੧. ਤਿਕਂ

੬੪੦. ਸਿਯਾ ਕੁਸਲਾ, ਸਿਯਾ ਅਬ੍ਯਾਕਤਾ. ਤੀਣਿ ਝਾਨਾਨਿ – ਏਤ੍ਥੁਪ੍ਪਨ੍ਨਂ ਸੁਖਂ ਵੇਦਨਂ ਠਪੇਤ੍ਵਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ, ਚਤੁਤ੍ਥਂ ਝਾਨਂ – ਏਤ੍ਥੁਪ੍ਪਨ੍ਨਂ ਅਦੁਕ੍ਖਮਸੁਖਂ ਵੇਦਨਂ ਠਪੇਤ੍ਵਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਂ. ਸਿਯਾ ਵਿਪਾਕਾ, ਸਿਯਾ ਵਿਪਾਕਧਮ੍ਮਧਮ੍ਮਾ, ਸਿਯਾ ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਾ. ਸਿਯਾ ਉਪਾਦਿਨ੍ਨੁਪਾਦਾਨਿਯਾ, ਸਿਯਾ ਅਨੁਪਾਦਿਨ੍ਨੁਪਾਦਾਨਿਯਾ, ਸਿਯਾ ਅਨੁਪਾਦਿਨ੍ਨਅਨੁਪਾਦਾਨਿਯਾ. ਸਿਯਾ ਅਸਂਕਿਲਿਟ੍ਠਸਂਕਿਲੇਸਿਕਾ, ਸਿਯਾ ਅਸਂਕਿਲਿਟ੍ਠਅਸਂਕਿਲੇਸਿਕਾ. ਪਠਮਂ ਝਾਨਂ – ਏਤ੍ਥੁਪ੍ਪਨ੍ਨੇ ਵਿਤਕ੍ਕਵਿਚਾਰੇ ਠਪੇਤ੍ਵਾ ਸਵਿਤਕ੍ਕਂ ਸਵਿਚਾਰਂ, ਤੀਣਿ ਝਾਨਾਨਿ ਅਵਿਤਕ੍ਕਅਵਿਚਾਰਾ. ਦ੍ਵੇ ਝਾਨਾਨਿ – ਏਤ੍ਥੁਪ੍ਪਨ੍ਨਂ ਪੀਤਿਂ ਠਪੇਤ੍ਵਾ ਪੀਤਿਸਹਗਤਾ, ਤੀਣਿ ਝਾਨਾਨਿ – ਏਤ੍ਥੁਪ੍ਪਨ੍ਨਂ ਸੁਖਂ ਠਪੇਤ੍ਵਾ ਸੁਖਸਹਗਤਾ, ਚਤੁਤ੍ਥਂ ਝਾਨਂ – ਏਤ੍ਥੁਪ੍ਪਨ੍ਨਂ ਉਪੇਕ੍ਖਂ ਠਪੇਤ੍ਵਾ ਉਪੇਕ੍ਖਾਸਹਗਤਂ. ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਾ. ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਹੇਤੁਕਾ. ਸਿਯਾ ਆਚਯਗਾਮਿਨੋ, ਸਿਯਾ ਅਪਚਯਗਾਮਿਨੋ, ਸਿਯਾ ਨੇਵਾਚਯਗਾਮਿਨਾਪਚਯਗਾਮਿਨੋ. ਸਿਯਾ ਸੇਕ੍ਖਾ, ਸਿਯਾ ਅਸੇਕ੍ਖਾ, ਸਿਯਾ ਨੇਵਸੇਕ੍ਖਨਾਸੇਕ੍ਖਾ. ਸਿਯਾ ਮਹਗ੍ਗਤਾ, ਸਿਯਾ ਅਪ੍ਪਮਾਣਾ. ਤੀਣਿ ਝਾਨਾਨਿ ਨ ਵਤ੍ਤਬ੍ਬਾ ਪਰਿਤ੍ਤਾਰਮ੍ਮਣਾਤਿਪਿ, ਮਹਗ੍ਗਤਾਰਮ੍ਮਣਾਤਿਪਿ, ਸਿਯਾ ਅਪ੍ਪਮਾਣਾਰਮ੍ਮਣਾ, ਸਿਯਾ ਨ ਵਤ੍ਤਬ੍ਬਾ ਅਪ੍ਪਮਾਣਾਰਮ੍ਮਣਾਤਿ; ਚਤੁਤ੍ਥਂ ਝਾਨਂ ਸਿਯਾ ਪਰਿਤ੍ਤਾਰਮ੍ਮਣਂ, ਸਿਯਾ ਮਹਗ੍ਗਤਾਰਮ੍ਮਣਂ, ਸਿਯਾ ਅਪ੍ਪਮਾਣਾਰਮ੍ਮਣਂ; ਸਿਯਾ ਨ ਵਤ੍ਤਬ੍ਬਂ ਪਰਿਤ੍ਤਾਰਮ੍ਮਣਨ੍ਤਿਪਿ, ਮਹਗ੍ਗਤਾਰਮ੍ਮਣਨ੍ਤਿਪਿ, ਅਪ੍ਪਮਾਣਾਰਮ੍ਮਣਨ੍ਤਿਪਿ. ਸਿਯਾ ਮਜ੍ਝਿਮਾ, ਸਿਯਾ ਪਣੀਤਾ. ਸਿਯਾ ਸਮ੍ਮਤ੍ਤਨਿਯਤਾ, ਸਿਯਾ ਅਨਿਯਤਾ. ਤੀਣਿ ਝਾਨਾਨਿ ਨ ਮਗ੍ਗਾਰਮ੍ਮਣਾ, ਸਿਯਾ ਮਗ੍ਗਹੇਤੁਕਾ, ਸਿਯਾ ਮਗ੍ਗਾਧਿਪਤਿਨੋ, ਸਿਯਾ ਨ ਵਤ੍ਤਬ੍ਬਾ ਮਗ੍ਗਹੇਤੁਕਾਤਿਪਿ, ਮਗ੍ਗਾਧਿਪਤਿਨੋਤਿਪਿ; ਚਤੁਤ੍ਥਂ ਝਾਨਂ ਸਿਯਾ ਮਗ੍ਗਾਰਮ੍ਮਣਂ, ਸਿਯਾ ਮਗ੍ਗਹੇਤੁਕਂ, ਸਿਯਾ ਮਗ੍ਗਾਧਿਪਤਿ, ਸਿਯਾ ਨ ਵਤ੍ਤਬ੍ਬਂ ਮਗ੍ਗਾਰਮ੍ਮਣਨ੍ਤਿਪਿ, ਮਗ੍ਗਹੇਤੁਕਨ੍ਤਿਪਿ ਮਗ੍ਗਾਧਿਪਤੀਤਿਪਿ. ਸਿਯਾ ਉਪ੍ਪਨ੍ਨਾ, ਸਿਯਾ ਅਨੁਪ੍ਪਨ੍ਨਾ, ਸਿਯਾ ਉਪ੍ਪਾਦਿਨੋ. ਸਿਯਾ ਅਤੀਤਾ, ਸਿਯਾ ਅਨਾਗਤਾ, ਸਿਯਾ ਪਚ੍ਚੁਪ੍ਪਨ੍ਨਾ. ਤੀਣਿ ਝਾਨਾਨਿ ਨ ਵਤ੍ਤਬ੍ਬਾ ਅਤੀਤਾਰਮ੍ਮਣਾਤਿਪਿ, ਅਨਾਗਤਾਰਮ੍ਮਣਾਤਿਪਿ, ਪਚ੍ਚੁਪ੍ਪਨ੍ਨਾਰਮ੍ਮਣਾਤਿਪਿ; ਚਤੁਤ੍ਥਂ ਝਾਨਂ ਸਿਯਾ ਅਤੀਤਾਰਮ੍ਮਣਂ, ਸਿਯਾ ਅਨਾਗਤਾਰਮ੍ਮਣਂ, ਸਿਯਾ ਪਚ੍ਚੁਪ੍ਪਨ੍ਨਾਰਮ੍ਮਣਂ, ਸਿਯਾ ਨ ਵਤ੍ਤਬ੍ਬਂ ਅਤੀਤਾਰਮ੍ਮਣਨ੍ਤਿਪਿ, ਅਨਾਗਤਾਰਮ੍ਮਣਨ੍ਤਿਪਿ, ਪਚ੍ਚੁਪ੍ਪਨ੍ਨਾਰਮਣਨ੍ਤਿਪਿ. ਸਿਯਾ ਅਜ੍ਝਤ੍ਤਾ, ਸਿਯਾ ਬਹਿਦ੍ਧਾ, ਸਿਯਾ ਅਜ੍ਝਤ੍ਤਬਹਿਦ੍ਧਾ. ਤੀਣਿ ਝਾਨਾਨਿ ਬਹਿਦ੍ਧਾਰਮ੍ਮਣਾ, ਚਤੁਤ੍ਥਂ ਝਾਨਂ ਸਿਯਾ ਅਜ੍ਝਤ੍ਤਾਰਮ੍ਮਣਂ, ਸਿਯਾ ਬਹਿਦ੍ਧਾਰਮ੍ਮਣਂ, ਸਿਯਾ ਅਜ੍ਝਤ੍ਤਬਹਿਦ੍ਧਾਰਮ੍ਮਣਂ, ਸਿਯਾ ਨ ਵਤ੍ਤਬ੍ਬਂ ਅਜ੍ਝਤ੍ਤਾਰਮ੍ਮਣਨ੍ਤਿਪਿ, ਬਹਿਦ੍ਧਾਰਮ੍ਮਣਨ੍ਤਿਪਿ, ਅਜ੍ਝਤ੍ਤਬਹਿਦ੍ਧਾਰਮ੍ਮਣਨ੍ਤਿਪਿ. ਅਨਿਦਸ੍ਸਨਅਪ੍ਪਟਿਘਾ.