(੧) ਅਜ੍ਝਤ੍ਤਿਕਸ੍ਸ ਉਪਾਦਾਯ

੯੭੩. ਤਤ੍ਥ ਕਤਮਾਨਿ ਅਟ੍ਠਾਰਸ ਤਣ੍ਹਾਵਿਚਰਿਤਾਨਿ ਅਜ੍ਝਤ੍ਤਿਕਸ੍ਸ ਉਪਾਦਾਯ? ਅਸ੍ਮੀਤਿ ਹੋਤਿ, ਇਤ੍ਥਸ੍ਮੀਤਿ ਹੋਤਿ, ਏਵਸ੍ਮੀਤਿ ਹੋਤਿ, ਅਞ੍ਞਥਾਸ੍ਮੀਤਿ ਹੋਤਿ, ਭਵਿਸ੍ਸਨ੍ਤਿ ਹੋਤਿ, ਇਤ੍ਥਂ ਭਵਿਸ੍ਸਨ੍ਤਿ ਹੋਤਿ, ਏਵਂ ਭਵਿਸ੍ਸਨ੍ਤਿ ਹੋਤਿ, ਅਞ੍ਞਥਾ ਭਵਿਸ੍ਸਨ੍ਤਿ ਹੋਤਿ, ਅਸਸ੍ਮੀਤਿ ਹੋਤਿ, ਸਾਤਸ੍ਮੀਤਿ ਹੋਤਿ, ਸਿਯਨ੍ਤਿ ਹੋਤਿ, ਇਤ੍ਥਂ ਸਿਯਨ੍ਤਿ ਹੋਤਿ, ਏਵਂ ਸਿਯਨ੍ਤਿ ਹੋਤਿ, ਅਞ੍ਞਥਾ ਸਿਯਨ੍ਤਿ ਹੋਤਿ, ਅਪਾਹਂ ਸਿਯਨ੍ਤਿ ਹੋਤਿ, ਅਪਾਹਂ ਇਤ੍ਥਂ ਸਿਯਨ੍ਤਿ ਹੋਤਿ, ਅਪਾਹਂ ਏਵਂ ਸਿਯਨ੍ਤਿ ਹੋਤਿ, ਅਪਾਹਂ ਅਞ੍ਞਥਾ ਸਿਯਨ੍ਤਿ ਹੋਤਿ.

੯੭੪. ਕਥਞ੍ਚ ਅਸ੍ਮੀਤਿ ਹੋਤਿ? ਕਞ੍ਚਿ ਧਮ੍ਮਂ ਅਨਵਕਾਰਿਂ [ਅਨਵਕਾਰੀ (ਸੀ. ਕ.)] ਕਰਿਤ੍ਵਾ ਰੂਪਂ…ਪੇ… ਵੇਦਨਂ… ਸਞ੍ਞਂ… ਸਙ੍ਖਾਰੇ… ਵਿਞ੍ਞਾਣਂ ਅਸ੍ਮੀਤਿ ਛਨ੍ਦਂ ਪਟਿਲਭਤਿ, ਅਸ੍ਮੀਤਿ ਮਾਨਂ ਪਟਿਲਭਤਿ, ਅਸ੍ਮੀਤਿ ਦਿਟ੍ਠਿਂ ਪਟਿਲਭਤਿ. ਤਸ੍ਮਿਂ ਸਤਿ ਇਮਾਨਿ ਪਪਞ੍ਚਿਤਾਨਿ ਹੋਨ੍ਤਿ – ਇਤ੍ਥਸ੍ਮੀਤਿ ਵਾ ਏਵਸ੍ਮੀਤਿ ਵਾ ਅਞ੍ਞਥਾਸ੍ਮੀਤਿ ਵਾ.

