੧੪. ਸਿਕ੍ਖਾਪਦਵਿਭਙ੍ਗੋ

੧. ਅਭਿਧਮ੍ਮਭਾਜਨੀਯਵਣ੍ਣਨਾ

੭੦੩. ਇਦਾਨਿ ਤਦਨਨ੍ਤਰੇ ਸਿਕ੍ਖਾਪਦਵਿਭਙ੍ਗੇ ਪਞ੍ਚਾਤਿ ਗਣਨਪਰਿਚ੍ਛੇਦੋ. ਸਿਕ੍ਖਾਪਦਾਨੀਤਿ ਸਿਕ੍ਖਿਤਬ੍ਬਪਦਾਨਿ; ਸਿਕ੍ਖਾਕੋਟ੍ਠਾਸਾਤਿ ਅਤ੍ਥੋ. ਅਪਿਚ ਉਪਰਿ ਆਗਤਾ ਸਬ੍ਬੇਪਿ ਕੁਸਲਾ ਧਮ੍ਮਾ ਸਿਕ੍ਖਿਤਬ੍ਬਤੋ ਸਿਕ੍ਖਾ. ਪਞ੍ਚਸੁ ਪਨ ਸੀਲਙ੍ਗੇਸੁ ਯਂਕਿਞ੍ਚਿ ਅਙ੍ਗਂ ਤਾਸਂ ਸਿਕ੍ਖਾਨਂ ਪਤਿਟ੍ਠਾਨਟ੍ਠੇਨ ਪਦਨ੍ਤਿ ਸਿਕ੍ਖਾਨਂ ਪਦਤ੍ਤਾ ਸਿਕ੍ਖਾਪਦਾਨਿ. ਪਾਣਾਤਿਪਾਤਾਤਿ ਪਾਣਸ੍ਸ ਅਤਿਪਾਤਾ ਘਾਤਨਾ ਮਾਰਣਾਤਿ ਅਤ੍ਥੋ. ਵੇਰਮਣੀਤਿ ਵਿਰਤਿ. ਅਦਿਨ੍ਨਾਦਾਨਾਤਿ ਅਦਿਨ੍ਨਸ੍ਸ ਆਦਾਨਾ; ਪਰਪਰਿਗ੍ਗਹਿਤਸ੍ਸ ਹਰਣਾਤਿ ਅਤ੍ਥੋ. ਕਾਮੇਸੂਤਿ ਵਤ੍ਥੁਕਾਮੇਸੁ. ਮਿਚ੍ਛਾਚਾਰਾਤਿ ਕਿਲੇਸਕਾਮਵਸੇਨ ਲਾਮਕਾਚਾਰਾ. ਮੁਸਾਵਾਦਾਤਿ ਅਭੂਤਵਾਦਤੋ. ਸੁਰਾਮੇਰਯਮਜ੍ਜਪਮਾਦਟ੍ਠਾਨਾਤਿ ਏਤ੍ਥ ਸੁਰਾਤਿ ਪਿਟ੍ਠਸੁਰਾ, ਪੂਵਸੁਰਾ, ਓਦਨਸੁਰਾ, ਕਿਣ੍ਣਪਕ੍ਖਿਤ੍ਤਾ, ਸਮ੍ਭਾਰਸਂਯੁਤ੍ਤਾਤਿ ਪਞ੍ਚ ਸੁਰਾ. ਮੇਰਯਨ੍ਤਿ ਪੁਪ੍ਫਾਸਵੋ, ਫਲਾਸਵੋ, ਗੁਲ਼ਾਸਵੋ, ਮਧ੍ਵਾਸਵੋ, ਸਮ੍ਭਾਰਸਂਯੁਤ੍ਤੋਤਿ ਪਞ੍ਚ ਆਸਵਾ. ਤਦੁਭਯਮ੍ਪਿ ਮਦਨੀਯਟ੍ਠੇਨ ਮਜ੍ਜਂ. ਯਾਯ ਚੇਤਨਾਯ ਤਂ ਪਿਵਨ੍ਤਿ, ਸਾ ਪਮਾਦਕਾਰਣਤ੍ਤਾ ਪਮਾਦਟ੍ਠਾਨਂ; ਤਸ੍ਮਾ ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ. ਅਯਂ ਤਾਵੇਤ੍ਥ ਮਾਤਿਕਾਨਿਕ੍ਖੇਪਸ੍ਸ ਅਤ੍ਥੋ.

