੧. ਸੁਤ੍ਤਨ੍ਤਭਾਜਨੀਯਵਣ੍ਣਨਾ

੪੬੬. ਇਦਾਨਿ ਤਦਨਨ੍ਤਰੇ ਬੋਜ੍ਝਙ੍ਗਵਿਭਙ੍ਗੇ ਸਤ੍ਤਾਤਿ ਗਣਨਪਰਿਚ੍ਛੇਦੋ. ਬੋਜ੍ਝਙ੍ਗਾਤਿ ਬੋਧਿਯਾ ਬੋਧਿਸ੍ਸ ਵਾ ਅਙ੍ਗਾਤਿ ਬੋਜ੍ਝਙ੍ਗਾ. ਇਦਂ ਵੁਤ੍ਤਂ ਹੋਤਿ – ਯਾ ਏਸਾ ਧਮ੍ਮਸਾਮਗ੍ਗੀ ਯਾਯ ਲੋਕੁਤ੍ਤਰਮਗ੍ਗਕ੍ਖਣੇ ਉਪ੍ਪਜ੍ਜਮਾਨਾਯ ਲੀਨੁਦ੍ਧਚ੍ਚਪਤਿਟ੍ਠਾਨਾਯੂਹਨਕਾਮਸੁਖਤ੍ਤਕਿਲਮਥਾਨੁਯੋਗਉਚ੍ਛੇਦਸਸ੍ਸਤਾਭਿਨਿਵੇਸਾਦੀਨਂ ਅਨੇਕੇਸਂ ਉਪਦ੍ਦਵਾਨਂ ਪਟਿਪਕ੍ਖਭੂਤਾਯ ਸਤਿਧਮ੍ਮਵਿਚਯਵੀਰਿਯਪੀਤਿਪਸ੍ਸਦ੍ਧਿਸਮਾਧਿਉਪੇਕ੍ਖਾਸਙ੍ਖਾਤਾਯ ਧਮ੍ਮਸਾਮਗ੍ਗਿਯਾ ਅਰਿਯਸਾਵਕੋ ਬੁਜ੍ਝਤੀਤਿ ਕਤ੍ਵਾ ਬੋਧੀਤਿ ਵੁਚ੍ਚਤਿ, ਬੁਜ੍ਝਤਿ ਕਿਲੇਸਸਨ੍ਤਾਨਨਿਦ੍ਦਾਯ ਉਟ੍ਠਹਤਿ, ਚਤ੍ਤਾਰਿ ਵਾ ਅਰਿਯਸਚ੍ਚਾਨਿ ਪਟਿਵਿਜ੍ਝਤਿ, ਨਿਬ੍ਬਾਨਮੇਵ ਵਾ ਸਚ੍ਛਿਕਰੋਤਿ, ਤਸ੍ਸਾ ਧਮ੍ਮਸਾਮਗ੍ਗੀਸਙ੍ਖਾਤਾਯ ਬੋਧਿਯਾ ਅਙ੍ਗਾਤਿਪਿ ਬੋਜ੍ਝਙ੍ਗਾ, ਝਾਨਙ੍ਗਮਗ੍ਗਙ੍ਗਾਦੀਨਿ ਵਿਯ. ਯੋ ਪਨੇਸ ਯਥਾਵੁਤ੍ਤਪ੍ਪਕਾਰਾਯ ਏਤਾਯ ਧਮ੍ਮਸਾਮਗ੍ਗਿਯਾ ਬੁਜ੍ਝਤੀਤਿ ਕਤ੍ਵਾ ਅਰਿਯਸਾਵਕੋ ਬੋਧੀਤਿ ਵੁਚ੍ਚਤਿ, ਤਸ੍ਸ ਬੋਧਿਸ੍ਸ ਅਙ੍ਗਾਤਿਪਿ ਬੋਜ੍ਝਙ੍ਗਾ, ਸੇਨਙ੍ਗਰਥਙ੍ਗਾਦਯੋ ਵਿਯ. ਤੇਨਾਹੁ ਅਟ੍ਠਕਥਾਚਰਿਯਾ – ‘‘ਬੁਜ੍ਝਨਕਸ੍ਸ ਪੁਗ੍ਗਲਸ੍ਸ ਅਙ੍ਗਾਤਿ ਵਾ ਬੋਜ੍ਝਙ੍ਗਾ’’ਤਿ.

ਅਪਿਚ ‘‘ਬੋਜ੍ਝਙ੍ਗਾਤਿ ਕੇਨਟ੍ਠੇਨ ਬੋਜ੍ਝਙ੍ਗਾ? ਬੋਧਾਯ ਸਂਵਤ੍ਤਨ੍ਤੀਤਿ ਬੋਜ੍ਝਙ੍ਗਾ, ਬੁਜ੍ਝਨ੍ਤੀਤਿ ਬੋਜ੍ਝਙ੍ਗਾ, ਅਨੁਬੁਜ੍ਝਨ੍ਤੀਤਿ ਬੋਜ੍ਝਙ੍ਗਾ, ਪਟਿਬੁਜ੍ਝਨ੍ਤੀਤਿ ਬੋਜ੍ਝਙ੍ਗਾ, ਸਮ੍ਬੁਜ੍ਝਨ੍ਤੀਤਿ ਬੋਜ੍ਝਙ੍ਗਾ’’ਤਿ ਇਮਿਨਾ ਪਟਿਸਮ੍ਭਿਦਾਨਯੇਨਾਪਿ ਬੋਜ੍ਝਙ੍ਗਤ੍ਥੋ ਵੇਦਿਤਬ੍ਬੋ.

ਸਤਿਸਮ੍ਬੋਜ੍ਝਙ੍ਗੋਤਿਆਦੀਸੁ ਪਸਤ੍ਥੋ ਸੁਨ੍ਦਰੋ ਚ ਬੋਜ੍ਝਙ੍ਗੋ ਸਮ੍ਬੋਜ੍ਝਙ੍ਗੋ, ਸਤਿਯੇਵ ਸਮ੍ਬੋਜ੍ਝਙ੍ਗੋ ਸਤਿਸਮ੍ਬੋਜ੍ਝਙ੍ਗੋ. ਤਤ੍ਥ ਉਪਟ੍ਠਾਨਲਕ੍ਖਣੋ ਸਤਿਸਮ੍ਬੋਜ੍ਝਙ੍ਗੋ, ਪਵਿਚਯਲਕ੍ਖਣੋ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ, ਪਗ੍ਗਹਲਕ੍ਖਣੋ ਵੀਰਿਯਸਮ੍ਬੋਜ੍ਝਙ੍ਗੋ, ਫਰਣਲਕ੍ਖਣੋ ਪੀਤਿਸਮ੍ਬੋਜ੍ਝਙ੍ਗੋ, ਉਪਸਮਲਕ੍ਖਣੋ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ, ਅਵਿਕ੍ਖੇਪਲਕ੍ਖਣੋ ਸਮਾਧਿਸਮ੍ਬੋਜ੍ਝਙ੍ਗੋ, ਪਟਿਸਙ੍ਖਾਨਲਕ੍ਖਣੋ ਉਪੇਕ੍ਖਾਸਮ੍ਬੋਜ੍ਝਙ੍ਗੋ. ਤੇਸੁ ‘‘ਸਤਿਞ੍ਚ ਖ੍ਵਾਹਂ, ਭਿਕ੍ਖਵੇ, ਸਬ੍ਬਤ੍ਥਿਕਂ ਵਦਾਮੀ’’ਤਿ (ਸਂ. ਨਿ. ੫.੨੩੪) ਵਚਨਤੋ ਸਬ੍ਬੇਸਂ ਬੋਜ੍ਝਙ੍ਗਾਨਂ ਉਪਕਾਰਕਤ੍ਤਾ ਸਤਿਸਮ੍ਬੋਜ੍ਝਙ੍ਗੋ ਪਠਮਂ ਵੁਤ੍ਤੋ. ਤਤੋ ਪਰਂ ‘‘ਸੋ ਤਥਾ ਸਤੋ ਵਿਹਰਨ੍ਤੋ ਤਂ ਧਮ੍ਮਂ ਪਞ੍ਞਾਯ ਪਵਿਚਿਨਤੀ’’ਤਿਆਦਿਨਾ (ਮ. ਨਿ. ੧੫੦) ਨਯੇਨ ਏਵਂ ਅਨੁਕ੍ਕਮੇਨੇਵ ਨਿਕ੍ਖੇਪਪਯੋਜਨਂ ਪਾਲ਼ਿਯਂ ਆਗਤਮੇਵ.

ਕਸ੍ਮਾ ਪਨੇਤੇ ਸਤ੍ਤੇਵ ਵੁਤ੍ਤਾ, ਅਨੂਨਾ ਅਨਧਿਕਾਤਿ? ਲੀਨੁਦ੍ਧਚ੍ਚਪਟਿਪਕ੍ਖਤੋ ਸਬ੍ਬਤ੍ਥਿਕਤੋ ਚ. ਏਤ੍ਥ ਹਿ ਤਯੋ ਬੋਜ੍ਝਙ੍ਗਾ ਲੀਨਸ੍ਸ ਪਟਿਪਕ੍ਖਾ, ਯਥਾਹ – ‘‘ਯਸ੍ਮਿਞ੍ਚ ਖੋ, ਭਿਕ੍ਖਵੇ, ਸਮਯੇ ਲੀਨਂ ਚਿਤ੍ਤਂ ਹੋਤਿ, ਕਾਲੋ ਤਸ੍ਮਿਂ ਸਮਯੇ ਧਮ੍ਮਵਿਚਯਸਮ੍ਬੋਜ੍ਝਙ੍ਗਸ੍ਸ ਭਾਵਨਾਯ, ਕਾਲੋ ਵੀਰਿਯਸਮ੍ਬੋਜ੍ਝਙ੍ਗਸ੍ਸ ਭਾਵਨਾਯ, ਕਾਲੋ ਪੀਤਿਸਮ੍ਬੋਜ੍ਝਙ੍ਗਸ੍ਸ ਭਾਵਨਾਯਾ’’ਤਿ (ਸਂ. ਨਿ. ੫.੨੩੪). ਤਯੋ ਉਦ੍ਧਚ੍ਚਸ੍ਸ ਪਟਿਪਕ੍ਖਾ, ਯਥਾਹ – ‘‘ਯਸ੍ਮਿਞ੍ਚ ਖੋ, ਭਿਕ੍ਖਵੇ, ਸਮਯੇ ਉਦ੍ਧਤਂ ਚਿਤ੍ਤਂ ਹੋਤਿ, ਕਾਲੋ ਤਸ੍ਮਿਂ ਸਮਯੇ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗਸ੍ਸ ਭਾਵਨਾਯ, ਕਾਲੋ ਸਮਾਧਿਸਮ੍ਬੋਜ੍ਝਙ੍ਗਸ੍ਸ ਭਾਵਨਾਯ, ਕਾਲੋ ਉਪੇਕ੍ਖਾਸਮ੍ਬੋਜ੍ਝਙ੍ਗਸ੍ਸ ਭਾਵਨਾਯਾ’’ਤਿ (ਸਂ. ਨਿ. ੫.੨੩੪). ਏਕੋ ਪਨੇਤ੍ਥ ਲੋਣਧੂਪਨਂ ਵਿਯ ਸਬ੍ਬਬ੍ਯਞ੍ਜਨੇਸੁ, ਸਬ੍ਬਕਮ੍ਮਿਕਅਮਚ੍ਚੋ ਵਿਯ ਚ ਸਬ੍ਬੇਸੁ ਰਾਜਕਿਚ੍ਚੇਸੁ, ਸਬ੍ਬਬੋਜ੍ਝਙ੍ਗੇਸੁ ਇਚ੍ਛਿਤਬ੍ਬਤੋ ਸਬ੍ਬਤ੍ਥਿਕੋ, ਯਥਾਹ – ‘‘ਸਤਿਞ੍ਚ ਖ੍ਵਾਹਂ, ਭਿਕ੍ਖਵੇ, ਸਬ੍ਬਤ੍ਥਿਕਂ ਵਦਾਮੀ’’ਤਿ. ‘‘ਸਬ੍ਬਤ੍ਥਕ’’ਨ੍ਤਿਪਿ ਪਾਲ਼ਿ. ਦ੍ਵਿਨ੍ਨਮ੍ਪਿ ਸਬ੍ਬਤ੍ਥ ਇਚ੍ਛਿਤਬ੍ਬਨ੍ਤਿ ਅਤ੍ਥੋ. ਏਵਂ ਲੀਨੁਦ੍ਧਚ੍ਚਪਟਿਪਕ੍ਖਤੋ ਸਬ੍ਬਤ੍ਥਿਕਤੋ ਚ ਸਤ੍ਤੇਵ ਵੁਤ੍ਤਾਤਿ ਵੇਦਿਤਬ੍ਬਾ.

੪੬੭. ਇਦਾਨਿ ਨੇਸਂ ਏਕਸ੍ਮਿਂਯੇਵਾਰਮ੍ਮਣੇ ਅਤ੍ਤਨੋ ਅਤ੍ਤਨੋ ਕਿਚ੍ਚਵਸੇਨ ਨਾਨਾਕਰਣਂ ਦਸ੍ਸੇਤੁਂ ਤਤ੍ਥ ਕਤਮੋ ਸਤਿਸਮ੍ਬੋਜ੍ਝਙ੍ਗੋਤਿਆਦਿ ਆਰਦ੍ਧਂ. ਤਤ੍ਥ ਇਧ ਭਿਕ੍ਖੂਤਿ ਇਮਸ੍ਮਿਂ ਸਾਸਨੇ ਭਿਕ੍ਖੁ. ਸਤਿਮਾ ਹੋਤੀਤਿ ਪਞ੍ਞਾਯ ਪਞ੍ਞਵਾ, ਯਸੇਨ ਯਸਵਾ, ਧਨੇਨ ਧਨਵਾ ਵਿਯ ਸਤਿਯਾ ਸਤਿਮਾ ਹੋਤਿ, ਸਤਿਸਮ੍ਪਨ੍ਨੋਤਿ ਅਤ੍ਥੋ. ਪਰਮੇਨਾਤਿ ਉਤ੍ਤਮੇਨ; ਤਞ੍ਹਿ ਪਰਮਤ੍ਥਸਚ੍ਚਸ੍ਸ ਨਿਬ੍ਬਾਨਸ੍ਸ ਚੇਵ ਮਗ੍ਗਸ੍ਸ ਚ ਅਨੁਲੋਮਤੋ ਪਰਮਂ ਨਾਮ ਹੋਤਿ ਉਤ੍ਤਮਂ ਸੇਟ੍ਠਂ. ਸਤਿਨੇਪਕ੍ਕੇਨਾਤਿ ਨੇਪਕ੍ਕਂ ਵੁਚ੍ਚਤਿ ਪਞ੍ਞਾ; ਸਤਿਯਾ ਚੇਵ ਨੇਪਕ੍ਕੇਨ ਚਾਤਿ ਅਤ੍ਥੋ.