(੨) ਕਥਞ੍ਚ ਇਤ੍ਥਸ੍ਮੀਤਿ ਹੋਤਿ? ਖਤ੍ਤਿਯੋਸ੍ਮੀਤਿ ਵਾ, ਬ੍ਰਾਹ੍ਮਣੋਸ੍ਮੀਤਿ ਵਾ, ਵੇਸ੍ਸੋਸ੍ਮੀਤਿ ਵਾ, ਸੁਦ੍ਦੋਸ੍ਮੀਤਿ ਵਾ, ਗਹਟ੍ਠੋਸ੍ਮੀਤਿ ਵਾ, ਪਬ੍ਬਜਿਤੋਸ੍ਮੀਤਿ ਵਾ, ਦੇਵੋਸ੍ਮੀਤਿ ਵਾ, ਮਨੁਸ੍ਸੋਸ੍ਮੀਤਿ ਵਾ, ਰੂਪੀਸ੍ਮੀਤਿ ਵਾ, ਅਰੂਪੀਸ੍ਮੀਤਿ ਵਾ, ਸਞ੍ਞੀਸ੍ਮੀਤਿ ਵਾ, ਅਸਞ੍ਞੀਸ੍ਮੀਤਿ ਵਾ, ਨੇਵਸਞ੍ਞੀਨਾਸਞ੍ਞੀਸ੍ਮੀਤਿ ਵਾ – ਏਵਂ ਇਤ੍ਥਸ੍ਮੀਤਿ ਹੋਤਿ.

(੩) ਕਥਞ੍ਚ ਏਵਸ੍ਮੀਤਿ ਹੋਤਿ? ਪਰਪੁਗ੍ਗਲਂ [ਪਰਂ ਪੁਗ੍ਗਲਂ (ਸ੍ਯਾ.)] ਉਪਨਿਧਾਯ ਯਥਾ ਸੋ ਖਤ੍ਤਿਯੋ ਤਥਾਹਂ ਖਤ੍ਤਿਯੋਸ੍ਮੀਤਿ ਵਾ, ਯਥਾ ਸੋ ਬ੍ਰਾਹ੍ਮਣੋ ਤਥਾਹਂ ਬ੍ਰਾਹ੍ਮਣੋਸ੍ਮੀਤਿ ਵਾ, ਯਥਾ ਸੋ ਵੇਸ੍ਸੋ ਤਥਾਹਂ ਵੇਸ੍ਸੋਸ੍ਮੀਤਿ ਵਾ ਯਥਾ ਸੋ ਸੁਦ੍ਦੋ ਤਥਾਹਂ ਸੁਦ੍ਦੋਸ੍ਮੀਤਿ ਵਾ, ਯਥਾ ਸੋ ਗਹਟ੍ਠੋ ਤਥਾਹਂ ਗਹਟ੍ਠੋਸ੍ਮੀਤਿ ਵਾ, ਯਥਾ ਸੋ ਪਬ੍ਬਜਿਤੋ ਤਥਾਹਂ ਪਬ੍ਬਜਿਤੋਸ੍ਮੀਤਿ ਵਾ, ਯਥਾ ਸੋ ਦੇਵੋ ਤਥਾਹਂ ਦੇਵੋਸ੍ਮੀਤਿ ਵਾ, ਯਥਾ ਸੋ ਮਨੁਸ੍ਸੋ ਤਥਾਹਂ ਮਨੁਸ੍ਸੋਸ੍ਮੀਤਿ ਵਾ, ਯਥਾ ਸੋ ਰੂਪੀ ਤਥਾਹਂ ਰੂਪੀਸ੍ਮੀਤਿ ਵਾ, ਯਥਾ ਸੋ ਅਰੂਪੀ ਤਥਾਹਂ ਅਰੂਪੀਸ੍ਮੀਤਿ ਵਾ, ਯਥਾ ਸੋ ਸਞ੍ਞੀ ਤਥਾਹਂ ਸਞ੍ਞੀਸ੍ਮੀਤਿ ਵਾ, ਯਥਾ ਸੋ ਅਸਞ੍ਞੀ ਤਥਾਹਂ ਅਸਞ੍ਞੀਸ੍ਮੀਤਿ ਵਾ, ਯਥਾ ਸੋ ਨੇਵਸਞ੍ਞੀਨਾਸਞ੍ਞੀ ਤਥਾਹਂ ਨੇਵਸਞ੍ਞੀਨਾਸਞ੍ਞੀਸ੍ਮੀਤਿ ਵਾ – ਏਵਂ ਏਵਸ੍ਮੀਤਿ ਹੋਤਿ.

