(੬) ੧. ਪੁਗ੍ਗਲਵਗ੍ਗਵਣ੍ਣਨਾ

੫੩. ਦੁਤਿਯਪਣ੍ਣਾਸਕਸ੍ਸ ਪਠਮੇ ਚਕ੍ਕਵਤ੍ਤਿਨਾ ਸਦ੍ਧਿਂ ਗਹਿਤਤ੍ਤਾ ‘‘ਲੋਕਾਨੁਕਮ੍ਪਾਯਾ’’ਤਿ ਨ ਵੁਤ੍ਤਂ. ਏਤ੍ਥ ਚ ਚਕ੍ਕਵਤ੍ਤਿਨੋ ਉਪ੍ਪਤ੍ਤਿਯਾ ਦ੍ਵੇ ਸਮ੍ਪਤ੍ਤਿਯੋ ਲਭਨ੍ਤਿ, ਬੁਦ੍ਧਾਨਂ ਉਪ੍ਪਤ੍ਤਿਯਾ ਤਿਸ੍ਸੋਪਿ.

੫੪. ਦੁਤਿਯੇ ਅਚ੍ਛਰਿਯਮਨੁਸ੍ਸਾਤਿ ਆਚਿਣ੍ਣਮਨੁਸ੍ਸਾ ਅਬ੍ਭੁਤਮਨੁਸ੍ਸਾ.

੫੫. ਤਤਿਯੇ ਬਹੁਨੋ ਜਨਸ੍ਸ ਅਨੁਤਪ੍ਪਾ ਹੋਤੀਤਿ ਮਹਾਜਨਸ੍ਸ ਅਨੁਤਾਪਕਾਰੀ ਹੋਤਿ. ਤਤ੍ਥ ਚਕ੍ਕਵਤ੍ਤਿਨੋ ਕਾਲਕਿਰਿਯਾ ਏਕਚਕ੍ਕਵਾਲ਼ੇ ਦੇਵਮਨੁਸ੍ਸਾਨਂ ਅਨੁਤਾਪਂ ਕਰੋਤਿ, ਤਥਾਗਤਸ੍ਸ ਕਾਲਕਿਰਿਯਾ ਦਸਸੁ ਚਕ੍ਕਵਾਲ਼ਸਹਸ੍ਸੇਸੁ.

੫੬. ਚਤੁਤ੍ਥੇ ਥੂਪਾਰਹਾਤਿ ਥੂਪਸ੍ਸ ਯੁਤ੍ਤਾ ਅਨੁਚ੍ਛਵਿਕਾ. ਚਕ੍ਕਵਤ੍ਤਿਨੋ ਹਿ ਚੇਤਿਯਂ ਪਟਿਜਗ੍ਗਿਤ੍ਵਾ ਦ੍ਵੇ ਸਮ੍ਪਤ੍ਤਿਯੋ ਲਭਨ੍ਤਿ, ਬੁਦ੍ਧਾਨਂ ਚੇਤਿਯਂ ਪਟਿਜਗ੍ਗਿਤ੍ਵਾ ਤਿਸ੍ਸੋਪਿ.

੫੭. ਪਞ੍ਚਮੇ ਬੁਦ੍ਧਾਤਿ ਅਤ੍ਤਨੋ ਆਨੁਭਾਵੇਨ ਚਤ੍ਤਾਰਿ ਸਚ੍ਚਾਨਿ ਬੁਦ੍ਧਾ.

੫੮. ਛਟ੍ਠੇ ਫਲਨ੍ਤਿਯਾਤਿ ਸਦ੍ਦਂ ਕਰੋਨ੍ਤਿਯਾ. ਨ ਸਨ੍ਤਸਨ੍ਤੀਤਿ ਨ ਭਾਯਨ੍ਤਿ. ਤਤ੍ਥ ਖੀਣਾਸਵੋ ਅਤ੍ਤਨੋ ਸਕ੍ਕਾਯਦਿਟ੍ਠਿਯਾ ਪਹੀਨਤ੍ਤਾ ਨ ਭਾਯਤਿ, ਹਤ੍ਥਾਜਾਨੀਯੋ ਸਕ੍ਕਾਯਦਿਟ੍ਠਿਯਾ ਬਲਵਤ੍ਤਾਤਿ. ਸਤ੍ਤਮਟ੍ਠਮੇਸੁਪਿ ਏਸੇਵ ਨਯੋ.

