੧. ਸੁਦ੍ਧਬ੍ਰਹ੍ਮਚਰਿਯਕਥਾ

੨੬੯. ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਸਬ੍ਬੇ ਦੇਵਾ ਜਲ਼ਾ ਏਲਮੂਗਾ [ਏਲ਼ਮੂਗਾ (ਸ੍ਯਾ.)] ਅਵਿਞ੍ਞੂ ਹਤ੍ਥਸਂਵਾਚਿਕਾ ਨਪ੍ਪਟਿਬਲਾ ਸੁਭਾਸਿਤਦੁਬ੍ਭਾਸਿਤਾਨਂ ਅਤ੍ਥਮਞ੍ਞਾਤੁਂ, ਸਬ੍ਬੇ ਦੇਵਾ ਨ ਬੁਦ੍ਧੇ ਪਸਨ੍ਨਾ ਨ ਧਮ੍ਮੇ ਪਸਨ੍ਨਾ ਨ ਸਙ੍ਘੇ ਪਸਨ੍ਨਾ, ਨ ਬੁਦ੍ਧਂ ਭਗਵਨ੍ਤਂ ਪਯਿਰੁਪਾਸਨ੍ਤਿ, ਨ ਬੁਦ੍ਧਂ ਭਗਵਨ੍ਤਂ ਪਞ੍ਹਂ ਪੁਚ੍ਛਨ੍ਤਿ, ਨ ਬੁਦ੍ਧੇਨ ਭਗਵਤਾ ਪਞ੍ਹੇ ਵਿਸ੍ਸਜ੍ਜਿਤੇ ਅਤ੍ਤਮਨਾ, ਸਬ੍ਬੇ ਦੇਵਾ ਕਮ੍ਮਾਵਰਣੇਨ ਸਮਨ੍ਨਾਗਤਾ ਕਿਲੇਸਾਵਰਣੇਨ ਸਮਨ੍ਨਾਗਤਾ ਵਿਪਾਕਾਵਰਣੇਨ ਸਮਨ੍ਨਾਗਤਾ ਅਸ੍ਸਦ੍ਧਾ ਅਚ੍ਛਨ੍ਦਿਕਾ ਦੁਪ੍ਪਞ੍ਞਾ ਅਭਬ੍ਬਾ ਨਿਯਾਮਂ ਓਕ੍ਕਮਿਤੁਂ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤਂ, ਸਬ੍ਬੇ ਦੇਵਾ ਮਾਤੁਘਾਤਕਾ ਪਿਤੁਘਾਤਕਾ ਅਰਹਨ੍ਤਘਾਤਕਾ ਰੁਹਿਰੁਪ੍ਪਾਦਕਾ ਸਙ੍ਘਭੇਦਕਾ, ਸਬ੍ਬੇ ਦੇਵਾ ਪਾਣਾਤਿਪਾਤਿਨੋ ਅਦਿਨ੍ਨਾਦਾਯਿਨੋ ਕਾਮੇਸੁਮਿਚ੍ਛਾਚਾਰਿਨੋ ਮੁਸਾਵਾਦਿਨੋ ਪਿਸੁਣਵਾਚਾ ਫਰੁਸਾਵਾਚਾ ਸਮ੍ਫਪ੍ਪਲਾਪਿਨੋ ਅਭਿਜ੍ਝਾਲੁਨੋ ਬ੍ਯਾਪਨ੍ਨਚਿਤ੍ਤਾ ਮਿਚ੍ਛਾਦਿਟ੍ਠਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਨੁ ਅਤ੍ਥਿ ਦੇਵਾ ਅਜਲ਼ਾ ਅਨੇਲਮੂਗਾ ਵਿਞ੍ਞੂ ਨ ਹਤ੍ਥਸਂਵਾਚਿਕਾ ਪਟਿਬਲਾ ਸੁਭਾਸਿਤਦੁਬ੍ਭਾਸਿਤਾਨਂ ਅਤ੍ਥਮਞ੍ਞਾਤੁਂ, ਅਤ੍ਥਿ ਦੇਵਾ ਬੁਦ੍ਧੇ ਪਸਨ੍ਨਾ ਧਮ੍ਮੇ ਪਸਨ੍ਨਾ ਸਙ੍ਘੇ ਪਸਨ੍ਨਾ, ਬੁਦ੍ਧਂ ਭਗਵਨ੍ਤਂ ਪਯਿਰੁਪਾਸਨ੍ਤਿ, ਬੁਦ੍ਧਂ ਭਗਵਨ੍ਤਂ ਪਞ੍ਹਂ ਪੁਚ੍ਛਨ੍ਤਿ, ਬੁਦ੍ਧੇਨ ਭਗਵਤਾ ਪਞ੍ਹੇ ਵਿਸ੍ਸਜ੍ਜਿਤੇ ਅਤ੍ਤਮਨਾ ਹੋਨ੍ਤਿ, ਅਤ੍ਥਿ ਦੇਵਾ ਨ ਕਮ੍ਮਾਵਰਣੇਨ ਸਮਨ੍ਨਾਗਤਾ ਨ ਕਿਲੇਸਾਵਰਣੇਨ ਸਮਨ੍ਨਾਗਤਾ ਨ ਵਿਪਾਕਾਵਰਣੇਨ ਸਮਨ੍ਨਾਗਤਾ ਸਦ੍ਧਾ ਛਨ੍ਦਿਕਾ ਪਞ੍ਞਵਨ੍ਤੋ ਭਬ੍ਬਾ ਨਿਯਾਮਂ ਓਕ੍ਕਮਿਤੁਂ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤਂ, ਅਤ੍ਥਿ ਦੇਵਾ ਨ ਮਾਤੁਘਾਤਕਾ ਨ ਪਿਤੁਘਾਤਕਾ ਨ ਅਰਹਨ੍ਤਘਾਤਕਾ ਨ ਰੁਹਿਰੁਪ੍ਪਾਦਕਾ ਨ ਸਙ੍ਘਭੇਦਕਾ, ਅਤ੍ਥਿ ਦੇਵਾ ਨ ਪਾਣਾਤਿਪਾਤਿਨੋ ਨ ਅਦਿਨ੍ਨਾਦਾਯਿਨੋ ਨ ਕਾਮੇਸੁਮਿਚ੍ਛਾਚਾਰਿਨੋ ਨ ਮੁਸਾਵਾਦਿਨੋ ਨ ਪਿਸੁਣਾਵਾਚਾ ਨ ਫਰੁਸਾਵਾਚਾ ਨ ਸਮ੍ਫਪ੍ਪਲਾਪਿਨੋ ਨ ਅਭਿਜ੍ਝਾਲੁਨੋ ਅਬ੍ਯਾਪਨ੍ਨਚਿਤ੍ਤਾ ਸਮ੍ਮਾਦਿਟ੍ਠਿਕਾਤਿ? ਆਮਨ੍ਤਾ.

ਹਞ੍ਚਿ ਅਤ੍ਥਿ ਦੇਵਾ ਅਜਲ਼ਾ ਅਨੇਲਮੂਗਾ ਵਿਞ੍ਞੂ ਨ ਹਤ੍ਥਸਂਵਾਚਿਕਾ ਪਟਿਬਲਾ ਸੁਭਾਸਿਤਦੁਬ੍ਭਾਸਿਤਾਨਂ ਅਤ੍ਥਮਞ੍ਞਾਤੁਂ…ਪੇ… ਅਤ੍ਥਿ ਦੇਵਾ ਬੁਦ੍ਧੇ ਪਸਨ੍ਨਾ…ਪੇ… ਸਮ੍ਮਾਦਿਟ੍ਠਿਕਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋ’’ਤਿ.

