੨. ਆਯੁਪ੍ਪਮਾਣਂ
੧੦੨੨. ਮਨੁਸ੍ਸਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਵਸ੍ਸਸਤਂ, ਅਪ੍ਪਂ ਵਾ ਭਿਯ੍ਯੋ [ਅਪ੍ਪਂ ਵਾ ਭਿਯ੍ਯੋ ਵਾ (ਸ੍ਯਾ. ਕ.) ਦੀ. ਨਿ. ੨.੭].
੧੦੨੩. ਚਾਤੁਮਹਾਰਾਜਿਕਾਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਯਾਨਿ ਮਾਨੁਸਕਾਨਿ ਪਞ੍ਞਾਸ ਵਸ੍ਸਾਨਿ, ਚਾਤੁਮ੍ਮਹਾਰਾਜਿਕਾਨਂ ਦੇਵਾਨਂ ਏਸੋ ਏਕੋ ਰਤ੍ਤਿਨ੍ਦਿਵੋ [ਰਤ੍ਤਿਦਿਵੋ (ਕ.) ਅ. ਨਿ. ੩.੭੧]. ਤਾਯ ਰਤ੍ਤਿਯਾ ਤਿਂਸ ਰਤ੍ਤਿਯੋ ਮਾਸੋ. ਤੇਨ ਮਾਸੇਨ ਦ੍ਵਾਦਸਮਾਸਿਯੋ ਸਂਵਚ੍ਛਰੋ. ਤੇਨ ਸਂਵਚ੍ਛਰੇਨ ਦਿਬ੍ਬਾਨਿ ਪਞ੍ਚ ਵਸ੍ਸਸਤਾਨਿ ਚਾਤੁਮ੍ਮਹਾਰਾਜਿਕਾਨਂ ਦੇਵਾਨਂ ਆਯੁਪ੍ਪਮਾਣਂ. ਮਨੁਸ੍ਸਾਨਂ ਗਣਨਾਯ ਕਿਤ੍ਤਕਂ ਹੋਤਿ? ਨਵੁਤਿ ਵਸ੍ਸਸਤਸਹਸ੍ਸਾਨਿ.
ਤਾਵਤਿਂਸਾਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਯਂ ਮਾਨੁਸਕਂ ਵਸ੍ਸਸਤਂ, ਤਾਵਤਿਂਸਾਨਂ ਦੇਵਾਨਂ ਏਸੋ ਏਕੋ ਰਤ੍ਤਿਨ੍ਦਿਵੋ. ਤਾਯ ਰਤ੍ਤਿਯਾ ਤਿਂਸ ਰਤ੍ਤਿਯੋ ਮਾਸੋ. ਤੇਨ ਮਾਸੇਨ ਦ੍ਵਾਦਸਮਾਸਿਯੋ ਸਂਵਚ੍ਛਰੋ. ਤੇਨ ਸਂਵਚ੍ਛਰੇਨ ਦਿਬ੍ਬਂ ਵਸ੍ਸਸਹਸ੍ਸਂ ਤਾਵਤਿਂਸਾਨਂ ਦੇਵਾਨਂ ਆਯੁਪ੍ਪਮਾਣਂ. ਮਨੁਸ੍ਸਾਨਂ ਗਣਨਾਯ ਕਿਤ੍ਤਕਂ ਹੋਤਿ? ਤਿਸ੍ਸੋ ਚ ਵਸ੍ਸਕੋਟਿਯੋ ਸਟ੍ਠਿ ਚ ਵਸ੍ਸਸਤਸਹਸ੍ਸਾਨਿ.
ਯਾਮਾਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਯਾਨਿ ਮਾਨੁਸਕਾਨਿ ਦ੍ਵੇ ਵਸ੍ਸਸਤਾਨਿ, ਯਾਮਾਨਂ ਦੇਵਾਨਂ ਏਸੋ ਏਕੋ ਰਤ੍ਤਿਨ੍ਦਿਵੋ. ਤਾਯ ਰਤ੍ਤਿਯਾ ਤਿਂਸਰਤ੍ਤਿਯੋ ਮਾਸੋ. ਤੇਨ ਮਾਸੇਨ ਦ੍ਵਾਦਸਮਾਸਿਯੋ ਸਂਵਚ੍ਛਰੋ. ਤੇਨ ਸਂਵਚ੍ਛਰੇਨ ਦਿਬ੍ਬਾਨਿ ਦ੍ਵੇ ਵਸ੍ਸਸਹਸ੍ਸਾਨਿ ਯਾਮਾਨਂ ਦੇਵਾਨਂ ਆਯੁਪ੍ਪਮਾਣਂ. ਮਨੁਸ੍ਸਾਨਂ ਗਣਨਾਯ ਕਿਤ੍ਤਕਂ ਹੋਤਿ? ਚੁਦ੍ਦਸਞ੍ਚ ਵਸ੍ਸਕੋਟਿਯੋ ਚਤ੍ਤਾਰੀਸਞ੍ਚ ਵਸ੍ਸਸਤਸਹਸ੍ਸਾਨਿ.
ਤੁਸਿਤਾਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਯਾਨਿ ਮਾਨੁਸਕਾਨਿ ਚਤ੍ਤਾਰਿ ਵਸ੍ਸਸਤਾਨਿ, ਤੁਸਿਤਾਨਂ ਦੇਵਾਨਂ ਏਸੋ ਏਕੋ ਰਤ੍ਤਿਨ੍ਦਿਵੋ. ਤਾਯ ਰਤ੍ਤਿਯਾ ਤਿਂਸਰਤ੍ਤਿਯੋ ਮਾਸੋ. ਤੇਨ ਮਾਸੇਨ ਦ੍ਵਾਦਸਮਾਸਿਯੋ ਸਂਵਚ੍ਛਰੋ. ਤੇਨ ਸਂਵਚ੍ਛਰੇਨ ਦਿਬ੍ਬਾਨਿ ਚਤ੍ਤਾਰਿ ਵਸ੍ਸਸਹਸ੍ਸਾਨਿ ਤੁਸਿਤਾਨਂ ਦੇਵਾਨਂ ਆਯੁਪ੍ਪਮਾਣਂ. ਮਨੁਸ੍ਸਾਨਂ ਗਣਨਾਯ ਕਿਤ੍ਤਕਂ ਹੋਤਿ? ਸਤ੍ਤਪਞ੍ਞਾਸ ਵਸ੍ਸਕੋਟਿਯੋ ਸਟ੍ਠਿ ਚ ਵਸ੍ਸਸਤਸਹਸ੍ਸਾਨਿ.
ਨਿਮ੍ਮਾਨਰਤੀਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਯਾਨਿ ਮਾਨੁਸਕਾਨਿ ਅਟ੍ਠ ਵਸ੍ਸਸਤਾਨਿ, ਨਿਮ੍ਮਾਨਰਤੀਨਂ ਦੇਵਾਨਂ ਏਸੋ ਏਕੋ ਰਤ੍ਤਿਨ੍ਦਿਵੋ. ਤਾਯ ਰਤ੍ਤਿਯਾ ਤਿਂਸਰਤ੍ਤਿਯੋ ਮਾਸੋ. ਤੇਨ ਮਾਸੇਨ ਦ੍ਵਾਦਸਮਾਸਿਯੋ ਸਂਵਚ੍ਛਰੋ. ਤੇਨ ਸਂਵਚ੍ਛਰੇਨ ਦਿਬ੍ਬਾਨਿ ਅਟ੍ਠ ਵਸ੍ਸਸਹਸ੍ਸਾਨਿ ਨਿਮ੍ਮਾਨਰਤੀਨਂ ਦੇਵਾਨਂ ਆਯੁਪ੍ਪਮਾਣਂ. ਮਨੁਸ੍ਸਾਨਂ ਗਣਨਾਯ ਕਿਤ੍ਤਕਂ ਹੋਤਿ? ਦ੍ਵੇ ਵਸ੍ਸਕੋਟਿਸਤਾਨਿ ਤਿਂਸਞ੍ਚ ਵਸ੍ਸਕੋਟਿਯੋ ਚਤ੍ਤਾਰੀਸਞ੍ਚ ਵਸ੍ਸਸਤਸਹਸ੍ਸਾਨਿ.
