(੧੪) ੩. ਤਤਿਯਏਤਦਗ੍ਗਵਗ੍ਗੋ

੨੦੯. ਤਤਿਯਵਗ੍ਗਸ੍ਸ ਪਠਮੇ ਸਿਕ੍ਖਾਕਾਮਾਨਨ੍ਤਿ ਤਿਸ੍ਸੋ ਸਿਕ੍ਖਾ ਕਾਮਯਮਾਨਾਨਂ ਸਮ੍ਪਿਯਾਯਿਤ੍ਵਾ ਸਿਕ੍ਖਨ੍ਤਾਨਨ੍ਤਿ ਅਤ੍ਥੋ. ਰਾਹੁਲੋਤਿ ਅਤ੍ਤਨੋ ਪੁਤ੍ਤਂ ਰਾਹੁਲਤ੍ਥੇਰਂ ਦਸ੍ਸੇਤਿ. ਥੇਰੋ ਕਿਰ ਪਬ੍ਬਜਿਤਦਿਵਸਤੋ ਪਟ੍ਠਾਯ ਪਾਤੋਵ ਉਟ੍ਠਹਨ੍ਤੋ ਹਤ੍ਥਪੂਰਂ ਵਾਲਿਕਂ ਉਕ੍ਖਿਪਿਤ੍ਵਾ ‘‘ਅਹੋ ਵਤਾਹਂ ਅਜ੍ਜ ਦਸਬਲਸ੍ਸ ਚੇਵ ਆਚਰਿਯੁਪਜ੍ਝਾਯਾਨਞ੍ਚ ਸਨ੍ਤਿਕਾ ਏਤ੍ਤਕਂ ਓਵਾਦਞ੍ਚੇਵ ਅਨੁਸਾਸਨਿਞ੍ਚ ਲਭੇਯ੍ਯ’’ਨ੍ਤਿ ਪਤ੍ਥੇਤਿ. ਤਸ੍ਮਾ ਸਿਕ੍ਖਾਕਾਮਾਨਂ ਅਗ੍ਗੋ ਨਾਮ ਜਾਤੋਤਿ.

੨੧੦. ਦੁਤਿਯੇ ਸਦ੍ਧਾਪਬ੍ਬਜਿਤਾਨਨ੍ਤਿ ਸਦ੍ਧਾਯ ਪਬ੍ਬਜਿਤਾਨਂ. ਰਟ੍ਠਪਾਲੋਤਿ ਰਟ੍ਠਂ ਪਾਲੇਤੁਂ ਸਮਤ੍ਥੋ, ਭਿਨ੍ਨਂ ਵਾ ਰਟ੍ਠਂ ਸਨ੍ਧਾਰੇਤੁਂ ਸਮਤ੍ਥੇ ਕੁਲੇ ਜਾਤੋਤਿਪਿ ਰਟ੍ਠਪਾਲੋਤਿ ਸਙ੍ਖਂ ਗਤੋ. ਸੋ ਹਿ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਚੁਦ੍ਦਸਭਤ੍ਤਚ੍ਛੇਦੇ ਕਤ੍ਵਾ ਮਾਤਾਪਿਤਰੋ ਪਬ੍ਬਜ੍ਜਂ ਅਨੁਜਾਨਾਪੇਤ੍ਵਾ ਪਬ੍ਬਜਿਤੋ. ਤਸ੍ਮਾ ਸਦ੍ਧਾਪਬ੍ਬਜਿਤਾਨਂ ਅਗ੍ਗੋ ਨਾਮ ਜਾਤੋ.

ਰਾਹੁਲ-ਰਟ੍ਠਪਾਲਤ੍ਥੇਰਵਤ੍ਥੁ

ਇਮੇਸਂ ਪਨ ਉਭਿਨ੍ਨਮ੍ਪਿ ਥੇਰਾਨਂ ਪਞ੍ਹਕਮ੍ਮੇ ਅਯਮਨੁਪੁਬ੍ਬਿਕਥਾ – ਏਤੇ ਕਿਰ ਦ੍ਵੇਪਿ ਅਤੀਤੇ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤੀਨਗਰੇ ਗਹਪਤਿਮਹਾਸਾਲਕੁਲੇ ਨਿਬ੍ਬਤ੍ਤਿਂਸੁ. ਤੇਸਂ ਦਹਰਕਾਲੇ ਨਾਮਂ ਵਾ ਗੋਤ੍ਤਂ ਵਾ ਨ ਕਥਿਯਤਿ. ਵਯਪ੍ਪਤ੍ਤਾ ਪਨ ਘਰਾਵਾਸੇ ਪਤਿਟ੍ਠਾਯ ਅਤ੍ਤਨੋ ਅਤ੍ਤਨੋ ਪਿਤੁ ਅਚ੍ਚਯੇਨ ਉਭੋਪਿ ਅਤ੍ਤਨੋ ਅਤ੍ਤਨੋ ਰਤਨਕੋਟ੍ਠਾਗਾਰਕਮ੍ਮਿਕੇ ਪਕ੍ਕੋਸਾਪੇਤ੍ਵਾ ਅਪਰਿਮਾਣਂ ਧਨਂ ਦਿਸ੍ਵਾ – ‘‘ਇਮਂ ਏਤ੍ਤਕਂ ਧਨਰਾਸਿਂ ਅਯ੍ਯਕਪਯ੍ਯਕਾਦਯੋ ਅਤ੍ਤਨਾ ਸਦ੍ਧਿਂ ਗਹੇਤ੍ਵਾ ਗਨ੍ਤੁਂ ਨਾਸਕ੍ਖਿਂਸੁ, ਅਮ੍ਹੇਹਿ ਦਾਨਿ ਯੇਨ ਕੇਨਚਿ ਉਪਾਯੇਨ ਇਮਂ ਧਨਂ ਗਹੇਤ੍ਵਾ ਗਨ੍ਤੁਂ ਵਟ੍ਟਤੀ’’ਤਿ ਤੇ ਉਭੋਪਿ ਜਨਾ ਚਤੂਸੁ ਠਾਨੇਸੁ ਕਪਣਦ੍ਧਿਕਾਦੀਨਂ ਮਹਾਦਾਨਂ ਦਾਤੁਂ ਆਰਦ੍ਧਾ. ਏਕੋ ਅਤ੍ਤਨੋ ਦਾਨਗ੍ਗੇ ਆਗਤਾਗਤਜਨਂ ਪੁਚ੍ਛਿਤ੍ਵਾ ਯਾਗੁਖਜ੍ਜਕਾਦੀਸੁ ਯਸ੍ਸ ਯਂ ਪਟਿਭਾਤਿ, ਤਸ੍ਸ ਤਂ ਅਦਾਸਿ, ਤਸ੍ਸ ਤੇਨੇਵ ਕਾਰਣੇਨ ਆਗਤਪਾਕੋਤਿ ਨਾਮਂ ਜਾਤਂ. ਇਤਰੋ ਅਪੁਚ੍ਛਿਤ੍ਵਾਵ ਗਹਿਤਗਹਿਤਭਾਜਨਂ ਪੂਰੇਤ੍ਵਾ ਪੂਰੇਤ੍ਵਾ ਦੇਤਿ, ਤਸ੍ਸਪਿ ਤੇਨੇਵ ਕਾਰਣੇਨ ਅਨਗ੍ਗਪਾਕੋਤਿ ਨਾਮਂ ਜਾਤਂ, ਅਪ੍ਪਮਾਣਪਾਕੋਤਿ ਅਤ੍ਥੋ.

ਤੇ ਉਭੋਪਿ ਏਕਦਿਵਸਂ ਪਾਤੋਵ ਮੁਖਧੋਵਨਤ੍ਥਂ ਬਹਿਗਾਮਂ ਅਗਮਂਸੁ. ਤਸ੍ਮਿਂ ਸਮਯੇ ਹਿਮਵਨ੍ਤਤੋ ਦ੍ਵੇ ਮਹਿਦ੍ਧਿਕਾ ਤਾਪਸਾ ਭਿਕ੍ਖਾਚਾਰਤ੍ਥਾਯ ਆਕਾਸੇਨ ਆਗਨ੍ਤ੍ਵਾ ਤੇਸਂ ਸਹਾਯਕਾਨਂ ਅਵਿਦੂਰੇ ਓਤਰਿਤ੍ਵਾ ‘‘ਮਾ ਨੋ ਏਤੇ ਪਸ੍ਸਿਂਸੂ’’ਤਿ ਏਕਪਸ੍ਸੇ ਅਟ੍ਠਂਸੁ. ਤੇ ਉਭੋਪਿ ਜਨਾ ਤੇਸਂ ਲਾਬੁਭਾਜਨਾਦਿਪਰਿਕ੍ਖਾਰਂ ਸਂਵਿਧਾਯ ਅਨ੍ਤੋਗਾਮਂ ਸਨ੍ਧਾਯ ਭਿਕ੍ਖਾਯ ਗਤਾਨਂ ਸਨ੍ਤਿਕਂ ਆਗਮ੍ਮ ਵਨ੍ਦਿਂਸੁ. ਅਥ ਨੇ ਤਾਪਸਾ ‘‘ਕਾਯ ਵੇਲਾਯ ਆਗਤਤ੍ਥ ਮਹਾਪੁਞ੍ਞਾ’’ਤਿ ਆਹਂਸੁ. ਤੇ ‘‘ਅਧੁਨਾਵ, ਭਨ੍ਤੇ’’ਤਿ ਵਤ੍ਵਾ ਤੇਸਂ ਹਤ੍ਥਤੋ ਲਾਬੁਭਾਜਨਂ ਗਹੇਤ੍ਵਾ ਅਤ੍ਤਨੋ ਅਤ੍ਤਨੋ ਗੇਹਂ ਨੇਤ੍ਵਾ ਭਤ੍ਤਕਿਚ੍ਚਪਰਿਯੋਸਾਨੇ ਨਿਬਦ੍ਧਂ ਭਿਕ੍ਖਾਗਹਣਤ੍ਥਂ ਪਟਿਞ੍ਞਂ ਗਣ੍ਹਿਂਸੁ.

ਤੇਸੁ ਏਕੋ ਤਾਪਸੋ ਸਪਰਿਲ਼ਾਹਕਾਯਧਾਤੁਕੋ ਹੋਤਿ. ਸੋ ਅਤ੍ਤਨੋ ਆਨੁਭਾਵੇਨ ਮਹਾਸਮੁਦ੍ਦਉਦਕਂ ਦ੍ਵੇਧਾ ਕਤ੍ਵਾ ਪਥਵਿਨ੍ਧਰਨਾਗਰਾਜਸ੍ਸ ਭਵਨਂ ਗਨ੍ਤ੍ਵਾ ਦਿਵਾਵਿਹਾਰਂ ਨਿਸੀਦਤਿ. ਸੋ ਉਤੁਸਪ੍ਪਾਯਂ ਗਹੇਤ੍ਵਾ ਪਚ੍ਚਾਗਨ੍ਤ੍ਵਾ ਅਤ੍ਤਨੋ ਉਪਟ੍ਠਾਕਸ੍ਸ ਗੇਹੇ ਭਤ੍ਤਾਨੁਮੋਦਨਂ ਕਰੋਨ੍ਤੋ ‘‘ਪਥਵਿਨ੍ਧਰਨਾਗਭਵਨਂ ਵਿਯ ਹੋਤੂ’’ਤਿ ਵਦਤਿ. ਅਥ ਨਂ ਏਕਦਿਵਸਂ ਉਪਟ੍ਠਾਕੋ ਪੁਚ੍ਛਿ – ‘‘ਭਨ੍ਤੇ, ਤੁਮ੍ਹੇ ਅਨੁਮੋਦਨਂ ਕਰੋਨ੍ਤਾ ‘ਪਥਵਿਨ੍ਧਰਨਾਗਭਵਨਂ ਵਿਯ ਹੋਤੂ’ਤਿ ਵਦਥ, ਮਯਮਸ੍ਸ ਅਤ੍ਥਂ ਨ ਜਾਨਾਮ, ਕਿਂ ਵੁਤ੍ਤਂ ਹੋਤਿ ਇਦਂ, ਭਨ੍ਤੇ’’ਤਿ? ਆਮ, ਕੁਟੁਮ੍ਬਿਯ ਅਹਂ ‘‘ਤੁਮ੍ਹਾਕਂ ਸਮ੍ਪਤ੍ਤਿ ਪਥਵਿਨ੍ਧਰਨਾਗਰਾਜਸਮ੍ਪਤ੍ਤਿਸਦਿਸਾ ਹੋਤੂ’’ਤਿ ਵਦਾਮੀਤਿ. ਕੁਟੁਮ੍ਬਿਕੋ ਤਤੋ ਪਟ੍ਠਾਯ ਪਥਵਿਨ੍ਧਰਨਾਗਰਾਜਭਵਨੇ ਚਿਤ੍ਤਂ ਠਪੇਸਿ.

ਇਤਰੋ ਤਾਪਸੋ ਤਾਵਤਿਂਸਭਵਨਂ ਗਨ੍ਤ੍ਵਾ ਸੁਞ੍ਞੇ ਸੇਰਿਸਕਵਿਮਾਨੇ ਦਿਵਾਵਿਹਾਰਂ ਕਰੋਤਿ. ਸੋ ਆਗਚ੍ਛਨ੍ਤੋ ਗਚ੍ਛਨ੍ਤੋ ਚ ਸਕ੍ਕਸ੍ਸ ਦੇਵਰਾਜਸ੍ਸ ਸਮ੍ਪਤ੍ਤਿਂ ਦਿਸ੍ਵਾ ਅਤ੍ਤਨੋ ਉਪਟ੍ਠਾਕਸ੍ਸ ਅਨੁਮੋਦਨਂ ਕਰੋਨ੍ਤੋ ‘‘ਸਕ੍ਕਵਿਮਾਨਂ ਵਿਯ ਹੋਤੂ’’ਤਿ ਵਦਤਿ. ਅਥ ਨਂ ਸੋਪਿ ਕੁਟੁਮ੍ਬਿਯੋ ਇਤਰੋ ਸਹਾਯਕੋ ਤਂ ਤਾਪਸਂ ਵਿਯ ਪੁਚ੍ਛਿ. ਸੋ ਤਸ੍ਸ ਵਚਨਂ ਸੁਤ੍ਵਾ ਸਕ੍ਕਭਵਨੇ ਚਿਤ੍ਤਂ ਠਪੇਸਿ. ਤੇ ਉਭੋਪਿ ਪਤ੍ਥਿਤਟ੍ਠਾਨੇਸੁਯੇਵ ਨਿਬ੍ਬਤ੍ਤਾ.

ਪਥਵਿਨ੍ਧਰਭਵਨੇ ਨਿਬ੍ਬਤ੍ਤੋ ਪਥਵਿਨ੍ਧਰਨਾਗਰਾਜਾ ਨਾਮ ਜਾਤੋ. ਸੋ ਨਿਬ੍ਬਤ੍ਤਕ੍ਖਣੇ ਅਤ੍ਤਨੋ ਅਤ੍ਤਭਾਵਂ ਦਿਸ੍ਵਾ ‘‘ਅਮਨਾਪਸ੍ਸ ਵਤ ਮੇ ਠਾਨਸ੍ਸ ਕੁਲੁਪਕਤਾਪਸੋ ਵਣ੍ਣਂ ਕਥੇਸਿ, ਉਰੇਨ ਪਰਿਸਕ੍ਕਿਤ੍ਵਾ ਵਿਚਰਣਟ੍ਠਾਨਮੇਤਂ, ਨੂਨ ਸੋ ਅਞ੍ਞਂ ਠਾਨਂ ਨ ਜਾਨਾਤੀ’’ਤਿ ਵਿਪ੍ਪਟਿਸਾਰੀ ਅਹੋਸਿ. ਅਥਸ੍ਸ ਤਂਖਣੇਯੇਵ ਅਲਙ੍ਕਤਪਟਿਯਤ੍ਤਾਨਿ ਨਾਗਨਾਟਕਾਨਿ ਸਬ੍ਬਦਿਸਾਸੁ ਤੂਰਿਯਾਨਿ ਪਗ੍ਗਣ੍ਹਿਂਸੁ. ਸੋ ਤਸ੍ਮਿਂਯੇਵ ਖਣੇ ਤਂ ਅਤ੍ਤਭਾਵਂ ਵਿਜਹਿਤ੍ਵਾ ਮਾਣਵਕਵਣ੍ਣੀ ਅਹੋਸਿ. ਅਨ੍ਵਦ੍ਧਮਾਸਞ੍ਚ ਚਤ੍ਤਾਰੋ ਮਹਾਰਾਜਾਨੋ ਸਕ੍ਕਸ੍ਸ ਉਪਟ੍ਠਾਨਂ ਗਚ੍ਛਨ੍ਤਿ. ਤਸ੍ਮਾ ਸੋਪਿ ਵਿਰੂਪਕ੍ਖੇਨ ਨਾਗਰਞ੍ਞਾ ਸਦ੍ਧਿਂ ਸਕ੍ਕਸ੍ਸ ਉਪਟ੍ਠਾਨਂ ਗਤੋ. ਸਕ੍ਕੋ ਤਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ਸਞ੍ਜਾਨਿ. ਅਥ ਨਂ ਸਮੀਪੇ ਆਗਨ੍ਤ੍ਵਾ ਠਿਤਕਾਲੇ ‘‘ਕਹਂ ਨਿਬ੍ਬਤ੍ਤੋਸਿ ਸਮ੍ਮਾ’’ਤਿ ਪੁਚ੍ਛਿ. ਮਾ ਕਥੇਸਿ, ਮਹਾਰਾਜ, ਉਰੇਨ ਪਰਿਸਕ੍ਕਨਟ੍ਠਾਨੇ ਨਿਬ੍ਬਤ੍ਤੋਮ੍ਹਿ, ਤੁਮ੍ਹੇ ਪਨ ਕਲ੍ਯਾਣਮਿਤ੍ਤਂ ਲਭਿਤ੍ਥਾਤਿ. ਸਮ੍ਮ, ਤ੍ਵਂ ‘‘ਅਟ੍ਠਾਨੇ ਨਿਬ੍ਬਤ੍ਤੋਮ੍ਹੀ’’ਤਿ ਮਾ ਵਿਤਕ੍ਕਯਿ, ਪਦੁਮੁਤ੍ਤਰਦਸਬਲੋ ਲੋਕੇ ਨਿਬ੍ਬਤ੍ਤੋ, ਤਸ੍ਸ ਅਧਿਕਾਰਕਮ੍ਮਂ ਕਤ੍ਵਾ ਇਮਂਯੇਵ ਠਾਨਂ ਪਤ੍ਥੇਹਿ, ਉਭੋ ਸੁਖਂ ਵਸਿਸ੍ਸਾਮਾਤਿ. ਸੋ ‘‘ਏਵਂ, ਦੇਵ, ਕਰਿਸ੍ਸਾਮੀ’’ਤਿ ਗਨ੍ਤ੍ਵਾ ਪਦੁਮੁਤ੍ਤਰਦਸਬਲਂ ਨਿਮਨ੍ਤੇਤ੍ਵਾ ਅਤ੍ਤਨੋ ਨਾਗਭਵਨੇ ਨਾਗਪਰਿਸਾਯ ਸਦ੍ਧਿਂ ਸਬ੍ਬਰਤ੍ਤਿਂ ਸਕ੍ਕਾਰਸਮ੍ਮਾਨਂ ਸਜ੍ਜੇਸਿ.

ਸਤ੍ਥਾ ਪੁਨਦਿਵਸੇ ਉਟ੍ਠਿਤੇ ਅਰੁਣੇ ਅਤ੍ਤਨੋ ਉਪਟ੍ਠਾਕਂ ਸੁਮਨਤ੍ਥੇਰਂ ਆਮਨ੍ਤੇਸਿ – ‘‘ਸੁਮਨ, ਅਜ੍ਜ ਤਥਾਗਤੋ ਦੂਰਂ ਭਿਕ੍ਖਾਚਾਰਂ ਗਮਿਸ੍ਸਤਿ, ਮਾ ਪੁਥੁਜ੍ਜਨਭਿਕ੍ਖੂ ਆਗਚ੍ਛਨ੍ਤੁ, ਤੇਪਿਟਕਾ ਪਟਿਸਮ੍ਭਿਦਾਪ੍ਪਤ੍ਤਾ ਛਲ਼ਭਿਞ੍ਞਾਵ ਆਗਚ੍ਛਨ੍ਤੂ’’ਤਿ. ਥੇਰੋ ਸਤ੍ਥੁ ਵਚਨਂ ਸੁਤ੍ਵਾ ਸਬ੍ਬੇਸਂ ਆਰੋਚੇਸਿ. ਸਤ੍ਥਾਰਾ ਸਦ੍ਧਿਂ ਸਤਸਹਸ੍ਸਾ ਭਿਕ੍ਖੂ ਆਕਾਸਂ ਪਕ੍ਖਨ੍ਦਿਂਸੁ. ਪਥਵਿਨ੍ਧਰੋ ਨਾਗਪਰਿਸਾਯ ਸਦ੍ਧਿਂ ਦਸਬਲਸ੍ਸ ਪਚ੍ਚੁਗ੍ਗਮਨਂ ਆਗਤੋ ਸਤ੍ਥਾਰਂ ਪਰਿਵਾਰੇਤ੍ਵਾ ਸਮੁਦ੍ਦਮਤ੍ਥਕੇ ਮਣਿਵਣ੍ਣਾ ਊਮਿਯੋ ਮਦ੍ਦਮਾਨਂ ਭਿਕ੍ਖੁਸਙ੍ਘਂ ਓਲੋਕੇਤ੍ਵਾ ਆਦਿਤੋ ਸਤ੍ਥਾਰਂ, ਪਰਿਯੋਸਾਨੇ ਸਙ੍ਘਨਵਕਂ ਤਥਾਗਤਸ੍ਸ ਪੁਤ੍ਤਂ ਉਪਰੇਵਤਸਾਮਣੇਰਂ ਨਾਮ ਓਲੋਕੇਨ੍ਤੋ ‘‘ਅਨਚ੍ਛਰਿਯੋ ਸੇਸਸਾਵਕਾਨਂ ਏਵਰੂਪੋ ਇਦ੍ਧਾਨੁਭਾਵੋ, ਇਮਸ੍ਸ ਪਨ ਤਰੁਣਬਾਲਦਾਰਕਸ੍ਸ ਏਵਰੂਪੋ ਇਦ੍ਧਾਨੁਭਾਵੋ ਅਤਿਵਿਯ ਅਚ੍ਛਰਿਯੋ’’ਤਿ ਪੀਤਿਪਾਮੋਜ੍ਜਂ ਉਪ੍ਪਾਦੇਸਿ.

ਅਥਸ੍ਸ ਭਵਨੇ ਦਸਬਲੇ ਨਿਸਿਨ੍ਨੇ ਸੇਸਭਿਕ੍ਖੂਸੁ ਕੋਟਿਤੋ ਪਟ੍ਠਾਯ ਨਿਸੀਦਨ੍ਤੇਸੁ ਸਤ੍ਥੁ ਸਮ੍ਮੁਖਟ੍ਠਾਨੇਯੇਵ ਉਪਰੇਵਤਸਾਮਣੇਰਸ੍ਸ ਆਸਨਂ ਪਾਪੁਣਿ. ਨਾਗਰਾਜਾ ਯਾਗੁਂ ਦੇਨ੍ਤੋਪਿ ਖਜ੍ਜਕਂ ਦੇਨ੍ਤੋਪਿ ਸਕਿਂ ਦਸਬਲਂ ਓਲੋਕੇਤਿ, ਸਕਿਂ ਉਪਰੇਵਤਸਾਮਣੇਰਂ. ਤਸ੍ਸ ਕਿਰ ਸਰੀਰੇ ਸਤ੍ਥੁ ਸਰੀਰੇ ਵਿਯ ਦ੍ਵਤ੍ਤਿਂਸ ਮਹਾਪੁਰਿਸਲਕ੍ਖਣਾਨਿ ਪਞ੍ਞਾਯਨ੍ਤਿ. ਤਤੋ ਨਾਗਰਾਜਾ ‘‘ਅਯਂ ਸਾਮਣੇਰੋ ਬੁਦ੍ਧਾਨਂ ਸਦਿਸੋ ਪਞ੍ਞਾਯਤਿ, ਕਿਂ ਨੁ ਖੋ ਹੋਤੀ’’ਤਿ ਅਵਿਦੂਰੇ ਨਿਸਿਨ੍ਨਂ ਅਞ੍ਞਤਰਂ ਭਿਕ੍ਖੁਂ ਪੁਚ੍ਛਿ – ‘‘ਅਯਂ, ਭਨ੍ਤੇ, ਸਾਮਣੇਰੋ ਦਸਬਲਸ੍ਸ ਕਿਂ ਹੋਤੀ’’ਤਿ? ਪੁਤ੍ਤੋ, ਮਹਾਰਾਜਾਤਿ. ਸੋ ਚਿਨ੍ਤੇਸਿ – ‘‘ਮਹਾ ਵਤਾਯਂ ਭਿਕ੍ਖੁ, ਏਵਰੂਪਸ੍ਸ ਸੋਭਗ੍ਗਪ੍ਪਤ੍ਤਸ੍ਸ ਤਥਾਗਤਸ੍ਸ ਪੁਤ੍ਤਭਾਵਂ ਲਭਿ. ਸਰੀਰਮ੍ਪਿਸ੍ਸ ਏਕਦੇਸੇਨ ਬੁਦ੍ਧਾਨਂ ਸਰੀਰਸਦਿਸਂ ਪਞ੍ਞਾਯਤਿ, ਮਯਾਪਿ ਅਨਾਗਤੇ ਏਵਰੂਪੇਨ ਭਵਿਤੁਂ ਵਟ੍ਟਤੀ’’ਤਿ ਸਤ੍ਤਾਹਂ ਮਹਾਦਾਨਂ ਦਤ੍ਵਾ, ‘‘ਭਨ੍ਤੇ, ਅਹਂ ਇਮਸ੍ਸ ਅਧਿਕਾਰਕਮ੍ਮਸ੍ਸਾਨੁਭਾਵੇਨ ਅਯਂ ਉਪਰੇਵਤੋ ਵਿਯ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਪੁਤ੍ਤੋ ਭਵੇਯ੍ਯ’’ਨ੍ਤਿ ਪਤ੍ਥਨਂ ਅਕਾਸਿ. ਸਤ੍ਥਾ ਅਨਨ੍ਤਰਾਯਂ ਦਿਸ੍ਵਾ ‘‘ਅਨਾਗਤੇ ਗੋਤਮਬੁਦ੍ਧਸ੍ਸ ਪੁਤ੍ਤੋ ਭਵਿਸ੍ਸਸੀ’’ਤਿ ਬ੍ਯਾਕਰਿਤ੍ਵਾ ਪਕ੍ਕਾਮਿ.

