੧੩. ਪਰਿਤ੍ਤਾਰਮ੍ਮਣਤ੍ਤਿਕਂ

੧. ਪਟਿਚ੍ਚਵਾਰੋ

੧. ਪਚ੍ਚਯਾਨੁਲੋਮਂ

੧. ਵਿਭਙ੍ਗਵਾਰੋ

ਹੇਤੁਪਚ੍ਚਯੋ

੧. ਪਰਿਤ੍ਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਪਰਿਤ੍ਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਪਰਿਤ੍ਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ. ਪਟਿਸਨ੍ਧਿਕ੍ਖਣੇ ਪਰਿਤ੍ਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ. (੧)

ਮਹਗ੍ਗਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਮਹਗ੍ਗਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਮਹਗ੍ਗਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ. ਪਟਿਸਨ੍ਧਿਕ੍ਖਣੇ ਮਹਗ੍ਗਤਾਰਮ੍ਮਣਂ…ਪੇ…. (੧)

ਅਪ੍ਪਮਾਣਾਰਮ੍ਮਣਂ ਧਮ੍ਮਂ ਪਟਿਚ੍ਚ ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਅਪ੍ਪਮਾਣਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ. (੧)

ਆਰਮ੍ਮਣਪਚ੍ਚਯਾਦਿ

੨. ਪਰਿਤ੍ਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਪਰਿਤ੍ਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਆਰਮ੍ਮਣਪਚ੍ਚਯਾ… ਅਧਿਪਤਿਪਚ੍ਚਯਾ (ਸਂਖਿਤ੍ਤਂ)… ਅਵਿਗਤਪਚ੍ਚਯਾ.

੧. ਪਚ੍ਚਯਾਨੁਲੋਮਂ

੨. ਸਙ੍ਖ੍ਯਾਵਾਰੋ

੩. ਹੇਤੁਯਾ ਤੀਣਿ, ਆਰਮ੍ਮਣੇ ਤੀਣਿ, ਅਧਿਪਤਿਯਾ ਤੀਣਿ…ਪੇ… ਅਵਿਗਤੇ ਤੀਣਿ (ਏਵਂ ਗਣੇਤਬ੍ਬਂ).

ਅਨੁਲੋਮਂ.

੨. ਪਚ੍ਚਯਪਚ੍ਚਨੀਯਂ

੧. ਵਿਭਙ੍ਗਵਾਰੋ

ਨਹੇਤੁਪਚ੍ਚਯੋ

੪. ਪਰਿਤ੍ਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਪਰਿਤ੍ਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਪਰਿਤ੍ਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ. ਅਹੇਤੁਕਪਟਿਸਨ੍ਧਿਕ੍ਖਣੇ ਪਰਿਤ੍ਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ, ਵਿਚਿਕਿਚ੍ਛਾਸਹਗਤੇ ਉਦ੍ਧਚ੍ਚਸਹਗਤੇ ਖਨ੍ਧੇ ਪਟਿਚ੍ਚ ਵਿਚਿਕਿਚ੍ਛਾਸਹਗਤੋ ਉਦ੍ਧਚ੍ਚਸਹਗਤੋ ਮੋਹੋ. (੧)

ਮਹਗ੍ਗਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਮਹਗ੍ਗਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਮਹਗ੍ਗਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ, ਵਿਚਿਕਿਚ੍ਛਾਸਹਗਤੇ ਉਦ੍ਧਚ੍ਚਸਹਗਤੇ ਖਨ੍ਧੇ ਪਟਿਚ੍ਚ ਵਿਚਿਕਿਚ੍ਛਾਸਹਗਤੋ ਉਦ੍ਧਚ੍ਚਸਹਗਤੋ ਮੋਹੋ. (੧)

ਅਪ੍ਪਮਾਣਾਰਮ੍ਮਣਂ ਧਮ੍ਮਂ ਪਟਿਚ੍ਚ ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਅਪ੍ਪਮਾਣਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ. (੧)

ਨਅਧਿਪਤਿਪਚ੍ਚਯੋ

੫. ਪਰਿਤ੍ਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਪਰਿਤ੍ਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਅਧਿਪਤਿਪਚ੍ਚਯਾ – ਪਰਿਤ੍ਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ. ਪਟਿਸਨ੍ਧਿਕ੍ਖਣੇ…ਪੇ…. (੧)

ਮਹਗ੍ਗਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਮਹਗ੍ਗਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਅਧਿਪਤਿਪਚ੍ਚਯਾ – ਮਹਗ੍ਗਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ. ਪਟਿਸਨ੍ਧਿਕ੍ਖਣੇ…ਪੇ…. (੧)

ਅਪ੍ਪਮਾਣਾਰਮ੍ਮਣਂ ਧਮ੍ਮਂ ਪਟਿਚ੍ਚ ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਅਧਿਪਤਿਪਚ੍ਚਯਾ – ਅਪ੍ਪਮਾਣਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ. (੧)

ਨਪੁਰੇਜਾਤਪਚ੍ਚਯਾਦਿ

੬. ਪਰਿਤ੍ਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਪਰਿਤ੍ਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਪੁਰੇਜਾਤਪਚ੍ਚਯਾ – ਅਰੂਪੇ ਪਰਿਤ੍ਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਪਟਿਸਨ੍ਧਿਕ੍ਖਣੇ…ਪੇ…. (੧)

ਮਹਗ੍ਗਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਮਹਗ੍ਗਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਪੁਰੇਜਾਤਪਚ੍ਚਯਾ – ਅਰੂਪੇ ਮਹਗ੍ਗਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ (ਮਹਗ੍ਗਤਾਰਮ੍ਮਣੇ ਪਟਿਸਨ੍ਧਿ ਨਤ੍ਥਿ). (੧)

ਅਪ੍ਪਮਾਣਾਰਮ੍ਮਣਂ ਧਮ੍ਮਂ ਪਟਿਚ੍ਚ ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਪੁਰੇਜਾਤਪਚ੍ਚਯਾ – ਅਰੂਪੇ ਅਪ੍ਪਮਾਣਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ (ਨਪਚ੍ਛਾਜਾਤਪਚ੍ਚਯਞ੍ਚ ਨਆਸੇਵਨਪਚ੍ਚਯਞ੍ਚ ਨਅਧਿਪਤਿਸਦਿਸਂ).

ਨਕਮ੍ਮਪਚ੍ਚਯੋ

੭. ਪਰਿਤ੍ਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਪਰਿਤ੍ਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਕਮ੍ਮਪਚ੍ਚਯਾ – ਪਰਿਤ੍ਤਾਰਮ੍ਮਣੇ ਖਨ੍ਧੇ ਪਟਿਚ੍ਚ ਪਰਿਤ੍ਤਾਰਮ੍ਮਣਾ ਚੇਤਨਾ. (੧)

ਮਹਗ੍ਗਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਮਹਗ੍ਗਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਕਮ੍ਮਪਚ੍ਚਯਾ – ਮਹਗ੍ਗਤਾਰਮ੍ਮਣੇ ਖਨ੍ਧੇ ਪਟਿਚ੍ਚ ਮਹਗ੍ਗਤਾਰਮ੍ਮਣਾ ਚੇਤਨਾ. (੧)

ਅਪ੍ਪਮਾਣਾਰਮ੍ਮਣਂ ਧਮ੍ਮਂ ਪਟਿਚ੍ਚ ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਕਮ੍ਮਪਚ੍ਚਯਾ – ਅਪ੍ਪਮਾਣਾਰਮ੍ਮਣੇ ਖਨ੍ਧੇ ਪਟਿਚ੍ਚ ਅਪ੍ਪਮਾਣਾਰਮ੍ਮਣਾ ਚੇਤਨਾ. (੧)

ਨਵਿਪਾਕਪਚ੍ਚਯਾਦਿ

੮. ਪਰਿਤ੍ਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਪਰਿਤ੍ਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਵਿਪਾਕਪਚ੍ਚਯਾ (ਪਟਿਸਨ੍ਧਿ ਨਤ੍ਥਿ)… ਨਝਾਨਪਚ੍ਚਯਾ – ਪਞ੍ਚਵਿਞ੍ਞਾਣਸਹਗਤਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ…ਨਮਗ੍ਗਪਚ੍ਚਯਾ – ਅਹੇਤੁਕਂ ਪਰਿਤ੍ਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ; ਅਹੇਤੁਕਪਟਿਸਨ੍ਧਿਕ੍ਖਣੇ…ਪੇ… ਦ੍ਵੇ ਖਨ੍ਧਾ…ਪੇ….

