(੧੪) ੭. ਸਤ੍ਤਮਏਤਦਗ੍ਗਵਗ੍ਗੋ

ਸੁਜਾਤਾਵਤ੍ਥੁ

੨੫੮. ਉਪਾਸਿਕਾਪਾਲ਼ਿਯਾ ਪਠਮੇ ਪਠਮਂ ਸਰਣਂ ਗਚ੍ਛਨ੍ਤੀਨਨ੍ਤਿ ਸਬ੍ਬਪਠਮਂ ਸਰਣੇਸੁ ਪਤਿਟ੍ਠਿਤਾਨਂ ਉਪਾਸਿਕਾਨਂ, ਸੁਜਾਤਾ ਨਾਮ, ਸੇਨਿਯਧੀਤਾ ਅਗ੍ਗਾਤਿ ਦਸ੍ਸੇਤਿ. ਸਾਪਿ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤਾ ਅਪਰਭਾਗੇ ਸਤ੍ਥੁ ਧਮ੍ਮਕਥਂ ਸੁਣਨ੍ਤੀ ਸਤ੍ਥਾਰਂ ਏਕਂ ਉਪਾਸਿਕਂ ਪਠਮਂ ਸਰਣਂ ਗਚ੍ਛਨ੍ਤੀਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਅਮ੍ਹਾਕਂ ਸਤ੍ਥੁ ਨਿਬ੍ਬਤ੍ਤਿਤੋ ਪੁਰੇਤਰਮੇਵ ਉਰੁਵੇਲਾਯਂ ਸੇਨਾਨਿਗਮੇ ਸੇਨਿਯਕੁਟੁਮ੍ਬਿਕਸ੍ਸ ਗੇਹੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤਾ ਏਕਸ੍ਮਿਂ ਨਿਗ੍ਰੋਧਮੂਲੇ ਪਤ੍ਥਨਂ ਅਕਾਸਿ – ‘‘ਸਚੇ ਸਮਜਾਤਿਕਂ ਕੁਲਘਰਂ ਗਨ੍ਤ੍ਵਾ ਪਠਮਗਬ੍ਭੇ ਪੁਤ੍ਤਂ ਲਭਿਸ੍ਸਾਮਿ, ਅਨੁਸਂਵਚ੍ਛਰਂ ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ. ਤਸ੍ਸਾ ਸਾ ਪਤ੍ਥਨਾ ਸਮਿਜ੍ਝਿ.

ਸਾ ਮਹਾਸਤ੍ਤਸ੍ਸ ਦੁਕ੍ਕਰਕਾਰਿਕਂ ਕਰੋਨ੍ਤਸ੍ਸ ਛਟ੍ਠੇ ਵਸ੍ਸੇ ਪਰਿਪੁਣ੍ਣੇ ਵਿਸਾਖਪੁਣ੍ਣਮਦਿਵਸੇ ‘‘ਪਾਤੋਵ ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਧੇਨੁਯੋ ਦੁਹਾਪੇਸਿ. ਵਚ੍ਛਕਾ ਧੇਨੂਨਂ ਥਨਮੂਲਂ ਨ ਆਗਮਂਸੁ, ਥਨਮੂਲੇ ਨਵਭਾਜਨਮ੍ਹਿ ਉਪਨੀਤਮਤ੍ਤੇ ਅਤ੍ਤਨੋਵ ਧਮ੍ਮਤਾਯ ਖੀਰਧਾਰਾ ਪਤਿਂਸੁ. ਤਂ ਅਚ੍ਛਰਿਯਂ ਦਿਸ੍ਵਾ, ਸੁਜਾਤਾ, ਸਹਤ੍ਥੇਨੇਵ ਖੀਰਂ ਗਣ੍ਹਿਤ੍ਵਾ ਨਵਭਾਜਨੇ ਪਕ੍ਖਿਪਿਤ੍ਵਾ ਸਹਤ੍ਥੇਨੇਵ ਅਗ੍ਗਿਂ ਕਤ੍ਵਾ ਪਚਿਤੁਂ ਆਰਭਿ. ਤਸ੍ਮਿਂ ਪਾਯਾਸੇ ਪਚ੍ਚਮਾਨੇ ਮਹਨ੍ਤਮਹਨ੍ਤਾ ਬੁਬ੍ਬੁਲ਼ਾ ਉਟ੍ਠਹਿਤ੍ਵਾ ਦਕ੍ਖਿਣਾਵਤ੍ਤਾ ਹੁਤ੍ਵਾ ਸਞ੍ਚਰਨ੍ਤਿ, ਏਕਫੁਸਿਤਮ੍ਪਿ ਬਹਿ ਨ ਨਿਗ੍ਗਚ੍ਛਤਿ. ਮਹਾਬ੍ਰਹ੍ਮਾ ਛਤ੍ਤਂ ਧਾਰੇਸਿ, ਚਤ੍ਤਾਰੋ ਲੋਕਪਾਲਾ ਖਗ੍ਗਹਤ੍ਥਾ ਆਰਕ੍ਖਂ ਗਣ੍ਹਿਂਸੁ, ਸਕ੍ਕੋ ਅਲਾਤਾਨਿ ਸਮਾਨੇਨ੍ਤੋ ਅਗ੍ਗਿਂ ਜਾਲੇਸਿ. ਦੇਵਤਾ ਚਤੂਸੁ ਦੀਪੇਸੁ ਓਜਂ ਸਂਹਰਿਤ੍ਵਾ ਤਤ੍ਥ ਪਕ੍ਖਿਪਿਂਸੁ. ਸੁਜਾਤਾ, ਏਕਦਿਵਸੇਯੇਵ ਇਮਾਨਿ ਅਚ੍ਛਰਿਯਾਨਿ ਦਿਸ੍ਵਾ ਪੁਣ੍ਣਾਦਾਸਿਂ ਆਮਨ੍ਤੇਸਿ – ‘‘ਅਮ੍ਮ, ਪੁਣ੍ਣੇ ਅਜ੍ਜ ਅਮ੍ਹਾਕਂ ਦੇਵਤਾ ਅਤਿਵਿਯ ਪਸਨ੍ਨਾ, ਮਯਾ ਏਤ੍ਤਕਂ ਕਾਲਂ ਏਵਰੂਪਂ ਅਚ੍ਛਰਿਯਂ ਨਾਮ ਨ ਦਿਟ੍ਠਪੁਬ੍ਬਂ, ਵੇਗੇਨ ਗਨ੍ਤ੍ਵਾ ਦੇਵਟ੍ਠਾਨਂ ਪਟਿਜਗ੍ਗਾਹੀ’’ਤਿ. ਸਾ ‘‘ਸਾਧੁ, ਅਯ੍ਯੇ’’ਤਿ ਤਸ੍ਸਾ ਵਚਨਂ ਸਮ੍ਪਟਿਚ੍ਛਿਤ੍ਵਾ ਤੁਰਿਤਤੁਰਿਤਾ ਰੁਕ੍ਖਮੂਲਂ ਅਗਮਾਸਿ.

ਬੋਧਿਸਤ੍ਤੋਪਿ ਖੋ ਭਿਕ੍ਖਾਚਾਰਕਾਲਂ ਆਗਮਯਮਾਨੋ ਪਾਤੋਵ ਗਨ੍ਤ੍ਵਾ ਰੁਕ੍ਖਮੂਲੇ ਨਿਸੀਦਿ. ਰੁਕ੍ਖਮੂਲਂ ਸੋਧਨਤ੍ਥਾਯ ਗਤਾ ਪੁਣ੍ਣਾ ਆਗਨ੍ਤ੍ਵਾ ਸੁਜਾਤਾਯ ਆਰੋਚੇਸਿ – ‘‘ਦੇਵਤਾ ਰੁਕ੍ਖਮੂਲੇ ਨਿਸਿਨ੍ਨਾ’’ਤਿ. ਸੁਜਾਤਾ, ‘‘ਸਚੇ ਜੇ ਸਚ੍ਚਂ ਭਣਸਿ, ਅਦਾਸਿਂ ਕਰੋਮੀ’’ਤਿ ਵਤ੍ਵਾ ਸਬ੍ਬਪਸਾਧਨਂ ਪਸਾਧੇਤ੍ਵਾ ਸਤਸਹਸ੍ਸਗ੍ਘਨਕੇ ਸੁਵਣ੍ਣਥਾਲੇ ਪਾਯਾਸਂ ਵਡ੍ਢੇਤ੍ਵਾ ਅਪਰਾਯ ਸੁਵਣ੍ਣਪਾਤਿਯਾ ਪਿਦਹਿਤ੍ਵਾ ਸੇਤਵਤ੍ਥੇਨ ਸਮ੍ਪਲਿਵੇਠੇਤ੍ਵਾ ਸਮਨ੍ਤਾ ਗਨ੍ਧਦਾਮਮਾਲਾਦਾਮਾਨਿ ਓਸਾਰੇਤ੍ਵਾ ਉਕ੍ਖਿਪਿਤ੍ਵਾ ਗਨ੍ਤ੍ਵਾ ਮਹਾਪੁਰਿਸਂ ਦਿਸ੍ਵਾ ਬਲਵਪੀਤਿਂ ਉਪ੍ਪਾਦੇਤ੍ਵਾ ਦਿਟ੍ਠਟ੍ਠਾਨਤੋ ਪਟ੍ਠਾਯ ਓਣਤੋਣਤਾ ਗਨ੍ਤ੍ਵਾ ਸੀਸਤੋ ਥਾਲਂ ਓਤਾਰੇਤ੍ਵਾ ਵਿਵਰਿਤ੍ਵਾ ਸਹੇਵ ਪਾਤਿਯਾ ਪਾਯਾਸਂ ਮਹਾਪੁਰਿਸਸ੍ਸ ਹਤ੍ਥੇ ਠਪੇਤ੍ਵਾ ਵਨ੍ਦਿਤ੍ਵਾ ‘‘ਯਥਾ ਮਯ੍ਹਂ ਮਨੋਰਥੋ ਨਿਪ੍ਫਨ੍ਨੋ, ਏਵਂ ਤੁਮ੍ਹਾਕਮ੍ਪਿ ਨਿਪ੍ਫਜ੍ਜਤੂ’’ਤਿ ਵਤ੍ਵਾ ਪਕ੍ਕਾਮਿ. ਬੋਧਿਸਤ੍ਤੋ ਨੇਰਞ੍ਜਰਾਯ ਨਦਿਯਾ ਤੀਰਂ ਗਨ੍ਤ੍ਵਾ ਸੁਵਣ੍ਣਥਾਲਂ ਤੀਰੇ ਠਪੇਤ੍ਵਾ ਨ੍ਹਤ੍ਵਾ ਪਚ੍ਚੁਤ੍ਤਰਿਤ੍ਵਾ ਏਕੂਨਪਣ੍ਣਾਸ ਪਿਣ੍ਡੇ ਕਰੋਨ੍ਤੋ ਪਾਯਾਸਂ ਪਰਿਭੁਞ੍ਜਿਤ੍ਵਾ ਸੁਵਣ੍ਣਪਾਤਿਂ ਨਦਿਯਾ ਸਮ੍ਪਵਾਹੇਤ੍ਵਾ ਅਨੁਕ੍ਕਮੇਨ ਬੋਧਿਮਣ੍ਡਂ ਆਰੁਯ੍ਹ ਸਬ੍ਬਞ੍ਞੁਤਂ ਪਤ੍ਵਾ ਸਤ੍ਤਸਤ੍ਤਾਹਂ ਬੋਧਿਮਣ੍ਡੇ ਅਤਿਕ੍ਕਮਿਤ੍ਵਾ ਇਸਿਪਤਨੇ ਮਿਗਦਾਯੇ ਪਵਤ੍ਤਿਤਵਰਧਮ੍ਮਚਕ੍ਕੋ ਸੁਜਾਤਾਯ ਪੁਤ੍ਤਸ੍ਸ ਯਸਦਾਰਕਸ੍ਸ ਉਪਨਿਸ੍ਸਯਂ ਦਿਸ੍ਵਾ ਗਨ੍ਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ.

ਯਸੋਪਿ ਕੁਲਪੁਤ੍ਤੋ ਰਤ੍ਤਿਭਾਗਸਮਨਨ੍ਤਰੇ ਵਿਵਟਂ ਇਤ੍ਥਾਗਾਰਂ ਦਿਸ੍ਵਾ ਸਞ੍ਜਾਤਸਂਵੇਗੋ ‘‘ਉਪਦ੍ਦੁਤਂ ਵਤ, ਭੋ, ਉਪਸਟ੍ਠਂ ਵਤ, ਭੋ’’ਤਿ ਵਤ੍ਵਾ ਨਿਵੇਸਨਤੋ ਨਿਕ੍ਖਮਿਤ੍ਵਾਵ ਬਹਿਨਗਰੇ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਦੇਸਨਂ ਸੁਤ੍ਵਾ ਤੀਣਿ ਮਗ੍ਗਫਲਾਨਿ ਪਟਿਵਿਜ੍ਝਿ. ਅਥਸ੍ਸ ਪਿਤਾ ਪਦਾਨੁਪਦਿਕਂ ਗਨ੍ਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਯਸਸ੍ਸ ਪਵਤ੍ਤਿਂ ਪੁਚ੍ਛਿ. ਸਤ੍ਥਾ ਯਸਂ ਕੁਲਪੁਤ੍ਤਂ ਪਟਿਚ੍ਛਾਦੇਤ੍ਵਾ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਸੋ ਸੇਟ੍ਠਿਗਹਪਤਿ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ, ਯਸੋ ਅਰਹਤ੍ਤਫਲਂ ਪਾਪੁਣਿ. ਤਂ ਭਗਵਾ ‘‘ਏਹਿ ਭਿਕ੍ਖੂ’’ਤਿ ਆਹ, ਤਾਵਦੇਵਸ੍ਸ ਗਿਹਿਲਿਙ੍ਗਂ ਅਨ੍ਤਰਧਾਯਿ, ਇਦ੍ਧਿਮਯਪਤ੍ਤਚੀਵਰਧਰੋ ਅਹੋਸਿ. ਪਿਤਾਪਿਸ੍ਸ ਸਤ੍ਥਾਰਂ ਨਿਮਨ੍ਤੇਸਿ. ਸਤ੍ਥਾ ਯਸਂ ਕੁਲਪੁਤ੍ਤਂ ਪਚ੍ਛਾਸਮਣਂ ਕਤ੍ਵਾ ਤਸ੍ਸ ਘਰਂ ਗਨ੍ਤ੍ਵਾ ਕਤਭਤ੍ਤਕਿਚ੍ਚੋ ਧਮ੍ਮਂ ਦੇਸੇਸਿ, ਦੇਸਨਾਪਰਿਯੋਸਾਨੇ ਯਸਸ੍ਸ ਮਾਤਾ, ਸੁਜਾਤਾ, ਪੁਰਾਣਦੁਤਿਯਿਕਾ ਚ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ. ਤਂਦਿਵਸਂ ਅਯਂ, ਸੁਜਾਤਾ, ਤੇਵਾਚਿਕਸਰਣੇ ਪਤਿਟ੍ਠਾਸਿ ਸਦ੍ਧਿਂ ਸੁਣਿਸਾਯ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨੇਤਂ ਵਤ੍ਥੁ ਖਨ੍ਧਕੇ (ਮਹਾਵ. ੨੫-੨੮) ਆਗਤਮੇਵ. ਸਤ੍ਥਾ ਅਪਰਭਾਗੇ ਪਟਿਪਾਟਿਯਾ ਉਪਾਸਿਕਾਯੋ ਠਾਨਨ੍ਤਰੇਸੁ ਠਪੇਨ੍ਤੋ ਇਮਂ ਉਪਾਸਿਕਂ ਪਠਮਂ ਸਰਣਂ ਗਚ੍ਛਨ੍ਤੀਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਵਿਸਾਖਾਵਤ੍ਥੁ

੨੫੯. ਦੁਤਿਯੇ ਦਾਯਿਕਾਨਨ੍ਤਿ ਦਾਨਾਭਿਰਤਾਨਂ ਉਪਾਸਿਕਾਨਂ, ਵਿਸਾਖਾ ਮਿਗਾਰਮਾਤਾ, ਅਗ੍ਗਾਤਿ ਦਸ੍ਸੇਤਿ. ਸਾ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤਾ ਅਪਰਭਾਗੇ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤੀ ਸਤ੍ਥਾਰਂ ਏਕਂ ਉਪਾਸਿਕਂ ਦਾਯਿਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਕਸ੍ਸਪਬੁਦ੍ਧਕਾਲੇ ਕਿਕਿਸ੍ਸ ਕਾਸਿਰਞ੍ਞੋ ਗੇਹੇ ਸਤ੍ਤਨ੍ਨਂ ਭਗਿਨੀਨਂ ਸਬ੍ਬਕਨਿਟ੍ਠਾ ਹੁਤ੍ਵਾ ਨਿਬ੍ਬਤ੍ਤਿ. ਤਦਾ ਕਿਰ –

‘‘ਸਮਣੀ ਸਮਣਗੁਤ੍ਤਾ ਚ, ਭਿਕ੍ਖੁਨੀ ਭਿਕ੍ਖੁਦਾਯਿਕਾ;

ਧਮ੍ਮਾ ਚੇਵ ਸੁਧਮ੍ਮਾ ਚ, ਸਙ੍ਘਦਾਸੀ ਚ ਸਤ੍ਤਮਾ’’ਤਿ.

ਇਮਾ ਸਤ੍ਤ ਭਗਿਨਿਯੋ ਅਹੇਸੁਂ. ਤਾ ਏਤਰਹਿ –

‘‘ਖੇਮਾ ਉਪ੍ਪਲਵਣ੍ਣਾ ਚ, ਪਟਾਚਾਰਾ ਚ ਗੋਤਮੀ;

ਧਮ੍ਮਦਿਨ੍ਨਾ ਮਹਾਮਾਯਾ, ਵਿਸਾਖਾ ਚੇਵ ਸਤ੍ਤਮੀ’’ਤਿ. –

ਏਵਂਨਾਮਾ ਹੁਤ੍ਵਾ ਨਿਬ੍ਬਤ੍ਤਾ. ਤਤ੍ਰਾਯਂ ਸਙ੍ਘਦਾਸੀ ਏਕਂ ਬੁਦ੍ਧਨ੍ਤਰਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਅਙ੍ਗਰਟ੍ਠੇ ਭਦ੍ਦਿਯਨਗਰੇ ਮੇਣ੍ਡਕਸੇਟ੍ਠਿਪੁਤ੍ਤਸ੍ਸ ਧਨਞ੍ਚਯਸੇਟ੍ਠਿਨੋ ਅਗ੍ਗਮਹੇਸਿਯਾ ਸੁਮਨਦੇਵਿਯਾ ਨਾਮ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿ, ਵਿਸਾਖਾਤਿਸ੍ਸਾ ਨਾਮਂ ਅਕਂਸੁ. ਤਸ੍ਸਾ ਸਤ੍ਤਵਸ੍ਸਿਕਕਾਲੇ ਦਸਬਲੋ ਸੇਲਬ੍ਰਾਹ੍ਮਣਸ੍ਸ ਚ ਅਞ੍ਞੇਸਞ੍ਚ ਬੋਧਨੇਯ੍ਯਬਨ੍ਧਵਾਨਂ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਮਹਾਭਿਕ੍ਖੁਸਙ੍ਘਪਰਿਵਾਰੋ ਚਾਰਿਕਂ ਚਰਮਾਨੋ ਤਸ੍ਮਿਂ ਰਟ੍ਠੇ ਤਂ ਨਗਰਂ ਪਾਪੁਣਿ.

ਤਸ੍ਮਿਞ੍ਚ ਸਮਯੇ ਮੇਣ੍ਡਕੋ ਗਹਪਤਿ ਤਸ੍ਮਿਂ ਨਗਰੇ ਪਞ੍ਚਨ੍ਨਂ ਮਹਾਪੁਞ੍ਞਾਨਂ ਜੇਟ੍ਠਕੋ ਹੁਤ੍ਵਾ ਸੇਟ੍ਠਿਟ੍ਠਾਨਂ ਕਾਰੇਸਿ. ਪਞ੍ਚ ਮਹਾਪੁਞ੍ਞਾ ਨਾਮ ਮੇਣ੍ਡਕੋ ਸੇਟ੍ਠਿ, ਚਨ੍ਦਪਦੁਮਾ ਨਾਮ ਤਸ੍ਸੇਵ ਅਗ੍ਗਮਹੇਸੀ, ਤਸ੍ਸ ਚ ਪੁਤ੍ਤੋ ਧਨਞ੍ਚਯੋ ਨਾਮ, ਤਸ੍ਸ ਭਰਿਯਾ ਸੁਮਨਦੇਵੀ ਨਾਮ, ਮੇਣ੍ਡਕਸੇਟ੍ਠਿਸ੍ਸ ਦਾਸੋ ਪੁਣ੍ਣੋ ਨਾਮਾਤਿ. ਨ ਕੇਵਲਞ੍ਚ ਮੇਣ੍ਡਕਸੇਟ੍ਠਿਯੇਵ, ਬਿਮ੍ਬਿਸਾਰਮਹਾਰਾਜਸ੍ਸ ਪਨ ਆਣਾਪਵਤ੍ਤਿਟ੍ਠਾਨੇ ਪਞ੍ਚ ਅਮਿਤਭੋਗਾ ਨਾਮ ਅਹੇਸੁਂ ਜੋਤਿਕੋ ਜਟਿਲੋ ਮੇਣ੍ਡਕੋ ਪੁਣ੍ਣੋ ਕਾਕਵਲਿਯੋਤਿ. ਤੇਸੁ ਅਯਂ ਮੇਣ੍ਡਕਸੇਟ੍ਠਿ ਦਸਬਲਸ੍ਸ ਅਤ੍ਤਨੋ ਨਗਰਂ ਸਮ੍ਪਤ੍ਤਭਾਵਂ ਸੁਤ੍ਵਾ ਪੁਤ੍ਤਸ੍ਸ ਧਨਞ੍ਚਯਸੇਟ੍ਠਿਨੋ ਧੀਤਰਂ ਵਿਸਾਖਾਦਾਰਿਕਂ ਪਕ੍ਕੋਸਿਤ੍ਵਾ ਏਵਮਾਹ – ‘‘ਅਮ੍ਮ, ਤੁਯ੍ਹਮ੍ਪਿ ਮਙ੍ਗਲਂ ਅਮ੍ਹਾਕਮ੍ਪਿ ਮਙ੍ਗਲਂ, ਤਵ ਪਰਿਚਾਰਿਕਾਹਿ ਪਞ੍ਚਦਾਰਿਕਾਸਤੇਹਿ ਸਦ੍ਧਿਂ ਪਞ੍ਚ ਰਥਸਤਾਨਿ ਆਰੁਯ੍ਹ ਪਞ੍ਚਹਿ ਦਾਸਿਸਤੇਹਿ ਪਰਿਵੁਤਾ ਦਸਬਲਸ੍ਸ ਪਚ੍ਚੁਗ੍ਗਮਨਂ ਕਰੋਹੀ’’ਤਿ. ਸਾ ਪਿਤਾਮਹਸ੍ਸ ਵਚਨਂ ਸੁਤ੍ਵਾ ਤਥਾ ਅਕਾਸਿ. ਕਾਰਣਾਕਾਰਣੇਸੁ ਪਨ ਕੁਸਲਤ੍ਤਾ ਯਾਵਤਿਕਾ ਯਾਨਸ੍ਸ ਭੂਮਿ, ਯਾਨੇਨ ਗਨ੍ਤ੍ਵਾ ਯਾਨਾ ਪਚ੍ਚੋਰੋਹਿਤ੍ਵਾ ਪਤ੍ਤਿਕਾਵ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਅਥਸ੍ਸਾ ਚਰਿਤਵਸੇਨ ਸਤ੍ਥਾ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਪਞ੍ਚਹਿ ਦਾਰਿਕਾਸਤੇਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ. ਮੇਣ੍ਡਕਸੇਟ੍ਠਿਪਿ ਖੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਅਥ ਸਤ੍ਥਾ ਤਸ੍ਸਪਿ ਚਰਿਤਵਸੇਨ ਧਮ੍ਮਂ ਦੇਸੇਸਿ. ਸੋ ਦੇਸਨਾਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਸਤ੍ਥਾਰਂ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਪੁਨਦਿਵਸੇ ਅਤ੍ਤਨੋ ਨਿਵੇਸਨੇ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਰਿਵਿਸਿਤ੍ਵਾ ਏਤੇਨੁਪਾਯੇਨ ਅਡ੍ਢਮਾਸਂ ਮਹਾਦਾਨਂ ਅਦਾਸਿ. ਸਤ੍ਥਾ ਭਦ੍ਦਿਯਨਗਰੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਪਕ੍ਕਾਮਿ.

ਇਤੋ ਪਰਂ ਅਞ੍ਞਂ ਕਥਾਮਗ੍ਗਂ ਵਿਸ੍ਸਜ੍ਜੇਤ੍ਵਾ ਵਿਸਾਖਾਯ ਉਪ੍ਪਤ੍ਤਿਕਥਾਵ ਕਥੇਤਬ੍ਬਾ. ਸਾਵਤ੍ਥਿਯਞ੍ਹਿ ਕੋਸਲਰਾਜਾ ਬਿਮ੍ਬਿਸਾਰਸ੍ਸ ਸਨ੍ਤਿਕਂ ਪੇਸੇਸਿ – ‘‘ਮਮ ਆਣਾਪਵਤ੍ਤਿਟ੍ਠਾਨੇ ਅਮਿਤਭੋਗਵਿਨ੍ਦਨਕੁਲਂ ਨਾਮ ਨਤ੍ਥਿ, ਅਮ੍ਹਾਕਂ ਅਮਿਤਭੋਗਵਿਨ੍ਦਨਕੁਲਂ ਪੇਸੇਤੂ’’ਤਿ. ਰਾਜਾ ਅਮਚ੍ਚੇਹਿ ਸਦ੍ਧਿਂ ਮਨ੍ਤੇਸਿ. ਅਮਚ੍ਚਾ ‘‘ਮਹਾਕੁਲਂ ਪੇਸੇਤੁਂ ਨ ਸਕ੍ਕਾ, ਏਕਂ ਪਨ ਸੇਟ੍ਠਿਪੁਤ੍ਤਂ ਪੇਸੇਸ੍ਸਾਮਾ’’ਤਿ ਮੇਣ੍ਡਕਸੇਟ੍ਠਿਨੋ ਪੁਤ੍ਤਂ ਧਨਞ੍ਚਯਸੇਟ੍ਠਿਂ ਆਯਾਚਿਂਸੁ. ਰਾਜਾ ਤੇਸਂ ਵਚਨਂ ਸੁਤ੍ਵਾ ਤਂ ਪੇਸੇਸਿ. ਅਥ ਨਂ ਕੋਸਲਰਾਜਾ ਸਾਵਤ੍ਥਿਤੋ ਸਤ੍ਤਯੋਜਨਮਤ੍ਥਕੇ ਸਾਕੇਤਨਗਰੇ ਸੇਟ੍ਠਿਟ੍ਠਾਨਂ ਦਤ੍ਵਾ ਵਾਸੇਸਿ.

ਸਾਵਤ੍ਥਿਯਞ੍ਚ ਮਿਗਾਰਸੇਟ੍ਠਿਨੋ ਪੁਤ੍ਤੋ ਪੁਣ੍ਣਵਡ੍ਢਨਕੁਮਾਰੋ ਨਾਮ ਵਯਪ੍ਪਤ੍ਤੋ ਅਹੋਸਿ. ਅਥਸ੍ਸ ਪਿਤਾ ‘‘ਪੁਤ੍ਤੋ ਮੇ ਵਯਪ੍ਪਤ੍ਤੋ, ਘਰਾਵਾਸੇਨਸ੍ਸ ਆਬਨ੍ਧਨਸਮਯੋ’’ਤਿ ਞਤ੍ਵਾ ‘‘ਅਮ੍ਹਾਕਂ ਸਮਾਨਜਾਤਿਕੇ ਕੁਲੇ ਦਾਰਿਕਂ ਪਰਿਯੇਸਥਾ’’ਤਿ ਕਾਰਣਾਕਾਰਣਕੁਸਲੇ ਪੁਰਿਸੇ ਪੇਸੇਸਿ. ਤੇ ਸਾਵਤ੍ਥਿਯਂ ਅਤ੍ਤਨੋ ਰੁਚਿਤਂ ਦਾਰਿਕਂ ਅਦਿਸ੍ਵਾ ਸਾਕੇਤਂ ਅਗਮਂਸੁ. ਤਂਦਿਵਸਞ੍ਚ, ਵਿਸਾਖਾ, ਅਤ੍ਤਨੋ ਸਮਾਨਵਯੇਹਿ ਪਞ੍ਚਹਿ ਕੁਮਾਰਿਕਾਸਤੇਹਿ ਪਰਿਵਾਰਿਤਾ ਨਕ੍ਖਤ੍ਤਕੀਲ਼ਨਤ੍ਥਾਯ ਏਕਂ ਮਹਾਗਾਮਂ ਅਗਮਾਸਿ. ਤੇਪਿ ਪੁਰਿਸਾ ਅਨ੍ਤੋਨਗਰੇ ਚਰਿਤ੍ਵਾ ਅਤ੍ਤਨੋ ਰੁਚਿਤਂ ਦਾਰਿਕਂ ਅਦਿਸ੍ਵਾ ਬਹਿਨਗਰਦ੍ਵਾਰੇ ਅਟ੍ਠਂਸੁ. ਤਸ੍ਮਿਂ ਸਮਯੇ ਦੇਵੋ ਵਸ੍ਸਿਤੁਂ ਆਰਭਿ. ਅਥ ਤਾ ਵਿਸਾਖਾਯ ਸਦ੍ਧਿਂ ਨਿਕ੍ਖਨ੍ਤਾ ਦਾਰਿਕਾ ਤੇਮਨਭਯੇਨ ਵੇਗੇਨ ਸਾਲਂ ਪਵਿਸਿਂਸੁ. ਤੇ ਪੁਰਿਸਾ ਤਾਸਮ੍ਪਿ ਅਨ੍ਤਰੇ ਯਥਾਰੁਚਿਤਂ ਦਾਰਿਕਂ ਨ ਪਸ੍ਸਿਂਸੁ. ਤਾਸਂ ਪਨ ਸਬ੍ਬਪਚ੍ਛਤੋ, ਵਿਸਾਖਾ, ਦੇਵਂ ਵਸ੍ਸਨ੍ਤਮ੍ਪਿ ਅਗਣੇਤ੍ਵਾ ਅਤੁਰਿਤਗਮਨੇਨ ਤੇਮਯਮਾਨਾਵ ਸਾਲਂ ਪਾਵਿਸਿ. ਤੇ ਪੁਰਿਸਾ ਤਂ ਦਿਸ੍ਵਾ ਚਿਨ੍ਤਯਿਂਸੁ – ‘‘ਰੂਪਵਤੀ ਤਾਵ ਕਞ੍ਞਾ ਏਤਪਰਮਾ ਭਵੇਯ੍ਯ, ਰੂਪਂ ਪਨੇਤਂ ਏਕਚ੍ਚਾਯ ਕਾਰਿਤਪਤ੍ਤਂ ਵਿਯ ਹੋਤਿ, ਕਥਂ ਸਮੁਟ੍ਠਾਪੇਤ੍ਵਾ ਕਥੇਨ੍ਤਾ ਜਾਨਿਸ੍ਸਾਮ ਮਧੁਰਵਚਨਾ ਵਾ ਨੋ ਵਾ’’ਤਿ. ਤਤੋ ਨਂ ਆਹਂਸੁ – ‘‘ਅਤਿਵਿਯ ਪਰਿਣਤਵਯਾ ਇਤ੍ਥੀ ਵਿਯ ਯਾਸਿ, ਅਮ੍ਮਾ’’ਤਿ. ਕਿਂ ਦਿਸ੍ਵਾ ਕਥੇਥ, ਤਾਤਾਤਿ? ਅਞ੍ਞਾ ਤਯਾ ਸਦ੍ਧਿਂ ਕੀਲ਼ਨਕੁਮਾਰਿਯੋ ਤੇਮਨਭਯੇਨ ਵੇਗੇਨ ਆਗਨ੍ਤ੍ਵਾ ਸਾਲਂ ਪਵਿਟ੍ਠਾ, ਤ੍ਵਂ ਪਨ ਮਹਲ੍ਲਿਕਾ ਵਿਯ ਪਦਵਾਰਂ ਅਤਿਕ੍ਕਮ੍ਮ ਨਾਗਚ੍ਛਸਿ, ਸਾਟਕਸ੍ਸ ਤੇਮਨਭਾਵਮ੍ਪਿ ਨ ਗਣੇਸਿ. ਸਚੇ ਤਂ ਹਤ੍ਥੀ ਵਾ ਅਸ੍ਸੋ ਵਾ ਅਨੁਬਨ੍ਧੇਯ੍ਯ, ਕਿਂ ਏਵਮੇਵਂ ਕਰੇਯ੍ਯਾਸੀਤਿ? ਤਾਤਾ, ਸਾਟਕਾ ਨਾਮ ਨ ਦੁਲ੍ਲਭਾ, ਸੁਲਭਾ ਮਯ੍ਹਂ ਕੁਲੇ ਸਾਟਕਾ. ਵਯਪ੍ਪਤ੍ਤਾ ਮਾਤੁਗਾਮਾ ਪਨ ਪਣਿਯਭਣ੍ਡਸਦਿਸਾ, ਹਤ੍ਥੇ ਵਾ ਪਾਦੇ ਵਾ ਭਗ੍ਗੇ ਅਙ੍ਗਵਿਕਲਂ ਮਾਤੁਗਾਮਂ ਜਿਗੁਚ੍ਛਨ੍ਤਾ ਨਿਟ੍ਠੁਭਿਤ੍ਵਾ ਗਚ੍ਛਨ੍ਤਿ, ਤਸ੍ਮਾ ਸਣਿਕਂ ਆਗਤਾਮ੍ਹੀਤਿ.

ਤੇ ਚਿਨ੍ਤਯਿਂਸੁ – ‘‘ਇਮਾਯ ਸਦਿਸਾ ਇਮਸ੍ਮਿਂ ਜਮ੍ਬੁਦੀਪੇ ਇਤ੍ਥੀ ਨਾਮ ਨਤ੍ਥਿ, ਯਾਦਿਸਾ ਰੂਪੇਨ, ਕਥਾਯਪਿ ਤਾਦਿਸਾਵ. ਕਾਰਣਾਕਾਰਣਂ ਞਤ੍ਵਾ ਕਥੇਤੀ’’ਤਿ ਤਸ੍ਸਾ ਉਪਰਿ ਮਾਲਾਗੁਲ਼ਂ ਖਿਪਿਂਸੁ. ਅਥ, ਵਿਸਾਖਾ, ਚਿਨ੍ਤੇਸਿ – ‘‘ਅਹਂ ਪੁਬ੍ਬੇ ਅਪਰਿਗ੍ਗਹਿਤਾ, ਇਦਾਨਿ ਪਨ ਪਰਿਗ੍ਗਹਿਤਾਮ੍ਹੀ’’ਤਿ ਵਿਨੀਤੇਨਾਕਾਰੇਨ ਭੂਮਿਯਂ ਨਿਸੀਦਿ. ਅਥ ਨਂ ਤਤ੍ਥੇਵ ਸਾਣਿਯਾ ਪਰਿਕ੍ਖਿਪਿਂਸੁ. ਸਾ ਪਟਿਚ੍ਛਨ੍ਨਭਾਵਂ ਞਤ੍ਵਾ ਦਾਸਿਗਣਪਰਿਵੁਤਾ ਗੇਹਂ ਅਗਮਾਸਿ. ਤੇਪਿ ਮਿਗਾਰਸੇਟ੍ਠਿਨੋ ਪੁਰਿਸਾ ਤਾਯ ਸਦ੍ਧਿਂਯੇਵ ਧਨਞ੍ਚਯਸੇਟ੍ਠਿਸ੍ਸ ਸਨ੍ਤਿਕਂ ਅਗਮਂਸੁ. ‘‘ਕਤਰਗਾਮਵਾਸਿਨੋ, ਤਾਤਾ, ਤੁਮ੍ਹੇ’’ਤਿ ਪੁਚ੍ਛਿਤਾ ‘‘ਸਾਵਤ੍ਥਿਨਗਰੇ ਮਿਗਾਰਸੇਟ੍ਠਿਨੋ ਪੁਰਿਸਮ੍ਹਾ’’ਤਿ ਵਤ੍ਵਾ ‘‘ਮਯਂ ਅਮ੍ਹਾਕਂ ਸੇਟ੍ਠਿਨਾ ਤੁਮ੍ਹਾਕਂ ਗੇਹੇ ਵਯਪ੍ਪਤ੍ਤਾ ਦਾਰਿਕਾ ਅਤ੍ਥੀਤਿ ਸੁਤ੍ਵਾ ਪੇਸਿਤਾ’’ਤਿ. ਸਾਧੁ, ਤਾਤਾ, ਤੁਮ੍ਹਾਕਂ ਸੇਟ੍ਠਿ ਕਿਞ੍ਚਾਪਿ ਭੋਗੇਨ ਅਮ੍ਹੇਹਿ ਅਸਦਿਸੋ, ਜਾਤਿਯਾ ਪਨ ਸਦਿਸੋ. ਸਬ੍ਬਾਕਾਰਸਮ੍ਪਨ੍ਨੋ ਨਾਮ ਦੁਲ੍ਲਭੋ ਗਚ੍ਛਥ ਤੁਮ੍ਹੇ ਸੇਟ੍ਠਿਸ੍ਸ ਅਮ੍ਹੇਹਿ ਸਮ੍ਪਟਿਚ੍ਛਿਤਭਾਵਂ ਆਰੋਚੇਥਾਤਿ.

ਤੇ ਤਸ੍ਸ ਵਚਨਂ ਸੁਤ੍ਵਾ ਸਾਵਤ੍ਥਿਂ ਗਨ੍ਤ੍ਵਾ ਮਿਗਾਰਸੇਟ੍ਠਿਸ੍ਸ ਤੁਟ੍ਠਿਂ ਵਡ੍ਢਿਂ ਚ ਪਵੇਦੇਤ੍ਵਾ ‘‘ਲਦ੍ਧਾ ਨੋ ਸਾਮਿ ਸਾਕੇਤੇ ਧਨਞ੍ਚਯਸੇਟ੍ਠਿਸ੍ਸ ਗੇਹੇ ਦਾਰਿਕਾ’’ਤਿ ਆਹਂਸੁ. ਤਂ ਸੁਤ੍ਵਾ ਮਿਗਾਰਸੇਟ੍ਠਿ ‘‘ਮਹਾਕੁਲਗੇਹੇ ਕਿਰ ਨੋ ਦਾਰਿਕਾ ਲਦ੍ਧਾ’’ਤਿ ਤੁਟ੍ਠਮਾਨਸੋ ਹੁਤ੍ਵਾ ਤਾਵਦੇਵ ਧਨਞ੍ਚਯਸੇਟ੍ਠਿਸ੍ਸ ਸਾਸਨਂ ਪਹਿਣਿ ‘‘ਇਦਾਨੇਵ ਦਾਰਿਕਂ ਆਨਯਿਸ੍ਸਾਮ, ਕਤ੍ਤਬ੍ਬਕਿਚ੍ਚਂ ਕਰੋਨ੍ਤੂ’’ਤਿ. ਸੋਪਿਸ੍ਸ ਪਟਿਸਾਸਨਂ ਪੇਸੇਸਿ – ‘‘ਨਯਿਦਂ ਅਮ੍ਹਾਕਂ ਭਾਰਿਯਂ, ਸੇਟ੍ਠਿ ਪਨ ਅਤ੍ਤਨੋ ਕਤ੍ਤਬ੍ਬਕਿਚ੍ਚਂ ਕਰੋਤੂ’’ਤਿ. ਸੋ ਕੋਸਲਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ ਆਰੋਚੇਸਿ – ‘‘ਦੇਵ, ਏਕਾ ਮੇ ਮਙ੍ਗਲਕਿਰਿਯਾ ਅਤ੍ਥਿ, ਦਾਸਸ੍ਸ ਤੇ ਪੁਣ੍ਣਵਡ੍ਢਨਸ੍ਸ ਧਨਞ੍ਚਯਸੇਟ੍ਠਿਨੋ ਧੀਤਰਂ ਵਿਸਾਖਂ ਨਾਮ ਦਾਰਿਕਂ ਆਨੇਸ੍ਸਾਮਿ, ਸਾਕੇਤਗਮਨਂ ਮੇ ਅਨੁਜਾਨਾਥਾ’’ਤਿ. ਸਾਧੁ, ਮਹਾਸੇਟ੍ਠਿ, ਕਿਂ ਪਨ ਅਮ੍ਹੇਹਿਪਿ ਆਗਨ੍ਤਬ੍ਬਨ੍ਤਿ? ਦੇਵ ਤੁਮ੍ਹਾਦਿਸਾਨਂ ਗਮਨਂ ਲਦ੍ਧੁਂ ਸਕ੍ਕਾਤਿ? ਰਾਜਾ ਮਹਾਕੁਲਸ੍ਸ ਸਙ੍ਗਹਂ ਕਾਤੁਕਾਮੋ ‘‘ਹੋਤੁ ਸੇਟ੍ਠਿ, ਆਗਮਿਸ੍ਸਾਮੀ’’ਤਿ ਸਮ੍ਪਟਿਚ੍ਛਿਤ੍ਵਾ ਮਿਗਾਰਸੇਟ੍ਠਿਨਾ ਸਦ੍ਧਿਂ ਸਾਕੇਤਨਗਰਂ ਅਗਮਾਸਿ. ਧਨਞ੍ਚਯਸੇਟ੍ਠਿ ‘‘ਮਿਗਾਰਸੇਟ੍ਠਿ ਕਿਰ ਕੋਸਲਰਾਜਾਨਂ ਗਹੇਤ੍ਵਾ ਆਗਤੋ’’ਤਿ ਸੁਤ੍ਵਾ ਪਚ੍ਚੁਗ੍ਗਮਨਂ ਕਤ੍ਵਾ ਰਾਜਾਨਂ ਗਹੇਤ੍ਵਾ ਅਤ੍ਤਨੋ ਨਿਵੇਸਨਂ ਅਗਮਾਸਿ. ਤਾਵਦੇਵ ਰਞ੍ਞੋ ਚ ਰਾਜਬਲਸ੍ਸ ਚ ਮਿਗਾਰਸੇਟ੍ਠਿਨੋ ਚ ਵਸਨਟ੍ਠਾਨਂ ਚੇਵ ਮਾਲਾਗਨ੍ਧਭਤ੍ਤਾਦੀਨਿ ਚ ਸਬ੍ਬਾਨਿ ਪਟਿਯਾਦੇਸਿ. ‘‘ਇਦਂ ਇਮਸ੍ਸ ਲਦ੍ਧੁਂ ਵਟ੍ਟਤਿ, ਇਦਂ ਇਮਸ੍ਸਾ’’ਤਿ ਸਬ੍ਬਂ ਅਤ੍ਤਨਾਵ ਜਾਨਾਤਿ. ਤੇ ਤੇ ਜਨਾ ਚਿਨ੍ਤਯਿਂਸੁ – ‘‘ਸੇਟ੍ਠਿ ਅਮ੍ਹਾਕਮੇਵ ਸਕ੍ਕਾਰਂ ਕਰੋਤੀ’’ਤਿ.