(੪) ਕਥਞ੍ਚ ਅਞ੍ਞਥਾਸ੍ਮੀਤਿ ਹੋਤਿ? ਪਰਪੁਗ੍ਗਲਂ ਉਪਨਿਧਾਯ ਯਥਾ ਸੋ ਖਤ੍ਤਿਯੋ ਨਾਹਂ ਤਥਾ ਖਤ੍ਤਿਯੋਸ੍ਮੀਤਿ ਵਾ ਯਥਾ ਸੋ ਬ੍ਰਾਹ੍ਮਣੋ ਨਾਹਂ ਤਥਾ ਬ੍ਰਾਹ੍ਮਣੋਸ੍ਮੀਤਿ ਵਾ, ਯਥਾ ਸੋ ਵੇਸ੍ਸੋ ਨਾਹਂ ਤਥਾ ਵੇਸ੍ਸੋਸ੍ਮੀਤਿ ਵਾ, ਯਥਾ ਸੋ ਸੁਦ੍ਦੋ ਨਾਹਂ ਤਥਾ ਸੁਦ੍ਦੋਸ੍ਮੀਤਿ ਵਾ, ਯਥਾ ਸੋ ਗਹਟ੍ਠੋ ਨਾਹਂ ਤਥਾ ਗਹਟ੍ਠੋਸ੍ਮੀਤਿ ਵਾ, ਯਥਾ ਸੋ ਪਬ੍ਬਜਿਤੋ ਨਾਹਂ ਤਥਾ ਪਬ੍ਬਜਿਤੋਸ੍ਮੀਤਿ ਵਾ, ਯਥਾ ਸੋ ਦੇਵੋ ਨਾਹਂ ਤਥਾ ਦੇਵੋਸ੍ਮੀਤਿ ਵਾ, ਯਥਾ ਸੋ ਮਨੁਸ੍ਸੋ ਨਾਹਂ ਤਥਾ ਮਨੁਸ੍ਸੋਸ੍ਮੀਤਿ ਵਾ, ਯਥਾ ਸੋ ਰੂਪੀ ਨਾਹਂ ਤਥਾ ਰੂਪੀਸ੍ਮੀਤਿ ਵਾ, ਯਥਾ ਸੋ ਅਰੂਪੀ ਨਾਹਂ ਤਥਾ ਅਰੂਪੀਸ੍ਮੀਤਿ ਵਾ, ਯਥਾ ਸੋ ਸਞ੍ਞੀ ਨਾਹਂ ਤਥਾ ਸਞ੍ਞੀਸ੍ਮੀਤਿ ਵਾ, ਯਥਾ ਸੋ ਅਸਞ੍ਞੀ ਨਾਹਂ ਤਥਾ ਅਸਞ੍ਞੀਸ੍ਮੀਤਿ ਵਾ, ਯਥਾ ਸੋ ਨੇਵਸਞ੍ਞੀਨਾਸਞ੍ਞੀ ਨਾਹਂ ਤਥਾ ਨੇਵਸਞ੍ਞੀਨਾਸਞ੍ਞੀਸ੍ਮੀਤਿ ਵਾ – ਏਵਂ ਅਞ੍ਞਥਾਸ੍ਮੀਤਿ ਹੋਤਿ.

