(੧੪) ੪. ਪੁਗ੍ਗਲਵਗ੍ਗੋ

੧. ਸਂਯੋਜਨਸੁਤ੍ਤਵਣ੍ਣਨਾ

੧੩੧. ਚਤੁਤ੍ਥਸ੍ਸ ਪਠਮੇ ਉਪਪਤ੍ਤਿਪਟਿਲਾਭਿਯਾਨੀਤਿ ਯੇਹਿ ਅਨਨ੍ਤਰਾ ਉਪਪਤ੍ਤਿਂ ਪਟਿਲਭਤਿ. ਭਵਪਟਿਲਾਭਿਯਾਨੀਤਿ ਉਪਪਤ੍ਤਿਭਵਸ੍ਸ ਪਟਿਲਾਭਾਯ ਪਚ੍ਚਯਾਨਿ. ਸਕਦਾਗਾਮਿਸ੍ਸਾਤਿ ਇਦਂ ਅਪ੍ਪਹੀਨਸਂਯੋਜਨੇਸੁ ਅਰਿਯੇਸੁ ਉਤ੍ਤਮਕੋਟਿਯਾ ਗਹਿਤਂ. ਯਸ੍ਮਾ ਪਨ ਅਨ੍ਤਰਾਪਰਿਨਿਬ੍ਬਾਯਿਸ੍ਸ ਅਨ੍ਤਰਾ ਉਪਪਤ੍ਤਿ ਨਤ੍ਥਿ, ਯਂ ਪਨ ਸੋ ਤਤ੍ਥ ਝਾਨਂ ਸਮਾਪਜ੍ਜਤਿ, ਤਂ ਕੁਸਲਤ੍ਤਾ ‘‘ਉਪਪਤ੍ਤਿਭਵਸ੍ਸ ਪਚ੍ਚਯੋ’’ ਤੇਵ ਸਙ੍ਖ੍ਯਂ ਗਚ੍ਛਤਿ. ਤਸ੍ਮਾਸ੍ਸ ‘‘ਉਪਪਤ੍ਤਿਪਟਿਲਾਭਿਯਾਨਿ ਸਂਯੋਜਨਾਨਿ ਪਹੀਨਾਨਿ, ਭਵਪਟਿਲਾਭਿਯਾਨਿ ਸਂਯੋਜਨਾਨਿ ਅਪ੍ਪਹੀਨਾਨੀ’’ਤਿ ਵੁਤ੍ਤਂ. ਓਰਮ੍ਭਾਗਿਯੇਸੁ ਚ ਅਪ੍ਪਹੀਨਂ ਉਪਾਦਾਯ ਸਕਦਾਗਾਮਿਸ੍ਸ ਅਵਿਸੇਸੇਨ ‘‘ਓਰਮ੍ਭਾਗਿਯਾਨਿ ਸਂਯੋਜਨਾਨਿ ਅਪ੍ਪਹੀਨਾਨੀ’’ਤਿ ਵੁਤ੍ਤਂ. ਸੇਸਮੇਤ੍ਥ ਉਤ੍ਤਾਨਮੇਵ.

੨. ਪਟਿਭਾਨਸੁਤ੍ਤਵਣ੍ਣਨਾ

੧੩੨. ਦੁਤਿਯੇ ਯੁਤ੍ਤਪ੍ਪਟਿਭਾਨੋ ਨੋ ਮੁਤ੍ਤਪ੍ਪਟਿਭਾਨੋਤਿ ਪਞ੍ਹਂ ਕਥੇਨ੍ਤੋ ਯੁਤ੍ਤਮੇਵ ਕਥੇਤਿ, ਸੀਘਂ ਪਨ ਨ ਕਥੇਤਿ, ਸਣਿਕਮੇਵ ਕਥੇਤੀਤਿ ਅਤ੍ਥੋ. ਇਮਿਨਾ ਨਯੇਨ ਸਬ੍ਬਪਦਾਨਿ ਵੇਦਿਤਬ੍ਬਾਨਿ.

