੩. ਸੁਤ੍ਤਸਾਧਨਪਰਿਹਾਨਿ

੨੬੫. ਪਰਿਹਾਯਤਿ ਅਰਹਾ ਅਰਹਤ੍ਤਾਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਉਚ੍ਚਾਵਚਾ ਹਿ ਪਟਿਪਦਾ [ਪਟਿਪਾਦਾ (ਅਟ੍ਠ.)], ਸਮਣੇਨ ਪਕਾਸਿਤਾ;

ਨ ਪਾਰਂ ਦਿਗੁਣਂ ਯਨ੍ਤਿ, ਨਯਿਦਂ ਏਕਗੁਣਂ ਮੁਤ’’ਨ੍ਤਿ [ਸੁ. ਨਿ. ੭੧੯ ਸੁਤ੍ਤਨਿਪਾਤੇ].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਪਰਿਹਾਯਤਿ ਅਰਹਾ ਅਰਹਤ੍ਤਾ’’ਤਿ.

ਪਰਿਹਾਯਤਿ ਅਰਹਾ ਅਰਹਤ੍ਤਾਤਿ? ਆਮਨ੍ਤਾ. ਅਤ੍ਥਿ ਛਿਨ੍ਨਸ੍ਸ ਛੇਦਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਛਿਨ੍ਨਸ੍ਸ ਛੇਦਿਯਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਵੀਤਤਣ੍ਹੋ ਅਨਾਦਾਨੋ, ਕਿਚ੍ਚਂ ਯਸ੍ਸ ਨ ਵਿਜ੍ਜਤਿ;

ਛਿਨ੍ਨਸ੍ਸ ਛੇਦਿਯਂ ਨਤ੍ਥਿ, ਓਘਪਾਸੋ ਸਮੂਹਤੋ’’ਤਿ.

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤ੍ਥਿ ਛਿਨ੍ਨਸ੍ਸ ਛੇਦਿਯ’’ਨ੍ਤਿ.

੨੬੬. ਪਰਿਹਾਯਤਿ ਅਰਹਾ ਅਰਹਤ੍ਤਾਤਿ? ਆਮਨ੍ਤਾ. ਅਤ੍ਥਿ ਕਤਸ੍ਸ ਪਤਿਚਯੋਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਕਤਸ੍ਸ ਪਤਿਚਯੋਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਤਸ੍ਸ ਸਮ੍ਮਾ ਵਿਮੁਤ੍ਤਸ੍ਸ, ਸਨ੍ਤਚਿਤ੍ਤਸ੍ਸ ਭਿਕ੍ਖੁਨੋ;

ਕਤਸ੍ਸ ਪਤਿਚਯੋ ਨਤ੍ਥਿ, ਕਰਣੀਯਂ ਨ ਵਿਜ੍ਜਤਿ.

‘‘ਸੇਲੋ ਯਥਾ ਏਕਗ੍ਘਨੋ, ਵਾਤੇਨ ਨ ਸਮੀਰਤਿ;

ਏਵਂ ਰੂਪਾ ਰਸਾ ਸਦ੍ਦਾ, ਗਨ੍ਧਾ ਫਸ੍ਸਾ ਚ ਕੇਵਲਾ.

‘‘ਇਟ੍ਠਾ ਧਮ੍ਮਾ ਅਨਿਟ੍ਠਾ ਚ, ਨਪ੍ਪਵੇਧੇਨ੍ਤਿ ਤਾਦਿਨੋ;

ਠਿਤਂ ਚਿਤ੍ਤਂ ਵਿਪ੍ਪਮੁਤ੍ਤਂ, ਵਯਂ ਚਸ੍ਸਾਨੁਪਸ੍ਸਤੀ’’ਤਿ [ਮਹਾਵ. ੨੪੪; ਅ. ਨਿ. ੬.੫੫].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤ੍ਥਿ ਕਤਸ੍ਸ ਪਤਿਚਯੋ’’ਤਿ.

