੩. ਤਤਿਯਵਗ੍ਗੋ

(੨੪) ੪. ਵਿਮੁਚ੍ਚਮਾਨਕਥਾ

੩੬੬. ਵਿਮੁਤ੍ਤਂ ਵਿਮੁਚ੍ਚਮਾਨਨ੍ਤਿ? ਆਮਨ੍ਤਾ. ਏਕਦੇਸਂ ਵਿਮੁਤ੍ਤਂ, ਏਕਦੇਸਂ ਅਵਿਮੁਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਏਕਦੇਸਂ ਵਿਮੁਤ੍ਤਂ, ਏਕਦੇਸਂ ਅਵਿਮੁਤ੍ਤਨ੍ਤਿ? ਆਮਨ੍ਤਾ. ਏਕਦੇਸਂ ਸੋਤਾਪਨ੍ਨੋ, ਏਕਦੇਸਂ ਨ ਸੋਤਾਪਨ੍ਨੋ, ਏਕਦੇਸਂ ਸੋਤਾਪਤ੍ਤਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਸਤ੍ਤਕ੍ਖਤ੍ਤੁਪਰਮੋ ਕੋਲਙ੍ਕੋਲੋ ਏਕਬੀਜੀ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ ਧਮ੍ਮੇ…ਪੇ… ਸਙ੍ਘੇ…ਪੇ… ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋ, ਏਕਦੇਸਂ ਅਰਿਯਕਨ੍ਤੇਹਿ ਸੀਲੇਹਿ ਨ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਏਕਦੇਸਂ ਵਿਮੁਤ੍ਤਂ, ਏਕਦੇਸਂ ਅਵਿਮੁਤ੍ਤਨ੍ਤਿ? ਆਮਨ੍ਤਾ. ਏਕਦੇਸਂ ਸਕਦਾਗਾਮੀ, ਏਕਦੇਸਂ ਨ ਸਕਦਾਗਾਮੀ, ਏਕਦੇਸਂ ਸਕਦਾਗਾਮਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਏਕਦੇਸਂ ਵਿਮੁਤ੍ਤਂ, ਏਕਦੇਸਂ ਅਵਿਮੁਤ੍ਤਨ੍ਤਿ? ਆਮਨ੍ਤਾ. ਏਕਦੇਸਂ ਅਨਾਗਾਮੀ, ਏਕਦੇਸਂ ਨ ਅਨਾਗਾਮੀ, ਏਕਦੇਸਂ ਅਨਾਗਾਮਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਅਨ੍ਤਰਾਪਰਿਨਿਬ੍ਬਾਯੀ, ਉਪਹਚ੍ਚਪਰਿਨਿਬ੍ਬਾਯੀ, ਅਸਙ੍ਖਾਰਪਰਿਨਿਬ੍ਬਾਯੀ, ਸਸਙ੍ਖਾਰਪਰਿਨਿਬ੍ਬਾਯੀ, ਉਦ੍ਧਂਸੋਤੋਅਕਨਿਟ੍ਠਗਾਮੀ, ਏਕਦੇਸਂ ਨ ਉਦ੍ਧਂਸੋਤੋਅਕਨਿਟ੍ਠਗਾਮੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਏਕਦੇਸਂ ਵਿਮੁਤ੍ਤਂ, ਏਕਦੇਸਂ ਅਵਿਮੁਤ੍ਤਨ੍ਤਿ? ਆਮਨ੍ਤਾ. ਏਕਦੇਸਂ ਅਰਹਾ ਏਕਦੇਸਂ ਨ ਅਰਹਾ, ਏਕਦੇਸਂ ਅਰਹਤ੍ਤਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਵੀਤਰਾਗੋ ਵੀਤਦੋਸੋ ਵੀਤਮੋਹੋ…ਪੇ… ਏਕਦੇਸਂ ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਏਕਦੇਸਂ ਸਚ੍ਛਿਕਾਤਬ੍ਬਂ ਨ ਸਚ੍ਛਿਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਮੁਤ੍ਤਂ ਵਿਮੁਚ੍ਚਮਾਨਨ੍ਤਿ? ਆਮਨ੍ਤਾ. ਉਪ੍ਪਾਦਕ੍ਖਣੇ ਵਿਮੁਤ੍ਤਂ, ਭਙ੍ਗਕ੍ਖਣੇ ਵਿਮੁਚ੍ਚਮਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੬੭. ਨ ਵਤ੍ਤਬ੍ਬਂ – ‘‘ਵਿਮੁਤ੍ਤਂ ਵਿਮੁਚ੍ਚਮਾਨ’’ਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਤਸ੍ਸ ਏਵਂ ਜਾਨਤੋ ਏਵਂ ਪਸ੍ਸਤੋ ਕਾਮਾਸਵਾਪਿ ਚਿਤ੍ਤਂ ਵਿਮੁਚ੍ਚਤਿ, ਭਵਾਸਵਾਪਿ ਚਿਤ੍ਤਂ ਵਿਮੁਚ੍ਚਤਿ, ਅਵਿਜ੍ਜਾਸਵਾਪਿ ਚਿਤ੍ਤਂ ਵਿਮੁਚ੍ਚਤੀ’’ਤਿ [ਦੀ. ਨਿ. ੧.੨੪੮ ਆਦਯੋ]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਵਤ੍ਤਬ੍ਬਂ [ਤੇਨ ਹਿ (ਸੀ. ਸ੍ਯਾ. ਕਂ.), ਤੇਨ ਹਿ ਨ ਵਤ੍ਤਬ੍ਬਂ (ਕ.)] – ‘‘ਵਿਮੁਤ੍ਤਂ ਵਿਮੁਚ੍ਚਮਾਨ’’ਨ੍ਤਿ.

