੧. ਸੁਤ੍ਤਨ੍ਤਭਾਜਨੀਯਂ

੬੪੨. ਚਤਸ੍ਸੋ ਅਪ੍ਪਮਞ੍ਞਾਯੋ – ਇਧ ਭਿਕ੍ਖੁ ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤਿ, ਤਥਾ ਦੁਤਿਯਂ, ਤਥਾ ਤਤਿਯਂ, ਤਥਾ ਚਤੁਤ੍ਥਂ [ਚਤੁਤ੍ਥਿਂ (ਸੀ.)]. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਮੇਤ੍ਤਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ [ਅਬ੍ਯਾਪਜ੍ਝੇਨ (ਸੀ. ਸ੍ਯਾ.)] ਫਰਿਤ੍ਵਾ ਵਿਹਰਤਿ. ਕਰੁਣਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤਿ, ਤਥਾ ਦੁਤਿਯਂ, ਤਥਾ ਤਤਿਯਂ, ਤਥਾ ਚਤੁਤ੍ਥਂ. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਕਰੁਣਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ ਫਰਿਤ੍ਵਾ ਵਿਹਰਤਿ. ਮੁਦਿਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤਿ, ਤਥਾ ਦੁਤਿਯਂ, ਤਥਾ ਤਤਿਯਂ, ਤਥਾ ਚਤੁਤ੍ਥਂ. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਮੁਦਿਤਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ ਫਰਿਤ੍ਵਾ ਵਿਹਰਤਿ. ਉਪੇਕ੍ਖਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤਿ, ਤਥਾ ਦੁਤਿਯਂ, ਤਥਾ ਤਤਿਯਂ, ਤਥਾ ਚਤੁਤ੍ਥਂ. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਉਪੇਕ੍ਖਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ ਫਰਿਤ੍ਵਾ ਵਿਹਰਤਿ.

੧. ਮੇਤ੍ਤਾ

੬੪੩. ਕਥਞ੍ਚ ਭਿਕ੍ਖੁ ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤਿ? ਸੇਯ੍ਯਥਾਪਿ ਨਾਮ ਏਕਂ ਪੁਗ੍ਗਲਂ ਪਿਯਂ ਮਨਾਪਂ ਦਿਸ੍ਵਾ ਮੇਤ੍ਤਾਯੇਯ੍ਯ, ਏਵਮੇਵ ਸਬ੍ਬੇ ਸਤ੍ਤੇ ਮੇਤ੍ਤਾਯ ਫਰਤਿ.

ਤਤ੍ਥ ਕਤਮਾ ਮੇਤ੍ਤਾ? ਯਾ ਸਤ੍ਤੇਸੁ ਮੇਤ੍ਤਿ ਮੇਤ੍ਤਾਯਨਾ ਮੇਤ੍ਤਾਯਿਤਤ੍ਤਂ ਮੇਤ੍ਤਾਚੇਤੋਵਿਮੁਤ੍ਤਿ – ਅਯਂ ਵੁਚ੍ਚਤਿ ‘‘ਮੇਤ੍ਤਾ’’.

ਤਤ੍ਥ ਕਤਮਂ ਚਿਤ੍ਤਂ? ਯਂ ਚਿਤ੍ਤਂ ਮਨੋ ਮਾਨਸਂ ਹਦਯਂ ਪਣ੍ਡਰਂ ਮਨੋ ਮਨਾਯਤਨਂ ਮਨਿਨ੍ਦ੍ਰਿਯਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ ਤਜ੍ਜਾਮਨੋਵਿਞ੍ਞਾਣਧਾਤੁ – ਇਦਂ ਵੁਚ੍ਚਤਿ ‘‘ਚਿਤ੍ਤਂ’’. ਇਦਂ ਚਿਤ੍ਤਂ ਇਮਾਯ ਮੇਤ੍ਤਾਯ ਸਹਗਤਂ ਹੋਤਿ ਸਹਜਾਤਂ ਸਂਸਟ੍ਠਂ ਸਮ੍ਪਯੁਤ੍ਤਂ. ਤੇਨ ਵੁਚ੍ਚਤਿ ‘‘ਮੇਤ੍ਤਾਸਹਗਤੇਨ ਚੇਤਸਾ’’ਤਿ.