੭੦੪. ਪਦਭਾਜਨੀਯੇ ਪਨ ਯਸ੍ਮਿਂ ਸਮਯੇ ਕਾਮਾਵਚਰਨ੍ਤਿਆਦਿ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ. ਯਸ੍ਮਾ ਪਨ ਨ ਕੇਵਲਂ ਵਿਰਤਿਯੇਵ ਸਿਕ੍ਖਾਪਦਂ, ਚੇਤਨਾਪਿ ਸਿਕ੍ਖਾਪਦਮੇਵ, ਤਸ੍ਮਾ ਤਂ ਦਸ੍ਸੇਤੁਂ ਦੁਤਿਯਨਯੋ ਦਸ੍ਸਿਤੋ. ਯਸ੍ਮਾ ਚ ਨ ਕੇਵਲਂ ਏਤੇਯੇਵ ਦ੍ਵੇ ਧਮ੍ਮਾ ਸਿਕ੍ਖਾਪਦਂ, ਚੇਤਨਾਸਮ੍ਪਯੁਤ੍ਤਾ ਪਨ ਪਰੋਪਣ੍ਣਾਸਧਮ੍ਮਾਪਿ ਸਿਕ੍ਖਿਤਬ੍ਬਕੋਟ੍ਠਾਸਤੋ ਸਿਕ੍ਖਾਪਦਮੇਵ, ਤਸ੍ਮਾ ਤਤਿਯਨਯੋਪਿ ਦਸ੍ਸਿਤੋ.

ਤਤ੍ਥ ਦੁਵਿਧਂ ਸਿਕ੍ਖਾਪਦਂ ਪਰਿਯਾਯਸਿਕ੍ਖਾਪਦਂ ਨਿਪ੍ਪਰਿਯਾਯਸਿਕ੍ਖਾਪਦਞ੍ਚ. ਤਤ੍ਥ ਵਿਰਤਿ ਨਿਪ੍ਪਰਿਯਾਯਸਿਕ੍ਖਾਪਦਂ. ਸਾ ਹਿ ‘‘ਪਾਣਾਤਿਪਾਤਾ ਵੇਰਮਣੀ’’ਤਿ ਪਾਲ਼ਿਯਂ ਆਗਤਾ, ਨੋ ਚੇਤਨਾ. ਵਿਰਮਨ੍ਤੋ ਚ ਤਾਯ ਏਵ ਤਤੋ ਤਤੋ ਵਿਰਮਤਿ, ਨ ਚੇਤਨਾਯ. ਚੇਤਨਂ ਪਨ ਆਹਰਿਤ੍ਵਾ ਦਸ੍ਸੇਸਿ. ਤਥਾ ਸੇਸਚੇਤਨਾਸਮ੍ਪਯੁਤ੍ਤਧਮ੍ਮੇ. ਵੀਤਿਕ੍ਕਮਕਾਲੇ ਹਿ ਵੇਰਚੇਤਨਾ ਦੁਸ੍ਸੀਲ੍ਯਂ ਨਾਮ. ਤਸ੍ਮਾ ਸਾ ਵਿਰਤਿਕਾਲੇਪਿ ਸੁਸੀਲ੍ਯਵਸੇਨ ਵੁਤ੍ਤਾ. ਫਸ੍ਸਾਦਯੋ ਤਂਸਮ੍ਪਯੁਤ੍ਤਤ੍ਤਾ ਗਹਿਤਾਤਿ.

ਇਦਾਨਿ ਏਤੇਸੁ ਸਿਕ੍ਖਾਪਦੇਸੁ ਞਾਣਸਮੁਤ੍ਤੇਜਨਤ੍ਥਂ ਇਮੇਸਂ ਪਾਣਾਤਿਪਾਤਾਦੀਨਂ ਧਮ੍ਮਤੋ, ਕੋਟ੍ਠਾਸਤੋ, ਆਰਮ੍ਮਣਤੋ, ਵੇਦਨਾਤੋ, ਮੂਲਤੋ, ਕਮ੍ਮਤੋ, ਸਾਵਜ੍ਜਤੋ, ਪਯੋਗਤੋ ਚ ਵਿਨਿਚ੍ਛਯੋ ਵੇਦਿਤਬ੍ਬੋ.

ਤਤ੍ਥ ‘ਧਮ੍ਮਤੋ’ਤਿ ਪਞ੍ਚਪੇਤੇ ਪਾਣਾਤਿਪਾਤਾਦਯੋ ਚੇਤਨਾਧਮ੍ਮਾਵ ਹੋਨ੍ਤਿ. ‘ਕੋਟ੍ਠਾਸਤੋ’ ਪਞ੍ਚਪਿ ਕਮ੍ਮਪਥਾ ਏਵ.