੬੧. ਨਵਮੇ ਕਿਂਪੁਰਿਸਾਤਿ ਕਿਨ੍ਨਰਾ. ਮਾਨੁਸਿਂ ਵਾਚਂ ਨ ਭਾਸਨ੍ਤੀਤਿ ਮਨੁਸ੍ਸਕਥਂ ਨ ਕਥੇਨ੍ਤਿ. ਧਮ੍ਮਾਸੋਕਸ੍ਸ ਕਿਰ ਏਕਂ ਕਿਨ੍ਨਰਂ ਆਨੇਤ੍ਵਾ ਦਸ੍ਸੇਸੁਂ. ਸੋ ‘‘ਕਥਾਪੇਥ ਨ’’ਨ੍ਤਿ ਆਹ. ਕਿਨ੍ਨਰੋ ਕਥੇਤੁਂ ਨ ਇਚ੍ਛਤਿ. ਏਕੋ ਪੁਰਿਸੋ ‘‘ਅਹਮੇਤਂ ਕਥਾਪੇਸ੍ਸਾਮੀ’’ਤਿ ਹੇਟ੍ਠਾਪਾਸਾਦਂ ਓਤਾਰੇਤ੍ਵਾ ਦ੍ਵੇ ਖਾਣੁਕੇ ਕੋਟ੍ਟੇਤ੍ਵਾ ਉਕ੍ਖਲਿਂ ਆਰੋਪੇਸਿ. ਸਾ ਉਭਤੋਪਸ੍ਸੇਹਿ ਪਤਤਿ. ਤਂ ਦਿਸ੍ਵਾ ਕਿਨ੍ਨਰੋ ‘‘ਕਿਂ ਅਞ੍ਞਂ ਏਕਂ ਖਾਣੁਕਂ ਕੋਟ੍ਟੇਤੁਂ ਨ ਵਟ੍ਟਤੀ’’ਤਿ ਏਤ੍ਤਕਮੇਵ ਆਹ. ਪੁਨ ਅਪਰਭਾਗੇ ਦ੍ਵੇ ਕਿਨ੍ਨਰੇ ਆਨੇਤ੍ਵਾ ਦਸ੍ਸੇਸੁਂ. ਰਾਜਾ ‘‘ਕਥਾਪੇਥ ਨੇ’’ਤਿ ਆਹ. ਤੇ ਕਥੇਤੁਂ ਨ ਇਚ੍ਛਿਂਸੁ. ਏਕੋ ਪੁਰਿਸੋ ‘‘ਅਹਮੇਤੇ ਕਥਾਪੇਸ੍ਸਾਮੀ’’ਤਿ ਤੇ ਗਹੇਤ੍ਵਾ ਅਨ੍ਤਰਾਪਣਂ ਅਗਮਾਸਿ. ਤਤ੍ਥੇਕੋ ਅਮ੍ਬਪਕ੍ਕਞ੍ਚ ਮਚ੍ਛੇ ਚ ਅਦ੍ਦਸ, ਏਕੋ ਕਬਿਟ੍ਠਫਲਞ੍ਚ ਅਮ੍ਬਿਲਿਕਾਫਲਞ੍ਚ. ਤਤ੍ਥ ਪੁਰਿਮੋ ‘‘ਮਹਾਵਿਸਂ ਮਨੁਸ੍ਸਾ ਖਾਦਨ੍ਤਿ, ਕਥਂ ਤੇ ਕਿਲਾਸਿਨੋ ਨ ਹੋਨ੍ਤੀ’’ਤਿ ਆਹ. ਇਤਰੋ ‘‘ਕਥਂ ਇਮੇ ਏਤਂ ਨਿਸ੍ਸਾਯ ਕੁਟ੍ਠਿਨੋ ਨ ਹੋਨ੍ਤੀ’’ਤਿ ਆਹ. ਏਵਂ ਮਾਨੁਸਿਂ ਵਾਚਂ ਕਥੇਤੁਂ ਸਕ੍ਕੋਨ੍ਤਾਪਿ ਦ੍ਵੇ ਅਤ੍ਥੇ ਸਮ੍ਪਸ੍ਸਮਾਨਾ ਨ ਕਥੇਨ੍ਤੀਤਿ.

੬੨. ਦਸਮੇ ਅਪ੍ਪਟਿਵਾਨੋਤਿ ਅਨੁਕਣ੍ਠਿਤੋ ਅਪਚ੍ਚੋਸਕ੍ਕਿਤੋ.