੬੪੪. ‘‘ਏਕਂ ਦਿਸ’’ਨ੍ਤਿ ਪੁਰਤ੍ਥਿਮਂ ਵਾ ਦਿਸਂ ਪਚ੍ਛਿਮਂ ਵਾ ਦਿਸਂ ਉਤ੍ਤਰਂ ਵਾ ਦਿਸਂ ਦਕ੍ਖਿਣਂ ਵਾ ਦਿਸਂ ਉਦ੍ਧਂ ਵਾ ਅਧੋ ਵਾ ਤਿਰਿਯਂ ਵਾ ਵਿਦਿਸਂ ਵਾ.

੬੪੫. ‘‘ਫਰਿਤ੍ਵਾ’’ਤਿ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾ.

੬੪੬. ‘‘ਵਿਹਰਤੀ’’ਤਿ ਇਰਿਯਤਿ ਵਤ੍ਤਤਿ ਪਾਲੇਤਿ ਯਪੇਤਿ ਯਾਪੇਤਿ ਚਰਤਿ ਵਿਹਰਤਿ. ਤੇਨ ਵੁਚ੍ਚਤਿ ‘‘ਵਿਹਰਤੀ’’ਤਿ.

੬੪੭. ‘‘ਤਥਾ ਦੁਤਿਯ’’ਨ੍ਤਿ ਯਥੇਵ ਏਕਂ ਦਿਸਂ ਤਥਾ ਦੁਤਿਯਂ ਦਿਸਂ ਤਥਾ ਤਤਿਯਂ ਦਿਸਂ ਤਥਾ ਚਤੁਤ੍ਥਂ ਦਿਸਂ ਤਥਾ ਉਦ੍ਧਂ ਤਥਾ ਅਧੋ ਤਥਾ ਤਿਰਿਯਂ ਤਥਾ ਵਿਦਿਸਂ.

੬੪੮. ‘‘ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕ’’ਨ੍ਤਿ ਸਬ੍ਬੇਨ ਸਬ੍ਬਂ ਸਬ੍ਬਥਾ ਸਬ੍ਬਂ ਅਸੇਸਂ ਨਿਸ੍ਸੇਸਂ. ਪਰਿਯਾਦਾਯਵਚਨਮੇਤਂ – ‘‘ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕ’’ਨ੍ਤਿ.

੬੪੯. ‘‘ਮੇਤ੍ਤਾਸਹਗਤੇਨ ਚੇਤਸਾ’’ਤਿ ਤਤ੍ਥ ਕਤਮਾ ਮੇਤ੍ਤਾ? ਯਾ ਸਤ੍ਤੇਸੁ ਮੇਤ੍ਤਿ ਮੇਤ੍ਤਾਯਨਾ ਮੇਤ੍ਤਾਯਿਤਤ੍ਤਂ ਮੇਤ੍ਤਾਚੇਤੋਵਿਮੁਤ੍ਤਿ – ਅਯਂ ਵੁਚ੍ਚਤਿ ‘‘ਮੇਤ੍ਤਾ’’.

ਤਤ੍ਥ ਕਤਮਂ ਚਿਤ੍ਤਂ? ਯਂ ਚਿਤ੍ਤਂ ਮਨੋ ਮਾਨਸਂ…ਪੇ… ਤਜ੍ਜਾਮਨੋਵਿਞ੍ਞਾਣਧਾਤੁ – ਇਦਂ ਵੁਚ੍ਚਤਿ ‘‘ਚਿਤ੍ਤਂ’’. ਇਦਂ ਚਿਤ੍ਤਂ ਇਮਾਯ ਮੇਤ੍ਤਾਯ ਸਹਗਤਂ ਹੋਤਿ ਸਹਜਾਤਂ ਸਂਸਟ੍ਠਂ ਸਮ੍ਪਯੁਤ੍ਤਂ. ਤੇਨ ਵੁਚ੍ਚਤਿ ‘‘ਮੇਤ੍ਤਾਸਹਗਤੇਨ ਚੇਤਸਾ’’ਤਿ.

