੧. ਵਿਭਙ੍ਗਵਾਰੋ

ਹੇਤੁਪਚ੍ਚਯੋ

੨੭. ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ – ਮਗ੍ਗਾਰਮ੍ਮਣਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ – ਮਗ੍ਗਾਰਮ੍ਮਣਾ ਹੇਤੂ ਸਮ੍ਪਯੁਤ੍ਤਕਾਨਂ ਮਗ੍ਗਾਧਿਪਤੀਨਂ ਖਨ੍ਧਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (੨)

ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ (ਇਮਿਨਾ ਕਾਰਣੇਨ ਸਤ੍ਤਰਸ ਪਞ੍ਹਾ ਕਾਤਬ੍ਬਾ).

ਆਰਮ੍ਮਣਪਚ੍ਚਯੋ

੨੮. ਮਗ੍ਗਹੇਤੁਕੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਪਚ੍ਚਵੇਕ੍ਖਨ੍ਤਿ, ਚੇਤੋਪਰਿਯਞਾਣੇਨ ਮਗ੍ਗਹੇਤੁਕਚਿਤ੍ਤਸਮਙ੍ਗਿਸ੍ਸ ਚਿਤ੍ਤਂ ਜਾਨਨ੍ਤਿ, ਮਗ੍ਗਹੇਤੁਕਾ ਖਨ੍ਧਾ ਚੇਤੋਪਰਿਯਞਾਣਸ੍ਸ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਸ੍ਸ, ਅਨਾਗਤਂਸਞਾਣਸ੍ਸ, ਆਵਜ੍ਜਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਹੇਤੁਕੋ ਧਮ੍ਮੋ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੨)

ਮਗ੍ਗਹੇਤੁਕੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੩)

੨੯. ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੧)

ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਪਚ੍ਚਵੇਕ੍ਖਨ੍ਤਿ, ਚੇਤੋਪਰਿਯਞਾਣੇਨ ਮਗ੍ਗਾਧਿਪਤਿਚਿਤ੍ਤਸਮਙ੍ਗਿਸ੍ਸ ਚਿਤ੍ਤਂ ਜਾਨਨ੍ਤਿ, ਮਗ੍ਗਾਧਿਪਤੀ ਖਨ੍ਧਾ ਚੇਤੋਪਰਿਯਞਾਣਸ੍ਸ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਸ੍ਸ, ਅਨਾਗਤਂਸਞਾਣਸ੍ਸ, ਆਵਜ੍ਜਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. (੨)

ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੩)

੩੦. ਮਗ੍ਗਹੇਤੁਕੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਪਚ੍ਚਵੇਕ੍ਖਨ੍ਤਿ, ਚੇਤੋਪਰਿਯਞਾਣੇਨ ਮਗ੍ਗਹੇਤੁਕਮਗ੍ਗਾਧਿਪਤਿਚਿਤ੍ਤਸਮਙ੍ਗਿਸ੍ਸ ਚਿਤ੍ਤਂ ਜਾਨਨ੍ਤਿ, ਮਗ੍ਗਹੇਤੁਕਾ ਚ ਮਗ੍ਗਾਧਿਪਤੀ ਚ ਖਨ੍ਧਾ ਚੇਤੋਪਰਿਯਞਾਣਸ੍ਸ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਸ੍ਸ, ਅਨਾਗਤਂਸਞਾਣਸ੍ਸ, ਆਵਜ੍ਜਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਹੇਤੁਕੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੨)

ਮਗ੍ਗਹੇਤੁਕੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੩)

ਅਧਿਪਤਿਪਚ੍ਚਯੋ

੩੧. ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਮਗ੍ਗਾਰਮ੍ਮਣਾਧਿਪਤਿ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਮਗ੍ਗਾਰਮ੍ਮਣਾਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਾਧਿਪਤੀਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੨)

ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਮਗ੍ਗਾਰਮ੍ਮਣਾਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਾਰਮ੍ਮਣਾਨਞ੍ਚ ਮਗ੍ਗਾਧਿਪਤੀਨਞ੍ਚ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੩)

੩੨. ਮਗ੍ਗਹੇਤੁਕੋ ਧਮ੍ਮੋ ਮਗ੍ਗਹੇਤੁਕਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਮਗ੍ਗਹੇਤੁਕਾਧਿਪਤਿ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਹੇਤੁਕੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਆਰਮ੍ਮਣਾਧਿਪਤਿ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੨)