ਅਥੇਕਦਿਵਸਂ ਰਾਜਾ ਧਨਞ੍ਚਯਸੇਟ੍ਠਿਸ੍ਸ ਸਾਸਨਂ ਪਹਿਣਿ ‘‘ਨ ਸਕ੍ਕਾ ਸੇਟ੍ਠਿਨਾ ਚਿਰਕਾਲਂ ਅਮ੍ਹਾਕਂ ਭਰਣਪੋਸਨਂ ਕਾਤੁਂ, ਦਾਰਿਕਾਯ ਗਮਨਕਾਲਂ ਜਾਨਾਤੂ’’ਤਿ. ਸੋਪਿ ਰਞ੍ਞੋ ਸਾਸਨਂ ਪੇਸੇਸਿ – ‘‘ਇਦਾਨਿ ਵਸ੍ਸਕਾਲੋ ਆਗਤੋ, ਨ ਸਕ੍ਕਾ ਚਤੁਮਾਸਂ ਵਿਚਰਿਤੁਂ, ਤੁਮ੍ਹਾਕਂ ਬਲਕਾਯਸ੍ਸ ਯਂ ਯਂ ਲਦ੍ਧੁਂ ਵਟ੍ਟਤਿ, ਸਬ੍ਬਂ ਤਂ ਮਮ ਭਾਰੋ. ਕੇਵਲਂ ਦੇਵੋ ਮਯਾ ਪੇਸਿਤਕਾਲੇ ਗਚ੍ਛਤੂ’’ਤਿ. ਤਤੋ ਪਟ੍ਠਾਯ ਸਾਕੇਤਨਗਰਂ ਨਿਚ੍ਚਨਕ੍ਖਤ੍ਤਗਾਮੋ ਵਿਯ ਅਹੋਸਿ. ਏਵਂ ਤਯੋ ਮਾਸਾ ਅਤਿਕ੍ਕਨ੍ਤਾ. ਧਨਞ੍ਚਯਸੇਟ੍ਠਿਨੋ ਪਨ ਧੀਤਾਯ ਮਹਾਲਤਾਪਸਾਧਨਂ ਨ ਤਾਵ ਨਿਟ੍ਠਂ ਗਚ੍ਛਤਿ. ਅਥਸ੍ਸ ਕਮ੍ਮਨ੍ਤਾਧਿਟ੍ਠਾਯਕਾ ਆਗਨ੍ਤ੍ਵਾ ਆਰੋਚਯਿਂਸੁ – ‘‘ਸੇਸਂ ਅਸਨ੍ਤਂ ਨਾਮ ਨਤ੍ਥਿ, ਬਲਕਾਯਸ੍ਸ ਪਨ ਭਤ੍ਤਪਚਨਦਾਰੂਨਿ ਨਪ੍ਪਹੋਨ੍ਤੀ’’ਤਿ. ‘‘ਗਚ੍ਛਥ, ਤਾਤਾ, ਹਤ੍ਥਿਸਾਲਾ ਅਸ੍ਸਸਾਲਾ ਵਿਯੋਜੇਤ੍ਵਾ ਭਤ੍ਤਂ ਪਚਥਾ’’ਤਿ. ਏਵਂ ਪਚਨ੍ਤਾਨਮ੍ਪਿ ਅਡ੍ਢਮਾਸੋ ਅਤਿਕ੍ਕਨ੍ਤੋ. ਤਤੋ ਪੁਨ ਆਰੋਚਯਿਂਸੁ – ‘‘ਦਾਰੂਨਿ ਸਾਮਿ ਨਪ੍ਪਹੋਨ੍ਤੀ’’ਤਿ. ‘‘ਤਾਤਾ, ਇਮਸ੍ਮਿਂ ਕਾਲੇ ਦਾਰੂਨਿ ਲਦ੍ਧੁਂ ਨ ਸਕ੍ਕਾ, ਦੁਸ੍ਸਕੋਟ੍ਠਾਗਾਰਂ ਪਨ ਵਿਵਰਿਤ੍ਵਾ ਥੂਲਸਾਟਕੇ ਗਹੇਤ੍ਵਾ ਵਟ੍ਟਿਯੋ ਕਤ੍ਵਾ ਤੇਲਚਾਟਿਯਂ ਤੇਮੇਤ੍ਵਾ ਭਤ੍ਤਂ ਪਚਥਾ’’ਤਿ. ਇਮਿਨਾ ਨਿਯਾਮੇਨ ਪਚਨ੍ਤਾਨਂ ਚਤ੍ਤਾਰੋ ਮਾਸਾ ਪੂਰਯਿਂਸੁ.

ਤਤੋ ਧਨਞ੍ਚਯਸੇਟ੍ਠਿ ਧੀਤੁਯਾ ਮਹਾਲਤਾਪਸਾਧਨਸ੍ਸ ਨਿਟ੍ਠਿਤਭਾਵਂ ਞਤ੍ਵਾ ‘‘ਸ੍ਵੇ ਦਾਰਿਕਂ ਪੇਸੇਸ੍ਸਾਮੀ’’ਤਿ ਧੀਤਰਂ ਸਮੀਪੇ ਨਿਸੀਦਾਪੇਤ੍ਵਾ ‘‘ਅਮ੍ਮ ਪਤਿਕੁਲੇ ਵਸਨ੍ਤਿਯਾ ਨਾਮ ਇਮਞ੍ਚਿਮਞ੍ਚ ਆਚਾਰਂ ਸਿਕ੍ਖਿਤੁਂ ਵਟ੍ਟਤੀ’’ਤਿ ਓਵਾਦਂ ਅਦਾਸਿ. ਅਯਂ ਮਿਗਾਰਸੇਟ੍ਠਿ ਅਨਨ੍ਤਰਗਬ੍ਭੇ ਨਿਸਿਨ੍ਨੋ ਧਨਞ੍ਚਯਸੇਟ੍ਠਿਨੋ ਓਵਾਦਂ ਅਸ੍ਸੋਸਿ. ਸੋਪਿ ਸੇਟ੍ਠਿ ਧੀਤਰਂ ਏਵਂ ਓਵਦਿ –

‘‘ਅਮ੍ਮ ਸਸੁਰਕੁਲੇ ਵਸਨ੍ਤਿਯਾ ਨਾਮ ਅਨ੍ਤੋਅਗ੍ਗਿ ਬਹਿ ਨ ਨੀਹਰਿਤਬ੍ਬੋ, ਬਹਿਅਗ੍ਗਿ ਅਨ੍ਤੋ ਨ ਪਵੇਸੇਤਬ੍ਬੋ, ਦਦਨ੍ਤਸ੍ਸੇਵ ਦਾਤਬ੍ਬਂ, ਅਦਦਨ੍ਤਸ੍ਸ ਨ ਦਾਤਬ੍ਬਂ, ਦਦਨ੍ਤਸ੍ਸਪਿ ਅਦਦਨ੍ਤਸ੍ਸਪਿ ਦਾਤਬ੍ਬਂ, ਸੁਖਂ ਨਿਸੀਦਿਤਬ੍ਬਂ, ਸੁਖਂ ਪਰਿਭੁਞ੍ਜਿਤਬ੍ਬਂ, ਸੁਖਂ ਨਿਪਜ੍ਜਿਤਬ੍ਬਂ, ਅਗ੍ਗਿ ਪਰਿਚਰਿਤਬ੍ਬੋ, ਅਨ੍ਤੋਦੇਵਤਾ ਨਮਸ੍ਸਿਤਬ੍ਬਾ’’ਤਿ.

ਇਮਂ ਦਸਵਿਧਂ ਓਵਾਦਂ ਦਤ੍ਵਾ ਪੁਨਦਿਵਸੇ ਸਬ੍ਬਾ ਸੇਨਿਯੋ ਸਨ੍ਨਿਪਾਤੇਤ੍ਵਾ ਰਾਜਸੇਨਾਯ ਮਜ੍ਝੇ ਅਟ੍ਠ ਕੁਟੁਮ੍ਬਿਕੇ ਪਾਟਿਭੋਗੇ ਗਹੇਤ੍ਵਾ ‘‘ਸਚੇ ਮੇ ਧੀਤੁ ਗਤਟ੍ਠਾਨੇ ਦੋਸੋ ਉਪ੍ਪਜ੍ਜਤਿ, ਤੁਮ੍ਹੇਹਿ ਸੋਧੇਤਬ੍ਬੋ’’ਤਿ ਵਤ੍ਵਾ ਨਵਕੋਟਿਅਗ੍ਘਨਕੇਨ ਮਹਾਲਤਾਪਸਾਧਨੇਨ ਧੀਤਰਂ ਪਸਾਧੇਤ੍ਵਾ ਨ੍ਹਾਨਚੁਣ੍ਣਮੂਲਂ ਚਤੁਪਣ੍ਣਾਸਸਕਟਸਤਂ ਧਨਂ ਦਤ੍ਵਾ ਧੀਤਾਯ ਸਦ੍ਧਿਂ ਨਿਬਦ੍ਧਂ ਗਮਨਚਾਰਿਨਿਯੋ ਪਞ੍ਚਸਤਾ ਦਾਸਿਯੋ ਪਞ੍ਚ ਆਜਞ੍ਞਰਥਸਤਾਨਿ ਸਬ੍ਬੂਪਕਾਰਞ੍ਚ ਸਤਂ ਸਤਂ ਦਤ੍ਵਾ ਕੋਸਲਰਾਜਾਨਞ੍ਚ ਮਿਗਾਰਸੇਟ੍ਠਿਞ੍ਚ, ਵਿਸ੍ਸਜ੍ਜੇਤ੍ਵਾ ਧੀਤੁ ਗਮਨਵੇਲਾਯਂ ਵਜਾਧਿਟ੍ਠਾਯਕੇ ਪੁਰਿਸੇ ਪਕ੍ਕੋਸਾਪੇਤ੍ਵਾ, ‘‘ਤਾਤਾ, ਮਮ ਧੀਤਾਯ ਗਤਟ੍ਠਾਨੇ ਖੀਰਪਾਨਤ੍ਥਂ ਧੇਨੂਹਿ, ਯਾਨਯੋਜਨਤ੍ਥਂ ਉਸਭੇਹਿ ਚ ਅਤ੍ਥੋ ਹੋਤਿ, ਤਸ੍ਮਾ ਮਮ ਧੀਤੁ ਗਮਨਮਗ੍ਗੇ ਵਜਦ੍ਵਾਰਂ ਵਿਵਰਿਤ੍ਵਾ ਪੁਥੁਲਤੋ ਅਟ੍ਠ ਉਸਭਾਨਿ ਗੋਗਣੇਨ ਪੂਰੇਤ੍ਵਾ ਤਿਗਾਵੁਤਮਤ੍ਥਕੇ ਅਸੁਕਾ ਨਾਮ ਕਨ੍ਦਰਾ ਅਤ੍ਥਿ, ਅਗ੍ਗਗੋਯੂਥੇ ਤਂ ਠਾਨਂ ਪਤ੍ਤੇ ਭੇਰਿਸਞ੍ਞਾਯ ਵਜਦ੍ਵਾਰਂ ਪਿਦਹੇਯ੍ਯਾਥਾ’’ਤਿ. ਤੇ ‘‘ਸਾਧੂ’’ਤਿ ਸੇਟ੍ਠਿਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਤਥਾ ਅਕਂਸੁ. ਵਜਦ੍ਵਾਰੇ ਵਿਵਟੇ ਉਲ਼ਾਰੁਲ਼ਾਰਾਯੇਵ ਗਾਵਿਯੋ ਨਿਕ੍ਖਮਿਂਸੁ. ਦ੍ਵਾਰੇ ਪਿਦਹਿਤੇ ਪਨ ਵਿਸਾਖਾਯ ਪੁਞ੍ਞਬਲੇਨ ਬਲਵਗਾਵੋ ਚ ਦਮ੍ਮਗਾਵੋ ਚ ਬਹਿ ਲਙ੍ਘਿਤ੍ਵਾ ਮਗ੍ਗਂ ਪਟਿਪਜ੍ਜਿਂਸੁ. ਅਥ, ਵਿਸਾਖਾ, ਸਾਵਤ੍ਥਿਨਗਰਦ੍ਵਾਰਂ ਪਤ੍ਤਕਾਲੇ ਚਿਨ੍ਤੇਸਿ – ‘‘ਪਟਿਚ੍ਛਨ੍ਨਯਾਨਸ੍ਮਿਂ ਨੁ ਖੋ ਨਿਸੀਦਿਤ੍ਵਾ ਪਵਿਸਾਮਿ, ਉਦਾਹੁ ਰਥੇ ਠਤ੍ਵਾ’’ਤਿ. ਅਥਸ੍ਸਾ ਏਤਦਹੋਸਿ – ‘‘ਪਟਿਚ੍ਛਨ੍ਨਯਾਨੇਨ ਮੇ ਪਵਿਸਨ੍ਤਿਯਾ ਮਹਾਲਤਾਪਸਾਧਨਸ੍ਸ ਵਿਸੇਸੋ ਨ ਪਞ੍ਞਾਯਿਸ੍ਸਤੀ’’ਤਿ. ਸਾ ਸਕਲਨਗਰਸ੍ਸ ਅਤ੍ਤਾਨਂ ਦਸ੍ਸੇਨ੍ਤੀ ਰਥੇ ਠਤ੍ਵਾ ਨਗਰਂ ਪਾਵਿਸਿ. ਸਾਵਤ੍ਥਿਵਾਸਿਨੋ ਵਿਸਾਖਾਯ ਸਮ੍ਪਤ੍ਤਿਂ ਦਿਸ੍ਵਾ ‘‘ਏਸਾ ਕਿਰ, ਵਿਸਾਖਾ, ਨਾਮ ਏਵਰੂਪਾ, ਅਯਞ੍ਚ ਸਮ੍ਪਤ੍ਤਿ ਏਤਿਸ੍ਸਾਵ ਅਨੁਚ੍ਛਵਿਕਾ’’ਤਿ ਆਹਂਸੁ. ਇਤਿ ਸਾ ਮਹਾਸਮ੍ਪਤ੍ਤਿਯਾ ਮਿਗਾਰਸੇਟ੍ਠਿਨੋ ਗੇਹਂ ਪਾਵਿਸਿ. ਆਗਤਦਿਵਸੇ ਚਸ੍ਸਾ ਸਕਲਨਗਰਵਾਸਿਨੋ ‘‘ਅਮ੍ਹਾਕਂ, ਧਨਞ੍ਚਯਸੇਟ੍ਠਿ, ਅਤ੍ਤਨੋ ਨਗਰਂ ਸਮ੍ਪਤ੍ਤਾਨਂ ਮਹਾਸਕ੍ਕਾਰਂ ਅਕਾਸੀ’’ਤਿ ਯਥਾਬਲਂ ਪਣ੍ਣਾਕਾਰਂ ਪਹਿਣਿਂਸੁ. ਵਿਸਾਖਾ, ਪਹਿਤਪਹਿਤਂ ਪਣ੍ਣਾਕਾਰਂ ਤਸ੍ਮਿਂਯੇਵ ਨਗਰੇ ਅਞ੍ਞਮਞ੍ਞੇਸੁ ਕੁਲੇਸੁ ਸਬ੍ਬਤ੍ਥਕਮੇਵ ਦਾਪੇਸਿ. ਅਥਸ੍ਸਾ ਰਤ੍ਤਿਭਾਗਸਮਨਨ੍ਤਰੇ ਏਕਿਸ੍ਸਾ ਆਜਞ੍ਞਵਲ਼ਵਾਯ ਗਬ੍ਭਵੁਟ੍ਠਾਨਂ ਅਹੋਸਿ. ਸਾ ਦਾਸੀਹਿ ਦਣ੍ਡਦੀਪਿਕਾ ਗਾਹਾਪੇਤ੍ਵਾ ਤਤ੍ਥ ਗਨ੍ਤ੍ਵਾ ਵਲ਼ਵਂ ਉਣ੍ਹੋਦਕੇਨ ਨ੍ਹਾਪੇਤ੍ਵਾ ਤੇਲੇਨ ਮਕ੍ਖਾਪੇਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਅਗਮਾਸਿ.

ਮਿਗਾਰਸੇਟ੍ਠਿਪਿ ਸਤ੍ਤਾਹਂ ਪੁਤ੍ਤਸ੍ਸ ਆਵਾਹਸਕ੍ਕਾਰਂ ਕਰੋਨ੍ਤੋ ਧੁਰਵਿਹਾਰੇ ਵਸਨ੍ਤਮ੍ਪਿ ਤਥਾਗਤਂ ਅਮਨਸਿਕਤ੍ਵਾ ਸਤ੍ਤਮੇ ਦਿਵਸੇ ਸਕਲਨਿਵੇਸਨਂ ਪੂਰੇਨ੍ਤੋ ਨਗ੍ਗਸਮਣਕੇ ਨਿਸੀਦਾਪੇਤ੍ਵਾ ‘‘ਆਗਚ੍ਛਤੁ ਮੇ ਧੀਤਾ, ਅਰਹਨ੍ਤੇ ਵਨ੍ਦਤੂ’’ਤਿ ਵਿਸਾਖਾਯ ਸਾਸਨਂ ਪਹਿਣਿ. ਸਾ ‘‘ਅਰਹਨ੍ਤਾ’’ਤਿ ਵਚਨਂ ਸੁਤ੍ਵਾ ਸੋਤਾਪਨ੍ਨਾ ਅਰਿਯਸਾਵਿਕਾ ਹਟ੍ਠਤੁਟ੍ਠਾ ਹੁਤ੍ਵਾ ਤੇਸਂ ਨਿਸਿਨ੍ਨਟ੍ਠਾਨਂ ਗਨ੍ਤ੍ਵਾ ਤੇ ਓਲੋਕੇਤ੍ਵਾ ‘‘ਨ ਏਵਰੂਪਾ ਨਾਮ ਅਰਹਨ੍ਤਾ ਹੋਨ੍ਤਿ, ਹਿਰੋਤ੍ਤਪ੍ਪਵਿਵਜ੍ਜਿਤਾਨਂ ਨਾਮ ਸਨ੍ਤਿਕਂ ਕਸ੍ਮਾ ਮਂ ਸਸੁਰੋ ਪਕ੍ਕੋਸਾਪੇਤੀ’’ਤਿ ‘‘ਧੀ, ਧੀ’’ਤਿ ਗਰਹਿਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਗਤਾ. ਨਗ੍ਗਸਮਣਾ ਤਂ ਦਿਸ੍ਵਾ ਸਬ੍ਬੇ ਏਕਪ੍ਪਹਾਰੇਨੇਵ ਸੇਟ੍ਠਿਂ ਗਰਹਿਂਸੁ – ‘‘ਕਿਂ ਤ੍ਵਂ, ਗਹਪਤਿ, ਅਞ੍ਞਂ ਨਾਲਤ੍ਥ, ਸਮਣਸ੍ਸ ਗੋਤਮਸ੍ਸ ਸਾਵਿਕਂ ਮਹਾਕਾਲ਼ਕਣ੍ਣਿਂ ਕਸ੍ਮਾ ਇਮਂ ਗੇਹਂ ਪਵੇਸੇਸਿ, ਵੇਗੇਨ ਨਂ ਇਮਸ੍ਮਾ ਗੇਹਾ ਨੀਹਰਾਹੀ’’ਤਿ. ਤਤੋ ਸੇਟ੍ਠਿ ‘‘ਨ ਸਕ੍ਕਾ ਮਯਾ ਇਮੇਸਂ ਵਚਨੇਨ ਇਮਂ ਗੇਹਾ ਨੀਹਰਿਤੁਂ, ਮਹਾਕੁਲਸ੍ਸ ਧੀਤਾ ਅਯ’’ਨ੍ਤਿ ਚਿਨ੍ਤੇਤ੍ਵਾ – ‘‘ਆਚਰਿਯਾ ਦਹਰਾ ਨਾਮ ਜਾਨਿਤ੍ਵਾ ਵਾ ਅਜਾਨਿਤ੍ਵਾ ਵਾ ਕਰੇਯ੍ਯੁਂ, ਤੁਮ੍ਹੇ ਤੁਣ੍ਹੀ ਹੋਥਾ’’ਤਿ ਨਗ੍ਗੇ ਉਯ੍ਯੋਜੇਤ੍ਵਾ ਮਹਾਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਸੁਵਣ੍ਣਕਟਚ੍ਛੁਂ ਗਹੇਤ੍ਵਾ ਵਿਸਾਖਾਯ ਪਰਿਵਿਸਿਯਮਾਨੋ ਸੁਵਣ੍ਣਪਾਤਿਯਂ ਅਪ੍ਪੋਦਕਮਧੁਪਾਯਾਸਂ ਪਰਿਭੁਞ੍ਜਿ.

ਤਸ੍ਮਿਂ ਸਮਯੇ ਏਕੋ ਪਿਣ੍ਡਚਾਰਿਕੋ ਥੇਰੋ ਪਿਣ੍ਡਾਯ ਚਰਨ੍ਤੋ ਸੇਟ੍ਠਿਸ੍ਸ ਘਰਦ੍ਵਾਰਂ ਪਾਪੁਣਿ. ਵਿਸਾਖਾ, ਤਂ ਦਿਸ੍ਵਾ ‘‘ਸਸੁਰਸ੍ਸ ਆਚਿਕ੍ਖਿਤੁਂ ਨ ਯੁਤ੍ਤ’’ਨ੍ਤਿ ਯਥਾ ਸੋ ਥੇਰਂ ਪਸ੍ਸਤਿ, ਏਵਂ ਅਪਗਨ੍ਤ੍ਵਾ ਅਟ੍ਠਾਸਿ. ਸੋ ਪਨ ਬਾਲੋ ਥੇਰਂ ਦਿਸ੍ਵਾਪਿ ਅਪਸ੍ਸਨ੍ਤੋ ਵਿਯ ਹੁਤ੍ਵਾ ਅਧੋਮੁਖੋ ਪਾਯਾਸਮੇਵ ਭੁਞ੍ਜਤਿ. ਵਿਸਾਖਾ, ‘‘ਥੇਰਂ ਦਿਸ੍ਵਾਪਿ ਮੇ ਸਸੁਰੋ ਸਞ੍ਞਂ ਨ ਕਰੋਤੀ’’ਤਿ ਞਤ੍ਵਾ ਥੇਰਂ ਉਪਸਙ੍ਕਮਿਤ੍ਵਾ ‘‘ਅਤਿਚ੍ਛਥ, ਭਨ੍ਤੇ, ਮਯ੍ਹਂ ਸਸੁਰੋ ਪੁਰਾਣਂ ਖਾਦਤੀ’’ਤਿ ਆਹ. ਸੋ ਨਿਗਣ੍ਠੇਹਿ ਤਾਵ ਕਥਿਤਕਾਲੇ ਅਧਿਵਾਸੇਸਿ, ‘‘ਪੁਰਾਣਂ ਖਾਦਤੀ’’ਤਿ ਵੁਤ੍ਤਕ੍ਖਣੇਯੇਵ ਪਨ ਹਤ੍ਥਂ ਅਪਨੇਤ੍ਵਾ ‘‘ਇਮਂ ਪਾਯਾਸਂ ਇਤੋ ਹਰਥ, ਏਤਞ੍ਚ ਇਮਸ੍ਮਾ ਗੇਹਾ ਨੀਹਰਥ. ਅਯਞ੍ਹਿ ਮਂ ਏਵਰੂਪੇ ਮਙ੍ਗਲਗੇਹੇ ਅਸੁਚਿਖਾਦਕਂ ਨਾਮ ਕਰੋਤੀ’’ਤਿ ਆਹ. ਤਸ੍ਮਿਂ ਖੋ ਪਨ ਨਿਵੇਸਨੇ ਸਬ੍ਬੇਪਿ ਦਾਸਕਮ੍ਮਕਰਾ ਵਿਸਾਖਾਯ ਸਨ੍ਤਕਾਵ, ਕੋ ਨਂ ਹਤ੍ਥੇ ਵਾ ਪਾਦੇ ਵਾ ਗਣ੍ਹਿਸ੍ਸਤਿ, ਮੁਖੇਨ ਕਥੇਤੁਂ ਸਮਤ੍ਥੋਪਿ ਨਾਮ ਨਤ੍ਥਿ. ਤਤੋ, ਵਿਸਾਖਾ, ਸਸੁਰਸ੍ਸ ਕਥਂ ਸੁਤ੍ਵਾ ਆਹ – ‘‘ਤਾਤ, ਨ ਏਤ੍ਤਕੇਨ ਵਚਨੇਨ ਮਯਂ ਨਿਕ੍ਖਮਾਮ, ਨਾਹਂ ਤੁਮ੍ਹੇਹਿ ਉਦਕਤਿਤ੍ਥਤੋ ਕੁਮ੍ਭਦਾਸਿਕਾ ਵਿਯ ਆਨੀਤਾ. ਧਰਮਾਨਕਮਾਤਾਪਿਤੂਨਂ ਧੀਤਰੋ ਨਾਮ ਨ ਏਤ੍ਤਕੇਨੇਵ ਨਿਕ੍ਖਮਨ੍ਤਿ, ਏਤੇਨੇਵ ਮੇ ਕਾਰਣੇਨ ਪਿਤਾ ਇਧਾਗਮਨਦਿਵਸੇ ਅਟ੍ਠ ਕੁਟੁਮ੍ਬਿਕੇ ਪਕ੍ਕੋਸਾਪੇਤ੍ਵਾ ‘ਸਚੇ ਮੇ ਧੀਤਰਂ ਉਪਾਦਾਯ ਦੋਸੋ ਉਪ੍ਪਜ੍ਜਤਿ, ਸੋਧੇਯ੍ਯਾਥਾ’ਤਿ ਵਤ੍ਵਾ ਤੇਸਂ ਹਤ੍ਥੇ ਠਪੇਸਿ. ਤੇ ਪਕ੍ਕੋਸਾਪੇਤ੍ਵਾ ਮਯ੍ਹਂ ਦੋਸਾਦੋਸਂ ਸੋਧਾਪੇਥਾ’’ਤਿ.

ਤਤੋ ਸੇਟ੍ਠਿ ‘‘ਕਲ੍ਯਾਣਂ ਏਸਾ ਕਥੇਤੀ’’ਤਿ ਅਟ੍ਠ ਕੁਟੁਮ੍ਬਿਕੇ ਪਕ੍ਕੋਸਾਪੇਤ੍ਵਾ ‘‘ਅਯਂ ਦਾਰਿਕਾ ਸਤ੍ਤਮੇ ਦਿਵਸੇ ਅਪਰਿਪੁਣ੍ਣੇਯੇਵ ਮਙ੍ਗਲਗੇਹੇ ਨਿਸਿਨ੍ਨਂ ਮਂ ‘ਅਸੁਚਿਖਾਦਕੋ’ਤਿ ਵਦਤੀ’’ਤਿ ਆਹ. ਏਵਂ ਕਿਰ, ਅਮ੍ਮਾਤਿ? ‘‘ਤਾਤਾ, ਮਯ੍ਹਂ ਸਸੁਰੋ ਅਸੁਚਿਂ ਖਾਦਿਤੁਕਾਮੋ ਭਵਿਸ੍ਸਤਿ, ਅਹਂ ਪਨ ਏਵਂ ਕਤ੍ਵਾ ਨ ਕਥੇਮਿ. ਏਕਸ੍ਮਿਂ ਪਨ ਪਿਣ੍ਡਪਾਤਿਕਤ੍ਥੇਰੇ ਘਰਦ੍ਵਾਰੇ ਠਿਤੇ ਅਯਂ ਅਪ੍ਪੋਦਕਮਧੁਪਾਯਾਸਂ ਭੁਞ੍ਜਨ੍ਤੋ ਨ ਤਂ ਮਨਸਿ ਕਰੋਤਿ, ਅਹਂ ਇਮਿਨਾ ਕਾਰਣੇਨ ‘ਅਤਿਚ੍ਛਥ, ਭਨ੍ਤੇ, ਮਯ੍ਹਂ ਸਸੁਰੋ ਇਮਸ੍ਮਿਂ ਅਤ੍ਤਭਾਵੇ ਪੁਞ੍ਞਂ ਨ ਕਰੋਤਿ, ਪੁਰਾਣਪੁਞ੍ਞਂ ਖਾਦਤੀ’ਤਿ ਏਤ੍ਤਕਂ ਕਥਯਿਨ੍ਤਿ ਆਹ. ਅਯ੍ਯ, ਇਧ ਦੋਸੋ ਨਤ੍ਥਿ, ਅਮ੍ਹਾਕਂ ਧੀਤਾ ਕਾਰਣਂ ਕਥੇਤਿ, ਤ੍ਵਂ ਕਸ੍ਮਾ ਕੁਜ੍ਝਸੀਤਿ? ਅਯ੍ਯਾ, ਏਸ ਤਾਵ ਦੋਸੋ ਮਾ ਹੋਤੁ, ਅਯਂ ਪਨ ਦਾਰਿਕਾ ਆਗਤਦਿਵਸੇਯੇਵ ਮਮ ਪੁਤ੍ਤੇ ਸਞ੍ਞਂ ਅਕਤ੍ਵਾ ਅਤ੍ਤਨੋ ਇਚ੍ਛਿਤਟ੍ਠਾਨਂ ਅਗਮਾਸੀਤਿ. ਏਵਂ ਕਿਰ, ਅਮ੍ਮਾਤਿ? ਤਾਤਾ, ਨਾਹਂ ਇਚ੍ਛਿਤਟ੍ਠਾਨਂ ਗਚ੍ਛਾਮਿ, ਇਮਸ੍ਮਿਂ ਪਨ ਗੇਹੇ ਆਜਾਨੀਯਵਲ਼ਵਾਯ ਵਿਜਾਤਾਯ ਸਞ੍ਞਮ੍ਪਿ ਅਕਤ੍ਵਾ ਨਿਸੀਦਨਂ ਨਾਮ ਅਯੁਤ੍ਤਨ੍ਤਿ ਦਣ੍ਡਦੀਪਿਕਾ ਗਾਹਾਪੇਤ੍ਵਾ ਦਾਸੀਹਿ ਪਰਿਵੁਤਾ ਤਤ੍ਥ ਗਨ੍ਤ੍ਵਾ ਵਲ਼ਵਾਯ ਵਿਜਾਤਪਰਿਹਾਰਂ ਕਾਰਾਪੇਸਿਨ੍ਤਿ. ਅਯ੍ਯ, ਅਮ੍ਹਾਕਂ ਧੀਤਾ ਤਵ ਗੇਹੇ ਦਾਸੀਹਿਪਿ ਅਕਤ੍ਤਬ੍ਬਕਮ੍ਮਂ ਅਕਾਸਿ, ਤ੍ਵਂ ਏਤ੍ਥ ਕਿਂ ਦੋਸਂ ਪਸ੍ਸਸੀਤਿ?

ਅਯ੍ਯਾ, ਏਸ ਤਾਵ ਗੁਣੋ ਹੋਤੁ, ਇਮਿਸ੍ਸਾ ਪਨ ਪਿਤਾ ਇਧਾਗਮਨਦਿਵਸੇ ਓਵਾਦਂ ਦੇਨ੍ਤੋ ‘‘ਅਨ੍ਤੋਅਗ੍ਗਿ ਬਹਿ ਨ ਨੀਹਰਿਤਬ੍ਬੋ’’ਤਿ ਆਹ, ਕਿਂ ਪਨ ਸਕ੍ਕਾ ਅਮ੍ਹੇਹਿ ਉਭਤੋ ਪਟਿਵਿਸ੍ਸਕਗੇਹਾਨਂ ਅਗ੍ਗਿਂ ਅਦਤ੍ਵਾ ਵਸਿਤੁਨ੍ਤਿ? ਏਵਂ ਕਿਰ, ਅਮ੍ਮਾਤਿ? ਤਾਤਾ, ਨ ਮਯ੍ਹਂ ਪਿਤਾ ਏਤਂ ਅਗ੍ਗਿਂ ਉਪਾਦਾਯ ਕਥੇਸਿ, ਯਾ ਪਨ ਅਨ੍ਤੋਨਿਵੇਸਨੇ ਸਸ੍ਸੁਆਦੀਨਂ ਰਹਸ੍ਸਕਥਾ ਉਪ੍ਪਜ੍ਜਤਿ, ਸਾ ਦਾਸਿਦਾਸਾਨਂ ਨ ਕਥੇਤਬ੍ਬਾ. ਏਵਰੂਪਾ ਹਿ ਕਥਾ ਵਡ੍ਢਮਾਨਾ ਕਲਹਾਯ ਸਂਵਤ੍ਤਤਿ, ਇਦਂ ਸਨ੍ਧਾਯ ਮਯ੍ਹਂ ਪਿਤਾ ਕਥੇਸਿ, ਤਾਤਾਤਿ.

ਅਯ੍ਯਾ, ਏਤਂ ਤਾਵ ਏਵਂ ਹੋਤੁ, ਇਮਿਸ੍ਸਾ ਪਿਤਾ ‘‘ਬਾਹਿਰਤੋ ਅਗ੍ਗਿ ਨ ਅਨ੍ਤੋ ਪਵੇਸੇਤਬ੍ਬੋ’’ਤਿ ਆਹ, ਕਿਂ ਸਕ੍ਕਾ ਅਮ੍ਹੇਹਿ ਅਨ੍ਤੋਅਗ੍ਗਿਮ੍ਹਿ ਨਿਬ੍ਬੁਤੇ ਬਾਹਿਰਤੋ ਅਗ੍ਗਿਂ ਅਨਾਹਰਿਤੁਨ੍ਤਿ? ਏਵਂ ਕਿਰ, ਅਮ੍ਮਾਤਿ? ਤਾਤਾ, ਮਯ੍ਹਂ ਪਿਤਾ ਏਤਂ ਅਗ੍ਗਿਂ ਸਨ੍ਧਾਯ ਨ ਕਥੇਸਿ, ਯਂ ਪਨ ਦੋਸਂ ਦਾਸਕਮ੍ਮਕਾਰੇਹਿ ਕਥਿਤਂ ਹੋਤਿ, ਤਂ ਅਨ੍ਤੋਮਾਨੁਸਕਾਨਂ ਨ ਕਥੇਤਬ੍ਬਂ…ਪੇ….

ਯਮ੍ਪਿ ਤੇਨ ‘‘ਯੇ ਦਦਨ੍ਤਿ, ਤੇਸਂਯੇਵ ਦਾਤਬ੍ਬ’’ਨ੍ਤਿ ਵੁਤ੍ਤਂ, ਤਂ ‘‘ਯਾਚਿਤਕਂ ਉਪਕਰਣਂ ਗਹੇਤ੍ਵਾ ਯੇ ਪਟਿਦਦਨ੍ਤਿ, ਤੇਸਂਯੇਵ ਦਾਤਬ੍ਬ’’ਨ੍ਤਿ ਸਨ੍ਧਾਯ ਵੁਤ੍ਤਂ.

‘‘ਯੇ ਨ ਦਦਨ੍ਤੀ’’ਤਿ ਇਦਮ੍ਪਿ ਯਾਚਿਤਕਂ ਉਪਕਰਣਂ ਗਹੇਤ੍ਵਾ ਯੇ ਨ ਪਟਿਦਦਨ੍ਤਿ, ਤੇਸਂ ਨ ਦਾਤਬ੍ਬਨ੍ਤਿ ਸਨ੍ਧਾਯ ਵੁਤ੍ਤਂ.

‘‘ਦਦਨ੍ਤਸ੍ਸਪਿ ਅਦਦਨ੍ਤਸ੍ਸਪਿ ਦਾਤਬ੍ਬ’’ਨ੍ਤਿ, ਇਦਂ ਪਨ ਦੁਗ੍ਗਤੇਸੁ ਞਾਤਿਮਿਤ੍ਤੇਸੁ ਸਮ੍ਪਤ੍ਤੇਸੁ ਪਟਿਦਾਤੁਂ ਸਕ੍ਕੋਨ੍ਤੁ ਵਾ ਮਾ ਵਾ, ਦਾਤੁਮੇਵ ਵਟ੍ਟਤੀਤਿ ਸਨ੍ਧਾਯ ਵੁਤ੍ਤਂ.

‘‘ਸੁਖਂ ਨਿਸੀਦਿਤਬ੍ਬ’’ਨ੍ਤਿ ਇਦਮ੍ਪਿ ਸਸ੍ਸੁਸਸੁਰੇ ਦਿਸ੍ਵਾ ਉਟ੍ਠਾਤਬ੍ਬਟ੍ਠਾਨੇ ਨਿਸੀਦਿਤੁਂ ਨ ਵਟ੍ਟਤੀਤਿ ਸਨ੍ਧਾਯ ਵੁਤ੍ਤਂ.

‘‘ਸੁਖਂ ਭੁਞ੍ਜਿਤਬ੍ਬ’’ਨ੍ਤਿ ਇਦਂ ਪਨ ਸਸ੍ਸੁਸਸੁਰਸਾਮਿਕੇਹਿ ਪੁਰੇਤਰਂ ਅਭੁਞ੍ਜਿਤ੍ਵਾ ਤੇ ਪਰਿਵਿਸਿਤ੍ਵਾ ਸਬ੍ਬੇਹਿ ਲਦ੍ਧਾਲਦ੍ਧਂ ਞਤ੍ਵਾ ਪਚ੍ਛਾ ਸਯਂ ਭੁਞ੍ਜਿਤੁਂ ਵਟ੍ਟਤੀਤਿ ਸਨ੍ਧਾਯ ਵੁਤ੍ਤਂ.

‘‘ਸੁਖਂ ਨਿਪਜ੍ਜਿਤਬ੍ਬ’’ਨ੍ਤਿ ਇਦਮ੍ਪਿ ਸਸ੍ਸੁਸਸੁਰਸਾਮਿਕੇਹਿ ਪੁਰੇਤਰਮੇਵ ਸਯਨਂ ਆਰੁਯ੍ਹ ਨ ਨਿਪਜ੍ਜਿਤਬ੍ਬਂ, ਤੇਸਂ ਕਤ੍ਤਬ੍ਬਯੁਤ੍ਤਕਂ ਵਤ੍ਤਪਟਿਵਤ੍ਤਂ ਕਤ੍ਵਾ ਪਚ੍ਛਾ ਸਯਂ ਨਿਪਜ੍ਜਿਤੁਂ ਯੁਤ੍ਤਨ੍ਤਿ ਇਦਂ ਸਨ੍ਧਾਯ ਵੁਤ੍ਤਂ.

‘‘ਅਗ੍ਗਿ ਪਰਿਚਰਿਤਬ੍ਬੋ’’ਤਿ ਇਦਂ ਪਨ ਸਸ੍ਸੁਮ੍ਪਿ ਸਸੁਰਮ੍ਪਿ ਸਾਮਿਕਮ੍ਪਿ ਅਗ੍ਗਿਕ੍ਖਨ੍ਧਂ ਵਿਯ ਉਰਗਰਾਜਾਨਂ ਵਿਯ ਚ ਕਤ੍ਵਾ ਪਸ੍ਸਿਤੁਂ ਵਟ੍ਟਤੀਤਿ ਇਦਂ ਸਨ੍ਧਾਯ ਵੁਤ੍ਤਨ੍ਤਿ.

ਏਤੇ ਤਾਵ ਏਤ੍ਤਕਾ ਗੁਣਾ ਹੋਨ੍ਤੁ, ਇਮਿਸ੍ਸਾ ਪਨ ਪਿਤਾ ਅਨ੍ਤੋਦੇਵਤਾ ਨਮਸ੍ਸਾਪੇਤਿ, ਇਮਸ੍ਸ ਕੋ ਅਤ੍ਥੋਤਿ? ਏਵਂ ਕਿਰ, ਅਮ੍ਮਾਤਿ? ਆਮ, ਤਾਤਾ, ਏਤਮ੍ਪਿ ਹਿ ਮੇ ਪਿਤਰਾ ਇਦਂ ਸਨ੍ਧਾਯ ਵੁਤ੍ਤਂ – ‘‘ਆਵੇਣਿਕਘਰਾਵਾਸਂ ਵਸਨਕਾਲਤੋ ਪਟ੍ਠਾਯ ਅਤ੍ਤਨੋ ਘਰਦ੍ਵਾਰਂ ਸਮ੍ਪਤ੍ਤਪਬ੍ਬਜਿਤਂ ਦਿਸ੍ਵਾ ਯਂ ਘਰੇ ਖਾਦਨੀਯਂ ਭੋਜਨੀਯਂ ਅਤ੍ਥਿ, ਤਤੋ ਪਬ੍ਬਜਿਤਾਨਂ ਦਤ੍ਵਾਵ ਖਾਦਿਤੁਂ ਵਟ੍ਟਤੀ’’ਤਿ. ਅਥ ਨਂ ਤੇ ਆਹਂਸੁ – ‘‘ਤੁਯ੍ਹਂ ਪਨ ਮਹਾਸੇਟ੍ਠਿ ਪਬ੍ਬਜਿਤੇ ਦਿਸ੍ਵਾ ਅਦਾਨਮੇਵ ਰੁਚ੍ਚਤਿ ਮਞ੍ਞੇਤਿ. ਸੋ ਅਞ੍ਞਂ ਪਟਿਵਚਨਂ ਅਪਸ੍ਸਨ੍ਤੋ ਅਧੋਮੁਖੋ ਨਿਸੀਦਿ’’.

ਅਥ ਨਂ ਕੁਟੁਮ੍ਬਿਕਾ ‘‘ਕਿਂ ਸੇਟ੍ਠਿ ਅਞ੍ਞੋਪਿ ਅਮ੍ਹਾਕਂ ਧੀਤੁ ਦੋਸੋ ਅਤ੍ਥੀ’’ਤਿ ਪੁਚ੍ਛਿਂਸੁ. ਨਤ੍ਥਿ, ਅਯ੍ਯਾਤਿ. ਕਸ੍ਮਾ ਪਨ ਨਂ ਨਿਦ੍ਦੋਸਂ ਅਕਾਰਣਾ ਗੇਹਤੋ ਨੀਹਰਾਪੇਸੀਤਿ? ਤਸ੍ਮਿਂ ਖਣੇ, ਵਿਸਾਖਾ, ਆਹ – ‘‘ਪਠਮਂ ਤਾਵ ਮਯ੍ਹਂ ਮਮ ਸਸੁਰਸ੍ਸ ਵਚਨੇਨ ਗਮਨਂ ਨ ਯੁਤ੍ਤਂ, ਮਯ੍ਹਂ ਪਨ ਆਗਮਨਦਿਵਸੇ ਮਮ ਦੋਸਾਦੋਸਂ ਸੋਧਨਤ੍ਥਾਯ ਮਮ ਪਿਤਾ ਤੁਮ੍ਹਾਕਂ ਹਤ੍ਥੇ ਠਪੇਤ੍ਵਾ ਅਦਾਸਿ, ਇਦਾਨਿ ਮਯ੍ਹਂ ਗਨ੍ਤੁਂ ਸੁਖ’’ਨ੍ਤਿ ਦਾਸਿਦਾਸੇ ‘‘ਯਾਨਾਦੀਨਿ ਸਜ੍ਜਾਨਿ ਕਰੋਥਾ’’ਤਿ ਆਣਾਪੇਸਿ. ਅਥ ਨਂ ਸੇਟ੍ਠਿ ਤੇ ਕੁਟੁਮ੍ਬਿਕੇ ਗਹੇਤ੍ਵਾ, ‘‘ਅਮ੍ਮ, ਮਯਾ ਅਜਾਨਿਤ੍ਵਾ ਕਥਿਤਂ, ਖਮਾਹਿ ਮਯ੍ਹ’’ਨ੍ਤਿ ਆਹ. ‘‘ਤਾਤਾ, ਤੁਮ੍ਹਾਕਂ ਖਮਿਤਬ੍ਬਂ ਤਾਵ ਖਮਾਮਿ, ਅਹਂ ਪਨ ਬੁਦ੍ਧਸਾਸਨੇ ਅਵੇਚ੍ਚਪ੍ਪਸਨ੍ਨਸ੍ਸ ਕੁਲਸ੍ਸ ਧੀਤਾ, ਨ ਮਯਂ ਵਿਨਾ ਭਿਕ੍ਖੁਸਙ੍ਘੇਨ ਵਤ੍ਤਾਮ. ਸਚੇ ਮਮ ਰੁਚਿਯਾ ਭਿਕ੍ਖੁਸਙ੍ਘਂ ਪਟਿਜਗ੍ਗਿਤੁਂ ਲਭਾਮਿ, ਵਸਿਸ੍ਸਾਮੀ’’ਤਿ. ‘‘ਅਮ੍ਮ, ਤ੍ਵਂ ਯਥਾਰੁਚਿਯਾ ਤਵ ਸਮਣੇ ਪਟਿਜਗ੍ਗਾਹੀ’’ਤਿ.

