੨੦. ਅਮਤਵਗ੍ਗਵਣ੍ਣਨਾ

੬੦੦-੬੧੧. ਅਮਤਂ ਤੇ, ਭਿਕ੍ਖਵੇ, ਨ ਪਰਿਭੁਞ੍ਜਨ੍ਤੀਤਿ ਮਰਣਵਿਰਹਿਤਂ ਨਿਬ੍ਬਾਨਂ ਨ ਪਰਿਭੁਞ੍ਜਨ੍ਤੀਤਿ ਅਤ੍ਥੋ. ਨਨੁ ਚ ਨਿਬ੍ਬਾਨਂ ਲੋਕੁਤ੍ਤਰਂ, ਕਾਯਗਤਾਸਤਿ ਲੋਕਿਯਾ, ਕਥਂ ਤਂ ਪਰਿਭੁਞ੍ਜਨ੍ਤਾ ਅਮਤਂ ਪਰਿਭੁਞ੍ਜਨ੍ਤੀਤਿ? ਤਂ ਭਾਵੇਤ੍ਵਾ ਅਧਿਗਨ੍ਤਬ੍ਬਤੋ. ਕਾਯਗਤਞ੍ਹਿ ਸਤਿਂ ਭਾਵੇਨ੍ਤੋ ਅਮਤਮਧਿਗਚ੍ਛਤਿ, ਅਭਾਵੇਨ੍ਤੋ ਨਾਧਿਗਚ੍ਛਤਿ. ਤਸ੍ਮਾ ਏਵਂ ਵੁਤ੍ਤਂ. ਏਤੇਨੁਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਅਪਿ ਚੇਤ੍ਥ ਵਿਰਦ੍ਧਨ੍ਤਿ ਵਿਰਾਧਿਤਂ ਨਾਧਿਗਤਂ. ਆਰਦ੍ਧਨ੍ਤਿ ਪਰਿਪੁਣ੍ਣਂ. ਪਮਾਦਿਂਸੂਤਿ ਪਮਜ੍ਜਨ੍ਤਿ. ਪਮੁਟ੍ਠਨ੍ਤਿ ਸਮ੍ਮੁਟ੍ਠਂ ਵਿਸ੍ਸਰਿਤਂ ਨਟ੍ਠਂ ਵਾ. ਆਸੇਵਿਤਨ੍ਤਿ ਆਦਿਤੋ ਸੇਵਿਤਂ. ਭਾਵਿਤਨ੍ਤਿ ਵਡ੍ਢਿਤਂ. ਬਹੁਲੀਕਤਨ੍ਤਿ ਪੁਨਪ੍ਪੁਨਂ ਕਤਂ. ਅਨਭਿਞ੍ਞਾਤਨ੍ਤਿ ਞਾਤਅਭਿਞ੍ਞਾਯ ਅਜਾਨਿਤਂ. ਅਪਰਿਞ੍ਞਾਤਨ੍ਤਿ ਞਾਤਪਰਿਞ੍ਞਾਵਸੇਨੇਵ ਅਪਰਿਞ੍ਞਾਤਂ. ਅਸਚ੍ਛਿਕਤਨ੍ਤਿ ਅਪਚ੍ਚਕ੍ਖਕਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਅਮਤਵਗ੍ਗਵਣ੍ਣਨਾ.