੩. ਪਞ੍ਹਾਪੁਚ੍ਛਕਵਣ੍ਣਨਾ
੬੩੮. ਪਞ੍ਹਾਪੁਚ੍ਛਕੇ ਪਾਲ਼ਿਅਨੁਸਾਰੇਨੇਵ ਝਾਨਾਨਂ ਕੁਸਲਾਦਿਭਾਵੋ ਵੇਦਿਤਬ੍ਬੋ. ਆਰਮ੍ਮਣਤ੍ਤਿਕੇਸੁ ਪਨ ਤਿਣ੍ਣਂ ਝਾਨਾਨਂ ਨਿਮਿਤ੍ਤਾਰਮ੍ਮਣਤ੍ਤਾ ਪਰਿਤ੍ਤਾਰਮ੍ਮਣਾਦਿਭਾਵੇਨ ਨਵਤ੍ਤਬ੍ਬਤਾ ਵੇਦਿਤਬ੍ਬਾ. ਲੋਕੁਤ੍ਤਰਾ ਪਨੇਤ੍ਥ ਮਗ੍ਗਕਾਲੇ ਫਲਕਾਲੇ ਵਾ ਸਿਯਾ ਅਪ੍ਪਮਾਣਾਰਮ੍ਮਣਾ. ਚਤੁਤ੍ਥਂ ਝਾਨਂ ਸਿਯਾ ਪਰਿਤ੍ਤਾਰਮ੍ਮਣਨ੍ਤਿ ਏਤ੍ਥ ਕੁਸਲਤੋ ਤੇਰਸ ਚਤੁਤ੍ਥਜ੍ਝਾਨਾਨਿ ਸਬ੍ਬਤ੍ਥਪਾਦਕਚਤੁਤ੍ਥਂ, ਇਦ੍ਧਿਵਿਧਚਤੁਤ੍ਥਂ, ਦਿਬ੍ਬਸੋਤਞਾਣਚਤੁਤ੍ਥਂ, ਚੇਤੋਪਰਿਯਞਾਣਚਤੁਤ੍ਥਂ, ਪੁਬ੍ਬੇਨਿਵਾਸਞਾਣਚਤੁਤ੍ਥਂ, ਦਿਬ੍ਬਚਕ੍ਖੁਞਾਣਚਤੁਤ੍ਥਂ, ਯਥਾਕਮ੍ਮੂਪਗਞਾਣਚਤੁਤ੍ਥਂ, ਅਨਾਗਤਂਸਞਾਣਚਤੁਤ੍ਥਂ, ਆਕਾਸਾਨਞ੍ਚਾਯਤਨਾਦਿਚਤੁਤ੍ਥਂ, ਲੋਕੁਤ੍ਤਰਚਤੁਤ੍ਥਨ੍ਤਿ.
ਤਤ੍ਥ ਸਬ੍ਬਤ੍ਥਪਾਦਕਚਤੁਤ੍ਥਂ ਨਵਤ੍ਤਬ੍ਬਾਰਮ੍ਮਣਮੇਵ ਹੋਤਿ.
ਇਦ੍ਧਿਵਿਧਚਤੁਤ੍ਥਂ ਚਿਤ੍ਤਵਸੇਨ ਕਾਯਂ ਪਰਿਣਾਮੇਨ੍ਤਸ੍ਸ ਅਦਿਸ੍ਸਮਾਨੇਨ ਕਾਯੇਨ ਪਾਟਿਹਾਰਿਯਕਰਣੇ ਕਾਯਾਰਮ੍ਮਣਤ੍ਤਾ ਪਰਿਤ੍ਤਾਰਮ੍ਮਣਂ, ਕਾਯਵਸੇਨ ਚਿਤ੍ਤਂ ਪਰਿਣਾਮੇਨ੍ਤਸ੍ਸ ਦਿਸ੍ਸਮਾਨੇਨ ਕਾਯੇਨ ਪਾਟਿਹਾਰਿਯਂ ਕਤ੍ਵਾ ਬ੍ਰਹ੍ਮਲੋਕਂ ਗਚ੍ਛਨ੍ਤਸ੍ਸ ਸਮਾਪਤ੍ਤਿਚਿਤ੍ਤਾਰਮ੍ਮਣਤ੍ਤਾ ਮਹਗ੍ਗਤਾਰਮ੍ਮਣਂ.
