੧. ਰੂਪਕ੍ਖਨ੍ਧੋ

੩੩. ਤਤ੍ਥ ਕਤਮੋ ਰੂਪਕ੍ਖਨ੍ਧੋ? ਏਕਵਿਧੇਨ ਰੂਪਕ੍ਖਨ੍ਧੋ – ਸਬ੍ਬਂ ਰੂਪਂ ਨ ਹੇਤੁ, ਅਹੇਤੁਕਂ, ਹੇਤੁਵਿਪ੍ਪਯੁਤ੍ਤਂ, ਸਪ੍ਪਚ੍ਚਯਂ, ਸਙ੍ਖਤਂ, ਰੂਪਂ, ਲੋਕਿਯਂ, ਸਾਸਵਂ, ਸਂਯੋਜਨਿਯਂ, ਗਨ੍ਥਨਿਯਂ, ਓਘਨਿਯਂ, ਯੋਗਨਿਯਂ, ਨੀਵਰਣਿਯਂ, ਪਰਾਮਟ੍ਠਂ, ਉਪਾਦਾਨਿਯਂ, ਸਂਕਿਲੇਸਿਕਂ, ਅਬ੍ਯਾਕਤਂ, ਅਨਾਰਮ੍ਮਣਂ, ਅਚੇਤਸਿਕਂ, ਚਿਤ੍ਤਵਿਪ੍ਪਯੁਤ੍ਤਂ, ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਂ, ਅਸਂਕਿਲਿਟ੍ਠਸਂਕਿਲੇਸਿਕਂ, ਨ ਸਵਿਤਕ੍ਕਸਵਿਚਾਰਂ, ਨ ਅਵਿਤਕ੍ਕਵਿਚਾਰਮਤ੍ਤਂ, ਅਵਿਤਕ੍ਕਅਵਿਚਾਰਂ, ਨ ਪੀਤਿਸਹਗਤਂ, ਨ ਸੁਖਸਹਗਤਂ, ਨ ਉਪੇਕ੍ਖਾਸਹਗਤਂ, ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਂ, ਨੇਵ ਦਸ੍ਸਨੇਨ ਨ ਭਾਵਨਾਯ ਪਹਾਤਬ੍ਬਹੇਤੁਕਂ, ਨੇਵਾਚਯਗਾਮਿਨਾਪਚਯਗਾਮੀ, ਨੇਵਸੇਕ੍ਖਨਾਸੇਕ੍ਖਂ, ਪਰਿਤ੍ਤਂ, ਕਾਮਾਵਚਰਂ, ਨ ਰੂਪਾਵਚਰਂ, ਨ ਅਰੂਪਾਵਚਰਂ, ਪਰਿਯਾਪਨ੍ਨਂ, ਨੋ ਅਪਰਿਯਾਪਨ੍ਨਂ, ਅਨਿਯਤਂ, ਅਨਿਯ੍ਯਾਨਿਕਂ, ਉਪ੍ਪਨ੍ਨਂ, ਛਹਿ ਵਿਞ੍ਞਾਣੇਹਿ ਵਿਞ੍ਞੇਯ੍ਯਂ, ਅਨਿਚ੍ਚਂ, ਜਰਾਭਿਭੂਤਂ. ਏਵਂ ਏਕਵਿਧੇਨ ਰੂਪਕ੍ਖਨ੍ਧੋ.

