੨੩. ਤੇਵੀਸਤਿਮਵਗ੍ਗੋ

(੨੧੮) ੧. ਏਕਾਧਿਪ੍ਪਾਯਕਥਾ

੯੦੮. ਏਕਾਧਿਪ੍ਪਾਯੇਨ ਮੇਥੁਨੋ ਧਮ੍ਮੋ ਪਟਿਸੇਵਿਤਬ੍ਬੋਤਿ? ਆਮਨ੍ਤਾ. ਏਕਾਧਿਪ੍ਪਾਯੇਨ ਅਸ੍ਸਮਣੇਨ ਹੋਤਬ੍ਬਂ, ਅਭਿਕ੍ਖੁਨਾ ਹੋਤਬ੍ਬਂ, ਛਿਨ੍ਨਮੂਲੇਨ ਹੋਤਬ੍ਬਂ ਪਾਰਾਜਿਕੇਨ ਹੋਤਬ੍ਬਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਏਕਾਧਿਪ੍ਪਾਯੇਨ ਮੇਥੁਨੋ ਧਮ੍ਮੋ ਪਟਿਸੇਵਿਤਬ੍ਬੋਤਿ? ਆਮਨ੍ਤਾ. ਏਕਾਧਿਪ੍ਪਾਯੇਨ ਪਾਣੋ ਹਨ੍ਤਬ੍ਬੋ, ਅਦਿਨ੍ਨਂ ਆਦਿਯਿਤਬ੍ਬਂ, ਮੁਸਾ ਭਣਿਤਬ੍ਬਾ, ਪਿਸੁਣਂ ਭਣਿਤਬ੍ਬਂ, ਫਰੁਸਂ ਭਣਿਤਬ੍ਬਂ, ਸਮ੍ਫਂ ਪਲਪਿਤਬ੍ਬਂ, ਸਨ੍ਧਿ ਛੇਦਿਤਬ੍ਬੋ, ਨਿਲ੍ਲੋਪਂ ਹਾਤਬ੍ਬਂ, ਏਕਾਗਾਰਿਕਂ ਕਾਤਬ੍ਬਂ, ਪਰਿਪਨ੍ਥੇ ਠਾਤਬ੍ਬਂ, ਪਰਦਾਰੋ ਗਨ੍ਤਬ੍ਬੋ, ਗਾਮਘਾਤਕੋ ਕਾਤਬ੍ਬੋ, ਨਿਗਮਘਾਤਕੋ ਕਾਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਏਕਾਧਿਪ੍ਪਾਯਕਥਾ ਨਿਟ੍ਠਿਤਾ.

੨੩. ਤੇਵੀਸਤਿਮਵਗ੍ਗੋ

(੨੧੯) ੨. ਅਰਹਨ੍ਤਵਣ੍ਣਕਥਾ

੯੦੯. ਅਰਹਨ੍ਤਾਨਂ ਵਣ੍ਣੇਨ ਅਮਨੁਸ੍ਸਾ ਮੇਥੁਨਂ ਧਮ੍ਮਂ ਪਟਿਸੇਵਨ੍ਤੀਤਿ? ਆਮਨ੍ਤਾ. ਅਰਹਨ੍ਤਾਨਂ ਵਣ੍ਣੇਨ ਅਮਨੁਸ੍ਸਾ ਪਾਣਂ ਹਨਨ੍ਤਿ…ਪੇ… ਅਦਿਨ੍ਨਂ ਆਦਿਯਨ੍ਤਿ, ਮੁਸਾ ਭਣਨ੍ਤਿ, ਪਿਸੁਣਂ ਭਣਨ੍ਤਿ, ਫਰੁਸਂ ਭਣਨ੍ਤਿ, ਸਮ੍ਫਂ ਪਲਪਨ੍ਤਿ, ਸਨ੍ਧਿਂ ਛਿਨ੍ਦਨ੍ਤਿ, ਨਿਲ੍ਲੋਪਂ ਹਰਨ੍ਤਿ, ਏਕਾਗਾਰਿਕਂ ਕਰੋਨ੍ਤਿ, ਪਰਿਪਨ੍ਥੇ ਤਿਟ੍ਠਨ੍ਤਿ, ਪਰਦਾਰਂ ਗਚ੍ਛਨ੍ਤਿ, ਗਾਮਘਾਤਕਂ ਕਰੋਨ੍ਤਿ…ਪੇ… ਨਿਗਮਘਾਤਕਂ ਕਰੋਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰਹਨ੍ਤਵਣ੍ਣਕਥਾ ਨਿਟ੍ਠਿਤਾ.

