(੨੧) ੧. ਬਲਕਥਾ

੩੫੪. ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਆਮਨ੍ਤਾ. ਤਥਾਗਤਬਲਂ ਸਾਵਕਬਲਂ, ਸਾਵਕਬਲਂ ਤਥਾਗਤਬਲਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਆਮਨ੍ਤਾ. ਤਞ੍ਞੇਵ ਤਥਾਗਤਬਲਂ ਤਂ ਸਾਵਕਬਲਂ, ਤਞ੍ਞੇਵ ਸਾਵਕਬਲਂ ਤਂ ਤਥਾਗਤਬਲਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਆਮਨ੍ਤਾ. ਯਾਦਿਸਂ ਤਥਾਗਤਬਲਂ ਤਾਦਿਸਂ ਸਾਵਕਬਲਂ, ਯਾਦਿਸਂ ਸਾਵਕਬਲਂ ਤਾਦਿਸਂ ਤਥਾਗਤਬਲਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਆਮਨ੍ਤਾ. ਯਾਦਿਸੋ ਤਥਾਗਤਸ੍ਸ ਪੁਬ੍ਬਯੋਗੋ ਪੁਬ੍ਬਚਰਿਯਾ ਧਮ੍ਮਕ੍ਖਾਨਂ ਧਮ੍ਮਦੇਸਨਾ ਤਾਦਿਸੋ ਸਾਵਕਸ੍ਸ ਪੁਬ੍ਬਯੋਗੋ ਪੁਬ੍ਬਚਰਿਯਾ ਧਮ੍ਮਕ੍ਖਾਨਂ ਧਮ੍ਮਦੇਸਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਆਮਨ੍ਤਾ. ਤਥਾਗਤੋ ਜਿਨੋ ਸਤ੍ਥਾ ਸਮ੍ਮਾਸਮ੍ਬੁਦ੍ਧੋ ਸਬ੍ਬਞ੍ਞੂ ਸਬ੍ਬਦਸ੍ਸਾਵੀ ਧਮ੍ਮਸ੍ਸਾਮੀ ਧਮ੍ਮਪ੍ਪਟਿਸਰਣੋਤਿ? ਆਮਨ੍ਤਾ. ਸਾਵਕੋ ਜਿਨੋ ਸਤ੍ਥਾ ਸਮ੍ਮਾਸਮ੍ਬੁਦ੍ਧੋ ਸਬ੍ਬਞ੍ਞੂ ਸਬ੍ਬਦਸ੍ਸਾਵੀ ਧਮ੍ਮਸ੍ਸਾਮੀ ਧਮ੍ਮਪ੍ਪਟਿਸਰਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਆਮਨ੍ਤਾ. ਤਥਾਗਤੋ ਅਨੁਪ੍ਪਨ੍ਨਸ੍ਸ ਮਗ੍ਗਸ੍ਸ ਉਪ੍ਪਾਦੇਤਾ ਅਸਞ੍ਜਾਤਸ੍ਸ ਮਗ੍ਗਸ੍ਸ ਸਞ੍ਜਨੇਤਾ ਅਨਕ੍ਖਾਤਸ੍ਸ ਮਗ੍ਗਸ੍ਸ ਅਕ੍ਖਾਤਾ ਮਗ੍ਗਞ੍ਞੂ ਮਗ੍ਗਵਿਦੂ ਮਗ੍ਗਕੋਵਿਦੋਤਿ? ਆਮਨ੍ਤਾ. ਸਾਵਕੋ ਅਨੁਪ੍ਪਨ੍ਨਸ੍ਸ ਮਗ੍ਗਸ੍ਸ ਉਪ੍ਪਾਦੇਤਾ ਅਸਞ੍ਜਾਤਸ੍ਸ ਮਗ੍ਗਸ੍ਸ ਸਞ੍ਜਨੇਤਾ ਅਨਕ੍ਖਾਤਸ੍ਸ ਮਗ੍ਗਸ੍ਸ ਅਕ੍ਖਾਤਾ ਮਗ੍ਗਞ੍ਞੂ ਮਗ੍ਗਵਿਦੂ ਮਗ੍ਗਕੋਵਿਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਇਨ੍ਦ੍ਰਿਯਪਰੋਪਰਿਯਤ੍ਤਂ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਆਮਨ੍ਤਾ. ਸਾਵਕੋ ਸਬ੍ਬਞ੍ਞੂ ਸਬ੍ਬਦਸ੍ਸਾਵੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੫੫. ਸਾਵਕੋ ਠਾਨਾਠਾਨਂ ਜਾਨਾਤੀਤਿ? ਆਮਨ੍ਤਾ. ਹਞ੍ਚਿ ਸਾਵਕੋ ਠਾਨਾਠਾਨਂ ਜਾਨਾਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਠਾਨਾਠਾਨਂ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣ’’ਨ੍ਤਿ.