ਮਹਗ੍ਗਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਮਹਗ੍ਗਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਮਗ੍ਗਪਚ੍ਚਯਾ – ਅਹੇਤੁਕਂ ਮਹਗ੍ਗਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ. (੧)

ਅਪ੍ਪਮਾਣਾਰਮ੍ਮਣਂ ਧਮ੍ਮਂ ਪਟਿਚ੍ਚ ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਮਗ੍ਗਪਚ੍ਚਯਾ – ਅਹੇਤੁਕਂ ਅਪ੍ਪਮਾਣਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ. (੧)

ਨਵਿਪ੍ਪਯੁਤ੍ਤਪਚ੍ਚਯੋ

੯. ਪਰਿਤ੍ਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਪਰਿਤ੍ਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਵਿਪ੍ਪਯੁਤ੍ਤਪਚ੍ਚਯਾ – ਅਰੂਪੇ ਪਰਿਤ੍ਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ…. (੧)

ਮਹਗ੍ਗਤਾਰਮ੍ਮਣਂ ਧਮ੍ਮਂ ਪਟਿਚ੍ਚ ਮਹਗ੍ਗਤਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਵਿਪ੍ਪਯੁਤ੍ਤਪਚ੍ਚਯਾ – ਅਰੂਪੇ ਮਹਗ੍ਗਤਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ…. (੧)

ਅਪ੍ਪਮਾਣਾਰਮ੍ਮਣਂ ਧਮ੍ਮਂ ਪਟਿਚ੍ਚ ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਉਪ੍ਪਜ੍ਜਤਿ ਨਵਿਪ੍ਪਯੁਤ੍ਤਪਚ੍ਚਯਾ – ਅਰੂਪੇ ਅਪ੍ਪਮਾਣਾਰਮ੍ਮਣਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ…ਪੇ… ਦ੍ਵੇ ਖਨ੍ਧਾ. (੧)

੨. ਪਚ੍ਚਯਪਚ੍ਚਨੀਯਂ

੨. ਸਙ੍ਖ੍ਯਾਵਾਰੋ

੧੦. ਨਹੇਤੁਯਾ ਤੀਣਿ, ਨਅਧਿਪਤਿਯਾ ਤੀਣਿ…ਪੇ… ਨਪੁਰੇਜਾਤੇ ਤੀਣਿ, ਨਪਚ੍ਛਾਜਾਤੇ ਤੀਣਿ, ਨਆਸੇਵਨੇ ਤੀਣਿ, ਨਕਮ੍ਮੇ ਤੀਣਿ, ਨਵਿਪਾਕੇ ਤੀਣਿ, ਨਝਾਨੇ ਏਕਂ, ਨਮਗ੍ਗੇ ਤੀਣਿ, ਨਵਿਪ੍ਪਯੁਤ੍ਤੇ ਤੀਣਿ (ਏਵਂ ਗਣੇਤਬ੍ਬਂ).

ਪਚ੍ਚਨੀਯਂ.

੩. ਪਚ੍ਚਯਾਨੁਲੋਮਪਚ੍ਚਨੀਯਂ

੧੧. ਹੇਤੁਪਚ੍ਚਯਾ ਨਅਧਿਪਤਿਯਾ ਤੀਣਿ, ਨਪੁਰੇਜਾਤੇ ਤੀਣਿ, ਨਪਚ੍ਛਾਜਾਤੇ ਤੀਣਿ, ਨਆਸੇਵਨੇ ਤੀਣਿ, ਨਕਮ੍ਮੇ ਤੀਣਿ, ਨਵਿਪਾਕੇ ਤੀਣਿ, ਨਵਿਪ੍ਪਯੁਤ੍ਤੇ ਤੀਣਿ (ਏਵਂ ਗਣੇਤਬ੍ਬਂ).

ਅਨੁਲੋਮਪਚ੍ਚਨੀਯਂ.

੪. ਪਚ੍ਚਯਪਚ੍ਚਨੀਯਾਨੁਲੋਮਂ

ਨਹੇਤੁਦੁਕਂ

੧੨. ਨਹੇਤੁਪਚ੍ਚਯਾ ਆਰਮ੍ਮਣੇ ਤੀਣਿ, ਅਨਨ੍ਤਰੇ ਤੀਣਿ, ਸਮਨਨ੍ਤਰੇ ਤੀਣਿ, ਸਹਜਾਤੇ ਤੀਣਿ, ਅਞ੍ਞਮਞ੍ਞੇ ਤੀਣਿ, ਨਿਸ੍ਸਯੇ ਤੀਣਿ, ਉਪਨਿਸ੍ਸਯੇ ਤੀਣਿ, ਪੁਰੇਜਾਤੇ ਤੀਣਿ, ਆਸੇਵਨੇ ਦ੍ਵੇ, ਕਮ੍ਮੇ ਤੀਣਿ, ਵਿਪਾਕੇ ਏਕਂ, ਆਹਾਰੇ ਤੀਣਿ, ਇਨ੍ਦ੍ਰਿਯੇ ਤੀਣਿ, ਝਾਨੇ ਤੀਣਿ, ਮਗ੍ਗੇ ਦ੍ਵੇ, ਸਮ੍ਪਯੁਤ੍ਤੇ ਤੀਣਿ, ਵਿਪ੍ਪਯੁਤ੍ਤੇ ਤੀਣਿ, ਅਤ੍ਥਿਯਾ ਤੀਣਿ, ਨਤ੍ਥਿਯਾ ਤੀਣਿ, ਵਿਗਤੇ ਤੀਣਿ, ਅਵਿਗਤੇ ਤੀਣਿ (ਏਵਂ ਗਣੇਤਬ੍ਬਂ).

ਪਚ੍ਚਨੀਯਾਨੁਲੋਮਂ.

ਪਟਿਚ੍ਚਵਾਰੋ.

੨-੬. ਸਹਜਾਤ-ਪਚ੍ਚਯ-ਨਿਸ੍ਸਯ-ਸਂਸਟ੍ਠ-ਸਮ੍ਪਯੁਤ੍ਤਵਾਰੋ

(ਸਹਜਾਤਵਾਰੋਪਿ ਪਚ੍ਚਯਵਾਰੋਪਿ ਨਿਸ੍ਸਯਵਾਰੋਪਿ ਸਂਸਟ੍ਠਵਾਰੋਪਿ ਸਮ੍ਪਯੁਤ੍ਤਵਾਰੋਪਿ ਪਟਿਚ੍ਚਵਾਰਸਦਿਸੋ).

੭. ਪਞ੍ਹਾਵਾਰੋ

੧. ਪਚ੍ਚਯਾਨੁਲੋਮਂ

੧. ਵਿਭਙ੍ਗਵਾਰੋ

ਹੇਤੁਪਚ੍ਚਯੋ

੧੩. ਪਰਿਤ੍ਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ – ਪਰਿਤ੍ਤਾਰਮ੍ਮਣਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. ਪਟਿਸਨ੍ਧਿਕ੍ਖਣੇ ਪਰਿਤ੍ਤਾਰਮ੍ਮਣਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (੧)

ਮਹਗ੍ਗਤਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ – ਮਹਗ੍ਗਤਾਰਮ੍ਮਣਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. ਪਟਿਸਨ੍ਧਿਕ੍ਖਣੇ…ਪੇ…. (੧)

ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ – ਅਪ੍ਪਮਾਣਾਰਮ੍ਮਣਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (੧)

ਆਰਮ੍ਮਣਪਚ੍ਚਯੋ

੧੪. ਪਰਿਤ੍ਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਦਾਨਂ ਦਤ੍ਵਾ ਸੀਲਂ ਸਮਾਦਿਯਿਤ੍ਵਾ ਉਪੋਸਥਕਮ੍ਮਂ ਕਤ੍ਵਾ ਤਂ ਪਚ੍ਚਵੇਕ੍ਖਤਿ, ਪੁਬ੍ਬੇ ਸੁਚਿਣ੍ਣਾਨਿ ਪਚ੍ਚਵੇਕ੍ਖਤਿ, ਅਰਿਯਾ ਪਰਿਤ੍ਤਾਰਮ੍ਮਣੇ ਪਹੀਨੇ ਕਿਲੇਸੇ ਪਚ੍ਚਵੇਕ੍ਖਨ੍ਤਿ, ਵਿਕ੍ਖਮ੍ਭਿਤੇ ਕਿਲੇਸੇ ਪਚ੍ਚਵੇਕ੍ਖਨ੍ਤਿ, ਪੁਬ੍ਬੇ ਸਮੁਦਾਚਿਣ੍ਣੇ ਕਿਲੇਸੇ ਜਾਨਨ੍ਤਿ. ਪਰਿਤ੍ਤਾਰਮ੍ਮਣੇ ਪਰਿਤ੍ਤੇ ਖਨ੍ਧੇ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਵਿਪਸ੍ਸਤਿ, ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਪਰਿਤ੍ਤਾਰਮ੍ਮਣੋ ਰਾਗੋ ਉਪ੍ਪਜ੍ਜਤਿ…ਪੇ… ਦੋਮਨਸ੍ਸਂ ਉਪ੍ਪਜ੍ਜਤਿ. ਚੇਤੋਪਰਿਯਞਾਣੇਨ ਪਰਿਤ੍ਤਾਰਮ੍ਮਣਪਰਿਤ੍ਤਚਿਤ੍ਤਸਮਙ੍ਗਿਸ੍ਸ ਚਿਤ੍ਤਂ ਜਾਨਾਤਿ. ਪਰਿਤ੍ਤਾਰਮ੍ਮਣਾ ਪਰਿਤ੍ਤਾ ਖਨ੍ਧਾ ਚੇਤੋਪਰਿਯਞਾਣਸ੍ਸ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਸ੍ਸ, ਯਥਾਕਮ੍ਮੂਪਗਞਾਣਸ੍ਸ, ਅਨਾਗਤਂਸਞਾਣਸ੍ਸ, ਆਵਜ੍ਜਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. (੧)