ਕਸ੍ਮਾ ਪਨ ਇਮਸ੍ਮਿਂ ਸਤਿਭਾਜਨੀਯੇ ਪਞ੍ਞਾ ਸਙ੍ਗਹਿਤਾਤਿ? ਸਤਿਯਾ ਬਲਵਭਾਵਦੀਪਨਤ੍ਥਂ. ਸਤਿ ਹਿ ਪਞ੍ਞਾਯ ਸਦ੍ਧਿਮ੍ਪਿ ਉਪ੍ਪਜ੍ਜਤਿ ਵਿਨਾਪਿ, ਪਞ੍ਞਾਯ ਸਦ੍ਧਿਂ ਉਪ੍ਪਜ੍ਜਮਾਨਾ ਬਲਵਤੀ ਹੋਤਿ, ਵਿਨਾ ਉਪ੍ਪਜ੍ਜਮਾਨਾ ਦੁਬ੍ਬਲਾ. ਤੇਨਸ੍ਸਾ ਬਲਵਭਾਵਦੀਪਨਤ੍ਥਂ ਪਞ੍ਞਾ ਸਙ੍ਗਹਿਤਾ. ਯਥਾ ਹਿ ਦ੍ਵੀਸੁ ਦਿਸਾਸੁ ਦ੍ਵੇ ਰਾਜਮਹਾਮਤ੍ਤਾ ਤਿਟ੍ਠੇਯ੍ਯੁਂ; ਤੇਸੁ ਏਕੋ ਰਾਜਪੁਤ੍ਤਂ ਗਹੇਤ੍ਵਾ ਤਿਟ੍ਠੇਯ੍ਯ, ਏਕੋ ਅਤ੍ਤਨੋ ਧਮ੍ਮਤਾਯ ਏਕਕੋਵ ਤੇਸੁ ਰਾਜਪੁਤ੍ਤਂ ਗਹੇਤ੍ਵਾ ਠਿਤੋ ਅਤ੍ਤਨੋਪਿ ਤੇਜੇਨ ਰਾਜਪੁਤ੍ਤਸ੍ਸਪਿ ਤੇਜੇਨ ਤੇਜਵਾ ਹੋਤਿ; ਅਤ੍ਤਨੋ ਧਮ੍ਮਤਾਯ ਠਿਤੋ ਨ ਤੇਨ ਸਮਤੇਜੋ ਹੋਤਿ; ਏਵਮੇਵ ਰਾਜਪੁਤ੍ਤਂ ਗਹੇਤ੍ਵਾ ਠਿਤਮਹਾਮਤ੍ਤੋ ਵਿਯ ਪਞ੍ਞਾਯ ਸਦ੍ਧਿਂ ਉਪ੍ਪਨ੍ਨਾ ਸਤਿ, ਅਤ੍ਤਨੋ ਧਮ੍ਮਤਾਯ ਠਿਤੋ ਵਿਯ ਵਿਨਾ ਪਞ੍ਞਾਯ ਉਪ੍ਪਨ੍ਨਾ. ਤਤ੍ਥ ਯਥਾ ਰਾਜਪੁਤ੍ਤਂ ਗਹੇਤ੍ਵਾ ਠਿਤੋ ਅਤ੍ਤਨੋਪਿ ਤੇਜੇਨ ਰਾਜਪੁਤ੍ਤਸ੍ਸਪਿ ਤੇਜੇਨ ਤੇਜਵਾ ਹੋਤਿ, ਏਵਂ ਪਞ੍ਞਾਯ ਸਦ੍ਧਿਂ ਉਪ੍ਪਨ੍ਨਾ ਸਤਿ ਬਲਵਤੀ ਹੋਤਿ; ਯਥਾ ਅਤ੍ਤਨੋ ਧਮ੍ਮਤਾਯ ਠਿਤੋ ਨ ਤੇਨ ਸਮਤੇਜੋ ਹੋਤਿ, ਏਵਂ ਵਿਨਾ ਪਞ੍ਞਾਯ ਉਪ੍ਪਨ੍ਨਾ ਦੁਬ੍ਬਲਾ ਹੋਤੀਤਿ ਬਲਵਭਾਵਦੀਪਨਤ੍ਥਂ ਪਞ੍ਞਾ ਗਹਿਤਾਤਿ.

ਚਿਰਕਤਮ੍ਪੀਤਿ ਅਤ੍ਤਨੋ ਵਾ ਪਰਸ੍ਸ ਵਾ ਕਾਯੇਨ ਚਿਰਕਤਂ ਵਤ੍ਤਂ ਵਾ ਕਸਿਣਮਣ੍ਡਲਂ ਵਾ ਕਸਿਣਪਰਿਕਮ੍ਮਂ ਵਾ. ਚਿਰਭਾਸਿਤਮ੍ਪੀਤਿ ਅਤ੍ਤਨਾ ਵਾ ਪਰੇਨ ਵਾ ਵਾਚਾਯ ਚਿਰਭਾਸਿਤਂ ਬਹੁਕਮ੍ਪਿ, ਵਤ੍ਤਸੀਸੇ ਠਤ੍ਵਾ ਧਮ੍ਮਕਥਂ ਵਾ ਕਮ੍ਮਟ੍ਠਾਨਵਿਨਿਚ੍ਛਯਂ ਵਾ, ਵਿਮੁਤ੍ਤਾਯਤਨਸੀਸੇ ਵਾ ਠਤ੍ਵਾ ਧਮ੍ਮਕਥਮੇਵ. ਸਰਿਤਾ ਹੋਤੀਤਿ ਤਂ ਕਾਯਵਿਞ੍ਞਤ੍ਤਿਂ ਵਚੀਵਿਞ੍ਞਤ੍ਤਿਞ੍ਚ ਸਮੁਟ੍ਠਾਪੇਤ੍ਵਾ ਪਵਤ੍ਤਂ ਅਰੂਪਧਮ੍ਮਕੋਟ੍ਠਾਸਂ ‘ਏਵਂ ਉਪ੍ਪਜ੍ਜਿਤ੍ਵਾ ਏਵਂ ਨਿਰੁਦ੍ਧੋ’ਤਿ ਸਰਿਤਾ ਹੋਤਿ. ਅਨੁਸ੍ਸਰਿਤਾਤਿ ਪੁਨਪ੍ਪੁਨਂ ਸਰਿਤਾ. ਅਯਂ ਵੁਚ੍ਚਤਿ ਸਤਿਸਮ੍ਬੋਜ੍ਝਙ੍ਗੋਤਿ ਅਯਂ ਏਵਂ ਉਪ੍ਪਨ੍ਨਾ ਸੇਸਬੋਜ੍ਝਙ੍ਗਸਮੁਟ੍ਠਾਪਿਕਾ ਵਿਪਸ੍ਸਨਾਸਮ੍ਪਯੁਤ੍ਤਾ ਸਤਿ ਸਤਿਸਮ੍ਬੋਜ੍ਝਙ੍ਗੋ ਨਾਮ ਕਥੀਯਤਿ.

