੧. ਏਕਕਨਿਦ੍ਦੇਸੋ
(੧) ਜਾਤਿਮਦੋ
੮੪੩. ਤਤ੍ਥ ਕਤਮੋ ਜਾਤਿਮਦੋ? ਜਾਤਿਂ ਪਟਿਚ੍ਚ ਮਦੋ ਮਜ੍ਜਨਾ ਮਜ੍ਜਿਤਤ੍ਤਂ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ [ਉਣ੍ਣਤਿ ਉਣ੍ਣਾਮੋ (ਸ੍ਯਾ. ਕ.) ਧ. ਸ. ੧੧੨੧] ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਜਾਤਿਮਦੋ’’.
(੨-੨੭) ਗੋਤ੍ਤਮਦਾਦੀ
੮੪੪. ਤਤ੍ਥ ਕਤਮੋ ਗੋਤ੍ਤਮਦੋ? ਗੋਤ੍ਤਂ ਪਟਿਚ੍ਚ…ਪੇ… ਆਰੋਗ੍ਯਂ ਪਟਿਚ੍ਚ…ਪੇ… ਯੋਬ੍ਬਨਂ ਪਟਿਚ੍ਚ…ਪੇ… ਜੀਵਿਤਂ ਪਟਿਚ੍ਚ…ਪੇ… ਲਾਭਂ ਪਟਿਚ੍ਚ…ਪੇ… ਸਕ੍ਕਾਰਂ ਪਟਿਚ੍ਚ…ਪੇ… ਗਰੁਕਾਰਂ ਪਟਿਚ੍ਚ…ਪੇ… ਪੁਰੇਕ੍ਖਾਰਂ ਪਟਿਚ੍ਚ…ਪੇ… ਪਰਿਵਾਰਂ ਪਟਿਚ੍ਚ…ਪੇ… ਭੋਗਂ ਪਟਿਚ੍ਚ…ਪੇ… ਵਣ੍ਣਂ ਪਟਿਚ੍ਚ…ਪੇ… ਸੁਤਂ ਪਟਿਚ੍ਚ…ਪੇ… ਪਟਿਭਾਨਂ ਪਟਿਚ੍ਚ…ਪੇ… ਰਤ੍ਤਞ੍ਞੁਤਂ ਪਟਿਚ੍ਚ…ਪੇ… ਪਿਣ੍ਡਪਾਤਿਕਤ੍ਤਂ ਪਟਿਚ੍ਚ…ਪੇ… ਅਨਵਞ੍ਞਾਤਂ ਪਟਿਚ੍ਚ…ਪੇ… ਇਰਿਯਾਪਥਂ ਪਟਿਚ੍ਚ…ਪੇ… ਇਦ੍ਧਿਂ ਪਟਿਚ੍ਚ…ਪੇ… ਯਸਂ ਪਟਿਚ੍ਚ…ਪੇ… ਸੀਲਂ ਪਟਿਚ੍ਚ…ਪੇ… ਝਾਨਂ ਪਟਿਚ੍ਚ…ਪੇ… ਸਿਪ੍ਪਂ ਪਟਿਚ੍ਚ…ਪੇ… ਆਰੋਹਂ ਪਟਿਚ੍ਚ…ਪੇ… ਪਰਿਣਾਹਂ ਪਟਿਚ੍ਚ…ਪੇ… ਸਣ੍ਠਾਨਂ ਪਟਿਚ੍ਚ…ਪੇ… ਪਾਰਿਪੂਰਿਂ ਪਟਿਚ੍ਚ ਮਦੋ ਮਜ੍ਜਨਾ ਮਜ੍ਜਿਤਤ੍ਤਂ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਪਾਰਿਪੂਰਿਮਦੋ’’.
(੨੮) ਮਦੋ
੮੪੫. ਤਤ੍ਥ ਕਤਮੋ ਮਦੋ? ਯੋ ਮਦੋ ਮਜ੍ਜਨਾ ਮਜ੍ਜਿਤਤ੍ਤਂ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਮਦੋ’’.
(੨੯) ਪਮਾਦੋ
੮੪੬. ਤਤ੍ਥ ਕਤਮੋ ਪਮਾਦੋ? ਕਾਯਦੁਚ੍ਚਰਿਤੇ ਵਾ ਵਚੀਦੁਚ੍ਚਰਿਤੇ ਵਾ ਮਨੋਦੁਚ੍ਚਰਿਤੇ ਵਾ ਪਞ੍ਚਸੁ ਵਾ ਕਾਮਗੁਣੇਸੁ ਚਿਤ੍ਤਸ੍ਸ ਵੋਸ੍ਸਗ੍ਗੋ ਵੋਸ੍ਸਗ੍ਗਾਨੁਪ੍ਪਦਾਨਂ ਕੁਸਲਾਨਂ ਵਾ ਧਮ੍ਮਾਨਂ ਭਾਵਨਾਯ ਅਸਕ੍ਕਚ੍ਚਕਿਰਿਯਤਾ ਅਸਾਤਚ੍ਚਕਿਰਿਯਤਾ ਅਨਟ੍ਠਿਤਕਿਰਿਯਤਾ ਓਲੀਨਵੁਤ੍ਤਿਤਾ ਨਿਕ੍ਖਿਤ੍ਤਛਨ੍ਦਤਾ ਨਿਕ੍ਖਿਤ੍ਤਧੁਰਤਾ ਅਨਾਸੇਵਨਾ ਅਭਾਵਨਾ ਅਬਹੁਲੀਕਮ੍ਮਂ ਅਨਧਿਟ੍ਠਾਨਂ ਅਨਨੁਯੋਗੋ ਪਮਾਦੋ, ਯੋ ਏਵਰੂਪੋ ਪਮਾਦੋ ਪਮਜ੍ਜਨਾ ਪਮਜ੍ਜਿਤਤ੍ਤਂ – ਅਯਂ ਵੁਚ੍ਚਤਿ ‘‘ਪਮਾਦੋ’’.
(੩੦) ਥਮ੍ਭੋ
੮੪੭. ਤਤ੍ਥ ਕਤਮੋ ਥਮ੍ਭੋ? ਯੋ ਥਮ੍ਭੋ ਥਮ੍ਭਨਾ ਥਮ੍ਭਿਤਤ੍ਤਂ ਕਕ੍ਖਲ਼ਿਯਂ ਫਾਰੁਸਿਯਂ ਉਜੁਚਿਤ੍ਤਤਾ ਅਮੁਦੁਤਾ – ਅਯਂ ਵੁਚ੍ਚਤਿ ‘‘ਥਮ੍ਭੋ’’.
