੩. ਅਕਮ੍ਮਨਿਯਵਗ੍ਗਵਣ੍ਣਨਾ

੨੧-੨੨. ਤਤਿਯਸ੍ਸ ਪਠਮੇ ਅਭਾਵਿਤਨ੍ਤਿ ਅਵਡ੍ਢਿਤਂ ਭਾਵਨਾਵਸੇਨ ਅਪ੍ਪਵਤ੍ਤਿਤਂ. ਅਕਮ੍ਮਨਿਯਂ ਹੋਤੀਤਿ ਕਮ੍ਮਕ੍ਖਮਂ ਕਮ੍ਮਯੋਗ੍ਗਂ ਨ ਹੋਤਿ. ਦੁਤਿਯੇ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ. ਏਤ੍ਥ ਚ ਪਠਮੇ ਚਿਤ੍ਤਨ੍ਤਿ ਵਟ੍ਟਵਸੇਨ ਉਪ੍ਪਨ੍ਨਚਿਤ੍ਤਂ, ਦੁਤਿਯੇ ਵਿਵਟ੍ਟਵਸੇਨ ਉਪ੍ਪਨ੍ਨਚਿਤ੍ਤਂ. ਤਤ੍ਥ ਚ ਵਟ੍ਟਂ ਵਟ੍ਟਪਾਦਂ, ਵਿਵਟ੍ਟਂ ਵਿਵਟ੍ਟਪਾਦਨ੍ਤਿ ਅਯਂ ਪਭੇਦੋ ਵੇਦਿਤਬ੍ਬੋ. ਵਟ੍ਟਂ ਨਾਮ ਤੇਭੂਮਕਵਟ੍ਟਂ, ਵਟ੍ਟਪਾਦਂ ਨਾਮ ਵਟ੍ਟਪਟਿਲਾਭਾਯ ਕਮ੍ਮਂ, ਵਿਵਟ੍ਟਂ ਨਾਮ ਨਵ ਲੋਕੁਤ੍ਤਰਧਮ੍ਮਾ, ਵਿਵਟ੍ਟਪਾਦਂ ਨਾਮ ਵਿਵਟ੍ਟਪਟਿਲਾਭਾਯ ਕਮ੍ਮਂ. ਇਤਿ ਇਮੇਸੁ ਸੁਤ੍ਤੇਸੁ ਵਟ੍ਟਵਿਵਟ੍ਟਮੇਵ ਕਥਿਤਨ੍ਤਿ.

੨੩-੨੪. ਤਤਿਯੇ ਵਟ੍ਟਵਸੇਨੇਵ ਉਪ੍ਪਨ੍ਨਚਿਤ੍ਤਂ ਵੇਦਿਤਬ੍ਬਂ. ਮਹਤੋ ਅਨਤ੍ਥਾਯ ਸਂਵਤ੍ਤਤੀਤਿ ਦੇਵਮਨੁਸ੍ਸਸਮ੍ਪਤ੍ਤਿਯੋ ਮਾਰਬ੍ਰਹ੍ਮਇਸ੍ਸਰਿਯਾਨਿ ਚ ਦਦਮਾਨਮ੍ਪਿ ਪੁਨਪ੍ਪੁਨਂ ਜਾਤਿਜਰਾਬ੍ਯਾਧਿਮਰਣਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸੇ ਖਨ੍ਧਧਾਤੁਆਯਤਨਪਟਿਚ੍ਚਸਮੁਪ੍ਪਾਦਵਟ੍ਟਾਨਿ ਚ ਦਦਮਾਨਂ ਕੇਵਲਂ ਦੁਕ੍ਖਕ੍ਖਨ੍ਧਮੇਵ ਦੇਤੀਤਿ ਮਹਤੋ ਅਨਤ੍ਥਾਯ ਸਂਵਤ੍ਤਤਿ ਨਾਮਾਤਿ. ਚਤੁਤ੍ਥੇ ਚਿਤ੍ਤਨ੍ਤਿ ਵਿਵਟ੍ਟਵਸੇਨੇਵ ਉਪ੍ਪਨ੍ਨਚਿਤ੍ਤਂ.

੨੫-੨੬. ਪਞ੍ਚਮਛਟ੍ਠੇਸੁ ਅਭਾਵਿਤਂ ਅਪਾਤੁਭੂਤਨ੍ਤਿ ਅਯਂ ਵਿਸੇਸੋ. ਤਤ੍ਰਾਮਯਧਿਪ੍ਪਾਯੋ – ਵਟ੍ਟਵਸੇਨ ਉਪ੍ਪਨ੍ਨਚਿਤ੍ਤਂ ਨਾਮ ਉਪ੍ਪਨ੍ਨਮ੍ਪਿ ਅਭਾਵਿਤਂ ਅਪਾਤੁਭੂਤਮੇਵ ਹੋਤਿ. ਕਸ੍ਮਾ? ਲੋਕੁਤ੍ਤਰਪਾਦਕਜ੍ਝਾਨਵਿਪਸ੍ਸਨਾਮਗ੍ਗਫਲਨਿਬ੍ਬਾਨੇਸੁ ਪਕ੍ਖਨ੍ਦਿਤੁਂ ਅਸਮਤ੍ਥਤ੍ਤਾ. ਵਿਵਟ੍ਟਵਸੇਨ ਉਪ੍ਪਨ੍ਨਂ ਪਨ ਭਾਵਿਤਂ ਪਾਤੁਭੂਤਂ ਨਾਮ ਹੋਤਿ. ਕਸ੍ਮਾ? ਤੇਸੁ ਧਮ੍ਮੇਸੁ ਪਕ੍ਖਨ੍ਦਿਤੁਂ ਸਮਤ੍ਥਤ੍ਤਾ. ਕੁਰੁਨ੍ਦਕਵਾਸੀ ਫੁਸ੍ਸਮਿਤ੍ਤਤ੍ਥੇਰੋ ਪਨਾਹ – ‘‘ਮਗ੍ਗਚਿਤ੍ਤਮੇਵ, ਆਵੁਸੋ, ਭਾਵਿਤਂ ਪਾਤੁਭੂਤਂ ਨਾਮ ਹੋਤੀ’’ਤਿ.

