਾਤਿਲੋਹੇਹਿ ਸਦ੍ਧਿਂ ਸੇਸਂ ਸਬ੍ਬਮ੍ਪਿ ਇਧ ਲੋਹਨ੍ਤਿ ਵੇਦਿਤਬ੍ਬਂ.

ਤਿਪੂਤਿ ਸੇਤਤਿਪੁ. ਸੀਸਨ੍ਤਿ ਕਾਲ਼ਤਿਪੁ. ਸਜ੍ਝੂਤਿ ਰਜਤਂ. ਮੁਤ੍ਤਾਤਿ ਸਾਮੁਦ੍ਦਿਕਮੁਤ੍ਤਾ. ਮਣੀਤਿ ਠਪੇਤ੍ਵਾ ਪਾਲ਼ਿਆਗਤੇ ਵੇਲ਼ੁਰਿਯਾਦਯੋ ਸੇਸੋ ਜੋਤਿਰਸਾਦਿਭੇਦੋ ਸਬ੍ਬੋਪਿ ਮਣਿ. ਵੇਲ਼ੁਰਿਯੋਤਿ ਵਂਸਵਣ੍ਣਮਣਿ. ਸਙ੍ਖੋਤਿ ਸਾਮੁਦ੍ਦਿਕਸਙ੍ਖੋ. ਸਿਲਾਤਿ ਕਾਲ਼ਸਿਲਾ, ਪਣ੍ਡੁਸਿਲਾ, ਸੇਤਸਿਲਾਤਿਆਦਿਭੇਦਾ ਸਬ੍ਬਾਪਿ ਸਿਲਾ. ਪਵਾਲ਼ਨ੍ਤਿ ਪਵਾਲ਼ਮੇਵ. ਰਜਤਨ੍ਤਿ ਕਹਾਪਣੋ. ਜਾਤਰੂਪਨ੍ਤਿ ਸੁਵਣ੍ਣਂ. ਲੋਹਿਤਙ੍ਕੋਤਿ ਰਤ੍ਤਮਣਿ. ਮਸਾਰਗਲ੍ਲਨ੍ਤਿ ਕਬਰਮਣਿ. ਤਿਣਾਦੀਸੁ ਬਹਿਸਾਰਾ ਅਨ੍ਤਮਸੋ ਨਾਲ਼ਿਕੇਰਾਦਯੋਪਿ ਤਿਣਂ ਨਾਮ. ਅਨ੍ਤੋਸਾਰਂ ਅਨ੍ਤਮਸੋ ਦਾਰੁਖਣ੍ਡਮ੍ਪਿ ਕਟ੍ਠਂ ਨਾਮ. ਸਕ੍ਖਰਾਤਿ ਮੁਗ੍ਗਮਤ੍ਤਤੋ ਯਾਵ ਮੁਟ੍ਠਿਪ੍ਪਮਾਣਾ ਮਰੁਮ੍ਬਾ ਸਕ੍ਖਰਾ ਨਾਮ. ਮੁਗ੍ਗਮਤ੍ਤਤੋ ਪਨ ਹੇਟ੍ਠਾ ਵਾਲਿਕਾਤਿ ਵੁਚ੍ਚਤਿ. ਕਠਲਨ੍ਤਿ ਯਂ ਕਿਞ੍ਚਿ ਕਪਾਲਂ. ਭੂਮੀਤਿ ਪਥਵੀ. ਪਾਸਾਣੋਤਿ ਅਨ੍ਤੋਮੁਟ੍ਠਿਯਂ ਅਸਣ੍ਠਹਨਤੋ ਪਟ੍ਠਾਯ ਹਤ੍ਥਿਪ੍ਪਮਾਣਂ ਅਸਮ੍ਪਤ੍ਤੋ ਪਾਸਾਣੋ ਨਾਮ. ਹਤ੍ਥਿਪ੍ਪਮਾਣਤੋ ਪਟ੍ਠਾਯ ਪਨ ਉਪਰਿ ਪਬ੍ਬਤੋ ਨਾਮ. ਯਂ ਵਾ ਪਨਾਤਿ ਇਮਿਨਾ ਤਾਲਟ੍ਠਿ-ਨਾਲ਼ਿਕੇਰ-ਫਲਾਦਿਭੇਦਂ ਸੇਸਪਥਵਿਂ ਗਣ੍ਹਾਤਿ. ਯਾ ਚ ਅਜ੍ਝਤ੍ਤਿਕਾ ਪਥਵੀਧਾਤੁ ਯਾ ਚ ਬਾਹਿਰਾਤਿ ਇਮਿਨਾ ਦ੍ਵੇਪਿ ਪਥਵੀਧਾਤੁਯੋ ਕਕ੍ਖਲ਼ਟ੍ਠੇਨ ਲਕ੍ਖਣਤੋ ਏਕਾ ਪਥਵੀਧਾਤੁ ਏਵਾਤਿ ਦਸ੍ਸੇਤਿ.

੧੭੪. ਆਪੋਧਾਤੁਨਿਦ੍ਦੇਸਾਦੀਸੁ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਆਪੋ ਆਪੋਗਤਨ੍ਤਿਆਦੀਸੁ ਆਬਨ੍ਧਨਵਸੇਨ ਆਪੋ. ਤਦੇਵ ਆਪੋਸਭਾਵਂ ਗਤਤ੍ਤਾ ਆਪੋਗਤਂ ਨਾਮ. ਸ੍ਨੇਹਵਸੇਨ ਸ੍ਨੇਹੋ. ਸੋਯੇਵ ਸ੍ਨੇਹਸਭਾਵਂ ਗਤਤ੍ਤਾ ਸ੍ਨੇਹਗਤਂ ਨਾਮ. ਬਨ੍ਧਨਤ੍ਤਂ ਰੂਪਸ੍ਸਾਤਿ ਅਵਿਨਿਬ੍ਭੋਗਰੂਪਸ੍ਸ ਬਨ੍ਧਨਭਾਵੋ. ਪਿਤ੍ਤਂ ਸੇਮ੍ਹਨ੍ਤਿਆਦੀਨਿਪਿ ਵਣ੍ਣਸਣ੍ਠਾਨਦਿਸੋਕਾਸਪਰਿਚ੍ਛੇਦਵਸੇਨ ਪਰਿਗ੍ਗਹੇਤ੍ਵਾ ਧਾਤੁਵਸੇਨੇਵ ਮਨਸਿਕਾਤਬ੍ਬਾਨਿ.

ਤਤ੍ਰਾਯਂ ਨਯੋ – ਪਿਤ੍ਤੇਸੁ ਹਿ ਅਬਦ੍ਧਪਿਤ੍ਤਂ ਜੀਵਿਤਿਨ੍ਦ੍ਰਿਯਪਟਿਬਦ੍ਧਂ ਸਕਲਸਰੀਰਂ ਬ੍ਯਾਪੇਤ੍ਵਾ ਠਿਤਂ, ਬਦ੍ਧਪਿਤ੍ਤਂ ਪਿਤ੍ਤਕੋਸਕੇ ਠਿਤਂ. ਤਤ੍ਥ ਯਥਾ ਪੂਵਂ ਬ੍ਯਾਪੇਤ੍ਵਾ ਠਿਤੇ ਤੇਲੇ ਨ ਪੂਵਂ ਜਾਨਾਤਿ ‘ਤੇਲਂ ਮਂ ਬ੍ਯਾਪੇਤ੍ਵਾ ਠਿਤ’ਨ੍ਤਿ, ਨਾਪਿ ਤੇਲਂ ਜਾਨਾਤਿ ‘ਅਹਂ ਪੂਵਂ ਬ੍ਯਾਪੇਤ੍ਵਾ ਠਿਤ’ਨ੍ਤਿ, ਏਵਮੇਵ ਨ ਸਰੀਰਂ ਜਾਨਾਤਿ ‘ਅਬਦ੍ਧਪਿਤ੍ਤਂ ਮਂ ਬ੍ਯਾਪੇਤ੍ਵਾ ਠਿਤ’ਨ੍ਤਿ, ਨਾਪਿ ਅਬਦ੍ਧਪਿਤ੍ਤਂ ਜਾਨਾਤਿ ‘ਅਹਂ ਸਰੀਰਂ ਬ੍ਯਾਪੇਤ੍ਵਾ ਠਿਤ’ਨ੍ਤਿ. ਯਥਾ ਚ ਵਸ੍ਸੋਦਕੇਨ ਪੁਣ੍ਣੇ ਕੋਸਾਤਕੀਕੋਸਕੇ ਨ ਕੋਸਾਤਕੀਕੋਸਕੋ ਜਾਨਾਤਿ ‘ਮਯਿ ਵਸ੍ਸੋਦਕਂ ਠਿਤ’ਨ੍ਤਿ, ਨਾਪਿ ਵਸ੍ਸੋਦਕਂ ਜਾਨਾਤਿ ‘ਅਹਂ ਕੋਸਾਤਕੀਕੋਸਕੇ ਠਿਤ’ਨ੍ਤਿ, ਏਵਮੇਵ ਨ ਪਿਤ੍ਤਕੋਸਕੋ ਜਾਨਾਤਿ ਮਯਿ ਬਦ੍ਧਪਿਤ੍ਤਂ ਠਿਤਨ੍ਤਿ, ਨਾਪਿ ਬਦ੍ਧਪਿਤ੍ਤਂ ਜਾਨਾਤਿ ‘ਅਹਂ ਪਿਤ੍ਤਕੋਸਕੇ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਪਿਤ੍ਤਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

ਸੇਮ੍ਹਂ ਏਕਪਤ੍ਥਪੂਰਪ੍ਪਮਾਣਂ ਉਦਰਪਟਲੇ ਠਿਤਂ. ਤਤ੍ਥ ਯਥਾ ਉਪਰਿ ਸਞ੍ਜਾਤਫੇਣਪਟਲਾਯ ਚਨ੍ਦਨਿਕਾਯ ਨ ਚਨ੍ਦਨਿਕਾ ਜਾਨਾਤਿ ‘ਮਯਿ ਫੇਣਪਟਲਂ ਠਿਤ’ਨ੍ਤਿ, ਨਾਪਿ ਫੇਣਪਟਲਂ ਜਾਨਾਤਿ ‘ਅਹਂ ਚਨ੍ਦਨਿਕਾਯ ਠਿਤ’ਨ੍ਤਿ, ਏਵਮੇਵ ਨ ਉਦਰਪਟਲਂ ਜਾਨਾਤਿ ‘ਮਯਿ ਸੇਮ੍ਹਂ ਠਿਤ’ਨ੍ਤਿ, ਨਾਪਿ ਸੇਮ੍ਹਂ ਜਾਨਾਤਿ ‘ਅਹਂ ਉਦਰਪਟਲੇ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਸੇਮ੍ਹਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

