ਮਾਤਿਕਾ
੧. ਏਕਕਨਿਦ੍ਦੇਸੋ
੭੬੧. ਪਞ੍ਚ ਵਿਞ੍ਞਾਣਾ ਨ ਹੇਤੁਮੇਵ, ਅਹੇਤੁਕਮੇਵ, ਹੇਤੁਵਿਪ੍ਪਯੁਤ੍ਤਮੇਵ, ਸਪ੍ਪਚ੍ਚਯਮੇਵ, ਸਙ੍ਖਤਮੇਵ, ਅਰੂਪਮੇਵ, ਲੋਕਿਯਮੇਵ, ਸਾਸਵਮੇਵ, ਸਂਯੋਜਨਿਯਮੇਵ, ਗਨ੍ਥਨਿਯਮੇਵ, ਓਘਨਿਯਮੇਵ, ਯੋਗਨਿਯਮੇਵ, ਨੀਵਰਣਿਯਮੇਵ, ਪਰਾਮਟ੍ਠਮੇਵ, ਉਪਾਦਾਨਿਯਮੇਵ, ਸਂਕਿਲੇਸਿਕਮੇਵ, ਅਬ੍ਯਾਕਤਮੇਵ, ਸਾਰਮ੍ਮਣਮੇਵ, ਅਚੇਤਸਿਕਮੇਵ, ਵਿਪਾਕਮੇਵ, ਉਪਾਦਿਨ੍ਨੁਪਾਦਾਨਿਯਮੇਵ, ਅਸਂਕਿਲਿਟ੍ਠਸਂਕਿਲੇਸਿਕਮੇਵ, ਨ ਸਵਿਤਕ੍ਕਸਵਿਚਾਰਮੇਵ, ਨ ਅਵਿਤਕ੍ਕਵਿਚਾਰਮਤ੍ਤਮੇਵ, ਅਵਿਤਕ੍ਕਅਵਿਚਾਰਮੇਵ, ਨ ਪੀਤਿਸਹਗਤਮੇਵ, ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਮੇਵ, ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਹੇਤੁਕਮੇਵ, ਨੇਵਾਚਯਗਾਮਿਨਾਪਚਯਗਾਮਿਮੇਵ, ਨੇਵਸੇਕ੍ਖਨਾਸੇਕ੍ਖਮੇਵ, ਪਰਿਤ੍ਤਮੇਵ, ਕਾਮਾਵਚਰਮੇਵ, ਨ ਰੂਪਾਵਚਰਮੇਵ, ਨ ਅਰੂਪਾਵਚਰਮੇਵ, ਪਰਿਯਾਪਨ੍ਨਮੇਵ, ਨੋ ਅਪਰਿਯਾਪਨ੍ਨਮੇਵ, ਅਨਿਯਤਮੇਵ, ਅਨਿਯ੍ਯਾਨਿਕਮੇਵ, ਉਪ੍ਪਨ੍ਨਂ ਮਨੋਵਿਞ੍ਞਾਣਵਿਞ੍ਞੇਯ੍ਯਮੇਵ, ਅਨਿਚ੍ਚਮੇਵ, ਜਰਾਭਿਭੂਤਮੇਵ.
੭੬੨. ਪਞ੍ਚ ਵਿਞ੍ਞਾਣਾ ਉਪ੍ਪਨ੍ਨਵਤ੍ਥੁਕਾ, ਉਪ੍ਪਨ੍ਨਾਰਮ੍ਮਣਾਤਿ ਉਪ੍ਪਨ੍ਨਸ੍ਮਿਂ ਵਤ੍ਥੁਸ੍ਮਿਂ ਉਪ੍ਪਨ੍ਨੇ ਆਰਮ੍ਮਣੇ ਉਪ੍ਪਜ੍ਜਨ੍ਤਿ.
ਪੁਰੇਜਾਤਵਤ੍ਥੁਕਾ, ਪੁਰੇਜਾਤਾਰਮ੍ਮਣਾਤਿ ਪੁਰੇਜਾਤਸ੍ਮਿਂ ਵਤ੍ਥੁਸ੍ਮਿਂ ਪੁਰੇਜਾਤੇ ਆਰਮ੍ਮਣੇ ਉਪ੍ਪਜ੍ਜਨ੍ਤਿ.
ਅਜ੍ਝਤ੍ਤਿਕਵਤ੍ਥੁਕਾ, ਬਾਹਿਰਾਰਮ੍ਮਣਾਤਿ ਪਞ੍ਚਨ੍ਨਂ ਵਿਞ੍ਞਾਣਾਨਂ ਵਤ੍ਥੁ ਅਜ੍ਝਤ੍ਤਿਕਾ ਆਰਮ੍ਮਣਾ ਬਾਹਿਰਾ.
ਅਸਮ੍ਭਿਨ੍ਨਵਤ੍ਥੁਕਾ, ਅਸਮ੍ਭਿਨ੍ਨਾਰਮ੍ਮਣਾਤਿ ਅਸਮ੍ਭਿਨ੍ਨਸ੍ਮਿਂ ਵਤ੍ਥੁਸ੍ਮਿਂ ਅਸਮ੍ਭਿਨ੍ਨੇ ਆਰਮ੍ਮਣੇ ਉਪ੍ਪਜ੍ਜਨ੍ਤਿ.
ਨਾਨਾਵਤ੍ਥੁਕਾ, ਨਾਨਾਰਮ੍ਮਣਾਤਿ ਅਞ੍ਞਂ ਚਕ੍ਖੁਵਿਞ੍ਞਾਣਸ੍ਸ ਵਤ੍ਥੁ ਚ ਆਰਮ੍ਮਣਞ੍ਚ, ਅਞ੍ਞਂ ਸੋਤਵਿਞ੍ਞਾਣਸ੍ਸ ਵਤ੍ਥੁ ਚ ਆਰਮ੍ਮਣਞ੍ਚ, ਅਞ੍ਞਂ ਘਾਨਵਿਞ੍ਞਾਣਸ੍ਸ ਵਤ੍ਥੁ ਚ ਆਰਮ੍ਮਣਞ੍ਚ, ਅਞ੍ਞਂ ਜਿਵ੍ਹਾਵਿਞ੍ਞਾਣਸ੍ਸ ਵਤ੍ਥੁ ਚ ਆਰਮ੍ਮਣਞ੍ਚ, ਅਞ੍ਞਂ ਕਾਯਵਿਞ੍ਞਾਣਸ੍ਸ ਵਤ੍ਥੁ ਚ ਆਰਮ੍ਮਣਞ੍ਚ.
੭੬੩. ਨ ਅਞ੍ਞਮਞ੍ਞਸ੍ਸ ਗੋਚਰਵਿਸਯਂ ਪਚ੍ਚਨੁਭੋਨ੍ਤੀਤਿ ਚਕ੍ਖੁਵਿਞ੍ਞਾਣਸ੍ਸ ਗੋਚਰਵਿਸਯਂ ਸੋਤਵਿਞ੍ਞਾਣਂ ਨ ਪਚ੍ਚਨੁਭੋਤਿ, ਸੋਤਵਿਞ੍ਞਾਣਸ੍ਸ ਗੋਚਰਵਿਸਯਮ੍ਪਿ ਚਕ੍ਖੁਵਿਞ੍ਞਾਣਂ ਨ ਪਚ੍ਚਨੁਭੋਤਿ. ਚਕ੍ਖੁਵਿਞ੍ਞਾਣਸ੍ਸ ਗੋਚਰਵਿਸਯਂ ਘਾਨਵਿਞ੍ਞਾਣਂ ਨ ਪਚ੍ਚਨੁਭੋਤਿ, ਘਾਨਵਿਞ੍ਞਾਣਸ੍ਸ ਗੋਚਰਵਿਸਯਮ੍ਪਿ ਚਕ੍ਖੁਵਿਞ੍ਞਾਣਂ ਨ ਪਚ੍ਚਨੁਭੋਤਿ. ਚਕ੍ਖੁਵਿਞ੍ਞਾਣਸ੍ਸ ਗੋਚਰਵਿਸਯਂ ਜਿਵ੍ਹਾਵਿਞ੍ਞਾਣਂ ਨ ਪਚ੍ਚਨੁਭੋਤਿ, ਜਿਵ੍ਹਾਵਿਞ੍ਞਾਣਸ੍ਸ ਗੋਚਰਵਿਸਯਮ੍ਪਿ ਚਕ੍ਖੁਵਿਞ੍ਞਾਣਂ ਨ ਪਚ੍ਚਨੁਭੋਤਿ. ਚਕ੍ਖੁਵਿਞ੍ਞਾਣਸ੍ਸ ਗੋਚਰਵਿਸਯਂ ਕਾਯਵਿਞ੍ਞਾਣਂ ਨ ਪਚ੍ਚਨੁਭੋਤਿ, ਕਾਯਵਿਞ੍ਞਾਣਸ੍ਸ ਗੋਚਰਵਿਸਯਮ੍ਪਿ ਚਕ੍ਖੁਵਿਞ੍ਞਾਣਂ ਨ ਪਚ੍ਚਨੁਭੋਤਿ. ਸੋਤਵਿਞ੍ਞਾਣਸ੍ਸ…ਪੇ… ਘਾਨਵਿਞ੍ਞਾਣਸ੍ਸ…ਪੇ… ਜਿਵ੍ਹਾਵਿਞ੍ਞਾਣਸ੍ਸ…ਪੇ… ਕਾਯਵਿਞ੍ਞਾਣਸ੍ਸ ਗੋਚਰਵਿਸਯਂ ਚਕ੍ਖੁਵਿਞ੍ਞਾਣਂ ਨ ਪਚ੍ਚਨੁਭੋਤਿ, ਚਕ੍ਖੁਵਿਞ੍ਞਾਣਸ੍ਸ ਗੋਚਰਵਿਸਯਮ੍ਪਿ ਕਾਯਵਿਞ੍ਞਾਣਂ ਨ ਪਚ੍ਚਨੁਭੋਤਿ. ਕਾਯਵਿਞ੍ਞਾਣਸ੍ਸ ਗੋਚਰਵਿਸਯਂ ਸੋਤਵਿਞ੍ਞਾਣਂ ਨ ਪਚ੍ਚਨੁਭੋਤਿ, ਸੋਤਵਿਞ੍ਞਾਣਸ੍ਸ ਗੋਚਰਵਿਸਯਮ੍ਪਿ ਕਾਯਵਿਞ੍ਞਾਣਂ ਨ ਪਚ੍ਚਨੁਭੋਤਿ. ਕਾਯਵਿਞ੍ਞਾਣਸ੍ਸ ਗੋਚਰਵਿਸਯਂ ਘਾਨਵਿਞ੍ਞਾਣਂ ਨ ਪਚ੍ਚਨੁਭੋਤਿ, ਘਾਨਵਿਞ੍ਞਾਣਸ੍ਸ ਗੋਚਰਵਿਸਯਮ੍ਪਿ ਕਾਯਵਿਞ੍ਞਾਣਂ ਨ ਪਚ੍ਚਨੁਭੋਤਿ. ਕਾਯਵਿਞ੍ਞਾਣਸ੍ਸ ਗੋਚਰਵਿਸਯਂ ਜਿਵ੍ਹਾਵਿਞ੍ਞਾਣਂ ਨ ਪਚ੍ਚਨੁਭੋਤਿ, ਜਿਵ੍ਹਾਵਿਞ੍ਞਾਣਸ੍ਸ ਗੋਚਰਵਿਸਯਮ੍ਪਿ ਕਾਯਵਿਞ੍ਞਾਣਂ ਨ ਪਚ੍ਚਨੁਭੋਤਿ.
