੧. ਵਿਭਙ੍ਗਵਾਰੋ

ਨਹੇਤੁਪਚ੍ਚਯੋ

੧੯. ਅਨਿਯਤਂ ਧਮ੍ਮਂ ਪਚ੍ਚਯਾ ਅਨਿਯਤੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਅਨਿਯਤਂ ਏਕਂ ਖਨ੍ਧਂ ਪਚ੍ਚਯਾ ਤਯੋ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਦ੍ਵੇ ਖਨ੍ਧੇ…ਪੇ… ਅਹੇਤੁਕਪਟਿਸਨ੍ਧਿਕ੍ਖਣੇ…ਪੇ… ਖਨ੍ਧੇ ਪਚ੍ਚਯਾ ਵਤ੍ਥੁ, ਵਤ੍ਥੁਂ ਪਚ੍ਚਯਾ ਖਨ੍ਧਾ. ਏਕਂ ਮਹਾਭੂਤਂ…ਪੇ… ਅਸਞ੍ਞਸਤ੍ਤਾਨਂ…ਪੇ… ਚਕ੍ਖਾਯਤਨਂ ਪਚ੍ਚਯਾ ਚਕ੍ਖੁਵਿਞ੍ਞਾਣਂ…ਪੇ… ਕਾਯਾਯਤਨਂ ਪਚ੍ਚਯਾ ਕਾਯਵਿਞ੍ਞਾਣਂ. ਵਤ੍ਥੁਂ ਪਚ੍ਚਯਾ ਅਹੇਤੁਕਾ ਅਨਿਯਤਾ ਖਨ੍ਧਾ. ਵਿਚਿਕਿਚ੍ਛਾਸਹਗਤੇ ਉਦ੍ਧਚ੍ਚਸਹਗਤੇ ਖਨ੍ਧੇ ਚ ਵਤ੍ਥੁਞ੍ਚ ਪਚ੍ਚਯਾ ਵਿਚਿਕਿਚ੍ਛਾਸਹਗਤੋ ਉਦ੍ਧਚ੍ਚਸਹਗਤੋ ਮੋਹੋ. (੧)

ਨਆਰਮ੍ਮਣਪਚ੍ਚਯੋ

੨੦. ਮਿਚ੍ਛਤ੍ਤਨਿਯਤਂ ਧਮ੍ਮਂ ਪਚ੍ਚਯਾ ਅਨਿਯਤੋ ਧਮ੍ਮੋ ਉਪ੍ਪਜ੍ਜਤਿ ਨਆਰਮ੍ਮਣਪਚ੍ਚਯਾ – ਮਿਚ੍ਛਤ੍ਤਨਿਯਤੇ ਖਨ੍ਧੇ ਪਚ੍ਚਯਾ ਚਿਤ੍ਤਸਮੁਟ੍ਠਾਨਂ ਰੂਪਂ (ਕੁਸਲਤ੍ਤਿਕਸਦਿਸਂ, ਪਞ੍ਚ ਕਾਤਬ੍ਬਾ).

ਨਅਧਿਪਤਿਪਚ੍ਚਯੋ

੨੧. ਮਿਚ੍ਛਤ੍ਤਨਿਯਤਂ ਧਮ੍ਮਂ ਪਚ੍ਚਯਾ ਮਿਚ੍ਛਤ੍ਤਨਿਯਤੋ ਧਮ੍ਮੋ ਉਪ੍ਪਜ੍ਜਤਿ ਨਅਧਿਪਤਿਪਚ੍ਚਯਾ – ਮਿਚ੍ਛਤ੍ਤਨਿਯਤੇ ਖਨ੍ਧੇ ਪਚ੍ਚਯਾ ਮਿਚ੍ਛਤ੍ਤਨਿਯਤਾਧਿਪਤਿ. (੧)

ਸਮ੍ਮਤ੍ਤਨਿਯਤਂ ਧਮ੍ਮਂ ਪਚ੍ਚਯਾ ਸਮ੍ਮਤ੍ਤਨਿਯਤੋ ਧਮ੍ਮੋ ਉਪ੍ਪਜ੍ਜਤਿ ਨਅਧਿਪਤਿਪਚ੍ਚਯਾ – ਸਮ੍ਮਤ੍ਤਨਿਯਤੇ ਖਨ੍ਧੇ ਪਚ੍ਚਯਾ ਸਮ੍ਮਤ੍ਤਨਿਯਤਾਧਿਪਤਿ. (੧)