੬੫੦. ‘‘ਵਿਪੁਲੇਨਾ’’ਤਿ ਯਂ ਵਿਪੁਲਂ ਤਂ ਮਹਗ੍ਗਤਂ, ਯਂ ਮਹਗ੍ਗਤਂ ਤਂ ਅਪ੍ਪਮਾਣਂ, ਯਂ ਅਪ੍ਪਮਾਣਂ ਸੋ ਅਵੇਰੋ, ਯੋ ਅਵੇਰੋ ਸੋ ਅਬ੍ਯਾਪਜ੍ਜੋ [ਅਬ੍ਯਾਪਜ੍ਝੋ (ਸੀ. ਸ੍ਯਾ.)].

੬੫੧. ‘‘ਫਰਿਤ੍ਵਾ’’ਤਿ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾ.

੬੫੨. ‘‘ਵਿਹਰਤੀ’’ਤਿ…ਪੇ… ਤੇਨ ਵੁਚ੍ਚਤਿ ‘‘ਵਿਹਰਤੀ’’ਤਿ.

੨. ਕਰੁਣਾ

੬੫੩. ਕਥਞ੍ਚ ਭਿਕ੍ਖੁ ਕਰੁਣਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤਿ? ਸੇਯ੍ਯਥਾਪਿ ਨਾਮ ਏਕਂ ਪੁਗ੍ਗਲਂ ਦੁਗ੍ਗਤਂ ਦੁਰੂਪੇਤਂ ਦਿਸ੍ਵਾ ਕਰੁਣਾਯੇਯ੍ਯ, ਏਵਮੇਵ ਸਬ੍ਬੇ ਸਤ੍ਤੇ ਕਰੁਣਾਯ ਫਰਤਿ.

ਤਤ੍ਥ ਕਤਮਾ ਕਰੁਣਾ? ਯਾ ਸਤ੍ਤੇਸੁ ਕਰੁਣਾ ਕਰੁਣਾਯਨਾ ਕਰੁਣਾਯਿਤਤ੍ਤਂ ਕਰੁਣਾਚੇਤੋਵਿਮੁਤ੍ਤਿ – ਅਯਂ ਵੁਚ੍ਚਤਿ ‘‘ਕਰੁਣਾ’’.

ਤਤ੍ਥ ਕਤਮਂ ਚਿਤ੍ਤਂ? ਯਂ ਚਿਤ੍ਤਂ ਮਨੋ ਮਾਨਸਂ…ਪੇ… ਤਜ੍ਜਾਮਨੋਵਿਞ੍ਞਾਣਧਾਤੁ – ਇਦਂ ਵੁਚ੍ਚਤਿ ‘‘ਚਿਤ੍ਤਂ’’. ਇਦਂ ਚਿਤ੍ਤਂ ਇਮਾਯ ਕਰੁਣਾਯ ਸਹਗਤਂ ਹੋਤਿ ਸਹਜਾਤਂ ਸਂਸਟ੍ਠਂ ਸਮ੍ਪਯੁਤ੍ਤਂ. ਤੇਨ ਵੁਚ੍ਚਤਿ ‘‘ਕਰੁਣਾਸਹਗਤੇਨ ਚੇਤਸਾ’’ਤਿ.