ਪੁਬ੍ਬੋ ਅਨਿਬਦ੍ਧੋਕਾਸੋ, ਯਤ੍ਥ ਯਤ੍ਥੇਵ ਖਾਣੁਕਣ੍ਟਕਪ੍ਪਹਰਣਅਗ੍ਗਿਜਾਲਾਦੀਹਿ ਅਭਿਹਟੇ ਸਰੀਰਪ੍ਪਦੇਸੇ ਲੋਹਿਤਂ ਸਣ੍ਠਹਿਤ੍ਵਾ ਪਚ੍ਚਤਿ, ਗਣ੍ਡਪੀਲ਼ਕਾਦਯੋ ਵਾ ਉਪ੍ਪਜ੍ਜਨ੍ਤਿ, ਤਤ੍ਥ ਤਤ੍ਥੇਵ ਤਿਟ੍ਠਤਿ. ਤਤ੍ਥ ਯਥਾ ਫਰਸੁਪ੍ਪਹਾਰਾਦਿਵਸੇਨ ਪਗ੍ਘਰਿਤਨਿਯਾਸੇ ਰੁਕ੍ਖੇ ਨ ਰੁਕ੍ਖਸ੍ਸ ਫਰਸੁਪ੍ਪਹਾਰਾਦਿਪ੍ਪਦੇਸਾ ਜਾਨਨ੍ਤਿ ‘ਅਮ੍ਹੇਸੁ ਨਿਯ੍ਯਾਸੋ ਠਿਤੋ’ਤਿ, ਨਾਪਿ ਨਿਯ੍ਯਾਸੋ ਜਾਨਾਤਿ ‘ਅਹਂ ਰੁਕ੍ਖਸ੍ਸ ਫਰਸੁਪ੍ਪਹਾਰਾਦਿਪ੍ਪਦੇਸੇਸੁ ਠਿਤੋ’ਤਿ, ਏਵਮੇਵ ਨ ਸਰੀਰਸ੍ਸ ਖਾਣੁਕਣ੍ਟਕਾਦੀਹਿ ਅਭਿਹਟਪ੍ਪਦੇਸਾ ਜਾਨਨ੍ਤਿ ‘ਅਮ੍ਹੇਸੁ ਪੁਬ੍ਬੋ ਠਿਤੋ’ਤਿ, ਨਾਪਿ ਪੁਬ੍ਬੋ ਜਾਨਾਤਿ ‘ਅਹਂ ਤੇਸੁ ਪਦੇਸੇਸੁ ਠਿਤੋ’ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਪੁਬ੍ਬੋ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

ਲੋਹਿਤੇਸੁ ਸਂਸਰਣਲੋਹਿਤਂ ਅਬਦ੍ਧਪਿਤ੍ਤਂ ਵਿਯ ਸਕਲਸਰੀਰਂ ਬ੍ਯਾਪੇਤ੍ਵਾ ਠਿਤਂ. ਸਨ੍ਨਿਚਿਤਲੋਹਿਤਂ ਯਕਨਟ੍ਠਾਨਸ੍ਸ ਹੇਟ੍ਠਾਭਾਗਂ ਪੂਰੇਤ੍ਵਾ ਏਕਪਤ੍ਤਪੂਰਣਪ੍ਪਮਾਣਂ ਵਕ੍ਕਹਦਯਯਕਨਪਪ੍ਫਾਸਾਨਿ ਤੇਮੇਨ੍ਤਂ ਠਿਤਂ. ਤਤ੍ਥ ਸਂਸਰਣਲੋਹਿਤੇ ਅਬਦ੍ਧਪਿਤ੍ਤਸਦਿਸੋਵ ਵਿਨਿਚ੍ਛਯੋ. ਇਤਰਂ ਪਨ ਯਥਾ ਜਜ੍ਜਰਕਪਾਲਟ੍ਠੇ ਉਦਕੇ ਹੇਟ੍ਠਾ ਲੇਡ੍ਡੁਖਣ੍ਡਾਨਿ ਤੇਮਯਮਾਨੇ ਨ ਲੇਡ੍ਡੁਖਣ੍ਡਾਨਿ ਜਾਨਨ੍ਤਿ ‘ਮਯਂ ਉਦਕੇਨ ਤੇਮਿਯਮਾਨਾ ਠਿਤਾ’ਤਿ, ਨਾਪਿ ਉਦਕਂ ਜਾਨਾਤਿ ‘ਅਹਂ ਲੇਡ੍ਡੁਖਣ੍ਡਾਨਿ ਤੇਮੇਮੀ’ਤਿ, ਏਵਮੇਵ ਨ ਯਕਨਸ੍ਸ ਹੇਟ੍ਠਾਭਾਗਟ੍ਠਾਨਂ ਵਕ੍ਕਾਦੀਨਿ ਵਾ ਜਾਨਨ੍ਤਿ ‘ਮਯਿ ਲੋਹਿਤਂ ਠਿਤਂ, ਅਮ੍ਹੇ ਵਾ ਤੇਮਯਮਾਨਂ ਠਿਤ’ਨ੍ਤਿ, ਨਾਪਿ ਲੋਹਿਤਂ ਜਾਨਾਤਿ ‘ਅਹਂ ਯਕਨਸ੍ਸ ਹੇਟ੍ਠਾਭਾਗਂ ਪੂਰੇਤ੍ਵਾ ਵਕ੍ਕਾਦੀਨਿ ਤੇਮਯਮਾਨਂ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਲੋਹਿਤਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

ਸੇਦੋ ਅਗ੍ਗਿਸਨ੍ਤਾਪਾਦਿਕਾਲੇਸੁ ਕੇਸਲੋਮਕੂਪਵਿਵਰਾਨਿ ਪੂਰੇਤ੍ਵਾ ਤਿਟ੍ਠਤਿ ਚੇਵ ਪਗ੍ਘਰਤਿ ਚ. ਤਤ੍ਥ ਯਥਾ ਉਦਕਾ ਅਬ੍ਬੂਲ਼੍ਹਮਤ੍ਤੇਸੁ ਭਿਸਮੁਲ਼ਾਲਕੁਮੁਦਨਾਲ਼ਕਲਾਪੇਸੁ ਨ ਭਿਸਾਦਿਕਲਾਪਵਿਵਰਾਨਿ ਜਾਨਨ੍ਤਿ ‘ਅਮ੍ਹੇਹਿ ਉਦਕਂ ਪਗ੍ਘਰਤੀ’ਤਿ, ਨਾਪਿ ਭਿਸਾਦਿਕਲਾਪਵਿਵਰੇਹਿ ਪਗ੍ਘਰਨ੍ਤਂ ਉਦਕਂ ਜਾਨਾਤਿ ‘ਅਹਂ ਭਿਸਾਦਿਕਲਾਪਵਿਵਰੇਹਿ ਪਗ੍ਘਰਾਮੀ’ਤਿ, ਏਵਮੇਵ ਨ ਕੇਸਲੋਮਕੂਪਵਿਵਰਾਨਿ ਜਾਨਨ੍ਤਿ ‘ਅਮ੍ਹੇਹਿ ਸੇਦੋ ਪਗ੍ਘਰਤੀ’ਤਿ, ਨਾਪਿ ਸੇਦੋ ਜਾਨਾਤਿ ‘ਅਹਂ ਕੇਸਲੋਮਕੂਪਵਿਵਰੇਹਿ ਪਗ੍ਘਰਾਮੀ’ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਸੇਦੋ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

ਮੇਦੋ ਥੂਲਸ੍ਸ ਸਕਲਸਰੀਰਂ ਫਰਿਤ੍ਵਾ ਕਿਸਸ੍ਸ ਜਙ੍ਘਮਂਸਾਦੀਨਿ ਨਿਸ੍ਸਾਯ ਠਿਤੋ ਪਤ੍ਥਿਨ੍ਨਸ੍ਨੇਹੋ. ਤਤ੍ਥ ਯਥਾ ਹਲਿਦ੍ਦਿਪਿਲੋਤਿਕਪਟਿਚ੍ਛਨ੍ਨੇ ਮਂਸਪੁਞ੍ਜੇ ਨ ਮਂਸਪੁਞ੍ਜੋ ਜਾਨਾਤਿ ‘ਮਂ ਨਿਸ੍ਸਾਯ ਹਲਿਦ੍ਦਿਪਿਲੋਤਿਕਾ ਠਿਤਾ’ਤਿ, ਨਾਪਿ ਹਲਿਦ੍ਦਿਪਿਲੋਤਿਕਾ ਜਾਨਾਤਿ ‘ਅਹਂ ਮਂਸਪੁਞ੍ਜਂ ਨਿਸ੍ਸਾਯ ਠਿਤਾ’ਤਿ, ਏਵਮੇਵ ਨ ਸਕਲਸਰੀਰੇ ਜਙ੍ਘਾਦੀਸੁ ਵਾ ਮਂਸਂ ਜਾਨਾਤਿ ‘ਮਂ ਨਿਸ੍ਸਾਯ ਮੇਦੋ ਠਿਤੋ’ਤਿ, ਨਾਪਿ ਮੇਦੋ ਜਾਨਾਤਿ ‘ਅਹਂ ਸਕਲਸਰੀਰੇ ਜਙ੍ਘਾਦੀਸੁ ਵਾ ਮਂਸਂ ਨਿਸ੍ਸਾਯ ਠਿਤੋ’ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਮੇਦੋ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਪਤ੍ਥਿਨ੍ਨਸ੍ਨੇਹੋ ਪਤ੍ਥਿਨ੍ਨਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