ਅਨਿਯਤਂ ਧਮ੍ਮਂ ਪਚ੍ਚਯਾ ਅਨਿਯਤੋ ਧਮ੍ਮੋ ਉਪ੍ਪਜ੍ਜਤਿ ਨਅਧਿਪਤਿਪਚ੍ਚਯਾ – ਅਨਿਯਤਂ ਏਕਂ ਖਨ੍ਧਂ ਪਚ੍ਚਯਾ ਤਯੋ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਦ੍ਵੇ ਖਨ੍ਧੇ…ਪੇ… ਪਟਿਸਨ੍ਧਿਕ੍ਖਣੇ …ਪੇ… ਅਸਞ੍ਞਸਤ੍ਤਾਨਂ…ਪੇ… ਚਕ੍ਖਾਯਤਨਂ ਪਚ੍ਚਯਾ ਚਕ੍ਖੁਵਿਞ੍ਞਾਣਂ…ਪੇ… ਕਾਯਾਯਤਨਂ ਪਚ੍ਚਯਾ ਕਾਯਵਿਞ੍ਞਾਣਂ. ਵਤ੍ਥੁਂ ਪਚ੍ਚਯਾ ਅਨਿਯਤਾ ਖਨ੍ਧਾ. (੧)

ਅਨਿਯਤਂ ਧਮ੍ਮਂ ਪਚ੍ਚਯਾ ਮਿਚ੍ਛਤ੍ਤਨਿਯਤੋ ਧਮ੍ਮੋ ਉਪ੍ਪਜ੍ਜਤਿ ਨਅਧਿਪਤਿਪਚ੍ਚਯਾ – ਵਤ੍ਥੁਂ ਪਚ੍ਚਯਾ ਮਿਚ੍ਛਤ੍ਤਨਿਯਤਾਧਿਪਤਿ. (੨)

ਅਨਿਯਤਂ ਧਮ੍ਮਂ ਪਚ੍ਚਯਾ ਸਮ੍ਮਤ੍ਤਨਿਯਤੋ ਧਮ੍ਮੋ ਉਪ੍ਪਜ੍ਜਤਿ ਨਅਧਿਪਤਿਪਚ੍ਚਯਾ – ਵਤ੍ਥੁਂ ਪਚ੍ਚਯਾ ਸਮ੍ਮਤ੍ਤਨਿਯਤਾਧਿਪਤਿ. (੩)

ਮਿਚ੍ਛਤ੍ਤਨਿਯਤਞ੍ਚ ਅਨਿਯਤਞ੍ਚ ਧਮ੍ਮਂ ਪਚ੍ਚਯਾ ਮਿਚ੍ਛਤ੍ਤਨਿਯਤੋ ਧਮ੍ਮੋ ਉਪ੍ਪਜ੍ਜਤਿ ਨਅਧਿਪਤਿਪਚ੍ਚਯਾ – ਮਿਚ੍ਛਤ੍ਤਨਿਯਤੇ ਖਨ੍ਧੇ ਚ ਵਤ੍ਥੁਞ੍ਚ ਪਚ੍ਚਯਾ ਮਿਚ੍ਛਤ੍ਤਨਿਯਤਾਧਿਪਤਿ. (੧)

ਸਮ੍ਮਤ੍ਤਨਿਯਤਞ੍ਚ ਅਨਿਯਤਞ੍ਚ ਧਮ੍ਮਂ ਪਚ੍ਚਯਾ ਸਮ੍ਮਤ੍ਤਨਿਯਤੋ ਧਮ੍ਮੋ ਉਪ੍ਪਜ੍ਜਤਿ ਨਅਧਿਪਤਿਪਚ੍ਚਯਾ – ਸਮ੍ਮਤ੍ਤਨਿਯਤੇ ਖਨ੍ਧੇ ਚ ਵਤ੍ਥੁਞ੍ਚ ਪਚ੍ਚਯਾ ਸਮ੍ਮਤ੍ਤਨਿਯਤਾਧਿਪਤਿ. (੧)

ਨਅਨਨ੍ਤਰਪਚ੍ਚਯਾਦਿ

੨੨. ਮਿਚ੍ਛਤ੍ਤਨਿਯਤਂ ਧਮ੍ਮਂ ਪਚ੍ਚਯਾ ਅਨਿਯਤੋ ਧਮ੍ਮੋ ਉਪ੍ਪਜ੍ਜਤਿ ਨਅਨਨ੍ਤਰਪਚ੍ਚਯਾ…ਪੇ… ਨੋਨਤ੍ਥਿਪਚ੍ਚਯਾ… ਨੋਵਿਗਤਪਚ੍ਚਯਾ.