੧. ਵਿਭਙ੍ਗਵਾਰੋ

ਹੇਤੁਪਚ੍ਚਯੋ

੬੮. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ – ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ.) ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਹੇਤੂ ਚਿਤ੍ਤਸਮੁਟ੍ਠਾਨਾਨਂ ਰੂਪਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ.) ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (੩)

੬੯. ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ – ਨਦਸ੍ਸਨੇਨ ਪਹਾਤਬ੍ਬਹੇਤੁਕਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਹੇਤੁਪਚ੍ਚਯੇਨ ਪਚ੍ਚਯੋ, ਵਿਚਿਕਿਚ੍ਛਾਸਹਗਤੋ ਮੋਹੋ ਚਿਤ੍ਤਸਮੁਟ੍ਠਾਨਾਨਂ ਰੂਪਾਨਂ ਹੇਤੁਪਚ੍ਚਯੇਨ ਪਚ੍ਚਯੋ; ਪਟਿਸਨ੍ਧਿਕ੍ਖਣੇ…ਪੇ…. (ਮੂਲਂ ਕਾਤਬ੍ਬਂ.) ਵਿਚਿਕਿਚ੍ਛਾਸਹਗਤੋ ਮੋਹੋ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ.) ਵਿਚਿਕਿਚ੍ਛਾਸਹਗਤੋ ਮੋਹੋ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (੩)

ਆਰਮ੍ਮਣਪਚ੍ਚਯੋ

੭੦. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਦਸ੍ਸਨੇਨ ਪਹਾਤਬ੍ਬਹੇਤੁਕੇ ਖਨ੍ਧੇ ਆਰਬ੍ਭ ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਖਨ੍ਧਾ ਉਪ੍ਪਜ੍ਜਨ੍ਤਿ. (ਮੂਲਂ ਕਾਤਬ੍ਬਂ.) ਦਸ੍ਸਨੇਨ ਪਹਾਤਬ੍ਬਹੇਤੁਕੇ ਖਨ੍ਧੇ ਆਰਬ੍ਭ ਨਦਸ੍ਸਨੇਨ ਪਹਾਤਬ੍ਬਹੇਤੁਕਾ ਖਨ੍ਧਾ ਚ ਮੋਹੋ ਚ ਉਪ੍ਪਜ੍ਜਨ੍ਤਿ. (ਮੂਲਂ ਕਾਤਬ੍ਬਂ.) ਦਸ੍ਸਨੇਨ ਪਹਾਤਬ੍ਬਹੇਤੁਕੇ ਖਨ੍ਧੇ ਆਰਬ੍ਭ ਵਿਚਿਕਿਚ੍ਛਾਸਹਗਤਾ ਖਨ੍ਧਾ ਚ ਮੋਹੋ ਚ ਉਪ੍ਪਜ੍ਜਨ੍ਤਿ. (੩)