ਦੁਵਿਧੇਨ ਰੂਪਕ੍ਖਨ੍ਧੋ – ਅਤ੍ਥਿ ਰੂਪਂ ਉਪਾਦਾ, ਅਤ੍ਥਿ ਰੂਪਂ ਨੋ ਉਪਾਦਾ [ਨੁਪਾਦਾ (ਸੀ. ਕ.)]. ਅਤ੍ਥਿ ਰੂਪਂ ਉਪਾਦਿਨ੍ਨਂ, ਅਤ੍ਥਿ ਰੂਪਂ ਅਨੁਪਾਦਿਨ੍ਨਂ. ਅਤ੍ਥਿ ਰੂਪਂ ਉਪਾਦਿਨ੍ਨੁਪਾਦਾਨਿਯਂ, ਅਤ੍ਥਿ ਰੂਪਂ ਅਨੁਪਾਦਿਨ੍ਨੁਪਾਦਾਨਿਯਂ. ਅਤ੍ਥਿ ਰੂਪਂ ਸਨਿਦਸ੍ਸਨਂ, ਅਤ੍ਥਿ ਰੂਪਂ ਅਨਿਦਸ੍ਸਨਂ. ਅਤ੍ਥਿ ਰੂਪਂ ਸਪ੍ਪਟਿਘਂ, ਅਤ੍ਥਿ ਰੂਪਂ ਅਪ੍ਪਟਿਘਂ. ਅਤ੍ਥਿ ਰੂਪਂ ਇਨ੍ਦ੍ਰਿਯਂ, ਅਤ੍ਥਿ ਰੂਪਂ ਨ ਇਨ੍ਦ੍ਰਿਯਂ. ਅਤ੍ਥਿ ਰੂਪਂ ਮਹਾਭੂਤਂ, ਅਤ੍ਥਿ ਰੂਪਂ ਨ ਮਹਾਭੂਤਂ. ਅਤ੍ਥਿ ਰੂਪਂ ਵਿਞ੍ਞਤ੍ਤਿ, ਅਤ੍ਥਿ ਰੂਪਂ ਨ ਵਿਞ੍ਞਤ੍ਤਿ. ਅਤ੍ਥਿ ਰੂਪਂ ਚਿਤ੍ਤਸਮੁਟ੍ਠਾਨਂ, ਅਤ੍ਥਿ ਰੂਪਂ ਨ ਚਿਤ੍ਤਸਮੁਟ੍ਠਾਨਂ. ਅਤ੍ਥਿ ਰੂਪਂ ਚਿਤ੍ਤਸਹਭੁ, ਅਤ੍ਥਿ ਰੂਪਂ ਨ ਚਿਤ੍ਤਸਹਭੁ. ਅਤ੍ਥਿ ਰੂਪਂ ਚਿਤ੍ਤਾਨੁਪਰਿਵਤ੍ਤਿ, ਅਤ੍ਥਿ ਰੂਪਂ ਨ ਚਿਤ੍ਤਾਨੁਪਰਿਵਤ੍ਤਿ. ਅਤ੍ਥਿ ਰੂਪਂ ਅਜ੍ਝਤ੍ਤਿਕਂ, ਅਤ੍ਥਿ ਰੂਪਂ ਬਾਹਿਰਂ. ਅਤ੍ਥਿ ਰੂਪਂ ਓਲ਼ਾਰਿਕਂ, ਅਤ੍ਥਿ ਰੂਪਂ ਸੁਖੁਮਂ. ਅਤ੍ਥਿ ਰੂਪਂ ਦੂਰੇ, ਅਤ੍ਥਿ ਰੂਪਂ ਸਨ੍ਤਿਕੇ…ਪੇ… ਅਤ੍ਥਿ ਰੂਪਂ ਕਬਲ਼ੀਕਾਰੋ ਆਹਾਰੋ, ਅਤ੍ਥਿ ਰੂਪਂ ਨ ਕਬਲ਼ੀਕਾਰੋ ਆਹਾਰੋ. ਏਵਂ ਦੁਵਿਧੇਨ ਰੂਪਕ੍ਖਨ੍ਧੋ.

(ਯਥਾ ਰੂਪਕਣ੍ਡੇ ਵਿਭਤ੍ਤਂ, ਤਥਾ ਇਧ ਵਿਭਜਿਤਬ੍ਬਂ.)