‘ਆਰਮ੍ਮਣਤੋ’ ਪਾਣਾਤਿਪਾਤੋ ਜੀਵਿਤਿਨ੍ਦ੍ਰਿਯਾਰਮ੍ਮਣੋ. ਅਦਿਨ੍ਨਾਦਾਨਂ ਸਤ੍ਤਾਰਮ੍ਮਣਂ ਵਾ ਸਙ੍ਖਾਰਾਰਮ੍ਮਣਂ ਵਾ. ਮਿਚ੍ਛਾਚਾਰੋ ਇਤ੍ਥਿਪੁਰਿਸਾਰਮ੍ਮਣੋ. ਮੁਸਾਵਾਦੋ ਸਤ੍ਤਾਰਮ੍ਮਣੋ ਵਾ ਸਙ੍ਖਾਰਾਰਮ੍ਮਣੋ ਵਾ. ਸੁਰਾਪਾਨਂ ਸਙ੍ਖਾਰਾਰਮ੍ਮਣਂ.

‘ਵੇਦਨਾਤੋ’ ਪਾਣਾਤਿਪਾਤੋ ਦੁਕ੍ਖਵੇਦਨੋ. ਅਦਿਨ੍ਨਾਦਾਨਂ ਤਿਵੇਦਨਂ. ਤਞ੍ਹਿ ਹਟ੍ਠਤੁਟ੍ਠਸ੍ਸ ਅਦਿਨ੍ਨਂ ਆਦਿਯਤੋ ਸੁਖਵੇਦਨਂ ਹੋਤਿ, ਭੀਤਕਾਲੇ ਦੁਕ੍ਖਵੇਦਨਂ, ਮਜ੍ਝਤ੍ਤਸ੍ਸ ਹੁਤ੍ਵਾ ਗਣ੍ਹਤੋ ਅਦੁਕ੍ਖਮਸੁਖਵੇਦਨਂ. ਮਿਚ੍ਛਾਚਾਰੋ ਸੁਖਵੇਦਨੋ ਵਾ ਅਦੁਕ੍ਖਮਸੁਖਵੇਦਨੋ ਵਾ. ਮੁਸਾਵਾਦੋ ਅਦਿਨ੍ਨਾਦਾਨਂ ਵਿਯ ਤਿਵੇਦਨੋ. ਸੁਰਾਪਾਨਂ ਸੁਖਮਜ੍ਝਤ੍ਤਵੇਦਨਂ.

‘ਮੂਲਤੋ’ ਪਾਣਾਤਿਪਾਤੋ ਦੋਸਮੋਹਮੂਲੋ. ਅਦਿਨ੍ਨਾਦਾਨਂ ਕਿਞ੍ਚਿਕਾਲੇ ਲੋਭਮੋਹਮੂਲਂ, ਕਿਞ੍ਚਿਕਾਲੇ ਦੋਸਮੋਹਮੂਲਂ. ਮਿਚ੍ਛਾਚਾਰੋ ਲੋਭਮੋਹਮੂਲੋ. ਮੁਸਾਵਾਦੋ ਕਿਞ੍ਚਿਕਾਲੇ ਲੋਭਮੋਹਮੂਲੋ, ਕਿਞ੍ਚਿਕਾਲੇ ਦੋਸਮੋਹਮੂਲੋ. ਸੁਰਾਪਾਨਂ ਲੋਭਮੋਹਮੂਲਂ.

‘ਕਮ੍ਮਤੋ’ ਮੁਸਾਵਾਦੋ ਚੇਤ੍ਥ ਵਚੀਕਮ੍ਮਂ. ਸੇਸਾ ਕਾਯਕਮ੍ਮਮੇਵ.

‘ਸਾਵਜ੍ਜਤੋ’ ਪਾਣਾਤਿਪਾਤੋ ਅਤ੍ਥਿ ਅਪ੍ਪਸਾਵਜ੍ਜੋ, ਅਤ੍ਥਿ ਮਹਾਸਾਵਜ੍ਜੋ. ਤਥਾ ਅਦਿਨ੍ਨਾਦਾਨਾਦੀਨਿ. ਤੇਸਂ ਨਾਨਾਕਰਣਂ ਹੇਟ੍ਠਾ ਦਸ੍ਸਿਤਮੇਵ.