੬੩. ਏਕਾਦਸਮੇ ਅਸਨ੍ਤਸਨ੍ਨਿਵਾਸਨ੍ਤਿ ਅਸਪ੍ਪੁਰਿਸਾਨਂ ਸਨ੍ਨਿਵਾਸਂ. ਨ ਵਦੇਯ੍ਯਾਤਿ ਓਵਾਦੇਨ ਵਾ ਅਨੁਸਾਸਨਿਯਾ ਵਾ ਨ ਵਦੇਯ੍ਯ, ਮਾ ਵਦਤੂਤਿ ਅਤ੍ਥੋ. ਥੇਰਮ੍ਪਾਹਂ ਨ ਵਦੇਯ੍ਯਨ੍ਤਿ ਅਹਮ੍ਪਿ ਥੇਰਂ ਭਿਕ੍ਖੁਂ ਓਵਾਦਾਨੁਸਾਸਨਿਵਸੇਨ ਨ ਵਦੇਯ੍ਯਂ. ਅਹਿਤਾਨੁਕਮ੍ਪੀਤਿ ਅਹਿਤਂ ਇਚ੍ਛਮਾਨੋ. ਨੋ ਹਿਤਾਨੁਕਮ੍ਪੀਤਿ ਹਿਤਂ ਅਨਿਚ੍ਛਮਾਨੋ. ਨੋਤਿ ਨਂ ਵਦੇਯ੍ਯਨ੍ਤਿ ‘‘ਅਹਂ ਤਵ ਵਚਨਂ ਨ ਕਰਿਸ੍ਸ’’ਨ੍ਤਿ ਨਂ ਵਦੇਯ੍ਯਂ. ਵਿਹੇਠੇਯ੍ਯਨ੍ਤਿ ਵਚਨਸ੍ਸ ਅਕਰਣੇਨ ਵਿਹੇਠੇਯ੍ਯਂ. ਪਸ੍ਸਮ੍ਪਿਸ੍ਸ ਨਪ੍ਪਟਿਕਰੇਯ੍ਯਨ੍ਤਿ ਪਸ੍ਸਨ੍ਤੋਪਿ ਜਾਨਨ੍ਤੋਪਿ ਅਹਂ ਤਸ੍ਸ ਵਚਨਂ ਨ ਕਰੇਯ੍ਯਂ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਸੁਕ੍ਕਪਕ੍ਖੇ ਪਨ ਸਾਧੂਤਿ ਨਂ ਵਦੇਯ੍ਯਨ੍ਤਿ ‘‘ਸਾਧੁ ਭਦ੍ਦਕਂ ਸੁਕਥਿਤਂ ਤਯਾ’’ਤਿ ਤਸ੍ਸ ਕਥਂ ਅਭਿਨਨ੍ਦਨ੍ਤੋ ਨਂ ਵਦੇਯ੍ਯਨ੍ਤਿ ਅਤ੍ਥੋ.

੬੪. ਦ੍ਵਾਦਸਮੇ ਉਭਤੋ ਵਚੀਸਂਸਾਰੋਤਿ ਦ੍ਵੀਸੁਪਿ ਪਕ੍ਖੇਸੁ ਅਞ੍ਞਮਞ੍ਞਂ ਅਕ੍ਕੋਸਨਪਚ੍ਚਕ੍ਕੋਸਨਵਸੇਨ ਸਂਸਰਮਾਨਾ ਵਾਚਾ ਵਚੀਸਂਸਾਰੋ. ਦਿਟ੍ਠਿਪਲ਼ਾਸੋਤਿ ਦਿਟ੍ਠਿਂ ਨਿਸ੍ਸਾਯ ਉਪ੍ਪਜ੍ਜਨਕੋ ਯੁਗਗ੍ਗਾਹਲਕ੍ਖਣੋ ਪਲ਼ਾਸੋ ਦਿਟ੍ਠਿਪਲ਼ਾਸੋ ਨਾਮ. ਚੇਤਸੋ ਆਘਾਤੋਤਿ ਕੋਪੋ. ਸੋ ਹਿ ਚਿਤ੍ਤਂ ਆਘਾਤੇਨ੍ਤੋ ਉਪ੍ਪਜ੍ਜਤਿ. ਅਪ੍ਪਚ੍ਚਯੋਤਿ ਅਤੁਟ੍ਠਾਕਾਰੋ, ਦੋਮਨਸ੍ਸਨ੍ਤਿ ਅਤ੍ਥੋ. ਅਨਭਿਰਦ੍ਧੀਤਿ ਕੋਪੋਯੇਵ. ਸੋ ਹਿ ਅਨਭਿਰਾਧਨਵਸੇਨ ਅਨਭਿਰਦ੍ਧੀਤਿ ਵੁਚ੍ਚਤਿ. ਅਜ੍ਝਤ੍ਤਂ ਅਵੂਪਸਨ੍ਤਂ ਹੋਤੀਤਿ ਸਬ੍ਬਮ੍ਪੇਤਂ ਨਿਯਕਜ੍ਝਤ੍ਤਸਙ੍ਖਾਤੇ ਅਤ੍ਤਨੋ ਚਿਤ੍ਤੇ ਚ ਸਦ੍ਧਿਵਿਹਾਰਿਕਅਨ੍ਤੇਵਾਸਿਕਸਙ੍ਖਾਤਾਯ ਅਤ੍ਤਨੋ ਪਰਿਸਾਯ ਚ ਅਵੂਪਸਨ੍ਤਂ ਹੋਤਿ. ਤਸ੍ਮੇਤਨ੍ਤਿ ਤਸ੍ਮਿਂ ਏਤਂ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਪੁਗ੍ਗਲਵਗ੍ਗੋ ਪਠਮੋ.