੬੫੪. ‘‘ਏਕਂ ਦਿਸ’’ਨ੍ਤਿ ਪੁਰਤ੍ਥਿਮਂ ਵਾ ਦਿਸਂ ਪਚ੍ਛਿਮਂ ਵਾ ਦਿਸਂ ਉਤ੍ਤਰਂ ਵਾ ਦਿਸਂ ਦਕ੍ਖਿਣਂ ਵਾ ਦਿਸਂ ਉਦ੍ਧਂ ਵਾ ਅਧੋ ਵਾ ਤਿਰਿਯਂ ਵਾ ਵਿਦਿਸਂ ਵਾ.

੬੫੫. ‘‘ਫਰਿਤ੍ਵਾ’’ਤਿ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾ.

੬੫੬. ‘‘ਵਿਹਰਤੀ’’ਤਿ ਇਰਿਯਤਿ ਵਤ੍ਤਤਿ ਪਾਲੇਤਿ ਯਪੇਤਿ ਯਾਪੇਤਿ ਚਰਤਿ ਵਿਹਰਤਿ. ਤੇਨ ਵੁਚ੍ਚਤਿ ‘‘ਵਿਹਰਤੀ’’ਤਿ.

੬੫੭. ‘‘ਤਥਾ ਦੁਤਿਯ’’ਨ੍ਤਿ ਯਥੇਵ ਏਕਂ ਦਿਸਂ ਤਥਾ ਦੁਤਿਯਂ ਦਿਸਂ ਤਥਾ ਤਤਿਯਂ ਦਿਸਂ ਤਥਾ ਚਤੁਤ੍ਥਂ ਦਿਸਂ ਤਥਾ ਉਦ੍ਧਂ ਤਥਾ ਅਧੋ ਤਥਾ ਤਿਰਿਯਂ ਤਥਾ ਵਿਦਿਸਂ.

੬੫੮. ‘‘ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕ’’ਨ੍ਤਿ ਸਬ੍ਬੇਨ ਸਬ੍ਬਂ ਸਬ੍ਬਥਾ ਸਬ੍ਬਂ ਅਸੇਸਂ ਨਿਸ੍ਸੇਸਂ. ਪਰਿਯਾਦਾਯਵਚਨਮੇਤਂ – ‘‘ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕ’’ਨ੍ਤਿ.

੬੫੯. ‘‘ਕਰੁਣਾਸਹਗਤੇਨ ਚੇਤਸਾ’’ਤਿ ਤਤ੍ਥ ਕਤਮਾ ਕਰੁਣਾ? ਯਾ ਸਤ੍ਤੇਸੁ ਕਰੁਣਾ ਕਰੁਣਾਯਨਾ ਕਰੁਣਾਯਿਤਤ੍ਤਂ ਕਰੁਣਾਚੇਤੋਵਿਮੁਤ੍ਤਿ – ਅਯਂ ਵੁਚ੍ਚਤਿ ‘‘ਕਰੁਣਾ’’.

੬੬੦. ‘‘ਵਿਪੁਲੇਨਾ’’ਤਿ ਯਂ ਵਿਪੁਲਂ ਤਂ ਮਹਗ੍ਗਤਂ, ਯਂ ਮਹਗ੍ਗਤਂ ਤਂ ਅਪ੍ਪਮਾਣਂ, ਯਂ ਅਪ੍ਪਮਾਣਂ ਸੋ ਅਵੇਰੋ, ਯੋ ਅਵੇਰੋ ਸੋ ਅਬ੍ਯਾਪਜ੍ਜੋ.

੬੬੧. ‘‘ਫਰਿਤ੍ਵਾ’’ਤਿ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾ.

੬੬੨. ‘‘ਵਿਹਰਤੀ’’ਤਿ…ਪੇ… ਤੇਨ ਵੁਚ੍ਚਤਿ ‘‘ਵਿਹਰਤੀ’’ਤਿ.