੩. ਉਗ੍ਘਟਿਤਞ੍ਞੂਸੁਤ੍ਤਵਣ੍ਣਨਾ

੧੩੩. ਤਤਿਯੇ ਚਤੁਨ੍ਨਮ੍ਪਿ ਪੁਗ੍ਗਲਾਨਂ ਇਮਿਨਾ ਸੁਤ੍ਤੇਨ ਵਿਸੇਸੋ ਵੇਦਿਤਬ੍ਬੋ –

‘‘ਕਤਮੋ ਚ ਪੁਗ੍ਗਲੋ ਉਗ੍ਘਟਿਤਞ੍ਞੂ, ਯਸ੍ਸ ਪੁਗ੍ਗਲਸ੍ਸ ਸਹ ਉਦਾਹਟਵੇਲਾਯ ਧਮ੍ਮਾਭਿਸਮਯੋ ਹੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਉਗ੍ਘਟਿਤਞ੍ਞੂ. ਕਤਮੋ ਚ ਪੁਗ੍ਗਲੋ ਵਿਪਞ੍ਚਿਤਞ੍ਞੂ, ਯਸ੍ਸ ਪੁਗ੍ਗਲਸ੍ਸ ਵਿਤ੍ਥਾਰੇਨ ਅਤ੍ਥੇ ਵਿਭਜਿਯਮਾਨੇ ਧਮ੍ਮਾਭਿਸਮਯੋ ਹੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਵਿਪਞ੍ਚਿਤਞ੍ਞੂ. ਕਤਮੋ ਚ ਪੁਗ੍ਗਲੋ ਨੇਯ੍ਯੋ, ਯਸ੍ਸ ਪੁਗ੍ਗਲਸ੍ਸ ਉਦ੍ਦੇਸਤੋ ਪਰਿਪੁਚ੍ਛਤੋ ਯੋਨਿਸੋਮਨਸਿਕਰੋਤੋ ਕਲ੍ਯਾਣਮਿਤ੍ਤੇ ਸੇਵਤੋ ਭਜਤੋ ਪਯਿਰੁਪਾਸਤੋ ਅਨੁਪੁਬ੍ਬੇਨ ਧਮ੍ਮਾਭਿਸਮਯੋ ਹੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਨੇਯ੍ਯੋ. ਕਤਮੋ ਚ ਪੁਗ੍ਗਲੋ ਪਦਪਰਮੋ, ਯਸ੍ਸ ਪੁਗ੍ਗਲਸ੍ਸ ਬਹੁਮ੍ਪਿ ਸੁਣਤੋ ਬਹੁਮ੍ਪਿ ਭਣਤੋ ਬਹੁਮ੍ਪਿ ਧਾਰਯਤੋ ਬਹੁਮ੍ਪਿ ਵਾਚਯਤੋ ਨ ਤਾਯ ਜਾਤਿਯਾ ਧਮ੍ਮਾਭਿਸਮਯੋ ਹੋਤਿ, ਅਯਂ ਵੁਚ੍ਚਤਿ ਪੁਗ੍ਗਲੋ ਪਦਪਰਮੋ’’ਤਿ (ਪੁ. ਪ. ੧੪੮-੧੫੧).