੭੬੪. ਨ ਅਸਮਨ੍ਨਾਹਾਰਾ ਉਪ੍ਪਜ੍ਜਨ੍ਤੀਤਿ ਸਮਨ੍ਨਾਹਰਨ੍ਤਸ੍ਸ ਉਪ੍ਪਜ੍ਜਨ੍ਤਿ.
ਨ ਅਮਨਸਿਕਾਰਾ ਉਪ੍ਪਜ੍ਜਨ੍ਤੀਤਿ ਮਨਸਿਕਰੋਨ੍ਤਸ੍ਸ ਉਪ੍ਪਜ੍ਜਨ੍ਤਿ.
ਨ ਅਬ੍ਬੋਕਿਣ੍ਣਾ ਉਪ੍ਪਜ੍ਜਨ੍ਤੀਤਿ ਨ ਪਟਿਪਾਟਿਯਾ ਉਪ੍ਪਜ੍ਜਨ੍ਤਿ.
ਨ ਅਪੁਬ੍ਬਂ ਅਚਰਿਮਂ ਉਪ੍ਪਜ੍ਜਨ੍ਤੀਤਿ ਨ ਏਕਕ੍ਖਣੇ ਉਪ੍ਪਜ੍ਜਨ੍ਤਿ.
੭੬੫. ਨ ਅਞ੍ਞਮਞ੍ਞਸ੍ਸ ਸਮਨਨ੍ਤਰਾ ਉਪ੍ਪਜ੍ਜਨ੍ਤੀਤਿ ਚਕ੍ਖੁਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾ ਸੋਤਵਿਞ੍ਞਾਣਂ ਨ ਉਪ੍ਪਜ੍ਜਤਿ, ਸੋਤਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾਪਿ ਚਕ੍ਖੁਵਿਞ੍ਞਾਣਂ ਨ ਉਪ੍ਪਜ੍ਜਤਿ. ਚਕ੍ਖੁਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾ ਘਾਨਵਿਞ੍ਞਾਣਂ ਨ ਉਪ੍ਪਜ੍ਜਤਿ, ਘਾਨਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾਪਿ ਚਕ੍ਖੁਵਿਞ੍ਞਾਣਂ ਨ ਉਪ੍ਪਜ੍ਜਤਿ. ਚਕ੍ਖੁਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾ ਜਿਵ੍ਹਾਵਿਞ੍ਞਾਣਂ ਨ ਉਪ੍ਪਜ੍ਜਤਿ, ਜਿਵ੍ਹਾਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾਪਿ ਚਕ੍ਖੁਵਿਞ੍ਞਾਣਂ ਨ ਉਪ੍ਪਜ੍ਜਤਿ. ਚਕ੍ਖੁਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾ ਕਾਯਵਿਞ੍ਞਾਣਂ ਨ ਉਪ੍ਪਜ੍ਜਤਿ, ਕਾਯਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾਪਿ ਚਕ੍ਖੁਵਿਞ੍ਞਾਣਂ ਨ ਉਪ੍ਪਜ੍ਜਤਿ. ਸੋਤਵਿਞ੍ਞਾਣਸ੍ਸ…ਪੇ… ਘਾਨਵਿਞ੍ਞਾਣਸ੍ਸ…ਪੇ… ਜਿਵ੍ਹਾਵਿਞ੍ਞਾਣਸ੍ਸ…ਪੇ… ਕਾਯਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾ ਚਕ੍ਖੁਵਿਞ੍ਞਾਣਂ ਨ ਉਪ੍ਪਜ੍ਜਤਿ, ਚਕ੍ਖੁਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾਪਿ ਕਾਯਵਿਞ੍ਞਾਣਂ ਨ ਉਪ੍ਪਜ੍ਜਤਿ. ਕਾਯਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾ ਸੋਤਵਿਞ੍ਞਾਣਂ ਨ ਉਪ੍ਪਜ੍ਜਤਿ, ਸੋਤਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾਪਿ ਕਾਯਵਿਞ੍ਞਾਣਂ ਨ ਉਪ੍ਪਜ੍ਜਤਿ. ਕਾਯਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾ ਘਾਨਵਿਞ੍ਞਾਣਂ ਨ ਉਪ੍ਪਜ੍ਜਤਿ, ਘਾਨਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾਪਿ ਕਾਯਵਿਞ੍ਞਾਣਂ ਨ ਉਪ੍ਪਜ੍ਜਤਿ. ਕਾਯਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾ ਜਿਵ੍ਹਾਵਿਞ੍ਞਾਣਂ ਨ ਉਪ੍ਪਜ੍ਜਤਿ, ਜਿਵ੍ਹਾਵਿਞ੍ਞਾਣਸ੍ਸ ਉਪ੍ਪਨ੍ਨਸਮਨਨ੍ਤਰਾਪਿ ਕਾਯਵਿਞ੍ਞਾਣਂ ਨ ਉਪ੍ਪਜ੍ਜਤਿ.
੭੬੬. ਪਞ੍ਚ ਵਿਞ੍ਞਾਣਾ ਅਨਾਭੋਗਾਤਿ ਪਞ੍ਚਨ੍ਨਂ ਵਿਞ੍ਞਾਣਾਨਂ ਨਤ੍ਥਿ ਆਵਟ੍ਟਨਾ ਵਾ ਆਭੋਗੋ ਵਾ ਸਮਨ੍ਨਾਹਾਰੋ ਵਾ ਮਨਸਿਕਾਰੋ ਵਾ.
ਪਞ੍ਚਹਿ ਵਿਞ੍ਞਾਣੇਹਿ ਨ ਕਞ੍ਚਿ ਧਮ੍ਮਂ ਪਟਿਵਿਜਾਨਾਤੀਤਿ ਪਞ੍ਚਹਿ ਵਿਞ੍ਞਾਣੇਹਿ ਨ ਕਞ੍ਚਿ ਧਮ੍ਮਂ ਪਟਿਵਿਜਾਨਾਤਿ.
ਅਞ੍ਞਤ੍ਰ ਅਭਿਨਿਪਾਤਮਤ੍ਤਾਤਿ ਅਞ੍ਞਤ੍ਰ ਆਪਾਤਮਤ੍ਤਾ.
ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾਪਿ ਨ ਕਞ੍ਚਿ ਧਮ੍ਮਂ ਪਟਿਵਿਜਾਨਾਤੀਤਿ ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾ ਮਨੋਧਾਤੁਯਾਪਿ ਨ ਕਞ੍ਚਿ ਧਮ੍ਮਂ ਪਟਿਵਿਜਾਨਾਤਿ.
ਪਞ੍ਚਹਿ ਵਿਞ੍ਞਾਣੇਹਿ ਨ ਕਞ੍ਚਿ ਇਰਿਯਾਪਥਂ ਕਪ੍ਪੇਤੀਤਿ ਪਞ੍ਚਹਿ ਵਿਞ੍ਞਾਣੇਹਿ ਨ ਕਞ੍ਚਿ ਇਰਿਯਾਪਥਂ ਕਪ੍ਪੇਤਿ – ਗਮਨਂ ਵਾ ਠਾਨਂ ਵਾ ਨਿਸਜ੍ਜਂ ਵਾ ਸੇਯ੍ਯਂ ਵਾ.
ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾਪਿ ਨ ਕਞ੍ਚਿ ਇਰਿਯਾਪਥਂ ਕਪ੍ਪੇਤੀਤਿ ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾ ਮਨੋਧਾਤੁਯਾਪਿ ਨ ਕਞ੍ਚਿ ਇਰਿਯਾਪਥਂ ਕਪ੍ਪੇਤਿ – ਗਮਨਂ ਵਾ ਠਾਨਂ ਵਾ ਨਿਸਜ੍ਜਂ ਵਾ ਸੇਯ੍ਯਂ ਵਾ.
ਪਞ੍ਚਹਿ ਵਿਞ੍ਞਾਣੇਹਿ ਨ ਕਾਯਕਮ੍ਮਂ ਨ ਵਚੀਕਮ੍ਮਂ ਪਟ੍ਠਪੇਤੀਤਿ ਪਞ੍ਚਹਿ ਵਿਞ੍ਞਾਣੇਹਿ ਨ ਕਾਯਕਮ੍ਮਂ ਨ ਵਚੀਕਮ੍ਮਂ ਪਟ੍ਠਪੇਤਿ.
ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾਪਿ ਨ ਕਾਯਕਮ੍ਮਂ ਨ ਵਚੀਕਮ੍ਮਂ ਪਟ੍ਠਪੇਤੀਤਿ ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾ ਮਨੋਧਾਤੁਯਾਪਿ ਨ ਕਾਯਕਮ੍ਮਂ ਨ ਵਚੀਕਮ੍ਮਂ ਪਟ੍ਠਪੇਤਿ.
ਪਞ੍ਚਹਿ ਵਿਞ੍ਞਾਣੇਹਿ ਨ ਕੁਸਲਾਕੁਸਲਂ ਧਮ੍ਮਂ ਸਮਾਦਿਯਤੀਤਿ ਪਞ੍ਚਹਿ ਵਿਞ੍ਞਾਣੇਹਿ ਨ ਕੁਸਲਾਕੁਸਲਂ ਧਮ੍ਮਂ ਸਮਾਦਿਯਤਿ.
ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾਪਿ ਨ ਕੁਸਲਾਕੁਸਲਂ ਧਮ੍ਮਂ ਸਮਾਦਿਯਤੀਤਿ ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾ ਮਨੋਧਾਤੁਯਾਪਿ ਨ ਕੁਸਲਾਕੁਸਲਂ ਧਮ੍ਮਂ ਸਮਾਦਿਯਤਿ.