ਪਥਵਿਨ੍ਧਰੋਪਿ ਪੁਨ ਅਦ੍ਧਮਾਸੇ ਸਮ੍ਪਤ੍ਤੇ ਵਿਰੂਪਕ੍ਖੇਨ ਸਦ੍ਧਿਂ ਸਕ੍ਕਸ੍ਸ ਉਪਟ੍ਠਾਨਂ ਗਤੋ. ਅਥ ਨਂ ਸਮੀਪੇ ਠਿਤਂ ਸਕ੍ਕੋ ਪੁਚ੍ਛਿ – ‘‘ਪਤ੍ਥਿਤੋ ਤੇ, ਸਮ੍ਮ, ਅਯਂ ਦੇਵਲੋਕੋ’’ਤਿ? ਨ ਪਤ੍ਥਿਤੋ ਮਹਾਰਾਜਾਤਿ. ਕਿਂ ਦੋਸਂ ਅਦ੍ਦਸਾਤਿ? ਦੋਸੋ ਨਤ੍ਥਿ, ਮਹਾਰਾਜ, ਅਹਂ ਪਨ ਦਸਬਲਸ੍ਸ ਪੁਤ੍ਤਂ ਉਪਰੇਵਤਸਾਮਣੇਰਂ ਪਸ੍ਸਿਂ. ਤਸ੍ਸ ਮੇ ਦਿਟ੍ਠਕਾਲਤੋ ਪਟ੍ਠਾਯ ਅਞ੍ਞਤ੍ਥ ਚਿਤ੍ਤਂ ਨ ਨਮਿ, ਸ੍ਵਾਹਂ ‘‘ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਏਵਰੂਪੋ ਪੁਤ੍ਤੋ ਭਵੇਯ੍ਯ’’ਨ੍ਤਿ ਪਤ੍ਥਨਂ ਅਕਾਸਿਂ. ਤ੍ਵਮ੍ਪਿ, ਮਹਾਰਾਜ, ਏਕਂ ਪਤ੍ਥਨਂ ਕਰੋਹਿ, ਤੇ ਮਯਂ ਨਿਬ੍ਬਤ੍ਤਟ੍ਠਾਨੇ ਨ ਵਿਨਾ ਭਵਿਸ੍ਸਾਮਾਤਿ. ਸਕ੍ਕੋ ਤਸ੍ਸ ਵਚਨਂ ਸਮ੍ਪਟਿਚ੍ਛਿਤ੍ਵਾ ਏਕਂ ਮਹਾਨੁਭਾਵਂ ਭਿਕ੍ਖੁਂ ਦਿਸ੍ਵਾ ‘‘ਕਤਰਕੁਲਾ ਨੁ ਖੋ ਨਿਕ੍ਖਮਿਤ੍ਵਾ ਅਯਂ ਕੁਲਪੁਤ੍ਤੋ ਪਬ੍ਬਜਿਤੋ’’ਤਿ ਆਵਜ੍ਜੇਨ੍ਤੋ ‘‘ਅਯਂ ਭਿਨ੍ਨਂ ਰਟ੍ਠਂ ਸਨ੍ਧਾਰੇਤੁਂ ਸਮਤ੍ਥਸ੍ਸ ਕੁਲਸ੍ਸ ਪੁਤ੍ਤੋ ਹੁਤ੍ਵਾ ਚੁਦ੍ਦਸ ਭਤ੍ਤਚ੍ਛੇਦੇ ਕਤ੍ਵਾ ਮਾਤਾਪਿਤਰੋ ਪਬ੍ਬਜ੍ਜਂ ਅਨੁਜਾਨਾਪੇਤ੍ਵਾ ਪਬ੍ਬਜਿਤੋ’’ਤਿ ਅਞ੍ਞਾਸਿ. ਞਤ੍ਵਾ ਚ ਪਨ ਅਜਾਨਨ੍ਤੋ ਵਿਯ ਦਸਬਲਂ ਪੁਚ੍ਛਿਤ੍ਵਾ ਸਤ੍ਤਾਹਂ ਮਹਾਸਕ੍ਕਾਰਂ ਕਤ੍ਵਾ, ‘‘ਭਨ੍ਤੇ, ਅਹਂ ਇਮਸ੍ਸ ਕਲ੍ਯਾਣਕਮ੍ਮਸ੍ਸ ਨਿਸ੍ਸਨ੍ਦੇਨ ਤੁਮ੍ਹਾਕਂ ਸਾਸਨੇ ਅਯਂ ਕੁਲਪੁਤ੍ਤੋ ਵਿਯ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਸਾਸਨੇ ਸਦ੍ਧਾਪਬ੍ਬਜਿਤਾਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਪਤ੍ਥਨਂ ਅਕਾਸਿ. ਸਤ੍ਥਾ ਅਨਨ੍ਤਰਾਯਂ ਦਿਸ੍ਵਾ ‘‘ਤ੍ਵਂ, ਮਹਾਰਾਜ, ਅਨਾਗਤੇ ਗੋਤਮਸ੍ਸ ਬੁਦ੍ਧਸ੍ਸ ਸਾਸਨੇ ਸਦ੍ਧਾਪਬ੍ਬਜਿਤਾਨਂ ਅਗ੍ਗੋ ਭਵਿਸ੍ਸਸੀ’’ਤਿ ਬ੍ਯਾਕਰਿਤ੍ਵਾ ਪਕ੍ਕਾਮਿ. ਸਕ੍ਕੋਪਿ ਅਤ੍ਤਨੋ ਦੇਵਪੁਰਮੇਵ ਗਤੋ.

ਤੇ ਉਭੋਪਿ ਨਿਬ੍ਬਤ੍ਤਟ੍ਠਾਨਤੋ ਚਵਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤਾ ਅਨੇਕਸਹਸ੍ਸਕਪ੍ਪੇ ਅਤਿਕ੍ਕਮਿਂਸੁ. ਇਤੋ ਪਨ ਦ੍ਵਾਨਵੁਤਿਕਪ੍ਪਮਤ੍ਥਕੇ ਫੁਸ੍ਸੋ ਨਾਮ ਬੁਦ੍ਧੋ ਲੋਕੇ ਉਦਪਾਦਿ. ਤਸ੍ਸ ਪਿਤਾ ਮਹਿਨ੍ਦੋ ਨਾਮ ਰਾਜਾ ਅਹੋਸਿ, ਵੇਮਾਤਿਕਾ ਤਯੋ ਕਨਿਟ੍ਠਭਾਤਰੋ. ਰਾਜਾ ਦਿਵਸੇ ਦਿਵਸੇ ‘‘ਮਯ੍ਹਂਯੇਵ ਬੁਦ੍ਧੋ ਮਯ੍ਹਂ ਧਮ੍ਮੋ ਮਯ੍ਹਂ ਸਙ੍ਘੋ’’ਤਿ ਮਮਾਯਨ੍ਤੋ ਸਯਮੇਵ ਦਸਬਲਂ ਨਿਬਦ੍ਧਂ ਭੋਜਨਂ ਭੋਜੇਤਿ.

ਅਥਸ੍ਸ ਏਕਦਿਵਸਂ ਪਚ੍ਚਨ੍ਤੋ ਕੁਪਿਤੋ. ਸੋ ਪੁਤ੍ਤੇ ਆਮਨ੍ਤੇਸਿ – ‘‘ਤਾਤਾ, ਪਚ੍ਚਨ੍ਤੋ ਕੁਪਿਤੋ, ਤੁਮ੍ਹੇਹਿ ਵਾ ਮਯਾ ਵਾ ਗਨ੍ਤਬ੍ਬਂ. ਯਦਿ ਅਹਂ ਗਚ੍ਛਾਮਿ, ਤੁਮ੍ਹੇਹਿ ਇਮਿਨਾ ਨਿਯਾਮੇਨ ਦਸਬਲੋ ਪਰਿਚਰਿਤਬ੍ਬੋ’’ਤਿ. ਤੇ ਤਯੋਪਿ ਏਕਪ੍ਪਹਾਰੇਨੇਵ ਆਹਂਸੁ – ‘‘ਤਾਤ, ਤੁਮ੍ਹਾਕਂ ਗਮਨਕਿਚ੍ਚਂ ਨਤ੍ਥਿ, ਮਯਂ ਚੋਰੇ ਵਿਧਮਿਸ੍ਸਾਮਾ’’ਤਿ ਪਿਤਰਂ ਵਨ੍ਦਿਤ੍ਵਾ ਪਚ੍ਚਨ੍ਤਂ ਗਨ੍ਤ੍ਵਾ ਚੋਰੇ ਵਿਧਮਿਤ੍ਵਾ ਵਿਜਿਤਸਙ੍ਗਾਮਾ ਹੁਤ੍ਵਾ ਨਿਵਤ੍ਤਿਂਸੁ. ਤੇ ਅਨ੍ਤਰਾਮਗ੍ਗੇ ਪਾਦਮੂਲਿਕੇਹਿ ਸਦ੍ਧਿਂ ਮਨ੍ਤਯਿਂਸੁ – ‘‘ਤਾਤਾ, ਅਮ੍ਹਾਕਂ ਗਤਕ੍ਖਣੇਯੇਵ ਪਿਤਾ ਵਰਂ ਦਸ੍ਸਤਿ, ਕਤਰਂ ਵਰਂ ਗਣ੍ਹਾਮਾ’’ਤਿ? ਅਯ੍ਯਾ, ਤੁਮ੍ਹਾਕਂ ਪਿਤੁ ਅਚ੍ਚਯੇਨ ਦੁਲ੍ਲਭਂ ਨਾਮ ਨਤ੍ਥਿ, ਤੁਮ੍ਹਾਕਂ ਪਨ ਜੇਟ੍ਠਭਾਤਿਕਂ ਫੁਸ੍ਸਬੁਦ੍ਧਂ ਪਟਿਜਗ੍ਗਨਵਰਂ ਗਣ੍ਹਥਾ’’ਤਿ ਆਹਂਸੁ. ਤੇ ‘‘ਕਲ੍ਯਾਣਂ ਤੁਮ੍ਹੇਹਿ ਵੁਤ੍ਤ’’ਨ੍ਤਿ ਸਬ੍ਬੇਪਿ ਏਕਚਿਤ੍ਤਾ ਹੁਤ੍ਵਾ ਗਨ੍ਤ੍ਵਾ ਪਿਤਰਂ ਅਦ੍ਦਸਂਸੁ. ਤਦਾ ਪਿਤਾ ਤੇਸਂ ਪਸੀਦਿਤ੍ਵਾ ਵਰਂ ਅਦਾਸਿ. ਤੇ ‘‘ਤੇਮਾਸਂ ਤਥਾਗਤਂ ਪਟਿਜਗ੍ਗਿਸ੍ਸਾਮਾ’’ਤਿ ਵਰਂ ਯਾਚਿਂਸੁ. ਰਾਜਾ ‘‘ਅਯਂ ਦਾਤੁਂ ਨ ਸਕ੍ਕਾ, ਅਞ੍ਞਂ ਵਰਂ ਗਣ੍ਹਥਾ’’ਤਿ ਆਹ. ਤਾਤ, ਅਮ੍ਹਾਕਂ ਅਞ੍ਞੇਨ ਵਰੇਨ ਕਿਚ੍ਚਂ ਨਤ੍ਥਿ, ਸਚੇ ਤੁਮ੍ਹੇ ਦਾਤੁਕਾਮਾ, ਏਤਂਯੇਵ ਨੋ ਵਰਂ ਦੇਥਾਤਿ. ਰਾਜਾ ਤੇਸੁ ਪੁਨਪ੍ਪੁਨਂ ਕਥੇਨ੍ਤੇਸੁ ਅਤ੍ਤਨਾ ਪਟਿਞ੍ਞਾਤਤ੍ਤਾ ‘‘ਨ ਸਕ੍ਕਾ ਨ ਦਾਤੁ’’ਨ੍ਤਿ ਚਿਨ੍ਤੇਤ੍ਵਾ ਆਹ – ‘‘ਤਾਤਾ, ਅਹਂ ਤੁਮ੍ਹਾਕਂ ਵਰਂ ਦੇਮਿ, ਅਪਿਚ ਖੋ ਪਨ ਬੁਦ੍ਧਾ ਨਾਮ ਦੁਰਾਸਦਾ ਹੋਨ੍ਤਿ ਸੀਹਾ ਵਿਯ ਏਕਚਰਾ, ਦਸਬਲਂ ਪਟਿਜਗ੍ਗਨ੍ਤਾ ਅਪ੍ਪਮਤ੍ਤਾ ਭਵੇਯ੍ਯਾਥਾ’’ਤਿ.

ਤੇ ਚਿਨ੍ਤਯਿਂਸੁ – ‘‘ਅਮ੍ਹੇਹਿ ਤਥਾਗਤਂ ਪਟਿਜਗ੍ਗਨ੍ਤੇਹਿ ਅਨੁਚ੍ਛਵਿਕਂ ਕਤ੍ਵਾ ਪਟਿਜਗ੍ਗਿਤੁਂ ਵਟ੍ਟਤੀ’’ਤਿ ਸਬ੍ਬੇਪਿ ਏਕਚਿਤ੍ਤਾ ਹੁਤ੍ਵਾ ਦਸਸੀਲਾਨਿ ਸਮਾਦਾਯ ਨਿਰਾਮਗਨ੍ਧਾ ਹੁਤ੍ਵਾ ਸਤ੍ਥੁ ਦਾਨਗ੍ਗਪਰਿਵਹਨਕੇ ਤਯੋ ਪੁਰਿਸੇ ਠਪਯਿਂਸੁ. ਤੇਸੁ ਏਕੋ ਧਨਧਞ੍ਞੁਪ੍ਪਾਦਕੋ ਅਹੋਸਿ, ਏਕੋ ਮਾਪਕੋ, ਏਕੋ ਦਾਨਸਂਵਿਧਾਯਕੋ. ਤੇਸੁ ਧਨਧਞ੍ਞੁਪ੍ਪਾਦਕੋ ਪਚ੍ਚੁਪ੍ਪਨ੍ਨੇ ਬਿਮ੍ਬਿਸਾਰੋ ਮਹਾਰਾਜਾ ਜਾਤੋ, ਮਾਪਕੋ ਵਿਸਾਖੋ ਉਪਾਸਕੋ, ਦਾਨਸਂਵਿਧਾਯਕੋ ਰਟ੍ਠਪਾਲਤ੍ਥੇਰੋਤਿ. ਸੋ ਤਤ੍ਥ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਪੁਰੇ ਨਿਬ੍ਬਤ੍ਤੋ. ਅਯਂ ਪਨ ਰਾਹੁਲਤ੍ਥੇਰੋ ਨਾਮ ਕਸ੍ਸਪਦਸਬਲਸ੍ਸ ਕਾਲੇ ਕਿਕਿਸ੍ਸ ਕਾਸਿਰਞ੍ਞੋ ਜੇਟ੍ਠਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਪਥਵਿਨ੍ਧਰਕੁਮਾਰੋਤਿਸ੍ਸ ਨਾਮਂ ਅਕਂਸੁ. ਤਸ੍ਸ ਸਤ੍ਤ ਭਗਿਨਿਯੋ ਅਹੇਸੁਂ. ਤਾ ਦਸਬਲਸ੍ਸ ਸਤ੍ਤ ਪਰਿਵੇਣਾਨਿ ਕਾਰਯਿਂਸੁ. ਪਥਵਿਨ੍ਧਰੋ ਓਪਰਜ੍ਜਂ ਲਭਿ. ਸੋ ਤਾ ਭਗਿਨਿਯੋ ਆਹ – ‘‘ਤੁਮ੍ਹੇਹਿ ਕਾਰਿਤਪਰਿਵੇਣੇਸੁ ਮਯ੍ਹਮ੍ਪਿ ਏਕਂ ਦੇਥਾ’’ਤਿ. ਭਾਤਿਕ, ਤੁਮ੍ਹੇ ਉਪਰਾਜਟ੍ਠਾਨੇ ਠਿਤਾ, ਤੁਮ੍ਹੇਹਿ ਨਾਮ ਅਮ੍ਹਾਕਂ ਦਾਤਬ੍ਬਂ, ਤੁਮ੍ਹੇ ਅਞ੍ਞਂ ਪਰਿਵੇਣਂ ਕਰੋਥਾਤਿ. ਸੋ ਤਾਸਂ ਵਚਨਂ ਸੁਤ੍ਵਾ ਪਞ੍ਚ ਵਿਹਾਰਸਤਾਨਿ ਕਾਰੇਸਿ. ਪਞ੍ਚ ਪਰਿਵੇਣਸਤਾਨੀਤਿਪਿ ਵਦਨ੍ਤਿ. ਸੋ ਤਤ੍ਥ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਪੁਰੇ ਨਿਬ੍ਬਤ੍ਤਿ. ਇਮਸ੍ਮਿਂ ਪਨ ਬੁਦ੍ਧੁਪ੍ਪਾਦੇ ਪਥਵਿਨ੍ਧਰਕੁਮਾਰੋ ਅਮ੍ਹਾਕਂ ਬੋਧਿਸਤ੍ਤਸ੍ਸ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿ, ਤਸ੍ਸ ਸਹਾਯਕੋ ਕੁਰੁਰਟ੍ਠੇ ਥੁਲ੍ਲਕੋਟ੍ਠਿਤਨਿਗਮੇ ਰਟ੍ਠਪਾਲਸੇਟ੍ਠਿਗੇਹੇ ਨਿਬ੍ਬਤ੍ਤਿ.

ਅਥ ਅਮ੍ਹਾਕਂ ਦਸਬਲੋ ਅਭਿਸਮ੍ਬੋਧਿਂ ਪਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਅਨੁਪੁਬ੍ਬੇਨ ਕਪਿਲਵਤ੍ਥੁਂ ਆਗਨ੍ਤ੍ਵਾ ਰਾਹੁਲਕੁਮਾਰਂ ਪਬ੍ਬਾਜੇਸਿ. ਤਸ੍ਸ ਪਬ੍ਬਜ੍ਜਾਵਿਧਾਨਂ ਪਾਲ਼ਿਯਂ (ਮਹਾਵ. ੧੦੫) ਆਗਤਮੇਵ. ਏਵਂ ਪਬ੍ਬਜਿਤਸ੍ਸ ਪਨਸ੍ਸ ਸਤ੍ਥਾ ਅਭਿਣ੍ਹਓਵਾਦਵਸੇਨ ਰਾਹੁਲੋਵਾਦਸੁਤ੍ਤਂ ਅਭਾਸਿ. ਰਾਹੁਲੋਪਿ ਪਾਤੋਵ ਵੁਟ੍ਠਾਯ ਹਤ੍ਥੇਨ ਵਾਲੁਕਂ ਉਕ੍ਖਿਪਿਤ੍ਵਾ ‘‘ਦਸਬਲਸ੍ਸ ਚੇਵ ਆਚਰਿਯੁਪਜ੍ਝਾਯਾਨਞ੍ਚ ਸਨ੍ਤਿਕਾ ਅਜ੍ਜ ਏਤ੍ਤਕਂ ਓਵਾਦਂ ਲਭੇਯ੍ਯ’’ਨ੍ਤਿ ਵਦਤਿ. ਭਿਕ੍ਖੁਸਙ੍ਘਮਜ੍ਝੇ ਕਥਾ ਉਦਪਾਦਿ ‘‘ਓਵਾਦਕ੍ਖਮੋ ਵਤ ਰਾਹੁਲਸਾਮਣੇਰੋ ਪਿਤੁ ਅਨੁਚ੍ਛਵਿਕੋ ਪੁਤ੍ਤੋ’’ਤਿ. ਸਤ੍ਥਾ ਭਿਕ੍ਖੂਨਂ ਚਿਤ੍ਤਾਚਾਰਂ ਞਤ੍ਵਾ ‘‘ਮਯਿ ਗਤੇ ਏਕਾ ਧਮ੍ਮਦੇਸਨਾ ਚ ਵਡ੍ਢਿਸ੍ਸਤਿ, ਰਾਹੁਲਸ੍ਸ ਚ ਗੁਣੋ ਪਾਕਟੋ ਭਵਿਸ੍ਸਤੀ’’ਤਿ ਗਨ੍ਤ੍ਵਾ ਧਮ੍ਮਸਭਾਯਂ ਬੁਦ੍ਧਾਸਾਨੇ ਨਿਸਿਨ੍ਨੋ ਭਿਕ੍ਖੂ ਆਮਨ੍ਤੇਸਿ – ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ. ਰਾਹੁਲਸਾਮਣੇਰਸ੍ਸ ਓਵਾਦਕ੍ਖਮਭਾਵਂ ਕਥੇਮ ਭਗਵਾਤਿ. ਸਤ੍ਥਾ ਇਮਸ੍ਮਿਂ ਠਾਨੇ ਠਤ੍ਵਾ ਰਾਹੁਲਸ੍ਸ ਗੁਣਦੀਪਨਤ੍ਥਂ ਮਿਗਜਾਤਕਂ ਆਹਰਿਤ੍ਵਾ ਕਥੇਸਿ –

‘‘ਮਿਗਂ ਤਿਪਲ੍ਲਤ੍ਥਮਨੇਕਮਾਯਂ,

ਅਟ੍ਠਕ੍ਖੁਰਂ ਅਡ੍ਢਰਤ੍ਤਾ ਪਪਾਯਿਂ;

ਏਕੇਨ ਸੋਤੇਨ ਛਮਾ’ਸ੍ਸਸਨ੍ਤੋ,

ਛਹਿ ਕਲਾਹਿਤਿਭੋਤਿ ਭਾਗਿਨੇਯ੍ਯੋ’’ਤਿ. (ਜਾ. ੧.੧.੧੬);

ਅਥਸ੍ਸ ਸਤ੍ਤਵਸ੍ਸਿਕਸਾਮਣੇਰਕਾਲੇ ‘‘ਮਾ ਹੇਵ ਖੋ ਰਾਹੁਲੋ ਦਹਰਭਾਵੇਨ ਕੀਲ਼ਨਤ੍ਥਾਯਪਿ ਸਮ੍ਪਜਾਨਮੁਸਾ ਭਾਸੇਯ੍ਯਾ’’ਤਿ ਅਮ੍ਬਲਟ੍ਠਿਯਰਾਹੁਲੋਵਾਦਂ (ਮ. ਨਿ. ੨.੧੦੭ ਆਦਯੋ) ਦੇਸੇਸਿ. ਅਟ੍ਠਾਰਸਵਸ੍ਸਿਕਸਾਮਣੇਰਕਾਲੇ ਤਥਾਗਤਸ੍ਸ ਪਚ੍ਛਤੋ ਪਿਣ੍ਡਾਯ ਪਵਿਸਨ੍ਤਸ੍ਸ ਸਤ੍ਥੁ ਚੇਵ ਅਤ੍ਤਨੋ ਚ ਰੂਪਸਮ੍ਪਤ੍ਤਿਂ ਦਿਸ੍ਵਾ ਗੇਹਸਿਤਂ ਵਿਤਕ੍ਕਂ ਵਿਤਕ੍ਕੇਨ੍ਤਸ੍ਸ ‘‘ਯਂਕਿਞ੍ਚਿ, ਰਾਹੁਲ, ਰੂਪ’’ਨ੍ਤਿਆਦਿਨਾ ਨਯੇਨ ਮਹਾਰਾਹੁਲੋਵਾਦਸੁਤ੍ਤਨ੍ਤਂ (ਮ. ਨਿ. ੨.੧੧੩) ਕਥੇਸਿ. ਸਂਯੁਤ੍ਤਕੇ (ਸਂ. ਨਿ. ੪.੧੨੧) ਪਨ ਰਾਹੁਲੋਵਾਦੋਪਿ ਅਙ੍ਗੁਤ੍ਤਰੇ (ਅ. ਨਿ. ੪.੧੭੭) ਰਾਹੁਲੋਵਾਦੋਪਿ ਥੇਰਸ੍ਸ ਵਿਪਸ੍ਸਨਾਚਾਰੋਯੇਵ. ਅਥਸ੍ਸ ਸਤ੍ਥਾ ਞਾਣਪਰਿਪਾਕਂ ਞਤ੍ਵਾ ਅਵਸ੍ਸਿਕਭਿਕ੍ਖੁਕਾਲੇ ਅਨ੍ਧਵਨੇ ਨਿਸਿਨ੍ਨੋ ਚੂਲ਼ਰਾਹੁਲੋਵਾਦਂ (ਮ. ਨਿ. ੩.੪੧੬ ਆਦਯੋ) ਕਥੇਸਿ. ਦੇਸਨਾਪਰਿਯੋਸਾਨੇ ਰਾਹੁਲਤ੍ਥੇਰੋ ਕੋਟਿਸਤਸਹਸ੍ਸਦੇਵਤਾਹਿ ਸਦ੍ਧਿਂ ਅਰਹਤ੍ਤਂ ਪਾਪੁਣਿ, ਸੋਤਾਪਨ੍ਨਸਕਦਾਗਾਮਿਅਨਾਗਾਮਿਦੇਵਤਾਨਂ ਗਣਨਾ ਨਤ੍ਥਿ. ਅਥ ਸਤ੍ਥਾ ਅਪਰਭਾਗੇ ਅਰਿਯਸਙ੍ਘਮਜ੍ਝੇ ਨਿਸਿਨ੍ਨੋ ਥੇਰਂ ਇਮਸ੍ਮਿਂ ਸਾਸਨੇ ਸਿਕ੍ਖਾਕਾਮਾਨਂ ਅਗ੍ਗਟ੍ਠਾਨੇ ਠਪੇਸਿ.

ਸਤ੍ਥਰਿ ਪਨ ਕੁਰੁਰਟ੍ਠੇ ਚਾਰਿਕਾਯ ਨਿਕ੍ਖਮਿਤ੍ਵਾ ਥੁਲ੍ਲਕੋਟ੍ਠਿਤਂ ਅਨੁਪ੍ਪਤ੍ਤੇ ਰਟ੍ਠਪਾਲੋ ਕੁਲਪੁਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਮਾਤਾਪਿਤਰੋ ਅਨੁਜਾਨਾਪੇਤ੍ਵਾ ਦਸਬਲਂ ਉਪਸਙ੍ਕਮਿਤ੍ਵਾ ਸਤ੍ਥੁ ਆਣਤ੍ਤਿਯਾ ਅਞ੍ਞਤਰਸ੍ਸ ਥੇਰਸ੍ਸ ਸਨ੍ਤਿਕੇ ਪਬ੍ਬਜਿ. ਤਸ੍ਸ ਪਬ੍ਬਜਿਤਦਿਵਸਤੋ ਪਟ੍ਠਾਯ ਸੇਟ੍ਠਿਗਹਪਤਿ ਭਿਕ੍ਖੂ ਅਤ੍ਤਨੋ ਨਿਵੇਸਨਦ੍ਵਾਰੇਨ ਗਚ੍ਛਨ੍ਤੇ ਦਿਸ੍ਵਾ ‘‘ਕਿਂ ਤੁਮ੍ਹਾਕਂ ਇਮਸ੍ਮਿਂ ਗੇਹੇ ਕਮ੍ਮਂ, ਏਕੋਵ ਪੁਤ੍ਤਕੋ ਅਹੋਸਿ, ਤਂ ਗਣ੍ਹਿਤ੍ਵਾ ਗਤਤ੍ਥ, ਇਦਾਨਿ ਕਿਂ ਕਰਿਸ੍ਸਥਾ’’ਤਿ ਅਕ੍ਕੋਸਤਿ ਪਰਿਭਾਸਤਿ. ਸਤ੍ਥਾ ਅਦ੍ਧਮਾਸਂ ਥੁਲ੍ਲਕੋਟ੍ਠਿਤੇ ਵਸਿਤ੍ਵਾ ਪੁਨ ਸਾਵਤ੍ਥਿਮੇਵ ਅਗਮਾਸਿ. ਤਤ੍ਥਾਯਸ੍ਮਾ ਰਟ੍ਠਪਾਲੋ ਯੋਨਿਸੋ ਮਨਸਿਕਰੋਨ੍ਤੋ ਕਮ੍ਮਂ ਕਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਸੋ ਸਤ੍ਥਾਰਂ ਅਨੁਜਾਨਾਪੇਤ੍ਵਾ ਮਾਤਾਪਿਤਰੋ ਦਸ੍ਸਨਤ੍ਥਂ ਥੁਲ੍ਲਕੋਟ੍ਠਿਤਂ ਗਨ੍ਤ੍ਵਾ ਤਤ੍ਥ ਸਪਦਾਨਂ ਪਿਣ੍ਡਾਯ ਚਰਨ੍ਤੋ ਪਿਤੁ ਨਿਵੇਸਨੇ ਆਭਿਦੋਸਿਕਂ ਕੁਮ੍ਮਾਸਂ ਲਭਿਤ੍ਵਾ ਤਂ ਅਮਤਂ ਵਿਯ ਪਰਿਭੁਞ੍ਜਨ੍ਤੋ ਪਿਤਰਾ ਨਿਮਨ੍ਤਿਤੋ ਅਧਿਵਾਸੇਤ੍ਵਾ ਦੁਤਿਯਦਿਵਸੇ ਪਿਤੁ ਨਿਵੇਸਨੇ ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਅਲਙ੍ਕਤਪਟਿਯਤ੍ਤੇ ਇਤ੍ਥਿਜਨੇ ਅਸੁਭਸਞ੍ਞਂ ਉਪ੍ਪਾਦੇਤ੍ਵਾ ਠਿਤਕੋਵ ਧਮ੍ਮਂ ਦੇਸੇਤ੍ਵਾ ਜਿਯਾ ਮੁਤ੍ਤੋ ਵਿਯ ਨਾਰਾਚੋ ਆਕਾਸਂ ਉਪ੍ਪਤਿਤ੍ਵਾ ਕੋਰਬ੍ਯਰਞ੍ਞੋ ਮਿਗਚੀਰਂ ਗਨ੍ਤ੍ਵਾ ਮਙ੍ਗਲਸਿਲਾਪਟ੍ਟੇ ਨਿਸਿਨ੍ਨੋ ਦਸ੍ਸਨਤ੍ਥਾਯ ਆਗਤਸ੍ਸ ਰਞ੍ਞੋ ਚਤੁਪਾਰਿਜੁਞ੍ਞਪਟਿਮਣ੍ਡਿਤਂ ਧਮ੍ਮਂ (ਮ. ਨਿ. ੨.੩੦੪) ਦੇਸੇਤ੍ਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਪੁਨ ਸਤ੍ਥੁ ਸਨ੍ਤਿਕਂਯੇਵ ਆਗਤੋ. ਏਵਮੇਤਂ ਵਤ੍ਥੁ ਸਮੁਟ੍ਠਿਤਂ. ਅਥ ਸਤ੍ਥਾ ਅਪਰਭਾਗੇ ਅਰਿਯਗਣਮਜ੍ਝੇ ਨਿਸਿਨ੍ਨੋ ਥੇਰਂ ਇਮਸ੍ਮਿਂ ਸਾਸਨੇ ਸਦ੍ਧਾਪਬ੍ਬਜਿਤਾਨਂ ਕੁਲਪੁਤ੍ਤਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਕੁਣ੍ਡਧਾਨਤ੍ਥੇਰਵਤ੍ਥੁ

੨੧੧. ਤਤਿਯੇ ਪਠਮਂ ਸਲਾਕਂ ਗਣ੍ਹਨ੍ਤਾਨਨ੍ਤਿ ਸਬ੍ਬਪਠਮਂ ਸਲਾਕਗਾਹਕਾਨਂ ਭਿਕ੍ਖੂਨਂ ਕੁਣ੍ਡਧਾਨਤ੍ਥੇਰੋ ਅਗ੍ਗੋਤਿ ਦਸ੍ਸੇਤਿ. ਸੋ ਕਿਰ ਥੇਰੋ ਮਹਾਸੁਭਦ੍ਦਾਯ ਨਿਮਨ੍ਤਿਤਦਿਵਸੇ ਤਥਾਗਤੇ ਉਗ੍ਗਨਗਰਂ ਗਚ੍ਛਨ੍ਤੇ ‘‘ਅਜ੍ਜ ਸਤ੍ਥਾ ਦੂਰਂ ਭਿਕ੍ਖਾਚਾਰਂ ਗਮਿਸ੍ਸਤਿ, ਪੁਥੁਜ੍ਜਨਾ ਸਲਾਕਂ ਮਾ ਗਣ੍ਹਨ੍ਤੁ, ਪਞ੍ਚਸਤਾ ਖੀਣਾਸਵਾਵ ਗਣ੍ਹਨ੍ਤੂ’’ਤਿ ਵੁਤ੍ਤੇ ਪਠਮਮੇਵ ਸੀਹਨਾਦਂ ਨਦਿਤ੍ਵਾ ਸਲਾਕਂ ਗਣ੍ਹਿ. ਚੂਲ਼ਸੁਭਦ੍ਦਾਯ ਨਿਮਨ੍ਤਿਤਦਿਵਸੇ ਤਥਾਗਤੇ ਸਾਕੇਤਂ ਗਚ੍ਛਨ੍ਤੇਪਿ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਅਨ੍ਤਰੇ ਪਠਮਮੇਵ ਸਲਾਕਂ ਗਣ੍ਹਿ, ਸੁਨਾਪਰਨ੍ਤਜਨਪਦਂ ਗਚ੍ਛਨ੍ਤੇਪਿ. ਇਮੇਹਿ ਕਾਰਣੇਹਿ ਥੇਰੋ ਪਠਮਂ ਸਲਾਕਂ ਗਣ੍ਹਨ੍ਤਾਨਂ ਅਗ੍ਗੋ ਨਾਮ ਜਾਤੋ. ਕੁਣ੍ਡਧਾਨੋਤਿ ਪਨਸ੍ਸ ਨਾਮਂ.

ਤਸ੍ਸ ਪਞ੍ਹਕਮ੍ਮੇ ਅਯਮਨੁਪੁਬ੍ਬਿਕਥਾ – ਅਯਂ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤੋ ਵੁਤ੍ਤਨਯੇਨੇਵ ਵਿਹਾਰਂ ਗਨ੍ਤ੍ਵਾ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਪਠਮਂ ਸਲਾਕਂ ਗਣ੍ਹਨ੍ਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਬੁਦ੍ਧਾਨਂ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਤ੍ਵਾ ਸਤ੍ਥਾਰਾ ਅਨਨ੍ਤਰਾਯਂ ਦਿਸ੍ਵਾ ਬ੍ਯਾਕਤੋ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵੇਸੁ ਚ ਮਨੁਸ੍ਸੇਸੁ ਚ ਸਂਸਰਨ੍ਤੋ ਕਸ੍ਸਪਬੁਦ੍ਧਕਾਲੇ ਭੂਮਟ੍ਠਕਦੇਵਤਾ ਹੁਤ੍ਵਾ ਨਿਬ੍ਬਤ੍ਤਿ. ਦੀਘਾਯੁਕਬੁਦ੍ਧਾਨਞ੍ਚ ਨਾਮ ਨ ਅਨ੍ਵਦ੍ਧਮਾਸਿਕੋ ਉਪੋਸਥੋ ਹੋਤਿ. ਵਿਪਸ੍ਸੀਦਸਬਲਸ੍ਸ ਹਿ ਛਬ੍ਬਸ੍ਸਨ੍ਤਰੇ ਛਬ੍ਬਸ੍ਸਨ੍ਤਰੇ ਉਪੋਸਥੋ ਅਹੋਸਿ, ਕਸ੍ਸਪਦਸਬਲੋ ਪਨ ਛਟ੍ਠੇ ਛਟ੍ਠੇ ਮਾਸੇ ਪਾਤਿਮੋਕ੍ਖਂ ਓਸਾਰੇਸਿ. ਤਸ੍ਸ ਪਾਤਿਮੋਕ੍ਖਂ ਓਸਾਰਣਕਾਲੇ ਦਿਸਾਵਾਸਿਕਾ ਦ੍ਵੇ ਸਹਾਯਕਾ ਭਿਕ੍ਖੂ ‘‘ਉਪੋਸਥਂ ਕਰਿਸ੍ਸਾਮਾ’’ਤਿ ਗਚ੍ਛਨ੍ਤਿ. ਅਯਂ ਭੁਮ੍ਮਦੇਵਤਾ ਚਿਨ੍ਤੇਸਿ – ‘‘ਇਮੇਸਂ ਦ੍ਵਿਨ੍ਨਂ ਭਿਕ੍ਖੂਨਂ ਮੇਤ੍ਤਿ ਅਤਿਵਿਯ ਦਲ਼੍ਹਾ, ਕਿਂ ਨੁ ਖੋ ਭੇਦਕੇ ਸਤਿ ਭਿਜ੍ਜੇਯ੍ਯ, ਨ ਭਿਜ੍ਜੇਯ੍ਯਾ’’ਤਿ? ਤੇਸਂ ਓਕਾਸਂ ਓਲੋਕਯਮਾਨਾ ਤੇਸਂ ਅਵਿਦੂਰੇਨੇਵ ਗਚ੍ਛਤਿ.

ਅਥੇਕੋ ਥੇਰੋ ਏਕਸ੍ਸ ਹਤ੍ਥੇ ਪਤ੍ਤਚੀਵਰਂ ਦਤ੍ਵਾ ਸਰੀਰਵਲ਼ਞ੍ਜਨਤ੍ਥਂ ਉਦਕਫਾਸੁਕਟ੍ਠਾਨਂ ਗਨ੍ਤ੍ਵਾ ਧੋਤਹਤ੍ਥਪਾਦੋ ਹੁਤ੍ਵਾ ਗੁਮ੍ਬਸਭਾਗਤੋ ਨਿਕ੍ਖਮਤਿ. ਭੁਮ੍ਮਦੇਵਤਾ ਤਸ੍ਸ ਥੇਰਸ੍ਸ ਪਚ੍ਛਤੋ ਪਚ੍ਛਤੋ ਉਤ੍ਤਮਰੂਪਾ ਇਤ੍ਥੀ ਹੁਤ੍ਵਾ ਕੇਸੇ ਵਿਧੁਨਿਤ੍ਵਾ ਸਂਵਿਧਾਯ ਬਨ੍ਧਨ੍ਤੀ ਵਿਯ ਪਿਟ੍ਠਿਤੋ ਪਂਸੁਂ ਪੁਞ੍ਛਮਾਨਾ ਵਿਯ ਸਾਟਕਂ ਸਂਵਿਧਾਯ ਨਿਵਾਸਯਮਾਨਾ ਵਿਯ ਚ ਹੁਤ੍ਵਾ ਥੇਰਸ੍ਸ ਪਦਾਨੁਪਦਿਕਾ ਹੁਤ੍ਵਾ ਗੁਮ੍ਬਤੋ ਨਿਕ੍ਖਨ੍ਤਾ. ਏਕਮਨ੍ਤੇ ਠਿਤੋ ਸਹਾਯਕਤ੍ਥੇਰੋ ਇਮਂ ਕਾਰਣਂ ਦਿਸ੍ਵਾ ਦੋਮਨਸ੍ਸਜਾਤੋ ‘‘ਨਟ੍ਠੋ ਦਾਨਿ ਮੇ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਦੀਘਰਤ੍ਤਾਨੁਗਤੋ ਸਿਨੇਹੋ. ਸਚਾਹਂ ਏਵਂਵਿਧਭਾਵਂ ਜਾਨੇਯ੍ਯਂ, ਏਤ੍ਤਕਂ ਅਦ੍ਧਾਨਂ ਇਮਿਨਾ ਸਦ੍ਧਿਂ ਵਿਸ੍ਸਾਸਂ ਨ ਕਰੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਆਗਚ੍ਛਨ੍ਤਸ੍ਸੇਵਸ੍ਸ ‘‘ਹਨ੍ਦਾਵੁਸੋ, ਤੁਯ੍ਹਂ ਪਤ੍ਤਚੀਵਰਂ, ਤਾਦਿਸੇਨ ਪਾਪੇਨ ਸਹਾਯੇਨ ਸਦ੍ਧਿਂ ਏਕਮਗ੍ਗਂ ਨ ਗਚ੍ਛਾਮੀ’’ਤਿ ਆਹ. ਤਂ ਕਥਂ ਸੁਤ੍ਵਾ ਤਸ੍ਸ ਲਜ੍ਜਿਭਿਕ੍ਖੁਨੋ ਹਦਯਂ ਤਿਖਿਣਸਤ੍ਤਿਂ ਗਹੇਤ੍ਵਾ ਵਿਦ੍ਧਂ ਵਿਯ ਅਹੋਸਿ. ਤਤੋ ਨਂ ਆਹ – ‘‘ਆਵੁਸੋ, ਕਿਂ ਨਾਮੇਤਂ ਵਦਸਿ, ਅਹਂ ਏਤ੍ਤਕਂ ਕਾਲਂ ਦੁਕ੍ਕਟਮਤ੍ਤਮ੍ਪਿ ਆਪਤ੍ਤਿਂ ਨ ਜਾਨਾਮਿ. ਤ੍ਵਂ ਪਨ ਮਂ ਅਜ੍ਜ ‘ਪਾਪੋ’ਤਿ ਵਦਸਿ, ਕਿਂ ਤੇ ਦਿਟ੍ਠ’’ਨ੍ਤਿ? ਕਿਂ ਅਞ੍ਞੇਨ ਦਿਟ੍ਠੇਨ, ਕਿਂ ਤ੍ਵਂ ਏਵਂਵਿਧੇਨ ਅਲਙ੍ਕਤਪਟਿਯਤ੍ਤੇਨ ਮਾਤੁਗਾਮੇਨ ਸਦ੍ਧਿਂ ਏਕਟ੍ਠਾਨੇ ਹੁਤ੍ਵਾ ਨਿਕ੍ਖਨ੍ਤੋਤਿ? ਨਤ੍ਥੇਤਂ, ਆਵੁਸੋ, ਮਯ੍ਹਂ, ਨਾਹਂ ਏਵਰੂਪਂ ਮਾਤੁਗਾਮਂ ਪਸ੍ਸਾਮੀਤਿ. ਤਸ੍ਸ ਯਾਵਤਤਿਯਂ ਕਥੇਨ੍ਤਸ੍ਸਾਪਿ ਇਤਰੋ ਥੇਰੋ ਕਥਂ ਅਸਦ੍ਦਹਿਤ੍ਵਾ ਅਤ੍ਤਨਾ ਦਿਟ੍ਠਕਾਰਣਂਯੇਵ ਅਤ੍ਥਂ ਗਹੇਤ੍ਵਾ ਤੇਨ ਸਦ੍ਧਿਂ ਏਕਮਗ੍ਗੇਨ ਅਗਨ੍ਤ੍ਵਾ ਅਞ੍ਞੇਨ ਮਗ੍ਗੇਨ ਸਤ੍ਥੁ ਸਨ੍ਤਿਕਂ ਗਤੋ. ਇਤਰੋਪਿ ਅਞ੍ਞੇਨ ਮਗ੍ਗੇਨ ਸਤ੍ਥੁ ਸਨ੍ਤਿਕਂਯੇਵ ਗਤੋ.

ਤਤੋ ਭਿਕ੍ਖੁਸਙ੍ਘਸ੍ਸ ਉਪੋਸਥਾਗਾਰਂ ਪਵਿਸਨਵੇਲਾਯ ਸੋ ਭਿਕ੍ਖੁ ਤਂ ਭਿਕ੍ਖੁਂ ਉਪੋਸਥਗ੍ਗੇ ਸਞ੍ਜਾਨਿਤ੍ਵਾ ‘‘ਇਮਸ੍ਮਿਂ ਉਪੋਸਥਗ੍ਗੇ ਏਵਰੂਪੋ ਨਾਮ ਪਾਪਭਿਕ੍ਖੁ ਅਤ੍ਥਿ, ਨਾਹਂ ਤੇਨ ਸਦ੍ਧਿਂ ਉਪੋਸਥਂ ਕਰਿਸ੍ਸਾਮੀ’’ਤਿ ਨਿਕ੍ਖਮਿਤ੍ਵਾ ਬਹਿ ਅਟ੍ਠਾਸਿ. ਭੁਮ੍ਮਦੇਵਤਾ ‘‘ਭਾਰਿਯਂ ਮਯਾ ਕਮ੍ਮਂ ਕਤ’’ਨ੍ਤਿ ਮਹਲ੍ਲਕਉਪਾਸਕਵਣ੍ਣੇਨ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਕਸ੍ਮਾ, ਭਨ੍ਤੇ, ਅਯ੍ਯੋ ਇਮਸ੍ਮਿਂ ਠਾਨੇ ਠਿਤੋ’’ਤਿ ਆਹ. ਉਪਾਸਕ, ਇਮਂ ਉਪੋਸਥਗ੍ਗਂ ਏਕੋ ਪਾਪਭਿਕ੍ਖੁ ਪਵਿਟ੍ਠੋ, ਅਹਂ ਤੇਨ ਸਦ੍ਧਿਂ ਉਪੋਸਥਂ ਨ ਕਰੋਮੀਤਿ ਵਤ੍ਵਾ ਨਿਕ੍ਖਮਿਤ੍ਵਾ ਬਹਿ ਠਿਤੋਮ੍ਹੀਤਿ. ਭਨ੍ਤੇ, ਮਾ ਏਵਂ ਗਣ੍ਹਥ, ਪਰਿਸੁਦ੍ਧਸੀਲੋ ਏਸ ਭਿਕ੍ਖੁ. ਤੁਮ੍ਹੇਹਿ ਦਿਟ੍ਠਮਾਤੁਗਾਮੋ ਨਾਮ ਅਹਂ, ਮਯਾ ਤੁਮ੍ਹਾਕਂ ਵੀਮਂਸਨਤ੍ਥਾਯ ‘‘ਦਲ਼੍ਹਾ ਨੁ ਖੋ ਇਮੇਸਂ ਥੇਰਾਨਂ ਮੇਤ੍ਤਿ, ਨੋ ਦਲ਼੍ਹਾ’’ਤਿ ਲਜ੍ਜਿਅਲਜ੍ਜਿਭਾਵਂ ਓਲੋਕੇਨ੍ਤੇਨ ਤਂ ਕਮ੍ਮਂ ਕਤਨ੍ਤਿ. ਕੋ ਪਨ ਤ੍ਵਂ ਸਪ੍ਪੁਰਿਸਾਤਿ? ਅਹਂ ਏਕਾ ਭੁਮ੍ਮਦੇਵਤਾ, ਭਨ੍ਤੇਤਿ. ਦੇਵਪੁਤ੍ਤੋ ਕਥੇਨ੍ਤੋਵ ਦਿਬ੍ਬਾਨੁਭਾਵੇਨ ਠਤ੍ਵਾ ਥੇਰਸ੍ਸ ਪਾਦੇਸੁ ਪਤਿਤ੍ਵਾ ‘‘ਮਯ੍ਹਂ, ਭਨ੍ਤੇ, ਖਮਥ, ਏਤਂ ਦੋਸਂ ਥੇਰੋ ਨ ਜਾਨਾਤਿ, ਉਪੋਸਥਂ ਕਰੋਥਾ’’ਤਿ ਥੇਰਂ ਯਾਚਿਤ੍ਵਾ ਉਪੋਸਥਗ੍ਗਂ ਪਵੇਸੇਸਿ. ਸੋ ਥੇਰੋ ਉਪੋਸਥਂ ਤਾਵ ਏਕਟ੍ਠਾਨੇ ਅਕਾਸਿ, ਮਿਤ੍ਤਸਨ੍ਥਵਵਸੇਨ ਨ ਪੁਨ ਤੇਨ ਸਦ੍ਧਿਂ ਏਕਟ੍ਠਾਨੇ ਅਹੋਸੀਤਿ. ਇਮਸ੍ਸ ਥੇਰਸ੍ਸ ਕਮ੍ਮਂ ਨ ਕਥਿਯਤਿ, ਚੁਦਿਤਕਤ੍ਥੇਰੋ ਪਨ ਅਪਰਾਪਰਂ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਅਰਹਤ੍ਤਂ ਪਾਪੁਣਿ.

ਭੁਮ੍ਮਦੇਵਤਾ ਤਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੇਨ ਏਕਂ ਬੁਦ੍ਧਨ੍ਤਰਂ ਅਪਾਯਤੋ ਨ ਮੁਚ੍ਚਿਤ੍ਥ. ਸਚੇ ਪਨ ਕਾਲੇਨ ਕਾਲਂ ਮਨੁਸ੍ਸਤ੍ਤਂ ਆਗਚ੍ਛਤਿ, ਅਞ੍ਞੇਨ ਯੇਨ ਕੇਨਚਿ ਕਤੋ ਦੋਸੋ ਤਸ੍ਸੇਵ ਉਪਰਿ ਪਤਤਿ. ਸੋ ਅਮ੍ਹਾਕਂ ਭਗਵਤੋ ਕਾਲੇ ਸਾਵਤ੍ਥਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ, ਧਾਨਮਾਣਵੋਤਿਸ੍ਸ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਤਯੋ ਵੇਦੇ ਉਗ੍ਗਣ੍ਹਿਤ੍ਵਾ ਮਹਲ੍ਲਕਕਾਲੇ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿ, ਤਸ੍ਸ ਉਪਸਮ੍ਪਨ੍ਨਦਿਵਸਤੋ ਪਟ੍ਠਾਯ ਏਕਾ ਅਲਙ੍ਕਤਪਟਿਯਤ੍ਤਾ ਇਤ੍ਥੀ ਤਸ੍ਮਿਂ ਗਾਮਂ ਪਵਿਸਨ੍ਤੇ ਸਦ੍ਧਿਂਯੇਵ ਗਾਮਂ ਪਵਿਸਤਿ, ਨਿਕ੍ਖਮਨ੍ਤੇ ਨਿਕ੍ਖਮਤਿ. ਵਿਹਾਰਂ ਪਵਿਸਨ੍ਤੇਪਿ ਪਵਿਸਤਿ, ਤਿਟ੍ਠਨ੍ਤੇਪਿ ਤਿਟ੍ਠਤੀਤਿ ਏਵਂ ਨਿਚ੍ਚਾਨੁਬਨ੍ਧਾ ਪਞ੍ਞਾਯਤਿ. ਥੇਰੋ ਤਂ ਨ ਪਸ੍ਸਤਿ, ਤਸ੍ਸ ਪਨ ਪੁਰਿਮਸ੍ਸ ਕਮ੍ਮਸ੍ਸ ਨਿਸ੍ਸਨ੍ਦੇਨ ਸਾ ਅਞ੍ਞੇਸਂ ਉਪਟ੍ਠਾਤਿ.