(੩੧) ਸਾਰਮ੍ਭੋ
੮੪੮. ਤਤ੍ਥ ਕਤਮੋ ਸਾਰਮ੍ਭੋ? ਯੋ ਸਾਰਮ੍ਭੋ ਪਟਿਸਾਰਮ੍ਭੋ ਸਾਰਮ੍ਭਨਾ ਪਟਿਸਾਰਮ੍ਭਨਾ ਪਟਿਸਾਰਮ੍ਭਿਤਤ੍ਤਂ – ਅਯਂ ਵੁਚ੍ਚਤਿ ‘‘ਸਾਰਮ੍ਭੋ’’.
(੩੨) ਅਤ੍ਰਿਚ੍ਛਤਾ
੮੪੯. ਤਤ੍ਥ ਕਤਮਾ ਅਤ੍ਰਿਚ੍ਛਤਾ? ਇਤਰੀਤਰਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰੇਹਿ ਪਞ੍ਚਹਿ ਵਾ ਕਾਮਗੁਣੇਹਿ ਅਸਨ੍ਤੁਟ੍ਠਸ੍ਸ ਭਿਯ੍ਯੋਕਮ੍ਯਤਾ, ਯਾ ਏਵਰੂਪਾ ਇਚ੍ਛਾ ਇਚ੍ਛਾਗਤਾ ਅਤ੍ਰਿਚ੍ਛਤਾ ਰਾਗੋ ਸਾਰਾਗੋ ਚਿਤ੍ਤਸ੍ਸ ਸਾਰਾਗੋ – ਅਯਂ ਵੁਚ੍ਚਤਿ ‘‘ਅਤ੍ਰਿਚ੍ਛਤਾ’’.
(੩੩) ਮਹਿਚ੍ਛਤਾ
੮੫੦. ਤਤ੍ਥ ਕਤਮਾ ਮਹਿਚ੍ਛਤਾ? ਇਤਰੀਤਰਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰੇਹਿ ਪਞ੍ਚਹਿ ਵਾ ਕਾਮਗੁਣੇਹਿ ਅਸਨ੍ਤੁਟ੍ਠਸ੍ਸ ਭਿਯ੍ਯੋਕਮ੍ਯਤਾ, ਯਾ ਏਵਰੂਪਾ ਇਚ੍ਛਾ ਇਚ੍ਛਾਗਤਾ ਮਹਿਚ੍ਛਤਾ ਰਾਗੋ ਸਾਰਾਗੋ ਚਿਤ੍ਤਸ੍ਸ ਸਾਰਾਗੋ – ਅਯਂ ਵੁਚ੍ਚਤਿ ‘‘ਮਹਿਚ੍ਛਤਾ’’.
(੩੪) ਪਾਪਿਚ੍ਛਤਾ
੮੫੧. ਤਤ੍ਥ ਕਤਮਾ ਪਾਪਿਚ੍ਛਤਾ? ਇਧੇਕਚ੍ਚੋ ਅਸ੍ਸਦ੍ਧੋ ਸਮਾਨੋ ‘‘ਸਦ੍ਧੋਤਿ ਮਂ ਜਨੋ ਜਾਨਾਤੂ’’ਤਿ ਇਚ੍ਛਤਿ, ਦੁਸ੍ਸੀਲੋ ਸਮਾਨੋ ‘‘ਸੀਲਵਾਤਿ ਮਂ ਜਨੋ ਜਾਨਾਤੂ’’ਤਿ ਇਚ੍ਛਤਿ, ਅਪ੍ਪਸ੍ਸੁਤੋ ਸਮਾਨੋ ‘‘ਬਹੁਸ੍ਸੁਤੋਤਿ ਮਂ ਜਨੋ ਜਾਨਾਤੂ’’ਤਿ ਇਚ੍ਛਤਿ, ਸਙ੍ਗਣਿਕਾਰਾਮੋ ਸਮਾਨੋ ‘‘ਪਵਿਵਿਤ੍ਤੋਤਿ ਮਂ ਜਨੋ ਜਾਨਾਤੂ’’ਤਿ ਇਚ੍ਛਤਿ, ਕੁਸੀਤੋ ਸਮਾਨੋ ‘‘ਆਰਦ੍ਧਵੀਰਿਯੋਤਿ ਮਂ ਜਨੋ ਜਾਨਾਤੂ’’ਤਿ ਇਚ੍ਛਤਿ, ਮੁਟ੍ਠਸ੍ਸਤੀ ਸਮਾਨੋ ‘‘ਉਪਟ੍ਠਿਤਸ੍ਸਤੀਤਿ ਮਂ ਜਨੋ ਜਾਨਾਤੂ’’ਤਿ ਇਚ੍ਛਤਿ, ਅਸਮਾਹਿਤੋ ਸਮਾਨੋ ‘‘ਸਮਾਹਿਤੋਤਿ ਮਂ ਜਨੋ ਜਾਨਾਤੂ’’ਤਿ ਇਚ੍ਛਤਿ, ਦੁਪ੍ਪਞ੍ਞੋ ਸਮਾਨੋ ‘‘ਪਞ੍ਞਵਾਤਿ ਮਂ ਜਨੋ ਜਾਨਾਤੂ’’ਤਿ ਇਚ੍ਛਤਿ, ਅਖੀਣਾਸਵੋ ਸਮਾਨੋ ‘‘ਖੀਣਾਸਵੋਤਿ ਮਂ ਜਨੋ ਜਾਨਾਤੂ’’ਤਿ ਇਚ੍ਛਤਿ – ਯਾ ਏਵਰੂਪਾ ਇਚ੍ਛਾ ਇਚ੍ਛਾਗਤਾ ਪਾਪਿਚ੍ਛਤਾ ਰਾਗੋ ਸਾਰਾਗੋ ਚਿਤ੍ਤਸ੍ਸ ਸਾਰਾਗੋ – ਅਯਂ ਵੁਚ੍ਚਤਿ ‘‘ਪਾਪਿਚ੍ਛਤਾ’’.
(੩੫) ਸਿਙ੍ਗਂ
੮੫੨. ਤਤ੍ਥ ਕਤਮਂ ਸਿਙ੍ਗਂ? ਯਂ ਸਿਙ੍ਗਂ ਸਿਙ੍ਗਾਰਤਾ ਚਾਤੁਰਤਾ ਚਾਤੁਰਿਯਂ ਪਰਿਕ੍ਖਤ੍ਤਤਾ ਪਾਰਿਕ੍ਖਤ੍ਤਿਯਂ – ਇਦਂ ਵੁਚ੍ਚਤਿ ‘‘ਸਿਙ੍ਗਂ’’.
(੩੬) ਤਿਨ੍ਤਿਣਂ
੮੫੩. ਤਤ੍ਥ ਕਤਮਂ ਤਿਨ੍ਤਿਣਂ? ਯਂ ਤਿਨ੍ਤਿਣਂ ਤਿਨ੍ਤਿਣਾਯਨਾ ਤਿਨ੍ਤਿਣਾਯਿਤਤ੍ਤਂ ਲੋਲੁਪ੍ਪਂ ਲੋਲੁਪ੍ਪਾਯਨਾ ਲੋਲੁਪ੍ਪਾਯਿਤਤ੍ਤਂ ਪੁਚ੍ਛਞ੍ਜਿਕਤਾ ਸਾਧੁਕਮ੍ਯਤਾ – ਇਦਂ ਵੁਚ੍ਚਤਿ ‘‘ਤਿਨ੍ਤਿਣਂ’’.