ਤਤੋ, ਵਿਸਾਖਾ, ਦਸਬਲਂ ਨਿਮਨ੍ਤਾਪੇਤ੍ਵਾ ਪੁਨਦਿਵਸੇ ਨਿਵੇਸਨਂ ਪੂਰੇਨ੍ਤੀ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਸੀਦਾਪੇਸਿ. ਨਗ੍ਗਪਰਿਸਾਪਿ ਸਤ੍ਥੁ ਮਿਗਾਰਸੇਟ੍ਠਿਨੋ ਗੇਹਂ ਗਤਭਾਵਂ ਸੁਤ੍ਵਾ ਤਤ੍ਥ ਗਨ੍ਤ੍ਵਾ ਗੇਹਂ ਪਰਿਵਾਰੇਤ੍ਵਾ ਨਿਸੀਦਿਂਸੁ. ਵਿਸਾਖਾ, ਦਕ੍ਖਿਣੋਦਕਂ ਦਤ੍ਵਾ ‘‘ਸਬ੍ਬੋ ਸਕ੍ਕਾਰੋ ਪਟਿਯਾਦਿਤੋ, ਸਸੁਰੋ ਮੇ ਆਗਨ੍ਤ੍ਵਾ ਦਸਬਲਂ ਪਰਿਵਿਸਤੂ’’ਤਿ ਸਾਸਨਂ ਪੇਸੇਸਿ. ਸੋ ਨਿਗਣ੍ਠਾਨਂ ਵਚਨਂ ਸੁਤ੍ਵਾ ‘‘ਮਮ ਧੀਤਾ ਸਮ੍ਮਾਸਮ੍ਬੁਦ੍ਧਂ ਪਰਿਵਿਸਤੂ’’ਤਿ ਆਹ. ਵਿਸਾਖਾ, ਨਾਨਗ੍ਗਰਸੇਹਿ ਦਸਬਲਂ ਪਰਿਵਿਸਿਤ੍ਵਾ ਨਿਟ੍ਠਿਤੇ ਭਤ੍ਤਕਿਚ੍ਚੇ ਪੁਨ ਸਾਸਨਂ ਪਹਿਣਿ – ‘‘ਸਸੁਰੋ ਮੇ ਆਗਨ੍ਤ੍ਵਾ ਦਸਬਲਸ੍ਸ ਧਮ੍ਮਕਥਂ ਸੁਣਾਤੂ’’ਤਿ. ਅਥ ਨਂ ‘‘ਇਦਾਨਿ ਅਗਮਨਂ ਨਾਮ ਅਤਿਵਿਯ ਅਕਾਰਣ’’ਨ੍ਤਿ ਧਮ੍ਮਕਥਂ ਸੋਤੁਕਮ੍ਯਤਾਯ ਗਚ੍ਛਨ੍ਤਂ ਨਗ੍ਗਸਮਣਾ ਆਹਂਸੁ – ‘‘ਸਮਣਸ੍ਸ ਗੋਤਮਸ੍ਸ ਧਮ੍ਮਂ ਸੁਣਨ੍ਤੋ ਬਹਿਸਾਣਿਯਂ ਨਿਸੀਦਿਤ੍ਵਾ ਸੁਣਾਹੀ’’ਤਿ. ਪੁਰੇਤਰਮੇਵ ਚ ਗਨ੍ਤ੍ਵਾ ਸਾਣਿਯਾ ਪਰਿਕ੍ਖਿਪਿਂਸੁ. ਮਿਗਾਰਸੇਟ੍ਠਿ ਗਨ੍ਤ੍ਵਾ ਬਹਿਸਾਣਿਯਂ ਨਿਸੀਦਿ. ਤਥਾਗਤੋ ‘‘ਤ੍ਵਂ ਬਹਿਸਾਣਿਯਂ ਵਾ ਨਿਸੀਦ, ਪਰਕੁਟ੍ਟੇ ਵਾ ਪਰਸੇਲੇ ਵਾ ਪਰਚਕ੍ਕਵਾਲ਼ੇ ਵਾ ਨਿਸੀਦ. ਅਹਂ ਬੁਦ੍ਧੋ ਨਾਮ ਸਕ੍ਕੋਮਿ ਤਂ ਮਮ ਸਦ੍ਦਂ ਸਾਵੇਤੁ’’ਨ੍ਤਿ ਸੁਵਣ੍ਣਵਣ੍ਣਫਲਂ ਅਮ੍ਬਰੁਕ੍ਖਂ ਖਨ੍ਧੇ ਗਹੇਤ੍ਵਾ ਚਾਲੇਨ੍ਤੋ ਵਿਯ ਧਮ੍ਮਕਥਂ ਕਥੇਸਿ, ਦੇਸਨਾਪਰਿਯੋਸਾਨੇ ਸੇਟ੍ਠਿ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਸਾਣਿਂ ਉਕ੍ਖਿਪਿਤ੍ਵਾ ਸਤ੍ਥੁ ਪਾਦੇ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਸਤ੍ਥੁ ਸਨ੍ਤਿਕੇਯੇਵ ਚ ‘‘ਤ੍ਵਂ, ਅਮ੍ਮ, ਅਜ੍ਜ ਆਦਿਂ ਕਤ੍ਵਾ ਮਮ ਮਾਤਾ’’ਤਿ ਵਿਸਾਖਂ ਅਤ੍ਤਨੋ ਮਾਤੁਟ੍ਠਾਨੇ ਠਪੇਸਿ. ਤਤੋ ਪਟ੍ਠਾਯ, ਵਿਸਾਖਾ ਮਿਗਾਰਮਾਤਾ, ਨਾਮ ਜਾਤਾ.

ਸਾ ਏਕਦਿਵਸਂ ਨਕ੍ਖਤ੍ਤਸਮਯੇ ਵਤ੍ਤਨ੍ਤੇ ‘‘ਅਨ੍ਤੋਨਗਰੇ ਗੁਣੋ ਨਤ੍ਥੀ’’ਤਿ ਦਾਸੀਹਿ ਪਰਿਵੁਤਾ ਸਤ੍ਥੁ ਧਮ੍ਮਕਥਂ ਸੋਤੁਂ ਗਚ੍ਛਨ੍ਤੀ ‘‘ਬੁਦ੍ਧਾਨਂ ਸਨ੍ਤਿਕਂ ਉਦ੍ਧਤਵੇਸੇਨ ਗਨ੍ਤੁਂ ਅਯੁਤ੍ਤ’’ਨ੍ਤਿ ਮਹਾਲਤਾਪਸਾਧਨਂ ਓਮੁਞ੍ਚਿਤ੍ਵਾ ਦਾਸਿਯਾ ਹਤ੍ਥੇ ਦਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ, ਸਤ੍ਥਾ ਧਮ੍ਮਕਥਂ ਕਥੇਸਿ. ਸਾ ਧਮ੍ਮਦੇਸਨਾਪਰਿਯੋਸਾਨੇ ਦਸਬਲਂ ਵਨ੍ਦਿਤ੍ਵਾ ਨਗਰਾਭਿਮੁਖਾ ਪਾਯਾਸਿ. ਸਾਪਿ ਦਾਸੀ ਅਤ੍ਤਨਾ ਗਹਿਤਪਸਾਧਨਸ੍ਸ ਠਪਿਤਟ੍ਠਾਨਂ ਅਸਲ੍ਲਕ੍ਖੇਤ੍ਵਾ ਗਚ੍ਛਨ੍ਤੀ ਪਸਾਧਨਤ੍ਥਾਯ ਪਟਿਨਿਵਤ੍ਤਿ. ਅਥ ਨਂ, ਵਿਸਾਖਾ, ‘‘ਕਹਂ ਪਨ ਤੇ ਤਂ ਠਪਿਤ’’ਨ੍ਤਿ ਪਟਿਪੁਚ੍ਛਿ. ਗਨ੍ਧਕੁਟਿਪਰਿਵੇਣੇ, ਅਯ੍ਯੇਤਿ. ਹੋਤੁ ਜੇ ਗਨ੍ਤ੍ਵਾ ਆਹਰ, ਗਨ੍ਧਕੁਟਿਪਰਿਵੇਣੇ ਠਪਿਤਕਾਲਤੋ ਪਟ੍ਠਾਯ ਆਹਰਾਪਨਂ ਨਾਮ ਅਮ੍ਹਾਕਂ ਅਯੁਤ੍ਤਂ. ਤਸ੍ਮਾ ਤਂ ਵਿਸ੍ਸਜ੍ਜੇਤ੍ਵਾ ਦਣ੍ਡਕਮ੍ਮਂ ਕਰਿਸ੍ਸਾਮ. ਤਤ੍ਥ ਪਨ ਠਪਿਤੇ ਅਯ੍ਯਾਨਂ ਪਲਿਬੋਧੋ ਹੋਤੀਤਿ.

ਪੁਨਦਿਵਸੇ ਸਤ੍ਥਾ ਭਿਕ੍ਖੁਸਙ੍ਘਪਰਿਵਾਰੋ ਵਿਸਾਖਾਯ ਨਿਵੇਸਨਦ੍ਵਾਰਂ ਸਮ੍ਪਾਪੁਣਿ. ਨਿਵੇਸਨੇ ਚ ਨਿਬਦ੍ਧਪਞ੍ਞਤ੍ਤਾਨਿ ਆਸਨਾਨਿ. ਵਿਸਾਖਾ, ਸਤ੍ਥੁ ਪਤ੍ਤਂ ਗਣ੍ਹਿਤ੍ਵਾ ਸਤ੍ਥਾਰਂ ਗੇਹਂ ਪਵੇਸੇਤ੍ਵਾ ਪਞ੍ਞਤ੍ਤਾਸਨੇਸੁਯੇਵ ਨਿਸੀਦਾਪੇਤ੍ਵਾ ਕਤਭਤ੍ਤਕਿਚ੍ਚੇ ਸਤ੍ਥਰਿ ਤਂ ਪਸਾਧਨਂ ਆਹਰਿਤ੍ਵਾ ਸਤ੍ਥੁ ਪਾਦਮੂਲੇ ਨਿਕ੍ਖਿਪਿਤ੍ਵਾ ‘‘ਇਦਂ, ਭਨ੍ਤੇ, ਤੁਮ੍ਹਾਕਂ ਦਮ੍ਮੀ’’ਤਿ ਆਹ. ਸਤ੍ਥਾ ‘‘ਅਲਙ੍ਕਾਰੋ ਨਾਮ ਪਬ੍ਬਜਿਤਾਨਂ ਨ ਵਟ੍ਟਤੀ’’ਤਿ ਪਟਿਕ੍ਖਿਪਿ. ਜਾਨਾਮਿ, ਭਨ੍ਤੇ, ਅਹਂ ਪਨ ਇਮਂ ਅਗ੍ਘਾਪੇਤ੍ਵਾ ਧਨਂ ਗਹੇਤ੍ਵਾ ਤੁਮ੍ਹਾਕਂ ਵਸਨਗਨ੍ਧਕੁਟਿਂ ਕਾਰੇਸ੍ਸਾਮੀਤਿ. ਤਦਾ ਸਤ੍ਥਾ ਅਧਿਵਾਸੇਸਿ. ਸਾਪਿ ਤਂ ਅਗ੍ਘਾਪੇਤ੍ਵਾ ਨਵਕੋਟਿਧਨਂ ਗਹੇਤ੍ਵਾ ਗਬ੍ਭਸਹਸ੍ਸਪਟਿਮਣ੍ਡਿਤੇ ਪੁਬ੍ਬਾਰਾਮਵਿਹਾਰੇ ਤਥਾਗਤਸ੍ਸ ਵਸਨਗਨ੍ਧਕੁਟਿਂ ਕਾਰੇਸਿ. ਵਿਸਾਖਾਯ ਪਨ ਨਿਵੇਸਨਂ ਪੁਬ੍ਬਣ੍ਹਸਮਯੇ ਕਾਸਾਵਪਜ੍ਜੋਤਂ ਇਸਿਵਾਤਪਟਿਵਾਤਮੇਵ ਹੋਤਿ ਅਨਾਥਪਿਣ੍ਡਿਕਸ੍ਸ ਗੇਹਂ ਵਿਯ. ਤਸ੍ਸਾਪਿ ਗੇਹੇ ਸਬ੍ਬਭਤ੍ਤਾਨਿ ਪਟਿਯਤ੍ਤਾਨੇਵ ਅਹੇਸੁਂ. ਸਾ ਪੁਬ੍ਬਣ੍ਹਸਮਯੇ ਭਿਕ੍ਖੁਸਙ੍ਘਸ੍ਸ ਆਮਿਸਸਙ੍ਗਹਂ ਕਤ੍ਵਾ ਪਚ੍ਛਾਭਤ੍ਤੇ ਭੇਸਜ੍ਜਾਨਿ ਚੇਵ ਅਟ੍ਠਵਿਧਪਾਨਾਨਿ ਚ ਗਣ੍ਹਾਪੇਤ੍ਵਾ ਵਿਹਾਰਂ ਗਨ੍ਤ੍ਵਾ ਭਿਕ੍ਖੁਸਙ੍ਘਸ੍ਸ ਦਤ੍ਵਾ ਪਚ੍ਛਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਆਗਚ੍ਛਤਿ. ਸਤ੍ਥਾ ਅਪਰਭਾਗੇ ਉਪਾਸਿਕਾਯੋ ਪਟਿਪਾਟਿਯਾ ਠਾਨਨ੍ਤਰੇਸੁ ਠਪੇਨ੍ਤੋ ਵਿਸਾਖਂ ਮਿਗਾਰਮਾਤਰਂ ਦਾਯਿਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਖੁਜ੍ਜੁਤ੍ਤਰਾ-ਸਾਮਾਵਤੀਵਤ੍ਥੁ

੨੬੦-੨੬੧. ਤਤਿਯਚਤੁਤ੍ਥੇਸੁ ਬਹੁਸ੍ਸੁਤਾਨਂ ਯਦਿਦਂ, ਖੁਜ੍ਜੁਤ੍ਤਰਾ, ਮੇਤ੍ਤਾਵਿਹਾਰੀਨਂ ਯਦਿਦਂ, ਸਾਮਾਵਤੀਤਿ ਬਹੁਸ੍ਸੁਤਾਨਂ ਉਪਾਸਿਕਾਨਂ ਖੁਜ੍ਜੁਤ੍ਤਰਾ, ਮੇਤ੍ਤਾਵਿਹਾਰੀਨਂ ਸਾਮਾਵਤੀ ਅਗ੍ਗਾਤਿ ਦਸ੍ਸੇਤਿ. ਤਾ ਕਿਰ ਦ੍ਵੇਪਿ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਪਟਿਸਨ੍ਧਿਂ ਗਣ੍ਹਿਤ੍ਵਾ ਅਪਰਭਾਗੇ ‘‘ਸਤ੍ਥੁ ਧਮ੍ਮਕਥਂ ਸੋਸ੍ਸਾਮਾ’’ਤਿ ਵਿਹਾਰਂ ਅਗਮਂਸੁ. ਤਤ੍ਥ, ਖੁਜ੍ਜੁਤ੍ਤਰਾ, ਸਤ੍ਥਾਰਂ ਏਕਂ ਉਪਾਸਿਕਂ ਬਹੁਸ੍ਸੁਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾਮਾਵਤੀਪਿ ਏਕਂ ਉਪਾਸਿਕਂ ਮੇਤ੍ਤਾਵਿਹਾਰੀਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਤਾਸਂ ਦ੍ਵਿਨ੍ਨਮ੍ਪਿ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੀਨਂਯੇਵ ਕਪ੍ਪਸਤਸਹਸ੍ਸਂ ਅਤਿਕ੍ਕਨ੍ਤਂ.

ਅਥ ਅਮ੍ਹਾਕਂ ਸਤ੍ਥੁ ਨਿਬ੍ਬਤ੍ਤਿਤੋ ਪੁਰੇਤਰਮੇਵ ਅਲ੍ਲਕਪ੍ਪਰਟ੍ਠੇ ਅਹਿਵਾਤਕਰੋਗੋ ਨਾਮ ਉਦਪਾਦਿ. ਏਕੇਕਸ੍ਮਿਂ ਗੇਹੇ ਏਕਪ੍ਪਹਾਰੇਨੇਵ ਦਸਪਿ ਵੀਸਮ੍ਪਿ ਤਿਂਸਮ੍ਪਿ ਜਨਾ ਮਰਨ੍ਤਿ, ਤਿਰੋਰਟ੍ਠਂ ਗਤਾ ਪਨ ਜੀਵਿਤਂ ਲਭਨ੍ਤਿ. ਤਂ ਞਤ੍ਵਾ ਏਕੋ ਪੁਰਿਸੋ ਅਤ੍ਤਨੋ ਪੁਤ੍ਤਦਾਰਂ ਆਦਾਯ ‘‘ਅਞ੍ਞਂ ਰਟ੍ਠਂ ਗਮਿਸ੍ਸਾਮੀ’’ਤਿ ਤਤੋ ਨਿਕ੍ਖਮਿ. ਅਥਸ੍ਸ ਘਰੇ ਗਹਿਤਪਾਥੇਯ੍ਯਂ ਅਨ੍ਤਰਾਮਗ੍ਗੇ ਕਨ੍ਤਾਰੇ ਅਨੁਤ੍ਤਿਣ੍ਣੇਯੇਵ ਪਰਿਕ੍ਖਯਂ ਅਗਮਾਸਿ. ਤੇਸਂ ਸਰੀਰਬਲਂ ਪਰਿਹਾਯਿ, ਸਕਿਂ ਮਾਤਾ ਪੁਤ੍ਤਂ ਉਕ੍ਖਿਪਤਿ, ਸਕਿਂ ਪਿਤਾ. ਅਥਸ੍ਸ ਪਿਤਾ ਚਿਨ੍ਤੇਸਿ – ‘‘ਅਮ੍ਹਾਕਂ ਸਰੀਰਬਲਂ ਪਰਿਹੀਨਂ, ਪੁਤ੍ਤਂ ਉਕ੍ਖਿਪਿਤ੍ਵਾ ਗਚ੍ਛਨ੍ਤਾ ਕਨ੍ਤਾਰਂ ਨਿਤ੍ਥਰਿਤੁਂ ਨ ਸਕ੍ਖਿਸ੍ਸਾਮਾ’’ਤਿ. ਸੋ ਤਸ੍ਸ ਮਾਤਰਂ ਅਜਾਨਾਪੇਤ੍ਵਾਵ ਉਦਕਕਿਚ੍ਚੇਨ ਓਹੀਨੋ ਵਿਯ ਪੁਤ੍ਤਂ ਮਗ੍ਗੇ ਨਿਸੀਦਾਪੇਤ੍ਵਾ ਏਕਕੋਵ ਮਗ੍ਗਂ ਪਟਿਪਜ੍ਜਿ. ‘‘ਅਥਸ੍ਸ ਭਰਿਯਾ ਆਗਮਨਂ ਓਲੋਕਯਮਾਨਾ ਠਿਤਾ ਹਤ੍ਥੇ ਪੁਤ੍ਤਂ ਅਦਿਸ੍ਵਾ ਵਿਰਵਮਾਨਾ ਗਨ੍ਤ੍ਵਾ ਕਹਂ ਮੇ ਸਾਮਿ ਪੁਤ੍ਤੋ’’ਤਿ ਆਹ. ਕੋ ਤੇ ਪੁਤ੍ਤੇਨ ਅਤ੍ਥੋ? ਜੀਵਮਾਨਾ ਪੁਤ੍ਤਂ ਲਭਿਸ੍ਸਾਮਾਤਿ. ਸਾ ‘‘ਅਤਿਸਾਹਸਿਕੋ ਵਤਾਯਂ ਪੁਰਿਸੋ’’ਤਿ ਵਤ੍ਵਾ ‘‘ਗਚ੍ਛ ਤ੍ਵਂ, ਨਾਹਂ ਤਾਦਿਸੇਨ ਸਦ੍ਧਿਂ ਗਮਿਸ੍ਸਾਮੀ’’ਤਿ ਆਹ. ਸੋ ‘‘ਅਨੁਪਧਾਰੇਤ੍ਵਾ ਮੇ ਭਦ੍ਦੇ ਕਤਂ, ਖਮੇਤਂ ਮਯ੍ਹ’’ਨ੍ਤਿ ਵਤ੍ਵਾ ਪੁਤ੍ਤਂ ਆਦਾਯਾਗਤੋ.

ਤੇ ਤਂ ਕਨ੍ਤਾਰਂ ਸਮਤਿਕ੍ਕਮਿਤ੍ਵਾ ਸਾਯਂ ਏਕਂ ਗੋਪਾਲਕਕੁਲਂ ਸਮ੍ਪਾਪੁਣਿਂਸੁ. ਤਂ ਦਿਵਸਞ੍ਚ ਗੋਪਾਲਕਕੁਲਵਾਸਿਨੋ ਨਿਰੁਦਕਪਾਯਾਸਂ ਪਚਿਂਸੁ. ਤੇ ਤੇ ਦਿਸ੍ਵਾ ‘‘ਇਮੇ ਅਤਿਵਿਯ ਛਾਤਕਾ’’ਤਿ ਪਾਯਾਸਸ੍ਸ ਮਹਾਭਾਜਨਂ ਪੂਰੇਤ੍ਵਾ ਉਲ਼ੁਙ੍ਕਪੂਰਂ ਸਪ੍ਪਿਂ ਆਸਿਞ੍ਚਿਤ੍ਵਾ ਅਦਂਸੁ. ਤੇਸੁ ਤਂ ਪਾਯਾਸਂ ਭੁਞ੍ਜਨ੍ਤੇਸੁ ਸਾ ਇਤ੍ਥੀ ਪਮਾਣੇਨੇਵ ਭੁਞ੍ਜਿ, ਪੁਰਿਸੋ ਪਨ ਪਮਾਣਾਤਿਕ੍ਕਨ੍ਤਂ ਭੁਞ੍ਜਿਤ੍ਵਾ ਜੀਰਾਪੇਤੁਂ ਅਸਕ੍ਕੋਨ੍ਤੋ ਰਤ੍ਤਿਭਾਗਸਮਨਨ੍ਤਰੇ ਕਾਲਮਕਾਸਿ. ਸੋ ਕਾਲਂ ਕਰੋਨ੍ਤੋ ਤੇਸੁ ਸਾਲਯਭਾਵੇਨ ਗੋਪਾਲਕਾਨਂ ਗੇਹੇ ਸੁਨਖਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿ. ਸੁਨਖੀ ਨਚਿਰਸ੍ਸੇਵ ਵਿਜਾਤਾ. ਗੋਪਾਲਕੋ ਤਂ ਕੁਕ੍ਕੁਰਂ ਸਸ੍ਸਿਰਿਕਂ ਦਿਸ੍ਵਾ ਪਿਣ੍ਡੇਨ ਪਲੋਭੇਤ੍ਵਾ ਅਤ੍ਤਨਿ ਉਪ੍ਪਨ੍ਨਸਿਨੇਹਂ ਗਹੇਤ੍ਵਾ ਸਦ੍ਧਿਮੇਵ ਚਰਤਿ.

ਅਥੇਕਦਿਵਸਂ ਏਕੋ ਪਚ੍ਚੇਕਬੁਦ੍ਧੋ ਭਿਕ੍ਖਾਚਾਰਵੇਲਾਯ ਗੋਪਾਲਕਸ੍ਸ ਘਰਦ੍ਵਾਰਂ ਸਮ੍ਪਤ੍ਤੋ. ਸੋਪਿ ਤਂ ਦਿਸ੍ਵਾ ਭਿਕ੍ਖਂ ਦਤ੍ਵਾ ਅਤ੍ਤਾਨਂ ਨਿਸ੍ਸਾਯ ਵਸਨਤ੍ਥਾਯ ਪਟਿਞ੍ਞਂ ਗਣ੍ਹਿ. ਪਚ੍ਚੇਕਬੁਦ੍ਧੋ ਗੋਪਾਲਕਕੁਲਸ੍ਸ ਅਵਿਦੂਰੇ ਠਾਨੇ ਏਕਸ੍ਮਿਂ ਵਨਸਣ੍ਡੇ ਵਾਸਂ ਉਪਗਤੋ. ਗੋਪਾਲਕੋ ਤਸ੍ਸ ਸਨ੍ਤਿਕਂ ਗਚ੍ਛਨ੍ਤੋ ਤਂ ਕੁਕ੍ਕੁਰਂ ਗਹੇਤ੍ਵਾਵ ਗਚ੍ਛਤਿ, ਅਨ੍ਤਰਾਮਗ੍ਗੇ ਚ ਵਾਲ਼ਮਿਗਟ੍ਠਾਨੇ ਵਾਲ਼ਮਿਗਾਨਂ ਪਲਾਯਨਤ੍ਥਂ ਰੁਕ੍ਖੇ ਵਾ ਪਾਸਾਣੇ ਵਾ ਪਹਾਰਂ ਦੇਤਿ, ਸੋਪਿ ਕੁਕ੍ਕੁਰੋ ਤਸ੍ਸ ਕਰਣਵਿਧਾਨਂ ਵਵਤ੍ਥਪੇਤਿ. ਅਥੇਕਦਿਵਸਂ ਸੋ ਗੋਪਾਲਕੋ ਪਚ੍ਚੇਕਬੁਦ੍ਧਸ੍ਸ ਸਨ੍ਤਿਕੇ ਨਿਸੀਦਿਤ੍ਵਾ, ‘‘ਭਨ੍ਤੇ, ਅਮ੍ਹਾਕਂ ਸਬ੍ਬਕਾਲਂ ਆਗਮਨਂ ਨਾਮ ਨ ਹੋਤਿ. ਅਯਂ ਪਨ ਕੁਕ੍ਕੁਰੋ ਛੇਕੋ, ਇਮਸ੍ਸ ਆਗਤਸਞ੍ਞਾਯ ਅਮ੍ਹਾਕਂ ਗੇਹਦ੍ਵਾਰਂ ਆਗਚ੍ਛੇਯ੍ਯਾਥਾ’’ਤਿ ਆਹ. ਸੋ ਏਕਦਿਵਸਂ ‘‘ਪਚ੍ਚੇਕਬੁਦ੍ਧਂ ਗਣ੍ਹਿਤ੍ਵਾ ਏਹੀ’’ਤਿ ਕੁਕ੍ਕੁਰਂ ਪੇਸੇਸਿ. ਕੁਕ੍ਕੁਰੋ ਤਸ੍ਸ ਵਚਨਂ ਸੁਤ੍ਵਾ ਭਿਕ੍ਖਾਚਾਰਵੇਲਾਯ ਗਨ੍ਤ੍ਵਾ ਪਚ੍ਚੇਕਬੁਦ੍ਧਸ੍ਸ ਪਾਦਮੂਲੇ ਉਰੇਨ ਨਿਪਜ੍ਜਿ. ਪਚ੍ਚੇਕਬੁਦ੍ਧੋ ‘‘ਅਯਂ ਮਮ ਸਨ੍ਤਿਕਂ ਆਗਤੋ’’ਤਿ ਞਤ੍ਵਾ ਪਤ੍ਤਚੀਵਰਂ ਆਦਾਯ ਮਗ੍ਗਂ ਪਟਿਪਜ੍ਜਿ. ਸੋ ਤਸ੍ਸ ਵੀਮਂਸਨਤ੍ਥਾਯ ਉਕ੍ਕਮਿਤ੍ਵਾ ਅਞ੍ਞਂ ਮਗ੍ਗਂ ਗਣ੍ਹਿ, ਕੁਕ੍ਕੁਰੋ ਪੁਰਤੋ ਠਤ੍ਵਾ ਗੋਪਾਲਕਮਗ੍ਗਂ ਪਟਿਪਨ੍ਨਕਾਲੇ ਅਪਸਕ੍ਕਿ. ਯਸ੍ਮਿਂ ਚ ਯਸ੍ਮਿਂ ਚ ਠਾਨੇ ਵਾਲ਼ਮਿਗਾਨਂ ਪਲਾਯਨਤ੍ਥਂ ਗੋਪਾਲਕੋ ਰੁਕ੍ਖਂ ਵਾ ਪਾਸਾਣਂ ਵਾ ਪਹਰਿ, ਤਂ ਤਂ ਠਾਨਂ ਪਤ੍ਵਾ ਕੁਕ੍ਕੁਰੋ ਮਹਾਵਿਰਵਂ ਵਿਰਵਿ. ਤਸ੍ਸ ਸਦ੍ਦੇਨ ਵਾਲ਼ਮਿਗਾ ਪਲਾਯਨ੍ਤਿ. ਪਚ੍ਚੇਕਬੁਦ੍ਧੋਪਿ ਭਤ੍ਤਕਿਚ੍ਚਵੇਲਾਯ ਮਹਨ੍ਤਂ ਸਿਨਿਦ੍ਧਪਿਣ੍ਡਂ ਤਸ੍ਸ ਦੇਤਿ. ਸੋਪਿ ਪਿਣ੍ਡਲਾਭੇਨ ਪਚ੍ਚੇਕਬੁਦ੍ਧੇ ਉਤ੍ਤਰਿਤਰਂ ਸਿਨੇਹਂ ਕਰੋਤਿ.

ਗੋਪਾਲਕੋ ਤੇਮਾਸਂ ਵੁਤ੍ਥਸ੍ਸ ਪਚ੍ਚੇਕਬੁਦ੍ਧਸ੍ਸ ਤਿਚੀਵਰਪ੍ਪਹੋਨਕਂ ਸਾਟਕਂ ਦਤ੍ਵਾ, ‘‘ਭਨ੍ਤੇ, ਸਚੇ ਵੋ ਰੁਚ੍ਚਤਿ, ਇਧੇਵ ਵਸਥ. ਨੋ ਚੇ ਰੁਚ੍ਚਤਿ, ਯਥਾਸੁਖਂ ਗਚ੍ਛਥਾ’’ਤਿ ਆਹ. ਪਚ੍ਚੇਕਬੁਦ੍ਧੋ ਗਮਨਾਕਾਰਂ ਦਸ੍ਸੇਤਿ. ਸੋ ਗੋਪਾਲਕੋ ਪਚ੍ਚੇਕਬੁਦ੍ਧਂ ਅਨੁਗਨ੍ਤ੍ਵਾ ਨਿਵਤ੍ਤਤਿ. ਕੁਕ੍ਕੁਰੋ ਪਚ੍ਚੇਕਬੁਦ੍ਧਸ੍ਸ ਅਞ੍ਞਤ੍ਥ ਗਮਨਭਾਵਂ ਞਤ੍ਵਾ ਅਤਿਸਿਨੇਹੇਨ ਉਪ੍ਪਨ੍ਨਬਲਵਸੋਕੋ ਹਦਯਫਾਲਨਂ ਪਤ੍ਵਾ ਕਾਲਂ ਕਤ੍ਵਾ ਤਾਵਤਿਂਸਪੁਰੇ ਨਿਬ੍ਬਤ੍ਤਿ. ਅਥਸ੍ਸ ਪਚ੍ਚੇਕਬੁਦ੍ਧੇਨ ਸਦ੍ਧਿਂ ਗਮਨਕਾਲੇ ਉਚ੍ਚਾਸਦ੍ਦਂ ਕਤ੍ਵਾ ਵਾਲ਼ਮਿਗਾਨਂ ਪਲਾਪਿਤਭਾਵੇਨ ਦੇਵਤਾਹਿ ਸਦ੍ਧਿਂ ਕਥੇਨ੍ਤਸ੍ਸ ਸਦ੍ਦੋ ਸਕਲਦੇਵਪੁਰਂ ਛਾਦੇਤ੍ਵਾ ਅਟ੍ਠਾਸਿ. ਸੋ ਤੇਨੇਵ ਨਾਮਧੇਯ੍ਯਂ ਲਭਿਤ੍ਵਾ ਘੋਸਕਦੇਵਪੁਤ੍ਤੋ ਨਾਮ ਜਾਤੋ. ਅਥਸ੍ਸ ਤਸ੍ਮਿਂ ਸਮ੍ਪਤ੍ਤਿਂ ਅਨੁਭਵਨ੍ਤਸ੍ਸ ਮਨੁਸ੍ਸਪਥੇ ਕੋਸਮ੍ਬਿਨਗਰੇ ਉਦੇਨੋ ਨਾਮ ਰਾਜਾ ਰਜ੍ਜਂ ਪਟਿਪਜ੍ਜਿ. ਤਸ੍ਸ ਵਤ੍ਥੁ ਮਜ੍ਝਿਮਪਣ੍ਣਾਸਕੇ ਬੋਧਿਰਾਜਕੁਮਾਰਸੁਤ੍ਤਵਣ੍ਣਨਾਯਂ (ਮ. ਨਿ. ਅਟ੍ਠ. ੨.੩੨੪ ਆਦਯੋ) ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਤਸ੍ਮਿਂ ਪਨ ਰਜ੍ਜਂ ਕਾਰਯਮਾਨੇ ਘੋਸਕਦੇਵਪੁਤ੍ਤੋ ਚਵਿਤ੍ਵਾ ਕੋਸਮ੍ਬਿਯਂ ਏਕਿਸ੍ਸਾ ਰੂਪੂਪਜੀਵਿਨਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਸਾ ਦਸਮਾਸਚ੍ਚਯੇਨ ਵਿਜਾਯਿਤ੍ਵਾ ਪੁਤ੍ਤਭਾਵਂ ਞਤ੍ਵਾ ਸਙ੍ਕਾਰਕੂਟੇ ਛਡ੍ਡਾਪੇਸਿ. ਤਸ੍ਮਿਂ ਖਣੇ ਕੋਸਮ੍ਬਿਸੇਟ੍ਠਿਨੋ ਕਮ੍ਮਨ੍ਤਿਕੋ ਪਾਤੋਵ ਸੇਟ੍ਠਿਘਰਂ ਗਚ੍ਛਨ੍ਤੋ ‘‘ਕਿਂ ਨੁ ਖੋ ਇਮਂ ਕਾਕੇਹਿ ਸਮ੍ਪਰਿਕਿਣ੍ਣ’’ਨ੍ਤਿ ਗਨ੍ਤ੍ਵਾ ਦਾਰਕਂ ਦਿਸ੍ਵਾ ‘‘ਮਹਾਪੁਞ੍ਞਵਾ ਏਸ ਦਾਰਕੋ ਭਵਿਸ੍ਸਤੀ’’ਤਿ ਏਕਸ੍ਸ ਪੁਰਿਸਸ੍ਸ ਹਤ੍ਥੇ ਗੇਹਂ ਪੇਸੇਤ੍ਵਾ ਸੇਟ੍ਠਿਘਰਂ ਅਗਮਾਸਿ. ਸੇਟ੍ਠਿਪਿ ਰਾਜੂਪਟ੍ਠਾਨਵੇਲਾਯ ਰਾਜਕੁਲਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਪੁਰੋਹਿਤਂ ਦਿਸ੍ਵਾ ‘‘ਅਜ੍ਜ ਕਿਂ ਨਕ੍ਖਤ੍ਤ’’ਨ੍ਤਿ ਪੁਚ੍ਛਿ. ਸੋ ਤਤ੍ਥੇਵ ਠਿਤੋ ਗਣੇਤ੍ਵਾ ‘‘ਅਸੁਕਂ ਨਾਮ ਨਕ੍ਖਤ੍ਤਂ, ਅਜ੍ਜ ਇਮਿਨਾ ਨਕ੍ਖਤ੍ਤੇਨ ਜਾਤਦਾਰਕੋ ਇਮਸ੍ਮਿਂ ਨਗਰੇ ਸੇਟ੍ਠਿਟ੍ਠਾਨਂ ਲਭਿਸ੍ਸਤੀ’’ਤਿ ਆਹ. ਸੋ ਤਸ੍ਸ ਕਥਂ ਸੁਤ੍ਵਾ ਵੇਗੇਨ ਘਰਂ ਪੇਸੇਸਿ – ‘‘ਇਮਸ੍ਸ ਪੁਰੋਹਿਤਸ੍ਸ ਦ੍ਵੇ ਕਥਾ ਨਾਮ ਨਤ੍ਥਿ, ਘਰਣੀ ਚ ਮੇ ਗਰੁਗਬ੍ਭਾ, ਜਾਨਾਥ ਤਾਵ ਨਂ ਵਿਜਾਤਾ ਵਾ ਨੋ ਵਾ’’ਤਿ. ਤੇ ਗਨ੍ਤ੍ਵਾ ਜਾਨਿਤ੍ਵਾ, ‘‘ਅਯ੍ਯ, ਨ ਤਾਵ ਵਿਜਾਤਾ’’ਤਿ ਆਹਂਸੁ. ਤੇਨ ਹਿ ਗਚ੍ਛਥ, ਇਮਸ੍ਮਿਂ ਨਗਰੇ ਅਜ੍ਜ ਜਾਤਦਾਰਕਂ ਪਰਿਯੇਸਥਾਤਿ. ਤੇ ਪਰਿਯੇਸਨ੍ਤਾ ਤਸ੍ਸ ਸੇਟ੍ਠਿਨੋ ਕਮ੍ਮਨ੍ਤਿਕਸ੍ਸ ਗੇਹੇ ਤਂ ਦਾਰਕਂ ਦਿਸ੍ਵਾ ਸੇਟ੍ਠਿਨੋ ਆਰੋਚਯਿਂਸੁ. ਤੇਨ ਹਿ ਗਚ੍ਛਥ ਭਣੇ, ਤਂ ਕਮ੍ਮਨ੍ਤਿਕਂ ਪਕ੍ਕੋਸਥਾਤਿ. ਤੇ ਤਂ ਪਕ੍ਕੋਸਿਂਸੁ. ਅਥ ਨਂ ਸੇਟ੍ਠਿ ‘‘ਗੇਹੇ ਕਿਰ ਤੇ ਦਾਰਕੋ ਅਤ੍ਥੀ’’ਤਿ ਪੁਚ੍ਛਿ. ‘‘ਆਮ, ਅਯ੍ਯਾ’’ਤਿ. ‘‘ਤਂ ਦਾਰਕਂ ਅਮ੍ਹਾਕਂ ਦੇਹੀ’’ਤਿ. ‘‘ਨ ਦੇਮਿ, ਅਯ੍ਯਾ’’ਤਿ. ‘‘ਹਨ੍ਦ ਸਹਸ੍ਸਂ ਗਣ੍ਹਿਤ੍ਵਾ ਦੇਹੀ’’ਤਿ. ਸੋ ‘‘ਅਯਂ ਜੀਵੇਯ੍ਯ ਵਾ ਮਰੇਯ੍ਯ ਵਾ, ਦੁਜ੍ਜਾਨਮਿਦ’’ਨ੍ਤਿ ਸਹਸ੍ਸਂ ਗਣ੍ਹਿਤ੍ਵਾ ਅਦਾਸਿ.

ਤਤੋ ਸੇਟ੍ਠਿ ਚਿਨ੍ਤੇਸਿ – ‘‘ਸਚੇ ਮੇ ਭਰਿਯਾ ਧੀਤਰਂ ਵਿਜਾਯਿਸ੍ਸਤਿ, ਇਮਮੇਵ ਪੁਤ੍ਤਂ ਕਰਿਸ੍ਸਾਮਿ. ਸਚੇ ਪੁਤ੍ਤਂ ਵਿਜਾਯਿਸ੍ਸਤਿ, ਮਾਰੇਸ੍ਸਾਮੀ’’ਤਿ. ਚਿਨ੍ਤੇਤ੍ਵਾ ਗੇਹੇ ਪੋਸੇਸਿ. ਅਥਸ੍ਸ ਭਰਿਯਾ ਕਤਿਪਾਹਚ੍ਚਯੇਨ ਪੁਤ੍ਤਂ ਵਿਜਾਯਿ. ਤਤੋ ਸੇਟ੍ਠਿ ‘‘ਏਵਂ ਤਂ ਗਾਵੋ ਮਦ੍ਦਿਤ੍ਵਾ ਮਾਰੇਸ੍ਸਨ੍ਤੀ’’ਤਿ ਚਿਨ੍ਤੇਤ੍ਵਾ ‘‘ਇਮਂ ਦਾਰਕਂ ਵਜਦ੍ਵਾਰੇ ਨਿਪਜ੍ਜਾਪੇਥਾ’’ਤਿ ਆਹ. ਤਂ ਤਤ੍ਥ ਨਿਪਜ੍ਜਾਪੇਸੁਂ. ਅਥ ਨਂ ਯੂਥਪਤਿ ਉਸਭੋ ਪਠਮਂ ਨਿਕ੍ਖਮਨ੍ਤੋ ਦਿਸ੍ਵਾ ‘‘ਏਵਂ ਤਂ ਅਞ੍ਞੇ ਨ ਮਦ੍ਦਿਸ੍ਸਨ੍ਤੀ’’ਤਿ ਚਤੁਨ੍ਨਂ ਪਾਦਾਨਂ ਅਨ੍ਤਰੇ ਕਤ੍ਵਾ ਅਟ੍ਠਾਸਿ. ਅਥ ਨਂ ਗੋਪਾਲਕਾ ਦਿਸ੍ਵਾ ‘‘ਮਹਾਪੁਞ੍ਞੋ ਏਸ ਦਾਰਕੋ ਭਵਿਸ੍ਸਤਿ, ਯਸ੍ਸ ਤਿਰਚ੍ਛਾਨਗਤਾਪਿ ਗੁਣਂ ਜਾਨਨ੍ਤਿ, ਪਟਿਜਗ੍ਗਿਸ੍ਸਾਮ ਨ’’ਨ੍ਤਿ ਅਤ੍ਤਨੋ ਗੇਹਂ ਨਯਿਂਸੁ.