ਵਿਮੁਤ੍ਤਂ ਵਿਮੁਚ੍ਚਮਾਨਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸੋ ਏਵਂ ਸਮਾਹਿਤੇ ਚਿਤ੍ਤੇ ਪਰਿਸੁਦ੍ਧੇ ਪਰਿਯੋਦਾਤੇ ਅਨਙ੍ਗਣੇ ਵਿਗਤੂਪਕ੍ਕਿਲੇਸੇ ਮੁਦੁਭੂਤੇ ਕਮ੍ਮਨਿਯੇ ਠਿਤੇ ਆਨੇਞ੍ਜਪ੍ਪਤ੍ਤੇ ਆਸਵਾਨਂ ਖਯਞਾਣਾਯ ਚਿਤ੍ਤਂ ਅਭਿਨਿਨ੍ਨਾਮੇਤੀ’’ਤਿ! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਵਿਮੁਤ੍ਤਂ ਵਿਮੁਚ੍ਚਮਾਨ’’ਨ੍ਤਿ.

ਅਤ੍ਥਿ ਚਿਤ੍ਤਂ ਵਿਮੁਚ੍ਚਮਾਨਨ੍ਤਿ? ਆਮਨ੍ਤਾ. ਅਤ੍ਥਿ ਚਿਤ੍ਤਂ ਰਜ੍ਜਮਾਨਂ ਦੁਸ੍ਸਮਾਨਂ ਮੁਯ੍ਹਮਾਨਂ ਕਿਲਿਸ੍ਸਮਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਰਤ੍ਤਞ੍ਚੇਵ ਅਰਤ੍ਤਞ੍ਚ, ਦੁਟ੍ਠਞ੍ਚੇਵ ਅਦੁਟ੍ਠਞ੍ਚ, ਮੂਲ਼੍ਹਞ੍ਚੇਵ ਅਮੂਲ਼੍ਹਞ੍ਚ, ਛਿਨ੍ਨਞ੍ਚੇਵ ਅਛਿਨ੍ਨਞ੍ਚ, ਭਿਨ੍ਨਞ੍ਚੇਵ ਅਭਿਨ੍ਨਞ੍ਚ, ਕਤਞ੍ਚੇਵ ਅਕਤਞ੍ਚਾਤਿ? ਆਮਨ੍ਤਾ. ਹਞ੍ਚਿ ਰਤ੍ਤਞ੍ਚੇਵ ਅਰਤ੍ਤਞ੍ਚ, ਦੁਟ੍ਠਞ੍ਚੇਵ ਅਦੁਟ੍ਠਞ੍ਚ, ਮੂਲ਼੍ਹਞ੍ਚੇਵ ਅਮੂਲ਼੍ਹਞ੍ਚ, ਛਿਨ੍ਨਞ੍ਚੇਵ ਅਛਿਨ੍ਨਞ੍ਚ, ਭਿਨ੍ਨਞ੍ਚੇਵ ਅਭਿਨ੍ਨਞ੍ਚ, ਕਤਞ੍ਚੇਵ ਅਕਤਞ੍ਚ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਚਿਤ੍ਤਂ ਵਿਮੁਚ੍ਚਮਾਨ’’ਨ੍ਤਿ.

ਵਿਮੁਚ੍ਚਮਾਨਕਥਾ ਨਿਟ੍ਠਿਤਾ.