੨੭੦. ਅਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਅਤ੍ਥਿ ਤਤ੍ਥ ਪਬ੍ਬਜ੍ਜਾ ਮੁਣ੍ਡਿਯਂ ਕਾਸਾਵਧਾਰਣਾ ਪਤ੍ਤਧਾਰਣਾ, ਦੇਵੇਸੁ ਸਮ੍ਮਾਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ, ਪਚ੍ਚੇਕਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ, ਸਾਵਕਯੁਗਂ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਦੇਵੇਸੁ ਪਬ੍ਬਜ੍ਜਾ ਨਤ੍ਥੀਤਿ, ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਯਤ੍ਥ ਅਤ੍ਥਿ ਪਬ੍ਬਜ੍ਜਾ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਨਤ੍ਥਿ ਪਬ੍ਬਜ੍ਜਾ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਯਤ੍ਥ ਅਤ੍ਥਿ ਪਬ੍ਬਜ੍ਜਾ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਨਤ੍ਥਿ ਪਬ੍ਬਜ੍ਜਾ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਯੋ ਪਬ੍ਬਜਤਿ ਤਸ੍ਸੇਵ ਬ੍ਰਹ੍ਮਚਰਿਯਵਾਸੋ, ਯੋ ਨ ਪਬ੍ਬਜਤਿ ਨਤ੍ਥਿ ਤਸ੍ਸ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਦੇਵੇਸੁ ਮੁਣ੍ਡਿਯਂ ਨਤ੍ਥੀਤਿ, ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਯਤ੍ਥ ਅਤ੍ਥਿ ਮੁਣ੍ਡਿਯਂ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਨਤ੍ਥਿ ਮੁਣ੍ਡਿਯਂ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਯਤ੍ਥ ਅਤ੍ਥਿ ਮੁਣ੍ਡਿਯਂ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਨਤ੍ਥਿ ਮੁਣ੍ਡਿਯਂ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਯੋ ਮੁਣ੍ਡੋ ਹੋਤਿ ਤਸ੍ਸੇਵ ਬ੍ਰਹ੍ਮਚਰਿਯਵਾਸੋ, ਯੋ ਮੁਣ੍ਡੋ ਨ ਹੋਤਿ ਨਤ੍ਥਿ ਤਸ੍ਸ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਦੇਵੇਸੁ ਕਾਸਾਵਧਾਰਣਾ ਨਤ੍ਥੀਤਿ, ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਯਤ੍ਥ ਅਤ੍ਥਿ ਕਾਸਾਵਧਾਰਣਾ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਨਤ੍ਥਿ ਕਾਸਾਵਧਾਰਣਾ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਯਤ੍ਥ ਅਤ੍ਥਿ ਕਾਸਾਵਧਾਰਣਾ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਨਤ੍ਥਿ ਕਾਸਾਵਧਾਰਣਾ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਯੋ ਕਾਸਾਵਂ ਧਾਰੇਤਿ ਤਸ੍ਸੇਵ ਬ੍ਰਹ੍ਮਚਰਿਯਵਾਸੋ, ਯੋ ਕਾਸਾਵਂ ਨ ਧਾਰੇਤਿ ਨਤ੍ਥਿ ਤਸ੍ਸ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਦੇਵੇਸੁ ਪਤ੍ਤਧਾਰਣਾ ਨਤ੍ਥੀਤਿ, ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਯਤ੍ਥ ਅਤ੍ਥਿ ਪਤ੍ਤਧਾਰਣਾ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਨਤ੍ਥਿ ਪਤ੍ਤਧਾਰਣਾ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਯਤ੍ਥ ਅਤ੍ਥਿ ਪਤ੍ਤਧਾਰਣਾ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਨਤ੍ਥਿ ਪਤ੍ਤਧਾਰਣਾ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ? ਯੋ ਪਤ੍ਤਂ ਧਾਰੇਤਿ ਤਸ੍ਸੇਵ ਬ੍ਰਹ੍ਮਚਰਿਯਵਾਸੋ, ਯੋ ਪਤ੍ਤਂ ਨ ਧਾਰੇਤਿ ਨਤ੍ਥਿ ਤਸ੍ਸ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਦੇਵੇਸੁ ਸਮ੍ਮਾਸਮ੍ਬੁਦ੍ਧਾ ਨੁਪ੍ਪਜ੍ਜਨ੍ਤੀਤਿ, ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਯਤ੍ਥ ਸਮ੍ਮਾਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਸਮ੍ਮਾਸਮ੍ਬੁਦ੍ਧਾ ਨੁਪ੍ਪਜ੍ਜਨ੍ਤਿ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਯਤ੍ਥ ਸਮ੍ਮਾਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਸਮ੍ਮਾਸਮ੍ਬੁਦ੍ਧਾ ਨੁਪ੍ਪਜ੍ਜਨ੍ਤਿ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਲੁਮ੍ਬਿਨਿਯਾ ਭਗਵਾ ਜਾਤੋ, ਬੋਧਿਯਾ ਮੂਲੇ ਅਭਿਸਮ੍ਬੁਦ੍ਧੋ, ਬਾਰਾਣਸਿਯਂ ਭਗਵਤਾ ਧਮ੍ਮਚਕ੍ਕਂ ਪਵਤ੍ਤਿਤਂ; ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਨਤ੍ਥਞ੍ਞਤ੍ਰ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਦੇਵੇਸੁ ਪਚ੍ਚੇਕਸਮ੍ਬੁਦ੍ਧਾ ਨੁਪ੍ਪਜ੍ਜਨ੍ਤੀਤਿ, ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਯਤ੍ਥ ਪਚ੍ਚੇਕਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਪਚ੍ਚੇਕਸਮ੍ਬੁਦ੍ਧਾ ਨੁਪ੍ਪਜ੍ਜਨ੍ਤਿ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਯਤ੍ਥ ਪਚ੍ਚੇਕਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਪਚ੍ਚੇਕਸਮ੍ਬੁਦ੍ਧਾ ਨੁਪ੍ਪਜ੍ਜਨ੍ਤਿ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਮਜ੍ਝਿਮੇਸੁ ਜਨਪਦੇਸੁ ਪਚ੍ਚੇਕਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ, ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਨਤ੍ਥਞ੍ਞਤ੍ਰ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਦੇਵੇਸੁ ਸਾਵਕਯੁਗਂ ਨੁਪ੍ਪਜ੍ਜਤੀਤਿ, ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਯਤ੍ਥ ਸਾਵਕਯੁਗਂ ਉਪ੍ਪਜ੍ਜਤਿ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਸਾਵਕਯੁਗਂ ਨੁਪ੍ਪਜ੍ਜਤਿ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਯਤ੍ਥ ਸਾਵਕਯੁਗਂ ਉਪ੍ਪਜ੍ਜਤਿ ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਯਤ੍ਥ ਸਾਵਕਯੁਗਂ ਨੁਪ੍ਪਜ੍ਜਤਿ ਨਤ੍ਥਿ ਤਤ੍ਥ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਮਗਧੇਸੁ ਸਾਵਕਯੁਗਂ ਉਪ੍ਪਨ੍ਨਂ, ਤਤ੍ਥੇਵ ਬ੍ਰਹ੍ਮਚਰਿਯਵਾਸੋ, ਨਤ੍ਥਞ੍ਞਤ੍ਰ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੨੭੧. ਅਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਸਬ੍ਬਦੇਵੇਸੁ ਅਤ੍ਥਿ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਮਨੁਸ੍ਸੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਸਬ੍ਬਮਨੁਸ੍ਸੇਸੁ ਅਤ੍ਥਿ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਅਸਞ੍ਞਸਤ੍ਤੇਸੁ ਦੇਵੇਸੁ ਅਤ੍ਥਿ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਮਨੁਸ੍ਸੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਪਚ੍ਚਨ੍ਤਿਮੇਸੁ ਜਨਪਦੇਸੁ ਅਤ੍ਥਿ ਬ੍ਰਹ੍ਮਚਰਿਯਵਾਸੋ ਮਿਲਕ੍ਖੇਸੁ [ਮਿਲਕ੍ਖੂਸੁ (ਸ੍ਯਾ. ਕ.)] ਅਵਿਞ੍ਞਾਤਾਰੇਸੁ ਯਤ੍ਥ ਨਤ੍ਥਿ ਗਤਿ ਭਿਕ੍ਖੂਨਂ ਭਿਕ੍ਖੁਨੀਨਂ ਉਪਾਸਕਾਨਂ ਉਪਾਸਿਕਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ? ਅਤ੍ਥਿ ਯਤ੍ਥ ਅਤ੍ਥਿ, ਅਤ੍ਥਿ ਯਤ੍ਥ ਨਤ੍ਥੀਤਿ. ਅਸਞ੍ਞਸਤ੍ਤੇਸੁ ਦੇਵੇਸੁ ਅਤ੍ਥਿ ਯਤ੍ਥ ਅਤ੍ਥਿ, ਅਤ੍ਥਿ ਯਤ੍ਥ ਨਤ੍ਥਿ ਬ੍ਰਹ੍ਮਚਰਿਯਵਾਸੋ, ਸਞ੍ਞਸਤ੍ਤੇਸੁ [ਅਸਞ੍ਞਸਤ੍ਤੇਸੁ (ਕ.)] ਦੇਵੇਸੁ ਅਤ੍ਥਿ ਯਤ੍ਥ ਅਤ੍ਥਿ, ਅਤ੍ਥਿ ਯਤ੍ਥ ਨਤ੍ਥਿ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ.

ਦੇਵੇਸੁ ਅਤ੍ਥਿ ਯਤ੍ਥ ਅਤ੍ਥਿ, ਅਤ੍ਥਿ ਯਤ੍ਥ ਨਤ੍ਥਿ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਕਤ੍ਥ ਅਤ੍ਥਿ, ਕਤ੍ਥ ਨਤ੍ਥੀਤਿ? ਅਸਞ੍ਞਸਤ੍ਤੇਸੁ ਦੇਵੇਸੁ ਨਤ੍ਥਿ ਬ੍ਰਹ੍ਮਚਰਿਯਵਾਸੋ, ਸਞ੍ਞਸਤ੍ਤੇਸੁ [ਅਸਞ੍ਞਸਤ੍ਤੇਸੁ (ਕ.)] ਦੇਵੇਸੁ ਅਤ੍ਥਿ ਬ੍ਰਹ੍ਮਚਰਿਯਵਾਸੋਤਿ. ਅਸਞ੍ਞਸਤ੍ਤੇਸੁ ਦੇਵੇਸੁ ਨਤ੍ਥਿ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਸਞ੍ਞਸਤ੍ਤੇਸੁ [ਅਸਞ੍ਞਸਤ੍ਤੇਸੁ (ਕ.)] ਦੇਵੇਸੁ ਨਤ੍ਥਿ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ.

