੭. ਪਞ੍ਹਾਵਾਰੋ

ਪਚ੍ਚਯਚਤੁਕ੍ਕਂ

ਹੇਤੁਆਰਮ੍ਮਣਪਚ੍ਚਯਾਦਿ

੬. ਕੁਸਲੋ ਹੇਤੁ ਧਮ੍ਮੋ ਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ. (੧)

ਅਕੁਸਲੋ ਹੇਤੁ ਧਮ੍ਮੋ ਅਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ. (੧)

ਅਬ੍ਯਾਕਤੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ. (੧)

੭. ਕੁਸਲੋ ਹੇਤੁ ਧਮ੍ਮੋ ਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. ਕੁਸਲੋ ਹੇਤੁ ਧਮ੍ਮੋ ਅਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. ਕੁਸਲੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. (੩)

ਅਕੁਸਲੋ ਹੇਤੁ ਧਮ੍ਮੋ ਅਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਤੀਣਿ.

ਅਬ੍ਯਾਕਤੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਤੀਣਿ.

੮. ਕੁਸਲੋ ਹੇਤੁ ਧਮ੍ਮੋ ਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਕੁਸਲੋ ਹੇਤੁ ਧਮ੍ਮੋ ਅਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਕੁਸਲੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ… ਤੀਣਿ.

ਅਕੁਸਲੋ ਹੇਤੁ ਧਮ੍ਮੋ ਅਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੧)

ਅਬ੍ਯਾਕਤੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਅਬ੍ਯਾਕਤੋ ਹੇਤੁ ਧਮ੍ਮੋ ਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਅਬ੍ਯਾਕਤੋ ਹੇਤੁ ਧਮ੍ਮੋ ਅਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ… ਤੀਣਿ.

ਅਨਨ੍ਤਰਪਚ੍ਚਯਾਦਿ

੯. ਕੁਸਲੋ ਹੇਤੁ ਧਮ੍ਮੋ ਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ… ਦ੍ਵੇ.

ਅਕੁਸਲੋ ਹੇਤੁ ਧਮ੍ਮੋ ਅਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ… ਦ੍ਵੇ.

ਅਬ੍ਯਾਕਤੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ (੧)

੧੦. ਕੁਸਲੋ ਹੇਤੁ ਧਮ੍ਮੋ ਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਸਹਜਾਤਪਚ੍ਚਯੇਨ ਪਚ੍ਚਯੋ. (੧)

ਅਕੁਸਲੋ ਹੇਤੁ ਧਮ੍ਮੋ ਅਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਸਹਜਾਤਪਚ੍ਚਯੇਨ ਪਚ੍ਚਯੋ. (੧)

ਅਬ੍ਯਾਕਤੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਸਹਜਾਤਪਚ੍ਚਯੇਨ ਪਚ੍ਚਯੋ. (੧)

(ਅਞ੍ਞਮਞ੍ਞਨਿਸ੍ਸਯਪਚ੍ਚਯਾ ਸਹਜਾਤਪਚ੍ਚਯਸਦਿਸਾ).

ਉਪਨਿਸ੍ਸਯਪਚ੍ਚਯਾਦਿ

੧੧. ਕੁਸਲੋ ਹੇਤੁ ਧਮ੍ਮੋ ਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਕੁਸਲੋ ਹੇਤੁ ਧਮ੍ਮੋ ਅਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਕੁਸਲੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

ਅਕੁਸਲੋ ਹੇਤੁ ਧਮ੍ਮੋ ਅਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਅਕੁਸਲੋ ਹੇਤੁ ਧਮ੍ਮੋ ਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਅਕੁਸਲੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ… ਤੀਣਿ. (੩)

ਅਬ੍ਯਾਕਤੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਅਬ੍ਯਾਕਤੋ ਹੇਤੁ ਧਮ੍ਮੋ ਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਅਬ੍ਯਾਕਤੋ ਹੇਤੁ ਧਮ੍ਮੋ ਅਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

ਅਬ੍ਯਾਕਤੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਵਿਪਾਕਪਚ੍ਚਯੇਨ ਪਚ੍ਚਯੋ. (੧) (ਸਂਖਿਤ੍ਤਂ.)

੧੨. ਹੇਤੁਯਾ ਤੀਣਿ, ਆਰਮ੍ਮਣੇ ਨਵ, ਅਧਿਪਤਿਯਾ ਸਤ੍ਤ, ਅਨਨ੍ਤਰੇ ਪਞ੍ਚ, ਸਮਨਨ੍ਤਰੇ ਪਞ੍ਚ, ਸਹਜਾਤੇ ਤੀਣਿ, ਅਞ੍ਞਮਞ੍ਞੇ ਤੀਣਿ, ਨਿਸ੍ਸਯੇ ਤੀਣਿ, ਉਪਨਿਸ੍ਸਯੇ ਨਵ, ਆਸੇਵਨੇ ਤੀਣਿ, ਵਿਪਾਕੇ ਏਕਂ, ਇਨ੍ਦ੍ਰਿਯੇ ਦ੍ਵੇ, ਮਗ੍ਗੇ ਦ੍ਵੇ, ਸਮ੍ਪਯੁਤ੍ਤੇ ਤੀਣਿ, ਅਤ੍ਥਿਯਾ ਤੀਣਿ, ਨਤ੍ਥਿਯਾ ਪਞ੍ਚ, ਵਿਗਤੇ ਪਞ੍ਚ, ਅਵਿਗਤੇ ਤੀਣਿ (ਸਂਖਿਤ੍ਤਂ).

ਪਚ੍ਚਨੀਯੁਦ੍ਧਾਰੋ

੧੩. ਕੁਸਲੋ ਹੇਤੁ ਧਮ੍ਮੋ ਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਸਹਜਾਤਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਕੁਸਲੋ ਹੇਤੁ ਧਮ੍ਮੋ ਅਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਕੁਸਲੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

ਅਕੁਸਲੋ ਹੇਤੁ ਧਮ੍ਮੋ ਅਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਸਹਜਾਤਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਅਕੁਸਲੋ ਹੇਤੁ ਧਮ੍ਮੋ ਕੁਸਲਸ੍ਸ ਹੇਤੁਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਅਕੁਸਲੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

ਅਬ੍ਯਾਕਤੋ ਹੇਤੁ ਧਮ੍ਮੋ ਅਬ੍ਯਾਕਤਸ੍ਸ ਹੇਤੁਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਸਹਜਾਤਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ (ਸਂਖਿਤ੍ਤਂ).

੧੪. ਨਹੇਤੁਯਾ ਨਵ, ਨਆਰਮ੍ਮਣੇ ਨਵ (ਸਂਖਿਤ੍ਤਂ).

ਹੇਤੁਪਚ੍ਚਯਾ ਨਆਰਮ੍ਮਣੇ ਤੀਣਿ (ਸਂਖਿਤ੍ਤਂ).

ਨਹੇਤੁਪਚ੍ਚਯਾ ਆਰਮ੍ਮਣੇ ਨਵ (ਸਂਖਿਤ੍ਤਂ).

(ਯਥਾ ਕੁਸਲਤ੍ਤਿਕੇ ਪਞ੍ਹਾਵਾਰਸ੍ਸ ਅਨੁਲੋਮਮ੍ਪਿ ਪਚ੍ਚਨੀਯਮ੍ਪਿ ਅਨੁਲੋਮਪਚ੍ਚਨੀਯਮ੍ਪਿ ਪਚ੍ਚਨੀਯਾਨੁਲੋਮਮ੍ਪਿ ਗਣਿਤਂ, ਏਵਂ ਗਣੇਤਬ੍ਬਂ.)