ਦਿਬ੍ਬਸੋਤਞਾਣਚਤੁਤ੍ਥਂ ਸਦ੍ਦਾਰਮ੍ਮਣਤ੍ਤਾ ਪਰਿਤ੍ਤਾਰਮ੍ਮਣਂ.
ਚੇਤੋਪਰਿਯਞਾਣਚਤੁਤ੍ਥਂ ਕਾਮਾਵਚਰਚਿਤ੍ਤਜਾਨਨਕਾਲੇ ਪਰਿਤ੍ਤਾਰਮ੍ਮਣਂ, ਰੂਪਾਵਚਰਾਰੂਪਾਵਚਰਚਿਤ੍ਤਜਾਨਨਕਾਲੇ ਮਹਗ੍ਗਤਾਰਮ੍ਮਣਂ, ਲੋਕੁਤ੍ਤਰਚਿਤ੍ਤਜਾਨਨਕਾਲੇ ਅਪ੍ਪਮਾਣਾਰਮ੍ਮਣਂ. ਚੇਤੋਪਰਿਯਞਾਣਲਾਭੀ ਪਨ ਪੁਥੁਜ੍ਜਨੋ ਪੁਥੁਜ੍ਜਨਾਨਂਯੇਵ ਚਿਤ੍ਤਂ ਜਾਨਾਤਿ, ਨ ਅਰਿਯਾਨਂ. ਸੋਤਾਪਨ੍ਨੋ ਸੋਤਾਪਨ੍ਨਸ੍ਸ ਚੇਵ ਪੁਥੁਜ੍ਜਨਸ੍ਸ ਚ; ਸਕਦਾਗਾਮੀ ਸਕਦਾਗਾਮਿਨੋ ਚੇਵ ਹੇਟ੍ਠਿਮਾਨਞ੍ਚ ਦ੍ਵਿਨ੍ਨਂ; ਅਨਾਗਾਮੀ ਅਨਾਗਾਮਿਨੋ ਚੇਵ ਹੇਟ੍ਠਿਮਾਨਞ੍ਚ ਤਿਣ੍ਣਂ; ਖੀਣਾਸਵੋ ਸਬ੍ਬੇਸਮ੍ਪਿ ਜਾਨਾਤਿ.
ਪੁਬ੍ਬੇਨਿਵਾਸਞਾਣਚਤੁਤ੍ਥਂ ਕਾਮਾਵਚਰਕ੍ਖਨ੍ਧਾਨੁਸ੍ਸਰਣਕਾਲੇ ਪਰਿਤ੍ਤਾਰਮ੍ਮਣਂ, ਰੂਪਾਵਚਰਾਰੂਪਾਵਚਰਕ੍ਖਨ੍ਧਾਨੁਸ੍ਸਰਣਕਾਲੇ ਮਹਗ੍ਗਤਾਰਮ੍ਮਣਂ, ‘‘ਅਤੀਤੇ ਬੁਦ੍ਧਪਚ੍ਚੇਕਬੁਦ੍ਧਖੀਣਾਸਵਾ ਮਗ੍ਗਂ ਭਾਵਯਿਂਸੁ, ਫਲਂ ਸਚ੍ਛਿਕਰਿਂਸੂ’’ਤਿ ਅਨੁਸ੍ਸਰਣਕਾਲੇ ਅਪ੍ਪਮਾਣਾਰਮ੍ਮਣਂ, ਨਾਮਗੋਤ੍ਤਾਨੁਸ੍ਸਰਣਕਾਲੇ ਨਵਤ੍ਤਬ੍ਬਾਰਮ੍ਮਣਂ.
ਦਿਬ੍ਬਚਕ੍ਖੁਞਾਣਚਤੁਤ੍ਥਂ ਵਣ੍ਣਾਰਮ੍ਮਣਤ੍ਤਾ ਪਰਿਤ੍ਤਾਰਮ੍ਮਣਂ.
ਯਥਾਕਮ੍ਮੂਪਗਞਾਣਚਤੁਤ੍ਥਂ ਕਾਮਾਵਚਰਕਮ੍ਮਾਨੁਸ੍ਸਰਣਕਾਲੇ ਪਰਿਤ੍ਤਾਰਮ੍ਮਣਂ, ਰੂਪਾਵਚਰਾਰੂਪਾਵਚਰਕਮ੍ਮਾਨੁਸ੍ਸਰਣਕਾਲੇ ਮਹਗ੍ਗਤਾਰਮ੍ਮਣਂ.
ਅਨਾਗਤਂਸਞਾਣਚਤੁਤ੍ਥਂ ਅਨਾਗਤੇ ਕਾਮਧਾਤੁਯਾ ਨਿਬ੍ਬਤ੍ਤਿਜਾਨਨਕਾਲੇ ਪਰਿਤ੍ਤਾਰਮ੍ਮਣਂ, ਰੂਪਾਰੂਪਭਵੇਸੁ ਨਿਬ੍ਬਤ੍ਤਿਜਾਨਨਕਾਲੇ ਮਹਗ੍ਗਤਾਰਮ੍ਮਣਂ, ‘‘ਅਨਾਗਤੇ ਬੁਦ੍ਧਪਚ੍ਚੇਕਬੁਦ੍ਧਖੀਣਾਸਵਾ ਮਗ੍ਗਂ ਭਾਵੇਸ੍ਸਨ੍ਤਿ, ਫਲਂ ਸਚ੍ਛਿਕਰਿਸ੍ਸਨ੍ਤੀ’’ਤਿ ਜਾਨਨਕਾਲੇ ਅਪ੍ਪਮਾਣਾਰਮ੍ਮਣਂ, ‘‘ਅਨਾਗਤੇ ਸਙ੍ਖੋ ਨਾਮ ਰਾਜਾ ਭਵਿਸ੍ਸਤੀ’’ਤਿਆਦਿਨਾ (ਦੀ. ਨਿ. ੩.੧੦੮) ਨਯੇਨ ਨਾਮਗੋਤ੍ਤਾਨੁਸ੍ਸਰਣਕਾਲੇ ਨਵਤ੍ਤਬ੍ਬਾਰਮ੍ਮਣਂ.
ਆਕਾਸਾਨਞ੍ਚਾਯਤਨਆਕਿਞ੍ਚਞ੍ਞਾਯਤਨਚਤੁਤ੍ਥਂ ਨਵਤ੍ਤਬ੍ਬਾਰਮ੍ਮਣਂ. ਵਿਞ੍ਞਾਣਞ੍ਚਾਯਤਨਨੇਵਸਞ੍ਞਾਨਾਸਞ੍ਞਾਯਤਨਚਤੁਤ੍ਥਂ ਮਹਗ੍ਗਤਾਰਮ੍ਮਣਂ.
ਲੋਕੁਤ੍ਤਰਚਤੁਤ੍ਥਂ ਅਪ੍ਪਮਾਣਾਰਮ੍ਮਣਂ.