੨੬੭. ਨ ਵਤ੍ਤਬ੍ਬਂ – ‘‘ਪਰਿਹਾਯਤਿ ਅਰਹਾ ਅਰਹਤ੍ਤਾ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਪਞ੍ਚਿਮੇ, ਭਿਕ੍ਖਵੇ, ਧਮ੍ਮਾ ਸਮਯਵਿਮੁਤ੍ਤਸ੍ਸ ਭਿਕ੍ਖੁਨੋ ਪਰਿਹਾਨਾਯ ਸਂਵਤ੍ਤਨ੍ਤਿ. ਕਤਮੇ ਪਞ੍ਚ? ਕਮ੍ਮਾਰਾਮਤਾ, ਭਸ੍ਸਾਰਾਮਤਾ, ਨਿਦ੍ਦਾਰਾਮਤਾ, ਸਙ੍ਗਣਿਕਾਰਾਮਤਾ, ਯਥਾਵਿਮੁਤ੍ਤਂ ਚਿਤ੍ਤਂ ਨ ਪਚ੍ਚਵੇਕ੍ਖਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਧਮ੍ਮਾ ਸਮਯਵਿਮੁਤ੍ਤਸ੍ਸ ਭਿਕ੍ਖੁਨੋ ਪਰਿਹਾਨਾਯ ਸਂਵਤ੍ਤਨ੍ਤੀ’’ਤਿ [ਅ. ਨਿ. ੫.੧੪੯]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਪਰਿਹਾਯਤਿ ਅਰਹਾ ਅਰਹਤ੍ਤਾਤਿ.

ਅਤ੍ਥਿ ਅਰਹਤੋ ਕਮ੍ਮਾਰਾਮਤਾਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਅਰਹਤੋ ਕਮ੍ਮਾਰਾਮਤਾਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਰਾਗੋ ਕਾਮਰਾਗੋ ਕਾਮਰਾਗਪਰਿਯੁਟ੍ਠਾਨਂ ਕਾਮਰਾਗਸਂਯੋਜਨਂ ਕਾਮੋਘੋ ਕਾਮਯੋਗੋ ਕਾਮਚ੍ਛਨ੍ਦਨੀਵਰਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਅਰਹਤੋ ਭਸ੍ਸਾਰਾਮਤਾ, ਅਤ੍ਥਿ ਅਰਹਤੋ ਨਿਦ੍ਦਾਰਾਮਤਾ, ਅਤ੍ਥਿ ਅਰਹਤੋ ਸਙ੍ਗਣਿਕਾਰਾਮਤਾਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਅਰਹਤੋ ਸਙ੍ਗਣਿਕਾਰਾਮਤਾਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਰਾਗੋ ਕਾਮਰਾਗੋ ਕਾਮਰਾਗਪਰਿਯੁਟ੍ਠਾਨਂ ਕਾਮਰਾਗਸਂਯੋਜਨਂ ਕਾਮੋਘੋ ਕਾਮਯੋਗੋ ਕਾਮਚ੍ਛਨ੍ਦਨੀਵਰਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ.

੨੬੮. ਪਰਿਹਾਯਤਿ ਅਰਹਾ ਅਰਹਤ੍ਤਾਤਿ? ਆਮਨ੍ਤਾ. ਅਰਹਾ ਅਰਹਤ੍ਤਾ ਪਰਿਹਾਯਮਾਨੋ ਕਿਂ ਪਰਿਯੁਟ੍ਠਿਤੋ ਪਰਿਹਾਯਤੀਤਿ? ਰਾਗਪਰਿਯੁਟ੍ਠਿਤੋ ਪਰਿਹਾਯਤੀਤਿ. ਪਰਿਯੁਟ੍ਠਾਨਂ ਕਿਂ ਪਟਿਚ੍ਚ ਉਪ੍ਪਜ੍ਜਤੀਤਿ? ਅਨੁਸਯਂ ਪਟਿਚ੍ਚ ਉਪ੍ਪਜ੍ਜਤੀਤਿ. ਅਤ੍ਥਿ ਅਰਹਤੋ ਅਨੁਸਯਾਤਿ? ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਅਰਹਤੋ ਅਨੁਸਯਾਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਕਾਮਰਾਗਾਨੁਸਯੋ ਪਟਿਘਾਨੁਸਯੋ ਮਾਨਾਨੁਸਯੋ ਦਿਟ੍ਠਾਨੁਸਯੋ ਵਿਚਿਕਿਚ੍ਛਾਨੁਸਯੋ ਭਵਰਾਗਾਨੁਸਯੋ ਅਵਿਜ੍ਜਾਨੁਸਯੋਤਿ? ਨ ਹੇਵਂ ਵਤ੍ਤਬ੍ਬੇ.