ਗਾਮੇ ਯਾਗੁਭਿਕ੍ਖਂ ਦਦਮਾਨਾ ਇਤ੍ਥਿਯੋ, ‘‘ਭਨ੍ਤੇ, ਅਯਂ ਏਕੋ ਯਾਗੁਉਲ਼ੁਙ੍ਕੋ ਤੁਮ੍ਹਾਕਂ, ਏਕੋ ਇਮਿਸ੍ਸਾ ਅਮ੍ਹਾਕਂ ਸਹਾਯਿਕਾਯਾ’’ਤਿ ਪਰਿਹਾਸਂ ਕਰੋਨ੍ਤਿ. ਥੇਰਸ੍ਸ ਮਹਤੀ ਵਿਹੇਸਾ ਹੋਤਿ. ਵਿਹਾਰਂ ਗਤਮ੍ਪਿ ਨਂ ਸਾਮਣੇਰਾ ਚੇਵ ਦਹਰਭਿਕ੍ਖੂ ਚ ਪਰਿਵਾਰੇਤ੍ਵਾ ‘‘ਧਾਨੋ ਕੋਣ੍ਡੋ ਜਾਤੋ’’ਤਿ ਪਰਿਹਾਸਂ ਕਰੋਨ੍ਤਿ. ਅਥਸ੍ਸ ਤੇਨੇਵ ਕਾਰਣੇਨ ਕੁਣ੍ਡਧਾਨਤ੍ਥੇਰੋਤਿ ਨਾਮਂ ਜਾਤਂ. ਸੋ ਉਟ੍ਠਾਯ ਸਮੁਟ੍ਠਾਯ ਤੇਹਿ ਕਯਿਰਮਾਨਂ ਕੇਲ਼ਿਂ ਸਹਿਤੁਂ ਅਸਕ੍ਕੋਨ੍ਤੋ ਉਮ੍ਮਾਦਂ ਗਹੇਤ੍ਵਾ ‘‘ਤੁਮ੍ਹੇ ਕੋਣ੍ਡਾ, ਤੁਮ੍ਹਾਕਂ ਉਪਜ੍ਝਾਯਾ ਕੋਣ੍ਡਾ, ਆਚਰਿਯਾ ਕੋਣ੍ਡਾ’’ਤਿ ਵਦਤਿ. ਅਥ ਨਂ ਸਤ੍ਥੁ ਆਰੋਚੇਸੁਂ – ‘‘ਕੁਣ੍ਡਧਾਨੋ ਦਹਰਸਾਮਣੇਰੇਹਿ ਸਦ੍ਧਿਂ ਏਵਂ ਫਰੁਸਵਾਚਂ ਵਦਤੀ’’ਤਿ. ਸਤ੍ਥਾ ਤਂ ਪਕ੍ਕੋਸਾਪੇਤ੍ਵਾ ‘‘ਸਚ੍ਚਂ ਭਿਕ੍ਖੂ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ ਭਗਵਾ’’ਤਿ ਵੁਤ੍ਤੇ ‘‘ਕਸ੍ਮਾ ਏਵਂ ਵਦੇਸੀ’’ਤਿ ਆਹ. ਭਨ੍ਤੇ, ਨਿਬਦ੍ਧਂ ਵਿਹੇਸਂ ਅਸਹਨ੍ਤੋ ਏਵਂ ਕਥੇਮੀਤਿ. ‘‘ਤ੍ਵਂ ਪੁਬ੍ਬੇ ਕਤਕਮ੍ਮਂ ਯਾਵਜ੍ਜਦਿਵਸਾ ਜੀਰਾਪੇਤੁਂ ਨ ਸਕ੍ਕੋਸਿ, ਪੁਨ ਏਵਰੂਪਂ ਫਰੁਸਂ ਮਾ ਵਦ ਭਿਕ੍ਖੂ’’ਤਿ ਵਤ੍ਵਾ ਆਹ –

‘‘ਮਾਵੋਚ ਫਰੁਸਂ ਕਞ੍ਚਿ, ਵੁਤ੍ਤਾ ਪਟਿਵਦੇਯ੍ਯੁ ਤਂ;

ਦੁਕ੍ਖਾ ਹਿ ਸਾਰਮ੍ਭਕਥਾ, ਪਟਿਦਣ੍ਡਾ ਫੁਸੇਯ੍ਯੁ ਤਂ.

‘‘ਸਚੇ ਨੇਰੇਸਿ ਅਤ੍ਤਾਨਂ, ਕਂਸੋ ਉਪਹਤੋ ਯਥਾ;

ਏਸ ਪਤ੍ਤੋਸਿ ਨਿਬ੍ਬਾਨਂ, ਸਾਰਮ੍ਭੋ ਤੇ ਨ ਵਿਜ੍ਜਤੀ’’ਤਿ. (ਧ. ਪ. ੧੩੩-੧੩੪);

ਇਮਞ੍ਚ ਪਨ ਤਸ੍ਸ ਥੇਰਸ੍ਸ ਮਾਤੁਗਾਮੇਨ ਸਦ੍ਧਿਂ ਵਿਚਰਣਭਾਵਂ ਕੋਸਲਰਞ੍ਞੋਪਿ ਕਥਯਿਂਸੁ. ਰਾਜਾ ‘‘ਗਚ੍ਛਥ, ਭਣੇ, ਵੀਮਂਸਥਾ’’ਤਿ ਪੇਸੇਤ੍ਵਾ ਸਯਮ੍ਪਿ ਮਨ੍ਦੇਨੇਵ ਪਰਿਵਾਰੇਨ ਸਦ੍ਧਿਂ ਥੇਰਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਏਕਮਨ੍ਤੇ ਓਲੋਕੇਨ੍ਤੋ ਅਟ੍ਠਾਸਿ. ਤਸ੍ਮਿਂ ਖਣੇ ਥੇਰੋ ਸੂਚਿਕਮ੍ਮਂ ਕਰੋਨ੍ਤੋ ਨਿਸਿਨ੍ਨੋ ਹੋਤਿ, ਸਾਪਿਸ੍ਸ ਇਤ੍ਥੀ ਅਵਿਦੂਰੇ ਠਾਨੇ ਠਿਤਾ ਵਿਯ ਪਞ੍ਞਾਯਤਿ.

ਰਾਜਾ ਤਂ ਦਿਸ੍ਵਾ ‘‘ਅਤ੍ਥਿਦਂ ਕਾਰਣ’’ਨ੍ਤਿ ਤਸ੍ਸਾ ਠਿਤਟ੍ਠਾਨਂ ਅਗਮਾਸਿ. ਸਾ ਤਸ੍ਮਿਂ ਆਗਚ੍ਛਨ੍ਤੇ ਥੇਰਸ੍ਸ ਵਸਨਪਣ੍ਣਸਾਲਂ ਪਵਿਟ੍ਠਾ ਵਿਯ ਅਹੋਸਿ. ਰਾਜਾਪਿ ਤਾਯ ਸਦ੍ਧਿਂਯੇਵ ਪਣ੍ਣਸਾਲਂ ਪਵਿਸਿਤ੍ਵਾ ਸਬ੍ਬਤ੍ਥ ਓਲੋਕੇਨ੍ਤੋ ਅਦਿਸ੍ਵਾ ‘‘ਨਾਯਂ ਮਾਤੁਗਾਮੋ, ਥੇਰਸ੍ਸ ਏਕੋ ਕਮ੍ਮਵਿਪਾਕੋ’’ਤਿ ਸਞ੍ਞਂ ਕਤ੍ਵਾ ਪਠਮਂ ਥੇਰਸ੍ਸ ਸਮੀਪੇਨ ਗਚ੍ਛਨ੍ਤੋਪਿ ਥੇਰਂ ਅਵਨ੍ਦਿਤ੍ਵਾ ਤਸ੍ਸ ਕਾਰਣਸ੍ਸ ਅਭੂਤਭਾਵਂ ਞਤ੍ਵਾ ਆਗਮ੍ਮ ਥੇਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨੋ ‘‘ਕਚ੍ਚਿ, ਭਨ੍ਤੇ, ਪਿਣ੍ਡਕੇਨ ਨ ਕਿਲਮਥਾ’’ਤਿ ਪੁਚ੍ਛਿ. ਥੇਰੋ ‘‘ਵਟ੍ਟਤਿ ਮਹਾਰਾਜਾ’’ਤਿ ਆਹ. ‘‘ਜਾਨਾਮਿ, ਭਨ੍ਤੇ, ਅਯ੍ਯਸ੍ਸ ਕਥਂ, ਏਵਰੂਪੇਨ ਚ ਪਰਿਕ੍ਕਿਲੇਸੇਨ ਸਦ੍ਧਿਂ ਚਰਨ੍ਤਾਨਂ ਤੁਮ੍ਹਾਕਂ ਕੇ ਨਾਮ ਪਸੀਦਿਸ੍ਸਨ੍ਤਿ, ਇਤੋ ਪਟ੍ਠਾਯ ਵੋ ਕਤ੍ਥਚਿ ਗਮਨਕਿਚ੍ਚਂ ਨਤ੍ਥਿ, ਅਹਂ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿਸ੍ਸਾਮਿ, ਤੁਮ੍ਹੇ ਯੋਨਿਸੋਮਨਸਿਕਾਰੇ ਮਾ ਪਮਜ੍ਜਿਤ੍ਥਾ’’ਤਿ ਨਿਬਦ੍ਧਂ ਭਿਕ੍ਖਂ ਪਟ੍ਠਪੇਸਿ. ਥੇਰੋ ਰਾਜਾਨਂ ਉਪਤ੍ਥਮ੍ਭਕਂ ਲਭਿਤ੍ਵਾ ਭੋਜਨਸਪ੍ਪਾਯੇਨ ਏਕਗ੍ਗਚਿਤ੍ਤੋ ਹੁਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਤਤੋ ਪਟ੍ਠਾਯ ਸਾ ਇਤ੍ਥੀ ਅਨ੍ਤਰਧਾਯਿ.

ਮਹਾਸੁਭਦ੍ਦਾ ਉਗ੍ਗਨਗਰੇ ਮਿਚ੍ਛਾਦਿਟ੍ਠਿਕੁਲੇ ਵਸਮਾਨਾ ‘‘ਸਤ੍ਥਾ ਮਂ ਅਨੁਕਮ੍ਪਤੂ’’ਤਿ ਉਪੋਸਥਂ ਅਧਿਟ੍ਠਾਯ ਨਿਰਾਮਗਨ੍ਧਾ ਹੁਤ੍ਵਾ ਉਪਰਿਪਾਸਾਦਤਲੇ ਠਿਤਾ ‘‘ਇਮਾਨਿ ਪੁਪ੍ਫਾਨਿ ਅਨ੍ਤਰੇ ਅਟ੍ਠਤ੍ਵਾ ਦਸਬਲਸ੍ਸ ਮਤ੍ਥਕੇ ਵਿਤਾਨਂ ਹੁਤ੍ਵਾ ਤਿਟ੍ਠਨ੍ਤੁ, ਦਸਬਲੋ ਇਮਾਯ ਸਞ੍ਞਾਯ ਸ੍ਵੇ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਮਯ੍ਹਂ ਭਿਕ੍ਖਂ ਗਣ੍ਹਤੂ’’ਤਿ ਸਚ੍ਚਕਿਰਿਯਂ ਕਤ੍ਵਾ ਅਟ੍ਠ ਸੁਮਨਪੁਪ੍ਫਮੁਟ੍ਠਿਯੋ ਵਿਸ੍ਸਜ੍ਜੇਸਿ. ਪੁਪ੍ਫਾਨਿ ਗਨ੍ਤ੍ਵਾ ਧਮ੍ਮਦੇਸਨਾਵੇਲਾਯ ਸਤ੍ਥੁ ਮਤ੍ਥਕੇ ਵਿਤਾਨਂ ਹੁਤ੍ਵਾ ਅਟ੍ਠਂਸੁ. ਸਤ੍ਥਾ ਤਂ ਸੁਮਨਪੁਪ੍ਫਵਿਤਾਨਂ ਦਿਸ੍ਵਾ ਚਿਤ੍ਤੇਨੇਵ ਸੁਭਦ੍ਦਾਯ ਭਿਕ੍ਖਂ ਅਧਿਵਾਸੇਤ੍ਵਾ ਪੁਨਦਿਵਸੇ ਅਰੁਣੇ ਉਟ੍ਠਿਤੇ ਆਨਨ੍ਦਤ੍ਥੇਰਂ ਆਹ – ‘‘ਆਨਨ੍ਦ, ਮਯਂ ਅਜ੍ਜ ਦੂਰਂ ਭਿਕ੍ਖਾਚਾਰਂ ਗਮਿਸ੍ਸਾਮ, ਪੁਥੁਜ੍ਜਨਾਨਂ ਅਦਤ੍ਵਾ ਅਰਿਯਾਨਂਯੇਵ ਸਲਾਕਂ ਦੇਹੀ’’ਤਿ. ਥੇਰੋ ਭਿਕ੍ਖੂਨਂ ਆਰੋਚੇਸਿ – ‘‘ਆਵੁਸੋ, ਸਤ੍ਥਾ ਅਜ੍ਜ ਦੂਰਂ ਭਿਕ੍ਖਾਚਾਰਂ ਗਮਿਸ੍ਸਤਿ, ਪੁਥੁਜ੍ਜਨਾ ਮਾ ਗਣ੍ਹਨ੍ਤੁ, ਅਰਿਯਾਵ ਸਲਾਕਂ ਗਣ੍ਹਨ੍ਤੂ’’ਤਿ. ਕੁਣ੍ਡਧਾਨਤ੍ਥੇਰੋ ‘‘ਆਹਰਾਵੁਸੋ, ਸਲਾਕ’’ਨ੍ਤਿ ਪਠਮਂਯੇਵ ਹਤ੍ਥਂ ਪਸਾਰੇਸਿ. ਆਨਨ੍ਦਾ ‘‘ਸਤ੍ਥਾ ਤਾਦਿਸਾਨਂ ਭਿਕ੍ਖੂਨਂ ਸਲਾਕਂ ਨ ਦਾਪੇਤਿ, ਅਰਿਯਾਨਂਯੇਵ ਦਾਪੇਤੀ’’ਤਿ ਵਿਤਕ੍ਕਂ ਉਪ੍ਪਾਦੇਤ੍ਵਾ ਗਨ੍ਤ੍ਵਾ ਸਤ੍ਥੁ ਆਰੋਚੇਸਿ. ਸਤ੍ਥਾ ‘‘ਆਹਰਾਪੇਨ੍ਤਸ੍ਸ ਸਲਾਕਂ ਦੇਹੀ’’ਤਿ ਆਹ. ਥੇਰੋ ਚਿਨ੍ਤੇਸਿ – ‘‘ਸਚੇ ਕੁਣ੍ਡਧਾਨਸ੍ਸ ਸਲਾਕਾ ਦਾਤੁਂ ਨ ਯੁਤ੍ਤਾ ਅਸ੍ਸ, ਅਥ ਸਤ੍ਥਾ ਪਟਿਬਾਹੇਯ੍ਯ, ਭਵਿਸ੍ਸਤਿ ਏਕਂ ਕਾਰਣ’’ਨ੍ਤਿ. ‘‘ਕੁਣ੍ਡਧਾਨਸ੍ਸ ਸਲਾਕਂ ਦਸ੍ਸਾਮੀ’’ਤਿ ਗਮਨਂ ਅਭਿਨੀਹਰਿ. ਕੁਣ੍ਡਧਾਨਤ੍ਥੇਰੋ ਤਸ੍ਸ ਪੁਰੇ ਆਗਮਨਾਵ ਅਭਿਞ੍ਞਾਪਾਦਕਂ ਚਤੁਤ੍ਥਜ੍ਝਾਨਂ ਸਮਾਪਜ੍ਜਿਤ੍ਵਾ ਇਦ੍ਧਿਯਾ ਆਕਾਸੇ ਠਤ੍ਵਾ ‘‘ਆਹਰਾਵੁਸੋ ਆਨਨ੍ਦ, ਸਤ੍ਥਾ ਮਂ ਜਾਨਾਤਿ, ਮਾਦਿਸਂ ਭਿਕ੍ਖੁਂ ਪਠਮਂ ਸਲਾਕਂ ਗਣ੍ਹਨ੍ਤਂ ਨ ਸਤ੍ਥਾ ਵਾਰੇਤੀ’’ਤਿ ਹਤ੍ਥਂ ਪਸਾਰੇਤ੍ਵਾ ਸਲਾਕਂ ਗਣ੍ਹਿ. ਸਤ੍ਥਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਥੇਰਂ ਇਮਸ੍ਮਿਂ ਸਾਸਨੇ ਪਠਮਂ ਸਲਾਕਂ ਗਣ੍ਹਨ੍ਤਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਵਙ੍ਗੀਸਤ੍ਥੇਰਵਤ੍ਥੁ

੨੧੨. ਚਤੁਤ੍ਥੇ ਪਟਿਭਾਨਵਨ੍ਤਾਨਨ੍ਤਿ ਸਮ੍ਪਨ੍ਨਪਟਿਭਾਨਾਨਂ ਵਙ੍ਗੀਸਤ੍ਥੇਰੋ ਅਗ੍ਗੋਤਿ ਦਸ੍ਸੇਤਿ. ਅਯਂ ਕਿਰ ਥੇਰੋ ਦਸਬਲਸ੍ਸ ਸਨ੍ਤਿਕਂ ਉਪਸਙ੍ਕਮਨ੍ਤੋ ਚਕ੍ਖੁਪਥਤੋ ਪਟ੍ਠਾਯ ਚਨ੍ਦੇਨ ਸਦ੍ਧਿਂ ਉਪਮੇਤ੍ਵਾ, ਸੂਰਿਯੇਨ, ਆਕਾਸੇਨ, ਮਹਾਸਮੁਦ੍ਦੇਨ, ਹਤ੍ਥਿਨਾਗੇਨ, ਸੀਹੇਨ ਮਿਗਰਞ੍ਞਾ ਸਦ੍ਧਿਂ ਉਪਮੇਤ੍ਵਾਪਿ ਅਨੇਕੇਹਿ ਪਦਸਤੇਹਿ ਪਦਸਹਸ੍ਸੇਹਿ ਸਤ੍ਥੁ ਵਣ੍ਣਂ ਵਦਨ੍ਤੋਯੇਵ ਉਪਸਙ੍ਕਮਤਿ. ਤਸ੍ਮਾ ਪਟਿਭਾਨਵਨ੍ਤਾਨਂ ਅਗ੍ਗੋ ਨਾਮ ਜਾਤੋ.

ਤਸ੍ਸ ਪਞ੍ਹਕਮ੍ਮੇ ਅਯਮਨੁਪੁਬ੍ਬਿਕਥਾ – ਅਯਮ੍ਪਿ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤੀਨਗਰੇ ਮਹਾਭੋਗਕੁਲੇ ਪਟਿਸਨ੍ਧਿਂ ਗਣ੍ਹਿਤ੍ਵਾ ਪੁਰਿਮਨਯੇਨੇਵ ਵਿਹਾਰਂ ਗਨ੍ਤ੍ਵਾ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਪਟਿਭਾਨਵਨ੍ਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਤ੍ਥੁ ਅਧਿਕਾਰਕਮ੍ਮਂ ਕਤ੍ਵਾ ‘‘ਅਹਮ੍ਪਿ ਅਨਾਗਤੇ ਪਟਿਭਾਨਵਨ੍ਤਾਨਂ ਅਗ੍ਗੋ ਭਵੇਯ੍ਯ’’ਨ੍ਤਿ ਪਤ੍ਥਨਂ ਕਤ੍ਵਾ ਸਤ੍ਥਾਰਾ ਬ੍ਯਾਕਤੋ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ. ਵਙ੍ਗੀਸਮਾਣਵੋਤਿਸ੍ਸ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਤਯੋ ਵੇਦੇ ਉਗ੍ਗਣ੍ਹਨ੍ਤੋ ਆਚਰਿਯਂ ਆਰਾਧੇਤ੍ਵਾ ਛਵਸੀਸਮਨ੍ਤਂ ਨਾਮ ਸਿਕ੍ਖਿਤ੍ਵਾ ਛਵਸੀਸਂ ਨਖੇਨ ਆਕੋਟੇਤ੍ਵਾ ‘‘ਅਯਂ ਸਤ੍ਤੋ ਅਸੁਕਯੋਨਿਯਂ ਨਾਮ ਨਿਬ੍ਬਤ੍ਤੋ’’ਤਿ ਜਾਨਾਤਿ.

ਬ੍ਰਾਹ੍ਮਣਾ ‘‘ਅਯਂ ਅਮ੍ਹਾਕਂ ਜੀਵਿਕਮਗ੍ਗੋ’’ਤਿ ਞਤ੍ਵਾ ਵਙ੍ਗੀਸਮਾਣਵਂ ਪਟਿਚ੍ਛਨ੍ਨਯਾਨੇ ਨਿਸੀਦਾਪੇਤ੍ਵਾ ਗਾਮਨਿਗਮਰਾਜਧਾਨਿਯੋ ਚਰਨ੍ਤਾ ਨਗਰਦ੍ਵਾਰੇ ਵਾ ਨਿਗਮਦ੍ਵਾਰੇ ਵਾ ਠਪੇਤ੍ਵਾ ਮਹਾਜਨਸ੍ਸ ਰਾਸਿਭੂਤਭਾਵਂ ਞਤ੍ਵਾ ‘‘ਯੋ ਵਙ੍ਗੀਸਂ ਪਸ੍ਸਤਿ, ਸੋ ਧਨਂ ਵਾ ਲਭਤਿ, ਯਸਂ ਵਾ ਲਭਤਿ, ਸਗ੍ਗਂ ਵਾ ਗਚ੍ਛਤੀ’’ਤਿ ਵਦਨ੍ਤਿ. ਤੇਸਂ ਕਥਂ ਸੁਤ੍ਵਾ ਬਹੂ ਜਨਾ ਲਞ੍ਜਂ ਦਤ੍ਵਾ ਪਸ੍ਸਿਤੁਕਾਮਾ ਹੋਨ੍ਤਿ. ਰਾਜਰਾਜਮਹਾਮਤ੍ਤਾ ਤੇਸਂ ਸਨ੍ਤਿਕਂ ਗਨ੍ਤ੍ਵਾ ‘‘ਕੋ ਆਚਰਿਯਸ੍ਸ ਜਾਨਵਿਸੇਸੋ’’ਤਿ ਪੁਚ੍ਛਨ੍ਤਿ. ਤੁਮ੍ਹੇ ਨ ਜਾਨਾਥ, ਸਕਲਜਮ੍ਬੁਦੀਪੇ ਅਮ੍ਹਾਕਂ ਆਚਰਿਯਸਦਿਸੋ ਅਞ੍ਞੋ ਪਣ੍ਡਿਤੋ ਨਾਮ ਨਤ੍ਥਿ, ਤਿਵਸ੍ਸਮਤ੍ਥਕੇ ਮਤਕਾਨਂ ਸੀਸਂ ਆਹਰਾਪੇਤ੍ਵਾ ਨਖੇਨ ਆਕੋਟੇਤ੍ਵਾ ‘‘ਅਯਂ ਸਤ੍ਤੋ ਅਸੁਕਯੋਨਿਯਂ ਨਿਬ੍ਬਤ੍ਤੋ’’ਤਿ ਜਾਨਾਤਿ. ਵਙ੍ਗੀਸੋਪਿ ਮਹਾਜਨਸ੍ਸ ਕਙ੍ਖਛੇਦਨਤ੍ਥਂ ਤੇ ਤੇ ਜਨੇ ਆਵਾਹੇਤ੍ਵਾ ਅਤ੍ਤਨੋ ਅਤ੍ਤਨੋ ਗਤਿਂ ਕਥਾਪੇਤਿ. ਤਂ ਨਿਸ੍ਸਾਯ ਮਹਾਜਨਸ੍ਸ ਹਤ੍ਥਤੋ ਸਤਮ੍ਪਿ ਸਹਸ੍ਸਮ੍ਪਿ ਲਭਤਿ.

ਬ੍ਰਾਹ੍ਮਣਾ ਵਙ੍ਗੀਸਮਾਣਵਂ ਆਦਾਯ ਯਥਾਰੁਚਿਂ ਵਿਚਰਿਤ੍ਵਾ ਪੁਨ ਸਾਵਤ੍ਥਿਂ ਆਗਮਂਸੁ. ਵਙ੍ਗੀਸੋ ਜੇਤਵਨਮਹਾਵਿਹਾਰਸ੍ਸ ਅਵਿਦੂਰਟ੍ਠਾਨੇ ਠਿਤੋ ਚਿਨ੍ਤੇਸਿ – ‘‘ਸਮਣੋ ਗੋਤਮੋ ਪਣ੍ਡਿਤੋਤਿ ਵਦਨ੍ਤਿ, ਨ ਖੋ ਪਨ ਸਬ੍ਬਕਾਲਂ ਮਯਾ ਇਮੇਸਂਯੇਵ ਵਚਨਂ ਕਰੋਨ੍ਤੇਨ ਚਰਿਤੁਂ ਵਟ੍ਟਤਿ, ਪਣ੍ਡਿਤਾਨਮ੍ਪਿ ਸਨ੍ਤਿਕਂ ਗਨ੍ਤੁਂ ਵਟ੍ਟਤੀ’’ਤਿ. ਸੋ ਬ੍ਰਾਹ੍ਮਣੇ ਆਹ – ‘‘ਤੁਮ੍ਹੇ ਗਚ੍ਛਥ, ਅਹਂ ਨ ਬਹੁਕੇਹਿ ਸਦ੍ਧਿਂ ਗਨ੍ਤ੍ਵਾ ਸਮਣਂ ਗੋਤਮਂ ਪਸ੍ਸਿਸ੍ਸਾਮੀ’’ਤਿ. ਤੇ ਆਹਂਸੁ – ‘‘ਵਙ੍ਗੀਸ, ਮਾ ਤੇ ਰੁਚ੍ਚਿ ਸਮਣਂ ਗੋਤਮਂ ਪਸ੍ਸਿਤੁਂ. ਯੋ ਹਿ ਨਂ ਪਸ੍ਸਤਿ, ਤਂ ਸੋ ਮਾਯਾਯ ਆਵਟ੍ਟੇਤੀ’’ਤਿ. ਵਙ੍ਗੀਸੋ ਤੇਸਂ ਕਥਂ ਅਨਾਦਿਯਿਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਮਧੁਰਪਟਿਸਨ੍ਥਾਰਂ ਕਤ੍ਵਾ ਏਕਮਨ੍ਤਂ ਨਿਸੀਦਿ.