ਕਿਰਿਯਤੋਪਿ ਤੇਸਂ ਦ੍ਵਾਦਸਨ੍ਨਂ ਝਾਨਾਨਂ ਇਦਮੇਵ ਆਰਮ੍ਮਣਵਿਧਾਨਂ. ਤੀਣਿ ਝਾਨਾਨਿ ਨਮਗ੍ਗਾਰਮ੍ਮਣਾਤਿ ਪਚ੍ਚਵੇਕ੍ਖਣਞਾਣਂ ਵਾ ਚੇਤੋਪਰਿਯਾਦਿਞਾਣਂ ਵਾ ਮਗ੍ਗਂ ਆਰਮ੍ਮਣਂ ਕਰੇਯ੍ਯ, ਤੀਣਿ ਝਾਨਾਨਿ ਤਥਾ ਅਪ੍ਪਵਤ੍ਤਿਤੋ ਨਮਗ੍ਗਾਰਮ੍ਮਣਾ, ਸਹਜਾਤਹੇਤੁਵਸੇਨ ਪਨ ਸਿਯਾ ਮਗ੍ਗਹੇਤੁਕਾ; ਵੀਰਿਯਜੇਟ੍ਠਿਕਾਯ ਵਾ ਵੀਮਂਸਾਜੇਟ੍ਠਿਕਾਯ ਵਾ ਮਗ੍ਗਭਾਵਨਾਯ ਮਗ੍ਗਾਧਿਪਤਿਨੋ; ਛਨ੍ਦਚਿਤ੍ਤਜੇਟ੍ਠਕਕਾਲੇ ਫਲਕਾਲੇ ਚ ਨਵਤ੍ਤਬ੍ਬਾ.
ਚਤੁਤ੍ਥਂ ਝਾਨਨ੍ਤਿ ਇਧਾਪਿ ਕੁਸਲਤੋ ਤੇਰਸਸੁ ਚਤੁਤ੍ਥਜ੍ਝਾਨੇਸੁ ਸਬ੍ਬਤ੍ਥਪਾਦਕਇਦ੍ਧਿਵਿਧਦਿਬ੍ਬਸੋਤਦਿਬ੍ਬਚਕ੍ਖੁਯਥਾਕਮ੍ਮੂਪਗਞਾਣਚਤੁਤ੍ਥਞ੍ਚੇਵ ਚਤੁਬ੍ਬਿਧਞ੍ਚ ਆਰੁਪ੍ਪਚਤੁਤ੍ਥਂ ਮਗ੍ਗਾਰਮ੍ਮਣਾਦਿਭਾਵੇਨ ਨ ਵਤ੍ਤਬ੍ਬਂ. ਚੇਤੋਪਰਿਯਪੁਬ੍ਬੇਨਿਵਾਸਅਨਾਗਤਂਸਞਾਣਚਤੁਤ੍ਥਂ ਪਨ ਮਗ੍ਗਾਰਮ੍ਮਣਂ ਹੋਤਿ. ਨ ਵਤ੍ਤਬ੍ਬਂ ਮਗ੍ਗਹੇਤੁਕਂ ਮਗ੍ਗਾਧਿਪਤੀਤਿ ਵਾ; ਲੋਕੁਤ੍ਤਰਚਤੁਤ੍ਥਂ ਮਗ੍ਗਾਰਮ੍ਮਣਂ ਨ ਹੋਤਿ; ਮਗ੍ਗਕਾਲੇ ਪਨ ਸਹਜਾਤਹੇਤੁਵਸੇਨ ਮਗ੍ਗਹੇਤੁਕਂ; ਵੀਰਿਯਵੀਮਂਸਾਜੇਟ੍ਠਿਕਾਯ ਮਗ੍ਗਭਾਵਨਾਯ ਮਗ੍ਗਾਧਿਪਤਿ; ਛਨ੍ਦਚਿਤ੍ਤਜੇਟ੍ਠਿਕਾਯ ਚੇਵ ਮਗ੍ਗਭਾਵਨਾਯ ਫਲਕਾਲੇ ਚ ਨ ਵਤ੍ਤਬ੍ਬਂ. ਕਿਰਿਯਤੋਪਿ ਦ੍ਵਾਦਸਸੁ ਝਾਨੇਸੁ ਅਯਮੇਵ ਨਯੋ.
ਤੀਣਿ ਝਾਨਾਨਿ ਨ ਵਤ੍ਤਬ੍ਬਾਤਿ ਅਤੀਤਾਦੀਸੁ ਏਕਧਮ੍ਮਮ੍ਪਿ ਆਰਬ੍ਭ ਅਪ੍ਪਵਤ੍ਤਿਤੋ ਨਵਤ੍ਤਬ੍ਬਾਤਿ ਵੇਦਿਤਬ੍ਬਾ.