ਪਞ੍ਚਹਿ ਵਿਞ੍ਞਾਣੇਹਿ ਨ ਸਮਾਪਜ੍ਜਤਿ ਨ ਵੁਟ੍ਠਾਤੀਤਿ ਪਞ੍ਚਹਿ ਵਿਞ੍ਞਾਣੇਹਿ ਨ ਸਮਾਪਜ੍ਜਤਿ ਨ ਵੁਟ੍ਠਾਤਿ.
ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾਪਿ ਨ ਸਮਾਪਜ੍ਜਤਿ ਨ ਵੁਟ੍ਠਾਤੀਤਿ ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾ ਮਨੋਧਾਤੁਯਾਪਿ ਨ ਸਮਾਪਜ੍ਜਤਿ ਨ ਵੁਟ੍ਠਾਤਿ.
ਪਞ੍ਚਹਿ ਵਿਞ੍ਞਾਣੇਹਿ ਨ ਚਵਤਿ ਨ ਉਪ੍ਪਜ੍ਜਤੀਤਿ ਪਞ੍ਚਹਿ ਵਿਞ੍ਞਾਣੇਹਿ ਨ ਚਵਤਿ ਨ ਉਪ੍ਪਜ੍ਜਤਿ.
ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾਪਿ ਨ ਚਵਤਿ ਨ ਉਪ੍ਪਜ੍ਜਤੀਤਿ ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾ ਮਨੋਧਾਤੁਯਾਪਿ ਨ ਚਵਤਿ ਨ ਉਪ੍ਪਜ੍ਜਤਿ.
ਪਞ੍ਚਹਿ ਵਿਞ੍ਞਾਣੇਹਿ ਨ ਸੁਪਤਿ ਨ ਪਟਿਬੁਜ੍ਝਤਿ ਨ ਸੁਪਿਨਂ ਪਸ੍ਸਤੀਤਿ ਪਞ੍ਚਹਿ ਵਿਞ੍ਞਾਣੇਹਿ ਨ ਸੁਪਤਿ ਨ ਪਟਿਬੁਜ੍ਝਤਿ ਨ ਸੁਪਿਨਂ ਪਸ੍ਸਤਿ.
ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾਪਿ ਨ ਸੁਪਤਿ ਨ ਪਟਿਬੁਜ੍ਝਤਿ ਨ ਸੁਪਿਨਂ ਪਸ੍ਸਤੀਤਿ ਪਞ੍ਚਨ੍ਨਂ ਵਿਞ੍ਞਾਣਾਨਂ ਸਮਨਨ੍ਤਰਾ ਮਨੋਧਾਤੁਯਾਪਿ ਨ ਸੁਪਤਿ ਨ ਪਟਿਬੁਜ੍ਝਤਿ ਨ ਸੁਪਿਨਂ ਪਸ੍ਸਤਿ. ਏਵਂ ਯਾਥਾਵਕਵਤ੍ਥੁਵਿਭਾਵਨਾ ਪਞ੍ਞਾ.
ਏਵਂ ਏਕਵਿਧੇਨ ਞਾਣਵਤ੍ਥੁ.
ਏਕਕਂ.
੨. ਦੁਕਨਿਦ੍ਦੇਸੋ
੭੬੭. (੧) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਲੋਕਿਯਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਲੋਕੁਤ੍ਤਰਾ ਪਞ੍ਞਾ.
(੨) ਸਬ੍ਬਾਵ ਪਞ੍ਞਾ ਕੇਨਚਿ ਵਿਞ੍ਞੇਯ੍ਯਾ, ਕੇਨਚਿ ਨ ਵਿਞ੍ਞੇਯ੍ਯਾ.
(੩) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਸਾਸਵਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਨਾਸਵਾ ਪਞ੍ਞਾ.
(੪) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਆਸਵਵਿਪ੍ਪਯੁਤ੍ਤਾ ਸਾਸਵਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਆਸਵਵਿਪ੍ਪਯੁਤ੍ਤਾ ਅਨਾਸਵਾ ਪਞ੍ਞਾ.
(੫) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਸਂਯੋਜਨਿਯਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਸਂਯੋਜਨਿਯਾ ਪਞ੍ਞਾ.
(੬) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਸਂਯੋਜਨਵਿਪ੍ਪਯੁਤ੍ਤਾ ਸਂਯੋਜਨਿਯਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਸਂਯੋਜਨਵਿਪ੍ਪਯੁਤ੍ਤਾ ਅਸਂਯੋਜਨਿਯਾ ਪਞ੍ਞਾ.
(੭) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਗਨ੍ਥਨਿਯਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਗਨ੍ਥਨਿਯਾ ਪਞ੍ਞਾ.
(੮) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਗਨ੍ਥਵਿਪ੍ਪਯੁਤ੍ਤਾ ਗਨ੍ਥਨਿਯਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਗਨ੍ਥਵਿਪ੍ਪਯੁਤ੍ਤਾ ਅਗਨ੍ਥਨਿਯਾ ਪਞ੍ਞਾ.
(੯) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਓਘਨਿਯਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਨੋਘਨਿਯਾ ਪਞ੍ਞਾ.
(੧੦) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਓਘਵਿਪ੍ਪਯੁਤ੍ਤਾ ਓਘਨਿਯਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਓਘਵਿਪ੍ਪਯੁਤ੍ਤਾ ਅਨੋਘਨਿਯਾ ਪਞ੍ਞਾ.
(੧੧) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਯੋਗਨਿਯਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਯੋਗਨਿਯਾ ਪਞ੍ਞਾ.
(੧੨) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਯੋਗਵਿਪ੍ਪਯੁਤ੍ਤਾ ਯੋਗਨਿਯਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਯੋਗਵਿਪ੍ਪਯੁਤ੍ਤਾ ਅਯੋਗਨਿਯਾ ਪਞ੍ਞਾ.
(੧੩) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਨੀਵਰਣਿਯਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਨੀਵਰਣਿਯਾ ਪਞ੍ਞਾ.
(੧੪) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਨੀਵਰਣਵਿਪ੍ਪਯੁਤ੍ਤਾ ਨੀਵਰਣਿਯਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਨੀਵਰਣਵਿਪ੍ਪਯੁਤ੍ਤਾ ਅਨੀਵਰਣਿਯਾ ਪਞ੍ਞਾ.
(੧੫) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਪਰਾਮਟ੍ਠਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਪਰਾਮਟ੍ਠਾ ਪਞ੍ਞਾ.
(੧੬) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਪਰਾਮਾਸਵਿਪ੍ਪਯੁਤ੍ਤਾ ਪਰਾਮਟ੍ਠਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਪਰਾਮਾਸਵਿਪ੍ਪਯੁਤ੍ਤਾ ਅਪਰਾਮਟ੍ਠਾ ਪਞ੍ਞਾ.
(੧੭) ਤੀਸੁ ਭੂਮੀਸੁ ਵਿਪਾਕੇ ਪਞ੍ਞਾ ਉਪਾਦਿਨ੍ਨਾ ਪਞ੍ਞਾ, ਤੀਸੁ ਭੂਮੀਸੁ ਕੁਸਲੇ ਤੀਸੁ ਭੂਮੀਸੁ ਕਿਰਿਯਾਬ੍ਯਾਕਤੇ ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਨੁਪਾਦਿਨ੍ਨਾ ਪਞ੍ਞਾ.
(੧੮) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਉਪਾਦਾਨਿਯਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਨੁਪਾਦਾਨਿਯਾ ਪਞ੍ਞਾ.
(੧੯) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਉਪਾਦਾਨਵਿਪ੍ਪਯੁਤ੍ਤਾ ਉਪਾਦਾਨਿਯਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਉਪਾਦਾਨਵਿਪ੍ਪਯੁਤ੍ਤਾ ਅਨੁਪਾਦਾਨਿਯਾ ਪਞ੍ਞਾ.
(੨੦) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਸਂਕਿਲੇਸਿਕਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਸਂਕਿਲੇਸਿਕਾ ਪਞ੍ਞਾ.
(੨੧) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਕਿਲੇਸਵਿਪ੍ਪਯੁਤ੍ਤਾ ਸਂਕਿਲੇਸਿਕਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਕਿਲੇਸਵਿਪ੍ਪਯੁਤ੍ਤਾ ਅਸਂਕਿਲੇਸਿਕਾ ਪਞ੍ਞਾ.
(੨੨) ਵਿਤਕ੍ਕਸਮ੍ਪਯੁਤ੍ਤਾ ਪਞ੍ਞਾ ਸਵਿਤਕ੍ਕਾ ਪਞ੍ਞਾ, ਵਿਤਕ੍ਕਵਿਪ੍ਪਯੁਤ੍ਤਾ ਪਞ੍ਞਾ ਅਵਿਤਕ੍ਕਾ ਪਞ੍ਞਾ.
(੨੩) ਵਿਚਾਰਸਮ੍ਪਯੁਤ੍ਤਾ ਪਞ੍ਞਾ ਸਵਿਚਾਰਾ ਪਞ੍ਞਾ, ਵਿਚਾਰਵਿਪ੍ਪਯੁਤ੍ਤਾ ਪਞ੍ਞਾ ਅਵਿਚਾਰਾ ਪਞ੍ਞਾ.
(੨੪) ਪੀਤਿਸਮ੍ਪਯੁਤ੍ਤਾ ਪਞ੍ਞਾ ਸਪ੍ਪੀਤਿਕਾ ਪਞ੍ਞਾ, ਪੀਤਿਵਿਪ੍ਪਯੁਤ੍ਤਾ ਪਞ੍ਞਾ ਅਪ੍ਪੀਤਿਕਾ ਪਞ੍ਞਾ.
(੨੫) ਪੀਤਿਸਮ੍ਪਯੁਤ੍ਤਾ ਪਞ੍ਞਾ ਪੀਤਿਸਹਗਤਾ ਪਞ੍ਞਾ, ਪੀਤਿਵਿਪ੍ਪਯੁਤ੍ਤਾ ਪਞ੍ਞਾ ਨ ਪੀਤਿਸਹਗਤਾ ਪਞ੍ਞਾ.
(੨੬) ਸੁਖਸਮ੍ਪਯੁਤ੍ਤਾ ਪਞ੍ਞਾ ਸੁਖਸਹਗਤਾ ਪਞ੍ਞਾ, ਸੁਖਵਿਪ੍ਪਯੁਤ੍ਤਾ ਪਞ੍ਞਾ ਨ ਸੁਖਸਹਗਤਾ ਪਞ੍ਞਾ.
