੧. ਕੁਸਲਤ੍ਤਿਕਂ

੧੦੩੮. ਪਞ੍ਚਨ੍ਨਂ ਖਨ੍ਧਾਨਂ ਕਤਿ ਕੁਸਲਾ, ਕਤਿ ਅਕੁਸਲਾ, ਕਤਿ ਅਬ੍ਯਾਕਤਾ…ਪੇ… ਸਤ੍ਤਨ੍ਨਂ ਚਿਤ੍ਤਾਨਂ ਕਤਿ ਕੁਸਲਾ, ਕਤਿ ਅਕੁਸਲਾ, ਕਤਿ ਅਬ੍ਯਾਕਤਾ?

ਰੂਪਕ੍ਖਨ੍ਧੋ ਅਬ੍ਯਾਕਤੋ. ਚਤ੍ਤਾਰੋ ਖਨ੍ਧਾ ਸਿਯਾ ਕੁਸਲਾ, ਸਿਯਾ ਅਕੁਸਲਾ, ਸਿਯਾ ਅਬ੍ਯਾਕਤਾ. ਦਸਾਯਤਨਾ ਅਬ੍ਯਾਕਤਾ. ਦ੍ਵਾਯਤਨਾ ਸਿਯਾ ਕੁਸਲਾ, ਸਿਯਾ ਅਕੁਸਲਾ, ਸਿਯਾ ਅਬ੍ਯਾਕਤਾ. ਸੋਲ਼ਸ ਧਾਤੁਯੋ ਅਬ੍ਯਾਕਤਾ. ਦ੍ਵੇ ਧਾਤੁਯੋ ਸਿਯਾ ਕੁਸਲਾ, ਸਿਯਾ ਅਕੁਸਲਾ, ਸਿਯਾ ਅਬ੍ਯਾਕਤਾ. ਸਮੁਦਯਸਚ੍ਚਂ ਅਕੁਸਲਂ. ਮਗ੍ਗਸਚ੍ਚਂ ਕੁਸਲਂ. ਨਿਰੋਧਸਚ੍ਚਂ ਅਬ੍ਯਾਕਤਂ. ਦੁਕ੍ਖਸਚ੍ਚਂ ਸਿਯਾ ਕੁਸਲਂ, ਸਿਯਾ ਅਕੁਸਲਂ, ਸਿਯਾ ਅਬ੍ਯਾਕਤਂ.

ਦਸਿਨ੍ਦ੍ਰਿਯਾ ਅਬ੍ਯਾਕਤਾ. ਦੋਮਨਸ੍ਸਿਨ੍ਦ੍ਰਿਯਂ ਅਕੁਸਲਂ. ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਂ ਕੁਸਲਂ. ਚਤ੍ਤਾਰਿਨ੍ਦ੍ਰਿਯਾ ਸਿਯਾ ਕੁਸਲਾ, ਸਿਯਾ ਅਬ੍ਯਾਕਤਾ. ਛ ਇਨ੍ਦ੍ਰਿਯਾ ਸਿਯਾ ਕੁਸਲਾ, ਸਿਯਾ ਅਕੁਸਲਾ, ਸਿਯਾ ਅਬ੍ਯਾਕਤਾ.

ਤਯੋ ਕੁਸਲਹੇਤੂ ਕੁਸਲਾ. ਤਯੋ ਅਕੁਸਲਹੇਤੂ ਅਕੁਸਲਾ. ਤਯੋ ਅਬ੍ਯਾਕਤਹੇਤੂ ਅਬ੍ਯਾਕਤਾ. ਕਬਲ਼ੀਕਾਰੋ ਆਹਾਰੋ ਅਬ੍ਯਾਕਤੋ. ਤਯੋ ਆਹਾਰਾ ਸਿਯਾ ਕੁਸਲਾ, ਸਿਯਾ ਅਕੁਸਲਾ, ਸਿਯਾ ਅਬ੍ਯਾਕਤਾ. ਛ ਫਸ੍ਸਾ ਅਬ੍ਯਾਕਤਾ. ਮਨੋਵਿਞ੍ਞਾਣਧਾਤੁਸਮ੍ਫਸ੍ਸੋ ਸਿਯਾ ਕੁਸਲੋ, ਸਿਯਾ ਅਕੁਸਲੋ, ਸਿਯਾ ਅਬ੍ਯਾਕਤੋ. ਛ ਵੇਦਨਾ… ਛ ਸਞ੍ਞਾ… ਛ ਚੇਤਨਾ… ਛ ਚਿਤ੍ਤਾ ਅਬ੍ਯਾਕਤਾ. ਮਨੋਵਿਞ੍ਞਾਣਧਾਤੁ ਸਿਯਾ ਕੁਸਲਾ, ਸਿਯਾ ਅਕੁਸਲਾ, ਸਿਯਾ ਅਬ੍ਯਾਕਤਾ.