ਸੋ ਤਥਾ ਸਤੋ ਵਿਹਰਨ੍ਤੋਤਿ ਸੋ ਭਿਕ੍ਖੁ ਤੇਨਾਕਾਰੇਨ ਉਪ੍ਪਨ੍ਨਾਯ ਸਤਿਯਾ ਸਤੋ ਹੁਤ੍ਵਾ ਵਿਹਰਨ੍ਤੋ. ਤਂ ਧਮ੍ਮਨ੍ਤਿ ਤਂ ਚਿਰਕਤਂ ਚਿਰਭਾਸਿਤਂ ਹੇਟ੍ਠਾ ਵੁਤ੍ਤਪ੍ਪਕਾਰਂ ਧਮ੍ਮਂ. ਪਞ੍ਞਾਯ ਪਵਿਚਿਨਤੀਤਿ ਪਞ੍ਞਾਯ ‘ਅਨਿਚ੍ਚਂ ਦੁਕ੍ਖਂ ਅਨਤ੍ਤਾ’ਤਿ ਪਵਿਚਿਨਤਿ. ਪਵਿਚਰਤੀਤਿ ‘ਅਨਿਚ੍ਚਂ ਦੁਕ੍ਖਂ ਅਨਤ੍ਤਾ’ਤਿ ਤਤ੍ਥ ਪਞ੍ਞਂ ਚਰਾਪੇਨ੍ਤੋ ਪਵਿਚਰਤਿ. ਪਰਿਵੀਮਂਸਂ ਆਪਜ੍ਜਤੀਤਿ ਓਲੋਕਨਂ ਗਵੇਸਨਂ ਆਪਜ੍ਜਤਿ. ਅਯਂ ਵੁਚ੍ਚਤੀਤਿ ਇਦਂ ਵੁਤ੍ਤਪ੍ਪਕਾਰਂ ਬੋਜ੍ਝਙ੍ਗਸਮੁਟ੍ਠਾਪਕਂ ਵਿਪਸ੍ਸਨਾਞਾਣਂ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ ਨਾਮ ਵੁਚ੍ਚਤਿ.

ਤਸ੍ਸ ਤਂ ਧਮ੍ਮਨ੍ਤਿ ਤਸ੍ਸ ਭਿਕ੍ਖੁਨੋ ਤਂ ਹੇਟ੍ਠਾ ਵੁਤ੍ਤਪ੍ਪਕਾਰਂ ਧਮ੍ਮਂ. ਆਰਦ੍ਧਂ ਹੋਤੀਤਿ ਪਰਿਪੁਣ੍ਣਂ ਹੋਤਿ ਪਗ੍ਗਹਿਤਂ. ਅਸਲ੍ਲੀਨਨ੍ਤਿ ਆਰਦ੍ਧਤ੍ਤਾਯੇਵ ਅਸਲ੍ਲੀਨਂ. ਅਯਂ ਵੁਚ੍ਚਤੀਤਿ ਇਦਂ ਬੋਜ੍ਝਙ੍ਗਸਮੁਟ੍ਠਾਪਕਂ ਵਿਪਸ੍ਸਨਾਸਮ੍ਪਯੁਤ੍ਤਂ ਵੀਰਿਯਂ ਵੀਰਿਯਸਮ੍ਬੋਜ੍ਝਙ੍ਗੋ ਨਾਮ ਵੁਚ੍ਚਤਿ.

ਨਿਰਾਮਿਸਾਤਿ ਕਾਮਾਮਿਸਲੋਕਾਮਿਸਵਟ੍ਟਾਮਿਸਾਨਂ ਅਭਾਵੇਨ ਨਿਰਾਮਿਸਾ ਪਰਿਸੁਦ੍ਧਾ. ਅਯਂ ਵੁਚ੍ਚਤੀਤਿ ਅਯਂ ਬੋਜ੍ਝਙ੍ਗਸਮੁਟ੍ਠਾਪਿਕਾ ਵਿਪਸ੍ਸਨਾਸਮ੍ਪਯੁਤ੍ਤਾ ਪੀਤਿ ਪੀਤਿਸਮ੍ਬੋਜ੍ਝਙ੍ਗੋ ਨਾਮ ਵੁਚ੍ਚਤਿ.

ਪੀਤਿਮਨਸ੍ਸਾਤਿ ਪੀਤਿਸਮ੍ਪਯੁਤ੍ਤਚਿਤ੍ਤਸ੍ਸ. ਕਾਯੋਪਿ ਪਸ੍ਸਮ੍ਭਤੀਤਿ ਖਨ੍ਧਤ੍ਤਯਸਙ੍ਖਾਤੋ ਨਾਮਕਾਯੋ ਕਿਲੇਸਦਰਥਪਟਿਪ੍ਪਸ੍ਸਦ੍ਧਿਯਾ ਪਸ੍ਸਮ੍ਭਤਿ. ਚਿਤ੍ਤਮ੍ਪੀਤਿ ਵਿਞ੍ਞਾਣਕ੍ਖਨ੍ਧੋਪਿ ਤਥੇਵ ਪਸ੍ਸਮ੍ਭਤਿ. ਅਯਂ ਵੁਚ੍ਚਤੀਤਿ ਅਯਂ ਬੋਜ੍ਝਙ੍ਗਸਮੁਟ੍ਠਾਪਿਕਾ ਵਿਪਸ੍ਸਨਾਸਮ੍ਪਯੁਤ੍ਤਾ ਪਸ੍ਸਦ੍ਧਿ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ ਨਾਮ ਵੁਚ੍ਚਤਿ.

ਪਸ੍ਸਦ੍ਧਕਾਯਸ੍ਸ ਸੁਖਿਨੋਤਿ ਪਸ੍ਸਦ੍ਧਕਾਯਤਾਯ ਉਪ੍ਪਨ੍ਨਸੁਖੇਨ ਸੁਖਿਤਸ੍ਸ. ਸਮਾਧਿਯਤੀਤਿ ਸਮ੍ਮਾ ਆਧਿਯਤਿ, ਨਿਚ੍ਚਲਂ ਹੁਤ੍ਵਾ ਆਰਮ੍ਮਣੇ ਠਪੀਯਤਿ, ਅਪ੍ਪਨਾਪ੍ਪਤ੍ਤਂ ਵਿਯ ਹੋਤਿ. ਅਯਂ ਵੁਚ੍ਚਤੀਤਿ ਅਯਂ ਬੋਜ੍ਝਙ੍ਗਸਮੁਟ੍ਠਾਪਿਕਾ ਵਿਪਸ੍ਸਨਾਸਮ੍ਪਯੁਤ੍ਤਾ ਚਿਤ੍ਤੇਕਗ੍ਗਤਾ ਸਮਾਧਿਸਮ੍ਬੋਜ੍ਝਙ੍ਗੋ ਨਾਮ ਵੁਚ੍ਚਤਿ.

