੧. ਵਿਭਙ੍ਗਵਾਰੋ

ਹੇਤੁਪਚ੍ਚਯੋ

੧. ਦਸ੍ਸਨੇਨ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਦਸ੍ਸਨੇਨ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਦਸ੍ਸਨੇਨ ਪਹਾਤਬ੍ਬਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ. (੧)

ਦਸ੍ਸਨੇਨ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਦਸ੍ਸਨੇਨ ਪਹਾਤਬ੍ਬੇ ਖਨ੍ਧੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. (੨)

ਦਸ੍ਸਨੇਨ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਦਸ੍ਸਨੇਨ ਪਹਾਤਬ੍ਬੋ ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਹੇਤੁਪਚ੍ਚਯਾ – ਦਸ੍ਸਨੇਨ ਪਹਾਤਬ੍ਬਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ. (੩)

੨. ਭਾਵਨਾਯ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਭਾਵਨਾਯ ਪਹਾਤਬ੍ਬਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ. (੧)

ਭਾਵਨਾਯ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਭਾਵਨਾਯ ਪਹਾਤਬ੍ਬੇ ਖਨ੍ਧੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. (੨)

ਭਾਵਨਾਯ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਭਾਵਨਾਯ ਪਹਾਤਬ੍ਬੋ ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਹੇਤੁਪਚ੍ਚਯਾ – ਭਾਵਨਾਯ ਪਹਾਤਬ੍ਬਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ. (੩)

੩. ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ. ਪਟਿਸਨ੍ਧਿਕ੍ਖਣੇ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ ਕਟਤ੍ਤਾ ਚ ਰੂਪਂ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ ਕਟਤ੍ਤਾ ਚ ਰੂਪਂ, ਖਨ੍ਧੇ ਪਟਿਚ੍ਚ ਵਤ੍ਥੁ, ਵਤ੍ਥੁਂ ਪਟਿਚ੍ਚ ਖਨ੍ਧਾ; ਏਕਂ ਮਹਾਭੂਤਂ ਪਟਿਚ੍ਚ ਤਯੋ ਮਹਾਭੂਤਾ…ਪੇ… ਦ੍ਵੇ ਮਹਾਭੂਤੇ ਪਟਿਚ੍ਚ ਦ੍ਵੇ ਮਹਾਭੂਤਾ, ਮਹਾਭੂਤੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ ਕਟਤ੍ਤਾਰੂਪਂ ਉਪਾਦਾਰੂਪਂ. (੧)

੪. ਦਸ੍ਸਨੇਨ ਪਹਾਤਬ੍ਬਞ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਞ੍ਚ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਦਸ੍ਸਨੇਨ ਪਹਾਤਬ੍ਬੇ ਖਨ੍ਧੇ ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. (੧)

ਭਾਵਨਾਯ ਪਹਾਤਬ੍ਬਞ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਞ੍ਚ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਭਾਵਨਾਯ ਪਹਾਤਬ੍ਬੇ ਖਨ੍ਧੇ ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. (੧)

ਆਰਮ੍ਮਣਪਚ੍ਚਯੋ

੫. ਦਸ੍ਸਨੇਨ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਦਸ੍ਸਨੇਨ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਆਰਮ੍ਮਣਪਚ੍ਚਯਾ – ਦਸ੍ਸਨੇਨ ਪਹਾਤਬ੍ਬਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ. (੧)

ਭਾਵਨਾਯ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਆਰਮ੍ਮਣਪਚ੍ਚਯਾ – ਭਾਵਨਾਯ ਪਹਾਤਬ੍ਬਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ. (੧)

ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਆਰਮ੍ਮਣਪਚ੍ਚਯਾ – ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ. ਪਟਿਸਨ੍ਧਿਕ੍ਖਣੇ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ. ਵਤ੍ਥੁਂ ਪਟਿਚ੍ਚ ਖਨ੍ਧਾ. (੧)

ਅਧਿਪਤਿਪਚ੍ਚਯੋ

੬. ਦਸ੍ਸਨੇਨ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਦਸ੍ਸਨੇਨ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਅਧਿਪਤਿਪਚ੍ਚਯਾ… ਤੀਣਿ.

ਭਾਵਨਾਯ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਅਧਿਪਤਿਪਚ੍ਚਯਾ… ਤੀਣਿ.

ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਅਧਿਪਤਿਪਚ੍ਚਯਾ – ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ; ਏਕਂ ਮਹਾਭੂਤਂ ਪਟਿਚ੍ਚ ਤਯੋ ਮਹਾਭੂਤਾ…ਪੇ… ਦ੍ਵੇ ਮਹਾਭੂਤੇ ਪਟਿਚ੍ਚ ਦ੍ਵੇ ਮਹਾਭੂਤਾ, ਮਹਾਭੂਤੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ ਉਪਾਦਾਰੂਪਂ. (੧)

੭. ਦਸ੍ਸਨੇਨ ਪਹਾਤਬ੍ਬਞ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਞ੍ਚ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਅਧਿਪਤਿਪਚ੍ਚਯਾ – ਦਸ੍ਸਨੇਨ ਪਹਾਤਬ੍ਬੇ ਖਨ੍ਧੇ ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. (੧)

ਭਾਵਨਾਯ ਪਹਾਤਬ੍ਬਞ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਞ੍ਚ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਅਧਿਪਤਿਪਚ੍ਚਯਾ – ਭਾਵਨਾਯ ਪਹਾਤਬ੍ਬੇ ਖਨ੍ਧੇ ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. (੧)

ਅਨਨ੍ਤਰ-ਸਮਨਨ੍ਤਰਪਚ੍ਚਯਾ

੮. ਦਸ੍ਸਨੇਨ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਦਸ੍ਸਨੇਨ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਅਨਨ੍ਤਰਪਚ੍ਚਯਾ… ਸਮਨਨ੍ਤਰਪਚ੍ਚਯਾ (ਆਰਮ੍ਮਣਸਦਿਸਂ).

ਸਹਜਾਤਪਚ੍ਚਯੋ

੯. ਦਸ੍ਸਨੇਨ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਦਸ੍ਸਨੇਨ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਸਹਜਾਤਪਚ੍ਚਯਾ… ਤੀਣਿ.

ਭਾਵਨਾਯ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਸਹਜਾਤਪਚ੍ਚਯਾ… ਤੀਣਿ.

ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਸਹਜਾਤਪਚ੍ਚਯਾ…ਪੇ… ਏਕਂ ਮਹਾਭੂਤਂ ਪਟਿਚ੍ਚ…ਪੇ… ਬਾਹਿਰਂ… ਆਹਾਰਸਮੁਟ੍ਠਾਨਂ… ਉਤੁਸਮੁਟ੍ਠਾਨਂ… ਅਸਞ੍ਞਸਤ੍ਤਾਨਂ ਏਕਂ ਮਹਾਭੂਤਂ…ਪੇ…. (੧)

੧੦. ਦਸ੍ਸਨੇਨ ਪਹਾਤਬ੍ਬਞ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਞ੍ਚ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਸਹਜਾਤਪਚ੍ਚਯਾ – ਦਸ੍ਸਨੇਨ ਪਹਾਤਬ੍ਬੇ ਖਨ੍ਧੇ ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ.

ਭਾਵਨਾਯ ਪਹਾਤਬ੍ਬਞ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਞ੍ਚ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਸਹਜਾਤਪਚ੍ਚਯਾ – ਭਾਵਨਾਯ ਪਹਾਤਬ੍ਬੇ ਖਨ੍ਧੇ ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. (੧)

ਅਞ੍ਞਮਞ੍ਞਪਚ੍ਚਯੋ

੧੧. ਦਸ੍ਸਨੇਨ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਦਸ੍ਸਨੇਨ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਅਞ੍ਞਮਞ੍ਞਪਚ੍ਚਯਾ… ਏਕਂ.

ਭਾਵਨਾਯ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਸਹਜਾਤਪਚ੍ਚਯਾ… ਏਕਂ.

ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਅਞ੍ਞਮਞ੍ਞਪਚ੍ਚਯਾ – ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ. ਪਟਿਸਨ੍ਧਿਕ੍ਖਣੇ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ ਵਤ੍ਥੁ ਚ…ਪੇ… ਦ੍ਵੇ ਖਨ੍ਧੇ ਪਟਿਚ੍ਚ ਦ੍ਵੇ ਖਨ੍ਧਾ ਵਤ੍ਥੁ ਚ, ਖਨ੍ਧੇ ਪਟਿਚ੍ਚ ਵਤ੍ਥੁ, ਵਤ੍ਥੁਂ ਪਟਿਚ੍ਚ ਖਨ੍ਧਾ; ਏਕਂ ਮਹਾਭੂਤਂ ਪਟਿਚ੍ਚ ਤਯੋ ਮਹਾਭੂਤਾ…ਪੇ… ਦ੍ਵੇ ਮਹਾਭੂਤੇ ਪਟਿਚ੍ਚ ਦ੍ਵੇ ਮਹਾਭੂਤਾ; ਬਾਹਿਰਂ… ਆਹਾਰਸਮੁਟ੍ਠਾਨਂ… ਉਤੁਸਮੁਟ੍ਠਾਨਂ… ਅਸਞ੍ਞਸਤ੍ਤਾਨਂ…ਪੇ… ਦ੍ਵੇ ਮਹਾਭੂਤੇ ਪਟਿਚ੍ਚ ਦ੍ਵੇ ਮਹਾਭੂਤਾ.