ਚਤੁਤ੍ਥਂ ਝਾਨਨ੍ਤਿ ਕੁਸਲਤੋ ਤੇਰਸਸੁ ਚਤੁਤ੍ਥਜ੍ਝਾਨੇਸੁ ਸਬ੍ਬਤ੍ਥਪਾਦਕਚਤੁਤ੍ਥਂ ਨਵਤ੍ਤਬ੍ਬਾਰਮ੍ਮਣਮੇਵ. ਇਦ੍ਧਿਵਿਧਚਤੁਤ੍ਥਂ ਕਾਯਵਸੇਨ ਚਿਤ੍ਤਪਰਿਣਾਮਨੇ ਸਮਾਪਤ੍ਤਿਚਿਤ੍ਤਾਰਮ੍ਮਣਤ੍ਤਾ ਅਤੀਤਾਰਮ੍ਮਣਂ; ‘‘ਅਨਾਗਤੇ ਇਮਾਨਿ ਪੁਪ੍ਫਾਨਿ ਮਾ ਮਿਲਾਯਿਂਸੁ, ਦੀਪਾ ਮਾ ਨਿਬ੍ਬਾਯਿਂਸੁ, ਏਕੋ ਅਗ੍ਗਿਕ੍ਖਨ੍ਧੋ ਸਮੁਟ੍ਠਾਤੁ, ਪਬ੍ਬਤੋ ਸਮੁਟ੍ਠਾਤੂ’’ਤਿ ਅਧਿਟ੍ਠਾਨਕਾਲੇ ਅਨਾਗਤਾਰਮ੍ਮਣਂ; ਚਿਤ੍ਤਵਸੇਨ ਕਾਯਪਰਿਣਾਮਨਕਾਲੇ ਕਾਯਾਰਮ੍ਮਣਤ੍ਤਾ ਪਚ੍ਚੁਪ੍ਪਨ੍ਨਾਰਮ੍ਮਣਂ. ਦਿਬ੍ਬਸੋਤਞਾਣਚਤੁਤ੍ਥਂ ਸਦ੍ਦਾਰਮ੍ਮਣਤ੍ਤਾ ਪਚ੍ਚੁਪ੍ਪਨਾਰਮ੍ਮਣਂ. ਚੇਤੋਪਰਿਯਞਾਣਚਤੁਤ੍ਥਂ ਅਤੀਤੇ ਸਤ੍ਤਦਿਵਸਬ੍ਭਨ੍ਤਰੇ ਉਪ੍ਪਜ੍ਜਿਤ੍ਵਾ ਨਿਰੁਦ੍ਧਚਿਤ੍ਤਜਾਨਨਕਾਲੇ ਅਤੀਤਾਰਮ੍ਮਣਂ; ਅਨਾਗਤੇ ਸਤ੍ਤਦਿਵਸਬ੍ਭਨ੍ਤਰੇ ਉਪ੍ਪਜ੍ਜਨਕਚਿਤ੍ਤਜਾਨਨਕਾਲੇ ਅਨਾਗਤਾਰਮ੍ਮਣਂ. ‘‘ਯਥਾ ਇਮਸ੍ਸ ਭੋਤੋ ਮਨੋਸਙ੍ਖਾਰਾ ਪਣਿਹਿਤਾ ਇਮਸ੍ਸ ਚਿਤ੍ਤਸ੍ਸ ਅਨਨ੍ਤਰਾ ਅਮੁਂ ਨਾਮ ਵਿਤਕ੍ਕਂ ਵਿਤਕ੍ਕੇਸ੍ਸਤੀਤਿ. ਸੋ ਬਹੁਞ੍ਚੇਪਿ ਆਦਿਸਤਿ, ਤਥੇਵ ਤਂ ਹੋਤਿ ਨੋ ਅਞ੍ਞਥਾ’’ਤਿ ਇਮਿਨਾ ਹਿ ਸੁਤ੍ਤੇਨ (ਅ. ਨਿ. ੩.੬੧) ਚੇਤੋਪਰਿਯਞਾਣਸ੍ਸੇਵ ਪਵਤ੍ਤਿ ਪਕਾਸਿਤਾ. ਅਦ੍ਧਾਨਪਚ੍ਚੁਪ੍ਪਨ੍ਨਸਨ੍ਤਤਿਪਚ੍ਚੁਪ੍ਪਨ੍ਨਵਸੇਨੇਵ ਪਚ੍ਚੁਪ੍ਪਨ੍ਨਂ ਆਰਬ੍ਭ ਪਵਤ੍ਤਿਕਾਲੇ ਪਚ੍ਚੁਪ੍ਪਨ੍ਨਾਰਮ੍ਮਣਂ. ਵਿਤ੍ਥਾਰਕਥਾ ਪਨੇਤ੍ਥ ਹੇਟ੍ਠਾਅਟ੍ਠਕਥਾਕਣ੍ਡਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਾ.