ਦੋਸਪਰਿਯੁਟ੍ਠਿਤੋ ਪਰਿਹਾਯਤੀਤਿ…ਪੇ… ਮੋਹਪਰਿਯੁਟ੍ਠਿਤੋ ਪਰਿਹਾਯਤੀਤਿ…. ਪਰਿਯੁਟ੍ਠਾਨਂ ਕਿਂ ਪਟਿਚ੍ਚ ਉਪ੍ਪਜ੍ਜਤੀਤਿ? ਅਨੁਸਯਂ ਪਟਿਚ੍ਚ ਉਪ੍ਪਜ੍ਜਤੀਤਿ. ਅਤ੍ਥਿ ਅਰਹਤੋ ਅਨੁਸਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਅਰਹਤੋ ਅਨੁਸਯਾਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਕਾਮਰਾਗਾਨੁਸਯੋ…ਪੇ… ਅਵਿਜ੍ਜਾਨੁਸਯੋਤਿ? ਨ ਹੇਵਂ ਵਤ੍ਤਬ੍ਬੇ.

ਪਰਿਹਾਯਤਿ ਅਰਹਾ ਅਰਹਤ੍ਤਾਤਿ? ਆਮਨ੍ਤਾ. ਅਰਹਤੋ ਅਰਹਤ੍ਤਾ ਪਰਿਹਾਯਮਾਨਸ੍ਸ ਕਿਂ ਉਪਚਯਂ ਗਚ੍ਛਤੀਤਿ? ਰਾਗੋ ਉਪਚਯਂ ਗਚ੍ਛਤੀਤਿ. ਸਕ੍ਕਾਯਦਿਟ੍ਠਿ ਉਪਚਯਂ ਗਚ੍ਛਤੀਤਿ, ਵਿਚਿਕਿਚ੍ਛਾ ਉਪਚਯਂ ਗਚ੍ਛਤੀਤਿ, ਸੀਲਬ੍ਬਤਪਰਾਮਾਸੋ ਉਪਚਯਂ ਗਚ੍ਛਤੀਤਿ? ਨ ਹੇਵਂ ਵਤ੍ਤਬ੍ਬੇ. ਦੋਸੋ ਉਪਚਯਂ ਗਚ੍ਛਤੀਤਿ…ਪੇ… ਮੋਹੋ ਉਪਚਯਂ ਗਚ੍ਛਤੀਤਿ, ਸਕ੍ਕਾਯਦਿਟ੍ਠਿ ਉਪਚਯਂ ਗਚ੍ਛਤੀਤਿ, ਵਿਚਿਕਿਚ੍ਛਾ ਉਪਚਯਂ ਗਚ੍ਛਤੀਤਿ, ਸੀਲਬ੍ਬਤਪਰਾਮਾਸੋ ਉਪਚਯਂ ਗਚ੍ਛਤੀਤਿ? ਨ ਹੇਵਂ ਵਤ੍ਤਬ੍ਬੇ.