(੫) ਕਥਞ੍ਚ ਭਵਿਸ੍ਸਨ੍ਤਿ ਹੋਤਿ? ਕਞ੍ਚਿ ਧਮ੍ਮਂ ਅਨਵਕਾਰਿਂ ਕਰਿਤ੍ਵਾ ਰੂਪਂ…ਪੇ… ਵੇਦਨਂ… ਸਞ੍ਞਂ… ਸਙ੍ਖਾਰੇ… ਵਿਞ੍ਞਾਣਂ ਭਵਿਸ੍ਸਨ੍ਤਿ ਛਨ੍ਦਂ ਪਟਿਲਭਤਿ, ਭਵਿਸ੍ਸਨ੍ਤਿ ਮਾਨਂ ਪਟਿਲਭਤਿ, ਭਵਿਸ੍ਸਨ੍ਤਿ ਦਿਟ੍ਠਿਂ ਪਟਿਲਭਤਿ. ਤਸ੍ਮਿਂ ਸਤਿ ਇਮਾਨਿ ਪਪਞ੍ਚਿਤਾਨਿ ਹੋਨ੍ਤਿ – ਇਤ੍ਥਂ ਭਵਿਸ੍ਸਨ੍ਤਿ ਵਾ, ਏਵਂ ਭਵਿਸ੍ਸਨ੍ਤਿ ਵਾ, ਅਞ੍ਞਥਾ ਭਵਿਸ੍ਸਨ੍ਤਿ ਵਾ.

(੬) ਕਥਞ੍ਚ ਇਤ੍ਥਂ ਭਵਿਸ੍ਸਨ੍ਤਿ ਹੋਤਿ? ਖਤ੍ਤਿਯੋ ਭਵਿਸ੍ਸਨ੍ਤਿ ਵਾ, ਬ੍ਰਾਹ੍ਮਣੋ ਭਵਿਸ੍ਸਨ੍ਤਿ ਵਾ, ਵੇਸ੍ਸੋ ਭਵਿਸ੍ਸਨ੍ਤਿ ਵਾ, ਸੁਦ੍ਦੋ ਭਵਿਸ੍ਸਨ੍ਤਿ ਵਾ, ਗਹਟ੍ਠੋ ਭਵਿਸ੍ਸਨ੍ਤਿ ਵਾ, ਪਬ੍ਬਜਿਤੋ ਭਵਿਸ੍ਸਨ੍ਤਿ ਵਾ, ਦੇਵੋ ਭਵਿਸ੍ਸਨ੍ਤਿ ਵਾ, ਮਨੁਸ੍ਸੋ ਭਵਿਸ੍ਸਨ੍ਤਿ ਵਾ, ਰੂਪੀ ਭਵਿਸ੍ਸਨ੍ਤਿ ਵਾ, ਅਰੂਪੀ ਭਵਿਸ੍ਸਨ੍ਤਿ ਵਾ, ਸਞ੍ਞੀ ਭਵਿਸ੍ਸਨ੍ਤਿ ਵਾ, ਅਸਞ੍ਞੀ ਭਵਿਸ੍ਸਨ੍ਤਿ ਵਾ, ਨੇਵਸਞ੍ਞੀਨਾਸਞ੍ਞੀ ਭਵਿਸ੍ਸਨ੍ਤਿ ਵਾ – ਏਵਂ ਇਤ੍ਥਂ ਭਵਿਸ੍ਸਨ੍ਤਿ ਹੋਤਿ.

(੭) ਕਥਞ੍ਚ ਏਵਂ ਭਵਿਸ੍ਸਨ੍ਤਿ ਹੋਤਿ? ਪਰਪੁਗ੍ਗਲਂ ਉਪਨਿਧਾਯ ਯਥਾ ਸੋ ਖਤ੍ਤਿਯੋ ਤਥਾਹਂ ਖਤ੍ਤਿਯੋ ਭਵਿਸ੍ਸਨ੍ਤਿ ਵਾ, ਯਥਾ ਸੋ ਬ੍ਰਾਹ੍ਮਣੋ ਤਥਾਹਂ ਬ੍ਰਾਹ੍ਮਣੋ ਭਵਿਸ੍ਸਨ੍ਤਿ ਵਾ…ਪੇ… ਯਥਾ ਸੋ ਨੇਵਸਞ੍ਞੀਨਾਸਞ੍ਞੀ ਤਥਾਹਂ ਨੇਵਸਞ੍ਞੀਨਾਸਞ੍ਞੀ ਭਵਿਸ੍ਸਨ੍ਤਿ ਵਾ – ਏਵਂ ਭਵਿਸ੍ਸਨ੍ਤਿ ਹੋਤਿ.