ਅਸ੍ਸੁ ਯਦਾ ਸਞ੍ਜਾਯਤਿ ਤਦਾ ਅਕ੍ਖਿਕੂਪਕੇ ਪੂਰੇਤ੍ਵਾ ਤਿਟ੍ਠਤਿ ਵਾ ਪਗ੍ਘਰਤਿ ਵਾ. ਤਤ੍ਥ ਯਥਾ ਉਦਕਪੁਣ੍ਣੇਸੁ ਤਰੁਣਤਾਲਟ੍ਠਿਕੂਪਕੇਸੁ ਨ ਤਰੁਣਤਾਲਟ੍ਠਿਕੂਪਕਾ ਜਾਨਨ੍ਤਿ ‘ਅਮ੍ਹੇਸੁ ਉਦਕਂ ਠਿਤ’ਨ੍ਤਿ, ਨਾਪਿ ਉਦਕਂ ਜਾਨਾਤਿ ‘ਅਹਂ ਤਰੁਣਤਾਲਟ੍ਠਿਕੂਪਕੇਸੁ ਠਿਤ’ਨ੍ਤਿ, ਏਵਮੇਵ ਨ ਅਕ੍ਖਿਕੂਪਕਾ ਜਾਨਨ੍ਤਿ ‘ਅਮ੍ਹੇਸੁ ਅਸ੍ਸੁ ਠਿਤ’ਨ੍ਤਿ, ਨਾਪਿ ਅਸ੍ਸੁ ਜਾਨਾਤਿ ‘ਅਹਂ ਅਕ੍ਖਿਕੂਪਕੇਸੁ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਅਸ੍ਸੁ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

ਵਸਾ ਅਗ੍ਗਿਸਨ੍ਤਾਪਾਦਿਕਾਲੇ ਹਤ੍ਥਤਲਹਤ੍ਥਪਿਟ੍ਠਿਪਾਦਤਲਪਾਦਪਿਟ੍ਠਿਨਾਸਪੁਟਨਲਾਟਅਂਸਕੂਟੇਸੁ ਠਿਤਵਿਲੀਨਸ੍ਨੇਹੋ. ਤਤ੍ਥ ਯਥਾ ਪਕ੍ਖਿਤ੍ਤਤੇਲੇ ਆਚਾਮੇ ਨ ਆਚਾਮੋ ਜਾਨਾਤਿ ‘ਮਂ ਤੇਲਂ ਅਜ੍ਝੋਤ੍ਥਰਿਤ੍ਵਾ ਠਿਤ’ਨ੍ਤਿ, ਨਾਪਿ ਤੇਲਂ ਜਾਨਾਤਿ ‘ਅਹਂ ਆਚਾਮਂ ਅਜ੍ਝੋਤ੍ਥਰਿਤ੍ਵਾ ਠਿਤ’ਨ੍ਤਿ, ਏਵਮੇਵ ਨ ਹਤ੍ਥਤਲਾਦਿਪ੍ਪਦੇਸੋ ਜਾਨਾਤਿ ‘ਮਂ ਵਸਾ ਅਜ੍ਝੋਤ੍ਥਰਿਤ੍ਵਾ ਠਿਤਾ’ਤਿ, ਨਾਪਿ ਵਸਾ ਜਾਨਾਤਿ ‘ਅਹਂ ਹਤ੍ਥਤਲਾਦਿਪ੍ਪਦੇਸੇ ਅਜ੍ਝੋਤ੍ਥਰਿਤ੍ਵਾ ਠਿਤਾ’ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਵਸਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

ਖੇਲ਼ੋ ਤਥਾਰੂਪੇ ਖੇਲ਼ੁਪ੍ਪਤ੍ਤਿਪਚ੍ਚਯੇ ਸਤਿ ਉਭੋਹਿ ਕਪੋਲਪਸ੍ਸੇਹਿ ਓਰੋਹਿਤ੍ਵਾ ਜਿਵ੍ਹਾਯ ਤਿਟ੍ਠਤਿ. ਤਤ੍ਥ ਯਥਾ ਅਬ੍ਬੋਚ੍ਛਿਨ੍ਨਉਦਕਨਿਸ੍ਸਨ੍ਦੇ ਨਦੀਤੀਰਕੂਪਕੇ ਨ ਕੂਪਤਲਂ ਜਾਨਾਤਿ ‘ਮਯਿ ਉਦਕਂ ਸਨ੍ਤਿਟ੍ਠਤੀ’ਤਿ, ਨਾਪਿ ਉਦਕਂ ਜਾਨਾਤਿ ‘ਅਹਂ ਕੂਪਤਲੇ ਸਨ੍ਤਿਟ੍ਠਾਮੀ’ਤਿ, ਏਵਮੇਵ ਨ ਜਿਵ੍ਹਾਤਲਂ ਜਾਨਾਤਿ ‘ਮਯਿ ਉਭੋਹਿ ਕਪੋਲਪਸ੍ਸੇਹਿ ਓਰੋਹਿਤ੍ਵਾ ਖੇਲ਼ੋ ਠਿਤੋ’ਤਿ, ਨਾਪਿ ਖੇਲ਼ੋ ਜਾਨਾਤਿ ‘ਅਹਂ ਉਭੋਹਿ ਕਪੋਲਪਸ੍ਸੇਹਿ ਓਰੋਹਿਤ੍ਵਾ ਜਿਵ੍ਹਾਤਲੇ ਠਿਤੋ’ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਖੇਲ਼ੋ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

ਸਿਙ੍ਘਾਣਿਕਾ ਯਦਾ ਸਞ੍ਜਾਯਤਿ ਤਦਾ ਨਾਸਾਪੁਟੇ ਪੂਰੇਤ੍ਵਾ ਤਿਟ੍ਠਤਿ ਵਾ ਪਗ੍ਘਰਤਿ ਵਾ. ਤਤ੍ਥ ਯਥਾ ਪੂਤਿਦਧਿਭਰਿਤਾਯ ਸਿਪ੍ਪਿਕਾਯ ਨ ਸਿਪ੍ਪਿਕਾ ਜਾਨਾਤਿ ‘ਮਯਿ ਪੂਤਿਦਧਿ ਠਿਤ’ਨ੍ਤਿ, ਨਾਪਿ ਪੂਤਿਦਧਿ ਜਾਨਾਤਿ ‘ਅਹਂ ਸਿਪ੍ਪਿਕਾਯ ਠਿਤ’ਨ੍ਤਿ, ਏਵਮੇਵ ਨ ਨਾਸਾਪੁਟਾ ਜਾਨਨ੍ਤਿ ‘ਅਮ੍ਹੇਸੁ ਸਿਙ੍ਘਾਣਿਕਾ ਠਿਤਾ’ਤਿ, ਨਾਪਿ ਸਿਙ੍ਘਾਣਿਕਾ ਜਾਨਾਤਿ ‘ਅਹਂ ਨਾਸਾਪੁਟੇਸੁ ਠਿਤਾ’ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਸਿਙ੍ਘਾਣਿਕਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

ਲਸਿਕਾ ਅਟ੍ਠਿਕਸਨ੍ਧੀਨਂ ਅਬ੍ਭਞ੍ਜਨਕਿਚ੍ਚਂ ਸਾਧਯਮਾਨਾ ਅਸੀਤਿਸਤਸਨ੍ਧੀਸੁ ਠਿਤਾ. ਤਤ੍ਥ ਯਥਾ ਤੇਲਬ੍ਭਞ੍ਜਿਤੇ ਅਕ੍ਖੇ ਨ ਅਕ੍ਖੋ ਜਾਨਾਤਿ ‘ਮਂ ਤੇਲਂ ਅਬ੍ਭਞ੍ਜਿਤ੍ਵਾ ਠਿਤ’ਨ੍ਤਿ, ਨਾਪਿ ਤੇਲਂ ਜਾਨਾਤਿ ‘ਅਹਂ ਅਕ੍ਖਂ ਅਬ੍ਭਞ੍ਜਿਤ੍ਵਾ ਠਿਤ’ਨ੍ਤਿ, ਏਵਮੇਵ ਨ ਅਸੀਤਿਸਤਸਨ੍ਧਯੋ ਜਾਨਨ੍ਤਿ ‘ਲਸਿਕਾ ਅਮ੍ਹੇ ਅਬ੍ਭਞ੍ਜਿਤ੍ਵਾ ਠਿਤਾ’ਤਿ, ਨਾਪਿ ਲਸਿਕਾ ਜਾਨਾਤਿ ‘ਅਹਂ ਅਸੀਤਿਸਤਸਨ੍ਧਯੋ ਅਬ੍ਭਞ੍ਜਿਤ੍ਵਾ ਠਿਤਾ’ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਲਸਿਕਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

ਮੁਤ੍ਤਂ ਵਤ੍ਥਿਸ੍ਸ ਅਬ੍ਭਨ੍ਤਰੇ ਠਿਤਂ. ਤਤ੍ਥ ਯਥਾ ਚਨ੍ਦਨਿਕਾਯ ਪਕ੍ਖਿਤ੍ਤੇ ਅਧੋਮੁਖੇ ਰਵਣਘਟੇ ਨ ਰਵਣਘਟੋ ਜਾਨਾਤਿ ‘ਮਯਿ ਚਨ੍ਦਨਿਕਾਰਸੋ ਠਿਤੋ’ਤਿ, ਨਾਪਿ ਚਨ੍ਦਨਿਕਾਰਸੋ ਜਾਨਾਤਿ ‘ਅਹਂ ਰਵਣਘਟੇ ਠਿਤੋ’ਤਿ, ਏਵਮੇਵ ਨ ਵਤ੍ਥਿ ਜਾਨਾਤਿ ‘ਮਯਿ ਮੁਤ੍ਤਂ ਠਿਤ’ਨ੍ਤਿ, ਨਾਪਿ ਮੁਤ੍ਤਂ ਜਾਨਾਤਿ ‘ਅਹਂ ਵਤ੍ਥਿਮ੍ਹਿ ਠਿਤ’ਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਮੁਤ੍ਤਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ. ਯਂ ਵਾ ਪਨਾਤਿ ਅਵਸੇਸੇਸੁ ਤੀਸੁ ਕੋਟ੍ਠਾਸੇਸੁ ਆਪੋਧਾਤੁਂ ਸਨ੍ਧਾਯ ਵੁਤ੍ਤਂ.