ਸਞ੍ਞਸਤ੍ਤੇਸੁ ਦੇਵੇਸੁ ਅਤ੍ਥਿ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਅਸਞ੍ਞਸਤ੍ਤੇਸੁ ਦੇਵੇਸੁ ਅਤ੍ਥਿ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਮਨੁਸ੍ਸੇਸੁ ਬ੍ਰਹ੍ਮਚਰਿਯਵਾਸੋਤਿ? ਅਤ੍ਥਿ ਯਤ੍ਥ ਅਤ੍ਥਿ, ਅਤ੍ਥਿ ਯਤ੍ਥ ਨਤ੍ਥੀਤਿ. ਪਚ੍ਚਨ੍ਤਿਮੇਸੁ ਜਨਪਦੇਸੁ ਅਤ੍ਥਿ ਯਤ੍ਥ ਅਤ੍ਥਿ, ਅਤ੍ਥਿ ਯਤ੍ਥ ਨਤ੍ਥਿ ਬ੍ਰਹ੍ਮਚਰਿਯਵਾਸੋ ਮਿਲਕ੍ਖੇਸੁ ਅਵਿਞ੍ਞਾਤਾਰੇਸੁ ਯਤ੍ਥ ਨਤ੍ਥਿ ਗਤਿ ਭਿਕ੍ਖੂਨਂ ਭਿਕ੍ਖੁਨੀਨਂ ਉਪਾਸਕਾਨਂ ਉਪਾਸਿਕਾਨਂ, ਮਜ੍ਝਿਮੇਸੁ ਜਨਪਦੇਸੁ ਅਤ੍ਥਿ ਯਤ੍ਥ ਅਤ੍ਥਿ, ਅਤ੍ਥਿ ਯਤ੍ਥ ਨਤ੍ਥਿ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ.

ਮਨੁਸ੍ਸੇਸੁ ਅਤ੍ਥਿ ਯਤ੍ਥ ਅਤ੍ਥਿ, ਅਤ੍ਥਿ ਯਤ੍ਥ ਨਤ੍ਥਿ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਕਤ੍ਥ ਅਤ੍ਥਿ, ਕਤ੍ਥ ਨਤ੍ਥੀਤਿ? ਪਚ੍ਚਨ੍ਤਿਮੇਸੁ ਜਨਪਦੇਸੁ ਨਤ੍ਥਿ ਬ੍ਰਹ੍ਮਚਰਿਯਵਾਸੋ ਮਿਲਕ੍ਖੇਸੁ ਅਵਿਞ੍ਞਾਤਾਰੇਸੁ ਯਤ੍ਥ ਨਤ੍ਥਿ ਗਤਿ ਭਿਕ੍ਖੂਨਂ ਭਿਕ੍ਖੁਨੀਨਂ ਉਪਾਸਕਾਨਂ ਉਪਾਸਿਕਾਨਂ, ਮਜ੍ਝਿਮੇਸੁ ਜਨਪਦੇਸੁ ਅਤ੍ਥਿ ਬ੍ਰਹ੍ਮਚਰਿਯਵਾਸੋਤਿ. ਪਚ੍ਚਨ੍ਤਿਮੇਸੁ ਜਨਪਦੇਸੁ ਨਤ੍ਥਿ ਬ੍ਰਹ੍ਮਚਰਿਯਵਾਸੋ ਮਿਲਕ੍ਖੇਸੁ ਅਵਿਞ੍ਞਾਤਾਰੇਸੁ ਯਤ੍ਥ ਨਤ੍ਥਿ ਗਤਿ ਭਿਕ੍ਖੂਨਂ ਭਿਕ੍ਖੁਨੀਨਂ ਉਪਾਸਕਾਨਂ ਉਪਾਸਿਕਾਨਨ੍ਤਿ? ਆਮਨ੍ਤਾ. ਮਜ੍ਝਿਮੇਸੁ ਜਨਪਦੇਸੁ ਨਤ੍ਥਿ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ.