੭੧. ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਦਾਨਂ…ਪੇ… ਸੀਲਂ…ਪੇ… ਉਪੋਸਥਕਮ੍ਮਂ ਕਤ੍ਵਾ ਤਂ ਪਚ੍ਚਵੇਕ੍ਖਤਿ, ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਰਾਗੋ ਉਪ੍ਪਜ੍ਜਤਿ, ਉਦ੍ਧਚ੍ਚਂ ਉਪ੍ਪਜ੍ਜਤਿ, ਨਦਸ੍ਸਨੇਨ ਪਹਾਤਬ੍ਬਹੇਤੁਕਂ ਦੋਮਨਸ੍ਸਂ ਉਪ੍ਪਜ੍ਜਤਿ, ਪੁਬ੍ਬੇ ਸੁਚਿਣ੍ਣਾਨਿ …ਪੇ… ਝਾਨਾ ਵੁਟ੍ਠਹਿਤ੍ਵਾ…ਪੇ… ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਪਚ੍ਚਵੇਕ੍ਖਨ੍ਤਿ…ਪੇ… ਅਰਿਯਾ ਨਦਸ੍ਸਨੇਨ ਪਹਾਤਬ੍ਬਹੇਤੁਕੇ ਪਹੀਨੇ ਕਿਲੇਸੇ ਪਚ੍ਚਵੇਕ੍ਖਨ੍ਤਿ, ਵਿਕ੍ਖਮ੍ਭਿਤੇ ਕਿਲੇਸੇ…ਪੇ… ਪੁਬ੍ਬੇ ਸਮੁਦਾਚਿਣ੍ਣੇ ਕਿਲੇਸੇ ਜਾਨਨ੍ਤਿ, ਚਕ੍ਖੁਂ…ਪੇ… ਵਤ੍ਥੁਂ ਨਦਸ੍ਸਨੇਨ ਪਹਾਤਬ੍ਬਹੇਤੁਕੇ ਖਨ੍ਧੇ ਚ ਮੋਹਞ੍ਚ ਅਨਿਚ੍ਚਤੋ…ਪੇ… ਵਿਪਸ੍ਸਤਿ, ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਰਾਗੋ ਉਪ੍ਪਜ੍ਜਤਿ, ਉਦ੍ਧਚ੍ਚਂ ਉਪ੍ਪਜ੍ਜਤਿ, ਨਦਸ੍ਸਨੇਨ ਪਹਾਤਬ੍ਬਹੇਤੁਕਂ ਦੋਮਨਸ੍ਸਂ ਉਪ੍ਪਜ੍ਜਤਿ, ਦਿਬ੍ਬੇਨ ਚਕ੍ਖੁਨਾ ਰੂਪਂ ਪਸ੍ਸਤਿ…ਪੇ… ਅਨਾਗਤਂਸਞਾਣਸ੍ਸ, ਆਵਜ੍ਜਨਾਯ, ਮੋਹਸ੍ਸ ਚ ਆਰਮ੍ਮਣਪਚ੍ਚਯੇਨ ਪਚ੍ਚਯੋ.

ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਦਾਨਂ…ਪੇ… ਝਾਨਂ…ਪੇ… ਚਕ੍ਖੁਂ…ਪੇ… ਵਤ੍ਥੁਂ ਨਦਸ੍ਸਨੇਨ ਪਹਾਤਬ੍ਬਹੇਤੁਕੇ ਖਨ੍ਧੇ ਚ ਮੋਹਞ੍ਚ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ…ਪੇ… ਵਿਚਿਕਿਚ੍ਛਾ…ਪੇ… ਦਸ੍ਸਨੇਨ ਪਹਾਤਬ੍ਬਹੇਤੁਕਂ ਦੋਮਨਸ੍ਸਂ ਉਪ੍ਪਜ੍ਜਤਿ.

ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਚਕ੍ਖੁਂ…ਪੇ… ਵਤ੍ਥੁਂ ਨਦਸ੍ਸਨੇਨ ਪਹਾਤਬ੍ਬਹੇਤੁਕੇ ਖਨ੍ਧੇ ਚ ਮੋਹਞ੍ਚ ਆਰਬ੍ਭ ਵਿਚਿਕਿਚ੍ਛਾਸਹਗਤਾ ਖਨ੍ਧਾ ਚ ਮੋਹੋ ਚ ਉਪ੍ਪਜ੍ਜਨ੍ਤਿ. (੩)