ਤਥਾ ਸਮਾਹਿਤਨ੍ਤਿ ਤੇਨ ਅਪ੍ਪਨਾਪ੍ਪਤ੍ਤੇਨ ਵਿਯ ਸਮਾਧਿਨਾ ਸਮਾਹਿਤਂ. ਸਾਧੁਕਂ ਅਜ੍ਝੁਪੇਕ੍ਖਿਤਾ ਹੋਤੀਤਿ ਸੁਟ੍ਠੁ ਅਜ੍ਝੁਪੇਕ੍ਖਿਤਾ ਹੋਤਿ; ਤੇਸਂ ਧਮ੍ਮਾਨਂ ਪਹਾਨਵਡ੍ਢਨੇ ਅਬ੍ਯਾਵਟੋ ਹੁਤ੍ਵਾ ਅਜ੍ਝੁਪੇਕ੍ਖਤਿ. ਅਯਂ ਵੁਚ੍ਚਤੀਤਿ ਅਯਂ ਛਨ੍ਨਂ ਬੋਜ੍ਝਙ੍ਗਾਨਂ ਅਨੋਸਕ੍ਕਨਅਨਤਿਵਤ੍ਤਨਭਾਵਸਾਧਕੋ ਮਜ੍ਝਤ੍ਤਾਕਾਰੋ ਉਪੇਕ੍ਖਾਸਮ੍ਬੋਜ੍ਝਙ੍ਗੋ ਨਾਮ ਵੁਚ੍ਚਤਿ.

ਏਤ੍ਤਾਵਤਾ ਕਿਂ ਕਥਿਤਂ ਨਾਮ ਹੋਤਿ? ਅਪੁਬ੍ਬਂ ਅਚਰਿਮਂ ਏਕਚਿਤ੍ਤਕ੍ਖਣੇ ਨਾਨਾਰਸਲਕ੍ਖਣਾ ਪੁਬ੍ਬਭਾਗਵਿਪਸ੍ਸਨਾ ਬੋਜ੍ਝਙ੍ਗਾ ਕਥਿਤਾ ਹੋਨ੍ਤੀਤਿ.

ਪਠਮੋ ਨਯੋ.

੪੬੮-੪੬੯. ਇਦਾਨਿ ਯੇਨ ਪਰਿਯਾਯੇਨ ਸਤ੍ਤ ਬੋਜ੍ਝਙ੍ਗਾ ਚੁਦ੍ਦਸ ਹੋਨ੍ਤਿ, ਤਸ੍ਸ ਪਕਾਸਨਤ੍ਥਂ ਦੁਤਿਯਨਯਂ ਦਸ੍ਸੇਨ੍ਤੋ ਪੁਨ ਸਤ੍ਤ ਬੋਜ੍ਝਙ੍ਗਾਤਿਆਦਿਮਾਹ. ਤਤ੍ਰਾਯਂ ਅਨੁਪੁਬ੍ਬਪਦਵਣ੍ਣਨਾ – ਅਜ੍ਝਤ੍ਤਂ ਧਮ੍ਮੇਸੁ ਸਤੀਤਿ ਅਜ੍ਝਤ੍ਤਿਕਸਙ੍ਖਾਰੇ ਪਰਿਗ੍ਗਣ੍ਹਨ੍ਤਸ੍ਸ ਉਪ੍ਪਨ੍ਨਾ ਸਤਿ. ਬਹਿਦ੍ਧਾ ਧਮ੍ਮੇਸੁ ਸਤੀਤਿ ਬਹਿਦ੍ਧਾਸਙ੍ਖਾਰੇ ਪਰਿਗ੍ਗਣ੍ਹਨ੍ਤਸ੍ਸ ਉਪ੍ਪਨ੍ਨਾ ਸਤਿ. ਯਦਪੀਤਿ ਯਾਪਿ. ਤਦਪੀਤਿ ਸਾਪਿ. ਅਭਿਞ੍ਞਾਯਾਤਿ ਅਭਿਞ੍ਞੇਯ੍ਯਧਮ੍ਮੇ ਅਭਿਜਾਨਨਤ੍ਥਾਯ. ਸਮ੍ਬੋਧਾਯਾਤਿ ਸਮ੍ਬੋਧਿ ਵੁਚ੍ਚਤਿ ਮਗ੍ਗੋ, ਮਗ੍ਗਤ੍ਥਾਯਾਤਿ ਅਤ੍ਥੋ. ਨਿਬ੍ਬਾਨਾਯਾਤਿ ਵਾਨਂ ਵੁਚ੍ਚਤਿ ਤਣ੍ਹਾ; ਸਾ ਤਤ੍ਥ ਨਤ੍ਥੀਤਿ ਨਿਬ੍ਬਾਨਂ, ਤਦਤ੍ਥਾਯ, ਅਸਙ੍ਖਤਾਯ ਅਮਤਧਾਤੁਯਾ ਸਚ੍ਛਿਕਿਰਿਯਤ੍ਥਾਯ ਸਂਵਤ੍ਤਤੀਤਿ ਅਤ੍ਥੋ. ਧਮ੍ਮਵਿਚਯਸਮ੍ਬੋਜ੍ਝਙ੍ਗੇਪਿ ਏਸੇਵ ਨਯੋ.

ਕਾਯਿਕਂ ਵੀਰਿਯਨ੍ਤਿ ਚਙ੍ਕਮਂ ਅਧਿਟ੍ਠਹਨ੍ਤਸ੍ਸ ਉਪ੍ਪਨ੍ਨਵੀਰਿਯਂ. ਚੇਤਸਿਕਂ ਵੀਰਿਯਨ੍ਤਿ ‘‘ਨ ਤਾਵਾਹਂ ਇਮਂ ਪਲ੍ਲਙ੍ਕਂ ਭਿਨ੍ਦਿਸ੍ਸਾਮਿ ਯਾਵ ਮੇ ਨ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਚ੍ਚਿਸ੍ਸਤੀ’’ਤਿ ਏਵਂ ਕਾਯਪਯੋਗਂ ਵਿਨਾ ਉਪ੍ਪਨ੍ਨਵੀਰਿਯਂ. ਕਾਯਪਸ੍ਸਦ੍ਧੀਤਿ ਤਿਣ੍ਣਂ ਖਨ੍ਧਾਨਂ ਦਰਥਪਸ੍ਸਦ੍ਧਿ. ਚਿਤ੍ਤਪਸ੍ਸਦ੍ਧੀਤਿ ਵਿਞ੍ਞਾਣਕ੍ਖਨ੍ਧਸ੍ਸ ਦਰਥਪਸ੍ਸਦ੍ਧਿ. ਉਪੇਕ੍ਖਾਸਮ੍ਬੋਜ੍ਝਙ੍ਗੇ ਸਤਿਸਮ੍ਬੋਜ੍ਝਙ੍ਗਸਦਿਸੋਵ ਵਿਨਿਚ੍ਛਯੋ. ਇਮਸ੍ਮਿਂ ਨਯੇ ਸਤ੍ਤ ਬੋਜ੍ਝਙ੍ਗਾ ਲੋਕਿਯਲੋਕੁਤ੍ਤਰਮਿਸ੍ਸਕਾ ਕਥਿਤਾ.