(੩੭) ਚਾਪਲ੍ਯਂ
੮੫੪. ਤਤ੍ਥ ਕਤਮਂ ਚਾਪਲ੍ਯਂ? ਚੀਵਰਮਣ੍ਡਨਾ ਪਤ੍ਤਮਣ੍ਡਨਾ ਸੇਨਾਸਨਮਣ੍ਡਨਾ ਇਮਸ੍ਸ ਵਾ ਪੂਤਿਕਾਯਸ੍ਸ ਬਾਹਿਰਾਨਂ ਵਾ ਪਰਿਕ੍ਖਾਰਾਨਂ ਮਣ੍ਡਨਾ ਵਿਭੂਸਨਾ ਕੇਲ਼ਨਾ ਪਰਿਕੇਲ਼ਨਾ ਗਿਦ੍ਧਿਕਤਾ ਗਿਦ੍ਧਿਕਤ੍ਤਂ ਚਪਲਤਾ ਚਾਪਲ੍ਯਂ – ਇਦਂ ਵੁਚ੍ਚਤਿ ‘‘ਚਾਪਲ੍ਯਂ’’.
(੩੮) ਅਸਭਾਗਵੁਤ੍ਤਿ
੮੫੫. ਤਤ੍ਥ ਕਤਮਂ ਅਸਭਾਗਵੁਤ੍ਤਿ? ਮਾਤਰਿ ਵਾ ਪਿਤਰਿ ਵਾ ਜੇਟ੍ਠੇ ਵਾ ਭਾਤਰਿ ਵਾ ਆਚਰਿਯੇਸੁ ਵਾ ਉਪਜ੍ਝਾਯੇ ਵਾ ਬੁਦ੍ਧੇ ਵਾ ਸਾਵਕੇਸੁ ਵਾ ਅਞ੍ਞਤਰਞ੍ਞਤਰੇਸੁ ਗਰੁਟ੍ਠਾਨਿਯੇਸੁ ਵਿਪ੍ਪਟਿਕੂਲਗ੍ਗਾਹਿਤਾ ਵਿਪਚ੍ਚਨੀਕਸਾਤਤਾ ਅਨਾਦਰਿਯਂ ਅਨਾਦਰਿਯਤਾ ਅਗਾਰਵਤਾ ਅਪ੍ਪਤਿਸ੍ਸਵਤਾ – ਅਯਂ ਵੁਚ੍ਚਤਿ ‘‘ਅਸਭਾਗਵੁਤ੍ਤਿ’’.
(੩੯) ਅਰਤਿ
੮੫੬. ਤਤ੍ਥ ਕਤਮਾ ਅਰਤਿ? ਪਨ੍ਤੇਸੁ ਵਾ ਸੇਨਾਸਨੇਸੁ ਅਞ੍ਞਤਰਞ੍ਞਤਰੇਸੁ ਵਾ ਅਧਿਕੁਸਲੇਸੁ ਧਮ੍ਮੇਸੁ ਅਰਤਿ ਅਰਤਿਤਾ ਅਨਭਿਰਤਿ ਅਨਭਿਰਮਣਾ ਉਕ੍ਕਣ੍ਠਿਤਾ ਪਰਿਤਸ੍ਸਿਤਾ – ਅਯਂ ਵੁਚ੍ਚਤਿ ‘‘ਅਰਤਿ’’.
(੪੦) ਤਨ੍ਦੀ
੮੫੭. ਤਤ੍ਥ ਕਤਮਾ ਤਨ੍ਦੀ? ਯਾ ਤਨ੍ਦੀ ਤਨ੍ਦਿਯਨਾ ਤਨ੍ਦਿਮਨਕਤਾ ਆਲਸ੍ਯਂ ਆਲਸ੍ਯਾਯਨਾ ਆਲਸ੍ਯਾਯਿਤਤ੍ਤਂ – ਅਯਂ ਵੁਚ੍ਚਤਿ ‘‘ਤਨ੍ਦੀ’’.
(੪੧) ਵਿਜਮ੍ਭਿਤਾ
੮੫੮. ਤਤ੍ਥ ਕਤਮਾ ਵਿਜਮ੍ਭਿਤਾ? ਯਾ ਕਾਯਸ੍ਸ ਜਮ੍ਭਨਾ ਵਿਜਮ੍ਭਨਾ ਆਨਮਨਾ ਵਿਨਮਨਾ ਸਨ੍ਨਮਨਾ ਪਣਮਨਾ ਬ੍ਯਾਧਿਯਕਂ – ਅਯਂ ਵੁਚ੍ਚਤਿ ‘‘ਵਿਜਮ੍ਭਿਤਾ’’.
(੪੨) ਭਤ੍ਤਸਮ੍ਮਦੋ
੮੫੯. ਤਤ੍ਥ ਕਤਮੋ ਭਤ੍ਤਸਮ੍ਮਦੋ? ਯਾ ਭੁਤ੍ਤਾਵਿਸ੍ਸ ਭਤ੍ਤਮੁਚ੍ਛਾ ਭਤ੍ਤਕਿਲਮਥੋ ਭਤ੍ਤਪਰਿਲ਼ਾਹੋ ਕਾਯਦੁਟ੍ਠੁਲ੍ਲਂ – ਅਯਂ ਵੁਚ੍ਚਤਿ ‘‘ਭਤ੍ਤਸਮ੍ਮਦੋ’’.
(੪੩) ਚੇਤਸੋ ਚ ਲੀਨਤ੍ਤਂ
੮੬੦. ਤਤ੍ਥ ਕਤਮਂ ਚੇਤਸੋ ਚ ਲੀਨਤ੍ਤਂ? ਯਾ ਚਿਤ੍ਤਸ੍ਸ ਅਕਲ੍ਯਤਾ ਅਕਮ੍ਮਞ੍ਞਤਾ ਓਲੀਯਨਾ ਸਲ੍ਲੀਯਨਾ ਲੀਨਂ ਲੀਯਨਾ ਲੀਯਿਤਤ੍ਤਂ ਥਿਨਂ ਥੀਯਨਾ ਥੀਯਿਤਤ੍ਤਂ ਚਿਤ੍ਤਸ੍ਸ – ਇਦਂ ਵੁਚ੍ਚਤਿ ‘‘ਚੇਤਸੋ ਚ ਲੀਨਤ੍ਤਂ’’.