੨੩. ਤੇਵੀਸਤਿਮਵਗ੍ਗੋ

(੨੨੦-੪) ੩-੭. ਇਸ੍ਸਰਿਯਕਾਮਕਾਰਿਕਾਦਿਕਥਾ

੯੧੦. ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਵਿਨਿਪਾਤਂ ਗਚ੍ਛਤੀਤਿ? ਆਮਨ੍ਤਾ. ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਨਿਰਯਂ ਗਚ੍ਛਤਿ, ਸਞ੍ਜੀਵਂ ਗਚ੍ਛਤਿ, ਕਾਲਸੁਤ੍ਤਂ ਗਚ੍ਛਤਿ, ਤਾਪਨਂ ਗਚ੍ਛਤਿ, ਮਹਾਤਾਪਨਂ [ਪਤਾਪਨਂ (ਸੀ. ਸ੍ਯਾ. ਕਂ. ਪੀ.)] ਗਚ੍ਛਤਿ, ਸਙ੍ਘਾਤਕਂ ਗਚ੍ਛਤਿ, ਰੋਰੁਵਂ ਗਚ੍ਛਤਿ…ਪੇ… ਅਵੀਚਿਂ ਗਚ੍ਛਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਵਿਨਿਪਾਤਂ ਗਚ੍ਛਤੀਤਿ? ਆਮਨ੍ਤਾ. ‘‘ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਵਿਨਿਪਾਤਂ ਗਚ੍ਛਤੀ’’ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਨਤ੍ਥਿ. ਹਞ੍ਚਿ ‘‘ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਵਿਨਿਪਾਤਂ ਗਚ੍ਛਤੀ’’ਤਿ – ਨਤ੍ਥੇਵ ਸੁਤ੍ਤਨ੍ਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਵਿਨਿਪਾਤਂ ਗਚ੍ਛਤੀ’’ਤਿ.

੯੧੧. ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਗਬ੍ਭਸੇਯ੍ਯਂ ਓਕ੍ਕਮਤੀਤਿ? ਆਮਨ੍ਤਾ. ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਨਿਰਯਂ ਉਪਪਜ੍ਜੇਯ੍ਯ, ਤਿਰਚ੍ਛਾਨਯੋਨਿਂ ਉਪਪਜ੍ਜੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਗਬ੍ਭਸੇਯ੍ਯਂ ਓਕ੍ਕਮਤੀਤਿ? ਆਮਨ੍ਤਾ. ਬੋਧਿਸਤ੍ਤੋ ਇਦ੍ਧਿਮਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਬੋਧਿਸਤ੍ਤੋ ਇਦ੍ਧਿਮਾਤਿ? ਆਮਨ੍ਤਾ. ਬੋਧਿਸਤ੍ਤੇਨ ਛਨ੍ਦਿਦ੍ਧਿਪਾਦੋ ਭਾਵਿਤੋ…ਪੇ… ਵੀਰਿਯਿਦ੍ਧਿਪਾਦੋ…ਪੇ… ਚਿਤ੍ਤਿਦ੍ਧਿਪਾਦੋ…ਪੇ… ਵੀਮਂਸਿਦ੍ਧਿਪਾਦੋ ਭਾਵਿਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਗਬ੍ਭਸੇਯ੍ਯਂ ਓਕ੍ਕਮਤੀਤਿ? ਆਮਨ੍ਤਾ. ‘‘ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਗਬ੍ਭਸੇਯ੍ਯਂ ਓਕ੍ਕਮਤੀ’’ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਨਤ੍ਥਿ. ਹਞ੍ਚਿ ‘‘ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਗਬ੍ਭਸੇਯ੍ਯਂ ਓਕ੍ਕਮਤੀ’’ਤਿ – ਨਤ੍ਥੇਵ ਸੁਤ੍ਤਨ੍ਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਗਬ੍ਭਸੇਯ੍ਯਂ ਓਕ੍ਕਮਤੀ’’ਤਿ.