ਤਿਵਿਧੇਨ ਰੂਪਕ੍ਖਨ੍ਧੋ – ਯਂ ਤਂ ਰੂਪਂ ਅਜ੍ਝਤ੍ਤਿਕਂ ਤਂ ਉਪਾਦਾ, ਯਂ ਤਂ ਰੂਪਂ ਬਾਹਿਰਂ ਤਂ ਅਤ੍ਥਿ ਉਪਾਦਾ, ਅਤ੍ਥਿ ਨੋ ਉਪਾਦਾ. ਯਂ ਤਂ ਰੂਪਂ ਅਜ੍ਝਤ੍ਤਿਕਂ ਤਂ ਉਪਾਦਿਨ੍ਨਂ, ਯਂ ਤਂ ਰੂਪਂ ਬਾਹਿਰਂ ਤਂ ਅਤ੍ਥਿ ਉਪਾਦਿਨ੍ਨਂ, ਅਤ੍ਥਿ ਅਨੁਪਾਦਿਨ੍ਨਂ. ਯਂ ਤਂ ਰੂਪਂ ਅਜ੍ਝਤ੍ਤਿਕਂ ਤਂ ਉਪਾਦਿਨ੍ਨੁਪਾਦਾਨਿਯਂ, ਯਂ ਤਂ ਰੂਪਂ ਬਾਹਿਰਂ ਤਂ ਅਤ੍ਥਿ ਉਪਾਦਿਨ੍ਨੁਪਾਦਾਨਿਯਂ, ਅਤ੍ਥਿ ਅਨੁਪਾਦਿਨ੍ਨੁਪਾਦਾਨਿਯਂ…ਪੇ… ਯਂ ਤਂ ਰੂਪਂ ਅਜ੍ਝਤ੍ਤਿਕਂ ਤਂ ਨ ਕਬਲ਼ੀਕਾਰੋ ਆਹਾਰੋ, ਯਂ ਤਂ ਰੂਪਂ ਬਾਹਿਰਂ ਤਂ ਅਤ੍ਥਿ ਕਬਲ਼ੀਕਾਰੋ ਆਹਾਰੋ, ਅਤ੍ਥਿ ਨ ਕਬਲ਼ੀਕਾਰੋ ਆਹਾਰੋ. ਏਵਂ ਤਿਵਿਧੇਨ ਰੂਪਕ੍ਖਨ੍ਧੋ.

ਚਤੁਬ੍ਬਿਧੇਨ ਰੂਪਕ੍ਖਨ੍ਧੋ – ਯਂ ਤਂ ਰੂਪਂ ਉਪਾਦਾ ਤਂ ਅਤ੍ਥਿ ਉਪਾਦਿਨ੍ਨਂ, ਅਤ੍ਥਿ ਅਨੁਪਾਦਿਨ੍ਨਂ; ਯਂ ਤਂ ਰੂਪਂ ਨੋ ਉਪਾਦਾ ਤਂ ਅਤ੍ਥਿ ਉਪਾਦਿਨ੍ਨਂ, ਅਤ੍ਥਿ ਅਨੁਪਾਦਿਨ੍ਨਂ. ਯਂ ਤਂ ਰੂਪਂ ਉਪਾਦਾ ਤਂ ਅਤ੍ਥਿ ਉਪਾਦਿਨ੍ਨੁਪਾਦਾਨਿਯਂ, ਅਤ੍ਥਿ ਅਨੁਪਾਦਿਨ੍ਨੁਪਾਦਾਨਿਯਂ; ਯਂ ਤਂ ਰੂਪਂ ਨੋ ਉਪਾਦਾ ਤਂ ਅਤ੍ਥਿ ਉਪਾਦਿਨ੍ਨੁਪਾਦਾਨਿਯਂ, ਅਤ੍ਥਿ ਅਨੁਪਾਦਿਨ੍ਨੁਪਾਦਾਨਿਯਂ. ਯਂ ਤਂ ਰੂਪਂ ਉਪਾਦਾ ਤਂ ਅਤ੍ਥਿ ਸਪ੍ਪਟਿਘਂ, ਅਤ੍ਥਿ ਅਪ੍ਪਟਿਘਂ; ਯਂ ਤਂ ਰੂਪਂ ਨੋ ਉਪਾਦਾ ਤਂ ਅਤ੍ਥਿ ਸਪ੍ਪਟਿਘਂ, ਅਤ੍ਥਿ ਅਪ੍ਪਟਿਘਂ. ਯਂ ਤਂ ਰੂਪਂ ਉਪਾਦਾ ਤਂ ਅਤ੍ਥਿ ਓਲ਼ਾਰਿਕਂ, ਅਤ੍ਥਿ ਸੁਖੁਮਂ; ਯਂ ਤਂ ਰੂਪਂ ਨੋ ਉਪਾਦਾ ਤਂ ਅਤ੍ਥਿ ਓਲ਼ਾਰਿਕਂ, ਅਤ੍ਥਿ ਸੁਖੁਮਂ. ਯਂ ਤਂ ਰੂਪਂ ਉਪਾਦਾ ਤਂ ਅਤ੍ਥਿ ਦੂਰੇ, ਅਤ੍ਥਿ ਸਨ੍ਤਿਕੇ; ਯਂ ਤਂ ਰੂਪਂ ਨੋ ਉਪਾਦਾ ਤਂ ਅਤ੍ਥਿ ਦੂਰੇ, ਅਤ੍ਥਿ ਸਨ੍ਤਿਕੇ…ਪੇ… ਦਿਟ੍ਠਂ, ਸੁਤਂ, ਮੁਤਂ, ਵਿਞ੍ਞਾਤਂ ਰੂਪਂ. ਏਵਂ ਚਤੁਬ੍ਬਿਧੇਨ ਰੂਪਕ੍ਖਨ੍ਧੋ.

