੩. ਤਤਿਯਵਗ੍ਗੋ

(੩੧) ੧੧. ਅਸਞ੍ਞਕਥਾ

੩੮੧. ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥੀਤਿ? ਆਮਨ੍ਤਾ. ਸਞ੍ਞਾਭਵੋ ਸਞ੍ਞਾਗਤਿ ਸਞ੍ਞਾਸਤ੍ਤਾਵਾਸੋ ਸਞ੍ਞਾਸਂਸਾਰੋ ਸਞ੍ਞਾਯੋਨਿ ਸਞ੍ਞਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਨੁ ਅਸਞ੍ਞਭਵੋ ਅਸਞ੍ਞਗਤਿ ਅਸਞ੍ਞਸਤ੍ਤਾਵਾਸੋ ਅਸਞ੍ਞਸਂਸਾਰੋ ਅਸਞ੍ਞਯੋਨਿ ਅਸਞ੍ਞਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਹਞ੍ਚਿ ਅਸਞ੍ਞਭਵੋ ਅਸਞ੍ਞਗਤਿ ਅਸਞ੍ਞਸਤ੍ਤਾਵਾਸੋ ਅਸਞ੍ਞਸਂਸਾਰੋ ਅਸਞ੍ਞਯੋਨਿ ਅਸਞ੍ਞਤ੍ਤਭਾਵਪਟਿਲਾਭੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥੀ’’ਤਿ.

ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥੀਤਿ? ਆਮਨ੍ਤਾ. ਪਞ੍ਚਵੋਕਾਰਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਅਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਨੁ ਏਕਵੋਕਾਰਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਅਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਹਞ੍ਚਿ ਏਕਵੋਕਾਰਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਅਤ੍ਤਭਾਵਪਟਿਲਾਭੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥੀ’’ਤਿ.

ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥੀਤਿ? ਆਮਨ੍ਤਾ. ਤਾਯ ਸਞ੍ਞਾਯ ਸਞ੍ਞਾਕਰਣੀਯਂ ਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੮੨. ਮਨੁਸ੍ਸੇਸੁ ਸਞ੍ਞਾ ਅਤ੍ਥਿ, ਸੋ ਚ ਸਞ੍ਞਾਭਵੋ ਸਞ੍ਞਾਗਤਿ ਸਞ੍ਞਾਸਤ੍ਤਾਵਾਸੋ ਸਞ੍ਞਾਸਂਸਾਰੋ ਸਞ੍ਞਾਯੋਨਿ ਸਞ੍ਞਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥਿ, ਸੋ ਚ ਸਞ੍ਞਾਭਵੋ ਸਞ੍ਞਾਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਅਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਮਨੁਸ੍ਸੇਸੁ ਸਞ੍ਞਾ ਅਤ੍ਥਿ, ਸੋ ਚ ਪਞ੍ਚਵੋਕਾਰਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਅਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥਿ, ਸੋ ਚ ਪਞ੍ਚਵੋਕਾਰਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਅਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਮਨੁਸ੍ਸੇਸੁ ਸਞ੍ਞਾ ਅਤ੍ਥਿ, ਤਾਯ ਸਞ੍ਞਾਯ ਸਞ੍ਞਾਕਰਣੀਯਂ ਕਰੋਤੀਤਿ? ਆਮਨ੍ਤਾ. ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥਿ, ਤਾਯ ਸਞ੍ਞਾਯ ਸਞ੍ਞਾਕਰਣੀਯਂ ਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥਿ, ਸੋ ਚ ਅਸਞ੍ਞਭਵੋ ਅਸਞ੍ਞਗਤਿ ਅਸਞ੍ਞਸਤ੍ਤਾਵਾਸੋ ਅਸਞ੍ਞਸਂਸਾਰੋ ਅਸਞ੍ਞਯੋਨਿ ਅਸਞ੍ਞਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਮਨੁਸ੍ਸੇਸੁ ਸਞ੍ਞਾ ਅਤ੍ਥਿ, ਸੋ ਚ ਅਸਞ੍ਞਭਵੋ ਅਸਞ੍ਞਗਤਿ…ਪੇ… ਅਸਞ੍ਞਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥਿ, ਸੋ ਚ ਏਕਵੋਕਾਰਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਅਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਮਨੁਸ੍ਸੇਸੁ ਸਞ੍ਞਾ ਅਤ੍ਥਿ, ਸੋ ਚ ਏਕਵੋਕਾਰਭਵੋ ਗਤਿ…ਪੇ… ਅਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥਿ, ਨ ਚ ਤਾਯ ਸਞ੍ਞਾਯ ਸਞ੍ਞਾਕਰਣੀਯਂ ਕਰੋਤੀਤਿ? ਆਮਨ੍ਤਾ. ਮਨੁਸ੍ਸੇਸੁ ਸਞ੍ਞਾ ਅਤ੍ਥਿ, ਨ ਚ ਤਾਯ ਸਞ੍ਞਾਯ ਸਞ੍ਞਾਕਰਣੀਯਂ ਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੮੩. ਨ ਵਤ੍ਤਬ੍ਬਂ – ‘‘ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸਨ੍ਤਿ, ਭਿਕ੍ਖਵੇ, ਅਸਞ੍ਞਸਤ੍ਤਾ ਨਾਮ ਦੇਵਾ; ਸਞ੍ਞੁਪ੍ਪਾਦਾ ਚ ਪਨ ਤੇ ਦੇਵਾ ਤਮ੍ਹਾ ਕਾਯਾ ਚਵਨ੍ਤੀ’’ਤਿ [ਦੀ. ਨਿ. ੧.੬੮]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥੀਤਿ.

ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥੀਤਿ? ਕਿਞ੍ਚਿ [ਕਞ੍ਚਿ (ਸ੍ਯਾ.)] ਕਾਲੇ ਅਤ੍ਥਿ, ਕਿਞ੍ਚਿ ਕਾਲੇ ਨਤ੍ਥੀਤਿ. ਕਿਞ੍ਚਿ ਕਾਲੇ ਸਞ੍ਞਸਤ੍ਤਾ ਕਿਞ੍ਚਿ ਕਾਲੇ ਅਸਞ੍ਞਸਤ੍ਤਾ, ਕਿਞ੍ਚਿ ਕਾਲੇ ਸਞ੍ਞਭਵੋ ਕਿਞ੍ਚਿ ਕਾਲੇ ਅਸਞ੍ਞਭਵੋ, ਕਿਞ੍ਚਿ ਕਾਲੇ ਪਞ੍ਚਵੋਕਾਰਭਵੋ ਕਿਞ੍ਚਿ ਕਾਲੇ ਏਕਵੋਕਾਰਭਵੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਸਞ੍ਞਸਤ੍ਤੇਸੁ ਸਞ੍ਞਾ ਕਿਞ੍ਚਿ ਕਾਲੇ ਅਤ੍ਥਿ, ਕਿਞ੍ਚਿ ਕਾਲੇ ਨਤ੍ਥੀਤਿ? ਆਮਨ੍ਤਾ. ਕਂ ਕਾਲਂ ਅਤ੍ਥਿ, ਕਂ ਕਾਲਂ ਨਤ੍ਥੀਤਿ? ਚੁਤਿਕਾਲੇ ਉਪਪਤ੍ਤਿਕਾਲੇ ਅਤ੍ਥਿ, ਠਿਤਿਕਾਲੇ ਨਤ੍ਥੀਤਿ. ਚੁਤਿਕਾਲੇ ਉਪਪਤ੍ਤਿਕਾਲੇ ਸਞ੍ਞਸਤ੍ਤਾ, ਠਿਤਿਕਾਲੇ ਅਸਞ੍ਞਸਤ੍ਤਾ; ਚੁਤਿਕਾਲੇ ਉਪਪਤ੍ਤਿਕਾਲੇ ਸਞ੍ਞਭਵੋ, ਠਿਤਿਕਾਲੇ ਅਸਞ੍ਞਭਵੋ; ਚੁਤਿਕਾਲੇ ਉਪਪਤ੍ਤਿਕਾਲੇ ਪਞ੍ਚਵੋਕਾਰਭਵੋ, ਠਿਤਿਕਾਲੇ ਏਕਵੋਕਾਰਭਵੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਸਞ੍ਞਕਥਾ ਨਿਟ੍ਠਿਤਾ.