੨੭-੨੮. ਸਤ੍ਤਮਟ੍ਠਮੇਸੁ ਅਬਹੁਲੀਕਤਨ੍ਤਿ ਪੁਨਪ੍ਪੁਨਂ ਅਕਤਂ. ਇਮਾਨਿਪਿ ਦ੍ਵੇ ਵਟ੍ਟਵਿਵਟ੍ਟਵਸੇਨ ਉਪ੍ਪਨ੍ਨਚਿਤ੍ਤਾਨੇਵ ਵੇਦਿਤਬ੍ਬਾਨੀਤਿ.

੨੯. ਨਵਮੇ ‘‘ਜਾਤਿਪਿ ਦੁਕ੍ਖਾ’’ਤਿਆਦਿਨਾ ਨਯੇਨ ਵੁਤ੍ਤਂ ਦੁਕ੍ਖਂ ਅਧਿਵਹਤਿ ਆਹਰਤੀਤਿ ਦੁਕ੍ਖਾਧਿਵਹਂ. ਦੁਕ੍ਖਾਧਿਵਾਹਨ੍ਤਿਪਿ ਪਾਠੋ. ਤਸ੍ਸਤ੍ਥੋ – ਲੋਕੁਤ੍ਤਰਪਾਦਕਜ੍ਝਾਨਾਦਿ ਅਰਿਯਧਮ੍ਮਾਭਿਮੁਖਂ ਦੁਕ੍ਖੇਨ ਅਧਿਵਾਹੀਯਤਿ ਪੇਸੀਯਤੀਤਿ ਦੁਕ੍ਖਾਧਿਵਾਹਂ. ਇਦਮ੍ਪਿ ਵਟ੍ਟਵਸੇਨ ਉਪ੍ਪਨ੍ਨਚਿਤ੍ਤਮੇਵ. ਤਞ੍ਹਿ ਵੁਤ੍ਤਪ੍ਪਕਾਰਾ ਦੇਵਮਨੁਸ੍ਸਾਦਿਸਮ੍ਪਤ੍ਤਿਯੋ ਦਦਮਾਨਮ੍ਪਿ ਜਾਤਿਆਦੀਨਂ ਅਧਿਵਹਨਤੋ ਦੁਕ੍ਖਾਧਿਵਹਂ, ਅਰਿਯਧਮ੍ਮਾਧਿਗਮਾਯ ਦੁਪ੍ਪੇਸਨਤੋ ਦੁਕ੍ਖਾਧਿਵਾਹਞ੍ਚ ਨਾਮ ਹੋਤੀਤਿ.

੩੦. ਦਸਮੇ ਵਿਵਟ੍ਟਵਸੇਨ ਉਪ੍ਪਨ੍ਨਚਿਤ੍ਤਮੇਵ ਚਿਤ੍ਤਂ. ਤਞ੍ਹਿ ਮਾਨੁਸਕਸੁਖਤੋ ਦਿਬ੍ਬਸੁਖਂ, ਦਿਬ੍ਬਸੁਖਤੋ ਝਾਨਸੁਖਂ, ਝਾਨਸੁਖਤੋ ਵਿਪਸ੍ਸਨਾਸੁਖਂ, ਵਿਪਸ੍ਸਨਾਸੁਖਤੋ ਮਗ੍ਗਸੁਖਂ, ਮਗ੍ਗਸੁਖਤੋ ਫਲਸੁਖਂ, ਫਲਸੁਖਤੋ ਨਿਬ੍ਬਾਨਸੁਖਂ ਅਧਿਵਹਤਿ ਆਹਰਤੀਤਿ ਸੁਖਾਧਿਵਹਂ ਨਾਮ ਹੋਤਿ, ਸੁਖਾਧਿਵਾਹਂ ਵਾ. ਤਞ੍ਹਿ ਲੋਕੁਤ੍ਤਰਪਾਦਕਜ੍ਝਾਨਾਦਿਅਰਿਯਧਮ੍ਮਾਭਿਮੁਖਂ ਸੁਪੇਸਯਂ ਵਿਸ੍ਸਟ੍ਠਇਨ੍ਦਵਜਿਰਸਦਿਸਂ ਹੋਤੀਤਿ ਸੁਖਾਧਿਵਾਹਨ੍ਤਿਪਿ ਵੁਚ੍ਚਤਿ. ਇਮਸ੍ਮਿਮ੍ਪਿ ਵਗ੍ਗੇ ਵਟ੍ਟਵਿਵਟ੍ਟਮੇਵ ਕਥਿਤਨ੍ਤਿ.

ਅਕਮ੍ਮਨਿਯਵਗ੍ਗਵਣ੍ਣਨਾ.