ਪੁਬ੍ਬੇਨਿਵਾਸਞਾਣਚਤੁਤ੍ਥਂ ਅਤੀਤਕ੍ਖਨ੍ਧਾਨੁਸ੍ਸਰਣਕਾਲੇ ਅਤੀਤਾਰਮ੍ਮਣਂ, ਨਾਮਗੋਤ੍ਤਾਨੁਸ੍ਸਰਣਕਾਲੇ ਨਵਤ੍ਤਬ੍ਬਾਰਮ੍ਮਣਂ. ਦਿਬ੍ਬਚਕ੍ਖੁਞਾਣਚਤੁਤ੍ਥਂ ਵਣ੍ਣਾਰਮ੍ਮਣਤ੍ਤਾ ਪਚ੍ਚੁਪ੍ਪਨ੍ਨਾਰਮ੍ਮਣਂ. ਯਥਾਕਮ੍ਮੂਪਗਞਾਣਚਤੁਤ੍ਥਂ ਅਤੀਤਕਮ੍ਮਮੇਵ ਆਰਮ੍ਮਣਂ ਕਰੋਤੀਤਿ ਅਤੀਤਾਰਮ੍ਮਣਂ. ਅਨਾਗਤਂਸਞਾਣਚਤੁਤ੍ਥਂ ਅਨਾਗਤਕ੍ਖਨ੍ਧਾਨੁਸ੍ਸਰਣਕਾਲੇ ਅਨਾਗਤਾਰਮ੍ਮਣਂ, ਨਾਮਗੋਤ੍ਤਾਨੁਸ੍ਸਰਣਕਾਲੇ ਨਵਤ੍ਤਬ੍ਬਾਰਮ੍ਮਣਂ. ਆਕਾਸਾਨਞ੍ਚਾਯਤਨਆਕਿਞ੍ਚਞ੍ਞਾਯਤਨਚਤੁਤ੍ਥਂ ਨਵਤ੍ਤਬ੍ਬਾਰਮ੍ਮਣਮੇਵ. ਵਿਞ੍ਞਾਣਞ੍ਚਾਯਤਨਨੇਵਸਞ੍ਞਾਨਾਸਞ੍ਞਾਯਤਨਚਤੁਤ੍ਥਂ ਅਤੀਤਾਰਮ੍ਮਣਮੇਵ. ਲੋਕੁਤ੍ਤਰਚਤੁਤ੍ਥਂ ਨਵਤ੍ਤਬ੍ਬਾਰਮ੍ਮਣਮੇਵ. ਕਿਰਿਯਤੋਪਿ ਦ੍ਵਾਦਸਸੁ ਚਤੁਤ੍ਥਜ੍ਝਾਨੇਸੁ ਏਸੇਵ ਨਯੋ.
ਤੀਣਿ ਝਾਨਾਨਿ ਬਹਿਦ੍ਧਾਰਮ੍ਮਣਾਤਿ ਅਜ੍ਝਤ੍ਤਤੋ ਬਹਿਦ੍ਧਾਭੂਤਂ ਨਿਮਿਤ੍ਤਂ ਆਰਬ੍ਭ ਪਵਤ੍ਤਿਤੋ ਬਹਿਦ੍ਧਾਰਮ੍ਮਣਾ.