ਸੋਪਿ ਸੇਟ੍ਠਿ ਤਸ੍ਸ ਮਤਭਾਵਂ ਅਨੁਵਿਜ੍ਜਨ੍ਤੋ ‘‘ਗੋਪਾਲਕੇਹਿ ਨੀਤੋ’’ਤਿ ਸੁਤ੍ਵਾ ਪੁਨ ਸਹਸ੍ਸਂ ਦਤ੍ਵਾ ਆਣਾਪੇਤ੍ਵਾ ਆਮਕਸੁਸਾਨੇ ਛਡ੍ਡਾਪੇਸਿ. ਤਸ੍ਮਿਂ ਚ ਕਾਲੇ ਸੇਟ੍ਠਿਸ੍ਸ ਘਰੇ ਅਜਪਾਲਕੋ ਸੁਸਾਨਂ ਨਿਸ੍ਸਾਯ ਅਜਿਕਾ ਚਾਰੇਤਿ. ਅਥੇਕਾ ਧੇਨੁ ਅਜਿਕਾ ਦਾਰਕਸ੍ਸ ਪੁਞ੍ਞੇਨ ਮਗ੍ਗਾ ਓਕ੍ਕਮ੍ਮ ਗਨ੍ਤ੍ਵਾ ਦਾਰਕਸ੍ਸ ਖੀਰਂ ਦਤ੍ਵਾ ਗਤਾ. ਤਤੋ ਨਿਵਤ੍ਤਮਾਨਾਪਿ ਤਥੇਵ ਗਨ੍ਤ੍ਵਾ ਖੀਰਮਦਾਸਿ. ਅਜਪਾਲਕੋ ਚਿਨ੍ਤੇਸਿ – ‘‘ਅਯਂ ਅਜਿਕਾ ਪਾਤੋਪਿ ਇਮਸ੍ਮਾ ਠਾਨਾ ਓਕ੍ਕਮਿਤ੍ਵਾ ਗਤਾ, ਕਿਂ ਨੁ ਖੋ ਏਤ’’ਨ੍ਤਿ ਗਨ੍ਤ੍ਵਾ ਓਲੋਕੇਨ੍ਤੋ ਤਂ ਦਾਰਕਂ ਦਿਸ੍ਵਾ ‘‘ਮਹਾਪੁਞ੍ਞੋ ਏਸ ਦਾਰਕੋ, ਤਿਰਚ੍ਛਾਨਗਤਾਪਿਸ੍ਸ ਗੁਣਂ ਜਾਨਨ੍ਤਿ, ਪਟਿਜਗ੍ਗਿਸ੍ਸਾਮਿ ਨ’’ਨ੍ਤਿ ਗਹੇਤ੍ਵਾ ਗੇਹਂ ਗਤੋ.

ਪੁਨਦਿਵਸੇ ਸੇਟ੍ਠਿ ‘‘ਮਤੋ ਨੁ ਖੋ ਦਾਰਕੋ, ਨ ਮਤੋ’’ਤਿ ਓਲੋਕਾਪੇਨ੍ਤੋ ਅਜਪਾਲਕੇਨ ਗਹਿਤਭਾਵਂ ਞਤ੍ਵਾ ਸਹਸ੍ਸਂ ਦਤ੍ਵਾ ਆਣਾਪੇਤ੍ਵਾ ‘‘ਸ੍ਵੇ ਇਮਂ ਨਗਰਂ ਏਕੋ ਸਤ੍ਥਵਾਹਪੁਤ੍ਤੋ ਪਵਿਸਿਸ੍ਸਤਿ, ਇਮਂ ਦਾਰਕਂ ਨੇਤ੍ਵਾ ਚਕ੍ਕਮਗ੍ਗੇ ਠਪੇਥ, ਏਵਂ ਤਂ ਸਕਟਚਕ੍ਕਂ ਛਿਨ੍ਦਨ੍ਤਂ ਗਮਿਸ੍ਸਤੀ’’ਤਿ ਆਹ. ਤਂ ਤਤ੍ਥ ਨਿਕ੍ਖਿਤ੍ਤਂ ਸਤ੍ਥਵਾਹਪੁਤ੍ਤਸ੍ਸ ਪੁਰਿਮਸਕਟੇ ਗੋਣਾ ਦਿਸ੍ਵਾ ਚਤ੍ਤਾਰੋ ਪਾਦੇ ਥਮ੍ਭੇ ਵਿਯ ਓਤਾਰੇਤ੍ਵਾ ਅਟ੍ਠਂਸੁ. ਸਤ੍ਥਵਾਹੋ ‘‘ਕਿਂ ਨੁ ਖੋ ਏਤ’’ਨ੍ਤਿ ਤੇਸਂ ਠਿਤਕਾਰਣਂ ਓਲੋਕੇਨ੍ਤੋ ਦਾਰਕਂ ਦਿਸ੍ਵਾ ‘‘ਮਹਾਪੁਞ੍ਞੋ ਦਾਰਕੋ, ਪਤਿਜਗ੍ਗਿਤੁਂ ਵਟ੍ਟਤੀ’’ਤਿ ਗਣ੍ਹਿਤ੍ਵਾ ਅਗਮਾਸਿ.

ਸੇਟ੍ਠਿਪਿ ਤਸ੍ਸ ਚਕ੍ਕਪਥੇ ਮਤਭਾਵਂ ਵਾ ਅਮਤਭਾਵਂ ਵਾ ਓਲੋਕਾਪੇਨ੍ਤੋ ਸਤ੍ਥਵਾਹੇਨ ਗਹਿਤਭਾਵਂ ਞਤ੍ਵਾ ਤਸ੍ਸਪਿ ਸਹਸ੍ਸਂ ਦਤ੍ਵਾ ਆਣਾਪੇਤ੍ਵਾ ਨਗਰਤੋ ਅਵਿਦੂਰੇ ਠਾਨੇ ਪਪਾਤੇ ਪਾਤਾਪੇਸਿ. ਸੋ ਤਤ੍ਥ ਪਪਤਨ੍ਤੋ ਨਲ਼ਕਾਰਾਨਂ ਕਮ੍ਮਕਰਣਟ੍ਠਾਨੇ ਏਕਸਾਲਾਯ ਪਤਿਤੋ. ਸਾ ਤਸ੍ਸ ਪੁਞ੍ਞਾਨੁਭਾਵੇਨ ਸਤਵਿਹਤਕਪ੍ਪਾਸਪਿਚੁਸਮ੍ਫਸ੍ਸਸਦਿਸਾ ਅਹੋਸਿ. ਅਥ ਨਂ ਨਲ਼ਕਾਰਜੇਟ੍ਠਕੋ ‘‘ਪੁਞ੍ਞਵਾ ਏਸ ਦਾਰਕੋ, ਪਟਿਜਗ੍ਗਿਤੁਂ ਵਟ੍ਟਤੀ’’ਤਿ ਗਣ੍ਹਿਤ੍ਵਾ ਗੇਹਂ ਗਤੋ. ਸੇਟ੍ਠਿ ਦਾਰਕਸ੍ਸ ਪਪਾਤਤੋ ਪਤਿਤਟ੍ਠਾਨੇ ਮਤਭਾਵਂ ਵਾ ਅਮਤਭਾਵਂ ਵਾ ਪਰਿਯੇਸਾਪੇਨ੍ਤੋ ਨਲ਼ਕਾਰਜੇਟ੍ਠਕੇਨ ਗਹਿਤਭਾਵਂ ਞਤ੍ਵਾ ਤਸ੍ਸਪਿ ਸਹਸ੍ਸਂ ਦਤ੍ਵਾ ਆਣਾਪੇਸਿ.

ਅਪਰਭਾਗੇ ਸੇਟ੍ਠਿਸ੍ਸ ਸਕਪੁਤ੍ਤੋਪਿ ਸੋਪਿ ਉਭੋ ਵਯਪ੍ਪਤ੍ਤਾ ਅਹੇਸੁਂ. ਸੇਟ੍ਠਿ ਪੁਨ ਘੋਸਕਦਾਰਕਸ੍ਸ ਮਾਰਣੁਪਾਯਂ ਚਿਨ੍ਤੇਨ੍ਤੋ ਅਤ੍ਤਨੋ ਕੁਮ੍ਭਕਾਰਸ੍ਸ ਗੇਹਂ ਗਨ੍ਤ੍ਵਾ ‘‘ਅਮ੍ਭੋ ਮਯ੍ਹਂ ਗੇਹੇ ਏਵਰੂਪੋ ਏਕੋ ਅਵਜਾਤਦਾਰਕੋ ਅਤ੍ਥਿ, ਤਂ ਦਾਰਕਂ ਯਂਕਿਞ੍ਚਿ ਕਤ੍ਵਾ ਮਾਰੇਤੁਂ ਵਟ੍ਟਤਿ ਰਹਸ੍ਸੇਨਾ’’ਤਿ ਆਹ. ਸੋ ਉਭੋਪਿ ਕਣ੍ਣੇ ਪਿਦਹਿਤ੍ਵਾ ‘‘ਏਵਰੂਪਂ ਨਾਮ ਭਾਰਿਯਂ ਕਥਂ ਕਥੇਤੁਂ ਨ ਵਟ੍ਟਤੀ’’ਤਿ ਆਹ. ਤਤੋ ਸੇਟ੍ਠਿ ‘‘ਅਯਂ ਮੁਧਾ ਨ ਕਰਿਸ੍ਸਤੀ’’ਤਿ ਚਿਨ੍ਤੇਤ੍ਵਾ – ‘‘ਹਨ੍ਦ, ਭੋ, ਸਹਸ੍ਸਂ ਗਣ੍ਹਿਤ੍ਵਾ ਏਤਂ ਕਮ੍ਮਂ ਨਿਪ੍ਫਾਦੇਹੀ’’ਤਿ ਆਹ. ਲਞ੍ਜਂ ਨਾਮ ਅਭਿਨ੍ਨਂ ਭਿਨ੍ਦਤਿ, ਤਸ੍ਮਾ ਸੋ ਸਹਸ੍ਸਂ ਲਭਿਤ੍ਵਾ ਸਮ੍ਪਟਿਚ੍ਛਿਤ੍ਵਾ ‘‘ਅਹਂ, ਅਯ੍ਯ, ਅਸੁਕਦਿਵਸੇ ਨਾਮ ਆਵਾਪਂ ਆਲਿਮ੍ਪੇਸ੍ਸਾਮਿ, ਤਦਾ ਤਂ ਦਾਰਕਂ ਅਸੁਕਵੇਲਾਯ ਨਾਮ ਪੇਸੇਹੀ’’ਤਿ ਆਹ. ਸੇਟ੍ਠਿਪਿ ਖੋ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਤਤੋ ਪਟ੍ਠਾਯ ਦਿਵਸੇ ਗਣੇਨ੍ਤੋ ਕੁਮ੍ਭਕਾਰੇਨ ਵੁਤ੍ਤਦਿਵਸਸ੍ਸ ਸਮ੍ਪਤ੍ਤਭਾਵਂ ਞਤ੍ਵਾ ਘੋਸਕਕੁਮਾਰਂ ਪਕ੍ਕੋਸਾਪੇਤ੍ਵਾ ‘‘ਅਮ੍ਹਾਕਂ, ਤਾਤ, ਅਸੁਕਦਿਵਸੇ ਨਾਮ ਬਹੂਹਿ ਭਾਜਨੇਹਿ ਅਤ੍ਥੋ, ਤ੍ਵਂ ਅਮ੍ਹਾਕਂ ਕੁਮ੍ਭਕਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘ਪਿਤਰਾ ਕਿਰ ਮੇ ਤੁਮ੍ਹਾਕਂ ਏਕਂ ਕਥਿਤਂ ਅਤ੍ਥਿ, ਤਂ ਅਜ੍ਜ ਨਿਪ੍ਫਾਦੇਹੀ’ਤਿ ਵਦੇਹੀ’’ਤਿ ਆਹ. ਸੋ ‘‘ਸਾਧੂ’’ਤਿ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਨਿਕ੍ਖਮਿ.

ਅਥ ਨਂ ਅਨ੍ਤਰਾਮਗ੍ਗੇ ਸੇਟ੍ਠਿਸ੍ਸ ਸਕਪੁਤ੍ਤੋ ਗੁਲ਼ਕੀਲ਼ਂ ਕੀਲ਼ਨ੍ਤੋ ਦਿਸ੍ਵਾ ਵੇਗੇਨ ਗਨ੍ਤ੍ਵਾ ‘‘ਅਹਂ ਭਾਤਿਕ ਦਾਰਕੇਹਿ ਸਦ੍ਧਿਂ ਕੀਲ਼ਨ੍ਤੋ ਏਤ੍ਤਕਂ ਨਾਮ ਜਿਤੋ, ਤਂ ਮੇ ਪਟਿਜਿਨਿਤ੍ਵਾ ਦੇਹੀ’’ਤਿ ਆਹ. ਸੋ ‘‘ਮਯ੍ਹਂ ਇਦਾਨਿ ਓਕਾਸੋ ਨਤ੍ਥਿ, ਪਿਤਾ ਮਂ ਅਚ੍ਚਾਯਿਕਕਮ੍ਮੇਨ ਕੁਮ੍ਭਕਾਰਸ੍ਸ ਸਨ੍ਤਿਕਂ ਪਹਿਣੀ’’ਤਿ ਆਹ. ਇਤਰੋ ‘‘ਅਹਂ ਭਾਤਿਕ ਤਤ੍ਥ ਗਮਿਸ੍ਸਾਮਿ, ਤ੍ਵਂ ਇਮੇਹਿ ਸਦ੍ਧਿਂ ਕੀਲ਼ਿਤ੍ਵਾ ਮਯ੍ਹਂ ਲਕ੍ਖਂ ਪਚ੍ਚਾਹਰਿਤ੍ਵਾ ਦੇਹੀ’’ਤਿ ਆਹ. ‘‘ਤੇਨ ਹਿ ਗਚ੍ਛਾ’’ਤਿ ਅਤ੍ਤਨੋ ਕਥਿਤਸਾਸਨਂ ਤਸ੍ਸ ਕਥੇਤ੍ਵਾ ਦਾਰਕੇਹਿ ਸਦ੍ਧਿਂ ਕੀਲ਼ਿ. ਸੋਪਿ ਕੁਮਾਰੋ ਕੁਮ੍ਭਕਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਂ ਸਾਸਨਂ ਆਰੋਚੇਸਿ. ਸੋ ‘‘ਸਾਧੁ, ਤਾਤ, ਨਿਪ੍ਫਾਦੇਸ੍ਸਾਮੀ’’ਤਿ ਤਂ ਕੁਮਾਰਂ ਗਬ੍ਭਂ ਪਵੇਸੇਤ੍ਵਾ ਤਿਖਿਣਾਯ ਵਾਸਿਯਾ ਖਣ੍ਡਾਖਣ੍ਡਿਕਂ ਛਿਨ੍ਦਿਤ੍ਵਾ ਚਾਟਿਯਂ ਪਕ੍ਖਿਪਿਤ੍ਵਾ ਚਾਟਿਮੁਖਂ ਪਿਦਹਿਤ੍ਵਾ ਭਾਜਨਨ੍ਤਰੇ ਠਪੇਤ੍ਵਾ ਆਵਾਪਂ ਆਲਿਮ੍ਪੇਸਿ. ਘੋਸਕਕੁਮਾਰੋ ਬਹੂ ਜਿਨਿਤ੍ਵਾ ਕਨਿਟ੍ਠਸ੍ਸ ਆਗਮਨਂ ਓਲੋਕੇਨ੍ਤੋ ਨਿਸੀਦਿ. ਸੋ ਤਂ ਚਿਰਾਯਮਾਨਂ ਞਤ੍ਵਾ ‘‘ਕਿਂ ਨੁ ਖੋ ਚਿਰਾਯਤੀ’’ਤਿ ਕੁਮ੍ਭਕਾਰਗੇਹਸਭਾਗਂ ਗਨ੍ਤ੍ਵਾ ਕਤ੍ਥਚਿ ਅਦਿਸ੍ਵਾ ‘‘ਗੇਹਂ ਗਤੋ ਭਵਿਸ੍ਸਤੀ’’ਤਿ ਨਿਵਤ੍ਤਿਤ੍ਵਾ ਗੇਹਂ ਅਗਮਾਸਿ.

ਸੇਟ੍ਠਿ ਨਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ‘‘ਕਿਂ ਨੁ ਖੋ ਕਾਰਣਂ ਭਵਿਸ੍ਸਤਿ, ਮਯਾ ਏਸ ਮਾਰਣਤ੍ਥਾਯ ਕੁਮ੍ਭਕਾਰਸ੍ਸ ਸਨ੍ਤਿਕਂ ਪਹਿਤੋ, ਸੋ ਦਾਨਿ ਪੁਨ ਇਧੇਵਾਗਚ੍ਛਤੀ’’ਤਿ ਆਗਚ੍ਛਨ੍ਤਂਯੇਵ ਨਂ ‘‘ਕਿਂ, ਤਾਤ, ਕੁਮ੍ਭਕਾਰਸ੍ਸ ਸਨ੍ਤਿਕਂ ਨ ਗਤੋਸੀ’’ਤਿ ਆਹ. ‘‘ਆਮ, ਤਾਤ, ਨ ਗਤੋਮ੍ਹੀ’’ਤਿ. ‘‘ਕਸ੍ਮਾ, ਤਾਤਾ’’ਤਿ? ਸੋ ਅਤ੍ਤਨੋ ਨਿਵਤ੍ਤਕਾਰਣਞ੍ਚ ਕਨਿਟ੍ਠਭਾਤਿਕਸ੍ਸ ਤਤ੍ਥ ਗਤਕਾਰਣਞ੍ਚ ਆਰੋਚੇਸਿ. ਸੇਟ੍ਠਿ ਤਸ੍ਸ ਵਚਨਸ੍ਸ ਸੁਤਕਾਲਤੋ ਪਟ੍ਠਾਯ ਮਹਾਪਥਵਿਯਾ ਅਜ੍ਝੋਤ੍ਥਟੋ ਵਿਯ ਹੁਤ੍ਵਾ ‘‘ਕਿਂ ਨਾਮੇਤਂ ਤ੍ਵਂ ਵਦਸੀ’’ਤਿ ਵਿਪ੍ਫਨ੍ਦਚਿਤ੍ਤੋ ਵੇਗੇਨ ਕੁਮ੍ਭਕਾਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਞ੍ਞੇਸਂ ਸਨ੍ਤਿਕੇ ਅਕਥਨੀਯਭਾਵੇਨ ‘‘ਪੇਕ੍ਖ, ਭੋ, ਪੇਕ੍ਖ, ਭੋ’’ਤਿ ਆਹ. ‘‘ਕਿਂ ਪੇਕ੍ਖਾਪੇਸਿ ਤ੍ਵਂ’’? ਨਿਟ੍ਠਿਤਂ ਏਤਂ ਕਮ੍ਮਨ੍ਤਿ. ਸੋ ਤਤੋਵ ਨਿਵਤ੍ਤਿਤ੍ਵਾ ਗੇਹਂ ਅਗਮਾਸਿ. ਤਤੋ ਪਟ੍ਠਾਯ ਚਸ੍ਸ ਚੇਤਸਿਕਰੋਗੋ ਉਪ੍ਪਜ੍ਜਿ.

ਸੋ ਤਸ੍ਮਿਂ ਕਾਲੇ ਤੇਨ ਸਦ੍ਧਿਂ ਅਭੁਞ੍ਜਿਤ੍ਵਾ ਆਸਂ ਭਿਨ੍ਦਿਤ੍ਵਾ ‘‘ਯੇਨ ਕੇਨਚਿ ਉਪਾਯੇਨ ਮਮ ਪੁਤ੍ਤਸ੍ਸ ਸਤ੍ਤੁਨੋ ਅਨ੍ਤਰਮੇਵ ਪਸ੍ਸਿਤੁਂ ਵਟ੍ਟਤੀ’’ਤਿ ਏਕਂ ਪਣ੍ਣਂ ਲਿਖਿਤ੍ਵਾ ਘੋਸਕਕੁਮਾਰਂ ਪਕ੍ਕੋਸਿਤ੍ਵਾ ‘‘ਤ੍ਵਂ ਇਮਂ ਪਣ੍ਣਂ ਆਦਾਯ ਅਸੁਕਗਾਮੇ ਨਾਮ ਅਮ੍ਹਾਕਂ ਕਮ੍ਮਨ੍ਤਿਕੋ ਅਤ੍ਥਿ, ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਇਮਂ ਪਣ੍ਣਂ ਦਤ੍ਵਾ ‘ਇਮਸ੍ਮਿਂ ਕਿਰ ਪਣ੍ਣੇ ਸਾਸਨਂ ਸੀਘਂ ਕਰੋਹੀ’ਤਿ ਵਦ. ਅਨ੍ਤਰਾਮਗ੍ਗੇ ਅਮ੍ਹਾਕਂ ਸਹਾਯਕੋ ਗਾਮਕਸੇਟ੍ਠਿ ਨਾਮ ਏਕੋ ਸੇਟ੍ਠਿ ਅਤ੍ਥਿ, ਤਸ੍ਸ ਘਰਂ ਗਨ੍ਤ੍ਵਾ ਭਤ੍ਤਂ ਭੁਞ੍ਜਿਤ੍ਵਾ ਗਚ੍ਛੇਯ੍ਯਾਸੀ’’ਤਿ ਚ ਮੁਖਸਾਸਨਂ ਅਦਾਸਿ. ਸੋ ਸੇਟ੍ਠਿਂ ਵਨ੍ਦਿਤ੍ਵਾ ਪਣ੍ਣਂ ਗਹੇਤ੍ਵਾ ਨਿਕ੍ਖਨ੍ਤੋ ਅਨ੍ਤਰਾਮਗ੍ਗੇ ਗਾਮਕਸੇਟ੍ਠਿਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਤਸ੍ਸ ਗੇਹਂ ਪੁਚ੍ਛਿਤ੍ਵਾ ਤਂ ਬਹਿਦ੍ਵਾਰਕੋਟ੍ਠਕੇ ਨਿਸੀਦਿਤ੍ਵਾ ਮਸ੍ਸੁਪਰਿਕਮ੍ਮਂ ਕਰੋਨ੍ਤਂ ਵਨ੍ਦਿਤ੍ਵਾ ਅਟ੍ਠਾਸਿ. ‘‘ਕੁਤੋ ਆਗਚ੍ਛਸਿ, ਤਾਤਾ’’ਤਿ ਚ ਵੁਤ੍ਤੇ ‘‘ਕੋਸਮ੍ਬਿਸੇਟ੍ਠਿਨੋ ਪੁਤ੍ਤੋਮ੍ਹਿ, ਤਾਤਾ’’ਤਿ ਆਹ. ਸੋ ‘‘ਅਮ੍ਹਾਕਂ ਸਹਾਯਸੇਟ੍ਠਿਨੋ ਪੁਤ੍ਤੋ’’ਤਿ ਹਟ੍ਠਤੁਟ੍ਠੋ ਅਹੋਸਿ.

ਤਸ੍ਮਿਂ ਚ ਖਣੇ ਤਸ੍ਸ ਸੇਟ੍ਠਿਨੋ ਧੀਤਾਯ ਏਕਾ ਦਾਸੀ ਸੇਟ੍ਠਿਧੀਤੁ ਪੁਪ੍ਫਾਨਿ ਆਹਰਿਤੁਂ ਗਚ੍ਛਤਿ. ਅਥ ਨਂ ਸੇਟ੍ਠਿ ਆਹ – ‘‘ਤ੍ਵਂ, ਅਮ੍ਮ, ਏਤਂ ਕਮ੍ਮਂ ਠਪੇਤ੍ਵਾ ਘੋਸਕਕੁਮਾਰਸ੍ਸ ਪਾਦੇ ਧੋਵਿਤ੍ਵਾ ਸਯਨਂ ਅਤ੍ਥਰਿਤ੍ਵਾ ਦੇਹੀ’’ਤਿ. ਸਾ ਤਥਾ ਕਤ੍ਵਾ ਆਪਣਂ ਗਨ੍ਤ੍ਵਾ ਸੇਟ੍ਠਿਧੀਤੁ ਪੁਪ੍ਫਾਨਿ ਆਹਰਿ. ਸੇਟ੍ਠਿਧੀਤਾ ਤਂ ਦਿਸ੍ਵਾ ‘‘ਤ੍ਵਂ ਅਜ੍ਜ ਚਿਰਂ ਬਹਿ ਪਪਞ੍ਚੇਸੀ’’ਤਿ ਤਸ੍ਸਾ ਕੁਜ੍ਝਿਤ੍ਵਾ ‘‘ਕਿਂ ਤੇ ਏਤ੍ਤਕਂ ਕਾਲਂ ਏਤ੍ਥ ਕਤ’’ਨ੍ਤਿ ਆਹ. ‘‘ਮਾ ਕਥੇਸਿ, ਅਯ੍ਯੇ, ਮਯਾ ਏਵਰੂਪੋ ਨਦਿਟ੍ਠਪੁਬ੍ਬੋ, ਤੁਯ੍ਹਂ ਕਿਰ ਪਿਤੁ ਸਹਾਯਕਸੇਟ੍ਠਿਨੋ ਪੁਤ੍ਤੋ ਏਕੋ, ਨ ਸਕ੍ਕਾ ਤਸ੍ਸ ਰੂਪਸਮ੍ਪਤ੍ਤਿਂ ਕਥੇਤੁਂ. ਸੇਟ੍ਠਿ ਮਂ ਪੁਪ੍ਫਾਨਂ ਅਤ੍ਥਾਯ ਗਚ੍ਛਨ੍ਤਿਂ ‘ਤਸ੍ਸ ਕੁਮਾਰਸ੍ਸ ਪਾਦੇ ਧੋਵਿਤ੍ਵਾ ਸਯਨਂ ਅਤ੍ਥਰਿਤ੍ਵਾ ਦੇਹੀ’ਤਿ ਆਹ, ਤੇਨਾਹਂ ਬਹਿ ਚਿਰਂ ਪਪਞ੍ਚੇਸਿ’’ਨ੍ਤਿ. ਸਾਪਿ ਖੋ ਸੇਟ੍ਠਿਧੀਤਾ ਤਸ੍ਸ ਕੁਮਾਰਸ੍ਸ ਚਤੁਤ੍ਥੇ ਅਤ੍ਤਭਾਵੇ ਘਰਸਾਮਿਨੀ ਅਹੋਸਿ, ਤਸ੍ਮਾ ਤਸ੍ਸਾ ਵਚਨਸ੍ਸ ਸੁਤਕਾਲਤੋ ਪਟ੍ਠਾਯ ਨੇਵ ਅਤ੍ਤਨੋ ਠਿਤਭਾਵਂ, ਨ ਨਿਸਿਨ੍ਨਭਾਵਂ ਅਞ੍ਞਾਸਿ. ਸਾ ਤਮੇਵ ਦਾਸਿਂ ਗਹੇਤ੍ਵਾ ਤਸ੍ਸ ਨਿਪਨ੍ਨਟ੍ਠਾਨਂ ਗਨ੍ਤ੍ਵਾ ਤਂ ਨਿਦ੍ਦਾਯਮਾਨਂ ਓਲੋਕੇਤ੍ਵਾ ਦੁਸ੍ਸਨ੍ਤੇ ਪਣ੍ਣਂ ਦਿਸ੍ਵਾ ‘‘ਕਿਂ ਨੁ ਖੋ ਏਤਂ ਪਣ੍ਣ’’ਨ੍ਤਿ ਕੁਮਾਰਂ ਅਨੁਟ੍ਠਾਪੇਤ੍ਵਾਵ ਪਣ੍ਣਂ ਗਹੇਤ੍ਵਾ ਵਾਚੇਤ੍ਵਾ ‘‘ਅਯਂ ਅਤ੍ਤਨੋ ਮਰਣਪਣ੍ਣਂ ਸਯਮੇਵ ਗਹੇਤ੍ਵਾ ਆਗਚ੍ਛਤੀ’’ਤਿ ਤਂ ਪਣ੍ਣਂ ਫਾਲੇਤ੍ਵਾ ਤਸ੍ਮਿਂ ਅਪ੍ਪਬੁਦ੍ਧੇਯੇਵ ‘‘ਮਯਾ ਤਵ ਸਨ੍ਤਿਕਂ ਪੁਤ੍ਤੋ ਪੇਸਿਤੋ, ਸਹਾਯਕਸ੍ਸ ਮੇ ਗਾਮਕਸੇਟ੍ਠਿਸ੍ਸ ਵਯਪ੍ਪਤ੍ਤਾ ਦਾਰਿਕਾ ਅਤ੍ਥਿ, ਤ੍ਵਂ ਸੀਘਂ ਅਮ੍ਹਾਕਂ ਆਣਾਪਵਤ੍ਤਿਟ੍ਠਾਨੇ ਉਪ੍ਪਾਦਂ ਧਨਂ ਗਣ੍ਹਿਤ੍ਵਾ ਸਬ੍ਬਸਤੇਨ ਮਮ ਪੁਤ੍ਤਸ੍ਸ ਗਾਮਕਸੇਟ੍ਠਿਨੋ ਧੀਤਰਂ ਗਹੇਤ੍ਵਾ ਮਙ੍ਗਲਂ ਕਰੋਹਿ. ਮਙ੍ਗਲੇ ਚ ਨਿਟ੍ਠਿਤੇ ‘ਇਮਿਨਾ ਮੇ ਵਿਧਾਨੇਨ ਕਤ’ਨ੍ਤਿ ਮਯ੍ਹਂ ਸਾਸਨਂ ਪੇਸੇਹਿ. ਅਹਂ ਤਵ ਇਧ ਕਤ੍ਤਬ੍ਬਂ ਜਾਨਿਸ੍ਸਾਮੀ’’ਤਿ ਪਣ੍ਣਂ ਲਿਖਿਤ੍ਵਾ ਤਮੇਵ ਲਞ੍ਛਨਂ ਦਤ੍ਵਾ ਪਠਮਂ ਬਦ੍ਧਨਿਯਾਮੇਨੇਵ ਦੁਸ੍ਸਨ੍ਤੇ ਬਨ੍ਧਿ.

ਸੋਪਿ ਖੋ ਕੁਮਾਰੋ ਤਂਦਿਵਸਂ ਤਤ੍ਥ ਵਸਿਤ੍ਵਾ ਪੁਨਦਿਵਸੇ ਸੇਟ੍ਠਿਂ ਆਪੁਚ੍ਛਿਤ੍ਵਾ ਕਮ੍ਮਨ੍ਤਿਕਸ੍ਸ ਗਾਮਂ ਗਨ੍ਤ੍ਵਾ ਪਣ੍ਣਂ ਅਦਾਸਿ. ਕਮ੍ਮਨ੍ਤਿਕੋ ਪਣ੍ਣਂ ਵਾਚੇਤ੍ਵਾ ਗਾਮਿਕੇ ਸਨ੍ਨਿਪਾਤੇਤ੍ਵਾ ‘‘ਤੁਮ੍ਹੇਵ ਮਂ ਨ ਗਣੇਥ, ਮਮ ਸਾਮੀ ਅਤ੍ਤਨੋ ਜੇਟ੍ਠਪੁਤ੍ਤਸ੍ਸ ਸਬ੍ਬਸਤੇਨ ਦਾਰਿਕਂ ਆਨੇਤੁਂ ਮਯ੍ਹਂ ਸਨ੍ਤਿਕਂ ਪੇਸੇਸਿ, ਵੇਗੇਨ ਇਮਸ੍ਮਿਂ ਠਾਨੇ ਉਪ੍ਪਾਦਂ ਸਮ੍ਪਿਣ੍ਡੇਥਾ’’ਤਿ ਸਬ੍ਬਂ ਮਙ੍ਗਲਸਕ੍ਕਾਰਂ ਸਜ੍ਜੇਤ੍ਵਾ ਗਾਮਕਸੇਟ੍ਠਿਸ੍ਸ ਸਾਸਨਂ ਪੇਸੇਤ੍ਵਾ ਸਮ੍ਪਟਿਚ੍ਛਾਪੇਤ੍ਵਾ ਸਬ੍ਬਸਤੇਨ ਮਙ੍ਗਲਕਿਰਿਯਂ ਨਿਟ੍ਠਾਪੇਤ੍ਵਾ ਕੋਸਮ੍ਬਿਸੇਟ੍ਠਿਸ੍ਸ ਪਣ੍ਣਂ ਪਹਿਣਿ ‘‘ਮਯਾ ਤੁਮ੍ਹੇਹਿ ਪਹਿਤਪਣ੍ਣੇ ਸਾਸਨਂ ਸੁਤ੍ਵਾ ਇਦਞ੍ਚਿਦਞ੍ਚ ਕਤ’’ਨ੍ਤਿ.

ਸੇਟ੍ਠਿ ਤਂ ਸਾਸਨਂ ਸੁਤ੍ਵਾ ਅਗ੍ਗਿਦਡ੍ਢੋ ਵਿਯ ‘‘ਇਦਾਨਿ ਨਟ੍ਠੋਮ੍ਹੀ’’ਤਿ ਚਿਨ੍ਤਨਵਸੇਨ ਲੋਹਿਤਪਕ੍ਖਨ੍ਦਿਕਰੋਗਂ ਪਤ੍ਵਾ ‘‘ਯੇਨ ਕੇਨਚਿ ਤਂ ਉਪਾਯੇਨ ਪਕ੍ਕੋਸਿਤ੍ਵਾ ਮਮ ਸਨ੍ਤਕਸ੍ਸ ਅਸ੍ਸਾਮਿਕਂ ਕਰਿਸ੍ਸਾਮੀ’’ਤਿ ‘‘ਮਙ੍ਗਲਸ੍ਸ ਨਿਟ੍ਠਿਤਕਾਲਤੋ ਪਟ੍ਠਾਯ ਕਸ੍ਮਾ ਮਯ੍ਹਂ ਪੁਤ੍ਤੋ ਬਹਿ ਹੋਤਿ, ਸੀਘਂ ਆਗਚ੍ਛਤੂ’’ਤਿ ਸਾਸਨਂ ਪੇਸੇਸਿ. ਸਾਸਨਂ ਸੁਤ੍ਵਾ ਕੁਮਾਰੇ ਗਨ੍ਤੁਂ ਆਰਦ੍ਧੇ ਸੇਟ੍ਠਿਧੀਤਾ ਚਿਨ੍ਤੇਸਿ – ‘‘ਅਯਂ ਬਾਲੋ ਮਂ ਨਿਸ੍ਸਾਯ ਇਮਂ ਸਮ੍ਪਤ੍ਤਿਂ ਅਲਤ੍ਥਨ੍ਤਿ ਨ ਜਾਨਾਤਿ, ਯਂਕਿਞ੍ਚਿ ਕਤ੍ਵਾ ਇਮਸ੍ਸ ਗਮਨਪਟਿਬਾਹਨੁਪਾਯੋ ਕਾਤੁਂ ਵਟ੍ਟਤੀ’’ਤਿ. ਤਤੋ ਨਂ ਆਹ – ‘‘ਕੁਮਾਰ, ਮਾ ਅਤਿਵੇਗੇਨ ਗਚ੍ਛਾਹਿ, ਕੁਲਗਾਮਂ ਗਚ੍ਛਨ੍ਤੇਨ ਨਾਮ ਅਤ੍ਤਨੋ ਪਰਿਵਚ੍ਛਂ ਕਤ੍ਵਾ ਗਨ੍ਤੁਂ ਵਟ੍ਟਤੀ’’ਤਿ.

ਕੋਸਮ੍ਬਕਸੇਟ੍ਠਿਪਿ ਤਸ੍ਸ ਚਿਰਾਯਨਭਾਵਂ ਞਤ੍ਵਾ ਪੁਨ ਸਾਸਨਂ ਪਹਿਣਿ ‘‘ਕਸ੍ਮਾ ਮੇ ਪੁਤ੍ਤੋ ਚਿਰਾਯਤਿ, ਅਹਂ ਲੋਹਿਤਪਕ੍ਖਨ੍ਦਿਕਰੋਗਂ ਪਤ੍ਤੋ, ਜੀਵਨ੍ਤਮੇਵ ਮਂ ਆਗਨ੍ਤ੍ਵਾ ਦਟ੍ਠੁਂ ਵਟ੍ਟਤੀ’’ਤਿ. ਤਸ੍ਮਿਂ ਕਾਲੇ ਸੇਟ੍ਠਿਧੀਤਾ ਤਸ੍ਸ ਆਰੋਚੇਸਿ – ‘‘ਨ ਏਸੋ ਤਵ ਪਿਤਾ, ਤ੍ਵਂ ਪਨ ‘ਪਿਤਾ’ਤਿ ਸਞ੍ਞਂ ਕਰੋਸਿ. ਏਸ ਤਵ ਮਾਰਣਤ੍ਥਾਯ ਕਮ੍ਮਨ੍ਤਿਕਸ੍ਸ ਪਣ੍ਣਂ ਪਹਿਣਿ, ਅਹਂ ਤਂ ਪਣ੍ਣਂ ਅਪਨੇਤ੍ਵਾ ਅਞ੍ਞਂ ਸਾਸਨਂ ਲਿਖਿਤ੍ਵਾ ਤਵ ਏਤਂ ਸਮ੍ਪਤ੍ਤਿਂ ਉਪ੍ਪਾਦਯਿਂ. ਏਸ ਤਂ ‘ਅਪੁਤ੍ਤਂ ਕਰਿਸ੍ਸਾਮੀ’ਤਿ ਪਕ੍ਕੋਸਤਿ, ਏਤਸ੍ਸ ਕਾਲਕਿਰਿਯਂ ਆਗਮੇਹੀ’’ਤਿ. ਅਥਸ੍ਸ ਧਰਮਾਨਕਸ੍ਸੇਵ ਕਾਲਕਤਭਾਵਂ ਸੁਤ੍ਵਾ ਕੋਸਮ੍ਬਿਨਗਰਂ ਅਗਮਾਸਿ. ਸੇਟ੍ਠਿਧੀਤਾਪਿ ਤਸ੍ਸ ਬਹਿਯੇਵ ਸਞ੍ਞਂ ਅਦਾਸਿ ‘‘ਤ੍ਵਂ ਪਵਿਸਨ੍ਤੋ ਸਕਲਗੇਹੇ ਤਵ ਆਰਕ੍ਖਂ ਠਪੇਨ੍ਤੋਵ ਪਵਿਸਾਹੀ’’ਤਿ. ਸਯਮ੍ਪਿ ਸੇਟ੍ਠਿਪੁਤ੍ਤੇਨ ਸਦ੍ਧਿਮੇਵ ਪਵਿਸਿਤ੍ਵਾ ਉਭੋ ਹਤ੍ਥੇ ਉਕ੍ਖਿਪਿਤ੍ਵਾ ਰੋਦਨ੍ਤੀ ਵਿਯ ਹੁਤ੍ਵਾ ਅਨ੍ਧਕਾਰਟ੍ਠਾਨੇ ਨਿਪਨ੍ਨਕਸ੍ਸ ਸੇਟ੍ਠਿਸ੍ਸ ਸਨ੍ਤਿਕਂ ਗਨ੍ਤ੍ਵਾ ਸੀਸੇਨੇਵ ਹਦਯਂ ਪਹਰਿ. ਸੋ ਦੁਬ੍ਬਲਤਾਯ ਤੇਨੇਵ ਪਹਾਰੇਨ ਕਾਲਮਕਾਸਿ.

ਕੁਮਾਰੋਪਿ ਪਿਤੁ ਸਰੀਰਕਿਚ੍ਚਂ ਕਤ੍ਵਾ ‘‘ਤੁਮ੍ਹੇ ਮਹਾਸੇਟ੍ਠਿਸ੍ਸ ਮਂ ਸਕਪੁਤ੍ਤੋਤਿ ਵਦਥਾ’’ਤਿ ਪਾਦਮੂਲਿਕਾਨਂ ਲਞ੍ਜਂ ਅਦਾਸਿ. ਤਤੋ ਸਤ੍ਤਮੇ ਦਿਵਸੇ ਰਾਜਾ ‘‘ਸੇਟ੍ਠਿਟ੍ਠਾਨਾਰਹਂ ਏਕਂ ਲਦ੍ਧੁਂ ਵਟ੍ਟਤੀ’’ਤਿ ‘‘ਸੇਟ੍ਠਿਸ੍ਸ ਸਪੁਤ੍ਤਕਨਿਪੁਤ੍ਤਕਭਾਵਂ ਜਾਨਾਥਾ’’ਤਿ ਪੇਸੇਸਿ. ਸੇਟ੍ਠਿਪਾਦਮੂਲਿਕਾ ਰਞ੍ਞੋ ਸੇਟ੍ਠਿਸ੍ਸ ਸਪੁਤ੍ਤਭਾਵਂ ਕਥਯਿਂਸੁ. ਰਾਜਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਤਸ੍ਸ ਸੇਟ੍ਠਿਟ੍ਠਾਨਂ ਅਦਾਸਿ. ਸੋ ਘੋਸਕਸੇਟ੍ਠਿ ਨਾਮ ਜਾਤੋ. ਅਥ ਨਂ ਭਰਿਯਾ ਆਹ – ‘‘ਅਯ੍ਯਪੁਤ੍ਤ, ਤ੍ਵਮ੍ਪਿ ਅਵਜਾਤੋ, ਅਹਮ੍ਪਿ ਦੁਗ੍ਗਤਕੁਲੇ ਨਿਬ੍ਬਤ੍ਤਾ. ਪੁਬ੍ਬੇ ਕਤਕੁਸਲਵਸੇਨ ਪਨ ਏਵਰੂਪਂ ਸਮ੍ਪਤ੍ਤਿਂ ਅਲਭਿਮ੍ਹ, ਅਧੁਨਾਪਿ ਕੁਸਲਂ ਕਰਿਸ੍ਸਾਮਾ’’ਤਿ. ਸੋ ‘‘ਸਾਧੁ ਭਦ੍ਦੇ’’ਤਿ ਸਮ੍ਪਟਿਚ੍ਛਿਤ੍ਵਾ ਦੇਵਸਿਕਂ ਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਦਾਨਂ ਪਟ੍ਠਪੇਸਿ.