(੨੭) ਉਪੇਕ੍ਖਾਸਮ੍ਪਯੁਤ੍ਤਾ ਪਞ੍ਞਾ ਉਪੇਕ੍ਖਾਸਹਗਤਾ ਪਞ੍ਞਾ, ਉਪੇਕ੍ਖਾਵਿਪ੍ਪਯੁਤ੍ਤਾ ਪਞ੍ਞਾ ਨ ਉਪੇਕ੍ਖਾਸਹਗਤਾ ਪਞ੍ਞਾ.
(੨੮) ਕਾਮਾਵਚਰਕੁਸਲਾਬ੍ਯਾਕਤੇ ਪਞ੍ਞਾ ਕਾਮਾਵਚਰਾ ਪਞ੍ਞਾ, ਰੂਪਾਵਚਰਾ ਪਞ੍ਞਾ ਅਰੂਪਾਵਚਰਾ ਪਞ੍ਞਾ, ਅਪਰਿਯਾਪਨ੍ਨਾ ਪਞ੍ਞਾ ਨ ਕਾਮਾਵਚਰਾ ਪਞ੍ਞਾ.
(੨੯) ਰੂਪਾਵਚਰਕੁਸਲਾਬ੍ਯਾਕਤੇ ਪਞ੍ਞਾ ਰੂਪਾਵਚਰਾ ਪਞ੍ਞਾ, ਕਾਮਾਵਚਰਾ ਪਞ੍ਞਾ ਅਰੂਪਾਵਚਰਾ ਪਞ੍ਞਾ ਅਪਰਿਯਾਪਨ੍ਨਾ ਪਞ੍ਞਾ ਨ ਰੂਪਾਵਚਰਾ ਪਞ੍ਞਾ.
(੩੦) ਅਰੂਪਾਵਚਰਕੁਸਲਾਬ੍ਯਾਕਤੇ ਪਞ੍ਞਾ ਅਰੂਪਾਵਚਰਾ ਪਞ੍ਞਾ, ਕਾਮਾਵਚਰਾ ਪਞ੍ਞਾ ਰੂਪਾਵਚਰਾ ਪਞ੍ਞਾ ਅਪਰਿਯਾਪਨ੍ਨਾ ਪਞ੍ਞਾ ਨ ਅਰੂਪਾਵਚਰਾ ਪਞ੍ਞਾ.
(੩੧) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਪਰਿਯਾਪਨ੍ਨਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਪਰਿਯਾਪਨ੍ਨਾ ਪਞ੍ਞਾ.
(੩੨) ਚਤੂਸੁ ਮਗ੍ਗੇਸੁ ਪਞ੍ਞਾ ਨਿਯ੍ਯਾਨਿਕਾ ਪਞ੍ਞਾ, ਤੀਸੁ ਭੂਮੀਸੁ ਕੁਸਲੇ ਚਤੂਸੁ ਭੂਮੀਸੁ ਵਿਪਾਕੇ ਤੀਸੁ ਭੂਮੀਸੁ ਕਿਰਿਯਾਬ੍ਯਾਕਤੇ ਪਞ੍ਞਾ ਅਨਿਯ੍ਯਾਨਿਕਾ ਪਞ੍ਞਾ.
(੩੩) ਚਤੂਸੁ ਮਗ੍ਗੇਸੁ ਪਞ੍ਞਾ ਨਿਯਤਾ ਪਞ੍ਞਾ, ਤੀਸੁ ਭੂਮੀਸੁ ਕੁਸਲੇ ਚਤੂਸੁ ਭੂਮੀਸੁ ਵਿਪਾਕੇ ਤੀਸੁ ਭੂਮੀਸੁ ਕਿਰਿਯਾਬ੍ਯਾਕਤੇ ਪਞ੍ਞਾ ਅਨਿਯਤਾ ਪਞ੍ਞਾ.
(੩੪) ਤੀਸੁ ਭੂਮੀਸੁ ਕੁਸਲਾਬ੍ਯਾਕਤੇ ਪਞ੍ਞਾ ਸਉਤ੍ਤਰਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਨੁਤ੍ਤਰਾ ਪਞ੍ਞਾ.
(੩੫) ਤਤ੍ਥ ਕਤਮਾ ਅਤ੍ਥਜਾਪਿਕਾ ਪਞ੍ਞਾ?
ਚਤੂਸੁ ਭੂਮੀਸੁ ਕੁਸਲੇ ਅਰਹਤੋ ਅਭਿਞ੍ਞਂ ਉਪ੍ਪਾਦੇਨ੍ਤਸ੍ਸ ਸਮਾਪਤ੍ਤਿਂ ਉਪ੍ਪਾਦੇਨ੍ਤਸ੍ਸ ਕਿਰਿਯਾਬ੍ਯਾਕਤੇ ਪਞ੍ਞਾ ਅਤ੍ਥਜਾਪਿਕਾ ਪਞ੍ਞਾ, ਚਤੂਸੁ ਭੂਮੀਸੁ ਵਿਪਾਕੇ ਅਰਹਤੋ ਉਪ੍ਪਨ੍ਨਾਯ ਅਭਿਞ੍ਞਾਯ ਉਪ੍ਪਨ੍ਨਾਯ ਸਮਾਪਤ੍ਤਿਯਾ ਕਿਰਿਯਾਬ੍ਯਾਕਤੇ ਪਞ੍ਞਾ ਜਾਪਿਤਤ੍ਥਾ ਪਞ੍ਞਾ.
ਏਵਂ ਦੁਵਿਧੇਨ ਞਾਣਵਤ੍ਥੁ.
ਦੁਕਂ.
੩. ਤਿਕਨਿਦ੍ਦੇਸੋ
੭੬੮. (੧. ਕ) ਤਤ੍ਥ ਕਤਮਾ ਚਿਨ੍ਤਾਮਯਾ ਪਞ੍ਞਾ?
ਯੋਗਵਿਹਿਤੇਸੁ ਵਾ ਕਮ੍ਮਾਯਤਨੇਸੁ ਯੋਗਵਿਹਿਤੇਸੁ ਵਾ ਸਿਪ੍ਪਾਯਤਨੇਸੁ ਯੋਗਵਿਹਿਤੇਸੁ ਵਾ ਵਿਜ੍ਜਾਟ੍ਠਾਨੇਸੁ ਕਮ੍ਮਸ੍ਸਕਤਂ ਵਾ ਸਚ੍ਚਾਨੁਲੋਮਿਕਂ ਵਾ ਰੂਪਂ ਅਨਿਚ੍ਚਨ੍ਤਿ ਵਾ ਵੇਦਨਾ…ਪੇ… ਸਞ੍ਞਾ… ਸਙ੍ਖਾਰਾ… ਵਿਞ੍ਞਾਣਂ ਅਨਿਚ੍ਚਨ੍ਤਿ ਵਾ, ਯਂ ਏਵਰੂਪਿਂ ਅਨੁਲੋਮਿਕਂ ਖਨ੍ਤਿਂ ਦਿਟ੍ਠਿਂ ਰੁਚਿਂ ਮੁਦਿਂ ਪੇਕ੍ਖਂ ਧਮ੍ਮਨਿਜ੍ਝਾਨਕ੍ਖਨ੍ਤਿਂ ਪਰਤੋ ਅਸ੍ਸੁਤ੍ਵਾ ਪਟਿਲਭਤਿ – ਅਯਂ ਵੁਚ੍ਚਤਿ ‘‘ਚਿਨ੍ਤਾਮਯਾ ਪਞ੍ਞਾ’’.
(ਖ) ਤਤ੍ਥ ਕਤਮਾ ਸੁਤਮਯਾ ਪਞ੍ਞਾ? ਯੋਗਵਿਹਿਤੇਸੁ ਵਾ ਕਮ੍ਮਾਯਤਨੇਸੁ ਯੋਗਵਿਹਿਤੇਸੁ ਵਾ ਸਿਪ੍ਪਾਯਤਨੇਸੁ ਯੋਗਵਿਹਿਤੇਸੁ ਵਾ ਵਿਜ੍ਜਾਟ੍ਠਾਨੇਸੁ ਕਮ੍ਮਸ੍ਸਕਤਂ ਵਾ ਸਚ੍ਚਾਨੁਲੋਮਿਕਂ ਵਾ ਰੂਪਂ ਅਨਿਚ੍ਚਨ੍ਤਿ ਵਾ ਵੇਦਨਾ…ਪੇ… ਸਞ੍ਞਾ… ਸਙ੍ਖਾਰਾ… ਵਿਞ੍ਞਾਣਂ ਅਨਿਚ੍ਚਨ੍ਤਿ ਵਾ, ਯਂ ਏਵਰੂਪਿਂ ਅਨੁਲੋਮਿਕਂ ਖਨ੍ਤਿਂ ਦਿਟ੍ਠਿਂ ਰੁਚਿਂ ਮੁਦਿਂ ਪੇਕ੍ਖਂ ਧਮ੍ਮਨਿਜ੍ਝਾਨਕ੍ਖਨ੍ਤਿਂ ਪਰਤੋ ਸੁਤ੍ਵਾ ਪਟਿਲਭਤਿ – ਅਯਂ ਵੁਚ੍ਚਤਿ ‘‘ਸੁਤਮਯਾ ਪਞ੍ਞਾ’’.
(ਗ) ਸਬ੍ਬਾਪਿ ਸਮਾਪਨ੍ਨਸ੍ਸ ਪਞ੍ਞਾ ਭਾਵਨਾਮਯਾ ਪਞ੍ਞਾ.
੭੬੯. (੨. ਕ) ਤਤ੍ਥ ਕਤਮਾ ਦਾਨਮਯਾ ਪਞ੍ਞਾ? ਦਾਨਂ ਆਰਬ੍ਭ ਦਾਨਾਧਿਗਚ੍ਛ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਦਾਨਮਯਾ ਪਞ੍ਞਾ’’.
(ਖ) ਤਤ੍ਥ ਕਤਮਾ ਸੀਲਮਯਾ ਪਞ੍ਞਾ? ਸੀਲਂ ਆਰਬ੍ਭ ਸੀਲਾਧਿਗਚ੍ਛ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਸੀਲਮਯਾ ਪਞ੍ਞਾ’’.
(ਗ) ਸਬ੍ਬਾਪਿ ਸਮਾਪਨ੍ਨਸ੍ਸ ਪਞ੍ਞਾ ਭਾਵਨਾਮਯਾ ਪਞ੍ਞਾ.
