੯. ਨਵਕਨਿਦ੍ਦੇਸੋ

(੧) ਨਵ ਆਘਾਤਵਤ੍ਥੂਨਿ

੯੬੦. ਤਤ੍ਥ ਕਤਮਾਨਿ ਨਵ ਆਘਾਤਵਤ੍ਥੂਨਿ? ‘‘ਅਨਤ੍ਥਂ ਮੇ ਅਚਰੀ’’ਤਿ ਆਘਾਤੋ ਜਾਯਤਿ; ‘‘ਅਨਤ੍ਥਂ ਮੇ ਚਰਤੀ’’ਤਿ ਆਘਾਤੋ ਜਾਯਤਿ; ‘‘ਅਨਤ੍ਥਂ ਮੇ ਚਰਿਸ੍ਸਤੀ’’ਤਿ ਆਘਾਤੋ ਜਾਯਤਿ; ‘‘ਪਿਯਸ੍ਸ ਮੇ ਮਨਾਪਸ੍ਸ ਅਨਤ੍ਥਂ ਅਚਰਿ’’…ਪੇ… ਅਨਤ੍ਥਂ ਚਰਤਿ…ਪੇ… ਅਨਤ੍ਥਂ ਚਰਿਸ੍ਸਤੀਤਿ ਆਘਾਤੋ ਜਾਯਤਿ; ਅਪ੍ਪਿਯਸ੍ਸ ਮੇ ਅਮਨਾਪਸ੍ਸ ਅਤ੍ਥਂ ਅਚਰਿ…ਪੇ… ਅਤ੍ਥਂ ਚਰਤਿ…ਪੇ… ਅਤ੍ਥਂ ਚਰਿਸ੍ਸਤੀਤਿ ਆਘਾਤੋ ਜਾਯਤਿ. ਇਮਾਨਿ ਨਵ ਆਘਾਤਵਤ੍ਥੂਨਿ.

(੨) ਨਵ ਪੁਰਿਸਮਲਾਨਿ

੯੬੧. ਤਤ੍ਥ ਕਤਮਾਨਿ ਨਵ ਪੁਰਿਸਮਲਾਨਿ? ਕੋਧੋ, ਮਕ੍ਖੋ, ਇਸ੍ਸਾ, ਮਚ੍ਛਰਿਯਂ, ਮਾਯਾ, ਸਾਠੇਯ੍ਯਂ, ਮੁਸਾਵਾਦੋ, ਪਾਪਿਚ੍ਛਤਾ, ਮਿਚ੍ਛਾਦਿਟ੍ਠਿ – ਇਮਾਨਿ ਨਵ ਪੁਰਿਸਮਲਾਨਿ.

(੩) ਨਵਵਿਧਾ ਮਾਨਾ

੯੬੨. ਤਤ੍ਥ ਕਤਮੇ ਨਵਵਿਧਾ ਮਾਨਾ? ‘‘ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀ’’ਤਿ ਮਾਨੋ, ‘‘ਸੇਯ੍ਯਸ੍ਸ ਸਦਿਸੋਹਮਸ੍ਮੀ’’ਤਿ ਮਾਨੋ, ‘‘ਸੇਯ੍ਯਸ੍ਸ ਹੀਨੋਹਮਸ੍ਮੀ’’ਤਿ ਮਾਨੋ, ‘‘ਸਦਿਸਸ੍ਸ ਸੇਯ੍ਯੋਹਮਸ੍ਮੀ’’ਤਿ ਮਾਨੋ, ‘‘ਸਦਿਸਸ੍ਸ ਸਦਿਸੋਹਮਸ੍ਮੀ’’ਤਿ ਮਾਨੋ, ‘‘ਸਦਿਸਸ੍ਸ ਹੀਨੋਹਮਸ੍ਮੀ’’ਤਿ ਮਾਨੋ, ‘‘ਹੀਨਸ੍ਸ ਸੇਯ੍ਯੋਹਮਸ੍ਮੀ’’ਤਿ ਮਾਨੋ, ‘‘ਹੀਨਸ੍ਸ ਸਦਿਸੋਹਮਸ੍ਮੀ’’ਤਿ ਮਾਨੋ, ‘‘ਹੀਨਸ੍ਸ ਹੀਨੋਹਮਸ੍ਮੀ’’ਤਿ ਮਾਨੋ – ਇਮੇ ਨਵਵਿਧਾ ਮਾਨਾ.