੯੧੨. ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਦੁਕ੍ਕਰਕਾਰਿਕਂ ਅਕਾਸੀਤਿ? ਆਮਨ੍ਤਾ. ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ‘‘ਸਸ੍ਸਤੋ ਲੋਕੋ’’ਤਿ ਪਚ੍ਚਾਗਚ੍ਛਿ, ‘‘ਅਸਸ੍ਸਤੋ ਲੋਕੋ’’ਤਿ…ਪੇ… ‘‘ਅਨ੍ਤਵਾ ਲੋਕੋ’’ਤਿ…ਪੇ… ‘‘ਅਨਨ੍ਤਵਾ ਲੋਕੋ’’ਤਿ… ‘‘ਤਂ ਜੀਵਂ ਤਂ ਸਰੀਰ’’ਨ੍ਤਿ … ‘‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’’ਨ੍ਤਿ… ‘‘ਹੋਤਿ ਤਥਾਗਤੋ ਪਰਂ ਮਰਣਾ’’ਤਿ… ‘‘ਨ ਹੋਤਿ ਤਥਾਗਤੋ ਪਰਂ ਮਰਣਾ’’ਤਿ… ‘‘ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾ’’ਤਿ…ਪੇ… ‘‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’’ਤਿ ਪਚ੍ਚਾਗਚ੍ਛੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਦੁਕ੍ਕਰਕਾਰਿਕਂ ਅਕਾਸੀਤਿ? ਆਮਨ੍ਤਾ. ‘‘ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਦੁਕ੍ਕਰਕਾਰਿਕਂ ਅਕਾਸੀ’’ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਨਤ੍ਥਿ. ਹਞ੍ਚਿ ‘‘ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਦੁਕ੍ਕਰਕਾਰਿਕਂ ਅਕਾਸੀ’’ਤਿ – ਨਤ੍ਥੇਵ ਸੁਤ੍ਤਨ੍ਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਦੁਕ੍ਕਰਕਾਰਿਕਂ ਅਕਾਸੀ’’ਤਿ.

੯੧੩. ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਅਪਰਨ੍ਤਪਂ [ਅਮਰਂ ਤਪਂ (ਸਂ. ਨਿ. ੧.੧੩੭)] ਅਕਾਸਿ, ਅਞ੍ਞਂ ਸਤ੍ਥਾਰਂ ਉਦ੍ਦਿਸੀਤਿ? ਆਮਨ੍ਤਾ. ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ‘‘ਸਸ੍ਸਤੋ ਲੋਕੋ’’ਤਿ ਪਚ੍ਚਾਗਚ੍ਛਿ…ਪੇ… ‘‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’’ਤਿ ਪਚ੍ਚਾਗਚ੍ਛੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੯੧੪. ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਅਞ੍ਞਂ ਸਤ੍ਥਾਰਂ ਉਦ੍ਦਿਸੀਤਿ? ਆਮਨ੍ਤਾ. ‘‘ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਅਞ੍ਞਂ ਸਤ੍ਥਾਰਂ ਉਦ੍ਦਿਸੀ’’ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਨਤ੍ਥਿ. ਹਞ੍ਚਿ ‘‘ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਅਞ੍ਞਂ ਸਤ੍ਥਾਰਂ ਉਦ੍ਦਿਸੀ’’ਤਿ – ਨਤ੍ਥੇਵ ਸੁਤ੍ਤਨ੍ਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਅਞ੍ਞਂ ਸਤ੍ਥਾਰਂ ਉਦ੍ਦਿਸੀ’’ਤਿ.

ਇਸ੍ਸਰਿਯਕਾਮਕਾਰਿਕਾਕਥਾ ਨਿਟ੍ਠਿਤਾ.