ਬਾਹਿਰਆਪੋਧਾਤੁਨਿਦ੍ਦੇਸੇ ਮੂਲਂ ਪਟਿਚ੍ਚ ਨਿਬ੍ਬਤ੍ਤੋ ਰਸੋ ਮੂਲਰਸੋ ਨਾਮ. ਖਨ੍ਧਰਸਾਦੀਸੁਪਿ ਏਸੇਵ ਨਯੋ. ਖੀਰਾਦੀਨਿ ਪਾਕਟਾਨੇਵ. ਯਥਾ ਪਨ ਭੇਸਜ੍ਜਸਿਕ੍ਖਾਪਦੇ ਏਵਮਿਧ ਨਿਯਮੋ ਨਤ੍ਥਿ. ਯਂ ਕਿਞ੍ਚਿ ਖੀਰਂ ਖੀਰਮੇਵ. ਸੇਸੇਸੁਪਿ ਏਸੇਵ ਨਯੋ. ਭੁਮ੍ਮਾਨੀਤਿ ਆਵਾਟਾਦੀਸੁ ਠਿਤਉਦਕਾਨਿ. ਅਨ੍ਤਲਿਕ੍ਖਾਨੀਤਿ ਪਥਵਿਂ ਅਪ੍ਪਤ੍ਤਾਨਿ ਵਸ੍ਸੋਦਕਾਨਿ. ਯਂ ਵਾ ਪਨਾਤਿ ਹਿਮੋਦਕਕਪ੍ਪਵਿਨਾਸਕਉਦਕਪਥਵੀਸਨ੍ਧਾਰਕਉਦਕਾਦੀਨਿ ਇਧ ਯੇਵਾਪਨਕਟ੍ਠਾਨਂ ਪਵਿਟ੍ਠਾਨਿ.

੧੭੫. ਤੇਜੋਧਾਤੁਨਿਦ੍ਦੇਸੇ ਤੇਜਨਵਸੇਨ ਤੇਜੋ. ਤੇਜੋਵ ਤੇਜੋਭਾਵਂ ਗਤਤ੍ਤਾ ਤੇਜੋਗਤਂ. ਉਸ੍ਮਾਤਿ ਉਣ੍ਹਾਕਾਰੋ. ਉਸ੍ਮਾਵ ਉਸ੍ਮਾਭਾਵਂ ਗਤਤ੍ਤਾ ਉਸ੍ਮਾਗਤਂ. ਉਸੁਮਨ੍ਤਿ ਚਣ੍ਡਉਸੁਮਂ. ਤਦੇਵ ਉਸੁਮਭਾਵਂ ਗਤਤ੍ਤਾ ਉਸੁਮਗਤਂ. ਯੇਨ ਚਾਤਿ ਯੇਨ ਤੇਜੋਗਤੇਨ ਕੁਪ੍ਪਿਤੇਨ. ਸਨ੍ਤਪ੍ਪਤੀਤਿ ਅਯਂ ਕਾਯੋ ਸਨ੍ਤਪ੍ਪਤਿ, ਏਕਾਹਿਕਜਰਾਦਿਭਾਵੇਨ ਉਸੁਮਜਾਤੋ ਹੋਤਿ. ਯੇਨ ਚ ਜੀਰੀਯਤੀਤਿ ਯੇਨ ਅਯਂ ਕਾਯੋ ਜੀਰੀਯਤਿ, ਇਨ੍ਦ੍ਰਿਯਵੇਕਲ੍ਲਤਂ ਬਲਪਰਿਕ੍ਖਯਂ ਵਲਿਪਲਿਤਾਦਿਭਾਵਞ੍ਚ ਪਾਪੁਣਾਤਿ. ਯੇਨ ਚ ਪਰਿਡਯ੍ਹਤੀਤਿ ਯੇਨ ਕੁਪ੍ਪਿਤੇਨ ਅਯਂ ਕਾਯੋ ਡਯ੍ਹਤਿ, ਸੋ ਚ ਪੁਗ੍ਗਲੋ ‘ਡਯ੍ਹਾਮਿ ਡਯ੍ਹਾਮੀ’ਤਿ ਕਨ੍ਦਨ੍ਤੋ ਸਤਧੋਤਸਪ੍ਪਿਗੋਸੀਤਚਨ੍ਦਨਾਦਿਲੇਪਨਞ੍ਚੇਵ ਤਾਲਵਣ੍ਟਵਾਤਞ੍ਚ ਪਚ੍ਚਾਸੀਸਤਿ. ਯੇਨ ਚ ਅਸਿਤਪੀਤਖਾਯਿਤਸਾਯਿਤਂ ਸਮ੍ਮਾ ਪਰਿਣਾਮਂ ਗਚ੍ਛਤੀਤਿ ਯੇਨੇਤਂ ਅਸਿਤਂ ਵਾ ਓਦਨਾਦਿ, ਪੀਤਂ ਵਾ ਪਾਨਕਾਦਿ, ਖਾਯਿਤਂ ਵਾ ਪਿਟ੍ਠਖਜ੍ਜਕਾਦਿ, ਸਾਯਿਤਂ ਵਾ ਅਮ੍ਬਪਕ੍ਕਮਧੁਫਾਣਿਤਾਦਿ ਸਮ੍ਮਾ ਪਰਿਪਾਕਂ ਗਚ੍ਛਤਿ, ਰਸਾਦਿਭਾਵੇਨ ਵਿਵੇਕਂ ਗਚ੍ਛਤੀਤਿ ਅਤ੍ਥੋ. ਏਤ੍ਥ ਚ ਪੁਰਿਮਾ ਤਯੋ ਤੇਜੋਧਾਤੂ ਚਤੁਸਮੁਟ੍ਠਾਨਾ, ਪਚ੍ਛਿਮੋ ਕਮ੍ਮਸਮੁਟ੍ਠਾਨੋਵ. ਅਯਂ ਤਾਵੇਤ੍ਥ ਪਦਸਂਵਣ੍ਣਨਾ.

ਇਦਂ ਪਨ ਮਨਸਿਕਾਰਵਿਧਾਨਂ – ਇਧ ਭਿਕ੍ਖੁ ‘ਯੇਨ ਸਨ੍ਤਪ੍ਪਤਿ, ਅਯਂ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਪਰਿਪਾਚਨਾਕਾਰੋ ਤੇਜੋਧਾਤੂ’ਤਿ ਮਨਸਿ ਕਰੋਤਿ; ‘ਯੇਨ ਜੀਰੀਯਤਿ, ਯੇਨ ਪਰਿਡਯ੍ਹਤਿ, ਯੇਨ ਅਸਿਤਪੀਤਖਾਯਿਤਸਾਯਿਤਂ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਅਯਂ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਪਰਿਪਾਚਨਾਕਾਰੋ ਤੇਜੋਧਾਤੂ’ਤਿ ਮਨਸਿ ਕਰੋਤਿ. ਯਂ ਵਾ ਪਨਾਤਿ ਇਮਸ੍ਮਿਂ ਸਰੀਰੇ ਪਾਕਤਿਕੋ ਏਕੋ ਉਤੁ ਅਤ੍ਥਿ, ਸੋ ਯੇਵਾਪਨਕਟ੍ਠਾਨਂ ਪਵਿਟ੍ਠੋ.

ਬਾਹਿਰਤੇਜੋਧਾਤੁਨਿਦ੍ਦੇਸੇ ਕਟ੍ਠਂ ਪਟਿਚ੍ਚ ਪਜ੍ਜਲਿਤੋ ਕਟ੍ਠੁਪਾਦਾਨੋ ਅਗ੍ਗਿ ਕਟ੍ਠਗ੍ਗਿ ਨਾਮ. ਸਕਲਿਕਗ੍ਗਿਆਦੀਸੁਪਿ ਏਸੇਵ ਨਯੋ. ਸਙ੍ਕਾਰਗ੍ਗੀਤਿ ਕਚਵਰਂ ਸਂਕਡ੍ਢਿਤ੍ਵਾ ਜਾਲਾਪਿਤੋ ਕਚਵਰਗ੍ਗਿ. ਇਨ੍ਦਗ੍ਗੀਤਿ ਅਸਨਿਅਗ੍ਗਿ. ਅਗ੍ਗਿਸਨ੍ਤਾਪੋਤਿ ਜਾਲਾਯ ਵਾ ਵੀਤਚ੍ਚਿਕਙ੍ਗਾਰਾਨਂ ਵਾ ਸਨ੍ਤਾਪੋ. ਸੂਰਿਯਸਨ੍ਤਾਪੋਤਿ ਆਤਪੋ. ਕਟ੍ਠਸਨ੍ਨਿਚਯਸਨ੍ਤਾਪੋਤਿ ਕਟ੍ਠਰਾਸਿਟ੍ਠਾਨੇ ਸਨ੍ਤਾਪੋ. ਸੇਸੇਸੁਪਿ ਏਸੇਵ ਨਯੋ. ਯਂ ਵਾ ਪਨਾਤਿ ਪੇਤਗ੍ਗਿ ਕਪ੍ਪਵਿਨਾਸਗ੍ਗਿ ਨਿਰਯਗ੍ਗਿਆਦਯੋ ਇਧ ਯੇਵਾਪਨਕਟ੍ਠਾਨਂ ਪਵਿਟ੍ਠਾ.

