੨. ਸੁਤ੍ਤਸਾਧਨਂ

੨੯੮. ਨ ਵਤ੍ਤਬ੍ਬਂ – ‘‘ਅਤੀਤਾਨਾਗਤਾ ਖਨ੍ਧਾ ਧਾਤੁ ਆਯਤਨਂ ਨਤ੍ਥਿ ਚੇਤੇ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਤਯੋਮੇ, ਭਿਕ੍ਖਵੇ, ਨਿਰੁਤ੍ਤਿਪਥਾ ਅਧਿਵਚਨਪਥਾ ਪਞ੍ਞਤ੍ਤਿ…ਪੇ… ਵਿਞ੍ਞੂਹੀਤਿ…ਪੇ…’’. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤੀਤਾਨਾਗਤਾ ਖਨ੍ਧਾ ਧਾਤੁ ਆਯਤਨਂ ਨਤ੍ਥਿ ਚੇਤੇ’’ਤਿ.

ਅਤੀਤਾਨਾਗਤਾ ਖਨ੍ਧਾ ਧਾਤੁ ਆਯਤਨਂ ਨਤ੍ਥਿ ਚੇਤੇਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਯਂ ਕਿਞ੍ਚਿ, ਭਿਕ੍ਖਵੇ, ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ ਓਲ਼ਾਰਿਕਂ ਵਾ ਸੁਖੁਮਂ ਵਾ ਹੀਨਂ ਵਾ ਪਣੀਤਂ ਵਾ ਯਂ ਦੂਰੇ ਸਨ੍ਤਿਕੇ ਵਾ, ਅਯਂ ਵੁਚ੍ਚਤਿ ਰੂਪਕ੍ਖਨ੍ਧੋ. ਯਾ ਕਾਚਿ ਵੇਦਨਾ… ਯਾ ਕਾਚਿ ਸਞ੍ਞਾ… ਯੇ ਕੇਚਿ ਸਙ੍ਖਾਰਾ… ਯਂ ਕਿਞ੍ਚਿ ਵਿਞ੍ਞਾਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ…ਪੇ… ਅਯਂ ਵੁਚ੍ਚਤਿ ਵਿਞ੍ਞਾਣਕ੍ਖਨ੍ਧੋ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤੀਤਾਨਾਗਤਾ ਖਨ੍ਧਾ ਧਾਤੁ ਆਯਤਨਂ ਨਤ੍ਥਿ ਚੇਤੇ’’ਤਿ.

ਅਤੀਤਕ੍ਖਨ੍ਧਾਦਿਕਥਾ ਨਿਟ੍ਠਿਤਾ.