ਪੋਰਾਣਕਤ੍ਥੇਰਾ ਪਨ ‘ਏਤ੍ਤਕੇਨ ਪਾਕਟਂ ਨ ਹੋਤੀ’ਤਿ ਵਿਭਜਿਤ੍ਵਾ ਦਸ੍ਸੇਸੁਂ. ਏਤੇਸੁ ਹਿ ਅਜ੍ਝਤ੍ਤਧਮ੍ਮੇਸੁ ਸਤਿ ਪਵਿਚਯੋ ਉਪੇਕ੍ਖਾਤਿ ਇਮੇ ਤਯੋ ਅਤ੍ਤਨੋ ਖਨ੍ਧਾਰਮ੍ਮਣਤ੍ਤਾ ਲੋਕਿਯਾਵ ਹੋਨ੍ਤਿ. ਤਥਾ ਮਗ੍ਗਂ ਅਪ੍ਪਤ੍ਤਂ ਕਾਯਿਕਵੀਰਿਯਂ. ਅਵਿਤਕ੍ਕਅਵਿਚਾਰਾ ਪਨ ਪੀਤਿਸਮਾਧਿਯੋ ਲੋਕੁਤ੍ਤਰਾ ਹੋਨ੍ਤਿ. ਸੇਸਾ ਲੋਕਿਯਲੋਕੁਤ੍ਤਰਮਿਸ੍ਸਕਾਤਿ.

ਤਤ੍ਥ ਅਜ੍ਝਤ੍ਤਂ ਤਾਵ ਧਮ੍ਮੇਸੁ ਸਤਿਪਵਿਚਯਉਪੇਕ੍ਖਾ ਅਜ੍ਝਤ੍ਤਾਰਮ੍ਮਣਾ, ਲੋਕੁਤ੍ਤਰਾ ਪਨ ਬਹਿਦ੍ਧਾਰਮ੍ਮਣਾਤਿ ਤੇਸਂ ਲੋਕੁਤ੍ਤਰਭਾਵੋ ਮਾ ਯੁਜ੍ਜਿਤ੍ਥ. ਚਙ੍ਕਮਪ੍ਪਯੋਗੇਨ ਨਿਬ੍ਬਤ੍ਤਵੀਰਿਯਮ੍ਪਿ ਲੋਕਿਯਨ੍ਤਿ ਵਦਨ੍ਤੋ ਨ ਕਿਲਮਤਿ. ਅਵਿਤਕ੍ਕਅਵਿਚਾਰਾ ਪਨ ਪੀਤਿਸਮਾਧਿਯੋ ਕਦਾ ਲੋਕੁਤ੍ਤਰਾ ਹੋਨ੍ਤੀਤਿ? ਕਾਮਾਵਚਰੇ ਤਾਵ ਪੀਤਿਸਮ੍ਬੋਜ੍ਝਙ੍ਗੋ ਲਬ੍ਭਤਿ, ਅਵਿਤਕ੍ਕਅਵਿਚਾਰਾ ਪੀਤਿ ਨ ਲਬ੍ਭਤਿ. ਰੂਪਾਵਚਰੇ ਅਵਿਤਕ੍ਕਅਵਿਚਾਰਾ ਪੀਤਿ ਲਬ੍ਭਤਿ, ਪੀਤਿਸਮ੍ਬੋਜ੍ਝਙ੍ਗੋ ਪਨ ਨ ਲਬ੍ਭਤਿ. ਅਰੂਪਾਵਚਰੇ ਸਬ੍ਬੇਨ ਸਬ੍ਬਂ ਨ ਲਬ੍ਭਤਿ. ਏਤ੍ਥ ਪਨ ਅਲਬ੍ਭਮਾਨਕਂ ਉਪਾਦਾਯ ਲਬ੍ਭਮਾਨਕਾਪਿ ਪਟਿਕ੍ਖਿਤ੍ਤਾ. ਏਵਮਯਂ ਅਵਿਤਕ੍ਕਅਵਿਚਾਰੋ ਪੀਤਿਸਮ੍ਬੋਜ੍ਝਙ੍ਗੋ ਕਾਮਾਵਚਰਤੋਪਿ ਨਿਕ੍ਖਨ੍ਤੋ ਰੂਪਾਵਚਰਤੋਪਿ ਅਰੂਪਾਵਚਰਤੋਪੀਤਿ ਨਿਬ੍ਬਤ੍ਤਿਤਲੋਕੁਤ੍ਤਰੋ ਯੇਵਾਤਿ ਕਥਿਤੋ.

ਤਥਾ ਕਾਮਾਵਚਰੇ ਸਮਾਧਿਸਮ੍ਬੋਜ੍ਝਙ੍ਗੋ ਲਬ੍ਭਤਿ, ਅਵਿਤਕ੍ਕਅਵਿਚਾਰੋ ਪਨ ਸਮਾਧਿ ਨ ਲਬ੍ਭਤਿ. ਰੂਪਾਵਚਰਅਰੂਪਾਵਚਰੇਸੁ ਅਵਿਤਕ੍ਕਅਵਿਚਾਰੋ ਸਮਾਧਿ ਲਬ੍ਭਤਿ, ਸਮਾਧਿਸਮ੍ਬੋਜ੍ਝਙ੍ਗੋ ਪਨ ਨ ਲਬ੍ਭਤਿ. ਏਤ੍ਥ ਪਨ ਅਲਬ੍ਭਮਾਨਕਂ ਉਪਾਦਾਯ ਲਬ੍ਭਮਾਨਕੋਪਿ ਪਟਿਕ੍ਖਿਤ੍ਤੋ. ਏਵਮਯਂ ਅਵਿਤਕ੍ਕਅਵਿਚਾਰੋ ਸਮਾਧਿ ਕਾਮਾਵਚਰਤੋਪਿ ਨਿਕ੍ਖਨ੍ਤੋ ਰੂਪਾਵਚਰਤੋਪਿ ਅਰੂਪਾਵਚਰਤੋਪੀਤਿ ਨਿਬ੍ਬਤ੍ਤਿਤਲੋਕੁਤ੍ਤਰੋ ਯੇਵਾਤਿ ਕਥਿਤੋ.

