੧. ਤਿਕਂ

੧੫੨. ਰੂਪਕ੍ਖਨ੍ਧੋ ਅਬ੍ਯਾਕਤੋ. ਚਤ੍ਤਾਰੋ ਖਨ੍ਧਾ ਸਿਯਾ ਕੁਸਲਾ, ਸਿਯਾ ਅਕੁਸਲਾ, ਸਿਯਾ ਅਬ੍ਯਾਕਤਾ. ਦ੍ਵੇ ਖਨ੍ਧਾ ਨ ਵਤ੍ਤਬ੍ਬਾ – ‘‘ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ’’ਤਿਪਿ, ‘‘ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ’’ਤਿਪਿ, ‘‘ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ’’ਤਿਪਿ. ਤਯੋ ਖਨ੍ਧਾ ਸਿਯਾ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ, ਸਿਯਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ, ਸਿਯਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ. ਰੂਪਕ੍ਖਨ੍ਧੋ ਨੇਵਵਿਪਾਕਨਵਿਪਾਕਧਮ੍ਮਧਮ੍ਮੋ. ਚਤ੍ਤਾਰੋ ਖਨ੍ਧਾ ਸਿਯਾ ਵਿਪਾਕਾ, ਸਿਯਾ ਵਿਪਾਕਧਮ੍ਮਧਮ੍ਮਾ, ਸਿਯਾ ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਾ. ਰੂਪਕ੍ਖਨ੍ਧੋ ਸਿਯਾ ਉਪਾਦਿਨ੍ਨੁਪਾਦਾਨਿਯੋ, ਸਿਯਾ ਅਨੁਪਾਦਿਨ੍ਨੁਪਾਦਾਨਿਯੋ. ਚਤ੍ਤਾਰੋ ਖਨ੍ਧਾ ਸਿਯਾ ਉਪਾਦਿਨ੍ਨੁਪਾਦਾਨਿਯਾ, ਸਿਯਾ ਅਨੁਪਾਦਿਨ੍ਨੁਪਾਦਾਨਿਯਾ, ਸਿਯਾ ਅਨੁਪਾਦਿਨ੍ਨਅਨੁਪਾਦਾਨਿਯਾ.

ਰੂਪਕ੍ਖਨ੍ਧੋ ਅਸਂਕਿਲਿਟ੍ਠਸਂਕਿਲੇਸਿਕੋ. ਚਤ੍ਤਾਰੋ ਖਨ੍ਧਾ ਸਿਯਾ ਸਂਕਿਲਿਟ੍ਠਸਂਕਿਲੇਸਿਕਾ, ਸਿਯਾ ਅਸਂਕਿਲਿਟ੍ਠਸਂਕਿਲੇਸਿਕਾ, ਸਿਯਾ ਅਸਂਕਿਲਿਟ੍ਠਅਸਂਕਿਲੇਸਿਕਾ. ਰੂਪਕ੍ਖਨ੍ਧੋ ਅਵਿਤਕ੍ਕਅਵਿਚਾਰੋ. ਤਯੋ ਖਨ੍ਧਾ ਸਿਯਾ ਸਵਿਤਕ੍ਕਸਵਿਚਾਰਾ, ਸਿਯਾ ਅਵਿਤਕ੍ਕਵਿਚਾਰਮਤ੍ਤਾ, ਸਿਯਾ ਅਵਿਤਕ੍ਕਅਵਿਚਾਰਾ. ਸਙ੍ਖਾਰਕ੍ਖਨ੍ਧੋ ਸਿਯਾ ਸਵਿਤਕ੍ਕਸਵਿਚਾਰੋ, ਸਿਯਾ ਅਵਿਤਕ੍ਕਵਿਚਾਰਮਤ੍ਤੋ, ਸਿਯਾ ਅਵਿਤਕ੍ਕਅਵਿਚਾਰੋ, ਸਿਯਾ ਨ ਵਤ੍ਤਬ੍ਬੋ – ‘‘ਸਵਿਤਕ੍ਕਸਵਿਚਾਰੋ’’ਤਿਪਿ, ‘‘ਅਵਿਤਕ੍ਕਵਿਚਾਰਮਤ੍ਤੋ’’ਤਿਪਿ, ‘‘ਅਵਿਤਕ੍ਕਅਵਿਚਾਰੋ’’ਤਿਪਿ. ਰੂਪਕ੍ਖਨ੍ਧੋ ਨ ਵਤ੍ਤਬ੍ਬੋ – ‘‘ਪੀਤਿਸਹਗਤੋ’’ਤਿਪਿ, ‘‘ਸੁਖਸਹਗਤੋ’’ਤਿਪਿ, ‘‘ਉਪੇਕ੍ਖਾਸਹਗਤੋ’’ਤਿਪਿ. ਵੇਦਨਾਕ੍ਖਨ੍ਧੋ ਸਿਯਾ ਪੀਤਿਸਹਗਤੋ ਨ ਸੁਖਸਹਗਤੋ ਨ ਉਪੇਕ੍ਖਾਸਹਗਤੋ, ਸਿਯਾ ਨ ਵਤ੍ਤਬ੍ਬੋ – ‘‘ਪੀਤਿਸਹਗਤੋ’’ਤਿ. ਤਯੋ ਖਨ੍ਧਾ ਸਿਯਾ ਪੀਤਿਸਹਗਤਾ, ਸਿਯਾ ਸੁਖਸਹਗਤਾ, ਸਿਯਾ ਉਪੇਕ੍ਖਾਸਹਗਤਾ, ਸਿਯਾ ਨ ਵਤ੍ਤਬ੍ਬਾ – ‘‘ਪੀਤਿਸਹਗਤਾ’’ਤਿਪਿ, ‘‘ਸੁਖਸਹਗਤਾ’’ਤਿਪਿ, ‘‘ਉਪੇਕ੍ਖਾਸਹਗਤਾ’’ਤਿਪਿ.