(੪੪) ਕੁਹਨਾ
੮੬੧. ਤਤ੍ਥ ਕਤਮਾ ਕੁਹਨਾ? ਲਾਭਸਕ੍ਕਾਰਸਿਲੋਕਸਨ੍ਨਿਸ੍ਸਿਤਸ੍ਸ ਪਾਪਿਚ੍ਛਸ੍ਸ ਇਚ੍ਛਾਪਕਤਸ੍ਸ ਪਚ੍ਚਯਪਟਿਸੇਵਨਸਙ੍ਖਾਤੇਨ [ਪਚ੍ਚਯਪਟਿਸੇਧਨਸਙ੍ਖਾਤੇਨ (ਸੀ.)] ਵਾ ਸਾਮਨ੍ਤਜਪ੍ਪਿਤੇਨ ਵਾ ਇਰਿਯਾਪਥਸ੍ਸ ਵਾ ਅਠਪਨਾ [ਆਠਪਨਾ (ਕ.)] ਠਪਨਾ ਸਣ੍ਠਪਨਾ ਭਾਕੁਟਿਤਾ ਭਾਕੁਟਿਯਂ ਕੁਹਨਾ ਕੁਹਾਯਨਾ ਕੁਹਿਤਤ੍ਤਂ – ਅਯਂ ਵੁਚ੍ਚਤਿ ‘‘ਕੁਹਨਾ’’.
(੪੫) ਲਪਨਾ
੮੬੨. ਤਤ੍ਥ ਕਤਮਾ ਲਪਨਾ? ਲਾਭਸਕ੍ਕਾਰਸਿਲੋਕਸਨ੍ਨਿਸ੍ਸਿਤਸ੍ਸ ਪਾਪਿਚ੍ਛਸ੍ਸ ਇਚ੍ਛਾਪਕਤਸ੍ਸ ਯਾ ਪਰੇਸਂ ਆਲਪਨਾ ਲਪਨਾ ਸਲ੍ਲਪਨਾ ਉਲ੍ਲਪਨਾ ਸਮੁਲ੍ਲਪਨਾ ਉਨ੍ਨਹਨਾ ਸਮੁਨ੍ਨਹਨਾ ਉਕ੍ਕਾਚਨਾ ਸਮੁਕ੍ਕਾਚਨਾ ਅਨੁਪ੍ਪਿਯਭਾਣਿਤਾ ਚਾਟੁਕਮ੍ਯਤਾ ਮੁਗ੍ਗਸੂਪ੍ਯਤਾ ਪਾਰਿਭਟਯਤਾ – ਅਯਂ ਵੁਚ੍ਚਤਿ ‘‘ਲਪਨਾ’’.
(੪੬) ਨੇਮਿਤ੍ਤਿਕਤਾ
੮੬੩. ਤਤ੍ਥ ਕਤਮਾ ਨੇਮਿਤ੍ਤਿਕਤਾ? ਲਾਭਸਕ੍ਕਾਰਸਿਲੋਕਸਨ੍ਨਿਸ੍ਸਿਤਸ੍ਸ ਪਾਪਿਚ੍ਛਸ੍ਸ ਇਚ੍ਛਾਪਕਤਸ੍ਸ ਯਂ ਪਰੇਸਂ ਨਿਮਿਤ੍ਤਂ ਨਿਮਿਤ੍ਤਕਮ੍ਮਂ ਓਭਾਸੋ ਓਭਾਸਕਮ੍ਮਂ ਸਾਮਨ੍ਤਜਪ੍ਪਾ ਪਰਿਕਥਾ – ਅਯਂ ਵੁਚ੍ਚਤਿ ‘‘ਨੇਮਿਤ੍ਤਿਕਤਾ’’.
(੪੭) ਨਿਪ੍ਪੇਸਿਕਤਾ
੮੬੪. ਤਤ੍ਥ ਕਤਮਾ ਨਿਪ੍ਪੇਸਿਕਤਾ? ਲਾਭਸਕ੍ਕਾਰਸਿਲੋਕਸਨ੍ਨਿਸ੍ਸਿਤਸ੍ਸ ਪਾਪਿਚ੍ਛਸ੍ਸ ਇਚ੍ਛਾਪਕਤਸ੍ਸ ਯਾ ਪਰੇਸਂ ਅਕ੍ਕੋਸਨਾ ਵਮ੍ਭਨਾ ਗਰਹਣਾ ਉਕ੍ਖੇਪਨਾ ਸਮੁਕ੍ਖੇਪਨਾ ਖਿਪਨਾ ਸਙ੍ਖਿਪਨਾ ਪਾਪਨਾ ਸਮ੍ਪਾਪਨਾ ਅਵਣ੍ਣਹਾਰਿਕਾ ਪਰਪਿਟ੍ਠਿਮਂਸਿਕਤਾ – ਅਯਂ ਵੁਚ੍ਚਤਿ ‘‘ਨਿਪ੍ਪੇਸਿਕਤਾ’’.
(੪੮) ਲਾਭੇਨ ਲਾਭਂ ਨਿਜਿਗੀਸਨਤਾ
੮੬੫. ਤਤ੍ਥ ਕਤਮਾ ਲਾਭੇਨ ਲਾਭਂ ਨਿਜਿਗੀਸਨਤਾ? ਲਾਭਸਕ੍ਕਾਰਸਿਲੋਕਸਨ੍ਨਿਸ੍ਸਿਤੋ ਪਾਪਿਚ੍ਛੋ ਇਚ੍ਛਾਪਕਤੋ ਇਤੋ ਲਦ੍ਧਂ ਆਮਿਸਂ ਅਮੁਤ੍ਰ ਹਰਤਿ ਅਮੁਤ੍ਰ ਵਾ ਲਦ੍ਧਂ ਆਮਿਸਂ ਇਧ ਆਹਰਤਿ, ਯਾ ਏਵਰੂਪਾ ਆਮਿਸਸ੍ਸ ਏਟ੍ਠਿ ਗਵੇਟ੍ਠਿ ਪਰਿਯੇਟ੍ਠਿ ਏਸਨਾ ਗਵੇਸਨਾ ਪਰਿਯੇਸਨਾ – ਅਯਂ ਵੁਚ੍ਚਤਿ ‘‘ਲਾਭੇਨ ਲਾਭਂ ਨਿਜਿਗੀਸਨਤਾ’’.
(੪੯) ਸੇਯ੍ਯੋਹਮਸ੍ਮੀਤਿ ਮਾਨੋ
੮੬੬. ਤਤ੍ਥ ਕਤਮੋ ਸੇਯ੍ਯੋਹਮਸ੍ਮੀਤਿ ਮਾਨੋ? ਇਧੇਕਚ੍ਚੋ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ ਵਣ੍ਣਪੋਕ੍ਖਰਤਾਯ ਵਾ ਧਨੇਨ ਵਾ ਅਜ੍ਝੇਨੇਨ ਵਾ ਕਮ੍ਮਾਯਤਨੇਨ ਵਾ ਸਿਪ੍ਪਾਯਤਨੇਨ ਵਾ ਵਿਜ੍ਜਾਟ੍ਠਾਨੇਨ [ਵਿਜ੍ਜਟ੍ਠਾਨੇਨ (ਸ੍ਯਾ.)] ਵਾ ਸੁਤੇਨ ਵਾ ਪਟਿਭਾਨੇਨ ਵਾ ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਮਾਨਂ ਜਪ੍ਪੇਤਿ, ਯੋ ਏਵਰੂਪੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਸੇਯ੍ਯੋਹਮਸ੍ਮੀਤਿ ਮਾਨੋ’’.