੨੩. ਤੇਵੀਸਤਿਮਵਗ੍ਗੋ

(੨੨੫) ੮. ਪਤਿਰੂਪਕਥਾ

੯੧੫. ਅਤ੍ਥਿ ਨ ਰਾਗੋ ਰਾਗਪਤਿਰੂਪਕੋਤਿ? ਆਮਨ੍ਤਾ. ਅਤ੍ਥਿ ਨ ਫਸ੍ਸੋ ਫਸ੍ਸਪਤਿਰੂਪਕੋ, ਅਤ੍ਥਿ ਨ ਵੇਦਨਾ ਵੇਦਨਾਪਤਿਰੂਪਿਕਾ, ਅਤ੍ਥਿ ਨ ਸਞ੍ਞਾ ਸਞ੍ਞਾਪਤਿਰੂਪਿਕਾ, ਅਤ੍ਥਿ ਨ ਚੇਤਨਾ ਚੇਤਨਾਪਤਿਰੂਪਿਕਾ, ਅਤ੍ਥਿ ਨ ਚਿਤ੍ਤਂ ਚਿਤ੍ਤਪਤਿਰੂਪਕਂ, ਅਤ੍ਥਿ ਨ ਸਦ੍ਧਾ ਸਦ੍ਧਾਪਤਿਰੂਪਿਕਾ, ਅਤ੍ਥਿ ਨ ਵੀਰਿਯਂ ਵੀਰਿਯਪਤਿਰੂਪਕਂ, ਅਤ੍ਥਿ ਨ ਸਤਿ ਸਤਿਪਤਿਰੂਪਿਕਾ, ਅਤ੍ਥਿ ਨ ਸਮਾਧਿ ਸਮਾਧਿਪਤਿਰੂਪਕੋ, ਅਤ੍ਥਿ ਨ ਪਞ੍ਞਾ ਪਞ੍ਞਾਪਤਿਰੂਪਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੯੧੬. ਅਤ੍ਥਿ ਨ ਦੋਸੋ ਦੋਸਪਤਿਰੂਪਕੋ, ਅਤ੍ਥਿ ਨ ਮੋਹੋ ਮੋਹਪਤਿਰੂਪਕੋ, ਅਤ੍ਥਿ ਨ ਕਿਲੇਸੋ ਕਿਲੇਸਪਤਿਰੂਪਕੋਤਿ? ਆਮਨ੍ਤਾ. ਅਤ੍ਥਿ ਨ ਫਸ੍ਸੋ ਫਸ੍ਸਪਤਿਰੂਪਕੋ…ਪੇ… ਅਤ੍ਥਿ ਨ ਪਞ੍ਞਾ ਪਞ੍ਞਾਪਤਿਰੂਪਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਤਿਰੂਪਕਥਾ ਨਿਟ੍ਠਿਤਾ.

੨੩. ਤੇਵੀਸਤਿਮਵਗ੍ਗੋ

(੨੨੬) ੯. ਅਪਰਿਨਿਪ੍ਫਨ੍ਨਕਥਾ

੯੧੭. ਰੂਪਂ ਅਪਰਿਨਿਪ੍ਫਨ੍ਨਨ੍ਤਿ? ਆਮਨ੍ਤਾ. ਰੂਪਂ ਨ ਅਨਿਚ੍ਚਂ ਨ ਸਙ੍ਖਤਂ ਨ ਪਟਿਚ੍ਚਸਮੁਪ੍ਪਨ੍ਨਂ ਨ ਖਯਧਮ੍ਮਂ ਨ ਵਯਧਮ੍ਮਂ ਨ ਵਿਰਾਗਧਮ੍ਮਂ ਨ ਨਿਰੋਧਧਮ੍ਮਂ ਨ ਵਿਪਰਿਣਾਮਧਮ੍ਮਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਰੂਪਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ ਖਯਧਮ੍ਮਂ ਵਯਧਮ੍ਮਂ ਵਿਰਾਗਧਮ੍ਮਂ ਨਿਰੋਧਧਮ੍ਮਂ ਵਿਪਰਿਣਾਮਧਮ੍ਮਨ੍ਤਿ? ਆਮਨ੍ਤਾ. ਹਞ੍ਚਿ ਰੂਪਂ ਅਨਿਚ੍ਚਂ ਸਙ੍ਖਤਂ…ਪੇ… ਵਿਪਰਿਣਾਮਧਮ੍ਮਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਰੂਪਂ ਅਪਰਿਨਿਪ੍ਫਨ੍ਨ’’ਨ੍ਤਿ.

