੪. ਧਮ੍ਮਦਸ੍ਸਨਵਾਰੋ
੧. ਕਾਮਧਾਤੁ
੧੦੦੭. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਤਿ ਖਨ੍ਧਾ ਪਾਤੁਭਵਨ੍ਤਿ…ਪੇ… ਕਤਿ ਚਿਤ੍ਤਾਨਿ ਪਾਤੁਭਵਨ੍ਤਿ?
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਸਬ੍ਬੇਸਂ ਪਞ੍ਚਕ੍ਖਨ੍ਧਾ ਪਾਤੁਭਵਨ੍ਤਿ; ਕਸ੍ਸਚਿ ਏਕਾਦਸਾਯਤਨਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਦਸਾਯਤਨਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਅਪਰਾਨਿ ਦਸਾਯਤਨਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਨਵਾਯਤਨਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਸਤ੍ਤਾਯਤਨਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਏਕਾਦਸ ਧਾਤੁਯੋ ਪਾਤੁਭਵਨ੍ਤਿ; ਕਸ੍ਸਚਿ ਦਸ ਧਾਤੁਯੋ ਪਾਤੁਭਵਨ੍ਤਿ; ਕਸ੍ਸਚਿ ਅਪਰਾ ਦਸ ਧਾਤੁਯੋ ਪਾਤੁਭਵਨ੍ਤਿ; ਕਸ੍ਸਚਿ ਨਵ ਧਾਤੁਯੋ ਪਾਤੁਭਵਨ੍ਤਿ; ਕਸ੍ਸਚਿ ਸਤ੍ਤ ਧਾਤੁਯੋ ਪਾਤੁਭਵਨ੍ਤਿ; ਸਬ੍ਬੇਸਂ ਏਕਂ ਸਚ੍ਚਂ ਪਾਤੁਭਵਤਿ; ਕਸ੍ਸਚਿ ਚੁਦ੍ਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਤੇਰਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਅਪਰਾਨਿ ਤੇਰਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਦ੍ਵਾਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਨਵਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਅਪਰਾਨਿ ਨਵਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਅਟ੍ਠਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਅਪਰਾਨਿ ਅਟ੍ਠਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਸਤ੍ਤਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਪਞ੍ਚਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਚਤ੍ਤਾਰਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ; ਕਸ੍ਸਚਿ ਤਯੋ ਹੇਤੂ ਪਾਤੁਭਵਨ੍ਤਿ; ਕਸ੍ਸਚਿ ਦ੍ਵੇ ਹੇਤੂ ਪਾਤੁਭਵਨ੍ਤਿ; ਕਸ੍ਸਚਿ [ਕੇਚਿ (ਸ੍ਯਾ.)] ਅਹੇਤੁਕਾ ਪਾਤੁਭਵਨ੍ਤਿ; ਸਬ੍ਬੇਸਂ ਚਤ੍ਤਾਰੋ ਆਹਾਰਾ ਪਾਤੁਭਵਨ੍ਤਿ; ਸਬ੍ਬੇਸਂ ਏਕੋ ਫਸ੍ਸੋ ਪਾਤੁਭਵਤਿ; ਸਬ੍ਬੇਸਂ ਏਕਾ ਵੇਦਨਾ… ਏਕਾ ਸਞ੍ਞਾ… ਏਕਾ ਚੇਤਨਾ… ਏਕਂ ਚਿਤ੍ਤਂ ਪਾਤੁਭਵਤਿ.
੧੦੦੮. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਸਬ੍ਬੇਸਂ ਕਤਮੇ ਪਞ੍ਚਕ੍ਖਨ੍ਧਾ ਪਾਤੁਭਵਨ੍ਤਿ? ਰੂਪਕ੍ਖਨ੍ਧੋ…ਪੇ… ਵਿਞ੍ਞਾਣਕ੍ਖਨ੍ਧੋ – ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਸਬ੍ਬੇਸਂ ਇਮੇ ਪਞ੍ਚਕ੍ਖਨ੍ਧਾ ਪਾਤੁਭਵਨ੍ਤਿ.
੧੦੦੯. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਏਕਾਦਸਾਯਤਨਾਨਿ ਪਾਤੁਭਵਨ੍ਤਿ? ਕਾਮਾਵਚਰਾਨਂ ਦੇਵਾਨਂ, ਪਠਮਕਪ੍ਪਿਕਾਨਂ ਮਨੁਸ੍ਸਾਨਂ, ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ, ਨੇਰਯਿਕਾਨਂ ਪਰਿਪੁਣ੍ਣਾਯਤਨਾਨਂ ਉਪਪਤ੍ਤਿਕ੍ਖਣੇ ਏਕਾਦਸਾਯਤਨਾਨਿ ਪਾਤੁਭਵਨ੍ਤਿ – ਚਕ੍ਖਾਯਤਨਂ, ਰੂਪਾਯਤਨਂ, ਸੋਤਾਯਤਨਂ, ਘਾਨਾਯਤਨਂ, ਗਨ੍ਧਾਯਤਨਂ, ਜਿਵ੍ਹਾਯਤਨਂ, ਰਸਾਯਤਨਂ, ਕਾਯਾਯਤਨਂ, ਫੋਟ੍ਠਬ੍ਬਾਯਤਨਂ, ਮਨਾਯਤਨਂ, ਧਮ੍ਮਾਯਤਨਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਏਕਾਦਸਾਯਤਨਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਦਸਾਯਤਨਾਨਿ ਪਾਤੁਭਵਨ੍ਤਿ? ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ ਨੇਰਯਿਕਾਨਂ, ਜਚ੍ਚਨ੍ਧਾਨਂ ਉਪਪਤ੍ਤਿਕ੍ਖਣੇ ਦਸਾਯਤਨਾਨਿ ਪਾਤੁਭਵਨ੍ਤਿ – ਰੂਪਾਯਤਨਂ, ਸੋਤਾਯਤਨਂ, ਘਾਨਾਯਤਨਂ, ਗਨ੍ਧਾਯਤਨਂ, ਜਿਵ੍ਹਾਯਤਨਂ, ਰਸਾਯਤਨਂ, ਕਾਯਾਯਤਨਂ, ਫੋਟ੍ਠਬ੍ਬਾਯਤਨਂ, ਮਨਾਯਤਨਂ, ਧਮ੍ਮਾਯਤਨਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਦਸਾਯਤਨਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਅਪਰਾਨਿ ਦਸਾਯਤਨਾਨਿ ਪਾਤੁਭਵਨ੍ਤਿ? ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ ਨੇਰਯਿਕਾਨਂ, ਜਚ੍ਚਬਧਿਰਾਨਂ ਉਪਪਤ੍ਤਿਕ੍ਖਣੇ ਦਸਾਯਤਨਾਨਿ ਪਾਤੁਭਵਨ੍ਤਿ – ਚਕ੍ਖਾਯਤਨਂ, ਰੂਪਾਯਤਨਂ, ਘਾਨਾਯਤਨਂ, ਗਨ੍ਧਾਯਤਨਂ, ਜਿਵ੍ਹਾਯਤਨਂ, ਰਸਾਯਤਨਂ, ਕਾਯਾਯਤਨਂ, ਫੋਟ੍ਠਬ੍ਬਾਯਤਨਂ, ਮਨਾਯਤਨਂ, ਧਮ੍ਮਾਯਤਨਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਦਸਾਯਤਨਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਨਵਾਯਤਨਾਨਿ ਪਾਤੁਭਵਨ੍ਤਿ? ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ ਨੇਰਯਿਕਾਨਂ, ਜਚ੍ਚਨ੍ਧਬਧਿਰਾਨਂ ਉਪਪਤ੍ਤਿਕ੍ਖਣੇ ਨਵਾਯਤਨਾਨਿ ਪਾਤੁਭਵਨ੍ਤਿ – ਰੂਪਾਯਤਨਂ, ਘਾਨਾਯਤਨਂ, ਗਨ੍ਧਾਯਤਨਂ, ਜਿਵ੍ਹਾਯਤਨਂ, ਰਸਾਯਤਨਂ, ਕਾਯਾਯਤਨਂ, ਫੋਟ੍ਠਬ੍ਬਾਯਤਨਂ, ਮਨਾਯਤਨਂ, ਧਮ੍ਮਾਯਤਨਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਨਵਾਯਤਨਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਸਤ੍ਤਾਯਤਨਾਨਿ ਪਾਤੁਭਵਨ੍ਤਿ? ਗਬ੍ਭਸੇਯ੍ਯਕਾਨਂ ਸਤ੍ਤਾਨਂ ਉਪਪਤ੍ਤਿਕ੍ਖਣੇ ਸਤ੍ਤਾਯਤਨਾਨਿ ਪਾਤੁਭਵਨ੍ਤਿ – ਰੂਪਾਯਤਨਂ, ਗਨ੍ਧਾਯਤਨਂ, ਰਸਾਯਤਨਂ, ਕਾਯਾਯਤਨਂ, ਫੋਟ੍ਠਬ੍ਬਾਯਤਨਂ, ਮਨਾਯਤਨਂ, ਧਮ੍ਮਾਯਤਨਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਸਤ੍ਤਾਯਤਨਾਨਿ ਪਾਤੁਭਵਨ੍ਤਿ.
੧੦੧੦. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਏਕਾਦਸ ਧਾਤੁਯੋ ਪਾਤੁਭਵਨ੍ਤਿ? ਕਾਮਾਵਚਰਾਨਂ ਦੇਵਾਨਂ, ਪਠਮਕਪ੍ਪਿਕਾਨਂ ਮਨੁਸ੍ਸਾਨਂ, ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ ਨੇਰਯਿਕਾਨਂ ਪਰਿਪੁਣ੍ਣਾਯਤਨਾਨਂ ਉਪਪਤ੍ਤਿਕ੍ਖਣੇ ਏਕਾਦਸ ਧਾਤੁਯੋ ਪਾਤੁਭਵਨ੍ਤਿ – ਚਕ੍ਖੁਧਾਤੁ, ਰੂਪਧਾਤੁ, ਸੋਤਧਾਤੁ, ਘਾਨਧਾਤੁ, ਗਨ੍ਧਧਾਤੁ, ਜਿਵ੍ਹਾਧਾਤੁ, ਰਸਧਾਤੁ, ਕਾਯਧਾਤੁ, ਫੋਟ੍ਠਬ੍ਬਧਾਤੁ, ਮਨੋਵਿਞ੍ਞਾਣਧਾਤੁ, ਧਮ੍ਮਧਾਤੁ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾ ਏਕਾਦਸ ਧਾਤੁਯੋ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਦਸ ਧਾਤੁਯੋ ਪਾਤੁਭਵਨ੍ਤਿ? ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ ਨੇਰਯਿਕਾਨਂ, ਜਚ੍ਚਨ੍ਧਾਨਂ ਉਪਪਤ੍ਤਿਕ੍ਖਣੇ ਦਸ ਧਾਤੁਯੋ ਪਾਤੁਭਵਨ੍ਤਿ – ਰੂਪਧਾਤੁ, ਸੋਤਧਾਤੁ, ਘਾਨਧਾਤੁ, ਗਨ੍ਧਧਾਤੁ, ਜਿਵ੍ਹਾਧਾਤੁ, ਰਸਧਾਤੁ, ਕਾਯਧਾਤੁ, ਫੋਟ੍ਠਬ੍ਬਧਾਤੁ, ਮਨੋਵਿਞ੍ਞਾਣਧਾਤੁ, ਧਮ੍ਮਧਾਤੁ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾ ਦਸ ਧਾਤੁਯੋ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਅਪਰਾ ਦਸ ਧਾਤੁਯੋ ਪਾਤੁਭਵਨ੍ਤਿ? ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ ਨੇਰਯਿਕਾਨਂ, ਜਚ੍ਚਬਧਿਰਾਨਂ ਉਪਪਤ੍ਤਿਕ੍ਖਣੇ ਦਸ ਧਾਤੁਯੋ ਪਾਤੁਭਵਨ੍ਤਿ – ਚਕ੍ਖੁਧਾਤੁ, ਰੂਪਧਾਤੁ, ਘਾਨਧਾਤੁ, ਗਨ੍ਧਧਾਤੁ, ਜਿਵ੍ਹਾਧਾਤੁ, ਰਸਧਾਤੁ, ਕਾਯਧਾਤੁ, ਫੋਟ੍ਠਬ੍ਬਧਾਤੁ, ਮਨੋਵਿਞ੍ਞਾਣਧਾਤੁ, ਧਮ੍ਮਧਾਤੁ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾ ਦਸ ਧਾਤੁਯੋ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਨਵ ਧਾਤੁਯੋ ਪਾਤੁਭਵਨ੍ਤਿ? ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ ਨੇਰਯਿਕਾਨਂ, ਜਚ੍ਚਨ੍ਧਬਧਿਰਾਨਂ ਉਪਪਤ੍ਤਿਕ੍ਖਣੇ ਨਵ ਧਾਤੁਯੋ ਪਾਤੁਭਵਨ੍ਤਿ – ਰੂਪਧਾਤੁ, ਘਾਨਧਾਤੁ, ਗਨ੍ਧਧਾਤੁ, ਜਿਵ੍ਹਾਧਾਤੁ, ਰਸਧਾਤੁ, ਕਾਯਧਾਤੁ, ਫੋਟ੍ਠਬ੍ਬਧਾਤੁ, ਮਨੋਵਿਞ੍ਞਾਣਧਾਤੁ, ਧਮ੍ਮਧਾਤੁ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾ ਨਵ ਧਾਤੁਯੋ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਸਤ੍ਤ ਧਾਤੁਯੋ ਪਾਤੁਭਵਨ੍ਤਿ? ਗਬ੍ਭਸੇਯ੍ਯਕਾਨਂ ਸਤ੍ਤਾਨਂ ਉਪਪਤ੍ਤਿਕ੍ਖਣੇ ਸਤ੍ਤ ਧਾਤੁਯੋ ਪਾਤੁਭਵਨ੍ਤਿ – ਰੂਪਧਾਤੁ, ਗਨ੍ਧਧਾਤੁ, ਰਸਧਾਤੁ, ਕਾਯਧਾਤੁ, ਫੋਟ੍ਠਬ੍ਬਧਾਤੁ, ਮਨੋਵਿਞ੍ਞਾਣਧਾਤੁ, ਧਮ੍ਮਧਾਤੁ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾ ਸਤ੍ਤ ਧਾਤੁਯੋ ਪਾਤੁਭਵਨ੍ਤਿ.
੧੦੧੧. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਸਬ੍ਬੇਸਂ ਕਤਮਂ ਏਕਂ ਸਚ੍ਚਂ ਪਾਤੁਭਵਤਿ? ਦੁਕ੍ਖਸਚ੍ਚਂ – ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਸਬ੍ਬੇਸਂ ਇਦਂ ਏਕਂ ਸਚ੍ਚਂ ਪਾਤੁਭਵਤਿ.
੧੦੧੨. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਚੁਦ੍ਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਕਾਮਾਵਚਰਾਨਂ ਦੇਵਾਨਂ, ਸਹੇਤੁਕਾਨਂ ਞਾਣਸਮ੍ਪਯੁਤ੍ਤਾਨਂ ਉਪਪਤ੍ਤਿਕ੍ਖਣੇ ਚੁਦ੍ਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ – ਚਕ੍ਖੁਨ੍ਦ੍ਰਿਯਂ, ਸੋਤਿਨ੍ਦ੍ਰਿਯਂ, ਘਾਨਿਨ੍ਦ੍ਰਿਯਂ, ਜਿਵ੍ਹਿਨ੍ਦ੍ਰਿਯਂ, ਕਾਯਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਇਤ੍ਥਿਨ੍ਦ੍ਰਿਯਂ ਵਾ ਪੁਰਿਸਿਨ੍ਦ੍ਰਿਯਂ ਵਾ, ਜੀਵਿਤਿਨ੍ਦ੍ਰਿਯਂ, ਸੋਮਨਸ੍ਸਿਨ੍ਦ੍ਰਿਯਂ ਵਾ ਉਪੇਕ੍ਖਿਨ੍ਦ੍ਰਿਯਂ ਵਾ, ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ, ਪਞ੍ਞਿਨ੍ਦ੍ਰਿਯਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਚੁਦ੍ਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਤੇਰਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਕਾਮਾਵਚਰਾਨਂ ਦੇਵਾਨਂ ਸਹੇਤੁਕਾਨਂ ਞਾਣਵਿਪ੍ਪਯੁਤ੍ਤਾਨਂ ਉਪਪਤ੍ਤਿਕ੍ਖਣੇ ਤੇਰਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ – ਚਕ੍ਖੁਨ੍ਦ੍ਰਿਯਂ, ਸੋਤਿਨ੍ਦ੍ਰਿਯਂ, ਘਾਨਿਨ੍ਦ੍ਰਿਯਂ, ਜਿਵ੍ਹਿਨ੍ਦ੍ਰਿਯਂ, ਕਾਯਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਇਤ੍ਥਿਨ੍ਦ੍ਰਿਯਂ ਵਾ ਪੁਰਿਸਿਨ੍ਦ੍ਰਿਯਂ ਵਾ, ਜੀਵਿਤਿਨ੍ਦ੍ਰਿਯਂ, ਸੋਮਨਸ੍ਸਿਨ੍ਦ੍ਰਿਯਂ ਵਾ ਉਪੇਕ੍ਖਿਨ੍ਦ੍ਰਿਯਂ ਵਾ, ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਤੇਰਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਅਪਰਾਨਿ ਤੇਰਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਪਠਮਕਪ੍ਪਿਕਾਨਂ ਮਨੁਸ੍ਸਾਨਂ ਸਹੇਤੁਕਾਨਂ ਞਾਣਸਮ੍ਪਯੁਤ੍ਤਾਨਂ ਉਪਪਤ੍ਤਿਕ੍ਖਣੇ ਤੇਰਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ – ਚਕ੍ਖੁਨ੍ਦ੍ਰਿਯਂ, ਸੋਤਿਨ੍ਦ੍ਰਿਯਂ, ਘਾਨਿਨ੍ਦ੍ਰਿਯਂ, ਜਿਵ੍ਹਿਨ੍ਦ੍ਰਿਯਂ, ਕਾਯਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਜੀਵਿਤਿਨ੍ਦ੍ਰਿਯਂ, ਸੋਮਨਸ੍ਸਿਨ੍ਦ੍ਰਿਯਂ ਵਾ ਉਪੇਕ੍ਖਿਨ੍ਦ੍ਰਿਯਂ ਵਾ, ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ, ਪਞ੍ਞਿਨ੍ਦ੍ਰਿਯਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਤੇਰਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਦ੍ਵਾਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਪਠਮਕਪ੍ਪਿਕਾਨਂ ਮਨੁਸ੍ਸਾਨਂ ਸਹੇਤੁਕਾਨਂ ਞਾਣਵਿਪ੍ਪਯੁਤ੍ਤਾਨਂ ਉਪਪਤ੍ਤਿਕ੍ਖਣੇ ਦ੍ਵਾਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ – ਚਕ੍ਖੁਨ੍ਦ੍ਰਿਯਂ, ਸੋਤਿਨ੍ਦ੍ਰਿਯਂ, ਘਾਨਿਨ੍ਦ੍ਰਿਯਂ, ਜਿਵ੍ਹਿਨ੍ਦ੍ਰਿਯਂ, ਕਾਯਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਜੀਵਿਤਿਨ੍ਦ੍ਰਿਯਂ, ਸੋਮਨਸ੍ਸਿਨ੍ਦ੍ਰਿਯਂ ਵਾ ਉਪੇਕ੍ਖਿਨ੍ਦ੍ਰਿਯਂ ਵਾ, ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਦ੍ਵਾਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਗਬ੍ਭਸੇਯ੍ਯਕਾਨਂ ਸਤ੍ਤਾਨਂ ਸਹੇਤੁਕਾਨਂ ਞਾਣਸਮ੍ਪਯੁਤ੍ਤਾਨਂ ਉਪਪਤ੍ਤਿਕ੍ਖਣੇ ਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ – ਕਾਯਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਇਤ੍ਥਿਨ੍ਦ੍ਰਿਯਂ ਵਾ ਪੁਰਿਸਿਨ੍ਦ੍ਰਿਯਂ ਵਾ, ਜੀਵਿਤਿਨ੍ਦ੍ਰਿਯਂ, ਸੋਮਨਸ੍ਸਿਨ੍ਦ੍ਰਿਯਂ ਵਾ ਉਪੇਕ੍ਖਿਨ੍ਦ੍ਰਿਯਂ ਵਾ, ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ, ਪਞ੍ਞਿਨ੍ਦ੍ਰਿਯਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਨਵਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਗਬ੍ਭਸੇਯ੍ਯਕਾਨਂ ਸਤ੍ਤਾਨਂ ਸਹੇਤੁਕਾਨਂ ਞਾਣਵਿਪ੍ਪਯੁਤ੍ਤਾਨਂ ਉਪਪਤ੍ਤਿਕ੍ਖਣੇ ਨਵਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ – ਕਾਯਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਇਤ੍ਥਿਨ੍ਦ੍ਰਿਯਂ ਵਾ ਪੁਰਿਸਿਨ੍ਦ੍ਰਿਯਂ ਵਾ, ਜੀਵਿਤਿਨ੍ਦ੍ਰਿਯਂ, ਸੋਮਨਸ੍ਸਿਨ੍ਦ੍ਰਿਯਂ ਵਾ ਉਪੇਕ੍ਖਿਨ੍ਦ੍ਰਿਯਂ ਵਾ, ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਨਵਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਅਪਰਾਨਿ ਨਵਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ ਨੇਰਯਿਕਾਨਂ ਪਰਿਪੁਣ੍ਣਾਯਤਨਾਨਂ ਉਪਪਤ੍ਤਿਕ੍ਖਣੇ ਨਵਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ – ਚਕ੍ਖੁਨ੍ਦ੍ਰਿਯਂ, ਸੋਤਿਨ੍ਦ੍ਰਿਯਂ, ਘਾਨਿਨ੍ਦ੍ਰਿਯਂ, ਜਿਵ੍ਹਿਨ੍ਦ੍ਰਿਯਂ, ਕਾਯਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਇਤ੍ਥਿਨ੍ਦ੍ਰਿਯਂ ਵਾ ਪੁਰਿਸਿਨ੍ਦ੍ਰਿਯਂ ਵਾ, ਜੀਵਿਤਿਨ੍ਦ੍ਰਿਯਂ, ਉਪੇਕ੍ਖਿਨ੍ਦ੍ਰਿਯਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਨਵਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਅਟ੍ਠਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ ਨੇਰਯਿਕਾਨਂ, ਜਚ੍ਚਨ੍ਧਾਨਂ ਉਪਪਤ੍ਤਿਕ੍ਖਣੇ ਅਟ੍ਠਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ – ਸੋਤਿਨ੍ਦ੍ਰਿਯਂ, ਘਾਨਿਨ੍ਦ੍ਰਿਯਂ, ਜਿਵ੍ਹਿਨ੍ਦ੍ਰਿਯਂ, ਕਾਯਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਇਤ੍ਥਿਨ੍ਦ੍ਰਿਯਂ ਵਾ ਪੁਰਿਸਿਨ੍ਦ੍ਰਿਯਂ ਵਾ, ਜੀਵਿਤਿਨ੍ਦ੍ਰਿਯਂ, ਉਪੇਕ੍ਖਿਨ੍ਦ੍ਰਿਯਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਅਟ੍ਠਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਅਪਰਾਨਿ ਅਟ੍ਠਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ ਨੇਰਯਿਕਾਨਂ, ਜਚ੍ਚਬਧਿਰਾਨਂ ਉਪਪਤ੍ਤਿਕ੍ਖਣੇ ਅਟ੍ਠਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ – ਚਕ੍ਖੁਨ੍ਦ੍ਰਿਯਂ, ਘਾਨਿਨ੍ਦ੍ਰਿਯਂ, ਜਿਵ੍ਹਿਨ੍ਦ੍ਰਿਯਂ, ਕਾਯਿਨ੍ਦ੍ਰਿਯਂ ਮਨਿਨ੍ਦ੍ਰਿਯਂ, ਇਤ੍ਥਿਨ੍ਦ੍ਰਿਯਂ ਵਾ ਪੁਰਿਸਿਨ੍ਦ੍ਰਿਯਂ ਵਾ, ਜੀਵਿਤਿਨ੍ਦ੍ਰਿਯਂ, ਉਪੇਕ੍ਖਿਨ੍ਦ੍ਰਿਯਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਅਟ੍ਠਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਸਤ੍ਤਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਓਪਪਾਤਿਕਾਨਂ ਪੇਤਾਨਂ, ਓਪਪਾਤਿਕਾਨਂ ਅਸੁਰਾਨਂ, ਓਪਪਾਤਿਕਾਨਂ ਤਿਰਚ੍ਛਾਨਗਤਾਨਂ ਨੇਰਯਿਕਾਨਂ, ਜਚ੍ਚਨ੍ਧਬਧਿਰਾਨਂ ਉਪਪਤ੍ਤਿਕ੍ਖਣੇ ਸਤ੍ਤਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ – ਘਾਨਿਨ੍ਦ੍ਰਿਯਂ, ਜਿਵ੍ਹਿਨ੍ਦ੍ਰਿਯਂ, ਕਾਯਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਇਤ੍ਥਿਨ੍ਦ੍ਰਿਯਂ ਵਾ ਪੁਰਿਸਿਨ੍ਦ੍ਰਿਯਂ ਵਾ, ਜੀਵਿਤਿਨ੍ਦ੍ਰਿਯਂ, ਉਪੇਕ੍ਖਿਨ੍ਦ੍ਰਿਯਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਸਤ੍ਤਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਪਞ੍ਚਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਗਬ੍ਭਸੇਯ੍ਯਕਾਨਂ ਸਤ੍ਤਾਨਂ ਅਹੇਤੁਕਾਨਂ, ਠਪੇਤ੍ਵਾ ਨਪੁਂਸਕਾਨਂ, ਉਪਪਤ੍ਤਿਕ੍ਖਣੇ ਪਞ੍ਚਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ – ਕਾਯਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਇਤ੍ਥਿਨ੍ਦ੍ਰਿਯਂ ਵਾ ਪੁਰਿਸਿਨ੍ਦ੍ਰਿਯਂ ਵਾ, ਜੀਵਿਤਿਨ੍ਦ੍ਰਿਯਂ, ਉਪੇਕ੍ਖਿਨ੍ਦ੍ਰਿਯਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਚਤ੍ਤਾਰਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਗਬ੍ਭਸੇਯ੍ਯਕਾਨਂ ਸਤ੍ਤਾਨਂ ਅਹੇਤੁਕਾਨਂ, ਨਪੁਂਸਕਾਨਂ ਉਪਪਤ੍ਤਿਕ੍ਖਣੇ ਚਤ੍ਤਾਰਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ – ਕਾਯਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਜੀਵਿਤਿਨ੍ਦ੍ਰਿਯਂ, ਉਪੇਕ੍ਖਿਨ੍ਦ੍ਰਿਯਂ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮਾਨਿ ਚਤ੍ਤਾਰਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
੧੦੧੩. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਤਯੋ ਹੇਤੂ ਪਾਤੁਭਵਨ੍ਤਿ? ਕਾਮਾਵਚਰਾਨਂ ਦੇਵਾਨਂ, ਪਠਮਕਪ੍ਪਿਕਾਨਂ ਮਨੁਸ੍ਸਾਨਂ, ਗਬ੍ਭਸੇਯ੍ਯਕਾਨਂ ਸਤ੍ਤਾਨਂ ਸਹੇਤੁਕਾਨਂ ਞਾਣਸਮ੍ਪਯੁਤ੍ਤਾਨਂ ਉਪਪਤ੍ਤਿਕ੍ਖਣੇ ਤਯੋ ਹੇਤੂ ਪਾਤੁਭਵਨ੍ਤਿ – ਅਲੋਭੋ ਵਿਪਾਕਹੇਤੁ, ਅਦੋਸੋ ਵਿਪਾਕਹੇਤੁ, ਅਮੋਹੋ ਵਿਪਾਕਹੇਤੁ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮੇ ਤਯੋ ਹੇਤੂ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸ ਦ੍ਵੇ ਹੇਤੂ ਪਾਤੁਭਵਨ੍ਤਿ? ਕਾਮਾਵਚਰਾਨਂ ਦੇਵਾਨਂ, ਪਠਮਕਪ੍ਪਿਕਾਨਂ ਮਨੁਸ੍ਸਾਨਂ, ਗਬ੍ਭਸੇਯ੍ਯਕਾਨਂ ਸਤ੍ਤਾਨਂ ਸਹੇਤੁਕਾਨਂ ਞਾਣਵਿਪ੍ਪਯੁਤ੍ਤਾਨਂ ਉਪਪਤ੍ਤਿਕ੍ਖਣੇ ਦ੍ਵੇ ਹੇਤੂ ਪਾਤੁਭਵਨ੍ਤਿ – ਅਲੋਭੋ ਵਿਪਾਕਹੇਤੁ, ਅਦੋਸੋ ਵਿਪਾਕਹੇਤੁ. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਏਤੇਸਂ ਇਮੇ ਦ੍ਵੇ ਹੇਤੂ ਪਾਤੁਭਵਨ੍ਤਿ. ਅਵਸੇਸਾਨਂ ਸਤ੍ਤਾਨਂ [ਅਵਸੇਸਾ ਸਤ੍ਤਾ (?)] ਅਹੇਤੁਕਾ ਪਾਤੁਭਵਨ੍ਤਿ.