ਅਥ ਨਂ ਸਤ੍ਥਾ ਪੁਚ੍ਛਿ – ‘‘ਵਙ੍ਗੀਸ, ਕਿਞ੍ਚਿ ਸਿਪ੍ਪਂ ਜਾਨਾਸੀ’’ਤਿ. ਆਮ, ਭੋ ਗੋਤਮ, ਛਵਸੀਸਮਨ੍ਤਂ ਨਾਮੇਕਂ ਜਾਨਾਮੀਤਿ. ਕਿਂ ਸੋ ਮਨ੍ਤੋ ਕਰੋਤੀਤਿ? ਤਿਵਸ੍ਸਮਤ੍ਥਕੇ ਮਤਾਨਮ੍ਪਿ ਤਂ ਮਨ੍ਤਂ ਜਪ੍ਪਿਤ੍ਵਾ ਸੀਸਂ ਨਖੇਨ ਆਕੋਟੇਤ੍ਵਾ ਨਿਬ੍ਬਤ੍ਤਟ੍ਠਾਨਂ ਜਾਨਾਮੀਤਿ. ਸਤ੍ਥਾ ਤਸ੍ਸ ਏਕਂ ਨਿਰਯੇ ਉਪ੍ਪਨ੍ਨਸ੍ਸ ਸੀਸਂ ਦਸ੍ਸੇਸਿ, ਏਕਂ ਮਨੁਸ੍ਸੇਸੁ ਉਪ੍ਪਨ੍ਨਸ੍ਸ, ਏਕਂ ਦੇਵੇਸੁ, ਏਕਂ ਪਰਿਨਿਬ੍ਬੁਤਸ੍ਸ ਸੀਸਂ ਦਸ੍ਸੇਸਿ. ਸੋ ਪਠਮਂ ਸੀਸਂ ਆਕੋਟੇਤ੍ਵਾ, ‘‘ਭੋ ਗੋਤਮ, ਅਯਂ ਸਤ੍ਤੋ ਨਿਰਯਂ ਗਤੋ’’ਤਿ ਆਹ. ਸਾਧੁ ਸਾਧੁ, ਵਙ੍ਗੀਸ, ਸੁਦਿਟ੍ਠਂ ਤਯਾ, ਅਯਂ ਸਤ੍ਤੋ ਕਹਂ ਗਤੋਤਿ ਪੁਚ੍ਛਿ. ਮਨੁਸ੍ਸਲੋਕਂ, ਭੋ ਗੋਤਮਾਤਿ. ਅਯਂ ਸਤ੍ਤੋ ਕਹਂ ਗਤੋਤਿ? ਦੇਵਲੋਕਂ, ਭੋ ਗੋਤਮਾਤਿ ਤਿਣ੍ਣਮ੍ਪਿ ਗਤਟ੍ਠਾਨਂ ਕਥੇਸਿ. ਪਰਿਨਿਬ੍ਬੁਤਸ੍ਸ ਪਨ ਸੀਸਂ ਨਖੇਨ ਆਕੋਟੇਨ੍ਤੋ ਨੇਵ ਅਨ੍ਤਂ ਨ ਕੋਟਿਂ ਪਸ੍ਸਤਿ. ਅਥ ਨਂ ਸਤ੍ਥਾ ‘‘ਨ ਸਕ੍ਕੋਸਿ ਤ੍ਵਂ, ਵਙ੍ਗੀਸਾ’’ਤਿ ਪੁਚ੍ਛਿ. ‘‘ਪਸ੍ਸਥ, ਭੋ ਗੋਤਮ, ਉਪਪਰਿਕ੍ਖਾਮਿ ਤਾਵਾ’’ਤਿ ਪੁਨਪ੍ਪੁਨਂ ਪਰਿਵਤ੍ਤੇਤਿ. ਬਾਹਿਰਕਮਨ੍ਤੇਨ ਖੀਣਾਸਵਸ੍ਸ ਗਤਿਂ ਕਥਂ ਜਾਨਿਸ੍ਸਤਿ, ਅਥਸ੍ਸ ਮਤ੍ਥਕਤੋ ਸੇਦੋ ਮੁਚ੍ਚਿ. ਸੋ ਲਜ੍ਜਿਤ੍ਵਾ ਤੁਣ੍ਹੀਭੂਤੋ ਅਟ੍ਠਾਸਿ. ਅਥ ਨਂ ਸਤ੍ਥਾ ‘‘ਕਿਲਮਸਿ, ਵਙ੍ਗੀਸਾ’’ਤਿ ਆਹ. ਆਮ, ਭੋ ਗੋਤਮ, ਇਮਸ੍ਸ ਸਤ੍ਤਸ੍ਸ ਗਤਟ੍ਠਾਨਂ ਜਾਨਿਤੁਂ ਨ ਸਕ੍ਕੋਮਿ. ਸਚੇ ਤੁਮ੍ਹੇ ਜਾਨਾਥ, ਕਥੇਥਾਤਿ. ‘‘ਵਙ੍ਗੀਸ, ਅਹਂ ਏਤਮ੍ਪਿ ਜਾਨਾਮਿ ਇਤੋ ਉਤ੍ਤਰਿਤਰਮ੍ਪੀ’’ਤਿ ਵਤ੍ਵਾ ਧਮ੍ਮਪਦੇ ਇਮਾ ਦ੍ਵੇ ਗਾਥਾ ਅਭਾਸਿ –

‘‘ਚੁਤਿਂ ਯੋ ਵੇਦਿ ਸਤ੍ਤਾਨਂ, ਉਪਪਤ੍ਤਿਂ ਚ ਸਬ੍ਬਸੋ;

ਅਸਤ੍ਤਂ ਸੁਗਤਂ ਬੁਦ੍ਧਂ, ਤਮਹਂ ਬ੍ਰੂਮਿ ਬ੍ਰਾਹ੍ਮਣਂ.

‘‘ਯਸ੍ਸ ਗਤਿਂ ਨ ਜਾਨਨ੍ਤਿ, ਦੇਵਾ ਗਨ੍ਧਬ੍ਬਮਾਨੁਸਾ;

ਖੀਣਾਸਵਂ ਅਰਹਨ੍ਤਂ, ਤਮਹਂ ਬ੍ਰੂਮਿ ਬ੍ਰਾਹ੍ਮਣ’’ਨ੍ਤਿ. (ਧ. ਪ. ੪੧੯-੪੨੦);

ਤਤੋ ਵਙ੍ਗੀਸੋ ਆਹ – ‘‘ਭੋ ਗੋਤਮ, ਵਿਜ੍ਜਾਯ ਵਿਜ੍ਜਂ ਦੇਨ੍ਤਸ੍ਸ ਨਾਮ ਪਰਿਹਾਨਿ ਨਤ੍ਥਿ, ਅਹਂ ਅਤ੍ਤਨਾ ਜਾਨਨਕਂ ਮਨ੍ਤਂ ਤੁਮ੍ਹਾਕਂ ਦਸ੍ਸਾਮਿ, ਤੁਮ੍ਹੇ ਏਤਂ ਮਨ੍ਤਂ ਮਯ੍ਹਂ ਦੇਥਾ’’ਤਿ. ਵਙ੍ਗੀਸ, ਨ ਮਯਂ ਮਨ੍ਤੇਨ ਮਨ੍ਤਂ ਦੇਮ, ਏਵਮੇਵ ਦੇਮਾਤਿ. ‘‘ਸਾਧੁ, ਭੋ ਗੋਤਮ, ਦੇਥ ਮੇ ਮਨ੍ਤ’’ਨ੍ਤਿ ਅਪਚਿਤਿਂ ਦਸ੍ਸੇਤ੍ਵਾ ਹਤ੍ਥਕਚ੍ਛਪਕਂ ਕਤ੍ਵਾ ਨਿਸੀਦਿ. ਕਿਂ, ਵਙ੍ਗੀਸ, ਤੁਮ੍ਹਾਕਂ ਸਮਯੇ ਮਹਗ੍ਘਮਨ੍ਤਂ ਵਾ ਕਿਞ੍ਚਿ ਵਾ ਗਣ੍ਹਨ੍ਤਾਨਂ ਪਰਿਵਾਸੋ ਨਾਮ ਨ ਹੋਤੀਤਿ? ਹੋਤਿ, ਭੋ ਗੋਤਮਾਤਿ. ਅਮ੍ਹਾਕਂ ਪਨ ਮਨ੍ਤੋ ਨਿਪ੍ਪਰਿਵਾਸੋਤਿ ਸਞ੍ਞਂ ਕਰੋਸੀਤਿ? ਬ੍ਰਾਹ੍ਮਣਾ ਨਾਮ ਮਨ੍ਤੇਹਿ ਅਤਿਤ੍ਤਾ ਹੋਨ੍ਤਿ, ਤਸ੍ਮਾ ਸੋ ਭਗਵਨ੍ਤਂ ਆਹ – ‘‘ਭੋ ਗੋਤਮ, ਤੁਮ੍ਹੇਹਿ ਕਥਿਤਨਿਯਾਮਂ ਕਰਿਸ੍ਸਾਮੀ’’ਤਿ. ਭਗਵਾ ਆਹ – ‘‘ਵਙ੍ਗੀਸ, ਮਯਂ ਇਮਂ ਮਨ੍ਤਂ ਦੇਨ੍ਤਾ ਅਮ੍ਹੇਹਿ ਸਮਾਨਲਿਙ੍ਗਸ੍ਸ ਦੇਮਾ’’ਤਿ. ਵਙ੍ਗੀਸੋ ‘‘ਯਂਕਿਞ੍ਚਿ ਕਤ੍ਵਾ ਮਯਾ ਇਮਂ ਮਨ੍ਤਂ ਗਣ੍ਹਿਤ੍ਵਾ ਗਨ੍ਤੁਂ ਵਟ੍ਟਤੀ’’ਤਿ ਬ੍ਰਾਹ੍ਮਣੇ ਆਹ. ਤੁਮ੍ਹੇ ਮਯਿ ਪਬ੍ਬਜਨ੍ਤੇ ਮਾ ਚਿਨ੍ਤਯਿਤ੍ਥ, ਅਹਂ ਇਮਂ ਮਨ੍ਤਂ ਗਣ੍ਹਿਤ੍ਵਾ ਸਕਲਜਮ੍ਬੁਦੀਪੇ ਜੇਟ੍ਠਕੋ ਭਵਿਸ੍ਸਾਮਿ. ਏਵਂ ਸਨ੍ਤੇ ਤੁਮ੍ਹਾਕਮ੍ਪਿ ਭਦ੍ਦਕਂ ਭਵਿਸ੍ਸਤੀ’’ਤਿ ਮਨ੍ਤਤ੍ਥਾਯ ਸਤ੍ਥੁ ਸਨ੍ਤਿਕੇ ਪਬ੍ਬਜਿ. ਸਤ੍ਥਾ ‘‘ਮਨ੍ਤਪਰਿਵਾਸਂ ਤਾਵ ਵਸਾਹੀ’’ਤਿ ਦ੍ਵਤ੍ਤਿਂਸਾਕਾਰਂ ਆਚਿਕ੍ਖਿ. ਪਞ੍ਞਵਾ ਸਤ੍ਤੋ ਦ੍ਵਤ੍ਤਿਂਸਾਕਾਰਂ ਸਜ੍ਝਾਯਨ੍ਤੋਵ ਤਤ੍ਥ ਖਯਵਯਂ ਪਟ੍ਠਪੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ.

ਤਸ੍ਮਿਂ ਅਰਹਤ੍ਤਂ ਪਤ੍ਤੇ ਬ੍ਰਾਹ੍ਮਣਾ ‘‘ਕਾ ਨੁ ਖੋ ਵਙ੍ਗੀਸਸ੍ਸ ਪਵਤ੍ਤਿ, ਪਸ੍ਸਿਸ੍ਸਾਮ ਨ’’ਨ੍ਤਿ ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਕਿਂ, ਭੋ ਵਙ੍ਗੀਸ, ਸਮਣਸ੍ਸ ਗੋਤਮਸ੍ਸ ਸਨ੍ਤਿਕੇ ਸਿਪ੍ਪਂ ਸਿਕ੍ਖਿਤ’’ਨ੍ਤਿ ਪੁਚ੍ਛਿਂਸੁ. ਆਮ, ਸਿਕ੍ਖਿਤਨ੍ਤਿ. ਤੇਨ ਹਿ ਏਹਿ ਗਮਿਸ੍ਸਾਮਾਤਿ. ਗਚ੍ਛਥ ਤੁਮ੍ਹੇ, ਤੁਮ੍ਹੇਹਿ ਸਦ੍ਧਿਂ ਗਨ੍ਤਬ੍ਬਕਿਚ੍ਚਂ ਮਯ੍ਹਂ ਨਿਟ੍ਠਿਤਨ੍ਤਿ. ਪਠਮਮੇਵ ਅਮ੍ਹੇਹਿ ਤੁਯ੍ਹਂ ਕਥਿਤਂ ‘‘ਸਮਣੋ ਗੋਤਮੋ ਅਤ੍ਤਾਨਂ ਪਸ੍ਸਿਤੁਂ ਆਗਤੇ ਮਾਯਾਯ ਆਵਟ੍ਟੇਤੀ’’ਤਿ. ਤ੍ਵਂ ਹਿ ਇਦਾਨਿ ਸਮਣਸ੍ਸ ਗੋਤਮਸ੍ਸ ਵਸਂ ਆਪਨ੍ਨੋ, ਕਿਂ ਮਯਂ ਤਵ ਸਨ੍ਤਿਕੇ ਕਰਿਸ੍ਸਾਮਾਤਿ ਆਗਤਮਗ੍ਗੇਨੇਵ ਪਕ੍ਕਮਿਂਸੁ. ਵਙ੍ਗੀਸਤ੍ਥੇਰੋਪਿ ਯਂ ਯਂ ਵੇਲਂ ਦਸਬਲਂ ਪਸ੍ਸਿਤੁਂ ਗਚ੍ਛਤਿ, ਏਕਂ ਥੁਤਿਂ ਕਰੋਨ੍ਤੋਵ ਗਚ੍ਛਤਿ. ਤੇਨ ਤਂ ਸਤ੍ਥਾ ਸਙ੍ਘਮਜ੍ਝੇ ਨਿਸਿਨ੍ਨੋ ਪਟਿਭਾਨਵਨ੍ਤਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਉਪਸੇਨਵਙ੍ਗਨ੍ਤਪੁਤ੍ਤਤ੍ਥੇਰਵਤ੍ਥੁ

੨੧੩. ਪਞ੍ਚਮੇ ਸਮਨ੍ਤਪਾਸਾਦਿਕਾਨਨ੍ਤਿ ਸਬ੍ਬਪਾਸਾਦਿਕਾਨਂ. ਉਪਸੇਨੋਤਿ ਤਸ੍ਸ ਥੇਰਸ੍ਸ ਨਾਮਂ. ਵਙ੍ਗਨ੍ਤਬ੍ਰਾਹ੍ਮਣਸ੍ਸ ਪਨ ਸੋ ਪੁਤ੍ਤੋ, ਤਸ੍ਮਾ ਵਙ੍ਗਨ੍ਤਪੁਤ੍ਤੋਤਿ ਵੁਚ੍ਚਤਿ. ਅਯਂ ਪਨ ਥੇਰੋ ਨ ਕੇਵਲਂ ਅਤ੍ਤਨਾਵ ਪਾਸਾਦਿਕੋ, ਪਰਿਸਾਪਿਸ੍ਸ ਪਾਸਾਦਿਕਾ, ਇਤਿ ਪਰਿਸਂ ਨਿਸ੍ਸਾਯ ਲਦ੍ਧਨਾਮਵਸੇਨ ਸਮਨ੍ਤਪਾਸਾਦਿਕਾਨਂ ਅਗ੍ਗੋ ਨਾਮ ਜਾਤੋ.

ਪਞ੍ਹਕਮ੍ਮੇ ਪਨਸ੍ਸ ਅਯਮਨੁਪੁਬ੍ਬਿਕਥਾ – ਅਯਮ੍ਪਿ ਹਿ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤੋ ਵਯਂ ਆਗਮ੍ਮ ਪੁਰਿਮਨਯੇਨੇਵ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਣਮਾਨੋ ਸਤ੍ਥਾਰਂ ਏਕਂ ਭਿਕ੍ਖੁਂ ਸਮਨ੍ਤਪਾਸਾਦਿਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਤ੍ਥੁ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਤ੍ਵਾ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਨਾਲਕਬ੍ਰਾਹ੍ਮਣਗਾਮੇ ਸਾਰਿਬ੍ਰਾਹ੍ਮਣਿਯਾ ਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਿ, ਉਪਸੇਨਦਾਰਕੋਤਿਸ੍ਸ ਨਾਮਂ ਅਕਂਸੁ.

ਸੋ ਵਯਪ੍ਪਤ੍ਤੋ ਤਯੋ ਵੇਦੇ ਉਗ੍ਗਣ੍ਹਿਤ੍ਵਾ ਦਸਬਲਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿ. ਸੋ ਉਪਸਮ੍ਪਦਾਯ ਏਕਵਸ੍ਸਿਕੋ ਹੁਤ੍ਵਾ ‘‘ਅਰਿਯਗਬ੍ਭਂ ਵਡ੍ਢੇਮੀ’’ਤਿ ਏਕਂ ਕੁਲਪੁਤ੍ਤਂ ਅਤ੍ਤਨੋ ਸਨ੍ਤਿਕੇ ਪਬ੍ਬਾਜੇਤ੍ਵਾ ਉਪਸਮ੍ਪਾਦੇਸਿ. ਸੋ ਪਵਾਰੇਤ੍ਵਾ ਸਦ੍ਧਿਵਿਹਾਰਿਕਸ੍ਸ ਏਕਵਸ੍ਸਿਕਕਾਲੇ ਅਤ੍ਤਨਾ ਦੁਵਸ੍ਸੋ ‘‘ਦਸਬਲੋ ਮਂ ਪਸ੍ਸਿਤ੍ਵਾ ਤੁਸਿਸ੍ਸਤੀ’’ਤਿ ਸਦ੍ਧਿਵਿਹਾਰਿਕਂ ਆਦਾਯ ਦਸਬਲਂ ਪਸ੍ਸਿਤੁਂ ਆਗਤੋ. ਸਤ੍ਥਾ ਤਂ ਵਨ੍ਦਿਤ੍ਵਾ ਏਕਮਨ੍ਤੇ ਨਿਸਿਨ੍ਨਂ ਪੁਚ੍ਛਿ – ‘‘ਕਤਿਵਸ੍ਸੋਸਿ ਤ੍ਵਂ ਭਿਕ੍ਖੂ’’ਤਿ? ਦੁਵਸ੍ਸੋ ਅਹਂ ਭਗਵਾਤਿ. ਅਯਂ ਪਨ ਭਿਕ੍ਖੁ ਕਤਿਵਸ੍ਸੋਤਿ? ਏਕਵਸ੍ਸੋ ਭਗਵਾਤਿ. ਕਿਨ੍ਤਾਯਂ ਭਿਕ੍ਖੁ ਹੋਤੀਤਿ? ਸਦ੍ਧਿਵਿਹਾਰਿਕੋ ਮੇ ਭਗਵਾਤਿ. ਅਥ ਨਂ ਸਤ੍ਥਾ ‘‘ਅਤਿਲਹੁਂ ਖੋ ਤ੍ਵਂ, ਮੋਘਪੁਰਿਸ, ਬਾਹੁਲ੍ਲਾਯ ਆਵਤ੍ਤੋ’’ਤਿ ਵਤ੍ਵਾ ਅਨੇਕਪਰਿਯਾਯੇਨ ਵਿਗਰਹਿ. ਥੇਰੋ ਸਤ੍ਥੁ ਸਨ੍ਤਿਕਾ ਗਰਹਂ ਲਭਿਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ‘‘ਇਮਿਨਾਵ ਪੁਣ੍ਣਚਨ੍ਦਸਸ੍ਸਿਰਿਕੇਨ ਮੁਖੇਨ ਸਤ੍ਥਾਰਂ ਪਰਿਸਮੇਵ ਨਿਸ੍ਸਾਯ ਸਾਧੁਕਾਰਂ ਦਾਪੇਸ੍ਸਾਮੀ’’ਤਿ ਤਂਦਿਵਸੇਯੇਵ ਏਕਂ ਠਾਨਂ ਗਨ੍ਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ.

ਤਤੋ ਯਸ੍ਮਾ ਥੇਰੋ ਮਹਾਕੁਲਤੋ ਨਿਕ੍ਖਮਿਤ੍ਵਾ ਪਬ੍ਬਜਿਤੋ ਪਥਵਿਘੁਟ੍ਠਧਮ੍ਮਕਥਿਕੋਵ, ਤਸ੍ਮਾ ਤਸ੍ਸ ਧਮ੍ਮਕਥਾਯ ਚੇਵ ਪਸੀਦਿਤ੍ਵਾ ਮਿਤ੍ਤਾਮਚ੍ਚਞਾਤਿਕੁਲੇਹਿ ਚ ਨਿਕ੍ਖਮਿਤ੍ਵਾ ਬਹੂ ਕੁਲਦਾਰਕਾ ਥੇਰਸ੍ਸ ਸਨ੍ਤਿਕੇ ਪਬ੍ਬਜਨ੍ਤਿ. ‘‘ਅਹਂ ਆਰਞ੍ਞਕੋ, ਤੁਮ੍ਹੇਪਿ ਆਰਞ੍ਞਕਾ ਭਵਿਤੁਂ ਸਕ੍ਕੋਨ੍ਤਾ ਪਬ੍ਬਜਥਾ’’ਤਿ ਤੇਰਸ ਧੁਤਙ੍ਗਾਨਿ ਆਚਿਕ੍ਖਿਤ੍ਵਾ ‘‘ਸਕ੍ਖਿਸ੍ਸਾਮ, ਭਨ੍ਤੇ’’ਤਿ ਵਦਨ੍ਤੇ ਪਬ੍ਬਾਜੇਤਿ. ਤੇ ਅਤ੍ਤਨੋ ਬਲੇਨ ਤਂ ਤਂ ਧੁਤਙ੍ਗਂ ਅਧਿਟ੍ਠਹਨ੍ਤਿ. ਥੇਰੋ ਅਤ੍ਤਨੋ ਦਸਵਸ੍ਸਕਾਲੇ ਵਿਨਯਂ ਪਗੁਣਂ ਕਤ੍ਵਾ ਸਬ੍ਬੇਵ ਉਪਸਮ੍ਪਾਦੇਸਿ. ਏਵਂ ਉਪਸਮ੍ਪਨ੍ਨਾ ਚਸ੍ਸ ਪਞ੍ਚਸਤਮਤ੍ਤਾ ਭਿਕ੍ਖੂ ਪਰਿਵਾਰਾ ਅਹੇਸੁਂ.

ਤਸ੍ਮਿਂ ਸਮਯੇ ਸਤ੍ਥਾ ਜੇਤਵਨਮਹਾਵਿਹਾਰੇ ਵਸਨ੍ਤੋ ‘‘ਇਚ੍ਛਾਮਹਂ, ਭਿਕ੍ਖਵੇ, ਅਦ੍ਧਮਾਸਂ ਪਟਿਸਲ੍ਲੀਯਿਤੁ’’ਨ੍ਤਿ ਭਿਕ੍ਖੁਸਙ੍ਘਸ੍ਸ ਆਰੋਚੇਤ੍ਵਾ ਏਕਵਿਹਾਰੀ ਹੋਤਿ. ਭਿਕ੍ਖੁਸਙ੍ਘੋਪਿ ‘‘ਯੋ ਭਗਵਨ੍ਤਂ ਦਸ੍ਸਨਾਯ ਉਪਸਙ੍ਕਮਤਿ, ਸੋ ਪਾਚਿਤ੍ਤਿਯਂ ਦੇਸਾਪੇਤਬ੍ਬੋ’’ਤਿ ਕਤਿਕਂ ਅਕਾਸਿ. ਤਦਾ ਉਪਸੇਨਤ੍ਥੇਰੋ ‘‘ਭਗਵਨ੍ਤਂ ਪਸ੍ਸਿਸ੍ਸਾਮੀ’’ਤਿ ਅਤ੍ਤਨੋ ਪਰਿਸਾਯ ਸਦ੍ਧਿਂ ਜੇਤਵਨਂ ਗਨ੍ਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਸਤ੍ਥਾ ਕਥਾਸਮੁਟ੍ਠਾਪਨਤ੍ਥਂ ਅਞ੍ਞਤਰਂ ਥੇਰਸ੍ਸ ਸਦ੍ਧਿਵਿਹਾਰਿਕਂ ਆਮਨ੍ਤੇਸਿ – ‘‘ਮਨਾਪਾਨਿ ਤੇ ਭਿਕ੍ਖੁ ਪਂਸੁਕੂਲਾਨੀ’’ਤਿ. ‘‘ਨ ਖੋ ਮੇ, ਭਨ੍ਤੇ, ਮਨਾਪਾਨਿ ਪਂਸੁਕੂਲਾਨੀ’’ਤਿ ਵਤ੍ਵਾ ਉਪਜ੍ਝਾਯੇ ਗਾਰਵੇਨ ਪਂਸੁਕੂਲਿਕਭਾਵਂ ਆਰੋਚੇਸਿ. ਇਮਸ੍ਮਿਂ ਠਾਨੇ ਸਤ੍ਥਾ ‘‘ਸਾਧੁ ਸਾਧੁ, ਉਪਸੇਨਾ’’ਤਿ ਥੇਰਸ੍ਸ ਸਾਧੁਕਾਰਂ ਦਤ੍ਵਾ ਅਨੇਕਪਰਿਯਾਯੇਨ ਗੁਣਕਥਂ ਕਥੇਸਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨ ਇਦਂ ਵਤ੍ਥੁ ਪਾਲ਼ਿਯਂ (ਪਾਰਾ. ੫੬੫) ਆਗਤਮੇਵ. ਅਥ ਸਤ੍ਥਾ ਅਪਰਭਾਗੇ ਅਰਿਯਗਣਮਜ੍ਝੇ ਨਿਸਿਨ੍ਨੋ ਇਮਸ੍ਮਿਂ ਸਾਸਨੇ ਥੇਰਂ ਸਮਨ੍ਤਪਾਸਾਦਿਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਦਬ੍ਬਤ੍ਥੇਰਵਤ੍ਥੁ

੨੧੪. ਛਟ੍ਠੇ ਸੇਨਾਸਨਪਞ੍ਞਾਪਕਾਨਨ੍ਤਿ ਸੇਨਾਸਨਂ ਪਞ੍ਞਾਪੇਨ੍ਤਾਨਂ. ਥੇਰਸ੍ਸ ਕਿਰ ਸੇਨਾਸਨਪਞ੍ਞਾਪਨਕਾਲੇ ਅਟ੍ਠਾਰਸਸੁ ਮਹਾਵਿਹਾਰੇਸੁ ਅਸਮ੍ਮਟ੍ਠਂ ਪਰਿਵੇਣਂ ਵਾ ਅਪਟਿਜਗ੍ਗਿਤਂ ਸੇਨਾਸਨਂ ਵਾ ਅਸੋਧਿਤਂ ਮਞ੍ਚਪੀਠਂ ਵਾ ਅਨੁਪਟ੍ਠਿਤਂ ਪਾਨੀਯਪਰਿਭੋਜਨੀਯਂ ਵਾ ਨਾਹੋਸਿ. ਤਸ੍ਮਾ ਸੇਨਾਸਨਪਞ੍ਞਾਪਕਾਨਂ ਅਗ੍ਗੋ ਨਾਮ ਜਾਤੋ. ਦਬ੍ਬੋਤਿਸ੍ਸ ਨਾਮਂ. ਮਲ੍ਲਰਾਜਕੁਲੇ ਪਨ ਉਪ੍ਪਨ੍ਨਤ੍ਤਾ ਮਲ੍ਲਪੁਤ੍ਤੋ ਨਾਮ ਜਾਤੋ.