ਨਿਸ੍ਸਯਪਚ੍ਚਯਾਦਿ

੧੨. ਦਸ੍ਸਨੇਨ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਦਸ੍ਸਨੇਨ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਨਿਸ੍ਸਯਪਚ੍ਚਯਾ… (ਹੇਤੁਪਚ੍ਚਯਸਦਿਸਂ) ਉਪਨਿਸ੍ਸਯਪਚ੍ਚਯਾ… ਤੀਣਿ… ਪੁਰੇਜਾਤਪਚ੍ਚਯਾ… ਤੀਣਿ (ਪਟਿਸਨ੍ਧਿ ਨਤ੍ਥਿ)… ਆਸੇਵਨਪਚ੍ਚਯਾ… (ਵਿਪਾਕਪਟਿਸਨ੍ਧਿ ਨਤ੍ਥਿ) ਕਮ੍ਮਪਚ੍ਚਯਾ (ਪਰਿਪੁਣ੍ਣਂ. ਅਜ੍ਝਤ੍ਤਿਕਾ ਚ ਅਸਞ੍ਞਸਤ੍ਤਾਨਞ੍ਚ ਮਹਾਭੂਤਾ).

ਵਿਪਾਕਪਚ੍ਚਯੋ

੧੩. ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਨੇਵਦਸ੍ਸਨੇਨ ਨਭਾਵਨਾਯ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਵਿਪਾਕਪਚ੍ਚਯਾ – ਵਿਪਾਕਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਪਟਿਸਨ੍ਧਿਕ੍ਖਣੇ…ਪੇ… ਖਨ੍ਧੇ ਪਟਿਚ੍ਚ ਵਤ੍ਥੁ, ਵਤ੍ਥੁਂ ਪਟਿਚ੍ਚ ਖਨ੍ਧਾ; ਏਕਂ ਮਹਾਭੂਤਂ…ਪੇ… ਮਹਾਭੂਤੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ ਕਟਤ੍ਤਾਰੂਪਂ ਉਪਾਦਾਰੂਪਂ. (੧)

ਆਹਾਰਪਚ੍ਚਯਾਦਿ

੧੪. ਦਸ੍ਸਨੇਨ ਪਹਾਤਬ੍ਬਂ ਧਮ੍ਮਂ ਪਟਿਚ੍ਚ ਦਸ੍ਸਨੇਨ ਪਹਾਤਬ੍ਬੋ ਧਮ੍ਮੋ ਉਪ੍ਪਜ੍ਜਤਿ ਆਹਾਰਪਚ੍ਚਯਾ (ਪਰਿਪੁਣ੍ਣਂ, ਅਜ੍ਝਤ੍ਤਿਕਾ ਮਹਾਭੂਤਾ ਚ ਆਹਾਰਸਮੁਟ੍ਠਾਨਞ੍ਚ)… ਇਨ੍ਦ੍ਰਿਯਪਚ੍ਚਯਾ (ਕਮ੍ਮਪਚ੍ਚਯਸਦਿਸਂ)… ਝਾਨਪਚ੍ਚਯਾ… ਮਗ੍ਗਪਚ੍ਚਯਾ (ਹੇਤੁਪਚ੍ਚਯਸਦਿਸਂ)… ਸਮ੍ਪਯੁਤ੍ਤਪਚ੍ਚਯਾ (ਆਰਮ੍ਮਣਪਚ੍ਚਯਸਦਿਸਂ)… ਵਿਪ੍ਪਯੁਤ੍ਤਪਚ੍ਚਯਾ (ਕੁਸਲਤ੍ਤਿਕੇ ਵਿਪ੍ਪਯੁਤ੍ਤਪਚ੍ਚਯਸਦਿਸਂ)… ਅਤ੍ਥਿਪਚ੍ਚਯਾ (ਸਹਜਾਤਪਚ੍ਚਯਸਦਿਸਂ)… ਨਤ੍ਥਿਪਚ੍ਚਯਾ… ਵਿਗਤਪਚ੍ਚਯਾ… ਅਵਿਗਤਪਚ੍ਚਯਾ.