ਅਯਂ ਪਨ ਅਪਰੋ ਨਯੋ – ਕੁਨ੍ਥਕਿਪਿਲ੍ਲਿਕਸ੍ਸ ਹਿ ਵਧੋ ਅਪ੍ਪਸਾਵਜ੍ਜੋ, ਤਤੋ ਮਹਨ੍ਤਤਰਸ੍ਸ ਮਹਾਸਾਵਜ੍ਜੋ; ਸੋਪਿ ਅਪ੍ਪਸਾਵਜ੍ਜੋ, ਤਤੋ ਮਹਨ੍ਤਤਰਾਯ ਸਕੁਣਿਕਾਯ ਮਹਾਸਾਵਜ੍ਜੋ; ਤਤੋ ਗੋਧਾਯ, ਤਤੋ ਸਸਕਸ੍ਸ, ਤਤੋ ਮਿਗਸ੍ਸ, ਤਤੋ ਗਵਯਸ੍ਸ, ਤਤੋ ਅਸ੍ਸਸ੍ਸ, ਤਤੋ ਹਤ੍ਥਿਸ੍ਸ ਵਧੋ ਮਹਾਸਾਵਜ੍ਜੋ, ਤਤੋਪਿ ਦੁਸ੍ਸੀਲਮਨੁਸ੍ਸਸ੍ਸ, ਤਤੋ ਗੋਰੂਪਸੀਲਕਮਨੁਸ੍ਸਸ੍ਸ, ਤਤੋ ਸਰਣਗਤਸ੍ਸ, ਤਤੋ ਪਞ੍ਚਸਿਕ੍ਖਾਪਦਿਕਸ੍ਸ, ਤਤੋ ਸਾਮਣੇਰਸ੍ਸ, ਤਤੋ ਪੁਥੁਜ੍ਜਨਭਿਕ੍ਖੁਨੋ, ਤਤੋ ਸੋਤਾਪਨ੍ਨਸ੍ਸ, ਤਤੋ ਸਕਦਾਗਾਮਿਸ੍ਸ, ਤਤੋ ਅਨਾਗਾਮਿਸ੍ਸ, ਤਤੋ ਖੀਣਾਸਵਸ੍ਸ ਵਧੋ ਅਤਿਮਹਾਸਾਵਜ੍ਜੋਯੇਵ.

ਅਦਿਨ੍ਨਾਦਾਨਂ ਦੁਸ੍ਸੀਲਸ੍ਸ ਸਨ੍ਤਕੇ ਅਪ੍ਪਸਾਵਜ੍ਜਂ, ਤਤੋ ਗੋਰੂਪਸੀਲਕਸ੍ਸ ਸਨ੍ਤਕੇ ਮਹਾਸਾਵਜ੍ਜਂ; ਤਤੋ ਸਰਣਗਤਸ੍ਸ, ਤਤੋ ਪਞ੍ਚਸਿਕ੍ਖਾਪਦਿਕਸ੍ਸ, ਤਤੋ ਸਾਮਣੇਰਸ੍ਸ, ਤਤੋ ਪੁਥੁਜ੍ਜਨਭਿਕ੍ਖੁਨੋ, ਤਤੋ ਸੋਤਾਪਨ੍ਨਸ੍ਸ, ਤਤੋ ਸਕਦਾਗਾਮਿਸ੍ਸ, ਤਤੋ ਅਨਾਗਾਮਿਸ੍ਸ ਸਨ੍ਤਕੇ ਮਹਾਸਾਵਜ੍ਜਂ, ਤਤੋ ਖੀਣਾਸਵਸ੍ਸ ਸਨ੍ਤਕੇ ਅਤਿਮਹਾਸਾਵਜ੍ਜਂਯੇਵ.

ਮਿਚ੍ਛਾਚਾਰੋ ਦੁਸ੍ਸੀਲਾਯ ਇਤ੍ਥਿਯਾ ਵੀਤਿਕ੍ਕਮੇ ਅਪ੍ਪਸਾਵਜ੍ਜੋ, ਤਤੋ ਗੋਰੂਪਸੀਲਕਾਯ ਮਹਾਸਾਵਜ੍ਜੋ; ਤਤੋ ਸਰਣਗਤਾਯ, ਪਞ੍ਚਸਿਕ੍ਖਾਪਦਿਕਾਯ, ਸਾਮਣੇਰਿਯਾ, ਪੁਥੁਜ੍ਜਨਭਿਕ੍ਖੁਨਿਯਾ, ਸੋਤਾਪਨ੍ਨਾਯ, ਸਕਦਾਗਾਮਿਨਿਯਾ, ਤਤੋ ਅਨਾਗਾਮਿਨਿਯਾ ਵੀਤਿਕ੍ਕਮੇ ਮਹਾਸਾਵਜ੍ਜੋ, ਖੀਣਾਸਵਾਯ ਪਨ ਭਿਕ੍ਖੁਨਿਯਾ ਏਕਨ੍ਤਮਹਾਸਾਵਜ੍ਜੋਵ.