ਤਸ੍ਸ ਪਞ੍ਹਕਮ੍ਮੇ ਅਯਮਨੁਪੁਬ੍ਬਿਕਥਾ – ਅਯਞ੍ਹਿ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਵੁਤ੍ਤਨਯੇਨੇਵ ਵਿਹਾਰਂ ਗਨ੍ਤ੍ਵਾ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਸੇਨਾਸਨਪਞ੍ਞਾਪਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਤ੍ਵਾ ਸਤ੍ਥਾਰਾ ਬ੍ਯਾਕਤੋ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਕਸ੍ਸਪਦਸਬਲਸ੍ਸ ਸਾਸਨਸ੍ਸ ਓਸਕ੍ਕਨਕਾਲੇ ਪਬ੍ਬਜਿ, ਤਦਾ ਤੇਨ ਸਦ੍ਧਿਂ ਅਪਰੇ ਛ ਜਨਾਤਿ ਸਤ੍ਤ ਭਿਕ੍ਖੂ ਏਕਚਿਤ੍ਤਾ ਹੁਤ੍ਵਾ ਅਞ੍ਞੇ ਸਾਸਨੇ ਅਗਾਰਵਂ ਕਰੋਨ੍ਤੇ ਦਿਸ੍ਵਾ ‘‘ਇਧ ਕਿਂ ਕਰੋਮ, ਏਕਮਨ੍ਤੇ ਸਮਣਧਮ੍ਮਂ ਕਤ੍ਵਾ ਦੁਕ੍ਖਸ੍ਸਨ੍ਤਂ ਕਰਿਸ੍ਸਾਮਾ’’ਤਿ ਨਿਸ੍ਸੇਣਿਂ ਬਨ੍ਧਿਤ੍ਵਾ ਉਚ੍ਚਪਬ੍ਬਤਸਿਖਰਂ ਅਭਿਰੁਹਿਤ੍ਵਾ ‘‘ਅਤ੍ਤਨੋ ਚਿਤ੍ਤਬਲਂ ਜਾਨਨ੍ਤਾ ਨਿਸ੍ਸੇਣਿਂ ਪਾਤੇਨ੍ਤੁ, ਜੀਵਿਤੇ ਸਾਲਯਾ ਓਤਰਨ੍ਤੁ, ਮਾ ਪਚ੍ਛਾਨੁਤਾਪਿਨੋ ਅਹੁਵਤ੍ਥਾ’’ਤਿ ਵਤ੍ਵਾ ਸਬ੍ਬੇ ਏਕਚਿਤ੍ਤਾ ਹੁਤ੍ਵਾ ਨਿਸ੍ਸੇਣਿਂ ਪਾਤੇਤ੍ਵਾ ‘‘ਅਪ੍ਪਮਤ੍ਤਾ ਹੋਥ, ਆਵੁਸੋ’’ਤਿ ਅਞ੍ਞਮਞ੍ਞਂ ਓਵਦਿਤ੍ਵਾ ਚਿਤ੍ਤਰੁਚਿਯੇਸੁ ਠਾਨੇਸੁ ਨਿਸੀਦਿਤ੍ਵਾ ਸਮਣਧਮ੍ਮਂ ਕਾਤੁਂ ਆਰਭਿਂਸੁ.

ਤਤ੍ਰੇਕੋ ਥੇਰੋ ਪਞ੍ਚਮੇ ਦਿਵਸੇ ਅਰਹਤ੍ਤਂ ਪਤ੍ਵਾ ‘‘ਮਮ ਕਿਚ੍ਚਂ ਨਿਪ੍ਫਨ੍ਨਂ, ਅਹਂ ਇਮਸ੍ਮਿਂ ਠਾਨੇ ਕਿਂ ਕਰਿਸ੍ਸਾਮੀ’’ਤਿ ਇਦ੍ਧਿਯਾ ਉਤ੍ਤਰਕੁਰੁਤੋ ਪਿਣ੍ਡਪਾਤਂ ਆਹਰਿਤ੍ਵਾ, ‘‘ਆਵੁਸੋ, ਇਮਂ ਪਿਣ੍ਡਪਾਤਂ ਪਰਿਭੁਞ੍ਜਥ, ਭਿਕ੍ਖਾਚਾਰਕਿਚ੍ਚਂ ਮਮਾਯਤ੍ਤਂ ਹੋਤੁ, ਤੁਮ੍ਹੇ ਅਤ੍ਤਨੋ ਕਮ੍ਮਂ ਕਰੋਥਾ’’ਤਿ ਆਹ. ਕਿਂ ਨੁ ਖੋ ਮਯਂ, ਆਵੁਸੋ, ਨਿਸ੍ਸੇਣਿਂ ਪਾਤੇਨ੍ਤਾ ਏਵਂ ਅਵੋਚੁਮ੍ਹਾ ‘‘ਯੋ ਪਠਮਂ ਧਮ੍ਮਂ ਸਚ੍ਛਿਕਰੋਤਿ, ਸੋ ਭਿਕ੍ਖਂ ਆਹਰਤੁ, ਤੇਨ ਆਭਤਂ ਸੇਸਾ ਪਰਿਭੁਞ੍ਜਿਤ੍ਵਾ ਸਮਣਧਮ੍ਮਂ ਕਰਿਸ੍ਸਨ੍ਤੀ’’ਤਿ. ਨਤ੍ਥਿ, ਆਵੁਸੋਤਿ. ਤੁਮ੍ਹੇ ਅਤ੍ਤਨੋ ਪੁਬ੍ਬਹੇਤੁਨਾ ਲਭਿਤ੍ਥ, ਮਯਮ੍ਪਿ ਸਕ੍ਕੋਨ੍ਤਾ ਵਟ੍ਟਸ੍ਸਨ੍ਤਂ ਕਰਿਸ੍ਸਾਮ, ਗਚ੍ਛਥ ਤੁਮ੍ਹੇਤਿ. ਥੇਰੋ ਤੇ ਸਞ੍ਞਾਪੇਤੁਂ ਅਸਕ੍ਕੋਨ੍ਤੋ ਫਾਸੁਕਟ੍ਠਾਨੇ ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਗਤੋ. ਅਪਰੋ ਥੇਰੋ ਸਤ੍ਤਮੇ ਦਿਵਸੇ ਅਨਾਗਾਮਿਫਲਂ ਪਤ੍ਵਾ ਤਤੋ ਚੁਤੋ ਸੁਦ੍ਧਾਵਾਸਬ੍ਰਹ੍ਮਲੋਕੇ ਨਿਬ੍ਬਤ੍ਤੋ.

ਇਤਰੇਪਿ ਥੇਰਾ ਤਤੋ ਚੁਤਾ ਏਕਂ ਬੁਦ੍ਧਨ੍ਤਰਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਤੇਸੁ ਤੇਸੁ ਕੁਲੇਸੁ ਨਿਬ੍ਬਤ੍ਤਾ. ਏਕੋ ਗਨ੍ਧਾਰਰਟ੍ਠੇ ਤਕ੍ਕਸਿਲਨਗਰੇ ਰਾਜਗੇਹੇ ਨਿਬ੍ਬਤ੍ਤੋ, ਏਕੋ ਪਬ੍ਬਤੇਯ੍ਯਰਟ੍ਠੇ ਪਰਿਬ੍ਬਾਜਿਕਾਯ ਕੁਚ੍ਛਿਮ੍ਹਿ ਨਿਬ੍ਬਤ੍ਤੋ, ਏਕੋ ਬਾਹਿਯਰਟ੍ਠੇ ਕੁਟੁਮ੍ਬਿਕਗੇਹੇ ਨਿਬ੍ਬਤ੍ਤੋ, ਏਕੋ ਰਾਜਗਹੇ ਕੁਟੁਮ੍ਬਿਕਗੇਹੇ ਨਿਬ੍ਬਤ੍ਤੋ. ਅਯਂ ਪਨ ਦਬ੍ਬਤ੍ਥੇਰੋ ਮਲ੍ਲਰਟ੍ਠੇ ਅਨੁਪਿਯਨਗਰੇ ਏਕਸ੍ਸ ਮਲ੍ਲਰਞ੍ਞੋ ਗੇਹੇ ਪਟਿਸਨ੍ਧਿਂ ਗਣ੍ਹਿ. ਤਸ੍ਸ ਮਾਤਾ ਉਪਵਿਜਞ੍ਞਕਾਲੇ ਕਾਲਮਕਾਸਿ, ਮਤਸਰੀਰਂ ਸੁਸਾਨਂ ਨੇਤ੍ਵਾ ਦਾਰੁਚਿਤਕਂ ਆਰੋਪੇਤ੍ਵਾ ਅਗ੍ਗਿਂ ਅਦਂਸੁ. ਤਸ੍ਸਾ ਅਗ੍ਗਿਵੇਗਸਨ੍ਤਤ੍ਤਂ ਉਦਰਪਟਲਂ ਦ੍ਵੇਧਾ ਅਹੋਸਿ. ਦਾਰਕੋ ਅਤ੍ਤਨੋ ਪੁਞ੍ਞਬਲੇਨ ਉਪ੍ਪਤਿਤ੍ਵਾ ਏਕਸ੍ਮਿਂ ਦਬ੍ਬਤ੍ਥਮ੍ਭੇ ਨਿਪਤਿ. ਤਂ ਦਾਰਕਂ ਗਹੇਤ੍ਵਾ ਅਯ੍ਯਿਕਾਯ ਅਦਂਸੁ. ਸਾ ਤਸ੍ਸ ਨਾਮਂ ਗਣ੍ਹਨ੍ਤੀ ਦਬ੍ਬਤ੍ਥਮ੍ਭੇ ਨਿਪਤਿਤ੍ਵਾ ਲਦ੍ਧਜੀਵਿਤਤ੍ਤਾ ਦਬ੍ਬੋਤਿਸ੍ਸ ਨਾਮਂ ਅਕਾਸਿ.

ਤਸ੍ਸ ਸਤ੍ਤਵਸ੍ਸਿਕਕਾਲੇ ਸਤ੍ਥਾ ਭਿਕ੍ਖੁਸਙ੍ਘਪਰਿਵਾਰੋ ਮਲ੍ਲਰਟ੍ਠੇ ਚਾਰਿਕਂ ਚਰਮਾਨੋ ਅਨੁਪਿਯਨਿਗਮਂ ਪਤ੍ਵਾ ਅਨੁਪਿਯਮ੍ਬਵਨੇ ਵਿਹਰਤਿ. ਦਬ੍ਬਕੁਮਾਰੋ ਸਤ੍ਥਾਰਂ ਦਿਸ੍ਵਾ ਦਸ੍ਸਨੇਨੇਵ ਪਸੀਦਿਤ੍ਵਾ ਪਬ੍ਬਜਿਤੁਕਾਮੋ ਹੁਤ੍ਵਾ ‘‘ਅਹਂ ਦਸਬਲਸ੍ਸ ਸਨ੍ਤਿਕੇ ਪਬ੍ਬਜਿਸ੍ਸਾਮੀ’’ਤਿ ਅਯ੍ਯਿਕਂ ਆਪੁਚ੍ਛਿ. ਸਾ ‘‘ਸਾਧੁ, ਤਾਤਾ’’ਤਿ ਦਬ੍ਬਕੁਮਾਰਂ ਆਦਾਯ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ, ‘‘ਭਨ੍ਤੇ, ਇਮਂ ਕੁਮਾਰਂ ਪਬ੍ਬਾਜੇਥਾ’’ਤਿ ਆਹ. ਸਤ੍ਥਾ ਅਞ੍ਞਤਰਸ੍ਸ ਭਿਕ੍ਖੁਨੋ ਸਞ੍ਞਂ ਅਦਾਸਿ ‘‘ਭਿਕ੍ਖੁ ਇਮਂ ਦਾਰਕਂ ਪਬ੍ਬਾਜੇਹੀ’’ਤਿ. ਸੋ ਥੇਰੋ ਸਤ੍ਥੁ ਵਚਨਂ ਸੁਤ੍ਵਾ ਦਬ੍ਬਕੁਮਾਰਂ ਪਬ੍ਬਾਜੇਨ੍ਤੋ ਤਚਪਞ੍ਚਕਂ ਕਮ੍ਮਟ੍ਠਾਨਂ ਆਚਿਕ੍ਖਿ. ਪੁਬ੍ਬਹੇਤੁਸਮ੍ਪਨ੍ਨੋ ਕਤਾਭਿਨੀਹਾਰੋ ਸਤ੍ਤੋ ਪਠਮਕੇਸਵਟ੍ਟਿਯਾ ਓਰੋਪਿਯਮਾਨਾਯ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ, ਦੁਤਿਯਕੇਸਵਟ੍ਟਿਯਾ ਓਰੋਪਿਯਮਾਨਾਯ ਸਕਦਾਗਾਮਿਫਲੇ, ਤਤਿਯਾਯ ਅਨਾਗਾਮਿਫਲੇ. ਸਬ੍ਬਕੇਸਾਨਂ ਪਨ ਓਰੋਪਨਞ੍ਚ ਅਰਹਤ੍ਤਫਲਸਚ੍ਛਿਕਿਰਿਯਾ ਚ ਅਪਚ੍ਛਾ ਅਪੁਰੇ ਅਹੋਸਿ.

ਸਤ੍ਥਾ ਮਲ੍ਲਰਟ੍ਠੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਰਾਜਗਹਂ ਗਨ੍ਤ੍ਵਾ ਵੇਲ਼ੁਵਨੇ ਵਾਸਂ ਕਪ੍ਪੇਸਿ. ਤਤ੍ਰਾਯਸ੍ਮਾ ਦਬ੍ਬੋ ਮਲ੍ਲਪੁਤ੍ਤੋ ਰਹੋਗਤੋ ਅਤ੍ਤਨੋ ਕਿਚ੍ਚਨਿਪ੍ਫਤ੍ਤਿਂ ਓਲੋਕੇਤ੍ਵਾ ਸਙ੍ਘਸ੍ਸ ਵੇਯ੍ਯਾਵਚ੍ਚਕਰਣੇ ਕਾਯਂ ਯੋਜੇਤੁਕਾਮੋ ਚਿਨ੍ਤੇਸਿ – ‘‘ਯਂਨੂਨਾਹਂ ਸਙ੍ਘਸ੍ਸ ਸੇਨਾਸਨਞ੍ਚ ਪਞ੍ਞਾਪੇਯ੍ਯਂ, ਭਤ੍ਤਾਨਿ ਚ ਉਦ੍ਦਿਸੇਯ੍ਯ’’ਨ੍ਤਿ. ਸੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਅਤ੍ਤਨੋ ਪਰਿਵਿਤਕ੍ਕਂ ਆਰੋਚੇਸਿ. ਸਤ੍ਥਾ ਤਸ੍ਸ ਸਾਧੁਕਾਰਂ ਦਤ੍ਵਾ ਸੇਨਾਸਨਪਞ੍ਞਾਪਕਤ੍ਤਞ੍ਚ ਭਤ੍ਤੁਦ੍ਦੇਸਕਤ੍ਤਞ੍ਚ ਸਮ੍ਪਟਿਚ੍ਛਿ. ਅਥ ਨਂ ‘‘ਅਯਂ ਦਬ੍ਬੋ ਦਹਰੋਵ ਸਮਾਨੋ ਮਹਨ੍ਤਟ੍ਠਾਨੇ ਠਿਤੋ’’ਤਿ ਸਤ੍ਤਵਸ੍ਸਿਕਕਾਲੇਯੇਵ ਉਪਸਮ੍ਪਾਦੇਸਿ. ਥੇਰੋ ਉਪਸਮ੍ਪਨ੍ਨਕਾਲਤੋਯੇਵ ਪਟ੍ਠਾਯ ਰਾਜਗਹਂ ਉਪਨਿਸ੍ਸਾਯ ਵਿਹਰਨ੍ਤਾਨਂ ਸਬ੍ਬਭਿਕ੍ਖੂਨਂ ਸੇਨਾਸਨਾਨਿ ਚ ਪਞ੍ਞਾਪੇਤਿ, ਭਿਕ੍ਖਞ੍ਚ ਸਮ੍ਪਟਿਚ੍ਛਿਤ੍ਵਾ ਉਦ੍ਦਿਸਤਿ. ਤਸ੍ਸ ਸੇਨਾਸਨਪਞ੍ਞਾਪਕਭਾਵੋ ਸਬ੍ਬਦਿਸਾਸੁ ਪਾਕਟੋ ਅਹੋਸਿ – ‘‘ਦਬ੍ਬੋ ਕਿਰ ਮਲ੍ਲਪੁਤ੍ਤੋ ਸਭਾਗਸਭਾਗਾਨਂ ਭਿਕ੍ਖੂਨਂ ਏਕਟ੍ਠਾਨੇ ਸੇਨਾਸਨਾਨਿ ਪਞ੍ਞਾਪੇਤਿ, ਦੂਰੇਪਿ ਸੇਨਾਸਨਂ ਪਞ੍ਞਾਪੇਤਿਯੇਵ. ਗਨ੍ਤੁਂ ਅਸਕ੍ਕੋਨ੍ਤੇ ਇਦ੍ਧਿਯਾ ਨੇਤੀਤਿ.

ਅਥ ਨਂ ਭਿਕ੍ਖੂ ਕਾਲੇਪਿ ਵਿਕਾਲੇਪਿ ‘‘ਅਮ੍ਹਾਕਂ, ਆਵੁਸੋ, ਜੀਵਕਮ੍ਬਵਨੇ ਸੇਨਾਸਨਂ ਪਞ੍ਞਾਪੇਹਿ, ਅਮ੍ਹਾਕਂ ਮਦ੍ਦਕੁਚ੍ਛਿਸ੍ਮਿਂ ਮਿਗਦਾਯੇ’’ਤਿ ਏਵਂ ਸੇਨਾਸਨਂ ਉਦ੍ਦਿਸਾਪੇਤ੍ਵਾ ਤਸ੍ਸ ਇਦ੍ਧਿਂ ਪਸ੍ਸਨ੍ਤਾ ਗਚ੍ਛਨ੍ਤਿ. ਸੋਪਿ ਇਦ੍ਧਿਯਾ ਮਨੋਮਯੇ ਕਾਯੇ ਅਭਿਸਙ੍ਖਰਿਤ੍ਵਾ ਏਕੇਕਸ੍ਸ ਥੇਰਸ੍ਸ ਏਕੇਕਂ ਅਤ੍ਤਨਾ ਸਦਿਸਂ ਭਿਕ੍ਖੁਂ ਨਿਮ੍ਮਿਨਿਤ੍ਵਾ ਅਙ੍ਗੁਲਿਯਾ ਜਲਮਾਨਾਯ ਪੁਰਤੋ ਪੁਰਤੋ ਗਨ੍ਤ੍ਵਾ ‘‘ਅਯਂ ਮਞ੍ਚੋ, ਇਦਂ ਪੀਠ’’ਨ੍ਤਿਆਦੀਨਿ ਵਤ੍ਵਾ ਸੇਨਾਸਨਂ ਪਞ੍ਞਾਪੇਤ੍ਵਾ ਪੁਨ ਅਤ੍ਤਨੋ ਵਸਨਟ੍ਠਾਨਮੇਵ ਆਗਚ੍ਛਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨਿਦਂ ਵਤ੍ਥੁ ਪਾਲ਼ਿਯਂ ਆਗਤਮੇਵ. ਸਤ੍ਥਾ ਇਦਮੇਵ ਕਾਰਣਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਅਪਰਭਾਗੇ ਅਰਿਯਗਣਮਜ੍ਝੇ ਨਿਸਿਨ੍ਨੋ ਥੇਰਂ ਸੇਨਾਸਨਪਞ੍ਞਾਪਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਪਿਲਿਨ੍ਦਵਚ੍ਛਤ੍ਥੇਰਵਤ੍ਥੁ

੨੧੫. ਸਤ੍ਤਮੇ ਦੇਵਤਾਨਂ ਪਿਯਮਨਾਪਾਨਨ੍ਤਿ ਦੇਵਤਾਨਂ ਪਿਯਾਨਞ੍ਚੇਵ ਮਨਾਪਾਨਞ੍ਚ ਪਿਲਿਨ੍ਦਵਚ੍ਛਤ੍ਥੇਰੋ ਅਗ੍ਗੋਤਿ ਦਸ੍ਸੇਤਿ. ਸੋ ਕਿਰ ਅਨੁਪ੍ਪਨ੍ਨੇ ਬੁਦ੍ਧੇ ਚਕ੍ਕਵਤ੍ਤੀ ਰਾਜਾ ਹੁਤ੍ਵਾ ਮਹਾਜਨਂ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਤ੍ਵਾ ਸਗ੍ਗਪਰਾਯਣਂ ਅਕਾਸਿ. ਯੇਭੁਯ੍ਯੇਨ ਕਿਰ ਛਸੁ ਕਾਮਸਗ੍ਗੇਸੁ ਨਿਬ੍ਬਤ੍ਤਦੇਵਤਾ ਤਸ੍ਸੇਵ ਓਵਾਦਂ ਲਭਿਤ੍ਵਾ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਅਤ੍ਤਨੋ ਸਮ੍ਪਤ੍ਤਿਂ ਓਲੋਕੇਤ੍ਵਾ ‘‘ਕਂ ਨੁ ਖੋ ਨਿਸ੍ਸਾਯ ਇਮਂ ਸਗ੍ਗਸਮ੍ਪਤ੍ਤਿਂ ਲਭਿਮ੍ਹਾ’’ਤਿ ਆਵਜ੍ਜਮਾਨਾ ਇਮਂ ਥੇਰਂ ਦਿਸ੍ਵਾ ‘‘ਥੇਰਂ ਨਿਸ੍ਸਾਯ ਅਮ੍ਹੇਹਿ ਸਮ੍ਪਤਿ ਲਦ੍ਧਾ’’ਤਿ ਸਾਯਂਪਾਤਂ ਥੇਰਂ ਨਮਸ੍ਸਨ੍ਤਿ. ਤਸ੍ਮਾ ਸੋ ਦੇਵਤਾਨਂ ਪਿਯਮਨਾਪਾਨਂ ਅਗ੍ਗੋ ਨਾਮ ਜਾਤੋ. ਪਿਲਿਨ੍ਦੋਤਿ ਪਨਸ੍ਸ ਗੋਤ੍ਤਂ, ਵਚ੍ਛੋਤਿ ਨਾਮਂ. ਤਦੁਭਯਂ ਸਂਸਨ੍ਦੇਤ੍ਵਾ ਪਿਲਿਨ੍ਦਵਚ੍ਛੋਤਿ ਵੁਚ੍ਚਤਿ.