ਮਗ੍ਗਹੇਤੁਕੋ ਧਮ੍ਮੋ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ. ਆਰਮ੍ਮਣਾਧਿਪਤਿ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. ਸਹਜਾਤਾਧਿਪਤਿ – ਮਗ੍ਗਹੇਤੁਕਾਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਾਧਿਪਤੀਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੩)

ਮਗ੍ਗਹੇਤੁਕੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਆਰਮ੍ਮਣਾਧਿਪਤਿ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੪)

ਮਗ੍ਗਹੇਤੁਕੋ ਧਮ੍ਮੋ ਮਗ੍ਗਹੇਤੁਕਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਮਗ੍ਗਹੇਤੁਕਾਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਹੇਤੁਕਾਨਞ੍ਚ ਮਗ੍ਗਾਧਿਪਤੀਨਞ੍ਚ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੫)

੩੩. ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ. ਆਰਮ੍ਮਣਾਧਿਪਤਿ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. ਸਹਜਾਤਾਧਿਪਤਿ – ਮਗ੍ਗਾਧਿਪਤਿ ਅਧਿਪਤਿ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ. ਆਰਮ੍ਮਣਾਧਿਪਤਿ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. ਸਹਜਾਤਾਧਿਪਤਿ – ਮਗ੍ਗਾਧਿਪਤਿ ਅਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਾਰਮ੍ਮਣਾਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੨)

ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਹੇਤੁਕਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਮਗ੍ਗਾਧਿਪਤਿ ਅਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਹੇਤੁਕਾਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੩)

ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਅਧਿਪਤਿਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ. ਆਰਮ੍ਮਣਾਧਿਪਤਿ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. ਸਹਜਾਤਾਧਿਪਤਿ – ਮਗ੍ਗਾਧਿਪਤਿ ਅਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਾਰਮ੍ਮਣਾਨਞ੍ਚ ਮਗ੍ਗਾਧਿਪਤੀਨਞ੍ਚ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੪)

ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਹੇਤੁਕਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਮਗ੍ਗਾਧਿਪਤਿ ਅਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਾਹੇਤੁਕਾਨਞ੍ਚ ਮਗ੍ਗਾਧਿਪਤੀਨਞ੍ਚ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੫)

੩੪. ਮਗ੍ਗਾਰਮ੍ਮਣੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਮਗ੍ਗਾਰਮ੍ਮਣਾ ਚ ਮਗ੍ਗਾਧਿਪਤੀ ਚ ਅਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਾਰਮ੍ਮਣਾਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਾਰਮ੍ਮਣੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਮਗ੍ਗਾਰਮ੍ਮਣਾ ਚ ਮਗ੍ਗਾਧਿਪਤੀ ਚ ਅਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਾਧਿਪਤੀਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੨)

ਮਗ੍ਗਾਰਮ੍ਮਣੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਮਗ੍ਗਾਰਮ੍ਮਣਾ ਚ ਮਗ੍ਗਾਧਿਪਤੀ ਚ ਅਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਾਰਮ੍ਮਣਾਨਞ੍ਚ ਮਗ੍ਗਾਧਿਪਤੀਨਞ੍ਚ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੩)

੩੫. ਮਗ੍ਗਹੇਤੁਕੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਆਰਮ੍ਮਣਾਧਿਪਤਿ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੧)

ਮਗ੍ਗਹੇਤੁਕੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਹੇਤੁਕਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਮਗ੍ਗਹੇਤੁਕਾ ਚ ਮਗ੍ਗਾਧਿਪਤੀ ਚ ਅਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਹੇਤੁਕਾਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੨)

ਮਗ੍ਗਹੇਤੁਕੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ. ਆਰਮ੍ਮਣਾਧਿਪਤਿ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. ਸਹਜਾਤਾਧਿਪਤਿ – ਮਗ੍ਗਹੇਤੁਕਾ ਚ ਮਗ੍ਗਾਧਿਪਤੀ ਚ ਅਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਾਧਿਪਤੀਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੩)

ਮਗ੍ਗਹੇਤੁਕੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਆਰਮ੍ਮਣਾਧਿਪਤਿ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੪)

ਮਗ੍ਗਹੇਤੁਕੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਹੇਤੁਕਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਸਹਜਾਤਾਧਿਪਤਿ – ਮਗ੍ਗਹੇਤੁਕਾ ਚ ਮਗ੍ਗਾਧਿਪਤੀ ਚ ਅਧਿਪਤਿ ਸਮ੍ਪਯੁਤ੍ਤਕਾਨਂ ਮਗ੍ਗਹੇਤੁਕਾਨਞ੍ਚ ਮਗ੍ਗਾਧਿਪਤੀਨਞ੍ਚ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੫)