ਪਰਿਤ੍ਤਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਦਿਬ੍ਬਂ ਚਕ੍ਖੁਂ ਪਚ੍ਚਵੇਕ੍ਖਤਿ, ਦਿਬ੍ਬਂ ਸੋਤਧਾਤੁਂ ਪਚ੍ਚਵੇਕ੍ਖਤਿ, ਪਰਿਤ੍ਤਾਰਮ੍ਮਣਂ ਇਦ੍ਧਿਵਿਧਞਾਣਂ ਪਚ੍ਚਵੇਕ੍ਖਤਿ, ਚੇਤੋਪਰਿਯਞਾਣਂ…ਪੇ… ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ…ਪੇ… ਯਥਾਕਮ੍ਮੂਪਗਞਾਣਂ…ਪੇ… ਅਨਾਗਤਂਸਞਾਣਂ ਪਚ੍ਚਵੇਕ੍ਖਤਿ. ਪਰਿਤ੍ਤਾਰਮ੍ਮਣੇ ਮਹਗ੍ਗਤੇ ਖਨ੍ਧੇ ਅਨਿਚ੍ਚਤੋ…ਪੇ… ਵਿਪਸ੍ਸਤਿ, ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਮਹਗ੍ਗਤਾਰਮ੍ਮਣੋ ਰਾਗੋ ਉਪ੍ਪਜ੍ਜਤਿ…ਪੇ… ਦੋਮਨਸ੍ਸਂ ਉਪ੍ਪਜ੍ਜਤਿ. ਚੇਤੋਪਰਿਯਞਾਣੇਨ ਪਰਿਤ੍ਤਾਰਮ੍ਮਣਮਹਗ੍ਗਤਚਿਤ੍ਤਸਮਙ੍ਗਿਸ੍ਸ ਚਿਤ੍ਤਂ ਜਾਨਾਤਿ. ਪਰਿਤ੍ਤਾਰਮ੍ਮਣਾ ਮਹਗ੍ਗਤਾ ਖਨ੍ਧਾ ਚੇਤੋਪਰਿਯਞਾਣਸ੍ਸ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਸ੍ਸ, ਅਨਾਗਤਂਸਞਾਣਸ੍ਸ, ਆਵਜ੍ਜਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. (੨)

੧੫. ਮਹਗ੍ਗਤਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਵਿਞ੍ਞਾਣਞ੍ਚਾਯਤਨਂ ਪਚ੍ਚਵੇਕ੍ਖਤਿ, ਨੇਵਸਞ੍ਞਾਨਾਸਞ੍ਞਾਯਤਨਂ ਪਚ੍ਚਵੇਕ੍ਖਤਿ, ਮਹਗ੍ਗਤਾਰਮ੍ਮਣਂ ਇਦ੍ਧਿਵਿਧਞਾਣਂ ਪਚ੍ਚਵੇਕ੍ਖਤਿ, ਚੇਤੋਪਰਿਯਞਾਣਂ…ਪੇ… ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ…ਪੇ… ਯਥਾਕਮ੍ਮੂਪਗਞਾਣਂ…ਪੇ… ਅਨਾਗਤਂਸਞਾਣਂ ਪਚ੍ਚਵੇਕ੍ਖਤਿ. ਮਹਗ੍ਗਤਾਰਮ੍ਮਣੇ ਮਹਗ੍ਗਤੇ ਖਨ੍ਧੇ ਅਨਿਚ੍ਚਤੋ…ਪੇ… ਵਿਪਸ੍ਸਤਿ, ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਮਹਗ੍ਗਤਾਰਮ੍ਮਣੋ ਰਾਗੋ ਉਪ੍ਪਜ੍ਜਤਿ…ਪੇ… ਦੋਮਨਸ੍ਸਂ ਉਪ੍ਪਜ੍ਜਤਿ. ਚੇਤੋਪਰਿਯਞਾਣੇਨ ਮਹਗ੍ਗਤਾਰਮ੍ਮਣਮਹਗ੍ਗਤਚਿਤ੍ਤਸਮਙ੍ਗਿਸ੍ਸ ਚਿਤ੍ਤਂ ਜਾਨਾਤਿ. ਮਹਗ੍ਗਤਾਰਮ੍ਮਣਾ ਮਹਗ੍ਗਤਾ ਖਨ੍ਧਾ ਚੇਤੋਪਰਿਯਞਾਣਸ੍ਸ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਸ੍ਸ, ਯਥਾਕਮ੍ਮੂਪਗਞਾਣਸ੍ਸ, ਅਨਾਗਤਂਸਞਾਣਸ੍ਸ, ਆਵਜ੍ਜਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. (੧)

ਮਹਗ੍ਗਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਪਠਮਜ੍ਝਾਨਪਚ੍ਚਵੇਕ੍ਖਣਂ ਪਚ੍ਚਵੇਕ੍ਖਤਿ…ਪੇ… ਨੇਵਸਞ੍ਞਾਨਾਸਞ੍ਞਾਯਤਨਪਚ੍ਚਵੇਕ੍ਖਣਂ ਪਚ੍ਚਵੇਕ੍ਖਤਿ, ਦਿਬ੍ਬਚਕ੍ਖੁਪਚ੍ਚਵੇਕ੍ਖਣਂ ਪਚ੍ਚਵੇਕ੍ਖਤਿ, ਦਿਬ੍ਬਸੋਤਧਾਤੁਪਚ੍ਚਵੇਕ੍ਖਣਂ ਪਚ੍ਚਵੇਕ੍ਖਤਿ, ਇਦ੍ਧਿਵਿਧਞਾਣਪਚ੍ਚਵੇਕ੍ਖਣਂ…ਪੇ… ਚੇਤੋਪਰਿਯਞਾਣਪਚ੍ਚਵੇਕ੍ਖਣਂ…ਪੇ… ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਪਚ੍ਚਵੇਕ੍ਖਣਂ…ਪੇ… ਯਥਾਕਮ੍ਮੂਪਗਞਾਣਪਚ੍ਚਵੇਕ੍ਖਣਂ…ਪੇ… ਅਨਾਗਤਂਸਞਾਣਪਚ੍ਚਵੇਕ੍ਖਣਂ ਪਚ੍ਚਵੇਕ੍ਖਤਿ, ਅਰਿਯਾ ਮਹਗ੍ਗਤਾਰਮ੍ਮਣੇ ਪਹੀਨੇ ਕਿਲੇਸੇ ਪਚ੍ਚਵੇਕ੍ਖਨ੍ਤਿ, ਵਿਕ੍ਖਮ੍ਭਿਤੇ ਕਿਲੇਸੇ ਪਚ੍ਚਵੇਕ੍ਖਨ੍ਤਿ, ਪੁਬ੍ਬੇ ਸਮੁਦਾਚਿਣ੍ਣੇ ਕਿਲੇਸੇ ਜਾਨਨ੍ਤਿ. ਮਹਗ੍ਗਤਾਰਮ੍ਮਣੇ ਪਰਿਤ੍ਤੇ ਖਨ੍ਧੇ ਅਨਿਚ੍ਚਤੋ…ਪੇ… ਵਿਪਸ੍ਸਤਿ, ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਆਰਬ੍ਭ ਪਰਿਤ੍ਤਾਰਮ੍ਮਣੋ ਰਾਗੋ ਉਪ੍ਪਜ੍ਜਤਿ…ਪੇ… ਦੋਮਨਸ੍ਸਂ ਉਪ੍ਪਜ੍ਜਤਿ. ਚੇਤੋਪਰਿਯਞਾਣੇਨ ਮਹਗ੍ਗਤਾਰਮ੍ਮਣਪਰਿਤ੍ਤਚਿਤ੍ਤਸਮਙ੍ਗਿਸ੍ਸ ਚਿਤ੍ਤਂ ਜਾਨਾਤਿ. ਮਹਗ੍ਗਤਾਰਮ੍ਮਣਾ ਪਰਿਤ੍ਤਾ ਖਨ੍ਧਾ ਚੇਤੋਪਰਿਯਞਾਣਸ੍ਸ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਸ੍ਸ, ਯਥਾਕਮ੍ਮੂਪਗਞਾਣਸ੍ਸ, ਅਨਾਗਤਂਸਞਾਣਸ੍ਸ, ਆਵਜ੍ਜਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. (੨)

੧੬. ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਪਚ੍ਚਵੇਕ੍ਖਨ੍ਤਿ, ਫਲਂ ਪਚ੍ਚਵੇਕ੍ਖਨ੍ਤਿ. ਚੇਤੋਪਰਿਯਞਾਣੇਨ ਅਪ੍ਪਮਾਣਾਰਮ੍ਮਣਅਪ੍ਪਮਾਣਚਿਤ੍ਤਸਮਙ੍ਗਿਸ੍ਸ ਚਿਤ੍ਤਂ ਜਾਨਾਤਿ. ਅਪ੍ਪਮਾਣਾਰਮ੍ਮਣਾ ਅਪ੍ਪਮਾਣਾ ਖਨ੍ਧਾ ਚੇਤੋਪਰਿਯਞਾਣਸ੍ਸ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਸ੍ਸ, ਅਨਾਗਤਂਸਞਾਣਸ੍ਸ, ਆਵਜ੍ਜਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. (੧)

ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਅਰਿਯਾ ਗੋਤ੍ਰਭੁਂ ਪਚ੍ਚਵੇਕ੍ਖਨ੍ਤਿ, ਵੋਦਾਨਂ ਪਚ੍ਚਵੇਕ੍ਖਨ੍ਤਿ, ਮਗ੍ਗਪਚ੍ਚਵੇਕ੍ਖਣਂ ਪਚ੍ਚਵੇਕ੍ਖਨ੍ਤਿ, ਫਲਪਚ੍ਚਵੇਕ੍ਖਣਂ ਪਚ੍ਚਵੇਕ੍ਖਨ੍ਤਿ, ਨਿਬ੍ਬਾਨਪਚ੍ਚਵੇਕ੍ਖਣਂ ਪਚ੍ਚਵੇਕ੍ਖਨ੍ਤਿ. ਅਪ੍ਪਮਾਣਾਰਮ੍ਮਣੇ ਪਰਿਤ੍ਤੇ ਖਨ੍ਧੇ ਅਨਿਚ੍ਚਤੋ…ਪੇ… ਵਿਪਸ੍ਸਤਿ, ਚੇਤੋਪਰਿਯਞਾਣੇਨ ਅਪ੍ਪਮਾਣਾਰਮ੍ਮਣਪਰਿਤ੍ਤਚਿਤ੍ਤਸਮਙ੍ਗਿਸ੍ਸ ਚਿਤ੍ਤਂ ਜਾਨਾਤਿ. ਅਪ੍ਪਮਾਣਾਰਮ੍ਮਣਾ ਪਰਿਤ੍ਤਾ ਖਨ੍ਧਾ ਚੇਤੋਪਰਿਯਞਾਣਸ੍ਸ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਸ੍ਸ, ਯਥਾਕਮ੍ਮੂਪਗਞਾਣਸ੍ਸ, ਅਨਾਗਤਂਸਞਾਣਸ੍ਸ ਆਵਜ੍ਜਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. (੨)

ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਅਰਿਯਾ ਅਪ੍ਪਮਾਣਾਰਮ੍ਮਣਂ ਚੇਤੋਪਰਿਯਞਾਣਂ ਪਚ੍ਚਵੇਕ੍ਖਨ੍ਤਿ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ ਪਚ੍ਚਵੇਕ੍ਖਨ੍ਤਿ, ਅਨਾਗਤਂਸਞਾਣਂ ਪਚ੍ਚਵੇਕ੍ਖਨ੍ਤਿ. ਚੇਤੋਪਰਿਯਞਾਣੇਨ ਅਪ੍ਪਮਾਣਾਰਮ੍ਮਣਮਹਗ੍ਗਤਚਿਤ੍ਤਸਮਙ੍ਗਿਸ੍ਸ ਚਿਤ੍ਤਂ ਜਾਨਨ੍ਤਿ. ਅਪ੍ਪਮਾਣਾਰਮ੍ਮਣਂ ਮਹਗ੍ਗਤਾ ਖਨ੍ਧਾ ਚੇਤੋਪਰਿਯਞਾਣਸ੍ਸ, ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਸ੍ਸ, ਅਨਾਗਤਂਸਞਾਣਸ੍ਸ, ਆਵਜ੍ਜਨਾਯ ਆਰਮ੍ਮਣਪਚ੍ਚਯੇਨ ਪਚ੍ਚਯੋ. (੩)

ਅਧਿਪਤਿਪਚ੍ਚਯੋ

੧੭. ਪਰਿਤ੍ਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ. ਆਰਮ੍ਮਣਾਧਿਪਤਿ – ਦਾਨਂ ਦਤ੍ਵਾ ਸੀਲਂ ਸਮਾਦਿਯਿਤ੍ਵਾ ਉਪੋਸਥਕਮ੍ਮਂ ਕਤ੍ਵਾ ਤਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਤਿ, ਪੁਬ੍ਬੇ ਸੁਚਿਣ੍ਣਾਨਿ ਗਰੁਂ ਕਤ੍ਵਾ ਪਚ੍ਚਵੇਕ੍ਖਤਿ, ਪਰਿਤ੍ਤਾਰਮ੍ਮਣੇ ਪਰਿਤ੍ਤੇ ਖਨ੍ਧੇ ਗਰੁਂ ਕਤ੍ਵਾ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਗਰੁਂ ਕਤ੍ਵਾ ਪਰਿਤ੍ਤਾਰਮ੍ਮਣੋ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ ਉਪ੍ਪਜ੍ਜਤਿ. ਸਹਜਾਤਾਧਿਪਤਿ – ਪਰਿਤ੍ਤਾਰਮ੍ਮਣਾਧਿਪਤਿ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੧)

ਪਰਿਤ੍ਤਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਆਰਮ੍ਮਣਾਧਿਪਤਿ – ਦਿਬ੍ਬਂ ਚਕ੍ਖੁਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਤਿ, ਦਿਬ੍ਬਂ ਸੋਤਧਾਤੁਂ…ਪੇ… ਪਰਿਤ੍ਤਾਰਮ੍ਮਣਂ ਇਦ੍ਧਿਵਿਧਞਾਣਂ…ਪੇ… ਚੇਤੋਪਰਿਯਞਾਣਂ…ਪੇ… ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ…ਪੇ… ਯਥਾਕਮ੍ਮੂਪਗਞਾਣਂ…ਪੇ… ਅਨਾਗਤਂਸਞਾਣਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਤਿ. ਪਰਿਤ੍ਤਾਰਮ੍ਮਣੇ ਮਹਗ੍ਗਤੇ ਖਨ੍ਧੇ ਗਰੁਂ ਕਤ੍ਵਾ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਗਰੁਂ ਕਤ੍ਵਾ ਮਹਗ੍ਗਤਾਰਮ੍ਮਣੋ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ ਉਪ੍ਪਜ੍ਜਤਿ. (੨)

੧੮. ਮਹਗ੍ਗਤਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ. ਆਰਮ੍ਮਣਾਧਿਪਤਿ – ਵਿਞ੍ਞਾਣਞ੍ਚਾਯਤਨਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਤਿ, ਨੇਵਸਞ੍ਞਾਨਾਸਞ੍ਞਾਯਤਨਂ…ਪੇ… ਮਹਗ੍ਗਤਾਰਮ੍ਮਣਂ ਇਦ੍ਧਿਵਿਧਞਾਣਂ…ਪੇ… ਚੇਤੋਪਰਿਯਞਾਣਂ …ਪੇ… ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ…ਪੇ… ਯਥਾਕਮ੍ਮੂਪਗਞਾਣਂ…ਪੇ… ਅਨਾਗਤਂਸਞਾਣਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਤਿ. ਮਹਗ੍ਗਤਾਰਮ੍ਮਣੇ ਮਹਗ੍ਗਤੇ ਖਨ੍ਧੇ ਗਰੁਂ ਕਤ੍ਵਾ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਗਰੁਂ ਕਤ੍ਵਾ ਮਹਗ੍ਗਤਾਰਮ੍ਮਣੋ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ ਉਪ੍ਪਜ੍ਜਤਿ. ਸਹਜਾਤਾਧਿਪਤਿ – ਮਹਗ੍ਗਤਾਰਮ੍ਮਣਾਧਿਪਤਿ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੧)

ਮਹਗ੍ਗਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਆਰਮ੍ਮਣਾਧਿਪਤਿ – ਪਠਮਜ੍ਝਾਨਪਚ੍ਚਵੇਕ੍ਖਣਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਤਿ…ਪੇ… ਅਨਾਗਤਂਸਞਾਣਪਚ੍ਚਵੇਕ੍ਖਣਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਤਿ. ਮਹਗ੍ਗਤਾਰਮ੍ਮਣੇ ਪਰਿਤ੍ਤੇ ਖਨ੍ਧੇ ਗਰੁਂ ਕਤ੍ਵਾ ਅਸ੍ਸਾਦੇਤਿ ਅਭਿਨਨ੍ਦਤਿ, ਤਂ ਗਰੁਂ ਕਤ੍ਵਾ ਪਰਿਤ੍ਤਾਰਮ੍ਮਣੋ ਰਾਗੋ ਉਪ੍ਪਜ੍ਜਤਿ, ਦਿਟ੍ਠਿ ਉਪ੍ਪਜ੍ਜਤਿ. (੨)

੧੯. ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ. ਆਰਮ੍ਮਣਾਧਿਪਤਿ – ਅਰਿਯਾ ਮਗ੍ਗਾ ਵੁਟ੍ਠਹਿਤ੍ਵਾ ਮਗ੍ਗਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ, ਫਲਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. ਸਹਜਾਤਾਧਿਪਤਿ – ਅਪ੍ਪਮਾਣਾਰਮ੍ਮਣਾਧਿਪਤਿ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਅਧਿਪਤਿਪਚ੍ਚਯੇਨ ਪਚ੍ਚਯੋ. (੧)

ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਆਰਮ੍ਮਣਾਧਿਪਤਿ – ਸੇਕ੍ਖਾ ਗੋਤ੍ਰਭੁਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ, ਵੋਦਾਨਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ, ਮਗ੍ਗਪਚ੍ਚਵੇਕ੍ਖਣਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ, ਫਲਪਚ੍ਚਵੇਕ੍ਖਣਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ, ਨਿਬ੍ਬਾਨਪਚ੍ਚਵੇਕ੍ਖਣਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੨)

ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ. ਆਰਮ੍ਮਣਾਧਿਪਤਿ – ਸੇਕ੍ਖਾ ਅਪ੍ਪਮਾਣਾਰਮ੍ਮਣਂ ਚੇਤੋਪਰਿਯਞਾਣਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ…ਪੇ… ਅਨਾਗਤਂਸਞਾਣਂ ਗਰੁਂ ਕਤ੍ਵਾ ਪਚ੍ਚਵੇਕ੍ਖਨ੍ਤਿ. (੩)

ਅਨਨ੍ਤਰਪਚ੍ਚਯੋ

੨੦. ਪਰਿਤ੍ਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਪਰਿਤ੍ਤਾਰਮ੍ਮਣਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਪਰਿਤ੍ਤਾਰਮ੍ਮਣਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੧)

ਪਰਿਤ੍ਤਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪਰਿਤ੍ਤਾਰਮ੍ਮਣਂ ਚੁਤਿਚਿਤ੍ਤਂ ਮਹਗ੍ਗਤਾਰਮ੍ਮਣਸ੍ਸ ਉਪਪਤ੍ਤਿਚਿਤ੍ਤਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. ਪਰਿਤ੍ਤਾਰਮ੍ਮਣਂ ਭਵਙ੍ਗਂ ਮਹਗ੍ਗਤਾਰਮ੍ਮਣਾਯ ਆਵਜ੍ਜਨਾਯ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. ਪਰਿਤ੍ਤਾਰਮ੍ਮਣਾ ਖਨ੍ਧਾ ਮਹਗ੍ਗਤਾਰਮ੍ਮਣਸ੍ਸ ਵੁਟ੍ਠਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੨)