ਤਸ੍ਮਿਂ ਸਮਯੇ ਤਾਸਂ ਦ੍ਵਿਨ੍ਨਂ ਜਨਾਨਂ ਖੁਜ੍ਜੁਤ੍ਤਰਾ ਦੇਵਲੋਕਤੋ ਚਵਿਤ੍ਵਾ ਘੋਸਕਸੇਟ੍ਠਿਸ੍ਸ ਗੇਹੇ ਧਾਤਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿ. ਸਾ ਜਾਤਕਾਲੇ ਖੁਜ੍ਜਾ ਅਹੋਸੀਤਿ ਖੁਜ੍ਜੁਤ੍ਤਰਾਤੇਵਸ੍ਸਾ ਨਾਮਂ ਅਕਂਸੁ. ਸਾਮਾਵਤੀਪਿ ਦੇਵਲੋਕਤੋ ਚਵਿਤ੍ਵਾ ਭਦ੍ਦਵਤਿਯਰਟ੍ਠੇ ਭਦ੍ਦਿਯਨਗਰੇ ਭਦ੍ਦਵਤਿਯਸੇਟ੍ਠਿਸ੍ਸ ਗੇਹੇ ਪਟਿਸਨ੍ਧਿਂ ਗਣ੍ਹਿ, ਸਾਮਾਤਿਸ੍ਸਾ ਨਾਮਂ ਅਕਂਸੁ. ਅਪਰਭਾਗੇ ਤਸ੍ਮਿਂ ਨਗਰੇ ਛਾਤਕਭਯਂ ਉਪ੍ਪਜ੍ਜਿ, ਮਨੁਸ੍ਸਾ ਛਾਤਕਭਯਭੀਤਾ ਯੇਨ ਵਾ ਤੇਨ ਵਾ ਗਚ੍ਛਨ੍ਤਿ. ਤਦਾ ਅਯਂ ਭਦ੍ਦਵਤਿਯਸੇਟ੍ਠਿ ਭਰਿਯਾਯ ਸਦ੍ਧਿਂ ਮਨ੍ਤੇਸਿ – ‘‘ਭਦ੍ਦੇ ਇਮਸ੍ਮਿਂ ਛਾਤਕਭਯਸ੍ਸ ਅਨ੍ਤੋ ਨ ਪਞ੍ਞਾਯਤਿ, ਕੋਸਮ੍ਬਿਨਗਰੇ ਅਮ੍ਹਾਕਂ ਸਹਾਯਕਸ੍ਸ ਘੋਸਕਸੇਟ੍ਠਿਸ੍ਸ ਸਨ੍ਤਿਕਂ ਗਚ੍ਛਾਮ, ਨ ਸੋ ਅਮ੍ਹੇ ਦਿਸ੍ਵਾ ਪਮਜ੍ਜਿਸ੍ਸਤੀ’’ਤਿ. ਤਸ੍ਸ ਕਿਰ ਸੋ ਸੇਟ੍ਠਿ ਅਦਿਟ੍ਠਸਹਾਯਕੋ ਅਹੋਸਿ, ਤਸ੍ਮਾ ਏਵਮਾਹ. ਸੋ ਸੇਸਜਨਂ ਨਿਵਤ੍ਤਾਪੇਤ੍ਵਾ ਭਰਿਯਞ੍ਚ ਧੀਤਰਞ੍ਚ ਗਣ੍ਹਿਤ੍ਵਾ ਕੋਸਮ੍ਬਿਨਗਰਸ੍ਸ ਮਗ੍ਗਂ ਪਟਿਪਜ੍ਜਿ. ਤੇ ਤਯੋਪਿ ਅਨ੍ਤਰਾਮਗ੍ਗੇ ਮਹਾਦੁਕ੍ਖਂ ਅਨੁਭਵਨ੍ਤਾ ਅਨੁਪੁਬ੍ਬੇਨ ਕੋਸਮ੍ਬਿਂ ਪਤ੍ਵਾ ਏਕਾਯ ਸਾਲਾਯ ਨਿਵਾਸਂ ਅਕਂਸੁ.

ਘੋਸਕਸੇਟ੍ਠਿਪਿ ਖੋ ਅਤ੍ਤਨੋ ਘਰਦ੍ਵਾਰੇ ਕਪਣਦ੍ਧਿਕਵਨਿਬ੍ਬਕਯਾਚਕਾਨਂ ਮਹਾਦਾਨਂ ਦਾਪੇਸਿ. ਅਥਾਯਂ ਭਦ੍ਦਵਤਿਯਸੇਟ੍ਠਿ ਚਿਨ੍ਤੇਸਿ – ‘‘ਨ ਸਕ੍ਕਾ ਅਮ੍ਹੇਹਿ ਇਮਿਨਾਵ ਕਪਣਵੇਸੇਨ ਸਹਾਯਕਸ੍ਸ ਅਤ੍ਤਾਨਂ ਦਸ੍ਸੇਤੁਂ, ਸਰੀਰੇ ਪਾਕਤਿਕੇ ਜਾਤੇ ਸੁਨਿਵਤ੍ਥਾ ਸੁਪਾਰੁਤਾ ਸੇਟ੍ਠਿਂ ਪਸ੍ਸਿਸ੍ਸਾਮਾ’’ਤਿ. ਤੇ ਉਭੋਪਿ ਧੀਤਰਂ ਘੋਸਕਸੇਟ੍ਠਿਸ੍ਸ ਦਾਨਗ੍ਗਂ ਪਹਿਣਿਂਸੁ. ਸਾ ਅਤ੍ਤਨੋ ਭਤ੍ਤਂ ਆਹਰਣਤ੍ਥਾਯ ਭਾਜਨਂ ਗਹੇਤ੍ਵਾ ਦਾਨਗ੍ਗਂ ਗਨ੍ਤ੍ਵਾ ਏਕਸ੍ਮਿਂ ਓਕਾਸੇ ਲਜ੍ਜਮਾਨਰੂਪਾ ਅਟ੍ਠਾਸਿ. ਤਂ ਦਿਸ੍ਵਾ ਦਾਨਕਮ੍ਮਿਕੋ ਚਿਨ੍ਤੇਸਿ – ‘‘ਸੇਸਜਨਾ ਸਮ੍ਮੁਖਸਮ੍ਮੁਖਟ੍ਠਾਨੇ ਕੇਵਟ੍ਟਾ ਮਚ੍ਛਵਿਲੋਪੇ ਵਿਯ ਮਹਾਸਦ੍ਦਂ ਕਤ੍ਵਾ ਗਣ੍ਹਿਤ੍ਵਾ ਗਚ੍ਛਨ੍ਤਿ, ਅਯਂ ਪਨ ਦਾਰਿਕਾ ਕੁਲਧੀਤਾ ਭਵਿਸ੍ਸਤਿ, ਉਪਧਿਸਮ੍ਪਦਾਪਿਸ੍ਸਾ ਅਤ੍ਥੀ’’ਤਿ.

ਤਤੋ ਨਂ ਆਹ – ‘‘ਤ੍ਵਂ, ਅਮ੍ਮ, ਕਸ੍ਮਾ ਸੇਸਜਨੋ ਵਿਯ ਗਣ੍ਹਿਤ੍ਵਾ ਨ ਗਚ੍ਛਸੀ’’ਤਿ? ਤਾਤ, ਏਵਰੂਪਂ ਸਮ੍ਬਾਧਟ੍ਠਾਨਂ ਕਿਨ੍ਤਿ ਕਤ੍ਵਾ ਪਵਿਸਾਮੀਤਿ. ਅਮ੍ਮ, ਕਤਿ ਪਨ ਜਨਾ ਤੁਮ੍ਹੇਤਿ? ਤਯੋ ਜਨਾ, ਤਾਤਾਤਿ. ਸੋ ਤਯੋ ਭਤ੍ਤਪਿਣ੍ਡੇ ਅਦਾਸਿ. ਸਾ ਤਂ ਭਤ੍ਤਂ ਮਾਤਾਪਿਤੂਨਂ ਅਦਾਸਿ, ਪਿਤਾ ਦੀਘਰਤ੍ਤਂ ਛਾਤਕਤ੍ਤਾ ਅਤਿਰੇਕਂ ਭੁਞ੍ਜਿਤ੍ਵਾ ਕਾਲਮਕਾਸਿ. ਸਾ ਪੁਨਦਿਵਸੇ ਗਨ੍ਤ੍ਵਾ ਦ੍ਵੇਯੇਵ ਭਤ੍ਤਪਿਣ੍ਡੇ ਗਣ੍ਹਿ. ਤਂਦਿਵਸਂ ਸੇਟ੍ਠਿਭਰਿਯਾ ਭਤ੍ਤੇਨ ਚ ਕਿਲਨ੍ਤਤਾਯ ਸੇਟ੍ਠਿਨੋ ਚ ਮਰਣਸੋਕੇਨ ਰਤ੍ਤਿਭਾਗਸਮਨਨ੍ਤਰੇ ਕਾਲਮਕਾਸਿ. ਸਾ ਪੁਨਦਿਵਸੇ ਸੇਟ੍ਠਿਧੀਤਾ ਏਕਮੇਵ ਭਤ੍ਤਪਿਣ੍ਡਂ ਗਣ੍ਹਿ. ਦਾਨਕਮ੍ਮਿਕੋ ਤਸ੍ਸਾ ਕਿਰਿਯਂ ਉਪਧਾਰੇਤ੍ਵਾ, ‘‘ਅਮ੍ਮ, ਤਯਾ ਪਠਮਦਿਵਸੇ ਤਯੋ ਪਿਣ੍ਡਾ ਗਹਿਤਾ, ਪੁਨਦਿਵਸੇ ਦ੍ਵੇ, ਅਜ੍ਜ ਏਕਮੇਵ ਗਣ੍ਹਸਿ. ਕਿਂ ਨੁ ਖੋ ਕਾਰਣ’’ਨ੍ਤਿ ਪੁਚ੍ਛਿ. ਸਾ ਤਂ ਕਾਰਣਂ ਕਥੇਸਿ. ਕਤਰਗਾਮਵਾਸਿਨੋ ਪਨ, ਅਮ੍ਮ, ਤੁਮ੍ਹੇਤਿ. ਸਾ ਤਮ੍ਪਿ ਕਾਰਣਂ ਨਿਪ੍ਪਦੇਸਤੋ ਕਥੇਸਿ. ‘‘ਅਮ੍ਮ, ਏਵਂ ਸਨ੍ਤੇ ਤ੍ਵਂ ਅਮ੍ਹਾਕਂ ਸੇਟ੍ਠਿਧੀਤਾ ਨਾਮ ਅਹੋਸਿ, ਮਯ੍ਹਞ੍ਚ ਅਞ੍ਞਾ ਦਾਰਿਕਾ ਨਤ੍ਥਿ, ਤ੍ਵਂ ਇਤੋ ਪਟ੍ਠਾਯ ਮਮ ਧੀਤਾ, ਅਮ੍ਮਾ’’ਤਿ ਤਂ ਧੀਤਰਂ ਕਤ੍ਵਾ ਗਣ੍ਹਿ.

ਸਾ ਉਟ੍ਠਾਯ ਸਮੁਟ੍ਠਾਯ ਦਾਨਗ੍ਗੇ ਮਹਾਸਦ੍ਦਂ ਸੁਤ੍ਵਾ ‘‘ਕਸ੍ਮਾ ਅਯਂ, ਤਾਤ, ਉਚ੍ਚਾਸਦ੍ਦਮਹਾਸਦ੍ਦੋ’’ਤਿ ਆਹ. ਅਮ੍ਮ, ਮਹਾਜਨਸ੍ਸ ਅਨ੍ਤਰੇ ਨਾਮ ਅਪ੍ਪਸਦ੍ਦਂ ਕਾਤੁਂ ਨ ਸਕ੍ਕਾਤਿ. ਅਹਮੇਤ੍ਥ ਉਪਾਯਂ ਜਾਨਾਮਿ, ਤਾਤਾਤਿ. ਕਿਂ ਕਾਤੁਂ ਵਟ੍ਟਤਿ, ਅਮ੍ਮਾਤਿ? ਸਮਨ੍ਤਾ ਵਤਿਂ ਕਤ੍ਵਾ ਦ੍ਵੇ ਦ੍ਵਾਰਾਨਿ ਯੋਜੇਤ੍ਵਾ ਅਨ੍ਤੋ ਭਾਜਨਾਨਿ ਠਪਾਪੇਤ੍ਵਾ ਏਕੇਨ ਦ੍ਵਾਰੇਨ ਪਵਿਸਿਤ੍ਵਾ ਭਤ੍ਤਂ ਗਣ੍ਹਿਤ੍ਵਾ ਏਕੇਨ ਦ੍ਵਾਰੇਨ ਨਿਕ੍ਖਮਨਂ ਕਰੋਥ, ਤਾਤਾਤਿ. ਸਾਧੁ, ਅਮ੍ਮਾਤਿ ਪੁਨਦਿਵਸਤੋ ਪਟ੍ਠਾਯ ਤਥਾ ਕਾਰੇਸਿ. ਤਤੋ ਪਟ੍ਠਾਯ ਦਾਨਗ੍ਗਂ ਪਦੁਮਸ੍ਸਰਂ ਵਿਯ ਸਨ੍ਨਿਸਿਨ੍ਨਸਦ੍ਦਂ ਅਹੋਸਿ.

ਤਤੋ ਘੋਸਕਸੇਟ੍ਠਿ ਪੁਬ੍ਬੇ ਦਾਨਗ੍ਗਸ੍ਮਿਂ ਉਚ੍ਚਾਸਦ੍ਦਮਹਾਸਦ੍ਦਂ ਸੁਤ੍ਵਾ ਤਦਾ ਤਂ ਅਸੁਣਨ੍ਤੋ ਦਾਨਕਮ੍ਮਿਕਂ ਪਕ੍ਕੋਸਾਪੇਤ੍ਵਾ ਪੁਚ੍ਛਿ – ‘‘ਤ੍ਵਂ ਅਜ੍ਜ ਦਾਨਂ ਨ ਦਾਪੇਸੀ’’ਤਿ. ਦਿਨ੍ਨਂ, ਅਯ੍ਯਾਤਿ. ਅਥ ਕਸ੍ਮਾ ਪੁਬ੍ਬੇ ਵਿਯ ਦਾਨਗ੍ਗੇ ਸਦ੍ਦੋ ਨ ਸੁਯ੍ਯਤੀਤਿ? ਆਮ, ਅਯ੍ਯ, ਏਕਾ ਮੇ ਧੀਤਾ ਅਤ੍ਥਿ, ਅਹਂ ਤਾਯ ਕਥਿਤਉਪਾਯੇ ਠਤ੍ਵਾ ਦਾਨਗ੍ਗਂ ਨਿਸ੍ਸਦ੍ਦਮਕਾਸਿਨ੍ਤਿ. ਤਵ ਧੀਤਾ ਨਾਮ ਨਤ੍ਥਿ, ਕੁਤੋ ਤੇ ਧੀਤਾ ਲਦ੍ਧਾਤਿ? ਸੋ ਵਞ੍ਚੇਤੁਂ ਅਸਕ੍ਕੁਣੇਯ੍ਯਭਾਵੇਨ ਸੇਟ੍ਠਿਸ੍ਸ ਸਬ੍ਬਂ ਧੀਤੁ ਆਗਮਨਵਿਧਾਨਂ ਕਥੇਸਿ. ਕਸ੍ਮਾ ਪਨ ਭੋ ਤ੍ਵਂ ਏਵਰੂਪਂ ਭਾਰਿਯਂ ਕਮ੍ਮਮਕਾਸਿ? ਤ੍ਵਂ ਏਤ੍ਤਕਂ ਅਦ੍ਧਾਨਂ ਮਮ ਧੀਤਰਂ ਅਤ੍ਤਨੋ ਸਨ੍ਤਿਕੇ ਵਸਮਾਨਂ ਨਾਰੋਚੇਸਿ, ਵੇਗੇਨ ਤਂ ਅਮ੍ਹਾਕਂ ਗੇਹਂ ਆਣਾਪੇਹੀਤਿ. ਸੋ ਤਸ੍ਸ ਵਚਨਂ ਸੁਤ੍ਵਾ ਅਕਾਮਕੋ ਆਣਾਪੇਸਿ. ਤਤੋ ਪਟ੍ਠਾਯ ਸੇਟ੍ਠਿ ਤਂ ਧੀਤੁਟ੍ਠਾਨੇ ਠਪੇਤ੍ਵਾ ‘‘ਧੀਤੁ ਸਕ੍ਕਾਰਂ ਕਰੋਮੀ’’ਤਿ ਅਤ੍ਤਨੋ ਸਮਾਨਜਾਤਿਕੇਹਿ ਕੁਲੇਹਿ ਧੀਤੁ ਸਮਾਨਵਯਾਨਿ ਪਞ੍ਚ ਕੁਮਾਰਿਕਸਤਾਨਿ ਤਸ੍ਸਾ ਪਰਿਵਾਰਮਕਾਸਿ.

ਅਥੇਕਦਿਵਸਂ ਉਦੇਨੋ ਰਾਜਾ ਨਗਰੇ ਅਨੁਸਞ੍ਚਰਨ੍ਤੋ ਤਂ ਸਾਮਾਵਤਿਂ ਤਾਹਿ ਕੁਮਾਰੀਹਿ ਪਰਿਵਾਰਿਤਂ ਕੀਲ਼ਮਾਨਂ ਦਿਸ੍ਵਾ ‘‘ਕਸ੍ਸਾਯਂ ਦਾਰਿਕਾ’’ਤਿ ਪੁਚ੍ਛਿਤ੍ਵਾ ‘‘ਘੋਸਕਸੇਟ੍ਠਿਸ੍ਸ ਧੀਤਾ’’ਤਿ ਸੁਤ੍ਵਾ ਸਸ੍ਸਾਮਿਕਅਸ੍ਸਾਮਿਕਭਾਵਂ ਪੁਚ੍ਛਿ. ਤਤੋ ਅਸ੍ਸਾਮਿਕਭਾਵੇ ਕਥਿਤੇ ‘‘ਗਚ੍ਛਥ ਸੇਟ੍ਠਿਨੋ ਕਥੇਥ ‘ਤੁਮ੍ਹਾਕਂ ਧੀਤਰਂ ਰਾਜਾ ਇਚ੍ਛਤੀ’’’ਤਿ. ਤਂ ਸੁਤ੍ਵਾ ਸੇਟ੍ਠਿ ‘‘ਅਮ੍ਹਾਕਂ ਅਞ੍ਞਾ ਦਾਰਿਕਾ ਨਤ੍ਥਿ, ਏਕਧੀਤਿਕਂ ਸਪਤ੍ਤਿਵਾਸੇ ਦਾਤੁਂ ਨ ਸਕ੍ਕੋਮਾ’’ਤਿ. ਰਾਜਾ ਤਂ ਕਥਂ ਸੁਤ੍ਵਾ ਸੇਟ੍ਠਿਂ ਚ ਸੇਟ੍ਠਿਭਰਿਯਞ੍ਚ ਬਹਿ ਕਤ੍ਵਾ ਸਕਲਗੇਹਂ ਲਞ੍ਛਾਪੇਸਿ. ਸਾਮਾਵਤੀ ਬਹਿ ਕੀਲ਼ਿਤ੍ਵਾ ਆਗਚ੍ਛਨ੍ਤੀ ਮਾਤਾਪਿਤਰੋ ਬਹਿ ਨਿਸਿਨ੍ਨਕੇ ਦਿਸ੍ਵਾ ‘‘ਅਮ੍ਮਤਾਤਾ, ਕਸ੍ਮਾ ਇਧ ਨਿਸਿਨ੍ਨਤ੍ਥਾ’’ਤਿ? ਤੇ ਤਂ ਕਾਰਣਂ ਕਥਯਿਂਸੁ. ਅਮ੍ਮਤਾਤਾ, ਕਸ੍ਮਾ ਤੁਮ੍ਹੇ ਇਮਂ ਪਟਿਵਚਨਂ ਨ ਜਾਨਾਥ ‘‘ਮਮ ਧੀਤਾ ਸਪਤ੍ਤਿਵਾਸੇ ਵਸਨ੍ਤੀ ਏਕਿਕਾ ਵਸਿਤੁਂ ਨ ਸਕ੍ਖਿਸ੍ਸਤਿ, ਸਚਸ੍ਸਾ ਪਰਿਵਾਰਾ ਪਞ੍ਚਸਤਾ ਕੁਮਾਰਿਯੋ ਵਸਾਪੇਥ, ਏਵਂ ਵਸਿਸ੍ਸਤੀ’’ਤਿ. ਇਦਾਨਿ ਏਵਂ ਕਥਾਪੇਥ, ਤਾਤਾਤਿ. ‘‘ਸਾਧੁ, ਅਮ੍ਮ, ਮਯਂ ਤਵ ਚਿਤ੍ਤਂ ਨ ਜਾਨਿਮ੍ਹਾ’’ਤਿ ਵਤ੍ਵਾ ਤੇ ਤਥਾ ਕਥਯਿਂਸੁ. ਰਾਜਾ ਉਤ੍ਤਰਿਤਰਂ ਪਸੀਦਿਤ੍ਵਾ ‘‘ਸਹਸ੍ਸਮ੍ਪਿ ਹੋਤੁ, ਸਬ੍ਬਾ ਆਨੇਥਾ’’ਤਿ ਆਹ. ਅਥ ਨਂ ਭਦ੍ਦਕੇਨ ਨਕ੍ਖਤ੍ਤਮੁਹੁਤ੍ਤਕੇਨ ਪਞ੍ਚਮਾਤੁਗਾਮਸਤਪਰਿਵਾਰਂ ਰਾਜਗੇਹਂ ਨਯਿਂਸੁ. ਰਾਜਾ ਤਾ ਪਞ੍ਚਸਤਾਪਿ ਤਸ੍ਸਾਯੇਵ ਪਰਿਵਾਰਂ ਕਤ੍ਵਾ ਅਭਿਸੇਕਂ ਕਤ੍ਵਾ ਵਿਸੁਂ ਏਕਸ੍ਮਿਂ ਪਾਸਾਦੇ ਵਸਾਪੇਸਿ.

ਤੇਨ ਚ ਸਮਯੇਨ ਕੋਸਮ੍ਬਿਯਂ ਘੋਸਕਸੇਟ੍ਠਿ ਕੁਕ੍ਕੁਟਸੇਟ੍ਠਿ ਪਵਾਰਿਕਸੇਟ੍ਠੀਤਿ ਤਯੋ ਜਨਾ ਅਞ੍ਞਮਞ੍ਞਂ ਸਹਾਯਕਾ ਹੋਨ੍ਤਿ. ਤੇ ਤਯੋਪਿ ਜਨਾ ਪਞ੍ਚਸਤੇ ਤਾਪਸੇ ਪਟਿਜਗ੍ਗਨ੍ਤਿ. ਤਾਪਸਾਪਿ ਚਤ੍ਤਾਰੋ ਮਾਸੇ ਤੇਸਂ ਸਨ੍ਤਿਕੇ ਵਸਿਤ੍ਵਾ ਅਟ੍ਠ ਮਾਸੇ ਹਿਮਵਨ੍ਤੇ ਵਸਨ੍ਤਿ. ਅਥੇਕਦਿਵਸਂ ਤੇ ਤਾਪਸਾ ਹਿਮਵਨ੍ਤਤੋ ਆਗਚ੍ਛਨ੍ਤਾ ਮਹਾਕਨ੍ਤਾਰੇ ਤਸਿਤਾ ਕਿਲਨ੍ਤਾ ਏਕਂ ਮਹਨ੍ਤਂ ਵਟਰੁਕ੍ਖਂ ਪਤ੍ਵਾ ਤਤ੍ਥ ਅਧਿਵਤ੍ਥਾਯ ਦੇਵਤਾਯ ਸਨ੍ਤਿਕਾ ਸਙ੍ਗਹਂ ਪਚ੍ਚਾਸੀਸਨ੍ਤਾ ਨਿਸੀਦਿਂਸੁ. ਦੇਵਤਾ ਸਬ੍ਬਾਲਙ੍ਕਾਰਵਿਭੂਸਿਤਂ ਹਤ੍ਥਂ ਪਸਾਰੇਤ੍ਵਾ ਤੇਸਂ ਪਾਨੀਯਪਾਨਕਾਦੀਨਿ ਦਤ੍ਵਾ ਕਿਲਮਥਂ ਪਟਿਵਿਨੋਦੇਸਿ. ਤੇ ਦੇਵਤਾਯ ਆਨੁਭਾਵੇਨ ਵਿਮ੍ਹਿਤਾ ਪੁਚ੍ਛਿਂਸੁ – ‘‘ਕਿਂ ਨੁ ਖੋ ਦੇਵਤੇ ਕਮ੍ਮਂ ਕਤ੍ਵਾ ਤਯਾ ਅਯਂ ਸਮ੍ਪਤ੍ਤਿ ਲਦ੍ਧਾ’’ਤਿ? ਦੇਵਤਾ ਆਹ – ਲੋਕੇ ਬੁਦ੍ਧੋ ਨਾਮ ਭਗਵਾ ਉਪ੍ਪਨ੍ਨੋ, ਸੋ ਏਤਰਹਿ ਸਾਵਤ੍ਥਿਯਂ ਵਿਹਰਤਿ. ਅਨਾਥਪਿਣ੍ਡਿਕੋ ਗਹਪਤਿ ਤਂ ਉਪਟ੍ਠਾਤਿ. ਸੋ ਉਪੋਸਥਦਿਵਸੇਸੁ ਅਤ੍ਤਨੋ ਭਤਕਾਨਂ ਪਕਤਿਭਤ੍ਤਵੇਤਨਮੇਵ ਦਤ੍ਵਾ ਉਪੋਸਥਂ ਕਾਰਾਪੇਸਿ. ਅਥਾਹਂ ਏਕਦਿਵਸਂ ਮਜ੍ਝਨ੍ਹਿਕੇ ਪਾਤਰਾਸਤ੍ਥਾਯ ਆਗਤੋ ਕਞ੍ਚਿ ਭਤਕਂ ਕਮ੍ਮਂ ਕਰੋਨ੍ਤਂ ਅਦਿਸ੍ਵਾ ‘‘ਅਜ੍ਜ ਮਨੁਸ੍ਸਾ ਕਸ੍ਮਾ ਕਮ੍ਮਂ ਨ ਕਰੋਨ੍ਤੀ’’ਤਿ ਪੁਚ੍ਛਿਂ. ਤਸ੍ਸ ਮੇ ਏਤਮਤ੍ਥਂ ਆਰੋਚੇਸੁਂ. ਅਥਾਹਂ ਏਤਦਵੋਚਂ – ‘‘ਇਦਾਨਿ ਉਪਡ੍ਢਦਿਵਸੋ ਗਤੋ, ਸਕ੍ਕਾ ਨੁ ਖੋ ਉਪਡ੍ਢਉਪੋਸਥਂ ਕਾਤੁ’’ਨ੍ਤਿ. ਤਤੋ ਸੇਟ੍ਠਿਸ੍ਸ ਪਟਿਵੇਦੇਤ੍ਵਾ ‘‘ਸਕ੍ਕਾ ਕਾਤੁ’’ਨ੍ਤਿ ਆਹ. ਸ੍ਵਾਹਂ ਉਪਡ੍ਢਦਿਵਸਂ ਉਪੋਸਥਂ ਸਮਾਦਿਯਿਤ੍ਵਾ ਤਦਹੇਵ ਕਾਲਂ ਕਤ੍ਵਾ ਇਮਂ ਸਮ੍ਪਤ੍ਤਿਂ ਪਟਿਲਭਿਨ੍ਤਿ.

ਅਥ ਤੇ ਤਾਪਸਾ ‘‘ਬੁਦ੍ਧੋ ਕਿਰ ਉਪ੍ਪਨ੍ਨੋ’’ਤਿ ਸਞ੍ਜਾਤਪੀਤਿਪਾਮੋਜ੍ਜਾ ਤਤੋ ਸਾਵਤ੍ਥਿਂ ਗਨ੍ਤੁਕਾਮਾ ਹੁਤ੍ਵਾਪਿ ‘‘ਬਹੂਪਕਾਰਾ ਨੋ ਉਪਟ੍ਠਾਕਸੇਟ੍ਠਿਨੋ, ਤੇਸਮ੍ਪਿ ਇਮਮਤ੍ਥਂ ਆਰੋਚੇਸ੍ਸਾਮਾ’’ਤਿ ਕੋਸਮ੍ਬਿਂ ਗਨ੍ਤ੍ਵਾ ਸੇਟ੍ਠੀਹਿ ਕਤਸਕ੍ਕਾਰਬਹੁਮਾਨਾ ‘‘ਤਦਹੇਵ ਮਯਂ ਗਚ੍ਛਾਮਾ’’ਤਿ ਆਹਂਸੁ. ‘‘ਕਿਂ, ਭਨ੍ਤੇ, ਤੁਰਿਤਤ੍ਥ, ਨਨੁ ਤੁਮ੍ਹੇ ਪੁਬ੍ਬੇ ਚਤ੍ਤਾਰੋ ਪਞ੍ਚ ਮਾਸੇ ਵਸਿਤ੍ਵਾ ਗਚ੍ਛਥਾ’’ਤਿ ਵੁਤ੍ਤਾ ਤਂ ਪਵਤ੍ਤਿਂ ਆਰੋਚੇਸੁਂ. ‘‘ਤੇਨ ਹਿ, ਭਨ੍ਤੇ, ਸਹੇਵ ਗਚ੍ਛਾਮਾ’’ਤਿ ਚ ਵੁਤ੍ਤੇ – ‘‘ਗਚ੍ਛਾਮ ਮਯਂ, ਤੁਮ੍ਹੇ ਸਣਿਕਂ ਆਗਚ੍ਛਥਾ’’ਤਿ ਸਾਵਤ੍ਥਿਂ ਗਨ੍ਤ੍ਵਾ ਭਗਵਤੋ ਸਨ੍ਤਿਕੇ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ.

ਤੇਪਿ ਸੇਟ੍ਠਿਨੋ ਪਚ੍ਛਾ ਪਞ੍ਚਸਤਪਞ੍ਚਸਤਸਕਟਪਰਿਵਾਰਾ ਸਾਵਤ੍ਥਿਂ ਗਨ੍ਤ੍ਵਾ ਜੇਤਵਨਤੋ ਅਵਿਦੂਰੇ ਠਾਨੇ ਖਨ੍ਧਾਵਾਰਂ ਬਨ੍ਧਿਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਸਤ੍ਥਾ ਤੇਸਂ ਚਰਿਯਾਵਸੇਨ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਤਯੋਪਿ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਪੁਨਦਿਵਸੇ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਤੇਨੇਵ ਨਿਯਾਮੇਨ ਅਜ੍ਜਤਨਾਯ ਸ੍ਵਾਤਨਾਯਾਤਿ ਨਿਮਨ੍ਤੇਤ੍ਵਾ ਅਦ੍ਧਮਾਸਂ ਖਨ੍ਧਾਵਾਰਭਤ੍ਤਂ ਨਾਮ ਦਤ੍ਵਾ ਸਤ੍ਥਾਰਂ ਅਤ੍ਤਨੋ ਨਗਰਂ ਆਗਮਨਤ੍ਥਾਯ ਯਾਚਿਂਸੁ. ਸਤ੍ਥਾ ‘‘ਸੁਞ੍ਞਾਗਾਰੇ ਤਥਾਗਤਾ ਅਭਿਰਮਨ੍ਤੀ’’ਤਿ ਕਥੇਸਿ. ਤੇ ‘‘ਅਞ੍ਞਾਤਂ, ਭਨ੍ਤੇ’’ਤਿ ਵਤ੍ਵਾ ‘‘ਤੁਮ੍ਹੇ ਅਮ੍ਹੇਹਿ ਪਹਿਤਸਾਸਨੇਨ ਆਗਚ੍ਛੇਯ੍ਯਾਥਾ’’ਤਿ ਵਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਅਤ੍ਤਨੋ ਨਗਰਮੇਵ ਆਗਨ੍ਤ੍ਵਾ ਤਯੋਪਿ ਜਨਾ ਸਕੇ ਸਕੇ ਉਯ੍ਯਾਨੇ ਵਿਹਾਰੇ ਕਾਰਾਪੇਸੁਂ. ਘੋਸਕਸੇਟ੍ਠਿਨਾ ਕਾਰਿਤੋ ਘੋਸਿਤਾਰਾਮੋ ਨਾਮ ਜਾਤੋ, ਕੁਕ੍ਕੁਟਸੇਟ੍ਠਿਨਾ ਕਾਰਿਤੋ ਕੁਕ੍ਕੁਟਾਰਾਮੋ ਨਾਮ ਜਾਤੋ, ਪਾਵਾਰਿਕਸੇਟ੍ਠਿਨਾ ਕਾਰਿਤਂ ਪਾਵਾਰਿਕਮ੍ਬਵਨਂ ਨਾਮ ਜਾਤਂ. ਤੇ ਵਿਹਾਰੇ ਕਾਰਾਪੇਤ੍ਵਾ ਸਤ੍ਥੁ ਦੂਤਂ ਪਹਿਣਿਂਸੁ – ‘‘ਸਤ੍ਥਾ ਅਮ੍ਹਾਕਂ ਸਙ੍ਗਹਂ ਕਾਤੁਂ ਇਮਂ ਨਗਰਂ ਆਗਚ੍ਛਤੂ’’ਤਿ. ਸਤ੍ਥਾ ‘‘ਕੋਸਮ੍ਬਿਂ ਗਮਿਸ੍ਸਾਮੀ’’ਤਿ ਮਹਾਭਿਕ੍ਖੁਸਙ੍ਘਪਰਿਵਾਰੋ ਚਾਰਿਕਂ ਨਿਕ੍ਖਮਨ੍ਤੋ ਅਨ੍ਤਰਾਮਗ੍ਗੇ ਮਾਗਣ੍ਡਿਯਬ੍ਰਾਹ੍ਮਣਸ੍ਸ ਅਰਹਤ੍ਤੂਪਨਿਸ੍ਸਯਂ ਦਿਸ੍ਵਾ ਗਮਨਂ ਵਿਚ੍ਛਿਨ੍ਦਿਤ੍ਵਾ ਕੁਰੁਰਟ੍ਠੇ ਕਮ੍ਮਾਸਦਮ੍ਮਂ ਨਾਮ ਨਿਗਮਂ ਅਗਮਾਸਿ.

ਤਸ੍ਮਿਂ ਸਮਯੇ ਮਾਗਣ੍ਡਿਯੋ ਸਬ੍ਬਰਤ੍ਤਿਂ ਬਹਿਗਾਮੇ ਅਗ੍ਗਿਂ ਜੁਹਿਤ੍ਵਾ ਪਾਤੋਵ ਅਨ੍ਤੋਗਾਮਂ ਪਵਿਸਤਿ. ਸਤ੍ਥਾਪਿ ਪੁਨਦਿਵਸੇ ਅਨ੍ਤੋਗਾਮਂ ਪਿਣ੍ਡਾਯ ਪਵਿਸਨ੍ਤੋ ਪਟਿਪਥੇ ਮਾਗਣ੍ਡਿਯਬ੍ਰਾਹ੍ਮਣਸ੍ਸ ਅਤ੍ਤਾਨਂ ਦਸ੍ਸੇਸਿ. ਸੋ ਦਸਬਲਂ ਦਿਸ੍ਵਾ ਚਿਨ੍ਤੇਸਿ – ‘‘ਅਹਂ ਏਤ੍ਤਕਂ ਕਾਲਂ ਮਮ ਧੀਤੁ ਰੂਪਸਮ੍ਪਤ੍ਤਿਯਾ ਸਦਿਸਂ ਦਾਰਕਂ ਪਰਿਯੇਸਨ੍ਤੋ ਚਰਾਮਿ, ਰੂਪਸਮ੍ਪਤ੍ਤਿਯਾ ਚ ਸਤਿਪਿ ਏਵਰੂਪਂ ਗਹਿਤਪਬ੍ਬਜ੍ਜਮੇਵ ਪਤ੍ਥੇਸਿਂ. ਅਯਂ ਖੋ ਪਨ ਪਬ੍ਬਜਿਤੋ ਅਭਿਰੂਪੋ ਦਸ੍ਸਨੀਯੋ ਮਮ ਧੀਤੁਯੇਵ ਅਨੁਚ੍ਛਵਿਕੋ’’ਤਿ ਵੇਗੇਨ ਗੇਹਂ ਅਗਮਾਸਿ. ਤਸ੍ਸ ਕਿਰ ਬ੍ਰਾਹ੍ਮਣਸ੍ਸ ਪੁਬ੍ਬੇ ਏਕੋ ਪਬ੍ਬਜਿਤਵਂਸੋ ਅਤ੍ਥਿ, ਤੇਨਸ੍ਸ ਪਬ੍ਬਜਿਤਮੇਵ ਦਿਸ੍ਵਾ ਚਿਤ੍ਤਂ ਨਮਤਿ. ਸੋ ਬ੍ਰਾਹ੍ਮਣਿਂ ਆਮਨ੍ਤੇਸਿ – ‘‘ਭਦ੍ਦੇ ਮਯਾ ਏਵਰੂਪੋ ਪਬ੍ਬਜਿਤੋ ਨਾਮ ਨਦਿਟ੍ਠਪੁਬ੍ਬੋ ਸੁਵਣ੍ਣਵਣ੍ਣੋ ਬ੍ਰਹ੍ਮਵਣ੍ਣੋ ਮਮ ਧੀਤੁਯੇਵ ਅਨੁਚ੍ਛਵਿਕੋ, ਸੀਘਂ ਮੇ ਧੀਤਰਂ ਅਲਙ੍ਕਰੋਹੀ’’ਤਿ. ਬ੍ਰਾਹ੍ਮਣਿਯਾ ਧੀਤਰਂ ਅਲਙ੍ਕਰੋਨ੍ਤਿਯਾਵ ਸਤ੍ਥਾ ਅਤ੍ਤਨੋ ਠਿਤਟ੍ਠਾਨੇ ਪਦਚੇਤਿਯਾਨਿ ਦਸ੍ਸੇਤ੍ਵਾ ਅਨ੍ਤੋਨਗਰਂ ਪਾਵਿਸਿ.

ਅਥ ਬ੍ਰਾਹ੍ਮਣੋ ਬ੍ਰਾਹ੍ਮਣਿਯਾ ਸਦ੍ਧਿਂ ਧੀਤਰਂ ਗਹੇਤ੍ਵਾ ਤਂ ਠਾਨਂ ਆਗਚ੍ਛਨ੍ਤੋ ਅਨ੍ਤੋਗਾਮਂ ਪਵਿਟ੍ਠਕਾਲੇ ਆਗਤਤ੍ਤਾ ਇਤੋ ਚਿਤੋ ਚ ਓਲੋਕੇਨ੍ਤੋ ਦਸਬਲਂ ਅਦਿਸ੍ਵਾ ਬ੍ਰਾਹ੍ਮਣਿਂ ਪਰਿਭਾਸਤਿ – ‘‘ਤਵ ਕਾਰਣਂ ਭਦ੍ਦਕਂ ਨਾਮ ਨਤ੍ਥਿ, ਤਯਿ ਪਪਞ੍ਚਂ ਕਰੋਨ੍ਤਿਯਾਵ ਸੋ ਪਬ੍ਬਜਿਤੋ ਨਿਕ੍ਖਮਿਤ੍ਵਾ ਗਤੋ’’ਤਿ. ਬ੍ਰਾਹ੍ਮਣ, ਗਤੋ ਤਾਵ ਹੋਤੁ, ਕਤਰਦਿਸਾਭਾਗੇਨ ਗਤੋਤਿ? ਇਮਿਨਾ ਦਿਸਾਭਾਗੇਨਾਤਿ ਸਤ੍ਥੁ ਗਤਟ੍ਠਾਨਂ ਓਲੋਕੇਨ੍ਤੋਵ ਪਦਚੇਤਿਯਾਨਿ ਦਿਸ੍ਵਾ ‘‘ਭਦ੍ਦੇ ਇਮਾਨਿ ਤਸ੍ਸ ਪੁਰਿਸਸ੍ਸ ਪਦਾਨਿ, ਇਤੋ ਗਤੋ ਭਵਿਸ੍ਸਤੀ’’ਤਿ ਆਹ. ਅਥ, ਬ੍ਰਾਹ੍ਮਣੀ, ਸਤ੍ਥੁ ਪਦਚੇਤਿਯਂ ਦਿਸ੍ਵਾ ਚਿਨ੍ਤੇਸਿ – ‘‘ਬਾਲੋ ਵਤਾਯਂ ਬ੍ਰਾਹ੍ਮਣੋ ਅਤ੍ਤਨੋ ਗਨ੍ਥਮਤ੍ਤਸ੍ਸਾਪਿ ਅਤ੍ਥਂ ਨ ਜਾਨਾਤੀ’’ਤਿ ਤੇਨ ਸਦ੍ਧਿਂ ਪਰਿਹਾਸਂ ਕਰੋਨ੍ਤੀ ਆਹ – ‘‘ਯਾਵ ਬਾਲੋ ਚਾਸਿ, ਬ੍ਰਾਹ੍ਮਣ, ਏਵਰੂਪਸ੍ਸ ਨਾਮ ਪੁਰਿਸਸ੍ਸ ਧੀਤਰਂ ਦਸ੍ਸਾਮੀਤਿ ਵਦਸਿ. ਰਾਗੇਨ ਹਿ ਰਤ੍ਤਸ੍ਸ ਦੋਸੇਨ ਦੁਟ੍ਠਸ੍ਸ ਮੋਹੇਨ ਮੂਲ਼੍ਹਸ੍ਸ ਪੁਰਿਸਸ੍ਸ ਪਦਂ ਨਾਮ ਏਵਰੂਪਂ ਨ ਹੋਤਿ. ਲੋਕੇ ਪਨ ਵਿਵਟਚ੍ਛਦਸ੍ਸ ਸਬ੍ਬਞ੍ਞੁਬੁਦ੍ਧਸ੍ਸ ਏਤਂ ਪਦਂ’’ ਪਸ੍ਸ, ਬ੍ਰਾਹ੍ਮਣ –

‘‘ਰਤ੍ਤਸ੍ਸ ਹਿ ਉਕ੍ਕੁਟਿਕਂ ਪਦਂ ਭਵੇ,

ਦੁਟ੍ਠਸ੍ਸ ਹੋਤਿ ਅਵਕਡ੍ਢਿਤਂ ਪਦਂ;

ਮੂਲ਼੍ਹਸ੍ਸ ਹੋਤਿ ਸਹਸਾਨੁਪੀਲ਼ਿਤਂ,

ਵਿਵਟਚ੍ਛਦਸ੍ਸ ਇਦਮੀਦਿਸਂ ਪਦ’’ਨ੍ਤਿ.

