੧. ਵਿਭਙ੍ਗਵਾਰੋ

ਨਹੇਤੁਪਚ੍ਚਯੋ

੧੦੬. ਸਵਿਤਕ੍ਕਂ ਧਮ੍ਮਂ ਪਟਿਚ੍ਚ ਸਵਿਤਕ੍ਕੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਸਵਿਤਕ੍ਕਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ…ਪੇ… ਅਹੇਤੁਕਪਟਿਸਨ੍ਧਿਕ੍ਖਣੇ…ਪੇ… ਵਿਚਿਕਿਚ੍ਛਾਸਹਗਤੇ ਉਦ੍ਧਚ੍ਚਸਹਗਤੇ ਖਨ੍ਧੇ ਪਟਿਚ੍ਚ ਵਿਚਿਕਿਚ੍ਛਾਸਹਗਤੋ ਉਦ੍ਧਚ੍ਚਸਹਗਤੋ ਮੋਹੋ. (ਸਵਿਤਕ੍ਕਮੂਲਕਾ ਅਵਸੇਸਾ ਦ੍ਵੇ ਪਞ੍ਹਾ ਕਾਤਬ੍ਬਾ, ਅਹੇਤੁਕਂ ਨਿਨ੍ਨਾਨਂ.) (੩)

ਅਵਿਤਕ੍ਕਂ ਧਮ੍ਮਂ ਪਟਿਚ੍ਚ ਅਵਿਤਕ੍ਕੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਅਵਿਤਕ੍ਕਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ…ਪੇ… ਅਹੇਤੁਕਂ ਵਿਤਕ੍ਕਂ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ; ਅਹੇਤੁਕਪਟਿਸਨ੍ਧਿਕ੍ਖਣੇ ਵਿਤਕ੍ਕਂ ਪਟਿਚ੍ਚ ਕਟਤ੍ਤਾਰੂਪਂ, ਵਿਤਕ੍ਕਂ ਪਟਿਚ੍ਚ ਵਤ੍ਥੁ, ਵਤ੍ਥੁਂ ਪਟਿਚ੍ਚ ਵਿਤਕ੍ਕੋ, ਏਕਂ ਮਹਾਭੂਤਂ…ਪੇ…. (੧)

ਅਵਿਤਕ੍ਕਂ ਧਮ੍ਮਂ ਪਟਿਚ੍ਚ ਸਵਿਤਕ੍ਕੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਵਿਤਕ੍ਕਂ ਪਟਿਚ੍ਚ ਸਮ੍ਪਯੁਤ੍ਤਕਾ ਖਨ੍ਧਾ, ਅਹੇਤੁਕਪਟਿਸਨ੍ਧਿਕ੍ਖਣੇ ਵਿਤਕ੍ਕਂ ਪਟਿਚ੍ਚ ਸਮ੍ਪਯੁਤ੍ਤਕਾ ਖਨ੍ਧਾ; ਪਟਿਸਨ੍ਧਿਕ੍ਖਣੇ ਵਤ੍ਥੁਂ ਪਟਿਚ੍ਚ ਅਹੇਤੁਕਾ ਸਵਿਤਕ੍ਕਾ ਖਨ੍ਧਾ, ਵਿਤਕ੍ਕਂ ਪਟਿਚ੍ਚ ਵਿਚਿਕਿਚ੍ਛਾਸਹਗਤੋ ਉਦ੍ਧਚ੍ਚਸਹਗਤੋ ਮੋਹੋ. (੨)

ਅਵਿਤਕ੍ਕਂ ਧਮ੍ਮਂ ਪਟਿਚ੍ਚ ਸਵਿਤਕ੍ਕੋ ਚ ਅਵਿਤਕ੍ਕੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਨਹੇਤੁਪਚ੍ਚਯਾ. (ਸਂਖਿਤ੍ਤਂ. ਹੇਤੁਪਚ੍ਚਯਸਦਿਸਂ. ‘‘ਅਹੇਤੁਕ’’ਨ੍ਤਿ ਨਿਯਾਮੇਤਬ੍ਬਂ.) (੩)

ਸਵਿਤਕ੍ਕਞ੍ਚ ਅਵਿਤਕ੍ਕਞ੍ਚ ਧਮ੍ਮਂ ਪਟਿਚ੍ਚ ਸਵਿਤਕ੍ਕੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਸਵਿਤਕ੍ਕਂ ਏਕਂ ਖਨ੍ਧਞ੍ਚ ਵਿਤਕ੍ਕਞ੍ਚ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ…ਪੇ… ਅਹੇਤੁਕਪਟਿਸਨ੍ਧਿਕ੍ਖਣੇ ਸਵਿਤਕ੍ਕਂ ਏਕਂ ਖਨ੍ਧਞ੍ਚ ਵਿਤਕ੍ਕਞ੍ਚ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ…ਪੇ… ਅਹੇਤੁਕਪਟਿਸਨ੍ਧਿਕ੍ਖਣੇ ਸਵਿਤਕ੍ਕਂ ਏਕਂ ਖਨ੍ਧਞ੍ਚ ਵਤ੍ਥੁਞ੍ਚ ਵਿਤਕ੍ਕਞ੍ਚ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ…ਪੇ… ਵਿਚਿਕਿਚ੍ਛਾਸਹਗਤੇ ਉਦ੍ਧਚ੍ਚਸਹਗਤੇ ਖਨ੍ਧੇ ਚ ਵਿਤਕ੍ਕਞ੍ਚ ਪਟਿਚ੍ਚ ਵਿਚਿਕਿਚ੍ਛਾਸਹਗਤੋ ਉਦ੍ਧਚ੍ਚਸਹਗਤੋ ਮੋਹੋ. (ਅਵਸੇਸਾ ਦ੍ਵੇ ਪਞ੍ਹਾ ਹੇਤੁਪਚ੍ਚਯਸਦਿਸਾ ਨਿਨ੍ਨਾਨਾ, ਅਹੇਤੁਕਨ੍ਤਿ ਨਿਯਾਮੇਤਬ੍ਬਂ.) (੩)