ਮੁਸਾਵਾਦੋ ਕਾਕਣਿਕਮਤ੍ਤਸ੍ਸ ਅਤ੍ਥਾਯ ਮੁਸਾਕਥਨੇ ਅਪ੍ਪਸਾਵਜ੍ਜੋ, ਤਤੋ ਅਡ੍ਢਮਾਸਕਸ੍ਸ, ਮਾਸਕਸ੍ਸ, ਪਞ੍ਚਮਾਸਕਸ੍ਸ, ਅਡ੍ਢਕਹਾਪਣਸ੍ਸ, ਕਹਾਪਣਸ੍ਸ, ਤਤੋ ਅਨਗ੍ਘਨਿਯਭਣ੍ਡਸ੍ਸ ਅਤ੍ਥਾਯ ਮੁਸਾਕਥਨੇ ਮਹਾਸਾਵਜ੍ਜੋ, ਮੁਸਾ ਕਥੇਤ੍ਵਾ ਪਨ ਸਙ੍ਘਂ ਭਿਨ੍ਦਨ੍ਤਸ੍ਸ ਏਕਨ੍ਤਮਹਾਸਾਵਜ੍ਜੋਵ.

ਸੁਰਾਪਾਨਂ ਪਸਤਮਤ੍ਤਸ੍ਸ ਪਾਨੇ ਅਪ੍ਪਸਾਵਜ੍ਜਂ, ਅਞ੍ਜਲਿਮਤ੍ਤਸ੍ਸ ਪਾਨੇ ਮਹਾਸਾਵਜ੍ਜਂ; ਕਾਯਚਾਲਨਸਮਤ੍ਥਂ ਪਨ ਬਹੁਂ ਪਿਵਿਤ੍ਵਾ ਗਾਮਘਾਤਨਿਗਮਘਾਤਕਮ੍ਮਂ ਕਰੋਨ੍ਤਸ੍ਸ ਏਕਨ੍ਤਮਹਾਸਾਵਜ੍ਜਮੇਵ.

ਪਾਣਾਤਿਪਾਤਞ੍ਹਿ ਪਤ੍ਵਾ ਖੀਣਾਸਵਸ੍ਸ ਵਧੋ ਮਹਾਸਾਵਜ੍ਜੋ; ਅਦਿਨ੍ਨਾਦਾਨਂ ਪਤ੍ਵਾ ਖੀਣਾਸਵਸਨ੍ਤਕਸ੍ਸ ਹਰਣਂ, ਮਿਚ੍ਛਾਚਾਰਂ ਪਤ੍ਵਾ ਖੀਣਾਸਵਾਯ ਭਿਕ੍ਖੁਨਿਯਾ ਵੀਤਿਕ੍ਕਮਨਂ, ਮੁਸਾਵਾਦਂ ਪਤ੍ਵਾ ਮੁਸਾਵਾਦੇਨ ਸਙ੍ਘਭੇਦੋ, ਸੁਰਾਪਾਨਂ ਪਤ੍ਵਾ ਕਾਯਚਾਲਨਸਮਤ੍ਥਂ ਬਹੁਂ ਪਿਵਿਤ੍ਵਾ ਗਾਮਨਿਗਮਘਾਤਨਂ ਮਹਾਸਾਵਜ੍ਜਂ. ਸਬ੍ਬੇਹਿਪਿ ਪਨੇਤੇਹਿ ਮੁਸਾਵਾਦੇਨ ਸਙ੍ਘਭੇਦਨਮੇਵ ਮਹਾਸਾਵਜ੍ਜਂ. ਤਞ੍ਹਿ ਕਪ੍ਪਂ ਨਿਰਯੇ ਪਾਚਨਸਮਤ੍ਥਂ ਮਹਾਕਿਬ੍ਬਿਸਂ.

