੧. ਸੁਤ੍ਤਨ੍ਤਭਾਜਨੀਯਵਣ੍ਣਨਾ

੬੪੨. ਇਦਾਨਿ ਤਦਨਨ੍ਤਰੇ ਅਪ੍ਪਮਞ੍ਞਾਵਿਭਙ੍ਗੇ ਚਤਸ੍ਸੋਤਿ ਗਣਨਪਰਿਚ੍ਛੇਦੋ. ਅਪ੍ਪਮਞ੍ਞਾਯੋਤਿ ਫਰਣਅਪ੍ਪਮਾਣਵਸੇਨ ਅਪ੍ਪਮਞ੍ਞਾਯੋ. ਏਤਾ ਹਿ ਆਰਮ੍ਮਣਵਸੇਨ ਅਪ੍ਪਮਾਣੇ ਵਾ ਸਤ੍ਤੇ ਫਰਨ੍ਤਿ, ਏਕਸਤ੍ਤਮ੍ਪਿ ਵਾ ਅਨਵਸੇਸਫਰਣਵਸੇਨ ਫਰਨ੍ਤੀਤਿ ਫਰਣਅਪ੍ਪਮਾਣਵਸੇਨ ਅਪ੍ਪਮਞ੍ਞਾਯੋਤਿ ਵੁਚ੍ਚਨ੍ਤਿ. ਇਧ ਭਿਕ੍ਖੂਤਿ ਇਮਸ੍ਮਿਂ ਸਾਸਨੇ ਭਿਕ੍ਖੁ. ਮੇਤ੍ਤਾਸਹਗਤੇਨਾਤਿ ਮੇਤ੍ਤਾਯ ਸਮਨ੍ਨਾਗਤੇਨ. ਚੇਤਸਾਤਿ ਚਿਤ੍ਤੇਨ. ਏਕਂ ਦਿਸਨ੍ਤਿ ਏਕਿਸ੍ਸਾ ਦਿਸਾਯ. ਪਠਮਪਰਿਗ੍ਗਹਿਤਂ ਸਤ੍ਤਂ ਉਪਾਦਾਯ ਏਕਦਿਸਾਪਰਿਯਾਪਨ੍ਨਸਤ੍ਤਫਰਣਵਸੇਨ ਵੁਤ੍ਤਂ. ਫਰਿਤ੍ਵਾਤਿ ਫੁਸਿਤ੍ਵਾ ਆਰਮ੍ਮਣਂ ਕਤ੍ਵਾ. ਵਿਹਰਤੀਤਿ ਬ੍ਰਹ੍ਮਵਿਹਾਰਾਧਿਟ੍ਠਿਤਂ ਇਰਿਯਾਪਥਵਿਹਾਰਂ ਪਵਤ੍ਤੇਤਿ. ਤਥਾ ਦੁਤਿਯਨ੍ਤਿ ਯਥਾ ਪੁਰਤ੍ਥਿਮਾਦੀਸੁ ਦਿਸਾਸੁ ਯਂ ਕਿਞ੍ਚਿ ਏਕਂ ਦਿਸਂ ਫਰਿਤ੍ਵਾ ਵਿਹਰਤਿ, ਤਥੇਵ ਤਦਨਨ੍ਤਰਂ ਦੁਤਿਯਂ ਤਤਿਯਂ ਚਤੁਤ੍ਥਞ੍ਚਾਤਿ ਅਤ੍ਥੋ.

ਇਤਿ ਉਦ੍ਧਨ੍ਤਿ ਤੇਨੇਵ ਚ ਨਯੇਨ ਉਪਰਿਮਂ ਦਿਸਨ੍ਤਿ ਵੁਤ੍ਤਂ ਹੋਤਿ. ਅਧੋ ਤਿਰਿਯਨ੍ਤਿ ਅਧੋਦਿਸਮ੍ਪਿ ਤਿਰਿਯਂਦਿਸਮ੍ਪਿ ਏਵਮੇਵ. ਏਤ੍ਥ ਚ ਅਧੋਤਿ ਹੇਟ੍ਠਾ, ਤਿਰਿਯਨ੍ਤਿ ਅਨੁਦਿਸਾ. ਏਵਂ ਸਬ੍ਬਦਿਸਾਸੁ ਅਸ੍ਸਮਣ੍ਡਲੇ ਅਸ੍ਸਮਿਵ ਮੇਤ੍ਤਾਸਹਗਤਂ ਚਿਤ੍ਤਂ ਸਾਰੇਤਿਪਿ ਪਚ੍ਚਾਸਾਰੇਤਿਪੀਤਿ ਏਤ੍ਤਾਵਤਾ ਏਕਮੇਕਂ ਦਿਸਂ ਪਰਿਗ੍ਗਹੇਤ੍ਵਾ ਓਧਿਸੋ ਮੇਤ੍ਤਾਫਰਣਂ ਦਸ੍ਸਿਤਂ. ਸਬ੍ਬਧੀਤਿਆਦਿ ਪਨ ਅਨੋਧਿਸੋ ਦਸ੍ਸਨਤ੍ਥਂ ਵੁਤ੍ਤਂ. ਤਤ੍ਥ ਸਬ੍ਬਧੀਤਿ ਸਬ੍ਬਤ੍ਥ. ਸਬ੍ਬਤ੍ਤਤਾਯਾਤਿ ਸਬ੍ਬੇਸੁ ਹੀਨਮਜ੍ਝਿਮੁਕ੍ਕਟ੍ਠਮਿਤ੍ਤਸਪਤ੍ਤਮਜ੍ਝਤ੍ਤਾਦਿਪ੍ਪਭੇਦੇਸੁ ਅਤ੍ਤਤਾਯ ‘ਅਯਂ ਪਰਸਤ੍ਤੋ’ਤਿ ਵਿਭਾਗਂ ਅਕਤ੍ਵਾ ਅਤ੍ਤਸਮਤਾਯਾਤਿ ਵੁਤ੍ਤਂ ਹੋਤਿ; ਅਥ ਵਾ ਸਬ੍ਬਤ੍ਤਤਾਯਾਤਿ ਸਬ੍ਬੇਨ ਚਿਤ੍ਤਭਾਵੇਨ ਈਸਕਮ੍ਪਿ ਬਹਿ ਅਵਿਕ੍ਖਿਪਮਾਨੋਤਿ ਵੁਤ੍ਤਂ ਹੋਤਿ. ਸਬ੍ਬਾਵਨ੍ਤਨ੍ਤਿ ਸਬ੍ਬਸਤ੍ਤਵਨ੍ਤਂ, ਸਬ੍ਬਸਤ੍ਤਯੁਤ੍ਤਨ੍ਤਿ ਅਤ੍ਥੋ. ਲੋਕਨ੍ਤਿ ਸਤ੍ਤਲੋਕਂ.

ਵਿਪੁਲੇਨਾਤਿਏਵਮਾਦਿਪਰਿਯਾਯਦਸ੍ਸਨਤੋ ਪਨੇਤ੍ਥ ਪੁਨ ‘‘ਮੇਤ੍ਤਾਸਹਗਤੇਨਾ’’ਤਿ ਵੁਤ੍ਤਂ. ਯਸ੍ਮਾ ਵਾ ਏਤ੍ਥ ਓਧਿਸੋ ਫਰਣੇ ਵਿਯ ਪੁਨ ‘ਤਥਾ’ਸਦ੍ਦੋ ‘ਇਤਿ’ਸਦ੍ਦੋ ਵਾ ਨ ਵੁਤ੍ਤੋ, ਤਸ੍ਮਾ ਪੁਨ ‘‘ਮੇਤ੍ਤਾਸਹਗਤੇਨ ਚੇਤਸਾ’’ਤਿ ਵੁਤ੍ਤਂ; ਨਿਗਮਨਵਸੇਨ ਵਾ ਏਤਂ ਵੁਤ੍ਤਂ. ਵਿਪੁਲੇਨਾਤਿ ਏਤ੍ਥ ਚ ਫਰਣਵਸੇਨ ਵਿਪੁਲਤਾ ਦਟ੍ਠਬ੍ਬਾ. ਭੂਮਿਵਸੇਨ ਪਨ ਤਂ ਮਹਗ੍ਗਤਂ, ਪਗੁਣਵਸੇਨ ਅਪ੍ਪਮਾਣਂ, ਸਤ੍ਤਾਰਮ੍ਮਣਵਸੇਨ ਚ ਅਪ੍ਪਮਾਣਂ, ਬ੍ਯਾਪਾਦਪਚ੍ਚਤ੍ਥਿਕਪ੍ਪਹਾਨੇਨ ਅਵੇਰਂ, ਦੋਮਨਸ੍ਸਪ੍ਪਹਾਨਤੋ ਅਬ੍ਯਾਪਜ੍ਝਂ, ਨਿਦ੍ਦੁਕ੍ਖਨ੍ਤਿ ਵੁਤ੍ਤਂ ਹੋਤਿ. ਅਯਂ ਤਾਵ ‘‘ਮੇਤ੍ਤਾਸਹਗਤੇਨ ਚੇਤਸਾ’’ਤਿਆਦਿਨਾ ਨਯੇਨ ਠਪਿਤਾਯ ਮਾਤਿਕਾਯ ਅਤ੍ਥੋ.