੭੨. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਧਮ੍ਮਾ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਵਿਚਿਕਿਚ੍ਛਾਸਹਗਤੇ ਖਨ੍ਧੇ ਚ ਮੋਹਞ੍ਚ ਆਰਬ੍ਭ ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਖਨ੍ਧਾ ਉਪ੍ਪਜ੍ਜਨ੍ਤਿ. (ਮੂਲਂ ਕਾਤਬ੍ਬਂ.) ਵਿਚਿਕਿਚ੍ਛਾਸਹਗਤੇ ਖਨ੍ਧੇ ਚ ਮੋਹਞ੍ਚ ਆਰਬ੍ਭ ਨਦਸ੍ਸਨੇਨ ਪਹਾਤਬ੍ਬਹੇਤੁਕਾ ਖਨ੍ਧਾ ਚ ਮੋਹੋ ਚ ਉਪ੍ਪਜ੍ਜਨ੍ਤਿ. (ਮੂਲਂ ਕਾਤਬ੍ਬਂ.) ਵਿਚਿਕਿਚ੍ਛਾਸਹਗਤੇ ਖਨ੍ਧੇ ਚ ਮੋਹਞ੍ਚ ਆਰਬ੍ਭ ਵਿਚਿਕਿਚ੍ਛਾਸਹਗਤਾ ਖਨ੍ਧਾ ਚ ਮੋਹੋ ਚ ਉਪ੍ਪਜ੍ਜਨ੍ਤਿ. (੩)

ਅਧਿਪਤਿਪਚ੍ਚਯੋ

੭੩. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ. ਆਰਮ੍ਮਣਾਧਿਪਤਿ – ਦਸ੍ਸਨੇਨ ਪਹਾਤਬ੍ਬਹੇਤੁਕੇ ਖਨ੍ਧੇ ਗਰੁਂ ਕਤ੍ਵਾ ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਖਨ੍ਧਾ ਉਪ੍ਪਜ੍ਜਨ੍ਤਿ. ਸਹਜਾਤਾਧਿਪਤਿ – ਦਸ੍ਸਨੇਨ ਪਹਾਤਬ੍ਬਹੇਤੁਕਾਧਿਪਤਿ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੧)

ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਦਸ੍ਸਨੇਨ ਪਹਾਤਬ੍ਬਹੇਤੁਕਾਧਿਪਤਿ ਚਿਤ੍ਤਸਮੁਟ੍ਠਾਨਾਨਂ ਰੂਪਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੨)

ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਦਸ੍ਸਨੇਨ ਪਹਾਤਬ੍ਬਹੇਤੁਕਾਧਿਪਤਿ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੩)

੭੪. ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ. ਆਰਮ੍ਮਣਾਧਿਪਤਿ – ਦਾਨਂ…ਪੇ… ਸੀਲਂ…ਪੇ… ਉਪੋਸਥਕਮ੍ਮਂ ਕਤ੍ਵਾ ਤਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਤਿ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਗਰੁਂ ਕਤ੍ਵਾ ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਰਾਗੋ ਉਪ੍ਪਜ੍ਜਤਿ, ਪੁਬ੍ਬੇ ਸੁਚਿਣ੍ਣਾਨਿ…ਪੇ… ਝਾਨਾ…ਪੇ… ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ…ਪੇ… ਫਲਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ; ਚਕ੍ਖੁਂ…ਪੇ… ਵਤ੍ਥੁਂ ਨਦਸ੍ਸਨੇਨ ਪਹਾਤਬ੍ਬਹੇਤੁਕੇ ਖਨ੍ਧੇ ਗਰੁਂ ਕਤ੍ਵਾ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਗਰੁਂ ਕਤ੍ਵਾ ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਰਾਗੋ ਉਪ੍ਪਜ੍ਜਤਿ. ਸਹਜਾਤਾਧਿਪਤਿ – ਨਦਸ੍ਸਨੇਨ ਪਹਾਤਬ੍ਬਹੇਤੁਕਾਧਿਪਤਿ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੧)

ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਆਰਮ੍ਮਣਾਧਿਪਤਿ – ਦਾਨਂ…ਪੇ… ਸੀਲਂ…ਪੇ… ਉਪੋਸਥਕਮ੍ਮਂ ਕਤ੍ਵਾ…ਪੇ… ਝਾਨਾ…ਪੇ… ਚਕ੍ਖੁਂ…ਪੇ… ਵਤ੍ਥੁਂ ਨਦਸ੍ਸਨੇਨ ਪਹਾਤਬ੍ਬਹੇਤੁਕੇ ਖਨ੍ਧੇ ਗਰੁਂ ਕਤ੍ਵਾ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਗਰੁਂ ਕਤ੍ਵਾ ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ ਉਪ੍ਪਜ੍ਜਤਿ. (੨)

