੩. ਵਿਨਯਪੇਯ੍ਯਾਲਂ
੨੦੧. ਦ੍ਵੇਮੇ, ਭਿਕ੍ਖਵੇ, ਅਤ੍ਥਵਸੇ ਪਟਿਚ੍ਚਾਤਿ, ਭਿਕ੍ਖਵੇ, ਦ੍ਵੇ ਅਤ੍ਥੇ ਨਿਸ੍ਸਾਯ ਦ੍ਵੇ ਕਾਰਣਾਨਿ ਸਨ੍ਧਾਯ. ਸਿਕ੍ਖਾਪਦਂ ਪਞ੍ਞਤ੍ਤਨ੍ਤਿ ਸਿਕ੍ਖਾਕੋਟ੍ਠਾਸੋ ਠਪਿਤੋ. ਸਙ੍ਘਸੁਟ੍ਠੁਤਾਯਾਤਿ ਸਙ੍ਘਸ੍ਸ ਸੁਟ੍ਠੁਭਾਵਾਯ, ‘‘ਸੁਟ੍ਠੁ, ਭਨ੍ਤੇ’’ਤਿ ਵਤ੍ਵਾ ਸਮ੍ਪਟਿਚ੍ਛਨਤ੍ਥਾਯਾਤਿ ਅਤ੍ਥੋ. ਸਙ੍ਘਫਾਸੁਤਾਯਾਤਿ ਸਙ੍ਘਸ੍ਸ ਫਾਸੁਵਿਹਾਰਤ੍ਥਾਯ. ਦੁਮ੍ਮਙ੍ਕੂਨਨ੍ਤਿ ਦੁਸ੍ਸੀਲਾਨਂ. ਪੇਸਲਾਨਨ੍ਤਿ ਪੀਯਸੀਲਾਨਂ. ਦਿਟ੍ਠਧਮ੍ਮਿਕਾਨਂ ਆਸਵਾਨਨ੍ਤਿ ਦਿਟ੍ਠਧਮ੍ਮੇ ਇਮਸ੍ਮਿਂਯੇਵ ਅਤ੍ਤਭਾਵੇ ਵੀਤਿਕ੍ਕਮਪਚ੍ਚਯਾ ਪਟਿਲਦ੍ਧਬ੍ਬਾਨਂ ਵਧਬਨ੍ਧਨਾਦਿਦੁਕ੍ਖਧਮ੍ਮਸਙ੍ਖਾਤਾਨਂ ਆਸਵਾਨਂ. ਸਂਵਰਾਯਾਤਿ ਪਿਦਹਨਤ੍ਥਾਯ. ਸਮ੍ਪਰਾਯਿਕਾਨਨ੍ਤਿ ਤਥਾਰੂਪਾਨਂਯੇਵ ਅਪਾਯਦੁਕ੍ਖਸਙ੍ਖਾਤਾਨਂ ਸਮ੍ਪਰਾਯੇ ਉਪ੍ਪਜ੍ਜਨਕਆਸਵਾਨਂ. ਪਟਿਘਾਤਾਯਾਤਿ ਪਟਿਸੇਧਨਤ੍ਥਾਯ. ਵੇਰਾਨਨ੍ਤਿ ਅਕੁਸਲਵੇਰਾਨਮ੍ਪਿ ਪੁਗ੍ਗਲਵੇਰਾਨਮ੍ਪਿ. ਵਜ੍ਜਾਨਨ੍ਤਿ ਦੋਸਾਨਂ. ਤੇ ਏਵ ਵਾ ਦੁਕ੍ਖਧਮ੍ਮਾ ਵਜ੍ਜਨੀਯਤ੍ਤਾ ਇਧ ਵਜ੍ਜਾਤਿ ਅਧਿਪ੍ਪੇਤਾ. ਭਯਾਨਨ੍ਤਿ ਚਿਤ੍ਤੁਤ੍ਰਾਸਭਯਾਨਮ੍ਪਿ ਭਯਹੇਤੂਨਂ ਤੇਸਂਯੇਵ ਦੁਕ੍ਖਧਮ੍ਮਾਨਮ੍ਪਿ. ਅਕੁਸਲਾਨਨ੍ਤਿ ਅਕ੍ਖਮਟ੍ਠੇਨ ਅਕੁਸਲਸਙ੍ਖਾਤਾਨਂ ਦੁਕ੍ਖਧਮ੍ਮਾਨਂ. ਗਿਹੀਨਂ ਅਨੁਕਮ੍ਪਾਯਾਤਿ ਗਿਹੀਸੁ ਉਜ੍ਝਾਯਨ੍ਤੇਸੁ ਪਞ੍ਞਤ੍ਤਸਿਕ੍ਖਾਪਦਂ ਗਿਹੀਨਂ ਅਨੁਕਮ੍ਪਾਯ ਪਞ੍ਞਤ੍ਤਂ ਨਾਮ. ਪਾਪਿਚ੍ਛਾਨਂ ਪਕ੍ਖੁਪਚ੍ਛੇਦਾਯਾਤਿ ਪਾਪਿਚ੍ਛਾ ਪਕ੍ਖਂ ਨਿਸ੍ਸਾਯ ਸਙ੍ਘਂ ਭਿਨ੍ਦੇਯ੍ਯੁਨ੍ਤਿ ਤੇਸਂ ਪਕ੍ਖੁਪਚ੍ਛੇਦਨਤ੍ਥਾਯ. ਅਪ੍ਪਸਨ੍ਨਾਨਂ ਪਸਾਦਾਯਾਤਿ ਪੁਬ੍ਬੇ ਅਪ੍ਪਸਨ੍ਨਾਨਮ੍ਪਿ ਪਣ੍ਡਿਤਮਨੁਸ੍ਸਾਨਂ ਸਿਕ੍ਖਾਪਦਪਞ੍ਞਤ੍ਤਿਸਮ੍ਪਦਂ ਦਿਸ੍ਵਾ ਪਸਾਦੁਪ੍ਪਤ੍ਤਿਅਤ੍ਥਾਯ. ਪਸਨ੍ਨਾਨਂ ਭਿਯ੍ਯੋਭਾਵਾਯਾਤਿ ਪਸਨ੍ਨਾਨਂ ਉਪਰੂਪਰਿਪਸਾਦਭਾਵਾਯ. ਸਦ੍ਧਮ੍ਮਟ੍ਠਿਤਿਯਾਤਿ ਸਦ੍ਧਮ੍ਮਸ੍ਸ ਚਿਰਟ੍ਠਿਤਤ੍ਥਂ. ਵਿਨਯਾਨੁਗ੍ਗਹਾਯਾਤਿ ਪਞ੍ਚਵਿਧਸ੍ਸਾਪਿ ਵਿਨਯਸ੍ਸ ਅਨੁਗ੍ਗਣ੍ਹਨਤ੍ਥਾਯ.
੨੦੨-੨੩੦. ਪਾਤਿਮੋਕ੍ਖਂ ਪਞ੍ਞਤ੍ਤਨ੍ਤਿ ਭਿਕ੍ਖੁਪਾਤਿਮੋਕ੍ਖਂ ਭਿਕ੍ਖੁਨਿਪਾਤਿਮੋਕ੍ਖਨ੍ਤਿ ਦੁਵਿਧਂ ਪਾਤਿਮੋਕ੍ਖਂ ਪਞ੍ਞਤ੍ਤਂ. ਪਾਤਿਮੋਕ੍ਖੁਦ੍ਦੇਸੋਤਿ ਭਿਕ੍ਖੂਨਂ ਪਞ੍ਚ, ਭਿਕ੍ਖੁਨੀਨਂ ਚਤ੍ਤਾਰੋਤਿ ਨਵ ਪਾਤਿਮੋਕ੍ਖੁਦ੍ਦੇਸਾ ਪਞ੍ਞਤ੍ਤਾ. ਪਾਤਿਮੋਕ੍ਖਟ੍ਠਪਨਨ੍ਤਿ ਉਪੋਸਥਟ੍ਠਪਨਂ. ਪਵਾਰਣਾ ਪਞ੍ਞਤ੍ਤਾਤਿ ਚਾਤੁਦ੍ਦਸਿਕਾ ਪਨ੍ਨਰਸਿਕਾਤਿ ਦ੍ਵੇ ਪਵਾਰਣਾ ਪਞ੍ਞਤ੍ਤਾ. ਪਵਾਰਣਟ੍ਠਪਨਂ ਪਞ੍ਞਤ੍ਤਨ੍ਤਿ ਸਾਪਤ੍ਤਿਕਸ੍ਸ ਭਿਕ੍ਖੁਨੋ ਪਵਾਰਣਾ ਉਤ੍ਤਿਯਾ ਵਤ੍ਤਮਾਨਾਯ ਪਵਾਰਣਟ੍ਠਪਨਂ ਪਞ੍ਞਤ੍ਤਂ. ਤਜ੍ਜਨੀਯਕਮ੍ਮਾਦੀਸੁ ਭਿਕ੍ਖੂ ਵਾਚਾਸਤ੍ਤੀਹਿ ਵਿਤੁਦਨ੍ਤਾਨਂ ਪਣ੍ਡੁਕਲੋਹਿਤਕਾਨਂ ਭਿਕ੍ਖੂਨਂ ਤਜ੍ਜਨੀਯਕਮ੍ਮਂ (ਚੂਲ਼ਵ. ੧ ਆਦਯੋ) ਪਞ੍ਞਤ੍ਤਂ. ਬਾਲਸ੍ਸ ਅਬ੍ਯਤ੍ਤਸ੍ਸ ਸੇਯ੍ਯਸਕਸ੍ਸ ਭਿਕ੍ਖੁਨੋ ਨਿਯਸ੍ਸਕਮ੍ਮਂ ਪਞ੍ਞਤ੍ਤਂ. ਕੁਲਦੂਸਕੇ ਅਸ੍ਸਜਿਪੁਨਬ੍ਬਸੁਕੇ ਭਿਕ੍ਖੂ ਆਰਬ੍ਭ ਪਬ੍ਬਾਜਨੀਯਕਮ੍ਮਂ (ਚੂਲ਼ਵ. ੨੧ ਆਦਯੋ) ਪਞ੍ਞਤ੍ਤਂ. ਗਿਹੀਨਂ ਅਕ੍ਕੋਸਕਸ੍ਸ ਸੁਧਮ੍ਮਤ੍ਥੇਰਸ੍ਸ ਪਟਿਸਾਰਣੀਯਕਮ੍ਮਂ (ਚੂਲ਼ਵ. ੩੩ ਆਦਯੋ) ਪਞ੍ਞਤ੍ਤਂ. ਆਪਤ੍ਤਿਯਾ ਅਦਸ੍ਸਨਾਦੀਸੁ ਉਕ੍ਖੇਪਨੀਯਕਮ੍ਮਂ ਪਞ੍ਞਤ੍ਤਂ. ਗਰੁਕਾਪਤ੍ਤਿਂ ਆਪਨ੍ਨਸ੍ਸ ਪਟਿਚ੍ਛਨ੍ਨਾਯ ਆਪਤ੍ਤਿਯਾ ਪਰਿਵਾਸਦਾਨਂ ਪਞ੍ਞਤ੍ਤਂ. ਪਰਿਵਾਸੇ ਅਨ੍ਤਰਾਪਤ੍ਤਿਂ ਆਪਨ੍ਨਸ੍ਸ ਮੂਲਾਯ ਪਟਿਕਸ੍ਸਨਂ ਪਞ੍ਞਤ੍ਤਂ. ਪਟਿਚ੍ਛਨ੍ਨਾਯਪਿ ਅਪ੍ਪਟਿਚ੍ਛਨ੍ਨਾਯਪਿ ਆਪਤ੍ਤਿਯਾ ਮਾਨਤ੍ਤਦਾਨਂ ਪਞ੍ਞਤ੍ਤਂ. ਚਿਣ੍ਣਮਾਨਤ੍ਤਸ੍ਸ ਅਬ੍ਭਾਨਂ ਪਞ੍ਞਤ੍ਤਂ. ਸਮ੍ਮਾ ਵਤ੍ਤਨ੍ਤਸ੍ਸ ਓਸਾਰਣੀਯਂ ਪਞ੍ਞਤ੍ਤਂ. ਅਸਮ੍ਮਾਵਤ੍ਤਨਾਦੀਸੁ ਨਿਸ੍ਸਾਰਣੀਯਂ ਪਞ੍ਞਤ੍ਤਂ.
ਏਹਿਭਿਕ੍ਖੂਪਸਮ੍ਪਦਾ ਸਰਣਗਮਨੂਪਸਮ੍ਪਦਾ ਓਵਾਦੂਪਸਮ੍ਪਦਾ ਪਞ੍ਹਾਬ੍ਯਾਕਰਣੂਪਸਮ੍ਪਦਾ ਞਤ੍ਤਿਚਤੁਤ੍ਥਕਮ੍ਮੂਪਸਮ੍ਪਦਾ ਗਰੁਧਮ੍ਮੂਪਸਮ੍ਪਦਾ ਉਭਤੋਸਙ੍ਘੇ ਉਪਸਮ੍ਪਦਾ ਦੂਤੇਨ ਉਪਸਮ੍ਪਦਾਤਿ ਅਟ੍ਠਵਿਧਾ ਉਪਸਮ੍ਪਦਾ ਪਞ੍ਞਤ੍ਤਾ. ਞਤ੍ਤਿਕਮ੍ਮਂ ਨਵ ਠਾਨਾਨਿ ਗਚ੍ਛਤੀਤਿ ਏਵਂ ਨਵਟ੍ਠਾਨਿਕਂ ਞਤ੍ਤਿਕਮ੍ਮਂ ਪਞ੍ਞਤ੍ਤਂ. ਞਤ੍ਤਿਦੁਤਿਯਕਮ੍ਮਂ ਸਤ੍ਤ ਠਾਨਾਨਿ ਗਚ੍ਛਤੀਤਿ ਏਵਂ ਸਤ੍ਤਟ੍ਠਾਨਿਕਮੇਵ ਞਤ੍ਤਿਦੁਤਿਯਕਮ੍ਮਂ ਪਞ੍ਞਤ੍ਤਂ. ਞਤ੍ਤਿਚਤੁਤ੍ਥਕਮ੍ਮਂ ਸਤ੍ਤ ਠਾਨਾਨਿ ਗਚ੍ਛਤੀਤਿ ਏਵਂ ਸਤ੍ਤਟ੍ਠਾਨਿਕਮੇਵ ਞਤ੍ਤਿਚਤੁਤ੍ਥਕਮ੍ਮਂ ਪਞ੍ਞਤ੍ਤਂ. ਪਠਮਪਾਰਾਜਿਕਾਦੀਨਂ ਪਠਮਪਞ੍ਞਤ੍ਤਿ ਅਪਞ੍ਞਤ੍ਤੇ ਪਞ੍ਞਤ੍ਤਂ. ਤੇਸਂਯੇਵ ਅਨੁਪਞ੍ਞਤ੍ਤਿ ਪਞ੍ਞਤ੍ਤੇ ਅਨੁਪਞ੍ਞਤ੍ਤਂ. ਧਮ੍ਮਸਮ੍ਮੁਖਤਾ ਵਿਨਯਸਮ੍ਮੁਖਤਾ ਸਙ੍ਘਸਮ੍ਮੁਖਤਾ ਪੁਗ੍ਗਲਸਮ੍ਮੁਖਤਾਤਿ ਇਮਸ੍ਸ ਚਤੁਬ੍ਬਿਧਸ੍ਸ ਸਮ੍ਮੁਖੀਭਾਵਸ੍ਸ ਵਸੇਨ ਸਮ੍ਮੁਖਾਵਿਨਯੋ ਪਞ੍ਞਤ੍ਤੋ. ਸਤਿਵੇਪੁਲ੍ਲਪ੍ਪਤ੍ਤਸ੍ਸ ਖੀਣਾਸਵਸ੍ਸ ਅਚੋਦਨਤ੍ਥਾਯ ਸਤਿਵਿਨਯੋ ਪਞ੍ਞਤ੍ਤੋ. ਉਮ੍ਮਤ੍ਤਕਸ੍ਸ ਭਿਕ੍ਖੁਨੋ ਅਮੂਲ਼੍ਹਵਿਨਯੋ ਪਞ੍ਞਤ੍ਤੋ. ਅਪ੍ਪਟਿਞ੍ਞਾਯ ਚੁਦਿਤਕਸ੍ਸ ਆਪਤ੍ਤਿਯਾ ਅਤਰਣਤ੍ਥਂ ਪਟਿਞ੍ਞਾਤਕਰਣਂ ਪਞ੍ਞਤ੍ਤਂ. ਬਹੁਤਰਾਨਂ ਧਮ੍ਮਵਾਦੀਨਂ ਲਦ੍ਧਿਂ ਗਹੇਤ੍ਵਾ ਅਧਿਕਰਣਵੂਪਸਮਨਤ੍ਥਂ. ਯੇਭੁਯ੍ਯਸਿਕਾ ਪਞ੍ਞਤ੍ਤਾ. ਪਾਪੁਸ੍ਸਨ੍ਨਸ੍ਸ ਪੁਗ੍ਗਲਸ੍ਸ ਨਿਗ੍ਗਣ੍ਹਨਤ੍ਥਂ ਤਸ੍ਸਪਾਪਿਯਸਿਕਾ ਪਞ੍ਞਤ੍ਤਾ. ਭਣ੍ਡਨਾਦਿਵਸੇਨ ਬਹੁਂ ਅਸ੍ਸਾਮਣਕਂ ਕਤ੍ਵਾ ਆਪਤ੍ਤਿਂ ਆਪਨ੍ਨਾਨਂ ਭਿਕ੍ਖੂਨਂ ਠਪੇਤ੍ਵਾ ਥੁਲ੍ਲਵਜ੍ਜਂ ਠਪੇਤ੍ਵਾ ਗਿਹਿਪਟਿਸਂਯੁਤ੍ਤਞ੍ਚ ਅਵਸੇਸਾਪਤ੍ਤੀਨਂ ਵੂਪਸਮਨਤ੍ਥਾਯ ਤਿਣਵਤ੍ਥਾਰਕੋ ਪਞ੍ਞਤ੍ਤੋ.
ਵਿਨਯਪੇਯ੍ਯਾਲਂ ਨਿਟ੍ਠਿਤਂ.