੬੪੩. ਇਦਾਨਿ ਯਦੇਤਂ ‘‘ਕਥਞ੍ਚ, ਭਿਕ੍ਖਵੇ, ਮੇਤ੍ਤਾਸਹਗਤੇਨ ਚੇਤਸਾ’’ਤਿਆਦਿਨਾ ਨਯੇਨ ਵੁਤ੍ਤਂ ਪਦਭਾਜਨੀਯਂ, ਤਤ੍ਥ ਯਸ੍ਮਾ ਇਦਂ ਕਮ੍ਮਟ੍ਠਾਨਂ ਦੋਸਚਰਿਤਸ੍ਸ ਸਪ੍ਪਾਯਂ, ਤਸ੍ਮਾ ਯਥਾਰੂਪੇ ਪੁਗ੍ਗਲੇ ਅਯਂ ਮੇਤ੍ਤਾ ਅਪ੍ਪਨਂ ਪਾਪੁਣਾਤਿ, ਤਂ ਮੇਤ੍ਤਾਯ ਵਤ੍ਥੁਭੂਤਂ ਪੁਗ੍ਗਲਂ ਤਾਵ ਦਸ੍ਸੇਤੁਂ ਸੇਯ੍ਯਥਾਪਿ ਨਾਮ ਏਕਂ ਪੁਗ੍ਗਲਨ੍ਤਿਆਦਿ ਵੁਤ੍ਤਂ. ਤਤ੍ਥ ਸੇਯ੍ਯਥਾਪਿ ਨਾਮਾਤਿ ਓਪਮ੍ਮਤ੍ਥੇ ਨਿਪਾਤੋ, ਯਥਾ ਏਕਂ ਪੁਗ੍ਗਲਨ੍ਤਿ ਅਤ੍ਥੋ. ਪਿਯਨ੍ਤਿ ਪੇਮਨੀਯਂ. ਮਨਾਪਨ੍ਤਿ ਹਦਯਵੁਡ੍ਢਿਕਰਂ. ਤਤ੍ਥ ਪੁਬ੍ਬੇਵ ਸਨ੍ਨਿਵਾਸੇਨ ਪਚ੍ਚੁਪ੍ਪਨ੍ਨਹਿਤੇਨ ਵਾ ਪਿਯੋ ਨਾਮ ਹੋਤਿ, ਸੀਲਾਦਿਗੁਣਸਮਾਯੋਗੇਨ ਮਨਾਪੋ ਨਾਮ; ਦਾਨਸਮਾਨਤ੍ਤਤਾਹਿ ਵਾ ਪਿਯਤਾ, ਪਿਯਵਚਨਅਤ੍ਥਚਰਿਯਤਾਹਿ ਮਨਾਪਤਾ ਵੇਦਿਤਬ੍ਬਾ. ਯਸ੍ਮਾ ਚੇਤ੍ਥ ਪਿਯਤਾਯ ਇਮਸ੍ਸ ਬ੍ਯਾਪਾਦਸ੍ਸ ਪਹਾਨਂ ਹੋਤਿ, ਤਤੋ ਮੇਤ੍ਤਾ ਸੁਖਂ ਫਰਤਿ, ਮਨਾਪਤਾਯ ਉਦਾਸੀਨਤਾ ਨ ਸਣ੍ਠਾਤਿ, ਹਿਰੋਤ੍ਤਪ੍ਪਞ੍ਚ ਪਚ੍ਚੁਪਟ੍ਠਾਤਿ, ਤਤੋ ਹਿਰੋਤ੍ਤਪ੍ਪਾਨੁਪਾਲਿਤਾ ਮੇਤ੍ਤਾ ਨ ਪਰਿਹਾਯਤਿ, ਤਸ੍ਮਾ ਤਂ ਉਪਮਂ ਕਤ੍ਵਾ ਇਦਂ ਵੁਤ੍ਤਂ – ਪਿਯਂ ਮਨਾਪਨ੍ਤਿ. ਮੇਤ੍ਤਾਯੇਯ੍ਯਾਤਿ ਮੇਤ੍ਤਾਯ ਫਰੇਯ੍ਯ; ਤਸ੍ਮਿਂ ਪੁਗ੍ਗਲੇ ਮੇਤ੍ਤਂ ਕਰੇਯ੍ਯ ਪਵਤ੍ਤੇਯ੍ਯਾਤਿ ਅਤ੍ਥੋ. ਏਵਮੇਵ ਸਬ੍ਬੇ ਸਤ੍ਤੇਤਿ ਯਥਾ ਪਿਯਂ ਪੁਗ੍ਗਲਂ ਮੇਤ੍ਤਾਯੇਯ੍ਯ, ਏਵਂ ਤਸ੍ਮਿਂ ਪੁਗ੍ਗਲੇ ਅਪ੍ਪਨਾਪ੍ਪਤ੍ਤਾਯ ਵਸੀਭਾਵਂ ਉਪਗਤਾਯ ਮੇਤ੍ਤਾਯ ਮਜ੍ਝਤ੍ਤਵੇਰਿਸਙ੍ਖਾਤੇਪਿ ਸਬ੍ਬੇ ਸਤ੍ਤੇ ਅਨੁਕ੍ਕਮੇਨ ਫਰਤੀਤਿ ਅਤ੍ਥੋ. ਮੇਤ੍ਤਿ ਮੇਤ੍ਤਾਯਨਾਤਿਆਦੀਨਿ ਵੁਤ੍ਤਤ੍ਥਾਨੇਵ.

੬੪੪. ਵਿਦਿਸਂ ਵਾਤਿ ਪਦਂ ਤਿਰਿਯਂ ਵਾਤਿ ਏਤਸ੍ਸ ਅਤ੍ਥਵਿਭਾਵਨਤ੍ਥਂ ਵੁਤ੍ਤਂ.

੬੪੫. ਫਰਿਤ੍ਵਾਤਿ ਆਰਮ੍ਮਣਕਰਣਵਸੇਨ ਫੁਸਿਤ੍ਵਾ. ਅਧਿਮੁਞ੍ਚਿਤ੍ਵਾਤਿ ਅਧਿਕਭਾਵੇਨ ਮੁਞ੍ਚਿਤ੍ਵਾ, ਯਥਾ ਮੁਤ੍ਤਂ ਸੁਮੁਤ੍ਤਂ ਹੋਤਿ ਸੁਪ੍ਪਸਾਰਿਤਂ ਸੁਵਿਤ੍ਥਤਂ ਤਥਾ ਮੁਞ੍ਚਿਤ੍ਵਾਤਿ ਅਤ੍ਥੋ.