ਚਤੁਤ੍ਥਂ ਝਾਨਨ੍ਤਿ ਇਧਾਪਿ ਕੁਸਲਤੋ ਤੇਰਸਸੁ ਚਤੁਤ੍ਥਜ੍ਝਾਨੇਸੁ ਸਬ੍ਬਤ੍ਥਪਾਦਕਚਤੁਤ੍ਥਂ ਬਹਿਦ੍ਧਾਰਮ੍ਮਣਮੇਵ.
ਇਦ੍ਧਿਵਿਧਚਤੁਤ੍ਥਂ ਕਾਯਵਸੇਨ ਚਿਤ੍ਤਪਰਿਣਾਮਨੇਪਿ ਚਿਤ੍ਤਵਸੇਨ ਕਾਯਪਰਿਣਾਮਨੇਪਿ ਅਤ੍ਤਨੋਵ ਕਾਯਚਿਤ੍ਤਾਰਮ੍ਮਣਤ੍ਤਾ ਅਜ੍ਝਤ੍ਤਾਰਮ੍ਮਣਂ; ‘‘ਬਹਿਦ੍ਧਾ ਹਤ੍ਥਿਮ੍ਪਿ ਦਸ੍ਸੇਤੀ’’ਤਿਆਦਿਨਾ ਨਯੇਨ ਪਵਤ੍ਤਕਾਲੇ ਬਹਿਦ੍ਧਾਰਮ੍ਮਣਂ.
ਦਿਬ੍ਬਸੋਤਞਾਣਚਤੁਤ੍ਥਂ ਅਤ੍ਤਨੋ ਕੁਚ੍ਛਿਗਤਸਦ੍ਦਾਰਮ੍ਮਣਕਾਲੇ ਅਜ੍ਝਤ੍ਤਾਰਮ੍ਮਣਂ, ਪਰਸ੍ਸ ਸਦ੍ਦਾਰਮ੍ਮਣਕਾਲੇ ਬਹਿਦ੍ਧਾਰਮ੍ਮਣਂ, ਉਭਯਵਸੇਨਾਪਿ ਅਜ੍ਝਤ੍ਤਬਹਿਦ੍ਧਾਰਮ੍ਮਣਂ.
ਚੇਤੋਪਰਿਯਞਾਣਚਤੁਤ੍ਥਂ ਬਹਿਦ੍ਧਾਰਮ੍ਮਣਮੇਵ.
ਪੁਬ੍ਬੇਨਿਵਾਸਞਾਣਚਤੁਤ੍ਥਂ ਅਤ੍ਤਨੋ ਖਨ੍ਧਾਨੁਸ੍ਸਰਣਕਾਲੇ ਅਜ੍ਝਤ੍ਤਾਰਮ੍ਮਣਂ, ਪਰਸ੍ਸ ਖਨ੍ਧਾਨਞ੍ਚੇਵ ਨਾਮਗੋਤ੍ਤਸ੍ਸ ਚ ਅਨੁਸ੍ਸਰਣਕਾਲੇ ਬਹਿਦ੍ਧਾਰਮ੍ਮਣਂ.
ਦਿਬ੍ਬਚਕ੍ਖੁਞਾਣਚਤੁਤ੍ਥਂ ਅਤ੍ਤਨੋ ਰੂਪਾਰਮ੍ਮਣਕਾਲੇ ਅਜ੍ਝਤ੍ਤਾਰਮ੍ਮਣਂ, ਪਰਸ੍ਸ ਰੂਪਾਰਮ੍ਮਣਕਾਲੇ ਬਹਿਦ੍ਧਾਰਮ੍ਮਣਂ, ਉਭਯਵਸੇਨਾਪਿ ਅਜ੍ਝਤ੍ਤਬਹਿਦ੍ਧਾਰਮ੍ਮਣਂ.