੧੭੬. ਵਾਯੋਧਾਤੁਨਿਦ੍ਦੇਸੇ ਵਾਯਨਵਸੇਨ ਵਾਯੋ. ਵਾਯੋਵ ਵਾਯੋਭਾਵਂ ਗਤਤ੍ਤਾ ਵਾਯੋਗਤਂ. ਥਮ੍ਭਿਤਤ੍ਤਂ ਰੂਪਸ੍ਸਾਤਿ ਅਵਿਨਿਬ੍ਭੋਗਰੂਪਸ੍ਸ ਥਮ੍ਭਿਤਭਾਵੋ. ਉਦ੍ਧਙ੍ਗਮਾ ਵਾਤਾਤਿ ਉਗ੍ਗਾਰਹਿਕ੍ਕਾਦਿ ਪਵਤ੍ਤਕਾ ਉਦ੍ਧਂ ਆਰੋਹਨਵਾਤਾ. ਅਧੋਗਮਾ ਵਾਤਾਤਿ ਉਚ੍ਚਾਰਪਸ੍ਸਾਵਾਦਿਨੀਹਰਣਕਾ ਅਧੋ ਓਰੋਹਨਵਾਤਾ. ਕੁਚ੍ਛਿਸਯਾ ਵਾਤਾਤਿ ਅਨ੍ਤਾਨਂ ਬਹਿਵਾਤਾ. ਕੋਟ੍ਠਾਸਯਾ ਵਾਤਾਤਿ ਅਨ੍ਤਾਨਂ ਅਨ੍ਤੋਵਾਤਾ. ਅਙ੍ਗਮਙ੍ਗਾਨੁਸਾਰਿਨੋ ਵਾਤਾਤਿ ਧਮਨਿਜਾਲਾਨੁਸਾਰੇਨ ਸਕਲਸਰੀਰੇ ਅਙ੍ਗਮਙ੍ਗਾਨਿ ਅਨੁਸਟਾ ਸਮਿਞ੍ਜਨਪਸਾਰਣਾਦਿਨਿਬ੍ਬਤ੍ਤਕਾ ਵਾਤਾ. ਸਤ੍ਥਕਵਾਤਾਤਿ ਸਨ੍ਧਿਬਨ੍ਧਨਾਨਿ ਕਤ੍ਤਰਿਯਾ ਛਿਨ੍ਦਨ੍ਤਾ ਵਿਯ ਪਵਤ੍ਤਵਾਤਾ. ਖੁਰਕਵਾਤਾਤਿ ਖੁਰੇਨ ਵਿਯ ਹਦਯਂ ਫਾਲਨਵਾਤਾ. ਉਪ੍ਪਲਕਵਾਤਾਤਿ ਹਦਯਮਂਸਮੇਵ ਉਪ੍ਪਾਟਨਕਵਾਤਾ. ਅਸ੍ਸਾਸੋਤਿ ਅਨ੍ਤੋਪਵਿਸਨਨਾਸਿਕਾਵਤੋ. ਪਸ੍ਸਾਸੋਤਿ ਬਹਿਨਿਕ੍ਖਮਨਨਾਸਿਕਾਵਤੋ. ਏਤ੍ਥ ਚ ਪੁਰਿਮਾ ਸਬ੍ਬੇ ਚਤੁਸਮੁਟ੍ਠਾਨਾ, ਅਸ੍ਸਾਸਪਸ੍ਸਾਸਾ ਚਿਤ੍ਤਸਮੁਟ੍ਠਾਨਾਵ. ਅਯਮੇਤ੍ਥ ਪਦਵਣ੍ਣਨਾ.

ਇਦਂ ਪਨ ਮਨਸਿਕਾਰਵਿਧਾਨਂ – ਇਧ ਭਿਕ੍ਖੁ ਉਦ੍ਧਙ੍ਗਮਾਦਿਭੇਦੇ ਵਾਤੇ ਉਦ੍ਧਙ੍ਗਮਾਦਿਵਸੇਨ ਪਰਿਗ੍ਗਹੇਤ੍ਵਾ ‘ਉਦ੍ਧਙ੍ਗਮਾ ਵਾਤਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਵਿਤ੍ਥਮ੍ਭਨਾਕਾਰੋ ਵਾਯੋਧਾਤੂ’ਤਿ ਮਨਸਿ ਕਰੋਤਿ. ਸੇਸੇਸੁਪਿ ਏਸੇਵ ਨਯੋ. ਯਂ ਵਾ ਪਨਾਤਿ ਸੇਸੇ ਵਾਯੋਕੋਟ੍ਠਾਸੇ ਅਨੁਗਤਾ ਵਾਤਾ ਇਧ ਯੇਵਾਪਨਕਟ੍ਠਾਨਂ ਪਵਿਟ੍ਠਾ.

ਬਾਹਿਰਵਾਯੋਧਾਤੁਨਿਦ੍ਦੇਸੇ ਪੁਰਤ੍ਥਿਮਾ ਵਾਤਾਤਿ ਪੁਰਤ੍ਥਿਮਦਿਸਤੋ ਆਗਤਾ ਵਾਤਾ. ਪਚ੍ਛਿਮੁਤ੍ਤਰਦਕ੍ਖਿਣੇਸੁਪਿ ਏਸੇਵ ਨਯੋ. ਸਰਜਾ ਵਾਤਾਤਿ ਸਹ ਰਜੇਨ ਸਰਜਾ. ਅਰਜਾ ਵਾਤਾਤਿ ਰਜਵਿਰਹਿਤਾ ਸੁਦ੍ਧਾ ਅਰਜਾ ਨਾਮ. ਸੀਤਾਤਿ ਸੀਤਉਤੁਸਮੁਟ੍ਠਾਨਾ ਸੀਤਵਲਾਹਕਨ੍ਤਰੇ ਸਮੁਟ੍ਠਿਤਾ. ਉਣ੍ਹਾਤਿ ਉਣ੍ਹਉਤੁਸਮੁਟ੍ਠਾਨਾ ਉਣ੍ਹਵਲਾਹਕਨ੍ਤਰੇ ਸਮੁਟ੍ਠਿਤਾ. ਪਰਿਤ੍ਤਾਤਿ ਮਨ੍ਦਾ ਤਨੁਕਵਾਤਾ. ਅਧਿਮਤ੍ਤਾਤਿ ਬਲਵਵਾਤਾ. ਕਾਲ਼ਾਤਿ ਕਾਲ਼ਵਲਾਹਕਨ੍ਤਰੇ ਸਮੁਟ੍ਠਿਤਾ, ਯੇਹਿ ਅਬ੍ਭਾਹਤੋ ਛਵਿਵਣ੍ਣੋ ਕਾਲ਼ਕੋ ਹੋਤਿ. ਤੇਸਂ ਏਤਂ ਅਧਿਵਚਨਨ੍ਤਿਪਿ ਏਕੇ. ਵੇਰਮ੍ਭਵਾਤਾਤਿ ਯੋਜਨਤੋ ਉਪਰਿ ਵਾਯਨਵਾਤਾ. ਪਕ੍ਖਵਾਤਾਤਿ ਅਨ੍ਤਮਸੋ ਮਕ੍ਖਿਕਾਯਪਿ ਪਕ੍ਖਾਯੂਹਨਸਮੁਟ੍ਠਿਤਾ ਵਾਤਾ. ਸੁਪਣ੍ਣਵਾਤਾਤਿ ਗਰੁਲ਼ਵਾਤਾ. ਕਾਮਞ੍ਚ ਇਮੇਪਿ ਪਕ੍ਖਵਾਤਾਵ ਉਸ੍ਸਦਵਸੇਨ ਪਨ ਵਿਸੁਂ ਗਹਿਤਾ. ਤਾਲਵਣ੍ਟਵਾਤਾਤਿ ਤਾਲਪਣ੍ਣੇਹਿ ਵਾ ਅਞ੍ਞੇਨ ਵਾ ਕੇਨਚਿ ਮਣ੍ਡਲਸਣ੍ਠਾਨੇਨ ਸਮੁਟ੍ਠਾਪਿਤਾ ਵਾਤਾ. ਵਿਧੂਪਨਵਾਤਾਤਿ ਬੀਜਨਪਤ੍ਤਕੇਨ ਸਮੁਟ੍ਠਾਪਿਤਾ ਵਾਤਾ. ਇਮਾਨਿ ਚ ਤਾਲਵਣ੍ਟਵਿਧੂਪਨਾਨਿ ਅਨੁਪ੍ਪਨ੍ਨਮ੍ਪਿ ਵਾਤਂ ਉਪ੍ਪਾਦੇਨ੍ਤਿ, ਉਪ੍ਪਨ੍ਨਮ੍ਪਿ ਪਰਿਵਤ੍ਤੇਨ੍ਤਿ. ਯਂ ਵਾ ਪਨਾਤਿ ਇਧ ਪਾਲ਼ਿਆਗਤੇ ਠਪੇਤ੍ਵਾ ਸੇਸਵਾਤਾ ਯੇਵਾਪਨਕਟ੍ਠਾਨਂ ਪਵਿਟ੍ਠਾ.

੧੭੭. ਆਕਾਸਧਾਤੁਨਿਦ੍ਦੇਸੇ ਅਪ੍ਪਟਿਘਟ੍ਟਨਟ੍ਠੇਨ ਨ ਕਸ੍ਸਤੀਤਿ ਆਕਾਸੋ. ਆਕਾਸੋਵ ਆਕਾਸਭਾਵਂ ਗਤਤ੍ਤਾ ਆਕਾਸਗਤਂ. ਅਘਟ੍ਟਨੀਯਤਾਯ ਅਘਂ. ਅਘਮੇਵ ਅਘਭਾਵਂ ਗਤਤ੍ਤਾ ਅਘਗਤਂ. ਵਿਵਰੋਤਿ ਅਨ੍ਤਰਂ. ਤਦੇਵ ਵਿਵਰਭਾਵਂ ਗਤਤ੍ਤਾ ਵਿਵਰਗਤਂ. ਅਸਮ੍ਫੁਟ੍ਠਂ ਮਂਸਲੋਹਿਤੇਹੀਤਿ ਮਂਸਲੋਹਿਤੇਹਿ ਨਿਸ੍ਸਟਂ. ਕਣ੍ਣਚ੍ਛਿਦ੍ਦਨ੍ਤਿਆਦਿ ਪਨ ਤਸ੍ਸੇਵ ਪਭੇਦਦਸ੍ਸਨਂ. ਤਤ੍ਥ ਕਣ੍ਣਚ੍ਛਿਦ੍ਦਨ੍ਤਿ ਕਣ੍ਣਸ੍ਮਿਂ ਛਿਦ੍ਦਂ ਵਿਵਰਂ ਮਂਸਲੋਹਿਤੇਹਿ ਅਸਮ੍ਫੁਟ੍ਠੋਕਾਸੋ. ਸੇਸੇਸੁਪਿ ਏਸੇਵ ਨਯੋ. ਯੇਨਾਤਿ ਯੇਨ ਵਿਵਰੇਨ ਏਤਂ ਅਸਿਤਾਦਿਭੇਦਂ ਅਜ੍ਝੋਹਰਣੀਯਂ ਅਜ੍ਝੋਹਰਤਿ, ਅਨ੍ਤੋ ਪਵੇਸੇਤਿ. ਯਤ੍ਥਾਤਿ ਯਸ੍ਮਿਂ ਅਨ੍ਤੋਉਦਰਪਟਲਸਙ੍ਖਾਤੇ ਓਕਾਸੇ ਏਤਦੇਵ ਚਤੁਬ੍ਬਿਧਂ ਅਜ੍ਝੋਹਰਣੀਯਂ ਤਿਟ੍ਠਤਿ. ਯੇਨਾਤਿ ਯੇਨ ਵਿਵਰੇਨ ਸਬ੍ਬਮ੍ਪੇਤਂ ਵਿਪਕ੍ਕਂ ਕਸਟਭਾਵਂ ਆਪਨ੍ਨਂ ਨਿਕ੍ਖਮਤਿ, ਤਂ ਉਦਰਪਟਲਤੋ ਯਾਵ ਕਰੀਸਮਗ੍ਗਾ ਵਿਦਤ੍ਥਿਚਤੁਰਙ੍ਗੁਲਮਤ੍ਤਂ ਛਿਦ੍ਦਂ ਮਂਸਲੋਹਿਤੇਹਿ ਅਸਮ੍ਫੁਟ੍ਠਂ ਨਿਸ੍ਸਟਂ ਆਕਾਸਧਾਤੂਤਿ ਵੇਦਿਤਬ੍ਬਂ. ਯਂ ਵਾ ਪਨਾਤਿ ਏਤ੍ਥ ਚਮ੍ਮਨ੍ਤਰਂ ਮਂਸਨ੍ਤਰਂ ਨ੍ਹਾਰੁਨ੍ਤਰਂ ਅਟ੍ਠਿਨ੍ਤਰਂ ਲੋਮਨ੍ਤਰਨ੍ਤਿ ਇਦਂ ਸਬ੍ਬਂ ਯੇਵਾਪਨਕਟ੍ਠਾਨਂ ਪਵਿਟ੍ਠਂ.