ਦੁਕ੍ਖਞ੍ਞੇਵ ਪਰਿਨਿਪ੍ਫਨ੍ਨਨ੍ਤਿ? ਆਮਨ੍ਤਾ. ਨਨੁ ਯਦਨਿਚ੍ਚਂ ਤਂ ਦੁਕ੍ਖਂ [ਸਂ. ਨਿ. ੩.੧੫] ਵੁਤ੍ਤਂ ਭਗਵਤਾ – ‘‘ਰੂਪਂ ਅਨਿਚ੍ਚ’’ਨ੍ਤਿ? ਆਮਨ੍ਤਾ. ਹਞ੍ਚਿ ਯਦਨਿਚ੍ਚਂ ਤਂ ਦੁਕ੍ਖਂ ਵੁਤ੍ਤਂ ਭਗਵਤਾ – ‘‘ਰੂਪਂ ਅਨਿਚ੍ਚਂ’’, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਦੁਕ੍ਖਞ੍ਞੇਵ ਪਰਿਨਿਪ੍ਫਨ੍ਨ’’ਨ੍ਤਿ…ਪੇ….

੯੧੮. ਵੇਦਨਾ …ਪੇ… ਸਞ੍ਞਾ… ਸਙ੍ਖਾਰਾ… ਵਿਞ੍ਞਾਣਂ… ਚਕ੍ਖਾਯਤਨਂ…ਪੇ… ਧਮ੍ਮਾਯਤਨਂ… ਚਕ੍ਖੁਧਾਤੁ… ਧਮ੍ਮਧਾਤੁ… ਚਕ੍ਖੁਨ੍ਦ੍ਰਿਯਂ…ਪੇ… ਅਞ੍ਞਾਤਾਵਿਨ੍ਦ੍ਰਿਯਂ ਅਪਰਿਨਿਪ੍ਫਨ੍ਨਨ੍ਤਿ? ਆਮਨ੍ਤਾ. ਅਞ੍ਞਾਤਾਵਿਨ੍ਦ੍ਰਿਯਂ ਨ ਅਨਿਚ੍ਚਂ…ਪੇ… ਨ ਵਿਪਰਿਣਾਮਧਮ੍ਮਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਞ੍ਞਾਤਾਵਿਨ੍ਦ੍ਰਿਯਂ ਅਨਿਚ੍ਚਂ ਸਙ੍ਖਤਂ…ਪੇ… ਵਿਪਰਿਣਾਮਧਮ੍ਮਨ੍ਤਿ? ਆਮਨ੍ਤਾ. ਹਞ੍ਚਿ ਅਞ੍ਞਾਤਾਵਿਨ੍ਦ੍ਰਿਯਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ ਖਯਧਮ੍ਮਂ ਵਯਧਮ੍ਮਂ ਵਿਰਾਗਧਮ੍ਮਂ ਨਿਰੋਧਧਮ੍ਮਂ ਵਿਪਰਿਣਾਮਧਮ੍ਮਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਞ੍ਞਾਤਾਵਿਨ੍ਦ੍ਰਿਯਂ ਅਪਰਿਨਿਪ੍ਫਨ੍ਨ’’ਨ੍ਤਿ.

ਦੁਕ੍ਖਞ੍ਞੇਵ ਪਰਿਨਿਪ੍ਫਨ੍ਨਨ੍ਤਿ? ਆਮਨ੍ਤਾ. ਨਨੁ ਯਦਨਿਚ੍ਚਂ ਤਂ ਦੁਕ੍ਖਂ ਵੁਤ੍ਤਂ ਭਗਵਤਾ – ‘‘ਅਞ੍ਞਾਤਾਵਿਨ੍ਦ੍ਰਿਯਂ ਅਨਿਚ੍ਚ’’ਨ੍ਤਿ? ਆਮਨ੍ਤਾ. ਹਞ੍ਚਿ ਯਦਨਿਚ੍ਚਂ ਤਂ ਦੁਕ੍ਖਂ ਵੁਤ੍ਤਂ ਭਗਵਤਾ – ‘‘ਅਞ੍ਞਾਤਾਵਿਨ੍ਦ੍ਰਿਯਂ ਅਨਿਚ੍ਚਂ’’, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਦੁਕ੍ਖਞ੍ਞੇਵ ਪਰਿਨਿਪ੍ਫਨ੍ਨ’’ਨ੍ਤਿ.