ਅਨਨ੍ਤਰਪਚ੍ਚਯੋ

੩੬. ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਮਗ੍ਗਾਰਮ੍ਮਣਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਮਗ੍ਗਾਰਮ੍ਮਣਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. ਆਵਜ੍ਜਨਾ ਮਗ੍ਗਾਰਮ੍ਮਣਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਮਗ੍ਗਾਰਮ੍ਮਣਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਮਗ੍ਗਾਧਿਪਤੀਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. ਆਵਜ੍ਜਨਾ ਮਗ੍ਗਾਧਿਪਤੀਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੨)

ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਮਗ੍ਗਾਰਮ੍ਮਣਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਮਗ੍ਗਾਰਮ੍ਮਣਾਨਞ੍ਚ ਮਗ੍ਗਾਧਿਪਤੀਨਞ੍ਚ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. ਆਵਜ੍ਜਨਾ ਮਗ੍ਗਾਰਮ੍ਮਣਾਨਞ੍ਚ ਮਗ੍ਗਾਧਿਪਤੀਨਞ੍ਚ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੩)

੩੭. ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਮਗ੍ਗਾਧਿਪਤੀ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਮਗ੍ਗਾਧਿਪਤੀਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਮਗ੍ਗਾਧਿਪਤੀ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਮਗ੍ਗਾਰਮ੍ਮਣਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੨)

ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਮਗ੍ਗਾਧਿਪਤੀ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਮਗ੍ਗਾਰਮ੍ਮਣਾਨਞ੍ਚ ਮਗ੍ਗਾਧਿਪਤੀਨਞ੍ਚ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੩)

੩੮. ਮਗ੍ਗਾਰਮ੍ਮਣੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਮਗ੍ਗਾਰਮ੍ਮਣਾ ਚ ਮਗ੍ਗਾਧਿਪਤੀ ਚ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਮਗ੍ਗਾਰਮ੍ਮਣਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਾਰਮ੍ਮਣੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਮਗ੍ਗਾਰਮ੍ਮਣਾ ਚ ਮਗ੍ਗਾਧਿਪਤੀ ਚ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਮਗ੍ਗਾਧਿਪਤੀਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੨)

ਮਗ੍ਗਾਰਮ੍ਮਣੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਮਗ੍ਗਾਰਮ੍ਮਣਾ ਚ ਮਗ੍ਗਾਧਿਪਤੀ ਚ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਮਗ੍ਗਾਰਮ੍ਮਣਾਨਞ੍ਚ ਮਗ੍ਗਾਧਿਪਤੀਨਞ੍ਚ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੩)

ਸਮਨਨ੍ਤਰਪਚ੍ਚਯਾਦਿ

੩੯. ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ…ਪੇ… (ਅਨਨ੍ਤਰਸਦਿਸਂ) ਸਹਜਾਤਪਚ੍ਚਯੇਨ ਪਚ੍ਚਯੋ… ਅਞ੍ਞਮਞ੍ਞਪਚ੍ਚਯੇਨ ਪਚ੍ਚਯੋ… ਨਿਸ੍ਸਯਪਚ੍ਚਯੇਨ ਪਚ੍ਚਯੋ… (ਤੀਸੁਪਿ ਸਤ੍ਤਰਸ ਪਞ੍ਹਾ ਕਾਤਬ੍ਬਾ).

ਉਪਨਿਸ੍ਸਯਪਚ੍ਚਯੋ

੪੦. ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਚ੍ਚਵੇਕ੍ਖਣਾ ਪਚ੍ਚਵੇਕ੍ਖਣਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਚ੍ਚਵੇਕ੍ਖਣਾ ਪਚ੍ਚਵੇਕ੍ਖਣਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੨)

ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਚ੍ਚਵੇਕ੍ਖਣਾ ਪਚ੍ਚਵੇਕ੍ਖਣਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

੪੧. ਮਗ੍ਗਹੇਤੁਕੋ ਧਮ੍ਮੋ ਮਗ੍ਗਹੇਤੁਕਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਪਕਤੂਪਨਿਸ੍ਸਯੋ – ਪਠਮੋ ਮਗ੍ਗੋ ਦੁਤਿਯਸ੍ਸ ਮਗ੍ਗਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ…ਪੇ… ਤਤਿਯੋ ਮਗ੍ਗੋ ਚਤੁਤ੍ਥਸ੍ਸ ਮਗ੍ਗਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਹੇਤੁਕੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਆਰਮ੍ਮਣੂਪਨਿਸ੍ਸਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੨)