ਪਰਿਤ੍ਤਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪਰਿਤ੍ਤਾਰਮ੍ਮਣਂ ਭਵਙ੍ਗਂ ਅਪ੍ਪਮਾਣਾਰਮ੍ਮਣਾਯ ਆਵਜ੍ਜਨਾਯ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. ਪਰਿਤ੍ਤਾਰਮ੍ਮਣਂ ਅਨੁਲੋਮਂ ਗੋਤ੍ਰਭੁਸ੍ਸ… ਅਨੁਲੋਮਂ ਵੋਦਾਨਸ੍ਸ… ਅਨੁਲੋਮਂ ਫਲਸਮਾਪਤ੍ਤਿਯਾ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੩)

੨੧. ਮਹਗ੍ਗਤਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਮਹਗ੍ਗਤਾਰਮ੍ਮਣਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਮਹਗ੍ਗਤਾਰਮ੍ਮਣਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੧)

ਮਹਗ੍ਗਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਮਹਗ੍ਗਤਾਰਮ੍ਮਣਂ ਚੁਤਿਚਿਤ੍ਤਂ ਪਰਿਤ੍ਤਾਰਮ੍ਮਣਸ੍ਸ ਉਪਪਤ੍ਤਿਚਿਤ੍ਤਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. ਮਹਗ੍ਗਤਾਰਮ੍ਮਣਂ ਭਵਙ੍ਗਂ ਪਰਿਤ੍ਤਾਰਮ੍ਮਣਾਯ ਆਵਜ੍ਜਨਾਯ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. ਮਹਗ੍ਗਤਾਰਮ੍ਮਣਾ ਖਨ੍ਧਾ ਪਰਿਤ੍ਤਾਰਮ੍ਮਣਸ੍ਸ ਵੁਟ੍ਠਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੨)

ਮਹਗ੍ਗਤਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਮਹਗ੍ਗਤਾਰਮ੍ਮਣਂ ਭਵਙ੍ਗਂ ਅਪ੍ਪਮਾਣਾਰਮ੍ਮਣਾਯ ਆਵਜ੍ਜਨਾਯ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. ਮਹਗ੍ਗਤਾਰਮ੍ਮਣਂ ਅਨੁਲੋਮਂ ਗੋਤ੍ਰਭੁਸ੍ਸ… ਅਨੁਲੋਮਂ ਵੋਦਾਨਸ੍ਸ… ਅਨੁਲੋਮਂ ਫਲਸਮਾਪਤ੍ਤਿਯਾ… ਨਿਰੋਧਾ ਵੁਟ੍ਠਹਨ੍ਤਸ੍ਸ ਨੇਵਸਞ੍ਞਾਨਾਸਞ੍ਞਾਯਤਨਂ ਫਲਸਮਾਪਤ੍ਤਿਯਾ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੩)

੨੨. ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਅਪ੍ਪਮਾਣਾਰਮ੍ਮਣਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਅਪ੍ਪਮਾਣਾਰਮ੍ਮਣਾਨਂ ਖਨ੍ਧਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. ਗੋਤ੍ਰਭੁ ਮਗ੍ਗਸ੍ਸ… ਵੋਦਾਨਂ ਮਗ੍ਗਸ੍ਸ… ਮਗ੍ਗੋ ਫਲਸ੍ਸ… ਫਲਂ ਫਲਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੧)

ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਮਗ੍ਗਪਚ੍ਚਵੇਕ੍ਖਣਂ ਪਰਿਤ੍ਤਾਰਮ੍ਮਣਸ੍ਸ ਵੁਟ੍ਠਾਨਸ੍ਸ… ਫਲਪਚ੍ਚਵੇਕ੍ਖਣਂ ਪਰਿਤ੍ਤਾਰਮ੍ਮਣਸ੍ਸ ਵੁਟ੍ਠਾਨਸ੍ਸ… ਨਿਬ੍ਬਾਨਪਚ੍ਚਵੇਕ੍ਖਣਂ ਪਰਿਤ੍ਤਾਰਮ੍ਮਣਸ੍ਸ ਵੁਟ੍ਠਾਨਸ੍ਸ… ਅਪ੍ਪਮਾਣਾਰਮ੍ਮਣਂ ਚੇਤੋਪਰਿਯਞਾਣਂ ਪਰਿਤ੍ਤਾਰਮ੍ਮਣਸ੍ਸ ਵੁਟ੍ਠਾਨਸ੍ਸ… ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ ਪਰਿਤ੍ਤਾਰਮ੍ਮਣਸ੍ਸ ਵੁਟ੍ਠਾਨਸ੍ਸ… ਅਨਾਗਤਂਸਞਾਣਂ ਪਰਿਤ੍ਤਾਰਮ੍ਮਣਸ੍ਸ ਵੁਟ੍ਠਾਨਸ੍ਸ… ਫਲਂ ਪਰਿਤ੍ਤਾਰਮ੍ਮਣਸ੍ਸ ਵੁਟ੍ਠਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੨)

ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਮਗ੍ਗਪਚ੍ਚਵੇਕ੍ਖਣਂ ਮਹਗ੍ਗਤਾਰਮ੍ਮਣਸ੍ਸ ਵੁਟ੍ਠਾਨਸ੍ਸ… ਫਲਪਚ੍ਚਵੇਕ੍ਖਣਂ ਮਹਗ੍ਗਤਾਰਮ੍ਮਣਸ੍ਸ ਵੁਟ੍ਠਾਨਸ੍ਸ… ਨਿਬ੍ਬਾਨਪਚ੍ਚਵੇਕ੍ਖਣਂ ਮਹਗ੍ਗਤਾਰਮ੍ਮਣਸ੍ਸ ਵੁਟ੍ਠਾਨਸ੍ਸ… ਫਲਂ ਮਹਗ੍ਗਤਾਰਮ੍ਮਣਸ੍ਸ ਵੁਟ੍ਠਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ. (੩)

ਸਮਨਨ੍ਤਰਪਚ੍ਚਯੋ

੨੩. ਪਰਿਤ੍ਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ (ਅਨਨ੍ਤਰਸਦਿਸਂ).

ਸਹਜਾਤਪਚ੍ਚਯਾਦਿ

੨੪. ਪਰਿਤ੍ਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਸਹਜਾਤਪਚ੍ਚਯੇਨ ਪਚ੍ਚਯੋ… ਅਞ੍ਞਮਞ੍ਞਪਚ੍ਚਯੇਨ ਪਚ੍ਚਯੋ… ਨਿਸ੍ਸਯਪਚ੍ਚਯੇਨ ਪਚ੍ਚਯੋ… ਤੀਣਿ (ਪਟਿਚ੍ਚਵਾਰਸਦਿਸਾ ਕਾਤਬ੍ਬਾ).

ਉਪਨਿਸ੍ਸਯਪਚ੍ਚਯੋ

੨੫. ਪਰਿਤ੍ਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਰਿਤ੍ਤਾਰਮ੍ਮਣਂ ਸਦ੍ਧਂ ਉਪਨਿਸ੍ਸਾਯ ਦਾਨਂ ਦੇਤਿ, ਸੀਲਂ…ਪੇ… ਉਪੋਸਥਕਮ੍ਮਂ…ਪੇ… ਪਰਿਤ੍ਤਾਰਮ੍ਮਣਂ ਝਾਨਂ ਉਪ੍ਪਾਦੇਤਿ, ਵਿਪਸ੍ਸਨਂ…ਪੇ… ਅਭਿਞ੍ਞਂ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ, ਮਾਨਂ ਜਪ੍ਪੇਤਿ, ਦਿਟ੍ਠਿਂ ਗਣ੍ਹਾਤਿ. ਪਰਿਤ੍ਤਾਰਮ੍ਮਣਂ ਸੀਲਂ…ਪੇ… ਪਞ੍ਞਂ… ਰਾਗਂ ਦੋਸਂ… ਮੋਹਂ… ਮਾਨਂ… ਦਿਟ੍ਠਿਂ… ਪਤ੍ਥਨਂ… ਕਾਯਿਕਂ ਸੁਖਂ… ਕਾਯਿਕਂ ਦੁਕ੍ਖਂ ਉਪਨਿਸ੍ਸਾਯ ਦਾਨਂ ਦੇਤਿ, ਸੀਲਂ…ਪੇ… ਉਪੋਸਥਕਮ੍ਮਂ…ਪੇ… ਪਰਿਤ੍ਤਾਰਮ੍ਮਣਂ ਝਾਨਂ ਉਪ੍ਪਾਦੇਤਿ, ਵਿਪਸ੍ਸਨਂ…ਪੇ… ਅਭਿਞ੍ਞਂ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ, ਪਾਣਂ ਹਨਤਿ…ਪੇ… ਸਙ੍ਘਂ ਭਿਨ੍ਦਤਿ. ਪਰਿਤ੍ਤਾਰਮ੍ਮਣਾ ਸਦ੍ਧਾ…ਪੇ… ਪਞ੍ਞਾ, ਰਾਗੋ…ਪੇ… ਪਤ੍ਥਨਾ, ਕਾਯਿਕਂ ਸੁਖਂ… ਕਾਯਿਕਂ ਦੁਕ੍ਖਂ… ਪਰਿਤ੍ਤਾਰਮ੍ਮਣਾਯ ਸਦ੍ਧਾਯ…ਪੇ… ਪਞ੍ਞਾਯ ਰਾਗਸ੍ਸ…ਪੇ… ਪਤ੍ਥਨਾਯ, ਕਾਯਿਕਸ੍ਸ ਸੁਖਸ੍ਸ, ਕਾਯਿਕਸ੍ਸ ਦੁਕ੍ਖਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੧)

