੧. ਵਾਦਯੁਤ੍ਤਿਪਰਿਹਾਨਿ

੨੩੯. ਪਰਿਹਾਯਤਿ ਅਰਹਾ ਅਰਹਤ੍ਤਾਤਿ? ਆਮਨ੍ਤਾ. ਸਬ੍ਬਤ੍ਥ ਅਰਹਾ ਅਰਹਤ੍ਤਾ ਪਰਿਹਾਯਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਬ੍ਬਤ੍ਥ ਅਰਹਾ ਅਰਹਤ੍ਤਾ ਪਰਿਹਾਯਤੀਤਿ? ਆਮਨ੍ਤਾ. ਸਬ੍ਬਤ੍ਥ ਅਰਹਤੋ ਪਰਿਹਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰਿਹਾਯਤਿ ਅਰਹਾ ਅਰਹਤ੍ਤਾਤਿ? ਆਮਨ੍ਤਾ. ਸਬ੍ਬਦਾ ਅਰਹਾ ਅਰਹਤ੍ਤਾ ਪਰਿਹਾਯਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਬ੍ਬਦਾ ਅਰਹਾ ਅਰਹਤ੍ਤਾ ਪਰਿਹਾਯਤੀਤਿ? ਆਮਨ੍ਤਾ. ਸਬ੍ਬਦਾ ਅਰਹਤੋ ਪਰਿਹਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰਿਹਾਯਤਿ ਅਰਹਾ ਅਰਹਤ੍ਤਾਤਿ? ਆਮਨ੍ਤਾ. ਸਬ੍ਬੇਵ ਅਰਹਨ੍ਤੋ ਅਰਹਤ੍ਤਾ ਪਰਿਹਾਯਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਬ੍ਬੇਵ ਅਰਹਨ੍ਤੋ ਅਰਹਤ੍ਤਾ ਪਰਿਹਾਯਨ੍ਤੀਤਿ? ਆਮਨ੍ਤਾ. ਸਬ੍ਬੇਸਂਯੇਵ ਅਰਹਨ੍ਤਾਨਂ ਪਰਿਹਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰਿਹਾਯਤਿ ਅਰਹਾ ਅਰਹਤ੍ਤਾਤਿ? ਆਮਨ੍ਤਾ. ਅਰਹਾ ਅਰਹਤ੍ਤਾ ਪਰਿਹਾਯਮਾਨੋ ਚਤੂਹਿ ਫਲੇਹਿ ਪਰਿਹਾਯਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਚਤੂਹਿ ਸਤਸਹਸ੍ਸੇਹਿ ਸੇਟ੍ਠੀ ਸੇਟ੍ਠਿਤ੍ਤਂ ਕਾਰੇਨ੍ਤੋ ਸਤਸਹਸ੍ਸੇ ਪਰਿਹੀਨੇ ਸੇਟ੍ਠਿਤ੍ਤਾ ਪਰਿਹੀਨੋ ਹੋਤੀਤਿ? ਆਮਨ੍ਤਾ. ਸਬ੍ਬਸਾਪਤੇਯ੍ਯਾ ਪਰਿਹੀਨੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਚਤੂਹਿ ਸਤਸਹਸ੍ਸੇਹਿ ਸੇਟ੍ਠੀ ਸੇਟ੍ਠਿਤ੍ਤਂ ਕਾਰੇਨ੍ਤੋ ਸਤਸਹਸ੍ਸੇ ਪਰਿਹੀਨੇ ਭਬ੍ਬੋ ਸਬ੍ਬਸਾਪਤੇਯ੍ਯਾ ਪਰਿਹਾਯਿਤੁਨ੍ਤਿ? ਆਮਨ੍ਤਾ. ਅਰਹਾ ਅਰਹਤ੍ਤਾ ਪਰਿਹਾਯਮਾਨੋ ਭਬ੍ਬੋ ਚਤੂਹਿ ਫਲੇਹਿ ਪਰਿਹਾਯਿਤੁਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….