ਸੋ ਬ੍ਰਾਹ੍ਮਣਿਯਾ ਏਤ੍ਤਕਂ ਕਥੇਨ੍ਤਿਯਾਪਿ ਅਸੁਤ੍ਵਾ ‘‘ਤ੍ਵਂ ਨਾਮ ਚਣ੍ਡਾ ਮੁਖਰਾ’’ਤਿ ਆਹ. ਤੇਸਂ ਦ੍ਵਿਨ੍ਨਮ੍ਪਿ ਅਞ੍ਞਮਞ੍ਞਂ ਵਿਵਾਦਂ ਕਰੋਨ੍ਤਾਨਂਯੇਵ ਸਤ੍ਥਾ ਪਿਣ੍ਡਾਯ ਚਰਿਤ੍ਵਾ ਸਦ੍ਧਿਂ ਭਿਕ੍ਖੁਸਙ੍ਘੇਨ ਕਤਭਤ੍ਤਕਿਚ੍ਚੋ ਬ੍ਰਾਹ੍ਮਣਸ੍ਸ ਦਸ੍ਸਨੂਪਚਾਰੇਨੇਵ ਨਿਕ੍ਖਮਿ. ਬ੍ਰਾਹ੍ਮਣੋ ਸਤ੍ਥਾਰਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ਬ੍ਰਾਹ੍ਮਣਿਂ ਅਪਸਾਦੇਤ੍ਵਾ ‘‘ਅਯਂ ਸੋ ਪੁਰਿਸੋ’’ਤਿ ਹਟ੍ਠਪਹਟ੍ਠੋ ਦਸਬਲਸ੍ਸ ਪੁਰਤੋ ਠਤ੍ਵਾ ‘‘ਭੋ ਪਬ੍ਬਜਿਤ, ਅਹਂ ਪਾਤੋਵ ਪਟ੍ਠਾਯ ਤਂ ਪਰਿਯੇਸਨ੍ਤੋ ਚਰਾਮਿ, ਇਮਸ੍ਮਿਂ ਜਮ੍ਬੁਦੀਪੇ ਮਮ ਧੀਤਾਯ ਸਮਾਨਰੂਪਾ ਇਤ੍ਥੀ ਨਾਮ ਨਤ੍ਥਿ, ਪੁਰਿਸੋਪਿ ਤਯਾ ਸਦ੍ਧਿਂ ਸਮਾਨਰੂਪੋ ਨਾਮ ਨਤ੍ਥਿ, ਮਮ ਧੀਤਰਂ ਤੁਯ੍ਹਂ ਪੋਸਨਤ੍ਥਾਯ ਦਮ੍ਮਿ, ਗਣ੍ਹਾਹਿ ਨ’’ਨ੍ਤਿ ਆਹ. ਅਥ ਨਂ ਸਤ੍ਥਾ ‘‘ਅਹਂ, ਬ੍ਰਾਹ੍ਮਣ, ਕਾਮਗ੍ਗਵਾਸਿਨਿਯੋ ਉਤ੍ਤਮਰੂਪਧਰਾ ਨਾਨਾਵਣ੍ਣਂ ਕਥਂ ਕਥੇਨ੍ਤਿਯੋ ਮਮ ਪਲੋਭਨਤ੍ਥਮੇਵ ਆਗਨ੍ਤ੍ਵਾ ਸਨ੍ਤਿਕੇ ਠਿਤਾ ਦੇਵਧੀਤਾਪਿ ਨ ਇਚ੍ਛਿਂ, ਕਿਮਙ੍ਗਂ ਪਨ ਇਮਂ ਗਣ੍ਹਿਸ੍ਸਾਮੀ’’ਤਿ ਵਤ੍ਵਾ ਇਮਂ ਗਾਥਮਾਹ –

‘‘ਦਿਸ੍ਵਾਨ ਤਣ੍ਹਂ ਅਰਤਿਂ ਰਗਞ੍ਚ,

ਨਾਹੋਸਿ ਛਨ੍ਦੋ ਅਪਿ ਮੇਥੁਨਸ੍ਮਿਂ;

ਕਿਂਮੇਵਿਦਂ ਮੁਤ੍ਤਕਰੀਸਪੁਣ੍ਣਂ,

ਪਾਦਾਪਿ ਨਂ ਸਮ੍ਫੁਸਿਤੁਂ ਨ ਇਚ੍ਛੇ’’ਤਿ. (ਸੁ. ਨਿ. ੮੪੧);

ਮਾਗਣ੍ਡਿਯਾ ਚਿਨ੍ਤੇਸਿ – ‘‘ਅਨਤ੍ਥਿਕੇਨ ਨਾਮ ‘ਅਲ’ਨ੍ਤਿ ਵਤ੍ਤੁਮੇਵ ਵਟ੍ਟਤਿ. ਅਯਂ ਪਨ ਮਮ ਸਰੀਰਂ ਮੁਤ੍ਤਕਰੀਸਪੁਣ੍ਣਂ ਨਾਮ ਕਤ੍ਵਾ ‘ਪਾਦਾਪਿ ਨਂ ਸਮ੍ਫੁਸਿਤੁਂ ਨ ਇਚ੍ਛੇ’ਤਿ ਅਵੋਚ, ਏਕਂ ਇਸ੍ਸਰਿਯਟ੍ਠਾਨਂ ਲਭਨ੍ਤੀ ਅਨ੍ਤਰਮੇਵਸ੍ਸ ਪਸ੍ਸਿਸ੍ਸਾਮੀ’’ਤਿ ਆਘਾਤਂ ਬਨ੍ਧਿ. ਸਤ੍ਥਾ ਤਂ ਅਮਨਸਿਕਤ੍ਵਾ ਚਰਿਯਵਸੇਨ ਬ੍ਰਾਹ੍ਮਣਸ੍ਸ ਧਮ੍ਮਦੇਸਨਂ ਆਰਭਿ. ਦੇਸਨਾਪਰਿਯੋਸਾਨੇ ਉਭੋਪਿ ਜਾਯਮ੍ਪਤਿਕਾ ਅਨਾਗਾਮਿਫਲੇ ਪਤਿਟ੍ਠਾਯ ‘‘ਇਦਾਨਿ ਅਮ੍ਹਾਕਂ ਘਰਾਵਾਸੇਨ ਅਤ੍ਥੋ ਨਤ੍ਥੀ’’ਤਿ ਧੀਤਰਂ ਮਾਗਣ੍ਡਿਯਂ ਚੂਲ਼ਪਿਤਰਂ ਸਮ੍ਪਟਿਚ੍ਛਾਪੇਤ੍ਵਾ ਉਭੋਪਿ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਂਸੁ. ਅਥ ਰਾਜਾ ਉਦੇਨੋ ਚੂਲ਼ਮਾਗਣ੍ਡਿਯੇਨ ਸਦ੍ਧਿਂ ਵੋਹਾਰਂ ਕਤ੍ਵਾ ਮਾਗਣ੍ਡਿਯਦਾਰਿਕਂ ਰਾਜਾਨੁਭਾਵੇਨ ਗੇਹਂ ਆਨੇਤ੍ਵਾ ਅਭਿਸੇਕਂ ਕਤ੍ਵਾ ਤਸ੍ਸਾ ਪਞ੍ਚਮਾਤੁਗਾਮਸਤਪਰਿਵਾਰਾਯ ਵਸਨਟ੍ਠਾਨਂ ਵਿਸੁਂ ਪਾਸਾਦਂ ਅਦਾਸਿ.

ਸਤ੍ਥਾਪਿ ਖੋ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਕੋਸਮ੍ਬਿਨਗਰਂ ਸਮ੍ਪਾਪੁਣਿ. ਸੇਟ੍ਠਿਨੋ ਸਤ੍ਥੁ ਆਗਮਨਂ ਸੁਤ੍ਵਾ ਪਚ੍ਚੁਗ੍ਗਮਨਂ ਕਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨਾ ਭਗਵਨ੍ਤਂ ਏਤਦਵੋਚੁਂ – ‘‘ਇਮੇ, ਭਨ੍ਤੇ, ਤਯੋ ਵਿਹਾਰਾ ਤੁਮ੍ਹੇ ਉਦ੍ਦਿਸ੍ਸ ਕਤਾ, ਪਟਿਗ੍ਗਣ੍ਹਥ, ਭਨ੍ਤੇ, ਵਿਹਾਰੇ ਚਾਤੁਦ੍ਦਿਸਸ੍ਸ ਸਙ੍ਘਸ੍ਸ ਸਙ੍ਗਹਤ੍ਥਾਯਾ’’ਤਿ. ਪਟਿਗ੍ਗਹੇਸਿ ਭਗਵਾ ਵਿਹਾਰੇ. ਤੇਪਿ ਸੇਟ੍ਠਿਨੋ ਸਤ੍ਥਾਰਂ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਅਭਿਵਾਦੇਤ੍ਵਾ ਘਰਂ ਅਗਮਂਸੁ.

ਮਾਗਣ੍ਡਿਯਾਪਿ ਖੋ ਸਤ੍ਥੁ ਆਗਤਭਾਵਂ ਸੁਤ੍ਵਾ ਛਿਨ੍ਨਭਿਨ੍ਨਕੇ ਧੁਤ੍ਤੇ ਪਕ੍ਕੋਸਾਪੇਤ੍ਵਾ ਤੇਸਂ ਲਞ੍ਜਂ ਦਤ੍ਵਾ ‘‘ਤੁਮ੍ਹੇ ਸਮਣਂ ਗੋਤਮਂ ਇਮਿਨਾ ਇਮਿਨਾ ਚ ਨਿਯਾਮੇਨ ਅਕ੍ਕੋਸਥਾ’’ਤਿ ਵਤ੍ਵਾ ਉਯ੍ਯੋਜੇਸਿ. ਤੇ ਸਤ੍ਥੁ ਅਨ੍ਤੋਗਾਮਂ ਪਵਿਸਨਵੇਲਾਯ ਸਪਰਿਵਾਰਂ ਸਤ੍ਥਾਰਂ ਨਾਨਾਵਿਧੇਹਿ ਅਕ੍ਕੋਸੇਹਿ ਅਕ੍ਕੋਸਿਂਸੁ. ਆਯਸ੍ਮਾ ਆਨਨ੍ਦੋ ਸਤ੍ਥਾਰਂ ਆਹ – ‘‘ਭਨ੍ਤੇ, ਏਵਰੂਪੇ ਅਕ੍ਕੋਸਨਟ੍ਠਾਨੇ ਨ ਵਸਿਸ੍ਸਾਮ, ਅਞ੍ਞਂ ਨਗਰਂ ਗਚ੍ਛਾਮਾ’’ਤਿ. ਸਤ੍ਥਾ, ‘‘ਆਨਨ੍ਦ, ਤਥਾਗਤਾ ਨਾਮ ਅਟ੍ਠਹਿ ਲੋਕਧਮ੍ਮੇਹਿ ਨ ਕਮ੍ਪਨ੍ਤਿ, ਅਯਮ੍ਪਿ ਸਦ੍ਦੋ ਸਤ੍ਤਾਹਂ ਨਾਤਿਕ੍ਕਮਿਸ੍ਸਤਿ, ਅਕ੍ਕੋਸਕਾਨਂਯੇਵ ਉਪਰਿ ਪਤਿਸ੍ਸਤਿ, ਤ੍ਵਂ ਮਾ ਵਿਤਕ੍ਕਯਿਤ੍ਥਾ’’ਤਿ. ਤੇਪਿ ਤਯੋ ਨਗਰਸੇਟ੍ਠਿਨੋ ਮਹਾਸਕ੍ਕਾਰੇਨ ਭਗਵਨ੍ਤਂ ਪਵੇਸੇਤ੍ਵਾ ਮਹਾਦਾਨਂ ਅਦਂਸੁ. ਤੇਸਂ ਅਪਰਾਪਰਂ ਦਾਨਂ ਦਦਨ੍ਤਾਨਂਯੇਵ ਮਾਸੋ ਅਤਿਕ੍ਕਮਿ, ਅਥ ਨੇਸਂ ਏਤਦਹੋਸਿ – ‘‘ਬੁਦ੍ਧਾ ਨਾਮ ਸਬ੍ਬਲੋਕਂ ਅਨੁਕਮ੍ਪਮਾਨਾ ਉਪ੍ਪਜ੍ਜਨ੍ਤਿ, ਅਞ੍ਞੇਸਮ੍ਪਿ ਓਕਾਸਂ ਦਸ੍ਸਾਮਾ’’ਤਿ. ਤਤੋ ਤੇ ਕੋਸਮ੍ਬਿਨਗਰਵਾਸਿਨੋਪਿ ਜਨਸ੍ਸ ਓਕਾਸਂ ਅਕਂਸੁ. ਤਤੋ ਪਟ੍ਠਾਯ ਨਾਗਰਾਪਿ ਵੀਥਿਸਭਾਗੇਨ ਗਣਸਭਾਗੇਨ ਮਹਾਦਾਨਂ ਦੇਨ੍ਤਿ.

ਅਥੇਕਦਿਵਸਂ ਸਤ੍ਥਾ ਭਿਕ੍ਖੁਸਙ੍ਘਪਰਿਵੁਤੋ ਮਾਲਾਕਾਰਕਜੇਟ੍ਠਕਸ੍ਸ ਗੇਹੇ ਨਿਸੀਦਿ. ਤਸ੍ਮਿਂ ਖਣੇ ਸਾਮਾਵਤਿਯਾ ਉਪਟ੍ਠਾਯਿਕਾ ਖੁਜ੍ਜੁਤ੍ਤਰਾ ਅਟ੍ਠ ਕਹਾਪਣੇ ਆਦਾਯ ਮਾਲਤ੍ਥਾਯ ਤਂ ਗੇਹਂ ਅਗਮਾਸਿ. ਮਾਲਾਕਾਰਜੇਟ੍ਠਕੋ ਤਂ ਦਿਸ੍ਵਾ, ‘‘ਅਮ੍ਮ ਉਤ੍ਤਰੇ, ਅਜ੍ਜ ਤੁਯ੍ਹਂ ਪੁਪ੍ਫਾਨਿ ਦਾਤੁਂ ਖਣੋ ਨਤ੍ਥਿ, ਅਹਂ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਰਿਵਿਸਾਮਿ. ਤ੍ਵਮ੍ਪਿ ਪਰਿਵੇਸਨਾਯ ਸਹਾਯਿਕਾ ਹੋਹਿ, ਏਵਂ ਇਤੋ ਪਰੇਸਂ ਵੇਯ੍ਯਾਵਚ੍ਚਕਰਣਤੋ ਮੁਚ੍ਚਿਸ੍ਸਤੀ’’ਤਿ ਆਹ. ਤਤੋ ਖੁਜ੍ਜੁਤ੍ਤਰਾ ਅਤ੍ਤਨਾ ਲਦ੍ਧਂ ਭੋਜਨਂ ਭੁਞ੍ਜਿਤ੍ਵਾ ਬੁਦ੍ਧਾਨਂ ਭਤ੍ਤਗ੍ਗੇ ਵੇਯ੍ਯਾਵਚ੍ਚਂ ਅਕਾਸਿ. ਸਾ ਸਤ੍ਥਾਰਾ ਉਪਨਿਸਿਨ੍ਨਕਥਾਵਸੇਨ ਕਥਿਤਂ ਧਮ੍ਮਂ ਸਬ੍ਬਮੇਵ ਉਗ੍ਗਣ੍ਹਿ. ਅਨੁਮੋਦਨਂ ਪਨ ਸੁਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ.

ਸਾ ਅਞ੍ਞੇਸੁ ਦਿਵਸੇਸੁ ਚਤ੍ਤਾਰੋਵ ਕਹਾਪਣੇ ਦਤ੍ਵਾ ਪੁਪ੍ਫਾਨਿ ਗਹੇਤ੍ਵਾ ਗਚ੍ਛਤਿ, ਤਸ੍ਮਿਂ ਪਨ ਦਿਵਸੇ ਦਿਟ੍ਠਸਚ੍ਚਭਾਵੇਨ ਪਰਸਨ੍ਤਕੇ ਚਿਤ੍ਤਂ ਅਨੁਪ੍ਪਾਦੇਤ੍ਵਾ ਸਬ੍ਬੇਵ ਅਟ੍ਠ ਕਹਾਪਣੇ ਦਤ੍ਵਾ ਪਚ੍ਛਿਂ ਪੂਰੇਤ੍ਵਾ ਪੁਪ੍ਫਾਨਿ ਆਦਾਯ ਸਾਮਾਵਤਿਯਾ ਸਨ੍ਤਿਕਂ ਅਗਮਾਸਿ. ਅਥ ਨਂ ਸਾ ਪੁਚ੍ਛਿ – ‘‘ਅਮ੍ਮ ਉਤ੍ਤਰੇ, ਤ੍ਵਂ ਅਞ੍ਞੇਸੁ ਦਿਵਸੇਸੁ ਨ ਬਹੂਨਿ ਪੁਪ੍ਫਾਨਿ ਆਹਰਸਿ, ਅਜ੍ਜ ਪਨ ਬਹੁਕਾਨਿ, ਕਿਂ ਨੋ ਰਾਜਾ ਉਤ੍ਤਰਿਤਰਂ ਪਸਨ੍ਨੋ’’ਤਿ? ਸਾ ਮੁਸਾਵਾਦੇ ਅਭਬ੍ਬਤਾਯ ਅਤੀਤੇ ਅਤ੍ਤਨਾ ਕਤਂ ਅਨਿਗੁਹਿਤ੍ਵਾ ਸਬ੍ਬਂ ਕਥੇਸਿ. ‘‘ਅਥ ਕਸ੍ਮਾ ਅਜ੍ਜ ਬਹੂਨਿ ਪੁਪ੍ਫਾਨਿ ਆਹਰਸੀ’’ਤਿ ਵੁਤ੍ਤਾ ਚ ਏਵਮਾਹ – ‘‘ਅਹਂ ਅਜ੍ਜ ਦਸਬਲਸ੍ਸ ਧਮ੍ਮਂ ਸੁਤ੍ਵਾ ਅਮਤਂ ਸਚ੍ਛਾਕਾਸਿਂ, ਤਸ੍ਮਾ ਤੁਮ੍ਹੇ ਨ ਵਞ੍ਚੇਮੀ’’ਤਿ. ਤਂ ਸੁਤ੍ਵਾ, ‘‘ਅਮ੍ਮ ਉਤ੍ਤਰੇ, ਤਯਾ ਲਦ੍ਧਂ ਅਮਤਧਮ੍ਮਂ ਅਮ੍ਹਾਕਮ੍ਪਿ ਦੇਹੀ’’ਤਿ ਸਬ੍ਬਾਵ ਹਤ੍ਥਂ ਪਸਾਰਯਿਂਸੁ. ਅਯ੍ਯੇ, ਏਵਂ ਦਾਤੁਂ ਨ ਸਕ੍ਕਾ, ਅਹਂ ਪਨ ਸਤ੍ਥਾਰਾ ਕਥਿਤਨਿਯਾਮੇਨ ਤੁਮ੍ਹਾਕਂ ਧਮ੍ਮਂ ਦੇਸੇਸ੍ਸਾਮਿ, ਤੁਮ੍ਹੇ ਅਤ੍ਤਨੋ ਹੇਤੁਮ੍ਹਿ ਸਤਿ ਤਂ ਧਮ੍ਮਂ ਲਭਿਸ੍ਸਥਾਤਿ. ਤੇਨ ਹਿ, ਅਮ੍ਮ ਉਤ੍ਤਰੇ, ਕਥੇਹੀਤਿ. ‘‘ਏਵਂ ਕਥੇਤੁਂ ਨ ਸਕ੍ਕਾ, ਮਯ੍ਹਂ ਉਚ੍ਚਂ ਆਸਨਂ ਪਞ੍ਞਾਪੇਤ੍ਵਾ ਤੁਮ੍ਹੇ ਨੀਚਾਸਨੇਸੁ ਨਿਸੀਦਥਾ’’ਤਿ ਆਹ. ਤਾ ਪਞ੍ਚਸਤਾਪਿ ਇਤ੍ਥਿਯੋ ਖੁਜ੍ਜੁਤ੍ਤਰਾਯ ਉਚ੍ਚਾਸਨਂ ਦਤ੍ਵਾ ਸਯਂ ਨੀਚਾਸਨਾਨਿ ਗਹੇਤ੍ਵਾ ਨਿਸੀਦਿਂਸੁ. ਖੁਜ੍ਜੁਤ੍ਤਰਾਪਿ ਸੇਕ੍ਖਪਟਿਸਮ੍ਭਿਦਾਸੁ ਠਤ੍ਵਾ ਤਾਸਂ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਸਾਮਾਵਤਿਂ ਜੇਟ੍ਠਿਕਂ ਕਤ੍ਵਾ ਸਬ੍ਬਾਵ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ. ਤਤੋ ਪਟ੍ਠਾਯ ਖੁਜ੍ਜੁਤ੍ਤਰਂ ਵੇਯ੍ਯਾਵਚ੍ਚਕਰਣਤੋ ਅਪਨੇਤ੍ਵਾ ‘‘ਤ੍ਵਂ ਸਤ੍ਥੁ ਧਮ੍ਮਕਥਂ ਸੁਤ੍ਵਾ ਆਹਰਿਤ੍ਵਾ ਅਮ੍ਹੇ ਸਾਵੇਹੀ’’ਤਿ ਆਹਂਸੁ. ਖੁਜ੍ਜੁਤ੍ਤਰਾਪਿ ਤਤੋ ਪਟ੍ਠਾਯ ਤਥਾ ਅਕਾਸਿ.

ਕਸ੍ਮਾ ਪਨੇਸਾ ਦਾਸੀ ਹੁਤ੍ਵਾ ਨਿਬ੍ਬਤ੍ਤਾਤਿ? ਸਾ ਕਿਰ ਕਸ੍ਸਪਦਸਬਲਸ੍ਸ ਸਾਸਨੇ ਏਕਾਯ ਸਾਮਣੇਰਿਯਾ ਅਤ੍ਤਨੋ ਵੇਯ੍ਯਾਵਚ੍ਚਂ ਕਾਰੇਸਿ. ਤੇਨ ਕਮ੍ਮੇਨ ਪਞ੍ਚ ਜਾਤਿਸਤਾਨਿ ਪਰੇਸਂ ਦਾਸੀਯੇਵ ਹੁਤ੍ਵਾ ਨਿਬ੍ਬਤ੍ਤਿ. ਕਸ੍ਮਾ ਪਨ ਖੁਜ੍ਜਾ ਅਹੋਸੀਤਿ? ਅਨੁਪ੍ਪਨ੍ਨੇ ਕਿਰ ਬੁਦ੍ਧੇ ਅਯਂ ਬਾਰਾਣਸਿਰਞ੍ਞੋ ਗੇਹੇ ਵਸਨ੍ਤੀ ਏਕਂ ਰਾਜਕੁਲੂਪਕਂ ਪਚ੍ਚੇਕਬੁਦ੍ਧਂ ਖੁਜ੍ਜਧਾਤੁਕਂ ਦਿਸ੍ਵਾ ਅਤ੍ਤਨਾ ਸਹਵਾਸੀਨਂ ਮਾਤੁਗਾਮਾਨਂ ਪੁਰਤੋ ਪਰਿਹਾਸਂ ਕਰੋਨ੍ਤੀ ਖੁਜ੍ਜਾਕਾਰੇਨ ਵਿਚਰਿ. ਤਸ੍ਮਾ ਖੁਜ੍ਜਾ ਹੁਤ੍ਵਾ ਨਿਬ੍ਬਤ੍ਤਿ. ਕਿਂ ਪਨ ਕਤ੍ਵਾ ਸਾ ਪਞ੍ਞਵਨ੍ਤੀ ਜਾਤਾਤਿ? ਅਨੁਪ੍ਪਨ੍ਨੇ ਬੁਦ੍ਧੇ ਅਯਂ ਬਾਰਾਣਸਿਰਞ੍ਞੋ ਗੇਹੇ ਵਸਨ੍ਤੀ ਅਟ੍ਠ ਪਚ੍ਚੇਕਬੁਦ੍ਧੇ ਰਾਜਗੇਹਤੋ ਉਣ੍ਹਪਾਯਾਸਸ੍ਸ ਪੂਰਿਤੇ ਪਤ੍ਤੇ ਗਹੇਤ੍ਵਾ ਗਚ੍ਛਨ੍ਤੇ ਦਿਸ੍ਵਾ ‘‘ਏਤ੍ਥ ਠਪੇਤ੍ਵਾ ਗਚ੍ਛਥ, ਭਨ੍ਤੇ’’ਤਿ ਅਟ੍ਠ ਸੁਵਣ੍ਣਕਟਕੇ ਓਮੁਞ੍ਚਿਤ੍ਵਾ ਅਦਾਸਿ. ਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੇਨ ਪਞ੍ਞਵਨ੍ਤੀ ਹੁਤ੍ਵਾ ਨਿਬ੍ਬਤ੍ਤਿ.

ਅਥ ਖੋ ਤਾ ਸਾਮਾਵਤਿਯਾ ਪਰਿਵਾਰਾ ਪਞ੍ਚਸਤਾ ਇਤ੍ਥਿਯੋ ਪਟਿਵਿਦ੍ਧਸਚ੍ਚਾਪਿ ਸਮਾਨਾ ਰਞ੍ਞੋ ਅਸ੍ਸਦ੍ਧਭਾਵੇਨ ਕਾਲੇਨ ਕਾਲਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਬੁਦ੍ਧਦਸ੍ਸਨਂ ਨ ਲਭਨ੍ਤਿ. ਤਸ੍ਮਾ ਦਸਬਲੇ ਅਨ੍ਤਰਵੀਥਿਂ ਪਟਿਪਨ੍ਨੇ ਵਾਤਪਾਨੇਸੁ ਨਪ੍ਪਹੋਨ੍ਤੇਸੁ ਅਤ੍ਤਨੋ ਅਤ੍ਤਨੋ ਗਬ੍ਭੇਸੁ ਛਿਦ੍ਦਂ ਕਤ੍ਵਾ ਤੇਹਿ ਓਲੋਕੇਨ੍ਤਿ. ਅਥੇਕਦਿਵਸਂ ਮਾਗਣ੍ਡਿਯਾ ਅਤ੍ਤਨੋ ਪਾਸਾਦਤਲਤੋ ਨਿਕ੍ਖਮਿਤ੍ਵਾ ਚਙ੍ਕਮਮਾਨਾ ਤਾਸਂ ਵਸਨਟ੍ਠਾਨਂ ਗਨ੍ਤ੍ਵਾ ਗਬ੍ਭਚ੍ਛਿਦ੍ਦਂ ਦਿਸ੍ਵਾ ‘‘ਕਿਮਿਦ’’ਨ੍ਤਿ ਪੁਚ੍ਛਿ. ਤਾਹਿ ਤਸ੍ਸਾ ਸਤ੍ਥਰਿ ਬਦ੍ਧਾਘਾਤਤਂ ਅਜਾਨਨ੍ਤੀਹਿ – ‘‘ਸਤ੍ਥਾ ਇਮਂ ਨਗਰਂ ਆਗਤੋ, ਮਯਂ ਏਤ੍ਥ ਠਤ੍ਵਾ ਸਤ੍ਥਾਰਂ ਪਸ੍ਸਾਮ ਚੇਵ ਪੂਜੇਮ ਚਾ’’ਤਿ ਵੁਤ੍ਤੇ ‘‘ਇਦਾਨਿਸ੍ਸ ਕਤ੍ਤਬ੍ਬਂ ਜਾਨਿਸ੍ਸਾਮਿ, ਇਮਾਪਿ ਤਸ੍ਸ ਉਪਟ੍ਠਾਯਿਕਾ, ਇਮਾਸਮ੍ਪਿ ਕਤ੍ਤਬ੍ਬਂ ਜਾਨਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਗਨ੍ਤ੍ਵਾ ਰਞ੍ਞਾ ਸਦ੍ਧਿਂ ਰਹੋਗਤਕਾਲੇ, ‘‘ਮਹਾਰਾਜ, ਸਾਮਾਵਤਿਮਿਸ੍ਸਕਾਨਂ ਬਹਿਦ੍ਧਾ ਪਤ੍ਥਨਾ ਅਤ੍ਥਿ, ਕਤਿਪਾਹੇਨੇਵ ਤੇ ਜੀਵਿਤਂ ਮਾਰੇਸ੍ਸਨ੍ਤਿ, ਸਾਮਾਵਤੀ, ਸਪਰਿਵਾਰਾ ਤੁਮ੍ਹੇਸੁ ਸਿਨੇਹਂ ਵਾ ਪੇਮਂ ਵਾ ਨ ਕਰੋਤਿ, ਸਮਣਂ ਪਨ ਗੋਤਮਂ ਅਨ੍ਤਰਵੀਥਿਯਾ ਗਚ੍ਛਨ੍ਤਂ ਦਿਸ੍ਵਾ ਵਾਤਪਾਨੇਸੁ ਅਪ੍ਪਹੋਨ੍ਤੇਸੁ ਤਾਨਿ ਖਣ੍ਡਿਤ੍ਵਾਪਿ ਓਕਾਸਂ ਕਤ੍ਵਾ ਓਲੋਕੇਨ੍ਤੀ’’ਤਿ ਆਹ. ਰਾਜਾ ‘‘ਨ ਤਾ ਏਵਰੂਪਂ ਕਰਿਸ੍ਸਨ੍ਤੀ’’ਤਿ ਨ ਸਦ੍ਦਹਤਿ. ਪੁਨ ਵੁਤ੍ਤੇਪਿ ਨ ਸਦ੍ਦਹਤਿਯੇਵ. ਅਥ ਨਂ ਤਿਕ੍ਖਤ੍ਤੁਂ ਵੁਤ੍ਤੇਪਿ ਅਸ੍ਸਦ੍ਦਹਨ੍ਤਂ ‘‘ਸਚੇ ਮੇ ਵਚਨਂ ਨ ਸਦ੍ਦਹਸਿ, ਤਾਸਂ ਵਸਨਟ੍ਠਾਨਂ ਗਨ੍ਤ੍ਵਾ ਉਪਧਾਰੇਹਿ, ਮਹਾਰਾਜਾ’’ਤਿ ਆਹ. ਰਾਜਾ ਗਨ੍ਤ੍ਵਾ ਗਬ੍ਭੇਸੁ ਛਿਦ੍ਦਂ ਦਿਸ੍ਵਾ ‘‘ਇਦਂ ਕਿ’’ਨ੍ਤਿ ਪੁਚ੍ਛਿਤ੍ਵਾ ਤਸ੍ਮਿਂ ਅਤ੍ਥੇ ਆਰੋਚਿਤੇ ਤਾਸਂ ਅਕ੍ਕੁਜ੍ਝਿਤ੍ਵਾ ਕਿਞ੍ਚਿ ਅਵਤ੍ਵਾ ਛਿਦ੍ਦਾਨਿ ਪਿਦਹਾਪੇਸਿ. ਰਾਜਾ ਤਤੋ ਪਟ੍ਠਾਯ ਤਾਸਂ ਪਾਸਾਦੇ ਉਦ੍ਧਚ੍ਛਿਦ੍ਦਕਜਾਲਵਾਤਪਾਨਾਨਿ ਕਾਰੇਸਿ.

ਸਾ ਤੇਨ ਕਾਰਣੇਨ ਰਾਜਾਨਂ ਕੋਪੇਤੁਂ ਅਸਕ੍ਕੋਨ੍ਤੀ, ‘‘ਦੇਵ, ਏਤਾਸਂ ਤੁਮ੍ਹੇਸੁ ਪੇਮਂ ਅਤ੍ਥਿ ਵਾ ਨਤ੍ਥਿ ਵਾਤਿ ਜਾਨਿਸ੍ਸਾਮ, ਅਟ੍ਠ ਕੁਕ੍ਕੁਟੇ ਪੇਸੇਤ੍ਵਾ ਤੁਮ੍ਹਾਕਂ ਅਤ੍ਥਾਯ ਪਚਾਪੇਥਾ’’ਤਿ ਆਹ. ਰਾਜਾ ਤਸ੍ਸਾ ਵਚਨਂ ਸੁਤ੍ਵਾ ‘‘ਇਮੇ ਪਚਿਤ੍ਵਾ ਪੇਸੇਤੂ’’ਤਿ ਸਾਮਾਵਤਿਯਾ ਅਟ੍ਠ ਕੁਕ੍ਕੁਟੇ ਪਹਿਣਿ. ਸੋਤਾਪਨ੍ਨਾ ਅਰਿਯਸਾਵਿਕਾ ਜੀਵਮਾਨੇ ਕੁਕ੍ਕੁਟੇ ਕਿਂ ਪਚਿਸ੍ਸਤਿ, ਅਲਨ੍ਤਿ ਵਤ੍ਵਾ ਪਨ ਹਤ੍ਥੇਨਪਿ ਫੁਸਿਤੁਂ ਨ ਇਚ੍ਛਿ. ਮਾਗਣ੍ਡਿਯਾ ‘‘ਹੋਤੁ, ਮਹਾਰਾਜ, ਏਤੇਯੇਵ ਚ ਕੁਕ੍ਕੁਟੇ ਸਮਣਸ੍ਸ ਗੋਤਮਸ੍ਸ ਪਚਨਤ੍ਥਾਯ ਪੇਸੇਹੀ’’ਤਿ. ਰਾਜਾ ਤਥਾ ਅਕਾਸਿ. ਮਾਗਣ੍ਡਿਯਾ ਅਨ੍ਤਰਾਮਗ੍ਗੇਯੇਵ ਕੁਕ੍ਕੁਟੇ ਮਾਰਾਪੇਤ੍ਵਾ ‘‘ਇਮੇ ਕੁਕ੍ਕੁਟੇ ਪਚਾਪੇਤ੍ਵਾ ਸਮਣਸ੍ਸ ਗੋਤਮਸ੍ਸ ਦੇਤੂ’’ਤਿ ਪਹਿਣਿ. ਸਾ ਤੇਸਂ ਮਤਭਾਵੇਨ ਦਸਬਲਞ੍ਚ ਉਦ੍ਦਿਸ੍ਸ ਪਹਿਤਭਾਵੇਨ ਪਚਿਤ੍ਵਾ ਦਸਬਲਸ੍ਸ ਪੇਸੇਸਿ. ਮਾਗਣ੍ਡਿਯਾ ‘‘ਪਸ੍ਸ, ਮਹਾਰਾਜਾ’’ਤਿ ਵਤ੍ਵਾ ਏਤ੍ਤਕੇਨਪਿ ਰਾਜਾਨਂ ਕੋਪੇਤੁਂ ਨਾਸਕ੍ਖਿ.

ਅਯਂ ਪਨ ਉਦੇਨੋ ਤਾਸੁ ਏਕੇਕਿਸ੍ਸਾ ਵਸਨਟ੍ਠਾਨੇ ਸਤ੍ਤ ਸਤ੍ਤ ਦਿਵਸਾਨਿ ਵਸਿ. ਅਥਾਯਂ ਮਾਗਣ੍ਡਿਯਾ ਏਕਂ ਕਣ੍ਹਸਪ੍ਪਪੋਤਕਂ ਵੇਲ਼ੁਪਬ੍ਬੇ ਪਕ੍ਖਿਪਾਪੇਤ੍ਵਾ ਅਤ੍ਤਨੋ ਵਸਨਟ੍ਠਾਨੇ ਠਪੇਸਿ. ਰਞ੍ਞੋ ਚ ਯਤ੍ਥ ਕਤ੍ਥਚਿ ਗਚ੍ਛਨ੍ਤਸ੍ਸ ਹਤ੍ਥਿਕਨ੍ਤਵੀਣਂ ਆਦਾਯਯੇਵ ਗਮਨਂ ਆਚਿਣ੍ਣਂ, ਮਾਗਣ੍ਡਿਯਾ ਰਞ੍ਞੋ ਅਤ੍ਤਨੋ ਸਨ੍ਤਿਕਂ ਆਗਮਨਕਾਲੇ ਤਂ ਸਪ੍ਪਪੋਤਕਂ ਅਨ੍ਤੋਵੀਣਾਯ ਪਕ੍ਖਿਪਿਤ੍ਵਾ ਛਿਦ੍ਦਂ ਪਿਦਹਾਪੇਸਿ. ਅਥ ਨਂ ਸਾਮਾਵਤਿਯਾ ਸਨ੍ਤਿਕਂ ਗਮਨਕਾਲੇ, ‘‘ਮਹਾਰਾਜ, ਸਾਮਾਵਤੀ ਨਾਮ ਸਮਣਸ੍ਸ ਗੋਤਮਸ੍ਸ ਪਕ੍ਖਾ, ਤੁਮ੍ਹੇ ਨ ਗਣੇਤਿ. ਯਂ ਕਿਞ੍ਚਿ ਕਤ੍ਵਾ ਤੁਮ੍ਹਾਕਂ ਦੋਸਮੇਵ ਚਿਨ੍ਤੇਤਿ, ਅਪ੍ਪਮਤ੍ਤਾ ਹੋਥਾ’’ਤਿ ਆਹ. ਰਾਜਾ ਸਾਮਾਵਤਿਯਾ ਵਸਨਟ੍ਠਾਨੇ ਸਤ੍ਤਾਹਂ ਵੀਤਿਨਾਮੇਤ੍ਵਾ ਪੁਨ ਸਤ੍ਤਾਹੇ ਮਾਗਣ੍ਡਿਯਾਯ ਨਿਵੇਸਨਂ ਅਗਮਾਸਿ. ਸਾ ਤਸ੍ਮਿਂ ਆਗਚ੍ਛਨ੍ਤੇਯੇਵ ‘‘ਕਚ੍ਚਿ ਤੇ, ਮਹਾਰਾਜ, ਸਾਮਾਵਤੀ ਓਤਾਰਂ ਨ ਗਵੇਸਤੀ’’ਤਿ ਕਥੇਨ੍ਤੀ ਵਿਯ ਰਞ੍ਞੋ ਹਤ੍ਥਤੋ ਵੀਣਂ ਗਹੇਤ੍ਵਾ ਚਾਲੇਤ੍ਵਾ ‘‘ਕਿਂ ਨੁ ਖੋ, ਮਹਾਰਾਜ, ਏਤ੍ਥ ਅਬ੍ਭਨ੍ਤਰੇ ਵਿਚਰਤੀ’’ਤਿ ਵਤ੍ਵਾ ਸਪ੍ਪਸ੍ਸ ਨਿਕ੍ਖਮਨੋਕਾਸਂ ਕਤ੍ਵਾ ‘‘ਅਬ੍ਭੁਮ੍ਮੇ ਅਨ੍ਤੋ ਸਪ੍ਪੋ’’ਤਿ ਵੀਣਂ ਛਡ੍ਡੇਤ੍ਵਾ ਪਲਾਯਿ. ਤਸ੍ਮਿਂ ਕਾਲੇ ਰਾਜਾ ਪਦਿਤ੍ਤਂ ਵੇਣੁਵਨਂ ਵਿਯ ਪਕ੍ਖਿਤ੍ਤਲੋਣਂ ਉਦ੍ਧਨਂ ਵਿਯ ਚ ਦੋਸੇਨ ਤਟਤਟਾਯਨ੍ਤੋ ‘‘ਵੇਗੇਨ ਸਪਰਿਵਾਰਂ ਸਾਮਾਵਤਿਂ ਪਕ੍ਕੋਸਥਾ’’ਤਿ ਆਹ. ਰਾਜਪੁਰਿਸਾ ਗਨ੍ਤ੍ਵਾ ਪਕ੍ਕੋਸਿਂਸੁ.

ਸਾ ਰਞ੍ਞੋ ਕੁਦ੍ਧਭਾਵਂ ਞਤ੍ਵਾ ਸੇਸਮਾਤੁਗਾਮਾਨਂ ਸਞ੍ਞਮਦਾਸਿ. ‘‘ਰਾਜਾ ਤੁਮ੍ਹੇ ਘਾਤੇਤੁਕਾਮੋ ਪਕ੍ਕੋਸਤਿ, ਅਜ੍ਜ ਦਿਵਸਂ ਓਦਿਸ੍ਸਕੇਨ ਮੇਤ੍ਤਾਫਰਣੇਨ ਰਾਜਾਨਂ ਫਰਥਾ’’ਤਿ ਆਹ. ਰਾਜਾ ਤਾ ਇਤ੍ਥਿਯੋ ਪਕ੍ਕੋਸਾਪੇਤ੍ਵਾ ਸਬ੍ਬਾਵ ਪਟਿਪਾਟਿਯਾ ਠਪੇਤ੍ਵਾ ਮਹਾਧਨੁਂ ਆਦਾਯ ਵਿਸਪੀਤਕਣ੍ਡਂ ਸਨ੍ਨਯ੍ਹਿਤ੍ਵਾ ਧਨੁਂ ਪੂਰੇਤ੍ਵਾ ਅਟ੍ਠਾਸਿ. ਤਸ੍ਮਿਂ ਖਣੇ ਸਬ੍ਬਾਵ ਤਾ ਸਾਮਾਵਤਿਪ੍ਪਮੁਖਾ ਇਤ੍ਥਿਯੋ ਓਧਿਸੋ ਮੇਤ੍ਤਂ ਫਰਿਂਸੁ. ਰਾਜਾ ਕਣ੍ਡਂ ਨੇਵ ਖਿਪਿਤੁਂ ਨ ਅਪਨੇਤੁਂ ਸਕ੍ਕੋਤਿ, ਗਤ੍ਤੇਹਿ ਸੇਦਾ ਮੁਚ੍ਚਨ੍ਤਿ, ਸਰੀਰਂ ਵੇਧਤਿ, ਮੁਖਤੋ ਖੇਲ਼ੋ ਪਤਤਿ, ਗਹੇਤਬ੍ਬਗਹਣਂ ਨ ਪਸ੍ਸਤਿ. ਅਥ ਨਂ ਸਾਮਾਵਤੀ ‘‘ਕਿਂ, ਮਹਾਰਾਜ, ਕਿਲਮਸੀ’’ਤਿ ਆਹ. ਆਮ, ਦੇਵਿ, ਕਿਲਮਾਮਿ, ਅਵਸ੍ਸਯੋ ਮੇ ਹੋਹੀਤਿ. ਸਾਧੁ, ਮਹਾਰਾਜ, ਕਣ੍ਡਂ ਮਹਾਪਥਵਿਮੁਖਂ ਕਰੋਹੀਤਿ. ਰਾਜਾ ਤਥਾ ਅਕਾਸਿ. ਸਾ ‘‘ਰਞ੍ਞੋ ਹਤ੍ਥਤੋ ਕਣ੍ਡਂ ਮੁਚ੍ਚਤੂ’’ਤਿ ਅਧਿਟ੍ਠਾਸਿ. ਤਸ੍ਮਿਂ ਖਣੇ ਕਣ੍ਡਂ ਮੁਚ੍ਚਿ. ਰਾਜਾ ਤਂਖਣਂਯੇਵ ਉਦਕੇ ਨਿਮੁਜ੍ਜਿਤ੍ਵਾ ਆਗਮ੍ਮ ਅਲ੍ਲਕੇਸੋ ਅਲ੍ਲਵਤ੍ਥੋ ਸਾਮਾਵਤਿਯਾ ਪਾਦੇਸੁ ਪਤਿਤ੍ਵਾ ‘‘ਖਮ, ਦੇਵਿ, ਮਯ੍ਹਂ, ਭੇਦਕਾਨਂ ਮੇ ਵਚਨੇਨ ਅਨੁਪਧਾਰੇਤ੍ਵਾ ਏਤਂ ਕਤ’’ਨ੍ਤਿ ਆਹ. ਖਮਾਮਿ, ਦੇਵਾਤਿ. ‘‘ਸਾਧੁ, ਦੇਵਿ, ਏਵਂ ਤਯਾ ਮਯ੍ਹਂ ਖਮਿਤਂ ਨਾਮ ਹੋਤਿ. ਇਤੋ ਪਟ੍ਠਾਯ ਤੁਮ੍ਹਾਕਂ ਯਥਾਰੁਚਿਯਾ ਦਸਬਲਸ੍ਸ ਦਾਨਂ ਦੇਥ, ਪਚ੍ਛਾਭਤ੍ਤਂ ਵਿਹਾਰਂ ਗਨ੍ਤ੍ਵਾ ਧਮ੍ਮਕਥਂ ਸੁਣਾਥ, ਅਜ੍ਜ ਵੋ ਪਟ੍ਠਾਯ ਪਰਿਹਾਰਂ ਦਮ੍ਮੀਤਿ. ਤੇਨ ਹਿ, ਦੇਵ, ਅਜ੍ਜ ਪਟ੍ਠਾਯ ਏਕਂ ਭਿਕ੍ਖੁਂ ਯਾਚਿਤ੍ਵਾ ਆਨੇਥ, ਯੋ ਨੋ ਧਮ੍ਮਂ ਵਾਚੇਸ੍ਸਤੀਤਿ. ਰਾਜਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਯਾਚਨ੍ਤੋ ਆਨਨ੍ਦਤ੍ਥੇਰਂ ਲਭਿ. ਤਤੋ ਪਟ੍ਠਾਯ ਤਾ ਪਞ੍ਚਸਤਾ ਇਤ੍ਥਿਯੋ ਥੇਰਂ ਪਕ੍ਕੋਸਾਪੇਤ੍ਵਾ ਸਕ੍ਕਾਰਸਮ੍ਮਾਨਂ ਕਤ੍ਵਾ ਕਤਭਤ੍ਤਕਿਚ੍ਚਸ੍ਸ ਥੇਰਸ੍ਸ ਸਨ੍ਤਿਕੇ ਧਮ੍ਮਂ ਪਰਿਯਾਪੁਣਨ੍ਤਿ.