ਅਪਿਚ ਲੋਕਿਯਂ ਗਹੇਤ੍ਵਾ ਲੋਕੁਤ੍ਤਰੋ ਕਾਤਬ੍ਬੋ; ਲੋਕੁਤ੍ਤਰਂ ਗਹੇਤ੍ਵਾ ਲੋਕਿਯੋ ਕਾਤਬ੍ਬੋ. ਅਜ੍ਝਤ੍ਤਧਮ੍ਮੇਸੁ ਹਿ ਸਤਿਪਵਿਚਯਉਪੇਕ੍ਖਾਨਂ ਲੋਕੁਤ੍ਤਰਭਾਵਨਾਕਾਲੋਪਿ ਅਤ੍ਥਿ. ਤਤ੍ਰਿਦਂ ਸੁਤ੍ਤਂ – ‘‘ਅਜ੍ਝਤ੍ਤਵਿਮੋਕ੍ਖਂ ਖ੍ਵਾਹਂ, ਆਵੁਸੋ, ਸਬ੍ਬੁਪਾਦਾਨਕ੍ਖਯਂ ਵਦਾਮਿ; ਏਵਮਸ੍ਸਿਮੇ ਆਸਵਾ ਨਾਨੁਸੇਨ੍ਤੀ’’ਤਿ (ਸਂ. ਨਿ. ੨.੩੨ ਥੋਕਂ ਵਿਸਦਿਸਂ) ਇਮਿਨਾ ਸੁਤ੍ਤੇਨ ਲੋਕੁਤ੍ਤਰਾ ਹੋਨ੍ਤਿ. ਯਦਾ ਪਨ ਚਙ੍ਕਮਪਯੋਗੇਨ ਨਿਬ੍ਬਤ੍ਤੇ ਕਾਯਿਕਵੀਰਿਯੇ ਅਨੁਪਸਨ੍ਤੇਯੇਵ ਵਿਪਸ੍ਸਨਾ ਮਗ੍ਗੇਨ ਘਟੀਯਤਿ, ਤਦਾ ਤਂ ਲੋਕੁਤ੍ਤਰਂ ਹੋਤਿ. ਯੇ ਪਨ ਥੇਰਾ ‘‘ਕਸਿਣਜ੍ਝਾਨੇ, ਆਨਾਪਾਨਜ੍ਝਾਨੇ, ਬ੍ਰਹ੍ਮਵਿਹਾਰਜ੍ਝਾਨੇ ਚ ਬੋਜ੍ਝਙ੍ਗੋ ਉਦ੍ਧਰਨ੍ਤੋ ਨ ਵਾਰੇਤਬ੍ਬੋ’’ਤਿ ਵਦਨ੍ਤਿ, ਤੇਸਂ ਵਾਦੇ ਅਵਿਤਕ੍ਕਅਵਿਚਾਰਾ ਪੀਤਿਸਮਾਧਿਸਮ੍ਬੋਜ੍ਝਙ੍ਗਾ ਲੋਕਿਯਾ ਹੋਨ੍ਤੀਤਿ.

ਦੁਤਿਯੋ ਨਯੋ.

੪੭੦-੪੭੧. ਇਦਾਨਿ ਬੋਜ੍ਝਙ੍ਗਾਨਂ ਭਾਵਨਾਵਸੇਨ ਪਵਤ੍ਤਂ ਤਤਿਯਨਯਂ ਦਸ੍ਸੇਨ੍ਤੋ ਪੁਨ ਸਤ੍ਤ ਬੋਜ੍ਝਙ੍ਗਾਤਿਆਦਿਮਾਹ. ਤਤ੍ਥਾਪਿ ਅਯਂ ਅਨੁਪੁਬ੍ਬਪਦਵਣ੍ਣਨਾ – ਭਾਵੇਤੀਤਿ ਵਡ੍ਢੇਤਿ; ਅਤ੍ਤਨੋ ਸਨ੍ਤਾਨੇ ਪੁਨਪ੍ਪੁਨਂ ਜਨੇਤਿ ਅਭਿਨਿਬ੍ਬਤ੍ਤੇਤਿ. ਵਿਵੇਕਨਿਸ੍ਸਿਤਨ੍ਤਿ ਵਿਵੇਕੇ ਨਿਸ੍ਸਿਤਂ. ਵਿਵੇਕੋਤਿ ਵਿਵਿਤ੍ਤਤਾ. ਸੋ ਚਾਯਂ ਤਦਙ੍ਗਵਿਵੇਕੋ, ਵਿਕ੍ਖਮ੍ਭਨਸਮੁਚ੍ਛੇਦਪਟਿਪ੍ਪਸ੍ਸਦ੍ਧਿਨਿਸ੍ਸਰਣਵਿਵੇਕੋਤਿ ਪਞ੍ਚਵਿਧੋ. ਤਤ੍ਥ ਤਦਙ੍ਗਵਿਵੇਕੋ ਨਾਮ ਵਿਪਸ੍ਸਨਾ. ਵਿਕ੍ਖਮ੍ਭਨਵਿਵੇਕੋ ਨਾਮ ਅਟ੍ਠ ਸਮਾਪਤ੍ਤਿਯੋ. ਸਮੁਚ੍ਛੇਦਵਿਵੇਕੋ ਨਾਮ ਮਗ੍ਗੋ. ਪਟਿਪ੍ਪਸ੍ਸਦ੍ਧਿਵਿਵੇਕੋ ਨਾਮ ਫਲਂ. ਨਿਸ੍ਸਰਣਵਿਵੇਕੋ ਨਾਮ ਸਬ੍ਬਨਿਮਿਤ੍ਤਨਿਸ੍ਸਟਂ ਨਿਬ੍ਬਾਨਂ. ਏਵਮੇਤਸ੍ਮਿਂ ਪਞ੍ਚਵਿਧੇ ਵਿਵੇਕੇ ਨਿਸ੍ਸਿਤਂ ਵਿਵੇਕਨਿਸ੍ਸਿਤਨ੍ਤਿ ਤਦਙ੍ਗਵਿਵੇਕਨਿਸ੍ਸਿਤਂ ਸਮੁਚ੍ਛੇਦਵਿਵੇਕਨਿਸ੍ਸਿਤਂ ਨਿਸ੍ਸਰਣਵਿਵੇਕਨਿਸ੍ਸਿਤਞ੍ਚ ਸਤਿਸਮ੍ਬੋਜ੍ਝਙ੍ਗਂ ਭਾਵੇਤੀਤਿ ਅਯਮਤ੍ਥੋ ਵੇਦਿਤਬ੍ਬੋ.