੪. ਉਟ੍ਠਾਨਫਲਸੁਤ੍ਤਵਣ੍ਣਨਾ

੧੩੪. ਚਤੁਤ੍ਥੇ ਉਟ੍ਠਾਨਵੀਰਿਯੇਨੇਵ ਦਿਵਸਂ ਵੀਤਿਨਾਮੇਤ੍ਵਾ ਤਸ੍ਸ ਨਿਸ੍ਸਨ੍ਦਫਲਮਤ੍ਤਂ ਕਿਞ੍ਚਿਦੇਵ ਲਭਿਤ੍ਵਾ ਜੀਵਿਕਂ ਕਪ੍ਪੇਤਿ, ਤਂ ਪਨ ਉਟ੍ਠਾਨਂ ਆਗਮ੍ਮ ਕਿਞ੍ਚਿ ਪੁਞ੍ਞਫਲਂ ਨਪ੍ਪਟਿਲਭਤਿ, ਅਯਂ ਉਟ੍ਠਾਨਫਲੂਪਜੀਵੀ ਨ ਕਮ੍ਮਫਲੂਪਜੀਵੀ ਨਾਮ. ਚਾਤੁਮਹਾਰਾਜਿਕੇ ਪਨ ਦੇਵੇ ਆਦਿਂ ਕਤ੍ਵਾ ਸਬ੍ਬੇਪਿ ਦੇਵਾ ਉਟ੍ਠਾਨਵੀਰਿਯੇਨ ਵਿਨਾ ਪੁਞ੍ਞਫਲਸ੍ਸੇਵ ਉਪਜੀਵਨਤੋ ਕਮ੍ਮਫਲੂਪਜੀਵਿਨੋ ਨ ਉਟ੍ਠਾਨਫਲੂਪਜੀਵਿਨੋ ਨਾਮ. ਰਾਜਰਾਜਮਹਾਮਤ੍ਤਾਦਯੋ ਉਟ੍ਠਾਨਫਲੂਪਜੀਵਿਨੋ ਚ ਕਮ੍ਮਫਲੂਪਜੀਵਿਨੋ ਚ. ਨੇਰਯਿਕਸਤ੍ਤਾ ਨੇਵ ਉਟ੍ਠਾਨਫਲੂਪਜੀਵਿਨੋ ਨ ਕਮ੍ਮਫਲੂਪਜੀਵਿਨੋ. ਇਮਸ੍ਮਿਂ ਸੁਤ੍ਤੇ ਪੁਞ੍ਞਫਲਮੇਵ ਕਮ੍ਮਫਲਨ੍ਤਿ ਅਧਿਪ੍ਪੇਤਂ, ਤਞ੍ਚ ਤੇਸਂ ਨਤ੍ਥਿ.

੫. ਸਾਵਜ੍ਜਸੁਤ੍ਤਵਣ੍ਣਨਾ

੧੩੫. ਪਞ੍ਚਮੇ ਪਠਮੋ ਅਨ੍ਧਬਾਲਪੁਥੁਜ੍ਜਨੋ, ਦੁਤਿਯੋ ਅਨ੍ਤਰਨ੍ਤਰਾ ਕੁਸਲਕਾਰਕੋ ਲੋਕਿਯਪੁਥੁਜ੍ਜਨੋ, ਤਤਿਯੋ ਸੋਤਾਪਨ੍ਨੋ, ਸਕਦਾਗਾਮਿਅਨਾਗਾਮਿਨੋਪਿ ਏਤੇਨੇਵ ਸਙ੍ਗਹਿਤਾ. ਚਤੁਤ੍ਥੋ ਖੀਣਾਸਵੋ. ਸੋ ਹਿ ਏਕਨ੍ਤੇਨੇਵ ਅਨਵਜ੍ਜੋ.