ਪਰਿਤ੍ਤਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਰਿਤ੍ਤਾਰਮ੍ਮਣਂ ਸਦ੍ਧਂ ਉਪਨਿਸ੍ਸਾਯ ਮਹਗ੍ਗਤਾਰਮ੍ਮਣਂ ਝਾਨਂ ਉਪ੍ਪਾਦੇਤਿ, ਵਿਪਸ੍ਸਨਂ…ਪੇ… ਅਭਿਞ੍ਞਂ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ, ਮਾਨਂ ਜਪ੍ਪੇਤਿ, ਦਿਟ੍ਠਿਂ ਗਣ੍ਹਾਤਿ. ਪਰਿਤ੍ਤਾਰਮ੍ਮਣਂ ਸੀਲਂ…ਪੇ… ਪਞ੍ਞਂ… ਰਾਗਂ…ਪੇ… ਪਤ੍ਥਨਂ… ਕਾਯਿਕਂ ਸੁਖਂ, ਕਾਯਿਕਂ ਦੁਕ੍ਖਂ ਉਪਨਿਸ੍ਸਾਯ ਮਹਗ੍ਗਤਾਰਮ੍ਮਣਂ ਝਾਨਂ ਉਪ੍ਪਾਦੇਤਿ, ਵਿਪਸ੍ਸਨਂ…ਪੇ… ਅਭਿਞ੍ਞਂ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ, ਮਾਨਂ ਜਪ੍ਪੇਤਿ, ਦਿਟ੍ਠਿਂ ਗਣ੍ਹਾਤਿ. ਪਰਿਤ੍ਤਾਰਮ੍ਮਣਾ ਸਦ੍ਧਾ…ਪੇ… ਕਾਯਿਕਂ ਸੁਖਂ, ਕਾਯਿਕਂ ਦੁਕ੍ਖਂ, ਮਹਗ੍ਗਤਾਰਮ੍ਮਣਾਯ ਸਦ੍ਧਾਯ…ਪੇ… ਪਞ੍ਞਾਯ ਰਾਗਸ੍ਸ…ਪੇ… ਪਤ੍ਥਨਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੨)

ਪਰਿਤ੍ਤਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਪਰਿਤ੍ਤਾਰਮ੍ਮਣਂ ਸਦ੍ਧਂ ਉਪਨਿਸ੍ਸਾਯ ਅਪ੍ਪਮਾਣਾਰਮ੍ਮਣਂ ਝਾਨਂ ਉਪ੍ਪਾਦੇਤਿ, ਮਗ੍ਗਂ…ਪੇ… ਅਭਿਞ੍ਞਂ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ. ਪਰਿਤ੍ਤਾਰਮ੍ਮਣਂ ਸੀਲਂ…ਪੇ… ਪਞ੍ਞਂ, ਰਾਗਂ…ਪੇ… ਕਾਯਿਕਂ ਸੁਖਂ, ਕਾਯਿਕਂ ਦੁਕ੍ਖਂ ਉਪਨਿਸ੍ਸਾਯ ਅਪ੍ਪਮਾਣਾਰਮ੍ਮਣਂ ਝਾਨਂ ਉਪ੍ਪਾਦੇਤਿ, ਮਗ੍ਗਂ… ਅਭਿਞ੍ਞਂ… ਸਮਾਪਤ੍ਤਿਂ ਉਪ੍ਪਾਦੇਤਿ. ਪਰਿਤ੍ਤਾਰਮ੍ਮਣਾ ਸਦ੍ਧਾ…ਪੇ… ਕਾਯਿਕਂ ਸੁਖਂ, ਕਾਯਿਕਂ ਦੁਕ੍ਖਂ ਅਪ੍ਪਮਾਣਾਰਮ੍ਮਣਾਯ ਸਦ੍ਧਾਯ…ਪੇ… ਪਞ੍ਞਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

੨੬. ਮਹਗ੍ਗਤਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਮਹਗ੍ਗਤਾਰਮ੍ਮਣਂ ਸਦ੍ਧਂ ਉਪਨਿਸ੍ਸਾਯ ਮਹਗ੍ਗਤਾਰਮ੍ਮਣਂ ਝਾਨਂ ਉਪ੍ਪਾਦੇਤਿ, ਵਿਪਸ੍ਸਨਂ… ਅਭਿਞ੍ਞਂ… ਸਮਾਪਤ੍ਤਿਂ ਉਪ੍ਪਾਦੇਤਿ, ਮਾਨਂ ਜਪ੍ਪੇਤਿ, ਦਿਟ੍ਠਿਂ ਗਣ੍ਹਾਤਿ. ਮਹਗ੍ਗਤਾਰਮ੍ਮਣਂ ਸੀਲਂ…ਪੇ… ਪਞ੍ਞਂ, ਰਾਗਂ…ਪੇ… ਪਤ੍ਥਨਂ ਉਪਨਿਸ੍ਸਾਯ ਮਹਗ੍ਗਤਾਰਮ੍ਮਣਂ ਝਾਨਂ ਉਪ੍ਪਾਦੇਤਿ…ਪੇ… ਦਿਟ੍ਠਿਂ ਗਣ੍ਹਾਤਿ. ਮਹਗ੍ਗਤਾਰਮ੍ਮਣਾ ਸਦ੍ਧਾ…ਪੇ… ਪਞ੍ਞਾ, ਰਾਗੋ…ਪੇ… ਪਤ੍ਥਨਾ ਮਹਗ੍ਗਤਾਰਮ੍ਮਣਾਯ ਸਦ੍ਧਾਯ…ਪੇ… ਪਤ੍ਥਨਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੧)

ਮਹਗ੍ਗਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਮਹਗ੍ਗਤਾਰਮ੍ਮਣਂ ਸਦ੍ਧਂ ਉਪਨਿਸ੍ਸਾਯ ਦਾਨਂ ਦੇਤਿ, ਸੀਲਂ ਸਮਾਦਿਯਤਿ, ਉਪੋਸਥਕਮ੍ਮਂ ਕਰੋਤਿ, ਪਰਿਤ੍ਤਾਰਮ੍ਮਣਂ ਝਾਨਂ ਉਪ੍ਪਾਦੇਤਿ, ਵਿਪਸ੍ਸਨਂ… ਅਭਿਞ੍ਞਂ… ਸਮਾਪਤ੍ਤਿਂ ਉਪ੍ਪਾਦੇਤਿ, ਮਾਨਂ ਜਪ੍ਪੇਤਿ, ਦਿਟ੍ਠਿਂ ਗਣ੍ਹਾਤਿ. ਮਹਗ੍ਗਤਾਰਮ੍ਮਣਂ ਸੀਲਂ…ਪੇ… ਪਤ੍ਥਨਂ ਉਪਨਿਸ੍ਸਾਯ ਦਾਨਂ ਦੇਤਿ…ਪੇ… ਦਿਟ੍ਠਿਂ ਗਣ੍ਹਾਤਿ. ਮਹਗ੍ਗਤਾਰਮ੍ਮਣਾ ਸਦ੍ਧਾ…ਪੇ… ਪਤ੍ਥਨਾ ਪਰਿਤ੍ਤਾਰਮ੍ਮਣਾਯ ਸਦ੍ਧਾਯ…ਪੇ… ਪਤ੍ਥਨਾਯ ਕਾਯਿਕਸ੍ਸ ਸੁਖਸ੍ਸ, ਕਾਯਿਕਸ੍ਸ ਦੁਕ੍ਖਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੨)

ਮਹਗ੍ਗਤਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਮਹਗ੍ਗਤਾਰਮ੍ਮਣਂ ਸਦ੍ਧਂ ਉਪਨਿਸ੍ਸਾਯ ਅਪ੍ਪਮਾਣਾਰਮ੍ਮਣਂ ਝਾਨਂ ਉਪ੍ਪਾਦੇਤਿ, ਮਗ੍ਗਂ… ਅਭਿਞ੍ਞਂ… ਸਮਾਪਤ੍ਤਿਂ ਉਪ੍ਪਾਦੇਤਿ. ਮਹਗ੍ਗਤਾਰਮ੍ਮਣਂ ਸੀਲਂ…ਪੇ… ਪਤ੍ਥਨਂ ਉਪਨਿਸ੍ਸਾਯ ਅਪ੍ਪਮਾਣਾਰਮ੍ਮਣਂ ਝਾਨਂ ਉਪ੍ਪਾਦੇਤਿ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ. ਮਹਗ੍ਗਤਾਰਮ੍ਮਣਾ ਸਦ੍ਧਾ…ਪੇ… ਪਤ੍ਥਨਾ ਅਪ੍ਪਮਾਣਾਰਮ੍ਮਣਾਯ ਸਦ੍ਧਾਯ…ਪੇ… ਪਞ੍ਞਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ (੩)