ਪਰਨਿਮ੍ਮਿਤਵਸਵਤ੍ਤੀਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਯਾਨਿ ਮਾਨੁਸਕਾਨਿ ਸੋਲ਼ਸ ਵਸ੍ਸਸਤਾਨਿ, ਪਰਨਿਮ੍ਮਿਤਵਸਵਤ੍ਤੀਨਂ ਦੇਵਾਨਂ ਏਸੋ ਏਕੋ ਰਤ੍ਤਿਨ੍ਦਿਵੋ. ਤਾਯ ਰਤ੍ਤਿਯਾ ਤਿਂਸਰਤ੍ਤਿਯੋ ਮਾਸੋ. ਤੇਨ ਮਾਸੇਨ ਦ੍ਵਾਦਸਮਾਸਿਯੋ ਸਂਵਚ੍ਛਰੋ. ਤੇਨ ਸਂਵਚ੍ਛਰੇਨ ਦਿਬ੍ਬਾਨਿ ਸੋਲ਼ਸ ਵਸ੍ਸਸਹਸ੍ਸਾਨਿ ਪਰਨਿਮ੍ਮਿਤਵਸਵਤ੍ਤੀਨਂ ਦੇਵਾਨਂ ਆਯੁਪ੍ਪਮਾਣਂ. ਮਨੁਸ੍ਸਾਨਂ ਗਣਨਾਯ ਕਿਤ੍ਤਕਂ ਹੋਤਿ? ਨਵ ਚ ਵਸ੍ਸਕੋਟਿਸਤਾਨਿ ਏਕਵੀਸਞ੍ਚ ਵਸ੍ਸਕੋਟਿਯੋ ਸਟ੍ਠਿ ਚ ਵਸ੍ਸਸਤਸਹਸ੍ਸਾਨੀਤਿ.
ਛ ਏਤੇ [ਛਪਿ ਤੇ (ਸ੍ਯਾ.)] ਕਾਮਾਵਚਰਾ, ਸਬ੍ਬਕਾਮਸਮਿਦ੍ਧਿਨੋ;
ਸਬ੍ਬੇਸਂ ਏਕਸਙ੍ਖਾਤੋ, ਆਯੁ ਭਵਤਿ ਕਿਤ੍ਤਕੋ.
ਦ੍ਵਾਦਸ ਕੋਟਿਸਤਂ ਤੇਸਂ, ਅਟ੍ਠਵੀਸਞ੍ਚ ਕੋਟਿਯੋ;
ਪਞ੍ਞਾਸ ਸਤਸਹਸ੍ਸਾਨਿ, ਵਸ੍ਸਗ੍ਗੇਨ ਪਕਾਸਿਤਾਤਿ.
੧੦੨੪. ਪਠਮਂ ਝਾਨਂ ਪਰਿਤ੍ਤਂ ਭਾਵੇਤ੍ਵਾ ਕਤ੍ਥ ਉਪਪਜ੍ਜਨ੍ਤਿ? ਪਠਮਂ ਝਾਨਂ ਪਰਿਤ੍ਤਂ ਭਾਵੇਤ੍ਵਾ ਬ੍ਰਹ੍ਮਪਾਰਿਸਜ੍ਜਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ. ਤੇਸਂ ਕਿਤ੍ਤਕਂ ਆਯੁਪ੍ਪਮਾਣਂ? ਕਪ੍ਪਸ੍ਸ ਤਤਿਯੋ ਭਾਗੋ.