ਤਸ੍ਸ ਪਞ੍ਹਕਮ੍ਮੇ ਅਯਮਨੁਪੁਬ੍ਬਿਕਥਾ – ਅਯਂ ਕਿਰ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤੀਨਗਰੇ ਮਹਾਭੋਗਕੁਲੇ ਨਿਬ੍ਬਤ੍ਤੋ ਪੁਰਿਮਨਯੇਨੇਵ ਸਤ੍ਥੁ ਧਮ੍ਮਦੇਸਨਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਦੇਵਤਾਨਂ ਪਿਯਮਨਾਪਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਤਂ ਠਾਨਨ੍ਤਰਂ ਪਤ੍ਥੇਤ੍ਵਾ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ. ਪਿਲਿਨ੍ਦਵਚ੍ਛੋਤਿਸ੍ਸ ਨਾਮਂ ਅਕਂਸੁ. ਸੋ ਅਪਰੇਨ ਸਮਯੇਨ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਉਪਸਮ੍ਪਨ੍ਨੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਸੋ ਗਿਹੀਹਿਪਿ ਭਿਕ੍ਖੂਹਿਪਿ ਸਦ੍ਧਿਂ ਕਥੇਨ੍ਤੋ ‘‘ਏਹਿ, ਵਸਲ, ਗਚ੍ਛ, ਵਸਲ, ਆਹਰ, ਵਸਲ, ਗਣ੍ਹ, ਵਸਲਾ’’ਤਿ ਵਸਲਵਾਦੇਨੇਵ ਸਮੁਦਾਚਰਤਿ. ਤਂ ਕਥਂ ਆਹਰਿਤ੍ਵਾ ਤਥਾਗਤਂ ਪੁਚ੍ਛਿਂਸੁ – ‘‘ਭਗਵਾ ਅਰਿਯਾ ਨਾਮ ਫਰੁਸਵਾਚਾ ਨ ਹੋਨ੍ਤੀ’’ਤਿ. ਭਿਕ੍ਖਵੇ, ਅਰਿਯਾਨਂ ਪਰਵਮ੍ਭਨਵਸੇਨ ਫਰੁਸਵਾਚਾ ਨਾਮ ਨਤ੍ਥਿ, ਅਪਿਚ ਖੋ ਪਨ ਭਵਨ੍ਤਰੇ ਆਚਿਣ੍ਣਵਸੇਨ ਭਵੇਯ੍ਯਾਤਿ. ਭਨ੍ਤੇ, ਪਿਲਿਨ੍ਦਵਚ੍ਛਤ੍ਥੇਰੋ ਉਟ੍ਠਾਯ ਸਮੁਟ੍ਠਾਯ ਗਿਹੀਹਿਪਿ ਭਿਕ੍ਖੂਹਿਪਿ ਸਦ੍ਧਿਂ ਕਥੇਨ੍ਤੋ, ‘‘ਵਸਲ, ਵਸਲਾ’’ਤਿ ਕਥੇਤਿ, ਕਿਮੇਤ੍ਥ ਕਾਰਣਂ ਭਗਵਾਤਿ. ਭਿਕ੍ਖਵੇ, ਨ ਮਯ੍ਹਂ ਪੁਤ੍ਤਸ੍ਸ ਏਤਂ ਇਦਾਨੇਵ ਆਚਿਣ੍ਣਂ, ਅਤੀਤੇ ਪਨੇਸ ਪਞ੍ਚ ਜਾਤਿਸਤਾਨਿ ਵਸਲਵਾਦਿਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ. ਇਚ੍ਚੇਸ ਭਵਾਚਿਣ੍ਣੇਨੇਵ ਕਥੇਸਿ, ਨ ਫਰੁਸਵਸੇਨ. ਅਰਿਯਾਨਞ੍ਹਿ ਵੋਹਾਰੋ ਫਰੁਸੋਪਿ ਸਮਾਨੋ ਚੇਤਨਾਯ ਅਫਰੁਸਭਾਵੇਨ ਪਰਿਸੁਦ੍ਧੋਵ, ਅਪ੍ਪਮਤ੍ਤਕਮ੍ਪੇਤ੍ਥ ਪਾਪਂ ਨ ਉਪਲਬ੍ਭਤੀਤਿ ਵਤ੍ਵਾ ਧਮ੍ਮਪਦੇ ਇਮਂ ਗਾਥਮਾਹ –

‘‘ਅਕਕ੍ਕਸਂ ਵਿਞ੍ਞਾਪਨਿਂ, ਗਿਰਂ ਸਚ੍ਚਮੁਦੀਰਯੇ;

ਯਾਯ ਨਾਭਿਸਜੇ ਕਞ੍ਚਿ, ਤਮਹਂ ਬ੍ਰੂਮਿ ਬ੍ਰਾਹ੍ਮਣ’’ਨ੍ਤਿ.

ਅਥੇਕਦਿਵਸਂ ਥੇਰੋ ਰਾਜਗਹਂ ਪਿਣ੍ਡਾਯ ਪਵਿਸਨ੍ਤੋ ਏਕਂ ਪੁਰਿਸਂ ਪਿਪ੍ਪਲੀਨਂ ਭਾਜਨਂ ਪੂਰੇਤ੍ਵਾ ਆਦਾਯ ਅਨ੍ਤੋਨਗਰਂ ਪਵਿਸਨ੍ਤਂ ਦਿਸ੍ਵਾ ‘‘ਕਿਂ ਤੇ, ਵਸਲ, ਭਾਜਨੇ’’ਤਿ ਆਹ. ਸੋ ਚਿਨ੍ਤੇਸਿ – ‘‘ਅਯਂ ਸਮਣੋ ਮਯਾ ਸਦ੍ਧਿਂ ਪਾਤੋਵ ਫਰੁਸਕਥਂ ਕਥੇਸਿ, ਇਮਸ੍ਸ ਅਨੁਚ੍ਛਵਿਕਮੇਵ ਵਤ੍ਤੁਂ ਵਟ੍ਟਤੀ’’ਤਿ ‘‘ਮੂਸਿਕਵਚ੍ਚਂ ਮੇ, ਭਨ੍ਤੇ, ਭਾਜਨੇ’’ਤਿ ਆਹ. ਏਵਂ ਭਵਿਸ੍ਸਤਿ, ਵਸਲਾਤਿ. ਤਸ੍ਸ ਥੇਰਸ੍ਸ ਦਸ੍ਸਨਂ ਵਿਜਹਨ੍ਤਸ੍ਸ ਸਬ੍ਬਂ ਮੂਸਿਕਵਚ੍ਚਮੇਵ ਅਹੋਸਿ. ਸੋ ਚਿਨ੍ਤੇਸਿ – ‘‘ਇਮਾ ਪਿਪ੍ਪਲਿਯੋ ਮੂਸਿਕਵਚ੍ਚਸਦਿਸਾ ਪਞ੍ਞਾਯਨ੍ਤਿ, ਸਭਾਵੋ ਨੁ ਖੋ ਨੋ’’ਤਿ ਵੀਮਂਸਨ੍ਤੋ ਹਤ੍ਥੇਨ ਉਪ੍ਪੀਲ਼ੇਸਿ. ਅਥਸ੍ਸ ਉਨ੍ਦੂਰਵਚ੍ਚਭਾਵਂ ਞਤ੍ਵਾ ਬਲਵਦੋਮਨਸ੍ਸਂ ਉਪ੍ਪਜ੍ਜਿ. ਸੋ ‘‘ਇਮਾਯੇਵ ਨੁ ਖੋ ਏਵਰੂਪਾ, ਉਦਾਹੁ ਸਕਟੇਪੀ’’ਤਿ ਗਨ੍ਤ੍ਵਾ ਓਲੋਕੇਨ੍ਤੋ ਸਬ੍ਬਾਪਿ ਪਿਪ੍ਪਲਿਯੋ ਤਾਦਿਸਾਵ ਦਿਸ੍ਵਾ ਹਦਯਂ ਹਤ੍ਥੇਨ ਸਨ੍ਧਾਰੇਤ੍ਵਾ ‘‘ਇਦਂ ਨ ਅਞ੍ਞਸ੍ਸ ਕਮ੍ਮਂ, ਮਯਾ ਪਾਤੋਵ ਦਿਟ੍ਠਭਿਕ੍ਖੁਸ੍ਸੇਤਂ ਕਮ੍ਮਂ, ਅਦ੍ਧਾ ਏਕਂ ਉਪਾਯਂ ਭਵਿਸ੍ਸਤਿ, ਤਸ੍ਸ ਗਤਟ੍ਠਾਨਂ ਅਨੁਵਿਚਿਨਿਤ੍ਵਾ ਏਤਂ ਕਾਰਣਂ ਜਾਨਿਸ੍ਸਾਮੀ’’ਤਿ ਥੇਰਸ੍ਸ ਗਤਮਗ੍ਗਂ ਪੁਚ੍ਛਿਤ੍ਵਾ ਪਾਯਾਸਿ.

ਅਥੇਕੋ ਪੁਰਿਸੋ ਤਂ ਅਤਿਵਿਯ ਚਣ੍ਡਿਕਤਂ ਗਚ੍ਛਨ੍ਤਂ ਦਿਸ੍ਵਾ, ‘‘ਭੋ ਪੁਰਿਸ, ਤ੍ਵਂ ਅਤਿਵਿਯ ਚਣ੍ਡਿਕਤੋਵ ਗਚ੍ਛਸਿ, ਕੇਨ ਕਮ੍ਮੇਨ ਗਚ੍ਛਸੀ’’ਤਿ ਪੁਚ੍ਛਿ. ਸੋ ਤਸ੍ਸ ਤਂ ਪਵਤ੍ਤਿਂ ਆਰੋਚੇਸਿ. ਸੋ ਤਸ੍ਸ ਕਥਂ ਸੁਤ੍ਵਾ ਏਵਮਾਹ – ‘‘ਭੋ, ਮਾ ਚਿਨ੍ਤਯਿ, ਮਯ੍ਹਂ ਅਯ੍ਯੋ ਪਿਲਿਨ੍ਦਵਚ੍ਛੋ ਭਵਿਸ੍ਸਤਿ, ਤ੍ਵਂ ਏਤਦੇਵ ਭਾਜਨਂ ਪੂਰੇਤ੍ਵਾ ਆਦਾਯ ਗਨ੍ਤ੍ਵਾ ਥੇਰਸ੍ਸ ਪੁਰਤੋ ਤਿਟ੍ਠ. ‘ਕਿਂ ਨਾਮੇਤਂ, ਵਸਲਾ’ਤਿ ਵੁਤ੍ਤਕਾਲੇ ਚ ‘ਪਿਪ੍ਪਲਿਯੋ, ਭਨ੍ਤੇ’ਤਿ ਵਦ, ਥੇਰੋ ‘ਏਵਂ ਭਵਿਸ੍ਸਤਿ, ਵਸਲਾ’ਤਿ ਵਕ੍ਖਤਿ. ਪੁਨ ਸਬ੍ਬਾਪਿ ਪਿਪ੍ਪਲਿਯੋ ਭਵਿਸ੍ਸਨ੍ਤੀ’’ਤਿ. ਸੋ ਤਥਾ ਅਕਾਸਿ. ਸਬ੍ਬਾ ਪਿਪ੍ਪਲਿਯੋ ਪਟਿਪਾਕਤਿਕਾ ਅਹੇਸੁਂ. ਇਦਮੇਤ੍ਤਕਂ ਵਤ੍ਥੁ. ਅਪਰਭਾਗੇ ਪਨ ਸਤ੍ਥਾ ਦੇਵਤਾਨਂ ਪਿਯਮਨਾਪਕਾਰਣਮੇਵ ਵਤ੍ਥੁਂ ਕਤ੍ਵਾ ਥੇਰਂ ਦੇਵਤਾਨਂ ਪਿਯਮਨਾਪਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਬਾਹਿਯਦਾਰੁਚੀਰਿਯਤ੍ਥੇਰਵਤ੍ਥੁ

੨੧੬. ਅਟ੍ਠਮੇ ਖਿਪ੍ਪਾਭਿਞ੍ਞਾਨਨ੍ਤਿ ਖਿਪ੍ਪਂ ਅਧਿਗਤਅਭਿਞ੍ਞਾਨਂ ਦਾਰੁਚੀਰਿਯਤ੍ਥੇਰੋ ਅਗ੍ਗੋਤਿ ਦਸ੍ਸੇਤਿ. ਅਯਞ੍ਹਿ ਥੇਰੋ ਸਂਖਿਤ੍ਤਧਮ੍ਮਦੇਸਨਾਪਰਿਯੋਸਾਨੇ ਅਰਹਤ੍ਤਂ ਪਾਪੁਣਿ, ਮਗ੍ਗਫਲਾਨਂ ਪਰਿਕਮ੍ਮਕਿਚ੍ਚਂ ਨਾਹੋਸਿ. ਤਸ੍ਮਾ ਖਿਪ੍ਪਾਭਿਞ੍ਞਾਨਂ ਅਗ੍ਗੋ ਨਾਮ ਜਾਤੋ. ਬਾਹਿਯਰਟ੍ਠੇ ਪਨ ਜਾਤਤ੍ਤਾ ਬਾਹਿਯੋਤਿਸ੍ਸ ਨਾਮਂ ਅਹੋਸਿ. ਸੋ ਅਪਰਭਾਗੇ ਦਾਰੁਚੀਰਂ ਨਿਵਾਸੇਸਿ. ਤਸ੍ਮਾ ਦਾਰੁਚੀਰਿਯੋ ਨਾਮ ਜਾਤੋ.

ਤਸ੍ਸ ਪਞ੍ਹਕਮ੍ਮੇ ਅਯਮਨੁਪੁਬ੍ਬਿਕਥਾ – ਅਯਮ੍ਪਿ ਹਿ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤੋ ਦਸਬਲਸ੍ਸ ਧਮ੍ਮਦੇਸਨਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਖਿਪ੍ਪਾਭਿਞ੍ਞਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਤ੍ਵਾ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਕਸ੍ਸਪਦਸਬਲਸ੍ਸ ਸਾਸਨਸ੍ਸ ਓਸਕ੍ਕਨਕਾਲੇ ਹੇਟ੍ਠਾ ਵੁਤ੍ਤੇਹਿ ਭਿਕ੍ਖੂਹਿ ਸਦ੍ਧਿਂ ਸਮਣਧਮ੍ਮਂ ਕਤ੍ਵਾ ਪਰਿਪੁਣ੍ਣਸੀਲੋ ਜੀਵਿਤਕ੍ਖਯਂ ਪਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ.

ਸੋ ਏਕਂ ਬੁਦ੍ਧਨ੍ਤਰਂ ਦੇਵਲੋਕੇ ਵਸਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਬਾਹਿਯਰਟ੍ਠੇ ਕੁਲਗੇਹੇ ਨਿਬ੍ਬਤ੍ਤੋ. ਵਯਂ ਆਗਮ੍ਮ ਘਰਾਵਾਸਂ ਵਸਨ੍ਤੋ ‘‘ਵੋਹਾਰਂ ਕਰਿਸ੍ਸਾਮੀ’’ਤਿ ਸੁਵਣ੍ਣਭੂਮਿਗਮਨੀਯਂ ਨਾਵਂ ਅਭਿਰੁਹਿ. ਨਾਵਾ ਇਚ੍ਛਿਤਂ ਦੇਸਂ ਅਪ੍ਪਤ੍ਵਾਵ ਸਮੁਦ੍ਦਮਜ੍ਝੇ ਭਿਨ੍ਨਾ, ਮਹਾਜਨੋ ਮਚ੍ਛਕਚ੍ਛਪਭਕ੍ਖੋ ਅਹੋਸਿ. ਅਯਂ ਪਨ ਏਕਂ ਦਾਰੁਖਣ੍ਡਂ ਗਹੇਤ੍ਵਾ ਸਤ੍ਤਮੇ ਦਿਵਸੇ ਸੁਪ੍ਪਾਰਕਪਟ੍ਟਨੇ ਉਤ੍ਤਿਣ੍ਣੋ ਮਨੁਸ੍ਸਾਵਾਸਂ ਪਤ੍ਵਾ ‘‘ਅਚੇਲਕਨਿਯਾਮੇਨ ਮਨੁਸ੍ਸੇ ਉਪਸਙ੍ਕਮਿਤੁਂ ਅਯੁਤ੍ਤ’’ਨ੍ਤਿ ਅਵਿਦੂਰੇ ਠਾਨੇ ਏਕਂ ਮਹਾਤਲ਼ਾਕਾ ਸੇਵਾਲਂ ਗਹੇਤ੍ਵਾ ਸਰੀਰਂ ਵੇਠੇਤ੍ਵਾ ਏਕਸ੍ਮਿਂ ਠਾਨੇ ਪਤਿਤਂ ਏਕਂ ਕਪਾਲਂ ਆਦਾਯ ਭਿਕ੍ਖਾਯ ਪਾਵਿਸਿ.

ਮਨੁਸ੍ਸਾ ਤਂ ਦਿਸ੍ਵਾ ਚਿਨ੍ਤੇਸੁਂ – ‘‘ਸਚੇ ਲੋਕੇ ਅਰਹਨ੍ਤਾ ਨਾਮ ਅਤ੍ਥਿ, ਏਵਂਵਿਧੇਹਿ ਭਵਿਤਬ੍ਬਂ. ਕਿਂ ਨੁ ਖੋ ਅਯ੍ਯੋ ਉਕ੍ਕਟ੍ਠਭਾਵੇਨ ਵਤ੍ਥਂ ਨ ਗਣ੍ਹਾਤਿ, ਉਦਾਹੁ ਦਿਯ੍ਯਮਾਨਂ ਗਣ੍ਹੇਯ੍ਯਾ’’ਤਿ ਵੀਮਂਸਨ੍ਤਾ ਨਾਨਾਦਿਸਾਹਿ ਵਤ੍ਥਾਨਿ ਆਹਰਿਂਸੁ. ਸੋ ਚਿਨ੍ਤੇਸਿ – ‘‘ਸਚਾਹਂ ਨ ਇਮਿਨਾ ਨਿਯਾਮੇਨ ਆਗਮਿਸ੍ਸਂ, ਨ ਮੇ ਏਤੇ ਪਸੀਦੇਯ੍ਯੁਂ, ਯਂਕਿਞ੍ਚਿ ਕਤ੍ਵਾ ਇਮੇ ਵਞ੍ਚੇਤ੍ਵਾ ਜੀਵਿਕੁਪਾਯਂ ਕਾਤੁਂ ਵਟ੍ਟਤੀ’’ਤਿ ਵਤ੍ਥਾਨਿ ਨ ਪਟਿਗ੍ਗਣ੍ਹਿ. ਮਨੁਸ੍ਸਾ ਭਿਯ੍ਯੋਸੋਮਤ੍ਤਾਯ ਪਸਨ੍ਨਾ ਮਹਾਸਕ੍ਕਾਰਂ ਕਰਿਂਸੁ. ਸੋਪਿ ਭਤ੍ਤਕਿਚ੍ਚਂ ਕਤ੍ਵਾ ਅਵਿਦੂਰਟ੍ਠਾਨੇ ਦੇਵਕੁਲਂ ਗਤੋ. ਮਹਾਜਨੋ ਤੇਨ ਸਦ੍ਧਿਂਯੇਵ ਗਨ੍ਤ੍ਵਾ ਦੇਵਕੁਲਂ ਪਟਿਜਗ੍ਗਿਤ੍ਵਾ ਅਦਾਸਿ. ਸੋ ਚਿਨ੍ਤੇਸਿ – ‘‘ਇਮੇ ਮਯ੍ਹਂ ਸੇਵਾਲੇ ਨਿਵਾਸਨਮਤ੍ਤੇ ਪਸੀਦਿਤ੍ਵਾ ਏਵਂਵਿਧਂ ਸਕ੍ਕਾਰਂ ਕਰੋਨ੍ਤਿ, ਏਤੇਸਂ ਮਯਾ ਉਕ੍ਕਟ੍ਠੇਨੇਵ ਭਵਿਤੁਂ ਵਟ੍ਟਤੀ’’ਤਿ ਸਲ੍ਲਹੁਕਾਨਿ ਰੁਕ੍ਖਫਲਕਾਨਿ ਗਹੇਤ੍ਵਾ ਤਚ੍ਛੇਤ੍ਵਾ ਵਾਕੇਸੁ ਆਵੁਣਿਤ੍ਵਾ ਚੀਰਂ ਕਤ੍ਵਾ ਨਿਵਾਸੇਤ੍ਵਾ ਪਾਰੁਪਿਤ੍ਵਾ ਜੀਵਿਕਂ ਕਪ੍ਪੇਨ੍ਤੋ ਵਸਿ.

ਅਥ ਯੋ ਸੋ ਕਸ੍ਸਪਬੁਦ੍ਧਕਾਲੇ ਸਤ੍ਤਸੁ ਜਨੇਸੁ ਸਮਣਧਮ੍ਮਂ ਕਰੋਨ੍ਤੇਸੁ ਏਕੋ ਭਿਕ੍ਖੁ ਸੁਦ੍ਧਾਵਾਸਬ੍ਰਹ੍ਮਲੋਕੇ ਨਿਬ੍ਬਤ੍ਤੋ. ਸੋ ਨਿਬ੍ਬਤ੍ਤਸਮਨਨ੍ਤਰਮੇਵ ਅਤ੍ਤਨੋ ਬ੍ਰਹ੍ਮਸਮ੍ਪਤ੍ਤਿਂ ਓਲੋਕੇਤ੍ਵਾ ਆਗਤਟ੍ਠਾਨਂ ਆਵਜ੍ਜੇਨ੍ਤੋ ਸਤ੍ਤਨ੍ਨਂ ਜਨਾਨਂ ਪਬ੍ਬਤਂ ਆਰੁਯ੍ਹ ਸਮਣਧਮ੍ਮਕਰਣਟ੍ਠਾਨਂ ਦਿਸ੍ਵਾ ਸੇਸਾਨਂ ਛਨ੍ਨਂ ਨਿਬ੍ਬਤ੍ਤਟ੍ਠਾਨਂ ਆਵਜ੍ਜੇਨ੍ਤੋ ਏਕਸ੍ਸ ਪਰਿਨਿਬ੍ਬੁਤਭਾਵਂ ਇਤਰੇਸਂ ਪਞ੍ਚਨ੍ਨਂ ਕਾਮਾਵਚਰਦੇਵਲੋਕੇ ਨਿਬ੍ਬਤ੍ਤਭਾਵਂ ਞਤ੍ਵਾ ਕਾਲਾਨੁਕਾਲਂ ਤੇ ਪਞ੍ਚ ਜਨੇ ਆਵਜ੍ਜੇਤਿ. ਇਮਸ੍ਮਿਂ ਪਨ ਕਾਲੇ ‘‘ਕਹਂ ਨੁ ਖੋ’’ਤਿ ਆਵਜ੍ਜੇਨ੍ਤੋ ਦਾਰੁਚੀਰਿਯਂ ਸੁਪ੍ਪਾਰਕਪਟ੍ਟਨਂ ਉਪਨਿਸ੍ਸਾਯ ਕੁਹਨਕਮ੍ਮੇਨ ਜੀਵਿਕਂ ਕਪ੍ਪੇਨ੍ਤਂ ਦਿਸ੍ਵਾ ‘‘ਨਟ੍ਠੋ ਵਤਾਯਂ ਬਾਲੋ, ਪੁਬ੍ਬੇ ਸਮਣਧਮ੍ਮਂ ਕਰੋਨ੍ਤੋ ਅਤਿਉਕ੍ਕਟ੍ਠਭਾਵੇਨ ਅਰਹਤਾਪਿ ਆਭਤਂ ਪਿਣ੍ਡਪਾਤਂ ਅਪਰਿਭੁਞ੍ਜਿਤ੍ਵਾ ਇਦਾਨਿ ਉਦਰਤ੍ਥਾਯ ਅਨਰਹਾਵ ਅਰਹਤ੍ਤਂ ਪਟਿਜਾਨਿਤ੍ਵਾ ਲੋਕਂ ਵਞ੍ਚੇਨ੍ਤੋ ਵਿਚਰਤਿ, ਦਸਬਲਸ੍ਸ ਚ ਨਿਬ੍ਬਤ੍ਤਭਾਵਂ ਨ ਜਾਨਾਤਿ, ਗਚ੍ਛਾਮਿ ਨਂ ਸਂਵੇਜੇਤ੍ਵਾ ਦਸਬਲਸ੍ਸ ਨਿਬ੍ਬਤ੍ਤਭਾਵਂ ਜਾਨਾਪੇਮੀ’’ਤਿ ਤਂਖਣਂਯੇਵ ਬ੍ਰਹ੍ਮਲੋਕਤੋ ਸੁਪ੍ਪਾਰਕਪਟ੍ਟਨੇ ਰਤ੍ਤਿਭਾਗਸਮਨਨ੍ਤਰੇ ਦਾਰੁਚੀਰਿਯਸ੍ਸ ਸਮ੍ਮੁਖੇ ਪਾਤੁਰਹੋਸਿ.

ਸੋ ਅਤ੍ਤਨੋ ਵਸਨਟ੍ਠਾਨੇ ਓਭਾਸਂ ਦਿਸ੍ਵਾ ਬਹਿ ਨਿਕ੍ਖਮਿਤ੍ਵਾ ਠਿਤੋ ਮਹਾਬ੍ਰਹ੍ਮਂ ਓਲੋਕੇਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ‘‘ਕੇ ਤੁਮ੍ਹੇ’’ਤਿ ਪੁਚ੍ਛਿ. ਅਹਂ ਤੁਯ੍ਹਂ ਪੋਰਾਣਕਸਹਾਯੋ ਅਨਾਗਾਮਿਫਲਂ ਪਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ. ਅਮ੍ਹਾਕਂ ਪਨ ਸਬ੍ਬਜੇਟ੍ਠਕੋ ਅਰਹਤ੍ਤਂ ਪਤ੍ਵਾ ਪਰਿਨਿਬ੍ਬੁਤੋ, ਤੁਮ੍ਹੇ ਪਞ੍ਚ ਜਨਾ ਦੇਵਲੋਕੇ ਨਿਬ੍ਬਤ੍ਤਾ. ਸ੍ਵਾਹਂ ਤਂ ਇਮਸ੍ਮਿਂ ਠਾਨੇ ਕੁਹਨਕਮ੍ਮੇਨ ਜੀਵਨ੍ਤਂ ਦਿਸ੍ਵਾ ਦਮੇਤੁਂ ਆਗਤੋਤਿ ਵਤ੍ਵਾ ਇਦਂ ਕਾਰਣਮਾਹ – ‘‘ਨ ਖੋ ਤ੍ਵਂ, ਬਾਹਿਯ ਅਰਹਾ, ਨਪਿ ਅਰਹਤ੍ਤਮਗ੍ਗਂ ਸਮਾਪਨ੍ਨੋ, ਸਾਪਿ ਤੇ ਪਟਿਪਦਾ ਨਤ੍ਥਿ, ਯਾਯ ਤ੍ਵਂ ਅਰਹਾ ਵਾ ਅਸ੍ਸ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨੋ’’ਤਿ. ਅਥਸ੍ਸ ਸਤ੍ਥੁ ਉਪ੍ਪਨ੍ਨਭਾਵਂ ਸਾਵਤ੍ਥਿਯਂ ਵਸਨਭਾਵਞ੍ਚ ਆਚਿਕ੍ਖਿਤ੍ਵਾ ‘‘ਸਤ੍ਥੁ ਸਨ੍ਤਿਕਂ ਗਚ੍ਛਾਹੀ’’ਤਿ ਤਂ ਉਯ੍ਯੋਜੇਤ੍ਵਾ ਬ੍ਰਹ੍ਮਲੋਕਮੇਵ ਅਗਮਾਸਿ.