੩. ਮੁਦਿਤਾ

੬੬੩. ਕਥਞ੍ਚ ਭਿਕ੍ਖੁ ਮੁਦਿਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤਿ? ਸੇਯ੍ਯਥਾਪਿ ਨਾਮ ਏਕਂ ਪੁਗ੍ਗਲਂ ਪਿਯਂ ਮਨਾਪਂ ਦਿਸ੍ਵਾ ਮੁਦਿਤੋ ਅਸ੍ਸ, ਏਵਮੇਵ ਸਬ੍ਬੇ ਸਤ੍ਤੇ ਮੁਦਿਤਾਯ ਫਰਤਿ.

ਤਤ੍ਥ ਕਤਮਾ ਮੁਦਿਤਾ? ਯਾ ਸਤ੍ਤੇਸੁ ਮੁਦਿਤਾ ਮੁਦਿਤਾਯਨਾ ਮੁਦਿਤਾਯਿਤਤ੍ਤਂ ਮੁਦਿਤਾਚੇਤੋਵਿਮੁਤ੍ਤਿ – ਅਯਂ ਵੁਚ੍ਚਤਿ ‘‘ਮੁਦਿਤਾ’’.

ਤਤ੍ਥ ਕਤਮਂ ਚਿਤ੍ਤਂ? ਯਂ ਚਿਤ੍ਤਂ ਮਨੋ ਮਾਨਸਂ…ਪੇ… ਤਜ੍ਜਾਮਨੋਵਿਞ੍ਞਾਣਧਾਤੁ – ਇਦਂ ਵੁਚ੍ਚਤਿ ‘‘ਚਿਤ੍ਤਂ’’. ਇਦਂ ਚਿਤ੍ਤਂ ਇਮਾਯ ਮੁਦਿਤਾਯ ਸਹਗਤਂ ਹੋਤਿ ਸਹਜਾਤਂ ਸਂਸਟ੍ਠਂ ਸਮ੍ਪਯੁਤ੍ਤਂ. ਤੇਨ ਵੁਚ੍ਚਤਿ ‘‘ਮੁਦਿਤਾਸਹਗਤੇਨ ਚੇਤਸਾ’’ਤਿ.

੬੬੪. ‘‘ਏਕਂ ਦਿਸ’’ਨ੍ਤਿ ਪੁਰਤ੍ਥਿਮਂ ਵਾ ਦਿਸਂ ਪਚ੍ਛਿਮਂ ਵਾ ਦਿਸਂ ਉਤ੍ਤਰਂ ਵਾ ਦਿਸਂ ਦਕ੍ਖਿਣਂ ਵਾ ਦਿਸਂ ਉਦ੍ਧਂ ਵਾ ਅਧੋ ਵਾ ਤਿਰਿਯਂ ਵਾ ਵਿਦਿਸਂ ਵਾ.

੬੬੫. ‘‘ਫਰਿਤ੍ਵਾ’’ਤਿ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾ.

੬੬੬. ‘‘ਵਿਹਰਤੀ’’ਤਿ…ਪੇ… ਤੇਨ ਵੁਚ੍ਚਤਿ ‘‘ਵਿਹਰਤੀ’’ਤਿ.

੬੬੭. ‘‘ਤਥਾ ਦੁਤਿਯ’’ਨ੍ਤਿ ਯਥੇਵ ਏਕਂ ਦਿਸਂ ਤਥਾ ਦੁਤਿਯਂ ਦਿਸਂ ਤਥਾ ਤਤਿਯਂ ਦਿਸਂ ਤਥਾ ਚਤੁਤ੍ਥਂ ਦਿਸਂ ਤਥਾ ਉਦ੍ਧਂ ਤਥਾ ਅਧੋ ਤਥਾ ਤਿਰਿਯਂ ਤਥਾ ਵਿਦਿਸਂ.

੬੬੮. ‘‘ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕ’’ਨ੍ਤਿ ਸਬ੍ਬੇਨ ਸਬ੍ਬਂ ਸਬ੍ਬਥਾ ਸਬ੍ਬਂ ਅਸੇਸਂ ਨਿਸ੍ਸੇਸਂ. ਪਰਿਯਾਦਾਯਵਚਨਮੇਤਂ – ‘‘ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕ’’ਨ੍ਤਿ.