(੮) ਕਥਞ੍ਚ ਅਞ੍ਞਥਾ ਭਵਿਸ੍ਸਨ੍ਤਿ ਹੋਤਿ? ਪਰਪੁਗ੍ਗਲਂ ਉਪਨਿਧਾਯ ਯਥਾ ਸੋ ਖਤ੍ਤਿਯੋ ਨਾਹਂ ਤਥਾ ਖਤ੍ਤਿਯੋ ਭਵਿਸ੍ਸਨ੍ਤਿ ਵਾ, ਯਥਾ ਸੋ ਬ੍ਰਾਹ੍ਮਣੋ ਨਾਹਂ ਤਥਾ ਬ੍ਰਾਹ੍ਮਣੋ ਭਵਿਸ੍ਸਨ੍ਤਿ ਵਾ…ਪੇ… ਯਥਾ ਸੋ ਨੇਵਸਞ੍ਞੀਨਾਸਞ੍ਞੀ ਨਾਹਂ ਤਥਾ ਨੇਵਸਞ੍ਞੀਨਾਸਞ੍ਞੀ ਭਵਿਸ੍ਸਨ੍ਤਿ ਵਾ – ਏਵਂ ਅਞ੍ਞਥਾ ਭਵਿਸ੍ਸਨ੍ਤਿ ਹੋਤਿ.

(੯) ਕਥਞ੍ਚ ਅਸਸ੍ਮੀਤਿ ਹੋਤਿ? ਕਞ੍ਚਿ ਧਮ੍ਮਂ ਅਨਵਕਾਰਿਂ ਕਰਿਤ੍ਵਾ ਰੂਪਂ…ਪੇ… ਵੇਦਨਂ… ਸਞ੍ਞਂ… ਸਙ੍ਖਾਰੇ… ਵਿਞ੍ਞਾਣਂ ਨਿਚ੍ਚੋਸ੍ਮਿ ਧੁਵੋਸ੍ਮਿ ਸਸ੍ਸਤੋਸ੍ਮਿ ਅਵਿਪਰਿਣਾਮਧਮ੍ਮੋਸ੍ਮੀਤਿ – ਏਵਂ ਅਸਸ੍ਮੀਤਿ ਹੋਤਿ.

(੧੦) ਕਥਞ੍ਚ ਸਾਤਸ੍ਮੀਤਿ ਹੋਤਿ? ਕਞ੍ਚਿ ਧਮ੍ਮਂ ਅਨਵਕਾਰਿਂ ਕਰਿਤ੍ਵਾ ਰੂਪਂ…ਪੇ… ਵੇਦਨਂ… ਸਞ੍ਞਂ… ਸਙ੍ਖਾਰੇ… ਵਿਞ੍ਞਾਣਂ ਉਚ੍ਛਿਜ੍ਜਿਸ੍ਸਾਮਿ ਵਿਨਸ੍ਸਿਸ੍ਸਾਮਿ ਨ ਭਵਿਸ੍ਸਾਮੀਤਿ – ਏਵਂ ਸਾਤਸ੍ਮੀਤਿ ਹੋਤਿ.