੬੪੮. ਸਬ੍ਬਧਿਆਦਿਨਿਦ੍ਦੇਸੇ ਯਸ੍ਮਾ ਤੀਣਿਪਿ ਏਤਾਨਿ ਪਦਾਨਿ ਸਬ੍ਬਸਙ੍ਗਾਹਿਕਾਨਿ, ਤਸ੍ਮਾ ਨੇਸਂ ਏਕਤੋਵ ਅਤ੍ਥਂ ਦਸ੍ਸੇਤੁਂ ਸਬ੍ਬੇਨ ਸਬ੍ਬਨ੍ਤਿਆਦਿ ਵੁਤ੍ਤਂ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤੋਯੇਵ.

੬੫੦. ਵਿਪੁਲਾਦਿਨਿਦ੍ਦੇਸੇ ਯਸ੍ਮਾ ਯਂ ਅਪ੍ਪਨਾਪ੍ਪਤ੍ਤਂ ਹੁਤ੍ਵਾ ਅਨਨ੍ਤਸਤ੍ਤਫਰਣਵਸੇਨ ਵਿਪੁਲਂ, ਤਂ ਨਿਯਮਤੋ ਭੂਮਿਵਸੇਨ ਮਹਗ੍ਗਤਂ ਹੋਤਿ. ਯਞ੍ਚ ਮਹਗ੍ਗਤਂ ਤਂ ਅਪ੍ਪਮਾਣਗੋਚਰਵਸੇਨ ਅਪ੍ਪਮਾਣਂ. ਯਂ ਅਪ੍ਪਮਾਣਂ ਤਂ ਪਚ੍ਚਤ੍ਥਿਕਵਿਘਾਤਵਸੇਨ ਅਵੇਰਂ. ਯਞ੍ਚ ਅਵੇਰਂ ਤਂ ਵਿਹਤਬ੍ਯਾਪਜ੍ਜਤਾਯ ਅਬ੍ਯਾਪਜ੍ਜਂ. ਤਸ੍ਮਾ ‘‘ਯਂ ਵਿਪੁਲਂ ਤਂ ਮਹਗ੍ਗਤ’’ਨ੍ਤਿਆਦਿ ਵੁਤ੍ਤਂ. ਅਵੇਰੋ ਅਬ੍ਯਾਪਜ੍ਜੋਤਿ ਚੇਤ੍ਥ ਲਿਙ੍ਗਵਿਪਰਿਯਾਯੇਨ ਵੁਤ੍ਤਂ. ਮਨੇਨ ਵਾ ਸਦ੍ਧਿਂ ਯੋਜਨਾ ਕਾਤਬ੍ਬਾ – ਯਂ ਅਪ੍ਪਮਾਣਂ ਚਿਤ੍ਤਂ, ਸੋ ਅਵੇਰੋ ਮਨੋ; ਯੋ ਅਵੇਰੋ ਸੋ ਅਬ੍ਯਾਪਜ੍ਜੋਤਿ. ਅਪਿਚੇਤ੍ਥ ਹੇਟ੍ਠਿਮਂ ਹੇਟ੍ਠਿਮਂ ਪਦਂ ਉਪਰਿਮਸ੍ਸ ਉਪਰਿਮਸ੍ਸ, ਉਪਰਿਮਂ ਵਾ ਉਪਰਿਮਂ ਹੇਟ੍ਠਿਮਸ੍ਸ ਹੇਟ੍ਠਿਮਸ੍ਸ ਅਤ੍ਥੋਤਿਪਿ ਵੇਦਿਤਬ੍ਬੋ.