(੫੦) ਸਦਿਸੋਹਮਸ੍ਮੀਤਿ ਮਾਨੋ
੮੬੭. ਤਤ੍ਥ ਕਤਮੋ ਸਦਿਸੋਹਮਸ੍ਮੀਤਿ ਮਾਨੋ? ਇਧੇਕਚ੍ਚੋ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ ਵਣ੍ਣਪੋਕ੍ਖਰਤਾਯ ਵਾ ਧਨੇਨ ਵਾ ਅਜ੍ਝੇਨੇਨ ਵਾ ਕਮ੍ਮਾਯਤਨੇਨ ਵਾ ਸਿਪ੍ਪਾਯਤਨੇਨ ਵਾ ਵਿਜ੍ਜਾਟ੍ਠਾਨੇਨ ਵਾ ਸੁਤੇਨ ਵਾ ਪਟਿਭਾਨੇਨ ਵਾ ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਮਾਨਂ ਜਪ੍ਪੇਤਿ, ਯੋ ਏਵਰੂਪੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਸਦਿਸੋਹਮਸ੍ਮੀਤਿ ਮਾਨੋ’’.
(੫੧) ਹੀਨੋਹਮਸ੍ਮੀਤਿ ਮਾਨੋ
੮੬੮. ਤਤ੍ਥ ਕਤਮੋ ਹੀਨੋਹਮਸ੍ਮੀਤਿ ਮਾਨੋ? ਇਧੇਕਚ੍ਚੋ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ ਵਣ੍ਣਪੋਕ੍ਖਰਤਾਯ ਵਾ ਧਨੇਨ ਵਾ ਅਜ੍ਝੇਨੇਨ ਵਾ ਕਮ੍ਮਾਯਤਨੇਨ ਵਾ ਸਿਪ੍ਪਾਯਤਨੇਨ ਵਾ ਵਿਜ੍ਜਾਟ੍ਠਾਨੇਨ ਵਾ ਸੁਤੇਨ ਵਾ ਪਟਿਭਾਨੇਨ ਵਾ ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਓਮਾਨਂ ਜਪ੍ਪੇਤਿ, ਯੋ ਏਵਰੂਪੋ ਓਮਾਨੋ ਓਮਞ੍ਞਨਾ ਓਮਞ੍ਞਿਤਤ੍ਤਂ ਹੀਲ਼ਨਾ ਓਹੀਲ਼ਨਾ ਓਹੀਲ਼ਿਤਤ੍ਤਂ ਅਤ੍ਤੁਞ੍ਞਾ ਅਤ੍ਤਵਞ੍ਞਾ ਅਤ੍ਤਪਰਿਭਵੋ – ਅਯਂ ਵੁਚ੍ਚਤਿ ‘‘ਹੀਨੋਹਮਸ੍ਮੀਤਿ ਮਾਨੋ’’.
(੫੨) ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨੋ
੮੬੯. ਤਤ੍ਥ ਕਤਮੋ ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨੋ? ਇਧੇਕਚ੍ਚੋ ਸੇਯ੍ਯੋ ਹੋਤਿ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ ਵਣ੍ਣਪੋਕ੍ਖਰਤਾਯ ਵਾ ਧਨੇਨ ਵਾ ਅਜ੍ਝੇਨੇਨ ਵਾ ਕਮ੍ਮਾਯਤਨੇਨ ਵਾ ਸਿਪ੍ਪਾਯਤਨੇਨ ਵਾ ਵਿਜ੍ਜਾਟ੍ਠਾਨੇਨ ਵਾ ਸੁਤੇਨ ਵਾ ਪਟਿਭਾਨੇਨ ਵਾ ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਪਰੇਹਿ ਸੇਯ੍ਯਂ ਅਤ੍ਤਾਨਂ ਦਹਤਿ; ਸੋ ਤਂ ਨਿਸ੍ਸਾਯ ਮਾਨਂ ਜਪ੍ਪੇਤਿ. ਯੋ ਏਵਰੂਪੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨੋ’’.
(੫੩) ਸੇਯ੍ਯਸ੍ਸ ਸਦਿਸੋਹਮਸ੍ਮੀਤਿ ਮਾਨੋ
੮੭੦. ਤਤ੍ਥ ਕਤਮੋ ਸੇਯ੍ਯਸ੍ਸ ਸਦਿਸੋਹਮਸ੍ਮੀਤਿ ਮਾਨੋ? ਇਧੇਕਚ੍ਚੋ ਸੇਯ੍ਯੋ ਹੋਤਿ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ ਵਣ੍ਣਪੋਕ੍ਖਰਤਾਯ ਵਾ ਧਨੇਨ ਵਾ ਅਜ੍ਝੇਨੇਨ ਵਾ ਕਮ੍ਮਾਯਤਨੇਨ ਵਾ ਸਿਪ੍ਪਾਯਤਨੇਨ ਵਾ ਵਿਜ੍ਜਾਟ੍ਠਾਨੇਨ ਵਾ ਸੁਤੇਨ ਵਾ ਪਟਿਭਾਨੇਨ ਵਾ ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਪਰੇਹਿ ਸਦਿਸਂ ਅਤ੍ਤਾਨਂ ਦਹਤਿ; ਸੋ ਤਂ ਨਿਸ੍ਸਾਯ ਮਾਨਂ ਜਪ੍ਪੇਤਿ. ਯੋ ਏਵਰੂਪੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਸੇਯ੍ਯਸ੍ਸ ਸਦਿਸੋਹਮਸ੍ਮੀਤਿ ਮਾਨੋ’’.