੨੭. ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਅਪ੍ਪਮਾਣਾਰਮ੍ਮਣਂ ਸਦ੍ਧਂ ਉਪਨਿਸ੍ਸਾਯ ਅਪ੍ਪਮਾਣਾਰਮ੍ਮਣਂ ਝਾਨਂ ਉਪ੍ਪਾਦੇਤਿ, ਮਗ੍ਗਂ… ਅਭਿਞ੍ਞਂ… ਸਮਾਪਤ੍ਤਿਂ ਉਪ੍ਪਾਦੇਤਿ. ਅਪ੍ਪਮਾਣਾਰਮ੍ਮਣਂ ਸੀਲਂ…ਪੇ… ਪਞ੍ਞਂ ਉਪਨਿਸ੍ਸਾਯ ਅਪ੍ਪਮਾਣਾਰਮ੍ਮਣਂ ਝਾਨਂ ਉਪ੍ਪਾਦੇਤਿ. ਮਗ੍ਗਂ…ਪੇ… ਅਭਿਞ੍ਞਂ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ ਅਪ੍ਪਮਾਣਾਰਮ੍ਮਣਾ ਸਦ੍ਧਾ…ਪੇ… ਪਞ੍ਞਾ ਅਪ੍ਪਮਾਣਾਰਮ੍ਮਣਾਯ ਸਦ੍ਧਾਯ…ਪੇ… ਪਞ੍ਞਾਯ ਮਗ੍ਗਸ੍ਸ ਫਲਸਮਾਪਤ੍ਤਿਯਾ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੧)

ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਅਪ੍ਪਮਾਣਾਰਮ੍ਮਣਂ ਸਦ੍ਧਂ ਉਪਨਿਸ੍ਸਾਯ ਦਾਨਂ ਦੇਤਿ, ਸੀਲਂ ਸਮਾਦਿਯਤਿ, ਉਪੋਸਥਕਮ੍ਮਂ ਕਰੋਤਿ, ਪਰਿਤ੍ਤਾਰਮ੍ਮਣਂ ਝਾਨਂ ਉਪ੍ਪਾਦੇਤਿ, ਵਿਪਸ੍ਸਨਂ… ਅਭਿਞ੍ਞਂ… ਸਮਾਪਤ੍ਤਿਂ ਉਪ੍ਪਾਦੇਤਿ. ਅਪ੍ਪਮਾਣਾਰਮ੍ਮਣਂ ਸੀਲਂ…ਪੇ… ਪਞ੍ਞਂ ਉਪਨਿਸ੍ਸਾਯ ਦਾਨਂ ਦੇਤਿ…ਪੇ… ਸਮਾਪਤ੍ਤਿਂ ਉਪ੍ਪਾਦੇਤਿ. ਅਪ੍ਪਮਾਣਾਰਮ੍ਮਣਾ ਸਦ੍ਧਾ…ਪੇ… ਪਞ੍ਞਾ ਪਰਿਤ੍ਤਾਰਮ੍ਮਣਾਯ ਸਦ੍ਧਾਯ…ਪੇ… ਪਞ੍ਞਾਯ ਕਾਯਿਕਸ੍ਸ ਸੁਖਸ੍ਸ, ਕਾਯਿਕਸ੍ਸ ਦੁਕ੍ਖਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੨)

ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਅਪ੍ਪਮਾਣਾਰਮ੍ਮਣਂ ਸਦ੍ਧਂ ਉਪਨਿਸ੍ਸਾਯ ਮਹਗ੍ਗਤਾਰਮ੍ਮਣਂ ਝਾਨਂ ਉਪ੍ਪਾਦੇਤਿ, ਵਿਪਸ੍ਸਨਂ… ਅਭਿਞ੍ਞਂ… ਸਮਾਪਤ੍ਤਿਂ ਉਪ੍ਪਾਦੇਤਿ. ਅਪ੍ਪਮਾਣਾਰਮ੍ਮਣਂ ਸੀਲਂ…ਪੇ… ਪਞ੍ਞਂ ਉਪਨਿਸ੍ਸਾਯ ਮਹਗ੍ਗਤਾਰਮ੍ਮਣਂ ਝਾਨਂ ਉਪ੍ਪਾਦੇਤਿ, ਵਿਪਸ੍ਸਨਂ… ਅਭਿਞ੍ਞਂ… ਸਮਾਪਤ੍ਤਿਂ ਉਪ੍ਪਾਦੇਤਿ. ਅਪ੍ਪਮਾਣਾਰਮ੍ਮਣਾ ਸਦ੍ਧਾ…ਪੇ… ਪਞ੍ਞਾ ਮਹਗ੍ਗਤਾਰਮ੍ਮਣਾਯ ਸਦ੍ਧਾਯ…ਪੇ… ਪਞ੍ਞਾਯ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

ਆਸੇਵਨਪਚ੍ਚਯੋ

੨੮. ਪਰਿਤ੍ਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਆਸੇਵਨਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਪਰਿਤ੍ਤਾਰਮ੍ਮਣਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਪਰਿਤ੍ਤਾਰਮ੍ਮਣਾਨਂ ਖਨ੍ਧਾਨਂ ਆਸੇਵਨਪਚ੍ਚਯੇਨ ਪਚ੍ਚਯੋ. (੧)

ਪਰਿਤ੍ਤਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਆਸੇਵਨਪਚ੍ਚਯੇਨ ਪਚ੍ਚਯੋ – ਪਰਿਤ੍ਤਾਰਮ੍ਮਣਂ ਅਨੁਲੋਮਂ ਗੋਤ੍ਰਭੁਸ੍ਸ… ਅਨੁਲੋਮਂ ਵੋਦਾਨਸ੍ਸ ਆਸੇਵਨਪਚ੍ਚਯੇਨ ਪਚ੍ਚਯੋ. (੨)

੨੯. ਮਹਗ੍ਗਤਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਆਸੇਵਨਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਮਹਗ੍ਗਤਾਰਮ੍ਮਣਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਮਹਗ੍ਗਤਾਰਮ੍ਮਣਾਨਂ ਖਨ੍ਧਾਨਂ ਆਸੇਵਨਪਚ੍ਚਯੇਨ ਪਚ੍ਚਯੋ. (੧)

ਮਹਗ੍ਗਤਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਆਸੇਵਨਪਚ੍ਚਯੇਨ ਪਚ੍ਚਯੋ – ਮਹਗ੍ਗਤਾਰਮ੍ਮਣਂ ਅਨੁਲੋਮਂ ਗੋਤ੍ਰਭੁਸ੍ਸ… ਅਨੁਲੋਮਂ ਵੋਦਾਨਸ੍ਸ ਆਸੇਵਨਪਚ੍ਚਯੇਨ ਪਚ੍ਚਯੋ. (੨)

੩੦. ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਆਸੇਵਨਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਅਪ੍ਪਮਾਣਾਰਮ੍ਮਣਾ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਅਪ੍ਪਮਾਣਾਰਮ੍ਮਣਾਨਂ ਖਨ੍ਧਾਨਂ ਆਸੇਵਨਪਚ੍ਚਯੇਨ ਪਚ੍ਚਯੋ. ਗੋਤ੍ਰਭੁ ਮਗ੍ਗਸ੍ਸ… ਵੋਦਾਨਂ ਮਗ੍ਗਸ੍ਸ ਆਸੇਵਨਪਚ੍ਚਯੇਨ ਪਚ੍ਚਯੋ. (੧)

ਕਮ੍ਮਪਚ੍ਚਯੋ

੩੧. ਪਰਿਤ੍ਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਕਮ੍ਮਪਚ੍ਚਯੇਨ ਪਚ੍ਚਯੋ – ਸਹਜਾਤਾ, ਨਾਨਾਕ੍ਖਣਿਕਾ. ਸਹਜਾਤਾ – ਪਰਿਤ੍ਤਾਰਮ੍ਮਣਾ ਚੇਤਨਾ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. ਪਟਿਸਨ੍ਧਿਕ੍ਖਣੇ…ਪੇ…. ਨਾਨਾਕ੍ਖਣਿਕਾ – ਪਰਿਤ੍ਤਾਰਮ੍ਮਣਾ ਚੇਤਨਾ ਵਿਪਾਕਾਨਂ ਪਰਿਤ੍ਤਾਰਮ੍ਮਣਾਨਂ ਖਨ੍ਧਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. (੧)

ਮਹਗ੍ਗਤਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਕਮ੍ਮਪਚ੍ਚਯੇਨ ਪਚ੍ਚਯੋ – ਸਹਜਾਤਾ, ਨਾਨਾਕ੍ਖਣਿਕਾ. ਸਹਜਾਤਾ – ਮਹਗ੍ਗਤਾਰਮ੍ਮਣਾ ਚੇਤਨਾ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. ਪਟਿਸਨ੍ਧਿਕ੍ਖਣੇ…ਪੇ…. ਨਾਨਾਕ੍ਖਣਿਕਾ – ਮਹਗ੍ਗਤਾਰਮ੍ਮਣਾ ਚੇਤਨਾ ਵਿਪਾਕਾਨਂ ਮਹਗ੍ਗਤਾਰਮ੍ਮਣਾਨਂ ਖਨ੍ਧਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. (੧)

ਮਹਗ੍ਗਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਕਮ੍ਮਪਚ੍ਚਯੇਨ ਪਚ੍ਚਯੋ. ਨਾਨਾਕ੍ਖਣਿਕਾ – ਮਹਗ੍ਗਤਾਰਮ੍ਮਣਾ ਚੇਤਨਾ ਵਿਪਾਕਾਨਂ ਪਰਿਤ੍ਤਾਰਮ੍ਮਣਾਨਂ ਖਨ੍ਧਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. (੨)

