੨੨. ਬਾਵੀਸਤਿਮਵਗ੍ਗੋ

(੨੦੯) ੨. ਕੁਸਲਚਿਤ੍ਤਕਥਾ

੮੯੪. ਅਰਹਾ ਕੁਸਲਚਿਤ੍ਤੋ ਪਰਿਨਿਬ੍ਬਾਯਤੀਤਿ? ਆਮਨ੍ਤਾ. ਅਰਹਾ ਪੁਞ੍ਞਾਭਿਸਙ੍ਖਾਰਂ ਅਭਿਸਙ੍ਖਰੋਨ੍ਤੋ… ਆਨੇਞ੍ਜਾਭਿਸਙ੍ਖਾਰਂ ਅਭਿਸਙ੍ਖਰੋਨ੍ਤੋ… ਗਤਿਸਂਵਤ੍ਤਨਿਯਂ ਕਮ੍ਮਂ ਕਰੋਨ੍ਤੋ… ਭਵਸਂਵਤ੍ਤਨਿਯਂ ਕਮ੍ਮਂ ਕਰੋਨ੍ਤੋ… ਇਸ੍ਸਰਿਯਸਂਵਤ੍ਤਨਿਯਂ ਕਮ੍ਮਂ ਕਰੋਨ੍ਤੋ… ਅਧਿਪਚ੍ਚਸਂਵਤ੍ਤਨਿਯਂ ਕਮ੍ਮਂ ਕਰੋਨ੍ਤੋ… ਮਹਾਭੋਗਸਂਵਤ੍ਤਨਿਯਂ ਕਮ੍ਮਂ ਕਰੋਨ੍ਤੋ… ਮਹਾਪਰਿਵਾਰਸਂਵਤ੍ਤਨਿਯਂ ਕਮ੍ਮਂ ਕਰੋਨ੍ਤੋ… ਦੇਵਸੋਭਗ੍ਯਸਂਵਤ੍ਤਨਿਯਂ ਕਮ੍ਮਂ ਕਰੋਨ੍ਤੋ… ਮਨੁਸ੍ਸਸੋਭਗ੍ਯਸਂਵਤ੍ਤਨਿਯਂ ਕਮ੍ਮਂ ਕਰੋਨ੍ਤੋ ਪਰਿਨਿਬ੍ਬਾਯਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰਹਾ ਕੁਸਲਚਿਤ੍ਤੋ ਪਰਿਨਿਬ੍ਬਾਯਤੀਤਿ? ਆਮਨ੍ਤਾ. ਅਰਹਾ ਆਚਿਨਨ੍ਤੋ ਅਪਚਿਨਨ੍ਤੋ ਪਜਹਨ੍ਤੋ ਉਪਾਦਿਯਨ੍ਤੋ ਵਿਸਿਨੇਨ੍ਤੋ ਉਸ੍ਸਿਨੇਨ੍ਤੋ ਵਿਧੂਪੇਨ੍ਤੋ ਸਨ੍ਧੂਪੇਨ੍ਤੋ ਪਰਿਨਿਬ੍ਬਾਯਤੀਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਨਨੁ ਅਰਹਾ ਨੇਵਾਚਿਨਾਤਿ ਨ ਅਪਚਿਨਾਤਿ ਅਪਚਿਨਿਤ੍ਵਾ ਠਿਤੋਤਿ? ਆਮਨ੍ਤਾ. ਹਞ੍ਚਿ ਅਰਹਾ ਨੇਵਾਚਿਨਾਤਿ ਨ ਅਪਚਿਨਾਤਿ ਅਪਚਿਨਿਤ੍ਵਾ ਠਿਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਰਹਾ ਕੁਸਲਚਿਤ੍ਤੋ ਪਰਿਨਿਬ੍ਬਾਯਤੀ’’ਤਿ. ਨਨੁ ਅਰਹਾ ਨੇਵ ਪਜਹਤਿ ਨ ਉਪਾਦਿਯਤਿ ਪਜਹਿਤ੍ਵਾ ਠਿਤੋ, ਨੇਵ ਵਿਸਿਨੇਤਿ ਨ ਉਸ੍ਸਿਨੇਤਿ ਵਿਸਿਨੇਤ੍ਵਾ ਠਿਤੋ; ਨਨੁ ਅਰਹਾ ਨੇਵ ਵਿਧੂਪੇਤਿ ਨ ਸਨ੍ਧੂਪੇਤਿ ਵਿਧੂਪੇਤ੍ਵਾ ਠਿਤੋਤਿ? ਆਮਨ੍ਤਾ. ਹਞ੍ਚਿ ਅਰਹਾ ਨੇਵ ਵਿਧੂਪੇਤਿ ਨ ਸਨ੍ਧੂਪੇਤਿ ਵਿਧੂਪੇਤ੍ਵਾ ਠਿਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਰਹਾ ਕੁਸਲਚਿਤ੍ਤੋ ਪਰਿਨਿਬ੍ਬਾਯਤੀ’’ਤਿ.

੮੯੫. ਨ ਵਤ੍ਤਬ੍ਬਂ – ‘‘ਅਰਹਾ ਕੁਸਲਚਿਤ੍ਤੋ ਪਰਿਨਿਬ੍ਬਾਯਤੀ’’ਤਿ? ਆਮਨ੍ਤਾ. ਨਨੁ ਅਰਹਾ ਉਪਟ੍ਠਿਤਸ੍ਸਤਿ ਸਤੋ ਸਮ੍ਪਜਾਨੋ ਪਰਿਨਿਬ੍ਬਾਯਤੀਤਿ? ਆਮਨ੍ਤਾ. ਹਞ੍ਚਿ ਅਰਹਾ ਉਪਟ੍ਠਿਤਸ੍ਸਤਿ ਸਤੋ ਸਮ੍ਪਜਾਨੋ ਪਰਿਨਿਬ੍ਬਾਯਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਰਹਾ ਕੁਸਲਚਿਤ੍ਤੋ ਪਰਿਨਿਬ੍ਬਾਯਤੀ’’ਤਿ.

ਕੁਸਲਚਿਤ੍ਤਕਥਾ ਨਿਟ੍ਠਿਤਾ.