੧੦੧੪. ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਸਬ੍ਬੇਸਂ ਕਤਮੇ ਚਤ੍ਤਾਰੋ ਆਹਾਰਾ ਪਾਤੁਭਵਨ੍ਤਿ. ਕਬਲ਼ੀਕਾਰੋ ਆਹਾਰੋ, ਫਸ੍ਸਾਹਾਰੋ, ਮਨੋਸਞ੍ਚੇਤਨਾਹਾਰੋ, ਵਿਞ੍ਞਾਣਾਹਾਰੋ – ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਸਬ੍ਬੇਸਂ ਇਮੇ ਚਤ੍ਤਾਰੋ ਆਹਾਰਾ ਪਾਤੁਭਵਨ੍ਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਸਬ੍ਬੇਸਂ ਕਤਮੋ ਏਕੋ ਫਸ੍ਸੋ ਪਾਤੁਭਵਤਿ? ਮਨੋਵਿਞ੍ਞਾਣਧਾਤੁਸਮ੍ਫਸ੍ਸੋ – ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਸਬ੍ਬੇਸਂ ਅਯਂ ਏਕੋ ਫਸ੍ਸੋ ਪਾਤੁਭਵਤਿ.
ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਸਬ੍ਬੇਸਂ ਕਤਮਾ ਏਕਾ ਵੇਦਨਾ … ਏਕਾ ਸਞ੍ਞਾ… ਏਕਾ ਚੇਤਨਾ… ਏਕਂ ਚਿਤ੍ਤਂ ਪਾਤੁਭਵਤਿ? ਮਨੋਵਿਞ੍ਞਾਣਧਾਤੁ – ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਸਬ੍ਬੇਸਂ ਇਦਂ ਏਕਂ ਚਿਤ੍ਤਂ ਪਾਤੁਭਵਤਿ.
੨. ਰੂਪਧਾਤੁ
੧੦੧੫. ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਿ ਖਨ੍ਧਾ ਪਾਤੁਭਵਨ੍ਤਿ…ਪੇ… ਕਤਿ ਚਿਤ੍ਤਾਨਿ ਪਾਤੁਭਵਨ੍ਤਿ?
ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ, ਠਪੇਤ੍ਵਾ ਅਸਞ੍ਞਸਤ੍ਤਾਨਂ ਦੇਵਾਨਂ, ਪਞ੍ਚਕ੍ਖਨ੍ਧਾ ਪਾਤੁਭਵਨ੍ਤਿ, ਪਞ੍ਚਾਯਤਨਾਨਿ ਪਾਤੁਭਵਨ੍ਤਿ, ਪਞ੍ਚ ਧਾਤੁਯੋ ਪਾਤੁਭਵਨ੍ਤਿ, ਏਕਂ ਸਚ੍ਚਂ ਪਾਤੁਭਵਤਿ, ਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ, ਤਯੋ ਹੇਤੂ ਪਾਤੁਭਵਨ੍ਤਿ, ਤਯੋ ਆਹਾਰਾ ਪਾਤੁਭਵਨ੍ਤਿ, ਏਕੋ ਫਸ੍ਸੋ ਪਾਤੁਭਵਤਿ, ਏਕਾ ਵੇਦਨਾ… ਏਕਾ ਸਞ੍ਞਾ… ਏਕਾ ਚੇਤਨਾ… ਏਕਂ ਚਿਤ੍ਤਂ ਪਾਤੁਭਵਤਿ.
੧੦੧੬. ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮੇ ਪਞ੍ਚਕ੍ਖਨ੍ਧਾ ਪਾਤੁਭਵਨ੍ਤਿ? ਰੂਪਕ੍ਖਨ੍ਧੋ, ਵੇਦਨਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ, ਵਿਞ੍ਞਾਣਕ੍ਖਨ੍ਧੋ – ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਮੇ ਪਞ੍ਚਕ੍ਖਨ੍ਧਾ ਪਾਤੁਭਵਨ੍ਤਿ.
ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮਾਨਿ ਪਞ੍ਚਾਯਤਨਾਨਿ ਪਾਤੁਭਵਨ੍ਤਿ? ਚਕ੍ਖਾਯਤਨਂ, ਰੂਪਾਯਤਨਂ, ਸੋਤਾਯਤਨਂ, ਮਨਾਯਤਨਂ, ਧਮ੍ਮਾਯਤਨਂ – ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਮਾਨਿ ਪਞ੍ਚਾਯਤਨਾਨਿ ਪਾਤੁਭਵਨ੍ਤਿ.
ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮਾ ਪਞ੍ਚ ਧਾਤੁਯੋ ਪਾਤੁਭਵਨ੍ਤਿ? ਚਕ੍ਖੁਧਾਤੁ, ਰੂਪਧਾਤੁ, ਸੋਤਧਾਤੁ, ਮਨੋਵਿਞ੍ਞਾਣਧਾਤੁ, ਧਮ੍ਮਧਾਤੁ – ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਮਾ ਪਞ੍ਚ ਧਾਤੁਯੋ ਪਾਤੁਭਵਨ੍ਤਿ.
ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮਂ ਏਕਂ ਸਚ੍ਚਂ ਪਾਤੁਭਵਤਿ? ਦੁਕ੍ਖਸਚ੍ਚਂ – ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਦਂ ਏਕਂ ਸਚ੍ਚਂ ਪਾਤੁਭਵਤਿ.
ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮਾਨਿ ਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਚਕ੍ਖੁਨ੍ਦ੍ਰਿਯਂ, ਸੋਤਿਨ੍ਦ੍ਰਿਯਂ, ਮਨਿਨ੍ਦ੍ਰਿਯਂ, ਜੀਵਿਤਿਨ੍ਦ੍ਰਿਯਂ, ਸੋਮਨਸ੍ਸਿਨ੍ਦ੍ਰਿਯਂ ਵਾ ਉਪੇਕ੍ਖਿਨ੍ਦ੍ਰਿਯਂ ਵਾ, ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ, ਪਞ੍ਞਿਨ੍ਦ੍ਰਿਯਂ – ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਮਾਨਿ ਦਸਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮੇ ਤਯੋ ਹੇਤੂ ਪਾਤੁਭਵਨ੍ਤਿ? ਅਲੋਭੋ ਵਿਪਾਕਹੇਤੁ, ਅਦੋਸੋ ਵਿਪਾਕਹੇਤੁ, ਅਮੋਹੋ ਵਿਪਾਕਹੇਤੁ – ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਮੇ ਤਯੋ ਹੇਤੂ ਪਾਤੁਭਵਨ੍ਤਿ.
ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮੇ ਤਯੋ ਆਹਾਰਾ ਪਾਤੁਭਵਨ੍ਤਿ? ਫਸ੍ਸਾਹਾਰੋ, ਮਨੋਸਞ੍ਚੇਤਨਾਹਾਰੋ, ਵਿਞ੍ਞਾਣਾਹਾਰੋ – ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਮੇ ਤਯੋ ਆਹਾਰਾ ਪਾਤੁਭਵਨ੍ਤਿ.
ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮੋ ਏਕੋ ਫਸ੍ਸੋ ਪਾਤੁਭਵਤਿ? ਮਨੋਵਿਞ੍ਞਾਣਧਾਤੁਸਮ੍ਫਸ੍ਸੋ – ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਅਯਂ ਏਕੋ ਫਸ੍ਸੋ ਪਾਤੁਭਵਤਿ.
ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮਾ ਏਕਾ ਵੇਦਨਾ… ਏਕਾ ਸਞ੍ਞਾ… ਏਕਾ ਚੇਤਨਾ… ਏਕਂ ਚਿਤ੍ਤਂ ਪਾਤੁਭਵਤਿ? ਮਨੋਵਿਞ੍ਞਾਣਧਾਤੁ – ਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਦਂ ਏਕਂ ਚਿਤ੍ਤਂ ਪਾਤੁਭਵਤਿ.
੩. ਅਸਞ੍ਞਸਤ੍ਤਾ
੧੦੧੭. ਅਸਞ੍ਞਸਤ੍ਤਾਨਂ ਦੇਵਾਨਂ ਉਪਪਤ੍ਤਿਕ੍ਖਣੇ ਕਤਿ ਖਨ੍ਧਾ ਪਾਤੁਭਵਨ੍ਤਿ…ਪੇ… ਕਤਿ ਚਿਤ੍ਤਾਨਿ ਪਾਤੁਭਵਨ੍ਤਿ?
ਅਸਞ੍ਞਸਤ੍ਤਾਨਂ ਦੇਵਾਨਂ ਉਪਪਤ੍ਤਿਕ੍ਖਣੇ ਏਕੋ ਖਨ੍ਧੋ ਪਾਤੁਭਵਤਿ – ਰੂਪਕ੍ਖਨ੍ਧੋ; ਦ੍ਵੇ ਆਯਤਨਾਨਿ ਪਾਤੁਭਵਨ੍ਤਿ – ਰੂਪਾਯਤਨਂ, ਧਮ੍ਮਾਯਤਨਂ; ਦ੍ਵੇ ਧਾਤੁਯੋ ਪਾਤੁਭਵਨ੍ਤਿ – ਰੂਪਧਾਤੁ, ਧਮ੍ਮਧਾਤੁ; ਏਕਂ ਸਚ੍ਚਂ ਪਾਤੁਭਵਤਿ – ਦੁਕ੍ਖਸਚ੍ਚਂ; ਏਕਿਨ੍ਦ੍ਰਿਯਂ ਪਾਤੁਭਵਤਿ – ਰੂਪਜੀਵਿਤਿਨ੍ਦ੍ਰਿਯਂ. ਅਸਞ੍ਞਸਤ੍ਤਾ ਦੇਵਾ ਅਹੇਤੁਕਾ ਅਨਾਹਾਰਾ ਅਫਸ੍ਸਕਾ ਅਵੇਦਨਕਾ ਅਸਞ੍ਞਕਾ ਅਚੇਤਨਕਾ ਅਚਿਤ੍ਤਕਾ ਪਾਤੁਭਵਨ੍ਤਿ.
੪. ਅਰੂਪਧਾਤੁ
੧੦੧੮. ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਿ ਖਨ੍ਧਾ ਪਾਤੁਭਵਨ੍ਤਿ…ਪੇ… ਕਤਿ ਚਿਤ੍ਤਾਨਿ ਪਾਤੁਭਵਨ੍ਤਿ?
ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਚਤ੍ਤਾਰੋ ਖਨ੍ਧਾ ਪਾਤੁਭਵਨ੍ਤਿ, ਦ੍ਵੇ ਆਯਤਨਾਨਿ ਪਾਤੁਭਵਨ੍ਤਿ, ਦ੍ਵੇ ਧਾਤੁਯੋ ਪਾਤੁਭਵਨ੍ਤਿ, ਏਕਂ ਸਚ੍ਚਂ ਪਾਤੁਭਵਤਿ, ਅਟ੍ਠਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ, ਤਯੋ ਹੇਤੂ ਪਾਤੁਭਵਨ੍ਤਿ, ਤਯੋ ਆਹਾਰਾ ਪਾਤੁਭਵਨ੍ਤਿ, ਏਕੋ ਫਸ੍ਸੋ ਪਾਤੁਭਵਤਿ, ਏਕਾ ਵੇਦਨਾ… ਏਕਾ ਸਞ੍ਞਾ… ਏਕਾ ਚੇਤਨਾ… ਏਕਂ ਚਿਤ੍ਤਂ ਪਾਤੁਭਵਤਿ.
੧੦੧੯. ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮੇ ਚਤ੍ਤਾਰੋ ਖਨ੍ਧਾ ਪਾਤੁਭਵਨ੍ਤਿ? ਵੇਦਨਾਕ੍ਖਨ੍ਧੋ, ਸਞ੍ਞਾਕ੍ਖਨ੍ਧੋ, ਸਙ੍ਖਾਰਕ੍ਖਨ੍ਧੋ, ਵਿਞ੍ਞਾਣਕ੍ਖਨ੍ਧੋ – ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਮੇ ਚਤ੍ਤਾਰੋ ਖਨ੍ਧਾ ਪਾਤੁਭਵਨ੍ਤਿ.
ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮਾਨਿ ਦ੍ਵੇ ਆਯਤਨਾਨਿ ਪਾਤੁਭਵਨ੍ਤਿ? ਮਨਾਯਤਨਂ, ਧਮ੍ਮਾਯਤਨਂ – ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਮਾਨਿ ਦ੍ਵੇ ਆਯਤਨਾਨਿ ਪਾਤੁਭਵਨ੍ਤਿ.
ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮਾ ਦ੍ਵੇ ਧਾਤੁਯੋ ਪਾਤੁਭਵਨ੍ਤਿ? ਮਨੋਵਿਞ੍ਞਾਣਧਾਤੁ, ਧਮ੍ਮਧਾਤੁ – ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਮਾ ਦ੍ਵੇ ਧਾਤੁਯੋ ਪਾਤੁਭਵਨ੍ਤਿ.
ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮਂ ਏਕਂ ਸਚ੍ਚਂ ਪਾਤੁਭਵਤਿ? ਦੁਕ੍ਖਸਚ੍ਚਂ – ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਦਂ ਏਕਂ ਸਚ੍ਚਂ ਪਾਤੁਭਵਤਿ.
ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮਾਨਿ ਅਟ੍ਠਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ? ਮਨਿਨ੍ਦ੍ਰਿਯਂ, ਜੀਵਿਤਿਨ੍ਦ੍ਰਿਯਂ, ਉਪੇਕ੍ਖਿਨ੍ਦ੍ਰਿਯਂ, ਸਦ੍ਧਿਨ੍ਦ੍ਰਿਯਂ, ਵੀਰਿਯਿਨ੍ਦ੍ਰਿਯਂ, ਸਤਿਨ੍ਦ੍ਰਿਯਂ, ਸਮਾਧਿਨ੍ਦ੍ਰਿਯਂ, ਪਞ੍ਞਿਨ੍ਦ੍ਰਿਯਂ – ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਮਾਨਿ ਅਟ੍ਠਿਨ੍ਦ੍ਰਿਯਾਨਿ ਪਾਤੁਭਵਨ੍ਤਿ.
ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮੇ ਤਯੋ ਹੇਤੂ ਪਾਤੁਭਵਨ੍ਤਿ? ਅਲੋਭੋ ਵਿਪਾਕਹੇਤੁ, ਅਦੋਸੋ ਵਿਪਾਕਹੇਤੁ, ਅਮੋਹੋ ਵਿਪਾਕਹੇਤੁ – ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਮੇ ਤਯੋ ਹੇਤੂ ਪਾਤੁਭਵਨ੍ਤਿ.
ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮੇ ਤਯੋ ਆਹਾਰਾ ਪਾਤੁਭਵਨ੍ਤਿ? ਫਸ੍ਸਾਹਾਰੋ, ਮਨੋਸਞ੍ਚੇਤਨਾਹਾਰੋ, ਵਿਞ੍ਞਾਣਾਹਾਰੋ – ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਮੇ ਤਯੋ ਆਹਾਰਾ ਪਾਤੁਭਵਨ੍ਤਿ.
ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮੋ ਏਕੋ ਫਸ੍ਸੋ ਪਾਤੁਭਵਤਿ? ਮਨੋਵਿਞ੍ਞਾਣਧਾਤੁਸਮ੍ਫਸ੍ਸੋ – ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਅਯਂ ਏਕੋ ਫਸ੍ਸੋ ਪਾਤੁਭਵਤਿ.
ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਕਤਮਾ ਏਕਾ ਵੇਦਨਾ…ਪੇ… ਏਕਾ ਸਞ੍ਞਾ… ਏਕਾ ਚੇਤਨਾ… ਏਕਂ ਚਿਤ੍ਤਂ ਪਾਤੁਭਵਤਿ? ਮਨੋਵਿਞ੍ਞਾਣਧਾਤੁ – ਅਰੂਪਧਾਤੁਯਾ ਉਪਪਤ੍ਤਿਕ੍ਖਣੇ ਇਦਂ ਏਕਂ ਚਿਤ੍ਤਂ ਪਾਤੁਭਵਤਿ.