‘ਪਯੋਗਤੋ’ਤਿ ਪਾਣਾਤਿਪਾਤੋ ਸਾਹਤ੍ਥਿਕੋਪਿ ਹੋਤਿ ਆਣਤ੍ਤਿਕੋਪਿ. ਤਥਾ ਅਦਿਨ੍ਨਾਦਾਨਂ. ਮਿਚ੍ਛਾਚਾਰਮੁਸਾਵਾਦਸੁਰਾਪਾਨਾਨਿ ਸਾਹਤ੍ਥਿਕਾਨੇਵਾਤਿ.

ਏਵਮੇਤ੍ਥ ਪਾਣਾਤਿਪਾਤਾਦੀਨਂ ਧਮ੍ਮਾਦਿਵਸੇਨ ਵਿਨਿਚ੍ਛਯਂ ਞਤ੍ਵਾ ਪਾਣਾਤਿਪਾਤਾ ਵੇਰਮਣੀਤਿਆਦੀਨਮ੍ਪਿ ਧਮ੍ਮਤੋ, ਕੋਟ੍ਠਾਸਤੋ, ਆਰਮ੍ਮਣਤੋ, ਵੇਦਨਾਤੋ, ਮੂਲਤੋ, ਕਮ੍ਮਤੋ, ਖਣ੍ਡਤੋ, ਸਮਾਦਾਨਤੋ, ਪਯੋਗਤੋ ਚ ਵਿਨਿਚ੍ਛਯੋ ਵੇਦਿਤਬ੍ਬੋ.

ਤਤ੍ਥ ‘ਧਮ੍ਮਤੋ’ਤਿ ਪਰਿਯਾਯਸੀਲਵਸੇਨ ਪਟਿਪਾਟਿਯਾ ਪਞ੍ਚ ਚੇਤਨਾਧਮ੍ਮਾਵ. ‘ਕੋਟ੍ਠਾਸਤੋ’ਤਿ ਪਞ੍ਚਪਿ ਕਮ੍ਮਪਥਾ ਏਵ. ‘ਆਰਮ੍ਮਣਤੋ’ਤਿ ਪਾਣਾਤਿਪਾਤਾ ਵੇਰਮਣੀ ਪਰਸ੍ਸ ਜੀਵਿਤਿਨ੍ਦ੍ਰਿਯਂ ਆਰਮ੍ਮਣਂ ਕਤ੍ਵਾ ਅਤ੍ਤਨੋ ਵੇਰਚੇਤਨਾਯ ਵਿਰਮਤਿ. ਇਤਰਾਸੁਪਿ ਏਸੇਵ ਨਯੋ. ਸਬ੍ਬਾਪਿ ਹਿ ਏਤਾ ਵੀਤਿਕ੍ਕਮਿਤਬ੍ਬਵਤ੍ਥੁਂ ਆਰਮ੍ਮਣਂ ਕਤ੍ਵਾ ਵੇਰਚੇਤਨਾਹਿਯੇਵ ਵਿਰਮਨ੍ਤਿ. ‘ਵੇਦਨਾਤੋ’ਤਿ ਸਬ੍ਬਾਪਿ ਸੁਖਵੇਦਨਾ ਵਾ ਹੋਨ੍ਤਿ ਮਜ੍ਝਤ੍ਤਵੇਦਨਾ ਵਾ. ‘ਮੂਲਤੋ’ਤਿ ਞਾਣਸਮ੍ਪਯੁਤ੍ਤਚਿਤ੍ਤੇਨ ਵਿਰਮਨ੍ਤਸ੍ਸ ਅਲੋਭਅਦੋਸਅਮੋਹਮੂਲਾ ਹੋਨ੍ਤਿ, ਞਾਣਵਿਪ੍ਪਯੁਤ੍ਤਚਿਤ੍ਤੇਨ ਵਿਰਮਨ੍ਤਸ੍ਸ ਅਲੋਭਅਦੋਸਮੂਲਾ ਹੋਨ੍ਤਿ. ‘ਕਮ੍ਮਤੋ’ਤਿ ਮੁਸਾਵਾਦਾ ਵੇਰਮਣੀਯੇਵੇਤ੍ਥ ਵਚੀਕਮ੍ਮਂ; ਸੇਸਾ ਕਾਯਕਮ੍ਮਂ. ‘ਖਣ੍ਡਤੋ’ਤਿ ਗਹਟ੍ਠਾ ਯਂ ਯਂ ਵੀਤਿਕ੍ਕਮਨ੍ਤਿ, ਤਂ ਤਦੇਵ ਖਣ੍ਡਂ ਹੋਤਿ ਭਿਜ੍ਜਤਿ, ਅਵਸੇਸਂ ਨ ਭਿਜ੍ਜਤਿ. ਕਸ੍ਮਾ? ਗਹਟ੍ਠਾ ਹਿ ਅਨਿਬਦ੍ਧਸੀਲਾ ਹੋਨ੍ਤਿ, ਯਂ ਯਂ ਸਕ੍ਕੋਨ੍ਤਿ ਤਂ ਤਦੇਵ ਗੋਪੇਨ੍ਤਿ. ਸਾਮਣੇਰਾਨਂ ਪਨ ਏਕਸ੍ਮਿਂ ਵੀਤਿਕ੍ਕਮਨ੍ਤੇ ਸਬ੍ਬਾਨਿ ਭਿਜ੍ਜਨ੍ਤਿ. ਨ ਕੇਵਲਞ੍ਚ ਏਤਾਨਿ, ਸੇਸਸੀਲਾਨਿਪਿ ਭਿਜ੍ਜਨ੍ਤਿਯੇਵ. ਤੇਸਂ ਪਨ ਵੀਤਿਕ੍ਕਮੋ ਦਣ੍ਡਕਮ੍ਮਵਤ੍ਥੁਕੋ. ‘ਪੁਨ ਏਵਰੂਪਂ ਨ ਕਰਿਸ੍ਸਾਮੀ’ਤਿ ਦਣ੍ਡਕਮ੍ਮੇ ਕਤੇ ਸੀਲਂ ਪਰਿਪੁਣ੍ਣਂ ਹੋਤਿ. ‘ਸਮਾਦਾਨਤੋ’ਤਿ ਸਯਮੇਵ ‘ਪਞ੍ਚ ਸੀਲਾਨਿ ਅਧਿਟ੍ਠਹਾਮੀ’ਤਿ ਅਧਿਟ੍ਠਹਨ੍ਤੇਨਪਿ, ਪਾਟਿਯੇਕ੍ਕਂ ਪਾਟਿਯੇਕ੍ਕਂ ਸਮਾਦਿਯਨ੍ਤੇਨਪਿ ਸਮਾਦਿਣ੍ਣਾਨਿ ਹੋਨ੍ਤਿ. ਅਞ੍ਞਸ੍ਸ ਸਨ੍ਤਿਕੇ ਨਿਸੀਦਿਤ੍ਵਾ ‘ਪਞ੍ਚ ਸੀਲਾਨਿ ਸਮਾਦਿਯਾਮੀ’ਤਿ ਸਮਾਦਿਯਨ੍ਤੇਨਪਿ, ਪਾਟਿਯੇਕ੍ਕਂ ਪਾਟਿਯੇਕ੍ਕਂ ਸਮਾਦਿਯਨ੍ਤੇਨਪਿ ਸਮਾਦਿਨ੍ਨਾਨੇਵ ਹੋਨ੍ਤਿ. ‘ਪਯੋਗਤੋ’ ਸਬ੍ਬਾਨਿਪਿ ਸਾਹਤ੍ਥਿਕਪਯੋਗਾਨੇਵਾਤਿ ਵੇਦਿਤਬ੍ਬਾਨਿ.

੭੧੨. ਇਦਾਨਿ ਯਾਸਂ ਸਿਕ੍ਖਾਨਂ ਕੋਟ੍ਠਾਸਭਾਵੇਨ ਇਮਾਨਿ ਪਞ੍ਚ ਸਿਕ੍ਖਾਪਦਾਨਿ ਵੁਤ੍ਤਾਨਿ, ਤਾਨਿ ਦਸ੍ਸੇਤੁਂ ਕਤਮੇ ਧਮ੍ਮਾ ਸਿਕ੍ਖਾਤਿ ਅਯਂ ਸਿਕ੍ਖਾਵਾਰੋ ਆਰਦ੍ਧੋ. ਤਤ੍ਥ ਯਸ੍ਮਾ ਸਬ੍ਬੇਪਿ ਚਤੁਭੂਮਕਕੁਸਲਾ ਧਮ੍ਮਾ ਸਿਕ੍ਖਿਤਬ੍ਬਭਾਵਤੋ ਸਿਕ੍ਖਾ, ਤਸ੍ਮਾ ਤੇ ਦਸ੍ਸੇਤੁਂ ਯਸ੍ਮਿਂ ਸਮਯੇ ਕਾਮਾਵਚਰਨ੍ਤਿਆਦਿ ਵੁਤ੍ਤਂ. ਤਤ੍ਥ ਹੇਟ੍ਠਾ ਚਿਤ੍ਤੁਪ੍ਪਾਦਕਣ੍ਡੇ (ਧ. ਸ. ੧) ਵੁਤ੍ਤਨਯੇਨੇਵ ਪਾਲ਼ਿਂ ਵਿਤ੍ਥਾਰੇਤ੍ਵਾ ਅਤ੍ਥੋ ਵੇਦਿਤਬ੍ਬੋ. ਇਧ ਪਨ ਮੁਖਮਤ੍ਤਮੇਵ ਦਸ੍ਸਿਤਨ੍ਤਿ.