(੫੪) ਸੇਯ੍ਯਸ੍ਸ ਹੀਨੋਹਮਸ੍ਮੀਤਿ ਮਾਨੋ
੮੭੧. ਤਤ੍ਥ ਕਤਮੋ ਸੇਯ੍ਯਸ੍ਸ ਹੀਨੋਹਮਸ੍ਮੀਤਿ ਮਾਨੋ? ਇਧੇਕਚ੍ਚੋ ਸੇਯ੍ਯੋ ਹੋਤਿ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ ਵਣ੍ਣਪੋਕ੍ਖਰਤਾਯ ਵਾ ਧਨੇਨ ਵਾ ਅਜ੍ਝੇਨੇਨ ਵਾ ਕਮ੍ਮਾਯਤਨੇਨ ਵਾ ਸਿਪ੍ਪਾਯਤਨੇਨ ਵਾ ਵਿਜ੍ਜਾਟ੍ਠਾਨੇਨ ਵਾ ਸੁਤੇਨ ਵਾ ਪਟਿਭਾਨੇਨ ਵਾ ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਪਰੇਹਿ ਹੀਨਂ ਅਤ੍ਤਾਨਂ ਦਹਤਿ; ਸੋ ਤਂ ਨਿਸ੍ਸਾਯ ਓਮਾਨਂ ਜਪ੍ਪੇਤਿ. ਯੋ ਏਵਰੂਪੋ ਓਮਾਨੋ ਓਮਞ੍ਞਨਾ ਓਮਞ੍ਞਿਤਤ੍ਤਂ ਹੀਲ਼ਨਾ ਓਹੀਲ਼ਨਾ ਓਹੀਲ਼ਿਤਤ੍ਤਂ ਅਤ੍ਤੁਞ੍ਞਾ ਅਤ੍ਤਵਞ੍ਞਾ ਅਤ੍ਤਪਰਿਭਵੋ – ਅਯਂ ਵੁਚ੍ਚਤਿ ‘‘ਸੇਯ੍ਯਸ੍ਸ ਹੀਨੋਹਮਸ੍ਮੀਤਿ ਮਾਨੋ’’.
(੫੫) ਸਦਿਸਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨੋ
੮੭੨. ਤਤ੍ਥ ਕਤਮੋ ਸਦਿਸਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨੋ? ਇਧੇਕਚ੍ਚੋ ਸਦਿਸੋ ਹੋਤਿ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ…ਪੇ… ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਪਰੇਹਿ ਸੇਯ੍ਯਂ ਅਤ੍ਤਾਨਂ ਦਹਤਿ; ਸੋ ਤਂ ਨਿਸ੍ਸਾਯ ਮਾਨਂ ਜਪ੍ਪੇਤਿ. ਯੋ ਏਵਰੂਪੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ…ਪੇ… ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਸਦਿਸਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨੋ’’.
(੫੬) ਸਦਿਸਸ੍ਸ ਸਦਿਸੋਹਮਸ੍ਮੀਤਿ ਮਾਨੋ
੮੭੩. ਤਤ੍ਥ ਕਤਮੋ ਸਦਿਸਸ੍ਸ ਸਦਿਸੋਹਮਸ੍ਮੀਤਿ ਮਾਨੋ? ਇਧੇਕਚ੍ਚੋ ਸਦਿਸੋ ਹੋਤਿ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ…ਪੇ… ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਪਰੇਹਿ ਸਦਿਸਂ ਅਤ੍ਤਾਨਂ ਦਹਤਿ; ਸੋ ਤਂ ਨਿਸ੍ਸਾਯ ਮਾਨਂ ਜਪ੍ਪੇਤਿ. ਯੋ ਏਵਰੂਪੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਸਦਿਸਸ੍ਸ ਸਦਿਸੋਹਮਸ੍ਮੀਤਿ ਮਾਨੋ’’.
(੫੭) ਸਦਿਸਸ੍ਸ ਹੀਨੋਹਮਸ੍ਮੀਤਿ ਮਾਨੋ
੮੭੪. ਤਤ੍ਥ ਕਤਮੋ ਸਦਿਸਸ੍ਸ ਹੀਨੋਹਮਸ੍ਮੀਤਿ ਮਾਨੋ? ਇਧੇਕਚ੍ਚੋ ਸਦਿਸੋ ਹੋਤਿ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ…ਪੇ… ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਪਰੇਹਿ ਹੀਨਂ ਅਤ੍ਤਾਨਂ ਦਹਤਿ; ਸੋ ਤਂ ਨਿਸ੍ਸਾਯ ਓਮਾਨਂ ਜਪ੍ਪੇਤਿ. ਯੋ ਏਵਰੂਪੋ ਓਮਾਨੋ ਓਮਞ੍ਞਨਾ ਓਮਞ੍ਞਿਤਤ੍ਤਂ ਹੀਲ਼ਨਾ ਓਹੀਲ਼ਨਾ ਓਹੀਲ਼ਿਤਤ੍ਤਂ ਅਤ੍ਤੁਞ੍ਞਾ ਅਤ੍ਤਵਞ੍ਞਾ ਅਤ੍ਤਪਰਿਭਵੋ – ਅਯਂ ਵੁਚ੍ਚਤਿ ‘‘ਸਦਿਸਸ੍ਸ ਹੀਨੋਹਮਸ੍ਮੀਤਿ ਮਾਨੋ’’.
(੫੮) ਹੀਨਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨੋ
੮੭੫. ਤਤ੍ਥ ਕਤਮੋ ਹੀਨਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨੋ? ਇਧੇਕਚ੍ਚੋ ਹੀਨੋ ਹੋਤਿ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ…ਪੇ… ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਪਰੇਹਿ ਸੇਯ੍ਯਂ ਅਤ੍ਤਾਨਂ ਦਹਤਿ; ਸੋ ਤਂ ਨਿਸ੍ਸਾਯ ਮਾਨਂ ਜਪ੍ਪੇਤਿ. ਯੋ ਏਵਰੂਪੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਹੀਨਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨੋ’’.
(੫੯) ਹੀਨਸ੍ਸ ਸਦਿਸੋਹਮਸ੍ਮੀਤਿ ਮਾਨੋ
੮੭੬. ਤਤ੍ਥ ਕਤਮੋ ਹੀਨਸ੍ਸ ਸਦਿਸੋਹਮਸ੍ਮੀਤਿ ਮਾਨੋ? ਇਧੇਕਚ੍ਚੋ ਹੀਨੋ ਹੋਤਿ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ…ਪੇ… ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਪਰੇਹਿ ਸਦਿਸਂ ਅਤ੍ਤਾਨਂ ਦਹਤਿ; ਸੋ ਤਂ ਨਿਸ੍ਸਾਯ ਮਾਨਂ ਜਪ੍ਪੇਤਿ. ਯੋ ਏਵਰੂਪੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਹੀਨਸ੍ਸ ਸਦਿਸੋਹਮਸ੍ਮੀਤਿ ਮਾਨੋ’’.