ਪਞ੍ਚਵਿਧੇਨ ਰੂਪਕ੍ਖਨ੍ਧੋ – ਪਥਵੀਧਾਤੁ, ਆਪੋਧਾਤੁ, ਤੇਜੋਧਾਤੁ, ਵਾਯੋਧਾਤੁ, ਯਞ੍ਚ ਰੂਪਂ ਉਪਾਦਾ. ਏਵਂ ਪਞ੍ਚਵਿਧੇਨ ਰੂਪਕ੍ਖਨ੍ਧੋ.

ਛਬ੍ਬਿਧੇਨ ਰੂਪਕ੍ਖਨ੍ਧੋ – ਚਕ੍ਖੁਵਿਞ੍ਞੇਯ੍ਯਂ ਰੂਪਂ, ਸੋਤਵਿਞ੍ਞੇਯ੍ਯਂ ਰੂਪਂ, ਘਾਨਵਿਞ੍ਞੇਯ੍ਯਂ ਰੂਪਂ, ਜਿਵ੍ਹਾਵਿਞ੍ਞੇਯ੍ਯਂ ਰੂਪਂ, ਕਾਯਵਿਞ੍ਞੇਯ੍ਯਂ ਰੂਪਂ, ਮਨੋਵਿਞ੍ਞੇਯ੍ਯਂ ਰੂਪਂ. ਏਵਂ ਛਬ੍ਬਿਧੇਨ ਰੂਪਕ੍ਖਨ੍ਧੋ.

ਸਤ੍ਤਵਿਧੇਨ ਰੂਪਕ੍ਖਨ੍ਧੋ – ਚਕ੍ਖੁਵਿਞ੍ਞੇਯ੍ਯਂ ਰੂਪਂ, ਸੋਤਵਿਞ੍ਞੇਯ੍ਯਂ ਰੂਪਂ, ਘਾਨਵਿਞ੍ਞੇਯ੍ਯਂ ਰੂਪਂ, ਜਿਵ੍ਹਾਵਿਞ੍ਞੇਯ੍ਯਂ ਰੂਪਂ, ਕਾਯਵਿਞ੍ਞੇਯ੍ਯਂ ਰੂਪਂ, ਮਨੋਧਾਤੁਵਿਞ੍ਞੇਯ੍ਯਂ ਰੂਪਂ, ਮਨੋਵਿਞ੍ਞਾਣਧਾਤੁਵਿਞ੍ਞੇਯ੍ਯਂ ਰੂਪਂ. ਏਵਂ ਸਤ੍ਤਵਿਧੇਨ ਰੂਪਕ੍ਖਨ੍ਧੋ.