ਯਥਾਕਮ੍ਮੂਪਗਞਾਣਚਤੁਤ੍ਥਂ ਅਤ੍ਤਨੋ ਕਮ੍ਮਜਾਨਨਕਾਲੇ ਅਜ੍ਝਤ੍ਤਾਰਮ੍ਮਣਂ, ਪਰਸ੍ਸ ਕਮ੍ਮਜਾਨਨਕਾਲੇ ਬਹਿਦ੍ਧਾਰਮ੍ਮਣਂ, ਉਭਯਵਸੇਨਾਪਿ ਅਜ੍ਝਤ੍ਤਬਹਿਦ੍ਧਾਰਮ੍ਮਣਂ.
ਅਨਾਗਤਂਸਞਾਣਚਤੁਤ੍ਥਂ ਅਤ੍ਤਨੋ ਅਨਾਗਤੇ ਨਿਬ੍ਬਤ੍ਤਿਜਾਨਨਕਾਲੇ ਅਜ੍ਝਤ੍ਤਾਰਮ੍ਮਣਂ, ਪਰਸ੍ਸ ਖਨ੍ਧਾਨੁਸ੍ਸਰਣਕਾਲੇ ਚੇਵ ਨਾਮਗੋਤ੍ਤਾਨੁਸ੍ਸਰਣਕਾਲੇ ਚ ਬਹਿਦ੍ਧਾਰਮ੍ਮਣਂ, ਉਭਯਵਸੇਨਾਪਿ ਅਜ੍ਝਤ੍ਤਬਹਿਦ੍ਧਾਰਮ੍ਮਣਂ.
ਆਕਾਸਾਨਞ੍ਚਾਯਤਨਚਤੁਤ੍ਥਂ ਬਹਿਦ੍ਧਾਰਮ੍ਮਣਂ. ਆਕਿਞ੍ਚਞ੍ਞਾਯਤਨਚਤੁਤ੍ਥਂ ਨਵਤ੍ਤਬ੍ਬਾਰਮ੍ਮਣਂ. ਵਿਞ੍ਞਾਣਞ੍ਚਾਯਤਨਨੇਵਸਞ੍ਞਾਨਾਸਞ੍ਞਾਯਤਨਚਤੁਤ੍ਥਂ ਅਜ੍ਝਤ੍ਤਾਰਮ੍ਮਣਂ.
ਲੋਕੁਤ੍ਤਰਚਤੁਤ੍ਥਂ ਬਹਿਦ੍ਧਾਰਮ੍ਮਣਮੇਵ. ਕਿਰਿਯਤੋਪਿ ਦ੍ਵਾਦਸਸੁ ਝਾਨੇਸੁ ਅਯਮੇਵ ਨਯੋਤਿ.
ਇਮਸ੍ਮਿਂ ਪਨ ਝਾਨਵਿਭਙ੍ਗੇ ਸਮ੍ਮਾਸਮ੍ਬੁਦ੍ਧੇਨ ਸੁਤ੍ਤਨ੍ਤਭਾਜਨੀਯੇਪਿ ਲੋਕਿਯਲੋਕੁਤ੍ਤਰਮਿਸ੍ਸਕਾਨੇਵ ਝਾਨਾਨਿ ਕਥਿਤਾਨਿ; ਅਭਿਧਮ੍ਮਭਾਜਨੀਯੇਪਿ ਪਞ੍ਹਾਪੁਚ੍ਛਕੇਪਿ. ਤਯੋਪਿ ਹਿ ਏਤੇ ਨਯਾ ਤੇਭੂਮਕਧਮ੍ਮਮਿਸ੍ਸਕਤ੍ਤਾ ਏਕਪਰਿਚ੍ਛੇਦਾ ਏਵ. ਏਵਮਯਂ ਝਾਨਵਿਭਙ੍ਗੋਪਿ ਤੇਪਰਿਵਟ੍ਟਂ ਨੀਹਰਿਤ੍ਵਾਵ ਭਾਜੇਤ੍ਵਾ ਦਸ੍ਸਿਤੋਤਿ.
ਸਮ੍ਮੋਹਵਿਨੋਦਨਿਯਾ ਵਿਭਙ੍ਗਟ੍ਠਕਥਾਯ
ਝਾਨਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.