ਤਾ ਏਕਦਿਵਸਂ ਥੇਰਸ੍ਸ ਅਨੁਮੋਦਨਾਯ ਪਸਨ੍ਨਾ ਥੇਰਸ੍ਸ ਪਞ੍ਚ ਉਤ੍ਤਰਾਸਙ੍ਗਸਤਾਨਿ ਅਦਂਸੁ. ਥੇਰੋ ਕਿਰ ਪੁਬ੍ਬੇ ਤੁਨ੍ਨਵਾਯਕਾਲੇ ਏਕਸ੍ਸ ਪਚ੍ਚੇਕਬੁਦ੍ਧਸ੍ਸ ਏਕਾਯ ਸੂਚਿਯਾ ਸਦ੍ਧਿਂ ਹਤ੍ਥਤਲਮਤ੍ਤਂ ਚੋਲ਼ਖਣ੍ਡਂ ਅਦਾਸਿ. ਸੋ ਸੂਚਿਯਾ ਫਲੇਨ ਇਮਸ੍ਮਿਂ ਅਤ੍ਤਭਾਵੇ ਮਹਾਪਞ੍ਞੋ ਅਹੋਸਿ, ਚੋਲ਼ਖਣ੍ਡਸ੍ਸ ਫਲੇਨ ਇਮਿਨਾਵ ਨਿਯਾਮੇਨ ਪਞ੍ਚਸਤਕ੍ਖਤ੍ਤੁਂ ਦੁਸ੍ਸਾਨਿ ਪਟਿਲਭਿ.

ਤਤੋ ਮਾਗਣ੍ਡਿਯਾ ਅਞ੍ਞਂ ਕਾਤਬ੍ਬਂ ਅਪਸ੍ਸਨ੍ਤੀ ‘‘ਉਯ੍ਯਾਨਂ ਗਚ੍ਛਾਮ, ਮਹਾਰਾਜਾ’’ਤਿ ਆਹ. ਸਾਧੁ, ਦੇਵੀਤਿ. ਸਾ ਰਞ੍ਞੋ ਸਮ੍ਪਟਿਚ੍ਛਿਤਭਾਵਂ ਞਤ੍ਵਾ ਚੂਲ਼ਪਿਤਰਂ ਪਕ੍ਕੋਸਾਪੇਤ੍ਵਾ ਆਹ – ‘‘ਅਮ੍ਹਾਕਂ ਉਯ੍ਯਾਨਂ ਗਤਕਾਲੇ ਸਾਮਾਵਤਿਯਾ ਵਸਨਟ੍ਠਾਨਂ ਗਨ੍ਤ੍ਵਾ ਸਾਮਾਵਤਿਂ ਸਪਰਿਵਾਰਂ ਅਨ੍ਤੋਕਰਿਤ੍ਵਾ ‘ਰਞ੍ਞੋ ਆਣਾ’ਤਿ ਵਤ੍ਵਾ ਦ੍ਵਾਰਂ ਪਿਦਹਿਤ੍ਵਾ ਪਲਾਲੇਨ ਪਲਿਵੇਠੇਤ੍ਵਾ ਗੇਹੇ ਅਗ੍ਗਿਂ ਦੇਥਾ’’ਤਿ. ਮਾਗਣ੍ਡਿਯੋ ਤਸ੍ਸਾ ਵਚਨਂ ਸੁਤ੍ਵਾ ਤਥਾ ਅਕਾਸਿ. ਤਸ੍ਮਿਂ ਦਿਵਸੇ ਸਬ੍ਬਾਪਿ ਤਾ ਇਤ੍ਥਿਯੋ ਪੁਬ੍ਬੇ ਕਤਸ੍ਸ ਉਪਪੀਲ਼ਕਕਮ੍ਮਸ੍ਸਾਨੁਭਾਵੇਨ ਸਮਾਪਤ੍ਤਿਂ ਅਪ੍ਪੇਤੁਂ ਨਾਸਕ੍ਖਿਂਸੁ, ਏਕਪ੍ਪਹਾਰੇਨੇਵ ਭੁਸਮੁਟ੍ਠਿ ਵਿਯ ਝਾਯਿਂਸੁ. ਤਾਸਂ ਆਰਕ੍ਖਪੁਰਿਸਾ ਰਞ੍ਞੋ ਸਨ੍ਤਿਕਂ ਗਨ੍ਤ੍ਵਾ, ‘‘ਦੇਵ, ਇਦਂ ਨਾਮ ਕਰਿਂਸੂ’’ਤਿ ਆਚਿਕ੍ਖਿਂਸੁ.

ਰਾਜਾ ‘‘ਕੇਨ ਕਤ’’ਨ੍ਤਿ ਪਰਿਯੇਸਨ੍ਤੋ ਮਾਗਣ੍ਡਿਯਾਯ ਕਾਰਿਤਭਾਵਂ ਞਤ੍ਵਾ ਤਂ ਪਕ੍ਕੋਸਾਪੇਤ੍ਵਾ ‘‘ਭਦ੍ਦੇ, ਭਦ੍ਦਕਂ ਤਯਾ ਕਮ੍ਮਂ ਕਤਂ ਮਯਾ ਕਾਤਬ੍ਬਂ ਕਰੋਨ੍ਤਿਯਾ, ‘‘ਉਟ੍ਠਾਯ ਸਮੁਟ੍ਠਾਯ ਮਯ੍ਹਂ ਵਧਾਯ ਪਰਿਸਕ੍ਕਮਾਨਾ ਘਾਤਿਤਾ, ਪਸਨ੍ਨੋਸ੍ਮਿ, ਤੁਯ੍ਹਂ ਸਮ੍ਪਤ੍ਤਿਂ ਦਸ੍ਸਾਮੀਤਿ ਤਵ ਞਾਤਕੇ ਪਕ੍ਕੋਸਾਪੇਹੀ’’ਤਿ ਆਹ. ਸਾ ਰਞ੍ਞੋ ਕਥਂ ਸੁਤ੍ਵਾ ਅਞ੍ਞਾਤਕੇਪਿ ਞਾਤਕੇ ਕਤ੍ਵਾ ਪਕ੍ਕੋਸਾਪੇਸਿ. ਰਾਜਾ ਸਬ੍ਬੇਸਂ ਸਨ੍ਨਿਪਤਿਤਭਾਵਂ ਞਤ੍ਵਾ ਰਾਜਙ੍ਗਣੇ ਗਲਪ੍ਪਮਾਣੇਸੁ ਆਵਾਟੇਸੁ ਨਿਖਨਿਤ੍ਵਾ ਉਪਰਿ ਠਿਤਾਨਿ ਸੀਸਾਨਿ ਭਿਨ੍ਦਾਪੇਨ੍ਤੋ ਮਹਨ੍ਤੇਹਿ ਅਯਨਙ੍ਗਲੇਹਿ ਕਸਾਪੇਸਿ. ਮਾਗਣ੍ਡਿਯਮ੍ਪਿ ਖਣ੍ਡਾਖਣ੍ਡਿਕਂ ਛਿਨ੍ਦਾਪੇਤ੍ਵਾ ਪੂਵਪਚਨਕਟਾਹੇ ਪਚਾਪੇਸਿ.

ਕਿਂ ਪਨ ਸਾਮਾਵਤਿਯਾ ਸਪਰਿਵਾਰਾਯ ਅਗ੍ਗਿਨਾ ਝਾਪਨਕਮ੍ਮਨ੍ਤਿ? ਸਾ ਕਿਰ ਅਨੁਪ੍ਪਨ੍ਨੇ ਬੁਦ੍ਧੇ ਤੇਹੇਵ ਪਞ੍ਚਹਿ ਮਾਤੁਗਾਮਸਤੇਹਿ ਸਦ੍ਧਿਂ ਗਙ੍ਗਾਯਂ ਕੀਲ਼ਿਤ੍ਵਾ ਬਹਿਤਿਤ੍ਥੇ ਠਿਤਾ ਸੀਤੇ ਜਾਤੇ ਅਵਿਦੂਰਟ੍ਠਾਨੇ ਪਚ੍ਚੇਕਬੁਦ੍ਧਸ੍ਸ ਪਣ੍ਣਸਾਲਂ ਦਿਸ੍ਵਾ ਅਨ੍ਤੋ ਅਸੋਧੇਤ੍ਵਾਵ ਬਹਿ ਅਗ੍ਗਿਂ ਦਤ੍ਵਾ ਵਿਸਿਬ੍ਬੇਸੁਂ. ਅਨ੍ਤੋਪਣ੍ਣਸਾਲਾਯ ਪਚ੍ਚੇਕਬੁਦ੍ਧੋ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਨਿਸਿਨ੍ਨੋ. ਤਾ ਜਾਲਾਸੁ ਪਚ੍ਛਿਨ੍ਨਾਸੁ ਪਚ੍ਚੇਕਬੁਦ੍ਧਂ ਦਿਸ੍ਵਾ ‘‘ਕਿਂ ਅਮ੍ਹੇਹਿ ਕਤਂ, ਅਯਂ ਪਚ੍ਚੇਕਬੁਦ੍ਧੋ ਰਞ੍ਞੋ ਕੁਲੂਪਕੋ, ਇਮਂ ਦਿਸ੍ਵਾ ਰਾਜਾ ਅਮ੍ਹਾਕਂ ਕੁਜ੍ਝਿਸ੍ਸਤਿ, ਇਦਾਨਿ ਨਂ ਸੁਜ੍ਝਾਪਿਤਂ ਕਾਤੁਂ ਵਟ੍ਟਤੀ’’ਤਿ ਅਞ੍ਞਾਨਿਪਿ ਦਾਰੂਨਿ ਪਕ੍ਖਿਪਿਤ੍ਵਾ ਅਗ੍ਗਿਂ ਅਦਂਸੁ. ਪੁਨ ਜਾਲਾਯ ਪਚ੍ਛਿਨ੍ਨਾਯ ਪਚ੍ਚੇਕਬੁਦ੍ਧੋ ਸਮਾਪਤ੍ਤਿਤੋ ਵੁਟ੍ਠਾਯ ਤਾਸਂ ਪਸ੍ਸਨ੍ਤੀਨਂਯੇਵ ਚੀਵਰਾਨਿ ਪਪ੍ਫੋਟੇਤ੍ਵਾ ਵੇਹਾਸਂ ਉਪ੍ਪਤਿਤ੍ਵਾ ਗਤੋ. ਤੇਨ ਕਮ੍ਮੇਨ ਨਿਰਯੇ ਪਚ੍ਚਿਤ੍ਵਾ ਪਕ੍ਕਾਵਸੇਸੇਨ ਇਮਂ ਬ੍ਯਸਨਂ ਪਾਪੁਣਿਂਸੁ. ਚਤੁਪਰਿਸਮਜ੍ਝੇ ਪਨ ਕਥਾ ਉਦਪਾਦਿ – ‘‘ਬਹੁਸ੍ਸੁਤਾ ਵਤ ਖੁਜ੍ਜੁਤ੍ਤਰਾ, ਮਾਤੁਗਾਮਅਤ੍ਤਭਾਵੇ ਠਤ੍ਵਾ ਪਞ੍ਚਨ੍ਨਂ ਮਾਤੁਗਾਮਸਤਾਨਂ ਧਮ੍ਮਂ ਕਥੇਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਸਿ. ਸਾਮਾਵਤੀਪਿ ਰਞ੍ਞਾ ਅਤ੍ਤਨੋ ਅਪ੍ਪਿਤਂ ਕਣ੍ਡਂ ਮੇਤ੍ਤਾਫਰਣੇਨ ਫਰਿਤ੍ਵਾ ਪਟਿਬਾਹੀ’’ਤਿ ਤਸ੍ਸਾਪਿ ਮਹਾਜਨੋ ਗੁਣਂ ਕਥੇਸਿ. ਏਵਮੇਤਂ ਵਤ੍ਥੁ ਸਮੁਟ੍ਠਿਤਂ. ਅਥ ਸਤ੍ਥਾ ਅਪਰਭਾਗੇ ਜੇਤਵਨੇ ਨਿਸਿਨ੍ਨੋ ਤਦੇਵ ਕਾਰਣਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਖੁਜ੍ਜੁਤ੍ਤਰਂ ਬਹੁਸ੍ਸੁਤਾਨਂ, ਸਾਮਾਵਤਿਂ ਮੇਤ੍ਤਾਵਿਹਾਰੀਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਉਤ੍ਤਰਾਨਨ੍ਦਮਾਤਾਵਤ੍ਥੁ

੨੬੨. ਪਞ੍ਚਮੇ ਝਾਯੀਨਨ੍ਤਿ ਝਾਨਾਭਿਰਤਾਨਂ ਉਪਾਸਿਕਾਨਂ, ਉਤ੍ਤਰਾ ਨਨ੍ਦਮਾਤਾ, ਅਗ੍ਗਾਤਿ ਦਸ੍ਸੇਤਿ. ਸਾ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤਾ ਸਤ੍ਥੁ ਧਮ੍ਮਕਥਂ ਸੁਣਨ੍ਤੀ ਸਤ੍ਥਾਰਂ ਏਕਂ ਉਪਾਸਿਕਂ ਝਾਨਾਭਿਰਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਨਗਰੇ ਸੁਮਨਸੇਟ੍ਠਿਂ ਨਿਸ੍ਸਾਯ ਵਸਨ੍ਤਸ੍ਸ ਪੁਣ੍ਣਸੀਹਸ੍ਸ ਨਾਮ ਭਰਿਯਾਯ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿ, ਉਤ੍ਤਰਾਤਿਸ੍ਸਾ ਨਾਮਂ ਅਕਂਸੁ.

ਅਥੇਕਸ੍ਮਿਂ ਨਕ੍ਖਤ੍ਤਮਹਦਿਵਸੇ ਰਾਜਗਹਸੇਟ੍ਠਿ ਪੁਣ੍ਣਂ ਪਕ੍ਕੋਸਾਪੇਤ੍ਵਾ ਆਹ – ‘‘ਤਾਤ ਪੁਣ੍ਣ, ਨਕ੍ਖਤ੍ਤਂ ਵਾ ਉਪੋਸਥੋ ਵਾ ਦੁਗ੍ਗਤਸ੍ਸ ਕਿਂ ਕਰਿਸ੍ਸਤਿ, ਏਵਂ ਸਨ੍ਤੇਪਿ ਵਦੇਹਿ ‘ਕਿਂ ਨਕ੍ਖਤ੍ਤਪਰਿਬ੍ਬਯਂ ਗਹੇਤ੍ਵਾ ਨਕ੍ਖਤ੍ਤਂ ਕੀਲ਼ਿਸ੍ਸਸਿ, ਬਲਵਗੋਣੇ ਚ ਫਾਲਞ੍ਚ ਨਙ੍ਗਲਞ੍ਚ ਗਹੇਤ੍ਵਾ ਕਸਿਸ੍ਸਸੀ’’’ਤਿ. ‘‘ਮਮ ਭਰਿਯਾਯ ਸਦ੍ਧਿਂ ਮਨ੍ਤੇਤ੍ਵਾ ਜਾਨਿਸ੍ਸਾਮਿ, ਅਯ੍ਯਾ’’ਤਿ ਤਂ ਕਥਂ ਭਰਿਯਾਯ ਆਰੋਚੇਸਿ. ‘‘ਸੇਟ੍ਠਿ ਨਾਮ ਅਯ੍ਯੋ ਇਸ੍ਸਰੋ, ਤਸ੍ਸ ਤਯਾ ਸਦ੍ਧਿਂ ਕਥੇਨ੍ਤਸ੍ਸ ਕਥਾ ਸੋਭਤਿ, ਤ੍ਵਂ ਪਨ ਅਤ੍ਤਨੋ ਕਸਿਕਮ੍ਮਂ ਮਾ ਵਿਸ੍ਸਜ੍ਜੇਸੀ’’ਤਿ ਆਹ. ਸੋ ਤਸ੍ਸਾ ਵਚਨਂ ਸੁਤ੍ਵਾ ਕਸਿਭਣ੍ਡਂ ਆਦਾਯ ਕਸਿਤੁਂ ਗਤੋ.

ਤਂਦਿਵਸਞ੍ਚ ਸਾਰਿਪੁਤ੍ਤਤ੍ਥੇਰੋ ਨਿਰੋਧਸਮਾਪਤ੍ਤਿਤੋ ਵੁਟ੍ਠਾਯ ‘‘ਕਸ੍ਸ ਅਜ੍ਜ ਮਯਾ ਸਙ੍ਗਹਂ ਕਾਤੁਂ ਵਟ੍ਟਤੀ’’ਤਿ ਆਵਜ੍ਜੇਨ੍ਤੋ ਇਮਸ੍ਸ ਪੁਣ੍ਣਸ੍ਸ ਉਪਨਿਸ੍ਸਯਂ ਦਿਸ੍ਵਾ ਭਿਕ੍ਖਾਚਾਰਵੇਲਾਯ ਪਤ੍ਤਚੀਵਰਮਾਦਾਯ ਪੁਣ੍ਣਸ੍ਸ ਕਸਨਟ੍ਠਾਨਂ ਗਚ੍ਛਨ੍ਤੋ ਅਵਿਦੂਰੇ ਅਤ੍ਤਾਨਂ ਦਸ੍ਸੇਸਿ. ਪੁਣ੍ਣੋ ਥੇਰਂ ਦਿਸ੍ਵਾ ਕਸਿਂ ਠਪੇਤ੍ਵਾ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿ. ਥੇਰੋ ਤਂ ਓਲੋਕੇਤ੍ਵਾ ਉਦਕਸਭਾਗਂ ਪੁਚ੍ਛਿ. ਤਸ੍ਸ ਏਤਦਹੋਸਿ – ‘‘ਅਯ੍ਯੋ ਮੁਖਂ ਧੋਵਿਤੁਕਾਮੋ ਭਵਿਸ੍ਸਤੀ’’ਤਿ. ਤਤੋ ਵੇਗੇਨ ਗਨ੍ਤ੍ਵਾ ਦਨ੍ਤਕਟ੍ਠਂ ਆਹਰਿਤ੍ਵਾ ਕਪ੍ਪਿਯਂ ਕਤ੍ਵਾ ਥੇਰਸ੍ਸ ਅਦਾਸਿ. ਥੇਰੇ ਦਨ੍ਤਕਟ੍ਠਂ ਖਾਦਨ੍ਤੇ ਪਤ੍ਤੇਨ ਸਦ੍ਧਿਂ ਧਮ੍ਮਕਰਣਂ ਨੀਹਰਿਤ੍ਵਾ ਉਦਕਸ੍ਸ ਪੂਰੇਤ੍ਵਾ ਆਹਰਿ. ਥੇਰੋ ਮੁਖਂ ਧੋਵਿਤ੍ਵਾ ਭਿਕ੍ਖਾਚਾਰਮਗ੍ਗਂ ਪਟਿਪਜ੍ਜਿ. ਪੁਣ੍ਣੋ ਚਿਨ੍ਤੇਸਿ – ‘‘ਥੇਰੋ ਅਞ੍ਞੇਸੁ ਦਿਵਸੇਸੁ ਇਮਂ ਮਗ੍ਗਂ ਨ ਪਟਿਪਜ੍ਜਤਿ, ਅਜ੍ਜ ਪਨ ਮਯ੍ਹਂ ਸਙ੍ਗਹਤ੍ਥਾਯ ਪਟਿਪਨ੍ਨੋ ਭਵਿਸ੍ਸਤਿ. ਅਹੋ ਵਤ ਮੇ ਭਰਿਯਾ ਮਮਤ੍ਥਾਯ ਆਹਰਣਕਂ ਆਹਾਰਂ ਥੇਰਸ੍ਸ ਪਤ੍ਤੇ ਪਤਿਟ੍ਠਪੇਯ੍ਯਾ’’ਤਿ.

ਅਥਸ੍ਸ ਭਰਿਯਾ ‘‘ਅਜ੍ਜ ਨਕ੍ਖਤ੍ਤਦਿਵਸੋ’’ਤਿ ਪਾਤੋਵ ਅਤ੍ਤਨੋ ਲਭਨਕਨਿਯਾਮੇਨ ਖਾਦਨੀਯਭੋਜਨੀਯਂ ਸਂਵਿਧਾਯ ਗਹੇਤ੍ਵਾ ਸਾਮਿਕਸ੍ਸ ਕਸਨਟ੍ਠਾਨਂ ਆਗਚ੍ਛਨ੍ਤੀ ਅਨ੍ਤਰਾਮਗ੍ਗੇ ਥੇਰਂ ਦਿਸ੍ਵਾ ਚਿਨ੍ਤੇਸਿ – ‘‘ਅਞ੍ਞੇਸੁ ਦਿਵਸੇਸੁ ਮਯ੍ਹਂ ਥੇਰਂ ਦਿਸ੍ਵਾ ਦੇਯ੍ਯਧਮ੍ਮੋ ਨ ਹੋਤਿ, ਦੇਯ੍ਯਧਮ੍ਮੇ ਸਨ੍ਤੇਪਿ ਮਮ ਅਯ੍ਯਂ ਨ ਪਸ੍ਸਾਮਿ, ਅਜ੍ਜ ਪਨ ਦ੍ਵਿਨ੍ਨਮ੍ਪਿ ਸਮ੍ਮੁਖੀਭਾਵੋ ਜਾਤੋ. ਮਮ ਸਾਮਿਕਸ੍ਸ ਪੁਨ ਸਮ੍ਪਾਦੇਤ੍ਵਾ ਆਹਰਿਸ੍ਸਾਮਿ, ਇਮਂ ਤਾਵ ਆਹਾਰਂ ਥੇਰਸ੍ਸ ਦਸ੍ਸਾਮੀ’’ਤਿ ਤੀਹਿ ਚੇਤਨਾਹਿ ਸਮ੍ਪਯੁਤ੍ਤਂ ਕਤ੍ਵਾ ਤਂ ਭੋਜਨਂ ਸਾਰਿਪੁਤ੍ਤਤ੍ਥੇਰਸ੍ਸ ਪਤ੍ਤੇ ਪਤਿਟ੍ਠਪੇਤ੍ਵਾ ‘‘ਏਵਂਵਿਧਾ ਦੁਗ੍ਗਤਜੀਵਿਤਾ ਮੁਚ੍ਚਾਮੀ’’ਤਿ ਆਹ. ਥੇਰੋਪਿ ‘‘ਤਵ ਅਜ੍ਝਾਸਯੋ ਪੂਰਤੂ’’ਤਿ ਤਸ੍ਸਾਨੁਮੋਦਨਂ ਕਤ੍ਵਾ ਤਤੋ ਨਿਵਤ੍ਤਿਤ੍ਵਾ ਵਿਹਾਰਂ ਅਗਮਾਸਿ.

ਸਾਪਿ ਪੁਨ ਅਤ੍ਤਨੋ ਗੇਹਂ ਗਨ੍ਤ੍ਵਾ ਸਾਮਿਕਸ੍ਸ ਆਹਾਰਂ ਸਮ੍ਪਾਦੇਤ੍ਵਾ ਆਦਾਯ ਕਸਨਟ੍ਠਾਨਂ ਗਨ੍ਤ੍ਵਾ ਸਾਮਿਕਸ੍ਸ ਕੁਜ੍ਝਨਭਾਵਤੋ ਭੀਤਾ ‘‘ਸਾਮਿ, ਅਜ੍ਜ ਏਕਦਿਵਸਂ ਤਵ ਮਨਂ ਸਨ੍ਧਾਰੇਹੀ’’ਤਿ ਆਹ. ਕਿਂ ਕਾਰਣਾਤਿ? ਅਹਂ ਅਜ੍ਜ ਤਾਵ ਆਹਾਰਂ ਆਹਰਨ੍ਤੀ ਅਨ੍ਤਰਾਮਗ੍ਗੇ ਥੇਰਂ ਦਿਸ੍ਵਾ ਤਵ ਭਾਗਭਤ੍ਤਂ ਥੇਰਸ੍ਸ ਪਤ੍ਤੇ ਪਤਿਟ੍ਠਪੇਤ੍ਵਾ ਪੁਨ ਗੇਹਂ ਗਨ੍ਤ੍ਵਾ ਆਹਾਰਂ ਪਚਿਤ੍ਵਾ ਆਦਾਯ ਆਗਤਾਮ੍ਹੀਤਿ. ਮਨਾਪਂ ਤੇ, ਭਦ੍ਦੇ, ਕਤਂ, ਮਯਾਪਿ ਪਾਤੋਵ ਥੇਰਸ੍ਸ ਦਨ੍ਤਕਟ੍ਠਞ੍ਚ ਮੁਖੋਦਕਞ੍ਚ ਦਿਨ੍ਨਂ. ਅਜ੍ਜ ਅਮ੍ਹਾਕਂ ਸੁਪ੍ਪਭਾਤਂ, ਸਬ੍ਬਮ੍ਪਿ ਥੇਰਸ੍ਸ ਅਮ੍ਹਾਕਂ ਸਨ੍ਤਕਮੇਵ ਜਾਤਨ੍ਤਿ ਦ੍ਵਿਨ੍ਨਮ੍ਪਿ ਜਨਾਨਂ ਏਕਸਦਿਸਮੇਵ ਚਿਤ੍ਤਂ ਅਹੋਸਿ. ਅਥ ਪੁਣ੍ਣੋ ਆਹਾਰਕਿਚ੍ਚਂ ਕਤ੍ਵਾ ਭਰਿਯਾਯ ਊਰੁਮ੍ਹਿ ਸੀਸਂ ਕਤ੍ਵਾ ਮੁਹੁਤ੍ਤਂ ਨਿਪਜ੍ਜਿ. ਅਥਸ੍ਸ ਨਿਦ੍ਦਾ ਓਕ੍ਕਮਿ. ਸੋ ਥੋਕਂ ਨਿਦ੍ਦਾਯਿਤ੍ਵਾ ਪਬੁਦ੍ਧੋ ਕਸਿਤਟ੍ਠਾਨਂ ਓਲੋਕੇਸਿ, ਓਲੋਕਿਤੋਲੋਕਿਤਟ੍ਠਾਨਂ ਮਹਾਕੋਸਾਤਕਿਪੁਪ੍ਫੇਹਿ ਸਮ੍ਪਰਿਕਿਣ੍ਣਂ ਵਿਯ ਅਹੋਸਿ. ਸੋ ਭਰਿਯਂ ਆਹ – ‘‘ਭਦ੍ਦੇ, ਕਿਨ੍ਨਾਮੇਤਂ ਅਜ੍ਜ ਇਦਂ ਕਸਿਤਟ੍ਠਾਨਂ ਸੁਵਣ੍ਣਵਣ੍ਣਂ ਹੁਤ੍ਵਾ ਖਾਯਤੀ’’ਤਿ. ਅਯ੍ਯ, ਅਜ੍ਜ ਤੇ ਸਕਲਦਿਵਸਂ ਕਿਲਨ੍ਤਤਾਯ ਅਕ੍ਖੀਨਿ ਮਞ੍ਞੇ ਭਮਨ੍ਤੀਤਿ. ਭਦ੍ਦੇ, ਮਯ੍ਹਂ ਅਸ੍ਸਦ੍ਦਹਨ੍ਤੀ ਸਯਂ ਓਲੋਕੇਹੀਤਿ. ਤਸ੍ਮਿਂ ਕਾਲੇ ਸਾ ਓਲੋਕੇਤ੍ਵਾ ਸਭਾਵਂ ਅਯ੍ਯ, ਕਥੇਸਿ, ਏਵਮੇਤਂ ਭਵਿਸ੍ਸਤੀਤਿ.

ਪੁਣ੍ਣੋ ਉਟ੍ਠਾਯ ਏਕਂ ਕਟ੍ਠਿਂ ਗਹੇਤ੍ਵਾ ਨਙ੍ਗਲਸੀਸੇ ਪਹਰਿ, ਗੁਲ਼ਪਿਣ੍ਡੋ ਵਿਯ ਨਙ੍ਗਲਸੀਸੇ ਅਲ੍ਲੀਯਿਤ੍ਵਾ ਅਟ੍ਠਾਸਿ. ਸੋ ਭਰਿਯਂ ਪਕ੍ਕੋਸਿਤ੍ਵਾ ਆਹ – ‘‘ਭਦ੍ਦੇ, ਅਞ੍ਞੇਸਂ ਵਪਿਤਬੀਜਂ ਨਾਮ ਤੀਹਿ ਵਾ ਚਤੂਹਿ ਵਾ ਮਾਸੇਹਿ ਫਲਂ ਦੇਤਿ, ਅਮ੍ਹਾਕਂ ਪਨ ਅਯ੍ਯਸ੍ਸ ਸਾਰਿਪੁਤ੍ਤਤ੍ਥੇਰਸ੍ਸ ਅਨ੍ਤਰੇ ਰੋਪਿਤੇਨ ਸਦ੍ਧਾਬੀਜੇਨ ਅਜ੍ਜੇਵ ਅਵਸ੍ਸਂ ਫਲਂ ਦਿਨ੍ਨਂ. ਇਮਸ੍ਮਿਂ ਕਰੀਸਮਤ੍ਤੇ ਪਦੇਸੇ ਆਮਲਕਮਤ੍ਤੋਪਿ ਪਂਸੁਪਿਣ੍ਡੋ ਅਸੁਵਣ੍ਣੋ ਨਾਮ ਨਤ੍ਥੀ’’ਤਿ. ਇਦਾਨਿ ਕਿਂ ਕਰਿਸ੍ਸਾਮ, ਅਯ੍ਯਾਤਿ? ‘‘ਭਦ੍ਦੇ, ਇਮਂ ਏਤ੍ਤਕਂ ਸੁਵਣ੍ਣਂ ਥੇਨੇਤ੍ਵਾ ਖਾਦਿਤੁਂ ਨਾਮ ਨ ਸਕ੍ਕਾ’’ਤਿ ਭਰਿਯਂ ਤਸ੍ਮਿਂ ਠਾਨੇ ਠਪੇਤ੍ਵਾ ਭਤ੍ਤਸ੍ਸ ਪੂਰੇਤ੍ਵਾ ਆਭਤਂ ਪਾਤਿਂ ਸੁਵਣ੍ਣਸ੍ਸ ਪੂਰੇਤ੍ਵਾ ਗਨ੍ਤ੍ਵਾ ਰਞ੍ਞੋ ਆਰੋਚਾਪੇਸਿ – ‘‘ਏਕੋ ਮਨੁਸ੍ਸੋ ਸੁਵਣ੍ਣਪਾਤਿਂ ਗਹੇਤ੍ਵਾ ਠਿਤੋ’’ਤਿ. ਰਾਜਾ ਤਂ ਪਕ੍ਕੋਸਾਪੇਤ੍ਵਾ ‘‘ਕਹਂ ਤੇ, ਤਾਤ, ਲਦ੍ਧ’’ਨ੍ਤਿ ਪੁਚ੍ਛਿ. ‘‘ਦੇਵ, ਮਯ੍ਹਂ ਏਕਂ ਕਸਿਤਟ੍ਠਾਨਂ ਸਬ੍ਬਂ ਸੁਵਣ੍ਣਮੇਵ ਜਾਤਂ, ਪਹਿਣਿਤ੍ਵਾ ਆਹਰਾਪੇਥਾ’’ਤਿ ਆਹ. ਤ੍ਵਂ ਕਿਨ੍ਨਾਮੋਸੀਤਿ? ਪੁਣ੍ਣੋ ਨਾਮ ਅਹਂ, ਦੇਵਾਤਿ. ਗਚ੍ਛਥ, ਭਣੇ, ਸਕਟਾਨਿ ਯੋਜੇਤ੍ਵਾ ਪੁਣ੍ਣਸ੍ਸ ਕਸਿਤਟ੍ਠਾਨਤੋ ਸੁਵਣ੍ਣਮਾਹਰਥਾਤਿ.

ਸਕਟੇਹਿ ਸਦ੍ਧਿਂ ਗਤਰਾਜਪੁਰਿਸਾ ‘‘ਰਞ੍ਞੋ ਪੁਞ੍ਞ’’ਨ੍ਤਿ ਵਤ੍ਵਾ ਸੁਵਣ੍ਣਪਿਣ੍ਡੇ ਗਣ੍ਹਨ੍ਤਿ, ਗਹਿਤਗਹਿਤਮ੍ਪਿ ਕਸਿਤਲੇਡ੍ਡੁਯੇਵ ਹੋਤਿ. ਤੇ ਗਨ੍ਤ੍ਵਾ ਰਞ੍ਞੋ ਆਰੋਚੇਸੁਂ. ਤੇਨ ਹਿ ਭਣੇ ਗਨ੍ਤ੍ਵਾ ‘‘ਪੁਣ੍ਣਸ੍ਸ ਪੁਞ੍ਞ’’ਨ੍ਤਿ ਵਤ੍ਵਾ ਗਣ੍ਹਥਾਤਿ. ਗਹਿਤਗਹਿਤਂ ਸੁਵਣ੍ਣਮੇਵ ਹੋਤਿ. ਤੇ ਸਬ੍ਬਮ੍ਪਿ ਤਂ ਸੁਵਣ੍ਣਂ ਆਹਰਿਤ੍ਵਾ ਰਾਜਙ੍ਗਣੇ ਰਾਸਿਂ ਅਕਂਸੁ. ਰਾਸਿ ਉਬ੍ਬੇਧੇਨ ਤਾਲਪ੍ਪਮਾਣੋ ਅਹੋਸਿ. ਰਾਜਾ ਵਾਣਿਜੇ ਪਕ੍ਕੋਸਾਪੇਤ੍ਵਾ ‘‘ਕਸ੍ਸ ਗੇਹੇ ਏਤ੍ਤਕਂ ਸੁਵਣ੍ਣਂ ਅਤ੍ਥੀ’’ਤਿ ਪੁਚ੍ਛਿ. ਨਤ੍ਥਿ, ਦੇਵ, ਕਸ੍ਸਚੀਤਿ. ਏਤ੍ਤਕਸ੍ਸ ਪਨ ਧਨਸ੍ਸ ਸਾਮਿਨੋ ਕਿਂ ਕਾਤੁਂ ਵਟ੍ਟਤੀਤਿ? ਧਨਸੇਟ੍ਠਿਂ ਨਾਮ ਨਂ ਕਾਤੁਂ ਵਟ੍ਟਤਿ, ਦੇਵਾਤਿ? ਤੇਨ ਹਿ ਪੁਣ੍ਣਂ ਇਮਸ੍ਮਿਂ ਨਗਰੇ ਧਨਸੇਟ੍ਠਿਂ ਨਾਮ ਕਰੋਥਾਤਿ ਸਬ੍ਬਂ ਤਂ ਸੁਵਣ੍ਣਂ ਤਸ੍ਸੇਵ ਦਤ੍ਵਾ ਤਂਦਿਵਸਂਯੇਵਸ੍ਸ ਸੇਟ੍ਠਿਟ੍ਠਾਨਂ ਅਦਾਸਿ. ਸੋ ਸੇਟ੍ਠਿ ਮਙ੍ਗਲਂ ਕਰੋਨ੍ਤੋ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਅਦਾਸਿ. ਸਤ੍ਤਮੇ ਦਿਵਸੇ ਦਸਬਲਸ੍ਸ ਭਤ੍ਤਾਨੁਮੋਦਨਾਯ ਪੁਣ੍ਣਸੇਟ੍ਠਿਪਿ ਭਰਿਯਾਪਿ ਧੀਤਾਪਿ ਸਬ੍ਬੇ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ.

ਅਪਰਭਾਗੇ ਰਾਜਗਹਸੇਟ੍ਠਿ ‘‘ਪੁਣ੍ਣਸੇਟ੍ਠਿਨੋ ਵਯਪ੍ਪਤ੍ਤਾ ਦਾਰਿਕਾ ਅਤ੍ਥੀ’’ਤਿ ਸੁਤ੍ਵਾ ਅਤ੍ਤਨੋ ਪੁਤ੍ਤਸ੍ਸ ਕਾਰਣਾ ਤਸ੍ਸ ਗੇਹਂ ਪੇਸੇਸਿ. ਸੋ ਤਸ੍ਸ ਸਾਸਨਂ ਸੁਤ੍ਵਾ ‘‘ਨਾਹਂ ਧੀਤਰਂ ਦਸ੍ਸਾਮੀ’’ਤਿ ਪਟਿਸਾਸਨਂ ਪੇਸੇਸਿ. ਸੁਮਨਸੇਟ੍ਠਿਪਿ ਪੁਨ ਪੇਸੇਸਿ – ‘‘ਤ੍ਵਂ ਮਮ ਗੇਹਂ ਨਿਸ੍ਸਾਯ ਵਸਿਤ੍ਵਾ ਇਦਾਨਿ ਏਕਪ੍ਪਹਾਰੇਨੇਵ ਇਸ੍ਸਰੋ ਹੁਤ੍ਵਾ ਮਯ੍ਹਂ ਦਾਰਿਕਂ ਨ ਦੇਸੀ’’ਤਿ. ਤਤੋ ਪੁਣ੍ਣਸੇਟ੍ਠਿ ਆਹ – ‘‘ਇਮਂ ਤਾਵ ਤੁਮ੍ਹਾਕਂ ਸੇਟ੍ਠਿ ਸਭਾਵਮੇਵ ਕਥੇਸਿ, ਪੁਰਿਸੋ ਨਾਮ ਸਬ੍ਬਕਾਲੇ ਏਵਂਵਿਧੋਯੇਵਾਤਿ ਨ ਸਲ੍ਲਕ੍ਖੇਤਬ੍ਬੋ. ਅਹਞ੍ਹਿ ਇਦਾਨਿ ਤਾਦਿਸੇ ਪੁਰਿਸੇ ਦਾਸੇ ਕਤ੍ਵਾ ਗਹੇਤੁਂ ਸਕ੍ਕੋਮਿ, ਤੁਯ੍ਹਂ ਪਨ ਜਾਤਿਂ ਵਾ ਗੋਤ੍ਤਂ ਵਾ ਨ ਕੋਪੇਮਿ. ਅਪਿਚ ਖੋ ਮਮ ਧੀਤਾ ਸੋਤਾਪਨ੍ਨਾ ਅਰਿਯਸਾਵਿਕਾ ਦੇਵਸਿਕਂ ਕਹਾਪਣਗ੍ਘਨਕੇਹਿ ਪੁਪ੍ਫੇਹਿ ਪੂਜਂ ਕਰੋਤਿ, ਤਮਹਂ ਤੁਮ੍ਹਾਦਿਸਸ੍ਸ ਮਿਚ੍ਛਾਦਿਟ੍ਠਿਕਸ੍ਸ ਗੇਹਂ ਨ ਪੇਸੇਸ੍ਸਾਮੀ’’ਤਿ. ਏਵਂ ਪੁਣ੍ਣਸੇਟ੍ਠਿਸ੍ਸ ਪਟਿਬਾਹਕਭਾਵਂ ਞਤ੍ਵਾ ਰਾਜਗਹਸੇਟ੍ਠਿ ਪੁਨ ਸਾਸਨਂ ਪੇਸੇਸਿ – ‘‘ਪੋਰਾਣਕਂ ਵਿਸ੍ਸਾਸਂ ਮਾ ਭਿਨ੍ਦਤੁ, ਅਹਂ ਮਯ੍ਹਂ ਸੁਣਿਸਾਯ ਦੇਵਸਿਕਂ ਦ੍ਵਿਨ੍ਨਂ ਕਹਾਪਣਾਨਂ ਅਨ੍ਧਨਕਾਨਿ ਪੁਪ੍ਫਾਨਿ ਸਜ੍ਜਾਪੇਸ੍ਸਾਮੀ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਧੀਤਰਂ ਤਸ੍ਸ ਘਰਂ ਪੇਸੇਸਿ.

ਅਥੇਕਦਿਵਸਂ ਸਾ ਪੁਣ੍ਣਸੇਟ੍ਠਿਨੋ ਧੀਤਾ ਉਤ੍ਤਰਾ ਅਤ੍ਤਨੋ ਸਾਮਿਕਂ ਏਵਮਾਹ – ‘‘ਅਹਂ ਅਤ੍ਤਨੋ ਕੁਲਗੇਹੇ ਮਾਸਸ੍ਸ ਅਟ੍ਠ ਦਿਵਸਾਨਿ ਨਿਬਦ੍ਧਂ ਉਪੋਸਥਕਮ੍ਮਂ ਕਰੋਮਿ, ਇਦਾਨਿਪਿ ਤੁਮ੍ਹੇਸੁ ਸਮ੍ਪਟਿਚ੍ਛਨ੍ਤੇਸੁ ਉਪੋਸਥਙ੍ਗਾਨਿ ਅਧਿਟ੍ਠਹੇਯ੍ਯ’’ਨ੍ਤਿ. ਸੋ ‘‘ਨ ਸਕ੍ਕਾ’’ਤਿ ਤਂ ਨ ਸਮ੍ਪਟਿਚ੍ਛਿ. ਸਾ ਤਂ ਸਞ੍ਞਾਪੇਤੁਂ ਅਸਕ੍ਕੋਨ੍ਤੀ ਤੁਣ੍ਹੀ ਅਹੋਸਿ. ਪੁਨ ਅਨ੍ਤੋਵਸ੍ਸੇ ‘‘ਉਪੋਸਥਿਕਾ ਭਵਿਸ੍ਸਾਮੀ’’ਤਿ ਤਦਾਪਿ ਓਕਾਸਂ ਕਾਰੇਨ੍ਤੀ ਨੇਵ ਅਲਤ੍ਥ. ਸਾ ਅਨ੍ਤੋਵਸ੍ਸੇ ਅਡ੍ਢਤਿਯੇਸੁ ਮਾਸੇਸੁ ਅਤਿਕ੍ਕਨ੍ਤੇਸੁ ਅਡ੍ਢਮਾਸੇ ਅਵਸਿਟ੍ਠੇ ਮਾਤਾਪਿਤੂਨਂ ਸਾਸਨਂ ਪੇਸੇਸਿ – ‘‘ਅਹਂ ਤੁਮ੍ਹੇਹਿ ਚਾਰਕੇ ਪਕ੍ਖਿਤ੍ਤਾ ਏਤ੍ਤਕੇ ਅਦ੍ਧਾਨੇ ਏਕਦਿਵਸਮ੍ਪਿ ਉਪੋਸਥਙ੍ਗਾਨਿ ਅਧਿਟ੍ਠਾਤੁਂ ਨ ਲਭਾਮਿ, ਪਞ੍ਚਦਸ ਮੇ ਕਹਾਪਣਸਹਸ੍ਸਾਨਿ ਪੇਸੇਥਾ’’ਤਿ. ਤੇ ਧੀਤੁ ਸਾਸਨਂ ਸੁਤ੍ਵਾ ‘‘ਕਿਂਕਾਰਣਾ’’ਤਿ ਅਪੁਚ੍ਛਿਤ੍ਵਾਵ ਪਹਿਣਿਂਸੁ. ਉਤ੍ਤਰਾ ਤੇ ਕਹਾਪਣੇ ਗਣ੍ਹਿਤ੍ਵਾ ਤਸ੍ਮਿਂ ਨਗਰੇ ਸਿਰਿਮਾ ਨਾਮ ਗਣਿਕਾ ਅਤ੍ਥਿ, ਤਂ ਪਕ੍ਕੋਸਾਪੇਤ੍ਵਾ ‘‘ਅਮ੍ਮ ਸਿਰਿਮੇ, ਅਹਂ ਇਮਂ ਅਡ੍ਢਮਾਸਂ ਉਪੋਸਥਙ੍ਗਾਨਿ ਅਧਿਟ੍ਠਹਿਸ੍ਸਾਮਿ, ਤ੍ਵਂ ਇਮਾਨਿ ਪਞ੍ਚਦਸ ਕਹਾਪਣਸਹਸ੍ਸਾਨਿ ਗਹੇਤ੍ਵਾ ਇਮਂ ਅਡ੍ਢਮਾਸਂ ਸੇਟ੍ਠਿਪੁਤ੍ਤਂ ਪਰਿਚਰਾਹੀ’’ਤਿ. ਸਾ ‘‘ਸਾਧੁ, ਅਯ੍ਯੇ’’ਤਿ ਸਮ੍ਪਟਿਚ੍ਛਿ. ਤਤੋ ਪਟ੍ਠਾਯ ਸੇਟ੍ਠਿਪੁਤ੍ਤੋ ‘‘ਅਹਂ ਸਿਰਿਮਾਯ ਸਦ੍ਧਿਂ ਮੋਦਿਸ੍ਸਾਮੀ’’ਤਿ ਉਤ੍ਤਰਾਯ ਅਡ੍ਢਮਾਸਂ ਉਪੋਸਥਕਮ੍ਮਂ ਸਮ੍ਪਟਿਚ੍ਛਿ.