੬੬੯. ‘‘ਮੁਦਿਤਾਸਹਗਤੇਨ ਚੇਤਸਾ’’ਤਿ ਤਤ੍ਥ ਕਤਮਾ ਮੁਦਿਤਾ? ਯਾ ਸਤ੍ਤੇਸੁ ਮੁਦਿਤਾ ਮੁਦਿਤਾਯਨਾ ਮੁਦਿਤਾਯਿਤਤ੍ਤਂ ਮੁਦਿਤਾਚੇਤੋਵਿਮੁਤ੍ਤਿ – ਅਯਂ ਵੁਚ੍ਚਤਿ ‘‘ਮੁਦਿਤਾ’’.

੬੭੦. ‘‘ਵਿਪੁਲੇਨਾ’’ਤਿ ਯਂ ਵਿਪੁਲਂ ਤਂ ਮਹਗ੍ਗਤਂ, ਯਂ ਮਹਗ੍ਗਤਂ ਤਂ ਅਪ੍ਪਮਾਣਂ, ਯਂ ਅਪ੍ਪਮਾਣਂ ਸੋ ਅਵੇਰੋ, ਯੋ ਅਵੇਰੋ ਸੋ ਅਬ੍ਯਾਪਜ੍ਜੋ.

੬੭੧. ‘‘ਫਰਿਤ੍ਵਾ’’ਤਿ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾ.

੬੭੨. ‘‘ਵਿਹਰਤੀ’’ਤਿ …ਪੇ… ਤੇਨ ਵੁਚ੍ਚਤਿ ‘‘ਵਿਹਰਤੀ’’ਤਿ.

੪. ਉਪੇਕ੍ਖਾ

੬੭੩. ਕਥਞ੍ਚ ਭਿਕ੍ਖੁ ਉਪੇਕ੍ਖਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤਿ? ਸੇਯ੍ਯਥਾਪਿ ਨਾਮ ਏਕਂ ਪੁਗ੍ਗਲਂ ਨੇਵ ਮਨਾਪਂ ਨ ਅਮਨਾਪਂ ਦਿਸ੍ਵਾ ਉਪੇਕ੍ਖਕੋ ਅਸ੍ਸ, ਏਵਮੇਵ ਸਬ੍ਬੇ ਸਤ੍ਤੇ ਉਪੇਕ੍ਖਾਯ ਫਰਤਿ.

ਤਤ੍ਥ ਕਤਮਾ ਉਪੇਕ੍ਖਾ? ਯਾ ਸਤ੍ਤੇਸੁ ਉਪੇਕ੍ਖਾ ਉਪੇਕ੍ਖਾਯਨਾ ਉਪੇਕ੍ਖਾਯਿਤਤ੍ਤਂ ਉਪੇਕ੍ਖਾਚੇਤੋਵਿਮੁਤ੍ਤਿ – ਅਯਂ ਵੁਚ੍ਚਤਿ ‘‘ਉਪੇਕ੍ਖਾ’’.

ਤਤ੍ਥ ਕਤਮਂ ਚਿਤ੍ਤਂ? ਯਂ ਚਿਤ੍ਤਂ ਮਨੋ ਮਾਨਸਂ…ਪੇ… ਤਜ੍ਜਾਮਨੋਵਿਞ੍ਞਾਣਧਾਤੁ – ਇਦਂ ਵੁਚ੍ਚਤਿ ‘‘ਚਿਤ੍ਤਂ’’. ਇਦਂ ਚਿਤ੍ਤਂ ਇਮਾਯ ਉਪੇਕ੍ਖਾਯ ਸਹਗਤਂ ਹੋਤਿ ਸਹਜਾਤਂ ਸਂਸਟ੍ਠਂ ਸਮ੍ਪਯੁਤ੍ਤਂ. ਤੇਨ ਵੁਚ੍ਚਤਿ ‘‘ਉਪੇਕ੍ਖਾਸਹਗਤੇਨ ਚੇਤਸਾ’’ਤਿ.