ਸਾਵਕੋ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਕਮ੍ਮਸਮਾਦਾਨਾਨਂ ਠਾਨਸੋ ਹੇਤੁਸੋ ਵਿਪਾਕਂ ਜਾਨਾਤੀਤਿ? ਆਮਨ੍ਤਾ. ਹਞ੍ਚਿ ਸਾਵਕੋ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਕਮ੍ਮਸਮਾਦਾਨਾਨਂ ਠਾਨਸੋ ਹੇਤੁਸੋ ਵਿਪਾਕਂ ਜਾਨਾਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਕਮ੍ਮਸਮਾਦਾਨਾਨਂ ਠਾਨਸੋ ਹੇਤੁਸੋ ਵਿਪਾਕਂ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣ’’ਨ੍ਤਿ.

ਸਾਵਕੋ ਸਬ੍ਬਤ੍ਥਗਾਮਿਨਿਂ ਪਟਿਪਦਂ ਜਾਨਾਤੀਤਿ? ਆਮਨ੍ਤਾ. ਹਞ੍ਚਿ ਸਾਵਕੋ ਸਬ੍ਬਤ੍ਥਗਾਮਿਨਿਂ ਪਟਿਪਦਂ ਜਾਨਾਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਬ੍ਬਤ੍ਥਗਾਮਿਨਿਂ ਪਟਿਪਦਂ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣ’’ਨ੍ਤਿ.

ਸਾਵਕੋ ਅਨੇਕਧਾਤੁਂ ਨਾਨਾਧਾਤੁਂ ਲੋਕਂ ਜਾਨਾਤੀਤਿ? ਆਮਨ੍ਤਾ. ਹਞ੍ਚਿ ਸਾਵਕੋ ਅਨੇਕਧਾਤੁਂ ਨਾਨਾਧਾਤੁਂ ਲੋਕਂ ਜਾਨਾਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਨੇਕਧਾਤੁਂ ਨਾਨਾਧਾਤੁਂ ਲੋਕਂ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣ’’ਨ੍ਤਿ.

ਸਾਵਕੋ ਸਤ੍ਤਾਨਂ ਨਾਨਾਧਿਮੁਤ੍ਤਿਕਤਂ ਜਾਨਾਤੀਤਿ? ਆਮਨ੍ਤਾ. ਹਞ੍ਚਿ ਸਾਵਕੋ ਸਤ੍ਤਾਨਂ ਨਾਨਾਧਿਮੁਤ੍ਤਿਕਤਂ ਜਾਨਾਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਤ੍ਤਾਨਂ ਨਾਨਾਧਿਮੁਤ੍ਤਿਕਤਂ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣ’’ਨ੍ਤਿ.

ਸਾਵਕੋ ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਂ ਸਂਕਿਲੇਸਂ ਵੋਦਾਨਂ ਵੁਟ੍ਠਾਨਂ ਜਾਨਾਤੀਤਿ? ਆਮਨ੍ਤਾ. ਹਞ੍ਚਿ ਸਾਵਕੋ ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਂ ਸਂਕਿਲੇਸਂ ਵੋਦਾਨਂ ਵੁਟ੍ਠਾਨਂ ਜਾਨਾਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਂ ਸਂਕਿਲੇਸਂ ਵੋਦਾਨਂ ਵੁਟ੍ਠਾਨਂ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣ’’ਨ੍ਤਿ.

ਸਾਵਕੋ ਪੁਬ੍ਬੇਨਿਵਾਸਾਨੁਸ੍ਸਤਿਂ ਜਾਨਾਤੀਤਿ? ਆਮਨ੍ਤਾ. ਹਞ੍ਚਿ ਸਾਵਕੋ ਪੁਬ੍ਬੇਨਿਵਾਸਾਨੁਸ੍ਸਤਿਂ ਜਾਨਾਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਪੁਬ੍ਬੇਨਿਵਾਸਾਨੁਸ੍ਸਤਿ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣ’’ਨ੍ਤਿ.