ਪਠਮਂ ਝਾਨਂ ਮਜ੍ਝਿਮਂ ਭਾਵੇਤ੍ਵਾ ਕਤ੍ਥ ਉਪਪਜ੍ਜਨ੍ਤਿ? ਪਠਮਂ ਝਾਨਂ ਮਜ੍ਝਿਮਂ ਭਾਵੇਤ੍ਵਾ ਬ੍ਰਹ੍ਮਪੁਰੋਹਿਤਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ. ਤੇਸਂ ਕਿਤ੍ਤਕਂ ਆਯੁਪ੍ਪਮਾਣਂ? ਉਪਡ੍ਢਕਪ੍ਪੋ.
ਪਠਮਂ ਝਾਨਂ ਪਣੀਤਂ ਭਾਵੇਤ੍ਵਾ ਕਤ੍ਥ ਉਪਪਜ੍ਜਨ੍ਤਿ? ਪਠਮਂ ਝਾਨਂ ਪਣੀਤਂ ਭਾਵੇਤ੍ਵਾ ਮਹਾਬ੍ਰਹ੍ਮਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ. ਤੇਸਂ ਕਿਤ੍ਤਕਂ ਆਯੁਪ੍ਪਮਾਣਂ? ਕਪ੍ਪੋ [ਏਕੋ ਕਪ੍ਪੋ (ਸ੍ਯਾ.)].
੧੦੨੫. ਦੁਤਿਯਂ ਝਾਨਂ ਪਰਿਤ੍ਤਂ ਭਾਵੇਤ੍ਵਾ ਕਤ੍ਥ ਉਪਪਜ੍ਜਨ੍ਤਿ? ਦੁਤਿਯਂ ਝਾਨਂ ਪਰਿਤ੍ਤਂ ਭਾਵੇਤ੍ਵਾ ਪਰਿਤ੍ਤਾਭਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ. ਤੇਸਂ ਕਿਤ੍ਤਕਂ ਆਯੁਪ੍ਪਮਾਣਂ? ਦ੍ਵੇ ਕਪ੍ਪਾ.
ਦੁਤਿਯਂ ਝਾਨਂ ਮਜ੍ਝਿਮਂ ਭਾਵੇਤ੍ਵਾ ਕਤ੍ਥ ਉਪਪਜ੍ਜਨ੍ਤਿ? ਦੁਤਿਯਂ ਝਾਨਂ ਮਜ੍ਝਿਮਂ ਭਾਵੇਤ੍ਵਾ ਅਪ੍ਪਮਾਣਾਭਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ. ਤੇਸਂ ਕਿਤ੍ਤਕਂ ਆਯੁਪ੍ਪਮਾਣਂ? ਚਤ੍ਤਾਰੋ ਕਪ੍ਪਾ.
ਦੁਤਿਯਂ ਝਾਨਂ ਪਣੀਤਂ ਭਾਵੇਤ੍ਵਾ ਕਤ੍ਥ ਉਪਪਜ੍ਜਨ੍ਤਿ? ਦੁਤਿਯਂ ਝਾਨਂ ਪਣੀਤਂ ਭਾਵੇਤ੍ਵਾ ਆਭਸ੍ਸਰਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ. ਤੇਸਂ ਕਿਤ੍ਤਕਂ ਆਯੁਪ੍ਪਮਾਣਂ? ਅਟ੍ਠ ਕਪ੍ਪਾ.
੧੦੨੬. ਤਤਿਯਂ ਝਾਨਂ ਪਰਿਤ੍ਤਂ ਭਾਵੇਤ੍ਵਾ ਕਤ੍ਥ ਉਪਪਜ੍ਜਨ੍ਤਿ? ਤਤਿਯਂ ਝਾਨਂ ਪਰਿਤ੍ਤਂ ਭਾਵੇਤ੍ਵਾ ਪਰਿਤ੍ਤਸੁਭਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ. ਤੇਸਂ ਕਿਤ੍ਤਕਂ ਆਯੁਪ੍ਪਮਾਣਂ? ਸੋਲ਼ਸ ਕਪ੍ਪਾ.