ਅਪਰਿਨਿਪ੍ਫਨ੍ਨਕਥਾ ਨਿਟ੍ਠਿਤਾ.

ਤੇਵੀਸਤਿਮਵਗ੍ਗੋ.

ਤਸ੍ਸੁਦ੍ਦਾਨਂ –

ਏਕਾਧਿਪ੍ਪਾਯੇਨ ਮੇਥੁਨੋ ਧਮ੍ਮੋ ਪਟਿਸੇਵਿਤਬ੍ਬੋ, ਅਰਹਨ੍ਤਾਨਂ ਵਣ੍ਣੇਨ ਅਮਨੁਸ੍ਸਾ ਮੇਥੁਨਂ ਧਮ੍ਮਂ ਪਟਿਸੇਵਨ੍ਤਿ, ਬੋਧਿਸਤ੍ਤੋ ਇਸ੍ਸਰਿਯਕਾਮਕਾਰਿਕਾਹੇਤੁ ਵਿਨਿਪਾਤਂ ਗਚ੍ਛਤਿ, ਗਬ੍ਭਸੇਯ੍ਯਂ ਓਕ੍ਕਮਤਿ, ਦੁਕ੍ਕਰਕਾਰਿਕਂ ਅਕਾਸਿ, ਅਪਰਨ੍ਤਪਂ ਅਕਾਸਿ, ਅਞ੍ਞਂ ਸਤ੍ਥਾਰਂ ਉਦ੍ਦਿਸਿ, ਅਤ੍ਥਿ ਨ ਰਾਗੋ ਰਾਗਪਤਿਰੂਪਕੋ ਅਤ੍ਥਿ ਨ ਦੋਸੋ ਦੋਸਪਤਿਰੂਪਕੋ ਅਤ੍ਥਿ ਨ ਮੋਹੋ ਮੋਹਪਤਿਰੂਪਕੋ ਅਤ੍ਥਿ ਨ ਕਿਲੇਸੋ ਕਿਲੇਸਪਤਿਰੂਪਕੋ, ਰੂਪਂ ਅਪਰਿਨਿਪ੍ਫਨ੍ਨਂ ਅਞ੍ਞਾਤਾਵਿਨ੍ਦ੍ਰਿਯਂ ਅਪਰਿਨਿਪ੍ਫਨ੍ਨਨ੍ਤਿ.

ਖੁਦ੍ਦਕੋ ਅਡ੍ਢਪਣ੍ਣਾਸਕੋ.

ਤਸ੍ਸੁਦ੍ਦਾਨਂ –

ਨਵਂ, ਨਿਬ੍ਬੁਤਿ, ਏਕਾਧਿਪ੍ਪਾਯੋਤਿ.

ਪਣ੍ਣਾਸਕੁਦ੍ਦਾਨਂ –

ਮਹਾਨਿਯਾਮੋ, ਅਨੁਸਯਾ, ਨਿਗ੍ਗਹੋ, ਖੁਦ੍ਦਕਪਞ੍ਚਮੋ;

ਪਰਪ੍ਪਵਾਦਮਦ੍ਦਨਾ, ਸੁਤ੍ਤਮੂਲਸਮਾਹਿਤਾ;

ਉਜ੍ਜੋਤਨਾ ਸਤ੍ਥੁਸਮਯੇ, ਕਥਾਵਤ੍ਥੁਪਕਰਣੇਤਿ.

ਪਞ੍ਚਤ੍ਤਿਂਸਭਾਣਵਾਰਂ

ਕਥਾਵਤ੍ਥੁਪਕਰਣਂ ਨਿਟ੍ਠਿਤਂ.