ਮਗ੍ਗਹੇਤੁਕੋ ਧਮ੍ਮੋ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਠਮੋ ਮਗ੍ਗੋ ਦੁਤਿਯਸ੍ਸ ਮਗ੍ਗਸ੍ਸ…ਪੇ… ਤਤਿਯੋ ਮਗ੍ਗੋ ਚਤੁਤ੍ਥਸ੍ਸ ਮਗ੍ਗਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

ਮਗ੍ਗਹੇਤੁਕੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਆਰਮ੍ਮਣੂਪਨਿਸ੍ਸਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੪)

ਮਗ੍ਗਹੇਤੁਕੋ ਧਮ੍ਮੋ ਮਗ੍ਗਹੇਤੁਕਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਪਕਤੂਪਨਿਸ੍ਸਯੋ – ਪਠਮੋ ਮਗ੍ਗੋ ਦੁਤਿਯਸ੍ਸ ਮਗ੍ਗਸ੍ਸ…ਪੇ… ਤਤਿਯੋ ਮਗ੍ਗੋ ਚਤੁਤ੍ਥਸ੍ਸ ਮਗ੍ਗਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੫)

੪੨. ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਠਮੋ ਮਗ੍ਗੋ ਦੁਤਿਯਸ੍ਸ ਮਗ੍ਗਸ੍ਸ…ਪੇ… ਤਤਿਯੋ ਮਗ੍ਗੋ ਚਤੁਤ੍ਥਸ੍ਸ ਮਗ੍ਗਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ; ਪਚ੍ਚਵੇਕ੍ਖਣਾ ਪਚ੍ਚਵੇਕ੍ਖਣਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਚ੍ਚਵੇਕ੍ਖਣਾ ਪਚ੍ਚਵੇਕ੍ਖਣਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੨)

ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਹੇਤੁਕਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਪਕਤੂਪਨਿਸ੍ਸਯੋ – ਪਠਮੋ ਮਗ੍ਗੋ ਦੁਤਿਯਸ੍ਸ ਮਗ੍ਗਸ੍ਸ…ਪੇ… ਤਤਿਯੋ ਮਗ੍ਗੋ ਚਤੁਤ੍ਥਸ੍ਸ ਮਗ੍ਗਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਚ੍ਚਵੇਕ੍ਖਣਾ ਪਚ੍ਚਵੇਕ੍ਖਣਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੪)

ਮਗ੍ਗਾਧਿਪਤਿ ਧਮ੍ਮੋ ਮਗ੍ਗਹੇਤੁਕਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਪਕਤੂਪਨਿਸ੍ਸਯੋ – ਪਠਮੋ ਮਗ੍ਗੋ ਦੁਤਿਯਸ੍ਸ ਮਗ੍ਗਸ੍ਸ…ਪੇ… ਤਤਿਯੋ ਮਗ੍ਗੋ ਚਤੁਤ੍ਥਸ੍ਸ ਮਗ੍ਗਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੫)

੪੩. ਮਗ੍ਗਾਰਮ੍ਮਣੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਚ੍ਚਵੇਕ੍ਖਣਾ ਪਚ੍ਚਵੇਕ੍ਖਣਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੧)

ਮਗ੍ਗਾਰਮ੍ਮਣੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਚ੍ਚਵੇਕ੍ਖਣਾ ਪਚ੍ਚਵੇਕ੍ਖਣਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੨)

ਮਗ੍ਗਾਰਮ੍ਮਣੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਚ੍ਚਵੇਕ੍ਖਣਾ ਪਚ੍ਚਵੇਕ੍ਖਣਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

੪੪. ਮਗ੍ਗਹੇਤੁਕੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਆਰਮ੍ਮਣੂਪਨਿਸ੍ਸਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੧)

ਮਗ੍ਗਹੇਤੁਕੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਹੇਤੁਕਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਪਕਤੂਪਨਿਸ੍ਸਯੋ – ਪਠਮੋ ਮਗ੍ਗੋ ਦੁਤਿਯਸ੍ਸ ਮਗ੍ਗਸ੍ਸ…ਪੇ… ਤਤਿਯੋ ਮਗ੍ਗੋ ਚਤੁਤ੍ਥਸ੍ਸ ਮਗ੍ਗਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੨)

ਮਗ੍ਗਹੇਤੁਕੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਠਮੋ ਮਗ੍ਗੋ ਦੁਤਿਯਸ੍ਸ ਮਗ੍ਗਸ੍ਸ…ਪੇ… ਤਤਿਯੋ ਮਗ੍ਗੋ ਚਤੁਤ੍ਥਸ੍ਸ ਮਗ੍ਗਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

ਮਗ੍ਗਹੇਤੁਕੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਾਰਮ੍ਮਣਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਆਰਮ੍ਮਣੂਪਨਿਸ੍ਸਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੪)

ਮਗ੍ਗਹੇਤੁਕੋ ਚ ਮਗ੍ਗਾਧਿਪਤਿ ਚ ਧਮ੍ਮਾ ਮਗ੍ਗਹੇਤੁਕਸ੍ਸ ਚ ਮਗ੍ਗਾਧਿਪਤਿਸ੍ਸ ਚ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਪਕਤੂਪਨਿਸ੍ਸਯੋ – ਪਠਮੋ ਮਗ੍ਗੋ ਦੁਤਿਯਸ੍ਸ ਮਗ੍ਗਸ੍ਸ…ਪੇ… ਤਤਿਯੋ ਮਗ੍ਗੋ ਚਤੁਤ੍ਥਸ੍ਸ ਮਗ੍ਗਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੫)

ਆਸੇਵਨਪਚ੍ਚਯੋ

੪੫. ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਆਸੇਵਨਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਮਗ੍ਗਾਰਮ੍ਮਣਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਮਗ੍ਗਾਰਮ੍ਮਣਾਨਂ ਖਨ੍ਧਾਨਂ ਆਸੇਵਨਪਚ੍ਚਯੇਨ ਪਚ੍ਚਯੋ.

ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਧਿਪਤਿਸ੍ਸ ਧਮ੍ਮਸ੍ਸ ਆਸੇਵਨਪਚ੍ਚਯੇਨ ਪਚ੍ਚਯੋ (ਅਨਨ੍ਤਰਸਦਿਸਂ. ਨਵ ਪਞ੍ਹਾ ਕਾਤਬ੍ਬਾ, ਆਵਜ੍ਜਨਾ ਨ ਕਾਤਬ੍ਬਾ).

ਕਮ੍ਮਪਚ੍ਚਯਾਦਿ

੪੬. ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਕਮ੍ਮਪਚ੍ਚਯੇਨ ਪਚ੍ਚਯੋ – ਸਹਜਾਤਾ…ਪੇ… (ਨਾਨਾਕ੍ਖਣਿਕਾ ਨਤ੍ਥਿ, ਸਤ੍ਤਰਸ ਪਞ੍ਹਾ ਕਾਤਬ੍ਬਾ).

ਆਹਾਰਪਚ੍ਚਯਾਦਿ

੪੭. ਮਗ੍ਗਾਰਮ੍ਮਣੋ ਧਮ੍ਮੋ ਮਗ੍ਗਾਰਮ੍ਮਣਸ੍ਸ ਧਮ੍ਮਸ੍ਸ ਆਹਾਰਪਚ੍ਚਯੇਨ ਪਚ੍ਚਯੋ… ਇਨ੍ਦ੍ਰਿਯਪਚ੍ਚਯੇਨ ਪਚ੍ਚਯੋ… ਝਾਨਪਚ੍ਚਯੇਨ ਪਚ੍ਚਯੋ… ਮਗ੍ਗਪਚ੍ਚਯੇਨ ਪਚ੍ਚਯੋ… ਸਮ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ… ਅਤ੍ਥਿਪਚ੍ਚਯੇਨ ਪਚ੍ਚਯੋ (ਇਮੇ ਸਤ੍ਤ ਪਚ੍ਚਯਾ ਸਤ੍ਤਰਸ ਪਞ੍ਹਾ ਹੇਤੁਸਦਿਸਾ)… ਨਤ੍ਥਿਪਚ੍ਚਯੇਨ ਪਚ੍ਚਯੋ… ਵਿਗਤਪਚ੍ਚਯੇਨ ਪਚ੍ਚਯੋ (ਅਨਨ੍ਤਰਸਦਿਸਾ)… ਅਵਿਗਤਪਚ੍ਚਯੇਨ ਪਚ੍ਚਯੋ (ਸਤ੍ਤਰਸ ਪਞ੍ਹਾ).