ਅਭਿਧਮ੍ਮਭਾਜਨੀਯਵਣ੍ਣਨਾ.

੩. ਪਞ੍ਹਾਪੁਚ੍ਛਕਵਣ੍ਣਨਾ

੭੧੪. ਪਞ੍ਹਾਪੁਚ੍ਛਕੇ ਪਾਲ਼ਿਅਨੁਸਾਰੇਨੇਵ ਸਿਕ੍ਖਾਪਦਾਨਂ ਕੁਸਲਾਦਿਭਾਵੋ ਵੇਦਿਤਬ੍ਬੋ. ਆਰਮ੍ਮਣਤ੍ਤਿਕੇਸੁ ਪਨ ਯਾਨਿ ਸਿਕ੍ਖਾਪਦਾਨਿ ਏਤ੍ਥ ਸਤ੍ਤਾਰਮ੍ਮਣਾਨੀਤਿ ਵੁਤ੍ਤਾਨਿ, ਤਾਨਿ ਯਸ੍ਮਾ ਸਤ੍ਤੋਤਿ ਸਙ੍ਖਂ ਗਤੇ ਸਙ੍ਖਾਰੇਯੇਵ ਆਰਮ੍ਮਣਂ ਕਰੋਨ੍ਤਿ, ਯਸ੍ਮਾ ਚ ਸਬ੍ਬਾਨਿਪਿ ਏਤਾਨਿ ਸਮ੍ਪਤ੍ਤਵਿਰਤਿਵਸੇਨੇਵ ਨਿਦ੍ਦਿਟ੍ਠਾਨਿ, ਤਸ੍ਮਾ ‘‘ਪਰਿਤ੍ਤਾਰਮ੍ਮਣਾ’’ਤਿ ਚ ‘‘ਪਚ੍ਚੁਪ੍ਪਨ੍ਨਾਰਮ੍ਮਣਾ’’ਤਿ ਚ ਵੁਤ੍ਤਂ. ਯਤੋ ਪਨ ਵਿਰਮਤਿ ਤਸ੍ਸ ਵਤ੍ਥੁਨੋ ਅਚ੍ਚਨ੍ਤਬਹਿਦ੍ਧਤ੍ਤਾ ਸਬ੍ਬੇਸਮ੍ਪਿ ਬਹਿਦ੍ਧਾਰਮ੍ਮਣਤਾ ਵੇਦਿਤਬ੍ਬਾਤਿ.

ਇਮਸ੍ਮਿਂ ਪਨ ਸਿਕ੍ਖਾਪਦਵਿਭਙ੍ਗੇ ਸਮ੍ਮਾਸਮ੍ਬੁਦ੍ਧੇਨ ਅਭਿਧਮ੍ਮਭਾਜਨੀਯੇਪਿ ਪਞ੍ਹਾਪੁਚ੍ਛਕੇਪਿ ਲੋਕਿਯਾਨੇਵ ਸਿਕ੍ਖਾਪਦਾਨਿ ਕਥਿਤਾਨਿ. ਉਭੋਪਿ ਹਿ ਏਤੇ ਨਯਾ ਲੋਕਿਯਤ੍ਤਾ ਏਕਪਰਿਚ੍ਛੇਦਾ ਏਵ. ਏਵਮਯਂ ਸਿਕ੍ਖਾਪਦਵਿਭਙ੍ਗੋ ਦ੍ਵੇਪਰਿਵਟ੍ਟਂ ਨੀਹਰਿਤ੍ਵਾਵ ਭਾਜੇਤ੍ਵਾ ਦਸ੍ਸਿਤੋਤਿ.

ਸਮ੍ਮੋਹਵਿਨੋਦਨਿਯਾ ਵਿਭਙ੍ਗਟ੍ਠਕਥਾਯ

ਸਿਕ੍ਖਾਪਦਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.