੬੭੪. ‘‘ਏਕਂ ਦਿਸ’’ਨ੍ਤਿ ਪੁਰਤ੍ਥਿਮਂ ਵਾ ਦਿਸਂ ਪਚ੍ਛਿਮਂ ਵਾ ਦਿਸਂ ਉਤ੍ਤਰਂ ਵਾ ਦਿਸਂ ਦਕ੍ਖਿਣਂ ਵਾ ਦਿਸਂ ਉਦ੍ਧਂ ਵਾ ਅਧੋ ਵਾ ਤਿਰਿਯਂ ਵਾ ਵਿਦਿਸਂ ਵਾ.

੬੭੫. ‘‘ਫਰਿਤ੍ਵਾ’’ਤਿ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾ.

੬੭੬. ‘‘ਵਿਹਰਤੀ’’ਤਿ…ਪੇ… ਤੇਨ ਵੁਚ੍ਚਤਿ ‘‘ਵਿਹਰਤੀ’’ਤਿ.

੬੭੭. ‘‘ਤਥਾ ਦੁਤਿਯ’’ਨ੍ਤਿ ਯਥੇਵ ਏਕਂ ਦਿਸਂ ਤਥਾ ਦੁਤਿਯਂ ਦਿਸਂ ਤਥਾ ਤਤਿਯਂ ਦਿਸਂ ਤਥਾ ਚਤੁਤ੍ਥਂ ਦਿਸਂ ਤਥਾ ਉਦ੍ਧਂ ਤਥਾ ਅਧੋ ਤਥਾ ਤਿਰਿਯਂ ਤਥਾ ਵਿਦਿਸਂ.

੬੭੮. ‘‘ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕ’’ਨ੍ਤਿ ਸਬ੍ਬੇਨ ਸਬ੍ਬਂ ਸਬ੍ਬਥਾ ਸਬ੍ਬਂ ਅਸੇਸਂ ਨਿਸ੍ਸੇਸਂ. ਪਰਿਯਾਦਾਯਵਚਨਮੇਤਂ – ‘‘ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕ’’ਨ੍ਤਿ.

੬੭੯. ‘‘ਉਪੇਕ੍ਖਾਸਹਗਤੇਨ ਚੇਤਸਾ’’ਤਿ, ਤਤ੍ਥ ਕਤਮਾ ਉਪੇਕ੍ਖਾ? ਯਾ ਸਤ੍ਤੇਸੁ ਉਪੇਕ੍ਖਾ ਉਪੇਕ੍ਖਾਯਨਾ ਉਪੇਕ੍ਖਾਯਿਤਤ੍ਤਂ ਉਪੇਕ੍ਖਾਚੇਤੋਵਿਮੁਤ੍ਤਿ – ਅਯਂ ਵੁਚ੍ਚਤਿ ‘‘ਉਪੇਕ੍ਖਾ’’.

੬੮੦. ‘‘ਵਿਪੁਲੇਨਾ’’ਤਿ ਯਂ ਵਿਪੁਲਂ ਤਂ ਮਹਗ੍ਗਤਂ, ਯਂ ਮਹਗ੍ਗਤਂ ਤਂ ਅਪ੍ਪਮਾਣਂ, ਯਂ ਅਪ੍ਪਮਾਣਂ ਸੋ ਅਵੇਰੋ, ਯੋ ਅਵੇਰੋ ਸੋ ਅਬ੍ਯਾਪਜ੍ਜੋ.

੬੮੧. ‘‘ਫਰਿਤ੍ਵਾ’’ਤਿ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾ.

੬੮੨. ‘‘ਵਿਹਰਤੀ’’ਤਿ…ਪੇ… ਤੇਨ ਵੁਚ੍ਚਤਿ ‘‘ਵਿਹਰਤੀ’’ਤਿ.

ਸੁਤ੍ਤਨ੍ਤਭਾਜਨੀਯਂ.