ਤਤਿਯਂ ਝਾਨਂ ਮਜ੍ਝਿਮਂ ਭਾਵੇਤ੍ਵਾ ਕਤ੍ਥ ਉਪਪਜ੍ਜਨ੍ਤਿ? ਤਤਿਯਂ ਝਾਨਂ ਮਜ੍ਝਿਮਂ ਭਾਵੇਤ੍ਵਾ ਅਪ੍ਪਮਾਣਸੁਭਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ. ਤੇਸਂ ਕਿਤ੍ਤਕਂ ਆਯੁਪ੍ਪਮਾਣਂ? ਬਾਤ੍ਤਿਂਸ ਕਪ੍ਪਾ.
ਤਤਿਯਂ ਝਾਨਂ ਪਣੀਤਂ ਭਾਵੇਤ੍ਵਾ ਕਤ੍ਥ ਉਪਪਜ੍ਜਨ੍ਤਿ? ਤਤਿਯਂ ਝਾਨਂ ਪਣੀਤਂ ਭਾਵੇਤ੍ਵਾ ਸੁਭਕਿਣ੍ਹਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ. ਤੇਸਂ ਕਿਤ੍ਤਕਂ ਆਯੁਪ੍ਪਮਾਣਂ? ਚਤੁਸਟ੍ਠਿ ਕਪ੍ਪਾ.
੧੦੨੭. ਚਤੁਤ੍ਥਂ ਝਾਨਂ ਭਾਵੇਤ੍ਵਾ ਆਰਮ੍ਮਣਨਾਨਤ੍ਤਤਾ ਮਨਸਿਕਾਰਨਾਨਤ੍ਤਤਾ ਛਨ੍ਦਨਾਨਤ੍ਤਤਾ ਪਣਿਧਿਨਾਨਤ੍ਤਤਾ ਅਧਿਮੋਕ੍ਖਨਾਨਤ੍ਤਤਾ ਅਭਿਨੀਹਾਰਨਾਨਤ੍ਤਤਾ ਪਞ੍ਞਾਨਾਨਤ੍ਤਤਾ ਅਪ੍ਪੇਕਚ੍ਚੇ ਅਸਞ੍ਞਸਤ੍ਤਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ, ਅਪ੍ਪੇਕਚ੍ਚੇ ਵੇਹਪ੍ਫਲਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ, ਅਪ੍ਪੇਕਚ੍ਚੇ ਅਵਿਹਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ, ਅਪ੍ਪੇਕਚ੍ਚੇ ਅਤਪ੍ਪਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ, ਅਪ੍ਪੇਕਚ੍ਚੇ ਸੁਦਸ੍ਸਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ, ਅਪ੍ਪੇਕਚ੍ਚੇ ਸੁਦਸ੍ਸੀਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ, ਅਪ੍ਪੇਕਚ੍ਚੇ ਅਕਨਿਟ੍ਠਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ, ਅਪ੍ਪੇਕਚ੍ਚੇ ਆਕਾਸਾਨਞ੍ਚਾਯਤਨੂਪਗਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ, ਅਪ੍ਪੇਕਚ੍ਚੇ ਵਿਞ੍ਞਾਣਞ੍ਚਾਯਤਨੂਪਗਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ, ਅਪ੍ਪੇਕਚ੍ਚੇ ਆਕਿਞ੍ਚਞ੍ਞਾਯਤਨੂਪਗਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ, ਅਪ੍ਪੇਕਚ੍ਚੇ ਨੇਵਸਞ੍ਞਾਨਾਸਞ੍ਞਾਯਤਨੂਪਗਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ.
ਅਸਞ੍ਞਸਤ੍ਤਾਨਞ੍ਚ ਵੇਹਪ੍ਫਲਾਨਞ੍ਚ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਪਞ੍ਚਕਪ੍ਪਸਤਾਨਿ.
ਅਵਿਹਾਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਕਪ੍ਪਸਹਸ੍ਸਂ.
ਅਤਪ੍ਪਾਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਦ੍ਵੇ ਕਪ੍ਪਸਹਸ੍ਸਾਨਿ.
ਸੁਦਸ੍ਸਾਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਚਤ੍ਤਾਰਿ ਕਪ੍ਪਸਹਸ੍ਸਾਨਿ.
ਸੁਦਸ੍ਸੀਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਅਟ੍ਠ ਕਪ੍ਪਸਹਸ੍ਸਾਨਿ.
ਅਕਨਿਟ੍ਠਾਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਸੋਲ਼ਸ ਕਪ੍ਪਸਹਸ੍ਸਾਨਿ.
੧੦੨੮. ਆਕਾਸਾਨਞ੍ਚਾਯਤਨੂਪਗਾਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਵੀਸਤਿ ਕਪ੍ਪਸਹਸ੍ਸਾਨਿ.
ਵਿਞ੍ਞਾਣਞ੍ਚਾਯਤਨੂਪਗਾਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਚਤ੍ਤਾਰੀਸ ਕਪ੍ਪਸਹਸ੍ਸਾਨਿ.
ਆਕਿਞ੍ਚਞ੍ਞਾਯਤਨੂਪਗਾਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਸਟ੍ਠਿ ਕਪ੍ਪਸਹਸ੍ਸਾਨਿ.
ਨੇਵਸਞ੍ਞਾਨਾਸਞ੍ਞਾਯਤਨੂਪਗਾਨਂ ਦੇਵਾਨਂ ਕਿਤ੍ਤਕਂ ਆਯੁਪ੍ਪਮਾਣਂ? ਚਤੁਰਾਸੀਤਿ ਕਪ੍ਪਸਹਸ੍ਸਾਨੀਤਿ.
੧੦੨੯. ਉਕ੍ਖਿਤ੍ਤਾ ਪੁਞ੍ਞਤੇਜੇਨ, ਕਾਮਰੂਪਗਤਿਂ ਗਤਾ.
ਭਵਗ੍ਗਤਮ੍ਪਿ [ਭਵਗ੍ਗਂ ਵਾਪਿ (ਸ੍ਯਾ.)] ਸਮ੍ਪਤ੍ਤਾ, ਪੁਨਾਗਚ੍ਛਨ੍ਤਿ [ਪੁਨ ਗਚ੍ਛਨ੍ਤਿ (ਸ੍ਯਾ.)] ਦੁਗ੍ਗਤਿਂ.
ਤਾਵ ਦੀਘਾਯੁਕਾ ਸਤ੍ਤਾ, ਚਵਨ੍ਤਿ ਆਯੁਸਙ੍ਖਯਾ;
ਨਤ੍ਥਿ ਕੋਚਿ ਭਵੋ ਨਿਚ੍ਚੋ, ਇਤਿ ਵੁਤ੍ਤਂ ਮਹੇਸਿਨਾ.
ਤਸ੍ਮਾ ਹਿ ਧੀਰਾ ਨਿਪਕਾ, ਨਿਪੁਣਾ ਅਤ੍ਥਚਿਨ੍ਤਕਾ;
ਜਰਾਮਰਣਮੋਕ੍ਖਾਯ, ਭਾਵੇਨ੍ਤਿ ਮਗ੍ਗਮੁਤ੍ਤਮਂ.
ਭਾਵਯਿਤ੍ਵਾ ਸੁਚਿਂ ਮਗ੍ਗਂ, ਨਿਬ੍ਬਾਨੋਗਧਗਾਮਿਨਂ;
ਸਬ੍ਬਾਸਵੇ ਪਰਿਞ੍ਞਾਯ, ਪਰਿਨਿਬ੍ਬਨ੍ਤਿ ਅਨਾਸਵਾਤਿ.