੬-੭. ਸੀਲਸੁਤ੍ਤਾਦਿਵਣ੍ਣਨਾ

੧੩੬-੧੩੭. ਛਟ੍ਠੇ ਪਠਮੋ ਲੋਕਿਯਮਹਾਜਨੋ, ਦੁਤਿਯੋ ਸੁਕ੍ਖਵਿਪਸ੍ਸਕੋ ਸੋਤਾਪਨ੍ਨੋ ਚ ਸਕਦਾਗਾਮੀ ਚ, ਤਤਿਯੋ ਅਨਾਗਾਮੀ. ਸੋ ਹਿ ਯਸ੍ਮਾ ਤਙ੍ਖਣਿਕਮ੍ਪਿ ਉਪਪਤ੍ਤਿਨਿਮਿਤ੍ਤਕਂ ਝਾਨਂ ਪਟਿਲਭਤਿਯੇਵ, ਤਸ੍ਮਾ ਸੁਕ੍ਖਵਿਪਸ੍ਸਕੋਪਿ ਸਮਾਧਿਸ੍ਮਿਂ ਪਰਿਪੂਰਕਾਰੀਯੇਵ. ਚਤੁਤ੍ਥੋ ਖੀਣਾਸਵੋਯੇਵ. ਸੋ ਹਿ ਸਬ੍ਬੇਸਂ ਸੀਲਾਦਿਪਚ੍ਚਨੀਕਾਨਂ ਪਹੀਨਤ੍ਤਾ ਸਬ੍ਬਤ੍ਥ ਪਰਿਪੂਰਕਾਰੀ ਨਾਮ. ਸਤ੍ਤਮੇਪਿ ਛਟ੍ਠੇ ਵੁਤ੍ਤਨਯੇਨੇਵ ਪੁਗ੍ਗਲਪਰਿਚ੍ਛੇਦੋ ਵੇਦਿਤਬ੍ਬੋ.

੮. ਨਿਕਟ੍ਠਸੁਤ੍ਤਵਣ੍ਣਨਾ

੧੩੮. ਅਟ੍ਠਮੇ ਨਿਕਟ੍ਠਕਾਯੋਤਿ ਨਿਗ੍ਗਤਕਾਯੋ. ਅਨਿਕਟ੍ਠਚਿਤ੍ਤੋਤਿ ਅਨੁਪਵਿਟ੍ਠਚਿਤ੍ਤੋ. ਕਾਯੇਨੇਵ ਗਾਮਤੋ ਨਿਕ੍ਖਨ੍ਤੋ, ਚਿਤ੍ਤੇਨ ਅਰਞ੍ਞੇ ਵਸਨ੍ਤੋਪਿ ਗਾਮਮੇਵ ਪਵਿਟ੍ਠੋਤਿ ਵੁਤ੍ਤਂ ਹੋਤਿ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

੯. ਧਮ੍ਮਕਥਿਕਸੁਤ੍ਤਵਣ੍ਣਨਾ

੧੩੯. ਨਵਮੇ ਅਸਹਿਤਨ੍ਤਿ ਅਤ੍ਥੇਨ ਅਸਂਯੁਤ੍ਤਂ. ਨ ਕੁਸਲਾ ਹੋਤੀਤਿ ਨ ਛੇਕਾ ਹੋਤਿ. ਸਹਿਤਾਸਹਿਤਸ੍ਸਾਤਿ ਅਤ੍ਥਨਿਸ੍ਸਿਤਸ੍ਸ ਵਾ ਅਨਿਸ੍ਸਿਤਸ੍ਸ ਵਾ. ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

੧੦. ਵਾਦੀਸੁਤ੍ਤਵਣ੍ਣਨਾ

੧੪੦. ਦਸਮੇ ਅਤ੍ਥਤੋ ਪਰਿਯਾਦਾਨਂ ਗਚ੍ਛਤੀਤਿ ਅਟ੍ਠਕਥਂ ਪੁਚ੍ਛਿਤੋ ਪਰਿਯਾਦਾਨਂ ਪਰਿਕ੍ਖਯਂ ਗਚ੍ਛਤਿ, ਕਥੇਤੁਂ ਨ ਸਕ੍ਕੋਤਿ. ਨੋ ਬ੍ਯਞ੍ਜਨਤੋਤਿ ਬ੍ਯਞ੍ਜਨਂ ਪਨਸ੍ਸ ਪਵਤ੍ਤਤਿ ਨ ਪਰਿਯਾਦਿਯਤਿ. ਏਸੇਵ ਨਯੋ ਸਬ੍ਬਤ੍ਥਾਤਿ.

ਪੁਗ੍ਗਲਵਗ੍ਗੋ ਚਤੁਤ੍ਥੋ.