(੬੦) ਹੀਨਸ੍ਸ ਹੀਨੋਹਮਸ੍ਮੀਤਿ ਮਾਨੋ
੮੭੭. ਤਤ੍ਥ ਕਤਮੋ ਹੀਨਸ੍ਸ ਹੀਨੋਹਮਸ੍ਮੀਤਿ ਮਾਨੋ? ਇਧੇਕਚ੍ਚੋ ਹੀਨੋ ਹੋਤਿ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ…ਪੇ… ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਪਰੇਹਿ ਸਦਿਸਂ ਅਤ੍ਤਾਨਂ ਦਹਤਿ; ਸੋ ਤਂ ਨਿਸ੍ਸਾਯ ਓਮਾਨਂ ਜਪ੍ਪੇਤਿ. ਯੋ ਏਵਰੂਪੋ ਓਮਾਨੋ ਓਮਞ੍ਞਨਾ ਓਮਞ੍ਞਿਤਤ੍ਤਂ ਹੀਲ਼ਨਾ ਓਹੀਲ਼ਨਾ ਓਹੀਲ਼ਿਤਤ੍ਤਂ ਅਤ੍ਤੁਞ੍ਞਾ ਅਤ੍ਤਵਞ੍ਞਾ ਅਤ੍ਤਪਰਿਭਵੋ – ਅਯਂ ਵੁਚ੍ਚਤਿ ‘‘ਹੀਨਸ੍ਸ ਹੀਨੋਹਮਸ੍ਮੀਤਿ ਮਾਨੋ’’.
(੬੧) ਮਾਨੋ
੮੭੮. ਤਤ੍ਥ ਕਤਮੋ ਮਾਨੋ? ਯੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਮਾਨੋ’’.
(੬੨) ਅਤਿਮਾਨੋ
੮੭੯. ਤਤ੍ਥ ਕਤਮੋ ਅਤਿਮਾਨੋ? ਇਧੇਕਚ੍ਚੋ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ…ਪੇ… ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਪਰੇਹਿ ਅਤ੍ਤਾਨਂ ਅਤਿਮਞ੍ਞਤਿ. ਯੋ ਏਵਰੂਪੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਅਤਿਮਾਨੋ’’.
(੬੩) ਮਾਨਾਤਿਮਾਨੋ
੮੮੦. ਤਤ੍ਥ ਕਤਮੋ ਮਾਨਾਤਿਮਾਨੋ? ਇਧੇਕਚ੍ਚੋ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ…ਪੇ… ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਪੁਬ੍ਬਕਾਲਂ ਪਰੇਹਿ ਸਦਿਸਂ ਅਤ੍ਤਾਨਂ ਦਹਤਿ, ਅਪਰਕਾਲਂ ਅਤ੍ਤਾਨਂ ਸੇਯ੍ਯਂ ਦਹਤਿ. ਯੋ ਏਵਰੂਪੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਮਾਨਾਤਿਮਾਨੋ’’.
(੬੪) ਓਮਾਨੋ
੮੮੧. ਤਤ੍ਥ ਕਤਮੋ ਓਮਾਨੋ? ਇਧੇਕਚ੍ਚੋ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ ਵਣ੍ਣਪੋਕ੍ਖਰਤਾਯ ਵਾ ਧਨੇਨ ਵਾ ਅਜ੍ਝੇਨੇਨ ਵਾ ਕਮ੍ਮਾਯਤਨੇਨ ਵਾ ਸਿਪ੍ਪਾਯਤਨੇਨ ਵਾ ਵਿਜ੍ਜਾਟ੍ਠਾਨੇਨ ਵਾ ਸੁਤੇਨ ਵਾ ਪਟਿਭਾਨੇਨ ਵਾ ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਓਮਾਨਂ ਜਪ੍ਪੇਤਿ. ਯੋ ਏਵਰੂਪੋ ਓਮਾਨੋ ਓਮਞ੍ਞਨਾ ਓਮਞ੍ਞਿਤਤ੍ਤਂ ਹੀਲ਼ਨਾ ਓਹੀਲ਼ਨਾ ਓਹੀਲ਼ਿਤਤ੍ਤਂ ਅਤ੍ਤੁਞ੍ਞਾ ਅਤ੍ਤਵਞ੍ਞਾ ਅਤ੍ਤਪਰਿਭਵੋ – ਅਯਂ ਵੁਚ੍ਚਤਿ ‘‘ਓਮਾਨੋ’’.
(੬੫) ਅਧਿਮਾਨੋ
੮੮੨. ਤਤ੍ਥ ਕਤਮੋ ਅਧਿਮਾਨੋ? ਅਪ੍ਪਤ੍ਤੇ ਪਤ੍ਤਸਞ੍ਞਿਤਾ, ਅਕਤੇ ਕਤਸਞ੍ਞਿਤਾ, ਅਨਧਿਗਤੇ ਅਧਿਗਤਸਞ੍ਞਿਤਾ, ਅਸਚ੍ਛਿਕਤੇ ਸਚ੍ਛਿਕਤਸਞ੍ਞਿਤਾ, ਯੋ ਏਵਰੂਪੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਅਧਿਮਾਨੋ’’.
(੬੬) ਅਸ੍ਮਿਮਾਨੋ
੮੮੩. ਤਤ੍ਥ ਕਤਮੋ ਅਸ੍ਮਿਮਾਨੋ? ਰੂਪਂ ਅਸ੍ਮੀਤਿ ਮਾਨੋ, ਅਸ੍ਮੀਤਿ ਛਨ੍ਦੋ, ਅਸ੍ਮੀਤਿ ਅਨੁਸਯੋ, ਵੇਦਨਾ…ਪੇ… ਸਞ੍ਞਾ…ਪੇ… ਸਙ੍ਖਾਰਾ…ਪੇ… ਵਿਞ੍ਞਾਣਂ ਅਸ੍ਮੀਤਿ ਮਾਨੋ, ਅਸ੍ਮੀਤਿ ਛਨ੍ਦੋ, ਅਸ੍ਮੀਤਿ ਅਨੁਸਯੋ, ਯੋ ਏਵਰੂਪੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਅਸ੍ਮਿਮਾਨੋ’’.
(੬੭) ਮਿਚ੍ਛਾਮਾਨੋ
੮੮੪. ਤਤ੍ਥ ਕਤਮੋ ਮਿਚ੍ਛਾਮਾਨੋ? ਇਧੇਕਚ੍ਚੋ ਪਾਪਕੇਨ ਵਾ ਕਮ੍ਮਾਯਤਨੇਨ ਪਾਪਕੇਨ ਵਾ ਸਿਪ੍ਪਾਯਤਨੇਨ ਪਾਪਕੇਨ ਵਾ ਵਿਜ੍ਜਾਟ੍ਠਾਨੇਨ ਪਾਪਕੇਨ ਵਾ ਸੁਤੇਨ ਪਾਪਕੇਨ ਵਾ ਪਟਿਭਾਨੇਨ ਪਾਪਕੇਨ ਵਾ ਸੀਲੇਨ ਪਾਪਕੇਨ ਵਾ ਵਤੇਨ ਪਾਪਕੇਨ ਵਾ ਸੀਲਬ੍ਬਤੇਨ ਪਾਪਿਕਾਯ ਵਾ ਦਿਟ੍ਠਿਯਾ ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਮਾਨਂ ਜਪ੍ਪੇਤਿ, ਯੋ ਏਵਰੂਪੋ ਮਾਨੋ ਮਞ੍ਞਨਾ ਮਞ੍ਞਿਤਤ੍ਤਂ ਉਨ੍ਨਤਿ ਉਨ੍ਨਾਮੋ ਧਜੋ ਸਮ੍ਪਗ੍ਗਾਹੋ ਕੇਤੁਕਮ੍ਯਤਾ ਚਿਤ੍ਤਸ੍ਸ – ਅਯਂ ਵੁਚ੍ਚਤਿ ‘‘ਮਿਚ੍ਛਾਮਾਨੋ’’.