ਮਜ੍ਝਿਮੇਸੁ ਜਨਪਦੇਸੁ ਅਤ੍ਥਿ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਪਚ੍ਚਨ੍ਤਿਮੇਸੁ ਜਨਪਦੇਸੁ ਅਤ੍ਥਿ ਬ੍ਰਹ੍ਮਚਰਿਯਵਾਸੋ ਮਿਲਕ੍ਖੇਸੁ ਅਵਿਞ੍ਞਾਤਾਰੇਸੁ ਯਤ੍ਥ ਨਤ੍ਥਿ ਗਤਿ ਭਿਕ੍ਖੂਨਂ ਭਿਕ੍ਖੁਨੀਨਂ ਉਪਾਸਕਾਨਂ ਉਪਾਸਿਕਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਤੀਹਿ, ਭਿਕ੍ਖਵੇ, ਠਾਨੇਹਿ ਜਮ੍ਬੁਦੀਪਕਾ ਮਨੁਸ੍ਸਾ ਉਤ੍ਤਰਕੁਰੁਕੇ ਚ ਮਨੁਸ੍ਸੇ ਅਧਿਗ੍ਗਣ੍ਹਨ੍ਤਿ ਦੇਵੇ ਚ ਤਾਵਤਿਂਸੇ! ਕਤਮੇਹਿ ਤੀਹਿ? ਸੂਰਾ, ਸਤਿਮਨ੍ਤੋ, ਇਧ ਬ੍ਰਹ੍ਮਚਰਿਯਵਾਸੋ’’ਤਿ [ਅ. ਨਿ. ੯.੨੧]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋਤਿ.

ਸਾਵਤ੍ਥਿਯਂ ਵੁਤ੍ਤਂ ਭਗਵਤਾ – ‘‘ਇਧ ਬ੍ਰਹ੍ਮਚਰਿਯਵਾਸੋ’’ਤਿ? ਆਮਨ੍ਤਾ. ਸਾਵਤ੍ਥਿਯਂਯੇਵ ਬ੍ਰਹ੍ਮਚਰਿਯਵਾਸੋ, ਨਤ੍ਥਿ ਅਞ੍ਞਤ੍ਰ ਬ੍ਰਹ੍ਮਚਰਿਯਵਾਸੋਤਿ? ਨ ਹੇਵਂ ਵਤ੍ਤਬ੍ਬੇ.

੨੭੨. ਅਨਾਗਾਮਿਸ੍ਸ ਪੁਗ੍ਗਲਸ੍ਸ ਪਞ੍ਚੋਰਮ੍ਭਾਗਿਯਾਨਿ ਸਂਯੋਜਨਾਨਿ ਪਹੀਨਾਨਿ, ਪਞ੍ਚੁਦ੍ਧਮ੍ਭਾਗਿਯਾਨਿ ਸਂਯੋਜਨਾਨਿ ਅਪ੍ਪਹੀਨਾਨਿ, ਇਤੋ ਚੁਤਸ੍ਸ ਤਤ੍ਥ ਉਪਪਨ੍ਨਸ੍ਸ ਕੁਹਿਂ ਫਲੁਪ੍ਪਤ੍ਤੀਤਿ? ਤਤ੍ਥੇਵ. ਹਞ੍ਚਿ ਅਨਾਗਾਮਿਸ੍ਸ ਪੁਗ੍ਗਲਸ੍ਸ ਪਞ੍ਚੋਰਮ੍ਭਾਗਿਯਾਨਿ ਸਂਯੋਜਨਾਨਿ ਪਹੀਨਾਨਿ, ਪਞ੍ਚੁਦ੍ਧਮ੍ਭਾਗਿਯਾਨਿ ਸਂਯੋਜਨਾਨਿ ਅਪ੍ਪਹੀਨਾਨਿ, ਇਤੋ ਚੁਤਸ੍ਸ ਤਤ੍ਥ ਉਪਪਨ੍ਨਸ੍ਸ ਤਹਿਂ ਫਲੁਪ੍ਪਤ੍ਤਿ; ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋ’’ਤਿ.