(੪) ਨਵ ਤਣ੍ਹਾਮੂਲਕਾ ਧਮ੍ਮਾ

੯੬੩. ਤਤ੍ਥ ਕਤਮੇ ਨਵ ਤਣ੍ਹਾਮੂਲਕਾ ਧਮ੍ਮਾ? ਤਣ੍ਹਂ ਪਟਿਚ੍ਚ ਪਰਿਯੇਸਨਾ, ਪਰਿਯੇਸਨਂ ਪਟਿਚ੍ਚ ਲਾਭੋ, ਲਾਭਂ ਪਟਿਚ੍ਚ ਵਿਨਿਚ੍ਛਯੋ, ਵਿਨਿਚ੍ਛਯਂ ਪਟਿਚ੍ਚ ਛਨ੍ਦਰਾਗੋ, ਛਨ੍ਦਰਾਗਂ ਪਟਿਚ੍ਚ ਅਜ੍ਝੋਸਾਨਂ, ਅਜ੍ਝੋਸਾਨਂ ਪਟਿਚ੍ਚ ਪਰਿਗ੍ਗਹੋ, ਪਰਿਗ੍ਗਹਂ ਪਟਿਚ੍ਚ ਮਚ੍ਛਰਿਯਂ, ਮਚ੍ਛਰਿਯਂ ਪਟਿਚ੍ਚ ਆਰਕ੍ਖੋ, ਆਰਕ੍ਖਾਧਿਕਰਣਂ ਦਣ੍ਡਾਦਾਨ-ਸਤ੍ਥਾਦਾਨ-ਕਲਹ-ਵਿਗ੍ਗਹਵਿਵਾਦ-ਤੁਵਂਤੁਵਂ-ਪੇਸੁਞ੍ਞ-ਮੁਸਾਵਾਦਾ ਅਨੇਕੇ ਪਾਪਕਾ ਅਕੁਸਲਾ ਧਮ੍ਮਾ ਸਮ੍ਭਵਨ੍ਤਿ – ਇਮੇ ਨਵ ਤਣ੍ਹਾਮੂਲਕਾ ਧਮ੍ਮਾ.

(੫) ਨਵ ਇਞ੍ਜਿਤਾਨਿ

੯੬੪. ਤਤ੍ਥ ਕਤਮਾਨਿ ਨਵ ਇਞ੍ਜਿਤਾਨਿ? ‘‘ਅਸ੍ਮੀ’’ਤਿ ਇਞ੍ਜਿਤਮੇਤਂ, ‘‘ਅਹਮਸ੍ਮੀ’’ਤਿ ਇਞ੍ਜਿਤਮੇਤਂ, ‘‘ਅਯਮਹਮਸ੍ਮੀ’’ਤਿ ਇਞ੍ਜਿਤਮੇਤਂ ‘‘ਭਵਿਸ੍ਸ’’ਨ੍ਤਿ ਇਞ੍ਜਿਤਮੇਤਂ, ‘‘ਰੂਪੀ ਭਵਿਸ੍ਸ’’ਨ੍ਤਿ ਇਞ੍ਜਿਤਮੇਤਂ, ‘‘ਅਰੂਪੀ ਭਵਿਸ੍ਸ’’ਨ੍ਤਿ ਇਞ੍ਜਿਤਮੇਤਂ, ‘‘ਸਞ੍ਞੀ ਭਵਿਸ੍ਸ’’ਨ੍ਤਿ ਇਞ੍ਜਿਤਮੇਤਂ, ‘‘ਅਸਞ੍ਞੀ ਭਵਿਸ੍ਸ’’ਨ੍ਤਿ ਇਞ੍ਜਿਤਮੇਤਂ, ‘‘ਨੇਵਸਞ੍ਞੀਨਾਸਞ੍ਞੀ ਭਵਿਸ੍ਸ’’ਨ੍ਤਿ ਇਞ੍ਜਿਤਮੇਤਂ – ਇਮਾਨਿ ਨਵ ਇਞ੍ਜਿਤਾਨਿ.

(੬-੯) ਨਵ ਮਞ੍ਞਿਤਾਦੀਨਿ

੯੬੫. ਤਤ੍ਥ ਕਤਮਾਨਿ ਨਵ ਮਞ੍ਞਿਤਾਨਿ… ਨਵ ਫਨ੍ਦਿਤਾਨਿ… ਨਵ ਪਪਞ੍ਚਿਤਾਨਿ… ਨਵ ਸਙ੍ਖਤਾਨਿ? ‘‘ਅਸ੍ਮੀ’’ਤਿ ਸਙ੍ਖਤਮੇਤਂ, ‘‘ਅਹਮਸ੍ਮੀ’’ਤਿ ਸਙ੍ਖਤਮੇਤਂ, ‘‘ਅਯਮਹਮਸ੍ਮੀ’’ਤਿ ਸਙ੍ਖਤਮੇਤਂ, ‘‘ਭਵਿਸ੍ਸ’’ਨ੍ਤਿ ਸਙ੍ਖਤਮੇਤਂ, ‘‘ਰੂਪੀ ਭਵਿਸ੍ਸ’’ਨ੍ਤਿ ਸਙ੍ਖਤਮੇਤਂ, ‘‘ਅਰੂਪੀ ਭਵਿਸ੍ਸ’’ਨ੍ਤਿ ਸਙ੍ਖਤਮੇਤਂ, ‘‘ਸਞ੍ਞੀ ਭਵਿਸ੍ਸ’’ਨ੍ਤਿ ਸਙ੍ਖਤਮੇਤਂ, ‘‘ਅਸਞ੍ਞੀ ਭਵਿਸ੍ਸ’’ਨ੍ਤਿ ਸਙ੍ਖਤਮੇਤਂ, ‘‘ਨੇਵਸਞ੍ਞੀਨਾਸਞ੍ਞੀ ਭਵਿਸ੍ਸ’’ਨ੍ਤਿ ਸਙ੍ਖਤਮੇਤਂ – ਇਮਾਨਿ ਨਵ ਸਙ੍ਖਤਾਨਿ.

ਨਵਕਂ.