੭੭੦. (੩. ਕ) ਤਤ੍ਥ ਕਤਮਾ ਅਧਿਸੀਲੇ ਪਞ੍ਞਾ? ਪਾਤਿਮੋਕ੍ਖਸਂਵਰਂ ਸਂਵਰਨ੍ਤਸ੍ਸ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਅਧਿਸੀਲੇ ਪਞ੍ਞਾ’’.
(ਖ) ਤਤ੍ਥ ਕਤਮਾ ਅਧਿਚਿਤ੍ਤੇ ਪਞ੍ਞਾ? ਰੂਪਾਵਚਰਾਰੂਪਾਵਚਰਸਮਾਪਤ੍ਤਿਂ ਸਮਾਪਜ੍ਜਨ੍ਤਸ੍ਸ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਅਧਿਚਿਤ੍ਤੇ ਪਞ੍ਞਾ’’.
(ਗ) ਤਤ੍ਥ ਕਤਮਾ ਅਧਿਪਞ੍ਞਾਯ ਪਞ੍ਞਾ? ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ – ਅਯਂ ਵੁਚ੍ਚਤਿ ‘‘ਅਧਿਪਞ੍ਞਾਯ ਪਞ੍ਞਾ’’.
੭੭੧. (੪. ਕ) ਤਤ੍ਥ ਕਤਮਂ ਆਯਕੋਸਲ੍ਲਂ? ‘‘ਇਮੇ ਧਮ੍ਮੇ ਮਨਸਿਕਰੋਤੋ ਅਨੁਪ੍ਪਨ੍ਨਾ ਚੇਵ ਅਕੁਸਲਾ ਧਮ੍ਮਾ ਨ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾ ਚ ਅਕੁਸਲਾ ਧਮ੍ਮਾ ਪਹੀਯਨ੍ਤਿ. ਇਮੇ ਵਾ ਪਨਿਮੇ ਧਮ੍ਮੇ ਮਨਸਿਕਰੋਤੋ ਅਨੁਪ੍ਪਨ੍ਨਾ ਚੇਵ ਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾ ਚ ਕੁਸਲਾ ਧਮ੍ਮਾ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਸਂਵਤ੍ਤਨ੍ਤੀ’’ਤਿ – ਯਾ ਤਤ੍ਥ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਇਦਂ ਵੁਚ੍ਚਤਿ ‘‘ਆਯਕੋਸਲ੍ਲਂ’’.
(ਖ) ਤਤ੍ਥ ਕਤਮਂ ਅਪਾਯਕੋਸਲ੍ਲਂ? ‘‘ਇਮੇ ਧਮ੍ਮੇ ਮਨਸਿਕਰੋਤੋ ਅਨੁਪ੍ਪਨ੍ਨਾ ਚੇਵ ਕੁਸਲਾ ਧਮ੍ਮਾ ਨ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾ ਚ ਕੁਸਲਾ ਧਮ੍ਮਾ ਨਿਰੁਜ੍ਝਨ੍ਤਿ. ਇਮੇ ਵਾ ਪਨਿਮੇ ਧਮ੍ਮੇ ਮਨਸਿਕਰੋਤੋ ਅਨੁਪ੍ਪਨ੍ਨਾ ਚੇਵ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾ ਚ ਅਕੁਸਲਾ ਧਮ੍ਮਾ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਸਂਵਤ੍ਤਨ੍ਤੀ’’ਤਿ – ਯਾ ਤਤ੍ਥ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਇਦਂ ਵੁਚ੍ਚਤਿ ‘‘ਅਪਾਯਕੋਸਲ੍ਲਂ’’.
(ਗ) ਸਬ੍ਬਾਪਿ ਤਤ੍ਰੁਪਾਯਾ ਪਞ੍ਞਾ ਉਪਾਯਕੋਸਲ੍ਲਂ.
੭੭੨. (੫. ਕ) ਚਤੂਸੁ ਭੂਮੀਸੁ ਵਿਪਾਕੇ ਪਞ੍ਞਾ ਵਿਪਾਕਾ ਪਞ੍ਞਾ.
(ਖ) ਚਤੂਸੁ ਭੂਮੀਸੁ ਕੁਸਲੇ ਪਞ੍ਞਾ ਵਿਪਾਕਧਮ੍ਮਧਮ੍ਮਾ ਪਞ੍ਞਾ.
(ਗ) ਤੀਸੁ ਭੂਮੀਸੁ ਕਿਰਿਯਾਬ੍ਯਾਕਤੇ ਪਞ੍ਞਾ ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਾ ਪਞ੍ਞਾ.
੭੭੩. (੬. ਕ) ਤੀਸੁ ਭੂਮੀਸੁ ਵਿਪਾਕੇ ਪਞ੍ਞਾ ਉਪਾਦਿਨ੍ਨੁਪਾਦਾਨਿਯਾ ਪਞ੍ਞਾ.
(ਖ) ਤੀਸੁ ਭੂਮੀਸੁ ਕੁਸਲੇ ਤੀਸੁ ਭੂਮੀਸੁ ਕਿਰਿਯਾਬ੍ਯਾਕਤੇ ਪਞ੍ਞਾ ਅਨੁਪਾਦਿਨ੍ਨੁਪਾਦਾਨਿਯਾ ਪਞ੍ਞਾ.
(ਗ) ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਨੁਪਾਦਿਨ੍ਨਅਨੁਪਾਦਾਨਿਯਾ ਪਞ੍ਞਾ.
੭੭੪. (੭. ਕ) ਵਿਤਕ੍ਕਵਿਚਾਰਸਮ੍ਪਯੁਤ੍ਤਾ ਪਞ੍ਞਾ ਸਵਿਤਕ੍ਕਸਵਿਚਾਰਾ ਪਞ੍ਞਾ.
(ਖ) ਵਿਤਕ੍ਕਵਿਪ੍ਪਯੁਤ੍ਤਾ ਵਿਚਾਰਸਮ੍ਪਯੁਤ੍ਤਾ ਪਞ੍ਞਾ ਅਵਿਤਕ੍ਕਵਿਚਾਰਮਤ੍ਤਾ ਪਞ੍ਞਾ.
(ਗ) ਵਿਤਕ੍ਕਵਿਚਾਰਵਿਪ੍ਪਯੁਤ੍ਤਾ ਪਞ੍ਞਾ ਅਵਿਤਕ੍ਕਅਵਿਚਾਰਾ ਪਞ੍ਞਾ.
੭੭੫. (੮. ਕ) ਪੀਤਿਸਮ੍ਪਯੁਤ੍ਤਾ ਪਞ੍ਞਾ ਪੀਤਿਸਹਗਤਾ ਪਞ੍ਞਾ.
(ਖ) ਸੁਖਸਮ੍ਪਯੁਤ੍ਤਾ ਪਞ੍ਞਾ ਸੁਖਸਹਗਤਾ ਪਞ੍ਞਾ.
(ਗ) ਉਪੇਕ੍ਖਾਸਮ੍ਪਯੁਤ੍ਤਾ ਪਞ੍ਞਾ ਉਪੇਕ੍ਖਾਸਹਗਤਾ ਪਞ੍ਞਾ.
੭੭੬. (੯. ਕ) ਤੀਸੁ ਭੂਮੀਸੁ ਕੁਸਲੇ ਪਞ੍ਞਾ ਆਚਯਗਾਮਿਨੀ ਪਞ੍ਞਾ.
(ਖ) ਚਤੂਸੁ ਮਗ੍ਗੇਸੁ ਪਞ੍ਞਾ ਅਪਚਯਗਾਮਿਨੀ ਪਞ੍ਞਾ.
(ਗ) ਚਤੂਸੁ ਭੂਮੀਸੁ ਵਿਪਾਕੇ ਤੀਸੁ ਭੂਮੀਸੁ ਕਿਰਿਯਾਬ੍ਯਾਕਤੇ ਪਞ੍ਞਾ ਨੇਵਾਚਯਗਾਮਿਨਾਪਚਯਗਾਮਿਨੀ ਪਞ੍ਞਾ.
੭੭੭. (੧੦. ਕ) ਚਤੂਸੁ ਮਗ੍ਗੇਸੁ ਤੀਸੁ ਫਲੇਸੁ ਪਞ੍ਞਾ ਸੇਕ੍ਖਾ ਪਞ੍ਞਾ.
(ਖ) ਉਪਰਿਟ੍ਠਿਮਾ [ਉਪਰਿਟ੍ਠਿਮੇ (ਸ੍ਯਾ.), ਉਪਰਿਟ੍ਠਿਮਂ (ਕ.)] ਅਰਹਤ੍ਤਫਲੇ ਪਞ੍ਞਾ ਅਸੇਕ੍ਖਾ ਪਞ੍ਞਾ.
(ਗ) ਤੀਸੁ ਭੂਮੀਸੁ ਕੁਸਲੇ ਤੀਸੁ ਭੂਮੀਸੁ ਵਿਪਾਕੇ ਤੀਸੁ ਭੂਮੀਸੁ ਕਿਰਿਯਾਬ੍ਯਾਕਤੇ ਪਞ੍ਞਾ ਨੇਵਸੇਕ੍ਖਨਾਸੇਕ੍ਖਾ ਪਞ੍ਞਾ.
੭੭੮. (੧੧. ਕ) ਕਾਮਾਵਚਰਕੁਸਲਾਬ੍ਯਾਕਤੇ ਪਞ੍ਞਾ ਪਰਿਤ੍ਤਾ ਪਞ੍ਞਾ.
(ਖ) ਰੂਪਾਵਚਰਾਰੂਪਾਵਚਰਕੁਸਲਾਬ੍ਯਾਕਤੇ ਪਞ੍ਞਾ ਮਹਗ੍ਗਤਾ ਪਞ੍ਞਾ.
(ਗ) ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਪ੍ਪਮਾਣਾ ਪਞ੍ਞਾ.
੭੭੯. (੧੨. ਕ) ਤਤ੍ਥ ਕਤਮਾ ਪਰਿਤ੍ਤਾਰਮ੍ਮਣਾ ਪਞ੍ਞਾ? ਪਰਿਤ੍ਤੇ ਧਮ੍ਮੇ ਆਰਬ੍ਭ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਪਰਿਤ੍ਤਾਰਮ੍ਮਣਾ ਪਞ੍ਞਾ’’.
੭੮੦. (ਖ) ਤਤ੍ਥ ਕਤਮਾ ਮਹਗ੍ਗਤਾਰਮ੍ਮਣਾ ਪਞ੍ਞਾ? ਮਹਗ੍ਗਤੇ ਧਮ੍ਮੇ ਆਰਬ੍ਭ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਮਹਗ੍ਗਤਾਰਮ੍ਮਣਾ ਪਞ੍ਞਾ’’.