ਰੂਪਕ੍ਖਨ੍ਧੋ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬੋ. ਚਤ੍ਤਾਰੋ ਖਨ੍ਧਾ ਸਿਯਾ ਦਸ੍ਸਨੇਨ ਪਹਾਤਬ੍ਬਾ, ਸਿਯਾ ਭਾਵਨਾਯ ਪਹਾਤਬ੍ਬਾ, ਸਿਯਾ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਾ. ਰੂਪਕ੍ਖਨ੍ਧੋ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਹੇਤੁਕੋ. ਚਤ੍ਤਾਰੋ ਖਨ੍ਧਾ ਸਿਯਾ ਦਸ੍ਸਨੇਨ ਪਹਾਤਬ੍ਬਹੇਤੁਕਾ, ਸਿਯਾ ਭਾਵਨਾਯ ਪਹਾਤਬ੍ਬਹੇਤੁਕਾ, ਸਿਯਾ ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਹੇਤੁਕਾ. ਰੂਪਕ੍ਖਨ੍ਧੋ ਨੇਵਾਚਯਗਾਮਿਨਾਪਚਯਗਾਮੀ. ਚਤ੍ਤਾਰੋ ਖਨ੍ਧਾ ਸਿਯਾ ਆਚਯਗਾਮਿਨੋ, ਸਿਯਾ ਅਪਚਯਗਾਮਿਨੋ, ਸਿਯਾ ਨੇਵਾਚਯਗਾਮਿਨਾਪਚਯਗਾਮਿਨੋ. ਰੂਪਕ੍ਖਨ੍ਧੋ ਨੇਵਸੇਕ੍ਖਨਾਸੇਕ੍ਖੋ. ਚਤ੍ਤਾਰੋ ਖਨ੍ਧਾ ਸਿਯਾ ਸੇਕ੍ਖਾ, ਸਿਯਾ ਅਸੇਕ੍ਖਾ, ਸਿਯਾ ਨੇਵਸੇਕ੍ਖਨਾਸੇਕ੍ਖਾ. ਰੂਪਕ੍ਖਨ੍ਧੋ ਪਰਿਤ੍ਤੋ. ਚਤ੍ਤਾਰੋ ਖਨ੍ਧਾ ਸਿਯਾ ਪਰਿਤ੍ਤਾ, ਸਿਯਾ ਮਹਗ੍ਗਤਾ, ਸਿਯਾ ਅਪ੍ਪਮਾਣਾ. ਰੂਪਕ੍ਖਨ੍ਧੋ ਅਨਾਰਮ੍ਮਣੋ. ਚਤ੍ਤਾਰੋ ਖਨ੍ਧਾ ਸਿਯਾ ਪਰਿਤ੍ਤਾਰਮ੍ਮਣਾ, ਸਿਯਾ ਮਹਗ੍ਗਤਾਰਮ੍ਮਣਾ, ਸਿਯਾ ਅਪ੍ਪਮਾਣਾਰਮ੍ਮਣਾ, ਸਿਯਾ ਨ ਵਤ੍ਤਬ੍ਬਾ – ‘‘ਪਰਿਤ੍ਤਾਰਮ੍ਮਣਾ’’ਤਿਪਿ, ‘‘ਮਹਗ੍ਗਤਾਰਮ੍ਮਣਾ’’ਤਿਪਿ, ‘‘ਅਪ੍ਪਮਾਣਾਰਮ੍ਮਣਾ’’ਤਿਪਿ. ਰੂਪਕ੍ਖਨ੍ਧੋ ਮਜ੍ਝਿਮੋ. ਚਤ੍ਤਾਰੋ ਖਨ੍ਧਾ ਸਿਯਾ ਹੀਨਾ, ਸਿਯਾ ਮਜ੍ਝਿਮਾ, ਸਿਯਾ ਪਣੀਤਾ. ਰੂਪਕ੍ਖਨ੍ਧੋ ਅਨਿਯਤੋ. ਚਤ੍ਤਾਰੋ ਖਨ੍ਧਾ ਸਿਯਾ ਮਿਚ੍ਛਤ੍ਤਨਿਯਤਾ, ਸਿਯਾ ਸਮ੍ਮਤ੍ਤਨਿਯਤਾ, ਸਿਯਾ ਅਨਿਯਤਾ.