ਤਥਾ ਹਿ ਅਯਂ ਸਤਿਸਮ੍ਬੋਜ੍ਝਙ੍ਗਭਾਵਨਾਨੁਯੋਗਮਨੁਯੁਤ੍ਤੋ ਯੋਗੀ ਵਿਪਸ੍ਸਨਾਕ੍ਖਣੇ ਕਿਚ੍ਚਤੋ ਤਦਙ੍ਗਵਿਵੇਕਨਿਸ੍ਸਿਤਂ, ਅਜ੍ਝਾਸਯਤੋ ਨਿਸ੍ਸਰਣਵਿਵੇਕਨਿਸ੍ਸਿਤਂ, ਮਗ੍ਗਕਾਲੇ ਪਨ ਕਿਚ੍ਚਤੋ ਸਮੁਚ੍ਛੇਦਵਿਵੇਕਨਿਸ੍ਸਿਤਂ, ਆਰਮ੍ਮਣਤੋ ਨਿਸ੍ਸਰਣਵਿਵੇਕਨਿਸ੍ਸਿਤਂ, ਸਤਿਸਮ੍ਬੋਜ੍ਝਙ੍ਗਂ ਭਾਵੇਤਿ. ਪਞ੍ਚਵਿਵੇਕਨਿਸ੍ਸਿਤਮ੍ਪੀਤਿ ਏਕੇ. ਤੇ ਹਿ ਨ ਕੇਵਲਂ ਬਲਵਵਿਪਸ੍ਸਨਾਮਗ੍ਗਫਲਕ੍ਖਣੇਸੁ ਏਵ ਬੋਜ੍ਝਙ੍ਗਂ ਉਦ੍ਧਰਨ੍ਤਿ, ਵਿਪਸ੍ਸਨਾਪਾਦਕਕਸਿਣਜ੍ਝਾਨਆਨਾਪਾਨਾਸੁਭਬ੍ਰਹ੍ਮਵਿਹਾਰਜ੍ਝਾਨੇਸੁਪਿ ਉਦ੍ਧਰਨ੍ਤਿ, ਨ ਚ ਪਟਿਸਿਦ੍ਧਾ ਅਟ੍ਠਕਥਾਚਰਿਯੇਹਿ. ਤਸ੍ਮਾ ਤੇਸਂ ਮਤੇਨ ਏਤੇਸਂ ਝਾਨਾਨਂ ਪਵਤ੍ਤਿਕ੍ਖਣੇ ਕਿਚ੍ਚਤੋ ਏਵ ਵਿਕ੍ਖਮ੍ਭਨਵਿਵੇਕਨਿਸ੍ਸਿਤਂ. ਯਥਾ ਚ ਵਿਪਸ੍ਸਨਾਕ੍ਖਣੇ ‘‘ਅਜ੍ਝਾਸਯਤੋ ਨਿਸ੍ਸਰਣਵਿਵੇਕਨਿਸ੍ਸਿਤ’’ਨ੍ਤਿ ਵੁਤ੍ਤਂ, ਏਵਂ ‘‘ਪਟਿਪ੍ਪਸ੍ਸਦ੍ਧਿਵਿਵੇਕਨਿਸ੍ਸਿਤਮ੍ਪਿ ਭਾਵੇਤੀ’’ਤਿ ਵਤ੍ਤੁਂ ਵਟ੍ਟਤਿ. ਏਸ ਨਯੋ ਵਿਰਾਗਨਿਸ੍ਸਿਤਾਦੀਸੁ. ਵਿਵੇਕਤ੍ਥਾ ਏਵ ਹਿ ਵਿਰਾਗਾਦਯੋ.

ਕੇਵਲਞ੍ਚੇਤ੍ਥ ਵੋਸ੍ਸਗ੍ਗੋ ਦੁਵਿਧੋ – ਪਰਿਚ੍ਚਾਗਵੋਸ੍ਸਗ੍ਗੋ ਚ ਪਕ੍ਖਨ੍ਦਨਵੋਸ੍ਸਗ੍ਗੋ ਚਾਤਿ. ਤਤ੍ਥ ‘ਪਰਿਚ੍ਚਾਗਵੋਸ੍ਸਗ੍ਗੋ’ਤਿ ਵਿਪਸ੍ਸਨਾਕ੍ਖਣੇ ਚ ਤਦਙ੍ਗਵਸੇਨ ਮਗ੍ਗਕ੍ਖਣੇ ਚ ਸਮੁਚ੍ਛੇਦਵਸੇਨ ਕਿਲੇਸਪ੍ਪਹਾਨਂ. ‘ਪਕ੍ਖਨ੍ਦਨਵੋਸ੍ਸਗ੍ਗੋ’ਤਿ ਵਿਪਸ੍ਸਨਾਕ੍ਖਣੇ ਤਨ੍ਨਿਨ੍ਨਭਾਵੇਨ, ਮਗ੍ਗਕ੍ਖਣੇ ਪਨ ਆਰਮ੍ਮਣਕਰਣੇਨ ਨਿਬ੍ਬਾਨਪਕ੍ਖਨ੍ਦਨਂ. ਤਦੁਭਯਮ੍ਪਿ ਇਮਸ੍ਮਿਂ ਲੋਕਿਯਲੋਕੁਤ੍ਤਰਮਿਸ੍ਸਕੇ ਅਤ੍ਥਵਣ੍ਣਨਾਨਯੇ ਵਟ੍ਟਤਿ. ਤਥਾ ਹਿ ਅਯਂ ਸਤਿ ਸਮ੍ਬੋਜ੍ਝਙ੍ਗੋ ਯਥਾਵੁਤ੍ਤੇਨ ਪਕਾਰੇਨ ਕਿਲੇਸੇ ਪਰਿਚ੍ਚਜਤਿ, ਨਿਬ੍ਬਾਨਞ੍ਚ ਪਕ੍ਖਨ੍ਦਤਿ.

ਵੋਸ੍ਸਗ੍ਗਪਰਿਣਾਮਿਨ੍ਤਿ ਇਮਿਨਾ ਪਨ ਸਕਲੇਨ ਵਚਨੇਨ ਵੋਸ੍ਸਗ੍ਗਤ੍ਥਂ ਪਰਿਣਮਨ੍ਤਂ ਪਰਿਣਤਞ੍ਚ, ਪਰਿਪਚ੍ਚਨ੍ਤਂ ਪਰਿਪਕ੍ਕਞ੍ਚਾਤਿ ਇਦਂ ਵੁਤ੍ਤਂ ਹੋਤਿ. ਅਯਞ੍ਹਿ ਬੋਜ੍ਝਙ੍ਗਭਾਵਨਮਨੁਯੁਤ੍ਤੋ ਭਿਕ੍ਖੁ ਯਥਾ ਸਤਿਸਮ੍ਬੋਜ੍ਝਙ੍ਗੋ ਕਿਲੇਸਪਰਿਚ੍ਚਾਗਵੋਸ੍ਸਗ੍ਗਤ੍ਥਂ ਨਿਬ੍ਬਾਨਪਕ੍ਖਨ੍ਦਨਵੋਸ੍ਸਗ੍ਗਤ੍ਥਞ੍ਚ ਪਰਿਪਚ੍ਚਤਿ, ਯਥਾ ਚ ਪਰਿਪਕ੍ਕੋ ਹੋਤਿ, ਤਥਾ ਨਂ ਭਾਵੇਤੀਤਿ. ਏਸ ਨਯੋ ਸੇਸਬੋਜ੍ਝਙ੍ਗੇਸੁਪਿ. ਇਮਸ੍ਮਿਮ੍ਪਿ ਨਯੇ ਲੋਕਿਯਲੋਕੁਤ੍ਤਰਮਿਸ੍ਸਕਾ ਬੋਜ੍ਝਙ੍ਗਾ ਕਥਿਤਾਤਿ.

ਸੁਤ੍ਤਨ੍ਤਭਾਜਨੀਯਵਣ੍ਣਨਾ.