੭੮੧. (ਗ) ਤਤ੍ਥ ਕਤਮਾ ਅਪ੍ਪਮਾਣਾਰਮ੍ਮਣਾ ਪਞ੍ਞਾ? ਅਪ੍ਪਮਾਣੇ ਧਮ੍ਮੇ ਆਰਬ੍ਭ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਅਪ੍ਪਮਾਣਾਰਮ੍ਮਣਾ ਪਞ੍ਞਾ’’.
੭੮੨. (੧੩. ਕ) ਤਤ੍ਥ ਕਤਮਾ ਮਗ੍ਗਾਰਮ੍ਮਣਾ ਪਞ੍ਞਾ? ਅਰਿਯਮਗ੍ਗਂ ਆਰਬ੍ਭ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਮਗ੍ਗਾਰਮ੍ਮਣਾ ਪਞ੍ਞਾ’’.
(ਖ) ਚਤੂਸੁ ਮਗ੍ਗੇਸੁ ਪਞ੍ਞਾ ਮਗ੍ਗਹੇਤੁਕਾ ਪਞ੍ਞਾ.
੭੮੩. (ਗ) ਤਤ੍ਥ ਕਤਮਾ ਮਗ੍ਗਾਧਿਪਤਿਨੀ ਪਞ੍ਞਾ? ਅਰਿਯਮਗ੍ਗਂ ਅਧਿਪਤਿਂ ਕਰਿਤ੍ਵਾ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਮਗ੍ਗਾਧਿਪਤਿਨੀ ਪਞ੍ਞਾ’’.
੭੮੪. (੧੪) ਚਤੂਸੁ ਭੂਮੀਸੁ ਵਿਪਾਕੇ ਪਞ੍ਞਾ ਸਿਯਾ ਉਪ੍ਪਨ੍ਨਾ, ਸਿਯਾ ਉਪ੍ਪਾਦਿਨੀ, ਨ ਵਤ੍ਤਬ੍ਬਾ ਅਨੁਪ੍ਪਨ੍ਨਾਤਿ. ਚਤੂਸੁ ਭੂਮੀਸੁ ਕੁਸਲੇ ਤੀਸੁ ਭੂਮੀਸੁ ਕਿਰਿਯਾਬ੍ਯਾਕਤੇ ਪਞ੍ਞਾ ਸਿਯਾ ਉਪ੍ਪਨ੍ਨਾ, ਸਿਯਾ ਅਨੁਪ੍ਪਨ੍ਨਾ, ਨ ਵਤ੍ਤਬ੍ਬਾ ਉਪ੍ਪਾਦਿਨੀਤਿ.
੭੮੫. (੧੫) ਸਬ੍ਬਾਵ ਪਞ੍ਞਾ ਸਿਯਾ ਅਤੀਤਾ, ਸਿਯਾ ਅਨਾਗਤਾ, ਸਿਯਾ ਪਚ੍ਚੁਪ੍ਪਨ੍ਨਾ.
੭੮੬. (੧੬. ਕ) ਤਤ੍ਥ ਕਤਮਾ ਅਤੀਤਾਰਮ੍ਮਣਾ ਪਞ੍ਞਾ? ਅਤੀਤੇ ਧਮ੍ਮੇ ਆਰਬ੍ਭ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਅਤੀਤਾਰਮ੍ਮਣਾ ਪਞ੍ਞਾ’’.
੭੮੭. (ਖ) ਤਤ੍ਥ ਕਤਮਾ ਅਨਾਗਤਾਰਮ੍ਮਣਾ ਪਞ੍ਞਾ? ਅਨਾਗਤੇ ਧਮ੍ਮੇ ਆਰਬ੍ਭ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਅਨਾਗਤਾਰਮ੍ਮਣਾ ਪਞ੍ਞਾ’’.
੭੮੮. (ਗ) ਤਤ੍ਥ ਕਤਮਾ ਪਚ੍ਚੁਪ੍ਪਨ੍ਨਾਰਮ੍ਮਣਾ ਪਞ੍ਞਾ? ਪਚ੍ਚੁਪ੍ਪਨ੍ਨੇ ਧਮ੍ਮੇ ਆਰਬ੍ਭ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ …ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਪਚ੍ਚੁਪ੍ਪਨ੍ਨਾਰਮ੍ਮਣਾ ਪਞ੍ਞਾ’’.
੭੮੯. (੧੭) ਸਬ੍ਬਾਵ ਪਞ੍ਞਾ ਸਿਯਾ ਅਜ੍ਝਤ੍ਤਾ, ਸਿਯਾ ਬਹਿਦ੍ਧਾ, ਸਿਯਾ ਅਜ੍ਝਤ੍ਤਬਹਿਦ੍ਧਾ.
੭੯੦. (੧੮. ਕ) ਤਤ੍ਥ ਕਤਮਾ ਅਜ੍ਝਤ੍ਤਾਰਮ੍ਮਣਾ ਪਞ੍ਞਾ? ਅਜ੍ਝਤ੍ਤੇ ਧਮ੍ਮੇ ਆਰਬ੍ਭ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਅਜ੍ਝਤ੍ਤਾਰਮ੍ਮਣਾ ਪਞ੍ਞਾ’’.
੭੯੧. (ਖ) ਤਤ੍ਥ ਕਤਮਾ ਬਹਿਦ੍ਧਾਰਮ੍ਮਣਾ ਪਞ੍ਞਾ? ਬਹਿਦ੍ਧਾਧਮ੍ਮੇ ਆਰਬ੍ਭ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਬਹਿਦ੍ਧਾਰਮ੍ਮਣਾ ਪਞ੍ਞਾ’’.
੭੯੨. (ਗ) ਤਤ੍ਥ ਕਤਮਾ ਅਜ੍ਝਤ੍ਤਬਹਿਦ੍ਧਾਰਮ੍ਮਣਾ ਪਞ੍ਞਾ? ਅਜ੍ਝਤ੍ਤਬਹਿਦ੍ਧਾ ਧਮ੍ਮੇ ਆਰਬ੍ਭ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਅਯਂ ਵੁਚ੍ਚਤਿ ‘‘ਅਜ੍ਝਤ੍ਤਬਹਿਦ੍ਧਾਰਮ੍ਮਣਾ ਪਞ੍ਞਾ’’.
ਏਵਂ ਤਿਵਿਧੇਨ ਞਾਣਵਤ੍ਥੁ.
ਤਿਕਂ.
੪. ਚਤੁਕ੍ਕਨਿਦ੍ਦੇਸੋ
੭੯੩. (੧. ਕ) ਤਤ੍ਥ ਕਤਮਂ ਕਮ੍ਮਸ੍ਸਕਤਞਾਣਂ? ‘‘ਅਤ੍ਥਿ ਦਿਨ੍ਨਂ, ਅਤ੍ਥਿ ਯਿਟ੍ਠਂ, ਅਤ੍ਥਿ ਹੁਤਂ, ਅਤ੍ਥਿ ਸੁਕਤਦੁਕ੍ਕਟਾਨਂ ਕਮ੍ਮਾਨਂ ਫਲਂ ਵਿਪਾਕੋ, ਅਤ੍ਥਿ ਅਯਂ ਲੋਕੋ, ਅਤ੍ਥਿ ਪਰੋ ਲੋਕੋ, ਅਤ੍ਥਿ ਮਾਤਾ, ਅਤ੍ਥਿ ਪਿਤਾ, ਅਤ੍ਥਿ ਸਤ੍ਤਾ ਓਪਪਾਤਿਕਾ, ਅਤ੍ਥਿ ਲੋਕੇ ਸਮਣਬ੍ਰਾਹ੍ਮਣਾ ਸਮ੍ਮਗ੍ਗਤਾ ਸਮ੍ਮਾਪਟਿਪਨ੍ਨਾ ਯੇ ਇਮਞ੍ਚ ਲੋਕਂ ਪਰਞ੍ਚ ਲੋਕਂ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਨ੍ਤੀ’’ਤਿ – ਯਾ ਏਵਰੂਪਾ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਇਦਂ ਵੁਚ੍ਚਤਿ ‘‘ਕਮ੍ਮਸ੍ਸਕਤਞਾਣਂ’’. ਠਪੇਤ੍ਵਾ ਸਚ੍ਚਾਨੁਲੋਮਿਕਂ ਞਾਣਂ, ਸਬ੍ਬਾਪਿ ਸਾਸਵਾ ਕੁਸਲਾ ਪਞ੍ਞਾ ਕਮ੍ਮਸ੍ਸਕਤਞਾਣਂ.
(ਖ) ਤਤ੍ਥ ਕਤਮਂ ਸਚ੍ਚਾਨੁਲੋਮਿਕਂ ਞਾਣਂ? ‘‘ਰੂਪਂ ਅਨਿਚ੍ਚ’’ਨ੍ਤਿ ਵਾ ਵੇਦਨਾ…ਪੇ… ਸਞ੍ਞਾ… ਸਙ੍ਖਾਰਾ… ‘‘ਵਿਞ੍ਞਾਣਂ ਅਨਿਚ੍ਚ’’ਨ੍ਤਿ ਵਾ ਯਾ ਏਵਰੂਪੀ ਅਨੁਲੋਮਿਕਾ ਖਨ੍ਤਿ ਦਿਟ੍ਠਿ ਰੁਚਿ ਮੁਦਿ ਪੇਕ੍ਖਾ ਧਮ੍ਮਨਿਜ੍ਝਾਨਕ੍ਖਨ੍ਤਿ – ਇਦਂ ਵੁਚ੍ਚਤਿ ‘‘ਸਚ੍ਚਾਨੁਲੋਮਿਕਂ ਞਾਣਂ’’.
(ਗ) ਚਤੂਸੁ ਮਗ੍ਗੇਸੁ ਪਞ੍ਞਾ ਮਗ੍ਗਸਮਙ੍ਗਿਸ੍ਸ ਞਾਣਂ.
(ਘ) ਚਤੂਸੁ ਫਲੇਸੁ ਪਞ੍ਞਾ ਫਲਸਮਙ੍ਗਿਸ੍ਸ ਞਾਣਂ.
੭੯੪. (੨) ਮਗ੍ਗਸਮਙ੍ਗਿਸ੍ਸ ਞਾਣਂ ਦੁਕ੍ਖੇਪੇਤਂ ਞਾਣਂ, ਦੁਕ੍ਖਸਮੁਦਯੇਪੇਤਂ ਞਾਣਂ, ਦੁਕ੍ਖਨਿਰੋਧੇਪੇਤਂ ਞਾਣਂ, ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯਪੇਤਂ ਞਾਣਂ.