(੧੧) ਕਥਞ੍ਚ ਸਿਯਨ੍ਤਿ ਹੋਤਿ? ਕਞ੍ਚਿ ਧਮ੍ਮਂ ਅਨਵਕਾਰਿਂ ਕਰਿਤ੍ਵਾ ਰੂਪਂ…ਪੇ… ਵੇਦਨਂ… ਸਞ੍ਞਂ… ਸਙ੍ਖਾਰੇ… ਵਿਞ੍ਞਾਣਂ ਸਿਯਨ੍ਤਿ ਛਨ੍ਦਂ ਪਟਿਲਭਤਿ, ਸਿਯਨ੍ਤਿ ਮਾਨਂ ਪਟਿਲਭਤਿ, ਸਿਯਨ੍ਤਿ ਦਿਟ੍ਠਿਂ ਪਟਿਲਭਤਿ. ਤਸ੍ਮਿਂ ਸਤਿ ਇਮਾਨਿ ਪਪਞ੍ਚਿਤਾਨਿ ਹੋਨ੍ਤਿ – ਇਤ੍ਥਂ ਸਿਯਨ੍ਤਿ ਵਾ, ਏਵਂ ਸਿਯਨ੍ਤਿ ਵਾ, ਅਞ੍ਞਥਾ ਸਿਯਨ੍ਤਿ ਵਾ.

(੧੨) ਕਥਞ੍ਚ ਇਤ੍ਥਂ ਸਿਯਨ੍ਤਿ ਹੋਤਿ? ਖਤ੍ਤਿਯੋ ਸਿਯਨ੍ਤਿ ਵਾ, ਬ੍ਰਾਹ੍ਮਣੋ ਸਿਯਨ੍ਤਿ ਵਾ, ਵੇਸ੍ਸੋ ਸਿਯਨ੍ਤਿ ਵਾ, ਸੁਦ੍ਦੋ ਸਿਯਨ੍ਤਿ ਵਾ, ਗਹਟ੍ਠੋ ਸਿਯਨ੍ਤਿ ਵਾ, ਪਬ੍ਬਜਿਤੋ ਸਿਯਨ੍ਤਿ ਵਾ, ਦੇਵੋ ਸਿਯਨ੍ਤਿ ਵਾ, ਮਨੁਸ੍ਸੋ ਸਿਯਨ੍ਤਿ ਵਾ, ਰੂਪੀ ਸਿਯਨ੍ਤਿ ਵਾ, ਅਰੂਪੀ ਸਿਯਨ੍ਤਿ ਵਾ, ਸਞ੍ਞੀ ਸਿਯਨ੍ਤਿ ਵਾ, ਅਸਞ੍ਞੀ ਸਿਯਨ੍ਤਿ ਵਾ, ਨੇਵਸਞ੍ਞੀਨਾਸਞ੍ਞੀ ਸਿਯਨ੍ਤਿ ਵਾ – ਏਵਂ ਇਤ੍ਥਂ ਸਿਯਨ੍ਤਿ ਹੋਤਿ.

(੧੩) ਕਥਞ੍ਚ ਏਵਂ ਸਿਯਨ੍ਤਿ ਹੋਤਿ? ਪਰਪੁਗ੍ਗਲਂ ਉਪਨਿਧਾਯ ਯਥਾ ਸੋ ਖਤ੍ਤਿਯੋ ਤਥਾਹਂ ਖਤ੍ਤਿਯੋ ਸਿਯਨ੍ਤਿ ਵਾ, ਯਥਾ ਸੋ ਬ੍ਰਾਹ੍ਮਣੋ ਤਥਾਹਂ ਬ੍ਰਾਹ੍ਮਣੋ ਸਿਯਨ੍ਤਿ ਵਾ…ਪੇ… ਯਥਾ ਸੋ ਨੇਵਸਞ੍ਞੀਨਾਸਞ੍ਞੀ ਤਥਾਹਂ ਨੇਵਸਞ੍ਞੀਨਾਸਞ੍ਞੀ ਸਿਯਨ੍ਤਿ ਵਾ – ਏਵਂ ਏਵਂ ਸਿਯਨ੍ਤਿ ਹੋਤਿ.