ਰੂਪਕ੍ਖਨ੍ਧੋ ਅਨਾਰਮ੍ਮਣੋ. ਚਤ੍ਤਾਰੋ ਖਨ੍ਧਾ ਸਿਯਾ ਮਗ੍ਗਾਰਮ੍ਮਣਾ, ਸਿਯਾ ਮਗ੍ਗਹੇਤੁਕਾ, ਸਿਯਾ ਮਗ੍ਗਾਧਿਪਤਿਨੋ, ਸਿਯਾ ਨ ਵਤ੍ਤਬ੍ਬਾ – ‘‘ਮਗ੍ਗਾਰਮ੍ਮਣਾ’’ਤਿਪਿ, ‘‘ਮਗ੍ਗਹੇਤੁਕਾ’’ਤਿਪਿ, ‘‘ਮਗ੍ਗਾਧਿਪਤਿਨੋ’’ਤਿਪਿ; ਸਿਯਾ ਉਪ੍ਪਨ੍ਨਾ, ਸਿਯਾ ਅਨੁਪ੍ਪਨ੍ਨਾ, ਸਿਯਾ ਉਪ੍ਪਾਦਿਨੋ; ਸਿਯਾ ਅਤੀਤਾ, ਸਿਯਾ ਅਨਾਗਤਾ, ਸਿਯਾ ਪਚ੍ਚੁਪ੍ਪਨ੍ਨਾ. ਰੂਪਕ੍ਖਨ੍ਧੋ ਅਨਾਰਮ੍ਮਣੋ. ਚਤ੍ਤਾਰੋ ਖਨ੍ਧਾ ਸਿਯਾ ਅਤੀਤਾਰਮ੍ਮਣਾ, ਸਿਯਾ ਅਨਾਗਤਾਰਮ੍ਮਣਾ, ਸਿਯਾ ਪਚ੍ਚੁਪ੍ਪਨ੍ਨਾਰਮ੍ਮਣਾ, ਸਿਯਾ ਨ ਵਤ੍ਤਬ੍ਬਾ – ‘‘ਅਤੀਤਾਰਮ੍ਮਣਾ’’ਤਿਪਿ, ‘‘ਅਨਾਗਤਾਰਮ੍ਮਣਾ’’ਤਿਪਿ, ‘‘ਪਚ੍ਚੁਪ੍ਪਨ੍ਨਾਰਮ੍ਮਣਾ’’ਤਿਪਿ; ਸਿਯਾ ਅਜ੍ਝਤ੍ਤਾ, ਸਿਯਾ ਬਹਿਦ੍ਧਾ, ਸਿਯਾ ਅਜ੍ਝਤ੍ਤਬਹਿਦ੍ਧਾ. ਰੂਪਕ੍ਖਨ੍ਧੋ ਅਨਾਰਮ੍ਮਣੋ. ਚਤ੍ਤਾਰੋ ਖਨ੍ਧਾ ਸਿਯਾ ਅਜ੍ਝਤ੍ਤਾਰਮ੍ਮਣਾ, ਸਿਯਾ ਬਹਿਦ੍ਧਾਰਮ੍ਮਣਾ, ਸਿਯਾ ਅਜ੍ਝਤ੍ਤਬਹਿਦ੍ਧਾਰਮ੍ਮਣਾ, ਸਿਯਾ ਨ ਵਤ੍ਤਬ੍ਬਾ – ‘‘ਅਜ੍ਝਤ੍ਤਾਰਮ੍ਮਣਾ’’ਤਿਪਿ, ‘‘ਬਹਿਦ੍ਧਾਰਮ੍ਮਣਾ’’ਤਿਪਿ, ‘‘ਅਜ੍ਝਤ੍ਤਬਹਿਦ੍ਧਾਰਮ੍ਮਣਾ’’ਤਿਪਿ. ਚਤ੍ਤਾਰੋ ਖਨ੍ਧਾ ਅਨਿਦਸ੍ਸਨਅਪ੍ਪਟਿਘਾ. ਰੂਪਕ੍ਖਨ੍ਧੋ ਸਿਯਾ ਸਨਿਦਸ੍ਸਨਸਪ੍ਪਟਿਘੋ, ਸਿਯਾ ਅਨਿਦਸ੍ਸਨਸਪ੍ਪਟਿਘੋ, ਸਿਯਾ ਅਨਿਦਸ੍ਸਨਅਪ੍ਪਟਿਘੋ.