(ਕ) ਤਤ੍ਥ ਕਤਮਂ ਦੁਕ੍ਖੇ ਞਾਣਂ? ਦੁਕ੍ਖਂ ਆਰਬ੍ਭ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਇਦਂ ਵੁਚ੍ਚਤਿ ‘‘ਦੁਕ੍ਖੇ ਞਾਣਂ’’.
(ਖ-ਘ) ਦੁਕ੍ਖਸਮੁਦਯਂ ਆਰਬ੍ਭ…ਪੇ… ਦੁਕ੍ਖਨਿਰੋਧਂ ਆਰਬ੍ਭ…ਪੇ… ਦੁਕ੍ਖਨਿਰੋਧਗਾਮਿਨਿਂ ਪਟਿਪਦਂ ਆਰਬ੍ਭ ਯਾ ਉਪ੍ਪਜ੍ਜਤਿ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਇਦਂ ਵੁਚ੍ਚਤਿ ‘‘ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਞਾਣਂ’’.
੭੯੫. (੩) ਕਾਮਾਵਚਰਕੁਸਲਾਬ੍ਯਾਕਤੇ ਪਞ੍ਞਾ ਕਾਮਾਵਚਰਾ ਪਞ੍ਞਾ, ਰੂਪਾਵਚਰਕੁਸਲਾਬ੍ਯਾਕਤੇ ਪਞ੍ਞਾ ਰੂਪਾਵਚਰਾ ਪਞ੍ਞਾ, ਅਰੂਪਾਵਚਰਕੁਸਲਾਬ੍ਯਾਕਤੇ ਪਞ੍ਞਾ ਅਰੂਪਾਵਚਰਾ ਪਞ੍ਞਾ, ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਅਪਰਿਯਾਪਨ੍ਨਾ ਪਞ੍ਞਾ.
੭੯੬. (੪. ਕ) ਤਤ੍ਥ ਕਤਮਂ ਧਮ੍ਮੇ ਞਾਣਂ? ਚਤੂਸੁ ਮਗ੍ਗੇਸੁ ਚਤੂਸੁ ਫਲੇਸੁ ਪਞ੍ਞਾ ਧਮ੍ਮੇ ਞਾਣਂ.
(ਖ) ਸੋ ਇਮਿਨਾ ਧਮ੍ਮੇਨ ਞਾਤੇਨ ਦਿਟ੍ਠੇਨ ਪਤ੍ਤੇਨ ਵਿਦਿਤੇਨ ਪਰਿਯੋਗਾਲ਼੍ਹੇਨ ਅਤੀਤਾਨਾਗਤੇਨ ਨਯਂ ਨੇਤਿ. ‘‘ਯੇ ਹਿ ਕੇਚਿ ਅਤੀਤਮਦ੍ਧਾਨਂ ਸਮਣਾ ਵਾ ਬ੍ਰਾਹ੍ਮਣਾ ਵਾ ਦੁਕ੍ਖਂ ਅਬ੍ਭਞ੍ਞਂਸੁ [ਅਬ੍ਭਞ੍ਞਿਂਸੁ (ਸ੍ਯਾ.) ਏਵਮੁਪਰਿਪਿ], ਦੁਕ੍ਖਸਮੁਦਯਂ ਅਬ੍ਭਞ੍ਞਂਸੁ, ਦੁਕ੍ਖਨਿਰੋਧਂ ਅਬ੍ਭਞ੍ਞਂਸੁ, ਦੁਕ੍ਖਨਿਰੋਧਗਾਮਿਨਿਂ ਪਟਿਪਦਂ ਅਬ੍ਭਞ੍ਞਂਸੁ, ਇਮਞ੍ਞੇਵ ਤੇ ਦੁਕ੍ਖਂ ਅਬ੍ਭਞ੍ਞਂਸੁ, ਇਮਞ੍ਞੇਵ ਤੇ ਦੁਕ੍ਖਸਮੁਦਯਂ ਅਬ੍ਭਞ੍ਞਂਸੁ, ਇਮਞ੍ਞੇਵ ਤੇ ਦੁਕ੍ਖਨਿਰੋਧਂ ਅਬ੍ਭਞ੍ਞਂਸੁ, ਇਮਞ੍ਞੇਵ ਤੇ ਦੁਕ੍ਖਨਿਰੋਧਗਾਮਿਨਿਂ ਪਟਿਪਦਂ ਅਬ੍ਭਞ੍ਞਂਸੁ. ਯੇ ਹਿ ਕੇਚਿ ਅਨਾਗਤਮਦ੍ਧਾਨਂ ਸਮਣਾ ਵਾ ਬ੍ਰਾਹ੍ਮਣਾ ਵਾ ਦੁਕ੍ਖਂ ਅਭਿਜਾਨਿਸ੍ਸਨ੍ਤਿ, ਦੁਕ੍ਖਸਮੁਦਯਂ ਅਭਿਜਾਨਿਸ੍ਸਨ੍ਤਿ, ਦੁਕ੍ਖਨਿਰੋਧਂ ਅਭਿਜਾਨਿਸ੍ਸਨ੍ਤਿ, ਦੁਕ੍ਖਨਿਰੋਧਗਾਮਿਨਿਂ ਪਟਿਪਦਂ ਅਭਿਜਾਨਿਸ੍ਸਨ੍ਤਿ, ਇਮਞ੍ਞੇਵ ਤੇ ਦੁਕ੍ਖਂ ਅਭਿਜਾਨਿਸ੍ਸਨ੍ਤਿ, ਇਮਞ੍ਞੇਵ ਤੇ ਦੁਕ੍ਖਸਮੁਦਯਂ ਅਭਿਜਾਨਿਸ੍ਸਨ੍ਤਿ, ਇਮਞ੍ਞੇਵ ਤੇ ਦੁਕ੍ਖਨਿਰੋਧਂ ਅਭਿਜਾਨਿਸ੍ਸਨ੍ਤਿ, ਇਮਞ੍ਞੇਵ ਤੇ ਦੁਕ੍ਖਨਿਰੋਧਗਾਮਿਨਿਂ ਪਟਿਪਦਂ ਅਭਿਜਾਨਿਸ੍ਸਨ੍ਤੀ’’ਤਿ – ਯਾ ਤਤ੍ਥ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਇਦਂ ਵੁਚ੍ਚਤਿ ‘‘ਅਨ੍ਵਯੇ ਞਾਣਂ’’.
(ਗ) ਤਤ੍ਥ ਕਤਮਂ ਪਰਿਯੇ ਞਾਣਂ? ਇਧ ਭਿਕ੍ਖੁ ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਚੇਤਸਾ ਚੇਤੋ ਪਰਿਚ੍ਚ ਪਜਾਨਾਤਿ. ਸਰਾਗਂ ਵਾ ਚਿਤ੍ਤਂ ‘‘ਸਰਾਗਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਵੀਤਰਾਗਂ ਵਾ ਚਿਤ੍ਤਂ ‘‘ਵੀਤਰਾਗਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਸਦੋਸਂ ਵਾ ਚਿਤ੍ਤਂ ‘‘ਸਦੋਸਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਵੀਤਦੋਸਂ ਵਾ ਚਿਤ੍ਤਂ ‘‘ਵੀਤਦੋਸਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਸਮੋਹਂ ਵਾ ਚਿਤ੍ਤਂ ‘‘ਸਮੋਹਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਵੀਤਮੋਹਂ ਵਾ ਚਿਤ੍ਤਂ ‘‘ਵੀਤਮੋਹਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਸਂਖਿਤ੍ਤਂ ਵਾ ਚਿਤ੍ਤਂ ‘‘ਸਂਖਿਤ੍ਤਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਵਿਕ੍ਖਿਤ੍ਤਂ ਵਾ ਚਿਤ੍ਤਂ ‘‘ਵਿਕ੍ਖਿਤ੍ਤਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਮਹਗ੍ਗਤਂ ਵਾ ਚਿਤ੍ਤਂ ‘‘ਮਹਗ੍ਗਤਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਅਮਹਗ੍ਗਤਂ ਵਾ ਚਿਤ੍ਤਂ ‘‘ਅਮਹਗ੍ਗਤਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਸਉਤ੍ਤਰਂ ਵਾ ਚਿਤ੍ਤਂ ‘‘ਸਉਤ੍ਤਰਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਅਨੁਤ੍ਤਰਂ ਵਾ ਚਿਤ੍ਤਂ ‘‘ਅਨੁਤ੍ਤਰਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਸਮਾਹਿਤਂ ਵਾ ਚਿਤ੍ਤਂ ‘‘ਸਮਾਹਿਤਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਅਸਮਾਹਿਤਂ ਵਾ ਚਿਤ੍ਤਂ ‘‘ਅਸਮਾਹਿਤਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਵਿਮੁਤ੍ਤਂ ਵਾ ਚਿਤ੍ਤਂ ‘‘ਵਿਮੁਤ੍ਤਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਅਵਿਮੁਤ੍ਤਂ ਵਾ ਚਿਤ੍ਤਂ ‘‘ਅਵਿਮੁਤ੍ਤਂ ਚਿਤ੍ਤ’’ਨ੍ਤਿ ਪਜਾਨਾਤੀਤਿ – ਯਾ ਤਤ੍ਥ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ – ਇਦਂ ਵੁਚ੍ਚਤਿ ‘‘ਪਰਿਯੇ ਞਾਣਂ’’.
(ਘ) ਠਪੇਤ੍ਵਾ ਧਮ੍ਮੇ ਞਾਣਂ ਅਨ੍ਵਯੇ ਞਾਣਂ ਪਰਿਯੇ ਞਾਣਂ, ਅਵਸੇਸਾ ਪਞ੍ਞਾ ਸਮ੍ਮੁਤਿਞਾਣਂ.
੭੯੭. (੫. ਕ) ਤਤ੍ਥ ਕਤਮਾ ਪਞ੍ਞਾ ਆਚਯਾਯ ਨੋ ਅਪਚਯਾਯ? ਕਾਮਾਵਚਰਕੁਸਲੇ ਪਞ੍ਞਾ ਆਚਯਾਯ ਨੋ ਅਪਚਯਾਯ.
(ਖ) ਚਤੂਸੁ ਮਗ੍ਗੇਸੁ ਪਞ੍ਞਾ ਅਪਚਯਾਯ ਨੋ ਆਚਯਾਯ.
(ਗ) ਰੂਪਾਵਚਰਾਰੂਪਾਵਚਰਕੁਸਲੇ ਪਞ੍ਞਾ ਆਚਯਾਯ ਚੇਵ ਅਪਚਯਾਯ ਚ.
(ਘ) ਅਵਸੇਸਾ ਪਞ੍ਞਾ ਨੇਵ ਆਚਯਾਯ ਨੋ ਅਪਚਯਾਯ.