(੧੪) ਕਥਞ੍ਚ ਅਞ੍ਞਥਾ ਸਿਯਨ੍ਤਿ ਹੋਤਿ? ਪਰਪੁਗ੍ਗਲਂ ਉਪਨਿਧਾਯ ਯਥਾ ਸੋ ਖਤ੍ਤਿਯੋ ਨਾਹਂ ਤਥਾ ਖਤ੍ਤਿਯੋ ਸਿਯਨ੍ਤਿ ਵਾ, ਯਥਾ ਸੋ ਬ੍ਰਾਹ੍ਮਣੋ ਨਾਹਂ ਤਥਾ ਬ੍ਰਾਹ੍ਮਣੋ ਸਿਯਨ੍ਤਿ ਵਾ…ਪੇ… ਯਥਾ ਸੋ ਨੇਵਸਞ੍ਞੀਨਾਸਞ੍ਞੀ ਨਾਹਂ ਤਥਾ ਨੇਵਸਞ੍ਞੀਨਾਸਞ੍ਞੀ ਸਿਯਨ੍ਤਿ ਵਾ – ਏਵਂ ਅਞ੍ਞਥਾ ਸਿਯਨ੍ਤਿ ਹੋਤਿ.

(੧੫) ਕਥਞ੍ਚ ਅਪਾਹਂ ਸਿਯਨ੍ਤਿ ਹੋਤਿ? ਕਞ੍ਚਿ ਧਮ੍ਮਂ ਅਨਵਕਾਰਿਂ ਕਰਿਤ੍ਵਾ ਰੂਪਂ… ਵੇਦਨਂ… ਸਞ੍ਞਂ… ਸਙ੍ਖਾਰੇ… ਵਿਞ੍ਞਾਣਂ ਅਪਾਹਂ ਸਿਯਨ੍ਤਿ ਛਨ੍ਦਂ ਪਟਿਲਭਤਿ, ਅਪਾਹਂ ਸਿਯਨ੍ਤਿ ਮਾਨਂ ਪਟਿਲਭਤਿ, ਅਪਾਹਂ ਸਿਯਨ੍ਤਿ ਦਿਟ੍ਠਿਂ ਪਟਿਲਭਤਿ. ਤਸ੍ਮਿਂ ਸਤਿ ਇਮਾਨਿ ਪਪਞ੍ਚਿਤਾਨਿ ਹੋਨ੍ਤਿ – ਅਪਾਹਂ ਇਤ੍ਥਂ ਸਿਯਨ੍ਤਿ ਵਾ, ਅਪਾਹਂ ਏਵਂ ਸਿਯਨ੍ਤਿ ਵਾ, ਅਪਾਹਂ ਅਞ੍ਞਥਾ ਸਿਯਨ੍ਤਿ ਵਾ.