੬੫੩. ਸੇਯ੍ਯਥਾਪਿ ਨਾਮ ਏਕਂ ਪੁਗ੍ਗਲਂ ਦੁਗ੍ਗਤਂ ਦੁਰੁਪੇਤਨ੍ਤਿ ਇਦਮ੍ਪਿ ਕਰੁਣਾਯ ਵਤ੍ਥੁਭੂਤਂ ਪੁਗ੍ਗਲਂ ਦਸ੍ਸੇਤੁਂ ਵੁਤ੍ਤਂ. ਏਵਰੂਪਸ੍ਮਿਞ੍ਹਿ ਪੁਗ੍ਗਲੇ ਬਲਵਕਾਰੁਞ੍ਞਂ ਉਪ੍ਪਜ੍ਜਤਿ. ਤਤ੍ਥ ਦੁਗ੍ਗਤਨ੍ਤਿ ਦੁਕ੍ਖੇਨ ਸਮਙ੍ਗੀਭਾਵਂ ਗਤਂ. ਦੁਰੁਪੇਤਨ੍ਤਿ ਕਾਯਦੁਚ੍ਚਰਿਤਾਦੀਹਿ ਉਪੇਤਂ. ਗਤਿਕੁਲਭੋਗਾਦਿਵਸੇਨ ਵਾ ਤਮਭਾਵੇ ਠਿਤੋ ਪੁਗ੍ਗਲੋ ਦੁਗ੍ਗਤੋ, ਕਾਯਦੁਚ੍ਚਰਿਤਾਦੀਹਿ ਉਪੇਤਤ੍ਤਾ ਤਮਪਰਾਯਣਭਾਵੇ ਠਿਤੋ ਦੁਰੁਪੇਤੋਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ.

੬੬੩. ਏਕਂ ਪੁਗ੍ਗਲਂ ਪਿਯਂ ਮਨਾਪਨ੍ਤਿ ਇਦਮ੍ਪਿ ਮੁਦਿਤਾਯ ਵਤ੍ਥੁਭੂਤਂ ਪੁਗ੍ਗਲਂ ਦਸ੍ਸੇਤੁਂ ਵੁਤ੍ਤਂ. ਤਤ੍ਥ ਗਤਿਕੁਲਭੋਗਾਦਿਵਸੇਨ ਜੋਤਿਭਾਵੇ ਠਿਤੋ ਪਿਯੋ, ਕਾਯਸੁਚਰਿਤਾਦੀਹਿ ਉਪੇਤਤ੍ਤਾ ਜੋਤਿਪਰਾਯਣਭਾਵੇ ਠਿਤੋ ਮਨਾਪੋਤਿ ਵੇਦਿਤਬ੍ਬੋ.

੬੭੩. ਨੇਵ ਮਨਾਪਂ ਨ ਅਮਨਾਪਨ੍ਤਿ ਇਦਮ੍ਪਿ ਉਪੇਕ੍ਖਾਯ ਵਤ੍ਥੁਭੂਤਂ ਪੁਗ੍ਗਲਂ ਦਸ੍ਸੇਤੁਂ ਵੁਤ੍ਤਂ. ਤਤ੍ਥ ਮਿਤ੍ਤਭਾਵਂ ਅਸਮ੍ਪਤ੍ਤਤਾਯ ਨੇਵ ਮਨਾਪੋ, ਅਮਿਤ੍ਤਭਾਵਂ ਅਸਮ੍ਪਤ੍ਤਤਾਯ ਨ ਅਮਨਾਪੋਤਿ ਵੇਦਿਤਬ੍ਬੋ. ਸੇਸਮੇਤ੍ਥ ਯਂ ਵਤ੍ਤਬ੍ਬਂ ਸਿਯਾ, ਤਂ ਸਬ੍ਬਂ ਹੇਟ੍ਠਾ ਚਿਤ੍ਤੁਪ੍ਪਾਦਕਣ੍ਡੇ ਵੁਤ੍ਤਮੇਵ. ਭਾਵਨਾਵਿਧਾਨਮ੍ਪਿ ਏਤੇਸਂ ਕਮ੍ਮਟ੍ਠਾਨਾਨਂ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਤੋ ਕਥਿਤਮੇਵਾਤਿ.

ਸੁਤ੍ਤਨ੍ਤਭਾਜਨੀਯਵਣ੍ਣਨਾ.