੯. ਦਿਟ੍ਠਸੁਤਾਦਿਦਸ੍ਸਨਵਾਰੋ

੧੦੩੬. ਪਞ੍ਚਨ੍ਨਂ ਖਨ੍ਧਾਨਂ ਕਤਿ ਦਿਟ੍ਠਾ, ਕਤਿ ਸੁਤਾ, ਕਤਿ ਮੁਤਾ, ਕਤਿ ਵਿਞ੍ਞਾਤਾ, ਕਤਿ ਨ ਦਿਟ੍ਠਾ ਨ ਸੁਤਾ ਨ ਮੁਤਾ ਨ ਵਿਞ੍ਞਾਤਾ…ਪੇ… ਸਤ੍ਤਨ੍ਨਂ ਚਿਤ੍ਤਾਨਂ ਕਤਿ ਦਿਟ੍ਠਾ, ਕਤਿ ਸੁਤਾ, ਕਤਿ ਮੁਤਾ, ਕਤਿ ਵਿਞ੍ਞਾਤਾ, ਕਤਿ ਨ ਦਿਟ੍ਠਾ ਨ ਸੁਤਾ ਨ ਮੁਤਾ ਨ ਵਿਞ੍ਞਾਤਾ?

੧੦੩੭. ਰੂਪਕ੍ਖਨ੍ਧੋ ਸਿਯਾ ਦਿਟ੍ਠੋ, ਸਿਯਾ ਸੁਤੋ, ਸਿਯਾ ਮੁਤੋ, ਸਿਯਾ ਵਿਞ੍ਞਾਤੋ, ਸਿਯਾ ਨ ਦਿਟ੍ਠੋ ਨ ਸੁਤੋ ਨ ਮੁਤੋ, ਵਿਞ੍ਞਾਤੋ. ਚਤ੍ਤਾਰੋ ਖਨ੍ਧਾ ਨ ਦਿਟ੍ਠਾ ਨ ਸੁਤਾ ਨ ਮੁਤਾ, ਵਿਞ੍ਞਾਤਾ.

ਰੂਪਾਯਤਨਂ ਦਿਟ੍ਠਂ, ਨ ਸੁਤਂ ਨ ਮੁਤਂ, ਵਿਞ੍ਞਾਤਂ. ਸਦ੍ਦਾਯਤਨਂ ਨ ਦਿਟ੍ਠਂ, ਸੁਤਂ, ਨ ਮੁਤਂ, ਵਿਞ੍ਞਾਤਂ. ਗਨ੍ਧਾਯਤਨਂ… ਰਸਾਯਤਨਂ… ਫੋਟ੍ਠਬ੍ਬਾਯਤਨਂ ਨ ਦਿਟ੍ਠਂ ਨ ਸੁਤਂ, ਮੁਤਂ, ਵਿਞ੍ਞਾਤਂ. ਸਤ੍ਤਾਯਤਨਾ ਨ ਦਿਟ੍ਠਾ ਨ ਸੁਤਾ ਨ ਮੁਤਾ, ਵਿਞ੍ਞਾਤਾ.

ਰੂਪਧਾਤੁ ਦਿਟ੍ਠਾ, ਨ ਸੁਤਾ ਨ ਮੁਤਾ, ਵਿਞ੍ਞਾਤਾ. ਸਦ੍ਦਧਾਤੁ ਨ ਦਿਟ੍ਠਾ, ਸੁਤਾ, ਨ ਮੁਤਾ, ਵਿਞ੍ਞਾਤਾ. ਗਨ੍ਧਧਾਤੁ… ਰਸਧਾਤੁ… ਫੋਟ੍ਠਬ੍ਬਧਾਤੁ ਨ ਦਿਟ੍ਠਾ ਨ ਸੁਤਾ, ਮੁਤਾ, ਵਿਞ੍ਞਾਤਾ. ਤੇਰਸ ਧਾਤੁਯੋ ਨ ਦਿਟ੍ਠਾ ਨ ਸੁਤਾ ਨ ਮੁਤਾ, ਵਿਞ੍ਞਾਤਾ.

ਤੀਣਿ ਸਚ੍ਚਾਨਿ ਨ ਦਿਟ੍ਠਾ ਨ ਸੁਤਾ ਨ ਮੁਤਾ, ਵਿਞ੍ਞਾਤਾ. ਦੁਕ੍ਖਸਚ੍ਚਂ ਸਿਯਾ ਦਿਟ੍ਠਂ, ਸਿਯਾ ਸੁਤਂ, ਸਿਯਾ ਮੁਤਂ, ਸਿਯਾ ਵਿਞ੍ਞਾਤਂ, ਸਿਯਾ ਨ ਦਿਟ੍ਠਂ ਨ ਸੁਤਂ ਨ ਮੁਤਂ, ਵਿਞ੍ਞਾਤਂ.

ਬਾਵੀਸਤਿਨ੍ਦ੍ਰਿਯਾ ਨ ਦਿਟ੍ਠਾ ਨ ਸੁਤਾ ਨ ਮੁਤਾ, ਵਿਞ੍ਞਾਤਾ. ਨਵ ਹੇਤੂ ਨ ਦਿਟ੍ਠਾ ਨ ਸੁਤਾ ਨ ਮੁਤਾ, ਵਿਞ੍ਞਾਤਾ. ਚਤ੍ਤਾਰੋ ਆਹਾਰਾ ਨ ਦਿਟ੍ਠਾ ਨ ਸੁਤਾ ਨ ਮੁਤਾ, ਵਿਞ੍ਞਾਤਾ. ਸਤ੍ਤ ਫਸ੍ਸਾ ਨ ਦਿਟ੍ਠਾ ਨ ਸੁਤਾ ਨ ਮੁਤਾ, ਵਿਞ੍ਞਾਤਾ. ਸਤ੍ਤ ਵੇਦਨਾ… ਸਤ੍ਤ ਸਞ੍ਞਾ… ਸਤ੍ਤ ਚੇਤਨਾ… ਸਤ੍ਤ ਚਿਤ੍ਤਾ ਨ ਦਿਟ੍ਠਾ ਨ ਸੁਤਾ ਨ ਮੁਤਾ, ਵਿਞ੍ਞਾਤਾ.