ਦਾਰੁਚੀਰਿਯੋ ਮਹਾਬ੍ਰਹ੍ਮੁਨਾ ਸਂਵੇਜਿਤੋ ‘‘ਮੋਕ੍ਖਮਗ੍ਗਂ ਗਵੇਸਿਸ੍ਸਾਮੀ’’ਤਿ ਵੀਸਯੋਜਨਸਤਂ ਮਗ੍ਗਂ ਏਕਰਤ੍ਤਿਵਾਸੇਨ ਗਨ੍ਤ੍ਵਾ ਸਤ੍ਥਾਰਂ ਪਿਣ੍ਡਾਯ ਪਵਿਟ੍ਠਂ ਅਨ੍ਤਰਘਰੇ ਸਮ੍ਪਾਪੁਣਿਤ੍ਵਾ ਸਤ੍ਥੁ ਪਾਦੇਸੁ ਨਿਪਤਿਤ੍ਵਾ ‘‘ਦੇਸੇਤੁ ਮੇ, ਭਨ੍ਤੇ, ਭਗਵਾ ਧਮ੍ਮਂ, ਦੇਸੇਤੁ ਸੁਗਤੋ ਧਮ੍ਮ’’ਨ੍ਤਿ ਯਾਵਤਤਿਯਂ ਯਾਚਿ. ਸਤ੍ਥਾ ‘‘ਏਤ੍ਤਾਵਤਾ ਬਾਹਿਯਸ੍ਸ ਞਾਣਂ ਪਰਿਪਾਕਂ ਗਤ’’ਨ੍ਤਿ ਞਤ੍ਵਾ ‘‘ਤਸ੍ਮਾਤਿਹ ਤੇ, ਬਾਹਿਯ, ਏਵਂ ਸਿਕ੍ਖਿਤਬ੍ਬਂ ਦਿਟ੍ਠੇ ਦਿਟ੍ਠਮਤ੍ਤਂ ਭਵਿਸ੍ਸਤੀ’’ਤਿ (ਉਦਾ. ੧੦) ਇਮਿਨਾ ਓਵਾਦੇਨ ਓਵਦਿ. ਸੋਪਿ ਦੇਸਨਾਪਰਿਯੋਸਾਨੇ ਅਨ੍ਤਰਵੀਥਿਯਂ ਠਿਤੋਵ ਦੇਸਨਾਨੁਸਾਰੇਨ ਞਾਣਂ ਪੇਸੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ.

ਸੋ ਅਤ੍ਤਨੋ ਕਿਚ੍ਚਂ ਮਤ੍ਥਕਪ੍ਪਤ੍ਤਂ ਞਤ੍ਵਾ ਭਗਵਨ੍ਤਂ ਪਬ੍ਬਜ੍ਜਂ ਯਾਚਿਤ੍ਵਾ ਅਪਰਿਪੁਣ੍ਣਪਤ੍ਤਚੀਵਰਤਾਯ ਪਤ੍ਤਚੀਵਰਂ ਪਰਿਯੇਸਨ੍ਤੋ ਸਙ੍ਕਾਰਟ੍ਠਾਨਤੋ ਚੋਲ਼ਕ੍ਖਣ੍ਡਾਨਿ ਸਂਕਡ੍ਢਤਿ. ਅਥ ਨਂ ਪੁਬ੍ਬਵੇਰਿਕੋ ਅਮਨੁਸ੍ਸੋ ਏਕਿਸ੍ਸਾ ਤਰੁਣਵਚ੍ਛਾਯ ਗਾਵਿਯਾ ਸਰੀਰੇ ਅਧਿਮੁਚ੍ਚਿਤ੍ਵਾ ਜੀਵਿਤਕ੍ਖਯਂ ਪਾਪੇਸਿ. ਸਤ੍ਥਾ ਸਾਵਤ੍ਥਿਤੋ ਨਿਕ੍ਖਮਨ੍ਤੋ ਅਨ੍ਤਰਵੀਥਿਯਂ ਬਾਹਿਯਂ ਸਙ੍ਕਾਰਟ੍ਠਾਨੇ ਪਤਿਤਂ ਦਿਸ੍ਵਾ ‘‘ਗਣ੍ਹਥ, ਭਿਕ੍ਖਵੇ, ਬਾਹਿਯਸ੍ਸ ਦਾਰੁਚੀਰਿਯਸ੍ਸ ਸਰੀਰ’’ਨ੍ਤਿ ਨੀਹਰਾਪੇਤ੍ਵਾ ਸਰੀਰਕਿਚ੍ਚਂ ਕਾਰੇਤ੍ਵਾ ਚਾਤੁਮਹਾਪਥੇ ਚੇਤਿਯਂ ਕਾਰਾਪੇਸਿ. ਤਤੋ ਸਙ੍ਘਮਜ੍ਝੇ ਕਥਾ ਉਦਪਾਦਿ – ‘‘ਤਥਾਗਤੋ ਭਿਕ੍ਖੁਸਙ੍ਘੇਨ ਬਾਹਿਯਸ੍ਸ ਸਰੀਰਜ੍ਝਾਪਨਕਿਚ੍ਚਂ ਕਾਰੇਸਿ, ਧਾਤੁਯੋ ਗਹੇਤ੍ਵਾ ਚੇਤਿਯਂ ਕਾਰੇਸਿ, ਕਤਰਮਗ੍ਗੋ ਨੁ ਖੋ ਤੇਨ ਸਚ੍ਛਿਕਤੋ, ਸਾਮਣੇਰੋ ਨੁ ਖੋ ਸੋ, ਭਿਕ੍ਖੁ ਨੁ ਖੋ’’ਤਿ ਚਿਤ੍ਤਂ ਉਪ੍ਪਾਦਯਿਂਸੁ. ਸਤ੍ਥਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ‘‘ਪਣ੍ਡਿਤੋ, ਭਿਕ੍ਖਵੇ, ਬਾਹਿਯੋ’’ਤਿ ਉਪਰਿ ਧਮ੍ਮਦੇਸਨਂ ਵਡ੍ਢੇਤ੍ਵਾ ਤਸ੍ਸ ਪਰਿਨਿਬ੍ਬੁਤਭਾਵਂ ਪਕਾਸੇਸਿ. ਪੁਨ ਸਙ੍ਘਮਜ੍ਝੇ ਕਥਾ ਉਦਪਾਦਿ ‘‘ਨ ਚ ਸਤ੍ਥਾਰਾ ਬਾਹਿਯਸ੍ਸ ਬਹੁ ਧਮ੍ਮੋ ਦੇਸਿਤੋ, ਅਰਹਤ੍ਤਂ ਪਤ੍ਤੋਤਿ ਚ ਵਦੇਤਿ. ਕਿਂ ਨਾਮੇਤ’’ਨ੍ਤਿ? ਸਤ੍ਥਾ ‘‘ਧਮ੍ਮੋ ਮਨ੍ਦੋ ਬਹੂਤਿ ਅਕਾਰਣਂ, ਵਿਸਪੀਤਕਸ੍ਸ ਅਗਦੋ ਵਿਯ ਚੇਸੋ’’ਤਿ ਵਤ੍ਵਾ ਧਮ੍ਮਪਦੇ ਗਾਥਮਾਹ –

‘‘ਸਹਸ੍ਸਮਪਿ ਚੇ ਗਾਥਾ, ਅਨਤ੍ਥਪਦਸਂਹਿਤਾ;

ਏਕਂ ਗਾਥਾਪਦਂ ਸੇਯ੍ਯੋ, ਯਂ ਸੁਤ੍ਵਾ ਉਪਸਮ੍ਮਤੀ’’ਤਿ. (ਧ. ਪ. ੧੦੦);

ਦੇਸਨਾਪਰਿਯੋਸਾਨੇ ਚਤੁਰਾਸੀਤਿ ਪਾਣਸਹਸ੍ਸਾਨਿ ਅਮਤਪਾਨਂ ਪਿਵਿਂਸੁ. ਇਦਞ੍ਚ ਪਨ ਬਾਹਿਯਤ੍ਥੇਰਸ੍ਸ ਵਤ੍ਥੁ ਸੁਤ੍ਤੇ (ਉਦਾ. ੧੦) ਆਗਤਤ੍ਤਾ ਵਿਤ੍ਥਾਰੇਨ ਨ ਕਥਿਤਂ. ਅਪਰਭਾਗੇ ਪਨ ਸਤ੍ਥਾ ਸਙ੍ਘਮਜ੍ਝੇ ਨਿਸਿਨ੍ਨੋ ਬਾਹਿਯਤ੍ਥੇਰਂ ਖਿਪ੍ਪਾਭਿਞ੍ਞਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਕੁਮਾਰਕਸ੍ਸਪਤ੍ਥੇਰਵਤ੍ਥੁ

੨੧੭. ਨਵਮੇ ਚਿਤ੍ਤਕਥਿਕਾਨਨ੍ਤਿ ਵਿਚਿਤ੍ਤਂ ਕਤ੍ਵਾ ਧਮ੍ਮਂ ਕਥੇਨ੍ਤਾਨਂ. ਥੇਰੋ ਕਿਰ ਏਕਸ੍ਸਪਿ ਦ੍ਵਿਨ੍ਨਮ੍ਪਿ ਧਮ੍ਮਂ ਕਥੇਨ੍ਤੋ ਬਹੂਹਿ ਉਪਮਾਹਿ ਚ ਕਾਰਣੇਹਿ ਚ ਮਣ੍ਡਯਿਤ੍ਵਾ ਬੋਧੇਨ੍ਤੋ ਕਥੇਤਿ. ਤਸ੍ਮਾ ਚਿਤ੍ਤਕਥਿਕਾਨਂ ਅਗ੍ਗੋ ਨਾਮ ਜਾਤੋ.

ਤਸ੍ਸ ਪਞ੍ਹਕਮ੍ਮੇ ਅਯਮਨੁਪੁਬ੍ਬਿਕਥਾ – ਅਯਮ੍ਪਿ ਹਿ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤੀਨਗਰੇ ਕੁਲਗੇਹੇ ਪਟਿਸਨ੍ਧਿਂ ਗਣ੍ਹਿਤ੍ਵਾ ਵਯਪ੍ਪਤ੍ਤੋ ਦਸਬਲਸ੍ਸ ਧਮ੍ਮਕਥਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਚਿਤ੍ਤਕਥਿਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਕਸ੍ਸਪਬੁਦ੍ਧਸਾਸਨੋਸਕ੍ਕਨਕਾਲੇ ਸਤ੍ਤਨ੍ਨਂ ਭਿਕ੍ਖੂਨਂ ਅਬ੍ਭਨ੍ਤਰੋ ਹੁਤ੍ਵਾ ਪਬ੍ਬਤਮਤ੍ਥਕੇ ਸਮਣਧਮ੍ਮਂ ਕਤ੍ਵਾ ਅਪਰਿਹੀਨਸੀਲੋ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਏਕਂ ਬੁਦ੍ਧਨ੍ਤਰਂ ਸਮ੍ਪਤ੍ਤਿਂ ਅਨੁਭਵਮਾਨੋ ਅਮ੍ਹਾਕਂ ਸਤ੍ਥੁ ਕਾਲੇ ਰਾਜਗਹੇ ਏਕਿਸ੍ਸਾ ਕੁਲਦਾਰਿਕਾਯ ਕੁਚ੍ਛਿਮ੍ਹਿ ਉਪ੍ਪਨ੍ਨੋ. ਸਾ ਚ ਪਠਮਂ ਮਾਤਾਪਿਤਰੋ ਯਾਚਿਤ੍ਵਾ ਪਬ੍ਬਜ੍ਜਂ ਅਲਭਮਾਨਾ ਕੁਲਘਰਂ ਗਤਾ ਗਬ੍ਭਂ ਗਣ੍ਹਿ. ਤਮ੍ਪਿ ਅਜਾਨਨ੍ਤੀ ਸਾਮਿਕਂ ਆਰਾਧੇਤ੍ਵਾ ਤੇਨ ਅਨੁਞ੍ਞਾਤਾ ਭਿਕ੍ਖੁਨੀਸੁ ਪਬ੍ਬਜਿਤਾ. ਤਸ੍ਸਾ ਗਬ੍ਭਨਿਮਿਤ੍ਤਂ ਦਿਸ੍ਵਾ ਭਿਕ੍ਖੁਨਿਯੋ ਦੇਵਦਤ੍ਤਂ ਪੁਚ੍ਛਿਂਸੁ, ਸੋ ‘‘ਅਸ੍ਸਮਣੀ’’ਤਿ ਆਹ. ਦਸਬਲਂ ਪੁਚ੍ਛਿਂਸੁ, ਸਤ੍ਥਾ ਉਪਾਲਿਤ੍ਥੇਰਂ ਪਟਿਚ੍ਛਾਪੇਸਿ. ਥੇਰੋ ਸਾਵਤ੍ਥਿਨਗਰਵਾਸੀਨਿ ਕੁਲਾਨਿ ਵਿਸਾਖਞ੍ਚ ਉਪਾਸਿਕਂ ਪਕ੍ਕੋਸਾਪੇਤ੍ਵਾ ਸੋਧੇਨ੍ਤੋ ‘‘ਪੁਰੇ ਲਦ੍ਧੋ ਗਬ੍ਭੋ, ਪਬ੍ਬਜ੍ਜਾ ਅਰੋਗਾ’’ਤਿ ਆਹ. ਸਤ੍ਥਾ ‘‘ਸੁਵਿਨਿਚ੍ਛਿਤਂ ਅਧਿਕਰਣ’’ਨ੍ਤਿ ਥੇਰਸ੍ਸ ਸਾਧੁਕਾਰਂ ਅਦਾਸਿ.

ਸਾ ਭਿਕ੍ਖੁਨੀ ਸੁਵਣ੍ਣਬਿਮ੍ਬਸਦਿਸਂ ਪੁਤ੍ਤਂ ਵਿਜਾਯਿ. ਤਂ ਗਹੇਤ੍ਵਾ ਰਾਜਾ ਪਸੇਨਦਿਕੋਸਲੋ ਪੋਸਾਪੇਸਿ, ਕਸ੍ਸਪੋਤਿ ਚਸ੍ਸ ਨਾਮਂ ਕਤ੍ਵਾ ਅਪਰਭਾਗੇ ਅਲਙ੍ਕਰਿਤ੍ਵਾ ਸਤ੍ਥੁ ਸਨ੍ਤਿਕਂ ਨੇਤ੍ਵਾ ਪਬ੍ਬਾਜੇਸਿ. ਕੁਮਾਰਕਾਲੇ ਪਨ ਪਬ੍ਬਜਿਤਤ੍ਤਾ ਭਗਵਤਾ ‘‘ਕਸ੍ਸਪਂ ਪਕ੍ਕੋਸਥ, ਇਦਂ ਫਲਂ ਵਾ ਖਾਦਨੀਯਂ ਵਾ ਕਸ੍ਸਪਸ੍ਸ ਦੇਥਾ’’ਤਿ ਵੁਤ੍ਤੇ ‘‘ਕਤਰਕਸ੍ਸਪਸ੍ਸਾਤਿ. ਕੁਮਾਰਕਸ੍ਸਪਸ੍ਸਾ’’ਤਿ ਏਵਂ ਗਹਿਤਨਾਮਤ੍ਤਾ ਤਤੋ ਪਟ੍ਠਾਯ ਵੁਡ੍ਢਕਾਲੇਪਿ ਕੁਮਾਰਕਸ੍ਸਪੋਤ੍ਵੇਵ ਵੁਚ੍ਚਤਿ. ਅਪਿਚ ਰਞ੍ਞੋ ਪੋਸਾਵਨਿਕਪੁਤ੍ਤਤ੍ਤਾਪਿ ਕੁਮਾਰਕਸ੍ਸਪੋਤਿ ਤਂ ਸਞ੍ਜਾਨਿਂਸੁ.

ਸੋ ਪਬ੍ਬਜਿਤਕਾਲਤੋ ਪਟ੍ਠਾਯ ਵਿਪਸ੍ਸਨਾਯ ਚੇਵ ਕਮ੍ਮਂ ਕਰੋਤਿ, ਬੁਦ੍ਧਵਚਨਞ੍ਚ ਗਣ੍ਹਾਤਿ. ਅਥ ਸੋ ਤੇਨ ਸਦ੍ਧਿਂ ਪਬ੍ਬਤਮਤ੍ਥਕੇ ਸਮਣਧਮ੍ਮਂ ਕਤ੍ਵਾ ਅਨਾਗਾਮਿਫਲਂ ਪਤ੍ਵਾ ਸੁਦ੍ਧਾਵਾਸੇ ਨਿਬ੍ਬਤ੍ਤੋ ਮਹਾਬ੍ਰਹ੍ਮਾ ਤਸ੍ਮਿਂ ਸਮਯੇ ਆਵਜ੍ਜੇਨ੍ਤੋ ਕੁਮਾਰਕਸ੍ਸਪਂ ਦਿਸ੍ਵਾ ‘‘ਸਹਾਯਕੋ ਮੇ ਵਿਪਸ੍ਸਨਾਯ ਕਿਲਮਤਿ, ਗਨ੍ਤ੍ਵਾ ਤਸ੍ਸ ਵਿਪਸ੍ਸਨਾਯ ਨਯਮੁਖਂ ਦਸ੍ਸੇਤ੍ਵਾ ਮਗ੍ਗਫਲਪਤ੍ਤਿਯਾ ਉਪਾਯਂ ਕਰਿਸ੍ਸਾਮੀ’’ਤਿ ਬ੍ਰਹ੍ਮਲੋਕੇ ਠਿਤੋਵ ਪਞ੍ਚਦਸ ਪਞ੍ਹੇ ਅਭਿਸਙ੍ਖਰਿਤ੍ਵਾ ਰਤ੍ਤਿਭਾਗਸਮਨਨ੍ਤਰੇ ਕੁਮਾਰਕਸ੍ਸਪਤ੍ਥੇਰਸ੍ਸ ਵਸਨਟ੍ਠਾਨੇ ਅਨ੍ਧਵਨੇ ਪਾਤੁਰਹੋਸਿ. ਥੇਰੋ ਆਲੋਕਂ ਦਿਸ੍ਵਾ ‘‘ਕੋ ਏਤ੍ਥਾ’’ਤਿ ਆਹ. ‘‘ਅਹਂ ਪੁਬ੍ਬੇ ਤਯਾ ਸਦ੍ਧਿਂ ਸਮਣਧਮ੍ਮਂ ਕਤ੍ਵਾ ਅਨਾਗਾਮਿਫਲਂ ਪਤ੍ਵਾ ਸੁਦ੍ਧਾਵਾਸੇ ਨਿਬ੍ਬਤ੍ਤਬ੍ਰਹ੍ਮਾ’’ਤਿ ਆਹ. ਕੇਨ ਕਮ੍ਮੇਨ ਆਗਤਤ੍ਥਾਤਿ? ਮਹਾਬ੍ਰਹ੍ਮਾ ਅਤ੍ਤਨੋ ਆਗਤਕਾਰਣਂ ਦੀਪੇਤੁਂ ਤੇ ਪਞ੍ਹੇ ਆਚਿਕ੍ਖਿਤ੍ਵਾ ‘‘ਤ੍ਵਂ ਇਮੇ ਪਞ੍ਹੇ ਉਗ੍ਗਣ੍ਹਿਤ੍ਵਾ ਅਰੁਣੇ ਉਟ੍ਠਿਤੇ ਤਥਾਗਤਂ ਉਪਸਙ੍ਕਮਿਤ੍ਵਾ ਪੁਚ੍ਛ, ਠਪੇਤ੍ਵਾ ਹਿ ਤਥਾਗਤਂ ਅਞ੍ਞੋ ਇਮੇ ਪਞ੍ਹੇ ਕਥੇਤੁਂ ਸਮਤ੍ਥੋ ਨਾਮ ਨਤ੍ਥੀ’’ਤਿ ਵਤ੍ਵਾ ਬ੍ਰਹ੍ਮਲੋਕਮੇਵ ਗਤੋ.

ਥੇਰੋਪਿ ਪੁਨਦਿਵਸੇ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਮਹਾਬ੍ਰਹ੍ਮੁਨਾ ਕਥਿਤਨਿਯਾਮੇਨੇਵ ਪਞ੍ਹੇ ਪੁਚ੍ਛਿ. ਸਤ੍ਥਾ ਕੁਮਾਰਕਸ੍ਸਪਤ੍ਥੇਰਸ੍ਸ ਅਰਹਤ੍ਤਂ ਪਾਪੇਤ੍ਵਾ ਪਞ੍ਹੇ ਕਥੇਸਿ. ਥੇਰੋ ਸਤ੍ਥਾਰਾ ਕਥਿਤਨਿਯਾਮੇਨੇਵ ਉਗ੍ਗਣ੍ਹਿਤ੍ਵਾ ਅਨ੍ਧਵਨਂ ਗਨ੍ਤ੍ਵਾ ਵਿਪਸ੍ਸਨਂ ਗਬ੍ਭਂ ਗਾਹਾਪੇਤ੍ਵਾ ਅਰਹਤ੍ਤਂ ਪਾਪੁਣਿ. ਤਤੋ ਪਟ੍ਠਾਯ ਚਤੁਨ੍ਨਂ ਪਰਿਸਾਨਂ ਧਮ੍ਮਕਥਂ ਕਥੇਨ੍ਤੋ ਬਹੁਕਾਹਿ ਉਪਮਾਹਿ ਚ ਕਾਰਣੇਹਿ ਚ ਮਣ੍ਡੇਤ੍ਵਾ ਚਿਤ੍ਤਕਥਮੇਵ ਕਥੇਤਿ. ਅਥ ਨਂ ਸਤ੍ਥਾ ਪਾਯਾਸਿਰਞ੍ਞੋ ਪਞ੍ਚਦਸਹਿ ਪਞ੍ਹੇਹਿ ਪਟਿਮਣ੍ਡੇਤ੍ਵਾ ਸੁਤ੍ਤਨ੍ਤੇ (ਦੀ. ਨਿ. ੨.੪੦੬ ਆਦਯੋ) ਦੇਸਿਤੇ ਤਂ ਸੁਤ੍ਤਨ੍ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਇਮਸ੍ਮਿਂ ਸਾਸਨੇ ਚਿਤ੍ਤਕਥਿਕਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਮਹਾਕੋਟ੍ਠਿਤਤ੍ਥੇਰਵਤ੍ਥੁ

੨੧੮. ਦਸਮੇ ਪਟਿਸਮ੍ਭਿਦਾਪਤ੍ਤਾਨਨ੍ਤਿ ਚਤਸ੍ਸੋ ਪਟਿਸਮ੍ਭਿਦਾ ਪਤ੍ਵਾ ਠਿਤਾਨਂ ਮਹਾਕੋਟ੍ਠਿਤਤ੍ਥੇਰੋ ਅਗ੍ਗੋਤਿ ਦਸ੍ਸੇਤਿ. ਅਯਂ ਹਿ ਥੇਰੋ ਅਤ੍ਤਨੋ ਪਟਿਸਮ੍ਭਿਦਾਸੁ ਚਿਣ੍ਣਵਸਿਭਾਵੇਨ ਅਭਿਞ੍ਞਾਤੇ ਅਭਿਞ੍ਞਾਤੇ ਮਹਾਸਾਵਕੇ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਨ੍ਤੋਪਿ ਦਸਬਲਂ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਨ੍ਤੋਪਿ ਪਟਿਸਮ੍ਭਿਦਾਸੁਯੇਵ ਪਞ੍ਹਂ ਪੁਚ੍ਛਤਿ. ਇਤਿ ਇਮਿਨਾ ਚਿਣ੍ਣਵਸਿਭਾਵੇਨ ਪਟਿਸਮ੍ਭਿਦਾਪਤ੍ਤਾਨਂ ਅਗ੍ਗੋ ਨਾਮ ਜਾਤੋ.

ਤਸ੍ਸ ਪਞ੍ਹਕਮ੍ਮੇ ਅਯਮਨੁਪੁਬ੍ਬਿਕਥਾ – ਅਯਮ੍ਪਿ ਹਿ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤੀਨਗਰੇ ਮਹਾਭੋਗਕੁਲੇ ਨਿਬ੍ਬਤ੍ਤੋ ਅਪਰੇਨ ਸਮਯੇਨ ਸਤ੍ਥੁ ਧਮ੍ਮਕਥਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਪਟਿਸਮ੍ਭਿਦਾਪਤ੍ਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਸਿ. ਸੋ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ. ਕੋਟ੍ਠਿਤਮਾਣਵੋਤਿਸ੍ਸ ਨਾਮਂ ਅਕਂਸੁ. ਸੋ ਵਯਪ੍ਪਤ੍ਤੋ ਤਯੋ ਵੇਦੇ ਉਗ੍ਗਣ੍ਹਿਤ੍ਵਾ ਏਕਦਿਵਸਂ ਸਤ੍ਥੁ ਧਮ੍ਮਕਥਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿ. ਸੋ ਉਪਸਮ੍ਪਨ੍ਨਕਾਲਤੋ ਪਟ੍ਠਾਯ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਨਿਚ੍ਚਕਾਲਂ ਪਟਿਸਮ੍ਭਿਦਾਸੁ ਚਿਣ੍ਣਵਸੀ ਹੁਤ੍ਵਾ ਪਞ੍ਹਂ ਪੁਚ੍ਛਨ੍ਤੋ ਪਟਿਸਮ੍ਭਿਦਾਸੁਯੇਵ ਪੁਚ੍ਛਤਿ. ਅਥ ਨਂ ਸਤ੍ਥਾ ਅਪਰਭਾਗੇ ਮਹਾਵੇਦਲ੍ਲਸੁਤ੍ਤਂ (ਮ. ਨਿ. ੧.੪੪੯ ਆਦਯੋ) ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਪਟਿਸਮ੍ਭਿਦਾਪਤ੍ਤਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਤਤਿਯਵਗ੍ਗਵਣ੍ਣਨਾ.