(੧੬) ਕਥਞ੍ਚ ਅਪਾਹਂ ਇਤ੍ਥਂ ਸਿਯਨ੍ਤਿ ਹੋਤਿ? ਅਪਾਹਂ ਖਤ੍ਤਿਯੋ ਸਿਯਨ੍ਤਿ ਵਾ, ਅਪਾਹਂ ਬ੍ਰਾਹ੍ਮਣੋ ਸਿਯਨ੍ਤਿ ਵਾ, ਅਪਾਹਂ ਵੇਸ੍ਸੋ ਸਿਯਨ੍ਤਿ ਵਾ, ਅਪਾਹਂ ਸੁਦ੍ਦੋ ਸਿਯਨ੍ਤਿ ਵਾ, ਅਪਾਹਂ ਗਹਟ੍ਠੋ ਸਿਯਨ੍ਤਿ ਵਾ, ਅਪਾਹਂ ਪਬ੍ਬਜਿਤੋ ਸਿਯਨ੍ਤਿ ਵਾ, ਅਪਾਹਂ ਦੇਵੋ ਸਿਯਨ੍ਤਿ ਵਾ, ਅਪਾਹਂ ਮਨੁਸ੍ਸੋ ਸਿਯਨ੍ਤਿ ਵਾ, ਅਪਾਹਂ ਰੂਪੀ ਸਿਯਨ੍ਤਿ ਵਾ, ਅਪਾਹਂ ਅਰੂਪੀ ਸਿਯਨ੍ਤਿ ਵਾ, ਅਪਾਹਂ ਸਞ੍ਞੀ ਸਿਯਨ੍ਤਿ ਵਾ, ਅਪਾਹਂ ਅਸਞ੍ਞੀ ਸਿਯਨ੍ਤਿ ਵਾ, ਅਪਾਹਂ ਨੇਵਸਞ੍ਞੀਨਾਸਞ੍ਞੀ ਸਿਯਨ੍ਤਿ ਵਾ – ਏਵਂ ਅਪਾਹਂ ਇਤ੍ਥਂ ਸਿਯਨ੍ਤਿ ਹੋਤਿ. (੧੭) ਕਥਞ੍ਚ ਅਪਾਹਂ ਏਵਂ ਸਿਯਨ੍ਤਿ ਹੋਤਿ? ਪਰਪੁਗ੍ਗਲਂ ਉਪਨਿਧਾਯ ਯਥਾ ਸੋ ਖਤ੍ਤਿਯੋ ਅਪਾਹਂ ਤਥਾ ਖਤ੍ਤਿਯੋ ਸਿਯਨ੍ਤਿ ਵਾ, ਯਥਾ ਸੋ ਬ੍ਰਾਹ੍ਮਣੋ ਅਪਾਹਂ ਤਥਾ ਬ੍ਰਾਹ੍ਮਣੋ ਸਿਯਨ੍ਤਿ ਵਾ…ਪੇ… ਯਥਾ ਸੋ ਨੇਵਸਞ੍ਞੀਨਾਸਞ੍ਞੀ ਅਪਾਹਂ ਤਥਾ ਨੇਵਸਞ੍ਞੀਨਾਸਞ੍ਞੀ ਸਿਯਨ੍ਤਿ ਵਾ – ਏਵਂ ਅਪਾਹਂ ਏਵਂ ਸਿਯਨ੍ਤਿ ਹੋਤਿ.

(੧੮) ਕਥਞ੍ਚ ਅਪਾਹਂ ਅਞ੍ਞਥਾ ਸਿਯਨ੍ਤਿ ਹੋਤਿ? ਪਰਪੁਗ੍ਗਲਂ ਉਪਨਿਧਾਯ ਯਥਾ ਸੋ ਖਤ੍ਤਿਯੋ ਅਪਾਹਂ ਨ ਤਥਾ ਖਤ੍ਤਿਯੋ ਸਿਯਨ੍ਤਿ ਵਾ, ਯਥਾ ਸੋ ਬ੍ਰਾਹ੍ਮਣੋ ਅਪਾਹਂ ਨ ਤਥਾ ਬ੍ਰਾਹ੍ਮਣੋ ਸਿਯਨ੍ਤਿ ਵਾ…ਪੇ… ਯਥਾ ਸੋ ਨੇਵਸਞ੍ਞੀਨਾਸਞ੍ਞੀ ਅਪਾਹਂ ਨ ਤਥਾ ਨੇਵਸਞ੍ਞੀਨਾਸਞ੍ਞੀ ਸਿਯਨ੍ਤਿ ਵਾ – ਏਵਂ ਅਪਾਹਂ ਅਞ੍ਞਥਾ ਸਿਯਨ੍ਤਿ ਹੋਤਿ.

ਇਮਾਨਿ ਅਟ੍ਠਾਰਸ ਤਣ੍ਹਾਵਿਚਰਿਤਾਨਿ ਅਜ੍ਝਤ੍ਤਿਕਸ੍ਸ ਉਪਾਦਾਯ.