੧-੪. ਪਚ੍ਚਯਾਨੁਲੋਮਾਦਿ

ਹੇਤੁਪਚ੍ਚਯੋ

੧੮੩. ਉਪੇਕ੍ਖਾਸਹਗਤਂ ਧਮ੍ਮਂ ਪਚ੍ਚਯਾ ਉਪੇਕ੍ਖਾਸਹਗਤੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਉਪੇਕ੍ਖਾਸਹਗਤਂ ਏਕਂ ਖਨ੍ਧਂ ਪਚ੍ਚਯਾ ਦ੍ਵੇ ਖਨ੍ਧਾ, ਦ੍ਵੇ ਖਨ੍ਧੇ…ਪੇ… ਪਟਿਸਨ੍ਧਿਕ੍ਖਣੇ…ਪੇ… (ਯਥਾ ਸਵਿਤਕ੍ਕਦੁਕਸਦਿਸਂ ਪਚ੍ਚਯਵਾਰੇ ਨਾਨਾਕਰਣਂ. ‘‘ਉਪੇਕ੍ਖ’’ਨ੍ਤਿ ਨਵਪਿ ਪਞ੍ਹਾ ਕਾਤਬ੍ਬਾ, ਪਟਿਸਨ੍ਧਿਪਵਤ੍ਤਿਪਿ ਵਤ੍ਥੁਪਿ.)

ਹੇਤੁਯਾ ਨਵ, ਆਰਮ੍ਮਣੇ ਨਵ…ਪੇ… ਪੁਰੇਜਾਤੇ ਨਵ, ਆਸੇਵਨੇ ਨਵ (ਸਬ੍ਬਤ੍ਥ ਨਵ), ਅਵਿਗਤੇ ਨਵ.

ਅਨੁਲੋਮਂ.

੧੮੪. ਉਪੇਕ੍ਖਾਸਹਗਤਂ ਧਮ੍ਮਂ ਪਚ੍ਚਯਾ ਉਪੇਕ੍ਖਾਸਹਗਤੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਉਪੇਕ੍ਖਾਸਹਗਤਂ ਏਕਂ ਖਨ੍ਧਂ ਪਚ੍ਚਯਾ ਦ੍ਵੇ ਖਨ੍ਧਾ, ਦ੍ਵੇ ਖਨ੍ਧੇ…ਪੇ… ਅਹੇਤੁਕਪਟਿਸਨ੍ਧਿਕ੍ਖਣੇ…ਪੇ… ਵਿਚਿਕਿਚ੍ਛਾਸਹਗਤੇ ਉਦ੍ਧਚ੍ਚਸਹਗਤੇ ਖਨ੍ਧੇ ਪਚ੍ਚਯਾ ਵਿਚਿਕਿਚ੍ਛਾਸਹਗਤੋ ਉਦ੍ਧਚ੍ਚਸਹਗਤੋ ਮੋਹੋ. (ਏਵਂ ਨਵਪਿ ਪਞ੍ਹਾ ਪਵਤ੍ਤਿਪਟਿਸਨ੍ਧਿਯੋ ਯਥਾ ਸਵਿਤਕ੍ਕਦੁਕਸ੍ਸ ਏਵਂ ਕਾਤਬ੍ਬਾ. ਤੀਣਿਯੇਵ ਮੋਹੋ, ਪਵਤ੍ਤੇ ਵਤ੍ਥੁਪਿ ਕਾਤਬ੍ਬਾ.)

ਨਹੇਤੁਯਾ ਨਵ, ਨਆਰਮ੍ਮਣੇ ਤੀਣਿ, ਨਅਧਿਪਤਿਯਾ ਨਵ, ਨਅਨਨ੍ਤਰੇ ਤੀਣਿ, ਨਸਮਨਨ੍ਤਰੇ ਤੀਣਿ, ਨਉਪਨਿਸ੍ਸਯੇ ਤੀਣਿ, ਨਪੁਰੇਜਾਤੇ ਨਵ, ਨਪਚ੍ਛਾਜਾਤੇ ਨਵ, ਨਆਸੇਵਨੇ ਨਵ, ਨਕਮ੍ਮੇ ਚਤ੍ਤਾਰਿ, ਨਵਿਪਾਕੇ ਨਵ, ਨਆਹਾਰੇ ਏਕਂ, ਨਇਨ੍ਦ੍ਰਿਯੇ ਏਕਂ, ਨਝਾਨੇ ਏਕਂ, ਨਮਗ੍ਗੇ ਨਵ, ਨਸਮ੍ਪਯੁਤ੍ਤੇ ਤੀਣਿ, ਨਵਿਪ੍ਪਯੁਤ੍ਤੇ ਛ, ਨੋਨਤ੍ਥਿਯਾ ਤੀਣਿ, ਨੋਵਿਗਤੇ ਤੀਣਿ.

ਪਚ੍ਚਨੀਯਂ.