ਬਾਹਿਰਕਆਕਾਸਧਾਤੁਨਿਦ੍ਦੇਸੇ ਅਸਮ੍ਫੁਟ੍ਠਂ ਚਤੂਹਿ ਮਹਾਭੂਤੇਹੀਤਿ ਚਤੂਹਿ ਮਹਾਭੂਤੇਹਿ ਨਿਸ੍ਸਟਂ ਭਿਤ੍ਤਿਛਿਦ੍ਦਕਵਾਟਛਿਦ੍ਦਾਦਿਕਂ ਵੇਦਿਤਬ੍ਬਂ. ਇਮਿਨਾ ਯਸ੍ਮਿਂ ਆਕਾਸੇ ਪਰਿਕਮ੍ਮਂ ਕਰੋਨ੍ਤਸ੍ਸ ਚਤੁਕ੍ਕਪਞ੍ਚਕਜ੍ਝਾਨਾਨਿ ਉਪ੍ਪਜ੍ਜਨ੍ਤਿ ਤਂ ਕਥਿਤਂ.

੧੭੮. ਵਿਞ੍ਞਾਣਧਾਤੁਨਿਦ੍ਦੇਸੇ ਚਕ੍ਖੁਵਿਞ੍ਞਾਣਸਙ੍ਖਾਤਾ ਧਾਤੁ ਚਕ੍ਖੁਵਿਞ੍ਞਾਣਧਾਤੁ. ਸੇਸਾਸੁਪਿ ਏਸੇਵ ਨਯੋ. ਇਤਿ ਇਮਾਸੁ ਛਸੁ ਧਾਤੂਸੁ ਪਰਿਗ੍ਗਹਿਤਾਸੁ ਅਟ੍ਠਾਰਸ ਧਾਤੁਯੋ ਪਰਿਗ੍ਗਹਿਤਾਵ ਹੋਨ੍ਤਿ. ਕਥਂ? ਪਥਵੀਤੇਜੋਵਾਯੋਧਾਤੁਗ੍ਗਹਣੇਨ ਤਾਵ ਫੋਟ੍ਠਬ੍ਬਧਾਤੁ ਗਹਿਤਾਵ ਹੋਤਿ, ਆਪੋਧਾਤੁਆਕਾਸਧਾਤੁਗ੍ਗਹਣੇਨ ਧਮ੍ਮਧਾਤੁ, ਵਿਞ੍ਞਾਣਧਾਤੁਗ੍ਗਹਣੇਨ ਤਸ੍ਸਾ ਪੁਰੇਚਾਰਿਕਪਚ੍ਛਾਚਾਰਿਕਤ੍ਤਾ ਮਨੋਧਾਤੁ ਗਹਿਤਾਵ ਹੋਤਿ. ਚਕ੍ਖੁਵਿਞ੍ਞਾਣਧਾਤੁਆਦਯੋ ਸੁਤ੍ਤੇ ਆਗਤਾ ਏਵ. ਸੇਸਾ ਨਵ ਆਹਰਿਤ੍ਵਾ ਦਸ੍ਸੇਤਬ੍ਬਾ. ਚਕ੍ਖੁਵਿਞ੍ਞਾਣਧਾਤੁਗ੍ਗਹਣੇਨ ਹਿ ਤਸ੍ਸਾ ਨਿਸ੍ਸਯਭੂਤਾ ਚਕ੍ਖੁਧਾਤੁ, ਆਰਮ੍ਮਣਭੂਤਾ ਰੂਪਧਾਤੁ ਚ ਗਹਿਤਾਵ ਹੋਨ੍ਤਿ. ਏਵਂ ਸੋਤਵਿਞ੍ਞਾਣਧਾਤੁਆਦਿਗ੍ਗਹਣੇਨ ਸੋਤਧਾਤੁਆਦਯੋਤਿ ਅਟ੍ਠਾਰਸਾਪਿ ਗਹਿਤਾਵ ਹੋਨ੍ਤਿ. ਤਾਸੁ ਦਸਹਿ ਧਾਤੂਹਿ ਰੂਪਪਰਿਗ੍ਗਹੋ ਕਥਿਤੋ ਹੋਤਿ. ਸਤ੍ਤਹਿ ਅਰੂਪਪਰਿਗ੍ਗਹੋ. ਧਮ੍ਮਧਾਤੁਯਾ ਸਿਯਾ ਰੂਪਪਰਿਗ੍ਗਹੋ, ਸਿਯਾ ਅਰੂਪਪਰਿਗ੍ਗਹੋ. ਇਤਿ ਅਡ੍ਢੇਕਾਦਸਹਿ ਧਾਤੂਹਿ ਰੂਪਪਰਿਗ੍ਗਹੋ, ਅਡ੍ਢਟ੍ਠਧਾਤੂਹਿ ਅਰੂਪਪਰਿਗ੍ਗਹੋਤਿ ਰੂਪਾਰੂਪਪਰਿਗ੍ਗਹੋ ਕਥਿਤੋ ਹੋਤਿ. ਰੂਪਾਰੂਪਂ ਪਞ੍ਚਕ੍ਖਨ੍ਧਾ. ਤਂ ਹੋਤਿ ਦੁਕ੍ਖਸਚ੍ਚਂ. ਤਂਸਮੁਟ੍ਠਾਪਿਕਾ ਪੁਰਿਮਤਣ੍ਹਾ ਸਮੁਦਯਸਚ੍ਚਂ. ਉਭਿਨ੍ਨਂ ਅਪ੍ਪਵਤ੍ਤਿ ਨਿਰੋਧਸਚ੍ਚਂ. ਤਂਪਜਾਨਨੋ ਮਗ੍ਗੋ ਮਗ੍ਗਸਚ੍ਚਨ੍ਤਿ ਇਦਂ ਚਤੁਸਚ੍ਚਕਮ੍ਮਟ੍ਠਾਨਂ ਅਟ੍ਠਾਰਸਧਾਤੁਵਸੇਨ ਅਭਿਨਿਵਿਟ੍ਠਸ੍ਸ ਭਿਕ੍ਖੁਨੋ ਯਾਵ ਅਰਹਤ੍ਤਾ ਮਤ੍ਥਕਂ ਪਾਪੇਤ੍ਵਾ ਨਿਗਮਨਂ ਕਥਿਤਨ੍ਤਿ ਵੇਦਿਤਬ੍ਬਂ.

੧੭੯. ਇਦਾਨਿ ਦੁਤਿਯਛਕ੍ਕਂ ਦਸ੍ਸੇਨ੍ਤੋ ਅਪਰਾਪਿ ਛ ਧਾਤੁਯੋਤਿਆਦਿਮਾਹ. ਤਤ੍ਥ ਸੁਖਧਾਤੁ ਦੁਕ੍ਖਧਾਤੂਤਿ ਕਾਯਪ੍ਪਸਾਦਵਤ੍ਥੁਕਾਨਿ ਸੁਖਦੁਕ੍ਖਾਨਿ ਸਪ੍ਪਟਿਪਕ੍ਖਵਸੇਨ ਯੁਗਲ਼ਕਤੋ ਦਸ੍ਸਿਤਾਨਿ. ਸੁਖਞ੍ਹਿ ਦੁਕ੍ਖਸ੍ਸ ਪਟਿਪਕ੍ਖੋ, ਦੁਕ੍ਖਂ ਸੁਖਸ੍ਸ. ਯਤ੍ਤਕਂ ਸੁਖੇਨ ਫਰਿਤਟ੍ਠਾਨਂ ਤਤ੍ਤਕਂ ਦੁਕ੍ਖਂ ਫਰਤਿ. ਯਤ੍ਤਕਂ ਦੁਕ੍ਖੇਨ ਫਰਿਤਟ੍ਠਾਨਂ ਤਤ੍ਤਕਂ ਸੁਖਂ ਫਰਤਿ. ਸੋਮਨਸ੍ਸਧਾਤੁ ਦੋਮਨਸ੍ਸਧਾਤੂਤਿ ਇਦਮ੍ਪਿ ਤਥੇਵ ਯੁਗਲ਼ਕਂ ਕਤਂ. ਸੋਮਨਸ੍ਸਞ੍ਹਿ ਦੋਮਨਸ੍ਸਸ੍ਸ ਪਟਿਪਕ੍ਖੋ, ਦੋਮਨਸ੍ਸਂ ਸੋਮਨਸ੍ਸਸ੍ਸ. ਯਤ੍ਤਕਂ ਸੋਮਨਸ੍ਸੇਨ ਫਰਿਤਟ੍ਠਾਨਂ ਤਤ੍ਤਕਂ ਦੋਮਨਸ੍ਸਂ ਫਰਤਿ. ਯਤ੍ਤਕਂ ਦੋਮਨਸ੍ਸੇਨ ਫਰਿਤਟ੍ਠਾਨਂ ਤਤ੍ਤਕਂ ਸੋਮਨਸ੍ਸਂ ਫਰਤਿ.

