੧੭. ਪਸਾਦਕਰਧਮ੍ਮਵਗ੍ਗਵਣ੍ਣਨਾ

੩੬੬. ਅਦ੍ਧਮਿਦਨ੍ਤਿਆਦੀਸੁ ਅਦ੍ਧਨ੍ਤਿ ਏਕਂਸਾਧਿਵਚਨਮੇਤਂ, ਅਦ੍ਧਾ ਇਦਂ ਲਾਭਾਨਂ, ਏਕਂਸੋ ਏਸ ਲਾਭਾਨਨ੍ਤਿ ਵੁਤ੍ਤਂ ਹੋਤਿ. ਯਦਿਦਂ ਆਰਞ੍ਞਿਕਤ੍ਤਨ੍ਤਿ ਯੋ ਏਸ ਆਰਞ੍ਞਿਕਭਾਵੋ. ਇਦਂ ਵੁਤ੍ਤਂ ਹੋਤਿ – ਆਰਞ੍ਞਿਕਭਾਵੋ ਨਾਮ ਲਾਭਾਨਂ ਏਕਂਸੋ ਅਵਸ੍ਸਭਾਵਿਤਾ ਨ ਸਕ੍ਕਾ ਆਰਞ੍ਞਿਕੇਨ ਲਾਭਂ ਨ ਲਭਿਤੁਨ੍ਤਿ. ਆਰਞ੍ਞਿਕੋ ਹਿ ਭਿਕ੍ਖੁ ‘‘ਅਤ੍ਤਨੋ ਅਰਞ੍ਞਵਾਸਸ੍ਸ ਅਨੁਚ੍ਛਵਿਕਂ ਕਰਿਸ੍ਸਾਮੀ’’ਤਿ ਪਾਪਕਂ ਨਾਮ ਨ ਕਰੋਤਿ, ਅਥਸ੍ਸ ‘‘ਆਰਞ੍ਞਿਕੋ ਅਯਂ ਭਿਕ੍ਖੂ’’ਤਿ ਸਞ੍ਜਾਤਗਾਰਵੋ ਮਹਾਜਨੋ ਚਤੁਪਚ੍ਚਯੇਨ ਪੂਜਂ ਕਰੋਤਿ. ਤੇਨ ਵੁਤ੍ਤਂ – ‘‘ਅਦ੍ਧਮਿਦਂ, ਭਿਕ੍ਖਵੇ, ਲਾਭਾਨਂ ਯਦਿਦਂ ਆਰਞ੍ਞਿਕਤ੍ਤ’’ਨ੍ਤਿ. ਸੇਸਪਦੇਸੁਪਿ ਏਸੇਵ ਨਯੋ. ਏਤ੍ਥ ਪਨ ਬਾਹੁਸਚ੍ਚਨ੍ਤਿ ਬਹੁਸ੍ਸੁਤਭਾਵੋ. ਥਾਵਰੇਯ੍ਯਨ੍ਤਿ ਚਿਰਪਬ੍ਬਜਿਤਤ੍ਤਾ ਥਾਵਰਪ੍ਪਤ੍ਤਭਾਵੋ. ਆਕਪ੍ਪਸਮ੍ਪਦਾਤਿ ਚੀਵਰਗ੍ਗਹਣਾਦਿਨੋ ਆਕਪ੍ਪਸ੍ਸ ਸਮ੍ਪਤ੍ਤਿ. ਪਰਿਵਾਰਸਮ੍ਪਦਾਤਿ ਸੁਚਿਪਰਿਵਾਰਤਾ. ਕੋਲਪੁਤ੍ਤੀਤਿ ਕੁਲਪੁਤ੍ਤਭਾਵੋ. ਵਣ੍ਣਪੋਕ੍ਖਰਤਾਤਿ ਸਮ੍ਪਨ੍ਨਰੂਪਤਾ. ਕਲ੍ਯਾਣਵਾਕ੍ਕਰਣਤਾਤਿ ਵਚਨਕਿਰਿਯਾਯ ਮਧੁਰਭਾਵੋ. ਅਪ੍ਪਾਬਾਧਤਾਤਿ ਆਰੋਗ੍ਯਸਮ੍ਪਤ੍ਤਿ. ਅਰੋਗੋ ਹਿ ਭਿਕ੍ਖੁ ਅਤ੍ਤਨੋ ਸਰੀਰਕਲ੍ਯਾਣਤਾਯ ਵਿਪਸ੍ਸਨਾਧੁਰੇ ਚ ਗਨ੍ਥਧੁਰੇ ਚ ਪਰਿਪੂਰਕਾਰੀ ਹੋਤਿ, ਤੇਨਸ੍ਸ ਲਾਭੋ ਉਪ੍ਪਜ੍ਜਤੀਤਿ.

ਸੋਲ਼ਸ ਪਸਾਦਕਰਧਮ੍ਮਾ ਨਿਟ੍ਠਿਤਾ.