ਸਾ ਤੇਨ ਸਮ੍ਪਟਿਚ੍ਛਿਤਭਾਵਂ ਞਤ੍ਵਾ ਦਿਵਸੇ ਦਿਵਸੇ ਪਾਤੋਵ ਦਾਸਿਗਣਪਰਿਵੁਤਾ ਸਤ੍ਥੁ ਸਹਤ੍ਥਾ ਖਾਦਨੀਯਭੋਜਨੀਯਂ ਸਂਵਿਦਹਿਤ੍ਵਾ ਸਤ੍ਥਰਿ ਭਤ੍ਤਕਿਚ੍ਚਂ ਕਤ੍ਵਾ ਵਿਹਾਰਂ ਗਤੇ ਉਪੋਸਥਙ੍ਗਾਨਿ ਅਧਿਟ੍ਠਾਯ ਪਾਸਾਦਵਰਂ ਆਰੁਯ੍ਹ ਅਤ੍ਤਨੋ ਸੀਲਾਨਿ ਆਵਜ੍ਜਮਾਨਾ ਨਿਸੀਦਤਿ. ਏਵਂ ਅਡ੍ਢਮਾਸਂ ਵੀਤਿਨਾਮੇਤ੍ਵਾ ਉਪੋਸਥਂ ਵਿਸ੍ਸਜ੍ਜਨਦਿਵਸੇ ਪਾਤੋਵ ਯਾਗੁਖਜ੍ਜਕਾਦੀਨਿ ਸਂਵਿਦਹਨ੍ਤੀ ਵਿਚਰਤਿ. ਤਸ੍ਮਿਂ ਸਮਯੇ ਸੇਟ੍ਠਿਪੁਤ੍ਤੋ ਸਿਰਿਮਾਯ ਸਦ੍ਧਿਂ ਉਪਰਿਪਾਸਾਦਵਰਗਤੋ ਜਾਲਵਾਤਪਾਨਂ ਵਿਵਰਿਤ੍ਵਾ ਅਨ੍ਤਰਵਤ੍ਥੁਂ ਓਲੋਕੇਨ੍ਤੋ ਅਟ੍ਠਾਸਿ. ਉਤ੍ਤਰਾ, ਵਾਤਪਾਨਚ੍ਛਿਦ੍ਦੇਨ ਉਦ੍ਧਂ ਓਲੋਕੇਸਿ. ਸੇਟ੍ਠਿਪੁਤ੍ਤੋ ਉਤ੍ਤਰਂ ਓਲੋਕੇਤ੍ਵਾ ‘‘ਨੇਰਯਿਕਜਾਤਿਕਾ ਵਤਾਯਂ ਏਵਂਵਿਧਂ ਨਾਮ ਸਮ੍ਪਤ੍ਤਿਂ ਪਹਾਯ ਉਕ੍ਖਲਿਕਮਸਿਮਕ੍ਖਿਤਾ ਹੁਤ੍ਵਾ ਨਿਕ੍ਕਾਰਣਾ ਦਾਸੀਨਂ ਅਨ੍ਤਰੇ ਵਿਚਰਤੀ’’ਤਿ ਸਿਤਂ ਅਕਾਸਿ. ਉਤ੍ਤਰਾ, ਤਸ੍ਸ ਪਮਾਦਭਾਵਂ ਞਤ੍ਵਾ ‘‘ਅਯਂ ਬਾਲੋ ਨਾਮ ਅਤ੍ਤਨੋ ਸਮ੍ਪਤ੍ਤਿ ਸਬ੍ਬਕਾਲਂ ਥਾਵਰਾਤਿ ਸਞ੍ਞੀ ਭਵਿਸ੍ਸਤੀ’’ਤਿ ਸਯਮ੍ਪਿ ਸਿਤਂ ਅਕਾਸਿ. ਤਤੋ ਸਿਰਿਮਾ ‘‘ਅਯਂ ਚੇਟਿਕਾ ਮਯਿ ਠਿਤਾਯ ਏਵਂ ਮਮ ਸਾਮਿਕੇਨ ਸਦ੍ਧਿਂ ਸਿਤਂ ਕਰੋਤੀ’’ਤਿ ਕੁਪਿਤਾ ਵੇਗੇਨ ਓਤਰਿ. ਉਤ੍ਤਰਾ, ਤਸ੍ਸਾ ਆਗਮਨਾਕਪ੍ਪੇਨੇਵ ‘‘ਅਯਂ ਬਾਲਾ ਅਡ੍ਢਮਾਸਮਤ੍ਤਂ ਇਮਸ੍ਮਿਂ ਗੇਹੇ ਵਸਿਤ੍ਵਾ ਮਯ੍ਹਮੇਵੇਤਂ ਗੇਹਨ੍ਤਿਸਞ੍ਞੀ ਜਾਤਾ’’ਤਿ ਞਤ੍ਵਾ ਤਙ੍ਖਣਞ੍ਞੇਵ ਮੇਤ੍ਤਾਝਾਨਂ ਸਮਾਪਜ੍ਜਿਤ੍ਵਾ ਅਟ੍ਠਾਸਿ. ਸਿਰਿਮਾਪਿ ਦਾਸੀਨਂ ਅਨ੍ਤਰੇਨ ਆਗਨ੍ਤ੍ਵਾ ਉਲ਼ੁਙ੍ਕਂ ਗਹੇਤ੍ਵਾ ਪੂਵਪਚਨਟ੍ਠਾਨੇ ਪਕ੍ਕੁਥਿਤਤੇਲਸ੍ਸ ਪੂਰੇਤ੍ਵਾ ਉਤ੍ਤਰਾਯ ਮਤ੍ਥਕੇ ਆਸਿਞ੍ਚਿ, ਮੇਤ੍ਤਾਝਾਨਸ੍ਸ ਵਿਪ੍ਫਾਰੇਨ ਉਤ੍ਤਰਾਯ ਮਤ੍ਥਕੇ ਆਸਿਤ੍ਤਂ ਪਕ੍ਕੁਥਿਤਤੇਲਂ ਪਦੁਮਪਤ੍ਤੇ ਆਸਿਤ੍ਤਉਦਕਂ ਵਿਯ ਵਿਨਿਵਤ੍ਤਿਤ੍ਵਾ ਗਤਂ.

ਤਸ੍ਮਿਂ ਖਣੇ ਸਿਰਿਮਾਯ ਸਮੀਪੇ ਠਿਤਾ ਦਾਸਿਯੋ ਤਂ ਓਲੋਕੇਤ੍ਵਾ, ‘‘ਭੋ ਜੇ, ਤ੍ਵਂ ਅਮ੍ਹਾਕਂ ਅਯ੍ਯਾਯ ਹਤ੍ਥਤੋ ਮੂਲਂ ਗਹੇਤ੍ਵਾ ਆਗਤਾ ਇਮਸ੍ਮਿਂ ਗੇਹੇ ਵਸਮਾਨਾ ਅਮ੍ਹਾਕਂ ਅਯ੍ਯਾਯ ਸਦਿਸਾ ਭਵਿਤੁਂ ਵਾਯਮਸੀ’’ਤਿ ਸਮ੍ਮੁਖਟ੍ਠਾਨੇ ਤਂ ਪਰਿਭਾਸਿਂਸੁ. ਤਸ੍ਮਿਂ ਖਣੇ ਸਿਰਿਮਾ ਅਤ੍ਤਨੋ ਆਗਨ੍ਤੁਕਭਾਵਂ ਅਞ੍ਞਾਸਿ. ਸਾ ਤਤੋਵ ਗਨ੍ਤ੍ਵਾ ਉਤ੍ਤਰਾਯ ਪਾਦੇਸੁ ਪਤਿਤ੍ਵਾ, ‘‘ਅਯ੍ਯੇ, ਅਨੁਪਧਾਰੇਤ੍ਵਾ ਮੇ ਕਤਂ, ਖਮਥ ਮਯ੍ਹ’’ਨ੍ਤਿ ਆਹ. ਅਮ੍ਮ ਸਿਰਿਮੇ, ਨਾਹਂ ਤਵ ਇਮਸ੍ਮਿਂ ਠਾਨੇ ਖਮਿਸ੍ਸਾਮਿ, ਅਹਂ ਸਪਿਤਿਕਾ ਧੀਤਾ, ਦਸਬਲੇ ਖਮਨ੍ਤੇਯੇਵ ਖਮਿਸ੍ਸਾਮੀਤਿ.

ਸਤ੍ਥਾਪਿ ਖੋ ਭਿਕ੍ਖੁਸਙ੍ਘਪਰਿਵਾਰੋ ਆਗਨ੍ਤ੍ਵਾ ਉਤ੍ਤਰਾਯ ਨਿਵੇਸਨੇ ਪਞ੍ਞਤ੍ਤਾਸਨੇ ਨਿਸੀਦਿ. ਸਿਰਿਮਾ ਗਨ੍ਤ੍ਵਾ ਸਤ੍ਥੁ ਪਾਦੇਸੁ ਪਤਿਤ੍ਵਾ, ‘‘ਭਨ੍ਤੇ, ਮਯਾ ਅਯ੍ਯਾਯ ਉਤ੍ਤਰਾਯ ਅਨ੍ਤਰੇ ਏਕੋ ਦੋਸੋ ਕਤੋ, ਤੁਮ੍ਹੇਸੁ ਖਮਨ੍ਤੇਸੁ ਖਮਿਸ੍ਸਾਮੀਤਿ ਵਦਤਿ, ਖਮਥ ਮਯ੍ਹਂ ਭਗਵਾ’’ਤਿ. ਖਮਾਮਿ ਤੇ ਸਿਰਿਮੇਤਿ. ਸਾ ਤਸ੍ਮਿਂ ਕਾਲੇ ਗਨ੍ਤ੍ਵਾ ਉਤ੍ਤਰਂ ਖਮਾਪੇਸਿ. ਤਂਦਿਵਸਞ੍ਚ ਸਿਰਿਮਾ ਦਸਬਲਸ੍ਸ ਭਤ੍ਤਾਨੁਮੋਦਨਂ ਸੁਤ੍ਵਾ –

‘‘ਅਕ੍ਕੋਧੇਨ ਜਿਨੇ ਕੋਧਂ, ਅਸਾਧੁਂ ਸਾਧੁਨਾ ਜਿਨੇ;

ਜਿਨੇ ਕਦਰਿਯਂ ਦਾਨੇਨ, ਸਚ੍ਚੇਨਾਲਿਕਵਾਦਿਨ’’ਨ੍ਤਿ. (ਧ. ਪ. ੨੨੩) –

ਗਾਥਾਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਿਤਾ ਦਸਬਲਂ ਨਿਮਨ੍ਤੇਤ੍ਵਾ ਪੁਨਦਿਵਸੇ ਮਹਾਦਾਨਂ ਅਦਾਸਿ. ਏਵਮੇਤਂ ਵਤ੍ਥੁ ਸਮੁਟ੍ਠਿਤਂ. ਅਪਰਭਾਗੇ ਪਨ ਸਤ੍ਥਾ ਜੇਤਵਨੇ ਨਿਸੀਦਿਤ੍ਵਾ ਉਪਾਸਿਕਾਯੋ ਠਾਨਨ੍ਤਰੇਸੁ ਠਪੇਨ੍ਤੋ ਉਤ੍ਤਰਂ ਨਨ੍ਦਮਾਤਰਂ ਝਾਯੀਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਸੁਪ੍ਪਵਾਸਾਵਤ੍ਥੁ

੨੬੩. ਛਟ੍ਠੇ ਪਣੀਤਦਾਯਿਕਾਨਨ੍ਤਿ ਪਣੀਤਰਸਦਾਯਿਕਾਨਂ ਉਪਾਸਿਕਾਨਂ, ਸੁਪ੍ਪਵਾਸਾ ਕੋਲਿਯਧੀਤਾ, ਅਗ੍ਗਾਤਿ ਦਸ੍ਸੇਤਿ. ਸਾ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤਾ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤੀ ਸਤ੍ਥਾਰਂ ਏਕਂ ਉਪਾਸਿਕਂ ਪਣੀਤਦਾਯਿਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੋਲਿਯਨਗਰੇ ਖਤ੍ਤਿਯਕੁਲੇ ਨਿਬ੍ਬਤ੍ਤਿ, ਸੁਪ੍ਪਵਾਸਾਤਿਸ੍ਸਾ ਨਾਮਂ ਅਕਂਸੁ. ਸਾ ਵਯਪ੍ਪਤ੍ਤਾ ਏਕਸ੍ਸ ਸਕ੍ਯਕੁਮਾਰਸ੍ਸ ਗੇਹਂ ਗਤਾ, ਪਠਮਦਸ੍ਸਨੇਯੇਵ ਸਤ੍ਥੁ ਧਮ੍ਮਕਥਂ ਸੁਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ. ਸਾ ਅਪਰਭਾਗੇ ਸੀਵਲਿਂ ਨਾਮ ਦਾਰਕਂ ਵਿਜਾਯਿ. ਤਸ੍ਸ ਵਤ੍ਥੁ ਹੇਟ੍ਠਾ ਵਿਤ੍ਥਾਰਿਤਮੇਵ.

ਸਾ ਏਕਸ੍ਮਿਂ ਸਮਯੇ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਨਾਨਗ੍ਗਰਸਪਣੀਤਭੋਜਨਂ ਅਦਾਸਿ. ਸਤ੍ਥਾ ਕਤਭਤ੍ਤਕਿਚ੍ਚੋ ਅਨੁਮੋਦਨਂ ਕਰੋਨ੍ਤੋ ਸੁਪ੍ਪਵਾਸਾਯ ਇਮਂ ਧਮ੍ਮਂ ਦੇਸੇਸਿ ‘‘ਭੋਜਨਂ ਸੁਪ੍ਪਵਾਸੇ ਦੇਨ੍ਤੀ ਅਰਿਯਸਾਵਿਕਾ ਪਟਿਗ੍ਗਾਹਕਾਨਂ ਪਞ੍ਚ ਠਾਨਾਨਿ ਦੇਤਿ. ਆਯੁਂ ਦੇਤਿ, ਵਣ੍ਣਂ ਦੇਤਿ, ਸੁਖਂ ਦੇਤਿ, ਬਲਂ ਦੇਤਿ, ਪਟਿਭਾਨਂ ਦੇਤਿ. ਆਯੁਂ ਖੋ ਪਨ ਦਤ੍ਵਾ ਆਯੁਸ੍ਸ ਭਾਗਿਨੀ ਹੋਤਿ ਦਿਬ੍ਬਸ੍ਸ ਵਾ ਮਾਨੁਸਸ੍ਸ ਵਾ…ਪੇ… ਪਟਿਭਾਨਂ ਦਤ੍ਵਾ ਪਟਿਭਾਨਸ੍ਸ ਭਾਗਿਨੀ ਹੋਤਿ ਦਿਬ੍ਬਸ੍ਸ ਵਾ ਮਾਨੁਸਸ੍ਸ ਵਾ’’ਤਿ. ਏਵਮੇਤਂ ਵਤ੍ਥੁ ਸਮੁਟ੍ਠਿਤਂ. ਅਥ ਅਪਰਭਾਗੇ ਸਤ੍ਥਾ ਜੇਤਵਨੇ ਨਿਸੀਦਿਤ੍ਵਾ ਉਪਾਸਿਕਾਯੋ ਠਾਨਨ੍ਤਰੇਸੁ ਠਪੇਨ੍ਤੋ ਸੁਪ੍ਪਵਾਸਂ ਕੋਲਿਯਧੀਤਰਂ ਪਣੀਤਦਾਯਿਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਸੁਪ੍ਪਿਯਾਵਤ੍ਥੁ

੨੬੪. ਸਤ੍ਤਮੇ ਗਿਲਾਨੁਪਟ੍ਠਾਕੀਨਨ੍ਤਿ ਗਿਲਾਨੁਪਟ੍ਠਾਕੀਨਂ ਉਪਾਸਿਕਾਨਂ, ਸੁਪ੍ਪਿਯਾ ਉਪਾਸਿਕਾ, ਅਗ੍ਗਾਤਿ ਦਸ੍ਸੇਤਿ. ਅਯਂ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤਾ ਅਪਰਭਾਗੇ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤੀ ਸਤ੍ਥਾਰਂ ਏਕਂ ਉਪਾਸਿਕਂ ਗਿਲਾਨੁਪਟ੍ਠਾਕੀਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਬਾਰਾਣਸਿਯਂ ਕੁਲਗੇਹੇ ਨਿਬ੍ਬਤ੍ਤਿ, ਸੁਪ੍ਪਿਯਾਤਿਸ੍ਸਾ ਨਾਮਂ ਅਕਂਸੁ. ਅਪਰਭਾਗੇ ਸਤ੍ਥਾ ਭਿਕ੍ਖੁਸਙ੍ਘਪਰਿਵਾਰੋ ਬਾਰਾਣਸਿਂ ਅਗਮਾਸਿ. ਸਾ ਤਥਾਗਤਸ੍ਸ ਪਠਮਦਸ੍ਸਨੇਯੇਵ ਧਮ੍ਮਂ ਸੁਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ.

ਅਥੇਕਦਿਵਸਂ ਧਮ੍ਮਸ੍ਸਵਨਤ੍ਥਾਯ ਵਿਹਾਰਂ ਗਤਾ. ਵਿਹਾਰਚਾਰਿਕਂ ਚਰਮਾਨਾ ਏਕਂ ਭਿਕ੍ਖੁਂ ਗਿਲਾਨਂ ਦਿਸ੍ਵਾ ਅਭਿਵਾਦੇਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ‘‘ਅਯ੍ਯਸ੍ਸ ਕਿਂ ਲਦ੍ਧੁਂ ਵਟ੍ਟਤੀ’’ਤਿ ਪੁਚ੍ਛਿ. ਰਸਂ ਲਦ੍ਧੁਂ ਵਟ੍ਟਤਿ, ਉਪਾਸਿਕੇਤਿ. ‘‘ਹੋਤੁ, ਭਨ੍ਤੇ, ਅਹਂ ਪਹਿਣਿਸ੍ਸਾਮੀ’’ਤਿ ਥੇਰਂ ਅਭਿਵਾਦੇਤ੍ਵਾ ਅਨ੍ਤੋਨਗਰਂ ਗਨ੍ਤ੍ਵਾ ਪੁਨਦਿਵਸੇ ਪਵਤ੍ਤਮਂਸਤ੍ਥਾਯ ਦਾਸਿਂ ਅਨ੍ਤਰਾਪਣਂ ਪੇਸੇਸਿ. ਸਾ ਸਕਲਨਗਰੇ ਪਵਤ੍ਤਮਂਸਂ ਅਲਭਿਤ੍ਵਾ ਅਲਦ੍ਧਭਾਵਂ ਕਥੇਸਿ. ਉਪਾਸਿਕਾ ਚਿਨ੍ਤੇਸਿ – ‘‘ਅਹਂ ਅਯ੍ਯਸ੍ਸ ਰਸਂ ਪਹਿਣਿਸ੍ਸਾਮੀਤਿ ਵਤ੍ਵਾ ਸਚੇ ਨ ਪੇਸੇਸ੍ਸਾਮਿ, ਅਯ੍ਯੋ ਅਞ੍ਞਤੋਪਿ ਅਲਭਨ੍ਤੋ ਕਿਲਮਿਸ੍ਸਤਿ, ਯਂਕਿਞ੍ਚਿ ਕਤ੍ਵਾ ਪੇਸੇਤੁਂ ਵਟ੍ਟਤੀ’’ਤਿ ਗਬ੍ਭਂ ਪਵਿਸਿਤ੍ਵਾ ਊਰੁਮਂਸਂ ਛਿਨ੍ਦਿਤ੍ਵਾ ਦਾਸਿਯਾ ਅਦਾਸਿ ‘‘ਇਦਂ ਮਂਸਂ ਗਹੇਤ੍ਵਾ ਸਮ੍ਭਾਰੇਹਿ ਯੋਜੇਤ੍ਵਾ ਰਸਂ ਕਤ੍ਵਾ ਵਿਹਾਰਂ ਨੇਤ੍ਵਾ ਅਯ੍ਯਸ੍ਸ ਦੇਹਿ. ਸੋ ਚੇ ਮਂ ਪੁਚ੍ਛਤਿ, ਗਿਲਾਨਾਤਿ ਵਦੇਹੀ’’ਤਿ. ਸਾ ਤਥਾ ਅਕਾਸਿ.

ਸਤ੍ਥਾ ਤਂ ਕਾਰਣਂ ਞਤ੍ਵਾ ਪੁਨਦਿਵਸੇ ਭਿਕ੍ਖਾਚਾਰਵੇਲਾਯ ਭਿਕ੍ਖੁਸਙ੍ਘਪਰਿਵੁਤੋ ਉਪਾਸਿਕਾਯ ਗੇਹਂ ਅਗਮਾਸਿ. ਸਾ ਤਥਾਗਤਸ੍ਸ ਆਗਤਭਾਵਂ ਸੁਤ੍ਵਾ ਸਾਮਿਕਂ ਆਮਨ੍ਤੇਸਿ – ‘‘ਅਯ੍ਯਪੁਤ੍ਤ, ਅਹਂ ਸਤ੍ਥੁ ਸਨ੍ਤਿਕਂ ਗਨ੍ਤੁਂ ਨ ਸਕ੍ਕੋਮਿ, ਗਚ੍ਛ ਤ੍ਵਂ ਸਤ੍ਥਾਰਂ ਅਨ੍ਤੋਗੇਹਂ ਪਵੇਸੇਤ੍ਵਾ ਨਿਸੀਦਾਪੇਹੀ’’ਤਿ. ਸੋ ਤਥਾ ਅਕਾਸਿ. ਸਤ੍ਥਾ ‘‘ਕਹਂ ਸੁਪ੍ਪਿਯਾ’’ਤਿ ਪੁਚ੍ਛਿ. ਗਿਲਾਨਾ, ਭਨ੍ਤੇਤਿ. ਪਕ੍ਕੋਸਥ, ਨਨ੍ਤਿ. ਅਥ ਤੇ ਗਨ੍ਤ੍ਵਾ ‘‘ਸਤ੍ਥਾ ਤਂ ਪਕ੍ਕੋਸਤੀ’’ਤਿ ਆਹਂਸੁ. ਸਾ ਚਿਨ੍ਤੇਸਿ – ‘‘ਸਬ੍ਬਲੋਕਸ੍ਸ ਹਿਤਾਨੁਕਮ੍ਪਕੋ ਸਤ੍ਥਾ ਨ ਇਮਂ ਕਾਰਣਂ ਅਦਿਸ੍ਵਾ ਪਕ੍ਕੋਸਾਪੇਸ੍ਸਤੀ’’ਤਿ ਸਹਸਾ ਮਞ੍ਚਮ੍ਹਾ ਵੁਟ੍ਠਾਸਿ. ਅਥਸ੍ਸਾ ਬੁਦ੍ਧਾਨੁਭਾਵੇਨ ਤਂਖਣਂਯੇਵ ਵਣੋ ਰੁਹਿਤ੍ਵਾ ਸੁਚ੍ਛਵਿ ਅਹੋਸਿ ਸੇਸਟ੍ਠਾਨਤੋ ਅਤਿਰੇਕਤਰਂ ਵਿਪ੍ਪਸਨ੍ਨਵਣ੍ਣੋ. ਤਸ੍ਮਿਂ ਖਣੇ ਉਪਾਸਿਕਾ ਸਿਤਂ ਕਤ੍ਵਾ ਦਸਬਲਂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਸਤ੍ਥਾ ‘‘ਇਮਿਸ੍ਸਾ ਉਪਾਸਿਕਾਯ ਕਿਂ ਅਫਾਸੁਕ’’ਨ੍ਤਿ ਪੁਚ੍ਛਿ. ਸਾ ਅਤ੍ਤਨਾ ਕਤਕਾਰਣਂ ਸਬ੍ਬਂ ਕਥੇਸਿ. ਸਤ੍ਥਾ ਕਤਭਤ੍ਤਕਿਚ੍ਚੋ ਵਿਹਾਰਂ ਗਨ੍ਤ੍ਵਾ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਤਂ ਭਿਕ੍ਖੁਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਸਿਕ੍ਖਾਪਦਂ (ਮਹਾਵ. ੨੮੦) ਪਞ੍ਞਪੇਸਿ. ਏਵਮੇਤਂ ਵਤ੍ਥੁ ਸਮੁਟ੍ਠਿਤਂ. ਅਪਰਭਾਗੇ ਸਤ੍ਥਾ ਜੇਤਵਨੇ ਨਿਸਿਨ੍ਨੋ ਉਪਾਸਿਕਾਯੋ ਠਾਨਨ੍ਤਰੇਸੁ ਠਪੇਨ੍ਤੋ ਸੁਪ੍ਪਿਯਂ ਉਪਾਸਿਕਂ ਗਿਲਾਨੁਪਟ੍ਠਾਕੀਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਕਾਤਿਯਾਨੀਵਤ੍ਥੁ

੨੬੫. ਅਟ੍ਠਮੇ ਅਵੇਚ੍ਚਪ੍ਪਸਨ੍ਨਾਨਨ੍ਤਿ ਅਧਿਗਤੇਨ ਅਚਲਪ੍ਪਸਾਦੇਨ ਸਮਨ੍ਨਾਗਤਾਨਂ ਉਪਾਸਿਕਾਨਂ, ਕਾਤਿਯਾਨੀ, ਅਗ੍ਗਾਤਿ ਦਸ੍ਸੇਤਿ. ਸਾ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਲਗੇਹੇ ਨਿਬ੍ਬਤ੍ਤਾ ਸਤ੍ਥਾਰਂ ਏਕਂ ਉਪਾਸਿਕਂ ਅਵੇਚ੍ਚਪ੍ਪਸਨ੍ਨਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਰਰਘਰਨਗਰੇ ਨਿਬ੍ਬਤ੍ਤਿ, ਕਾਤਿਯਾਨੀਤਿਸ੍ਸਾ ਨਾਮਂ ਅਕਂਸੁ.

ਸਾ ਅਪਰਭਾਗੇ ਵਯਪ੍ਪਤ੍ਤਾ ਕੁਰਰਘਰਿਕਾਯ, ਕਾਲ਼ਿਯਾ ਸਹਾਯਿਕਾ, ਦਲ਼੍ਹਮਿਤ੍ਤਾ ਅਹੋਸਿ. ਯਦਾ ਪਨ ਕੁਟਿਕਣ੍ਣਸੋਣਤ੍ਥੇਰੋ ‘‘ਦਸਬਲਸ੍ਸ ਕਥਿਤਨਿਯਾਮੇਨ ਮਯ੍ਹਮ੍ਪਿ ਧਮ੍ਮਂ ਕਥੇਹੀ’’ਤਿ ਮਾਤਰਾ ਯਾਚਿਤੋ ਰਤ੍ਤਿਭਾਗੇ ਅਨ੍ਤੋਨਗਰੇ ਅਲਙ੍ਕਤਧਮ੍ਮਾਸਨੇ ਨਿਸੀਦਿਤ੍ਵਾ ਮਾਤਰਂ ਕਾਯਸਕ੍ਖਿਂ ਕਤ੍ਵਾ ਧਮ੍ਮਦੇਸਨਂ ਆਰਭਿ, ਤਦਾ ਅਯਂ ਕਾਤਿਯਾਨੀ ਉਪਾਸਿਕਾ ਕਾਲ਼ਿਯਾ ਸਦ੍ਧਿਂ ਗਨ੍ਤ੍ਵਾ ਪਰਿਸਪਰਿਯਨ੍ਤੇ ਧਮ੍ਮਂ ਸੁਣਨ੍ਤੀ ਅਟ੍ਠਾਸਿ. ਤਸ੍ਮਿਂ ਸਮਯੇ ਪਞ੍ਚਮਤ੍ਤਾਨਿ ਚੋਰਸਤਾਨਿ ਅਨ੍ਤੋਨਗਰੇ ਦਿਵਾ ਕਤਸਞ੍ਞਾਯ ਕੋਟਿਤੋ ਪਟ੍ਠਾਯ ਉਮ੍ਮਙ੍ਗਂ ਖਨਿਤ੍ਵਾ ਇਮਿਸ੍ਸਾ ਕਾਤਿਯਾਨਿਯਾ ਘਰਂ ਸਮ੍ਪਾਪੁਣਿਂਸੁ. ਤੇਸਂ ਚੋਰਜੇਟ੍ਠਕੋ ਤੇਹਿ ਸਦ੍ਧਿਂ ਅਪਵਿਸਿਤ੍ਵਾ ‘‘ਕਿਂ ਨੁ ਖੋ ਅਯਂ ਪਰਿਸਾ ਸਨ੍ਨਿਪਤਿਤਾ’’ਤਿ ਵੀਮਂਸਨਤ੍ਥਾਯ ਸੋਣਤ੍ਥੇਰਸ੍ਸ ਧਮ੍ਮਕਥਨਟ੍ਠਾਨਂ ਗਨ੍ਤ੍ਵਾ ਪਰਿਸਪਰਿਯਨ੍ਤੇ ਤਿਟ੍ਠਮਾਨੋ ਇਮਿਸ੍ਸਾ ਕਾਤਿਯਾਨਿਯਾ ਪਿਟ੍ਠਿਪਸ੍ਸੇ ਅਟ੍ਠਾਸਿ.

ਤਸ੍ਮਿਂ ਸਮਯੇ, ਕਾਤਿਯਾਨੀ, ਦਾਸਿਂ ਆਮਨ੍ਤੇਸਿ – ‘‘ਗਚ੍ਛ ਜੇ, ਗੇਹਂ ਪਵਿਸਿਤ੍ਵਾ ਦੀਪਤੇਲਂ ਆਹਰ, ਮਯਂ ਦੀਪੇ ਜਾਲੇਤ੍ਵਾ ਧਮ੍ਮਂ ਸੋਸ੍ਸਾਮਾ’’ਤਿ. ਸਾ ਘਰਂ ਗਨ੍ਤ੍ਵਾ ਉਮ੍ਮਙ੍ਗੇ ਚੋਰੇ ਦਿਸ੍ਵਾ ਦੀਪਤੇਲਂ ਅਗਣ੍ਹਿਤ੍ਵਾਵ ਆਗਨ੍ਤ੍ਵਾ ਅਤ੍ਤਨੋ ਅਯ੍ਯਾਯ ਆਰੋਚੇਸਿ – ‘‘ਅਯ੍ਯੇ, ਗੇਹੇ ਚੋਰਾ ਉਮ੍ਮਙ੍ਗਂ ਖਨਨ੍ਤੀ’’ਤਿ. ਤਂ ਸੁਤ੍ਵਾ ਚੋਰਜੇਟ੍ਠਕੋ ਚਿਨ੍ਤੇਸਿ – ‘‘ਸਚਾਯਂ ਇਮਿਸ੍ਸਾ ਕਥਂ ਗਣ੍ਹਿਤ੍ਵਾ ਗੇਹਂ ਗਮਿਸ੍ਸਤਿ, ਏਤ੍ਥੇਵ ਨਂ ਅਸਿਨਾ ਦ੍ਵੇਧਾ ਛਿਨ੍ਦਿਸ੍ਸਾਮਿ. ਸਚੇ ਪਨ ਗਹਿਤਨਿਮਿਤ੍ਤੇਨੇਵ ਧਮ੍ਮਂ ਸੁਣਿਸ੍ਸਤਿ, ਚੋਰੇਹਿ ਗਹਿਤਭਣ੍ਡਕਮ੍ਪਿ ਪੁਨ ਦਾਪੇਸ੍ਸਾਮੀ’’ਤਿ. ਕਾਤਿਯਾਨੀਪਿ ਖੋ ਦਾਸਿਯਾ ਕਥਂ ਸੁਤ੍ਵਾ, ‘‘ਅਮ੍ਮ, ਮਾ ਸਦ੍ਦਂ ਕਰਿ, ਚੋਰਾ ਨਾਮ ਹਰਨ੍ਤਾ ਅਤ੍ਤਨਾ ਦਿਟ੍ਠਮੇਵ ਹਰਿਸ੍ਸਨ੍ਤਿ, ਅਹਂ ਪਨ ਅਜ੍ਜ ਦੁਲ੍ਲਭਸ੍ਸਵਨਂ ਸੁਣਾਮਿ, ਮਾ ਧਮ੍ਮਸ੍ਸ ਅਨ੍ਤਰਾਯਂ ਕਰੋਹੀ’’ਤਿ ਆਹ. ਚੋਰਜੇਟ੍ਠਕੋ ਤਸ੍ਸਾ ਵਚਨਂ ਸੁਤ੍ਵਾ ਚਿਨ੍ਤੇਸਿ – ‘‘ਇਮਿਨਾ ਅਜ੍ਝਾਸਯੇਨ ਠਿਤਾਯ ਨਾਮ ਗੇਹੇ ਭਣ੍ਡਂ ਹਰਨ੍ਤੇਹਿ ਅਮ੍ਹੇਹਿ ਮਹਾਪਥਵੀ ਪਵਿਸਿਤਬ੍ਬਾ ਭਵੇਯ੍ਯਾ’’ਤਿ. ਸੋ ਤਾਵਦੇਵ ਗਨ੍ਤ੍ਵਾ ਚੋਰੇਹਿ ਗਹਿਤਭਣ੍ਡਂ ਛਡ੍ਡਾਪੇਤ੍ਵਾ ਚੋਰੇਹਿ ਸਦ੍ਧਿਂ ਆਗਨ੍ਤ੍ਵਾ ਧਮ੍ਮਂ ਸੁਣਨ੍ਤੋ ਪਰਿਸਪਰਿਯਨ੍ਤੇ ਅਟ੍ਠਾਸਿ. ਕਾਤਿਯਾਨੀਪਿ ਉਪਾਸਿਕਾ ਥੇਰਸ੍ਸ ਦੇਸਨਾਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ.

ਅਥ ਅਰੁਣੇ ਉਗ੍ਗਤੇ ਚੋਰਜੇਟ੍ਠਕੋ ਗਨ੍ਤ੍ਵਾ ਉਪਾਸਿਕਾਯ ਪਾਦੇਸੁ ਪਤਿਤ੍ਵਾ, ‘‘ਅਯ੍ਯੇ, ਸਬ੍ਬੇਸਂਯੇਵ ਨੋ ਖਮਾਹੀ’’ਤਿ ਆਹ. ਕਿਂ ਪਨ ਤੁਮ੍ਹੇਹਿ ਮਯ੍ਹਂ ਕਤਨ੍ਤਿ? ਸੋ ਸਬ੍ਬਂ ਅਤ੍ਤਨਾ ਕਤਦੋਸਂ ਆਰੋਚੇਸਿ. ਤੇਨ ਹਿ, ਤਾਤਾ, ਖਮਾਮਿ ਤੁਮ੍ਹਾਕਨ੍ਤਿ. ਅਯ੍ਯੇ, ਅਮ੍ਹਾਕਂ ਏਵਂ ਖਮਿਤਂ ਨਾਮ ਨ ਹੋਤਿ, ਤੁਮ੍ਹਾਕਂ ਪਨ ਪੁਤ੍ਤਤ੍ਥੇਰਸ੍ਸ ਸਨ੍ਤਿਕੇ ਸਬ੍ਬੇਸਂਯੇਵ ਨੋ ਪਬ੍ਬਜ੍ਜਂ ਦਾਪੇਹੀਤਿ. ਸਾ ਸਬ੍ਬੇਪਿ ਤੇ ਗਹੇਤ੍ਵਾ ਕੁਟਿਕਣ੍ਣਸੋਣਤ੍ਥੇਰਸ੍ਸ ਸਨ੍ਤਿਕੇ ਪਬ੍ਬਾਜੇਸਿ. ਤੇਪਿ ਖੋ ਚੋਰਾ ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤਾ ਸਬ੍ਬੇਵ ਅਰਹਤ੍ਤਂ ਪਾਪੁਣਿਂਸੁ. ਏਵਮੇਤਂ ਵਤ੍ਥੁ ਸਮੁਟ੍ਠਿਤਂ. ਅਪਰਭਾਗੇ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਉਪਾਸਿਕਾਯੋ ਠਾਨਨ੍ਤਰੇਸੁ ਠਪੇਨ੍ਤੋ ਕਾਤਿਯਾਨਿਂ ਉਪਾਸਿਕਂ ਅਵੇਚ੍ਚਪ੍ਪਸਨ੍ਨਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਨਕੁਲਮਾਤਾਵਤ੍ਥੁ

੨੬੬. ਨਵਮੇ ਵਿਸ੍ਸਾਸਿਕਾਨਨ੍ਤਿ ਵਿਸ੍ਸਾਸਕਥਂ ਕਥੇਨ੍ਤੀਨਂ ਉਪਾਸਿਕਾਨਂ, ਨਕੁਲਮਾਤਾ ਗਹਪਤਾਨੀ, ਅਗ੍ਗਾਤਿ ਦਸ੍ਸੇਤਿ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਸਬ੍ਬਂ ਹੇਟ੍ਠਾ ਉਪਾਸਕਪਾਲ਼ਿਯਂ ਵੁਤ੍ਤਮੇਵ. ਕੇਵਲਂ ਇਧ ਨਕੁਲਮਾਤਰਂ ਧੁਰਂ ਕਤ੍ਵਾ ਵੇਦਿਤਬ੍ਬਨ੍ਤਿ.

ਕਾਲ਼ੀਕੁਰਰਘਰਿਕਾਵਤ੍ਥੁ

੨੬੭. ਦਸਮੇ ਅਨੁਸ੍ਸਵਪ੍ਪਸਨ੍ਨਾਨਨ੍ਤਿ ਅਨੁਸ੍ਸਵੇਨੇਵ ਉਪ੍ਪਨ੍ਨੇਨ ਪਸਾਦੇਨ ਸਮਨ੍ਨਾਗਤਾਨਂ ਉਪਾਸਿਕਾਨਂ ਅਨ੍ਤਰੇ, ਕਾਲ਼ੀ ਉਪਾਸਿਕਾ, ਕੁਰਰਘਰਿਕਾ ਅਗ੍ਗਾਤਿ ਦਸ੍ਸੇਤਿ. ਸਾ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤਿਯਂ ਕੁਰਰਘਰਨਗਰੇ ਨਿਬ੍ਬਤ੍ਤਾ ਸਤ੍ਥੁ ਧਮ੍ਮਕਥਂ ਸੁਣਨ੍ਤੀ ਸਤ੍ਥਾਰਂ ਏਕਂ ਉਪਾਸਿਕਂ ਅਨੁਸ੍ਸਵਪ੍ਪਸਨ੍ਨਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਨਗਰੇ ਕੁਲਗੇਹੇ ਨਿਬ੍ਬਤ੍ਤਿ, ਕਾਲ਼ੀਤਿਸ੍ਸਾ ਨਾਮਂ ਅਕਂਸੁ.

ਸਾ ਵਯਪ੍ਪਤ੍ਤਾ ਕੁਰਰਘਰਨਗਰੇ ਕੁਲਗੇਹਂ ਗਤਾ. ਅਥਸ੍ਸਾ ਸਂਵਾਸੇਨ ਗਬ੍ਭੋ ਪਤਿਟ੍ਠਹਿ. ਸਾ ਪਰਿਪੁਣ੍ਣਗਬ੍ਭਾ ‘‘ਪਰੇਸਂ ਗੇਹੇ ਗਬ੍ਭਵੁਟ੍ਠਾਨਂ ਨਾਮ ਅਪ੍ਪਤਿਰੂਪ’’ਨ੍ਤਿ ਅਤ੍ਤਨੋ ਕੁਲਨਗਰਮੇਵ ਆਗਨ੍ਤ੍ਵਾ ਰਤ੍ਤਿਭਾਗਸਮਨਨ੍ਤਰੇ ਅਤ੍ਤਨੋ ਪਾਸਾਦਸ੍ਸ ਉਪਰਿ ਆਕਾਸੇ ਠਿਤਾਨਂ ਸਾਤਾਗਿਰਹੇਮਵਤਾਨਂ ਰਤਨਤ੍ਤਯਸ੍ਸ ਵਣ੍ਣਂ ਕਥੇਨ੍ਤਾਨਂ ਕਥਂ ਸੁਤ੍ਵਾ ਅਨੁਸ੍ਸਵਿਕਪ੍ਪਸਾਦਂ ਉਪ੍ਪਾਦੇਤ੍ਵਾ ਸਤ੍ਥੁ ਅਦਸ੍ਸਨੇਨੇਵ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ, ਅਪਰਭਾਗੇ ਪਨਸ੍ਸਾ ਗਬ੍ਭਵੁਟ੍ਠਾਨਂ ਅਹੋਸੀਤਿ ਸਬ੍ਬਂ ਵਤ੍ਥੁ ਹੇਟ੍ਠਾ ਵਿਤ੍ਥਾਰਿਤਮੇਵ. ਅਪਰਭਾਗੇ ਪਨ ਸਤ੍ਥਾ ਜੇਤਵਨੇ ਭਿਕ੍ਖੁਸਙ੍ਘਮਜ੍ਝੇ ਨਿਸੀਦਿਤ੍ਵਾ ਉਪਾਸਿਕਾਯੋ ਠਾਨਨ੍ਤਰੇਸੁ ਠਪੇਨ੍ਤੋ ਇਮਂ ਉਪਾਸਿਕਂ ਅਨੁਸ੍ਸਵਪ੍ਪਸਨ੍ਨਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਦਸਸੁਤ੍ਤਪਰਿਮਾਣਾਯ ਉਪਾਸਿਕਾਪਾਲ਼ਿਯਾ ਵਣ੍ਣਨਾ ਨਿਟ੍ਠਿਤਾ.

ਏਤ੍ਤਾਵਤਾ ਚ ਮਨੋਰਥਪੂਰਣਿਯਾ

ਅਙ੍ਗੁਤ੍ਤਰਨਿਕਾਯ-ਅਟ੍ਠਕਥਾਯ

ਸਬ੍ਬਾਪਿ ਏਤਦਗ੍ਗਪਾਲ਼ਿਵਣ੍ਣਨਾ ਨਿਟ੍ਠਿਤਾ.