ਅਨਨ੍ਤਰਪਚ੍ਚਯੋ

੭੫. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਦਸ੍ਸਨੇਨ ਪਹਾਤਬ੍ਬਹੇਤੁਕਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ.) ਪੁਰਿਮਾ ਪੁਰਿਮਾ ਵਿਚਿਕਿਚ੍ਛਾਸਹਗਤਾ ਖਨ੍ਧਾ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਵਿਚਿਕਿਚ੍ਛਾਸਹਗਤਸ੍ਸ ਮੋਹਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ; ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਖਨ੍ਧਾ ਵੁਟ੍ਠਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ.) ਪੁਰਿਮਾ ਪੁਰਿਮਾ ਵਿਚਿਕਿਚ੍ਛਾਸਹਗਤਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਵਿਚਿਕਿਚ੍ਛਾਸਹਗਤਾਨਂ ਖਨ੍ਧਾਨਂ ਮੋਹਸ੍ਸ ਚ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੩)

੭੬. ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮੋ ਪੁਰਿਮੋ ਵਿਚਿਕਿਚ੍ਛਾਸਹਗਤੋ ਮੋਹੋ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਵਿਚਿਕਿਚ੍ਛਾਸਹਗਤਸ੍ਸ ਮੋਹਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ; ਪੁਰਿਮਾ ਪੁਰਿਮਾ ਨਦਸ੍ਸਨੇਨ ਪਹਾਤਬ੍ਬਹੇਤੁਕਾ ਖਨ੍ਧਾ…ਪੇ… ਫਲਸਮਾਪਤ੍ਤਿਯਾ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ.) ਪੁਰਿਮੋ ਪੁਰਿਮੋ ਵਿਚਿਕਿਚ੍ਛਾਸਹਗਤੋ ਮੋਹੋ ਪਚ੍ਛਿਮਾਨਂ ਪਚ੍ਛਿਮਾਨਂ ਵਿਚਿਕਿਚ੍ਛਾਸਹਗਤਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ; ਆਵਜ੍ਜਨਾ ਦਸ੍ਸਨੇਨ ਪਹਾਤਬ੍ਬਹੇਤੁਕਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ.) ਪੁਰਿਮੋ ਪੁਰਿਮੋ ਵਿਚਿਕਿਚ੍ਛਾਸਹਗਤੋ ਮੋਹੋ ਪਚ੍ਛਿਮਾਨਂ ਪਚ੍ਛਿਮਾਨਂ ਵਿਚਿਕਿਚ੍ਛਾਸਹਗਤਾਨਂ ਖਨ੍ਧਾਨਂ ਮੋਹਸ੍ਸ ਚ ਅਨਨ੍ਤਰਪਚ੍ਚਯੇਨ ਪਚ੍ਚਯੋ; ਆਵਜ੍ਜਨਾ ਵਿਚਿਕਿਚ੍ਛਾਸਹਗਤਾਨਂ ਖਨ੍ਧਾਨਂ ਮੋਹਸ੍ਸ ਚ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੩)

੭੭. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਧਮ੍ਮਾ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਵਿਚਿਕਿਚ੍ਛਾਸਹਗਤਾ ਖਨ੍ਧਾ ਚ ਮੋਹੋ ਚ ਪਚ੍ਛਿਮਾਨਂ ਪਚ੍ਛਿਮਾਨਂ ਵਿਚਿਕਿਚ੍ਛਾਸਹਗਤਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ.) ਪੁਰਿਮਾ ਪੁਰਿਮਾ ਵਿਚਿਕਿਚ੍ਛਾਸਹਗਤਾ ਖਨ੍ਧਾ ਚ ਮੋਹੋ ਚ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਵਿਚਿਕਿਚ੍ਛਾਸਹਗਤਸ੍ਸ ਮੋਹਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ; ਵਿਚਿਕਿਚ੍ਛਾਸਹਗਤਾ ਖਨ੍ਧਾ ਚ ਮੋਹੋ ਚ ਵੁਟ੍ਠਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ.) ਪੁਰਿਮਾ ਪੁਰਿਮਾ ਵਿਚਿਕਿਚ੍ਛਾਸਹਗਤਾ ਖਨ੍ਧਾ ਚ ਮੋਹੋ ਚ ਪਚ੍ਛਿਮਾਨਂ ਪਚ੍ਛਿਮਾਨਂ ਵਿਚਿਕਿਚ੍ਛਾਸਹਗਤਾਨਂ ਖਨ੍ਧਾਨਂ ਮੋਹਸ੍ਸ ਚ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੩)

ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ… ਨਵ… ਸਹਜਾਤਪਚ੍ਚਯੇਨ ਪਚ੍ਚਯੋ… ਨਵ… ਅਞ੍ਞਮਞ੍ਞਪਚ੍ਚਯੇਨ ਪਚ੍ਚਯੋ… ਛ… ਨਿਸ੍ਸਯਪਚ੍ਚਯੇਨ ਪਚ੍ਚਯੋ… ਨਵ.

ਉਪਨਿਸ੍ਸਯਪਚ੍ਚਯੋ

੭੮. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਖਨ੍ਧਾ ਦਸ੍ਸਨੇਨ ਪਹਾਤਬ੍ਬਹੇਤੁਕਾਨਂ ਖਨ੍ਧਾਨਂ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (ਅਵਸੇਸੇਸੁ ਦ੍ਵੀਸੁ ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ.) (ਮੂਲਂ ਕਾਤਬ੍ਬਂ.) ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਖਨ੍ਧਾ ਨਦਸ੍ਸਨੇਨ ਪਹਾਤਬ੍ਬਹੇਤੁਕਾਨਂ ਖਨ੍ਧਾਨਂ ਮੋਹਸ੍ਸ ਚ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ.) ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਖਨ੍ਧਾ ਵਿਚਿਕਿਚ੍ਛਾਸਹਗਤਾਨਂ ਖਨ੍ਧਾਨਂ ਮੋਹਸ੍ਸ ਚ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

੭੯. ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਸਦ੍ਧਂ ਉਪਨਿਸ੍ਸਾਯ ਦਾਨਂ ਦੇਤਿ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ ਮਾਨਂ ਜਪ੍ਪੇਤਿ; ਸੀਲਂ …ਪੇ… ਪਞ੍ਞਂ… ਨਦਸ੍ਸਨੇਨ ਪਹਾਤਬ੍ਬਹੇਤੁਕਂ ਰਾਗਂ… ਦੋਸਂ… ਮੋਹਂ… ਮਾਨਂ… ਪਤ੍ਥਨਂ… ਕਾਯਿਕਂ ਸੁਖਂ… ਕਾਯਿਕਂ ਦੁਕ੍ਖਂ… ਉਤੁਂ… ਭੋਜਨਂ… ਸੇਨਾਸਨਂ ਉਪਨਿਸ੍ਸਾਯ ਦਾਨਂ ਦੇਤਿ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ; ਸਦ੍ਧਾ…ਪੇ… ਸੇਨਾਸਨਂ ਸਦ੍ਧਾਯ…ਪੇ… ਪਞ੍ਞਾਯ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਰਾਗਸ੍ਸ…ਪੇ… ਪਤ੍ਥਨਾਯ ਫਲਸਮਾਪਤ੍ਤਿਯਾ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੧)

ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਸਦ੍ਧਂ ਉਪਨਿਸ੍ਸਾਯ ਦਿਟ੍ਠਿਂ ਗਣ੍ਹਾਤਿ; ਸੀਲਂ…ਪੇ… ਪਞ੍ਞਂ… ਨਦਸ੍ਸਨੇਨ ਪਹਾਤਬ੍ਬਹੇਤੁਕਂ ਰਾਗਂ… ਦੋਸਂ… ਮੋਹਂ… ਮਾਨਂ… ਪਤ੍ਥਨਂ… ਕਾਯਿਕਂ ਸੁਖਂ… ਕਾਯਿਕਂ ਦੁਕ੍ਖਂ… ਉਤੁਂ… ਭੋਜਨਂ… ਸੇਨਾਸਨਂ ਉਪਨਿਸ੍ਸਾਯ ਪਾਣਂ ਹਨਤਿ…ਪੇ… ਸਙ੍ਘਂ ਭਿਨ੍ਦਤਿ; ਸਦ੍ਧਾ…ਪੇ… ਸੇਨਾਸਨਂ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਰਾਗਸ੍ਸ… ਦੋਸਸ੍ਸ… ਮੋਹਸ੍ਸ… ਦਿਟ੍ਠਿਯਾ… ਪਤ੍ਥਨਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੨)

ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਸਦ੍ਧਾ…ਪੇ… ਪਞ੍ਞਾ, ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਰਾਗੋ… ਦੋਸੋ… ਮੋਹੋ… ਮਾਨੋ… ਪਤ੍ਥਨਾ… ਕਾਯਿਕਂ ਸੁਖਂ…ਪੇ… ਸੇਨਾਸਨਂ, ਵਿਚਿਕਿਚ੍ਛਾਸਹਗਤਾਨਂ ਖਨ੍ਧਾਨਂ ਮੋਹਸ੍ਸ ਚ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

੮੦. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਧਮ੍ਮਾ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਵਿਚਿਕਿਚ੍ਛਾਸਹਗਤਾ ਖਨ੍ਧਾ ਚ ਮੋਹੋ ਚ ਦਸ੍ਸਨੇਨ ਪਹਾਤਬ੍ਬਹੇਤੁਕਾਨਂ ਖਨ੍ਧਾਨਂ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ.) ਵਿਚਿਕਿਚ੍ਛਾਸਹਗਤਾ ਖਨ੍ਧਾ ਚ ਮੋਹੋ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕਾਨਂ ਖਨ੍ਧਾਨਂ ਮੋਹਸ੍ਸ ਚ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ.) ਵਿਚਿਕਿਚ੍ਛਾਸਹਗਤਾ ਖਨ੍ਧਾ ਚ ਮੋਹੋ ਚ ਵਿਚਿਕਿਚ੍ਛਾਸਹਗਤਾਨਂ ਖਨ੍ਧਾਨਂ ਮੋਹਸ੍ਸ ਚ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

ਪੁਰੇਜਾਤਪਚ੍ਚਯੋ

੮੧. ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਪੁਰੇਜਾਤਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਪੁਰੇਜਾਤਂ, ਵਤ੍ਥੁਪੁਰੇਜਾਤਂ. ਆਰਮ੍ਮਣਪੁਰੇਜਾਤਂ – ਚਕ੍ਖੁਂ…ਪੇ… ਵਤ੍ਥੁਂ ਅਨਿਚ੍ਚਤੋ…ਪੇ… ਵਿਪਸ੍ਸਤਿ, ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਰਾਗੋ ਉਪ੍ਪਜ੍ਜਤਿ, ਉਦ੍ਧਚ੍ਚਂ ਉਪ੍ਪਜ੍ਜਤਿ, ਨਦਸ੍ਸਨੇਨ ਪਹਾਤਬ੍ਬਹੇਤੁਕਂ ਦੋਮਨਸ੍ਸਂ ਉਪ੍ਪਜ੍ਜਤਿ; ਦਿਬ੍ਬੇਨ…ਪੇ…. (ਸਂਖਿਤ੍ਤਂ. ਵਤ੍ਥੁਪੁਰੇਜਾਤਂ ਸਂਖਿਤ੍ਤਂ.) (੧)

ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਪੁਰੇਜਾਤਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਪੁਰੇਜਾਤਂ, ਵਤ੍ਥੁਪੁਰੇਜਾਤਂ. ਆਰਮ੍ਮਣਪੁਰੇਜਾਤਂ – ਚਕ੍ਖੁਂ…ਪੇ… ਵਤ੍ਥੁਂ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ…ਪੇ… ਵਿਚਿਕਿਚ੍ਛਾ…ਪੇ… ਦਸ੍ਸਨੇਨ ਪਹਾਤਬ੍ਬਹੇਤੁਕਂ ਦੋਮਨਸ੍ਸਂ ਉਪ੍ਪਜ੍ਜਤਿ. (ਵਤ੍ਥੁਪੁਰੇਜਾਤਂ ਸਂਖਿਤ੍ਤਂ.) (੨)

ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਧਮ੍ਮਸ੍ਸ ਪੁਰੇਜਾਤਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਪੁਰੇਜਾਤਂ, ਵਤ੍ਥੁਪੁਰੇਜਾਤਂ. ਆਰਮ੍ਮਣਪੁਰੇਜਾਤਂ – ਚਕ੍ਖੁਂ…ਪੇ… ਵਤ੍ਥੁਂ ਆਰਬ੍ਭ ਵਿਚਿਕਿਚ੍ਛਾਸਹਗਤਾ ਖਨ੍ਧਾ ਚ ਮੋਹੋ ਚ ਉਪ੍ਪਜ੍ਜਨ੍ਤਿ. (ਵਤ੍ਥੁਪੁਰੇਜਾਤਂ ਸਂਖਿਤ੍ਤਂ.) (੩)

ਪਚ੍ਛਾਜਾਤਾਸੇਵਨਪਚ੍ਚਯਾ

੮੨. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ (ਸਂਖਿਤ੍ਤਂ). ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ (ਸਂਖਿਤ੍ਤਂ). ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਧਮ੍ਮਾ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ (ਸਂਖਿਤ੍ਤਂ)… ਆਸੇਵਨਪਚ੍ਚਯੇਨ ਪਚ੍ਚਯੋ.

ਕਮ੍ਮਪਚ੍ਚਯਾਦਿ

੮੩. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਕਮ੍ਮਪਚ੍ਚਯੇਨ ਪਚ੍ਚਯੋ – ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਚੇਤਨਾ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. (ਮੂਲਂ ਕਾਤਬ੍ਬਂ.) ਸਹਜਾਤਾ, ਨਾਨਾਕ੍ਖਣਿਕਾ. ਸਹਜਾਤਾ – ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਚੇਤਨਾ ਚਿਤ੍ਤਸਮੁਟ੍ਠਾਨਾਨਂ ਰੂਪਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. ਨਾਨਾਕ੍ਖਣਿਕਾ – ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਚੇਤਨਾ ਵਿਪਾਕਾਨਂ ਖਨ੍ਧਾਨਂ ਕਟਤ੍ਤਾ ਚ ਰੂਪਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਧਮ੍ਮਸ੍ਸ ਕਮ੍ਮਪਚ੍ਚਯੇਨ ਪਚ੍ਚਯੋ – ਦਸ੍ਸਨੇਨ ਪਹਾਤਬ੍ਬਹੇਤੁਕਾ ਚੇਤਨਾ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. (੩)

ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਕਮ੍ਮਪਚ੍ਚਯੇਨ ਪਚ੍ਚਯੋ – ਸਹਜਾਤਾ, ਨਾਨਾਕ੍ਖਣਿਕਾ. ਸਹਜਾਤਾ – ਨਦਸ੍ਸਨੇਨ ਪਹਾਤਬ੍ਬਹੇਤੁਕਾ ਚੇਤਨਾ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਚਿਤ੍ਤਸਮੁਟ੍ਠਾਨਾਨਞ੍ਚ ਰੂਪਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ; ਪਟਿਸਨ੍ਧਿਕ੍ਖਣੇ…ਪੇ…. ਨਾਨਾਕ੍ਖਣਿਕਾ – ਨਦਸ੍ਸਨੇਨ ਪਹਾਤਬ੍ਬਹੇਤੁਕਾ ਚੇਤਨਾ ਵਿਪਾਕਾਨਂ ਖਨ੍ਧਾਨਂ ਕਟਤ੍ਤਾ ਚ ਰੂਪਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. (੧)