ਉਪੇਕ੍ਖਾਧਾਤੁ ਅਵਿਜ੍ਜਾਧਾਤੂਤਿ ਇਦਂ ਪਨ ਦ੍ਵਯਂ ਸਰਿਕ੍ਖਕਵਸੇਨ ਯੁਗਲ਼ਕਂ ਕਤਂ. ਉਭਯਮ੍ਪਿ ਹੇਤਂ ਅਵਿਭੂਤਤ੍ਤਾ ਸਰਿਕ੍ਖਕਂ ਹੋਤਿ. ਤਤ੍ਥ ਸੁਖਦੁਕ੍ਖਧਾਤੁਗ੍ਗਹਣੇਨ ਤਂ ਸਮ੍ਪਯੁਤ੍ਤਾ ਕਾਯਵਿਞ੍ਞਾਣਧਾਤੁ, ਵਤ੍ਥੁਭੂਤਾ ਕਾਯਧਾਤੁ, ਆਰਮ੍ਮਣਭੂਤਾ ਫੋਟ੍ਠਬ੍ਬਧਾਤੁ ਚ ਗਹਿਤਾਵ ਹੋਨ੍ਤਿ. ਸੋਮਨਸ੍ਸਦੋਮਨਸ੍ਸਧਾਤੁਗ੍ਗਹਣੇਨ ਤਂ ਸਮ੍ਪਯੁਤ੍ਤਾ ਮਨੋਵਿਞ੍ਞਾਣਧਾਤੁ ਗਹਿਤਾ ਹੋਤਿ. ਅਵਿਜ੍ਜਾਧਾਤੁਗ੍ਗਹਣੇਨ ਧਮ੍ਮਧਾਤੁ ਗਹਿਤਾ. ਉਪੇਕ੍ਖਾਧਾਤੁਗ੍ਗਹਣੇਨ ਚਕ੍ਖੁਸੋਤਘਾਨਜਿਵ੍ਹਾਵਿਞ੍ਞਾਣਧਾਤੁਮਨੋਧਾਤੁਯੋ, ਤਾਸਂਯੇਵ ਵਤ੍ਥਾਰਮ੍ਮਣਭੂਤਾ ਚਕ੍ਖੁਧਾਤੁਰੂਪਧਾਤੁਆਦਯੋ ਚ ਗਹਿਤਾਤਿ ਏਵਂ ਅਟ੍ਠਾਰਸਪਿ ਧਾਤੁਯੋ ਗਹਿਤਾਵ ਹੋਨ੍ਤਿ. ਇਦਾਨਿ ਤਾਸੁ ਦਸਹਿ ਧਾਤੂਹਿ ਰੂਪਪਰਿਗ੍ਗਹੋਤਿਆਦਿ ਸਬ੍ਬਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਏਵਮ੍ਪਿ ਏਕਸ੍ਸ ਭਿਕ੍ਖੁਨੋ ਯਾਵ ਅਰਹਤ੍ਤਾ ਮਤ੍ਥਕਂ ਪਾਪੇਤ੍ਵਾ ਨਿਗਮਨਂ ਕਥਿਤਂ ਹੋਤੀਤਿ ਵੇਦਿਤਬ੍ਬਂ. ਤਤ੍ਥ ਕਤਮਾ ਸੁਖਧਾਤੁ ਯਂ ਕਾਯਿਕਂ ਸਾਤਨ੍ਤਿ ਆਦੀਨਿ ਹੇਟ੍ਠਾ ਵੁਤ੍ਤਨਯਾਨੇਵ.

੧੮੧. ਤਤਿਯਛਕ੍ਕੇ ਕਾਮੋਤਿ ਦ੍ਵੇ ਕਾਮਾ – ਵਤ੍ਥੁਕਾਮੋ ਚ ਕਿਲੇਸਕਾਮੋ ਚ. ਤਤ੍ਥ ਕਿਲੇਸਕਾਮਂ ਸਨ੍ਧਾਯ ਕਾਮਪਟਿਸਂਯੁਤ੍ਤਾ ਧਾਤੁ ਕਾਮਧਾਤੁ, ਕਾਮਵਿਤਕ੍ਕਸ੍ਸੇਤਂ ਨਾਮਂ. ਵਤ੍ਥੁਕਾਮਂ ਸਨ੍ਧਾਯ ਕਾਮੋਯੇਵ ਧਾਤੁ ਕਾਮਧਾਤੁ, ਕਾਮਾਵਚਰਧਮ੍ਮਾਨਮੇਤਂ ਨਾਮਂ. ਬ੍ਯਾਪਾਦਪਟਿਸਂਯੁਤ੍ਤਾ ਧਾਤੁ ਬ੍ਯਾਪਾਦਧਾਤੁ, ਬ੍ਯਾਪਾਦਵਿਤਕ੍ਕਸ੍ਸੇਤਂ ਨਾਮਂ. ਬ੍ਯਾਪਾਦੋਵ ਧਾਤੁ ਬ੍ਯਾਪਾਦਧਾਤੁ, ਦਸਆਘਾਤਵਤ੍ਥੁਕਸ੍ਸ ਪਟਿਘਸ੍ਸੇਤਂ ਨਾਮਂ. ਵਿਹਿਂਸਾ ਪਟਿਸਂਯੁਤ੍ਤਾ ਧਾਤੁ ਵਿਹਿਂਸਾਧਾਤੁ, ਵਿਹਿਂਸਾਵਿਤਕ੍ਕਸ੍ਸੇਤਂ ਨਾਮਂ. ਵਿਹਿਂਸਾਯੇਵ ਧਾਤੁ ਵਿਹਿਂਸਾਧਾਤੁ, ਪਰਸਤ੍ਤਵਿਹੇਸਨਸ੍ਸੇਤਂ ਨਾਮਂ. ਅਯਂ ਪਨ ਹੇਟ੍ਠਾ ਅਨਾਗਤਤ੍ਤਾ ਏਵਂ ਅਤ੍ਥਾਦਿਵਿਭਾਗਤੋ ਵੇਦਿਤਬ੍ਬਾ – ਵਿਹਿਂਸਨ੍ਤਿ ਏਤਾਯ ਸਤ੍ਤੇ, ਵਿਹਿਂਸਨਂ ਵਾ ਏਤਂ ਸਤ੍ਤਾਨਨ੍ਤਿ ਵਿਹਿਂਸਾ. ਸਾ ਵਿਹੇਠਨਲਕ੍ਖਣਾ, ਕਰੁਣਾਪਟਿਪਕ੍ਖਲਕ੍ਖਣਾ ਵਾ; ਪਰਸਨ੍ਤਾਨੇ ਉਬ੍ਬੇਗਜਨਨਰਸਾ, ਸਕਸਨ੍ਤਾਨੇ ਕਰੁਣਾਵਿਦ੍ਧਂਸਨਰਸਾ ਵਾ; ਦੁਕ੍ਖਾਯਤਨਪਚ੍ਚੁਪਟ੍ਠਾਨਾ; ਪਟਿਘਪਦਟ੍ਠਾਨਾਤਿ ਵੇਦਿਤਬ੍ਬਾ. ਨੇਕ੍ਖਮ੍ਮਂ ਵੁਚ੍ਚਤਿ ਲੋਭਾ ਨਿਕ੍ਖਨ੍ਤਤ੍ਤਾ ਅਲੋਭੋ, ਨੀਵਰਣੇਹਿ ਨਿਕ੍ਖਨ੍ਤਤ੍ਤਾ ਪਠਮਜ੍ਝਾਨਂ, ਸਬ੍ਬਾਕੁਸਲੇਹਿ ਨਿਕ੍ਖਨ੍ਤਤ੍ਤਾ ਸਬ੍ਬਕੁਸਲਂ. ਨੇਕ੍ਖਮ੍ਮਪਟਿਸਂਯੁਤ੍ਤਾ ਧਾਤੁ ਨੇਕ੍ਖਮ੍ਮਧਾਤੁ, ਨੇਕ੍ਖਮ੍ਮਵਿਤਕ੍ਕਸ੍ਸੇਤਂ ਨਾਮਂ. ਨੇਕ੍ਖਮ੍ਮਮੇਵ ਧਾਤੁ ਨੇਕ੍ਖਮ੍ਮਧਾਤੁ, ਸਬ੍ਬਸ੍ਸਾਪਿ ਕੁਸਲਸ੍ਸੇਤਂ ਨਾਮਂ. ਅਬ੍ਯਾਪਾਦਪਟਿਸਂਯੁਤ੍ਤਾ ਧਾਤੁ ਅਬ੍ਯਾਪਾਦਧਾਤੁ, ਅਬ੍ਯਾਪਾਦਵਿਤਕ੍ਕਸ੍ਸੇਤਂ ਨਾਮਂ. ਅਬ੍ਯਾਪਾਦੋਵ ਧਾਤੁ ਅਬ੍ਯਾਪਾਦਧਾਤੁ, ਮੇਤ੍ਤਾਯੇਤਂ ਨਾਮਂ. ਅਵਿਹਿਂਸਾਪਟਿਸਂਯੁਤ੍ਤਾ ਧਾਤੁ ਅਵਿਹਿਂਸਾਧਾਤੁ, ਅਵਿਹਿਂਸਾ ਵਿਤਕ੍ਕਸ੍ਸੇਤਂ ਨਾਮਂ. ਅਵਿਹਿਂਸਾਵ ਧਾਤੁ ਅਵਿਹਿਂਸਾਧਾਤੁ, ਕਰੁਣਾਯੇਤਂ ਨਾਮਂ.