ਅਨਾਗਾਮਿਸ੍ਸ ਪੁਗ੍ਗਲਸ੍ਸ ਪਞ੍ਚੋਰਮ੍ਭਾਗਿਯਾਨਿ ਸਂਯੋਜਨਾਨਿ ਪਹੀਨਾਨਿ, ਪਞ੍ਚੁਦ੍ਧਮ੍ਭਾਗਿਯਾਨਿ ਸਂਯੋਜਨਾਨਿ ਅਪ੍ਪਹੀਨਾਨਿ, ਇਤੋ ਚੁਤਸ੍ਸ ਤਤ੍ਥ ਉਪਪਨ੍ਨਸ੍ਸ ਕੁਹਿਂ ਭਾਰੋਹਰਣਂ, ਕੁਹਿਂ ਦੁਕ੍ਖਪਰਿਞ੍ਞਾਤਂ, ਕੁਹਿਂ ਕਿਲੇਸਪ੍ਪਹਾਨਂ, ਕੁਹਿਂ ਨਿਰੋਧਸਚ੍ਛਿਕਿਰਿਯਾ, ਕੁਹਿਂ ਅਕੁਪ੍ਪਪਟਿਵੇਧੋਤਿ? ਤਤ੍ਥੇਵ. ਹਞ੍ਚਿ ਅਨਾਗਾਮਿਸ੍ਸ ਪੁਗ੍ਗਲਸ੍ਸ ਪਞ੍ਚੋਰਮ੍ਭਾਗਿਯਾਨਿ ਸਂਯੋਜਨਾਨਿ ਪਹੀਨਾਨਿ, ਪਞ੍ਚੁਦ੍ਧਮ੍ਭਾਗਿਯਾਨਿ ਸਂਯੋਜਨਾਨਿ ਅਪ੍ਪਹੀਨਾਨਿ, ਇਤੋ ਚੁਤਸ੍ਸ ਤਤ੍ਥ ਉਪਪਨ੍ਨਸ੍ਸ ਤਹਿਂ ਅਕੁਪ੍ਪਪਟਿਵੇਧੋ; ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋ’’ਤਿ.

ਅਨਾਗਾਮਿਸ੍ਸ ਪੁਗ੍ਗਲਸ੍ਸ ਪਞ੍ਚੋਰਮ੍ਭਾਗਿਯਾਨਿ ਸਂਯੋਜਨਾਨਿ ਪਹੀਨਾਨਿ, ਪਞ੍ਚੁਦ੍ਧਮ੍ਭਾਗਿਯਾਨਿ ਸਂਯੋਜਨਾਨਿ ਅਪ੍ਪਹੀਨਾਨਿ, ਇਤੋ ਚੁਤਸ੍ਸ ਤਤ੍ਥ ਉਪਪਨ੍ਨਸ੍ਸ ਤਹਿਂ ਫਲੁਪ੍ਪਤ੍ਤਿ, ਤਹਿਂ ਭਾਰੋਹਰਣਂ, ਤਹਿਂ ਦੁਕ੍ਖਪਰਿਞ੍ਞਾਤਂ, ਤਹਿਂ ਕਿਲੇਸਪ੍ਪਹਾਨਂ, ਤਹਿਂ ਨਿਰੋਧਸਚ੍ਛਿਕਿਰਿਯਾ, ਤਹਿਂ ਅਕੁਪ੍ਪਪਟਿਵੇਧੋ; ਕੇਨਟ੍ਠੇਨ ਵਦੇਸਿ – ‘‘ਨਤ੍ਥਿ ਦੇਵੇਸੁ ਬ੍ਰਹ੍ਮਚਰਿਯਵਾਸੋ’’ਤਿ? ਹਨ੍ਦ ਹਿ ਅਨਾਗਾਮੀ ਪੁਗ੍ਗਲੋ ਇਧ ਭਾਵਿਤੇਨ ਮਗ੍ਗੇਨ ਤਤ੍ਥ ਫਲਂ ਸਚ੍ਛਿਕਰੋਤੀਤਿ [ਸਚ੍ਛਿਕਰੋਤਿ (ਬਹੂਸੁ)].