ਵਿਪਾਕਪਚ੍ਚਯੇਨ ਪਚ੍ਚਯੋ… ਆਹਾਰਪਚ੍ਚਯੇਨ ਪਚ੍ਚਯੋ… ਇਨ੍ਦ੍ਰਿਯਪਚ੍ਚਯੇਨ ਪਚ੍ਚਯੋ… ਝਾਨਪਚ੍ਚਯੇਨ ਪਚ੍ਚਯੋ… ਮਗ੍ਗਪਚ੍ਚਯੇਨ ਪਚ੍ਚਯੋ… ਸਮ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ… ਛ… ਵਿਪ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ… ਪਞ੍ਚ.

ਅਤ੍ਥਿਪਚ੍ਚਯਾਦਿ

੮੪. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ… ਤੀਣਿ.

ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ – ਸਹਜਾਤਂ, ਪੁਰੇਜਾਤਂ, ਪਚ੍ਛਾਜਾਤਂ, ਆਹਾਰਂ, ਇਨ੍ਦ੍ਰਿਯਂ (ਸਂਖਿਤ੍ਤਂ). ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ – ਸਹਜਾਤਂ, ਪੁਰੇਜਾਤਂ (ਸਂਖਿਤ੍ਤਂ). ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਧਮ੍ਮੋ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ – ਸਹਜਾਤਂ, ਪੁਰੇਜਾਤਂ (ਸਂਖਿਤ੍ਤਂ). (੩)

੮੫. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਧਮ੍ਮਾ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ – ਸਹਜਾਤਂ, ਪੁਰੇਜਾਤਂ. ਸਹਜਾਤੋ – ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਏਕੋ ਖਨ੍ਧੋ ਚ ਵਤ੍ਥੁ ਚ ਤਿਣ੍ਣਨ੍ਨਂ ਖਨ੍ਧਾਨਂ ਅਤ੍ਥਿਪਚ੍ਚਯੇਨ ਪਚ੍ਚਯੋ…ਪੇ… ਦ੍ਵੇ ਖਨ੍ਧਾ ਚ…ਪੇ… ਵਿਚਿਕਿਚ੍ਛਾਸਹਗਤੋ ਏਕੋ ਖਨ੍ਧੋ ਚ ਮੋਹੋ ਚ ਤਿਣ੍ਣਨ੍ਨਂ ਖਨ੍ਧਾਨਂ ਅਤ੍ਥਿਪਚ੍ਚਯੇਨ ਪਚ੍ਚਯੋ…ਪੇ… ਦ੍ਵੇ ਖਨ੍ਧਾ ਚ…ਪੇ…. ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਧਮ੍ਮਾ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ – ਸਹਜਾਤਂ, ਪੁਰੇਜਾਤਂ, ਪਚ੍ਛਾਜਾਤਂ, ਆਹਾਰਂ, ਇਨ੍ਦ੍ਰਿਯਂ (ਸਂਖਿਤ੍ਤਂ). ਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕੋ ਚ ਧਮ੍ਮਾ ਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਨਦਸ੍ਸਨੇਨ ਪਹਾਤਬ੍ਬਹੇਤੁਕਸ੍ਸ ਚ ਧਮ੍ਮਸ੍ਸ ਅਤ੍ਥਿਪਚ੍ਚਯੇਨ ਪਚ੍ਚਯੋ – ਸਹਜਾਤਂ, ਪੁਰੇਜਾਤਂ (ਸਂਖਿਤ੍ਤਂ). (੩)

ਨਤ੍ਥਿਪਚ੍ਚਯੇਨ ਪਚ੍ਚਯੋ… ਵਿਗਤਪਚ੍ਚਯੇਨ ਪਚ੍ਚਯੋ… ਅਵਿਗਤਪਚ੍ਚਯੇਨ ਪਚ੍ਚਯੋ.