੭੯੮. (੬. ਕ) ਤਤ੍ਥ ਕਤਮਾ ਪਞ੍ਞਾ ਨਿਬ੍ਬਿਦਾਯ ਨੋ ਪਟਿਵੇਧਾਯ? ਯਾਯ ਪਞ੍ਞਾਯ ਕਾਮੇਸੁ ਵੀਤਰਾਗੋ ਹੋਤਿ, ਨ ਚ ਅਭਿਞ੍ਞਾਯੋ ਪਟਿਵਿਜ੍ਝਤਿ ਨ ਚ ਸਚ੍ਚਾਨਿ – ਅਯਂ ਵੁਚ੍ਚਤਿ ‘‘ਪਞ੍ਞਾ ਨਿਬ੍ਬਿਦਾਯ ਨੋ ਪਟਿਵੇਧਾਯ’’.
(ਖ) ਸ੍ਵੇਵ ਪਞ੍ਞਾਯ ਕਾਮੇਸੁ ਵੀਤਰਾਗੋ ਸਮਾਨੋ ਅਭਿਞ੍ਞਾਯੋ ਪਟਿਵਿਜ੍ਝਤਿ ਨ ਚ ਸਚ੍ਚਾਨਿ – ਅਯਂ ਵੁਚ੍ਚਤਿ ‘‘ਪਞ੍ਞਾ ਪਟਿਵੇਧਾਯ ਨੋ ਨਿਬ੍ਬਿਦਾਯ’’.
(ਗ) ਚਤੂਸੁ ਮਗ੍ਗੇਸੁ ਪਞ੍ਞਾ ਨਿਬ੍ਬਿਦਾਯ ਚੇਵ ਪਟਿਵੇਧਾਯ ਚ.
(ਘ) ਅਵਸੇਸਾ ਪਞ੍ਞਾ ਨੇਵ ਨਿਬ੍ਬਿਦਾਯ ਨੋ ਪਟਿਵੇਧਾਯ.
੭੯੯. (੭. ਕ) ਤਤ੍ਥ ਕਤਮਾ ਹਾਨਭਾਗਿਨੀ ਪਞ੍ਞਾ? ਪਠਮਸ੍ਸ ਝਾਨਸ੍ਸ ਲਾਭਿਂ ਕਾਮਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਹਾਨਭਾਗਿਨੀ ਪਞ੍ਞਾ.
(ਖ) ਤਦਨੁਧਮ੍ਮਤਾ ਸਤਿ ਸਨ੍ਤਿਟ੍ਠਤਿ ਠਿਤਿਭਾਗਿਨੀ ਪਞ੍ਞਾ.
(ਗ) ਅਵਿਤਕ੍ਕਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਸੇਸਭਾਗਿਨੀ ਪਞ੍ਞਾ.
(ਘ) ਨਿਬ੍ਬਿਦਾਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਰਾਗੂਪਸਞ੍ਹਿਤਾ ਨਿਬ੍ਬੇਧਭਾਗਿਨੀ ਪਞ੍ਞਾ. ਦੁਤਿਯਸ੍ਸ ਝਾਨਸ੍ਸ ਲਾਭਿਂ ਵਿਤਕ੍ਕਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਹਾਨਭਾਗਿਨੀ ਪਞ੍ਞਾ. ਤਦਨੁਧਮ੍ਮਤਾ ਸਤਿ ਸਨ੍ਤਿਟ੍ਠਤਿ ਠਿਤਿਭਾਗਿਨੀ ਪਞ੍ਞਾ. ਉਪੇਕ੍ਖਾਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਸੇਸਭਾਗਿਨੀ ਪਞ੍ਞਾ. ਨਿਬ੍ਬਿਦਾਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਰਾਗੂਪਸਞ੍ਹਿਤਾ ਨਿਬ੍ਬੇਧਭਾਗਿਨੀ ਪਞ੍ਞਾ. ਤਤਿਯਸ੍ਸ ਝਾਨਸ੍ਸ ਲਾਭਿਂ ਪੀਤਿਸੁਖਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਹਾਨਭਾਗਿਨੀ ਪਞ੍ਞਾ. ਤਦਨੁਧਮ੍ਮਤਾ ਸਤਿ ਸਨ੍ਤਿਟ੍ਠਤਿ ਠਿਤਿਭਾਗਿਨੀ ਪਞ੍ਞਾ. ਅਦੁਕ੍ਖਮਸੁਖਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਸੇਸਭਾਗਿਨੀ ਪਞ੍ਞਾ. ਨਿਬ੍ਬਿਦਾਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਰਾਗੂਪਸਞ੍ਹਿਤਾ ਨਿਬ੍ਬੇਧਭਾਗਿਨੀ ਪਞ੍ਞਾ. ਚਤੁਤ੍ਥਸ੍ਸ ਝਾਨਸ੍ਸ ਲਾਭਿਂ ਉਪੇਕ੍ਖਾਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਹਾਨਭਾਗਿਨੀ ਪਞ੍ਞਾ. ਤਦਨੁਧਮ੍ਮਤਾ ਸਤਿ ਸਨ੍ਤਿਟ੍ਠਤਿ ਠਿਤਿਭਾਗਿਨੀ ਪਞ੍ਞਾ. ਆਕਾਸਾਨਞ੍ਚਾਯਤਨਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਸੇਸਭਾਗਿਨੀ ਪਞ੍ਞਾ. ਨਿਬ੍ਬਿਦਾਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਰਾਗੂਪਸਞ੍ਹਿਤਾ ਨਿਬ੍ਬੇਧਭਾਗਿਨੀ ਪਞ੍ਞਾ. ਆਕਾਸਾਨਞ੍ਚਾਯਤਨਸ੍ਸ ਲਾਭਿਂ ਰੂਪਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਹਾਨਭਾਗਿਨੀ ਪਞ੍ਞਾ. ਤਦਨੁਧਮ੍ਮਤਾ ਸਤਿ ਸਨ੍ਤਿਟ੍ਠਤਿ ਠਿਤਿਭਾਗਿਨੀ ਪਞ੍ਞਾ. ਵਿਞ੍ਞਾਣਞ੍ਚਾਯਤਨਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਸੇਸਭਾਗਿਨੀ ਪਞ੍ਞਾ. ਨਿਬ੍ਬਿਦਾਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਰਾਗੂਪਸਞ੍ਹਿਤਾ ਨਿਬ੍ਬੇਧਭਾਗਿਨੀ ਪਞ੍ਞਾ. ਵਿਞ੍ਞਾਣਞ੍ਚਾਯਤਨਸ੍ਸ ਲਾਭਿਂ ਆਕਾਸਾਨਞ੍ਚਾਯਤਨਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਹਾਨਭਾਗਿਨੀ ਪਞ੍ਞਾ. ਤਦਨੁਧਮ੍ਮਤਾ ਸਤਿ ਸਨ੍ਤਿਟ੍ਠਤਿ ਠਿਤਿਭਾਗਿਨੀ ਪਞ੍ਞਾ. ਆਕਿਞ੍ਚਞ੍ਞਾਯਤਨਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਸੇਸਭਾਗਿਨੀ ਪਞ੍ਞਾ. ਨਿਬ੍ਬਿਦਾਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਰਾਗੂਪਸਞ੍ਹਿਤਾ ਨਿਬ੍ਬੇਧਭਾਗਿਨੀ ਪਞ੍ਞਾ. ਆਕਿਞ੍ਚਞ੍ਞਾਯਤਨਸ੍ਸ ਲਾਭਿਂ ਵਿਞ੍ਞਾਣਞ੍ਚਾਯਤਨਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਹਾਨਭਾਗਿਨੀ ਪਞ੍ਞਾ. ਤਦਨੁਧਮ੍ਮਤਾ ਸਤਿ ਸਨ੍ਤਿਟ੍ਠਤਿ ਠਿਤਿਭਾਗਿਨੀ ਪਞ੍ਞਾ. ਨੇਵਸਞ੍ਞਾਨਾਸਞ੍ਞਾਯਤਨਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਸੇਸਭਾਗਿਨੀ ਪਞ੍ਞਾ. ਨਿਬ੍ਬਿਦਾਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਰਾਗੂਪਸਞ੍ਹਿਤਾ ਨਿਬ੍ਬੇਧਭਾਗਿਨੀ ਪਞ੍ਞਾ.
੮੦੦. (੮) ਤਤ੍ਥ ਕਤਮਾ ਚਤਸ੍ਸੋ ਪਟਿਸਮ੍ਭਿਦਾ? ਅਤ੍ਥਪਟਿਸਮ੍ਭਿਦਾ, ਧਮ੍ਮਪਟਿਸਮ੍ਭਿਦਾ, ਨਿਰੁਤ੍ਤਿਪਟਿਸਮ੍ਭਿਦਾ, ਪਟਿਭਾਨਪਟਿਸਮ੍ਭਿਦਾ. ਅਤ੍ਥੇ ਞਾਣਂ ਅਤ੍ਥਪਟਿਸਮ੍ਭਿਦਾ, ਧਮ੍ਮੇ ਞਾਣਂ ਧਮ੍ਮਪਟਿਸਮ੍ਭਿਦਾ, ਤਤ੍ਰ ਧਮ੍ਮਨਿਰੁਤ੍ਤਾਭਿਲਾਪੇ ਞਾਣਂ ਨਿਰੁਤ੍ਤਿਪਟਿਸਮ੍ਭਿਦਾ, ਞਾਣੇਸੁ ਞਾਣਂ ਪਟਿਭਾਨਪਟਿਸਮ੍ਭਿਦਾ. ਇਮਾ ਚਤਸ੍ਸੋ ਪਟਿਸਮ੍ਭਿਦਾ.
੮੦੧. (੯) ਤਤ੍ਥ ਕਤਮਾ ਚਤਸ੍ਸੋ ਪਟਿਪਦਾ? ਦੁਕ੍ਖਪਟਿਪਦਾ ਦਨ੍ਧਾਭਿਞ੍ਞਾ ਪਞ੍ਞਾ, ਦੁਕ੍ਖਪਟਿਪਦਾ ਖਿਪ੍ਪਾਭਿਞ੍ਞਾ ਪਞ੍ਞਾ, ਸੁਖਪਟਿਪਦਾ ਦਨ੍ਧਾਭਿਞ੍ਞਾ ਪਞ੍ਞਾ, ਸੁਖਪਟਿਪਦਾ ਖਿਪ੍ਪਾਭਿਞ੍ਞਾ ਪਞ੍ਞਾ.