੩੨. ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਕਮ੍ਮਪਚ੍ਚਯੇਨ ਪਚ੍ਚਯੋ – ਸਹਜਾਤਾ, ਨਾਨਾਕ੍ਖਣਿਕਾ. ਸਹਜਾਤਾ – ਅਪ੍ਪਮਾਣਾਰਮ੍ਮਣਾ ਚੇਤਨਾ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. ਨਾਨਾਕ੍ਖਣਿਕਾ – ਅਪ੍ਪਮਾਣਾਰਮ੍ਮਣਾ ਚੇਤਨਾ ਵਿਪਾਕਾਨਂ ਅਪ੍ਪਮਾਣਾਰਮ੍ਮਣਾਨਂ ਖਨ੍ਧਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. (੧)

ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਕਮ੍ਮਪਚ੍ਚਯੇਨ ਪਚ੍ਚਯੋ. ਨਾਨਾਕ੍ਖਣਿਕਾ – ਅਪ੍ਪਮਾਣਾਰਮ੍ਮਣਾ ਚੇਤਨਾ ਵਿਪਾਕਾਨਂ ਪਰਿਤ੍ਤਾਰਮ੍ਮਣਾਨਂ ਖਨ੍ਧਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ. (੨)

ਵਿਪਾਕਪਚ੍ਚਯਾਦਿ

੩੩. ਪਰਿਤ੍ਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਵਿਪਾਕਪਚ੍ਚਯੇਨ ਪਚ੍ਚਯੋ… ਆਹਾਰਪਚ੍ਚਯੇਨ ਪਚ੍ਚਯੋ… ਇਨ੍ਦ੍ਰਿਯਪਚ੍ਚਯੇਨ ਪਚ੍ਚਯੋ… ਝਾਨਪਚ੍ਚਯੇਨ ਪਚ੍ਚਯੋ… ਮਗ੍ਗਪਚ੍ਚਯੇਨ ਪਚ੍ਚਯੋ… ਸਮ੍ਪਯੁਤ੍ਤਪਚ੍ਚਯੇਨ ਪਚ੍ਚਯ… ਅਤ੍ਥਿਪਚ੍ਚਯੇਨ ਪਚ੍ਚਯੋ… ਨਤ੍ਥਿਪਚ੍ਚਯੇਨ ਪਚ੍ਚਯੋ… ਵਿਗਤਪਚ੍ਚਯੇਨ ਪਚ੍ਚਯ… ਅਵਿਗਤਪਚ੍ਚਯੇਨ ਪਚ੍ਚਯੋ.

੧. ਪਚ੍ਚਯਾਨੁਲੋਮਂ

੨. ਸਙ੍ਖ੍ਯਾਵਾਰੋ

੩੪. ਹੇਤੁਯਾ ਤੀਣਿ, ਆਰਮ੍ਮਣੇ ਸਤ੍ਤ, ਅਧਿਪਤਿਯਾ ਸਤ੍ਤ, ਅਨਨ੍ਤਰੇ ਨਵ, ਸਮਨਨ੍ਤਰੇ ਨਵ, ਸਹਜਾਤੇ ਤੀਣਿ, ਅਞ੍ਞਮਞ੍ਞੇ ਤੀਣਿ, ਨਿਸ੍ਸਯੇ ਤੀਣਿ, ਉਪਨਿਸ੍ਸਯੇ ਨਵ, ਆਸੇਵਨੇ ਪਞ੍ਚ, ਕਮ੍ਮੇ ਪਞ੍ਚ, ਵਿਪਾਕੇ ਤੀਣਿ, ਆਹਾਰੇ ਤੀਣਿ, ਇਨ੍ਦ੍ਰਿਯੇ ਝਾਨੇ ਮਗ੍ਗੇ ਸਮ੍ਪਯੁਤ੍ਤੇ ਅਤ੍ਥਿਯਾ ਤੀਣਿ, ਨਤ੍ਥਿਯਾ ਨਵ, ਵਿਗਤੇ ਨਵ, ਅਵਿਗਤੇ ਤੀਣਿ (ਏਵਂ ਗਣੇਤਬ੍ਬਂ).

ਅਨੁਲੋਮਂ.

ਪਚ੍ਚਨੀਯੁਦ੍ਧਾਰੋ

੩੫. ਪਰਿਤ੍ਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਸਹਜਾਤਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ… ਕਮ੍ਮਪਚ੍ਚਯੇਨ ਪਚ੍ਚਯੋ. (੧)

ਪਰਿਤ੍ਤਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੨)

ਪਰਿਤ੍ਤਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

੩੬. ਮਹਗ੍ਗਤਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਸਹਜਾਤਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੧)

ਮਹਗ੍ਗਤਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ… ਕਮ੍ਮਪਚ੍ਚਯੇਨ ਪਚ੍ਚਯੋ. (੨)

ਮਹਗ੍ਗਤਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

੩੭. ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਅਪ੍ਪਮਾਣਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਸਹਜਾਤਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੧)

ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਪਰਿਤ੍ਤਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ… ਕਮ੍ਮਪਚ੍ਚਯੇਨ ਪਚ੍ਚਯੋ. (੨)

ਅਪ੍ਪਮਾਣਾਰਮ੍ਮਣੋ ਧਮ੍ਮੋ ਮਹਗ੍ਗਤਾਰਮ੍ਮਣਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ… ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. (੩)

੨. ਪਚ੍ਚਯਪਚ੍ਚਨੀਯਂ

੨. ਸਙ੍ਖ੍ਯਾਵਾਰੋ

੩੮. ਨਹੇਤੁਯਾ ਨਵ, ਨਆਰਮ੍ਮਣੇ ਨਵ, ਨਅਧਿਪਤਿਯਾ ਨਵ, ਨਅਨਨ੍ਤਰੇ ਨਵ, ਨਸਮਨਨ੍ਤਰੇ ਨਵ, ਨਸਹਜਾਤੇ ਨਵ, ਨਅਞ੍ਞਮਞ੍ਞੇ ਨਵ, ਨਨਿਸ੍ਸਯੇ ਨਵ, ਨਉਪਨਿਸ੍ਸਯੇ ਸਤ੍ਤ, ਨਪੁਰੇਜਾਤੇ ਨਵ, ਨਪਚ੍ਛਾਜਾਤੇ ਨਵ, ਨਆਸੇਵਨੇ ਨਵ…ਪੇ… ਨਮਗ੍ਗੇ ਨਵ, ਨਸਮ੍ਪਯੁਤ੍ਤੇ ਨਵ, ਨਵਿਪ੍ਪਯੁਤ੍ਤੇ ਨਵ, ਨੋਅਤ੍ਥਿਯਾ ਨਵ, ਨੋਨਤ੍ਥਿਯਾ ਨਵ, ਨੋਵਿਗਤੇ ਨਵ, ਨੋਅਵਿਗਤੇ ਨਵ (ਏਵਂ ਗਣੇਤਬ੍ਬਂ).

ਪਚ੍ਚਨੀਯਂ.

੩. ਪਚ੍ਚਯਾਨੁਲੋਮਪਚ੍ਚਨੀਯਂ

ਨਹੇਤੁਦੁਕਂ

੩੯. ਹੇਤੁਪਚ੍ਚਯਾ ਨਆਰਮ੍ਮਣੇ ਤੀਣਿ, ਨਅਧਿਪਤਿਯਾ ਨਅਨਨ੍ਤਰੇ ਨਸਮਨਨ੍ਤਰੇ ਨਉਪਨਿਸ੍ਸਯੇ ਨਪੁਰੇਜਾਤੇ ਨਪਚ੍ਛਾਜਾਤੇ ਨਆਸੇਵਨੇ ਤੀਣਿ…ਪੇ… ਨਮਗ੍ਗੇ ਨਵਿਪ੍ਪਯੁਤ੍ਤੇ ਨੋਨਤ੍ਥਿਯਾ ਨੋਵਿਗਤੇ ਤੀਣਿ (ਏਵਂ ਗਣੇਤਬ੍ਬਂ).

ਅਨੁਲੋਮਪਚ੍ਚਨੀਯਂ.

੪. ਪਚ੍ਚਯਪਚ੍ਚਨੀਯਾਨੁਲੋਮਂ

ਹੇਤੁਦੁਕਂ

੪੦. ਨਹੇਤੁਪਚ੍ਚਯਾ ਆਰਮ੍ਮਣੇ ਸਤ੍ਤ, ਅਧਿਪਤਿਯਾ ਸਤ੍ਤ, ਅਨਨ੍ਤਰੇ ਨਵ, ਸਮਨਨ੍ਤਰੇ ਨਵ, ਸਹਜਾਤੇ ਤੀਣਿ, ਅਞ੍ਞਮਞ੍ਞੇ ਤੀਣਿ, ਨਿਸ੍ਸਯੇ ਤੀਣਿ, ਉਪਨਿਸ੍ਸਯੇ ਨਵ, ਆਸੇਵਨੇ ਪਞ੍ਚ, ਕਮ੍ਮੇ ਪਞ੍ਚ, ਵਿਪਾਕੇ ਤੀਣਿ…ਪੇ… ਸਮ੍ਪਯੁਤ੍ਤੇ ਤੀਣਿ, ਅਤ੍ਥਿਯਾ ਤੀਣਿ, ਨਤ੍ਥਿਯਾ ਨਵ, ਵਿਗਤੇ ਨਵ, ਅਵਿਗਤੇ ਤੀਣਿ (ਏਵਂ ਗਣੇਤਬ੍ਬਂ).

ਪਚ੍ਚਨੀਯਾਨੁਲੋਮਂ.

ਪਞ੍ਹਾਵਾਰੋ.

ਪਰਿਤ੍ਤਾਰਮ੍ਮਣਤ੍ਤਿਕਂ ਨਿਟ੍ਠਿਤਂ.