ਸਾਵਕੋ ਸਤ੍ਤਾਨਂ ਚੁਤੂਪਪਾਤਂ ਜਾਨਾਤੀਤਿ? ਆਮਨ੍ਤਾ. ਹਞ੍ਚਿ ਸਾਵਕੋ ਸਤ੍ਤਾਨਂ ਚੁਤੂਪਪਾਤਂ ਜਾਨਾਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਤ੍ਤਾਨਂ ਚੁਤੂਪਪਾਤਂ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣ’’ਨ੍ਤਿ.

ਨਨੁ ਤਥਾਗਤਸ੍ਸਾਪਿ ਆਸਵਾ ਖੀਣਾ ਸਾਵਕਸ੍ਸਾਪਿ ਆਸਵਾ ਖੀਣਾਤਿ? ਆਮਨ੍ਤਾ. ਅਤ੍ਥਿ ਕਿਞ੍ਚਿ ਨਾਨਾਕਰਣਂ ਤਥਾਗਤਸ੍ਸ ਵਾ ਸਾਵਕਸ੍ਸ ਵਾ ਆਸਵਕ੍ਖਯੇਨ ਵਾ ਆਸਵਕ੍ਖਯਂ ਵਿਮੁਤ੍ਤਿਯਾ ਵਾ ਵਿਮੁਤ੍ਤੀਤਿ? ਨਤ੍ਥਿ. ਹਞ੍ਚਿ ਨਤ੍ਥਿ ਕਿਞ੍ਚਿ ਨਾਨਾਕਰਣਂ ਤਥਾਗਤਸ੍ਸ ਵਾ ਸਾਵਕਸ੍ਸ ਵਾ ਆਸਵਕ੍ਖਯੇਨ ਵਾ ਆਸਵਕ੍ਖਯਂ ਵਿਮੁਤ੍ਤਿਯਾ ਵਾ ਵਿਮੁਤ੍ਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਆਸਵਾਨਂ ਖਯੇ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣ’’ਨ੍ਤਿ.

੩੫੬. ਆਸਵਾਨਂ ਖਯੇ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਆਮਨ੍ਤਾ. ਠਾਨਾਠਾਨੇ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਆਸਵਾਨਂ ਖਯੇ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਆਮਨ੍ਤਾ. ਸਤ੍ਤਾਨਂ ਚੁਤੂਪਪਾਤੇ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਠਾਨਾਠਾਨੇ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਅਸਾਧਾਰਣਨ੍ਤਿ? ਆਮਨ੍ਤਾ. ਆਸਵਾਨਂ ਖਯੇ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਅਸਾਧਾਰਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਤ੍ਤਾਨਂ ਚੁਤੂਪਪਾਤੇ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਅਸਾਧਾਰਣਨ੍ਤਿ? ਆਮਨ੍ਤਾ. ਆਸਵਾਨਂ ਖਯੇ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਅਸਾਧਾਰਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਇਨ੍ਦ੍ਰਿਯਪਰੋਪਰਿਯਤ੍ਤਂ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਅਸਾਧਾਰਣਨ੍ਤਿ? ਆਮਨ੍ਤਾ. ਠਾਨਾਠਾਨੇ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਅਸਾਧਾਰਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ [ਅਯਮੇਤ੍ਥ ਸਾਧਾਰਣਪਕ੍ਖਂ ਸਨ੍ਧਾਯ ਪਟਿਕ੍ਖੇਪੋ (ਟੀਕਾ ਓਲੋਕੇਤਬ੍ਬਾ)] …ਪੇ….

ਇਨ੍ਦ੍ਰਿਯਪਰੋਪਰਿਯਤ੍ਤਂ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਅਸਾਧਾਰਣਨ੍ਤਿ? ਆਮਨ੍ਤਾ…ਪੇ…. ਆਸਵਾਨਂ ਖਯੇ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਅਸਾਧਾਰਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਠਾਨਾਠਾਨੇ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਆਮਨ੍ਤਾ. ਇਨ੍ਦ੍ਰਿਯਪਰੋਪਰਿਯਤ੍ਤਂ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਆਸਵਾਨਂ ਖਯੇ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਆਮਨ੍ਤਾ. ਇਨ੍ਦ੍ਰਿਯਪਰੋਪਰਿਯਤ੍ਤਂ ਯਥਾਭੂਤਂ ਞਾਣਂ ਤਥਾਗਤਬਲਂ ਸਾਵਕਸਾਧਾਰਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਬਲਕਥਾ ਨਿਟ੍ਠਿਤਾ.