ਪਰਿਹਾਯਤਿ ਅਰਹਾ ਅਰਹਤ੍ਤਾਤਿ? ਆਮਨ੍ਤਾ. ਅਰਹਾ ਆਚਿਨਤੀਤਿ? ਨ ਹੇਵਂ ਵਤ੍ਤਬ੍ਬੇ. ਅਰਹਾ ਅਪਚਿਨਤੀਤਿ? ਨ ਹੇਵਂ ਵਤ੍ਤਬ੍ਬੇ. ਅਰਹਾ ਪਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ. ਅਰਹਾ ਉਪਾਦਿਯਤੀਤਿ? ਨ ਹੇਵਂ ਵਤ੍ਤਬ੍ਬੇ. ਅਰਹਾ ਵਿਸਿਨੇਤੀਤਿ? ਨ ਹੇਵਂ ਵਤ੍ਤਬ੍ਬੇ. ਅਰਹਾ ਉਸ੍ਸਿਨੇਤੀਤਿ? ਨ ਹੇਵਂ ਵਤ੍ਤਬ੍ਬੇ. ਅਰਹਾ ਵਿਧੂਪੇਤੀਤਿ? ਨ ਹੇਵਂ ਵਤ੍ਤਬ੍ਬੇ. ਅਰਹਾ ਸਨ੍ਧੂਪੇਤੀਤਿ? ਨ ਹੇਵਂ ਵਤ੍ਤਬ੍ਬੇ.

ਨਨੁ ਅਰਹਾ ਨੇਵਾਚਿਨਤਿ ਨ ਅਪਚਿਨਤਿ ਅਪਚਿਨਿਤ੍ਵਾ ਠਿਤੋਤਿ? ਆਮਨ੍ਤਾ. ਹਞ੍ਚਿ ਅਰਹਾ ਨੇਵਾਚਿਨਤਿ ਨ ਅਪਚਿਨਤਿ ਅਪਚਿਨਿਤ੍ਵਾ ਠਿਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਰਿਹਾਯਤਿ ਅਰਹਾ ਅਰਹਤ੍ਤਾ’’ਤਿ.

ਨਨੁ ਅਰਹਾ ਨੇਵ ਪਜਹਤਿ ਨ ਉਪਾਦਿਯਤਿ ਪਜਹਿਤ੍ਵਾ ਠਿਤੋਤਿ? ਆਮਨ੍ਤਾ. ਹਞ੍ਚਿ ਅਰਹਾ ਨੇਵ ਪਜਹਤਿ ਨ ਉਪਾਦਿਯਤਿ ਪਜਹਿਤ੍ਵਾ ਠਿਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਰਿਹਾਯਤਿ ਅਰਹਾ ਅਰਹਤ੍ਤਾ’’ਤਿ.

ਨਨੁ ਅਰਹਾ ਨੇਵ ਵਿਸਿਨੇਤਿ ਨ ਉਸ੍ਸਿਨੇਤਿ ਵਿਸਿਨਿਤ੍ਵਾ ਠਿਤੋਤਿ? ਆਮਨ੍ਤਾ. ਹਞ੍ਚਿ ਅਰਹਾ ਨੇਵ ਵਿਸਿਨੇਤਿ ਨ ਉਸ੍ਸਿਨੇਤਿ ਵਿਸਿਨਿਤ੍ਵਾ ਠਿਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਰਿਹਾਯਤਿ ਅਰਹਾ ਅਰਹਤ੍ਤਾ’’ਤਿ.

ਨਨੁ ਅਰਹਾ ਨੇਵ ਵਿਧੂਪੇਤਿ ਨ ਸਨ੍ਧੂਪੇਤਿ ਵਿਧੂਪੇਤ੍ਵਾ ਠਿਤੋਤਿ? ਆਮਨ੍ਤਾ. ਹਞ੍ਚਿ ਅਰਹਾ ਨੇਵ ਵਿਧੂਪੇਤਿ ਨ ਸਨ੍ਧੂਪੇਤਿ ਵਿਧੂਪੇਤ੍ਵਾ ਠਿਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਰਿਹਾਯਤਿ ਅਰਹਾ ਅਰਹਤ੍ਤਾ’’ਤਿ.

ਪਰਿਹਾਨਿਕਥਾ ਨਿਟ੍ਠਿਤਾ.