ਅਟ੍ਠਵਿਧੇਨ ਰੂਪਕ੍ਖਨ੍ਧੋ – ਚਕ੍ਖੁਵਿਞ੍ਞੇਯ੍ਯਂ ਰੂਪਂ, ਸੋਤਵਿਞ੍ਞੇਯ੍ਯਂ ਰੂਪਂ, ਘਾਨਵਿਞ੍ਞੇਯ੍ਯਂ ਰੂਪਂ, ਜਿਵ੍ਹਾਵਿਞ੍ਞੇਯ੍ਯਂ ਰੂਪਂ, ਕਾਯਵਿਞ੍ਞੇਯ੍ਯਂ ਰੂਪਂ ਅਤ੍ਥਿ ਸੁਖਸਮ੍ਫਸ੍ਸਂ, ਅਤ੍ਥਿ ਦੁਕ੍ਖਸਮ੍ਫਸ੍ਸਂ, ਮਨੋਧਾਤੁਵਿਞ੍ਞੇਯ੍ਯਂ ਰੂਪਂ, ਮਨੋਵਿਞ੍ਞਾਣਧਾਤੁਵਿਞ੍ਞੇਯ੍ਯਂ ਰੂਪਂ. ਏਵਂ ਅਟ੍ਠਵਿਧੇਨ ਰੂਪਕ੍ਖਨ੍ਧੋ.

ਨਵਵਿਧੇਨ ਰੂਪਕ੍ਖਨ੍ਧੋ – ਚਕ੍ਖੁਨ੍ਦ੍ਰਿਯਂ, ਸੋਤਿਨ੍ਦ੍ਰਿਯਂ, ਘਾਨਿਨ੍ਦ੍ਰਿਯਂ, ਜਿਵ੍ਹਿਨ੍ਦ੍ਰਿਯਂ, ਕਾਯਿਨ੍ਦ੍ਰਿਯਂ, ਇਤ੍ਥਿਨ੍ਦ੍ਰਿਯਂ, ਪੁਰਿਸਿਨ੍ਦ੍ਰਿਯਂ, ਜੀਵਿਤਿਨ੍ਦ੍ਰਿਯਂ, ਯਞ੍ਚ ਰੂਪਂ ਨ ਇਨ੍ਦ੍ਰਿਯਂ. ਏਵਂ ਨਵਵਿਧੇਨ ਰੂਪਕ੍ਖਨ੍ਧੋ.

ਦਸਵਿਧੇਨ ਰੂਪਕ੍ਖਨ੍ਧੋ – ਚਕ੍ਖੁਨ੍ਦ੍ਰਿਯਂ, ਸੋਤਿਨ੍ਦ੍ਰਿਯਂ, ਘਾਨਿਨ੍ਦ੍ਰਿਯਂ, ਜਿਵ੍ਹਿਨ੍ਦ੍ਰਿਯਂ, ਕਾਯਿਨ੍ਦ੍ਰਿਯਂ, ਇਤ੍ਥਿਨ੍ਦ੍ਰਿਯਂ, ਪੁਰਿਸਿਨ੍ਦ੍ਰਿਯਂ, ਜੀਵਿਤਿਨ੍ਦ੍ਰਿਯਂ, ਨ ਇਨ੍ਦ੍ਰਿਯਂ ਰੂਪਂ ਅਤ੍ਥਿ ਸਪ੍ਪਟਿਘਂ, ਅਤ੍ਥਿ ਅਪ੍ਪਟਿਘਂ. ਏਵਂ ਦਸਵਿਧੇਨ ਰੂਪਕ੍ਖਨ੍ਧੋ.

ਏਕਾਦਸਵਿਧੇਨ ਰੂਪਕ੍ਖਨ੍ਧੋ – ਚਕ੍ਖਾਯਤਨਂ, ਸੋਤਾਯਤਨਂ, ਘਾਨਾਯਤਨਂ, ਜਿਵ੍ਹਾਯਤਨਂ, ਕਾਯਾਯਤਨਂ, ਰੂਪਾਯਤਨਂ, ਸਦ੍ਦਾਯਤਨਂ, ਗਨ੍ਧਾਯਤਨਂ, ਰਸਾਯਤਨਂ, ਫੋਟ੍ਠਬ੍ਬਾਯਤਨਂ, ਯਞ੍ਚ ਰੂਪਂ ਅਨਿਦਸ੍ਸਨਅਪ੍ਪਟਿਘਂ ਧਮ੍ਮਾਯਤਨਪਰਿਯਾਪਨ੍ਨਂ. ਏਵਂ ਏਕਾਦਸਵਿਧੇਨ ਰੂਪਕ੍ਖਨ੍ਧੋ.

ਅਯਂ ਵੁਚ੍ਚਤਿ ਰੂਪਕ੍ਖਨ੍ਧੋ.