(੬੮) ਞਾਤਿਵਿਤਕ੍ਕੋ
੮੮੫. ਤਤ੍ਥ ਕਤਮੋ ਞਾਤਿਵਿਤਕ੍ਕੋ? ਞਾਤਕੇ ਆਰਬ੍ਭ ਗੇਹਸਿਤੋ ਤਕ੍ਕੋ ਵਿਤਕ੍ਕੋ ਮਿਚ੍ਛਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਞਾਤਿਵਿਤਕ੍ਕੋ’’.
(੬੯) ਜਨਪਦਵਿਤਕ੍ਕੋ
੮੮੬. ਤਤ੍ਥ ਕਤਮੋ ਜਨਪਦਵਿਤਕ੍ਕੋ? ਜਨਪਦਂ ਆਰਬ੍ਭ ਗੇਹਸਿਤੋ ਤਕ੍ਕੋ ਵਿਤਕ੍ਕੋ ਮਿਚ੍ਛਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਜਨਪਦਵਿਤਕ੍ਕੋ’’.
(੭੦) ਅਮਰਵਿਤਕ੍ਕੋ
੮੮੭. ਤਤ੍ਥ ਕਤਮੋ ਅਮਰਵਿਤਕ੍ਕੋ? ਦੁਕ੍ਕਰਕਾਰਿਤਾਪਟਿਸਂਯੁਤ੍ਤੋ ਵਾ ਦਿਟ੍ਠਿਗਤਪਟਿਸਂਯੁਤ੍ਤੋ ਵਾ ਗੇਹਸਿਤੋ ਤਕ੍ਕੋ ਵਿਤਕ੍ਕੋ ਮਿਚ੍ਛਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਅਮਰਵਿਤਕ੍ਕੋ’’.
(੭੧) ਪਰਾਨੁਦ੍ਦਯਤਾਪਟਿਸਂਯੁਤ੍ਤੋ ਵਿਤਕ੍ਕੋ
੮੮੮. ਤਤ੍ਥ ਕਤਮੋ ਪਰਾਨੁਦ੍ਦਯਤਾਪਟਿਸਂਯੁਤ੍ਤੋ ਵਿਤਕ੍ਕੋ? ਇਧੇਕਚ੍ਚੋ ਗਿਹੀਹਿ ਸਂਸਟ੍ਠੋ ਵਿਹਰਤਿ ਸਹਨਨ੍ਦੀ ਸਹਸੋਕੀ, ਸੁਖਿਤੇਸੁ ਸੁਖਿਤੋ, ਦੁਕ੍ਖਿਤੇਸੁ ਦੁਕ੍ਖਿਤੋ, ਉਪ੍ਪਨ੍ਨੇਸੁ ਕਿਚ੍ਚਕਰਣੀਯੇਸੁ ਅਤ੍ਤਨਾ ਵਾ ਯੋਗਂ ਆਪਜ੍ਜਤਿ. ਯੋ ਤਤ੍ਥ ਗੇਹਸਿਤੋ ਤਕ੍ਕੋ ਵਿਤਕ੍ਕੋ ਮਿਚ੍ਛਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਪਰਾਨੁਦ੍ਦਯਤਾਪਟਿਸਂਯੁਤ੍ਤੋ ਵਿਤਕ੍ਕੋ’’.
(੭੨) ਲਾਭਾਦਿਪਟਿਸਂਯੁਤ੍ਤੋ ਵਿਤਕ੍ਕੋ
੮੮੯. ਤਤ੍ਥ ਕਤਮੋ ਲਾਭਸਕ੍ਕਾਰਸਿਲੋਕਪਟਿਸਂਯੁਤ੍ਤੋ ਵਿਤਕ੍ਕੋ? ਲਾਭਸਕ੍ਕਾਰਸਿਲੋਕਂ ਆਰਬ੍ਭ ਗੇਹਸਿਤੋ ਤਕ੍ਕੋ ਵਿਤਕ੍ਕੋ ਮਿਚ੍ਛਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਲਾਭਸਕ੍ਕਾਰਸਿਲੋਕਪਟਿਸਂਯੁਤ੍ਤੋ ਵਿਤਕ੍ਕੋ’’.
(੭੩) ਅਨਵਞ੍ਞਤ੍ਤਿਪਟਿਸਂਯੁਤ੍ਤੋ ਵਿਤਕ੍ਕੋ
੮੯੦. ਤਤ੍ਥ ਕਤਮੋ ਅਨਵਞ੍ਞਤ੍ਤਿਪਟਿਸਂਯੁਤ੍ਤੋ ਵਿਤਕ੍ਕੋ? ਇਧੇਕਚ੍ਚੋ ਜਾਤਿਯਾ ਵਾ ਗੋਤ੍ਤੇਨ ਵਾ ਕੋਲਪੁਤ੍ਤਿਯੇਨ ਵਾ ਵਣ੍ਣਪੋਕ੍ਖਰਤਾਯ ਵਾ ਧਨੇਨ ਵਾ ਅਜ੍ਝੇਨੇਨ ਵਾ ਕਮ੍ਮਾਯਤਨੇਨ ਵਾ ਸਿਪ੍ਪਾਯਤਨੇਨ ਵਾ ਵਿਜ੍ਜਾਟ੍ਠਾਨੇਨ ਵਾ ਸੁਤੇਨ ਵਾ ਪਟਿਭਾਨੇਨ ਵਾ ਅਞ੍ਞਤਰਞ੍ਞਤਰੇਨ ਵਤ੍ਥੁਨਾ ਮਾ ਮਂ ਪਰੇ ਅਵਜਾਨਿਂਸੂਤਿ. ਯੋ ਤਤ੍ਥ ਗੇਹਸਿਤੋ ਤਕ੍ਕੋ ਵਿਤਕ੍ਕੋ ਮਿਚ੍ਛਾਸਙ੍ਕਪ੍ਪੋ – ਅਯਂ ਵੁਚ੍ਚਤਿ ‘‘ਅਨਵਞ੍ਞਤ੍ਤਿਪਟਿਸਂਯੁਤ੍ਤੋ ਵਿਤਕ੍ਕੋ’’.
ਏਕਕਂ.