੧੮੨. ਇਦਾਨਿ ਤਮੇਵਤ੍ਥਂ ਦਸ੍ਸੇਤੁਂ ਤਤ੍ਥ ਕਤਮਾ ਕਾਮਧਾਤੂਤਿ ਪਦਭਾਜਨਂ ਆਰਦ੍ਧਂ. ਤਤ੍ਥ ਪਟਿਸਂਯੁਤ੍ਤੋਤਿ ਸਂਪਯੋਗਵਸੇਨ ਪਟਿਸਂਯੁਤ੍ਤੋ. ਤਕ੍ਕੋ ਵਿਤਕ੍ਕੋਤਿਆਦੀਨਿ ਵੁਤ੍ਤਤ੍ਥਾਨੇਵ. ਵਿਹੇਠੇਤੀਤਿ ਬਾਧੇਤਿ, ਦੁਕ੍ਖਾਪੇਤਿ. ਹੇਠਨਾਤਿ ਪਾਣਿਪ੍ਪਹਾਰਾਦੀਹਿ ਬਾਧਨਾ, ਦੁਕ੍ਖੁਪ੍ਪਾਦਨਾ. ਬਲਵਹੇਠਨਾ ਵਿਹੇਠਨਾ. ਹਿਂਸਨ੍ਤਿ ਏਤਾਯਾਤਿ ਹਿਂਸਨਾ. ਬਲਵਹਿਂਸਨਾ ਵਿਹਿਂਸਨਾ. ਰੋਸਨਾਤਿ ਘਟ੍ਟਨਾ. ਵਿਰੋਸਨਾਤਿ ਬਲਵਘਟ੍ਟਨਾ. ਸਬ੍ਬਤ੍ਥ ਵਾ ‘ਵਿ’ ਉਪਸਗ੍ਗੇਨ ਪਦਂ ਵਡ੍ਢਿਤਂ. ਉਪਹਨਨ੍ਤਿ ਏਤੇਨਾਤਿ ਉਪਘਾਤੋ, ਪਰੇਸਂ ਉਪਘਾਤੋ ਪਰੂਪਘਾਤੋ.

ਮੇਤ੍ਤਾਯਨ੍ਤਿ ਏਤਾਯਾਤਿ ਮੇਤ੍ਤਿ. ਮੇਤ੍ਤਾਯਨਾਕਾਰੋ ਮੇਤ੍ਤਾਯਨਾ. ਮੇਤ੍ਤਾਯ ਅਯਿਤਸ੍ਸ ਮੇਤ੍ਤਾਸਮਙ੍ਗਿਨੋ ਭਾਵੋ ਮੇਤ੍ਤਾਯਿਤਤ੍ਤਂ. ਬ੍ਯਾਪਾਦੇਨ ਵਿਮੁਤ੍ਤਸ੍ਸ ਚੇਤਸੋ ਵਿਮੁਤ੍ਤਿ ਚੇਤੋਵਿਮੁਤ੍ਤਿ. ਏਤ੍ਥ ਚ ਪੁਰਿਮੇਹਿ ਤੀਹਿ ਉਪਚਾਰਪ੍ਪਤ੍ਤਾਪਿ ਅਪ੍ਪਨਾਪਤਾਪਿ ਮੇਤ੍ਤਾ ਕਥਿਤਾ, ਪਚ੍ਛਿਮੇਨ ਅਪ੍ਪਨਾਪਤ੍ਤਾਵ.

ਕਰੁਣਾਯਨ੍ਤਿ ਏਤਾਯਾਤਿ ਕਰੁਣਾ. ਕਰੁਣਾਯਨਾਕਾਰੋ ਕਰੁਣਾਯਨਾ. ਕਰੁਣਾਯ ਅਯਿਤਸ੍ਸ ਕਰੁਣਾਸਮਙ੍ਗਿਨੋ ਭਾਵੋ ਕਰੁਣਾਯਿਤਤ੍ਤਂ. ਵਿਹਿਂਸਾਯ ਵਿਮੁਤ੍ਤਸ੍ਸ ਚੇਤਸੋ ਵਿਮੁਤ੍ਤਿ ਚੇਤੋਵਿਮੁਤ੍ਤਿ. ਇਧਾਪਿ ਪੁਰਿਮਨਯੇਨੇਵ ਉਪਚਾਰਪ੍ਪਨਾਭੇਦੋ ਵੇਦਿਤਬ੍ਬੋ. ਉਭਯਤ੍ਥਾਪਿ ਚ ਪਰਿਯੋਸਾਨਪਦੇ ਮੇਤ੍ਤਾਕਰੁਣਾਤਿ ਚੇਤੋਵਿਮੁਤ੍ਤਿਵਿਸੇਸਨਤ੍ਥਂ ਵੁਤ੍ਤਂ.

ਏਤ੍ਥ ਚ ਕਾਮਵਿਤਕ੍ਕੋ ਸਤ੍ਤੇਸੁਪਿ ਉਪ੍ਪਜ੍ਜਤਿ ਸਙ੍ਖਾਰੇਸੁਪਿ. ਉਭਯਤ੍ਥ ਉਪ੍ਪਨ੍ਨੋਪਿ ਕਮ੍ਮਪਥਭੇਦੋਵ. ਬ੍ਯਾਪਾਦੋ ਪਨ ਸਤ੍ਤੇਸੁ ਉਪ੍ਪਨ੍ਨੋਯੇਵ ਕਮ੍ਮਪਥਂ ਭਿਨ੍ਦਤਿ, ਨ ਇਤਰੋ. ਵਿਹਿਂਸਾਯਪਿ ਏਸੇਵ ਨਯੋ. ਏਤ੍ਥ ਚ ਦੁਵਿਧਾ ਕਥਾ – ਸਬ੍ਬਸਙ੍ਗਾਹਿਕਾ ਚੇਵ ਅਸਮ੍ਭਿਨ੍ਨਾ ਚ. ਕਾਮਧਾਤੁਗ੍ਗਹਣੇਨ ਹਿ ਬ੍ਯਾਪਾਦਵਿਹਿਂਸਾਧਾਤੁਯੋਪਿ ਗਹਿਤਾ. ਕਾਮਧਾਤੁਯਾਯੇਵ ਪਨ ਨੀਹਰਿਤ੍ਵਾ ਨੀਹਰਿਤ੍ਵਾ ਦ੍ਵੇਪਿ ਏਤਾ ਦਸ੍ਸਿਤਾਤਿ. ਅਯਂ ਤਾਵੇਤ੍ਥ ਸਬ੍ਬਸਙ੍ਗਾਹਿਕਕਥਾ. ਠਪੇਤ੍ਵਾ ਪਨ ਬ੍ਯਾਪਾਦਵਿਹਿਂਸਾਧਾਤੁਯੋ ਸੇਸਾ ਸਬ੍ਬਾਪਿ ਕਾਮਧਾਤੁ ਏਵਾਤਿ. ਅਯਂ ਅਸਮ੍ਭਿਨ੍ਨਕਥਾ ਨਾਮ. ਨੇਕ੍ਖਮ੍ਮਧਾਤੁਗ੍ਗਹਣੇਨਾਪਿ ਅਬ੍ਯਾਪਾਦਅਵਿਹਿਂਸਾਧਾਤੁਯੋ ਗਹਿਤਾਯੇਵ. ਨੇਕ੍ਖਮ੍ਮਧਾਤੁਤੋ ਪਨ ਨੀਹਰਿਤ੍ਵਾ ਨੀਹਰਿਤ੍ਵਾ ਤਦੁਭਯਮ੍ਪਿ ਦਸ੍ਸਿਤਨ੍ਤਿ ਅਯਮੇਤ੍ਥਾਪਿ ਸਬ੍ਬਸਙ੍ਗਾਹਿਕਕਥਾ. ਠਪੇਤ੍ਵਾ ਅਬ੍ਯਾਪਾਦਅਵਿਹਿਂਸਾਧਾਤੁਯੋ ਅਵਸੇਸਾ ਨੇਕ੍ਖਮ੍ਮਧਾਤੂਤਿ ਅਯਂ ਅਸਮ੍ਭਿਨ੍ਨਕਥਾ ਨਾਮ.

ਇਮਾਹਿ ਚ ਛਹਿ ਧਾਤੂਹਿ ਪਰਿਗ੍ਗਹਿਤਾ ਹਿ ਅਟ੍ਠਾਰਸ ਧਾਤੁਯੋ ਪਰਿਗ੍ਗਹਿਤਾਵ ਹੋਨ੍ਤਿ. ਸਬ੍ਬਾਪਿ ਹਿ ਤਾ ਕਾਮਧਾਤੁਤੋਵ ਨੀਹਰਿਤ੍ਵਾ ਨੀਹਰਿਤ੍ਵਾ ਲਭਾਪੇਤਬ੍ਬਾ ਅਟ੍ਠਾਰਸ ਧਾਤੁਯੋਵ ਹੋਨ੍ਤੀਤਿ ਤਿਣ੍ਣਂ ਛਕ੍ਕਾਨਂ ਵਸੇਨ ਅਟ੍ਠਾਰਸ ਹੋਨ੍ਤਿ. ਏਵਂ ਪਨ ਅਗ੍ਗਹੇਤ੍ਵਾ ਏਕੇਕਸ੍ਮਿਂ ਛਕ੍ਕੇ ਵੁਤ੍ਤਨਯੇਨ ਅਟ੍ਠਾਰਸ ਅਟ੍ਠਾਰਸ ਕਤ੍ਵਾ ਸਬ੍ਬਾਨਿਪਿ ਤਾਨਿ ਅਟ੍ਠਾਰਸਕਾਨਿ ਏਕਜ੍ਝਂ ਅਭਿਸਙ੍ਖਿਪਿਤ੍ਵਾ ਅਟ੍ਠਾਰਸੇਵ ਹੋਨ੍ਤੀਤਿ ਵੇਦਿਤਬ੍ਬਾ. ਇਤਿ ਇਮਸ੍ਮਿਂ ਸੁਤ੍ਤਨ੍ਤਭਾਜਨੀਯੇ ਸੋਲ਼ਸ ਧਾਤੁਯੋ ਕਾਮਾਵਚਰਾ, ਦ੍ਵੇ ਤੇਭੂਮਿਕਾਤਿ ਏਵਮੇਤ੍ਥ ਸਮ੍ਮਸਨਚਾਰੋਵ ਕਥਿਤੋਤਿ ਵੇਦਿਤਬ੍ਬੋ.

ਸੁਤ੍ਤਨ੍ਤਭਾਜਨੀਯਵਣ੍ਣਨਾ.